លោក សៀម ភ្លុក Archives - Kampuchea Thmey Daily

អ្នកនាំពាក្យក្រសួងមហាផ្ទៃ ៖ សំណុំរឿងលោក សៀម ភ្លុក កំពុងស្ថិតក្នុងនីតិវិធីរបស់តុលាការ

sopheak khoun — Mon, 25 Jul 2022 06:12:17 +0000

អ្នកនាំពាក្យក្រសួងមហាផ្ទៃ លោកនាយឧត្តមសេនីយ៍ ខៀវ សុភ័គ បានមានប្រសាសន៍ប្រាប់កម្ពុជាថ្មី ថា សំណុំរឿងក្លែងបន្លំឯកសារ ចុះបញ្ជីគណបក្សបេះដូងជាតិ របស់លោក សៀម ភ្លុក កំពុងស្ថិតក្នុងនីតិវិធីរបស់តុលាការ។ ដូច្នេះសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ មិនអាចជ្រៀតជ្រែកក្នុងដំណើរការនីតិវិធីរបស់តុលាការ នោះទេ។

ការលើកឡើងរបស់លោកនាយឧត្តមសេនីយ៍ ខៀវ សុភ័គ បានធ្វើឡើងបន្ទាប់ពីលោក សៀម ភ្លុក បានសរសេរលិខិតមួយ ស្នើសុំឲ្យសម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ទម្លាក់ចោលការចោទប្រកាន់លើរូបលោក។

លោកនាយឧត្តមសេនីយ៍ ខៀវ សុភ័គ មានប្រសាសន៍នៅថ្ងៃទី ២៥ ខែកក្កដានេះថា «ករណីនេះ កំពុងតែស្ថិតនៅក្នុងនីតិវិធីរបស់តុលាការ។ ដូច្នេះសម្ដេចក្រឡាហោម ស ខេង ពុំមានសមត្ថភាព ឬឥទ្ធិពលអ្វីទៅអន្តរាគមន៍ ឬជ្រៀតជ្រែកក្នុងដំណើរការនីតិវិធី របស់តុលាការនោះទេ។ ទី២ ដោយពុំទាន់មានសាលក្រមស្ថាពរ ក្នុងន័យនេះ ក៏មិនទាន់អាចស្នើសុំព្រះរាជក្រឹត្យលើកលែងទោសពីព្រះមហាក្សត្របានដែរ។ ទី៣ បើសាម៉ីខ្លួនគាត់នៅតែប្រកាន់ថា គាត់មិនបានប្រព្រឹត្ត មិនមានកំហុស ក៏មិនដឹងលើកលែងទោសឲ្យគាត់យ៉ាងម៉េចដែរ បើឥឡូវនេះយើងចាប់គាត់ដាក់ពន្ធនាគារ កំពុងដំណើរការក្តីនៅតុលាការតាមនីតិវិធី…គាត់គួររកមេធាវីការពារគាត់តាមនីតិវិធីរបស់តុលាការ»។

គួររំលឹកថា ថ្មីៗនេះ លោក សៀម ភ្លុក អតីតស្ថាបនិកគណបក្សបេះដូងជាតិ បានសរសេរលិខិតមួយជូនសម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ដោយស្នើសុំឲ្យទម្លាក់ចោលការចោទប្រកាន់លើរូបលោក។ លោក សៀម ភ្លុក បានលើកឡើងថា កាលពីកំឡុងពាក់កណ្ដាលឆ្នាំ ២០២១ លោក និងបញ្ញវន្តខ្មែរមួយចំនួន មានគោលបំណងបង្កើតគណបក្សនយោបាយមួយ ដែលមានឈ្មោះថា “គណបក្សបេះដូងជាតិ” ដើម្បីចូលរួមកសាងកម្ពុជា ឲ្យបានជាប្រទេសប្រជាធិបតេយ្យ សេរី ពហុបក្ស និងជានីតិរដ្ឋ មានការគោរពច្បាប់ គោរពសិទ្ធិមនុស្ស។ ក្នុងនាមតំណាងស្ថាបនិក លោកបានរៀបចំលក្ខន្តិកៈ និងស្នាមមេដៃប្រជាពលរដ្ឋ ដែលគាំទ្រគណបក្សដាក់ជូនក្រសួងមហាផ្ទៃ ដើម្បីចុះបញ្ជីគណបក្សបេះដូងជាតិ។

