តាមរយៈវីដេអូបង្ហោះលើហ្វេសបុកឃើញថា ស្រ្តីជាប្រពន្ធតែងខ្លួនជាព្រះនាងឥន្ទ្រទេវី បានរាំពត់ពេននូវក្បាច់រាំដែលគេមិនដែលឃើញ និងបានថ្វាយបង្គំ បុរសជាប្ដីកាន់កាំបិតខ្លី ឈរស្ងៀម ហាក់ដូចជា ព្រះបាទជ័យវរ្ម័នទី៧ ចូលសណ្ឋិតដែរ។

បន្ថែមពីនេះ ប្ដីប្រពន្ធទាំង ២រូប ក៏បានទៅថ្វាយបង្គំ នៅទីតាំងសក្ការៈលោកតារាជ នៅប្រាសាទអង្គរវត្ត ក៏ដូចជានៅមុខចម្លាក់នានា និងព្រះបរមរូបព្រះនាងឥន្ទ្រទេវី នាប្រាសាទព្រះខ័ន ខេត្តសៀមរាបជាដើម ក្នុងអាការៈយំខ្សឹកខ្សួលស្ដាយស្រណោះ។

ជុំវិញ ករណីនេះ អ្នកនាំពាក្យ ក្រសួងធម្មការ និងសាសនា បានឱ្យ “កម្ពុជាថ្មី” ដឹងនៅ ព្រឹកថ្ងៃទី៣ ខែមករា ឆ្នាំ២០២៤ នេះថា ក្រសួងបាន និងកំពុងអនុវត្តភារកិច្ចក្នុងដែនសមត្ថកិច្ចរបស់ខ្លួន ព្រមទាំងរួមសហការគ្រប់តួអង្គពាក់ព័ន្ធ។

ជាមួយគ្នានេះ អ្នកនាង ចន ច័ន្ទលក្ខិណា ប្រធានសមាគមសិល្បករខ្មែរ បានលើកឡើងក្នុងហ្វេសបុកថា តាមការឆាតជាមួយអ្នកនាង ម្ចាស់បង្ហោះរូបភាពនោះ កំពុងតាំងខ្លួនជា ព្រះនាងឥន្ទ្រទេវី យាងមកជួយជាតិ។

គួររម្លឹកថា កាលពីរសៀលថ្ងៃទី២១ ខែធ្នូ ឆ្នាំ២០២៣ នៅក្នុងពិធីបិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងបរិស្ថាន សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានប្រាប់ឱ្យ លោក ចាយ បូរិន រដ្ឋមន្រ្តីក្រសួងធម្មការ និងសាសនា និងលោក កើត រិទ្ធ រដ្ឋមន្រ្តីក្រសួងយុត្តិធម៌ ដោះស្រាយបញ្ហាដែលបុគ្គលមួយចំនួនយកសាសនាធ្វើជាខែល ក្នុងគោលបំណងណាមួយ ឬក្នុងគោលបំណងធ្វើអាជីវកម្ម។

​

ទោះ​ជា​យ៉ាង​ណា ​សម្ដេចធិបតី បាន​បញ្ជាក់​ថា​ នេះ​មិន​មែន​រដ្ឋាភិបាល​បិទ​សិទ្ធិ​ នៃ​ជំនឿ​សាសនា​នៅ​កម្ពុជា​ឡើយ។​ តាម​រដ្ឋ​ធម្មនុញ្ញ​កម្ពុជា ​ការ​មាន​ជំនឿ​ ឬ​ជឿ​ទៅ​លើ​សាសនា​អ្វី​មួយ​ ជា​សិទ្ធិ​របស់​ពលរដ្ឋ ប៉ុន្តែ​​រាល់​ជំនឿ​ទាំង​អស់​នោះ​គប្បី​ធ្វើ​យ៉ាង​ណា​កុំ​ឱ្យ​ប៉ះ​ពាល់​អ្នក​ដទៃ​ដែល​ធ្វើ​ឱ្យ​កើត​ជា​ជម្លោះ​រវាង​អ្នក​ជឿ ​និង​អ្នក​មិន​ជឿ។

