លោក ហែម ស៊ីណារ៉េត Archives - Kampuchea Thmey Daily

មន្ទីរអប់រំរាជធានីភ្នំពេញ នឹងចុះឃ្លាំមើលតាមសាលា ដើម្បីទប់ស្កាត់បាតុភាពផ្សេងៗ ក្នុងទិវា នៃក្តីស្រលាញ់

អ៊ិន ពិសី — Fri, 13 Feb 2026 08:51:45 +0000

មន្ទីរអប់រំ យុវជន និងកីឡារាជធានីភ្នំពេញ នឹងចុះឃ្លាំមើលតាមសាលារៀននានា នៅក្នុងទិវា នៃក្តីស្រលាញ់ ថ្ងៃ ១៤ កុម្ភៈ ដើម្បីបញ្ចៀសកុំឱ្យមានបាតុភាពមិនប្រក្រតីណាមួយកើតឡើង។

លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡារាជធានីភ្នំពេញ បានមានប្រសាសន៍នៅរសៀលថ្ងៃទី ១៣ កុម្ភៈ នេះថា មន្ទីរអប់រំ បានធ្វើការប្រជុំណែនាំដល់គ្រប់គ្រឹះស្ថានសិក្សារដ្ឋ និងឯកជនរួចហើយ ឱ្យពង្រឹង និងទប់ស្កាត់មិនឱ្យមានភាពមិនប្រក្រតីណាមួយកើតឡើងនៅក្នុងសាលា ក្នុងទិវា នៃក្តីស្រលាញ់ និងបានផ្សព្វផ្សាយសេចក្ដីជូនដំណឹងរបស់ក្រសួងអប់រំ យុវជន និងកីឡា រួចហើយដែរ ដើម្បីឱ្យសាលាផ្សព្វផ្សាយបន្តទៅដល់សិស្សានុសិស្សបានយល់ជ្រួតជ្រាប និងអនុវត្តឱ្យមានប្រសិទ្ធភាពទាំងអស់គ្នា ពិសេសនៅពេលគោរពទង់ជាតិ ដើម្បីបញ្ចៀសកុំឱ្យមានបាតុភាពមិនប្រក្រតីណាមួយកើតឡើង។

លោកប្រធានមន្ទីរ បានបន្ថែមថា ដើម្បីទប់ស្កាត់ភាពមិនប្រក្រតីក្នុងទិវា នៃក្តីស្រលាញ់ មន្ទីរ បានណែនាំដល់នាយកសាលាទាំងអស់ ត្រូវសហការជាមួយអាជ្ញាធរមូលដ្ឋាន មិនអនុញ្ញាតឱ្យមានការលក់ផ្កា ដែលជាកាដូសម្រាប់ជូនដល់សង្សារនៅក្រៅបរិវេណសាលារៀន ឬ លក់តាមច្រកចូលសាលានៅក្នុងទិវា នៃក្តីស្រលាញ់ ថ្ងៃទី ១៤ កុម្ភៈ ឡើយ។

កាលពីថ្ងៃទី ៥ ខែកុម្ភៈ ឆ្នាំ ២០២៦ ក្រសួងអប់រំ យុវជន និងកីឡា បានចេញវិធានការយ៉ាងតឹងរ៉ឹង ដើម្បីទប់ស្កាត់ភាពមិនប្រក្រតីក្នុងទិវា នៃក្តីស្រលាញ់ នៅតាមគ្រឹះស្ថានសិក្សាសាធារណៈ និងឯកជនដូចជា ផ្សព្វផ្សាយឱ្យបានទូលំទូលាយគ្រប់មធ្យោបាយទាំងអស់ អំពីអត្ថន័យទិវា នៃសេចក្តីស្រឡាញ់ ដល់សិស្សានុសិស្ស ចៀសវាងមានការយល់ច្រឡំ ប្រព្រឹត្តខុសនូវសីលធម៌ វប្បធម៌ប្រពៃណីខ្មែរ , ត្រូវពង្រឹងវិន័យឱ្យបានម៉ឺងម៉ាត់ និងតាមដានវត្តមានសិស្សជាប់ជាប្រចាំ , ត្រូវបញ្ជ្រាបការអប់រំសីលធម៌តាមមុខវិជ្ជានីមួយៗ , ត្រូវជំរុញដំណើរការក្រុមប្រឹក្សាយុវជន ក្រុមប្រឹក្សាកុមារប្រចាំសាលា ដោយអនុវត្តសកម្មភាព មិត្តអប់រំមិត្ត , ត្រូវមានទំនាក់ទំនងល្អជាមួយអាណាព្យាបាលសិស្ស សហគមន៍ ដើម្បីងាយស្រួលក្នុងការផ្តល់ដំណឹង នៅពេលមានបញ្ហាមិនប្រក្រតីកើតឡើង , ត្រូវរួមគ្នាសហការ ទប់ស្កាត់ អប់រំ ណែនាំ និងកែលម្អ ឱ្យបានទាន់ពេលវេលា និងគ្រប់មន្ទីរអប់រំ យុវជន និងកីឡា រាជធានី ខេត្ត គណៈគ្រប់គ្រងសាលារៀន និងគ្រប់ភាគីពាក់ព័ន្ធទាំងអស់ ត្រូវបន្តពង្រឹងបទបញ្ជាផ្ទៃក្នុងសម្រាប់គ្រឹះស្ថានបឋមសិក្សា និងបទបញ្ជាផ្ទៃក្នុងសម្រាប់គ្រឹះស្ថានមធ្យមសិក្សាចំណេះទូទៅសាធារណៈ៕

អត្ថបទ ៖ សំអឿន

The post មន្ទីរអប់រំរាជធានីភ្នំពេញ នឹងចុះឃ្លាំមើលតាមសាលា ដើម្បីទប់ស្កាត់បាតុភាពផ្សេងៗ ក្នុងទិវា នៃក្តីស្រលាញ់ appeared first on Kampuchea Thmey Daily.

ប្រធានមន្ទីរអប់រំ ៖ មកដល់ពេលនេះ នៅមិនទាន់មានបេក្ខជនភៀសខ្លួនសុំចុះឈ្មោះចូលរួមប្រឡងនៅភ្នំពេញ នៅឡើយទេ

អ៊ិន ពិសី — Mon, 04 Aug 2025 09:34:37 +0000

លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡារាជធានីភ្នំពេញ បានមានប្រសាសន៍នៅរសៀលថ្ងៃទី ៤ សីហា នេះថា រហូតមកដល់ពេលនេះ នៅមិនទាន់មានបេក្ខជនភៀសខ្លួនពីខេត្តព្រះវិហារ និងឧត្តរមានជ័យ មកចុះឈ្មោះចូលរួមប្រឡងនៅមណ្ឌលប្រឡងរាជធានីភ្នំពេញនៅឡើយទេ។