ក្រោយពីទទួលបានឯកសារអត្តសញ្ញាណ និងស្នាមមេដៃប្រជាពលរដ្ឋហើយ ក្រសួងមហាផ្ទៃ បានធ្វើការស្រាវជ្រាវលើឯកសារអត្តសញ្ញាណ និងស្នាមមេដៃទាំងនោះ រកឃើញថា មានការផ្តិតមេដៃជំនួស មានការក្លែងបន្លំអត្តសញ្ញាណ និងការផ្តិតមេដៃ ធ្វើឲ្យខូចគុណភាព។

លោកបញ្ជាក់ក្នុងលិខិតនោះថា លោកមិនបានក្លែងបន្លំឯកសារ ឬស្នាមេដៃប្រជាពលរដ្ឋទេ ហើយលោកក៏មិនមានចេតនាក្លែងបន្លំឯកសារ ឬស្នាមេដៃប្រជាពលរដ្ឋនោះដែរ។ ក្នុងករណីមានការក្លែងបន្លំមែន គឺជាកំហុសដោយអចេតនា ខ្ជីខ្ជា មិនមែនជាចេតនាក្នុងការប្រព្រឹត្តបទល្មើលទេ។ បើតាមលោក សៀម ភ្លុក ការបដិសេធចុះបញ្ជីគណបក្សបេះដូងជាតិ គឺជាទណ្ឌកម្មសមល្មមសម្រាប់គណបក្សបេះដូងជាតិហើយ៕

អត្ថបទ៖ កោះកែវ

The post អ្នកនាំពាក្យក្រសួងមហាផ្ទៃ ៖ សំណុំរឿងលោក សៀម ភ្លុក កំពុងស្ថិតក្នុងនីតិវិធីរបស់តុលាការ appeared first on Kampuchea Thmey Daily.

សមត្ថកិច្ចមិនទាន់បាននាំខ្លួនលោក សៀម ភ្លុក ចូលតុលាការនៅឡើយទេ ខណៈមានព័ត៌មានថា លោកកំពុងភៀសខ្លួន

sopheak khoun — Tue, 19 Apr 2022 04:35:56 +0000

សមត្ថកិច្ចមិនទាន់បាននាំខ្លួនលោក សៀម ភ្លុក អតីតស្ថាបនិកគណបក្សបេះដូងជាតិ ដែលត្រូវបានចៅក្រមសាលាដំបូងរាជធានីភ្នំពេញ ចេញដីកាបង្គាប់ឲ្យនាំខ្លួនឲ្យបានមុនថ្ងៃទី ២៥ ខែមេសា ឆ្នាំ ២០២២នៅឡើយទេ ខណៈលេចលឺព័ត៌មានពីខាងមេធាវីថា លោក សៀម ភ្លុក កំពុងតែភៀសខ្លួនស្នាក់នៅកន្លែងសុវត្ថិភាពមួយរយៈ។

កាលពីថ្ងៃទី ៤ ខែមេសាកន្លងទៅនេះ លោក សៀម ភ្លុក អតីតស្ថាបនិកគណបក្សបេះដូងជាតិ ត្រូវបានចៅក្រមសាលាដំបូងរាជធានីភ្នំពេញ ចេញដីកាបង្គាប់ឲ្យនាំខ្លួន ពាក់ព័ន្ធនឹងករណីក្លែងបន្លំ និងបទប្រើប្រាស់លិខិតក្លែង។