គួរបញ្ជាក់ថា តាមរយៈការស្រាវជ្រាវប្រវត្ដិសាស្ដ្របានបង្ហាញថា ព្រះនាងឥន្ទ្រទេវី ជាព្រះរាជអគ្គមហេសីទី២ នៃព្រះបាទជយវម៌្មទី៧ ពីព្រោះព្រះនាងបានទទួលព្រះរាជាភិសេកជាមួយព្រះចៅអធិរាជ ក្រោយពេលដែលព្រះមហេសីដើមដែលត្រូវជាព្រះរាជកន្និដ្ឋា ព្រះនាង ជ័យរាជាទេវី សោយទិវង្គត។

ព្រះនាងឥន្ទ្រទេវី គឺជាវីរក្សត្រីយ៍ខ្មែរមួយអង្គនាសម័យអង្គរ ដែលមិនត្រឹមតែមានព្រះរូបឆោមលោមពណ៌ល្អឥតមាននរណាផ្ទឹមបានប៉ុណ្ណោះទេ ព្រះនាងថែមទាំងមានវិជ្ជាសម្បត្ដិខ្ពង់ខ្ពស់ឈ្លាសវៃក្នុងការសិក្សា និងចេះដឹងនូវក្បួនច្បាប់ទាំងឡាយយ៉ាងជ្រៅជ្រះ។ ដោយមានសេចក្ដីដំណាលនៅក្នុងសិលាចារឹកថា ព្រះនាងឥន្ទ្រទេវី គឺជាក្សត្រីយ៍ខ្មែរដ៏ពូកែលើសលប់ ឥតមាននរណាប្រៀបផ្ទឹមបាននៅសម័យអង្គរ ក្នុងផ្នែកភាសាសំស្ក្រឹត និងបរមត្ថវិជ្ជា៕

អត្ថបទ៖ ច័ន្ទ វីរៈ

The post ក្រសួងធម្មការ កំពុងអនុវត្តភារកិច្ច លើ អ្នកលក់តាមអនឡាញ ថាស្នងរូប ព្រះនាងឥន្ទ្រទេវី appeared first on Kampuchea Thmey Daily.

បណ្ឌិត សេង សុមុនី អ្នកនាំពាក្យ ក្រសួងធម្មការ និងសាសនា បានឱ្យដឹងនៅព្រឹកថ្ងៃទី២៧ ខែកញ្ញានេះថា ឆ្នាំនេះ ពិធីបុណ្យកាន់បិណ្ឌ និងភ្ជុំបិណ្ឌ នឹងប្រព្រឹត្តទៅពីថ្ងៃសៅរ៍ ១រោច ដល់ថ្ងៃសៅរ៍ ១៥រោច ខែភទ្របទ ព.ស. ២៥៦៧ ត្រូវនឹងថ្ងៃទី៣០ ខែកញ្ញា ដល់ថ្ងៃទី១៤ ខែតុលា ឆ្នាំ២០២៣។

លោកបណ្ឌិត មានប្រសាសន៍បន្តថា នៅក្នុងពិធីកាន់បិណ្ឌ និងភ្ជុំបិណ្ឌ ក្រសួងបានណែនាំគ្រប់វត្តអារាមនីមួយៗដែល ទទួលបានទេយ្យទាន រួមមាន ភោជនាហារ នំ ចំណីជាដើម លើសពីសេចក្តីត្រូវការ គួរតែចាត់ចែងរៀបចំជូនដល់ចាស់ព្រឹទ្ធាចារ្យ កុមារកំព្រា ជនពិការ ជនទីទ័លក្រ និងជនរងគ្រោះដោយហេតុផ្សេងៗទៀត។