លោកប្រធានមន្ទីរ បានបន្តថា «អត់ទាន់មានទេ កាលពីសប្ដាហ៍មុនមានម្នាក់ដែរ គាត់សួរព័ត៌មានពីខេត្តឧត្តរមានជ័យ យើងទាក់ទងទៅក្រសួង ក្រសួងអនុញ្ញាតឱ្យមួយពីរបីទៅ តែឥឡូវបាត់ព័ត៌មានទៅ លុះដល់យើងសួរបញ្ជាក់ទៅ គាត់ប្ដូរចិត្តទៅប្រឡងនៅសៀមរាបវិញ។ ជារួម ជាក់ស្ដែង សម្រាប់មណ្ឌលរាជធានីភ្នំពេញ អត់ទាន់មាននៅឡើយទេ»។

យ៉ាងណាក៏ដោយ លោកប្រធានមន្ទីរ បានអំពាវនាវដល់បេក្ខជនភៀសខ្លួនដោយសារសង្គ្រាម រួសរាន់ដាក់ពាក្យប្រឡងឱ្យបានមុនថ្ងៃទី ១៥ សីហា ខាងមុខ ព្រោះ ក្រសួង កំណត់ត្រឹមថ្ងៃទី ១៥ សីហា ជាកំហិត។

កាលពីថ្ងៃទី ៣១ ខែកក្កដា ឆ្នាំ ២០២៥ ក្រសួងអប់រំ យុវជន និងកីឡា បានចេញសេចក្តីណែនាំមួយ ដោយឱ្យមន្ទីរអប់រំ យុវជន និងកីឡារាជធានី-ខេត្ត ចំនួន ២៣ លើកលែងតែខេត្តឧត្តរមានជ័យ និងខេត្តព្រះវិហារ ត្រូវចាត់ចែងទទួលពាក្យសុំចុះឈ្មោះប្រឡង និងទទួលបូកសរុបព័ត៌មានដែលទទួល បានពីបេក្ខជនភៀសខ្លួនពីខេត្ត ទាំងព្រះវិហារ និងឧត្តរមានជ័យ រួចហើយរៀបចំជាបញ្ជីឈ្មោះបេក្ខជនភៀសខ្លួន ដែលបានដាក់ពាក្យប្រឡង ព្រមទាំងបញ្ជូនមកក្រសួងនៅត្រឹមថ្ងៃទី ១៥ ខែសីហា ឆ្នាំ ២០២៥ ដើម្បីក្រសួងអាចបូកសរុប និងរៀបចំជាបញ្ជីរាយនាមបេក្ខជន និងសលាកបត្រឯកត្តជន និងបន្តនីតិវិធី នៃដំណើរការប្រឡងជាបន្តទៀត។ ប៉ុន្តែក្រសួងបានណែនាំបេក្ខជននៅខេត្តឧត្តរមានជ័យ និងខេត្តព្រះវិហារ អាចសម្រេចចិត្តចូលរួមការប្រឡងនៅទីតាំងក្នុងខេត្តរបស់ខ្លួនក៏បាន ឬនៅខេត្តផ្សេងទៀតក៏បាន ប្រសិនបើបេក្ខជនបានភៀសខ្លួនចេញពីខេត្ត។

ជាមួយគ្នានេះដែរ បេក្ខជនដែលភៀសខ្លួន ត្រូវទៅដាក់ពាក្យនៅមន្ទីរអប់រំ យុវជន និងកីឡារាជធានី-ខេត្ត ដែលខ្លួនបានសម្រេចចិត្តជ្រើសរើសប្រឡង។ បេក្ខជនភៀសខ្លួន ត្រូវទៅទទួលសលាកបត្រឯកត្តជន (បោះពុម្ពថ្មី) នៅមន្ទីរអប់រំ យុវជន និងកីឡារាជធានី-ខេត្ត ដែលសាមីជនបានដាក់ពាក្យ ចាប់ពីថ្ងៃទី ២២ ខែសីហា ឆ្នាំ ២០២៥។

ចំណែកបេក្ខជនដែលសម្រេចចិត្តប្រឡងនៅខេត្តព្រះវិហារ ត្រូវត្រៀមទៅប្រឡងនៅក្នុងទីរួមខេត្តព្រះវិហារ ដដែល។ ចំពោះបេក្ខជន ដែលសម្រេចចិត្តចូលរួមការប្រឡងសញ្ញាបត្រមធ្យមសិក្សាទុតិយភូមិ នៅក្នុងខេត្តឧត្តរមានជ័យ ដើម្បីធានាសុវត្ថិភាព ក្រសួង នឹងរៀបចំមណ្ឌលប្រឡងនៅ ក្នុងភូមិសាស្ត្រស្រុកពួក នៃខេត្តសៀមរាប។ ក្រសួង នឹងបង្កើតក្រុមការងារ ដើម្បីគាំទ្រលើការដឹកជញ្ជូនបេក្ខជន ផ្តល់ថវិកាសម្រាប់ការហូបចុក ការស្នាក់នៅ និងរៀបចំយន្តការផ្សេងទៀត តាមការ ចាំបាច់។

ក្រសួង នឹងបោះពុម្ពសលាកបត្រឯកត្តជន របស់បេក្ខជន ដើម្បីឱ្យបេក្ខជនភៀសខ្លួន អាចមកទទួលនៅមន្ទីរអប់រំ យុវជន និងកីឡារាជធានី-ខេត្ត។ ក្រសួង នឹងមានវិធានការគាំទ្រពិសេសសម្រាប់បេក្ខជននៅខេត្តឧត្តរមានជ័យ និងខេត្តព្រះវិហារ។

ក្រសួងអប់រំ យុវជន និងកីឡា បានសម្រេចពន្យារពេល នៃការប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា ២០២៤-២០២៥ ដែលគ្រោងរៀបចំនៅថ្ងៃទី ១៨ និងទី ១៩ ខែសីហា ឆ្នាំ ២០២៥ ទៅថ្ងៃទី ២៨ និងទី ២៩ ខែសីហា ឆ្នាំ ២០២៥ វិញ ដោយសារសង្គ្រាមឈ្លានពាននៅតាមព្រំដែនកម្ពុជា-ថៃ ដែលបង្កឡើងដោយភាគីថៃ បានបណ្តាលឱ្យមានការផ្អាកដំណើរការសាលារៀន និង ប្រជាជនភៀសខ្លួនរាប់ម៉ឺននាក់៕

អត្ថបទ ៖ សំអឿន

The post ប្រធានមន្ទីរអប់រំ ៖ មកដល់ពេលនេះ នៅមិនទាន់មានបេក្ខជនភៀសខ្លួនសុំចុះឈ្មោះចូលរួមប្រឡងនៅភ្នំពេញ នៅឡើយទេ appeared first on Kampuchea Thmey Daily.

