លោក អ៊ិត សំហេង Archives - Kampuchea Thmey Daily

រដ្ឋមន្រ្តីការងារលើកទឹកចិត្តនិស្សិតកម្ពុជា សិក្សានៅបរទេសក្រោយចប់ត្រឡប់មកអភិវឌ្ឍប្រទេសវិញ

Sophal Tuon — Tue, 01 Aug 2023 10:54:21 +0000

លោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានលើកទឹកចិត្តដល់ក្រុមនិស្សិតកម្ពុជា ដែលទៅសិក្សា ឬទទួលបានអាហារូបករណ៍ទៅរៀននៅក្រៅប្រទេស វិលមកបម្រើប្រទេសជាតិវិញក្រោយពេលរៀបចប់។

ការលើកទឹកចិត្តនេះធ្វើឡើងក្នុងឱកាសដែលលោក ទទួលជួបសំណេះសំណាល និងផ្ដល់អនុសាសន៍ណែនាំដល់ក្រុមនិស្សិតកម្ពុជា២៤នាក់ ដែលទទួលអាហារូបករណ៍ពីរដ្ឋាភិបាលជប៉ុន ឆ្នាំ២០២៣ នៅទីស្ដីការក្រសួងការងារ នាព្រឹកថ្ងៃទី១ ខែសីហា ឆ្នាំ២០២៣។

លោក ចេង គឹមអូន ប្រធានប្រតិភូនិស្សិតកម្ពុជា ទទួលអាហារូបករណ៍ពីរដ្ឋាភិបាលជប៉ុនឆ្នាំ ២០២៣ បានឱ្យដឹងថា ក្នុងចំណោមនិស្សិតទាំង ២៤ នាក់នេះ គឺជាមន្ត្រីរាជការថ្នាក់ជាតិ និងថ្នាក់ក្រោមជាតិសរុប ១៤ស្ថាប័ន។ មុខជំនាញដែលត្រូវសិក្សានោះរួមមាន ៨ជំនាញរួមមាន៖ ១. អភិវឌ្ឍន៍ហេដ្ឋានរចនាសម្ពន្ធ, ២. អភិវឌ្ឍន៍វិស័យឯកជន, ៣. លើកកម្ពស់គុណអប់រំ ៤. អភិវឌ្ឍន៍កសិកម្ម និងអភិវឌ្ឍន៍ជនបទ, ៥. លើកកម្ពស់បរិស្ថានរស់នៅទីក្រុង, ៦. លើកម្ពស់ប្រព័ន្ធថែទាំសុខភាព និងសន្តិសុខសង្គម, ៧. លើកកម្ពស់មុខងាររដ្ឋបាលសាធារណៈ និង ៨. កសាងទំនាក់ទំនងអន្តរជាតិ។

ប្រធានប្រតិភូបានបន្តថា អាហារូបករណ៍របស់រដ្ឋាភិបាលជប៉ុនសម្រាប់មន្ត្រីរាជការកម្ពុជានេះ គឺជាគម្រោងជំនួយឥតសំណងដែលត្រូវបានអនុវត្តចាប់តាំងពីឆ្នាំ ២០០០ មកដល់ពេលបច្ចុប្បន្នមាននិស្សិតកម្ពុជាជាង ៥០០នាក់ ហើយ ដែលបានទទួលអាហារូបករណ៍នេះ។ កម្មវិធីនេះផ្ដោតលើទំនាក់ទំនងកិច្ចសហប្រតិបត្តិការទ្វេភាគីកម្ពុជា-ជប៉ុន ការអភិវឌ្ឍសមត្ថភាពមន្ត្រីរាជការ ការចូលរួមអភិវឌ្ឍន៍ និងបង្កើតផែនការអភិវឌ្ឍសេដ្ឋកិច្ចសង្គម ស្របតាមគោលនយោបាយរបស់រាជរដ្ឋាភិបាលកម្ពុជា។

លើសពីនេះ លោក អ៊ិត សំហេង បានបញ្ជាក់ឱ្យដឹងដែរថា កម្មវិធីអាហារូបករណ៍របស់រដ្ឋាភិបាលជប៉ុនសម្រាប់មន្ត្រីរាជការកម្ពុជា គឺជាជោគជ័យរបស់រាជរដ្ឋាភិបាលក្នុងការខិតខំពង្រឹងកិច្ចសហប្រតិបត្តិការជាមួយភាគីជប៉ុន ដើម្បីលើកកម្ពស់វិស័យអប់រំ អភិវឌ្ឍន៍ធនធានមនុស្ស។

លោករំពឹងថា និស្សិតកម្ពុជា នឹងខិតខំប្រឹងប្រែងប្រើប្រាស់ឱកាសមួយនេះជាផលប្រយោជន៍សម្រាប់ស្ថាប័នរបស់ខ្លួន ក៏ដូចជាសង្គមជាតិទាំងមូល។

អត្ថបទ៖ ផល ធារិត

The post រដ្ឋមន្រ្តីការងារលើកទឹកចិត្តនិស្សិតកម្ពុជា សិក្សានៅបរទេសក្រោយចប់ត្រឡប់មកអភិវឌ្ឍប្រទេសវិញ appeared first on Kampuchea Thmey Daily.

