លោក វ៉ាង យី Archives - Kampuchea Thmey Daily

ផ្លូវការ! ស្អែកនេះ រដ្ឋមន្ត្រីការបរទេស និងរដ្ឋមន្ត្រីការពារជាតិចិន នឹងចូលរួមកិច្ចសន្ទនាយុទ្ធសាស្ត្រ “២+២” នៅភ្នំពេញ

Ngoeul Narath — Tue, 21 Apr 2026 07:39:46 +0000

រដ្ឋមន្ត្រីក្រសួងការបរទេសចិន លោក វ៉ាង យី និងរដ្ឋមន្ត្រីក្រសួងការពារជាតិចិន លោក តុង ជុន នឹងមកបំពេញទស្សនកិច្ចការងារនៅកម្ពុជា ដើម្បីធ្វើជាសហប្រធាននៃកិច្ចប្រជុំលើកទី១ ស្ដីពីយន្តការកិច្ចសន្ទនាយុទ្ធសាស្ត្រ២+២ ជាមួយរដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ លោក ប្រាក់ សុខុន និងរដ្ឋមន្ត្រីក្រសួងការពារជាតិកម្ពុជា លោក ទៀ សីហា នៅថ្ងៃទី២២ ខែមេសា នេះ។ នេះបើតាមសេចក្ដីប្រកាសព័ត៌មានរបស់ក្រសួងការបរទេស ចេញនៅថ្ងៃទី ២១ ខែមេសា នេះ ដោយបញ្ជាក់ថា វត្តមានរបស់ឥស្សរជនជាន់ខ្ពស់របស់ចិនទាំងពីររូបមកកាន់កម្ពុជា គឺតបតាមការអញ្ជើញរបស់ឧបនាយករដ្ឋមន្ត្រី ប្រាក់ សុខុន និងឧបនាយករដ្ឋមន្ត្រី ទៀ សីហា។

ក្រសួងការបរទេសរម្លឹកថា កម្ពុជា និងចិន បានឯកភាពគ្នាបង្កើតកិច្ចសន្ទនានេះ ក្នុងអំឡុងពេលនៃដំណើរទស្សនកិច្ចផ្លូវរដ្ឋនៅកម្ពុជា ប្រធានាធិបតីចិន លោក ស៊ី ជីនពីង កាលពីខែមេសា ឆ្នាំ២០២៥ ក្នុងគោលបំណងជំរុញទំនាក់ទំនងយុទ្ធសាស្ត្រកម្រិតខ្ពស់ ធ្វើឱ្យស៊ីជម្រៅនូវទំនុកចិត្តផ្នែកនយោបាយ និងសន្តិសុខ និងភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ។ យន្តការថ្មីនេះគឺជាវេទិកា ដ៏សំខាន់មួយសម្រាប់ការផ្លាស់ប្តូរទស្សនៈលើបញ្ហាតំបន់ និងអន្តរជាតិដើម្បីផលប្រយោជន៍រួម។

បើតាមក្រសួងការបរទេស ក្នុងអំឡុងពេលស្នាក់នៅរាជធានីភ្នំពេញ រដ្ឋមន្ត្រីការបរទេស និងរដ្ឋមន្ត្រីការពារជាតិចិន ក៏នឹងចូលជួបសម្តែងការគួរសមដាច់ដោយឡែកពីគ្នា ជាមួយសម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី និងជាប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។

ក្រសួងការបរទេសអះអាងថា បន្ទាប់ពីកិច្ចសន្ទនា“២+២” លោក វ៉ាង យី ក៏នឹងបន្តបំពេញទស្សនកិច្ចផ្លូវការនៅកម្ពុជា នៅថ្ងៃទី២៣ ខែមេសា ឆ្នាំ២០២៦។ ឯកឧត្តម នឹងមានជំនួបពិភាក្សាស៊ីជម្រៅជាមួយឧបនាយករដ្ឋមន្ត្រី ប្រាក់ សុខុន ស្តីពីការជំរុញការអនុវត្តក្របខ័ណ្ឌកិច្ចសហប្រតិបត្តិការនានា ដែលមានស្រាប់ និងការរួមចំណែកដល់សន្តិភាព សន្តិសុខ ស្ថិរភាព និងការអភិវឌ្ឍក្នុង និងក្រៅតំបន់៕

ដោយ៖ ង៉ិល ណារ៉ាត់

The post ផ្លូវការ! ស្អែកនេះ រដ្ឋមន្ត្រីការបរទេស និងរដ្ឋមន្ត្រីការពារជាតិចិន នឹងចូលរួមកិច្ចសន្ទនាយុទ្ធសាស្ត្រ “២+២” នៅភ្នំពេញ appeared first on Kampuchea Thmey Daily.

លោក វ៉ាង យី៖ ជប៉ុនព្យាយាមបញ្ច្រាសប្រវត្តិសាស្ត្រ ខណៈលោកប្រាប់កូរ៉េខាងត្បូង ប្រកាន់ខ្ជាប់ចិនតែមួយ

សាង ស្រីល័ក្ខ — Fri, 02 Jan 2026 03:39:31 +0000

រដ្ឋមន្ត្រីការបរទេសចិន លោក វ៉ាង យី កាលពីថ្ងៃទី១ ខែមករា ឆ្នាំ ២០២៦ បាននិយាយថា កម្លាំងនយោបាយមួយចំនួននៅក្នុងប្រទេសជប៉ុនកំពុងព្យាយាមបញ្ច្រាសទិសដៅនៃប្រវត្តិសាស្ត្រ ខណៈលោកក៏បានប្រាប់កូរ៉េខាងត្បូងប្រកាន់ខ្ជាប់នូវអាកប្បកិរិយាទទួលខុសត្រូវចំពោះប្រវត្តិសាស្ត្រ រួមទាំងការប្រកាន់ខ្ជាប់នូវគោលការណ៍ចិនតែមួយលើតៃវ៉ាន់។

