លោក ហួត ហាក់ Archives - Kampuchea Thmey Daily

ឆ្នាំ ២០២៥ ចំណូលពីភ្ញៀវទេសចរកើនឡើងជាង ២០០ លានដុល្លារ ចាក់ចូលទៅក្នុងផលិតផលក្នុងស្រុកសរុប

Dy Bunnara — Sat, 09 May 2026 03:44:57 +0000

ឆ្នាំ ២០២៥ ទោះបីជាបរិមាណភ្ញៀវទេសចរមកកម្សាន្តប្រទេសកម្ពុជាមានការថយចុះក៏ពិតមែន ប៉ុន្តែចំណូលសរុបពីវិស័យទេសចរណ៍ដែលបានចាក់បញ្ចូលទៅក្នុងផលិតផលក្នុងស្រុកសរុប (GDP) មានចំនួន ៣.៨៧៨ លានដុល្លារពោលគឺកើនឡើង ៦,៦%។

ចំនួនភ្ញៀវទេសចរអន្តរជាតិមកប្រទេសកម្ពុជា ត្រូវបានប៉ាន់ប្រមាណមានចំនួន ៥,៥៧ លាននាក់ ថយចុះ ១៦,៧% បើធៀបនឹងឆ្នាំ ២០២៤។

ទាក់ទងនឹងចម្ងល់ដែលថា ហេតុអ្វីបរិមាណភ្ញៀវទេសចរថយចុះតែចំណូលកើនឡើង តួលេខចំណូលនេះត្រូវបានបញ្ជាក់ទទួលស្គាល់ដោយធនាគារជាតិនៃកម្ពុជាផ្ទាល់។ នេះបើតាមលោក ហួត ហាក់ រដ្ឋមន្រ្តីក្រសួងទេសរណ៍។

ថ្លែងនៅក្នុងសិក្ខាសាលាផ្សព្វផ្សាយពីសូចនាករទេសចរណ៍ឆ្នាំ ២០២៥ និងការព្យាករណ៍ស្ថិតិទេសចរណ៍ឆ្នាំ ២០២៦ កាលពីម្សិលមិញនេះ លោក ហួត ហាត់ រដ្ឋមន្រ្តីក្រសួងទេសចរណ៍បានគូសបញ្ជាក់ថា មូលហេតុចម្បងគឺដោយសារតែកម្ពុជាទទួលបានភ្ញៀវទេសចរកម្រិតខ្ពស់ (High-end tourists) ច្រើន ដែលពួកគេមានលទ្ធភាពចំណាយខ្ពស់ បើប្រៀបធៀបទៅនឹងភ្ញៀវទេសចរកម្រិតទាប ឬភ្ញៀវដែលចំណាយតិច ដូច្នេះទោះបីជាចំនួនភ្ញៀវសរុបថយចុះក៏កម្រិតនៃការចំណាយរបស់ភ្ញៀវជាន់ខ្ពស់ទាំងនោះ អាចជួយជំរុញឲ្យចំណូលកើនឡើងជាង ២០០ ទៅ ២៥០ លានដុល្លារ។

ដោយឡែកពាក់ព័ន្ធការព្យាករណ៍ភ្ញៀវទេសចរមកកម្សាន្តប្រទេសកម្ពុជាក្នុងឆ្នាំ ២០២៦ នេះ លោករដ្ឋមន្រ្តីបានថ្លែងថា អ្នកជំនាញបានធ្វើការប៉ាន់ស្មានដោយផ្អែកលើមូលដ្ឋានជាក់ស្តែង និងបានបែងចែកជា ៣ ករណី។ ករណីទី១ ប្រសិនបើវិបត្តិនិងបញ្ហាប្រឈមនានានៅតែបន្តអូសបន្លាយ ចំនួនភ្ញៀវទេសចរអាចស្ថិតក្នុងរង្វង់ ៤,៦ ទៅ ៤,៨ លាននាក់។

ករណីទី២ ប្រសិនបើស្ថានភាពព្រំដែននៅមិនទាន់បានធូរស្បើយពេញលេញ ចំនួនភ្ញៀវអាចមានចន្លោះពី ៥,៣ ទៅ ៥,៥ លាននាក់។ ករណីទី ៣ ប្រសិនបើស្ថានភាពអ្វីៗត្រឡប់មកល្អប្រសើរឡើងវិញទាំងស្រុង កម្ពុជាអាចរំពឹងទទួលបានភ្ញៀវចន្លោះពី ៦,១ ទៅ ៦,៣ លាននាក់។

នៅក្នុងសិក្ខាសាលាផ្សព្វផ្សាយពីសូចនាករទេសចរណ៍ឆ្នាំ ២០២៥ និងការព្យាករណ៍ស្ថិតិទេសចរណ៍ លោក គង់ សុភារក្ស ប្រធាននាយកដ្ឋានស្ថិតិទេសចរណ៍ បានបង្ហាញពីវិធីសាស្ត្រក្នុងការរាប់ និងប្រមូលទិន្នន័យចំនួនភ្ញៀវទេសចរ ដែលត្រូវបានអនុវត្តតាមលក្ខខណៈវិទ្យាសាស្ត្រ និងស្របតាមប្រព័ន្ធស្តង់ដារបច្ចេកទេសនៃអង្គការទេសចរណ៍ពិភពលោក។

លោកថា ការរាប់ចំនួនភ្ញៀវទេសចរមិនមែនធ្វើឡើងតែមួយផ្លូវនោះទេ ប៉ុន្តែប្រើប្រាស់វិធីសាស្ត្រចម្រុះមានដូចជាការធ្វើជំរឿនដោយការរាប់ចំនួនសរុបជាក់ស្តែង រួមទាំងការអង្កេតតាមដាន និងវាយតម្លៃលើសកម្មភាពទេសចរណ៍ជាក់ស្តែង។