ជាមួយគ្នានេះដែរ ដើម្បីរៀបចំបុណ្យកាន់បិណ្ឌ និងភ្ជុំបិណ្ឌ ឱ្យដំណើរការ និងប្រព្រឹត្តទៅស្របតាមទំនៀមទម្លាប់ និង ប្រពៃណីព្រះពុទ្ធសាសនា ក្រសួងក៏បានធ្វើការណែនាំដល់គ្រប់មន្ទីរធម្មការ និងសាសនា រាជធានី/ខេត្ត ត្រូវយកចិត្តទុកដាក់បង្កលក្ខណៈឱ្យបានល្អប្រសើរ ប្រភេនព្រះសង្ឃ ជូនពុទ្ធបវិស័ទ ប្រារព្ធពិធីកាន់បិណ្ឌ និងភ្ជុំបិណ្ឌ ព្រមទាំងរៀបចំបង្សុកូលឧទ្ទិសមហាកុសលជូនដល់វិញ្ញាណក្ខន្ធជនរួមជាតិ និងបុព្វបុរស ដែលបានពលីក្នុងបុព្វហេតុជាតិមាតុភូមិ ស្របតាមប្រពៃណីព្រះពុទ្ធសាសនា។

គ្រប់វត្តអារាម ត្រូវរៀបចំសម្អាតបូជនីយដ្ឋាន ស្តូប កន្លែងតម្កល់អដ្ឋិធាតុបងប្អូនជនរួមជាតិ ដែលបានបាត់បង់ជីវិតក្នុងរបបប្រល័យពូជសាសន៍ និងតុបតែងលម្អដោយបំភ្លឺភ្លើងពណ៌ លើកទង់ជាតិ ទង់សាសនា ទង់ព្រះមហាក្សត្រ បដា ពាក្យស្លោក ដើម្បីអបអរសាទរតាមប្រពៃណីព្រះពុទ្ធសាសនា។

គួរបញ្ជាក់ថា បុណ្យកាន់បិណ្ឌ និងភ្ជុំបិណ្ឌ ជាបុណ្យប្រពៃណីព្រះពុទ្ធសាសនាដ៏សំខាន់របស់ពុទ្ធសាសនិកខ្មែរគ្រប់ៗរូប។ ពិធីបុណ្យនេះ ប្រារព្ធឡើង ដើម្បីឧទ្ទិសមហាកុសលជូនវិញ្ញាណក្ខន្ធ នៃអ្នកមានគុណទាំងឡាយ មានមាតាបិតា ជីដូនជីតា គ្រូឧបជ្ឈាយាចារ្យ បុព្វបុរស និងញាតិមិត្ដសាច់សាលោហិត ដែលបានលាចាកលោកនេះទៅកាន់លោកខាងមុខ។ ម៉្យាងវិញទៀត ក៏ជាឱកាសដ៏ល្អសម្រាប់ការជួបជុំឪពុកម្តាយ ជីដូនជីតាបងប្អូន ញាតិមិត្ត សាច់សាលោហិត ដែលកំពុងមានជីវិតរស់នៅ អាចឈ្វេងយល់ពីសុខទុក្ខ និងដំណើរប្រព្រឹត្តទៅក្នុងជីវភាពរស់នៅប្រចាំថ្ងៃ រវាងគ្នានឹងគ្នា បង្ហាញមនោសញ្ចេតនាគោរពស្រលាញ់ ការដឹងគុណ តបគុណ ព្រមទាំងបានបង្កើននូវសាមគ្គីភាព ដ៏ទូលំទូលាយផងដែរ៕

អត្ថបទ៖ សំអឿន

The post វត្តអារាមគួររៀបចំជូនភោជនាហារលើសនារដូវភ្ជុំ ជូនចាស់ ជនពិការ និងជនទីទ័លក្រ appeared first on Kampuchea Thmey Daily.