នៅក្នុងដីកាបង្គាប់ឲ្យនាំខ្លួន របស់ចៅក្រមស៊ើបសួរសាលាដំបូងរាជធានីភ្នំពេញ លិ សុខា បានឲ្យដឹងថា អតីតស្ថាបនិកគណបក្សបេះដូងជាតិ លោក សៀម ភ្លុក ត្រូវបានចោទប្រកាន់ ២បទល្មើស រួមមាន៖ បទក្លែងបន្លំ និងបទប្រើប្រាស់លិខិតក្លែង ប្រព្រឹត្តនៅរាជធានីភ្នំពេញ កាលពីអំឡុងឆ្នាំ ២០២១ ដែលបទល្មើសដែលមានចែង និងឲ្យផ្តន្ទាទោសតាមមាត្រា ៦២៦, មាត្រា ៦២៧ និងមាត្រា ៦២៨ នៃក្រមព្រហ្មទណ្ឌ។

នៅក្នុងដីកាដដែល បានបញ្ជាក់ថា ដើម្បីធានាដល់ការស៊ើបសួរឲ្យបានពេញលេញ គប្បីសម្រេចនាំខ្លួនឈ្មោះ សៀម ភ្លុក មកចំពោះមុខចៅក្រមស៊ើបសួរ ដើម្បីបំភ្លឺការពិត។ ហេតុដូច្នេះសម្រេច៖ ១. ឲ្យនាំខ្លួនឈ្មោះ សៀម ភ្លុក ភេទប្រុស ដែលមានអត្តសញ្ញាណខាងលើនេះ។ ២. បង្គាប់មកកងកម្លាំងសាធារណៈឲ្យនាំខ្លួនជនត្រូវចោទខាងលើនេះ មកប្រគល់ជូនសាលាដំបូងរាជធានីភ្នំពេញ ឲ្យបានមុនថ្ងៃទី ២៥ ខែមេសា ឆ្នាំ ២០២២ ជាកំហិត ដើម្បីចាត់ការតាមច្បាប់។

ប្រភពព័ត៌មានពីសមត្ថកិច្ចរាជធានីភ្នំពេញ បានឲ្យដឹងនៅថ្ងៃទី ១៩ ខែមេសានេះថា សមត្ថកិច្ចមិនទាន់ឃាត់ខ្លួនលោក សៀម ភ្លុក បាននៅឡើយទេ គិតត្រឹមព្រឹកថ្ងៃអង្គារនេះ។ ទោះជាបែបណាក៏ដោយ លោកវរសេនីយ៍ឯក សាន សុខសីហា អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ បានបញ្ជាក់ថា «មន្ត្រីអនុវត្តច្បាប់ បើមានដីកា គឺត្រូវតែអនុវត្តតាមច្បាប់»។

លោក សៀម ភ្លុក មានទីកន្លែងកំណើតនៅភូមិ ៤ ឃុំកោះសូទិន ស្រុកកោះសូទិន ខេត្តកំពង់ចាម។ លោកមានអាសយដ្ឋានបច្ចុប្បន្ន ស្នាក់នៅផ្ទះលេខ ៩២E1 ផ្លូវលេខ ១៩៣ ភូមិ ៤ សង្កាត់ទួលស្វាយព្រៃទី ១ ខណ្ឌបឹងកេងកង រាជធានីភ្នំពេញ។ នៅក្នុងដីកា របស់ចៅក្រមសាលាដំបូងរាជធានីភ្នំពេញ កាលពីថ្ងៃទី ៤ ខែមេសា បានបញ្ជាក់ថា សមត្ថកិច្ច បានបញ្ជូនដីកាកោះទៅដល់អាសយដ្ឋានរបស់ជនត្រូវចោទ តែទីតាំងនោះត្រូវបានបិទតាំងពីឆ្នាំ ២០២១ ហើយមិនអាចទាក់ទងទៅជនត្រូវចោទបានឡើយ។

