វគ្គបណ្តោះបណ្តាលនេះបានធ្វើឡើងកាលពីថ្ងៃទី ៧ ខែឧសភា ឆ្នាំ ២០២៦ តាមអនឡាញ ដោយមានការចូលរួមពី លោកគ្រូ អ្នកគ្រូ មកពីតំបន់ដាច់ស្រយាល និង ខេត្តជាប់ព្រំដែន រួមមាន ខេត្តព្រះវិហារ សៀមរាប ឧត្ដរមានជ័យ បន្ទាយមានជ័យ និង ពោធិ៍សាត់ ដែលវគ្គបណ្តុះបណ្តាលនេះមានសារសំខាន់ជាខ្លាំងសម្រាប់ការងារបង្រៀន និង ការរស់នៅប្រចាំថ្ងៃ។

ក្រៅពីការរៀបចំវគ្គបណ្តុះបណ្តាលអនឡាញ នាយកដ្ឋានបរិវត្តកម្មឌីជីថល នឹងចុះបណ្តុះបណ្តាលផ្ទាល់ ព្រមទាំងបានចុះជួយគាំទ្របំពាក់បរិក្ខារបច្ចេកវិទ្យា ដើម្បីលើកកម្ពស់ហេដ្ឋារចនាសម្ព័ន្ធឌីជីថលនៅតាមសាលារៀនដែលរងផលប៉ះពាល់ដោយសារសង្គ្រាមព្រំដែន។ សកម្មភាពនេះ បង្ហាញពីការយកចិត្តទុកដាក់ និង ការគាំទ្រយ៉ាងជាប់លាប់របស់ក្រសួងអប់រំ យុវជន និង កីឡា ក្នុងការគាំទ្រដល់ លោកគ្រូ អ្នកគ្រូ និង រួមចំណែកលើកកម្ពស់គុណភាពអប់រំនៅកម្ពុជា នៅគ្រប់កាលៈទេសៈ។

ការបណ្តុះបណ្តាលគ្រូបង្រៀនតាមបន្ទាត់ព្រំដែនឱ្យចេះប្រើប្រាស់ប្រព័ន្ធផ្សព្វផ្សាយ និង បញ្ញាសិប្បនិម្មិត (AI) ឆ្លើយតបទៅនឹងផែនការយុទ្ធសាស្ត្ររបស់ក្រសួងអប់រំ យុវជន និង កីឡា ដែលនឹងធ្វើទំនើបកម្មសាលារៀនតាមតំបន់ព្រំដែនឱ្យក្លាយជាសាលារៀនឌីជីថល។

លោកបណ្ឌិតសភាចារ្យ ហង់ជួន ណារុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និង កីឡា ធ្លាប់បានលើកឡើងថា គោលដៅយុទ្ធសាស្ត្ររបស់ ក្រសួងអប់រំ យុវជន និង កីឡា ក្នុងការធ្វើទំនើបកម្មសាលារៀនតាមតំបន់ព្រំដែនឱ្យក្លាយជាសាលារៀនឌីជីថល តាមរយៈការរៀបចំបន្ទប់សិក្សាបច្ចេកវិទ្យា ការប្រើប្រាស់ថ្នាលសិក្សាឌីជីថលកម្រិតបឋម និង មធ្យមសិក្សា ជាពិសេសគឺការជំរុញឱ្យយុវជនជំនាន់ក្រោយស្វែងយល់ពីបច្ចេកវិទ្យា និង បញ្ញាសិប្បនិម្មិត (AI) តាំងពីវ័យក្មេងឱ្យបានច្បាស់លាស់ ដើម្បីធានាបានថា ធនធានមនុស្សនៅតាមតំបន់ព្រំដែនមានសមត្ថភាពឌីជីថលក្នុងការប្រកួតប្រជែងខ្ពស់សម្រាប់អនាគតកម្ពុជា៕
អត្ថបទ ៖ សំអឿន

The post ក្រសួងអប់រំ បណ្តុះបណ្តាលគ្រូបង្រៀនតាមបន្ទាត់ព្រំដែនឱ្យចេះប្រើប្រាស់ប្រព័ន្ធផ្សព្វផ្សាយ និង បញ្ញាសិប្បនិម្មិត (AI) appeared first on Kampuchea Thmey Daily.

នៅក្នុងកិច្ចប្រជុំពិភាក្សាស្ដីពីវិធីសាស្ត្របង្រៀនមុខវិជ្ជាវិទ្យាសាស្ត្រ កាលពីព្រឹកថ្ងៃទី ៤ ឧសភានេះ នៅទីស្តីការក្រសួង លោកឧបនាយករដ្ឋមន្ត្រី បានផ្ដល់អនុសាសន៍ឱ្យពង្រឹងការបង្រៀនមុខវិជ្ជាវិទ្យាសាស្ត្រ ចាប់ពីកម្រិតបឋមសិក្សា ដោយផ្ដោតលើការផ្សារភ្ជាប់ទ្រឹស្ដីទៅនឹងការអនុវត្តជាក់ស្ដែងក្នុងជីវភាពប្រចាំថ្ងៃ។ ចំណែក លោកគ្រូ អ្នកគ្រូ ត្រូវផ្លាស់ប្ដូរពីវិធីសាស្ត្រឱ្យសិស្សទន្ទេញចាំមាត់ មកជាការបណ្ដុះស្មារតីឱ្យសិស្សចេះឆ្ងល់ ចេះសួរដេញដោល និងមានការចូលរួមយ៉ាងសកម្មក្នុងថ្នាក់រៀន ព្រមទាំងត្រូវលុបបំបាត់គម្លាតរវាងមុខវិជ្ជារូបវិទ្យា និងគណិតវិទ្យា ដែលទាមទារឱ្យមានការប្រើប្រាស់រូបមន្តប្រទាក់ក្រឡាគ្នា។