ថ្លែងក្នុងពិធីការពារសារណាបញ្ចប់ថ្នាក់បរិញ្ញាបត្រ នៃពុទ្ធកសាកលវិទ្យាល័យព្រះសីហនុរាជ នៅព្រឹកថ្ងៃទី១៣ មីនានេះ  លោក សេង សុមុនី រដ្ឋលេខាធិការ ក្រសួងធម្មការ និងសាសនា បានជំរុញឱ្យសមណនិស្សិត និងនិស្សិតត្រូវខិតខំប្រឹងប្រែងជួយខ្លួនឯងឱ្យមានចំណេះ ជំនាញ បទពិសោធន៍ការងារជាមួយនឹងសីលធម៌ និងគុណភាពដើម្បីក្លាយជាកោសិកាជាតិដ៏សំខាន់របស់ជាតិ។ ជាក់ស្តែងនាពេលខាងមុខនេះ រាជរដ្ឋាភិបាលនឹងបណ្តុះបណ្តាលជំនាញវិជ្ជាជីវៈដល់យុវជនឱ្យបាន ១លាន ៥សែននាក់ ហើយក្នុងនោះក៏មានការបណ្តុះបណ្តាលពីសីលធម៌ និងគុណធម៌ផងដែរ ដើម្បីឱ្យយុវជនមិនត្រឹមមានចំណេះជំនាញច្បាស់លាស់ប៉ុណ្ណោះទេ ថែមទាំងមានអាកប្បកិរិយាល្អសក្ដិសមជាពលរដ្ឋល្អរស់នៅក្នុងប្រទេសមានប្រពៃណី និងទំនៀមទំលាប់ល្អផូរផង់ និងអរិយធម៌ខ្ពស់។

លោក សេង សុមុនី លើកឡើងថា បច្ចុប្បន្នសាកលវិទ្យាល័យព្រះសីហនុរាជបានក្លាយជាថ្នាលបណ្តុះបណ្តាលធនធានមនុស្សមួយដ៏សំខាន់សម្រាប់បណ្តុះបណ្តាលធនធានផ្នែកព្រះសង្ឃ និងនិស្សិតឱ្យទទួលបានចំណេះដឹងលើវិស័យពុទ្ធសាសនាក៏ដូចជាពុទ្ធចក្រដើម្បីជួយទ្រទ្រង់នូវវប្បធម៌ ទំនៀមទំលាប់និងអត្ថសញ្ញាណរបស់ជាតិ។

លោក សេង សុមុនី មានប្រសាសន៍បន្តថា មិនតែប៉ុណ្ណោះ សាកលវិទ្យាល័យនេះក៏ជាកន្លែងសម្រាប់សិក្សាពីវិន័យ បាលី អភិធម៌ ពិសេសបង្ហាត់បង្រៀនឱ្យនិស្សិតចេះប្រតិបត្តិសីលធម៌ និងគុណភាពដែលជាតម្លៃមួយដែលរាជរដ្ឋាភិបាលមិនអាចមើលរំលងបាន និងបានខិតខំជួយគាំទ្រ និងទំនុកបម្រុង ព្រោះការអភិវឌ្ឍប្រទេសជាតិមួយត្រូវការធនធានមនុស្ស។ ប៉ុន្តែបើធនធនមនុស្សនោះមិនមានសីលធម៌ និងគុណធម៌ ក៏មិនអាចអភិវឌ្ឍប្រទេសជាតិឱ្យមានការរីកចំរើនជឿនលឿនបានដែរ។

ព្រះមុនីកោសលបណ្ឌិត យ៉ន សេង យៀត ព្រះសកលវិទ្យាធិការរង ទទួលបន្ទុកសាកលវិទ្យាល័យព្រះសីហនុរាជបានមានថេរដីការថា សមណនិស្សិត និងនិស្សិតដែលឡើងការពារសារណាបញ្ចប់ថ្នាក់បរិញ្ញាបត្រនេះមានចំនួន ៣០៦អង្គនាក់ ក្នុងនោះមានសមណនិស្សិតចំនួន ៧៦អង្គ និស្សិតប្រុស ៨៧នាក់ និស្សិតស្រីចំនួន ១៣៩នាក់ ដោយឡើងការពារទៅលើប្រធានបទចំនួន ៧៥ដែលមានឯកទេសចំនួន ៨៕

អត្ថបទ៖ សំអឿន

The post មន្ត្រីជាន់ខ្ពស់ក្រសួងធម្មការ ជំរុញព្រះសង្ឃ និងនិស្សិតខំសិក្សាឱ្យក្លាយជាកោសិកាសំខាន់ជាតិ appeared first on Kampuchea Thmey Daily.