រដ្ឋមន្ត្រីក្រសួងការងារផ្ដល់អនុសាសន៍ ៤ ចំណុច ទប់ស្កាត់គ្រោះថ្នាក់នៅកន្លែងការងារ

Din Thary — Thu, 13 Jul 2023 04:02:18 +0000

លោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈក្នុងពិធីប្រកាសដាក់ឱ្យប្រើប្រាស់ផែនការមេលើកទី៣ ស្តីពីសុវត្ថិភាព និងសុខភាពការងារ ឆ្នាំ២០២៣-២០២៧ បានផ្តល់អនុសាសន៍ ៤ចំណុចបន្ថែម ដល់គ្រប់ភាគីពាក់ព័ន្ធ ដើម្បីចូលរួមទប់ស្កាត់គ្រោះថ្នាក់ការងារនៅកន្លែងធ្វើការ។

នាថ្ងៃទី១១ ខែកក្កដា ឆ្នាំ២០២៣នេះ លោកបណ្ឌិត អ៊ិត សំហេង មានប្រសាសន៍ថា ផែនការមេលើកទី ៣ ស្តីពីសុវត្ថិភាព និងសុខភាពការងារ បានកំណត់យុទ្ធសាស្ត្រចំនួន ៦ និងផែនការសកម្មភាពលម្អិតជាមួយនឹងយន្តការត្រួតពិនិត្យ និងវាយតម្លៃដែលជាក់លាក់អាចវាស់វែងបាន អាចអនុវត្តបានប្រាកដនិយម និងតាមពេលកំណត់ (SMART) ដើម្បីបង្កើនកិច្ចសហប្រតិបត្តិការ និងប្រសិទ្ធភាពក្នុងផ្នែកសុវត្ថិភាព និងសុខភាពការងារ ដែលជាប្រយោជន៍ដល់និយោជក និងកម្មករនិយោជិកគ្រប់វិស័យទាំងអស់ ដោយមិនផ្អែកទៅតាមវិស័យសេដ្ឋកិច្ច ទំហំនៃសហគ្រាស គ្រឹះស្ថាន ឬកន្លែងធ្វើការបែបណានោះទេ។

ក្នុងឱកាសដដែលនេះ ដើម្បីអាចទប់ស្កាត់គ្រោះថ្នាក់ការងារនៅកន្លែងធ្វើការ រដ្ឋមន្ត្រីក្រសួងការងារ បានផ្ដល់អនុសាស្ត្រ ៤ចំណុច ដល់គ្រប់ភាគីពាក់ព័ន្ធ ដូចខាងក្រោម៖

១.មន្ត្រីអធិការកិច្ចការងារត្រូវពង្រឹងការអនុវត្តច្បាប់ស្តីពីការងារ តាមរយៈការបង្កើនប្រសិទ្ធភាពនៃការចុះអធិការកិច្ចការងារ បន្តពង្រឹងយន្តការត្រីភាគី នៃគណៈកម្មាធិការជាតិសុខភាព និងសុវត្ថិភាពការងារ ដើម្បីឱ្យប្រសើរឡើងនូវលក្ខខណ្ឌការងាររបស់កម្មករនិយោជិក ពង្រឹងប្រព័ន្ធ គ្រប់គ្រងសុខភាព និងសុវត្ថិភាពការងារនៅគ្រប់កម្រិត

២.អនុញ្ញាតឱ្យបើកដំណើរការត្រួតពិនិត្យសុខភាពដល់កម្មករ/កម្មការិនី ដោយពេទ្យការងារឡើងវិញ ព្រោះជាយន្តការតែមួយក្នុងការអនុវត្តផែនការមេស្ដីពីសុវត្ថិភាព និងសុខភាពការងារ

៣.សម្រាប់ភាគី អ្នកគ្រប់គ្រងសហគ្រាស សូមស្នើឱ្យម្ចាស់សហគ្រាស គ្រឹះស្ថានពង្រឹងប្រព័ន្ធគ្រប់គ្រងសុវត្ថិភាព និងសុខភាពការងារ ហើយត្រូវប្រុងប្រយ័ត្នអំពីបរិយាការកម្ដៅនៅក្នុងអគារផលិតកម្ម សុវត្ថិភាពអគ្គិភ័យ ការប្រើប្រាស់សារធាតុគីមី និងការប្រើប្រាស់ប្រព័ន្ធឡចំហាយ ដោយត្រូវអនុវត្តឱ្យបានត្រឹមត្រូវ តាមលក្ខណៈបច្ចេកទេស

៤.សម្រាប់ភាគីកម្មករនិយោជិក ត្រូវយកចិត្តទុកដាក់ក្នុងការផ្ដល់ព័ត៌មានដល់អ្នកគ្រប់គ្រងអំពីហានិភ័យ និងគ្រោះថ្នាក់ដែលអាចកើតមាននៅកន្លែងធ្វើការ, ស្វែងយល់អំពីហានិភ័យ និងគ្រោះថ្នាក់ដែលអាចកើតមាន និងវិធានការការពារខ្លួនពីអ្នកគ្រប់គ្រង ឬមន្ត្រីសុវត្ថិភាពការងារ បង្កើនការយល់ដឹងអំពីព័ត៌មានស្តីពីសុខភាព និងសុវត្ថិភាពដែលបានបិទផ្សាយនៅក្នុងសហគ្រាស គ្រឹះស្ថាន