ជាមួយគ្នានេះ លោកបណ្ឌិតសភាចារ្យ ក៏បានសង្កត់ធ្ងន់លើការវិភាគលទ្ធផល នៃតេស្តរង្វាយតម្លៃអន្តរជាតិ (PISA) ដើម្បីកែលម្អគុណភាពអប់រំឱ្យស្របតាមស្ដង់ដារពិភពលោក និងជំរុញឱ្យបង្កើនការអនុវត្តជាក់ស្ដែងជាជាងទ្រឹស្ដី សំដៅលុបបំបាត់គម្លាតរវាងការបណ្ដុះបណ្ដាល និងការអនុវត្តនៅតាមសាលារៀន។ ជាពិសេស ត្រូវព្យាយាមពង្រីកការផ្សព្វផ្សាយនូវរាល់ឯកសារដែលបានបោះពុម្ពរួចឱ្យបានទូលំទូលាយដល់គ្រូបង្រៀននៅទូទាំងប្រទេស ដើម្បីធានាបាននូវសមធម៌ និងប្រសិទ្ធភាព នៃការបង្រៀនដល់សិស្សានុសិស្សគ្រប់រូប។

លោកបណ្ឌិតសភាចារ្យ បានថ្លែងអំណរគុណយ៉ាងជ្រាលជ្រៅចំពោះកិច្ចខិតខំប្រឹងប្រែងរបស់ក្រុមការងារបច្ចេកទេស និងភាគីពាក់ព័ន្ធទាំងអស់ ដែលបានលះបង់កម្លាំងកាយចិត្តក្នុងការរៀបចំ និងកែលម្អវិធីសាស្ត្របង្រៀនឱ្យកាន់តែមានភាពប្រសើរឡើង និងជឿជាក់ថា ស្មារតី នៃកិច្ចប្រជុំនេះ នឹងក្លាយជាកម្លាំងចលករយ៉ាងសំខាន់ក្នុងការជំរុញគុណភាពអប់រំលើមុខវិជ្ជាវិទ្យាសាស្ត្រ (STEM) នៅកម្ពុជាឱ្យឈានឡើងមួយកម្រិតទៀត ស្របតាមចក្ខុវិស័យរបស់រាជរដ្ឋាភិបាល៕
អត្ថបទ ៖ សំអឿន

The post គ្រូបង្រៀន ត្រូវប្ដូរពីវិធីសាស្ត្រឱ្យសិស្សទន្ទេញចាំមាត់ មកការបណ្ដុះស្មារតីសិស្សចេះឆ្ងល់ និងសួរដេញដោលក្នុងថ្នាក់រៀនវិញ appeared first on Kampuchea Thmey Daily.

ការជំរុញរបស់លោករដ្ឋមន្ត្រីនេះបានធ្វើឡើងកាលពីរសៀលថ្ងៃទី ៣០ ខែមេសា ឆ្នាំ ២០២៦ ក្នុងឱកាសអញ្ជើញជាអធិបតីក្នុងពិធីបិទ “ការប្រឡងជ្រើសរើសសិស្សពូកែទូទាំងប្រទេស ផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា ថ្នាក់ទី ៩ និងថ្នាក់ទី ១២ សម័យប្រឡង ៖ ២៦ មេសា ២០២៦” នៅវិទ្យាល័យ ជា ស៊ីម សន្ធរម៉ុក។

នៅក្នុងឱកាសនោះ លោកឧបនាយករដ្ឋមន្ត្រី បានផ្ដាំផ្ញើដល់សិស្សជ័យលាភីទាំងអស់ ឱ្យបន្តខិតខំរៀនសូត្រ ដើម្បីក្លាយជាសិស្សល្អ កូនល្អ និងពលរដ្ឋល្អ ប្រកបដោយគុណធម៌ និងសីលធម៌ ដែលស័ក្តិសមជាសសរទ្រូង និងជាអ្នកបន្តវេនដ៏មានសក្តានុពលសម្រាប់អភិវឌ្ឍន៍ប្រទេសជាតិ។

លោកឧបនាយករដ្ឋមន្ត្រី មានប្រសាសន៍ថា «ការមកដល់ទីនេះ ក្នុងនាមជាតំណាងសិស្សពូកែទូទាំងប្រទេស គឺជាជោគជ័យដ៏ធំធេងរួចទៅហើយសម្រាប់ក្មួយៗ ទោះបីជាជាប់ជ័យលាភី ឬមិនជាប់ក៏ដោយ ព្រោះការរៀនសូត្រមិនបញ្ចប់ត្រឹមការប្រឡងនេះទេ ប៉ុន្តែវាគឺជាការចាប់ផ្ដើម នៃដំណើរឆ្ពោះទៅក្លាយជាអ្នកវិទ្យាសាស្ត្រ បញ្ញាវន្ត និងជាអ្នកដឹកនាំ នាពេលអនាគត»។

ជាមួយគ្នានេះដែរ លោកឧបនាយករដ្ឋមន្ត្រី បានលើកទឹកចិត្តឱ្យសិស្សានុសិស្សត្រៀមខ្លួនឱ្យបានល្អសម្រាប់ការប្រឡងសញ្ញាបត្រមធ្យមសិក្សាបឋមភូមិ និងទុតិយភូមិ ខាងមុខ ដោយសង្ឃឹមថា នឹងឃើញវត្តមានជ័យលាភីថ្នាក់ទី ៩ ត្រឡប់មកប្រកួតម្ដងទៀតនៅថ្នាក់ទី ១២ ក្នុងឆ្នាំ ២០២៩ និងសង្ឃឹមថា ជ័យលាភីថ្នាក់ទី ១២ នឹងទទួលបាន «និទ្ទេស A» គ្រប់ៗ គ្នា។