ប្រឡងឌីប្លូម ២ ថ្ងៃ នៅមណ្ឌលភ្នំពេញ មានបេក្ខជនអវត្តមាន ២៣៦ នាក់ ភាគច្រើនជាបុរស

អ៊ិន ពិសី — Tue, 15 Jul 2025 10:19:00 +0000

ការប្រឡងសញ្ញាបត្រមធ្យមសិក្សាបឋមភូមិឬឌីប្លូមរយៈពេល ២ ថ្ងៃនេះ នៅមណ្ឌលប្រឡងរាជធានីភ្នំពេញ មានបេក្ខជនអវត្តមានចំនួន ២៣៦ នាក់ ភាគច្រើនជាបុរស។

លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡារាជធានីភ្នំពេញ បានឱ្យដឹងនៅរសៀលថ្ងៃទី ១៥ កក្កដា នេះថា ការប្រឡងសញ្ញាបត្រមធ្យមសិក្សាបឋមភូមិឬឌីប្លូមរយៈពេល ២ ថ្ងៃនេះ មានបេក្ខជនមកប្រឡងចំនួន ១៧ ៤២៩ នាក់ ស្រី ៨ ៨៥២ នាក់ ក្នុងចំណោមបេក្ខជនសរុប ១៧ ៦៦៥ នាក់ ចែកជា ៦៥ មណ្ឌល ត្រូវជា ៧៤៣ បន្ទប់ ក្នុងនោះ បេក្ខជនអវត្តមានចំនួន ២៣៦ នាក់ ស្រី ៨៣ នាក់ ស្មើនឹងបុរសមាន ១.៣៣% និងស្រី ០.៩២%។

លោកបានបន្តថា បេក្ខជនអវត្តមាន ២៣៦ នាក់ ក្នុងនោះ ប្រឡងថ្ងៃទី ១ អវត្តមានចំនួន ២២៤ នាក់ ពេលព្រឹកអវត្តមាន ២២២ នាក់ និងពេលរសៀលអវត្តមាន ២ នាក់ និងប្រឡងថ្ងៃទី ២ នេះ បេក្ខជនអវត្តមានមានចំនួន ១២ នាក់ ពេលព្រឹកអវត្តមាន ៨ នាក់ និងពេលរសៀលអវត្តមាន ៤ នាក់។

លោកបានបន្តទៀតថា សម្រាប់ដំណើរការប្រឡងឌីប្លូមរយៈពេល ២ ថ្ងៃនេះ បានប្រព្រឹត្តទៅមានលក្ខណៈល្អប្រសើរ មានភាពស្ងប់ស្ងាត់ និងអនុវត្តបានត្រឹមត្រូវតាមសេចក្តីណែនាំរបស់ក្រសួង។

លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានមានប្រសាសន៍ថា សម្រាប់ឆ្នាំនេះ មានបេក្ខជនប្រឡងឌីប្លូមចំនួន ១៧៧ ៣៨២ នាក់ ក្នុងនោះ ស្រី ៩៥ ៥០៩ នាក់ ចែកជា ១៨៤៥ មណ្ឌល ទាំងរដ្ឋ និងឯកជន បើធៀបទៅនឹងឆ្នាំមុន មានការថយចុះគួរឱ្យកត់សម្គាល់ ខណៈឆ្នាំមុន មានបេក្ខជនដាក់ពាក្យប្រឡងនៅទូទាំងប្រទេសចំនួន ២០១ ៧១២ នាក់ ស្រី ១០៧ ៨០៦ នាក់ ចែកជា ២ ០៩៦ មណ្ឌល ទាំងរដ្ឋ និងឯកជន។

លោកស្រីបានបន្តទៀតថា ក្រសួងអប់រំ បន្តប្រគល់សិទ្ធិអំណាច និងការទទួលខុសត្រូវទាំងស្រុង ជូនគ្រឹះស្ថានមធ្យមសិក្សានីមួយៗ រៀបចំការប្រឡងចាប់តាំងពីការរៀបចំវិញ្ញាសា ដំណើរការសំណេរ កំណែ ស្រង់បូកពិន្ទុ និងប្រកាសលទ្ធផលនៅតាមគ្រឹះស្ថានមធ្យមសិក្សានីមួយៗ។ គ្រឹះស្ថានមធ្យមសិក្សានីមួយៗ ត្រូវប្រើប្រាស់បុគ្គលិកអប់រំ នៅក្នុងគ្រឹះស្ថានមធ្យមសិក្សារបស់ខ្លួនធ្វើជាមេប្រយោគប្រឡង។ មន្ទីរអប់រំ យុវជន និងកីឡា មានភារកិច្ចបញ្ជូនមន្ត្រីជំនាញ ដើម្បីត្រួតពិនិត្យតាមមណ្ឌលប្រឡងមួយចំនួន ក្នុងករណីចាំបាច់ដោយប្រើប្រាស់ថវិកាកម្មវិធីរបស់អង្គភាព និងមានភារកិច្ចចេញវិញ្ញាបនបត្របណ្តោះអាសន្នមធ្យមសិក្សាបឋមភូមិ ជូនដល់បេក្ខជនទាំងអស់ដែលប្រឡងជាប់។

គួរបញ្ជាក់ថា ឆ្នាំនេះ ក្រសួងអប់រំ យុវជន និងកីឡា បានរៀបចំដំណើរការប្រឡងសញ្ញាបត្រមធ្យមសិក្សាបឋមភូមិ ឬឌីប្លូម រយៈពេល ២ ថ្ងៃ ចាប់ពីថ្ងៃទី ១៤ និង ១៥ កក្កដា ឆ្នាំ ២០២៥ និងប្រកាសលទ្ធផលនៅថ្ងៃទី ២១ កក្កដា ខាងមុខ។ចំពោះមុខវិជ្ជាដែលត្រូវប្រឡងមានចំនួន ១០ មុខវិជ្ជា ត្រូវជា ១១ វិញ្ញាសា រួមមាន តែងសេចក្ដី .គីមីវិទ្យា .ផែនដី និងបរិស្ថានវិទ្យា .រូបវិទ្យា .ភូមិវិទ្យា សីលធម៌-ពលរដ្ឋវិជ្ជា គណិតវិទ្យា ការសរសេរតាមអាន ជីវវិទ្យា ប្រវត្តិវិទ្យា និង ភាសាបរទេស។

រីឯរបបពិន្ទុដែលបេក្ខជនទទួលបានជាអតិបរមាមានចំនួន ៤៤៥ ពិន្ទុ និងរបបពិន្ទុប្រចាំឆ្នាំ ១០០ ពិន្ទុ សរុបពិន្ទុទាំងអស់ ៥៤៥ ពិន្ទុ។ ប៉ុន្តែដោយសារភាសាបរទេសជាវិញ្ញាសាស្ម័គ្រចិត្ត ដូចនេះពិន្ទុប្រឡងជាប់គឺ ៥៤៥ ដក ២៥ រួចចែកនឹង ២ ស្មើនឹង ២៦០ ពិន្ទុ សម្រាប់បេក្ខជនចំណេះទូទៅ និងបំពេញវិជ្ជា។ ចំពោះបេក្ខជនស្វៃរិនពិន្ទុជាប់ ៤៤៥ ដក ២៥ ចែកនឹង ២ ស្មើនឹង ២១០ ពិន្ទុ។