ទន្ទឹមនេះ លោក អ៊ិត សំហេង ក៏បានសង្ឃឹមយ៉ាងមុតមាំដែរថា ផែនការមេលើកទី៣ ស្តីពីសុវត្ថិភាព និងសុខភាពការងារ ឆ្នាំ២០២៣-២០២៧ នេះ នឹងត្រូវបានប្រើប្រាស់យ៉ាងទូលំទូលាយ ហើយកាន់តែងាយស្រួលគ្រប់ភាគីពាក់ព័ន្ធ ក្នុងការប្រើប្រាស់ផែនការសកម្មភាពលម្អិតរបស់ខ្លួន សម្រាប់ការលើកកម្ពស់ និងកែលម្អការគ្រប់គ្រងប្រព័ន្ធសុវត្ថិភាព និងសុខភាពការងារឱ្យកាន់តែមានប្រសិទ្ធភាព។ ព្រមទាំង ដើម្បីធានាឱ្យបាននូវកន្លែងធ្វើការ មានបរិយាកាសការងារល្អ រួមជាមួយនឹងប្រព័ន្ធគ្រប់គ្រងសុវត្ថិភាព និងសុខភាពការងារ ដែលអាចជួយជំរុញផលិតភាព និងកសាងវប្បធម៌សុវត្ថិភាព និងសុខភាពការងារនៅគ្រប់កន្លែងធ្វើការនាពេលអនាគត៕

The post រដ្ឋមន្ត្រីក្រសួងការងារផ្ដល់អនុសាសន៍ ៤ ចំណុច ទប់ស្កាត់គ្រោះថ្នាក់នៅកន្លែងការងារ appeared first on Kampuchea Thmey Daily.

ប.ស.ស ប្រមូលភាគទានផ្នែកប្រាក់សោធនពីនិយោជក និងកម្មករបានជិត៧០លានដុល្លារ

Sokhom Khon — Sun, 09 Jul 2023 23:49:37 +0000

បេឡារបបសន្តិសុខសង្គម (ប.ស.ស)បានប្រមូលភាគទានរបបសន្តិសុខសង្គមផ្នែកប្រាក់សោធនពីនិយោជក និងកម្មករនិយោជិតបានប្រមាណជិត៧០លានដុល្លារអាមេរិក។

លោកបណ្ឌិត អ៊ិត សំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ បានឱ្យដឹងថា របបសន្តិសុខសង្គមផ្នែកប្រាក់សោធនត្រូវបានរារដ្ឋាភិបាលអនុវត្តនៅខែតុលា ឆ្នាំ២០២២ ហើយរហូតមកដល់ដើមឆ្នាំ២០២៣នេះបានចុះបញ្ជីសហគ្រាសគ្រឹះស្ថានចំនួន១៥៥៤៤មានកម្មករនិយោជិរ២៦២៩៥៥៣នាក់ ដោយប្រមូលភាគទានរបបសន្តិសុខសង្គមផ្នែកប្រាក់សោធនពីនិយោជក និងកម្មករជិតចំនួន២៧៩ពាន់២៧៨លានរៀល ស្មើនឹងប្រមាណ៦៨លាន៩៤០ពាន់ដុល្លារអាមេរិក។

ការបង់ប្រាក់ភាគទានរបបសន្តិសុខសង្គមផ្នែកប្រាក់សោធនពីនិយោជក និងកម្មករជិតនេះតម្រូវឱ្យបង់ចំនួន៤ភាគរយនៃចំនួនប្រាក់ឈ្មួលរបស់កម្មករនិយោជិតក្នុងនោះនិយោជកត្រូវបង់២ភាគរយនិងកម្មករនិយោជិតបង់២ភាគរយ។ នៅពេលកម្មករនិងយោជិតដល់អាយុ៦០ឆ្នាំដែលត្រូវចូលនិវត្តនឹងទទួលបានប្រាក់សោធនដូចមន្ត្រីរាជការបម្រើការងារនៅតាមស្ថានប័នរដ្ឋដែរទៅតាមប្រាក់ឈ្មួលដែលម្នាក់ៗទទួលបាន។

លោករដ្ឋមន្ត្រីបានបន្តថា រហូតមកដល់ពេលនេះរាជរដ្ឋាភិបាលបានអនុវត្តរបបសន្តិសុខសង្គមចំនួន៣រួមមានទី១, របបសន្តិសុខសង្គមផ្នែកហានិភ័យការងារដែលបានអនុវត្តនៅខែវិច្ឆិកាឆ្នាំ២០០៨សម្រាប់វិស័ឯកជនដែលបានចុះបញ្ជិសហគ្រាសគ្រឹះស្ថានចំនួន២២៩៣១មានកម្មករនិយោជិត២២៩៩៨០២នាក់និងវិស័យសាធារណៈអនុវត្តនៅខែមករាឆ្នាំ២០២១ ដែលបានចុះបញ្ជីស្ថាប័នចំនួន៣៥មានសមាជិក២២៩៤១៣នាក់។ទី២របបសន្តិសុខសង្គមផ្នែកថែទាំសុខភាពដែលបានអនុវត្តនៅខែកញ្ញាឆ្នាំ២០១៦ដោយមានចុះបញ្ជីសហគ្រាសគ្រឹះស្ថានចំនួន២២៩៣១មានកម្មកនិយោជិត២២៩
៩៨០២នាក់សម្រាប់វិស័យេកជននិងវិស័យសាធាររណៈអនុវត្តនៅខែមករាឆ្នាំ២០១៨បានចុះបញ្ជីស្ថាប័នចំនួន៣៩មានសមាជិកចំនួន៤៣៩២៤៣នាក់និងទី៣របបសន្តិសុខសង្គមផ្នែកប្រាក់សោធន៕

អត្ថបទ៖ សំអឿន

The post ប.ស.ស ប្រមូលភាគទានផ្នែកប្រាក់សោធនពីនិយោជក និងកម្មករបានជិត៧០លានដុល្លារ appeared first on Kampuchea Thmey Daily.