ការប្រឡងជ្រើសរើសសិស្សពូកែទូទាំងប្រទេស ផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា ថ្នាក់ទី ៩ និងថ្នាក់ទី ១២ សម័យប្រឡង ៖ ២៦ មេសា ២០២៦” បានប្រព្រឹត្តិទៅរយៈពេល ៥ ថ្ងៃ ចាប់ពីថ្ងៃទី ២៦ រហូតដល់ថ្ងៃទី ៣០ ខែមេសា ឆ្នាំ ២០២៦ នៅវិទ្យាល័យ ជា ស៊ីម សន្ធរម៉ុក ដោយជ្រើសរើសបានជ័យលាភីទាំង ៦០ រូប ក្នុងនោះ ថ្នាក់ទី ៩ ចំនួន ៣០ រូប និងថ្នាក់ទី ១២ ចំនួន ៣០ រូប ដែលភាគច្រើនជាសិស្សមកពីតាមបណ្តាខេត្តនានា៕
អត្ថបទ ៖ សំអឿន

The post រដ្ឋមន្ត្រីអប់រំ លើកទឹកចិត្តសិស្សានុសិស្សត្រៀមខ្លួនឱ្យបានល្អសម្រាប់ការប្រឡងឌីប្លូម និងបាក់ឌុប នាពេលខាងមុខ appeared first on Kampuchea Thmey Daily.

តាមប្រភពដដែល ការលើកឡើងរបស់បណ្ឌិតសភាចារ្យ ហង់ជួន ណារ៉ុន ធ្វើឡើងនារសៀលថ្ងៃទី២០ ខែមេសា ឆ្នាំ២០២៦ ក្នុងឱកាសរដ្ឋមន្ត្រីក្រសួងអប់រំ និង លោក វ៉ាង វិនពីន ឯកអគ្គរដ្ឋទូតសាធារណរដ្ឋប្រជាមានិតចិនប្រចាំកម្ពុជា បានអញ្ជើញជាសហអធិបតីក្នុង ពិធីអបអរសាទរ ទិវាភាសាចិនអន្តរជាតិ ឆ្នាំ២០២៦ ដែលប្រព្រឹត្តទៅនៅ វិទ្យាស្ថានខុងជឺនៃរាជបណ្ឌិត្យសភាកម្ពុជា។ ក្រសួងបញ្ជាក់ថា ទិវានេះ គឺជាកម្មវិធីដែលគាំទ្រដោយស្ថានទូតចិនប្រចាំកម្ពុជា និងមជ្ឈមណ្ឌលសហប្រតិបត្តិការ ផ្លាស់ប្ដូរភាសាចិន-បរទេសនៃក្រសួងអប់រំចិន គឺជាវេទិកាដ៏សំខាន់មួយដែលត្រូវបានរៀបចំឡើងជារៀងរាល់ឆ្នាំ ក្នុងគោលបំណងជំរុញលើកទឹកចិត្តដល់យុវជនក្នុងការសិក្សាភាសាចិន លើកកម្ពស់ការអប់រំភាសាចិននៅកម្ពុជា និងពន្លាតការផ្លាស់ប្ដូររវាងប្រជាជន និងប្រជាជនកម្ពុជា-ចិន។

ក្នុងឱកាសនោះ បណ្ឌិតសភាចារ្យ ហង់ជួន ណារ៉ុន បញ្ជាក់ថា៖ “ចំណេះដឹងផ្នែកភាសានេះ មិនត្រឹមតែជួយដល់ការអភិវឌ្ឍបុគ្គលប៉ុណ្ណោះទេ ថែមទាំងជាកម្លាំងចលករយ៉ាងសំខាន់ក្នុងការជំរុញសេដ្ឋកិច្ចជាតិ ដើម្បីសម្រេចឱ្យបាននូវចក្ខុវិស័យកម្ពុជាឆ្នាំ ២០៥០ ក្នុងការក្លាយជាប្រទេសដែលមានចំណូលខ្ពស់ ព្រមទាំងបន្តថែរក្សាចំណងមិត្តភាពកម្ពុជា-ចិន ឱ្យកាន់តែរឹងមាំថែមទៀត”។

ជាមួយគ្នានេះ លោក វ៉ាង វិនពីន ឯកអគ្គរដ្ឋទូតសាធារណរដ្ឋប្រជាមានិតចិនប្រចាំកម្ពុជា បានកោតសរសើរចំពោះទំនាក់ទំនងមិត្តភាពដែកថែបរវាងចិន និងកម្ពុជា ដែលមានប្រវត្តិសាស្ត្រយ៉ាងយូរអង្វែង និងកំពុងឈានទៅមុខយ៉ាងរឹងមាំ តាមរយៈកិច្ចសហប្រតិបត្តិការគ្រប់ជ្រុងជ្រោយ ដើម្បីឆ្ពោះទៅរកការកសាងអនាគតរួមគ្នាមួយដ៏ត្រចះត្រចង់។ លោកថា៖ “ភាសាចិន គឺជាស្ពានសម្រាប់ទំនាក់ទំនង និងជាចំណងវប្បធម៌នៃមិត្តភាពដែលអនុញ្ញាតឱ្យអ្នកសិក្សាអាចស្វែងយល់ពីអរិយធម៌ចិន ក៏ដូចជាបើកកិច្ចសហប្រតិបត្តិការរវាងប្រជាជន និងប្រជាជនឱ្យកាន់តែស៊ីជម្រៅ”។

ឯកអគ្គរដ្ឋទូត ក៏បានបង្ហាញមោទនភាពចំពោះវឌ្ឍនភាពនៃមិត្តភាពរវាងប្រទេសទាំងពីរ ដែលបានដាក់បញ្ចូលភាសាចិនទៅក្នុងប្រព័ន្ធអប់រំជាតិរបស់កម្ពុជា។ លោក វ៉ាង វិនពីន បានប្ដេជ្ញាចិត្តបន្តបង្កើតឱកាសបន្ថែមទៀតសម្រាប់យុវជនកម្ពុជាក្នុងការរៀនសូត្រ ដើម្បីបន្តរក្សាមិត្តភាពនេះឱ្យកាន់តែរីកសុសសាយ។

