លោក ស៊ីន ចាន់សេរីវុត្ថា Archives - Kampuchea Thmey Daily

កម្ពុជា មិនទាន់ទទួលបានលិខិតផ្លូវការណាមួយ បញ្ជាក់ពីការផ្អាកជើងហោះហើរពីថៃមកកម្ពុជាឡើយ

Ngoeul Narath — Thu, 13 Nov 2025 11:23:43 +0000

រដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិល លោក ស៊ីន ចាន់សិរីវុត្ថា គូសបញ្ជាក់ថា អាកាសចរណ៍ស៊ីវិលកម្ពុជា នៅមិនទាន់ទទួលបានលិខិតផ្លូវការណាមួយ ដែលថា ថៃផ្អាកជើងហោះហើរមកកាន់កម្ពុជានៅឡើយទេ។ អ្នកនាំពាក្យ ចេញមកបញ្ជាក់នៅល្ងាចថ្ងៃទី១៣ ខែវិច្ឆិកា ឆ្នាំ២០២៥នេះ បន្ទាប់ពី បណ្ដាញសង្គមជាច្រើនផ្សព្វផ្សាយនូវលិខិតជាភាសាថៃមួយ ដែលលើកឡើងថា ថៃបានសម្រេចផ្អាកជើងហោះហើរ ជាមួយកម្ពុជាទាំងស្រុង នៅថ្ងៃទី២៥ ខែវិច្ឆិកា ឆ្នាំ២០២៥ខាងមុខនេះ។

អ្នកនាំពាក្យអាកាសចរណ៍ស៊ីវិល អះអាងថា លិខិត ដែលមានខ្លឹមសារថៃ ផ្អាកជើងហោះហើរជាមួយកម្ពុជា គឺជាលិខិតក្លែងក្លាយ។

លោក ស៊ីន ចាន់សិរីវុត្ថា បានបញ្ជាក់មកកាន់អ្នកសារព័ត៌មានដូច្នេះថា «មកដល់ពេលនេះ អាកាសចរណ៍ស៊ីវិលកម្ពុជា មិនទានទទួលបានលិខិតផ្លូវការណាមួយ ពីការផ្អាកជើងហោះហើរថៃមកកម្ពុជានោះទេ ហើយអាកាសចរណ៍ស៊ីវិល នឹងបន្ដតាមដានអំពីរឿងនេះ ហើយបើមានអ្វីប្រែប្រួល នឹងធ្វើការជូនដំណឹង»។

លោក ស៊ីន ចាន់សិរីវុត្ថា បានគូសបញ្ជាក់ថា លិខិតដែលគេចែកចាយ នៅលើបណ្ដាញសង្គម គឺជាលិខិតក្លែងក្លាយ ព្រោះថា នៅក្នុងសរសេរឈ្មោះ និងឆ្នាំខុស ជាពិសេសនៅក្នុងនោះ អត់មានឈ្មោះអ្នកចុះហត្ថលេខា ហើយអ៉ីម៉ែលក៏សរសេរខុសដែរ។

អ្នកនាំពាក្យ បានសំណូមពរទៅកាន់ប្រជាពលរដ្ឋ កុំមានការភ្ញាក់ផ្អើលចំពោះព័ត៌មានមិនពិតនេះ និងកុំចែកចាយបន្តនាំឱ្យមានការយល់ច្រឡំ៕

The post កម្ពុជា មិនទាន់ទទួលបានលិខិតផ្លូវការណាមួយ បញ្ជាក់ពីការផ្អាកជើងហោះហើរពីថៃមកកម្ពុជាឡើយ appeared first on Kampuchea Thmey Daily.

ក្រុមហ៊ុនអាកាសចរណ៍ក្នុងស្រុក គ្រោងធ្វើការហោះហើរបង្ហាញមកអាកាសយានដ្ឋានតារាសាគរ នៅថ្ងៃសម្ពោធចុងខែវិច្ឆិកានេះ

Dy Bunnara — Tue, 22 Oct 2024 02:48:17 +0000

តាមមន្រ្តីគ្រប់គ្រងអាកាសយានដ្ឋានអន្តរជាតិតារាសាគរខេត្តកោះកុងបានបញ្ជាក់ឲ្យដឹងថា ក្រុមហ៊ុនអាកាសចរណ៍ក្នុងស្រុកមួយ នឹងធ្វើការហោះហើរបង្ហាញក្នុងថ្ងៃបើកដំណើរការអាកាសយានដ្ឋានអន្តរជាតិតារាសាគរខេត្តកោះកុង។

លោក ម៉ៅ កែវពេជ្រច័ន្ទមុន្នី នាយកអាកាសយានដ្ឋានអន្តរជាតិតារាសាគរបានបញ្ជាក់ប្រាប់កម្ពុជាថ្មីថា ខណៈដែលអាកាសយានដ្ឋានតារាសាគរគ្រោងនឹងបើកដំណើរការនៅថ្ងៃទី ២៨ ខែវិច្ឆិកាខាងមុខនេះ តាមការគ្រោងទុកនៅថ្ងៃបើកដំណើរការ នឹងមានការហោះហើរបង្ហាញ ដោយក្រុមហ៊ុនអាកាសចរណ៍ក្នុងស្រុកមកអាកាសយានដ្ឋានអន្តរជាតិថ្មីតារាសាគរ។

«សម្រាប់ការបើកដំណើរនៅថ្ងៃទី២៨ ខែ ១១ អាកាសចរណ៍ដំបូងអាចជាអាកាសចរណ៍អ៊ែរ ខេមបូឌា (អតីតកម្ពុជាអង្គរអ៊ែរ) នឹងធ្វើការហោះហើរបង្ហាញភ្ជាប់មកអាកាសយានដ្ឋានថ្មីនេះ»។

