លោក ឡុង ឌីម៉ង់ Archives - Kampuchea Thmey Daily

កត្តារាំងស្ទះ «ការចុះបញ្ជីគម្រោងវិនិយោគក្រោម ៥ លានដុល្លារ» លើកយកពិភាក្សាក្នុងសន្និបាតប្រចាំឆ្នាំរបស់ខេត្តព្រះសីហនុ

Dy Bunnara — Sat, 31 Jan 2026 07:13:37 +0000

«ការចុះបញ្ជីគម្រោងវិនិយោគដែលមានទុនសមមូល ៥ លានដុល្លារចុះក្រោម» គឺជាប្រធានបទមួយត្រូវបានលើកយកពិភាក្សាក្នុងសន្និបាតបូកសរុបលទ្ធផលការងារប្រចាំឆ្នាំរបស់រដ្ឋបាលខេត្តព្រះសីហនុ។

ទោះបីមានច្បាប់ លិខិតបទដ្ឋានគតិយុត្តពាក់ព័ន្ធនឹងច្បាប់វិនិយោគ និងការប្រតិភូកម្មសិទ្ធិអំណាចមកអនុគណៈកម្មាធិការវិនិយោគខេត្ត ក៏រដ្ឋបាលខេត្តនៅតែជួបបញ្ហាប្រឈមមួយចំនួន។ នេះបើតាមលោក ឡុង ឌីម៉ង់ អភិបាលរងនៃគណៈអភិបាលខេត្តព្រះសីហនុ ដែលដឹកនាំកិច្ចពិភាក្សាចំពោះមុខប្រធានបទ «ការចុះបញ្ជីគម្រោងវិនិយោគដែលមានទុនសមមូល ៥ លានដុល្លារចុះក្រោម» នៅក្នុងសន្និបាតបូកសរុបលទ្ធផលការងារឆ្នាំ ២០២៥ និងលើកទិសដៅការងារបន្តឆ្នាំ ២០២៦ របស់រដ្ឋបាលខេត្តព្រះសីហនុ។

បញ្ហារាំងស្ទះមានដូចជា៖

– ធនធានមនុស្ស និងជំនាញបច្ចេកទេស៖ មន្ត្រីអនុវត្តមួយចំនួននៅមិនទាន់មានបទពិសោធន៍ និងមិនទាន់យល់ដឹងស៊ីជម្រៅអំពីច្បាប់វិនិយោគថ្មីនៅឡើយ។ មន្ត្រីរបស់មន្ទីរអង្គភាពមួយចំនួនមិនទាន់ទទួលបានការបណ្តុះបណ្តាលពីក្រសួងសាមីនៅឡើយ ដែលការណ៍នេះជារបាំងបច្ចេកទេសក្នុងការអនុវត្ត។

ឧទាហរណ៍៖ ប្រកាសលេខ ១៨៨ ប្រក.កសក ចុះថ្ងៃទី៤ ខែកក្កដា ឆ្នាំ២០២៤ របស់ក្រសួងកសិកម្ម រុក្ខាប្រមាញ់ និងនេសាទ ស្តីពីការធ្វើប្រតិភូកម្មសិទ្ធអំណាចទៅឱ្យមន្ទីរកសិកម្ម រុក្ខាប្រមាញ់ និងនេសាទរាជធានីខេត្ត ក្នុងការពិនិត្យផ្តល់យោបល់និងសម្រេចលើការចុះបញ្ជីគម្រោងវិនិយោគដែលមានទុនវិនិយោគសមមូល ៥ (ប្រាំ) លានដុល្លារចុះក្រោម

– កង្វះខាតទិន្នន័យ ព័ត៌មានលម្អិតអំពីតំបន់ និងហេដ្ឋារចនាសម្ព័ន្ធគាំទ្រ៖ បញ្ហាថ្លៃដើមអគ្គិសនី ទឹកស្អាត និងប្រព័ន្ធដឹកជញ្ជូនក្នុងខេត្តនៅតំបន់ខ្លះនៅមានកម្រិត ដែលជាឧបសគ្គដល់ការសម្រេចចិត្តរបស់វិនិយោគិន

– នីតិវិធីដាក់ពាក្យស្នើសុំគម្រោង QIP នៅអនុគណៈកម្មាធិការវិនិយោគខេត្តពុំទាន់អាចដំណើរការ Online បាននៅឡើយ

– ក្រសួង ស្ថាប័នមួយចំនួនមិនទាន់បានធ្វើប្រតិភូកម្មមុខងារមកឱ្យមន្ទីរអង្គភាពជំនាញ

– ក្រសួង ស្ថាប័នមួយចំនួនបានប្រតិភូកម្មរួចរាល់ ប៉ុន្តែពុំទាន់បានដាក់ចេញនីតិវិធីឬសេចក្តីណែនាំក្នុងការពិនិត្យ ផ្តល់យោបល់ និងឯកភាពផ្នែកបច្ចេកទេស តាមជំនាញនិងផ្តល់ការបណ្តុះបណ្តាលដល់មន្ទីរអង្គភាពរបស់ខ្លួន

នៅក្នុងសន្និបាតបានលើកឡើងថា ដើម្បីឱ្យរដ្ឋបាលខេត្តដើរតួនាទីជាអ្នកសម្របសម្រួលវិនិយោគដ៏មានប្រសិទ្ធភាព រដ្ឋបាលខេត្តត្រូវការគាំទ្រពីរាជរដ្ឋាភិបាល និងក្រសួងស្ថាប័នពាក់ព័ន្ធដូចជា៖

– ការបណ្តុះបណ្តាលសមត្ថភាព៖ ក្រុមប្រឹក្សាអភិវឌ្ឍន៍កម្ពុជា (CDC) គួរផ្តល់ការបណ្តុះបណ្តាលបន្តបន្ទាប់ដល់អនុគណៈកម្មាធិការវិនិយោគខេត្ត

