លោក សាយ សៀរ៉ា Archives - Kampuchea Thmey Daily

សាយ សៀរ៉ា ទម្លាយរឿងថតហើយមិនបានលុយ និងផ្តាំអ្នកសិល្បៈជំនាន់ក្រោយ ត្រូវធ្វើកិច្ចសន្យាឲ្យច្បាស់មុនថត

Chan Sotheavy — Mon, 30 Sep 2024 02:10:17 +0000

លោក សាយ សៀរ៉ា តារាសម្តែងប្រុសមួយរូប ដែលមហាជនតែងបានឃើញពីវត្តមានរបស់លោក ក្នុងភាពយន្តភាគជាច្រើន របស់ស្ថានីយទូរទស្សន៍ ក៏ដូចជាសកម្មភាពសង្គមមួយចំនួននោះ បានចេញមកទម្លាយបទពិសោធទាក់ទិននឹងការថតរបស់លោក ខណៈក្រោយបំពេញការងារហើយ បែរជាមិនទទួលបានប្រាក់ពលកម្ម។

តាមរយៈគណនីហ្វេសប៊ុកផ្ទាល់ខ្លួន លោកបានផ្តាំទៅសិល្បករសិល្បការិនីជំនាន់ក្រោយថា មុននឹងថតរឿង ត្រូវធ្វើកិច្ចសន្យានិយាយរឿងលុយឱ្យបានច្បាស់លាស់ ជៀសវាងជួបរឿងដូចលោក ព្រោះក្រោយបានថតរឿងភាគសម្រាប់ចាក់បញ្ចាំងតាមទូរទស្សន៍ រឿងខ្លះថតចប់ហើយមិនបើកលុយជូនក៏មាន។ លោកថា “ខ្ញុំថតចប់ពិបាកបើកលុយណាស់ ខ្លះថតរាប់ឆ្នាំហើយមិនបើកឲ្យទេ តេមិនលើកទូរស័ព្ទ ឆាតមិនតប”។

ជុំវិញការលើកឡើងនេះ លោកបញ្ជាក់ដែរថា ថ្ងៃណាមួយនឹងផ្សព្វផ្សាយឲ្យសាធារណបានឃើញមុខ អ្នកដែលធ្វើទង្វើដាក់លោកជាក់ជាមិនខាន។ លោកបន្ថែមថា “មនុស្សខ្ញុំស្លូតទេ ខ្ញុំថតរឿងជិះឡានចាក់សាំងឡាន មិនមែនសុំសាំងគេទេ ខោអាវទិញគេ មិនមែនគេឲ្យទេ ថតទាំងជិតទាំងឆ្ងាយ”។

ទន្ទឹមនេះ លោកក៏ស្នើដល់អ្នកដែលទាក់ទងលោកដើម្បីថត និងមិនបានប្រគល់លុយជូនលោកក្រោយថតចប់ ដោយស្នើសុំថា “គួរតែយល់ខ្ញុំផង ទុក្ខពេលឲ្យមួយរយៈ ខ្ញុំត្រូវការលុយទិញបាយ ១ថ្ងៃ ៣ពេលហូប មើលក្មួយៗបង់ទឹកបង់ភ្លើង មើលថែឪពុកម្តាយចាស់ៗ ខ្ញុំក៏ជំពាក់គេដែរ គួរយល់ផង”។

ទាក់ទិននឹងរឿងនេះដែរ លោកផ្តាំផ្ញើទៅសិល្បករសិល្បការិនី ទាំងជើងចាស់ និងជំនាន់ក្រោយដែរថា បើសិនជាជួបករណីដូចជាលោក ត្រូវងើបឡើងកុំលាក់ខ្លាចខ្មាសគេ ហើយត្រូវហ៊ានឲ្យគេដឹង៕

The post សាយ សៀរ៉ា ទម្លាយរឿងថតហើយមិនបានលុយ និងផ្តាំអ្នកសិល្បៈជំនាន់ក្រោយ ត្រូវធ្វើកិច្ចសន្យាឲ្យច្បាស់មុនថត appeared first on Kampuchea Thmey Daily.