យ៉ាងណាមិញ បើតាមមន្រ្តីអ្នកនាំពាក្យអាកាសចរណ៍ស៊ីវិល ផែនការដែលនឹងការហោះហើរបង្ហាញដោយក្រុមហ៊ុនក្នុងស្រុកនៅថ្ងៃបើកដំណើរការ នៅមិនទាន់សម្រេចជាផ្លូវការនៅឡើយទេ។

លោក ស៊ីន ចាន់សេរីវុត្ថា រដ្ឋលេខាធិការ និងជាមន្រ្តីអ្នកនាំពាក្យអាកាសចរស៊ីវិលបានឲ្យកម្ពុជាថ្មីដឹងថា នៅថ្ងៃសម្ពោធ ក្រុមហ៊ុនក្នុងស្រុក អ៊ែរ ខេមបូឌា (អតីតកម្ពុជាអង្គរអ៊ែរ) គ្រោងមានការហោះហើរបង្ហាញមកអាកាសយានដ្ឋានថ្មី ប៉ុន្តែជាក់ស្តែងមិនទាន់មានការសម្រេចជាផ្លូវការនៅឡើយទេ។

ពាក់ព័ន្ធដំណើរការអាកាសយានដ្ឋានថ្មី លោក ស៊ីន ចាន់សេរីវុត្ថា បានបញ្ជាក់ថា នៅដំណាក់ដំបូងទទួលការហោះហើរយន្តហោះខ្នាតតូច មិនមែនយន្តហោះបែបពាណិជ្ជកម្មនោះទេ។

«ការបើកដំណើរការនេះមិនមែនទទួលយន្តហោះបែបពាណិជ្ជកម្មទេ ជាយន្តហោះខ្នាតតូច។ អីចឹងទេ កុំទាន់មានការយល់ច្រឡំ»។ លោក ស៊ីន ចាន់សេរីវុត្ថា បញ្ជាក់បន្ថែម។

ទាក់ទងការអភិវឌ្ឍហេដ្ឋារចនាសម្ព័ន្ធបម្រើការក្នុងអាកាសយានដ្ឋាន លោក ម៉ៅ កែវពេជ្រច័ន្ទមុន្នី បានបញ្ជាក់ថា មាន ៣ ផ្នែកធំៗ ក្នុងនោះផ្លូវរត់ និងចំណតយន្តហោះបានបញ្ចប់ ១០០% ប្រព័ន្ធនាំផ្លូវចុះចត និងវិទ្យុទាក់ទងជាមួយយន្តហោះក៏រួចរាល់ ១០០% ខណៈអគារទទួលអ្នកដំណើរ (Terminal) នឹងរួចរាល់មុនថ្ងៃបើកសម្ពោធដំណើរការជាផ្លូវការ។

ក្រោមការវិនិយោគដោយក្រុមហ៊ុនចិន Union Development Group (UDG) អាកាសយានដ្ឋានតារាសាគរបានពន្យារពេលបើកប្រតិបត្តិការ ដែលដំបូងឡើយគ្រោងដាក់ឲ្យដំណើរការនៅឆ្នាំ ២០២១។

ក្រុមហ៊ុន Union Development Group (UDG) បានទទួលបានដីសម្បទានពីរដ្ឋាភិបាលវិនិយោគសាងសង់អាកាសយានដ្ឋានតារាសាគរតម្លៃជាង ៣០០ លានដុល្លារ នៅស្រុកបុទុមសាគរ ក្នុងខេត្តកោះកុង។

អាកាសយានដ្ឋានថ្មីនេះមានផ្លូវយន្តហោះចុះប្រវែង ៣២០០ ម៉ែត្រ ទទឹង ៦០ ម៉ែត្រ ដែលមានសមត្ថភាពអាចទទួលយន្តហោះប្រភេទ A-350-900 និង Boeing 777 ជាដើម៕

The post ក្រុមហ៊ុនអាកាសចរណ៍ក្នុងស្រុក គ្រោងធ្វើការហោះហើរបង្ហាញមកអាកាសយានដ្ឋានតារាសាគរ នៅថ្ងៃសម្ពោធចុងខែវិច្ឆិកានេះ appeared first on Kampuchea Thmey Daily.

មួយថ្ងៃម្សិលមិញនេះ អ្នកដំណើរតាមផ្លូវអាកាសចូលប្រទេសកម្ពុជាមានជិត ១ ម៉ឺននាក់

Dy Bunnara — Mon, 07 Oct 2024 04:28:51 +0000

បើតាមមន្រ្តីអាកាសចរណ៍ស៊ីវិលបានឲ្យកម្ពុជាថ្មីដឹងថា មួយថ្ងៃម្សិលមិញនេះ មានអ្នកដំណើរតាមផ្លូវអាកាសចូលប្រទេសកម្ពុជាមានជិត ១ ម៉ឺននាក់។

លោក ស៊ីន ចាន់សេរីវុត្ថា រដ្ឋលេខាធិការ និងជាមន្រ្តីអ្នកនាំពាក្យអាកាសចរស៊ីវិលបានឲ្យកម្ពុជាថ្មីដឹងនៅព្រឹកនេះថា អ្នកដំណើរដែលចូលប្រទេសតាមផ្លូវអាកាសនៅថ្ងៃទី០៦ ខែតុលា ឆ្នាំ២០២៤ ម្សិលមិញសរុបមានចំនួន ៩ ៨៩៦ នាក់។

លោក ស៊ីន ចាន់សេរីវុត្ថា បានបញ្ជាក់បន្ថែមថា «អ្នកដំណើរជិត ១ ម៉ឺននាក់មាន ៨១ សញ្ជាតិ ខណៈប្រទេសដែលនាំមុខគេមានចិនមានចំនួន ៣ ១៥៥ នាក់ ម៉ាឡេស៊ី ៣១៣ នាក់, កូរ៉េខាងត្បូង ២៨៦ នាក់ និង ថៃ ២៤២នាក់»។

