លោក អាំង សិរីពិសិដ្ឋ Archives - Kampuchea Thmey Daily

លោក អាំង សិរីពិសិដ្ឋ បកស្រាយរឿងអ្នកគាំទ្រមួយចំនួនឃើញកីឡាករខ្លះមានសមត្ថភាពតែអត់ជាប់ជម្រើសជាតិ

Sina Noun — Mon, 09 Mar 2026 03:18:59 +0000

អគ្គលេខាធិការសហព័ន្ធកីឡាបាល់ទះលោក អាំង សិរីពិសិដ្ឋ ថាអ្នកគាំទ្រមួយចំនួនតែងតែឆ្ងល់ថាមានកីឡាករខ្លះមានសមត្ថភាពល្អៗ និងលេចធ្លោខ្លាំងពេលលេងពានរង្វាន់ផ្សេងៗ ប៉ុន្តែបែរជាមិនជាប់ជម្រើសជាតិនោះដោយសារតែវិន័យចំពោះការរស់នៅក្នុងជំរុំហ្វឹកហាត់។

លោក អាំង សិរីពិសិដ្ឋ

លោក អាំង សិរីពិសិដ្ឋ អគ្គលេខាធិការសហព័ន្ធបាល់ទះបានឲ្យដឹងថា ស្រាយចម្ងល់សាធារណៈ និងអ្នកគាំទ្រដែលតែងតែឆ្ងល់ថាកីឡាករមួយចំនួនមានសមត្ថភាពល្អ លេចធ្លោ ប៉ុន្តែបែរជាមិនជាប់ជម្រើសជាតិនាពេលកន្លងមកនោះគឺដោយសារបញ្ហាវិន័យតឹងរឹង និងសាមីកីឡាករខ្លួនឯងមិនហ៊ានចូលមក។

រូបភាពតំណាង

អគ្គលេខាធិការរូបនេះបន្ថែមទៀតថា ក្នុងក្រុមជម្រើសជាតិនេះគឺបើកជំហរចំពោះការធ្វើតេស្តចូលរួមគ្រប់កីឡាករទាំងអស់ដែលខ្លួនគិតថាមានសមត្ថភាពល្អគ្រប់គ្រាន់។ ប៉ុន្តែក្នុងក្រុមជម្រើសជាតិនេះគឺមានច្បាប់ទម្លាប់ វិន័យតឹងរឹងបំផុតដូចជាក្នុងមួយសប្ដាហ៍ហ្វឹកហាត់រយៈពេល ៥ថ្ងៃកន្លះ និងអាចទៅលេងក្រុមគ្រួសារមួយថ្ងៃបន្ទាប់មកចូលក្នុងជំរុំហ្វឹកហាត់វិញ។ នៅសល់ពេលត្រឹម ២ខែមុនការប្រកួតមកដល់កីឡាករមិនអនុញ្ញាតឲ្យទៅលេងក្រុមគ្រួសារទៀតទេ។ អំឡុងកន្លះខែមុនការប្រកួតតែម្ដងកីឡាករប្រើប្រាស់ទូរសព្ទត្រឹម ៧យប់ប៉ុណ្ណោះគឺត្រូវដកចេញ និងសម្រាកហើយ។ ចុងក្រោយដល់ថ្ងៃចេញទៅប្រកួតតែម្ដងកីឡាករមិនអនុញ្ញាតឲ្យប្រើប្រាស់ទូរសព្ទដៃនោះទេ។ ហេតុនេះហើយបានជាកីឡាករមួយចំនួនដែលមិនសូវមានវិន័យ និងធ្លាប់ដើរសេរីគឺមិនចង់ចូលក្នុងក្រុមជម្រើសជាតិ ឬមិនមកតេស្តសមត្ថភាពពេលជ្រើសរើសនោះឡើយ។

ចំណុចប៉ុន្មានខាងលើនេះជាហេតុផលមួយដែលសាធារណៈជនអាចមិនដឹង និងតែងតែឆ្ងល់អ្នកមួយចំនួនលេងល្អនៅខាងក្រៅ ឬលេចធ្លោនៅតាមពានរង្វាន់ផ្សេងៗតែមិនជាប់ជាកីឡាករជម្រើសជាតិចេញប្រកួតតំណាងកម្ពុជានាពេលកន្លងមក។