លោកបានលើកឡើងពីប្រភពទិន្នន័យសម្រាប់ដំណើរការនៃការរាប់គឺក្រសួងទេសចរណ៍ប្រមូលទិន្នន័យពីប្រភពសំខាន់ៗចំនួន ៣៖ គឺអគ្គនាយកដ្ឋានអន្តោប្រវេសន៍ សម្រាប់រាប់ចំនួនភ្ញៀវទេសចរអន្តរជាតិដែលចូលតាមច្រកទ្វារអន្តរជាតិ និងច្រកព្រំដែន។

មន្ទីរទេសចរណ៍រាជធានី-ខេត្តទាំង ២៥ សម្រាប់រាប់ចំនួនភ្ញៀវទេសចរផ្ទៃក្នុង (ភ្ញៀវជាតិដើរក្នុងស្រុក) និងមូលដ្ឋានអាជីវកម្មទេសចរណ៍សម្រាប់ប្រមូលទិន្នន័យពីសណ្ឋាគារ ផ្ទះសំណាក់ និងសេវាកម្មស្នាក់នៅផ្សេងៗ។

លោកបន្តថា បច្ចុប្បន្នកម្ពុជាកំពុងវិវត្តទៅរកការប្រើប្រាស់បច្ចេកវិទ្យាឌីជីថល ដើម្បីប្រមូលទិន្នន័យនៅតាមគោលដៅទេសចរណ៍ រួមទាំងការចងក្រងនិងផ្ទៀងផ្ទាត់ទិន្នន័យតាមប្រព័ន្ធកុំព្យូទ័រ ដើម្បីធានាបាននូវភាពរហ័ស និងសុក្រឹតភាព។

បើតាមលោក គង់ សុភារក្ស វិធីសាស្ត្រទាំងនេះជួយឱ្យរាជរដ្ឋាភិបាល អាចតាមដាននិន្នាការនៃការផ្លាស់ប្តូររបស់ភ្ញៀវ ដូចជាការប្តូរពីការធ្វើដំណើរតាមផ្លូវអាកាស មកផ្លូវគោកវិញជាដើម ដើម្បីរៀបចំផែនការអភិវឌ្ឍន៍ឱ្យចំគោលដៅ៕

The post ឆ្នាំ ២០២៥ ចំណូលពីភ្ញៀវទេសចរកើនឡើងជាង ២០០ លានដុល្លារ ចាក់ចូលទៅក្នុងផលិតផលក្នុងស្រុកសរុប appeared first on Kampuchea Thmey Daily.

ធុរជនអូទ្រីស ចាប់អារម្មណ៍លើសក្តានុពលវិនិយោគក្នុងវិស័យទេសចរណ៍កម្ពុជា

Din Thary — Wed, 18 Mar 2026 07:28:32 +0000

ក្នុងជំនួបជាមួយលោករដ្ឋមន្ត្រី ហួត ហាក់ នៅថ្ងៃទី១៧ ខែមិនា ឆ្នាំ២០២៦ នេះ ស្ថានទូតអូទ្រីសប្រចាំកម្ពុជា និងធុរជនពីប្រទេសអូទ្រីស បានបង្ហាញពីចំណាប់អារម្មណ៍របស់ខ្លួនលើសក្តានុពលទេសចរណ៍ និងកាលានុវត្តភាពវិនិយោគក្នុងវិស័យទេសចរណ៍កម្ពុជា ជាតារាទើបនឹងរះ។

តាមរយៈជំនួបពិភាក្សាការងារស្តីពីកិច្ចសហប្រតិបត្តិការលើវិស័យទេសចរណ៍ក្នុងឱកាសនៃបេសកកម្មពាណិជ្ជកម្មមកប្រទេសកម្ពុជា ប្រតិភូអូទ្រី បានលើកឡើងពីបេសកកម្មពាណិជ្ជកម្មរបស់ស្ថានទូតដែលបានដឹកនាំក្រុមហ៊ុនធំៗ ពីប្រទេសអូទ្រីសជាច្រើនក្រុមហ៊ុនពីអាជីវកម្មផ្សេងៗ មកសិក្សាស្វែងយល់ពីសភាពការណ៍នយោបាយ សេដ្ឋកិច្ច សង្គម កាលានុវត្តភាពវិនិយោគ ជាពិសេសលើវិស័យទេសចរណ៍។

ក្នុងជំនួបនេះដែរ តំណាងក្រុមហ៊ុនបានណែនាំអំពីសកម្មភាព និងបទពិសោធរបស់ក្រុមហ៊ុន លើការរៀបចំព្រឹត្តិការណ៍កីឡាកន្លងមក ដែលអាចរួមចំណែកជំរុញការផ្សព្វផ្សាយទេសចរណ៍កម្ពុជាទៅកាន់ទីផ្សារអន្តរជាតិ។

ជាកិច្ចឆ្លើយតប លោករដ្ឋមន្រ្តី ហួត ហាក់ អរគុណដល់ស្ថានទូតអូទ្រីសប្រចាំកម្ពុជា និងធុរជនអូទ្រីសជាប្រតិភូដែលបានមកសិក្សាស្វែងយល់ពីសភាពការណ៍នយោបាយ សេដ្ឋកិច្ច សង្គមពិតជាក់ស្តែង ដែលកំពុងមានសុខសន្តិភាព និងការរីកចម្រើនលើគ្រប់វិស័យក្រោមការដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជា។

តាមរយៈកត្តាសុខសុវត្តិភាព និងស្ថិរភាពនយោបាយ បានផ្តល់នូវកាលានុវភាពវិនិយោគ និងសក្តានុពលទេសចរណ៍ដ៏ល្អប្រៀបដូចជាតារាទើបនឹងរះបង្ហាញដល់អ្នកវិនិយោគ និងភ្ញៀវទេសចរអន្តរជាតិ។