បើតាមរបាយការណ៍ពីអាកាសចរណ៍ស៊ីវិល ក្នុងរយៈពេល ៧ ខែ ឆ្នាំ២០២៤ អាកាសយានដ្ឋានអន្តរជាតិទាំង ៣ របស់ប្រទេសកម្ពុជា មានអ្នកដំណើរឆ្លងកាត់ជាង ៣ លាននាក់ បើធៀបរយៈពេលដូចគ្នាកាលពីឆ្នាំមុនកើនឡើង ២០ ភាគរយ។

គិតចាប់ពីដើមខែមករា ដល់ខែកក្កដា ឆ្នាំ២០២៤ អាកាសយានដ្ឋានអន្តរជាតិទាំង ៣ មានភ្នំពេញ សៀមរាប និងខេត្តព្រះសីហនុ មានជើងហោះហើរចេញ-ចូល (ទ្វេទិស) មានចំនួនជាង ៣ ម៉ឺនជើង, អ្នកដំណើរចេញ-ចូល (ទ្វេទិស) មានចំនួនជាង ៣ លាននាក់ និងទំនិញតាមផ្លូវអាកាសចេញ-ចូល (ទ្វេទិស) មានចំនួនជាង ៤២ លានគីឡូក្រាម។

បើធៀបរយៈពេល ៧ ខែ (មករា-កក្កដា) ឆ្នាំ២០២៤ ទៅនឹងរយៈពេល ៧ខែ (មករា-កក្កដា) ឆ្នាំ២០២៣ កំណើនជាមធ្យមសម្រាប់ចំនួនជើងហោះហើរកើនឡើងប្រមាណ ១៣%, ចំនួនអ្នកដំណើរកើនឡើងប្រមាណ ២០% និងចំនួនទំនិញតាមផ្លូវអាកាសកើនឡើងប្រមាណ ៤៤%៕

The post មួយថ្ងៃម្សិលមិញនេះ អ្នកដំណើរតាមផ្លូវអាកាសចូលប្រទេសកម្ពុជាមានជិត ១ ម៉ឺននាក់ appeared first on Kampuchea Thmey Daily.

គម្រោងដាំដើមត្នោត តាមមហាវិថីថ្មីទៅព្រលានយន្តហោះតេជោតាខ្មៅ រដ្ឋមន្រ្តីក្រសួងបរិស្ថានប្រកាសរង់ចាំសហការ

Dy Bunnara — Thu, 23 May 2024 04:27:52 +0000

រដ្ឋមន្រ្តីក្រសួងបរិស្ថាន ប្រកាសនឹងចូលរួមសហការជាមួយអាជ្ញាធរពាក់ព័ន្ធ បើសិនមានការស្នើសុំផ្តល់កូនត្នោតដើម្បីយកទៅដាំលម្អនៅលើដងមហាវិថីថ្មីឆ្ពោះទៅកាន់ព្រលានយន្តហោះតេជោតាខ្មៅដែលកំពុងដំណើរការសាងសង់។

មហាវិថីថ្មីកំពុងសាងសង់ភ្ជាប់ពីផ្លូវ ៦០ ម៉ែត្រ ទៅព្រលានយន្តហោះអន្តរជាតិតេជោតាខ្មៅ

ខណៈដែលក្រសួងបរិស្ថាន កំពុងរៀបចំយុទ្ធនាការចែកកូនឈើរាប់លានដើម ដល់ពលរដ្ឋយកទៅដាំតាមសហគមន៍ សាលារៀន និងទីអារាមនានា ក្រសួងបរិស្ថានក៏បានបណ្តុះកូនត្នោតរាប់ម៉ឺនដើម ដើម្បីចែកជូនដល់ប្រជាពលរដ្ឋយកទៅដាំដោយឥតគិតថ្លៃនៅពេលខាងមុខ។

ឆ្លើយតបសំនួររបស់អ្នកសារព័ត៌មានកម្ពុជាថ្មីនៅក្នុងសន្និសីទ «ពិព័រណ៍ផ្សព្វផ្សាយនិងចែកកូនឈើ» កាលពីថ្ងៃទី ២០ ខែឧសភា លោក អ៊ាង សុផល្លែត រដ្ឋមន្រ្តីក្រសួងបរិស្ថានបានឲ្យដឹងថា ក្រសួងបរិស្ថានរីករាយសហការផ្តល់ជូនកូនត្នោតដល់អាជ្ញាធរ ដើម្បីយកទៅដាំនៅតាមដងមហាវិថីឆ្ពោះទៅព្រលានយន្តហោះតេជោតាខ្មៅ។

លោករដ្ឋមន្រ្តីជំរុញលើកទឹកចិត្តដល់ប្រជាពលរដ្ឋកម្ពុជាឱ្យដាំដើមរុក្ខជាតិរបស់ជាតិគឺដើមត្នោត។ ដើមត្នោតជាអត្តសញ្ញាណជាតិ ដែលបានផ្សារភ្ជាប់ទៅវប្បធម៌របស់ដូនតាខ្មែរតាំងពីកកើតទឹកដីមក។ ការដាំដើមត្នោតប្រយោជន៍ជួយផ្សព្វផ្សាយតម្លៃវប្បធម៌ជាតិ និងបង្កើនការចាប់អារម្មណ៍ដល់ទេសចរបរទេសបានស្គាល់ពីរុក្ខជាតិជាអត្តសញ្ញាណរបស់ជាតិខ្មែរនៅពេលធ្វើដំណើរមកប្រទេសកម្ពុជា។

លោកបន្តថា ក្រសួងនឹងបើកយុទ្ធាការចែកកូនត្នោតជាង ៣០ ម៉ឺនក្នុង ១ ឆ្នាំ ដោយឥតគិតថ្លៃ បន្ថែមការចែកជូនកូនឈើជាង ១ លានដើមទៀតជូនប្រជាពលរដ្ឋកម្ពុជា ដើម្បីដាំនិងស្តារព្រៃឈើឡើងវិញឱ្យបានជាង ៦០% នៅឆ្នាំ២០៥០។