រដ្ឋាភិបាលចំណាយថវិកាជិត ៣០លានដុល្លារ ដល់កម្មការិនីសម្រាលកូនជាង ៣៥ម៉ឺននាក់ នៅទូទាំងប្រទេស

Sophal Tuon — Sat, 08 Jul 2023 09:26:38 +0000

លោក បណ្ឌិត អ៊ិត សំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈបានឱ្យដឹងថា រហូតមកដល់ពេលនេះរដ្ឋាភិបាលបានចំណាយថវិកាប្រមាណ១១៤៩៥៥៦០០០០០រៀល ឬប្រហាក់ប្រហែល២៨៧៣៨៩០០ដុល្លារដល់កម្មការិនីសម្រាលកូនចំនួន៣៥៩៩១៤នាក់នៅទូទាំងប្រទេសក្នុងនោះមានកូនចំនួន៣៦២៣៨៩នាក់។

ការផ្តល់ជូននូវប្រាក់ឧបត្ថម្ភដល់ស្ត្រីជាកម្មការិនីសម្រាលកូនខាងលើគឺជាការអនុវត្តកម្មវិធីពិសេសមួយរបស់រាជរដ្ឋាភិបាលកម្ពុជាដើម្បីចូលរួមលើកកម្ពស់សុខុមាលភាពនិងជីវភាពរស់នៅរបស់បងប្អូនកម្មករនិយោជិតក៏ដូចជារួមចំណែកដោះស្រាយនូវទុក្ខលំបាកការខ្វះខាតក្នុងអំឡុងពេលសម្រាលមាតុភាព។ ក្នុងនោះស្ត្រីសម្រាលបានកូនម្នាក់ទទួលបាន ៤០ ម៉ឺនរៀល សម្រាលបានកូនភ្លោះ២ ទទួលបាន ៨០ម៉ឺនរៀលនិងសម្រាលបានកូនភ្លោះ ៣ ទទួលបានប្រាក់ឧបត្ថម្ភចំនួន ១លាន ២សែនរៀលដែលបើកផ្ដល់ជូនតាមរយៈ បេឡាជាតិសន្តិសុខសង្គម (ប.ស.ស.)ជាប្រតិបត្តិករផ្ទាល់។

ជាមួយគ្នានេះដែរ សម្រាប់អ្នកដែលសម្រាលបានកូនភ្លោះ ៣ នាក់ ក៏ទទួលបានប្រាក់ឧបត្ថម្ភពិសេសបន្ថែមពី សម្តេច អគ្គមហាសេនាបតីតេជោ ហ៊ុនសែន និងសម្ដេចកិត្តិព្រឹទ្ធបណ្ឌិត ចំនួន ៥ លានរៀលទៀតផងដែរ។

ថ្លែងនៅក្នុងឱកាសសម្ពោធអគារការិយាល័យកណ្តាលរបស់ប.ស.ស កាលពីពេលថ្មីៗនេះ លោករដ្ឋមន្ត្រីបានលើកឡើងថា សម្តេចនាយករដ្ឋមន្ត្រីបានសម្រេចផ្តល់អត្ថប្រយោជន៍បន្ថែមពីកម្មវិធីឧបត្ថម្ភសាច់ប្រាក់ជូនកម្មរនិយោជិតស្ត្រីមានផ្ទៃពោះ និងកុមារក្រោមអាយុ២ឆ្នាំចាប់ពីខែ សីហាឆ្នាំ២០២៣តទៅ ក្នុងនោះ មុនពេលសម្រាលកូនទទួលបានប្រាក់ឧបត្ថម្ភចំនួន៤លើកដោយ១លើក ទទួលបានថវិកា៨ម៉ឺនរៀល។ ពេលសម្រាលកូនទទួលបានប្រាក់ឧបត្ថម្ភដោយកូនចំនួន១ទទួលបានថវិកា៨០ម៉ឺនរៀល កូនភ្លោះពីរទទួលបាន១លាន២សែនរៀលនិងកូនភ្លោះបីទទួលបាន១លាន៦សែនរៀល និងទទួលបានការឧបត្ថម្ភពិសេសបន្ថែមពី សម្តេច អគ្គមហាសេនាបតីតេជោ ហ៊ុនសែន និងសម្ដេចកិត្តិព្រឹទ្ធបណ្ឌិត ចំនួន ៥ លានរៀលទៀតផងដែរ។

លោករដ្ឋមន្ត្រីបានបន្តទៀតថា ក្រោយពេលសម្រាលកូនទទួលបានប្រាក់ឧបត្ថម្ភចំនួន១០លើកដោយ១លើកទទួលបាន៨ម៉ឺនរៀលក្នុងនោះ៣លើក នៅពេលទៅទទួលសេវាពិនិត្យសុខភាពក្រោយពេលសម្រាលកូននិង៧លើកទៀត នៅពេលយកកូនទៅទទួលថ្នាំបង្ការរហូតដល់អាយុ២ឆ្នាំ៕

អត្ថបទ ៖ សំអឿន

The post រដ្ឋាភិបាលចំណាយថវិកាជិត ៣០លានដុល្លារ ដល់កម្មការិនីសម្រាលកូនជាង ៣៥ម៉ឺននាក់ នៅទូទាំងប្រទេស appeared first on Kampuchea Thmey Daily.