សាយ សៀរ៉ា បញ្ជាក់អាការជំងឺ ក្រោយចេញទៅព្យាបាលនៅក្រៅប្រទេស

អ៊ិន ពិសី — Wed, 22 Mar 2023 01:43:04 +0000

តារាសម្ដែងប្រុសលោក សាយ សៀរ៉ា ថ្មីៗនេះ បានធ្លាក់ខ្លួនឈឺចេញទៅព្យាបាលនៅប្រទេសថៃ ដោយសារជំងឺវៀចមាត់ និងភ្នែក បង្កការភ្ញាក់ផ្អើលដល់អ្នកគាំទ្រ ខណៈខ្លះទៀតបានបង្ហាញក្ដីព្រួយបារម្ភផងនោះ។

បន្ទាប់ពីចេញទៅព្យាបាលរយៈពេលប្រមាណ ១ សប្ដាហ៍ លោក សាយ សៀរ៉ា បានប្រាប់ឲ្យដឹងតាមបណ្ដាញសង្គមថា ពេលនេះអាការជំងឺរបស់លោកបានធូរស្រាលប្រមាណ ៩០ ភាគរយហើយ ដោយក្នុងនោះ ភ្នែក និងមាត់របស់លោក បានវិលមកសភាពដើមវិញ។ លោកថា ៣ ថ្ងៃទៀត ពេទ្យឲ្យលោកវិលមកស្រុកខ្មែរវិញហើយ។

តារាសម្ដែងលោក សាយ សៀរ៉ា បន្តទៀតថា “ខ្ញុំឈឺរលាកសរសៃផ្ទៃមុខទី ៧ ធ្វើឲ្យវៀចមុខ វៀចភ្នែក វៀចមាត់ តែពេលនេះក៏បានធូរច្រើនហើយ”។ លោកថា ពេលដែលចូលពេទ្យដំបូង គឺវៀចភ្នែក និងវៀចមាត់ ហើយពេលបរិភោគទឹក និងបាយ គឺហៀរចេញតាមមាត់ តែក្រោយការព្យាបាលនៅមន្ទីរពេទ្យថៃ បានវិលមកសភាពដើមប្រមាណ ៩០ ភាគរយវិញហើយ។

ជាមួយគ្នានេះដែរ លោក សាយ សៀរ៉ា ក៏បានថ្លែងអំណរគុណដល់សិល្បករ-សិល្បការិនីរួមអាជីព ព្រមទាំងអ្នកគាំទ្រនៅក្នុង និងក្រៅប្រទេស ដែលបានសម្ដែងក្ដីព្រួយបារម្ភ និងឆាតសួរសុខទុក្ខ ហើយផ្ញើសារជូនពរផងដែរ៕

អត្ថបទ ៖ ចាន់រ៉ា

The post សាយ សៀរ៉ា បញ្ជាក់អាការជំងឺ ក្រោយចេញទៅព្យាបាលនៅក្រៅប្រទេស appeared first on Kampuchea Thmey Daily.

សាយ សៀរ៉ា ត្អូញត្អែរចង់ឈប់ពីសិល្បៈ ខណៈការងារត្រូវគេមើលរំលង

Sorn Phanith — Fri, 30 Sep 2022 09:17:16 +0000

តារាសម្តែងប្រុសលោក សាយ សៀរ៉ា ស្របពេលដែលការងារសិល្បៈបច្ចុប្បន្នហាក់មានភាព ស្ងប់ស្ងាត់ខ្លាំង ស្ទើររកលុយចាយគ្មាននោះ ស្រាប់តែលោកចេញមកត្អូញត្អែរហើយពោលពាក្យយ៉ាងកម្សត់ដោយចង់លាឈប់ពីវិថីមួយនេះ។

