លោក ហេង វ៉ាន់ដា Archives - Kampuchea Thmey Daily

ប្រធានសមាគមមួយ ស្នើឱ្យ ក្រសួងអប់រំ ដាក់ការប្រឡងបាក់ឌុប ជាទិវាបាក់ឌុបជាតិ

អ៊ិន ពិសី — Thu, 17 Oct 2024 09:27:39 +0000

លោកបណ្ឌិត ហេង វ៉ាន់ដា ប្រធានក្រុមប្រឹក្សាភិបាលសមាគមគ្រឹះស្ថានឧត្តមសិក្សាកម្ពុជា បានស្នើឱ្យក្រសួងអប់រំ យុវជន និងកីឡា ដាក់ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប ទៅជាទិវាបាក់ឌុបជាតិ ដើម្បីឱ្យការប្រឡងបាក់ឌុបកាន់តែមានតម្លៃទៅថ្ងៃអនាគត។

លោកបណ្ឌិត ហេង វ៉ាន់ដា បានមានប្រសាសន៍នៅរសៀលថ្ងៃទី ១៧ តុលា នេះថា «រឿងបាក់ឌុបជាតិនេះ ជាបដិវត្តន៍មួយដ៏ធំក្នុងជំនាន់រាជរដ្ឋាភិបាលអាណត្តិទី ៥ ពីឆ្នាំ ២០១៣ ដល់ ២០១៨ គឺការកែទម្រង់បាក់ឌុបធ្វើឱ្យសង្គមជាតិមួយទាំងមូលមានការផ្លាស់ប្ដូរ។ បើសិស្សវិញ ត្រូវតែខំរៀន បើមិនរៀន មិនជាប់ តាមទ្រឹស្តីចេះគឺជាប់។ ចំណែកឪពុកម្ដាយអាណាព្យាបាលបានផ្លាស់ប្ដូរឥរិយាបថពីមិនទុកចិត្តការប្រឡងដោយនាំគ្នាដើររកពឹងពាក់អ្នកនេះអ្នកនោះតាមខ្សែបណ្តាញនានា ដើម្បីសូកប៉ាន់កាលពីជំនាន់មុនដើររកវិញ្ញាសាឱ្យកូន តែឥឡូវអត់ទេ ពោលគឺតាំងពី ២០១៣ មកអត់មានតែម្តង»។

លោកបណ្ឌិត ហេង វ៉ាន់ដា បានបន្តថា «ខ្ញុំគិតថាក្រសួងអប់រំ គួរតែដាក់ការប្រឡងបាក់ឌុបក្លាយជាទិវាបាក់ឌុបជាតិសម្រាប់រំលឹក និងដើម្បីធ្វើឱ្យការប្រឡងបាក់ឌុបទៅថ្ងៃអនាគតកាន់តែមានតម្លៃ»។

លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានមានប្រសាសន៍នៅរសៀលថ្ងៃទី ១៧ តុលា នេះថា ក្នុងនាមក្រសួងអប់រំ សូមអរគុណក្នុងការផ្ដួចផ្ដើមគំនិតនេះ ដោយឡែកកន្លងទៅក្រសួងបានធ្វើកិច្ចការជាច្រើន ដើម្បីកំណែតម្រង់ ក៏ដូចជាលើកកម្ពស់គុណភាព នៃការអប់រំ មិនថាធ្វើកំណែទម្រង់តាមសាលារៀន កំណែទម្រង់តាមគ្រឹះស្ថានសិក្សា គ្រូ ក៏ដូចជាការប្រឡង និងការវាយតម្លៃនានា។ ដូច្នេះហើយនេះគឺជាជោគជ័យមួយ ហើយក្រសួងក៏នៅតែបន្តខិតខំប្រឹងប្រែង ដើម្បីលើកកម្ពស់គុណភាពការអប់រំជាបន្តទៀតដែរ។

លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានលើកឡើងក្នុងឱកាសចុះកាត់វិញ្ញាសាប្រឡងបាក់ឌុបកាលពីថ្ងៃទី ០៨ តុលា ថា ពីដំបូងការធ្វើកំណែតម្រង់ការប្រឡងបាក់ឌុបនៅឆ្នាំ ២០១៤ មានការប្រឈមច្រើន ដោយសារសិស្សអត់ទាន់បានយល់ដឹង ដោយបាននាំចូលសំណៅឯកសារប្រឡងច្រើន និងមានការនាំចូលឧបករណ៍អេឡិចត្រូនិក និងមានអ្នកប្រឡងជំនួស។ បន្ទាប់មក ក្រសួង បានរៀបចំយន្តការដោះស្រាយបញ្ហាទាំងនេះហើយបានដាក់ទោសទណ្ឌតាមច្បាប់បញ្ញត្តិ។ នៅឆ្នាំទី ២ ទី ៣ ឃើញថា សិស្សបានយល់ដឹង បានខិតខំប្រឹងប្រែងរៀន និងគ្រូខំបង្រៀន ហើយក្រសួងបានសង្ខេបមេរៀនមុខវិជ្ជាសំខាន់ៗ សម្រាប់សិស្ស និងបង្រៀនសិស្សបំប៉នបន្ថែមត្រៀមប្រឡងជួយពង្រឹងសមត្ថភាពសិស្ស។

លោកឧបនាយករដ្ឋមន្ត្រី បានបន្តថា រយៈពេល ១០ ឆ្នាំនេះ ឃើញថា ដំណើរការប្រឡងបាក់ឌុបបានកែលម្អហើយ ជាពិសេសការប្រឡងនេះមិនមែនត្រឹមតែជាការប្រឡងទេ គឺយកលទ្ធផលប្រឡងនេះទៅធ្វើកំណែទម្រង់សាលារៀនទៀត។ មានន័យថា សិស្សខំប្រឹងរៀន គ្រូខំប្រឹងបង្រៀនបន្ថែម ហើយសាលាខិតខំកែលម្អ សាលារៀនអនុវត្តកម្មវិធីសិក្សា កែលម្អវិធីសាស្ត្របង្រៀន និងថ្នាលឌីជីថល ដើម្បីងាយស្រួលដល់សិស្សស្វ័យសិក្សាថែមទៀត។ ទាំងអស់នេះបង្កើតទៅជាយន្តការមួយដ៏រឹងមាំ មានគោលការណ៍ច្បាប់ យុត្តិធម៌ និងលទ្ធផលទទួលយកបាន។