លោក សេង សុមុនី រដ្ឋលេខាធិការ និងជាអ្នកនាំពាក្យ ក្រសួងធម្មការ និងសាសនា បានបានមានប្រសាសន៍នៅព្រឹកថ្ងៃទី៣ ខែកុម្ភៈនេះថា ឆ្នាំនេះពិធីបុណ្យមាឃបូជានឹងប្រព្រឹត្តិទៅរយៈពេល២ថ្ងៃ គឺថ្ងៃទី៥ ទី៦ ខែកុម្ភៈ ដោយរៀងរាល់ឆ្នាំ ពុទ្ធសាសនិកជនខ្មែរតែងតែប្រារព្ធធ្វើបុណ្យនេះនៅថ្នាក់ជាតិ និងគ្រប់វត្តទូទាំងប្រទេស ដោយចាត់ទុកជាការបំពេញកុសលដ៏ថ្លៃថ្លាបំផុត និងធ្វើនូវកតញ្ញូកតវេទីដល់ព្រះសាស្តាបរមគ្រូ។

ចំណែករាជរដ្ឋាភិបាល បានអនុញ្ញាតឱ្យរៀបចំកម្មវិធីបុណ្យនេះ នៅបរិវេណព្រះមហាសក្យមុនីចេតិយ ភ្នំព្រះរាជទ្រព្យ (ឧត្ដុង្គ) ស្ថិតនៅស្រុកពញាឮ ខេត្តកណ្តាល ដោយមានថ្នាក់ដឹកនាំជាន់ខ្ពស់រាជរដ្ឋាភិបាល មន្ត្រីរាជការ និងពុទ្ធបរិស័ទចូលរួមបំពេញកុសលតាមប្រពៃណីព្រះពុទ្ធសាសនាខ្មែរស្របតាមរដ្ឋធម្មនុញ្ញ នៃព្រះរាជាណាចក្រកម្ពុជា។

លោកបានបន្តថា សម្រាប់បុណ្យមាឃបូជាឆ្នាំនេះ ក្រសួងបានទូលថ្វាយ-ប្រគេន ព្រះថេរានុត្ថេរៈគ្រប់ព្រះអង្គ និងណែនាំទៅគ្រប់ប្រធានមន្ទីរធម្មការ និងសាសនារាជធានី-ខេត្ត ត្រូវណែនាំគ្រប់វត្ត ឱ្យរៀបចំពិធីបុណ្យមាឃបូជា ឱ្យស្របតាមទំនៀមទម្លាប់ប្រពៃណីជាតិ និងជ្រើសតាំងវត្តណាមួយក្នុងរាជធានី-ខេត្ត ប្រារព្ធពិធីបុណ្យនេះជាផ្លូវការ។

ក្រសួងបានណែនាំដល់គ្រប់វត្តឱ្យសម្អាតទីធ្លាក្នុងវត្តទាំងមូល និងជាពិសេសកន្លែងសក្ការបូជារបស់ពុទ្ធបរិស័ទ ព្រមទាំងតុបតែងលម្អដោយទង់ជាតិ ទង់ព្រះពុទ្ធសាសនា ទង់ព្រះមហាក្សត្រ បដាពាក្យស្លោក ដើម្បីអបអរសាទរក្នុងពិធីបុណ្យនេះ។ ទន្ទឹមនឹងនេះត្រូវសហការជាមួយអាជ្ញាធរដែនដីគ្រប់លំដាប់ថ្នាក់ ដើម្បីការពារសុវត្ថិភាពនៅក្នុងពិធីបុណ្យ និងអំពាវនាវ សប្បុរសជន ពុទ្ធបរិស័ទប្រជាពលរដ្ឋចូលរួមបំពេញកុសលតាមសទ្ធាជ្រះថ្លាដើម្បីជាគុណប្រយោជន៍ដល់ ការថែរក្សានូវអត្តសញ្ញាណជាតិ ប្រពៃណីព្រះពុទ្ធសាសនា និងអនុមោទនាយកផល្លានិសង្សរៀងៗខ្លួន។