ក្នុងជំនួបប្រកបដោយផ្លែផ្កា គូភាគី បានបញ្ជាក់ពីការប្តេជ្ញាចិត្តក្នុងការបន្តពង្រឹង និងពង្រីកកិច្ចសហប្រតិបត្តិការក្នុងវិស័យទេសចរណ៍ឱ្យកាន់តែល្អ ដើម្បីអភិវឌ្ឍវិស័យទេសចរណ៍ និងឧស្សាហកម្មបដិសណ្ឋារកិច្ចឱ្យកាន់តែរីកចម្រើន ព្រមទាំងការពិនិត្យលទ្ធភាពជម្រុញឱ្យមានជើងហោះហើរត្រង់ពីទីក្រុង Vienna មកកាន់រាជធានីភ្នំពេញ ឬខេត្តសៀមរាប។

សូមបញ្ជាក់ថា កម្ពុជា និងអូទ្រីស មានទំនាក់ទំនងការទូតដ៏ល្អតាំងពីឆ្នាំ១៩៥៦ ហើយគិតត្រឹមឆ្នាំ២០២៦ នេះ គឺមានរយៈពេលប្រមាណ៧០ឆ្នាំមកហើយ ដែលមានកិច្ចសហប្រតិបត្តិការលើវិស័យនានា រួមទាំងវិស័យវិនិយោគ ទេសចរណ៍ផងដែរ។

ក្នុងដើមឆ្នាំ២០២៦ នេះ មានភ្ញៀវទេសចរអូទ្រីសច្រើនជាង ២.០០០នាក់ បានធ្វើដំណើរទេសចរណ៍មកលេងគ្រប់គោលដៅទេសចរណ៍កម្ពុជាទាំងអស់ប្រកបដោយសុខសុវត្តិភាព និងសោមន្សរីករាយ៕

The post ធុរជនអូទ្រីស ចាប់អារម្មណ៍លើសក្តានុពលវិនិយោគក្នុងវិស័យទេសចរណ៍កម្ពុជា appeared first on Kampuchea Thmey Daily.

កម្ពុជា ស្វាគមន៍ទេសចរអន្តរជាតិជិត ៧០ ម៉ឺន នាក់ក្នុងរយៈពេល ២ ខែ ដើមឆ្នាំនេះ

Din Thary — Mon, 16 Mar 2026 04:40:41 +0000

កម្ពុជាទទួលបានភ្ញៀវទេសចរអន្តរជាតិចំនួន ៦៩ ម៉ឺននាក់ នៅក្នុងរយៈពេល ២ ខែដំបូង ឆ្នាំ២០២៦ ពោលគឺមានការធ្លាក់ចុះពី ១,២ លាននាក់ នៅរយៈពេលដូចគ្នាឆ្នាំ ២០២៥។

លោក ហួត ហាក់ រដ្ឋមន្ត្រីក្រសួងទេសចរណ៍ មានប្រសាសន៍ថា កម្ពុជា គឺជាគោលដៅទេសចរណ៍សុវត្ថិភាព និងស្វាគមន៍ភ្ញៀវទេសចរពីគ្រប់ទិសទីប្រកបដោយបដិសណ្ឋារកិច្ចដ៏កក់ក្តៅ។

លោករដ្ឋមន្ត្រី លើកឡើងបែបនេះ ក្នុងកម្មវិធី K-WAVE Peace Concert 2026 ដែលរៀបចំឡើងដោយ The Cambodia Branch of the Peaceful Unification Advisory Council (PUAC)។

ក្នុងឱកាសនៃកម្មវិធីផ្សព្វផ្សាយវប្បធម៌ដ៏មានសារៈសំខាន់ កម្ពុជា-កូរ៉េ បានវាយតម្លៃខ្លស់លើគុណតម្លៃនៃសន្តិភាព ការរួបរួមគ្នា ព្រមទាំងបញ្ជាក់ពីការប្តេជ្ញាពង្រឹង និងពង្រីកទំនាក់ទំនងការទូត «ភាពជាដៃគូយុទ្ធសាស្រ្ត» រវាងកម្ពុជា និងសាធារណរដ្ឋកូរ៉េលើគ្រប់វិស័យ ជាពិសេសកិច្ចសហប្រតិបត្តិការជំរុញទេសចរណ៍ ការផ្លាស់ប្តូរប្រជាជន និងវប្បធម៌រវាងប្រទេសទាំងពីរ ការរួមគ្នាប្រយុទ្ធប្រឆាំង និងបោសសំអាតឱ្យអស់ឧក្រិដ្ឋកម្មឆបោកអនឡាញអន្តរជាតិដែលបានជះឥទ្ធិពលជាអវិជ្ជមានលើការធ្វើដំណើរ ប្រកបអាជីវកម្ម និងទេសចរណ៍។

លោករដ្ឋមន្ត្រី ហួត ហាក់ បានកោតសរសើរ និងវាយតម្លៃខ្ពស់លើគំនិតផ្តួចផ្តើមរៀបចំព្រឹត្តិការណ៍វប្បធម៌ដ៏មានអត្ថន័យនេះ ដែលបានរួមចំណែកលើកពីគុណតម្លៃនៃសុខសន្តិភាព ការរួបរួមសាមគ្គីភាពគ្នា ការពង្រឹងចំណងមិត្តភាព និងការផ្លាស់ប្តូរវប្បធម៌រវាងព្រះរាជាណាចក្រកម្ពុជា និងសាធារណរដ្ឋកូរ៉េ ព្រមទាំងការជំរុញការផ្លាស់ប្តូរ និងការស្វែងយល់ពីគ្នា រវាងប្រជាជននៃប្រទេសទាំងពីរតាមរយៈតន្ត្រី សិល្បៈ និងវប្បធម៌។

លោករដ្ឋមន្ត្រីបានគូសបញ្ជាក់ថា រាជរដ្ឋាភិបាលកម្ពុជា បាននិងកំពុងចាត់វិធានការយ៉ាងម៉ឺងម៉ាត់ក្នុងការបង្ក្រាប និងលុបបំបាត់ដល់ឬសគល់នៃឧក្រិដ្ឋកម្មឆបោកតាមប្រព័ន្ធបច្ចេកវិទ្យា ដើម្បីធានានូវបរិយាកាសសុវត្ថិភាព និងទំនុកចិត្តសម្រាប់ភ្ញៀវទេសចរ ប្រជាពលរដ្ឋ និងវិនិយោគិន។