បន្ថែមពីនេះ បណ្ឌិតសភាចារ្យ ហង់ជួន ណារ៉ុន បានថ្លែងអំណរគុណចំពោះរដ្ឋាភិបាលចិន ដែលបានបន្តគាំទ្រដល់ការអភិវឌ្ឍ នៅកម្ពុជានាពេលកន្លងមក និងថ្លែងអំណរគុណចំពោះដៃគូអប់រំ បុគ្គលិកអប់រំ និងស្ថាប័នពាក់ព័ន្ធទាំងអស់ ដែលបានរួមចំណែកលើកកម្ពស់ការអប់រំ និងជាពិសេសការអប់រំភាសាចិននៅកម្ពុជា ព្រមទាំងលើកទឹកចិត្តឱ្យសិស្សានុសិស្សទាំងអស់ចាប់យកឱកាសនេះដើម្បីសិក្សារៀនសូត្រ ផ្លាស់ប្ដូរបទពិសោធ ដើម្បីអភិវឌ្ឍន៍ប្រទេសជាតិនាពេលអនាគត៕

The post រដ្ឋមន្ត្រីអប់រំ៖ ការចេះភាសាចិន គឺជាឧត្តមភាពប្រកួតប្រជែងដ៏សំខាន់សម្រាប់យុវជនកម្ពុជាក្នុងការចាប់យកឱកាសការងារ appeared first on Kampuchea Thmey Daily.

លើក​ឡើង​ក្នុង​ទិវា​ព្រះពុទ្ធសាសនា​អន្តរជាតិ ឆ្នាំ​២០២៦ ព្រឹក​ថ្ងៃ​ទី​៨ ខែ​មេសា ឆ្នាំ​២០២៦​នេះ នៅ​សាល​សន្និសីទ​ចតុម្មុខ លោក​ឧបនាយករដ្ឋមន្ត្រី ហង់ជួន ណារ៉ុន មាន​ប្រសាសន៍​ថា ទិវា​ព្រះពុទ្ធសាសនា​អន្តរជាតិ នៅ​ព្រះរាជាណាចក្រ​កម្ពុជា​ នា​ពេល​នេះ សមស្រប​ទៅ​នឹង​បរិបទ​នៃ​ពិភពលោក​បច្ចុប្បន្ន កំពុង​ប្រឈម​នឹង​វិបត្តិ​ជា​ច្រើន​ដូចជា​ ជម្លោះ​ប្រដាប់​អាវុធ សង្គ្រាម​សេដ្ឋកិច្ច ការ​បម្រែបម្រួល​អាកាសធាតុ​ ភាព​ឡើង​កំដៅ​នៃ​ភូមិ​សាស្ត្រ​នយោបាយ​ ភាព​ផុយ​ស្រួយ​នៃ​ជម្លោះ​សាសនា ការ​បំពុល​បរិស្ថាន​ ជំងឺឆ្លង និង​គម្លាត​សង្គម ធ្វើ​ឱ្យ​មនុស្ស​រស់នៅ​មិន​មាន​ភាព​ចុះ​សម្រុង​ និង​មិន​យោគយល់​គ្នា ព្រមទាំង​បង្ក​ភាព​រាំង​ស្ទះ​ដល់​ការ​រីកចម្រើន​របស់​សង្គម ហើយ​វិបត្តិ​ទាំង​នោះ ​បាន​ក្លាយ​ជា​បញ្ហា​រួមនៅក្នុងសង្គម ក្នុងតំបន់ ក៏ដូចជាពិភពលោក ធ្វើឱ្យប៉ះពាល់ដល់សន្តិសុខ សណ្តាប់ធ្នាប់​សង្គម សេដ្ឋកិច្ច និងវិស័យសាសនាទៀតផង។

លោក​ឧបនាយករដ្ឋមន្ត្រី​បាន​បន្ថែម​ថា​ ព្រះពុទ្ធសាសនា គឺជា​មាគ៌ា​មួយ​ដ៏​សំខាន់​ក្នុងការ​បង្កើត​នូវ​សាមគ្គីភាព ​ភាតរភាព និង​រក្សាសន្តិភាព​ តាមរយៈ​ការ​ផ្តល់​ឱវាទ​ដោយ​ផ្អែក​លើ​ព្រហ្មវិហារធម៌ ​សង្គហធម៌ និង​មាគ៌ាកណ្តាល ដែលអាចជួយឱ្យបុគ្គល គ្រួសារ សង្គម និង​ពិភពលោក​ប្រកាន់​យក​នូវ​វប្បធម៌​អហិង្សា ការ​គោរព​អធ្យាស្រ័យ​យោគយល់​គ្នា​ខ្ពស់​ ការ​ប្រកាន់​យក​នូវ​សីលធម៌​រស់នៅ​ល្អ សុខដុមរមនា ដែល​ជា​ឧបករណ៍​ចាំ​បាច់​សម្រាប់​សន្តិភាព និងការអភិវឌ្ឍប្រកបដោយចីរភាព។