គួរបញ្ជាក់ថា បុណ្យមាឃបូជា គឺជាបុណ្យមួយក្នុងបណ្តាបុណ្យធំៗទាំងឡាយក្នុងព្រះពុទ្ធសាសនា ហើយប្រទេសដែលកាន់ព្រះពុទ្ធសាសនាលើសកលលោកតែងតែប្រារព្ធធ្វើជារៀងរាល់ឆ្នាំពុំដែលខកខាន។ ពិធីនេះប្រារព្ធធ្វើឡើងដើម្បីរម្លឹកដល់ថ្ងៃពេញបូណ៌មីខែមាឃ ជាថ្ងៃប្រជុំចតុរង្គសន្និបាតសម្តែងឱវាទប្បាតិមោក្ខ និងថ្ងៃដែលព្រះពុទ្ធអង្គប្រជុំប្រកាសដាក់កំណត់ព្រះជន្មាយុសង្ខារ៕

អត្ថបទ៖ សំអឿន

The post ក្រសួងធម្មការក្រើនរំលឹករៀបចំបុណ្យមាឃបូជាឱ្យអធិកអធម ប្រកបសុវត្ថិភាព appeared first on Kampuchea Thmey Daily.

លោក សេង សុមុនី រដ្ឋលេខាធិការ​និង​ជា​អ្នក​នាំ​ពាក្យ​ក្រសួង​ធម្មការ និង​សាសនា បាន​ឲ្យ​ដឹង​ថា បច្ចុប្បន្ន​នៅ​ទូទាំង​ប្រទេស មាន​វត្ត​ជាង ៥ ពាន់ ក្នុងនោះ​វត្ត​គណៈ​មហានិកាយ​មាន​ចំនួន ៤ ៨៤៣ វត្ត​មាន​ព្រះសង្ឃ ៧០ ៩០៥ អង្គ និង​វត្ត​គណៈ​ធម្មយុត្តិ​មាន​ចំនួន ២៦១ វត្ត និង​មាន​ព្រះសង្ឃ ២ ៤២៩ វត្ត។

លោក សេង សុមុនី បាន​បង្ហាញ​លក្ខណៈ​សម្គាល់​ខ្លះៗ​ពី​ព្រះសង្ឃ​គណៈ​ធម្មយុត្តិ​​និង​គណៈ​មហានិកាយ​​។

លោក​សេង សុមុនី បញ្ជាក់ថា ព្រះសង្ឃគណៈ​ធម្មយុត្តិ​ការ​ប្រតិបត្តិ​​លំអាន​ពីបុរាណ​ច្រើន​សម្គាល់ ៣ ចំណុច គឺ​ប្រើប្រាស់​បាតអត់ស្រោម ​អត់ពាក់ទ្រនាប់ជើង និង​មិន​ទទួល​បច្ច័យ​។ ដោយ​ឡែក​​ការសាងសង់​ទីអារាម​ មិនមានការ​បែងចែក​កំណត់​​ខុស​គ្នា​នោះទេ។

បើ​តាម​លោក សេង សុមុនី​ ព្រះពុទ្ធសាសនា​គណៈ​ធម្មយុត្តិ​នៅ​ក្នុង​ប្រទេស​កម្ពុជា​មាន​ប្រភព​មក​ពី​ប្រទេស​ថៃ តែ​លោក​មិន​បាន​បញ្ជាក់​​លម្អិត​មាន​ឥទ្ធិពល​និង​​​បាន​នាំ​​ចូលមកប្រទេស​កម្ពុជា​​តាំង​ពី​ពេល​​ណា​នោះទេ។

​នៅ​រាជធានី​ភ្នំពេញ​មាន​វត្ត​ជាង ១៥០ កន្លែង​​​ក្នុង​ចំណោម​វត្ត​ជាង ៥ ពាន់នៅទូទាំងប្រទេស។ វត្ត​នៅ​រាជធានី​ភ្នំពេញ​​មាន​ទាំង​គណៈ​ធម្មយុត្ត និង​គណៈ​មហានិកាយ។ ​

វត្ត​បទុម​វតីរាជវរារាម​ដែល​ជា​វត្ត​ចំណាស់​មួយ​នៅ​រាជធានី​ភ្នំពេញ មាន​ទាំង​គណៈ​ធម្មយុត្ត និង​មហានិកាយ៕

The post ព្រះសង្ឃ​ធម្មយុត្តិមាន ៣ ចំណុច​សំខាន់​ងាយស្រួល​ចំណាំ​ appeared first on Kampuchea Thmey Daily.