ក្រុមជម្រើសជាតិអំឡុងឆ្នាំ២០២៣ ឈ្នះមេដាយប្រាក់

បញ្ជាក់ដែរថា សហព័ន្ធកីឡាបាល់ទះកម្ពុជាគឺបានប្រមូលផ្ដុំកីឡាករឲ្យហ្វឹកហាត់ជុំគ្នា និងមានច្បាប់ទម្លាប់តឹងរឹងតាំងពីឆ្នាំ២០១៦ -២០១៧ មកម្ល៉េះ។ សហព័ន្ធមួយនេះចាត់ទុកជាសហព័ន្ធដែលមានការប្រមូលផ្ដុំមុនៗគេម្ល៉េះ។ ក្រុមជម្រើសជាតិនេះមានការយកចិត្តទុកដាក់ខ្ពស់ និងទំនុកបម្រុងខ្លាំងពីលោក ស សុខា ជាយូរឆ្នាំ និងបានទម្រង់ទិសដាក់គោលដៅច្បាស់លាស់ឆ្ពោះមកកាន់ព្រឹត្តិការណ៍ស៊ីហ្គេម លើកទី៣២ អំឡុងកម្ពុជាជាម្ចាស់ផ្ទះកាលឆ្នាំ២០២៣។ ស្របពេលការខំប្រឹងប្រែងកន្លងមក និងមានផែនការច្បាស់លាស់កីឡាបាល់ទះនេះមានភាពល្បីល្បាញជាខ្លាំងបន្ទាប់ពីមានកីឡាករល្អៗមានទាំងកាយសម្បទាស្ដង់ដារ និងបច្ចេកទេសលេងរហូតឈ្នះមេដាយសំរឹទ្ធនៅស៊ីហ្គេម វៀតណាម ឆ្នាំ២០២២ និងឈ្នះមេដាយប្រាក់ស៊ីហ្គេម ឆ្នាំ២០២៣ នៅកម្ពុជា និងជាកីឡាកំពុងមានប្រជាប្រិយភាពខ្លាំងបំផុងនាពេលបច្ចុប្បន្ននេះ៕

អត្ថបទដោយ៖ នួន ស៊ីណា

The post លោក អាំង សិរីពិសិដ្ឋ បកស្រាយរឿងអ្នកគាំទ្រមួយចំនួនឃើញកីឡាករខ្លះមានសមត្ថភាពតែអត់ជាប់ជម្រើសជាតិ appeared first on Kampuchea Thmey Daily.

លោក អាំង សិរីពិសិដ្ឋ ៖«សួន ចាន់ណារ៉ូ អាចចូលជម្រើសជាតិវិញ បើចង់…»

chean virakbot — Sat, 09 Aug 2025 02:57:25 +0000

អ្នកប៉ះសេឆ្នើមប្រចាំស្រុកខ្មែរ សួន ចាន់ណារ៉ូ បានធ្វើឲ្យអ្នកគាំទ្រចាប់អារម្មណ៍យ៉ាងខ្លាំងពីអាជីពបាល់ទះរបស់ខ្លួនក្នុងមួយរយៈពេលចុងក្រោយនេះ ខណៈអ្នកគាំទ្រជាច្រើនពិតជាចង់ឃើញរូបគេវិលត្រឡប់មកចូលរួមជាមួយក្រុមបាល់ទះជម្រើសជាតិកម្ពុជាវិញ។

កីឡាករ សួន ចាន់ណារ៉ូ

ចុងក្រោយបំផុត កាលពីថ្ងៃសុក្រ ទី៨ ខែកក្កដា ឆ្នាំ ២០២៥ សួន ចាន់ណារ៉ូ បានបង្ហោះរូបភាពដែលមានឯកសណ្ឋានរបស់ក្រុមបាល់ទះជម្រើសជាតិកម្ពុជា និងមានខ្លឹមសារខ្លីថា ៖«ជួបគ្នាឆាប់ៗ»។ ស្របពេលជាមួយគ្នានេះ ស្មាត់ឆ្នើម គួន ម៉ុម បានសរសេរថា ៖«ជួបគ្នាជាថ្មីម្តងទៀត»។ សារខ្លីទាំងនេះបានធ្វើឲ្យអ្នកគាំទ្រចាប់អារម្មណ៍យ៉ាងខ្លាំង ហើយគិតថា រូបគេប្រហែលជាអាចវិលត្រឡប់មកចូលរួមជាមួយជម្រើសជាតិឡើងវិញ។