លោក Cho Hyun (ខាងឆ្វេង) និងលោក Wang Yi អនុរដ្ឋមន្ត្រីក្រសួងការបរទេសចិន (រូបថតដោយ Chosunilbo DB)

ចុះផ្សាយដោយ NHK លោក វ៉ាង បានធ្វើការកត់សម្គាល់ក្នុងអំឡុងពេលសន្ទនាតាមទូរស័ព្ទជាមួយសមភាគីកូរ៉េខាងត្បូង គឺលោក Cho Hyun កាលពីថ្ងៃពុធទី៣១ធ្នូ ឆ្នាំ២០២៥។ កិច្ចពិភាក្សានេះដែរ បានធ្វើឡើងមុនកិច្ចប្រជុំកំពូលចិន-កូរ៉េខាងត្បូង ដែលគ្រោងធ្វើឡើងនៅដើមខែមករា។

ក្រសួងការបរទេសទាំងពីរបាននិយាយថា ពួកគេយល់ព្រមធ្វើការរួមគ្នាសម្រាប់ដំណើរទស្សនកិច្ចផ្លូវរដ្ឋរបស់ប្រធានាធិបតីកូរ៉េខាងត្បូង លោក Lee Jae-myung ទៅកាន់ប្រទេសចិន ដែលនឹងចាប់ផ្តើមកាលពីថ្ងៃអាទិត្យនេះ។

ក្នុងអំឡុងពេលនៃការសន្ទនាតាមទូរស័ព្ទ លោកវ៉ាងបានកត់សម្គាល់ថា ទំនាក់ទំនងចិន-កូរ៉េខាងត្បូង បានលេចចេញពីចំណុចទាបមួយអស់រយៈកាលជាយូរណាស់មកហើយ ពេលនេះបានវិលត្រឡប់មករកផ្លូវត្រូវវិញជាមួយគ្នា។

ភាគីចិនបានដកស្រង់សម្តីរបស់លោក វ៉ាង ដែលរៀបរាប់ថា កម្លាំងនយោបាយមួយចំនួននៅក្នុងប្រទេសជប៉ុន បានដើរបញ្ច្រាសទិសដៅនៃប្រវត្តិសាស្ត្រ និងបិទបាំងឧក្រិដ្ឋកម្មឈ្លានពាន និងអាណានិគមនិយម។ លោកវ៉ាងជឿជាក់ថា កូរ៉េខាងត្បូងនឹងប្រកាន់ខ្ជាប់នូវអាកប្បកិរិយាទទួលខុសត្រូវចំពោះប្រវត្តិសាស្ត្រ និងប្រជាជន ប្រកាន់យកជំហរត្រឹមត្រូវ និងការពារយុត្តិធម៌អន្តរជាតិ រួមទាំងការប្រកាន់ខ្ជាប់នូវគោលការណ៍ចិនតែមួយលើតៃវ៉ាន់។

មន្ត្រីកូរ៉េខាងត្បូងនិយាយថា លោក Cho និងលោកវ៉ាងបានបញ្ជាក់ពីការប្តេជ្ញាចិត្តជាបន្តបន្ទាប់ ក្នុងការធានាស្ថិរភាព និងវិបុលភាពនៃតំបន់អាស៊ីឦសាន។ ប៉ុន្តែពួកគេមិនបានសំដៅទៅលើការអត្ថាធិប្បាយរបស់លោកវ៉ាងលើរង្វង់នយោបាយជប៉ុនទេ។

ដោយឡែក អ្នកវិភាគនិយាយថា ប្រទេសចិនបានរិះគន់ការកត់សម្គាល់របស់នាយករដ្ឋមន្ត្រីជប៉ុន លោកស្រី Takaichi Sanae នៅក្នុងសភាតំណាងរាស្ត្រទាក់ទងនឹងភាពអាសន្នដែលអាចកើតមាននៅតៃវ៉ាន់។ ដូច្នេះ ពួកគេសន្ធិដ្ធានថា ចិនកំពុងព្យាយាមជំរុញឲ្យកូរ៉េខាងត្បូងរក្សាជំហានជាមួយនឹងជំហររបស់ខ្លួនលើបញ្ហានេះ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

គីម ជុងអ៊ុន បញ្ជាឲ្យពន្លឿនផលិតឧបករណ៍បាញ់រ៉ុក្កែតច្រើនគ្រាប់

The post លោក វ៉ាង យី៖ ជប៉ុនព្យាយាមបញ្ច្រាសប្រវត្តិសាស្ត្រ ខណៈលោកប្រាប់កូរ៉េខាងត្បូង ប្រកាន់ខ្ជាប់ចិនតែមួយ appeared first on Kampuchea Thmey Daily.

អំណាចការទូតចិន បង្ហាញឥទ្ធិពលពិត ក្នុងជម្លោះថៃនិងកម្ពុជា

Rann Reuy — Wed, 31 Dec 2025 05:16:20 +0000

ឥទ្ធិពលរបស់មហាអំណាចចិនបានបង្ហាញភាពច្បាស់លាស់កាន់តែខ្លាំង ក្នុងដំណោះស្រាយលើជម្លោះរវាងប្រទេសថៃនិងកម្ពុជាដែលបានផ្ទុះអាវុធអស់រយៈពេលជាច្រើនខែចុងក្រោយនេះ បន្ទាប់ពីភាគីថៃមិនអាចគេចវេសក្រៅពីការបំពេញតាមការសន្យារបស់ខ្លួនក្នុងការដោះលែងយុទ្ធជនកម្ពុជាទាំង១៨រូបដែលថៃឃុំខ្លួនអស់រយៈពេល១៥៥ថ្ងៃឲ្យត្រឡប់មកកាន់មាតុប្រទេសវិញ។