លោកថ្លែងបែបនេះ នៅក្នុងសន្និសីទសារព័ត៌មាន ស្តីពី សមិទ្ធផល ៥ឆ្នាំ របស់ក្រសួងធម្មការ និងសាសនា កាលពីថ្ងៃទី ២៩ ខែកញ្ញាម្សិលមិញនេះ។ លោកថា កន្លងមក មានសាធារណជនមួយចំនួន មានការយល់ច្រឡំថា ការតែងតាំងតួនាទីជាទីប្រឹក្សាគណៈសង្ឃ គឺត្រូវតែហៅអ្នកនោះថា​ «ឯកឧត្តម ឬជំទាវ​»។ 

ឆ្លើយតបនឹងការលើកឡើងនេះ លោកបញ្ជាក់ថា ការតែងតាំងទីប្រឹក្សាគណៈសង្ឃ និងការតែងតាំងងារ គឺជារឿងពីរផ្សេងគ្នា ព្រោះការតែងតាំងងារជា «ឯកឧត្តម ឬជំទាវ» ធ្វើបាន លុះត្រាតែមានព្រះរាជក្រឹត្យព្រះមហាក្សត្រ ឬរាជរដ្ឋាភិបាលប៉ុណ្ណោះ។

អ្នកនាំពាក្យពាក្យរូបនេះ លើកឡើងផងដែរ ពីករណីដែលមានជនឱកាសនិយមមួយចំនួន ប្រើប្រាស់រឿងនេះ ជាមធ្យោ បាយធ្វើសកម្មភាពផ្សេងៗ ដែលអាចប៉ះពាល់ដល់វិស័យសាសនានៅកម្ពុជា។ ដូច្នេះលោកណែនាំឲ្យអាជ្ញាធរពាក់ព័ន្ធ ជួយតាមដាន និងត្រួតពិនិត្យលើករណីនេះផង។

បើតាមលោក សេង សុមុនី ការតែងតាំងទីប្រឹក្សាឲ្យគណៈសង្ឃ មិនមានចែងក្នុងច្បាប់នោះឡើយ ហើយក៏មិនមានការហាមឃាត់ដែរ៕

អត្ថបទ៖ សុធាវី

The post លោក សេង សុមុនី ៖ ការតែងតាំងទីប្រឹក្សាគណៈសង្ឃ និងការតែងតាំងងារ ជារឿងពីរផ្សេងគ្នា​ appeared first on Kampuchea Thmey Daily.

បណ្ឌិត សេង សុមុនី បានឱ្យដឹងបន្តថា ថ្នាក់ដឹកនាំពាហិរសាសនាដែលបានឆ្លងជំងឺកូវីដ-១៩ ចំនួន ៤៧៥ រូប ជាសះស្បើយ ចំនួន ៤៥៩ រូប មរណភាព ចំនួន ៧រូប។ ក្នុងនោះរួមមាន៖ សាសនាឥស្លាម ចំនួន ៣១៥ រូប ជាសះស្បើយ ចំនួន ៣០៥ រូប មរណភាព ចំនួន ៦ រូប, គ្រិស្ដសាសនា ចំនួន ១២២ រូប ជាសះស្បើយ ចំនួន ១១៦ រូប មរណភាព ចំនួន ១ រូប និងសាសនាផ្សេងៗ ចំនួន ៣៨ រូប ជាសះស្បើយ ចំនួន ៣៨ រូប មិនមានមរណភាព។