កីឡាករ សួន ចាន់ណារ៉ូ និង គួន ម៉ុម

ទន្ទឹមជាមួយគ្នានេះ លោក អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទះកម្ពុជា ក៏បានបង្ហាញរូបភាពពីការជួបកីឡាករ សួន ចាន់ណារ៉ូ និងបានសរសេរសារថា ៖«អតីតជម្រើសជាតិបាល់ទះមកទទួលសេវាសាធារណៈ ផ្តល់សេវាតម្រូវការដល់ពលរដ្ឋទូទៅអោយកាន់តែល្អប្រសើរ និងមានទំនុកចិត្ត….»។

លោក អាំង សិរីពិសិដ្ឋ

ទោះបីជាយ៉ាងណា ការបង្ហោះសារគួរឲ្យចាប់អារម្មណ៍របស់កីឡាករទាំងពីរខាងលើ មិនមែនមានន័យថា សួន ចាន់ណារ៉ូ វិលត្រឡប់ទៅកាន់ជម្រើសជាតិក្នុងនាមជាកីឡាករដែរ ប៉ុន្តែក៏អាចមានន័យក្នុងលក្ខខណ្ឌផ្សេងដូចជា កីឡាករអាចចូលរួមជាមួយក្រុមបាល់ទះជម្រើសជាតិក្នុងនាមជាគ្រូជំនួយ ឬការងារអ្វីដែលអាចរួមចំណែកជួយដល់ក្រុមជម្រើសជាតិបាន។

លោក អាំង សិរីពិសិដ្ឋ និង សួន ចាន់ណារ៉ូ

សារព័ត៌មាន«កម្ពុជាថ្មី»ក៏បានសួរទៅលោក អាំង សិរីពិសិដ្ឋ ជុំវិញករណីនេះ ដោយបានឆ្លើយដោយសញ្ញាវិជ្ជមានថា ៖«អាចដែរ ដូចខ្ញុំធ្លាប់និយាយអ៉ីចឹង យើងអត់ដែលបិទឱកាសសម្រាប់កីឡាករណាម្នាក់ទេ ឲ្យតែមានឆន្ទៈ ហើយមានសមត្ថភាពនៅល្អ ដែលអាចជួយជាតិបាន គឺយើងអនុញ្ញាតឲ្យគាត់ចូល»។

ក្រុមជម្រើសជាតិកម្ពុជាឈ្នះមេដាយប្រាក់ស៊ីហ្គេម

សូមបញ្ជាក់ថា សួន ចាន់ណារ៉ូ បានប្រកាសចូលនិវត្តន៍ជាផ្លូវការកាលពីថ្ងៃទី ២១ ខែតុលា ឆ្នាំ ២០២៤ បន្ទាប់ពីចាប់អាជីពបាល់ទះអស់រយៈពេល ១៥ ឆ្នាំ។ រូបគេជាផ្នែកមួយដ៏សំខាន់ជួយក្រុមបាល់ទះជម្រើសជាតិកម្ពុជា ទទួលបានមេដាយសំរិទ្ធកីឡាស៊ីហ្គេម ឆ្នាំ ២០២១ និងមេដាយប្រាក់កីឡាស៊ីហ្គេម ឆ្នាំ ២០២៣ ព្រមទាំងឈ្នះជើងឯក SEA V. League Challenge ឆ្នាំ ២០២៤។ បន្ទាប់ពីអវត្តមានអ្នកប៉ះសេឆ្នើមរូបនេះ ក្រុមបាល់ទះជម្រើសជាតិកម្ពុជាធ្វើមិនបានល្អទេ ក្នុងពានរង្វាន់ SEA V. League ឆ្នាំ ២០២៥ ដោយឆ្លងកាត់ ៨ ប្រកួតគឺចាញ់ទាំងអស់៕

សួន ចាន់ណារ៉ូ លើកពាន SEA V. LEAGUE Challenge

The post លោក អាំង សិរីពិសិដ្ឋ ៖«សួន ចាន់ណារ៉ូ អាចចូលជម្រើសជាតិវិញ បើចង់…» appeared first on Kampuchea Thmey Daily.