ពិន្ទុដែលទទួលបាននិទ្ទេសមធ្យមគឺចាប់ពី ២៦០ ដល់ ៣៣៧ ពិន្ទុ និទ្ទេសល្អបង្គួរចាប់ពី ៣៣៨ ដល់ ៤១៥ ពិន្ទុ និងនិទ្ទេសល្អចាប់ ៤១៦ ពិន្ទុឡើងទៅ សម្រាប់បេក្ខជនចំណេះទូទៅ និងបំពេញវិជ្ជា។ ចំពោះបេក្ខជនស្វៃរិនពិន្ទុចាប់ពី ២១០ ដល់ ២៧២ ទទួលនិទ្ទេសមធ្យម។ ពិន្ទុចាប់ពី ២៧៣ ដល់ ៣៣៥ ទទួលបាននិទ្ទេសល្អបង្គួរ និងពិន្ទុចាប់ពី ៣៣៦ ឡើងទៅ ទទួលបាននិទ្ទេសល្អ៕

អត្ថបទ ៖ សំអឿន

The post ប្រឡងឌីប្លូម ២ ថ្ងៃ នៅមណ្ឌលភ្នំពេញ មានបេក្ខជនអវត្តមាន ២៣៦ នាក់ ភាគច្រើនជាបុរស appeared first on Kampuchea Thmey Daily.

ប្រធានមន្ទីរអប់រំ ៖ ការហាមឃាត់ការប្រើទូរសព្ទដៃក្នុងម៉ោងសិក្សា ជួយបង្កើនគុណភាពសិក្សារបស់សិស្សកាន់តែប្រសើរ

អ៊ិន ពិសី — Thu, 20 Feb 2025 03:35:59 +0000

លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡា បានអះអាងថា ការហាមឃាត់ការប្រើប្រាស់ទូរសព្ទដៃ ឬឧបករណ៍អេឡិចត្រូនិកក្នុងថ្នាក់រៀន ឬម៉ោងសិក្សា ដែលមិនបម្រើឱ្យសកម្មភាពសិក្សា ពិតជាបានចូលរួមចំណែកក្នុងការលើកកម្ពស់គុណភាពការសិក្សារបស់សិស្សានុសិស្សបានកាន់តែប្រសើរ។

កាលពីថ្ងៃទី ២៤ ខែតុលា ឆ្នាំ ២០២៣ កន្លងទៅ ក្រសួងអប់រំ យុវជន និងកីឡា បានចេញសេចក្ដីណែនាំស្តីពី ការពង្រឹងវិន័យ និងបង្កើនប្រសិទ្ធភាព នៃការប្រើប្រាស់ឧបករណ៍អេឡិចត្រូនិក ក្នុងបរិវេណគ្រឹះស្ថានសិក្សាសាធារណៈ ដោយធ្វើការហាមឃាត់ការប្រើប្រាស់ទូរសព្ទដៃ ឬឧបករណ៍អេឡិចត្រូនិកក្នុងថ្នាក់រៀន ឬម៉ោងសិក្សា ដែលមិនបម្រើឱ្យសកម្មភាពសិក្សា ដោយគ្មានការអនុញ្ញាតពីគ្រូកំពុងបង្រៀន ជាពិសេសការលេងហ្គេម និងបណ្ដាញទំនាក់ទំនងសង្គម ដែលមិនពាក់ព័ន្ធនឹងសកម្មភាពសិក្សា។ ជាមួយគ្នានោះ ពេលគ្រូកំពុងបង្រៀនក្នុងថ្នាក់ និងប្រធានថ្នាក់ ត្រូវណែនាំសិស្សក្នុងថ្នាក់ ដែលប្រើប្រាស់ទូរសព្ទដៃ ឬឧបករណ៍អេឡិចត្រូនិក នាំឱ្យខាត ឬរំខានដល់ការសិក្សា។

លោកប្រធានមន្ទីរអប់រំ បានមានប្រសាសន៍កាលពីថ្ងៃទី ១៩ កុម្ភៈថា «គោលការណ៍ហាមឃាត់ការប្រើប្រាស់ទូរសព្ទដៃ ឬឧបករណ៍អេឡិចត្រូនិកក្នុងថ្នាក់រៀន ឬម៉ោងសិក្សា នៅតែមានជាធរមានដដែលទេ បើប្រើទូរស័ព្ទដៃក្នុងប្រយោជន៍ការសិក្សា និងមានការអនុញ្ញាតពីគ្រូ ទើបអាចប្រើបាន តែបើប្រើមិនបម្រើឱ្យការរៀនសូត្រ គឺមិនអនុញ្ញាតទេ»។

លោកប្រធានមន្ទីរ បានបន្តទៀតថា ការហាមប្រាមរបស់ក្រសួងនេះបានជួយដល់ការសិក្សារបស់សិស្សានុសិស្សយ៉ាងច្រើន ដែលផ្ទុយពីមុនសិស្សមិនសូវយកចិត្តទុកដាក់ក្នុងការរៀនសូត្រដូចជាស្តាប់គ្រូពន្យល់ជាដើម ធ្វើឱ្យការសិក្សាធ្លាក់ចុះ ហើយការហាមប្រាមនេះក៏ទទួលបានការសាទរយ៉ាងខ្លាំងពីសំណាក់សិស្សខ្លួនឯង និងអាណាព្យាបាល និងឪពុកម្តាយផងដែរ។

អ្នកស្រី ស៊ានសុខា រស់នៅរាជធានីភ្នំពេញ បានគាំទ្រយ៉ាងខ្លាំងពេលក្រសួងអប់រំបានចេញប្រកាសហាមឃាត់មិនឱ្យសិស្សប្រើប្រាស់ទូរសព្ទដៃ ឬឧបករណ៍អេឡិចត្រូនិកក្នុងថ្នាក់រៀន ឬម៉ោងសិក្សា។

អ្នកស្រីបានបន្តថា «ពេលក្រសួងចេញប្រកាសខ្ញុំពេញចិត្ត ព្រោះវាជាវិធានការមួយដ៏ល្អក្នុងការជួយទប់ស្កាត់ការប្រើទូរស័ព្ទរបស់សិស្ស ខណៈបច្ចុប្បន្ននេះការប្រើទូរស័ព្ទដៃក្លាយជាបញ្ហារបស់សិស្សមួយចំនួនធំមិនខ្វល់ទៅនឹងការសិក្សាទេ ទាំងនៅពេលកំពុងសិក្សា និងពេលត្រឡប់មកដល់ផ្ទះ គឺគាត់វក់ខ្លាំងតែម្តង»។

អ្នកស្រី បានស្នើឱ្យលោកគ្រូអ្នកគ្រូនៅតាមថ្នាក់រៀននីមួយៗ សូមបន្តពង្រឹងការអនុវត្តហាមឃាត់មិនឱ្យសិស្សប្រើប្រាស់ទូរសព្ទដៃ ឬឧបករណ៍អេឡិចត្រូនិកក្នុងថ្នាក់រៀន ឬម៉ោងសិក្សាឱ្យបានតឹងរ៉ឹងបន្ថែមទៀត ដើម្បីឱ្យសិស្សយកចិត្តទុកដាក់រៀនសូត្រ។ ចំណែកនៅផ្ទះអ្នកស្រីក៏នឹងបន្តពង្រឹងដល់កូនៗផងដែរ ព្រោះថាបើឱ្យតែខាងសាលារៀនពង្រឹងតែអ្នកផ្ទះមិនពង្រឹង ក៏មិនអាចជួយដល់ការសិក្សារបស់កូនៗ បានដែរ។