ក្នុងរយៈពេល ២ ខែដំបូងនៃឆ្នាំ២០២៦ កម្ពុជាទទួលបានភ្ញៀវទេសចរអន្តរជាតិប្រមាណជិត ៦៩០,០០០ នាក់ ដែលក្នុងនោះមានភ្ញៀវទេសចរកូរ៉េជិត ១៥.១០០ នាក់ ដែលបង្ហាញពីសក្តានុពល និងភាពទាក់ទាញទេសចរណ៍របស់កម្ពុជាក្នុងទីផ្សារកូរ៉េ។

យោងតាមក្រសួងទេសចរណ៍ កម្ពុជាទទួលបានភ្ញៀវទេសចរអន្តរជាតិចំនួន ៥,៥៧ លាននាក់ នៅក្នុងឆ្នាំ ២០២៥ ធ្លាក់ចុះ ១៦,៩% ប្រៀបធៀបនឹងឆ្នាំ ២០២៤ និងទេសចរជាតិប្រមាណ ២៥ លាននាក់ ខណៈចំណូលទេសចរណ៍សម្រេចបានប្រមាណ ៣,៧ ពាន់លានដុល្លារ កើន ៣%៕

អត្ថបទ៖ ឡេង ដេត

The post កម្ពុជា ស្វាគមន៍ទេសចរអន្តរជាតិជិត ៧០ ម៉ឺន នាក់ក្នុងរយៈពេល ២ ខែ ដើមឆ្នាំនេះ appeared first on Kampuchea Thmey Daily.

បារាំងប្ដេជ្ញាបន្តផ្សព្វផ្សាយសក្តានុពលទេសចរណ៍កម្ពុជា

Din Thary — Wed, 11 Mar 2026 03:57:13 +0000

ក្រុមហ៊ុន VINCI Group ដែលជាក្រុមហ៊ុនអន្តរជាតិឈានមុខគេក្នុងការគ្រប់គ្រង និងដំណើរការអាកាសយានដ្ឋានធំៗ ប្ដេជ្ញាបន្តកិច្ចសហការផ្សព្វផ្សាយសក្តានុពលទេសចរណ៍កម្ពុជាដល់ពិភពលោក។

ការឱ្យដឹងបែបនេះ តាមរយៈជំនួបពិភាក្សាការងារ រវាងលោក ហួត ហាក់ រដ្ឋមន្ត្រីក្រសួងទេសចរណ៍ និងលោក Emmanuel MENANTEAU សមាជិកគណៈកម្មាធិការប្រតិបត្តិនៃក្រុមហ៊ុន VINCI Airport និងជានាយកទទួលបន្ទុកតំបន់សហរដ្ឋអាមេរិក អឺរ៉ុបខាងជើង និងខាងកើត និងអាស៊ីអាគ្នេយ៍ និងជាប្រធានក្រុមប្រឹក្សាភិបាលនៃក្រុមហ៊ុន Société Concessionnaire de l’Aéroport (SCA) នៅថ្ងៃទី១០ ខែមីនា ឆ្នាំ២០២៦។

លោក Emmanuel MENANTEAU បានលើកឡើងពីការធ្វើបច្ចុប្បន្នភាពអំពីសកម្មភាពចុងក្រោយនៃអាកាសយានដ្ឋាននៅខេត្តព្រះសីហនុ និងវឌ្ឍនភាពនៃអាកាសយានដ្ឋានអន្តរជាតិតេជោ ព្រមទាំងការផ្លាស់ប្តូរ និងពិភាក្សាអំពីទស្សនវិស័យវិស័យទេសចរណ៍ និងវិស័យសក្តានុពលសម្រាប់កិច្ចសហប្រតិបត្តិការជាមួយក្រសួងទេសចរណ៍ ក្រុមប្រឹក្សាភិបាលទេសចរណ៍កម្ពុជា (CTB) និងក្រុមហ៊ុន ក្នុងការរៀបចំផែនការសកម្មភាពផ្សព្វផ្សាយសក្តានុពលទេសចរណ៍កម្ពុជា និងទាក់ទាញភ្ញៀវទេសចរអន្តរជាតិមកកាន់កម្ពុជាបន្ថែមទៀត។

លោក ហួត ហាក់ បានកោតសរសើរ វាយតម្លៃខ្ពស់ចំពោះក្រុមហ៊ុនដែលបានចូលរួមយ៉ាងសកម្មក្នុងការអភិវឌ្ឍវិស័យអាកាសចរណ៍ និងការគាំទ្រដល់ការរីកចម្រើននៃវិស័យទេសចរណ៍កម្ពុជារហូតមក។

លោករដ្ឋមន្ត្រី ក៏បានបញ្ជាក់ពីសារៈសំខាន់នៃការពង្រឹងកិច្ចសហការរវាងវិស័យអាកាសចរណ៍ និងវិស័យទេសចរណ៍ ក្នុងការលើកកម្ពស់ការតភ្ជាប់អន្តរជាតិ និងការអភិវឌ្ឍវិស័យទេសចរណ៍ឱ្យកាន់តែមានចីរភាព និងប្រកួតប្រជែងនៅក្នុងតំបន់ និងលើឆាកអន្តរជាតិផងដែរ។

បន្ថែមជាមួយគ្នានេះ ភាគីទាំងពីរ បានឯកភាពបន្តសហការរៀបចំផែនការសកម្មភាពផ្សព្វផ្សាយសក្តានុពលទេសចរណ៍កម្ពុជា និងពង្រឹងការតភ្ជាប់ផ្លូវអាកាស ដើម្បីទាក់ទាញភ្ញៀវទេសចរអន្តរជាតិមកកាន់កម្ពុជាកាន់តែច្រើន៕

The post បារាំងប្ដេជ្ញាបន្តផ្សព្វផ្សាយសក្តានុពលទេសចរណ៍កម្ពុជា appeared first on Kampuchea Thmey Daily.