លោក អាំង សិរីពិសិដ្ឋ បង្ហាញការហត់នឿយនឹងបាល់ទះ ចង់យកពេលវេលាដើម្បីគ្រួសារ

chean virakbot — Fri, 18 Jul 2025 12:58:20 +0000

លោក អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទះកម្ពុជា បង្ហាញអារម្មណ៍អស់កម្លាំងកាយចិត្ត បន្ទាប់ពីការប្រកួតរបស់ក្រុមបាល់ទះជម្រើសជាតិកម្ពុជាមិនបានល្អក្នុងពានរង្វាន់ SEA V. League ឆ្នាំ ២០២៥។

លោកបានសរសេរថា ៖«ខ្ញុំពិតជាហត់ពេកហើយ អស់កម្លាំងហើយ ចង់ទុកពេលវេលាដែលនៅសេសសល់ប៉ុន្មានឆ្នាំចុងក្រោយមើលថែគ្រួសារវិញម្តង»។

ការលើកឡើងរបស់លោក អាំង សិរីពិសិដ្ឋ បានកើតមានឡើង បន្ទាប់ពីក្រុមបាល់ទះជម្រើសជាតិកម្ពុជា បានចាញ់ ៧ ប្រកួតជាប់គ្នាក្នុងពាន SEA V. League គឺចាញ់ ហ្វីលីពីន ២ លើក ចាញ់ វៀតណាម ២លើក ចាញ់ ថៃ ២ លើក និង ឥណ្ឌូណេស៊ី ១លើក ក្នុងរយៈពេលមិនដល់ ពីរសប្តាហ៍ផង។

មែនទែន ក្រុមបាល់ទះជម្រើសជាតិ ក្រោមការដឹកនាំរបស់លោកឧបនាយករដ្ឋមន្ត្រី ស សុខា ជាប្រធាន និងលោក អាំង សិរីពិសិដ្ឋ ជាអនុប្រធាន និងជាអគ្គលេខាធិការបានធ្វើឲ្យពិភពខាងក្រៅស្គាល់បាល់ទះកម្ពុជាលើឆាកអន្តរជាតិ។

ក្រុមកម្ពុជាបានឈ្នះមេដាយប្រាក់ និង សំរិទ្ធ ជាលើកដំបូងក្នុងប្រវត្តិសាស្ត្រកីឡាស៊ីហ្គេម ឆ្នាំ ២០១, ២០២៣ និងបានឈ្នះជើងឯក SEA V. League Challenge ឆ្នាំ ២០២៤ ព្រមទាំងបានចូលរួមប្រកួតកីឡាទ្វីបអាស៊ី Asian Games កាលពីចុងឆ្នាំ ២០២៣ ហើយចុងក្រោយបានចូលរួមប្រកួត SEA V. League។ ជាមួយគ្នា សហព័ន្ធបានរៀបចំកម្មវិធីប្រកួតជាច្រើន និងទទួលបានការគាំទ្រយ៉ាងខ្លាំងពីមហាជន។

កាតព្វកិច្ចការរបស់ក្រុមកីឡាករ ក្រុមការងារគ្រូបង្វឹក និងថ្នាក់ដឹកនាំដែលមានអគ្គលេខាធិការគឺជាអ្នកអនុវត្តផ្ទាល់ដែលត្រូវឃ្លាតឆ្ងាយពីក្រុមគ្រួសារច្រើនថ្ងៃដើម្បីដឹកនាំទាំងការហ្វឹកហាត់ និងប្រកួត ដូច្នេះនៅពេលទទួលបានលទ្ធផល នឹងទទួលបានភាពសប្បាយរីក កោតសរសើរ ប៉ុន្តែនៅពេលទទួលបានលទ្ធផលមិនល្អក៏ទទួលបានការរិះគន់ដែរ៕

អត្ថបទ៖ វីរបុត្រ

The post លោក អាំង សិរីពិសិដ្ឋ បង្ហាញការហត់នឿយនឹងបាល់ទះ ចង់យកពេលវេលាដើម្បីគ្រួសារ appeared first on Kampuchea Thmey Daily.