ក្នុង​ឱកាស​នោះ​លោក​ឧបនាយករដ្ឋមន្ត្រី ហង់ជួន ណារ៉ុន បាន​ផ្ដល់​នូវ​ទស្សនាទាន​មួយ​ចំនួន​ដែល​មាន​ដូច​ជា​ ការ​ជំរុញ​បំផុស​ប្រធាន​បទ​​នៃ​ទិវា​ពុទ្ធសាសនា​ពិភព​លោក​នា​ថ្ងៃ​នេះ​ឱ្យ​បាន​ទូលំទូលាយ​ប្រែ​ក្លាយ​ជា​សកម្មភាព​ជាក់​ស្ដែង​ដើម្បីធានា​សុខដុម​រមនា​នៅ​ក្នុង​សង្គម និង​សន្ដិភាព​សម្រាប់​ពិភព​លោក។ ការ​ចូលរួម​អភិវឌ្ឍ​ព្រះ​ពុទ្ធសាសនា​ឱ្យ​កាន់​តែ​រីក​ចម្រើន ដោយ​លើក​កម្ពស់​តួនាទី​ព្រះពុទ្អ​សាសនា​ក្នុង​សង្គម​តាម​រយៈ​ការ​អប់រំ​លើក​កម្ពស់​សីលធម៌​សង្គម និង​សុខភាព​ផ្លូវ​ចិត្ត​របស់​ប្រជាជន​​។ ជំរុញ​ការ​យល់​ដឹង​របស់​ពលរដ្ឋ​ចំពោះ​ព្រះ​ពុទ្ធសាសនា​ឱ្យ​បាន​ស៊ីជម្រៅ និង​គោរព​ប្រតិបត្តិ​ត្រឹមត្រូវ និង​ការ​បន្ត​រក្សា​សាមគ្គីភាព​គ្នា​ជា​ធ្លុង​មួយ​ដើម្បី​រក្សា​នូវ​ឧត្តម​ប្រយោជន៍​ជាតិ​។

​គួរ​ឱ្យ​ដឹង​ផង​ដែរ​ថា​ ទិវា​ព្រះ​ពុទ្ធសាសនា​អន្តរជាតិ​ ក្នុង​ឆ្នាំ​២០២៦​នេះ ​ត្រូវ​បាន​ប្រារព្ធ​ឡើង​ក្រោម​ប្រធាន​បទ​ «ពង្រឹងសាមគ្គីធម៌ ជំរុញសន្តិភាព តាមរយៈមាគ៌ាព្រះពុទ្ធសាសនា»។ ទិវា​នេះ​ត្រូវ​បាន​រៀប​ចំ​នៅ​សាល​សន្និសីទ​ចតុម្មុខ​ ដោយ​មាន​ការ​យាន​និមន្ត្ត និង​អញ្ជើញ​ចូលរួម​ពី​ សម្ដេច​ព្រះអភិសិរីសុគន្ធា​មហាសង្ឃ​រាជា​ធិបតី កិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជ នៃគណៈធម្មយុត្តិកនិកាយ នៃ​ព្រះ​រាជា​ណា​ចក្រ​កម្ពុជា, សម្តេចព្រះមហាសុមេធាធិបតី កិត្តិបណ្ឌិត អំ លីមហេង សម្តេច​ព្រះសង្ឃ​នាយក គណៈមហានិកាយ សម្តេចសង្ឃ​ព្រះសង្ឃនាយករង សម្ដេច​ព្រះរាជាគណៈ​ ព្រះមន្រ្តីសង្ឃ,មន្ត្រី​រដ្ឋាភិបាល តំណាង​អង្គទូត និង​ តំណាង​សាសនិក​គ្រប់​សាសនា ព្រម​ទាំង​និស្សិត​សរុបចំនួនជាង៩០០អង្គ/នាក់។

ពិធី​នេះ​ក៏​មាន​ការ​ឡើង​អាន​ព្រះរាជសារ​ថ្វាយ​ព្រះពរ​ព្រះ​មហាក្សត្រ​ដោយ​សម្ដេច​សង្ឃ​ទាំង​ពីរ​គណៈ និង​ការ​ឡើង​អាន​ព្រះ​រាជសារ​ព្រះមហាក្សត្រ​ និង​សុន្ទរកថា​ស្វាគមន៍​ដោយ​រដ្ឋមន្ត្រី​ក្រសួង​ធម្មការ​លោក ចាយ បូរិន ផង​ដែរ៕

អត្ថបទ​ដោយ ហ៊ុន សិរីវឌ្ឍន៍ ​

​​​

The post ឧបនាយករដ្ឋមន្ត្រី ហង់ជួន ណារ៉ុន៖ ព្រះ​ពុទ្ធសាសនា​គឺ​ជា​មាគ៌ា​មួយ​ដ៏​សំខាន់​ក្នុង​ការ​បង្កើត​សាមគ្គីភាព ភាតរភាព និង​រក្សា​សន្តិភាព appeared first on Kampuchea Thmey Daily.

ការណែនាំធ្វើឡើងនាថ្ងៃទី៣០ ខែមីនា ក្នុងឱកាសបណ្ឌិតសភាចារ្យ ហង់ជួន ណារ៉ុន ចុះទស្សនកិច្ច និងសំណេះសំណាលជាមួយបុគ្គលិកអប់រំ នៅវិទ្យាល័យ ហ៊ុន សែន ប៊ុនរ៉ានី ផ្សារដើមថ្កូវ ដោយការចូលរួមពីសំណាក់ ប្រធានមន្ទីរអប់រំ យុវជន និងកីឡារាជធានីភ្នំពេញ នាយក នាយិកា និងលោកគ្រូ អ្នកគ្រូ។ ក្នុងឱកាសនោះ លោកបានលើកឡើងថា គុណភាពអប់រំត្រូវតែដើរទន្ទឹមនឹងវិន័យ និងសីលធម៌ក្នុងការរស់នៅស្អាត។

ក្នុងសំណេរនោះ បានសរសេរថា៖ “គណៈគ្រប់គ្រងសាលាត្រូវបន្ថែមការយកចិត្តទុកដាក់លើការគ្រប់គ្រងសំរាមនៅតាមថ្នាក់រៀន និងតូបលក់អាហារក្នុងសាលា ដោយពង្រឹងយន្តការដឹកនាំឱ្យមានប្រសិទ្ធភាព ជាពិសេសត្រូវចាត់អ្នកទទួលខុសត្រូវពិនិត្យមើលរាល់សប្តាហ៍ និងប្រើប្រាស់កម្លាំងរបស់ក្រុមប្រឹក្សាយុវជន និងកាយរឹទ្ធិ ដើម្បីចូលរួមសម្អាតទីធ្លាសាលា និងបណ្តុះទម្លាប់គ្រប់គ្រងកាកសំណល់ដល់សិស្សានុសិស្ស”។