ការទាមទារឲ្យដោះលែងយុទ្ធជនកម្ពុជាទាំង១៨រូបនោះ បានកើតឡើងជាបន្តបន្ទាប់ចាប់តាំងពីថ្ងៃដែលយោធាថៃបានចាប់ដោយខុសច្បាប់កាលថ្ងៃទី២៩ខែកកក្ដដា ពោលគឺជិត១០ម៉ោង ក្រោយភាគីជម្លោះអនុវត្តបទឈប់បាញ់លើកទី១កាលថ្ងៃទី២៨ ដោយចុះហត្ថលេខាដោយនាយករដ្ឋមន្ត្រីកម្ពុជានិងថៃនៅទីក្រុងកូឡាឡាំពូ ដោយមានតំណាងពីប្រទេសចិន និងសហរដ្ឋអាមេរិកធ្វើជាសាក្សី។

ប៉ុន្តែការពន្យាពេលម្តងហើយម្តងទៀតរបស់ភាគីថៃក្នុងការដោះលែងយុទ្ធជនកម្ពុជាទាំង១៨រូបនោះ បានធ្វើឲ្យអន្តរជាតិដាក់សម្ពាធកាន់តែខ្លាំងលើប្រទេសថៃឲ្យអនុវត្តកិច្ចព្រមព្រៀងដែលពួកគេបានសន្យា និងចុះហត្ថលេខា។ កិច្ចព្រមព្រៀងសន្តិភាពចុងក្រោយ បានចែងយ៉ាងច្បាស់អំពីការដោះលែងយុទ្ធជនកម្ពុជា ប៉ុន្តែភាគីថៃ បានរកលេសផ្សេងៗដើម្បីបង្កការពន្យាពេល និងរហូតផ្ទុះអាវុធជាថ្មី ដើម្បីចង់គេចវេសពីការអនុវត្តកាតព្វកិច្ចដែលខ្លួនបានចុះហត្ថលេខារួចហើយនោះ។

ការផ្ទុះអាវុធចុងក្រោយដែលថៃបានចាប់ផ្តើមកាលថ្ងៃទី៧ខែធ្នូ ដែលរដ្ឋាភិបាលថៃជាឯកតោភាគី បានយកមូលហេតុនៃការជាន់មីនរបស់ទាហានថៃនិងចោទប្រកាន់កម្ពុជាថាជាអ្នកដាក់មីនថ្មីនោះ ត្រូវបានប្រធានាធិបតីសហរដ្ឋអាមេរិក លោក ដូណាល់ ត្រាំ កាលថ្ងៃទី១៣ខែធ្នូ បានហៅហេតុការណ៍ជាន់មីនដែលថៃអះអាងចោទប្រកាន់កម្ពុជានោះ ថាជា «ឧបទ្ទវហេតុចៃដន្យ» ប៉ុណ្ណោះ។

ចាប់តាំងពីប្រធានាធិបតី ត្រាំ បានអះអាងនោះមក រដ្ឋាភិបាលថៃបានបង្ហាញការមិនពេញចិត្តជាខ្លាំង និង ប្រកាសលែងស្តាប់ការអំពាវនាវ និងការដាក់សម្ពាធពីភាគីអន្តរជាតិដើម្បីបញ្ចប់ការប្រយុទ្ធនិងងាកទៅអនុវត្តបទឈប់បាញ់ ដោយភាគីថៃបង្កើនការវាយប្រហារកាន់តែខ្លាំងឡើង និងបង្កើនការបំផ្លិចបំផ្លាញកាន់តែទូលំទូលាយ។

ប៉ុន្តែក្រោយសម្ពាធកាន់តែខ្លាំងឡើងៗ ជាពិសេសចុងក្រោយពីភាគីមហាអំណាចចិន ទើបធ្វើឲ្យថៃយល់ព្រមដោះលែងយុទ្ធជនកម្ពុជាទាំង១៨រូបជាកិច្ចការអាទិភាពបំផុត មុនឈានទៅអនុវត្តពេញលេញនូវកិច្ចព្រមព្រៀងសន្តិភាពទីក្រុងកូឡាឡាំពួដែលខ្លួនបានចុះហត្ថលេខារួចហើយ។

ខណៈដែលការផ្ទុះអាវុធកាន់តែខ្លាំងឡើងៗនៅតាមព្រំដែនរវាងកម្ពុជា និងថៃ និងគ្មានភាគីណាមួយអន្តរាគមន៍ធ្វើឲ្យថៃខ្លាចនោះ មហាអំណាចចិន បានសង្កត់ធ្ងន់ថា ខ្លួនមាន «វិធីផ្ទាល់ខ្លួន» ក្នុងការសម្រុះសម្រួលជម្លោះដ៏សាហាវនេះ។

ឈានទៅដល់ការអនុវត្តការដោះលែងយុទ្ធជនកម្ពុជាទាំង១៨រូបនៅថ្ងៃទី៣១ខែធ្នូឆ្នាំ២០២៥នេះ អ្នកការទូតកំពូលរបស់ចិន លោក វ៉ាង យី (Wang Yi) បានជួបប្រជុំត្រីភាគីចុងក្រោយកាលពីថ្ងៃទី ២៩ខែធ្នូ ដើម្បីសម្របសម្រួលភាគីជម្លោះ បន្ទាប់ពីបេសកជនចិនប្រចាំតំបន់អាស៊ី បានបំពេញការទូតចរចា (Shuttle Diplomacy) ប៉ុន្មានថ្ងៃដោយជួបផ្ទាល់មេដឹកនាំកម្ពុជានិងថៃ។