លោក ស៊ីន ចាន់សិរីវុត្ថា មន្រ្តីអ្នកនាំពាក្យអាកាសចរស៊ីវិលបានឲ្យកម្ពុជាថ្មីដឹងថា ការដាំរុក្ខជាតិណាមួយក្នុងបរិវេណព្រលានត្រូវមានការសិក្សាច្បាស់លាស់ ដើម្បីកុំឲ្យប៉ះពាល់ដល់សុវត្ថិភាពនៃការហោះហើរ។

ទាក់ទងការបំផុសគំនិតដាំដើមត្នោតនៅតាមដងមហាវិថីថ្មីទៅព្រលានយន្តហោះតេជោតាខ្មៅ បើតាមមន្រ្តីអាកាសចរស៊ីវិលបានអះអាងថា កិច្ចការនេះពាក់ព័ន្ធអាជ្ញាធរដែនដី មិនស្ថិតនៅក្នុងការគ្រប់គ្រងរបស់អាជ្ញាធរព្រលាននោះទេ។

ក្នុងគម្រោងអភិវឌ្ឍព្រលានយន្តហោះតេជោតាខ្មៅ ក៏មានការស្ថាបនាមហាវិថីថ្មីតភ្ជាប់ពីមហាវិថីសម្តេចតេជោ ហ៊ុន សែន ឬផ្លូវ ៦០ ម៉ែត្រ ឆ្ពោះទៅព្រលានយន្តហោះតេជោតាខ្មៅ ដែលមានប្រវែងជាង ១៣ គីឡូម៉ែត្រ។ មហាវិថីថ្មីនេះសាងសង់កាត់ភូមិសាស្រ្តខេត្តកណ្តាលដោយឆ្លងកាត់ផ្លូវក្រវាត់ក្រុងទី ៣ និងផ្លូវជាតិលេខ ២ ភ្ជាប់មកមហាវិថីសម្តេចតេជោ ហ៊ុន សែន (ឬផ្លូវ ៦០ ម៉ែត្រ)។

ប្រាប់កម្ពុជាថ្មីតាមតេលេក្រាម លោក ឌឹម បូរ៉ា មន្រ្តីអ្នកនាំពាក្យរដ្ឋបាលខេត្តកណ្តាលបានឲ្យដឹងថា ចំពោះគម្រោងដាំដើមត្នោតតាមហាវិថីថ្មីភ្ជាប់ទៅព្រលានយន្តហោះតេជោតាខ្មៅឆ្លងកាត់ភូមិសាស្រ្តខេត្តកណ្តាល រដ្ឋបាលខេត្តពុំទាន់ទទួលបានព័ត៌មានជាក់លាក់នៅឡើយទេ។

បើតាមមន្រ្តីអ្នកនាំពាក្យរូបនេះ ការដាំដើមត្នោតទៅព្រលានយន្តហោះតេជោក្រុងតាខ្មៅ បើតាមលោកដឹងពីមន្ទីរបរិស្ថានខេត្តគ្រោងនឹងដាំពីថ្នាក់ជាតិ ដោយសហការជាមួយក្រុមហ៊ុនធ្វើព្រលាន។

យ៉ាងណាមិញ លោក ឌឹម បូរ៉ា បានបញ្ជាក់ថា រដ្ឋបាលខេត្តកណ្តាលក៏បានបំផុសឲ្យពលរដ្ឋនិងអាជ្ញាធរតាមមូលដ្ឋានចូលរួមដាំដើមឈើនៅក្នុងបរិវេណទីតាំងសមស្របនៅទូទាំងក្រុងស្រុកឲ្យបាន ១ ម៉ឺនដើម ក្នុង ១ ឆ្នាំ ខណៈដែលបច្ចុប្បន្នរដ្ឋបាលខេត្តក៏កំពុងរៀបចំឲ្យមានឧទ្យានតាមបបណ្តាក្រុងស្រុកទាំង ១៣។

បើតាមមន្រ្តីអាកាសចរស៊ីវិល វឌ្ឍនភាពនៃការសាងសង់ព្រលានយន្តហោះតេជោកក្រុងតាខ្មៅ មកដល់ពេលនេះសម្រេចបានប្រមាណ ៧០ ភាគរយ ហើយតាមគម្រោងនឹងបញ្ចប់ការសាងសង់ដំណាក់កាលទី ១ និងសម្ពោធដាក់ឲ្យប្រើប្រាស់នៅពាក់កណ្តាលឆ្នាំ ២០២៥។

ដោយចាយកញ្ចប់ថវិកាវិនិយោគអស់ប្រមាណ ១ ៥០០ លានដុល្លារ ព្រលានយន្តហោះតេជោតាខ្មៅថ្មីត្រូវបានអភិវឌ្ឍជាព្រលានយន្តហោះកម្រិតថ្នាក់ 4E។ តាមរយៈព្រលានយន្តហោះដែលចាយទុនខ្ទង់ពាន់លានដុល្លារនេះ នឹងចូលរួមអភិវឌ្ឍ ក៏ដូចជាបើកចំហជើងមេឃនៃវិស័យអាកាសចរណ៍របស់ប្រទេសកម្ពុជា ក្នុងការពង្រីកការតភ្ជាប់ការហោះហើរដោយត្រង់ទៅគ្រប់តំបន់ទូទាំងពិភពលោក៕

The post គម្រោងដាំដើមត្នោត តាមមហាវិថីថ្មីទៅព្រលានយន្តហោះតេជោតាខ្មៅ រដ្ឋមន្រ្តីក្រសួងបរិស្ថានប្រកាសរង់ចាំសហការ appeared first on Kampuchea Thmey Daily.