ជាមួយគ្នានេះ ​រដ្ឋមន្ត្រីក្រសួងអប់រំ ក៏បានបញ្ជាក់ថា ក្នុងទិសដៅអភិវឌ្ឍទៅមុខ ក្រសួងរៀប​ចំ​យុទ្ធសាស្ត្រក្នុងការប្រែក្លាយវិទ្យាល័យ ហ៊ុន សែន ប៊ុនរ៉ានី ផ្សារដើមថ្កូវ ឱ្យទៅជាវិទ្យាល័យគំរូ តាមរយៈការលើកកម្ពស់សមត្ថភាពវិជ្ជាជីវៈគ្រូបង្រៀនជាប្រចាំ ក៏ដូចជាការប្រើប្រាស់បច្ចេកវិទ្យាក្នុងការរៀននិងបង្រៀន ។ ក្រសួងនឹងបន្តចុះជួយគាំទ្រលើការរៀបចំថ្នាក់កុំព្យូទ័រ និងការប្រើប្រាស់ឧបករណ៍ឌីជីថល ដើម្បីបង្កើនប្រសិទ្ធភាពនៃការរៀន និងបង្រៀនឱ្យទាន់យុគសម័យឌីជីថល។

ដើម្បីប្រែក្លាយជាវិទ្យាល័យគំរូ បណ្ឌិតសភាចារ្យ ហង់ជួន ណារ៉ុន ក៏អំពាវនាវឱ្យមានការចូលរួមពីគ្រប់ភាគីពាក់ព័ន្ធ ជាពិសេស មាតាបិតា អ្នកអាណាព្យាបាល ក្នុងការគាំទ្រដល់ការសិក្សារបស់កូនៗ សហការជាមួយលោកគ្រូអ្នកគ្រូ ក្នុងគោលដៅអភិវឌ្ឍន៍សមត្ថភាពសិស្សានុសិស្ស និងគុណភាពអប់រំនៅកម្ពុជា៕

The post រដ្ឋមន្ត្រីអប់រំ ណែនាំនាយកសាលាយកចិត្តទុកដាក់បន្ថែមលើការគ្រប់គ្រងសំរាមតាមថ្នាក់រៀន និងតូបលក់អាហារ appeared first on Kampuchea Thmey Daily.

នៅក្នុងកិច្ចប្រជុំស្តីពីការពិនិត្យរបាយការណ៍វឌ្ឍនភាពប្រចាំត្រីមាសទី ៤ ឆ្នាំ ២០២៥ នៃការអនុវត្តគម្រោងវិទ្យាសាស្ត្រ និងបច្ចេកវិទ្យាសម្រាប់ការអប់រំមធ្យមសិក្សាទុតិយភូមិ (STEP-UP)កាលពីព្រឹកថ្ងៃទី ៣០ មីនា លោកឧបនាយករដ្ឋមន្ត្រី បានមានប្រសាសន៍ថា ការពង្រឹងសមត្ថភាពគ្រូពាក់ព័ន្ធ និងវិធីសាស្ត្របង្រៀន និងការគ្រប់គ្រងថ្នាក់រៀនប្រកបដោយប្រសិទ្ធភាពនេះធ្វើឡើងតាមរយៈការរៀបចំសៀវភៅណែនាំ និងសៀវភៅជំនួយដល់ការបង្រៀនដែលមានស្តង់ដារតែមួយ ការបន្តពង្រឹងការអនុវត្តអភិក្រមសាលារៀនទាំងមូល និងការរៀបចំផែនការសកម្មភាពគម្រោងជាប្រព័ន្ធរួម ដើម្បីជំរុញប្រសិទ្ធភាពការអនុវត្ត តាមដាន ត្រួតពិនិត្យ និងកែលម្អជាប្រចាំ ធានាឱ្យបាននូវនិរន្តរភាពគម្រោងក្នុងបុព្វហេតុលើកកម្ពស់គុណភាពអប់រំ និងការអភិវឌ្ឍធនធានមនុស្សនៅកម្ពុជាប្រកបដោយចីរភាព។

ក្នុងឱកាសនោះ លោកឧបនាយករដ្ឋមន្ត្រី បានកោតសរសើរ និងថ្លែងអំណរគុណយ៉ាងជ្រាលជ្រៅដល់ក្រុមការងារចំពោះកិច្ចខិតខំប្រឹងប្រែងបំពេញភារកិច្ចប្រកបដោយវឌ្ឍនភាព និងបានផ្តល់អនុសាសន៍ឱ្យក្រុមការងារបន្តយកចិត្តទុកដាក់ចុះទៅពិនិត្យផ្ទាល់ដល់សាលារៀន ដើម្បីវាយតម្លៃប្រសិទ្ធភាព នៃការបង្រៀន បន្តពង្រឹងការអនុវត្តវិធីសាស្ត្របង្រៀនថ្មីៗ ជាពិសេសត្រូវជំរុញការរៀបចំជាប្រព័ន្ធទិន្នន័យរួម និងប្រព័ន្ធគ្រប់គ្រងសាលារៀនតែមួយ។