សូមជម្រាបថា ក្រសួងមហាផ្ទៃ បានបដិសេធចំពោះសំណើស្នើសុំចុះបញ្ជី របស់គណបក្សបេះដូងជាតិ ក្នុងបញ្ជីគណ បក្សនយោបាយ នៅក្រសួងមហាផ្ទៃ។ ការបដិសេធនេះ បានធ្វើឡើងបន្ទាប់ពីក្រសួងមហាផ្ទៃ បានរកឃើញថា ការផ្តិតស្នាមមេដៃរបស់សមាជិក ដើម្បីគាំទ្រក្នុងការសុំចុះបញ្ជី មានចេតនាទុច្ចរិត ដោយមានការផ្តិតស្នាមមេដៃជំនួស ការក្លែងបន្លំអត្តសញ្ញាណបុគ្គល និងការផ្ដិតធ្វើឲ្យខូចគុណភាព ដើម្បីបង្កើនបរិមាណចំនួនសមាជិក។

លិខិតរបស់សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដែលផ្ញើជូនលោក សៀម ភ្លុក តំណាងស្ថាបនិកគណបក្សបេះដូងជាតិ ចុះថ្ងៃទី ១៦ ខែវិច្ឆិកា ឆ្នាំ ២០២១ បានបញ្ជាក់ថា ផ្អែកតាមបទប្បញ្ញត្តិនៃច្បាប់ ស្តីពី គណបក្សនយោបាយ ក្រសួងមហាផ្ទៃ សម្រេចបដិសេធការសុំចុះបញ្ជីរបស់ «គណបក្សបេះដូងជាតិ» ដោយសារការផ្តិតស្នាមមេដៃ របស់សមាជិកគណបក្សបេះដូងជាតិ ដើម្បីគាំទ្រក្នុងការសុំចុះបញ្ជីមានចេតនាទុច្ចរិត ដោយមានការផ្តិតស្នាមមេដៃជំនួស ការក្លែងបន្លំអត្តសញ្ញាណបុគ្គល និងការផ្ដិតធ្វើឲ្យខូចគុណភាព ដើម្បីបង្កើនបរិមាណចំនួនសមាជិក ព្រមទាំងខ្លឹមសារប្រការមួយចំនួននៃលក្ខន្តិកៈគណបក្ស ផ្ទុយនឹងបទប្បញ្ញត្តិនៃច្បាប់ ស្តីពី គណបក្សនយោបាយផងដែរ។

ជាមួយគ្នានេះ តុលាការក៏បានចេញដីកាកោះហៅលោក សៀម ភ្លុក តំណាងស្ថាបនិកគណបក្សបេះដូងជាតិ ឲ្យចូលខ្លួនទៅកាន់អយ្យការអមសាលាដំបូងរាជធានីភ្នំពេញ កាលពីថ្ងៃទី ២២ ខែមីនា ឆ្នាំ ២០២២ ដើម្បីសាកសួរពីដំណើររឿងនេះ។ លោក សៀម ភ្លុក កាលពីថ្ងៃទី ២១ ខែមីនា ឆ្នាំ ២០២២កន្លងទៅនេះ បានប្រកាសចូលរួមជីវភាពនយោបាយ ជាមួយគណបក្សភ្លើងទៀន៕

អត្ថបទ៖ ឃួន សុភ័ក្រ

The post សមត្ថកិច្ចមិនទាន់បាននាំខ្លួនលោក សៀម ភ្លុក ចូលតុលាការនៅឡើយទេ ខណៈមានព័ត៌មានថា លោកកំពុងភៀសខ្លួន appeared first on Kampuchea Thmey Daily.

លោក សៀម ភ្លុក អតីតស្ថាបនិកគណបក្សបេះដូងជាតិ ត្រូវតុលាការចេញដីកាបង្គាប់ឲ្យនាំខ្លួន

sopheak khoun — Fri, 08 Apr 2022 07:34:54 +0000

លោក សៀម ភ្លុក អតីតស្ថាបនិកគណបក្សបេះដូងជាតិ ត្រូវបានចៅក្រមសាលាដំបូងរាជធានីភ្នំពេញ ចេញដីកាបង្គាប់ឲ្យនាំខ្លួនឲ្យបានមុនថ្ងៃទី ២៥ ខែមេសា ឆ្នាំ ២០២២ជាកំហិត ពាក់ព័ន្ធនឹងករណីក្លែងបន្លំ និងបទប្រើប្រាស់លិខិតក្លែង។