ក្រោយការជូបចរចាជាមួយបេសកជនចិន លោក Deng Xijun ជំនួបចរចាលេខាធិការដ្ឋាននៃគណៈកម្មការព្រំដែនទូទៅ បានកើតឡើងភ្លាមៗកាលថ្ងៃទី២៤ ដើម្បីចរចាកិច្ចព្រមព្រៀងថ្មីបើកផ្លូវឲ្យមានបទឈប់បាញ់ថ្មីមួយកាលថ្ងៃទី២៧ខែធ្នូ ហើយការជួបប្រជុំរដ្ឋមន្ត្រីការបរទេសចិន ដាច់ដោយឡែកជាមួយរដ្ឋមន្ត្រីការបរទេសកម្ពុជា ឯកឧត្តម ប្រាក់ សុខុន និង រដ្ឋមន្ត្រីការប្រទេសថៃ លោក Sihasak Phuangketkeow ធ្វើឡើងនៅថ្ងៃទី១៨ខែធ្នូ។

ភាគីទាំង៣ បានជួបប្រជុំទល់មុខគ្នានៅថ្ងៃទី២៩ខែធ្នូ និងបានព្រមព្រៀងគ្នាលើលក្ខខណ្ឌមួយចំនួនឈានទៅអនុវត្តកិច្ចព្រមព្រៀងពេញលេញ។ ក្រោយកិច្ចប្រជុំនេះភ្លាម ភាគីថៃបានចាប់ផ្តើមអនុវត្តអ្វីដែលខ្លួនបានសន្យានៅមុខមហាអំណាចចិន ដោយមិនអាចប្រកែកបាន។

សារព័ត៌មាន Straits Times បានលើកឡើងថា ទីក្រុងប៉េកាំងហាក់ដូចជាមិនគ្រាន់តែត្រៀមខ្លួនរួចជាស្រេចសម្រាប់ចំណែកនៃគុណសម្បត្តិ (credits) របស់ខ្លួនក្នុងនាមជាអ្នកបង្កើតសន្តិភាពប៉ុណ្ណោះទេ ប៉ុន្តែថែមទាំងចង់អះអាងថា វិធីសាស្រ្តការទូតដ៏រឹងមាំ និងគន្លឹះទាបរបស់ខ្លួនតាមពិត គឺប្រសើរជាងរដ្ឋាភិបាលក្រុងវ៉ាស៊ីនតោន។

តាមការចេញផ្សាយរបស់សារព័ត៌មាន China Daily រដ្ឋមន្ត្រីការបរទេសចិន លោក វ៉ាង យី បានប្រាប់សមភាគីថៃ លោក Sihasak Phuangketkeow នៅក្នុងកិច្ចប្រជុំទ្វេភាគីដាច់ដោយឡែកមួយកាលពីថ្ងៃទី 28ខែធ្នូ នៅខេត្តយូណានភាគនិរតីនៃប្រទេសចិនថា «កិច្ចខិតខំប្រឹងប្រែងរបស់ប្រទេសចិនក្នុងការលើកកម្ពស់សន្តិភាព និងការសន្ទនាមិនដែលដាក់សម្ពាធលើអ្នកដទៃ ឬហួសព្រំដែនរបស់ខ្លួនឡើយ»។

ភាពទន់ភ្លន់របស់ភាគីចិននេះ អាចធ្វើឲ្យថៃគប់ចិត្តក្នុងរបត់នយោបាយសកលចុងក្រោយដែលថៃមិនអាចគេចវេស៕

រ៉ាន់ រើយ

The post អំណាចការទូតចិន បង្ហាញឥទ្ធិពលពិត ក្នុងជម្លោះថៃនិងកម្ពុជា appeared first on Kampuchea Thmey Daily.

ចិនប្រកាសជំនួយមនុស្សធម៌ជិត៣លានដុល្លារដល់កម្ពុជា និងត្រៀមជួយតាមដានបទឈប់បាញ់

Rann Reuy — Sun, 28 Dec 2025 13:15:23 +0000

ប្រទេសចិនប្រកាសផ្តល់ជំនួយមនុស្សធម៌មានតម្លៃ២.៨៥ លានដុល្លារ ដល់ប្រទេសកម្ពុជាសម្រាប់ជួយដល់ជនភៀសសឹក ដោយសាររងផលប៉ះពាល់ពីការបាញ់ផ្លោងរបស់កងទ័ពថៃចូលទឹកដីរបស់ប្រទេសកម្ពុជាតាំងពីថ្ងៃទី៧ខែធ្នូឆ្នាំ ២០២៥។

ការប្រកាសផ្តល់ជំនួយមនុស្សធម៌នេះ បានកើតឡើងក្នុងអំឡុងពេលដែលមានជំនួបទ្វេភាគីរវាង រដ្ឋមន្ត្រីការបរទេសចិន លោក វ៉ាង យី (Wang Yi) និងឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិនៃប្រទេសកម្ពុជា នៅទីក្រុង Yuxi ខេត្តយូណាន (Yunnan) ភាគនិរតីនៃប្រទេសចិន កាលពីថ្ងៃអាទិត្យ។

យោងសេចក្តីរាយការណ៍របស់សារព័ត៌មានចិននៅល្ងាចថ្ងៃអាទិត្យនេះ លោក វ៉ាង យី ដែលជាសមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិន បាននិយាយថា ប្រទេសចិនមានឆន្ទៈក្នុងការផ្តល់ការផ្គត់ផ្គង់មនុស្សធម៌ដល់ប្រទេសកម្ពុជាសម្រាប់ការតាំងទីលំនៅរបស់ជនភៀសខ្លួននៅតាមតំបន់ព្រំដែន។

