ការថតវីដេអូ Pre-Wedding នៅតាមប្រាង្គប្រាសាទកើនជិត ៤ ពាន់វីដេអូ

Dy Bunnara — Sat, 27 Jan 2024 09:57:56 +0000

ក្រសួងវប្បធម៌និងវិចិត្រសិល្បៈបានឱ្យដឹងថា ឆ្នាំ២០២៣ មានការថតវីដេអូ Pre-Wedding នៅតាមបណ្តាប្រាង្គប្រាសាទនានាប្រមាណជិត ៤ ពាន់ធៀបនឹងឆ្នាំ២០២២ មានការកើនឡើងគួរឱ្យកត់សម្គាល់។

លោក ហាប់ ទូច រដ្ឋលេខាធិការប្រចាំការក្រសួងវប្បធម៌ និងវិចិត្រសិល្បៈបានឱ្យដឹងនៅក្នុងពិធីបិទសន្និបាតក្រសួងប្រចាំឆ្នាំ ២០២៣ ថា ចំនួនភាពយន្ត-វីដេអូមានចំនួន ៤២២០ លើសគោលដៅកំណត់ចំនួន ៣២៤ រួមមានភាពយន្តចំនួន ១៦៩ និងវីដេអូចំនួន ៤០៥១ ក្នុងនោះវីដេអូ Pre-Wedding មានចំនួន ៣៩៨០ ដែលស្ថិតក្រោមសមត្ថកិច្ចរបស់អាជ្ញាធរជាតិអប្សរាចំនួន ៣៨៦៥ អាជ្ញាធរជាតិព្រះវិហារចំនួន ៣០ និងអាជ្ញាធរជាតិសំបូរព្រៃគុកចំនួន ៨៥។

លោកបានបន្តថា ជារួមបើធៀបទៅនឹងឆ្នាំ២០២២ គឺមានការកើនឡើងចំនួន ៦០ ស្មើនឹង១.៤%។

គួរបញ្ជាក់ថា ការថតវីដេអូ Pre-Wedding មានសកម្មភាពផុលផុសយ៉ាងខ្លាំងនៅតាមប្រាង្គប្រាសាទនានានៅក្នុងរយៈពេលប៉ុន្មានឆ្នាំចុងក្រោយនេះ ពិសេសអ្នកដែលមានជីវភាពធូរធារនិងទ្រព្យធនស្តុកស្តម ដើម្បីបង្ហាញនូវរូបភាពផ្អែមល្ហែមរបស់ខ្លួន រួមនឹងឈុតបុរាណខ្មែរ ព្រោះថាការថតនៅតាមតំបន់ប្រាសាទ នឹងផ្តល់អារម្មណ៍ឱ្យគូស្វាមីភរិយាថ្មី ដូចខ្លួនជាព្រះអង្គម្ចាស់ និងព្រះនាងម្ចាស់ នៃសម័យកាលមួយយ៉ាងដូច្នោះដែរ៕

អត្ថបទ៖ សំអឿន

The post ការថតវីដេអូ Pre-Wedding នៅតាមប្រាង្គប្រាសាទកើនជិត ៤ ពាន់វីដេអូ appeared first on Kampuchea Thmey Daily.

១ ឆ្នាំ ក្រសួងវប្បធម៌ ត្រូវការថវិកាជាង ១៨០ លានដុល្លារ អភិរក្ស លើកស្ទួយ និងអភិវឌ្ឍន៍វប្បធម៌ជាតិ

អ៊ិន ពិសី — Fri, 26 Jan 2024 03:17:31 +0000

មន្ត្រីជាន់ខ្ពស់ក្រសួងវប្បធម៌ និងវិចិត្រសិល្បៈ បានអះអាងថា ក្នុង ១ ឆ្នាំ ក្រសួង ត្រូវការថវិកាប្រមាណជាង ៧៣៣ ពាន់លានរៀល ឬ ស្មើនឹងជាង ១៨០ លានដុល្លារ ដើម្បីអភិរក្ស លើកស្ទួយ និងអភិវឌ្ឍន៍វប្បធម៌ជាតិ។