រដ្ឋមន្ត្រីការងារ អំពាវនាវ យុវជន ងាកមកទទួលយកជំនាញបច្ចេកទេស និងវិជ្ជាជីវៈ

Ken Malis — Fri, 16 Jun 2023 02:37:46 +0000

រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បន្តអំពាវនាវដល់យុវជនឲ្យងាកមកទទួលយកជំនាញបច្ចេកទេស និងវិជ្ជាជីវៈ ដែលជាជម្រើសដ៏ល្អមួយសម្រាប់ស្វែងរកការងារ និងបង្កើតមុខរបរដោយខ្លួនឯង។

លោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានលើកឡើងថា សហគមន៍ គ្រួសារ សិស្សានុសិស្ស យុវជន យុវនារី ជនងាយរងគ្រោះ និងសាធារណជនងាកមកចាប់អារម្មណ៍ និងទទួលយកជំនាញបច្ចេកទេស និងវិជ្ជាជីវៈ ដែលជាជម្រើសដ៏ល្អមួយសម្រាប់ការស្វែងរកឱកាសការងារ និងការបង្កើតមុខរបរដោយខ្លួនឯង ដើម្បីជីវភាពផ្ទាល់ខ្លួនផង និងរួមចំណែកក្នុងការអភិវឌ្ឍសេដ្ឋកិច្ចជាតិផង។ ការថ្លែងអំពាវនាវនេះ ធ្វើឡើងក្នុង ពិធីអបអរសាទរទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ លើកទី៦ ក្រោមប្រធានបទ “TVET ផ្ដល់ជំនាញ និងការងារសមរម្យ” នាថ្ងៃទី១៥ ខែមិថុនា ឆ្នាំ២០២៣ នៅសាលមហោស្របកោះពេជ្រ រាជធានីភ្នំពេញ។

លោក អ៊ិត សំហេង មានប្រសាសន៍បន្តថា បច្ចុប្បន្នគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ របស់ក្រសួងការងារ និងបណ្តុះបណ្តាលវិជ្ជាជីវៈ បានចុះអនុស្សរណៈយោគយល់គ្នាជាមួយវិស័យឯកជនបានចំនួន ២៣០ ក្រុមហ៊ុន ដើម្បីសហការផ្ដល់ការបណ្តុះបណ្តាលជំនាញតាមតម្រូវការរបស់ក្រុមហ៊ុន ដោយធានាថាសិក្ខាកាម សិស្ស និស្សិត ដែលបានបញ្ចប់ការសិក្សាទទួលបានការងារល្អនៅក្រុមហ៊ុនទាំងនេះ។

ទន្ទឹមនឹងនោះ ក្រសួងការងារ និងបណ្តុះបណ្តាលវិជ្ជាជីវៈ និងក្រសួង/ស្ថាប័នពាក់ព័ន្ធត្រៀមរៀបចំអនុវត្តផែនការបណ្តុះបណ្តាលជំនាញវិជ្ជាជីវៈដល់យុវជននៅគ្រួសារក្រីក្រ និងងាយរងគ្រោះ ទូទាំងប្រទេសចំនួន ១លាន ៥សែននាក់ ដោយរដ្ឋធានាផ្តល់ប្រាក់ឧបត្ថម្ភចាប់ពីឆ្នាំ២០២៣ នេះតទៅ។

គួរបញ្ជាក់ថា ក្នុងឆ្នាំ២០២២ មានសិក្ខាកាម សិស្ស និស្សិតបានបញ្ចប់ការសិក្សាគ្រប់កម្រិតចំនួន ៨៩ ៨៧៨ នាក់ ហើយសិក្ខាកាម សិស្ស និស្សិតដែលបានបញ្ចប់ការសិក្សា ទទួលបានការងារធ្វើស្ទើរទាំងអស់ ដោយទទួលបានប្រាក់ឈ្នួលសមរម្យច្រើនជាងកម្មករនិយោជិតដែលមិនមានជំនាញ៕

The post រដ្ឋមន្ត្រីការងារ អំពាវនាវ យុវជន ងាកមកទទួលយកជំនាញបច្ចេកទេស និងវិជ្ជាជីវៈ appeared first on Kampuchea Thmey Daily.

កម្ពុជា មិនទាន់មានកិច្ចសហការនាំពលករទៅធ្វើការនៅអូស្ត្រាលី កុំចាញ់ឃោសនាជនឆបោក

Sophal Tuon — Tue, 06 Jun 2023 01:43:20 +0000

ភាគីកម្ពុជា និងភាគីអូស្ត្រាលីក៏បានឯកភាពលើកិច្ចសហការទប់ស្កាត់ការបោកប្រាស់ទាក់ទាញពលករពីកម្ពុជាឱ្យទៅធ្វើការនៅប្រទេសអូស្ត្រាលីផ្នែកកសិកម្ម និងនេសាទ។

លោក អ៊ិត សំហេង បានលើកឡើងថា កន្លងមកក្រសួងការងារ និងបណ្តុះបណ្តាលវិជ្ជាជីវ: បានចេញសេចក្ដីជូនដំណឹងរួចហើយ អំពាវនាវសូមឱ្យប្រជាពលរដ្ឋប្រុងប្រយ័ត្នអំពើឆបោកដែលជនទុច្ចរិតធានាផ្តល់ឱកាសការងារនៅប្រទេសអូស្រ្តាលី ដោយឱ្យប្រជាពលរដ្ឋបង់ប្រាក់ជាមុន ដែលរហូតមកដល់ពេលនេះ កម្ពុជា និងអូស្រ្តាលី មិនទាន់មានកិច្ចសហប្រតិបត្តិការលើការបញ្ជូនពលករកម្ពុជាឱ្យទៅធ្វើការនៅប្រទេសអូស្ត្រាលីនៅឡើយទេ។