លោកឧបនាយករដ្ឋមន្ត្រី បានបញ្ជាក់ថា កត្តាជោគជ័យនេះដោយសារក្រសួងបានរៀបចំលិខិតបទដ្ឋាននានា ការផ្សព្វផ្សាយ ពិសេសសហការជាមួយអង្គភាពប្រឆាំងអំពើពុករលួយ សហភាពសហព័ន្ធយុវជនកម្ពុជា នៅក្នុងការរៀបចំការប្រឡងដោយមានអ្នកសង្កេតការណ៍ មានគណៈកម្មការមេប្រយោគទូទាំងប្រទេសដែលមើលការខុសត្រូវ និងចាត់តាំងថ្នាក់ដឹកនាំក្រសួងឱ្យទទួលខុសត្រូវតាមរាជធានី-ខេត្ត ទាំង ២៥ និងមានគណៈកម្មការអប្បមាទតាមឃ្លាំមើលដំណើរការប្រឡងផងដែរ៕

អត្ថបទ ៖ សំអឿន

The post ប្រធានសមាគមមួយ ស្នើឱ្យ ក្រសួងអប់រំ ដាក់ការប្រឡងបាក់ឌុប ជាទិវាបាក់ឌុបជាតិ appeared first on Kampuchea Thmey Daily.

លោក ហេង វ៉ាន់ដា ៖ សមាគមមិនទទួលយកសំណើពីសាលាឯកជនសុំរៀបចំប្រឡងបាក់ឌុបដោយខ្លួនឯងទេ

អ៊ិន ពិសី — Wed, 21 Aug 2024 04:16:26 +0000

លោក ហេង វ៉ាន់ដា ប្រធានក្រុមប្រឹក្សាភិបាលសមាគមគ្រឹះស្ថានឧត្ដមសិក្សាកម្ពុជា បានមានប្រសាសន៍នៅព្រឹកថ្ងៃទី ២១ សីហា នេះថា សមាគមនឹងមិនទទួលយកសំណើណាមួយពីគ្រឹះស្ថានសិក្សាឯកជនស្នើសុំរៀបចំប្រឡងសញ្ញាបត្រមធ្យមសិក្សាទុតិយភូមិ ឬ បាក់ឌុប ទេ បើទោះបីជាបច្ចុប្បន្នមានសាលាខ្លះបានរៀបចំប្រឡងឌីប្លូមដោយខ្លួនឯងក៏ដោយ។

លោកបានបន្តថា បច្ចុប្បន្ននេះនៅមិនទាន់មានសាលាឯកជនណាមួយបានស្នើសុំរៀបចំការប្រឡងបាក់ឌុបដោយខ្លួនឯងនៅឡើយទេ បើទោះបីជាមានសាលាខ្លះអាចមានសមត្ថភាពរៀបចំការប្រឡងឌីប្លូមដោយខ្លួនឯងបានក៏ដោយ។

លោកបានបន្តទៀតថា កន្លងមកមិនមានសាលាឯកជនណាស្នើមកសមាគមរៀបចំប្រឡងបាក់ឌុបដោយខ្លួនឯងទេ ហើយបើទោះជាមានសំណើ ក៏សមាគមមិនទទួលយកសំណើនោះមកពិនិត្យដែរ។

លោកបានបន្ថែមថា «អត់ៗ ទេ អាហ្នឹងយើងបាក់ឌុបមួយសមាគមអត់ស្នើសុំទេ ហើយក៏អត់ទទួលយកសំណើយកមកគិតដែរ ក្នុងសមាគម ព្រោះថាសំណើលុះត្រាមានការឯកភាពគ្នាទាំងសាកលវិទ្យាល័យ មធ្យមសិក្សា និងបឋមសិក្សា ឯកភាពគ្នាលើក ហើយបើកាលណាឯកភាពគ្នាលើក បើឌីប្លូមឯកភាព»។

លោកបានឱ្យដឹងទៀតថា រហូតមកដល់បច្ចុប្បន្ននេះសមាគមគ្រឹះស្ថានឧត្ដមសិក្សាកម្ពុជាមានសមាជិកកើនឡើងដល់ ១៤៥ គ្រឹះស្ថាន ហើយ នៅទូទាំងប្រទេស ក្នុងនោះមាន ៤០ ជាគ្រឹះស្ថានឧត្ដមសិក្សា និង ១០៥ ទៀត ជាគ្រឹះស្ថានសិក្សាចំណេះទូទៅ កើនឡើងជាង ២០ គ្រឹះស្ថានសិក្សា ចាប់តាំងពីមុនជំងឺកូវីដ មកដល់បច្ចុប្បន្ន។

លោក ហេង វ៉ាន់ដា បានបន្ថែមថា ការដែលសមាគមអត់លើកជាសំណើ និងមិនទទួលយកសំណើនេះ ខ្លាចប៉ះពាល់ដល់ទិវាបាក់ឌុបជាតិ ព្រោះថាក្រសួងរៀបចំការប្រឡងបាក់ឌុបមានគុណភាព ហើយទទួលបានជោគជ័យ ខណៈកន្លងមកការប្រឡងបាក់ឌុបបេក្ខជនពូកែ ឬ មិនពូកែ តែងតែមានការលេចឮពីភាពមិនប្រក្រតីដូចជាការសូកប៉ាន់ ដើម្បីប្រឡងជាប់ជាដើម។ ប៉ុន្តែចាប់តាំងពីមានគោលនយោបាយថ្នាក់ជាតិមក បានប្រែក្លាយមកជាអ្នកចេះគឺជាប់។

លោកស្រី ឃួន វិច្ឆិកា អ្នកនាំពាក្យអប់រំ យុវជន និងកីឡា បានអះអាងថា រហូតមកដល់ពេលនេះ ក្រសួង ពុំបានអនុញ្ញាតឱ្យសាលាឯកជនណាមួយរៀបចំការប្រឡងសញ្ញាបត្រមធ្យមសិក្សាទុតិយភូមិ ឬ បាក់ឌុប ដោយខ្លួនឯងនៅឡើយទេ។

លោកស្រី បានបន្តថា ប៉ុន្តែកន្លងមក ក្រសួងធ្លាប់បានចេញលិខិតផ្តល់សញ្ញាបត្រសមមូលសម្រាប់សាលាមួយចំនួនដែលអនុវត្តកម្មវិធីសិក្សាអន្តរជាតិដូចជាសាលា Cambridge ជាដើម ដែលសាលានេះអនុវត្តតាមស្តង់ដារកម្មវិធីអន្តរជាតិ និងធ្វើរង្វាយតម្លៃស្របតាមស្តង់ដារដែលខ្លួនអនុវត្តហើយសិស្សដែលប្រឡងចប់ពីកម្មវិធីអន្តរជាតិនោះ នឹងទទួលបានសញ្ញាបត្រសមមូល។