មកដឹងសមិទ្ធផល ដែលអាកាសចរណ៍ស៊ីវិលសម្រេចបាន ក្នុងរយៈពេល៥ឆ្នាំមកនេះ

Sophal Tuon — Mon, 19 Feb 2024 07:45:26 +0000

លោក ស៊ីន ចាន់សិរីវុត្ថា អ្នកនាំពាក្យអាកាសចរណ៍ស៊ីវិលកម្ពុជា បានឱ្យដឹងថា ក្នុងរយៈពេល៥ឆ្នាំ ចាប់ពីឆ្នាំ២០១៩-២០២៣ រដ្ឋលេខាធិការដ្ឋានអាកាសចរណ៍ស៊ីវិលបានខិតខំប្រឹងប្រែងបំពេញការងាររបស់ខ្លួនតាមតួនាទី ភារកិច្ចយ៉ាងសកម្ម ជាពិសេសក្នុងស្ថានការណ៍នៃការរីករាលដាលនៃជំងឺកូវីដ-១៩ ដែលបង្កផលប៉ះពាល់ខ្លាំងដល់វិស័យអាកាសចរណ៍ស៊ីវិល។

បើតាមលោក ស៊ីន ចាន់សិរីវុត្ថា សមិទ្ធផលសំខាន់ៗដែលរដ្ឋលេខាធិការដ្ឋានអាកាសចរណ៍ស៊ីវិលសម្រេចបាន និងឆ្លើយតបទៅនឹងការអនុវត្តផែនការយុទ្ធសាស្ត្រអភិវឌ្ឍន៍ជាតិ ឆ្នាំ ២០១៩-២០២៣ មានដូចជា៖

ការសាងសង់អាកាសយានដ្ឋានអន្តរជាតិភ្នំពេញថ្មី(អាកាសយានដ្ឋានអន្តរជាតិតេជោ)៖ ជាការសាងសង់អាកាសយានដ្ឋានអន្តរជាតិខ្នាតធំកម្រិតលំដាប់ថ្នាក់ (4F) ជាការកសាងហេដ្ឋារចនាសម្ព័ន្ធថ្មីទាំងស្រុងលើទំហំដី ២៦០០ ហិកតា។ តាមផែនការមេបានបង្ហាញថា អាកាសយានដ្ឋាននេះត្រូវបានរចនាឡើងដោយចែកចេញជា ៣ដំណាក់កាល៖ ដំណាក់កាលទី១-បឋម៖ ជាដំណាក់កាលដំបូង “រយៈពេលខ្លី” គិតពីថ្ងៃចាប់ផ្តើមសាងសង់ក្នុងឆ្នាំ២០១៩ រហូតដល់ថ្ងៃដាក់ឱ្យដំណើរការ ឆ្នាំ២០២៥។ ដំណាក់កាលទី១-បន្ទាន់៖ ជាដំណាក់កាលបន្ទាន់ “រយៈពេលមធ្យម” គិតចាប់ពីឆ្នាំ២០២៥ ដល់២០៣០ ដោយមានការសាងសង់ផ្លូវរត់ទី២ និងហេដ្ឋារចនាសម្ព័ន្ធផ្លូវបរពាក់ព័ន្ធ។ ដំណាក់កាលទី២៖ ជាដំណាក់កាល “រយៈពេលវែង” គិតចាប់ពីឆ្នាំ២០៣០ ដល់ ២០៥០ និងដំណាក់កាលទី៣៖ ជាដំណាក់កាល “អនាគត” គិតចាប់ពីឆ្នាំ២០៥០ ឡើងទៅ។

ការសាងសង់អាកាសយានដ្ឋានអន្តរជាតិសៀមរាបថី្ម៖ ជាការកសាងសង់អាកាសយានដ្ឋានអន្តរជាតិកម្រិតលំដាប់ថ្នាក់ (4E) ជាការកសាងហេដ្ឋារចនាសម្ព័ន្ធថ្មីទាំងស្រុងលើផ្ទៃដីទំហំ ៧០០,៦ ហិកតា ហើយនៅពេលខាងមុខ នឹងមានការបង្កើតតំបន់សេដ្ឋកិច្ចពិសេស តំបន់ឧស្សាហកម្មរណបអាកាសយានដ្ឋានហៅថា “ទីក្រុងអាកាសយានដ្ឋាន Airport City” ដែលមានដីបម្រុងប្រមាណជា ១០០០ ហិកអាកាសយានដ្ឋានអន្តរជាតិសៀមរាបអង្គរថ្មី ដែលទើបនឹងសម្ភោធដាក់ឱ្យដំណើការ កាលពីថ្ងៃទី១៦ ខែវិច្ឆិកា ឆ្នាំ២០២៣ ក្រោមអធិបតីភាពដ៏ខ្ពង់ខ្ពស់បំផុតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ហើយអាកាសយានដ្ឋាននេះនឹងរួមចំណែកយ៉ាងសំខាន់ដល់ការអភិវឌ្ឍន៍វិស័យទេសចរណ៍នៅព្រះរាជាណាចក្រកម្ពុជា។

ការសាងសង់អាកាសយានដ្ឋានអន្តរជាតិតារាសាគរ៖ ជាការកសាងសង់អាកាសយានដ្ឋានអន្តរជាតិកម្រិតលំដាប់ថ្នាក់ (4E) ជាការកសាងហេដ្ឋារចនាសម្ព័ន្ធថ្មីទាំងស្រុងលើផ្ទៃដីទំហំ ២១៨ ហិកតា នៅដំណាក់កាលទី១ ដែលមានឈ្មោះសសេរជាអក្សរកាត់ VDDS (ICAO code) និង DYS (IATA code) និងមានដីបម្រុងសម្រាប់ការអភិវឌ្ឍទំហំជិត ១០០០ ហិកតា និងមានគម្រោងអភិវឌ្ឍទៅជា (4F) នៅដំណាក់កាល២រយៈពេលវែង។