រដ្ឋមន្ត្រីទេសចរណ៍ជំរុញទូតខ្មែរនៅបរទេសជួយផ្សព្វផ្សាយសក្ដានុពលទេសចរណ៍កម្ពុជា

hun sirivadh — Thu, 05 Mar 2026 03:47:08 +0000

រដ្ឋមន្ត្រីក្រសួងទេសចរណ៍លោក ហួត ហាក់ បានជំរុញដល់ឯកអគ្គរាជទូតកម្ពុជានៅបរទេសទាំងអស់ចូលរួមផ្សព្វផ្សាយពីសក្ដានុពលទេសចរណ៍ និងកិត្តិនាមកម្ពុជាលើឆាកអន្តរជាតិឱ្យកាន់តែខ្លាំងក្លាក្នុងបរិបទភូមិសាស្ត្រនយោបាយដែលកំពុងប្រែប្រួលយ៉ាងឆាប់រហ័សនេះ។

លើកឡើងក្នុងជំនួបជាមួយឯកអគ្គរាជទូតខ្មែរប្រចាំរដ្ឋបរទេសចំនួន៤៣រូបកាលពីថ្ងៃទី៣ ខែមីនា ឆ្នាំ២០២៦ លោក ហួត ហាក់ បានផ្លាស់ប្ដូរយោបល់ជាមួយតំណាងកម្ពុជាប្រទេសរដ្ឋបរទេសទាំងនោះពីកិច្ចសហប្រតិបត្តិការលើវិស័យទេសចរណ៍ក្នុងគោលដៅផ្សព្វផ្សាយកិត្តិនាមកម្ពុជាលើឆាកអន្តរជាតិ និងជំរុញការផ្សព្វផ្សាយទេសចរណ៍កម្ពុជាទៅកាន់ពិភពលោក ព្រមទាំងការធ្វើពិពិធកម្មទីផ្សារទេសចរណ៍។

យោងតាមការចុះផ្សាយរបស់ក្រសួងទេសចរណ៍៖ «កិច្ចពិភាក្សាបានផ្លាស់ប្ដូរមតិយោបល់ស៊ីជម្រៅលើយុទ្ធសាស្ត្រថ្មីៗ ទាក់ទាញ និងបង្កើតភាពធន់ ដើម្បីឆ្លើយតបនឹងការប្រែប្រួលភូមិសាស្ត្រនយោបាយដ៏ឆាប់រហ័ស ស្មុគស្មាញ និងមិនអាចប៉ាន់ស្មាននាពេលបច្ចុប្បន្ន សំដៅទាក់ទាញ និងជំរុញកំណើនភ្ញៀវទេសចរអន្តរជាតិ តាមរយៈការពង្រីកការផ្សព្វផ្សាយអំពីសក្ដានុពលទេសចរណ៍កម្ពុជា»។

ប្រធានសមាគមទេសចរណ៍អាស៊ី ប៉ាស៊ីហ្វិក(PATA) លោក ធួន ស៊ីណាន បានឱ្យដឹងថាតាមការអង្កេតរបស់លោកកន្លងមកស្ថានទូតខ្មែរប្រចាំរដ្ឋបរទេសតិចតួចប៉ុណ្ណោះដែលសកម្មលើការជំរុញទេសចរណ៍កម្ពុជា ខណៈលោកបានបង្ហាញក្ដីសង្ឃឹមថាជំនួបរវាងរដ្ឋមន្ត្រីទេសចរណ៍ និងឯកអគ្គរាជទូតកម្ពុជានៅពេលនេះគឺជាចំណុចចាប់ផ្ដើមល្អលើការផ្សព្វផ្សាយពីទេសចរណ៍កម្ពុជាទៅកាន់ពិភពលោក។

លោកថា៖ «កន្លងមកឃើញថាទូតតិចណាស់ដែលបានអនុវត្តន៍កិច្ចការងារទាំងឡាយទាំងពួងដែលជាកាតាព្វកិច្ចរបស់ពួកគាត់ហ្នឹង យើងឃើញថាតិចមែនទែន ទូតខ្លះនៅបណ្ដាប្រទេសខ្លះនោះប្រជាជនខ្មែរក៏មិនដែលបានស្គាល់ មិនដែលឃើញមុខទូតហ្នឹងមិចផង។ យើងកុំនិយាយដល់ពួកអ្នកវិនិយោគឬដៃគូរពាក់ព័ន្ធនៅប្រទេសមួយៗហ្នឹង។ ប៉ុន្ដែសម្រាប់ខ្ញុំវាមិនយឺតពេលទេការដែលយើងផ្លាស់ប្ដូរចរិតអាកប្បកិរិយារបស់យើងធ្វើការ ដោយឈរលើនិយមន័យស្នេហាជាតិលើមនសិការជាតិហ្នឹង»។

ទោះជាយ៉ាងណាលោក ស៊ីណាន យល់ឃើញថាឯកអគ្គរាជទូតកម្ពុជាដែលបញ្ជូនទៅថ្មីៗមួយចំនួននៅពេលនេះក៏កំពុងបង្ហាញសកម្មភាពសកម្មជាច្រើនក្នុងកិច្ចការការពារកម្ពុជានៅប្រទេសដែលបានបញ្ជូនទៅនោះផងដែរ។

សូមជម្រាបផងដែរជំនួបរវាងរដ្ឋមន្ត្រីទេសចរណ៍ និងឯកអគ្គរាជទូតខ្មែរទាំង៤៣រូបនៅពេលនេះគឺធ្វើឡើងតាមគោលការណ៍ពីនាយករដ្ឋមន្ត្រី សម្ដេចធិបតី ហ៊ុន ម៉ាណែត ដោយមានការគាំទ្រពីរដ្ឋមន្ត្រីការបរទេសផងដែរ។