នៅក្នុងដីកាបង្គាប់ឲ្យនាំខ្លួន របស់ចៅក្រមស៊ើបសួរសាលាដំបូងរាជធានីភ្នំពេញ លិ សុខា ដែលត្រូវបានផ្សព្វផ្សាយនៅថ្ងៃទី ៨ ខែមេសានេះ បានឲ្យដឹងថា អតីតស្ថាបនិកគណបក្សបេះដូងជាតិ លោក សៀម ភ្លុក ត្រូវបានចោទប្រកាន់ ២បទល្មើស រួមមាន៖ បទក្លែងបន្លំ និងបទប្រើប្រាស់លិខិតក្លែង ប្រព្រឹត្តនៅរាជធានីភ្នំពេញ កាលពីអំឡុងឆ្នាំ ២០២១ ដែលបទល្មើស ដែលមានចែង និងឲ្យផ្តន្ទាទោសតាមមាត្រា ៦២៦, មាត្រា ៦២៧ និងមាត្រា ៦២៨ នៃក្រមព្រហ្មទណ្ឌ។

សូមជម្រាបថា ក្រសួងមហាផ្ទៃ បានបដិសេធចំពោះសំណើស្នើសុំចុះបញ្ជី របស់គណបក្សបេះដូងជាតិ ក្នុងបញ្ជីគណបក្សនយោបាយ នៅក្រសួងមហាផ្ទៃ។ ការបដិសេធនេះ បានធ្វើឡើងបន្ទាប់ពីក្រសួងមហាផ្ទៃ បានរកឃើញថា ការផ្តិតស្នាមមេដៃរបស់សមាជិក ដើម្បីគាំទ្រក្នុងការសុំចុះបញ្ជី មានចេតនាទុច្ចរិត ដោយមានការផ្តិតស្នាមមេដៃជំនួស ការក្លែងបន្លំអត្តសញ្ញាណបុគ្គល និងការផ្ដិតធ្វើឲ្យខូចគុណភាព ដើម្បីបង្កើនបរិមាណចំនួនសមាជិក។

អត្ថបទ៖ ឃួន សុភ័ក្រ

The post លោក សៀម ភ្លុក អតីតស្ថាបនិកគណបក្សបេះដូងជាតិ ត្រូវតុលាការចេញដីកាបង្គាប់ឲ្យនាំខ្លួន appeared first on Kampuchea Thmey Daily.

លោក សៀម ភ្លុក Archives - Kampuchea Thmey Daily

អ្នកនាំពាក្យក្រសួងមហាផ្ទៃ ​៖ សំណុំរឿងលោក​ សៀម ភ្លុក កំពុងស្ថិតក្នុងនីតិវិធីរបស់តុលាកា​រ

សមត្ថកិច្ចមិនទាន់បាននាំខ្លួនលោក សៀម ភ្លុក ចូលតុលាការនៅឡើយទេ ខណៈមានព័ត៌មានថា លោក​កំពុងភៀសខ្លួន

លោក សៀម ភ្លុក អតីត​ស្ថាបនិក​គណបក្ស​បេះដូង​ជាតិ ត្រូវតុលាការចេញដីកាបង្គាប់ឲ្យនាំខ្លួន

អ្នកនាំពាក្យក្រសួងមហាផ្ទៃ ៖ សំណុំរឿងលោក សៀម ភ្លុក កំពុងស្ថិតក្នុងនីតិវិធីរបស់តុលាការ

សមត្ថកិច្ចមិនទាន់បាននាំខ្លួនលោក សៀម ភ្លុក ចូលតុលាការនៅឡើយទេ ខណៈមានព័ត៌មានថា លោកកំពុងភៀសខ្លួន

លោក សៀម ភ្លុក អតីតស្ថាបនិកគណបក្សបេះដូងជាតិ ត្រូវតុលាការចេញដីកាបង្គាប់ឲ្យនាំខ្លួន