ការស្ដារនិងធ្វើឱ្យប្រសើរឡើងអាកាសយានដ្ឋានអន្តរជាតិខេត្តព្រះសីហនុ៖ តាមផែនការមេដែលត្រូវបានធ្វើបច្ចុប្បន្នកម្មនៅឆ្នាំ ២០១៩ បានបង្ហាញឱ្យឃើញថា អាកាសយានដ្ឋាននេះ ត្រូវការធ្វើឱ្យប្រសើរឡើង និងបង្កើនសមត្ថភាពហេដ្ឋារចនាសម្ព័ន្ធ និងឋបនីយភ័ណ្ឌ សំខាន់ៗមួយចំនួន ដើម្បីឆ្លើយតបទៅនឹងកំណើននិងតម្រូវការ ដែលត្រូវចំណាយទុនវិនិយោគសរុបប្រមាណ ២០០ លានដុល្លារអាមេរិក។ សម្រាប់រយៈពេលខ្លី និងមធ្យមឆ្នាំ ២០៣០ អាកាសយានដ្ឋាននេះ មានសមត្ថភាពទទួលអ្នកដំណើចំនួន ៣,៦ លាននាក់ និងទំនិញតាមផ្លូវអាកាសចំនួន ៣៥,០០០ តោនក្នុងមួយឆ្នាំ និងសម្រាប់រយៈពេលវែងឆ្នាំ២០៤០ មានសមត្ថភាពទទួលអ្នកដំណើរចំនួន ៦ លាននាក់ និងទំនិញតាមផ្លូវអាកាសចំនួន ៥២,០០០ តោនក្នុងមួយឆ្នាំ។

លើសពីនេះទៀត អ្នកនាំពាក្យអាកាសចរណ៍ស៊ីវិល បានគូសបញ្ជាក់ថា គម្រោងសាងសង់ និង ស្ដារឡើងវិញអាកាសយានដ្ឋានបន្ទាប់បន្សំ រួមមាន៖ អាកាសយានដ្ឋានប៉ោយប៉ែត អាកាសយានដ្ឋានកោះរ៉ុង អាកាសយានដ្ឋានកោះកុង(ទីតាំងថ្មី) អាកាសយានដ្ឋានមណ្ឌលគិរី(ទីតាំងថ្មី) អាកាសយានដ្ឋានបាត់ដំបង អាកាសយានដ្ឋានកំពង់ឆ្នាំង និងអាកាសយានដ្ឋានស្ទឹងត្រែង៕

The post មកដឹងសមិទ្ធផល ដែលអាកាសចរណ៍ស៊ីវិលសម្រេចបាន ក្នុងរយៈពេល៥ឆ្នាំមកនេះ appeared first on Kampuchea Thmey Daily.

អាកាសយានដ្ឋានអន្តរជាតិភ្នំពេញថ្មីសាងសង់សម្រេចបានជាង ៦៤% ចំណាយអស់ជាង ៩៣០លានដុល្លារហើយ

Sophal Tuon — Thu, 15 Feb 2024 07:24:37 +0000

គិតមកដល់ដើមខែកុម្ភៈនេះ គម្រោងសាងសង់អាកាសយានដ្ឋានអន្តរជាតិតេជោ(ភ្នំពេញថ្មី) សម្រេចការសាងសង់បានចំនួនជាង ៦៤ភាគរយ ដោយគម្រោងនេះចាយលុយអស់ ៩៣២លានដុល្លារហើយ។ នេះបើតាមការបញ្ជាក់របស់លោក ស៊ីន ចាន់សិរីវុត្ថា អនុរដ្ឋលេខធិការ និងជាអ្នកនាំពាក្យនៃរដ្ឋលេខាធិការដ្ឋានអាកាសចរណ៍ស៊ីវិលកម្ពុជា។

ថ្លែងប្រាប់កម្ពុជាថ្មី នៅថ្ងៃនេះ លោក ស៊ីន ចាន់សិរីវុត្ថា បានឱ្យដឹងថា ជាមធ្យមការចំណាយទៅលើគម្រោងប្រចាំថ្ងៃអស់ចន្លោះប្រមាណពីជាង ២លានដុល្លារ ទៅ ៣លានដុល្លារ ក្នុងមួយថ្ងៃ។

ដោយឡែក ការកសាងសង់ផ្លូវតភ្ជាប់ពីមហាវិថីសម្តេចតេជោ កាត់ផ្លូវជាតិលេខ២ ឆ្ពោះទៅកាន់អាកាសយានដ្ឋានដែលមានទទឹង៦០ម៉ែត្រ និងបណ្តោយប្រវែង ១៣.៥ គីឡូម៉ែត្រ សម្រេចបាន៨៥% ហើយ គិតមកដល់ពេលនេះ។

បើតាមលោក ស៊ីន ចាន់សិរីវុត្ថា គម្រោងអាកាសយានដ្ឋានអន្តរជាតិនេះ បានចាប់ផ្តើមដំណើរការសាងសង់នៅឆ្នាំ២០១៩ ហើយគ្រោងនឹងបញ្ចប់នៅចុងឆ្នាំឆ្នាំ២០២៤ (ដំណាក់កាលទី១) (យោងលើកម្មវិធីការងារមេ Updated Master Schedule) ដែលបានធ្វើបច្ចុប្បន្នភាពចុងក្រោយដោយ CAIC/Cambodia Airport Investment Co.,Ltd )។

កាលពីថ្ងៃទី ១៤ កុម្ភៈ លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល និងក្រុមអ្នកជំនាញបានចុះពិនិត្យផ្ទាល់អំពីវឌ្ឍនភាពនៃដំណើរការសាងសង់អាកាសយានដ្ឋានអន្តរជាតិតេជោ ភ្នំពេញថ្មីនេះ។