របាយការណ៍ស្ថិតិទេសចរណ៍ឆ្នាំ២០២៥ ឱ្យដឹងថាចំនួនភ្ញៀវទេសចរបរទេសដែលមកលេងកម្ពុជាមានចំនួន ៥,៥៧លាននាក់ ថយចុះ១៦,៩%បើធៀបនឹងឆ្នាំ២០២៤។ ភ្ញៀវពីប្រទេសចំនួន៣ដែលចូលមកលេងកម្ពុជាច្រើនជាងគេគឺវៀតណាមដែលមានជាង ១លាន២សែននាក់ ប្រហាក់ប្រហែលគ្នានឹងភ្ញៀវទេសចរចិនដែលឈរលំដាប់ទី២ និងភ្ញៀវទេសចរថៃមានជាង១លាននាក់ឈរលំដាប់ទី៣។ ដោយឡែកប្រទេសផ្សេងទៀតគឺនៅមានកម្រិតនៅឡើយ៕

អត្ថបទដោយ ហ៊ុន សិរីវឌ្ឍន៍

The post រដ្ឋមន្ត្រីទេសចរណ៍ជំរុញទូតខ្មែរនៅបរទេសជួយផ្សព្វផ្សាយសក្ដានុពលទេសចរណ៍កម្ពុជា appeared first on Kampuchea Thmey Daily.

រដ្ឋមន្ត្រី ហួត ហាក់៖ ការចុះ MOU ជាមួយសាកលវិទ្យាល័យការពារជាតិ គឺជាការផ្សារភ្ជាប់ទេសចរណ៍ទៅនឹងគុណតម្លៃនៃសន្តិភាព

hun sirivadh — Sun, 01 Mar 2026 03:10:04 +0000

រដ្ឋមន្ត្រីក្រសួងទេសចរណ៍លោក ហួត ហាក់ បានគូសបញ្ជាក់ថា ការចុះអនុស្សរណៈនៃការយោគយល់គ្នា (MoU) ជាមួយសាកលវិទ្យាល័យការពារជាតិ មិនមែនត្រឹមតែជាកិច្ចសហប្រតិបត្តិការរដ្ឋបាលប៉ុណ្ណោះទេ ប៉ុន្តែគឺជាការបង្ហាញពីការផ្សារភ្ជាប់យ៉ាងស៊ីជម្រៅរវាង «វិស័យទេសចរណ៍» និង «គុណតម្លៃនៃការថែរក្សាសន្តិភាព»។ លោកថា វិស័យទេសចរណ៍ គឺត្រូវការជាចាំបាច់នូវសន្តិភាព និងស្ថេរិភាពសង្គម។

ថ្លែងក្នុងពិធីចុះអនុស្សរណៈយោគយល់គ្នាជាមួយសកាលវិទ្យាល័យការពារជាតិ កាលពីថ្ងៃទី២៧ ខែកុម្ផៈ ឆ្នាំ២០២៦ នៅក្រសួងទេសចរណ៍ លោករដ្ឋមន្ត្រី ហួត ហាក់ មានប្រសាសន៍ថាមូលដ្ឋានគ្រឹះដ៏រឹងមាំរបស់វិស័យទេសចរណ៍ គឺសន្តិសុខ និងសន្តិភាព ពោលគឺ វិស័យការពារជាតិដែលជាគ្រឹះដ៏សំខាន់ ដើម្បីធានាថាប្រទេសជាតិមិនវិលត្រឡប់ទៅរកសង្រ្គាមស៊ីវិល ឬការបែកបាក់ដូចអតីតកាល និងការការពារកុំឱ្យមានការឈ្លានពានពីសំណាក់ខ្មាំងសត្រូវអមិត្តនានា។

លោកថា៖ «បើគ្មានសន្តិភាព និងស្ថិរភាពផ្ទៃក្នុង ដែលត្រូវបានការពារយ៉ាងរឹងមាំដោយកងកម្លាំងប្រដាប់អាវុធទេ នោះការអភិវឌ្ឍលើវិស័យផ្សេងៗទៀតក៏មិនអាចប្រព្រឹត្តទៅបានយ៉ាងរលូន និងមានប្រសិទ្ធភាពឡើយ។ ពិតណាស់, សន្តិភាព គឺជាមូលដ្ឋានគ្រឹះសម្រាប់ការរីកចម្រើនសេដ្ឋកិច្ច សង្គម និងវប្បធម៌ ខណៈស្ថិរភាពជាតិ ជាធាតុផ្សំចាំបាច់សម្រាប់ការទាក់ទាញវិនិយោគ និងភ្ញៀវទេសចរ»។

លោកបន្ថែមថាអនុស្សរណៈនៃការយោគយល់គ្នាដ៏មានអត្ថន័យនេះ មិនត្រឹមតែជាឯកសារផ្លូវការប៉ុណ្ណោះទេ ប៉ុន្តែជាសក្ខីភាពនៃទស្សនវិស័យរួម និងឆន្ទៈរួម ក្នុងការសហការយ៉ាងជិតស្និទ្ធ ដើម្បីលើកកម្ពស់វិស័យទេសចរណ៍ និងវិស័យការពារជាតិឱ្យឈានឆ្ពោះទៅរកការអភិវឌ្ឍប្រកបដោយភាពធន់ ចីរភាព និងបរិយាបន្ន។