ក្រៅពីហាមឃាត់មិនឱ្យសិស្សប្រើប្រាស់ទូរសព្ទដៃ ឬឧបករណ៍អេឡិចត្រូនិកក្នុងថ្នាក់រៀន ឬម៉ោងសិក្សា ក្រសួងអប់រំ យុវជន និងកីឡា ណែនាំដល់គណៈគ្រប់គ្រងគ្រឹះស្ថានសិក្សា ត្រូវជំរុញ និងលើកទឹកចិត្តឱ្យសិស្សមានទម្លាប់ធ្វើស្វ័យសិក្សា អាន និងស្រាវជ្រាវ ក្នុងបណ្ណាល័យ។ បង្កើត និងអនុវត្តការអប់រំក្រៅម៉ោងសិក្សា ដូចជាក្លិបសិក្សាតាមកម្រិតថ្នាក់ និងតាមមុខវិជ្ជាផងដែរ៕

អត្ថបទ ៖ សំអឿន

The post ប្រធានមន្ទីរអប់រំ ៖ ការហាមឃាត់ការប្រើទូរសព្ទដៃក្នុងម៉ោងសិក្សា ជួយបង្កើនគុណភាពសិក្សារបស់សិស្សកាន់តែប្រសើរ appeared first on Kampuchea Thmey Daily.

ទិវា នៃក្តីស្រលាញ់ ៖ ស្ថានភាពការសិក្សាតាមសាលានៅភ្នំពេញ មិនមានបាតុភាពអសកម្មណាមួយកើតឡើងនោះទេ

អ៊ិន ពិសី — Fri, 14 Feb 2025 06:49:49 +0000

លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡារាជធានីភ្នំពេញ បានមានប្រសាសន៍នៅព្រឹកថ្ងៃទី ១៤ កុម្ភៈ នេះថា នៅក្នុងទិវា នៃក្តីស្រលាញ់ ស្ថានភាពការសិក្សារបស់សិស្សានុសិស្សនៅតាមសាលារៀននានានៅរាជធានីភ្នំពេញ មិនមានបាតុភាពអសកម្មណាមួយកើតឡើងនោះទេ ពោលគឺដំណើរការសិក្សាជាប្រក្រតីធម្មតា។

លោកប្រធានមន្ទីរ បានបន្តថា «តាមរបាយការណ៍ពីសាលានានា ជារួមដំណើរការសិក្សាតាមសាលាថ្ងៃនេះមានភាពប្រក្រតីជាធម្មតាអត់មានអីដូចជាការលក់ផ្កានៅក្នុងសាលា ឬ យកផ្កាជូនគ្នាទេ រហូតដល់ម៉ោងនេះដំណើរការជាធម្មតាអត់មានបញ្ហាអីទេ»។

លោកប្រធានមន្ទីរ បានរំលឹកថា នៅមុនទិវា នៃក្តីស្រលាញ់ មន្ទីរអប់រំ បានធ្វើការប្រជុំណែនាំដល់គ្រប់គ្រឹះស្ថានសិក្សារដ្ឋ និងឯកជនរួចហើយ ឱ្យពង្រឹង និងទប់ស្កាត់មិនឱ្យមានភាពមិនប្រក្រតីណាមួយកើតឡើងនៅក្នុងសាលា ក្នុងទិវា នៃក្តីស្រលាញ់ និងផ្សព្វផ្សាយសេចក្ដីជូនដំណឹងរបស់ក្រសួងអប់រំ យុវជន និងកីឡា រួចហើយដែរ ដើម្បីឱ្យសាលាផ្សព្វផ្សាយបន្តទៅដល់សិស្សានុសិស្សបានយល់ជ្រួតជ្រាប និងអនុវត្តឱ្យមានប្រសិទ្ធភាពទាំងអស់គ្នា ពិសេសនៅពេលគោរពទង់ជាតិ ដើម្បីធ្វើយ៉ាងណាបញ្ចៀសកុំឱ្យមានបាតុភាពមិនប្រក្រតីណាមួយកើតឡើង។

លោកប្រធានមន្ទីរ បានបន្ថែមថា ដើម្បីទប់ស្កាត់ភាពមិនប្រក្រតីក្នុងទិវា នៃក្តីស្រលាញ់ មន្ទីរបានណែនាំដល់នាយកសាលាទាំងអស់ ត្រូវសហការជាមួយអាជ្ញាធរមូលដ្ឋាន មិនអនុញ្ញាតឱ្យមានការលក់ផ្កា ដែលជាកាដូសម្រាប់ជូនដល់សង្សារនៅក្រៅបរិវេណសាលារៀន ឬ លក់តាមច្រកចូលសាលានៅក្នុងទិវា នៃក្តីស្រលាញ់ ថ្ងៃទី ១៤ កុម្ភៈ ឡើយ។

កាលពីថ្ងៃទី ១១ ខែកុម្ភៈ ឆ្នាំ ២០២៥ ក្រសួងអប់រំ យុវជន និងកីឡា បានចេញវិធានការយ៉ាងតឹងរ៉ឹង ដើម្បីទប់ស្កាត់ភាពមិនប្រក្រតីក្នុងទិវា នៃក្តីស្រលាញ់ នៅតាមគ្រឹះស្ថានសិក្សាសាធារណៈ និងឯកជនដូចជា ផ្សព្វផ្សាយឱ្យបានទូលំទូលាយ គ្រប់មធ្យោបាយទាំងអស់ អំពីអត្ថន័យទិវា នៃសេចក្តីស្រឡាញ់ ដល់សិស្សានុសិស្ស ចៀសវាងមានការយល់ច្រឡំ ប្រព្រឹត្តខុសនូវសីលធម៌ វប្បធម៌ប្រពៃណីខ្មែរ , ត្រូវពង្រឹងវិន័យឱ្យបានម៉ឺងម៉ាត់ និងតាមដានវត្តមានសិស្សជាប់ជាប្រចាំ, ត្រូវបញ្ជ្រាបការអប់រំសីលធម៌តាមមុខវិជ្ជានីមួយៗ , ត្រូវជំរុញដំណើរការក្រុមប្រឹក្សាយុវជន ក្រុមប្រឹក្សាកុមារប្រចាំសាលា ដោយអនុវត្តសកម្មភាព មិត្តអប់រំមិត្ត, ត្រូវមានទំនាក់ទំនងល្អជាមួយអាណាព្យាបាលសិស្ស សហគមន៍ ដើម្បីងាយស្រួលក្នុងការផ្តល់ដំណឹង នៅពេលមានបញ្ហាមិនប្រក្រតីកើតឡើង,ត្រូវរួមគ្នាសហការ ទប់ស្កាត់ អប់រំ ណែនាំ និងកែលម្អឱ្យបានទាន់ពេលវេលា និងគ្រប់មន្ទីរអប់រំ យុវជន និងកីឡា រាជធានី ខេត្ត គណៈគ្រប់គ្រងសាលារៀន និងគ្រប់ភាគីពាក់ព័ន្ធទាំងអស់ ត្រូវបន្តពង្រឹងបទបញ្ជាផ្ទៃក្នុង សម្រាប់គ្រឹះស្ថានបឋមសិក្សា និងបទបញ្ជាផ្ទៃក្នុងសម្រាប់គ្រឹះស្ថានមធ្យមសិក្សាចំណេះទូទៅសាធារណៈ៕

អត្ថបទ ៖ សំអឿន

The post ទិវា នៃក្តីស្រលាញ់ ៖ ស្ថានភាពការសិក្សាតាមសាលានៅភ្នំពេញ មិនមានបាតុភាពអសកម្មណាមួយកើតឡើងនោះទេ appeared first on Kampuchea Thmey Daily.

