លោក សួង ហេង រដ្ឋលេខាធិការ និងជានាយកគម្រោង កាលពីថ្ងៃ​​ទី១ ខែមិថុនា ម្សិលមិញ​នេះ​បានដឹកនាំ​មន្រ្តីជំនាញ​​ក្រសួង​សាធាណការ និងដឹកជញ្ចូន ចុះទៅ​ពិនិត្យតាមដានការអនុវត្តគម្រោងស្ថាបនាស្ពានឆ្លងទន្លេបាសាក់ (ចាក់អង្រែក្រោម-ព្រែកប្រា) ដោយមានការចូលរួមពី​មន្រ្តីបច្ចេកទេស​ក្រុមហ៊ុនសាងសង់ផងដែរ។

​ក្នុងឱកាស​ចុះទៅពិនិត្យការដ្ឋាន​សាងសង់​ មន្រ្តីក្រសួងសាធារណការនិងដឹកជញ្ជូន បានបង្ហាញ​លទ្ធផល​ការងារ​ដែល​​សម្រេចបានរួមមាន ៖ ១). ផ្នែកគ្រឹះស្ពាន​សម្រេច ១០០% ២). រចនាសម្ព័ន្ធក្រោមស្ពានសម្រេចបាន ១០០ % ៣). រចនាសម្ព័ន្ធលើនៃស្ពានតភ្ជាប់សម្រេចបាន១០០% ៤). រចនាសម្ព័ន្ធលើនៃស្ពានមេសម្រេចបាន ៦៧,៣០% (ធ្នឹមប្រអប់ខាងស្តាំដៃចំនួន ៤៩ កង់ សម្រេចបាន ៣៦ កង់ និង ធ្នឹមប្រអប់ខាងឆ្វេងដៃចំនួន ៤៩ កង់ សម្រេចបាន ៣០ កង់) និង ៥).បណ្តាញផ្លូវសម្រេចបាន ៤៨,៤ % (តភ្ជាប់ប្រវែង ៨០៤,៣០ម. សម្រេចបាន ៥០% និងផ្លូវបង្វែរទិស ( Ram) ប្រវែង ១,៥៤ម. សម្រេចបាន ៤៦%)​

បន្ថែមពីនេះ ការ​ដឹក​ធ្នឹមស្ពានពីត្រើយខាងលិចទៅត្រើយខាងកើតចំនួន ៩៦ ដើមក៏​បានបញ្ចប់ និងកំពុងចាក់បេតុង​ភ្ជាប់មុខតំណ​បន្តទៀត។

ទន្ទឹមលទ្ធផល​ការ​ងារសាងសង់សម្រេ​ចបាន​តាមផែនការ​ មន្រ្តី​ជំនាញ​ក្រសួងសាធារណការ និងដឹកជញ្ជូន បាន​វាយតម្លៃខ្ពង់ចំពោះក្រុមហ៊ុនសំណង់សៀងហៃ ដែលបានអនុវត្តការងារសាងសង់​ដោយគោរពបទដ្ឋានបច្ចេកទេស និងកិច្ចសន្យា​បានយ៉ាងត្រឹមត្រូវ។

ជាមួយគ្នា​នេះ មន្រ្តី​គ្រប់គ្រងគម្រោងក៏​បាន​ណែនាំ​ឲ្យ​ក្រុម​បច្ចេកទេសបន្តពង្រឹងសុវត្ថិភាពការងារ។ ដោយហេតុថារដូវវស្សាទឹកទន្លេចាប់ផ្តើម​ឡើង ត្រូវ​បំពាក់ពោងសុវត្ថិភាព​បន្ថែមទៀតនៅ​លើទឹកដើម្បីសុវត្ថិភាពអ្នកប្រើប្រាស់មធ្យោបាយ​ដឹកជញ្ជូនតាមផ្លូវទឹក។

ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) គឺ​ជាស្ពានទី ៧ ដែលត្រូវបានសាងសង់​តាមបណ្តោយ​ដងទន្លេបាសាក់ បន្ទាប់ពីស្ពានដែលបាន​សាង​សង់រួចចំនួន ៦ រួមមាន៖ ស្ពានឆ្លងកោះពេជ្រកោះនរា ស្ពានព្រះមុនីវង្សទាំង ២ ស្ពានសំរោង ស្ពានកោះអន្លង់ចិន និងស្ពានកោះធំ។

​ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) មានប្រវែងសរុប ១.៦៥០ ម៉ែត្រ ​ក្នុងនោះ​​កា​រស្ថាបនា​ស្ពាន​មាន​ប្រវែង ៨៤៥,៧០ ម៉ែត្រ ទទឹងផ្លូវ ២៧ ម៉ែត្រ និង​​ផ្លូវតភ្ជាប់ក្បាលស្ពានប្រវែង ៨០៤,៣០ម៉ែត្រ ទទឹងផ្លូវ ២៧ ម៉ែត្រ។ ការ​ស្ថាបនា​ស្ពាននេះ ចំណាយ​​ថវិកាសាងសង់​អស់​​ប្រមាណ ៦០ លានដុល្លារអាមេរិក និង​ប្រើប្រាស់​រយៈ​ពេល​សាងសង់ចំនួន​ ៤២ ខែ ដោយកម្ចី​សម្បទានពីរដ្ឋាភិបាល​ចិន។

លោក ផន រឹម ​​មន្រ្តី​អ្នកនាំពាក្យក្រសួងសាធារណការ និងដឹកជញ្ជូនបានបញ្ជាក់ថា ​ក្រោយ​​ស្ពានឆ្លង​កាត់​ទន្លេ​បាសាក់ (ចាក់អង្រែក្រោម-ព្រែកប្រា) ស្ថាបនា​រួច​រាល់ នឹង​ជួយកាត់​បន្ថយការកក​ស្ទះចរាចរណ៍​លើស្ពានព្រះមុនីវង្សឆ្លងកាត់ទន្លេបាសាក់ភ្ជាប់​ទៅ​ផ្លូវជាតិលេខ ១ រួមទាំងជួយ​លើកកម្ពស់​ធ្វើឱ្យប្រសើរឡើង​ប្រព័ន្ធ​ដឹកជញ្ជូននៅតំបន់នោះបន្ថែមទៀត។

នៅក្នុងក្របខ័ណ្ឌនៃស្ថានភាពភូមិសាស្ត្រ ​ការ​សាងសង់​ស្ពាន​ចាក់អង្រែក្រោម-ព្រែកប្រា ​មានភាពប្រទាក់ក្រឡាគ្នាជាមួយ​បណ្តាញ​ផ្លូវជាតិនិងខ្សែផ្លូវសំខាន់ៗ ដោយ​នៅត្រើយខាងលិចភ្ជាប់ជាមួយមហាវិថី ឈុន គង់ ដែលកំពុង​សាងសង់​ភ្ជាប់​ទៅមហាវិថីសម្តេច ហ៊ុន សែន (ផ្លូវ ៦០ ម៉ែត្រ) រួម​ទាំង​តភ្ជាប់​ទៅ​ផ្លូវជាតិលេខ ២ និង​ត្រើយខាងកើតតភ្ជាប់ទៅផ្លូវជាតិលេខ ១ និង​ភ្ជាប់ជាមួយផ្លូវ​លេខ​ ១១០ ក្នុងទិសដៅចូលមក​រាជធានីភ្នំពេញ ឬចេញទៅខេត្តកណ្តាល ឆ្ពោះទៅកាន់តំបន់ភូមិសាស្ត្រពាក់ព័ន្ធផ្សេងទៀត៕

The post ស្ពានឆ្លងទន្លេបាសាក់ (ចាក់អង្រែក្រោម-ព្រែកប្រា) សម្រេចបាន ៧៣% ជំរុញ​​បញ្ចប់តាមផែនការ​​រយៈពេល ៤២ ខែ​ appeared first on Kampuchea Thmey Daily.