រដ្ឋមន្ត្រីការបរទេសចិន កំពុងរៀបចំជំនួបដាច់ដោយឡែករវាងរដ្ឋមន្ត្រីការបរទេសកម្ពុជា និង ថៃ បន្ទាប់ពីភាគីតាំងពីរ បានចុះហត្ថលេខាលើសេចក្តីថ្លែងការណ៍រួមដែលយល់ព្រមឲ្យមានបទឈប់បាញ់កាលពីថ្ងៃទី២៧ខែធ្នូ ហើយជំនួបជាមួយរដ្ឋមន្ត្រីការបរទេសកម្ពុជាធ្វើឡើងនៅថ្ងៃទី២៨ខែធ្នូ ខណៈជំនួបជាមួយរដ្ឋមន្ត្រីការបរទេសថៃ នឹងធ្វើឡើងនៅថ្ងៃទី២៩ខែធ្នូ។

សេចក្តីរាយការណ៍របស់សារព័ត៌មានចិន China Daily បានឲ្យដឹងថា លោក វ៉ាង បានលើកឡើងថា ប្រទេសចិនបានតាមដានស្ថានការណ៍តានតឹងនៅតាមព្រំដែនកម្ពុជា-ថៃយ៉ាងដិតដល់ ហើយនៅតែប្តេជ្ញាចិត្តក្នុងការសម្របសម្រួលសន្តិភាពតាមរយៈការចរចា ដោយបន្ថែមថា ប្រទេសចិនអបអរសាទរភាគីទាំងពីរចំពោះកិច្ចព្រមព្រៀងឈប់បាញ់។

មិនខុសពីបណ្តាប្រទេសជាច្រើនទៀតក្នុងពិភពលោក លោក វ៉ាង បានសង្កត់ធ្ងន់ថា បទឈប់បាញ់នេះគឺជាការចាប់ផ្តើមនៃការកសាងសន្តិភាព ដោយ លោក វ៉ា បានអំពាវនាវឱ្យភាគីទាំងពីរដំណើរការជាដំណាក់កាល និងវិធានការមួយ ដើម្បីលើកកម្ពស់បទឈប់បាញ់ដ៏ទូលំទូលាយ និងយូរអង្វែង ស្តារទំនាក់ទំនងធម្មតា កសាងទំនុកចិត្តគ្នាទៅវិញទៅមក សម្រេចបានការផ្លាស់ប្តូរទំនាក់ទំនងទ្វេភាគី និងរក្សាសន្តិភាព និងស្ថិរភាពក្នុងតំបន់។

នៅក្នុងកិច្ចពិភាក្សាទ្វេភាគីនោះដែរ លោក វ៉ា បាននិយាយថា ប្រទេសចិនគាំទ្រអាស៊ានក្នុងការដើរតួនាទីត្រឹមត្រូវរបស់ខ្លួន និងត្រៀមខ្លួនជាស្រេចក្នុងការផ្តល់ជំនួយដល់បេសកកម្មសង្កេតការណ៍អាស៊ានក្នុងការត្រួតពិនិត្យបទឈប់បាញ់។

លោកបានបន្ថែមថា ប្រទេសចិនក៏សង្ឃឹមថាកម្ពុជានឹងបន្តពង្រឹងការការពារពលរដ្ឋចិន និងគម្រោងនានានៅក្នុងប្រទេស។

The post ចិនប្រកាសជំនួយមនុស្សធម៌ជិត៣លានដុល្លារដល់កម្ពុជា និងត្រៀមជួយតាមដានបទឈប់បាញ់ appeared first on Kampuchea Thmey Daily.

កម្ពុជា និងចិន អះអាងជាថ្មីពីមិត្តភាពដែកថែបរវាងប្រទេសទាំងពីរ ដែលមិនអាចបំបែកបាន

Thoeun Vansong — Fri, 19 Dec 2025 07:52:29 +0000

កម្ពុជា និងចិន បន្តអះអាងពីមិត្តភាពដែកថែបនៅគ្រប់កាលៈទេសៈរវាងប្រទេសទាំងពីរ ដែលមិនអាចបំបែកបានឡើយនូវចំណងគ្រឹះដ៏រឹងមាំនេះ។ ការអះអាងនេះ ធ្វើឡើងដោយរដ្ឋមន្ត្រីការបរទេសនៃប្រទេសទាំងពីរ គឺលោក ប្រាក់ សុខុន និងលោក វ៉ាង យី ក្នុងជំនួបសន្ទនាតាមទូរសព្ទ កាលពីរសៀលថ្ងៃទី១៨ ខែធ្នូ ឆ្នាំ២០២៥។

បើតាមក្រសួងការបរទេសកម្ពុជា រដ្ឋមន្ត្រីការបរទេសទាំងពីរ បានបញ្ជាក់សារជាថ្មីអំពីការប្តេជ្ញាចិត្តឥតងាករេចំពោះទំនាក់ទំនងមិត្តភាពដែកថែបរវាងកម្ពុជា និងចិន ហើយបានឯកភាពពង្រឹងថែមទៀតនូវភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ ជាមួយនឹងការលើកកម្ពស់ការកសាងសហគមន៍វាសនារួមកម្ពុជា-ចិនគ្រប់រដូវកាល ក្នុងយុគសម័យថ្មី។

ការអះអាងអំពីចំណងទាក់ទងដ៏រឹងមាំកម្ពុជា និងចិន ត្រូវបានគេមើលឃើញថា ធ្វើឡើងក្នុងពេលដែលកម្ពុជាកំពុងតែប៉ះទង្គិចដោយកម្លាំងប្រដាប់អាវុធជាមួយនឹងប្រទេសថៃ ដោយយោធាថៃបានបើកការវាយប្រហារជាថ្មីមកលើកម្ពុជា ដែលកម្ពុជាហៅការវាយប្រហាររបស់យោធាថៃ ថា ជាអំពើឈ្លានពានលើដែនអធិបតេយ្យជាតិខ្លួន។