មន្ទីរអប់រំរាជធានីភ្នំពេញ ហាមលក់ផ្កានៅក្រៅបរិវេណសាលា ក្នុងទិវា នៃក្តីស្រលាញ់

អ៊ិន ពិសី — Wed, 12 Feb 2025 08:52:03 +0000

មន្ទីរអប់រំ យុវជន និងកីឡារាជធានីភ្នំពេញ បានណែនាំដល់នាយកសាលារដ្ឋ និងឯកជនទាំងអស់ ត្រូវសហការជាមួយអាជ្ញាធរមូលដ្ឋានមិនអនុញ្ញាតឱ្យមានការលក់ផ្កាដែលជាកាដូសម្រាប់ជូនដល់សង្សារនៅក្រៅបរិវេណសាលារៀនក្នុងទិវា នៃក្តីស្រលាញ់ ថ្ងៃទី ១៤ កុម្ភៈ ឡើយ។

លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡារាជធានីភ្នំពេញ បានមានប្រសាសន៍នៅរសៀលថ្ងៃទី ១២ កុម្ភៈ នេះថា មន្ទីរអប់រំ បានធ្វើការប្រជុំណែនាំដល់គ្រប់គ្រឹះស្ថានសិក្សារដ្ឋ និងឯកជនរួចហើយ ឱ្យពង្រឹង និងទប់ស្កាត់មិនឱ្យមានភាពមិនប្រក្រតីណាមួយកើតឡើងនៅក្នុងសាលាក្នុងទិវា នៃក្តីស្រលាញ់ និងផ្សព្វផ្សាយសេចក្ដីជូនដំណឹងរបស់ក្រសួងអប់រំ យុវជន និងកីឡា រួចហើយដែរ ដើម្បីឱ្យសាលាផ្សព្វផ្សាយបន្តទៅដល់សិស្សានុសិស្សបានយល់ជ្រួតជ្រាប និងអនុវត្តឱ្យមានប្រសិទ្ធភាពទាំងអស់គ្នា ពិសេសនៅពេលគោរពទង់ជាតិ ដើម្បីធ្វើយ៉ាងណាបញ្ចៀសកុំឱ្យមានបាតុភាពមិនប្រក្រតីណាមួយកើតឡើង។

លោកប្រធានមន្ទីរ បានបន្ថែមថា ដើម្បីទប់ស្កាត់ភាពមិនប្រក្រតីក្នុងទិវា នៃក្តីស្រលាញ់ មន្ទីរបានណែនាំដល់នាយកសាលាទាំងអស់ ត្រូវសហការជាមួយអាជ្ញាធរមូលដ្ឋាន មិនអនុញ្ញាតឱ្យមានការលក់ផ្កា ដែលជាកាដូសម្រាប់ជូនដល់សង្សារនៅក្រៅបរិវេណសាលារៀន ឬ លក់តាមច្រកចូលសាលានៅក្នុងទិវា នៃក្តីស្រលាញ់ ថ្ងៃទី ១៤ កុម្ភៈឡើយ។

កាលពីថ្ងៃទី ១១ ខែកុម្ភៈ ឆ្នាំ ២០២៥ ក្រសួងអប់រំ យុវជន និងកីឡា បានចេញវិធានការយ៉ាងតឹងរ៉ឹង ដើម្បីទប់ស្កាត់ភាពមិនប្រក្រតីក្នុងទិវា នៃក្តីស្រលាញ់ នៅតាមគ្រឹះស្ថានសិក្សាសាធារណៈ និងឯកជនដូចជា ផ្សព្វផ្សាយឱ្យបានទូលំទូលាយគ្រប់មធ្យោបាយទាំងអស់ អំពីអត្ថន័យទិវា នៃសេចក្តីស្រឡាញ់ ដល់សិស្សានុសិស្ស ចៀសវាងមានការយល់ច្រឡំ ប្រព្រឹត្តខុសនូវសីលធម៌ វប្បធម៌ប្រពៃណីខ្មែរ , ត្រូវពង្រឹងវិន័យឱ្យបានម៉ឺងម៉ាត់ និងតាមដានវត្តមានសិស្សជាប់ជាប្រចាំ , ត្រូវបញ្ជ្រាបការអប់រំសីលធម៌តាមមុខវិជ្ជានីមួយៗ , ត្រូវជំរុញដំណើរការក្រុមប្រឹក្សាយុវជន ក្រុមប្រឹក្សាកុមារប្រចាំសាលា ដោយអនុវត្តសកម្មភាព មិត្តអប់រំមិត្ត , ត្រូវមានទំនាក់ទំនងល្អជាមួយអាណាព្យាបាលសិស្ស សហគមន៍ ដើម្បីងាយស្រួលក្នុងការផ្តល់ដំណឹង នៅពេលមានបញ្ហាមិនប្រក្រតីកើតឡើង , ត្រូវរួមគ្នាសហការ ទប់ស្កាត់ អប់រំ ណែនាំ និងកែលម្អឱ្យបានទាន់ពេលវេលា និងគ្រប់មន្ទីរអប់រំ យុវជន និងកីឡា រាជធានី ខេត្ត គណៈគ្រប់គ្រងសាលារៀន និងគ្រប់ភាគីពាក់ព័ន្ធទាំងអស់ ត្រូវបន្តពង្រឹងបទបញ្ជាផ្ទៃក្នុង សម្រាប់គ្រឹះស្ថានបឋមសិក្សា និងបទបញ្ជាផ្ទៃក្នុងសម្រាប់គ្រឹះស្ថានមធ្យមសិក្សាចំណេះទូទៅសាធារណៈ៕

អត្ថបទ ៖ សំអឿន

The post មន្ទីរអប់រំរាជធានីភ្នំពេញ ហាមលក់ផ្កានៅក្រៅបរិវេណសាលា ក្នុងទិវា នៃក្តីស្រលាញ់ appeared first on Kampuchea Thmey Daily.