-ការប្រតិភូកម្ម និងបណ្តុះបណ្តាលបច្ចេកទេសច្បាស់លាស់៖ ធានាថាការប្រតិភូកម្មមករដ្ឋបាលថ្នាក់ក្រោមជាតិ អាចមានសិទ្ធិសម្រេចលើគម្រោងក្រោម ៥ លានដុល្លារ និងមានការបណ្តុះបណ្តាលបច្ចេកទេស ដើម្បីអាចឱ្យមន្ត្រីទទួលបន្ទុកតាមមន្ទីរ អង្គភាព អាចអនុវត្តបានពេញលេញ

-ការចេញលិខិតបទដ្ឋានគតិយុត្តណែនាំជាស្តង់ដារអនុវត្តរួមទូទាំងប្រទេស

-ការគាំទ្រផ្នែកហិរញ្ញវត្ថុនិងបច្ចេកវិទ្យា៖ ស្នើផ្តល់កញ្ចប់ថវិកា និងបច្ចេកវិទ្យា សម្រាប់គាំទ្រដល់ការអនុវត្តលើការចុះបញ្ជីគម្រោងវិនិយោគទុនសមមូល ៥ លានដុល្លារចុះក្រោម

– ផ្តល់ការលើកទឹកចិត្តណាមួយដល់បុគ្គលិកដែលមានទេពកោសល្យ ឬកម្មករដែលមានជំនាញខ្ពស់ ដើម្បីឆ្លើយតបនឹងតម្រូវការទីផ្សារការងារ និងការអភិវឌ្ឍឧស្សាហកម្មប្រភេទថ្មី

-ការពន្លឿនការចេញប្រកាសរួមស្តីពីការផ្តល់សេវាសាធារណៈលើការចុះបញ្ជីគម្រោង នៅអនុគណៈកម្មាធិការវិនិយោគរាជធានី-ខេត្ត (កន្លងមកអនុគណៈកម្មាធិការវិនិយោគខេត្តអនុវត្តតាមប្រកាស លេខ ៩៩១សហវ.ប្រក ចុះថ្ងៃទី២៨ ខែធ្នូ ឆ្នាំ២០១៣ ស្តីពីការផ្តល់សេវាសាធារណៈរបស់ក្រុមប្រឹក្សាអភិវឌ្ឍន៍កម្ពុជា។

ចំពោះមុខ ដើម្បីជំរុញការចុះបញ្ជីវិនិយោគដែលមានទុនសមមូល ៥ លានដុល្លារ រដ្ឋបាលខេត្តដាក់ចេញវិធានការដូចខាងក្រោម៖

-រដ្ឋបាលខេត្តគួរបង្កើតក្រុមការងារចម្រុះ ដែលមានសមាសភាពពាក់ព័ន្ធរាប់ចាប់ពីមន្ត្រីជំនាញ និងវិស័យឯកជន (ជើងសារគយ) ដើម្បីផ្តល់ការប្រឹក្សាយោបល់សម្រាប់បម្រើឱ្យការនាំចេញ

-គួរបានប្រើប្រាស់លេខាធិការដ្ឋានអនុគណៈកម្មាធិការវិនិយោគខេត្តជាមន្ត្រីប្រឹក្សា និងផ្តល់ការគាំទ្រដល់អ្នកវិនិយោគ ព្រមទាំងធ្វើការសម្របសម្រួលជាមួយមន្ទីរ អង្គភាពពាក់ព័ន្ធ ដើម្បីជំរុញការអនុវត្តបានដោយរលូនក្នុងករណីមានការរាំងស្ទះ ដោយកត្តាបច្ចេកទេសឬនីតិវិធីនានា

-រៀបចំជាសំណុំបែបបទ និងនីតិវិធីស្តង់ដាសម្រាប់ចុះបញ្ជីវិនិយោគមានលក្ខណៈសម្បត្តិគ្រប់គ្រាន់ SOP និង Investment Guide Book សម្រាប់អនុវត្តក្នុងខេត្ត

– បន្តពង្រឹងយន្តការច្រកចេញចូលតែមួយដើម្បីធ្វើសាមញ្ញបនីយកម្មនីតិវិធីរដ្ឋបាល និងកាត់បន្ថយរយៈពេលរង់ចាំក្នុងការចេញវិញ្ញាបនបត្រចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់ (QIP)

– បន្តជំរុញការធ្វើឌីជីថលូបនីយកម្ម៖ ប្រើប្រាស់ប្រព័ន្ធចុះបញ្ជីតាមអនឡាញដើម្បីផ្តល់ភាពងាយស្រួលដល់វិនិយោគិន ក្នុងការដាក់ពាក្យពីចម្ងាយ និងតាមដានវឌ្ឍនភាពសំណើ

-ការផ្តល់ការលើកទឹកចិត្ត និងការគាំទ្រ សម្រួលនីតិវិធីផ្សេងៗដល់អ្នកវិនិយោគ

– ការផ្សព្វផ្សាយ និងកៀរគរអ្នកវិនិយោគតាមរយៈការរៀបចំកិច្ចប្រជុំ ការធ្វើសិក្ខាសាលា និង Business Roadshow ដោយសហការជាមួយវិស័យឯកជនរួមមាន៖ សភាពាណិជ្ជកម្មខេត្ត សមាគមសហគ្រិនវ័យក្មេង និងសមាគមអ្នកវិនិយោគចិនជាដើម។

-គួរធ្វើអាទិភាវូបនីយកម្មការរៀបចំហេដ្ឋារចនាសម្ព័ន្ធច្បាស់លាស់រួមមាន៖ ផ្លូវ (ប្រព័ន្ធដឹកជញ្ជូន) ទឹកស្អាត អគ្គិសនី ប្រព័ន្ធអ៊ីនធើណេត

– បន្តពង្រឹងការងារសន្តិសុខ សណ្តាប់ធ្នាប់ក្នុងខេត្តឱ្យកាន់តែប្រសើរ ដើម្បីលើកកម្ពស់បរិយាកាស វិនិយោគនៅក្នុងខេត្ត និងផ្តល់ទំនុកចិត្តបន្ថែមដល់អ្នកវិនិយោគ៕

The post កត្តារាំងស្ទះ «ការចុះបញ្ជីគម្រោងវិនិយោគក្រោម ៥ លានដុល្លារ» លើកយកពិភាក្សាក្នុងសន្និបាតប្រចាំឆ្នាំរបស់ខេត្តព្រះសីហនុ appeared first on Kampuchea Thmey Daily.