ជុំវិញបញ្ហាជម្លោះកម្ពុជា និងថៃនេះ លោក ប្រាក់ សុខុន និងលោក វ៉ាង យី ក៏បានជជែកគ្នាលើការវិវឌ្ឍថ្មីៗជុំវិញជម្លោះប្រដាប់អាវុធនៅតាមបណ្ដោយព្រំដែនកម្ពុជា និងថៃ ដែលកំពុងបន្តកើតមានពេលនេះផងដែរ។ លោក វ៉ាង យី រដ្ឋមន្ត្រីការបរទេសចិន បានបញ្ជាក់ជំហររបស់ចិន ដែលតែងតែគាំទ្រឱ្យមានការសន្ទនាដោយសន្តិវិធី និងរក្សាជំហរដ៏យុត្តិធម៌ និងមិនលំអៀង ក៏ដូចជាគាំទ្រដល់កិច្ចខិតខំប្រឹងប្រែងសម្របសម្រួលរបស់អាស៊ាន។

បើតាមអ្នកនាំពាក្យក្រសួងការបរទេសចិន លោក Guo Jiakun តាមរយៈនោះ លោក វ៉ាង យី បញ្ជាក់ថា ក្រសួងការបរទេសចិន បានបញ្ជូនបេសកជនពិសេសមួយរូបទទួលបន្ទុកកិច្ចការអាស៊ី ទៅកម្ពុជា និងថៃ សម្រាប់ការចរចាការទូតជាមួយភាគីទាំងសងខាង ដោយចិននឹងបន្តធ្វើជាស្ពាន ដើម្បីសម្របសម្រួលដល់ការស្តារសន្តិភាពរវាងប្រទេសទាំងពីរឡើងវិញ៕

ដោយ៖ ធឿន វ៉ាន់សុង

The post កម្ពុជា និងចិន អះអាងជាថ្មីពីមិត្តភាពដែកថែបរវាងប្រទេសទាំងពីរ ដែលមិនអាចបំបែកបាន appeared first on Kampuchea Thmey Daily.

លោក វ៉ាង យី ទៅទស្សនកិច្ចសមាជិកណាតូ៣ប្រទេស ចំពេលត្រាំអំពាវនាវឲ្យរួមគ្នាដំឡើងពន្ធ

Rann Reuy — Sun, 14 Sep 2025 09:17:07 +0000

ប្រមុខការទូតចិន លោក វ៉ាង យី (Wang Yi) បានធ្វើដំណើរបំពេញទស្សនកិច្ចនៅតំបន់អឺរ៉ុប ហើយនៅថ្ងៃអាទិត្យនេះបានទៅដល់ប្រទេសស្លូវេនី ដែលជាសមាជិកសហភាពអឺរ៉ុប និងជាសមាជិកអង្គការណាតូ ចំពេលដែលប្រធានាធិបតីសហរដ្ឋអាមេរិក លោក ដូណាល់ ត្រាំ បានអំពាវនាវឲ្យប្រទេសសមាជិកណាតូរួមគ្នាជាមួយខ្លួនក្នុងការដំឡើងពន្ធលើប្រទេសចិន ដើម្បីដាក់សម្ពាធឲ្យបញ្ចប់ការទិញប្រេងពីរុស្ស៊ី។

រដ្ឋមន្ត្រីការបរទេសចិន លោក វ៉ាង យី បានទៅដល់ប្រទេសស្លូវេនីបន្ទាប់ពីបញ្ចប់ទស្សនកិច្ចនៅប្រទេសអូទ្រីស ហើយនឹងដំណើរទៅកាន់ប្រទេសប៉ូឡូញ ក្នុងដំណើរទៅកាន់តំបន់អឺរ៉ុបខាងកើតរយៈពេលប្រាំថ្ងៃដែលចាប់ផ្តើមថ្ងៃសុក្រ។

ក្នុងដំណើរទៅកាន់ប្រទេសស្លូវេនី ប្រមុខការទូតចិនបានជួបពិភាក្សាជាមួយ ប្រមុខដឹកនាំប្រទេសស្លូវេនី រួមមាន ប្រធានាធិបតី លោកស្រី Natasa Pirc Musar នាយករដ្ឋមន្ត្រីស្លូវេនី លោក Robert Golob និង រដ្ឋមន្ត្រីការបរទេសស្លូវេនី លោកស្រី Tanja Fajon នៅទីក្រុង Ljubljana នៃប្រទេសស្លូវេនី។

សារព័ត៌មានចិន បានផ្សព្វផ្សាយយ៉ាងព្រោងព្រាតអំពីការប្តេជ្ញាចិត្តរឹតចំណងមិត្តភាពនៃប្រទេសទាំងពីរ ដែលបានចាប់ផ្តើមកាលពីជាង៣០ឆ្នាំមុន។ ប្រទេសចិនបានដើរតួនាទីកាន់តែសំខាន់ក្នុងការលើកកម្ពស់ពហុភាគីនិយមក្នុងបរិបទនៃសង្គ្រាមដ៏តានតឹងនៅតំបន់អឺរ៉ុបខាងកើតរវាងរុស្ស៊ីនិងអ៊ុយក្រែនដែលមានមហាអំណាចអឺរ៉ុបនៅពីក្រោយនោះ។

តាមការចេញផ្សាយរបស់សារព័ត៌មានចិន China Daily លោក វ៉ាង យី បាននិយាយថា៖«សង្គ្រាមមិនអាចដោះស្រាយបញ្ហាបានទេ ខណៈដែលទណ្ឌកម្មនឹងធ្វើឱ្យពួកគេស្មុគស្មាញ»។