ជាមួយគ្នានៃការប្រកាសយ៉ាងភ្ញាក់ផ្អើលពីសំណាក់តារាសម្តែងលោក សាយ សៀរ៉ា ខាងលើនេះលោកក៏បានទទូចស្នើសុំដល់បណ្តាផលិតករ និងអ្នកដឹកនាំរឿងព្រមទាំងផលិតកម្មក្នុងស្រុកមេត្តាផ្តល់ឱកាសចំពោះតារាសម្តែងប្រុស-ស្រីជើងចាស់ ដើម្បីមានលទ្ធភាពបង្ហាញវត្តមានសម្តែងរកប្រាក់កម្រៃចិញ្ចឹមជីវិតផងដែរ។

លោក សាយ សៀរ៉ា បានប្រកាសពីទស្សនៈរបស់ខ្លួនថា ថ្ងៃនេះសប្បាយចិត្តបានទទួលការងារថតស្ពត ១ រយៈពេល ១ ខែ បានមានការងារ ១ មើលទៅកាងារសិល្បៈខ្ញុំប្រហែលជាឆ្ងាយពីគ្នាហើយ បើខ្ញុំឈប់បងប្អូនគិតមិចវិញ។ បើយើងនៅរង់ចាំការងារសិល្បៈទៀតដាច់បាយហើយ បើមានប្រពន្ធវិញ គឺចិញ្ចឹមគេមិនរស់ទេ។ លោកថា អ្នកសិល្បៈខ្លះគេមានការងារធ្វើមានលុយចាយ អ្នកសិល្បៈខ្លះអត់មានការងារធ្វើអត់មានលុយចាយទេដូចជារូបខ្ញុំ ពេលខ្លះរកតែ ១ ម៉ឺនរៀលនៅក្នុងខ្លួនក៏គ្មានដែរ។

តារាសម្តែងលោក សាយ សៀរ៉ា បន្ថែមថា បើសិនជាលោកប្រាប់គេថា អត់លុយ គឺគេមិនជឿទេ គេថាយើងជាអ្នកសិល្បៈមានលុយច្រើន ដូច្នេះសូមបងប្អូនអ្នកដឹកនាំរឿងជួយៗមើលតួចាស់ៗផងមិនថាលោកឬបងប្អូនម៉ែៗឪៗទេ អ្នកដែលគាត់នៅថតនៅស្រលាញ់សិល្បៈឲ្យកាងារគាត់ធ្វើផង។ បើមិនហៅទេពួកគាត់បាត់មុខអស់ហើយពីសិល្បៈ មានអ្នកសិល្បៈច្រើនដែលគាត់គេអត់ហៅថត។

គេតក់សម្គាល់ថា នេះមិនមែនទើបជាលើកទី ១ នោះទេ ដែលតារាចម្រៀងរូបសង្ហាលោក សាយសៀរ៉ា បានចេញមុខត្អូញត្អែរនឹងទទូចស្ទើរដល់ផលិតករព្រមទាំងអ្នកដឹកនាំរឿងផ្តល់ឱកាសចំពោះ តារាសម្តែងជើងចាស់ ពោលគឺមានអ្នកសិល្បៈមួយចំនួនរួចមកហើយដែលធ្លាប់ចេញមកនិយាយពាក់ព័ន្ធបញ្ហានេះដូចគ្នាផងដែរ៕

អត្ថបទ៖ ចាន់រ៉ា

The post សាយ សៀរ៉ា ត្អូញត្អែរចង់ឈប់ពីសិល្បៈ ខណៈការងារត្រូវគេមើលរំលង appeared first on Kampuchea Thmey Daily.