អគ្គិសនីកម្ពុជាកំពុងសាងសង់អនុស្ថានីយវាលរេញអានុភាព ៧៥ មេហ្គាវ៉ាត់ ផ្គត់ផ្គង់តំបន់សេដ្ឋកិច្ចពិសេសស្រុកព្រៃនប់

Dy Bunnara — Thu, 25 Dec 2025 03:21:56 +0000

អគ្គិសនីកម្ពុជាកំពុងសាងសង់អនុស្ថានីយវាលរេញដែលមានអនុភាព ៧៥ មេហ្គាវ៉ាត់ ដើម្បីបំពេញតម្រូវការប្រើប្រាស់ និងបម្រើការផ្គត់ផ្គង់ដល់តំបន់ឧស្សាហកម្ម។ នេះបើតាមលោក ឡុង ឌីម៉ង់ មន្រ្តីអ្នកនាំពាក្យរដ្ឋបាលខេត្តព្រះសីហនុនៅក្នុងវេទិកាបង្ហាញពីវឌ្ឍនភាពការអភិវឌ្ឍក្នុងខេត្តក្នុងឆមាសទី ១ ឆ្នាំ ២០២៥។

លោក ឡុង ឌីម៉ង់ បានឲ្យដឹងថា អនុស្ថានីយវាលរេញដែលមានអានុភាព ៧៥ មេហ្គាវ៉ាត់ កំពុងដំណើរការសាងសង់សម្រាប់ផ្គត់ផ្គង់តំបន់សេដ្ឋកិច្ចពិសេសស្រុកព្រៃនប់។ ជាមួយគ្នានេះ អាជ្ញាធរក៏ត្រៀមសាងសង់អនុស្ថានីយអូរត្រជាក់ចិត្តដែលមានអានុភាព ១៥០ មេហ្គាវ៉ាត់ ដើម្បីបំពេញតម្រូវការប្រើប្រាស់បន្ថែមទៀត។

ខេត្តព្រះសីហនុមានរោងចក្រផលិតថាមពលអគ្គិសនីចំនួន ៣ កំពុងដំណើរការមានអនុភាពផលិតបានចំនួន ១ ៣៤០ មេហ្គាវ៉ាត់ បញ្ចូលចូលបណ្តាញជាតិ។ ថាមពលផ្គត់ផ្គង់ក្នុងខេត្តមាន ១២ ប្រភព ដែលមានអនុភាពផលិតចំនួន ៨៨៤ មេហ្កាវ៉ាត់ ស្របពេលដែលតម្រូវការប្រើប្រាស់ជាក់ស្តែងអស់តែ ៣៥៧ មេហ្គាវ៉ាត់។

លោក ឡុង ឌីម៉ង់ បានបញ្ជាក់ថា បច្ចុប្បន្នអគ្គិសនីត្រូវបានផ្គត់ផ្គង់គ្របដណ្ដប់ ១០០% ទួទាំងខេត្តលើភូមិសរុបចំនួន ១១១ ភូមិ៕

The post អគ្គិសនីកម្ពុជាកំពុងសាងសង់អនុស្ថានីយវាលរេញអានុភាព ៧៥ មេហ្គាវ៉ាត់ ផ្គត់ផ្គង់តំបន់សេដ្ឋកិច្ចពិសេសស្រុកព្រៃនប់ appeared first on Kampuchea Thmey Daily.

ខេត្តព្រះសីហនុ មានសមត្ថភាពផលិតទឹកស្អាតគ្រប់គ្រាន់ បំពេញតម្រូវការប្រើប្រាស់ពលរដ្ឋក្នុងខេត្ត

Dy Bunnara — Mon, 10 Nov 2025 04:39:57 +0000

ខេត្តព្រះសីហនុមានក្រុមហ៊ុនផលិតទឹកស្អាតឯកជនចំនួន ១៤ កំពុងដំណើរការផលិតទឹកស្អាតបំពេញសេចក្តីត្រូវការប្រើប្រាស់ប្រចាំថ្ងៃសម្រាប់ពលរដ្ឋក្នុងខេត្ត។ នេះបើតាមលោក ឡុង ឌីម៉ង់ អភិបាលរងខេត្តព្រះសីហនុ។

ថ្លែងក្នុងកម្មវិធីបង្ហាញពីវឌ្ឍនភាពការងាររបស់រដ្ឋបាលខេត្តព្រះសីហនុក្នុងឆមាសទី ១ ឆ្នាំ ២០២៥ លោក ឡុង ឌីម៉ង់ អភិបាលរងខេត្តព្រះសីហនុបានឲ្យដឹងថា ខេត្តស្ថិតនៅតំបន់ឆ្នេរនេះ មានក្រុមហ៊ុនផលិតទឹកស្អាតឯកជនចំនួន ១៤ ក្រុមហ៊ុន ក្នុងនោះ ៤ ក្រុមហ៊ុនកំពុងស្នើសុំអាជ្ញាប័ណ្ណ។

សមត្ថភាពផលិតទឹកស្អាតក្នុងខេត្តបានប្រមាណ ១៧៨ ៩៦០ ម^៣/ថ្ងៃ ខណៈតម្រូវការប្រើប្រាស់ជាក់ស្ដែងមានប្រមាណ ១២០ ០០០ ម^៣/ថ្ងៃប៉ុណ្ណោះ។