លោករដ្ឋមន្រ្តី បានក្រើនរំលឹក និងអំពាវនាវសារជាថ្មីដល់ប្រជាពលរដ្ឋកម្ពុជា សូមកុំចាញ់បោកពួកមេខ្យល់ទាំងនោះ ហើយសូមចូលរួមសហការផ្តល់ព័ត៌មានដល់ក្រសួង បើសិនមានភ្នាក់ងារជ្រើសរើសណាមួយធ្វើការជ្រើសរើស និងបញ្ជូនពលករធ្វើការនៅប្រទេសអូស្ត្រាលី។

ការលើកឡើងរបស់លោករដ្ឋមន្រ្តី អ៊ិត សំហេង បែបនេះ នៅក្នុងជំនួបជាមួយលោក ចាស្ទីន ខេវីន វ្យ៉ាត់ (Justin Kevin Whyatt) ឯកអគ្គរដ្ឋទូតអូស្ត្រាលីថ្មីប្រចាំកម្ពុជា កាលពីថ្ងៃទី ០៥ ខែ មិថុនា។

នៅក្នុងជំនួបនេះ លោក អ៊ិត សំហេង បានវាយតម្លៃខ្ពស់ចំពោះរដ្ឋាភិបាលអូស្រ្តាលី ដែលបានផ្តល់នូវជំនួយជាថវិកា និងបច្ចេកទេសដល់កម្ពុជា តាមរយៈគម្រោង ILO-Triangle, ASEAN-ACT, គម្រោងទប់ស្កាត់ការប្រើប្រាស់សារធាតុអាសបេស្តុសនៅកម្ពុជា, ការផ្តល់ជំនួយបច្ចេកទេសក្នុងការដំណើរការដោះស្រាយវិវាទការងាររួមពី Fair Work Commission, និងការផ្តល់អាហារូបករណ៍ដល់សិស្ស-និស្សិតកម្ពុជា ជាដើម។

ភាគីទាំងពីរបានពិភាក្សាលើការបង្កើតតុលាការការងារ ដើម្បីធ្វើឱ្យមានភាពប្រសើរឡើងលើការដោះស្រាយទំនាស់ ឬការមិនចុះសម្រុងគ្នារវាងនិយោជក និងកម្មករនិយោជិត។ ត្រង់ចំណុចនេះ លោករដ្ឋមន្ត្រីបានលើកឡើងថា ចំពោះការដោះស្រាយបញ្ហារបស់និយោជក និងកម្មករនិយោជិត កម្ពុជាបានបង្កើតក្រុមប្រឹក្សាអាជ្ញាកណ្ដាលមួយ ហៅកាត់ថា AC រួចមកហើយ ដើម្បីសម្រួលការដោះស្រាយទំនាស់វិវាទក្រៅប្រព័ន្ធតុលការ ហើយរាជរដ្ឋាភិបាលបានដាក់ឱ្យប្រើប្រាស់ច្បាប់ដោះស្រាយវិវាទក្រៅប្រព័ន្ធតុលាការ។

លោក ចាស្ទីន ខេវីន វ្យ៉ាត់ (Justin Kevin Whyatt) ឯកអគ្គរដ្ឋទូតអូស្ត្រាលីថ្មីប្រចាំកម្ពុជា មានការភ្ញាក់ផ្អើល និងបានកោតសរសើរចំពោះការរីកចម្រើនរបស់ប្រទេសកម្ពុជា ក្នុងរយៈពេលដ៏ខ្លី ពិសេសលើវិស័យការងារ និងបណ្ដុះបណ្ដាលវិជ្ជាជីវៈ ក៏បន្តការអភិវឌ្ឍគួរឱ្យកត់សម្គាល់ផងដែរ៕

The post កម្ពុជា មិនទាន់មានកិច្ចសហការនាំពលករទៅធ្វើការនៅអូស្ត្រាលី កុំចាញ់ឃោសនាជនឆបោក appeared first on Kampuchea Thmey Daily.

ខេត្តចំនួនបីបានបង្កើតប្រាក់ចំណូលដល់ពលរដ្ឋរាប់សិបម៉ឺននាក់ តាមរយៈវិស័យរោងចក្រ

Sophal Tuon — Tue, 06 Jun 2023 01:00:00 +0000

ខេត្តចំនួនបី រួមមាន ខេត្តកណ្តាល កំពង់ឆ្នាំង និងខេត្តកំពង់ស្ពឺ បាននិងកំពុងផ្តល់ប្រាក់ចំណូលដល់ពលរដ្ឋខ្មែររាប់សិបម៉ឺនាក់ តាមរយៈការបង្កើតការងារក្នុងវិស័យរោងចក្រកាត់ដេរសម្លៀកបំពាក់ និងស្បែកជើង ផលិតឧបករណ៍ធ្វើដំណើរ និងផ្នែកដំឡើងសូឡា ជាដើម ។

លោក អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងកាលពីពេលថ្មីៗនេះថា ខេត្តចំនួនបីរបស់កម្ពុជា មានសក្តានុពលខ្លាំងទៅលើវិស័យរោងចក្រកាត់ដេរ ក្នុងនោះ រួមមាន ខេត្តកណ្ដាល ខេត្តកំពង់ស្ពឺ និងខេត្តកំពង់ឆ្នាំង។