ថ្លែងក្នុងពិធីបិទសន្និបាតបូកសរុបការងារឆ្នាំ ២០២៣ និងលើកទិសដៅអនុវត្តបន្តឆ្នាំ ២០២៤ កាលពីថ្ងៃទី ២៥ មករា លោក ហាប់ ទូច រដ្ឋលេខាធិការប្រចាំការ នៃក្រសួងវប្បធម៌ និងវិចិត្រសិល្បៈ បានអះអាងថា យោងតាមសេចក្ដីព្រាងបឋម (Draft Zero) នៃផែនការសកម្មភាពលម្អិតឆ្នាំ ២០២៤-២០២៨ ដើម្បីអភិរក្ស លើកស្ទួយ និងអភិវឌ្ឍន៍វប្បធម៌ជាតិ ស្របតាមយុទ្ធសាស្ត្រចតុកោណ ដំណាក់កាលទី ១ គឺមានសកម្មភាពសរុបប្រមាណចំនួន ៨០១ និងត្រូវការថវិកាប្រចាំឆ្នាំសរុបប្រមាណ ៧៣៣.២៨ ពាន់លានរៀល ស្មើនឹងប្រមាណជាង ១៨៣ លានដុល្លារ។ ក្នុងនោះសកម្មភាពសម្រាប់អនុវត្តជាមួយដៃគូមានចំនួន ១២ សកម្មភាព និងសកម្មភាពសម្រាប់ស្វែងរកថវិកាមានចំនួន ៨០ សកម្មភាព។ លោកបន្តថា សកម្មភាពដែលគ្រោងសរុបប្រមាណ ៨០១ ខាងលើនេះ នៅមិនទាន់បូកបញ្ចូលសកម្មភាពក្នុងផ្នែកសេវាគាំទ្រទូទៅនៅឡើយនោះទេ។

ពាក់ព័ន្ធនឹងបញ្ហានេះដែរ លោកស្រីបណ្ឌិត ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានរំលឹកដល់ក្រុមការងាររៀបចំផែនការយុទ្ធសាស្ត្រឆ្នាំ ២០២៤-២០២៨ របស់ក្រសួង ត្រូវតែឆ្លុះបញ្ចាំងនូវគ្រប់ចំណុចទាំងអស់ នៃយុទ្ធសាស្ត្របញ្ចកោណ ជាពិសេសការងារទាំងឡាយពាក់ព័ន្ធបញ្ចកោណទី ១ ទី ២ និង ទី ៤ ដែលសុទ្ធតែជាសកម្មភាពពាក់ព័ន្ធដោយផ្ទាល់នឹងវិស័យវប្បធម៌ និងវិចិត្រសិល្បៈ។ រីឯបញ្ចកោណទី ៣ និងទី ៥ ក៏ត្រូវរំលេចផងដែរក្នុងផែនការសកម្មភាពរបស់ក្រសួង ឱ្យប្រទាក់ក្រឡាជាមួយស្ថាប័នជាតិ អាជ្ញាធរថ្នាក់ក្រោមជាតិ និងសហគមន៍នានា ដោយត្រូវយកចិត្តទុកដាក់បង្កើនសកម្មភាពបន្ថែម។

លើសពីនេះ ត្រូវពិនិត្យឱ្យបានហ្មត់ចត់ និងត្រូវធ្វើឱ្យមានលក្ខណៈស៊ីសង្វាក់គ្នារវាងទំហំផែនការសកម្មភាព និងទំហំថវិកាដែលត្រូវការ និងដែលអាចត្រូវបានអនុម័តយកមកអនុវត្តដោយក្រសួងសេដ្ឋកិច្ច និងហិរញ្ញវត្ថុ។ ត្រូវកំណត់ឱ្យបានច្បាស់នូវសកម្មភាពអាទិភាព និងដាក់ចេញនូវតារាងពេលវេលាអនុវត្ត រួមទាំងយន្តការត្រួតពិនិត្យ តាមដាន និងវាយតម្លៃ ដើម្បីកែលម្អការអនុវត្តសកម្មភាពអាទិភាពទាំងនោះ៕

អត្ថបទ ៖ សំអឿន

The post ១ ឆ្នាំ ក្រសួងវប្បធម៌ ត្រូវការថវិកាជាង ១៨០ លានដុល្លារ អភិរក្ស លើកស្ទួយ និងអភិវឌ្ឍន៍វប្បធម៌ជាតិ appeared first on Kampuchea Thmey Daily.

លោក ហាប់ ទូច Archives - Kampuchea Thmey Daily

ការថតវីដេអូ Pre-Wedding នៅតាមប្រាង្គប្រាសាទ​កើន​ជិត ៤ ពាន់វីដេអូ

១ ឆ្នាំ ក្រសួងវប្បធម៌ ត្រូវការថវិកាជាង ១៨០ លានដុល្លារ អភិរក្ស លើកស្ទួយ និងអភិវឌ្ឍន៍វប្បធម៌ជាតិ

ការថតវីដេអូ Pre-Wedding នៅតាមប្រាង្គប្រាសាទកើនជិត ៤ ពាន់វីដេអូ