លោកស្រី បន្តទៀតថា សម្រាប់ប្រឡងឌីប្លូមដែលនឹងប្រព្រឹត្តិទៅនៅថ្ងៃទី ២ ខែកញ្ញា ខែក្រោយនេះ ក្រសួងបានអនុញ្ញាតសាលាឯកជនចំនួន ១៥៥ សាលា រៀបចំការប្រឡងដោយខ្លួនឯង តែត្រូវអនុវត្តតាមការណែនាំរបស់ក្រសួងផងដែរ។ ក្នុងករណីមានភាពមិនប្រក្រតី ក្រសួងនឹងចុះអធិការកិច្ចតែម្ដង។

គួរបញ្ជាក់ថា សម្រាប់ឆ្នាំនេះ ក្រសួងអប់រំ យុវជន និងកីឡា បានកំណត់យកថ្ងៃទី ៨ ខែតុលា ឆ្នាំ ២០២៤ ជាកាលបរិច្ឆេទសម្រាប់ប្រឡងសញ្ញាបត្រមធ្យមសិក្សាទុតិយភូមិ៕

អត្ថបទ ៖ សំអឿន

The post លោក ហេង វ៉ាន់ដា ៖ សមាគមមិនទទួលយកសំណើពីសាលាឯកជនសុំរៀបចំប្រឡងបាក់ឌុបដោយខ្លួនឯងទេ appeared first on Kampuchea Thmey Daily.

អ្នកជំនាញអប់រំ គាំទ្រអ្នកប្រើបណ្ដាញសង្គម សរសេរសំណេរ និងអក្ខរាវិរុទ្ធភាសាខ្មែរ ឱ្យបានត្រឹមត្រូវ លើកតម្កើងភាសាជាតិ

អ៊ិន ពិសី — Wed, 28 Feb 2024 04:50:41 +0000

អ្នកជំនាញផ្នែកវិស័យអប់រំ បង្ហាញនូវការគាំទ្រចំពោះក្រសួងអប់រំ យុវជន និងកីឡា ដែលឱ្យអ្នកប្រើប្រាស់បណ្ដាញសង្គមសរសេរសំណេរ និងអក្ខរាវិរុទ្ធភាសាខ្មែរនៅលើបណ្ដាញរបស់ខ្លួនបានត្រឹមត្រូវ ដើម្បីលើកតម្កើងភាសាជាតិ។

ថ្មីៗ នេះ ក្រសួងអប់រំ យុវជន និងកីឡា បានចេញសេចក្ដីជូនដំណឹងធ្វើការណែនាំដល់គ្រប់អង្គភាពទាំងនៅថ្នាក់ជាតិ ថ្នាក់ក្រោមជាតិ គ្រឹះស្ថានសិក្សាសាធារណៈ និងឯកជន សិស្សានុសិស្ស យុវជន និងអ្នកពាក់ព័ន្ធប្រើប្រាស់សំណេរ និងអក្ខរាវិរុទ្ធភាសាខ្មែរឱ្យបានត្រឹមត្រូវ ក្នុងគោលបំណងលើកកម្ពស់ការប្រើប្រាស់សំណេរ និងអក្ខរាវិរុទ្ធភាសាខ្មែរ នៅលើបណ្ដាញផ្សព្វផ្សាយ បណ្ដាញទំនាក់ទំនងសង្គម និងនៅតាមទីសាធារណៈ ទាំងក្បួនសរសេរ អក្ខរាវិរុទ្ធ និងវេយ្យាករណ៍បណ្ដុះស្មារតីស្រលាញ់ និងថែរក្សាអក្សរ និងភាសាជាតិឱ្យបានគង់វង្ស និងរីកចម្រើនថែមទៀត។

លោក ហេង វ៉ាន់ដា ប្រធានក្រុមប្រឹក្សាភិបាលសមាគមគ្រឹះស្ថានឧត្ដមសិក្សាកម្ពុជា បានមានប្រសាសន៍នៅព្រឹកថ្ងៃទី ២៨ កុម្ភៈ នេះថា ការដែលក្រសួងចេញលិខិតនេះពិតជាត្រឹមត្រូវ។ ទោះជាយ៉ាងណា ដើម្បីឱ្យលិខិតណែនាំនោះយកទៅអនុវត្តបាន គួរតែមានការណែនាំលម្អិតបន្តទៅទៀតថា តើត្រូវមានវិធីសាស្ត្រដូចម្ដេចបន្តទៅទៀត ដើម្បីឱ្យការណែនាំនេះ កាន់តែទទួលបានជោគជ័យបន្ថែមទៀត។

លោកបានបន្តថា «ពីមុនមានការធ្លាក់ចុះខ្លាំង ដោយអ្នកសិក្សាលែងសូវខ្វាយខ្វល់ពីការសរសេរស្របតាមវេយ្យាករណ៍ ឬមិនស្រប, សរសេរឃ្លាប្រយោគចប់មិនដឹងថាមានន័យដូចម្ដេច ឬស្របទៅនឹងគំនិតដែលខ្លួនចង់បាន ឬមិនស្រប ឬស្របទៅនឹងអ្នកអានចង់បាន ឬសរសេរចប់មិនដឹងចង់មានន័យថាម៉េច រួចបង្ខំអ្នកអានទៅអានភាសាបរទេសអែបមកជាមួយជាដើម, ការមុនយកចិត្តទុកដាក់លើអក្ខរាវិរុទ្ធ, ការមិនផ្ចង់តួអក្សរធ្វើឱ្យតួអក្សរបត់បែនតាមចិត្ត, ការអានមិនចេញ, ការបញ្ចេញសូរសំឡេងចំតួអក្សរ ឬចេញសំឡេងភាសាបរទេស ជាដើម។ល។»។

លោកបានបន្តទៀតថា យ៉ាងណាក៏ដោយបច្ចុប្បន្ននៅលើបណ្ដាញផ្សព្វផ្សាយ បណ្ដាញទំនាក់ទំនងសង្គម និងនៅតាមទីសាធារណៈ ហាក់បីដូចជាការសរសេរស្របតាមវេយ្យាករណ៍ល្អជាងមុន ទាំងខ្លឹមសារ អត្ថន័យ អត្ថរូប អត្ថរស អក្ខរាវិរុទ្ធ, ការផ្ចង់តួអក្សរ, ការបញ្ចេញសូរសំឡេង ។ល។ ការអានទៀតសោត ក៏មានការលើកដាក់ ដកឃ្លា ខ័ណ្ឌ និងចំតួអក្សរ ជាដើម។ ហេតុនេះហើយ ទើប ក្រសួងអប់រំ យុវជន និងកីឡា ចេញលិខិតណែនាំបន្ថែមទៀត។