លោក អាំង សិរីពិសិដ្ឋ ថ្លែងថា បាល់ទះកម្ពុជាមិនមែនជាអ្នកជំងឺអាស៊ានទៀតទេ

chean virakbot — Tue, 22 Oct 2024 01:49:19 +0000

លោកបណ្ឌិត អាំង សិរីពិសិដ្ឋ អគ្គលេខាធិការ និងជាអនុប្រធានសហព័ន្ធកីឡាបាល់ទះកម្ពុជាបានថ្លែងពីវិស័យបាល់ទះកម្ពុជាមិនមែនជាអ្នកជំងឺអាស៊ានទៀតទេក្នុងរយៈពេលប្រមាណ៣ឆ្នាំចុងក្រោយ។

នៅក្នុងពិធីនិវត្តន៍ជាផ្លូវការរបស់អ្នកលើកបាល់ (អ្នកប៉ះសេ) និងជាប្រធានក្រុមបាល់ទះជម្រើសជាតិកម្ពុជា សួន ចាន់ណារ៉ូ ពីក្រុមជម្រើសជាតិ កាលពីល្ងាចថ្ងៃទី២១ ខែតុលា ឆ្នាំ២០២៤ លោក អាំង សិរីសិដ្ឋ បានលើកឡើងពីការរីកចម្រើនរបស់កីឡាបាល់ទះកម្ពុជាគួរឲ្យកត់សំគាល់នាប៉ុន្មានឆ្នាំចុងក្រោយគឺជាការរួមចំណែកដ៏សំខាន់របស់ សួន ចាន់ណារ៉ូ។ ការចាកចេញរបស់ប្រធានក្រុមរូបនេះគឺជាការបាត់បង់ធនធានដ៏សំខាន់នៅក្នុងក្រុមបាល់ទះជម្រើសជាតិកម្ពុជា ប៉ុន្តែលោកសង្ឃឹមថា កីឡាករនឹងមិនទៅណាឆ្ងាយពីបាល់ទះឡើយ ហើយលោកបើកទ្វារចំហជានិច្ច សម្រាប់ សួន ចាន់ណារ៉ូ ទាំងកម្រិតជាកីឡាករ ឬក្រុមការងារគ្រូបង្វឹក។

លោកបានលើកឡើងថា ៖«កាលពីមុន នរណាក៏ចង់នៅពូលជាមួយកម្ពុជាដែរ។ ប្រទេសនៅតំបន់អាស៊ានចង់ចាប់ពូលនៅជាមួយកម្ពុជា ព្រោះគេងាយស្រួលឈ្នះ។ យើងស្ទើរតែអាចនិយាយបានថា ជិះយន្តហោះទៅប្រកួតបង្គ្រប់កិច្ច តែឥឡូវនេះអត់ទេ។ ឲ្យតែចាប់ពូលគឺគេពិចារណា ខ្លាចរអាហើយពីការនៅពូលជាមួយកម្ពុជា។ បច្ចុប្បន្ន យើងជាក្រុមលំដាប់កំពូលទាំង៤នៅតំបន់អាស៊ាន។ បាល់ទះកម្ពុជាយើងមិនមែនជាអ្នកជំងឺនៅអាស៊ានទៀតទេ»។

ជាការពិតណាស់ គិតចាប់តាំងពីឆ្នាំ២០២១ ក្រុមបាល់ទះជម្រើសជាតិកម្ពុជាបានបង្កការភ្ញាក់ផ្អើលនៅក្នុងតំបន់អាស៊ានតាមរយៈការប្រកួតផ្លូវការជាច្រើន។ ក្រុមកម្ពុជាបានយកឈ្នះ ហ្វីលីពីន ដែលជាម្ចាស់មេដាយប្រាក់កីឡាស៊ីហ្គេម ឆ្នាំ២០១៩ និងបានយកឈ្នះក្រុមខ្លាំងថៃដើម្បីបង្កើតប្រវត្តិសាស្ត្រដំបូងក្នុងការឈ្នះមេដាយសំរិទ្ធស៊ីហ្គេម ឆ្នាំ២០២១។

នៅស៊ីហ្គេម ឆ្នាំ២០២៣ កម្ពុជាបានបន្តឈ្នះ ហ្វីលីពិន និងឈ្នះ ថៃ ហើយ បានបង្កើតប្រវត្តិសាស្ត្រថ្មីបន្ថែមទៀតក្នុងការឈ្នះមេដាយប្រាក់កីឡាស៊ីហ្គេមជាលើកដំបូង។ កាលពីចុងឆ្នាំ២០២៣ កម្ពុជាបានបង្ហាញខ្លួនជាលើកដំបូងក្នុងព្រឹត្តិការណ៍កីឡាទ្វីបអាស៊ី នៅប្រទេសចិន បន្ទាប់ពីមិនធ្លាប់ចូលរួមសោះក្នុងរយៈពេលប្រមាណ៥០ឆ្នាំចុងក្រោយ។