រដ្ឋលេខាធិការ ក្រសួងធម្មការ និងសាសនារូបនេះ បញ្ជាក់ថា ក្នុងចំណោមព្រះសង្ឃ ចំនួន ៧០ ៩០៥ អង្គ ព្រះសង្ឃទាំងពីរគណៈ​ ដែលបាន​ចាក់វ៉ាក់​សាំង​ការពារ​ជំងឺកូវីដ-១៩ មានចំនួន ៦៤ ៨៦៤ អង្គ ស្មើនឹងចំនួន ៩៣%។ ថ្នាក់ដឹកនាំពាហិរសាសនាដែលបានចាក់វ៉ាក់សាំងការពារជំងឺកូវីដ-១៩ ចំនួន ៤ ០៧៨ រូប ក្នុងនោះថ្នាក់ដឹកនាំឥស្លាមសាសនា ១ ៤៨៧ រូប ថ្នាក់ដឹកនាំគ្រិស្ដសាសនា ២ ៣៤៣ រូប និងថ្នាក់ដឹកនាំសាសនាផ្សេងៗ ២៤៨ រូប។

គួរបញ្ជាក់ថា នៅតាមបណ្តាវត្តអារាម វិហារ ស្នាក់ការថ្វាយបង្គំ បានចូលរួមជាប្រចាំ​ក្នុង​ការផ្សព្វ​ផ្សាយ​ពីផលប៉ះពាល់នៃការ ប្រើប្រាស់គ្រឿងញៀន និងវិធីការពារ បង្ការ ទប់ស្កាត់ការរីករាលដាលនៃ​ជំងឺកូវីដ-១៩ ​តាម​ការណែនាំរបស់រាជរដ្ឋា​ភិ​បា​ល និងក្រសួងសុខាភិបាល។ ជាពិសេសគ្រប់វត្ត​អារាម​ទាំងអស់ បានចូលរួមអនុវត្តការវាយគង ជួង រគាំង និង ទូងស្គរ​ព្រមៗ​គ្នាទូទាំងប្រទេស ក្នុង១ថ្ងៃ ៥ដង ដើម្បីជាសាររម្លឹកប្រជាពលរដ្ឋពីវិធានការ “៣ការពារ” និង “៣កុំ”៕

The post បព្វជិតសាសនានានាជាង ១ ៧០០ អង្គ/រូប បានឆ្លងកូវីដ-១៩ និង អនិច្ចធម្ម​ ២៣ អង្គ/រូប appeared first on Kampuchea Thmey Daily.

ថ្លែងក្នុងសន្និសីទសារព័ត៌មានស្ដីពី “សមិទ្ធផលសម្រេចបានរយៈពេល ៥ឆ្នាំកន្លងមក របស់ក្រសួងធម្មការ និងសាសនា” នៅរសៀលថ្ងៃទី២៩ ខែកញ្ញា ឆ្នាំ២០២២ នេះ បណ្ឌិត សេង សុមុនី រដ្ឋលេខាធិការ និងជាអ្នកនាំពាក្យក្រសួង បានលើកឡើងថា តាមលទ្ធផលការងារ​សម្រេច​បាន​ក្នុងឆ្នាំ២០២១ ក្រសួង បានទទួលពាក្យបណ្តឹង ចំនួន ៧៣ ករណី និងសម្រប​សម្រួល​ដោះស្រាយ ចំនួន ៤៣ ករណី, របាយការណ៍ ចំនួន ០៨ករណី, តម្កល់ទុក ០១ករណី, បណ្តឹងចម្លងជូនចំនួន ០៣ករណី និងកំពុងចុះស្រាវជ្រាវចំនួន ០២ករណី។

បណ្ឌិត សេង សុមុនី បានឱ្យដឹងបន្ថែមថា ជាមួយគ្នានេះ ក្រសួងបានចូលបំភ្លឺនៅស្នងការ និងតុលាការ ចំនួន ០៣ ករណី និងម្ចាស់ប្តឹងបានដកពា្យបណ្តឹងវិញចំនួន០២ករណី។ ក្រសួងបានបង្វែសំនុំរឿង ទៅអង្គភាពពាក់ព័ន្ធ ២០ ករណី, មន្ទីរធម្មការរាជធានី ខេត្តដោះស្រាយចំនួន ៤០ករណី៕

The post ក្រសួងធម្មការ និងសាសនា បានទទួលពាក្យបណ្ដឹង ៧០ ករណី ដោះស្រាយបានជាង ៤០ ករណី appeared first on Kampuchea Thmey Daily.