លោក ឡុង ឌីម៉ង់ បានញ្ជាក់ថា វិសាលភាពផ្គត់ផ្គង់ទឹកស្អាតបច្ចុប្បន្នបានគ្របដណ្តប់ចំនួន ៩៤/១១១ ភូមិ ដែលស្មើនឹង ៨៤,៨៤% នៃភូមិទូទាំងខេត្ត ខណៈអតិថិជនបានកំពុងភ្ជាប់ប្រើប្រាស់សរុបមានចំនួន ៣៨ ៥២៩ កុងទ័រ (គ្រួសារ)។

រាជរដ្ឋាភិបាលបានដាក់ផែនការអភិវឌ្ឍខេត្តព្រះសីហនុ រយៈពេលវែងក្នុងការប្រែក្លាយខេត្តព្រះសីហនុជាប៉ូលសេដ្ឋកិច្ចដ៏សំខាន់មួយ មានការអភិវឌ្ឍផ្នែកឧស្សាហកម្ម ទេសចរណ៍ កសិកម្ម និងហិរញ្ញវត្ថុ ដោយប្រើប្រាស់បច្ចេកវិទ្យាទំនើប និងវ័យឆ្លាត មានសេវាសាធារណៈល្អ និងការរស់នៅប្រកបដោយរិស្ថានបៃតង៕

The post ខេត្តព្រះសីហនុ មានសមត្ថភាពផលិតទឹកស្អាតគ្រប់គ្រាន់ បំពេញតម្រូវការប្រើប្រាស់ពលរដ្ឋក្នុងខេត្ត appeared first on Kampuchea Thmey Daily.

តំបន់សេដ្ឋកិច្ចពិសេសទាំង ៥ នៅខេត្តព្រះសីហនុ មានជាង ២០០ រោងចក្រ ក្រោមទុនវិនិយោគប្រមាណ ២ ពាន់លានដុល្លារ

Dy Bunnara — Sat, 18 Oct 2025 01:13:01 +0000

តំបន់សេដ្ឋកិច្ចពិសេសទាំង ៥ កន្លែង នៅខេត្តព្រះសីហនុមានរោងចក្រកំពុងដំណើរការជាង ២០០ រោងចក្រ ក្រោមទុនវិនិយោគប្រមាណ ២ ពាន់លានដុល្លារ ហើយដែលបានបង្កើតការងាររាប់ម៉ឺនកន្លែងដល់ពលរដ្ឋក្នុងមូលដ្ឋាន។

លោក ឡុង ឌីម៉ង់ អភិបាលរងខេត្តព្រះសីហនុបានប្រាប់កម្ពុជាថ្មីថា ខេត្តព្រះសីហនុមានរោងចក្រសរុបចំនួន ៣៦៤ កំពុងបើកដំណើរការ។ ក្នុងនោះតែនៅក្នុងតំបន់សេដ្ឋកិច្ចពិសេសទាំង ៥ មានរោងចក្រប្រមាណជាង ២៤០ រោងចក្រ ដែលបានស្រូបទាញកម្លាំងពលកម្មបម្រើការងារប្រមាណ ៥ ម៉ឺននាក់។

តំបន់សេដ្ឋកិច្ចក្រុងព្រះសីហនុ មានរោងចក្រជាង ២០០ មានកម្មករប្រមាណ ៣៥ ០០០ នាក់ ជាមួយទុនវិនិយោគប្រមាណ ១ ៥៦៥ លានដុល្លារអាមេរិក។ តំបន់សេដ្ឋកិច្ចក្រុងព្រះសីហនុ កន្លងទៅថ្មីៗនេះក៏បានអបអរសម្រាប់វត្តមានរោងចក្រទី ២០០ ដែលបានបើកដំណើរការ ក្រោមវត្តមានសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា។

ដោយឡែកតំបន់សេដ្ឋកិច្ចពិសេសកំពង់ផែស្វយ័តក្រុងព្រះសីហនុ មានរោងចក្រចំនួន ២ កំពុងដំណើរការ មានកម្មករនិយោជិតចំនួន ២៨៨ នាក់ ក្រោមទុនវិនិយោគប្រមាណ ៧៩ លានដុល្លារ។

តំបន់សេដ្ឋកិច្ចពិសេសចេជាងមានរោងចក្រសរុប ២៩ មានកម្មករសរុប ១២ ០០០ នាក់ ក្រោមទុនវិនិយោគជាង ៣២២ លានដុល្លារ។

តំបន់សេដ្ឋកិច្ចពិសេសហ្គ្រេនបូកគោ មានរោងចក្រសរុបចំនួន ៣ មានកម្មករសរុប ៣០០ នាក់ ក្រោមទុនវិនិយោគប្រមាណ ១១ លានដុល្លារ។ តំបន់សេដ្ឋកិច្ចពិសេសខេមបូឌាន ស៊ីណូមេធលលីក មេធៀរៀល មានរោងចក្រសរុប ៥ មានកម្មករចំនួន ៧៦ នាក់ មានទុនវិនិយោគ ២៧ លានដុល្លារអាមេរិក។

លោក ឡុង ឌីម៉ង់ បានបញ្ជាក់ថា ក្រៅពីតំបន់រោងចក្រសេដ្ឋកិច្ច ក្នុងខេត្តព្រះសីហនុក៏មានសហគ្រាសធុនតូច និងមធ្យម និងសិប្បកម្មប្រមាណ ១ ១៩០ មូលដ្ឋាន ដែលបង្កើតការងារដល់ពលរដ្ឋបានប្រមាណ ៥ ០០០ នាក់។

លោក ឡុង ឌីម៉ង់បានអះអាងថា ខេត្តដ៏មានសក្តានុពលនេះនៅមានតម្រូវការកម្លាំងពលកម្មបន្ថែមប្រមាណ ៦ ពាន់នាក់ថែមទៀត សម្រាប់បំពេញការងារក្នុងខ្សែសង្វាក់ផលិតកម្មក្នុងរោងចក្រស្របកំណើនរោងចក្រសហគ្រាសជាច្រើនកំពុងវិនិយោគក្នុងខេត្ត៕

The post តំបន់សេដ្ឋកិច្ចពិសេសទាំង ៥ នៅខេត្តព្រះសីហនុ មានជាង ២០០ រោងចក្រ ក្រោមទុនវិនិយោគប្រមាណ ២ ពាន់លានដុល្លារ appeared first on Kampuchea Thmey Daily.