បើតាមលោករដ្ឋមន្រ្តី នៅក្នុងចំណោមខេត្តទាំងបីមាន មានរោងកច្រសរុបចំនួន ៣៨២ រោងចក្រ និងមានកម្មកររហូតដល់ ៣៣ម៉ឺននាក់ គិតត្រឹមឆ្នាំ ២០២៣។ ក្នុងនោះ ខេត្តកណ្ដាលមាន ១៧១ រោងចក្រ មានកម្មករសរុប ១៣ម៉ឺននាក់ ខេត្តកំពង់ស្ពឺមាន ១៩១ រោងចក្រ មានកម្មករ ១៥ម៉ឺននាក់ និងខេត្តកំពង់ឆ្នាំងមាន ២០រោងចក្រ មានកម្មករ ៥ម៉ឺននាក់។

លោក អ៊ិត សំហេង បានបញ្ជាក់ថា រាល់ផលិតផលឧស្សាហកម្មទាំងអស់ ដែលកម្ពុជាផលិតបាន គឺនាំចេញទៅទីផ្សារអន្តរជាតិ ជាពិសេសនាំចេញទៅកាន់សហគមន៍អឺរ៉ុប សហរដ្ឋអាមេរិក ប្រទេសកាណាដា និងប្រទេសជប៉ុន ជាដើម។

តាមរយៈវិស័យរោងចក្រនេះ បានរួមចំណែកបង្កើតការងារដល់ពលរដ្ឋក្នុងប្រទេស ជំនួសការធ្វើចំណាកស្រុកដោយប្រថុយប្រថានបានរាប់ម៉ឺននាក់។

សូមបញ្ជាក់ថា កម្ពុជា បាននាំចេញសម្លៀកបំពាក់ និងគ្រឿងបន្ទាប់បន្សំ ដែលធ្វើពីក្រណាត់ មានតម្លៃជាង ១.៣ពាន់លានដុល្លារ រយៈពេល៤ខែ ចាប់ពីខែមករា ដល់ខែ មេសា ឆ្នាំ ២០២៣ ពោលគឺមានការធ្លាក់ចុះ ២៨.៥ភាគរយ បើធៀបនឹងរយៈពេលដូចគ្នាកាលពីឆ្នាំ ២០២២ មានតម្លៃ ១.៩ ពាន់លានដុល្លារ។ នេះបើតាមទិន្នន័យបណ្តោះអាសន្នរបស់អគ្គនាយកដ្ឋានគយ និងរដ្ឋាករកម្ពុជា៕

អត្ថបទ ៖ ផល ធារិត

The post ខេត្តចំនួនបីបានបង្កើតប្រាក់ចំណូលដល់ពលរដ្ឋរាប់សិបម៉ឺននាក់ តាមរយៈវិស័យរោងចក្រ appeared first on Kampuchea Thmey Daily.

រដ្ឋមន្ត្រីការងារ ៖ ស្ថានភាពទីផ្សារការងារនៅកម្ពុជារឹងមាំ និងមានកំណើនខ្ពស់

Sophal Tuon — Thu, 01 Jun 2023 09:32:00 +0000

លោក បណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានមានប្រសាសន៍ថា ស្ថានភាពទីផ្សារការងារនៅកម្ពុជា មានភាពរឹងមាំដោយរក្សាបាននូវអត្រាមានការងារធ្វើខ្ពស់ប្រមាណ ៩៩,៣% នៃកម្លាំងពលកម្មសរុបហើយជាការងារក្នុងវិស័យឧស្សាហកម្មបែបទំនើប។

លោក រដ្ឋមន្ត្រីបានបន្តថា កំណើនអត្រាការងារបច្ចុប្បន្នភាគច្រើន នៅក្នុងវិស័យឧស្សាហកម្មបែបទំនើប មានតម្លៃបន្ថែម និងផលិតភាពខ្ពស់ តម្រូវការប្រើប្រាស់កម្លាំងពលកម្មមានជំនាញជាងមុន លក្ខខណ្ឌការងារល្អ និងទទួលបានប្រាក់ចំណូលកាន់តែប្រសើរជាងមុន។

លោករដ្ឋមន្ត្រីបានបន្តទៀតថា ក្រសួងការងារបានយកចិត្តទុកដាក់ខ្ពស់ក្នុងការអភិវឌ្ឍទីផ្សារការងារ ដើម្បីឱ្យឆ្លើយតបនឹងបម្រែបម្រួលរចនាសម្ព័ន្ធសេដ្ឋកិច្ច-សង្គម និងបច្ចេកវិទ្យា ក៏ដូចជាដើម្បីជំរុញកំណើនសេដ្ឋកិច្ច និងពង្រឹងសុខុមាលភាពសង្គម តាមរយៈការចូលរួមយ៉ាងសកម្មក្នុងការអនុវត្តយុទ្ធសាស្ត្រ និងគោលនយោបាយជាតិសំខាន់ៗមួយចំនួន ដែលរាជរដ្ឋាភិបាលបានដាក់ចេញ។

ជាមួយគ្នានេះដែរ ក្រសួងបានបន្តបង្កើនឱកាសការងារក្នុងប្រទេស តាមរយៈទីភ្នាក់ងារជាតិមុខរបរ និងការងារ (NEA) ដោយបានផ្សព្វផ្សាយព័ត៌មានទីផ្សារការងារ ពង្រីកការផ្តល់ប្រឹក្សាយោបល់ និងមគ្គុទេសក៍ការងារ, រៀបចំវេទិការការងារ និងបណ្តុះបណ្តាលជំនាញត្រៀមចូលទីផ្សារការងារជាដើម ហើយប្រជាជនក៏មានជម្រើសក្នុងការស្វែងរកឱកាសការងារក្រៅប្រទេសស្របច្បាប់ ដែលមានលក្ខខណ្ឌការងារល្អ និងប្រាក់ចំណូលខ្ពស់ផងដែរ។