ចំណែកលោក គង់ សំនៀង ប្រធានសហព័ន្ធសេវាអប់រំនៅកម្ពុជា បានលើកឡើងដែរថា «ការចេញសេចក្ដីណែនាំរបស់ក្រសួងនេះ តាមពិតជារឿងល្អនៅក្នុងការសរសេរជាភាសាជាតិ សរសេរហ្នឹងកុំគ្រាន់តែជាការសរសេរសរសេរឱ្យត្រូវថែមទៀត។ ភាសាជាតិយើងបើយើងមិនស្រលាញ់ តើឱ្យនរណាជាអ្នកស្រលាញ់។ អីចឹងដើម្បីបណ្ដុះឱ្យភាសានឹងមានលក្ខណៈទូលំទូលាយ ក្មេងគ្រប់រូប ឬអ្នកប្រើប្រាស់បណ្ដាញសង្គម អាចសរសេរបានដោយងាយស្រួល វាពាក់ព័ន្ធជាមួយនឹងក្រសួងអប់រំ ដោយសារក្រសួងអប់រំ ជាមេបា ជាអ្នកដែលធ្វើការបណ្ដុះបណ្ដាលភាសាជាតិ»។

លោកបានលើកជាយោបល់ថា ជារួមគ្រប់គ្រឹះស្ថានសិក្សាទាំងអស់ គួរតែយកចិត្តទុកដាក់ចូលរួមជាមួយក្រសួងអប់រំ យុវជន និងកីឡា ដើម្បីលើកតម្កើងអក្សរសាស្ត្រជាតិរបស់យើងចាប់ផ្តល់យកចិត្តទុកដាក់បង្ហាត់បង្រៀនក្មេងចាប់តាំងពីកម្រិតថ្នាក់ទី ១ ដែលគាត់ស្គាល់ពីសូរសៀងសូរស័ព្ទការសរសេរពាក្យភាសាខ្មែរឱ្យបានត្រឹមត្រូវ។

លោកបានបន្តទៀតថា «ឥឡូវនេះ បើយើងយកមកកែបណ្ដាជនទូទៅដែលប្រើហ្វេសប៊ុក ពេលខ្លះវាពិបាក និងហួសពេលទៅហើយ។ អ្នកខ្លះមិនបានយកចិត្តទុកដាក់រៀនពីក្មេង អីចឹងការសរសេរភាសា ការបម្រែបម្រួលភាសា អត់បានយល់ស៊ីជម្រៅទេ ដល់អីចឹងពេលសរសេរទៅវាខុសដូចជាពាក្យឱ្យខ្លះសរសេរអោយនៅឡើយ។ អីចឹងចូលរួមលើកតម្កើងភាសាជាតិទាំងអស់គ្នាទៅ ដើម្បីឱ្យភាសាជាតិយើងទូលំទូលាយនៅស្រុកគេ ពិសេសប្រទេសថៃ គេសរសេរភាសាគេក្នុងបណ្ដាញហ្វេសប៊ុក គេមិនសូវប្រើភាសាអង់គ្លេសទេ។ អីចឹងហើយបានជាហ្គោហ្គលត្រេនស្លេត ព្យាយាមដើម្បីធ្វើហ្គោហ្គលត្រេនស្លេតហ្នឹង ឱ្យទៅជាភាសាអង់គ្លេស ដើម្បីអាចឱ្យអ្នកផ្សេងអាចចង់មើលខ្លឹមសារ ឬ ពាក្យពេចន៍ដែលប្រជាជន នៃជាតិសាសន៍នីមួយៗ សរសេរ គេប្រើហ្គោហ្គលត្រេនស្លេត ទៅគេអាចយល់បានហើយ»។

លោកបានលើកទឹកចិត្តបណ្ដាជន ពិសេសលោកគ្រូ អ្នកគ្រូ គណៈនាយកមន្ត្រីរាជការផ្សេងៗ សូមយកចិត្តទុកដាក់ ហើយប្រែក្លាយការសរសេរឃែបសិននៅក្នុងបណ្ដាញសង្គមជាភាសាអង់គ្លេស ទៅជាភាសាជាតិរបស់យើងវិញ៕

អត្ថបទ ៖ សំអឿន

The post អ្នកជំនាញអប់រំ គាំទ្រអ្នកប្រើបណ្ដាញសង្គម សរសេរសំណេរ និងអក្ខរាវិរុទ្ធភាសាខ្មែរ ឱ្យបានត្រឹមត្រូវ លើកតម្កើងភាសាជាតិ appeared first on Kampuchea Thmey Daily.

អ្នកជំនាញអប់រំ ៖ ដំណើរការប្រឡងបាក់ឌុបឆ្នាំនេះ មានភាពល្អប្រសើរជាងឆ្នាំមុនៗ ទៅទៀត

អ៊ិន ពិសី — Sat, 25 Nov 2023 04:25:58 +0000

អ្នកជំនាញផ្នែកវិស័យអប់រំ បានវាយតម្លៃថា ដំណើរការប្រឡងបាក់ឌុបនៅឆ្នាំនេះ បានប្រព្រឹត្តិទៅល្អប្រសើរជាងបណ្តាឆ្នាំមុនៗទៅទៀត ហើយស្នើ ក្រសួង បន្តរៀបចំការប្រឡងជាបន្តទៀត ដើម្បីចម្រាញ់រកសិស្សមានគុណភាព និងប្រសិទ្ធភាពខ្ពស់ ឲ្យបានកាន់តែច្រើន ជាធនធានមនុស្សដ៏មានតម្លៃ ចូលរួមអភិវឌ្ឍន៍ប្រទេសជាតិកាន់តែរីកចម្រើន។

លោក ហេង វ៉ាន់ដា ប្រធានក្រុមប្រឹក្សាភិបាលសមាគមគ្រឹះស្ថានឧត្តមសិក្សាកម្ពុជា មានប្រសាសន៍នៅព្រឹកថ្ងៃទី ២៥ វិច្ឆិកានេះថា «ដំណើរការប្រឡងបាក់ឌុប មានភាពល្អប្រសើរជាងបណ្តាឆ្នាំមុនៗទៅទៀត ដោយមានការរឹតបន្តឹងខ្លាំង ធ្វើឲ្យសិស្សខំរៀន បើមិនខំរៀនទេ មិនអាចប្រឡងជាប់ ឬទទួលបាននិទ្ទេសល្អបានទេ ដូចទ្រឹស្ដី ឯកឧត្ដមឧបនាយករដ្ឋមន្ត្រី ហង់ជួន ណារ៉ុន លើកឡើងអីចឹង អ្នកចេះអត់ចេះធ្លាក់។ ដល់អីចឹង ឈប់សូកអីចឹង បាក់ឌុបជាតិគាំទ្រ ១៨០% តែម្តង ឲ្យបន្តធ្វើព្រោះបានផលច្រើនណាស់»។ លោក បានបន្តថា «ការប្រឡងនេះ គិតពីហ្គ្រេត មិនមែនមិនឲ្យសិស្សរៀនបន្តទៀតទេ។ ប្រឡងបាក់ឌុបជាតិ ត្រូវតែមាន ព្រោះថាសិស្សជាប់មានគុណភាពពូកែពិតមែន ពិសេសសិស្សជាប់ A ខំរៀនតែម្ដង»។