ខេត្តព្រះសីហនុ ស្រូបទាញរោងចក្រខ្នាតធំៗប្រមាណ ៣៦៤ ជាមួយទុនវិនិយោគជិត ៣ ពាន់លានដុល្លារ

Dy Bunnara — Wed, 08 Oct 2025 03:43:28 +0000

លោក ឡុង ឌីម៉ង់ អភិបាលរងខេត្តព្រះសីហនុបានឲ្យដឹងថា ខេត្តព្រះសីហនុមានរោងចក្រធំៗកំពុងដំណើរការសរុបចំនួន ៣៦៤ រោងចក្រ ដែលបានស្រូបទាញទុនវិនិយោគសរុបជាង ២ ៩៦៤ លានដុល្លារអាមេរិក។

ខេត្តតំបន់ឆ្នេរនេះមានការវិនិយោគសាងសង់រោងចក្រយ៉ាងច្រើន ទាំងនៅក្នុងតំបន់សេដ្ឋកិច្ចពិសេស និងក្រៅតំបន់សេដ្ឋកិច្ចពិសេស។

លោក ឡុង ឌីម៉ង់ បានគូសបញ្ជាក់ថា រោងចក្រចំនួន ៣៦៤ រោងចក្រ ដែលកំពុងដំណើរការវិនិយោគក្នុងខេត្តព្រះសីហនុមាននៅក្នុងតំបន់សេដ្ឋកិច្ចពិសេសទាំង ៥ ទីតាំង ចំនួន ២០៣ រោងចក្រ និងនៅក្រៅតំបន់សេដ្ឋកិច្ចពិសេសប្រមាណ ៦៤ រោងចក្រ ដោយប្រើប្រាស់កម្លាំងពលកម្មសរុប ៥៨ ៦១៨ នាក់។ បន្ថែមពីនេះ ខេត្តក៏មានសហគ្រាសធុនតូចនិងមធ្យម និងសិប្បកម្មមានចំនួន ១ ១៩០ មូលដ្ឋាន ដែលមានទុនសរុបជាង ៣០ លានដុល្លារអាមេរិក។

លោក ឡុង ឌីម៉ង់ បញ្ជាក់ថា បច្ចុប្បន្នខេត្តព្រះសីហនុក៏មានតម្រូវការកម្លាំងពលកម្មបន្ថែមប្រមាណ ៦ ៨០០ នាក់ សម្រាប់បម្រើការងារនៅតាមរោងចក្រសហគ្រាសនានា។

លោក ហុង វណ្ណៈ អ្នកជំនាញសេដ្ឋកិច្ចនៃរាជបណ្ឌិតសភាកម្ពុជាបានលើកឡើងពីសក្ដានុពលនៃខេត្តព្រះសីហនុ ដែលបានទាក់ទាញការវិនិយោគផ្នែកឧស្សាហកម្មធំៗមកបោះទីតាំងបង្កើតរោងចក្រនានា។

ថ្លែងប្រាប់ «កម្ពុជាថ្មី» លោកថា ខេត្តព្រះសីហនុបានក្លាយជាមជ្ឈមណ្ឌលសម្រាប់ការចែកចាយ និងទីតាំងរោងចក្រដំឡើងផលិតផលសម្រេច ស្របពេលដែលភូមិសាស្ត្រខេត្តនេះជាច្រកដឹកជញ្ជូនទំនិញចេញចូលដ៏សំខាន់តាមរយៈកំពង់ផែទឹកជ្រៅក្រុងព្រះសីហនុ។

យ៉ាងណាមិញ ដើម្បីបង្កើតឧត្ដមភាពខេត្តព្រះសីហនុក្នុងការទាក់ទាញការវិនិយោគបន្ថែមទៀត លោកបណ្ឌិត ហុង វណ្ណៈ មើលឃើញចាំបាច់ត្រូវមានការរៀបចំការអភិវឌ្ឍហេដ្ឋារចនាសម្ព័ន្ធ រួមទាំងការធ្វើទំនើបកម្មការប្រើប្រាស់បច្ចេកវិទ្យា បន្ថែមការកែសម្រួលការផ្តល់សេវារដ្ឋបាលឲ្យកាន់តែងាយស្រួល ដែលទាំងអស់នេះនឹងជួយបង្កើនសក្តានុពលខេត្តតំបន់ឆ្នេរនេះទាក់ទាញបានវិនិយោគិន បោះទុនវិនិយោគបង្កើតជាទីតាំងរោងចក្រផលិតកម្មដើម្បីផលិតនាំចេញទៅក្រៅប្រទេស៕

The post ខេត្តព្រះសីហនុ ស្រូបទាញរោងចក្រខ្នាតធំៗប្រមាណ ៣៦៤ ជាមួយទុនវិនិយោគជិត ៣ ពាន់លានដុល្លារ appeared first on Kampuchea Thmey Daily.