ទន្ទឹមនឹងនេះក្រសួងកំពុងខិតខំប្រឹងប្រែងក្នុងការលើកកម្ពស់លក្ខខណ្ឌការងារ និងសុខដុមនីយកម្មនៃទំនាក់ទំនងវិជ្ជាជីវៈឱ្យកាន់តែប្រសើរឡើង ព្រមទាំងអនុវត្តបានយ៉ាងជោគជ័យនូវអនុសាសន៍ទាំង១០ចំណុចរបស់ សម្តេចតេជោនាយករដ្ឋមន្រ្តី ក្នុងពេលចុះជួបសំណេះសំណាលផ្ទាល់ជាមួយបងប្អូនកម្មករនិយោជិតកន្លងមក។

លោករដ្ឋមន្ត្រីបានបន្ថែមថាក្រៅពីនេះ ក្រសួងការងារនៅតែបន្តលើកកម្ពស់សុវត្ថិភាពការងារ និងសុខភាពកម្មករនិយោជិត តាមរយៈការរៀបចំច្បាប់ ការកែលម្អគុណភាពមធ្យោបាយដឹកជញ្ជូនឱ្យកាន់តែមានសុវត្ថិភាព និងតាមស្តង់ដារបច្ចេកទេស ជំរុញការចូលរួមរបស់និយោជកក្នុងការគាំទ្រដល់ទារកដ្ឋានសហគមន៍ ដែលនៅក្បែរតំបន់រោងចក្រជាដើម។

តាមរយៈបាឋកថាប្រធានបទស្តីពី «ទីផ្សារការងារ និងការអភិវឌ្ឍសេដ្ឋកិច្ច» របស់លោក អ៊ិត សំហេង នៅថ្ងៃទី០១មិថុនា នៅសាលាភូមិន្ទរដ្ឋបាល មានខ្លឹមសារថា រាជរដ្ឋាភិបាលបាននិងកំពុងជំរុញការអនុវត្តក្របខណ្ឌគោលនយោបាយជាតិគាំពារសង្គម ឆ្នាំ២០១៦-២០២៥ ដែលមានភាពគ្រប់ជ្រុងជ្រោយ ស្របតាមដំណាក់កាល និងកម្រិតនៃការអភិវឌ្ឍប្រទេស ដែលបាននិងកំពុងអនុវត្ត។ ការអនុវត្តច្បាប់ស្តីពីរបបសន្តិសុខសង្គម ឆ្នាំ២០១៩ បានធ្វើឱ្យប្រព័ន្ធសន្តិសុខសង្គមកម្ពុជា កាន់តែមានលក្ខណៈពេញលេញ។ មកទល់ពេលនេះ កម្ពុជាកំពុងអនុវត្តរបបសន្តិសុខសង្គមផ្នែកហានិភ័យការងារ ផ្នែកថែទាំសុខភាព និងផ្នែកប្រាក់សោធនសម្រាប់កម្មករនិយោជិតដែលស្ថិតនៅក្រោមបទបញ្ញត្តិនៃច្បាប់ស្តីពីការងារ និងមន្រ្តីសាធារណៈ។

ចំណែកវិស័យអប់រំបណ្ដុះបណ្ដាលបច្ចេកទេស និងវិជ្ជាជីវៈ ក្រសួងបានអនុវត្តកម្មវិធីបណ្តុះបណ្តាលជំនាញ និងខិតខំអនុវត្តកម្មវិធីនេះដោយមានភាពបទបែន ក្នុងគោលបំណងបង្កើនមូលធនមនុស្ស និងកម្លាំងពលកម្មជំនាញឱ្យបានកាន់តែច្រើន ដើម្បីអាចឆ្លើយតបនឹងតម្រូវការទីផ្សារការងារបច្ចុប្បន្ន និងអនាគត។

ជាងនេះទៀតក្រសួងនឹងចូលរួមជាមួយក្រសួង-ស្ថាប័នផ្សេងទៀតដើម្បីបណ្តុះបណ្តាលជំនាញដល់យុវជនចំនួន ១,៥លាននាក់ ដោយមិនគិតថ្លៃ និងទទួលបានប្រាក់ឧបត្ថម្ភ ក្នុងអំឡុងពេលបណ្តុះបណ្តាល ស្របតាមអនុសាសន៍ដ៏ខ្ពង់ខ្ពស់របស់ សម្តេចតេជោនាយករដ្ឋមន្ត្រី៕

អត្ថបទ៖ សំអឿន

The post រដ្ឋមន្ត្រីការងារ ៖ ស្ថានភាពទីផ្សារការងារនៅកម្ពុជារឹងមាំ និងមានកំណើនខ្ពស់ appeared first on Kampuchea Thmey Daily.

លោក អ៊ិត សំហេង Archives - Kampuchea Thmey Daily

រដ្ឋមន្រ្តីការងារលើកទឹកចិត្តនិស្សិតកម្ពុជា សិក្សានៅបរទេស​ក្រោយចប់ត្រឡប់​មកអភិវឌ្ឍប្រទេសវិញ

រដ្ឋមន្ត្រីក្រសួងការងារផ្ដល់អនុសាសន៍ ៤ ចំណុច ទប់ស្កាត់​គ្រោះថ្នាក់នៅ​កន្លែងការងារ