លោករដ្ឋមន្ត្រី បានសង្កត់ធ្ងន់ថា ប្រទេសចិនមិនចូលរួមក្នុង ឬផែនការធ្វើសង្រ្គាមទេ ដោយបន្ថែមថា ផ្ទុយទៅវិញ ទីក្រុងប៉េកាំងធ្វើការដើម្បីលើកកម្ពស់ដំណោះស្រាយនយោបាយចំពោះបញ្ហាចំណុចក្តៅជាសកលតាមរយៈការសន្ទនា។

លោក Wang បាននិយាយថា ប្រទេសចិនគឺជាប្រទេសដ៏សំខាន់មួយដែលមានទំនួលខុសត្រូវ ដែលមានកំណត់ត្រាល្អបំផុតលើបញ្ហាសន្តិភាព និងសន្តិសុខ។

ប្រធានាធិបតីសហរដ្ឋអាមេរិក លោក ដូណាល់ ត្រាំ កាលថ្ងៃសៅរ៍ បានចេញនូវសេចក្តីថ្លែងការណ៍មួយដោយអំពាវនាវឲ្យសមាជិកនៃអង្គការណាតូរួមគ្នាដំឡើងពន្ធគយលើប្រទេសចិនពី៥០ភាគរយទៅ១០០ភាគរយដើម្បីដាក់សម្ពាធចិនឈប់ឲ្យទិញប្រេងពីប្រទេសរុស្ស៊ី ដែលលោកជឿថា ជាសម្ពាធឲ្យរុស្ស៊ីបញ្ចប់សង្គ្រាមនៅអ៊ុយក្រែន៕

រ៉ាន់ រើយ

The post លោក វ៉ាង យី ទៅទស្សនកិច្ចសមាជិកណាតូ៣ប្រទេស ចំពេលត្រាំអំពាវនាវឲ្យរួមគ្នាដំឡើងពន្ធ appeared first on Kampuchea Thmey Daily.

លោក ប្រាក់ សុខុន ជួបរដ្ឋមន្រ្តីការបរទេសចិន និយាយពីការរឹតចំណងទាក់ទងជាមួយគ្នា

Thoeun Vansong — Thu, 14 Aug 2025 07:45:12 +0000

រដ្ឋមន្ត្រីការបរទេសកម្ពុជា លោក ប្រាក់ សុខុន នាព្រឹកថ្ងៃទី១៤ ខែសីហា ឆ្នាំ២០២៥នេះ បានជួបជជែកគ្នាជាមួយលោក វ៉ាង យី រដ្ឋមន្ត្រីការបរទេសចិន អំពីការរឹតចំណងទាក់ទង និងកិច្ចសហប្រតិបត្តិការក្នុងក្របខ័ណ្ឌទ្វេភាគី និងពហុភាគីឱ្យកាន់ខ្លាំងក្លាបន្ថែមទៀត។

យោងខ្លឹមសារចុះផ្សាយដោយក្រសួងការបរទេសកម្ពុជា, លោក ប្រាក់ សុខុន និងលោក វ៉ាង យី បានបង្ហាញនូវការប្តេជ្ញាចិត្តរបស់កម្ពុជា និងចិន ក្នុងការពង្រឹងកិច្ចសហប្រតិបត្តិការជាមួយបណ្តាប្រទេសទាំងអស់ក្នុងតំបន់មេគង្គ ដើម្បីកសាងអនាគតប្រកបដោយសន្តិភាព វិបុលភាព និងចីរភាព ដោយធ្វើការរួមគ្នាតាមរយៈក្របខ័ណ្ឌកិច្ចសហប្រតិបត្តិការមេគង្គ-ឡានឆាង។

ចំពោះកិច្ចសហប្រតិបត្តិការក្នុងក្របខ័ណ្ឌទ្វេភាគី ប្រមុខការទូតទាំងពីរ បានផ្លាស់ប្ដូរយោបល់គ្នាអំពីមធ្យោបាយក្នុងការធ្វើឱ្យទំនាក់ទំនងមិត្តភាពដែកថែបរវាងប្រទេសទាំងពីរកាន់តែស៊ីជម្រៅថែមទៀត។

ជាការចាប់អារម្មណ៍ ក្រៅពីជំនួបទ្វេភាគីនេះ រដ្ឋមន្ត្រីការបរទេសកម្ពុជា លោក ប្រាក់ សុខុន ក៏បានជួបពិភាក្សាគ្នាជាមួយលោក ម៉ារីត សាងៀមផុង្ស រដ្ឋមន្ត្រីការបរទេសថៃ ក្នុងថ្ងៃដដែលនោះផងដែរ ក្រោមការសម្របសម្រួលរៀបចំឡើងដោយរដ្ឋមន្រ្តីការបរទេសចិន លោក វ៉ាង យី តែម្ដង។

ជំនួបត្រីភាគីនេះ ត្រូវបានគេមើលឃើញថា បានរៀបចំឡើងចំពេលដែលកម្ពុជា និងថៃ បាននិងកំពុងមានជម្លោះព្រំដែនដ៏ក្ដៅគគុកជាមួយគ្នា។ ខណៈចិន ជាប្រទេសសម្របសម្រួលមួយក្នុងជម្លោះនៃប្រទេសទាំងពីរ រហូតបង្កើតឱ្យមានបទឈប់បាញ់ នាពេលថ្មីៗនេះ។

បើតាមការចុះផ្សាយរបស់សារព័ត៌មានថៃ Thai Enquirer ជំនួបត្រីភាគីនេះ ផ្តោតសំខាន់លើការប្តេជ្ញាពង្រឹងទំនាក់ទំនងការទូត និងសេដ្ឋកិច្ចរវាងកម្ពុជា-ថៃ ក៏ដូចជាការលើកស្ទួយស្ថិរភាពនៅក្នុងតំបន់ និងការរួមគ្នាដោះស្រាយបញ្ហាប្រឈមនានាដែលកំពុងកើតឡើងនាពេលនេះ។