តាមរយៈកិច្ចសហប្រតិបត្តិការក្រសួងទេសចរណ៍ និងសាកលវិទ្យាល័យការពារជាតិមានគោលបំណងសំខាន់ៗចំនួន ២ គឺ ការបណ្ដុះបណ្ដាលកសាងសមត្ថភាព ចែករំលែកបទពិសោធ និងចំណេះដឹងអំពីវិស័យទេសចរណ៍ តាមរយៈបាឋកថា សិក្ខាសាលា ការបណ្តុះបណ្តាល និងការបញ្ជ្រាបចំណេះដឹងក្នុងកម្មវិធីសិក្សាយោធា និងការជំរុញចលនាទេសចរណ៍ក្នុងស្រុក តាមរយៈការរៀបចំទស្សនកិច្ចសិក្សាទៅកាន់តំបន់ទេសចរណ៍នានា ដើម្បីលើកកម្ពស់គុណតម្លៃនៃមរតកវប្បធម៌ ប្រវត្តិសាស្ត្រ និងធនធានធម្មជាតិ ព្រមទាំងបំផុសទឹកចិត្ត «ស្រលាញ់ជាតិ ត្រូវស្គាល់ទឹកដី» និង «ទេសចរណ៍ផ្សារភ្ជាប់នឹងទឹកដី»៕

អត្ថបទដោយ ហ៊ុន សិរីវឌ្ឍន៍

The post រដ្ឋមន្ត្រី ហួត ហាក់៖ ការចុះ MOU ជាមួយសាកលវិទ្យាល័យការពារជាតិ គឺជាការផ្សារភ្ជាប់ទេសចរណ៍ទៅនឹងគុណតម្លៃនៃសន្តិភាព appeared first on Kampuchea Thmey Daily.

ជប៉ុនប្តេជ្ញាសហការគាំទ្រកម្ពុជាអភិវឌ្ឍវិស័យទេសចរណ៍

Din Thary — Thu, 12 Feb 2026 03:40:20 +0000

ប្រធានវិទ្យាស្ថានស្រាវជ្រាវសេដ្ឋកិច្ចអាស៊ាន និងអាស៊ីបូព៌ា (Economic Research Institute for ASEAN and East Asia: ERIA) លោកសាស្ត្រាចារ្យ Tetsuya Watanabe បានប្តេជ្ញារបស់ខ្លួនក្នុងការសហការគាំទ្រក្រសួងទេសចរណ៍លើការអភិវឌ្ឍវិស័យទេសចរណ៍កម្ពុជា។

លោកសាស្ត្រាចារ្យ Tetsuya Watanabe បានលើកឡើងបែបនេះនៅក្នុងជំនួបពិភាក្សាការងារស្តីពីកិច្ចសហប្រតិបត្តិការលើវិស័យទេសចរណ៍ ជាមួយលោក ហួត ហាក់ រដ្ឋមន្ត្រីក្រសួងទេសចរណ៍។

លោកសាស្ត្រាចារ្យបានថ្លែងអំពីចំណាប់អារម្មណ៍លើការធានាបាននូវកត្តាសុខសន្តិភាព ស្ថិរភាពនយោបាយដែលកម្ពុជា និងរាជរដ្ឋាភិបាលកម្ពុជា ធានាបាន គឺពិតជាកត្តាដ៏សំខាន់ និងចម្បងក្នុងការអភិវឌ្ឍសេដ្ឋកិច្ច សង្គម ជាពិសេសគឺវិស័យទេសចរណ៍។ លោកក៏បានគូសបញ្ជាក់ពីសក្តានុពលទេសចរណ៍ដ៏សំបូរបែបដែលកម្ពុជាមាន គួបផ្សំជាមួយស្ថានភាពភូមិសាស្រ្តពិតផ្តល់នូវលក្ខណៈល្អប្រសើរដល់ការអភិវឌ្ឍទេសចរណ៍ និងចូលរួមចំណែកជម្រុញសេដ្ឋកិច្ចកម្ពុជាឱ្យមានសន្ទុះបន្ថែមទៀត។

លោក ហួត ហាក់ បានលើកឡើងអំពីទំនាក់ទំនងដ៏ល្អរវាងកម្ពុជា និងវិទ្យាស្ថាន(ERIA) ដែលបានចាប់ផ្តើមចាប់តាំងពីឆ្នាំ២០១២ ដោយគិតត្រឹមឆ្នាំ២០២៦ នេះ គឺមានរយៈពេល១៤ឆ្នាំ។ តាមរយៈទំនាក់ទំនងដ៏ល្អនេះ ដែលបានប្រែក្លាយជាមូលដ្ឋានគ្រឹះសម្រាប់ពង្រឹង និងពង្រីកកិច្ចសហប្រតិបត្តិការលើផ្នែកផ្សេងៗទៀត ជាពិសេសក្នុងវិស័យទេសចរណ៍ដែលបានទទួលកិច្ចសហប្រតិបត្តិការគាំទ្រជាបន្តបន្ទាប់ពីវិទ្យាស្ថានរហូតមក។

លោករដ្ឋមន្រ្តី ក៏បានអរគុណប្រធានវិទ្យាស្ថាន និងវិទ្យាស្ថានចំពោះកិច្ចសហប្រតិបត្តិការដ៏ល្អ និងការគំាទ្រក្រសួងទេសចរណ៍ទាំងនៅក្នុងប្រទេស ក្របខ័ណ្ឌអាស៊ាន តំបន់ និងអន្តរជាតិរហូតមក។

តាមរយៈជំនួបពិភាក្សាការងារផ្លាស់ប្តូរទស្សនៈប្រកបដោយលទ្ធផលជាផ្លែផ្កា គូភាគីប្តេជ្ញាបន្តពង្រីកកិច្ចសហប្រតិបត្តិការ ដោយភាគីវិទ្យាស្ថានបានទទួលពិនិត្យលទ្ធភាពលើសំណើសុំជំនួយគំាទ្របច្ចេកទេសអភិវឌ្ឍវិស័យទេសចរណ៍ពីក្រសួងទេសចរណ៍។