កិច្ចប្រជុំ​ដែល​ដឹកនាំ​ដោយ​លោក សួង ហេង រដ្ឋលេខាធិការក្រសួងសាធារណការ និងដឹកជញ្ជូន ​ដើម្បី​ពិនិត្យ​កំណត់ខ្សែអ័ក្ស និង​គំនូស​ប្លង់​បច្ចេកទេស​នៃ​គម្រោង​ផ្លូវ​ត​ភ្ជាប់ពី​គម្រោង​ស្ពាន​ឆ្លងកាត់​ទន្លេបាសាក់ (ចាក់អង្រែក្រោម-ព្រែកប្រា) ផ្នែក​ខាងកើត​ទៅផ្លូវជាតិ​លេខ១ ស្ថិត​នៅ​សង្កាត់​ព្រែកប្រា ខណ្ឌ​ច្បារអំពៅ រាជធានីភ្នំពេញ ធ្វើ​យ៉ាងណា​ឱ្យខ្សែផ្លូវថ្មីនេះ​មាន​ផល​ប៉ះពាល់តិច ស្របតាមលក្ខណៈបច្ចេកទេស និងមានផលចំណេញខ្ពស់។

បើតាម​កិច្ច​ប្រជុំ​បាន​សម្រេច​ឯកភាពគ្នាលើជម្រើសខ្សែផ្លូវ ១ ក្នុងចំណោម​ជម្រើស ២ ខ្សែ​ផ្លូវ ដែល​ក្រុមហ៊ុន​បាន​សិក្សាដោយ​ផ្អែក​លើ​ទិដ្ឋភាព​បច្ចេកទេស សេដ្ឋកិច្ច និង​នយោបាយ។

ប្រភព​ពី​​មន្រ្តីក្រសួង​សាធារណការ​និងដឹកជញ្ជូនបានបញ្ជាក់ថា គម្រោងផ្លូវតភ្ជាប់ផ្នែកខាងកើត នៃគម្រោងស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) ទៅ​ផ្លូវជាតិ​លេខ ១ បាន​សិក្សា​លើ​ផ្លូវ​ចំនួន ២ ខ្សែជាជម្រើស ក្នុងនោះជម្រើស​​ផ្លូវទី១ មាន​ប្រវែង​ ១,៥៩៥គ.ម និងជម្រើសផ្លូវទី២ មាន​ប្រវែង ១,៤៩០គ.ម។ ខ្សែផ្លូវទាំងពីរនេះ ត​ភ្ជាប់ពីស្ពាន​នៅ​ក្នុង​ភូមិសាស្រ្ត​សង្កាត់ព្រែកប្រា ខណ្ឌច្បារអំពៅ ទៅកាន់ផ្លូវជាតិលេខ១ សង្កាត់វាលស្បូវ ខណ្ឌ​ច្បារអំពៅ​៕

The post មាន​ជម្រើស​ផ្លូវ​ ២ ខ្សែ សាងសង់​ត​ភ្ជាប់​ពី​ស្ពាន​ព្រែកប្រា​ឆ្លង​កាត់​ទន្លេ​បាសាក់​ មក​ផ្លូវ​ជាតិ​លេខ ១ appeared first on Kampuchea Thmey Daily.

ទីតាំងប្រារព្ធពិធីបើកការដ្ឋានសាងសង់ស្ពានឆ្លងកាត់ទន្លេបាសាក់ នឹងរៀបចំនៅត្រើយខាងលិច​នៃគម្រោងស្ពាន ដែលស្ថិតនៅក្នុងភូមិព្រែកតាឡុង សង្កាត់ចាក់អង្រែក្រោម ខណ្ឌមានជ័យរាជធានីភ្នំពេញ។

ក្នុងពេល​​ចុះទៅ​ពិនិត្យទីតាំងការដ្ឋាន ​មន្រ្តី​ក្រសួង​សាធារណការ​និង​ដឹកជញ្ជូនក៏​បាន​ណែនាំ​ឱ្យក្រុមហ៊ុន Shanghai Construction Group Co.,Ltd. (SCG) ដែលជា​អ្នកអនុវត្តគម្រោង ធ្វើការឈូសឆាយសម្រួលផ្លូវចូលពីផ្លូវ ៦០ ម៉ែត្រ ទៅកាន់ទីតាំងពិធី​ដែលនឹងក្លាយជាទីតាំងសម្រាប់​សាងសង់​រង្វង់មូលនៃគម្រោងនាពេលអនាគត៕

The post មន្រ្តី​ជំនាញ​ចុះពិនិត្យទីតាំងត្រៀមបើកការដ្ឋាន​សាងសង់​ស្ពានឆ្លងទន្លេ​នៅ​ចាក់អង្រែក្រោម appeared first on Kampuchea Thmey Daily.