ចំណែកលោក គង់ សំនៀង ប្រធានសហព័ន្ធសេវាអប់រំនៅកម្ពុជា បានមានប្រសាសន៍ថា ការប្រឡងបាក់ឌុបបានក្លាយជាទម្លាប់ទៅហើយ ដោយមានការរៀបចំយ៉ាងតឹងរ៉ឹង មានការសង្កេតការណ៍ពីអង្គភាពប្រឆាំងអំពើពុករលួយ អប្បមាទ និងគណៈមេប្រយោគនៅទូទាំងប្រទេស។

លោកបន្តថា ចំពោះលទ្ធផលឆ្នាំនេះមានសិស្សជាប់កើនឡើង ពិសេសសិស្សជាប់និទ្ទេស A ដែលបង្ហាញពីការគ្រប់គ្រងដំណើរការប្រឡងបានល្អ សិស្សខិតខំរៀនទើបធ្វើឲ្យសិស្សជាប់ច្រើន។ យ៉ាងណាក៏ដោយ លោកស្នើថា «ប្រសិនបើការប្រឡងក្លាយជាទម្លាប់ទៅហើយនោះ នៅឆ្នាំក្រោយៗទៀត ក្រសួង គួរតែរៀបចំដំណើរការប្រឡងដោយខ្លួនឯង ម្ចាស់ការដោយខ្លួនឯង ព្រោះក្រសួងមានបទពិសោធន៍គ្រប់គ្រាន់ មានទាំងអប្បមាទ គណៈមេប្រយោគក្នុងការត្រួតពិនិត្យ និងដំណើរការប្រឡង ដោយមិនចាំបាច់មានការចូលរួមពីអង្គភាពប្រឆាំងអំពើពុករលួយទៀតនោះទេ»។

គួរជម្រាបថា ប្រឡងបាក់ឌុបឆ្នាំ ២០២៣ នេះ មានបេក្ខជនប្រឡងជាប់សរុប ចំនួន ៩៨ ៤៦០ នាក់ត្រូវជា ៧២,៨៩ ភាគរយ នៃចំនួនបេក្ខជនមកប្រឡងចំនួន ១៣៥ ០៨៤ នាក់ ស្រី ៧២ ៣៤៤ នាក់ ក្នុងចំណោមបេក្ខជនចុះឈ្មោះប្រឡងសរុបចំនួន ១៣៧ ៤១២ នាក់ ស្រី ៧៣ ២៧៨ នាក់។ ក្នុងនោះ បេក្ខជនជាប់និទ្ទេស A ចំនួន ១ ៦៧៣ នាក់, និទ្ទេស B ចំនួន ៦ ៩៦៤ នាក់ និទ្ទេស C ចំនួន ១៨ ៣០៨ នាក់, និទ្ទេស D ចំនួន ៣៤ ២៤៦ នាក់, និងនិទ្ទេស E ចំនួន ៣៧ ២៦៩ នាក់៕

អត្ថបទ ៖ សំអឿន

The post អ្នកជំនាញអប់រំ ៖ ដំណើរការប្រឡងបាក់ឌុបឆ្នាំនេះ មានភាពល្អប្រសើរជាងឆ្នាំមុនៗ ទៅទៀត appeared first on Kampuchea Thmey Daily.

លោក ហេង វ៉ាន់ដា ចាត់ទុករដ្ឋមន្ត្រីក្រសួងអប់រំ ជា«កំពូលមនុស្ស»

Ken Malis — Sat, 26 Aug 2023 07:57:52 +0000

លោក ហេង វ៉ាន់ដា ប្រធានសមាគមគ្រឹះស្ថានឧត្តមសិក្សា បានចាត់ទុកលោកបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា ថាជាកំពូលមនុស្ស។ លោក ហេង វ៉ាន់ដា ក៏បានបង្ហាញឳ្យដឹងផងដែរថា លោករដ្ឋមន្រ្តី ហង់ ជួនណារ៉ុន អាចប្រើប្រាស់បានដល់ទៅ ៧ ភាសាឯណោះ។

តាមរយ:ហ្វេសប៊ុករបស់ខ្លួនកាលពីថ្ងៃទី២៥ ខែសីហា លោក ហេង វ៉ាន់ដា បានបញ្ជាក់ថា បណ្ឌិតសភាចារ្យ ហង់ ជួនណារ៉ុន គឺជាកំពូលមនុស្សដែលគ្មានសារជាតិពុករលួយក្នុងខ្លួនទាល់តែសោះ។ លោកថា៖«កំពូលមនុស្សធ្វើអីក៏ល្អ ការដឹកនាំក៏ល្អ ការគ្រប់គ្រងក៏ល្អ ការធ្វើច្បាប់ និងលិខិតបទដ្ឋានគតិយុត្តិនានាក៏ល្អ ជាមួយនឹងភាពញញឹមញញែម សប្បាយរីករាយ គ្មានបំណុលទាល់តែសោះក្នុងខ្លួន»។

សូមបញ្ជាក់ថា បណ្ឌិតសភាចារ្យ ហង់ ជួនណារ៉ុន គឺជានិស្សិតឆ្នើមមួយរូបដែលបានបញ្ចប់ការសិក្សានៅប្រទេសរុស្ស៊ី និងបានកាន់តំណែងជា រដ្ឋមន្ត្រីក្រសួងអប់រំ យុវជន និងកីឡា ចាប់តាំងពីឆ្នាំ២០១៣ រហូតមកទល់ពេលបច្ចុប្បន្ននេះ៕

The post លោក ហេង វ៉ាន់ដា ចាត់ទុករដ្ឋមន្ត្រីក្រសួងអប់រំ ជា«កំពូលមនុស្ស» appeared first on Kampuchea Thmey Daily.