ស្ថានីយប្រព្រឹត្តកម្មទឹកកខ្វក់ ៤ កន្លែង ខេត្តព្រះសីហនុ មានលទ្ធភាពចម្រោះទឹកកខ្វក់បាន ៦២ ៤០០ ម៉ែត្រគូប ក្នុង ១ថ្ងៃ

Dy Bunnara — Mon, 06 Oct 2025 02:30:09 +0000

ខេត្តព្រះសីហនុដែលជាខេត្តស្ថិតនៅតំបន់ឆ្នេរ មានស្ថានីយប្រព្រឹត្តកម្មទឹកកខ្វក់ចំនួន ៤ កន្លែង ដែលមានសមត្ថភាពអាចចម្រោះទឹកកខ្វក់បាន ៦២ ៤០០ ម៉ែត្រគូប ក្នុង ១ ថ្ងៃ។ នេះបើតាមការឲ្យដឹងពីលោក ឡុង ឌីម៉ង់ អភិបាលរងខេត្តព្រះសីហនុប្រាប់កម្ពុជាថ្មី។

ស្ថានីយទី ១ មានសមត្ថភាពប្រព្រឹត្តកម្មទឹកកខ្វក់បានប្រមាណ ៥ ២០០ ម៉ែត្រគូប ក្នុង ១ ថ្ងៃ។ ស្ថានីយទី២ មានសមត្ថភាពប្រព្រឹត្តកម្មទឹកកខ្វក់ប្រមាណ ៧ ២០០ ម៉ែត្រគូប ក្នុង១ថ្ងៃ។ ស្ថានីយទី ៣ មានសមត្ថភាពប្រព្រឹត្តកម្មទឹកកខ្វក់ប្រមាណ ២០ ០០០ ម៉ែត្រគូប ក្នុង១ថ្ងៃ និងស្ថានីយច្រោះសម្អាតទឹកកខ្វក់អូរឈើទាល ដែលអភិវឌ្ឍលើផ្ទៃដីទំហំ ១៦ ហិកតា មានសមត្ថភាពច្រោះទឹកកខ្វក់បាន ៣០ ០០០ ម៉ែត្រគូប/ក្នុងមួយថ្ងៃ។

បើតាមលោក ឡុង ឌីម៉ង់ ស្ថានីយប្រព្រឹត្តកម្មចម្រោះទឹកកខ្វក់ទាំង ៤ កន្លែង គ្រប់ដណ្តប់បានប្រមាណជា ៧០% ដែលបានបំពេញតួនាទីជួយបន្សុទ្ធទឹកកខ្វក់ឱ្យក្លាយជាទឹកស្អាតស្របតាមស្តង់ដារបរិស្ថាន មុននឹងបញ្ចេញចោលទៅសមុទ្រចូលរួមទប់ស្កាត់ផលប៉ះពាល់ដល់បរិស្ថាន។

បន្ថែមពីនេះ បើតាមមន្រ្តីអ្នកនាំពាក្យរដ្ឋបាលខេត្តព្រះសីហុន ខេត្តក្នុងតំបន់ឆ្នេរមួយនេះក៏មានស្ថានីយបូមទឹកកខ្វក់ចំនួន ៨ កន្លែង ដែលមានសមត្ថភាពបូមបានចំនួន ៤៤ ០៦៤ ម៉ែត្រគូប ក្នុង១ថ្ងៃ និងកំពុងដំណើរការសាងសង់ស្ថានីយបូមទឹកកខ្វក់ចំនួន ២ ទីតាំងបន្ថែមទៀត៕

The post ស្ថានីយប្រព្រឹត្តកម្មទឹកកខ្វក់ ៤ កន្លែង ខេត្តព្រះសីហនុ មានលទ្ធភាពចម្រោះទឹកកខ្វក់បាន ៦២ ៤០០ ម៉ែត្រគូប ក្នុង ១ថ្ងៃ appeared first on Kampuchea Thmey Daily.

អគារខ្ពស់ៗចំនួន ៥ ថែមទៀត បានចាប់ផ្ដើមដំណើរការសាងសង់ក្នុងក្រុងព្រះសីហនុ

Dy Bunnara — Tue, 16 Sep 2025 02:53:21 +0000

នៅឆមាសទី ១ ឆ្នាំ ២០២៥ នេះ មានសំណង់អគារខ្ពស់ៗចំនួន ៥ បន្ថែមទៀត បានចាប់ផ្តើមដំណើរការសាងសង់ក្នុងខេត្តព្រះសីហនុ។ នេះបើតាមលោក ឡុង ឌីម៉ង់ អភិបាលរងនិងមន្រ្តីអ្នកនាំពាក្យរដ្ឋបាលខេត្តព្រះសីហនុ។

លោក ឡុង ឌីម៉ង់ អភិបាលរងនិងមន្រ្តីអ្នកនាំពាក្យរដ្ឋបាលខេត្តព្រះសីហនុបានបញ្ជាក់ថា នៅឆមាសទី ១ ឆ្នាំ ២០២៥ មានគម្រោងអគារខ្ពស់ៗចំនួន ៥ គម្រោងថែមទៀតបានចាប់ផ្ដើមដំណើរការសាងសង់។

បន្ថែមពីសំណង់អគារខ្ពស់ៗដែលទទួលបានការអនុញ្ញាតិឲ្យសាងសង់ លោក ឡុង ឌីម៉ង់បានបញ្ជាក់ថា ចាប់ពីឆ្នាំ ២០១៨ រហូតដល់ខែមិថុនាឆ្នាំ ២០២៥ ខេត្តនៅតំបន់ឆ្នេរនេះមានអគារខ្ពស់ៗសរុបចំនួន ៦១៥ គម្រោង។

លោក ឡុង ឌីម៉ង់ បានបញ្ជាក់ថា សំណង់អគារខ្ពស់ៗនៅខេត្តព្រះសីហនុបែងចែកទៅតាមកម្រិតកម្ពស់។ ក្នុងចំណោមអគារខ្ពស់ៗសរុបចំនួន ៦១៥ គម្រោង សំណង់អគារដែលមានកម្ពស់ចាប់ពី ៥ ជាន់ ដល់ ៩ ជាន់មានចំនួន ២៨៦ គម្រោង អគារកម្ពស់ចាប់ពី ១០ ជាន់ដល់ ១៩ ជាន់មានចំនួន ២៣២ គម្រោង អគារកម្ពស់ចាប់ពី ២០ ជាន់ ដល់ ២៩ ជាន់មានចំនួន ៦៣ គម្រោង អគារកម្ពស់ចាប់ពី ៣០ ជាន់ដល់ ៣៩ ជាន់មានចំនួន ២៨ គម្រោង និងអគារកម្ពស់ចាប់ពី ៤០ ជាន់ឡើងទៅមានចំនួន ៦ គម្រោង។