គួរបញ្ជាក់ថា គម្រោងវិទ្យាសាស្ត្រ និងបច្ចេកវិទ្យាសម្រាប់ការអប់រំមធ្យមសិក្សាទុតិយភូមិ (STEP-UP) គឺជាគម្រោងយុទ្ធសាស្ត្រមួយដែលគាំទ្រដោយធនាគារអភិវឌ្ឍន៍អាស៊ី (ADB) ដើម្បីលើកកម្ពស់គុណភាពអប់រំលើមុខវិជ្ជា STEM (វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា) នៅកម្ពុជា។ សម្រាប់ឆ្នាំ ២០២៥ គម្រោងសម្រេចបានវឌ្ឍនភាពសំខាន់ៗ រួមមាន ការកែលម្អហេដ្ឋារចនាសម្ព័ន្ធ និងសម្ភាររូបវន្តដោយបានបញ្ចប់ការសាងសង់មន្ទីរពិសោធន៍ស្តង់ដារ និងកែលម្អមន្ទីរពិសោធន៍វិទ្យាសាស្ត្រ បន្ទប់ ICT នៅតាមវិទ្យាល័យគោលដៅជាច្រើន។ ទន្ទឹមនឹងនេះ ក៏មានការអភិវឌ្ឍសមត្ថភាពគ្រូបង្រៀន (CPD) លើវិធីសាស្ត្របង្រៀនបែបថ្មីដល់គ្រូបង្រៀនមុខវិជ្ជាវិទ្យាសាស្ត្ររាប់ពាន់នាក់ ការបង្កើនការប្រើប្រាស់បច្ចេកវិទ្យា និងបង្កើនសមត្ថភាពគ្រូក្នុងការប្រើប្រាស់ឌីជីថល (Digital Literacy) ដើម្បីបញ្ចូលក្នុងកម្មវិធីបង្រៀន។

លើសពីនេះ គម្រោងក៏បានអភិវឌ្ឍន៍កម្មវិធីសិក្សា និងធនធានឌីជីថលតាមរយៈការបង្កើតមេរៀនជាវីដេអូ និងការពិសោធន៍បែបនិម្មិត (Virtual Labs) ដែលសិស្សអាចចូលមើលបានតាមរយៈប្រព័ន្ធគ្រប់គ្រងការសិក្សា (Learning Management System – LMS)។ ជាងនេះទៅទៀត គម្រោងបានបង្កើនការចូលរួមរបស់សិស្សក្នុងផ្នែក STEM ដោយផ្តល់អាហារូបករណ៍ដល់សិស្សដែលមានជីវភាពខ្វះខាត ជាពិសេសសិស្សស្រី ដើម្បីលើកទឹកចិត្តឱ្យពួកគេរៀនមុខវិជ្ជាវិទ្យាសាស្ត្រនៅកម្រិតមធ្យមសិក្សាទុតិយភូមិ ព្រមទាំងមានការតម្រង់ទិសអាជីពកម្មវិធីណែនាំអាជីពផ្នែក STEM ដែលត្រូវបានរៀបចំឡើងដើម្បីបង្ហាញសិស្សពីឱកាសការងារក្នុងទីផ្សារការងារសតវត្សរ៍ទី ២១។ ចុងក្រោយ គឺការពង្រឹងការគ្រប់គ្រងសាលារៀន ដោយបន្តពង្រឹងសាលារៀនជំនាន់ថ្មី និងសាលាបណ្តាញដោយផ្តោតលើលទ្ធផលសិក្សារបស់សិស្ស និងការប្រើប្រាស់ថវិកាឱ្យចំគោលដៅ។ដូចនេះ កិច្ចប្រជុំនេះ ផ្តោតលើការវាយតម្លៃលទ្ធផលការងារកន្លងមក វឌ្ឍនភាពសូចនាករ ដំណោះស្រាយបញ្ហាប្រឈម និងការអនុម័តផែនការសកម្មភាពបន្ត ដើម្បីជំរុញគុណភាពអប់រំ និងការអភិវឌ្ឍវិស័យអប់រំមធ្យមសិក្សា៕
អត្ថបទ ៖ សំអឿន

The post រដ្ឋមន្ត្រីអប់រំ ជំរុញឱ្យពង្រឹងសមត្ថភាពគ្រូ និងវិធីសាស្ត្របង្រៀន ដើម្បីគ្រប់គ្រងថ្នាក់រៀនប្រកបដោយប្រសិទ្ធភាព appeared first on Kampuchea Thmey Daily.

ថ្លែងក្នុងពិធីសម្ពោធ និងប្រកាសដាក់ឱ្យអនុវត្តជាផ្លូវការ “ផែនការសកម្មភាពអនុវត្តគោលនយោបាយស្ដីពីការផ្ដល់អាហារតាមសាលារៀន ឆ្នាំ ២០២៤-២០៣០” កាលពីរសៀលថ្ងៃទី ២៣ មីនា លោកឧបនាយករដ្ឋមន្ត្រី បានបន្តថា កម្មវិធីផ្ដល់អាហារតាមសាលារៀន គឺជាយុទ្ធសាស្ត្រអភិវឌ្ឍន៍មូលធនមនុស្សក្នុងក្របខ័ណ្ឌគោលនយោបាយជាតិគាំពារសង្គម ឆ្នាំ ២០២៤-២០៣៥ និងត្រូវបានដាក់បញ្ចូលជាផ្លូវការក្នុងយុទ្ធសាស្ត្រជាតិស្ដីពីសន្តិសុខស្បៀង និងអាហារូបត្ថម្ភលើកទី ៣ និងផែនការយុទ្ធសាស្ត្រអភិវឌ្ឍន៍ជាតិផងដែរ។