ទន្ទឹមនេះ ក្នុងពេលជួបពិភាក្សាការងារជាមួយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា លោកសាស្ត្រាចារ្យ ក៏បានលើកឡើងពីសក្ដានុពល និងឱកាសរបស់កម្ពុជាក្នុងការទាក់ទាញវិនិយោគិនជប៉ុន ជាពិសេសលទ្ធភាពរបស់កម្ពុជាក្នុងការប្រែក្លាយខ្លួនទៅជា «មូលដ្ឋានផលិតកម្មឧស្សាហកម្មថ្មី» ដែលការណ៍នេះមិនត្រឹមតែរួមចំណែកដល់កំណើនសេដ្ឋកិច្ចរបស់កម្ពុជាប៉ុណ្ណោះទេ ប៉ុន្តែថែមទាំងរួមចំណែកដល់ខ្សែច្រវាក់ផលិតកម្មឧស្សាហកម្មតំបន់ និង សកល។

លោកសាស្ត្រាចារ្យ បន្ថែមថា វិនិយោគិនជប៉ុនចាប់អារម្មណ៍ក្នុងការវិនិយោគបន្ថែម នៅកម្ពុជា ក៏ដូចជាការរៀបចំនូវវេទិកាធុរកិច្ចកម្ពុជា-ជប៉ុន នាពេលខាងមុខ ដើម្បីចូលរួមចំណែកក្នុងការទាក់ទាញវិនិយោគិនជប៉ុនមកកាន់កម្ពុជាឱ្យកាន់តែច្រើន។

បច្ចុប្បន្ននេះ បណ្ដាក្រុមហ៊ុនជប៉ុនកំពុងស្វែងរកឱកាសក្នុងការផ្លាស់ប្ដូរទីតាំងផលិតកម្ម (Re-location) នៅក្នុងតំបន់ ហើយបាននិងកំពុងសម្លឹងមើលឱកាសក្នុងការវិនិយោគថ្មីៗនៅកម្ពុជាបន្ថែមទៀត៕

The post ជប៉ុនប្តេជ្ញាសហការគាំទ្រកម្ពុជាអភិវឌ្ឍវិស័យទេសចរណ៍ appeared first on Kampuchea Thmey Daily.

កម្ពុជា-កូរ៉េ ចុះ MoU រួមគ្នាអភិវឌ្ឍន៍វិស័យទេសចរណ៍កម្ពុជាឱ្យកាន់តែរីកចម្រើន

Din Thary — Thu, 22 Jan 2026 03:14:43 +0000

ក្រសួងទេសចរណ៍កម្ពុជា និងអង្គការ Go & Do Social Welfare Corporation របស់កូរ៉េ បានចុះអនុស្សរណៈនៃការយោគយល់គ្នា (MoU) កាលពីថ្ងៃទី២០ ខែមករា ដើម្បីរួមគ្នាអភិវឌ្ឍន៍វិស័យទេសចរណ៍កម្ពុជាឱ្យកាន់តែរីកចម្រើនបន្ថែមទៀត។

ពិធីចុះអនុស្សរណៈនេះ ត្រូវបានធ្វើឡើងក្នុងឱកាស លោក ហួត ហាក់ រដ្ឋមន្ត្រីក្រសួងទេសចរណ៍ បានអនុញ្ញាតលោក Park Woo Hee ប្រធានអង្គការ Go & Do Social Welfare Corporation នៃសាធារណរដ្ឋកូរ៉េ និងសហការី ចូលជួបសម្តែងការគួរសម និងពិភាក្សាការងារលើកិច្ចសហប្រតិបត្តិការទេសចរណ៍កម្ពុជា-កូរ៉េ។

ក្នុងឱកាសនៃជំនួបប្រកបដោយផ្លែផ្កានេះ លោករដ្ឋមន្ត្រី ហួត ហាក់ បានឯកភាពលើសំណូមពររបស់លោកប្រធានអង្គការ ដែលបានផ្តួចផ្តើមគំនិតក្នុងការសហការជាមួយសាលាវិជ្ជាជីវៈទេសចរណ៍នៃក្រសួងទេសចរណ៍ ក្នុងការបង្កើតថ្នាក់បណ្តុះបណ្តាលមគ្គុទ្ទេសក៍និយាយភាសាកូរ៉េ ដើម្បីពង្រឹងសមត្ថភាពដល់អ្នកជំនាញមគ្គុទេ្ទសក៍ប្រើប្រាស់ភាសាកូរ៉េឱ្យបានស្ទាត់ជំនាញ និងទទួលបានជំនាញបដិសណ្ឋារកិច្ចក្នុងការទទួលស្វាគមន៍ជនជាតិកូរ៉េឱ្យកាន់តែល្អប្រសើរ។

លោករដ្ឋមន្ត្រី ក៏បានគាំទ្រ និងជំរុញបន្ថែមទៅប្រធានអង្គការក្នុងការផ្តល់ជំនួយបច្ចេកទេសដល់ប្រទេសកម្ពុជា សម្រាប់ជំនួយឧបត្ថម្ភរថយន្តសង្រ្គោះបន្ទាន់ និងរថយន្តពន្លត់អគ្គីភ័យ ក្នុងឆ្នាំ២០២៦ នេះ។

ជាមួយគ្នានេះ លោករដ្ឋមន្ត្រី ក៏បានស្នើដល់លោកប្រធានអង្គការ ជួយគាំទ្រ និងផ្តល់កិច្ចសហការ ពង្រឹងសមត្ថភាពមគ្គុទេ្ទសក៍និយាយភាសាកូរ៉េ និងបន្តទិសដៅអនុវត្តកិច្ចសហប្រតិបត្តិការនាពេលអនាគតឱ្យកាន់តែរឹងមាំ ដើម្បីទទួលបានលទ្ធផលជាវិជ្ជមានក្នុងការជំរុញកំណើនទេសចរណ៍ និងបង្កើនបទពិសោធល្អដល់ទេសចរជនជាតិកូរ៉េដែលបានអញ្ជើញមកទស្សនាប្រទេសកម្ពុជា៕

The post កម្ពុជា-កូរ៉េ ចុះ MoU រួមគ្នាអភិវឌ្ឍន៍វិស័យទេសចរណ៍កម្ពុជាឱ្យកាន់តែរីកចម្រើន appeared first on Kampuchea Thmey Daily.