ឆ្នាំ២០២៤ កម្ពុជាបានអភិវឌ្ឍខ្លួនទៅកាន់ក្រុមកំពូលទាំង៤ប្រចាំតំបន់អាស៊ាន បន្ទាប់ពីបានឈ្នះជើងឯកក្នុងការប្រកួត SEA V. League Challenge ឆ្នាំ២០២៤ ដោយបានយកឈ្នះ ម៉ាឡេស៊ី សិង្ហបុរី និង ឡាវ ដើម្បីឡើងទៅកាន់កម្រិត SEA V. League នៅឆ្នាំ២០២៥ ដែលមានឥណ្ឌូណេស៊ី ថៃ ហ្វីលីពីន និង កម្ពុជា ខណៈពាន SEA V. League Challenge ឆ្នាំ២០២៥ មាន វៀតណាម ម៉ាឡេស៊ី សិង្ហបុរី និងឡាវ។

និយាយរួម រហូតដល់ពេលនេះ មានតែក្រុមបាល់ទះជម្រើសជាតិឥណ្ឌូណេស៊ីតែមួយគត់នៅតំបន់អាស៊ាន ដែលក្រុមបាល់ទះជម្រើសជាតិកម្ពុជាមិនធ្លាប់ឈ្នះ។ ក្រៅពីនោះគឺកម្ពុជាធ្លាប់ឈ្នះអស់ហើយដូចជា ថៃ ហ្វីលីពីន វៀតណាម ម៉ាឡេស៊ី សិង្ហបុរី និងឡាវជាដើម។

សូមបញ្ជាក់ថា សួន ចាន់ណារ៉ូ បានចូលនិវត្តន៍ពីជម្រើសជាតិកម្ពុជាដោយសារសុខភាពមិនអំណោយផល ហើយអាយុក៏កាន់តែច្រើន។ ស្របពេលជាមួយគ្នានេះ លោកក៏ចង់ផ្តល់ឱកាសឲ្យយុវជនជំនាន់ក្រោយបន្តវេន។ តាមពិតទៅ រូបគេធ្លាប់បានប្រកាសចូលនិវត្តន៍ម្តងហើយ បន្ទាប់ពីឈ្នះមេដាយសំរិទ្ធស៊ីហ្គេម ឆ្នាំ២០២១ ប៉ុន្តែស៊ីហ្គេម ឆ្នាំ២០២៣ ក្រុមជម្រើសជាតិកម្ពុជាត្រូវការរូបគេដែលធ្វើឲ្យរូបគេលះបង់គ្រប់បែបយ៉ាងដើម្បីចូលរួមជាមួយក្រុមជម្រើសជាតិជាថ្មីនាពីរឆ្នាំចុងក្រោយ៕

អត្ថបទ៖ វីរបុត្រ

The post លោក អាំង សិរីពិសិដ្ឋ ថ្លែងថា បាល់ទះកម្ពុជាមិនមែនជាអ្នកជំងឺអាស៊ានទៀតទេ appeared first on Kampuchea Thmey Daily.

លោក អាំង សិរីពិសិដ្ឋ Archives - Kampuchea Thmey Daily

លោក អាំង សិរីពិសិដ្ឋ ៖«សួន ចាន់ណារ៉ូ អាច​ចូល​ជម្រើស​ជាតិវិញ បើចង់…»

លោក អាំង សិរីពិសិដ្ឋ បង្ហាញ​ការ​ហត់​នឿយ​​នឹង​​បាល់ទះ ចង់​យក​ពេល​វេលា​ដើម្បី​គ្រួសារ

លោក អាំង សិរីពិសិដ្ឋ ថ្លែង​ថា បាល់ទះកម្ពុជា​មិន​មែន​ជា​អ្នក​ជំងឺ​អាស៊ាន​ទៀត​ទេ

លោក អាំង សិរីពិសិដ្ឋ ៖«សួន ចាន់ណារ៉ូ អាចចូលជម្រើសជាតិវិញ បើចង់…»

លោក អាំង សិរីពិសិដ្ឋ បង្ហាញការហត់នឿយនឹងបាល់ទះ ចង់យកពេលវេលាដើម្បីគ្រួសារ

លោក អាំង សិរីពិសិដ្ឋ ថ្លែងថា បាល់ទះកម្ពុជាមិនមែនជាអ្នកជំងឺអាស៊ានទៀតទេ