លោកឧបនាយករដ្ឋមន្ត្រី បានបន្តទៀតថា បច្ចុប្បន្ន កម្មវិធីផ្តល់អាហារតាមសាលារៀន ត្រូវបានអនុវត្តដោយផ្ដោតលើសសរស្តម្ភសំខាន់ៗ ៥ រួមមាន ៖ (១)ការលើកកម្ពស់គុណភាពអប់រំ និងការចូលរៀន។ (២)ការកែលម្អសុខភាព និងអាហារូបត្ថម្ភកុមារ។ (៣)ការលើកកម្ពស់វិស័យកសិកម្ម និងសេដ្ឋកិច្ចមូលដ្ឋានតាមរយៈការប្រើប្រាស់កសិផលក្នុងសហគមន៍។ (៤)ការលើកកម្ពស់សមភាពយេនឌ័រ និងប្រព័ន្ធគាំពារសង្គម និង (៥)ការពង្រឹងការចូលរួម និងភាពជាដៃគូរបស់សហគមន៍។ ផែនការសកម្មភាពនេះ នឹងក្លាយជាមគ្គុទ្ទេសក៍ដ៏ប្រសើរលើការអនុវត្តកម្មវិធីផ្ដល់អាហារតាមសាលា ដែលទាមទារឱ្យមានការចូលរួមគាំទ្រការអនុវត្តយ៉ាងពេញទំហឹងពីគ្រប់ក្រសួង ស្ថាប័ន ដៃគូអភិវឌ្ឍន៍ សប្បុរសជន និងសហគមន៍ មានលទ្ធភាពផ្ដល់អាហារជូនដល់សិស្សានុសិស្សនៅតាមសាលារៀនសាធារណៈ ដោយប្រើប្រាស់ធនធានក្នុងសហគមន៍ផ្ទាល់។

លោកបណ្ឌិតសភាចារ្យ ឧបនាយករដ្ឋមន្ត្រី បានបញ្ជាក់ថា ផែនការសកម្មភាពអនុវត្តគោលនយោបាយស្ដីពីការផ្ដល់អាហារតាមសាលារៀននាពេលនេះ នឹងត្រូវប្រើប្រាស់ជាផែនទីចង្អុលបង្ហាញមាគ៌ាឆ្ពោះទៅការអនុវត្តកម្មវិធីផ្ដល់អាហារតាមសាលារៀនដោយប្រើប្រាស់កសិផលក្នុងសហគមន៍កាន់តែមានប្រសិទ្ធភាព ព្រមទាំងជំរុញលើកទឹកចិត្តឱ្យចូលរួមកាន់តែទូលំទូលាយពីគ្រប់ភាគីពាក់ព័ន្ធ ទាំងនៅកម្រិតជាតិ កម្រិតតំបន់ និងសកល។

គិតត្រឹមដើមឆ្នាំ ២០២៦ នេះ កម្មវិធីផ្តល់អាហារតាមសាលារៀន ដោយប្រើប្រាស់កសិផលក្នុងសហគមន៍ បាននិងកំពុងអនុវត្តតាមសាលារៀនគោលដៅចំនួន ១ ១១៤ ដែលមានសិស្សទទួលផលសរុបជាង ៣០ ម៉ឺននាក់ នៅតំបន់មានភាពងាយរងគ្រោះ និងអសន្តិសុខស្បៀង។

បើតាមរបាយការណ៍ក្រុមប្រឹក្សាជាតិ គាំពារសង្គម សាលារៀនគោលដៅចំនួន ៨១៦ សាលា ដែលមានសិស្សទទួលផលប្រមាណ ២៣ ម៉ឺននាក់ បានអនុវត្តដោយប្រើប្រាស់ថវិកាជាតិ ខណៈសាលាចំនួន ២៩៨ សាលាផ្សេងទៀត កំពុងអនុវត្តដោយកម្មវិធីស្បៀងអាហារពិភពលោក (WFP)។

កម្មវិធីនេះ កំពុងត្រូវបានអនុវត្តតាមបណ្ដាខេត្តចំនួន ១០ រួមមាន ៖ ខេត្តសៀមរាប , កំពង់ធំ , ព្រះវិហារ , បាត់ដំបង , ស្ទឹងត្រែង , បន្ទាយមានជ័យ , កំពង់ចាម , កំពង់ឆ្នាំង , ពោធិ៍សាត់ , និងឧត្តរមានជ័យ ដោយមានសិស្សានុសិស្សទទួលផលសរុបចំនួនប្រមាណ ៣០ ម៉ឺននាក់។ កម្មវិធីនេះ បានរួមចំណែកដ៏សំខាន់ក្នុងការកសាងមូលធនមនុស្ស តាមរយៈការផ្ដល់អាហារពេលព្រឹកដល់កុមារនៅតាមសាលាបឋមសិក្សាគោលដៅខាងលើ។

គួរបញ្ជាក់ថា កម្មវិធីផ្តល់អាហារតាមសាលារៀន ដោយប្រើប្រាស់កសិផលក្នុងសហគមន៍ ត្រូវបានចាប់អនុវត្តចាប់តាំងពីឆ្នាំ ១៩៩៩ មក ក្នុងគោលបំណងរួមចំណែកដល់ការអភិវឌ្ឍមូលធនមនុស្ស តាមរយៈការផ្ដល់អាហារចម្អិនក្ដៅៗ មានជីវជាតិដល់សិស្សនៅតាមសាលាបឋមសិក្សាសាធារណៈ (សាលារដ្ឋ) ក្នុងតំបន់ដែលមានអសន្តិសុខស្បៀង មានភាពក្រីក្រច្រើន និងភាពងាយរងគ្រោះខ្ពស់។

កម្មវិធីនេះ បានចូលរួមលើកកម្ពស់កម្រិតអាហារូបត្ថម្ភ , បង្កើនអត្រាចុះឈ្មោះចូលរៀន , ជំរុញសិស្សានុសិស្សឱ្យមករៀនបានទៀងទាត់ , កាត់បន្ថយការបោះបង់ការសិក្សា ព្រមទាំងរួមចំណែកដល់ការលើកកម្ពស់សេដ្ឋកិច្ច និងសមធម៌នៅក្នុងសហគមន៍ផងដែរ៕
អត្ថបទ ៖ សំអឿន

The post រដ្ឋមន្ត្រីអប់រំ ៖ កម្មវិធីផ្ដល់អាហារតាមសាលារៀនជាយន្តការដ៏មានប្រសិទ្ធភាព កាត់បន្ថយគម្លាតសិក្សារវាងសិស្សទីក្រុង និងជនបទ appeared first on Kampuchea Thmey Daily.