ពាក់ព័ន្ធការអនុវត្តកម្មវិធីពិសេសជំរុញការវិនិយោគក្នុងខេត្តព្រះសីហនុរបស់រដ្ឋាភិបាល លោក ឡុង ឌីម៉ង់បានថ្លែងថា គិតចាប់ពីការអនុវត្តរហូតដល់ឆមាសទី ១ ឆ្នាំ២០២៥ ក្រុមការងារជំរុញការវិនិយោគក្នុងខេត្តព្រះសីហនុ បានទទួលសំណើសុំការលើកទឹកចិត្តចំនួន ៣៣១ គម្រោង ដែលមានទុនវិនិយោគសរុបជាង ៧ ៣៥១ លានដុល្លារអាមេរិក។ ក្នុងនោះគម្រោងដែលពាក់ព័ន្ធនឹងអគារជាប់គាំងមានចំនួន ១៥៣ គម្រោង មានទុនវិនិយោគជាង ៣ ៥០៩ លានដុល្លារអាមេរិក គម្រោងមិនពាក់ព័ន្ធនឹងអគារជាប់គាំង (គម្រោងថ្មី ឬគម្រោងកំពុងដំណើរការសាងសង់) មានចំនួន ១៤២គម្រោង មានទុនវិនិយោគជាង ២ ៩៩០ លានដុល្លារអាមេរិក ការពង្រីកគម្រោងមានចំនួន ២៤ មានទុនវិនិយោគជាង ៨១៨ លានដុល្លារអាមេរិក និងគម្រោងមានស្រាប់មានចំនួន ១២ គម្រោង មានទុនវិនិយោគជាង ៣៤លានដុល្លារអាមេរិក។

ដោយឡែកក្រុមហ៊ុនវិនិយោគដែលបានចុះបញ្ជីជាគម្រោងវិនិយោគមានលក្ខណៈសម្បត្តិគ្រប់គ្រាន់ពីអនុគណៈកម្មាធិការវិនិយោគខេត្ត (គម្រោងមានទុនវិនិយោគក្រោម ៥ លានដុល្លារអាមេរិក) មានចំនួន ១៧ គម្រោង ដែលមានទុនវិនិយោគជាង ៣៧ លានដុល្លារអាមេរិក។ ក្នុងនោះបើគិតត្រឹមតែនៅឆមាសទី ១ ឆ្នាំ២០២៥ មានចំនួន ៦ គម្រោង មានទុនវិនិយោគជាង ២១ លានដុល្លារអាមេរិក៕

The post អគារខ្ពស់ៗចំនួន ៥ ថែមទៀត បានចាប់ផ្ដើមដំណើរការសាងសង់ក្នុងក្រុងព្រះសីហនុ appeared first on Kampuchea Thmey Daily.

រូបភាពបង្ហាញវឌ្ឍនភាពការសាងសង់កំពង់ផែទឹកជ្រៅក្រុងព្រះសីហនុ ខណៈសម្រេចបានប្រមាណ ៣០%

Dy Bunnara — Tue, 26 Aug 2025 03:41:13 +0000

ក្រោយបើកការដ្ឋានសាងសង់ជិត ២ ឆ្នាំ ដំណើរការសាងសង់កំពង់ផែទឹកជ្រៅជំហានទីមួយនៅក្រុងព្រះសីហនុសម្រេចបានលទ្ធផលការងារប្រមាណ ៣០%។ នេះបើតាមមន្ត្រីមួយរូបនៅកំពង់ផែស្វយ័តក្រុងព្រះសីហនុបានប្រាប់កម្ពុជាថ្មី។

មន្រ្តីដដែលរូបនេះមិនបានផ្តល់ព័ត៌មានលើដំណើរការសាងសង់កំពង់ផែទឹកជ្រៅ ដែលចាយទុនវិនិយោគរយលានដុល្លារនេះ ដោយគ្រាន់តែអាចផ្តល់រូបភាពនៃវឌ្ឍនភាពដំណើរការសាងសង់ និងប្រាប់ថាការសាងសង់មានដំណើរការទៅមុខស្របតាមផែនការ។

កំពង់ផែស្វយ័តក្រុងព្រះសីហនុបច្ចុប្បន្នមានជម្រៅទឹក ៩.៥ ម៉ែត្រ ដែលអាចឲ្យនាវាមានទម្ងន់ចាប់ពី ៣ ម៉ឺនទៅ ៤ ម៉ឺនតោន អាចចូលចតបានស្មើប្រហែល ១៨% នៃនាវាឆ្លងកាត់នៅតំបន់អាស៊ីប៉ាស៊ីហ្វិក។

នៅក្នុងកម្មវិធីបង្ហាញពីវឌ្ឍនភាពការងារប្រចាំឆមាសទីមួយឆ្នាំ ២០២៥ របស់រដ្ឋបាលខេត្តព្រះសីហនុកាលពីពេលថ្មីៗនេះ លោក ឡុង ឌីម៉ង់ អភិបាលរងខេត្តព្រះសីហនុបានឲ្យដឹងថា កំពង់ផែស្វយ័តក្រុងព្រះសីហនុបច្ចុប្បន្នជាកំពង់ផែអន្តរជាតិខ្នាតតូច (Feeder Port) ហើយរដ្ឋាភិបាលកំពុងសាងសង់ចំណតផែកុងតឺន័រថ្មី ដើម្បីប្រែក្លាយឱ្យទៅជាកំពង់ផែអន្តរជាតិខ្នាតធំ (Hub Port) ដែលអាចឱ្យនាវាកុងតឺន័រធុនធំមានផ្លូវដឹកជញ្ជូនពីគ្រប់តំបន់នៅក្នុងពិភពលោកអាចចូលចតបាន ដោយពុំមានឧបសគ្គលើជម្រៅទឹក។

