លោកឧត្តមសេនីយ៍ត្រី អេង ហ៊ី បានអំពាវនាវដល់បុគ្គលទាំងឡាយណាដែលគ្មានសិទ្ធិ ប៉ុន្ដែបានលួចប្រើប្រាស់ឯកសណ្ឋាន សញ្ញាណប័ណ្ណ និងសញ្ញាសម្គាល់របស់កងរាជអាវុធហត្ថ ឲ្យបញ្ឈប់ជាបន្ទាន់ ខណៈកម្លាំងសមត្ថកិច្ចជំនាញកំពុងធ្វើការស្រាវជ្រាវ និងចាត់វិធានការលើករណីនេះ។

អាវុធហត្ថលើផ្ទៃប្រទេស បានអំពាវនាវដល់បុគ្គលដែលកំពុងប្រើប្រាស់ជាសាធារណៈ នូវស្លាកសញ្ញា សម្លៀកបំពាក់ ឯកសណ្ឋាន សញ្ញាណបណ្ណ សញ្ញាសម្គាល់ របស់កងរាជអាវុធហត្ថ ដោយគ្មានសិទ្ធិ តាមគ្រប់មធ្យោបាយ ត្រូវបញ្ឈប់ជាបន្ទាន់ កងរាជអាវុធហត្ថនឹងធ្វើការស្រាវជ្រាវ និងអនុវត្តច្បាប់ចំពោះបុគ្គលណាដែលបន្តល្មើសច្បាប់នេះ។

បើតាមលោកឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស បានឲ្យដឹងកាលពីថ្ងៃទី២៨កក្កដាម្សិលមិញនេះថា នៅថ្ងៃទី២៧ ខែកក្កដា ឆ្នាំ២០២៤ កងរាជអាវុធហត្ថ បានឃើញគណនីហ្វេសប៊ុកឈ្មោះ “វិចិត្រ ផល្លា” មានដាក់រូបស្លាកសញ្ញា “អហ”។ តាមការស្រាវជ្រាវរបស់ជំនាញកងរាជអាវុធហត្ថខេត្តកណ្តាលបានបញ្ជាក់ថា គណនីហ្វេសប៊ុកឈ្មោះ “វិចិត្រ ផល្លា” គឺបានក្លែងយករូបសញ្ញា “អហ” ទៅប្រើប្រាស់ធ្វើឱ្យមានការភាន់ច្រឡំ។

លោកឧត្តមសេនីយ៍ត្រី អេង ហ៊ី បានបញ្ជាក់ថា គណនីហ្វេសប៊ុកឈ្មោះ “វិចិត្រ ផល្លា” នេះ គឺមិនពាក់ព័ន្ធនឹងយោធិននៃកងរាជអាវុធហត្ថឡើយ។ ជុំវិញករណីនេះ កងរាជអាវុធហត្ថ បាននិងកំពុងធ្វើការស្រាវជ្រាវ ស៊ើបអង្កេតលើករណីបុគ្គលណាដែលយកស្លាកសញ្ញា “អហ” ទៅប្រើប្រាស់ធ្វើឱ្យមានការភាន់ច្រឡំ ឬក្នុងគោលបំណងណាមួយមកលើកងរាជអាវុធហត្ថ៕

អត្ថបទ៖ សំណាង

The post អ្នកនាំពាក្យ៖ អ្នកលួចប្រើឯកសណ្ឋាន និងសញ្ញាសម្គាល់របស់អាវុធហត្ថ ត្រូវបញ្ឈប់សកម្មភាពជាបន្ទាន់ appeared first on Kampuchea Thmey Daily.