លោក ស៊ីន ចាន់សិរីវុត្ថា បានឱ្យដឹងទៀតថា សម្តេចធិបតី ហ៊ុន ម៉ាណែត នឹងធ្វើដំណើរទស្សនកិច្ចចុះទៅផ្ទាល់ ដើម្បីពិនិត្យពីដំណើរការសាងសង់គម្រោងអាកាសយានដ្ឋាននេះ នៅខែ មីនា ខាងមុខ។

អ្នកនាំពាក្យរូបនេះ បានគូសបញ្ជាក់ថា បើពុំមានការប្រែប្រួល អាកាសយានដ្ឋានអន្តរជាតិតេជោ(TIA) នឹងគ្រោងដាក់ឲ្យដំណើរការ នៅក្នុងចុងឆមាសទី១ ឆ្នាំ២០២៥ ខាងមុខនេះ។

សូមបញ្ជាក់ថា គម្រោងអាកាសយាន្តដ្ឋានអន្តរជាតិតេជោ ត្រូវបានរាជរដ្ឋាភិបាលបានផ្តល់សិទ្ធិឱ្យ ក្រុមហ៊ុន CAIC ដែលជាក្រុមហ៊ុនបណ្តាក់ទុនរួមគ្នារវាងរាជរដ្ឋាភិបាលកម្ពុជា និងក្រុមហ៊ុន OCIC សាងសង់ និងអភិវឌ្ឍអាកាសយានដ្ឋានអន្តរជាតិភ្នំពេញថ្មី នៅខេត្តកណ្តាល និងខេត្តតាកែវ លើផ្ទៃដីទំហំ ២ ៦០០ហិចតា ស្ថិតនៅចម្ងាយ ២០គីឡូម៉ែត្រពីភាគខាងត្បូងភ្នំពេញ៕

The post អាកាសយានដ្ឋានអន្តរជាតិភ្នំពេញថ្មីសាងសង់សម្រេចបានជាង ៦៤% ចំណាយអស់ជាង ៩៣០លានដុល្លារហើយ appeared first on Kampuchea Thmey Daily.

លោក ស៊ីន ចាន់សិរីវុត្ថា៖ ក្រុមហ៊ុនអាកាសចរណ៍ឡាវនឹងធ្វើការហោះហើរត្រង់ពីវៀងចន្ទន៍-ភ្នំពេញ-វៀងចន្ទន៍ ឆាប់ៗនេះ

Sophal Tuon — Mon, 05 Feb 2024 07:13:31 +0000

ក្រុមហ៊ុនអាកាសចរណ៍ឡាវនឹងធ្វើការហោះហើរត្រង់ឡើងវិញពី វៀងចន្ទន៍-ភ្នំពេញ-វៀងចន្ទន៍ ចាប់ពីថ្ងៃទី១៩ ខែមីនា ឆ្នាំ២០២៤ ខាងមុខនេះតទៅ។ នេះបើតាមការបញ្ជាក់របស់លោក ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលកម្ពុជា។

អ្នកនាំពាក្យរូបនេះបានឱ្យដឹងថា នៅថ្ងៃទី៥ ខែកុម្ភៈ ឆ្នាំ២០២៤នេះ រដ្ឋលេខាធិការដ្ឋានអាកាសចរណ៍ស៊ីវិល បានចេញលិខិតផ្តល់ការអនុញ្ញាតសម្រាប់ការហោះហើរតាមសំណើរបស់ក្រុមហ៊ុនអាកាសចរណ៍ឡាវរួចរាល់ហើយដែរ។

ក្រុមហ៊ុនអាកាសចរណ៍ឡាវ ក៏ធ្លាប់បានធ្វើការហោះហើរត្រង់លើកំណាត់ផ្លូវវៀងចន្ទន៍-ភ្នំពេញ-វៀងចន្ទន៍ តាំងពីអំឡុងទសវត្សរ៍៨០ រហូតដល់ពាក់កណ្តាលទសវត្សរ៍២០០០ តែដោយសារកត្តាទីផ្សារបានធ្វើឱ្យការហោះហើរលើកំណាត់ផ្លូវនេះ ត្រូវបានផ្អាកមួយរយៈ។ ដោយឡែកក្រុមហ៊ុនអាកាសចរណ៍ឡាវ បានប្រើប្រាស់សិទ្ធិហោះហើររបស់ខ្លួនលើកំណាត់ផ្លូវនេះ ជាមួយក្រុមហ៊ុនអាកាសចរណ៍វៀតណាម (Codeshare agreement) តែទោះជាក្នុងស្ថានភាពណាក៏ដោយ ក្រុមហ៊ុនអាកាសចរណ៍ឡាវ នៅតែបន្តការហោះហើរត្រង់រវាង ហ្លួងព្រះបាង-ប៉ាក់សេ-សៀមរាប-ប៉ាក់សេ-ហ្លួងព្រះបាង ដោយប្រើប្រាស់យន្តហោះប្រភេទ ATR 72 ដែលមានចំនួនជើងហោះហើរប្រមាណ ៣ជើង ក្នុងមួយសប្តាហ៍។

លោក សិរីវុត្ថា បានបន្តទៀតថា ក្នុងរយៈពេលវែង ក្រុមហ៊ុនអាកាសចរណ៍ឡាវ ក៏មានគម្រោងនឹងធ្វើការតភ្ជាប់ផ្លូវហោះហើរទៅកាន់ខេត្តព្រះសីហនុផងដែរ។