លោក ឡុង ឌីម៉ង់បានលើកពីការអភិវឌ្ឍកំពង់ផែទឹកជ្រៅនៅក្រុងព្រះសីហនុទាំង ៣ ដំណាក់កាល ដែលដំណាក់កាលទីមួយ (ឆ្នាំ ២០២៣-២០២៦) គ្រោងបញ្ចប់នៅឆ្នាំ ២០២៦ ដែលមានជម្រៅទឹក ១៤.៥ ម៉ែត្រ អាចឲ្យនាវាមានទម្ងន់ផ្ទុក ៤ ពាន់ TEU ស្មើ ៦ ម៉ឺនតោន អាចចូលចតបាន។ ដំណាក់កាលទី ២ មានជម្រៅទឹក ១៦.៥ ម៉ែត្រ គ្រោងបញ្ចប់នៅឆ្នាំ ២០២៨ ដអាចឲ្យនាវាទម្ងន់ផ្ទុក ១ ម៉ឺន TEU ស្មើ ១២ ម៉ឺនតោនអាចចូលចត និងដំណាក់កាលទី ៣ បញ្ចប់នៅឆ្នាំ ២០២៩ មានជម្រៅទឹក ១៧.៥ ម៉ែត្រ នឹងអាចឲ្យនាវាទម្ងន់ផ្ទុក ១ ម៉ឺន ៥ ពាន់ TEU ស្មើ ១៦ ម៉ឺនតោនអាចចូលចតបានគ្រប់នាវាចរាចរណ៍លើពិភពលោក។

ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់បានប្រាប់កម្ពុជាថ្មីថា ការដឹកជញ្ជូនតាមផ្លូវទឹកមានការពេញនិយមនៅលើពិភពលោក ដោយសារមធ្យោបាយនេះអាចដឹកទំនិញបានច្រើន ដឹកបានឆ្ងាយ និងតម្លៃថោក។

លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់បានបញ្ជាក់ថា បច្ចុប្បន្ននេះការដឹកជញ្ជូននៅកម្ពុជាមានតម្លៃខ្ពស់ ដោយសារទំនិញដឹកចេញចូលប្រទេសកម្ពុជាត្រូវឆ្លងកាត់ការលើកដាក់នៅកំពង់ផែប្រទេសជិតខាងនៅក្នុងតំបន់ ដែលនេះបង្កើនកញ្ចប់ចំណាយលើថ្លៃដឹកជញ្ជូនបន្ថែម។

យ៉ាងណាមិញ ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់មើលឃើញថា តាមរយៈការអភិវឌ្ឍកំពង់ផែទឹកជ្រៅថ្មីរបស់រដ្ឋាភិបាលដែលគ្រោងចំណាយថវិការហូតដល់ទៅជិត ១ ពាន់លានដុល្លារអាមេរិក នឹងអាចពង្រីកសមត្ថភាពការដឹកជញ្ជូនទំនិញតាមផ្លូវសមុទ្រឱ្យកាន់តែខ្លាំងក្លាថែមទៀត ឆ្លើយតបកំណើនសេដ្ឋកិច្ច និងពាណិជ្ជកម្មរបស់កម្ពុជា។

បើតាមរដ្ឋបាលខេត្តព្រះសីហនុ ក្នុងឆមាសទីមួយឆ្នាំ ២០២៥ កំពង់ផែស្វយ័តក្រុងព្រះសីហនុមានបរិមាណទំនិញឆ្លងកាត់ចំនួន ៥ លាន ៦ សែនតោន ក្នុងនោះទំនិញនាំចូលមានជាង ៤ លាន ២ សែនតោន និងនាំចេញមានជាង ១ លាន ៣ សែនតោន។ នាវាចូលចតសរុបមានចំនួន ៨៨៩ គ្រឿង និងទទួលបានចំណូលជាង ៧០ លានដុល្លារ៕

The post រូបភាពបង្ហាញវឌ្ឍនភាពការសាងសង់កំពង់ផែទឹកជ្រៅក្រុងព្រះសីហនុ ខណៈសម្រេចបានប្រមាណ ៣០% appeared first on Kampuchea Thmey Daily.

លោក ឡុង ឌីម៉ង់ Archives - Kampuchea Thmey Daily

ខេត្ត​ព្រះសីហនុ​ ស្រូបទាញ​រោងចក្រ​ខ្នាត​ធំៗ​​ប្រមាណ​ ៣៦៤ ជាមួយ​ទុន​វិនិយោគជិត ៣ ពាន់​លាន​ដុល្លារ

អគារ​ខ្ពស់​ៗ​ចំនួន ៥ ថែម​ទៀត ​បាន​ចាប់ផ្ដើម​ដំណើរការ​សាងសង់​ក្នុង​ក្រុង​ព្រះសីហនុ

​រូបភាព​បង្ហាញ​វឌ្ឍនភាព​ការ​សាងសង់​កំពង់ផែ​ទឹកជ្រៅ​ក្រុង​ព្រះសីហនុ ខណៈ​សម្រេច​បាន​ប្រមាណ ៣០%

ខេត្តព្រះសីហនុ ស្រូបទាញរោងចក្រខ្នាតធំៗប្រមាណ ៣៦៤ ជាមួយទុនវិនិយោគជិត ៣ ពាន់លានដុល្លារ

អគារខ្ពស់ៗចំនួន ៥ ថែមទៀត បានចាប់ផ្ដើមដំណើរការសាងសង់ក្នុងក្រុងព្រះសីហនុ

រូបភាពបង្ហាញវឌ្ឍនភាពការសាងសង់កំពង់ផែទឹកជ្រៅក្រុងព្រះសីហនុ ខណៈសម្រេចបានប្រមាណ ៣០%