ក្រសួងអប់រំ មិនទាន់ទទួលបានករណីតវ៉ាលទ្ធផលពីបេក្ខជនប្រឡងបាក់ឌុប

Dy Bunnara — Sat, 24 Dec 2022 07:52:42 +0000

រហូតមកដល់ពេលនេះក្រសួងអប់រំ យុវជន និងកីឡា នៅមិនទាន់ទទួលបានករណីតវ៉ាលទ្ធផលប្រឡងបាក់ឌុបណាមួយពីបេក្ខជនប្រឡងធ្លាក់ឬជាប់ឌុបនៅឡើយទេ។

លោក រស់ សុវាចា អ្នកនាំពាក្យក្រសួងអប់រំយុវជននិងកីឡាបានឱ្យដឹងនៅរសៀលថ្ងៃទី២៤ធ្នូនេះថា «ជាទូទៅក្រសួងអប់រំ យុវជន និងកីឡាជម្រាបជូនមហាជនពីព័ត៌មានបច្ចុប្បន្នភាព តាមរយ:ហ្វេសប៊ុកផ្លូវការរបស់ក្រសួង។ នៅពេលមានព័ត៌មានថ្មីករណីពាក់ព័ន្ធការប្រឡងបាក់ឌុប ក្រសួងនឹងជម្រាបជូនមហាជន តាមរយ:ហ្វេសប៊ុកផ្លូវការរបស់ក្រសួង»។

ការប្រឡងបាក់ឌុបថ្ងៃទី០៥ធ្នូ២០២២កន្លងទៅថ្មីៗនេះ អ្នកជំនាញវិស័យអប់រំបានកោតសរសើរពីការរៀបចំប្រព្រឹត្តិទៅបានល្អនិងលទ្ធផលអាចទទួលយកបានទាំងអស់គ្នាហើយមានសិស្សប្រឡងជាប់ច្រើនជាងឆ្នាំមុន។

លោក ហេង វ៉ាន់ដា ប្រធានក្រុមប្រឹក្សាភិបាលសមាគគ្រឹះស្ថានឧត្តមសិក្សាកម្ពុជាបានមានប្រសាសន៍នៅថ្ងៃទី២៤ធ្នូនេះថា «មិនមានអ្វីប្លែកទេនៅពេលដែលសិស្សម្នាក់ៗខិតខំប្រឹងប្រែងរៀនសូត្រនោះនឹងទទួលបានលទ្ធផលល្អហើយ។ជាក់សស្តែងឆ្នាំនេះឃើញថាសិស្សជាប់ច្រើនជាងឆ្នាំមុន»។

ចំណែក លោក ហែម ស៊ីណារ៉េត ប្រធានមន្ទីរអប់រំយុវជននិងកីឡារាជធានីភ្នំពេញបានឱ្យដឹងដែរថា លទ្ធផលបាក់ឌុបនៅឆ្នាំនេះឃើញថាល្អប្រសើរដោយចំនួនភាគរយសិស្សប្រឡងជាប់ខ្ពស់ជាងឆ្នាំមុន ដោយសារស្ថានភាពកូវីដ១៩បានធូរស្បើយ ផ្តល់ឱកាសឱ្យសិស្សបានចូលរៀនច្រើនខុសពីបណ្តាឆ្នាំមុនៗដែលមានកូវីដ១៩ឆ្លងខ្ពស់សិស្សចូលរៀនបានតិចជាមួយគ្រូនិងរៀនតាមអនឡាញធ្វើឱ្យសិស្សមួយចំនួនរៀនមិនបានពេញលេញ។ ម្យ៉ាងទៀតលទ្ធផលប្រឡងនេះក៏បានបង្ហាញពីការខិតខំប្រឹងប្រែងរៀនសូត្ររបស់សិស្សផងដែរ។

ចំណែកបេក្ខជនជាប់និទ្ទេសA តិចជាងឆ្នាំមុនដល់ទៅ៧០០នាក់ លោក ហេង វ៉ាន់ដាបានពន្យល់ថា គ្មានអីទៀងទាត់ទេ។ ទោះជាយ៉ាងណា ក៏ការប្រឡងនេះបង្ហាញឱ្យឃើញនូវសច្ចៈភាព និងតម្លាភាព។ យ៉ាងណាក៏ដោយ លោកបានណែនាំដល់សិស្សប្រឡងជាប់បាក់ឌុប គួរតែជ្រើសយកមុខវិជ្ជា ត្រូវឈរលើចំណង់ចំណូលចិត្ត។ មានអំណោយទានពីកំណើតនិងត្រូវគិតដល់ទីផ្សារដែរ។

គួរបញ្ជាក់ថាឆ្នាំនេះ មានបេក្ខជនប្រឡងជាប់បាក់ឌុបចំនួន៩០៩៥០នាក់ត្រូវជា ៧២,៣៣%នៃបេក្ខជនមកប្រឡងចំនួន១២៥៧៣៥នាក់កើនជាងឆ្នាំមុន១៨៩៣៤នាក់ ខណៈឆ្នាំមុនមានបេក្ខជនប្រឡងជាប់ចំនួន ៧២០១៦ នាក់ស្មើនឹង៦៥.៦៥ភាគរយ ក្នុងចំណោមបេក្ខជនចូលរួមប្រឡងចំនួន១១៤១៨៧នាក់។

ចំណែកបេក្ខជនជាប់និទ្ទេសAនៅឆ្នាំនេះមានចំនួន ១០៤៩នាក់ ថយចុះចំនួន៧០៤នាក់ ខណៈឆ្នាំមុនមានបេក្ខជនជាប់និទ្ទេសAចំនួន១៧៥៣នាក់។

ប្រឡងបាក់ឌុបថ្ងៃទី០៥ធ្នូ២០២២ មានបេក្ខជនចុះឈ្មោះសរុបចំនួន១២៨ ១៣៥នាក់ ស្រី៦៨៧៧១នាក់មាន២២១មណ្ឌល ដែលត្រូវជា៥១៧៤បន្ទប់ និងមានការចូលរួមដោយគណៈមេប្រយោគនិងគណៈកម្មការនានាចូលរួមក្នុងដំណើរនោះប្រឡងសរុបចំនួន១៧២៤០នាក់ ជំនួយការអប្បមាទដែលជាគរុសិស្ស និងគរុនិស្សិត ចំនួន២ ៧៥៦នាក់។

ចំណែកអង្គភាពប្រឆាំងអំពើពុករលួយ បានចូលរួមសង្កេតការណ៍ដោយបានចាត់ថ្នាក់ដឹកនាំ និងមន្រ្តីចំនួន៣៥០នាក់និងអ្នកសង្កេតការណ៍រាជធានីខេត្តចំនួន២ ៧០០នាក់៕

អត្ថបទ៖ សំអឿន

The post ក្រសួងអប់រំ មិនទាន់ទទួលបានករណីតវ៉ាលទ្ធផលពីបេក្ខជនប្រឡងបាក់ឌុប appeared first on Kampuchea Thmey Daily.