គួរជម្រាបថា ជំនួបទាំងពីរខាងលើ បានធ្វើឡើងមុនកិច្ចប្រជុំរដ្ឋមន្ត្រីការបរទេសនៃកិច្ចសហប្រតិបត្តិការមេគង្គ-ឡានឆាង លើកទី១០ ដែលនឹងប្រព្រឹត្តទៅចាប់ពីថ្ងៃទី១៤ ដល់ថ្ងៃទី១៥ ខែសីហា ឆ្នាំ២០២៥ នៅទីក្រុងអាននីង ខេត្តយូណាន៕

ដោយ៖ ធឿន វ៉ាន់សុង

The post លោក ប្រាក់ សុខុន ជួបរដ្ឋមន្រ្តីការបរទេសចិន និយាយពីការរឹតចំណងទាក់ទងជាមួយគ្នា appeared first on Kampuchea Thmey Daily.

ចិន ចេញមុខនិយាយអំពីដំណោះស្រាយ អាមេរិក-រុស្ស៊ី ចំពោះសង្គ្រាមនៅអ៊ុយក្រែន

Sok Sovann — Fri, 21 Feb 2025 08:31:04 +0000

ទីបំផុតទីក្រុងប៉េកាំង បានចេញមុខនិយាយហើយ ពាក់ព័ន្ធដំណោះស្រាយរវាងសហរដ្ឋអាមេរិកនិងរុស្ស៊ី ចំពោះសង្គ្រាមនៅអ៊ុយក្រែន ដោយរដ្ឋមន្ត្រីការបរទេសចិន លោក វ៉ាង យី បានបង្ហាញការគាំទ្រយ៉ាងពេញទំហឹងចំពោះគោលនយោបាយរបស់លោក ដូណាល់ ត្រាំ ហើយថែមទាំងសន្យាផងដែរថា ចិន នឹងរួមចំណែកក្នុងន័យស្ថាបនាដល់កិច្ចចរចាសន្តិភាព។

រដ្ឋមន្ត្រីការបរទេសចិន Wang Yi (រូបថត៖ Reuters)

ក្រោយបានជួបជាមួយសមភាគីរុស្ស៊ី Sergei Lavrov នៅខាងក្រៅកិច្ចប្រជុំរដ្ឋមន្ត្រីការបរទេស G20 ក្នុងទីក្រុង Johannesburg នៃប្រទេសអាហ្វ្រិកខាងត្បូង កាលពីថ្ងៃព្រហស្បតិ៍ទី២០ខែកុម្ភៈឆ្នាំ២០២៥ លោក វ៉ាង ថ្លែងថា «ចិនគាំទ្ររាល់កិច្ចខិតខំប្រឹងប្រែងដើម្បីសន្តិភាព រួមទាំងការឯកភាពគ្នានាពេលថ្មីៗនេះដែលសម្រេចបានដោយសហរដ្ឋអាមេរិក និងរុស្ស៊ីផងដែរ ហើយសង្ឃឹមថា ភាគីពាក់ព័ន្ធអាចស្វែងរកដំណោះស្រាយប្រកបដោយនិរន្តរភាព និងយូរអង្វែង ដែលគិតគូរពីកង្វល់របស់គ្នាទៅវិញទៅមក។

លើសពីនេះ លោកបន្តថា «ចិនមានឆន្ទៈបន្តដើរតួនាទីស្ថាបនាក្នុងការដោះស្រាយវិបត្តិនយោបាយស្របតាមតម្រូវការរបស់ភាគីពាក់ព័ន្ធ និងគិតគូរពីកង្វល់របស់សហគមន៍អន្តរជាតិ ជាពិសេសបណ្តាប្រទេសនៃពិភពលោកខាងត្បូង»។

រដ្ឋមន្ត្រីការបរទេសរុស្ស៊ី Sergei Lavrov (ឆ្វេង) ចាប់ដៃសមភាគីចិន Wang Yi (រូបថត៖ Reuters)

លោក វ៉ាង លើកឡើងបែបនេះ បន្ទាប់ពីមន្ត្រីអាមេរិកនិងរុស្ស៊ី ជួបប្រជុំគ្នាក្នុងប្រទេសអារ៉ាប៊ីសាអូឌីត ដើម្បីពិភាក្សាអំពីការបញ្ចប់ជម្លោះនៅអ៊ុយក្រែន ទាំងគ្មានវត្តមានទីក្រុងកៀវ ទើបធ្វើឲ្យលោក ហ្សេលេនស្គី មិនពេញចិត្ត ហើយថែមទាំងបញ្ចេញវោហារស័ព្ទវាយប្រហារលោក ត្រាំ ថែមទៀតផង។

ហេតុដូច្នេះហើយ ទើបកិច្ចពិភាក្សានៅរាជធានីរីយ៉ាដនោះ ធ្វើឲ្យគេបារម្ភថា ទីក្រុងវ៉ាស៊ីនតោននិងមូស្គូអាចរៀបចំកិច្ចព្រមព្រៀងសន្តិភាព ជាមួយលក្ខខណ្ឌណាមួយដែលអំណោយផលដល់ភាគីរុស្ស៊ី៕

អត្ថបទ៖ សុខ សុវណ្ណ

ចុចអាន៖ ត្រាំ៖ ទំនាក់ទំនងអាមេរិក-ចិនគឺល្អខ្លាំង និងអាចធ្វើកិច្ចព្រៀមព្រៀងពាណិជ្ជកម្មថ្មី

The post ចិន ចេញមុខនិយាយអំពីដំណោះស្រាយ អាមេរិក-រុស្ស៊ី ចំពោះសង្គ្រាមនៅអ៊ុយក្រែន appeared first on Kampuchea Thmey Daily.