អ្នកនាំពាក្យ បានរំលឹកថា នៅក្នុងជំនួបពិភាក្សាការងាររវាង សម្តេចធិបតី ហ៊ុន ម៉ាណែត នាយករដ្ឋមន្ត្រី កម្ពុជា ជាមួយលោក ថង លុនស៊ីសុលីត ប្រធានរដ្ឋ នៃសាធារណរដ្ឋប្រជាធិបតេយ្យប្រជាមានិតឡាវ ក្នុង
ឱកាសនៃការចូលរួមក្នុង “វេទិកាខ្សែក្រវាត់ និងផ្លូវ លើកទី៣” នៅរដ្ឋធានីប៉េកាំង សាធារណរដ្ឋប្រជាមានិតចិន កាលពីខែតុលា ឆ្នាំ២០២៣ សម្តេចធិបតី បានវាយតម្លៃខ្ពស់ ចំពោះវឌ្ឍនភាពរីកចម្រើននៃកិច្ចសហប្រត្តិការលើគ្រប់វិស័យរវាងប្រទេសទាំងពីរ ដែលសម្រេចបានកន្លងមក។

ក្នុងឱកាសនោះ សម្តេចធិបតី បានលើកឡើងនូវគំនិតផ្តួចផ្តើមមួយចំនួនពាក់ព័ន្ធនឹងការជំរុញកិច្ចសហប្រតិបត្តិការក្នុងវិស័យទេសចរណ៍ តាមរយៈការដាក់ចេញនូវកិច្ចសហប្រតិបត្តិការទេសចរណ៍ត្រីភាគី កម្ពុជា-ឡាវ-វៀតណាម “ប្រទេសបី គោលដៅតែមួយ (Three Countries One Destination)” និងការតភ្ជាប់ជើងហោះហើរត្រង់ ភ្នំពេញ-វៀងចន្ទន៍-ភ្នំពេញ។ ជាមួយគ្នានោះដែរ លោក ថងលុន ស៊ីសុលីត បានប្រកាសគាំទ្រគំនិតផ្ដួចផ្ដើមរបស់សម្ដេចធិបតី ពាក់ព័ន្ធនឹងកិច្ចសហប្រតិបត្តិការទេសចរណ៍ត្រីភាគី កម្ពុជា-ឡាវ-វៀតណាម “ប្រទេសបី គោលដៅតែមួយ (Three Countries One Destination)”។

ចំណែកនៅក្នុងដំណើរទស្សនៈកិច្ចជាផ្លូវការរបស់លោក ថោង ខុន អតីតរដ្ឋមន្ត្រីក្រសួងទេសចរណ៍ កាលពីខែមីនា ឆ្នាំ២០២៣ កន្លងមកក៏បានជំរុញឱ្យភាគីឡាវ បើកការហោះហើរត្រង់ វៀងចន្ទន៍-ភ្នំពេញ-វៀងចន្ទន៍ វិញផងដែរ។ ដោយពិនិត្យឃើញគ្រប់យ៉ាងបានដំណើរការជាប្រក្រតីឡើងវិញ ក្នុងនោះវិស័យទេសចរណ៍ ក៏មានការរីកចម្រើនជាបន្តបន្ទាប់ និងបង្កលក្ខណៈងាយស្រួលដល់ការធ្វើដំណើររបស់ភ្ញៀវទេសចរ ក្រុមហ៊ុនអាកាសចរណ៍ឡាវ ដែលជាក្រុមហ៊ុនរបស់រដ្ឋ បានសម្រេចចិត្តធ្វើការហោះត្រង់ឡើងវិញ វៀងចន្ទន៍-ភ្នំពេញ-វៀងចន្ទន៍ ដែលគ្រោងចាប់ផ្តើមហោះនាថ្ងៃ១៩ ខែមីនា ឆ្នាំ២០២៤ ខាងមុខតទៅ ដោយក្នុងមួយសប្តាហ៍ មានចំនួន៣ជើង គឺថ្ងៃអង្គារ-ព្រហស្បតិ៍ និងសៅរិ៍ ដោយប្រើយន្តហោះ Air Bus320 ឬ ATR 72។

គួរបញ្ជាក់ផងដែរថា ឡាវគឺជាភ្ញៀវទេសចរបរទេសធំទី៤ ដែលបានធ្វើដំណើរមកទស្សនៈកិច្ចកម្សាន្តនៅក្នុងប្រទេសកម្ពុជា កាលពីឆ្នាំ ២០២៣ ដោយមានចំនួនសរុបជាង ៣៧ម៉ឺននាក់ កើនឡើងរហូតដល់ទៅ៣០២%។ ក្រុមហ៊ុនអាកាសចរណ៍ឡាវជឿជាក់ថា ភ្ញៀវទេសចរកម្ពុជា និងភ្ញៀវទេសចរបរទេស នឹងចូលរួមគាំទ្រដល់ការហោះហើរត្រង់នេះ៕

The post លោក ស៊ីន ចាន់សិរីវុត្ថា៖ ក្រុមហ៊ុនអាកាសចរណ៍ឡាវនឹងធ្វើការហោះហើរត្រង់ពីវៀងចន្ទន៍-ភ្នំពេញ-វៀងចន្ទន៍ ឆាប់ៗនេះ appeared first on Kampuchea Thmey Daily.

ម្តាយលោកបណ្ឌិត ម៉ៅ ហាវណ្ណាល់ ទទួលមមរណភាព

Sophal Tuon — Sat, 20 Jan 2024 04:13:13 +0000

លោក ស៊ីន ចាន់សិរីវុត្ថា អនុរដ្ឋលេខាធិការលេខាធិការដ្ឋានអាកាសចរស៊ីវិល បានផ្ញើសារចូលរួមរំលែកទុក្ខចំពោះមរណភាព ឧបាសិកា ឡុង សារ៉ាត់ ដែលត្រូវជាម្តាយបង្កើតរបស់លោកបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុក រដ្ឋលេខាធិការដ្ឋានអាកាសចរណ៍ស៊ីវិល កាលពីយប់ថ្ងៃទី ១៩ ខែ មករា ឆ្នាំ ២០២៤។

The post ម្តាយលោកបណ្ឌិត ម៉ៅ ហាវណ្ណាល់ ទទួលមមរណភាព appeared first on Kampuchea Thmey Daily.