ចិត្តបុណ្យណាស់ ! សាយ សៀរ៉ា ចូលរួមថវិកានិងស៊ីម៉ង់ត៍ កសាងព្រះវិហារនៅវត្តប្រាសាទ

Kang Tola — Thu, 23 Dec 2021 10:30:45 +0000

ភ្នំពេញ ៖ តារាសម្តែងប្រុសសង្ហាលោក សាយ សៀរ៉ា កន្លងមកត្រូវបានទស្សនិកជនកត់សម្គាល់ថាលោកក៏ជាតារាខ្មែរមួយដួង ដែលតែងលេចមុខច្រើនតាមរយៈសកម្មភាពមនុស្សធម៌ជួយសង្គមនានាផងដែរ។

ស្របពេលជាមួយគ្នានេះដែរ លោកសាយ សៀរ៉ា ក៏ត្រូវបានអ្នកគាំទ្រនិងមិត្តភក្តិសិល្បៈមួយចំនួនបានលួចសរសើរចំពោះទឹកចិត្តដ៏ល្អរបស់លោក ដែលបានចែករំលែងនូវក្តីស្រលាញ់ដល់អ្នកជុំវិញផងដែរ ពិសេសទៅលើក្រុមមនុស្សដែលជួបការលំបាកដូច ជា,ក្មេងកំព្រា ,ចាស់ជរា និងពលរដ្ឋជួបការខ្វះខាតជាដើម។

ដោយឡែកបើចាប់អារម្មណ៍ផងដែរថ្មីៗមុននេះបន្តិចលោក សាយ សៀរ៉ា បានបង្ហាញនូវទង្វើដ៏គួរឲ្យសរសើរថែមទៀត គឺលោកបានចូលរួមថវិកាផ្ទាល់ខ្លួននិងស៊ីម៉ង់ត៍ ដើម្បីទុកកសាងព្រះវិហារនៅវត្តប្រាសាទ។ សាយ សៀរ៉ា បានឲ្យដឹងតាមរយៈបណ្តាញសង្គមថា ថ្ងៃនេះខ្ញុំបាទបានយកស៊ីម៉ង់ត៍១តោននិងថវិកា៥០ម៉ឺនរៀលមកប្រគេនលោកតានៅវត្តប្រាសាទសម្រាប់កសាងព្រះវិហារនៅក្នុងវត្តជូនបុណ្យផងពុកម៉ែបងប្អូន។

លោក សាយ សៀរ៉ា បាននិយាយបន្ថែមទៀតថា អរគុណច្រើនពុកម៉ែបងប្អូនបើចាំពេលយើងមានបាន បានធ្វើបុណ្យដូចជាពិបាកបន្តិចហើយ មានតិចធ្វើតិចទៅកុំចាំមានបានអីបានធ្វើដូចជាមិនស្រួលទេ។ គេឃើញអ្នកគាំទ្របានបង្ហាញការសរសើរនិងលើកទឹកចិត្តឲ្យ សាយ សៀរ៉ា បន្តធ្វើសកម្មភាពបែបនេះទៀតផងដែរ៕

ដោយ ៖ ចាន់រ៉ា

The post ចិត្តបុណ្យណាស់ ! សាយ សៀរ៉ា ចូលរួមថវិកានិងស៊ីម៉ង់ត៍ កសាងព្រះវិហារនៅវត្តប្រាសាទ appeared first on Kampuchea Thmey Daily.

លោក សាយ សៀរ៉ា Archives - Kampuchea Thmey Daily

សាយ សៀរ៉ា ទម្លាយរឿងថតហើយមិនបានលុយ និងផ្តាំអ្នកសិល្បៈជំនាន់ក្រោយ ត្រូវធ្វើកិច្ចសន្យាឲ្យច្បាស់មុនថត

សាយ សៀរ៉ា បញ្ជាក់អាការជំងឺ ក្រោយចេញទៅព្យាបាលនៅក្រៅប្រទេស

សាយ សៀរ៉ា ត្អូញត្អែរចង់ឈប់ពីសិល្បៈ ខណៈការងារត្រូវគេមើលរំលង

ចិត្តបុណ្យ​ណាស់ ! សាយ សៀ​រ៉ា ចូលរួម​ថវិកា​និង​ស៊ី​ម៉​ង់​ត៍ ក​សាង​ព្រះវិហារ​នៅ​វត្ត​ប្រាសាទ

ចិត្តបុណ្យណាស់ ! សាយ សៀរ៉ា ចូលរួមថវិកានិងស៊ីម៉ង់ត៍ កសាងព្រះវិហារនៅវត្តប្រាសាទ