២ ឆ្នាំចុងក្រោយចំនួនសិស្ស និងគ្រូមករៀននិងបង្រៀននៅបុណ្យចូលឆ្នាំចិន ច្រើនលើសការរំពឹងទុក

Dy Bunnara — Sat, 01 Feb 2025 09:50:34 +0000

លោក ហែម ស៊ីណារ៉េត ប្រធានមន្ទីរអប់រំយុវជននិងកីឡារាជធានីភ្នំពេញ បានមានប្រសាសន៍នៅរសៀលថ្ងៃទី ០១ កម្ភៈនេះថា រយៈពេល ២ ឆ្នាំចុងក្រោយនេះ អត្រាសិស្សានុសិស្សនិងគ្រូមករៀននិងបង្រៀន នៅក្នុងពិធីបុណ្យចូលឆ្នាំថ្មីប្រពៃណីចិនវៀតណាម មានការកើនឡើងជាបន្តបន្ទាប់លើសការរំពឹងទុកពោល គឺដូចថ្ងៃសិក្សាធម្មតាដែរផ្ទុយពីមុនមានសិស្សនិងគ្រូអវត្តមានច្រើន។

ការកើនឡើងនេះ ដោយសារមានការចូលរួមគាំទ្រពីសំណាក់សិស្សានុសិស្សអាណាព្យាបាលឪពុកម្តាយ បានយល់ពីសារសំខាន់នៃការសិក្សា ហើយបានបញ្ជូនកូនចៅមករៀននិងបានរៀប ចំពេលវេលាដំណើរកំសាន្តនៅថ្ងៃឈប់សម្រាកដើម្បីចៀសវាងកុំឱ្យប៉ះពាល់ដល់ការសិក្សារបស់បុណ្យធីតារបស់ខ្លួន។

លើសពីនេះទៀតមន្ទីរអប់រំបានដឹកនាំការប្រជុំពង្រឹងដំណើរការបង្រៀន និងរៀន ដល់គ្រប់គ្រឹះស្ថានសិក្សាទាំងអស់ ចូលរួមបន្តផ្សព្វផ្សាយដល់សិស្សានុសិស្ស ដើម្បីឲ្យពួកគេមករៀនឲ្យបានទៀងទាត់។ ម្យ៉ាងទៀតបានដាក់កំហិតឱ្យគ្រប់គ្រឹះស្ថានសិក្សាទាំងអស់ ត្រូវបន្តតាមដានការមកបំពេញ ការងាររបស់លោកគ្រូ អ្នកគ្រូ រក្សាបាននូវដំណើរការបង្រៀន និងរៀនជាប្រក្រតី ដោយគ្រប់គ្រឹះស្ថានសិក្សា និងការិយាល័យអប់រំ យុវជន និងកីឡា នៃរដ្ឋបាលខណ្ឌ ត្រូវផ្តល់របាយការណ៍ប្រចាំថ្ងៃស្តីពីវត្តមានរបស់គ្រូ-សិស្ស មកមន្ទីរអប់រំ យុវជន និងកីឡារាជធានីភ្នំពេញនិងចាត់មន្ត្រីចុះតាមសាលារៀននានាដើម្បីត្រួតពិនិត្យដំណើរការសិក្សារបស់សិស្សផងដែរ។

លោកប្រធានមន្ទីរបានបន្តទៀតថា តាមរយៈវិធានការទាំងនេះ បានធ្វើឱ្យចំនួនសិស្សានុសិស្សនិងគ្រូមករៀននិងបង្រៀនមានការកើនឡើងខ្ពស់លើសពីការរំពឹងទុក ពោលគឺស្ទើរ១០០%។ ផ្ទុយពីប៉ុន្មានឆ្នាំមុន មានសិស្សនិងគ្រូអវត្តមានច្រើននិងសាលាខ្លះបង្ខំបិទទ្វារដោយសារមិនមានសិស្សមករៀន ជាប់រវល់ទៅដើរកំសាន្តជាមួយឪពុកម្តាយ។

លោក ប្រធានមន្ទីរបានបន្ថែមទៀតថា សម្រាប់ពិធីបុណ្យចូលឆ្នាំចិនឆ្នាំនេះដែលបានចាប់ផ្តើមពីថ្ងៃទី ២៨ មករា ដល់ថ្ងៃទី ៣១ ខែមករាឆ្នាំ២០២៤ មានគ្រូនិងសិស្សមកបង្រៀននិងរៀនច្រើនដូចថ្ងៃសិក្សាធម្មតា ក្នុងនោះថ្ងៃសែនចិនដែលត្រូវនឹងថ្ងៃទី ២៨ មករា មានវត្តមានគ្រូ ៩៦% និងវត្តមានសិស្ស ៧៦%។ ថ្ងៃចូលឆ្នាំចិនទី ១ ត្រូវនឹងថ្ងៃទី ២៩ មករា មានវត្តមានគ្រូ ៩៤% និងវត្តមានសិស្ស ៧៥.០២%។

ដោយឡែក សាលារៀននៅកណ្តាលក្រុងភ្នំពេញមានវត្តមានសិស្សនិងគ្រូចន្លោះពី ៤៧%ទៅ ៩០% និងសាលារៀននៅជាយក្រុងភ្នំពេញមានវត្តមានសិស្សនិងគ្រូចន្លោះពី ៧៥% ទៅ៩១%។

សម្រាប់ព្រឹកថ្ងៃទី៣០ ខែមករា ឆ្នាំ២០២៥ ដែលត្រូវនឹងថ្ងៃទី ២ នៃពិធីបុណ្យចូលឆ្នាំចិន-វៀតណាម មានវត្តមានគ្រូមកបង្រៀនប្រមាណ ៩៧% និងវត្តមានសិស្សប្រមាណ ៩៥.២៥%។ ដោយឡែក សាលារៀននៅកណ្តាលក្រុងភ្នំពេញមានវត្តមានសិស្សនិងគ្រូចន្លោះពី ៩០% ទៅ ៩៧% និងសាលារៀននៅជាយក្រុងភ្នំពេញមានវត្តមានសិស្សនិងគ្រូចន្លោះពី ៩០% ទៅ ១០០%។

ចំណែកថ្ងៃទី ៣ នៃពិធីបុណ្យចូលឆ្នាំចិនត្រូវនឹងថ្ងៃទី ៣១ ខែមករា ឆ្នាំ២០២៥ ពេលព្រឹកមានវត្តមានគ្រូមកបង្រៀនប្រមាណ ៩៨% និងវត្តមានសិស្សប្រមាណ ៩៥%។ ដោយឡែក សាលារៀននៅកណ្តាលក្រុងភ្នំពេញមានវត្តមានសិស្សនិងគ្រូចន្លោះពី ៩០% ទៅ ៩៥% និងសាលារៀននៅជាយក្រុងភ្នំពេញមានសិស្សនិងគ្រូចន្លោះពី ៩៥% ទៅ៩៨%៕

អត្ថបទ៖សំអឿន

The post ២ ឆ្នាំចុងក្រោយចំនួនសិស្ស និងគ្រូមករៀននិងបង្រៀននៅបុណ្យចូលឆ្នាំចិន ច្រើនលើសការរំពឹងទុក appeared first on Kampuchea Thmey Daily.