ការកើនឡើងនៃ សាលាឯកជន ប៉ះពាល់ដល់ សាលារដ្ឋ ឬទេ?

KC Virak — Wed, 11 May 2022 08:15:53 +0000

លោក បណ្ឌិត ហេង វ៉ាន់ដា ប្រធានក្រុមប្រឹក្សាភិបាលសមាគគ្រឹះស្ថានឧត្តមសិក្សាកម្ពុជា បានមានប្រសាសន៍នៅរសៀលថ្ងៃទី១១ ខែឧសភានេះថា ការកើនឡើងនៃចំនួនគ្រឹះស្ថានសិក្សាឯកជន មិនធ្វើឱ្យប៉ះពាល់ដល់សាលារដ្ឋនោះទេ ផ្ទុយទៅវិញបានជួយដល់រាជរដ្ឋាភិបាលក្នុងការអភិវឌ្ឍន៍ធនធានមនុស្សនៅកម្ពុជាថែមទៀត។

លោកបណ្ឌិតបានបន្តថា ការកើនឡើងនៃចំនួនសាលារៀនឯកជន បានជួយដល់រាជរដ្ឋាភិបាលដើម្បីស្រូបយកសិស្សនិស្សិតឱ្យបានរៀន ហើយបង្កើនធនធានមនុស្សឱ្យកាន់តែច្រើន។

លោកបណ្ឌិត មានប្រសាសន៍បន្តទៀតថា៖ “តាមធម្មតា សាលារដ្ឋជាសាលាមិនស្វែងរកប្រាក់ចំណេញអ្វីទេ ទោះបីជាមានយកប្រាក់ក៏ដោយ ក៏ប្រាក់ទាំងនោះមិនមែនស្វែងរកផលចំណេញ។ ផ្ទុយទៅវិញសាលាឯកជនទេដែលស្វែងរកប្រាក់ចំណេញ។ ដូចនេះការកើនឡើងរបស់សាលាឯកជននេះ គឺជាការបំពេញឱ្យគ្នាទៅវិញទៅមក និងមិនមានផលប៉ះពាល់អ្វីដែរ”។

លោកបណ្ឌិតបានបន្ថែមថា ប្រទេសមានសន្តិភាព មានស្ថេរភាពនយោបាយ និងសេដ្ឋកិច្ច ធ្វើឱ្យមានកំណើនប្រជាពលរដ្ឋមានជីវភាពធូរធារច្រើន ហើយបើកាលណាប្រជាពលរដ្ឋធូរធារ ពួកគាត់នឹងបញ្ជួនកូនតូចៗទៅចូលរៀន ក៏នឹងកើនដែរ។ ចំណែកកំណើនសាលារៀន ក៏កើនឡើងដែរ ទាំងសាលារដ្ឋ និងឯកជន។

លោកបណ្ឌិតបានបញ្ជាក់ថា៖ “ជាទូទៅ បើសិនជាសាលារដ្ឋស្រូបយកសិស្សថ្មីៗមិនបាន តែងតែយកសាលាឯកជនទៅជំនួស ដោយសារតែគោលនយោបាយរបស់រាជរដ្ឋាភិបាលបើកទូលាយឱ្យមានវិស័យឯកជន។ បើរដ្ឋាភិបាលមានលទ្ធភាព ក្រសួងអប់រំមានលទ្ធភាពស្រូបយកទាំងអស់ នោះក៏មិនសូវមានវិស័យឯកជនទេ។ ប៉ុន្តែបើស្រូបបានចំនួនណាមួយ ហើយមិនអាចមានលទ្ធភាពស្រូបបានទាំងអស់ទេ វាត្រូវមានសាលាឯកជនហើយ”។

យោងតាមរបាយការណ៍របស់ក្រសួងអប់រំ យុវជន និងកីឡា បានឱ្យដឹងថា គិតត្រឹមឆ្នាំសិក្សា ២០២១-២០២២ នេះ កម្ពុជាមានសាលាមត្តេយ្យសិក្សា និងគ្រឹះស្ថានសិក្សាចំណេះទូទៅ ទាំងសាធារណៈ និងឯកជន មានចំនួន ១៨ ៤៣០ ក្នុងនោះ មត្តេយ្យសិក្សាសហគមន៍ ៣ ០៨៣ កន្លែង គ្រឹះស្ថានសិក្សាចំណេះទូទៅសាធារណៈ ១៣ ៦៨១ និងគ្រឹះស្ថានសិក្សាឯកជន ១ ៦៦៦។

ក្នុងនោះមានសិស្សសរុបចំនួន ៣ ៥៨៩ ០២៥ នាក់ សិស្សស្រី ៥០,៤ ភាគរយ ដោយមានសិស្សមត្តេយ្យសិក្សាសហគមន៍ ៧១ ៣៩៩នាក់ ស្រី ៥១,៧ ភាគរយ សិស្សគ្រឹះស្ថានសិក្សាចំណេះ ទូទៅសាធារណៈ ៣ ២៧៧ ០៧៦ នាក់ ស្រី ៥០,៤ ភាគរយ និងសិស្សគ្រឹះស្ថានសិក្សាឯកជន ២៤០ ៥៥០ នាក់ ស្រី ៤៩,០ ភាគរយ។

ចំណែកគ្រឹះស្ថានឧត្តមសិក្សាសរុបមានចំនួន ១៣០ ក្នុងនោះគ្រឹះស្ថានឧត្តមសិក្សាសាធារណៈ ៤៨ និងគ្រឹះស្ថានឧត្តមសិក្សាឯកជន ៨២។ និស្សិតកំពុងសិក្សានៅកម្រិតឧត្តមសិក្សាសរុបមានចំនួន ១៩៨ ៣៦៣ នាក់ ស្រី ៤៩,៧ ភាគរយ៕

អត្ថបទ៖ សំអឿន

The post ការកើនឡើងនៃ សាលាឯកជន ប៉ះពាល់ដល់ សាលារដ្ឋ ឬទេ? appeared first on Kampuchea Thmey Daily.