ថ្ងៃទី ៣ នៃបុណ្យចូលឆ្នាំចិននៅភ្នំពេញ មានសិស្ស និងគ្រូ មករៀន និងបង្រៀន ដូចថ្ងៃធម្មតា

អ៊ិន ពិសី — Fri, 31 Jan 2025 04:00:34 +0000

នៅថ្ងៃទី ៣ នៃពិធីបុណ្យចូលឆ្នាំប្រពៃណីចិន-វៀតណាមនៅរាជធានីភ្នំពេញមានសិស្ស និងគ្រូមករៀន និងបង្រៀននៅតាមសាលារៀននានាដូចថ្ងៃធម្មតាដែរ។

លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡារាជធានីភ្នំពេញ បានមានប្រសាសន៍នៅព្រឹកថ្ងៃទី ៣១ មករា នេះថា ពិធីបុណ្យចូលឆ្នាំចិននៅថ្ងៃទី ៣ នេះ ឃើញថា មានសិស្សានុសិស្ស និងលោកគ្រូអ្នកគ្រូមករៀន និងបង្រៀនដូចថ្ងៃធម្មតាដែរ។ ជាក់ស្តែងតាមរបាយការណ៍តាមសាលានីមួយៗ សម្រាប់ព្រឹកថ្ងៃទី ៣១ ខែមករា ឆ្នាំ ២០២៥ ពេលព្រឹកមានវត្តមានគ្រូមកបង្រៀនប្រមាណ ៩៨% និងវត្តមានសិស្សប្រមាណ ៩៥%។ ដោយឡែក សាលារៀននៅកណ្តាលក្រុងភ្នំពេញ មានវត្តមានសិស្ស និងគ្រូចន្លោះពី ៩០% ទៅ ៩៥% និងសាលារៀននៅជាយក្រុងភ្នំពេញមានសិស្ស និងគ្រូចន្លោះពី ៩៥% ទៅ ៩៨%។

លោកប្រធានមន្ទីរ បានបន្តថា «ដំណើរការរៀន និងបង្រៀនធម្មតាអត់អីទេ យើងមានការព្រួយបារម្ភៗ បន្ទាប់ពីថ្ងៃសែន និងថ្ងៃចូលឆ្នាំចិនទី ១ ទេ ពេលយើងចុះត្រួតពិនិត្យឥឡូវវាលែងអីវាធម្មតាអស់វិញអស់ហើយ»។

លោកប្រធានមន្ទីរ បានបញ្ជាក់ថា ដើម្បីធានាបានដំណើរការបង្រៀន និងរៀន ក្នុងឱកាសបុណ្យចូលឆ្នាំប្រពៃណីចិន-វៀតណាម មន្ទីរអប់រំ យុវជន និងកីឡារាជធានីភ្នំពេញ បានដឹកនាំការប្រជុំពង្រឹងដំណើរការបង្រៀន និងរៀន ដល់គ្រប់គ្រឹះស្ថានសិក្សាទាំងអស់ ចូលរួមបន្តផ្សព្វផ្សាយដល់សិស្សានុសិស្ស ដើម្បីឲ្យពួកគេមករៀនឲ្យបានទៀងទាត់។ ម្យ៉ាងទៀត គ្រប់គ្រឹះស្ថានសិក្សាទាំងអស់ ត្រូវបន្តតាមដានការមកបំពេញការងាររបស់លោកគ្រូ អ្នកគ្រូ រក្សាបាននូវដំណើរការបង្រៀន និងរៀនជាប្រក្រតី ដោយគ្រប់គ្រឹះស្ថានសិក្សា និងការិយាល័យអប់រំ យុវជន និងកីឡា នៃរដ្ឋបាលខណ្ឌ ត្រូវផ្តល់របាយការណ៍ប្រចាំថ្ងៃស្តីពីវត្តមានរបស់គ្រូ-សិស្ស មកមន្ទីរអប់រំ យុវជន និងកីឡារាជធានីភ្នំពេញ។

លោកប្រធានមន្ទីរ បានបន្ថែមថា ករណីចូលឆ្នាំចិននេះ មន្ទីរអប់រំ យុវជន និងកីឡារាជធានីភ្នំពេញ បាននិងកំពុងបន្តតាមដានដំណើរការបង្រៀន និងរៀន ដើម្បីធានាធ្វើយ៉ាងណាឱ្យសិស្ស និងគ្រូ មករៀន និងបង្រៀនធម្មតា៕

អត្ថបទ ៖ សំអឿន

The post ថ្ងៃទី ៣ នៃបុណ្យចូលឆ្នាំចិននៅភ្នំពេញ មានសិស្ស និងគ្រូ មករៀន និងបង្រៀន ដូចថ្ងៃធម្មតា appeared first on Kampuchea Thmey Daily.

លោក ហែម ស៊ីណារ៉េត Archives - Kampuchea Thmey Daily

មន្ទីរអប់រំរាជធានីភ្នំពេញ នឹងចុះឃ្លាំមើលតាមសាលា ដើម្បីទប់ស្កាត់បាតុភាពផ្សេងៗ ក្នុងទិវា នៃក្តីស្រលាញ់

ប្រធានមន្ទីរអប់រំ ៖ មកដល់ពេលនេះ នៅមិនទាន់មានបេក្ខជនភៀសខ្លួន​សុំចុះឈ្មោះចូលរួមប្រឡងនៅភ្នំពេញ នៅឡើយទេ

ប្រឡងឌីប្លូម ២ ថ្ងៃ នៅមណ្ឌលភ្នំពេញ មានបេក្ខជនអវត្តមាន ២៣៦ នាក់ ភាគច្រើនជាបុរស

ទិវា នៃក្តីស្រលាញ់ ៖ ស្ថានភាពការសិក្សាតាមសាលានៅភ្នំពេញ មិនមានបាតុភាពអសកម្មណាមួយកើតឡើងនោះទេ

មន្ទីរអប់រំរាជធានីភ្នំពេញ ហាមលក់ផ្កានៅក្រៅបរិវេណសាលា ក្នុងទិវា នៃក្តីស្រលាញ់

២ ឆ្នាំចុងក្រោយ​ចំនួន​សិស្ស និងគ្រូមករៀននិងបង្រៀននៅបុណ្យចូលឆ្នាំចិន ច្រើនលើសការរំពឹងទុក

ថ្ងៃទី ៣ នៃបុណ្យចូលឆ្នាំចិននៅភ្នំពេញ មានសិស្ស និងគ្រូ មករៀន និងបង្រៀន ដូចថ្ងៃធម្មតា

ប្រធានមន្ទីរអប់រំ ៖ មកដល់ពេលនេះ នៅមិនទាន់មានបេក្ខជនភៀសខ្លួនសុំចុះឈ្មោះចូលរួមប្រឡងនៅភ្នំពេញ នៅឡើយទេ

២ ឆ្នាំចុងក្រោយចំនួនសិស្ស និងគ្រូមករៀននិងបង្រៀននៅបុណ្យចូលឆ្នាំចិន ច្រើនលើសការរំពឹងទុក