អ្នកជំនាញអប់រំ ណែនាំដល់សិស្សនិស្សិតបង្កើនការប្រុងប្រយ័ត្ន ទោះកូវីដនៅកម្ពុជាធ្លាក់ដល់សូន្យ

KC Virak — Sun, 08 May 2022 07:51:16 +0000

លោកបណ្ឌិត ហេង វ៉ាន់ដា ប្រធានក្រុមប្រឹក្សាភិបាលសមាគមគ្រឹះស្ថានឧត្តមសិក្សាកម្ពុជា បានធ្វើការណែនាំដល់សិស្សនិស្សិតត្រូវតែបង្កើនការប្រុងប្រយ័ត្នឱ្យបានខ្លាំងក្លាបន្ថែមទៀត ទោះបីជាស្ថានភាពការឆ្លងជំងឺកូវីដ-១៩ ធ្លាក់ដល់សូន្យក៏ដោយ។

លោកបណ្ឌិតបានមានប្រសាសន៍នៅថ្ងៃទី០៨ ខែឧសភានេះថា៖ “ខ្ញុំសូមបញ្ជាក់បន្តិចថា យើងសូន្យគឺទទួលជ័យជំនះទៅលើព្រឹត្តិការណ៍ ២០ កុម្ភៈ ឆ្នាំ២០២១ គឺសម្តេចតេជោមានប្រសាសន៍អីចឹង គឺសូន្យថ្ងៃម្សិលមិញហ្នឹង។ ប៉ុន្តែ មិនមានជ័យថា កូវីដ-១៩ អស់ពីលើផែនដីទេ វានៅតែមាន។ យើងចេះតែខ្លាចព្រោះគ្មាននរណាមួយអាចគ្រប់គ្រងវាបាន១០០ភាគរយទេ ខ្លាចវាមានការឆ្លងរាលដាលជាថ្មី បង្កើតជាព្រឹត្តិការណ៍ថ្ងៃណាមួយទៀតដែលបង្កើតបានជាយុទ្ធនាការ។ ប្រសិនបើមេរោគថ្មីមកទៀត អាចបិទទៀត”។

លោកបណ្ឌិត បានបន្តទៀតថា ថ្មីៗនេះវិធានការរបស់រាជរដ្ឋាភិបាលគឺដោះកាតព្វកិច្ចចេញលើការពាក់ម៉ាស។ នៅតាមគ្រឹះស្ថានឧត្តមសិក្សានានាមាននិស្សិតចូលច្រើន ហើយមាននិស្សិតខ្លះពាក់ម៉ាស និងខ្លះទៀតមិនពាក់ អាស្រ័យទៅលើសិទ្ធិសេរីភាពរបស់គាត់ ព្រោះថារាជរដ្ឋាភិបាលមិនតម្រូវឱ្យមានកាតព្វកិច្ចពាក់ម៉ាសទៀតទេ។ នៅលើសិស្សទេសិស្សគាត់ចង់ពាក់ក៏ពាក់ទៅ។

លោកបណ្ឌិត បានបន្ថែមថា ចំពោះការសិក្សាវិញនៅតាមគ្រឹះស្ថានសិក្សាឯកជន យើងនៅតែប្រកាន់យកវិធីសាស្ត្រតាមអនឡាញភ្លើស ឬអនឡាញបូកដដែល។ មានន័យថា ពាក់កណ្តាលរៀននៅក្នុងថ្នាក់ និងពាក់កណ្តាលទៀតរៀននៅខាងក្រៅ ឬនៅផ្ទះ ដើម្បីការពារការឆ្លងរាលដាលជំងឺកូវីដ-១៩ ព្រោះជាវិធិសាស្ត្រមួយដ៏ល្អ ហើយយើងក៏មិនចាំបាច់ស្នើសុំទៅក្រសួងអប់រំ យុវជន និងកីឡា លើកលែងកាតព្វកិច្ចពាក់ម៉ាសនោះទេ។

យ៉ាងណាក៏ដោយ លោកបណ្ឌិតបានផ្តល់សិទ្ធិសេរីភាពឱ្យសិស្សនិស្សិតជាអ្នកសម្រេចដោយខ្លួនឯងថា ពាក់ម៉ាស់ ឬមិនពាក់នៅក្នុងថ្នាក់ ជាសិទ្ធិរបស់ពួកគេ។ លោកបណ្ឌិតបានបន្តទៀតថា ទោះបីជាមានការលើកលែងការពាក់ម៉ាស់ក៏ដោយ ក៏ការពាក់ម៉ាស់នៅមានប្រយោជន៍ខ្លះៗនៅតាមទីកន្លែងមួយចំនួនដែលតម្រូវឱ្យពាក់ម៉ាស់ដែរ៕

អត្ថបទ៖ សំអឿន

The post អ្នកជំនាញអប់រំ ណែនាំដល់សិស្សនិស្សិតបង្កើនការប្រុងប្រយ័ត្ន ទោះកូវីដនៅកម្ពុជាធ្លាក់ដល់សូន្យ appeared first on Kampuchea Thmey Daily.

លោក ហេង វ៉ាន់ដា Archives - Kampuchea Thmey Daily

ប្រធានសមាគមមួយ ស្នើឱ្យ ក្រសួងអប់រំ ដាក់ការប្រឡងបាក់ឌុប ជាទិវាបាក់ឌុបជាតិ

លោក ហេង វ៉ាន់ដា ៖ សមាគមមិនទទួលយកសំណើពីសាលាឯកជន​សុំរៀបចំប្រឡងបាក់ឌុបដោយខ្លួនឯងទេ

អ្នកជំនាញអប់រំ ៖ ដំណើរការប្រឡងបាក់ឌុបឆ្នាំនេះ មានភាពល្អប្រសើរជាងឆ្នាំមុនៗ ទៅទៀត

លោក ហេង វ៉ាន់ដា ចាត់ទុករដ្ឋមន្ត្រីក្រសួងអប់រំ ជា«កំពូលមនុស្ស»

ក្រសួងអប់រំ មិនទាន់ទទួលបានករណីតវ៉ាលទ្ធផល​ពីបេក្ខជនប្រឡងបាក់ឌុប

ការកើនឡើងនៃ សាលាឯកជន ប៉ះពាល់ដល់ សាលារដ្ឋ ឬទេ?

អ្នកជំនាញអប់រំ ណែនាំដល់សិស្សនិស្សិតបង្កើនការប្រុងប្រយ័ត្ន ទោះកូវីដនៅកម្ពុជាធ្លាក់ដល់សូន្យ

លោក ហេង វ៉ាន់ដា ៖ សមាគមមិនទទួលយកសំណើពីសាលាឯកជនសុំរៀបចំប្រឡងបាក់ឌុបដោយខ្លួនឯងទេ

ក្រសួងអប់រំ មិនទាន់ទទួលបានករណីតវ៉ាលទ្ធផលពីបេក្ខជនប្រឡងបាក់ឌុប