លោក​ ប៉េស្កូវ បាន​លើក​ឡើង​នៅក្នុងបទសម្ភាសន៍ជាមួយ​ទូរទស្សន៍ Vesti News របស់​រុស្ស៊ី​​ ថា ប្រទេសរុស្ស៊ីកំពុងត្រូវ​បានគេបង្ហាញរូបភាពឲ្យក្លាយទៅជា «សត្រូវខាងក្រៅគំរូ» ក្នុងគោលបំណង បង្កើន​​ការ​​ឃោសនា​ផ្សព្វផ្សាយ​បង្ខូច​ឈ្មោះ​​។ នេះបើតាមការចុះផ្សាយរបស់ទីភ្នាក់ងារសារព័ត៌មានរុស្ស៊ី Tass។

លោក ប៉េស្កូវ​ បានសង្កត់ធ្ងន់ថា រុស្ស៊ីមិនអាចជាការគំរាមកំហែងចម្បងចំពោះអឺរ៉ុប​នោះ​ទេ ពីព្រោះរុស្ស៊ី មិនថា អ្នកណានិយាយអ្វីក៏ដោយ ក្នុងនាមជាប្រទេសអឺរ៉ាស៊ី នៅតែជាផ្នែកសំខាន់មួយនៃអឺរ៉ុប។ លោកក៏បានលើកឡើងផងដែរថា វិបត្តិនៅក្នុងប្រទេសអឺរ៉ុបកាន់តែអាក្រក់ទៅៗ ទាំងសន្តិសុខ សេដ្ឋកិច្ច និងការយល់ដឹងអំពីខ្លួនឯង និងតម្លៃស្នូលរបស់ពួកគេ។

អ្នក​នាំពាក្យ​​​​វិមានក្រឹមឡាំង​រូបនេះ​ បានថ្លែងថា៖ «ក្រុមអ្នកនយោបាយនៅអឺរ៉ុបនឹងមិនអាចទម្លាក់កំហុសលើបញ្ហាក្នុងស្រុកទាំងអស់ទៅលើប្រទេសរុស្ស៊ីបានឡើយ។ តើរឿងនេះនឹងនាំទៅរកអ្វីដែលល្អដែរឬទេ? តើពួកគេនឹងអាចទម្លាក់កំហុសគ្រប់យ៉ាងមកលើពួកយើងបានដែរឬទេ? ពិតណាស់ វាមិនទំនងជាអាចទៅរួចឡើយ។ ហេតុដូច្នេះហើយ ទីក្រុងមូស្គូ បាននិយាយម្តងហើយម្តងទៀតថា ខ្លួនគ្មានចេតនាវាយប្រហារអឺរ៉ុបទេ»។

ការលើកឡើងរបស់អ្នកនាំពាក្យវិមានក្រឹមឡាំងខាងលើនេះស្របពេលដែល រដ្ឋមន្ត្រីការបរទេសរុស្ស៊ី លោក សឺហ្គេយ​​ ឡាវរ៉ូវ​ (Sergey Lavrov) បានថ្លែងកាលពីថ្ងៃទី ២៤ ខែមេសា ថា ដោយមានជំនួយពីអ៊ុយក្រែន ប្រទេសលោកខាងលិចបានប្រកាសសង្គ្រាមលើរុស្ស៊ី។

លោក ឡាវរ៉ូវ​ បានមានប្រសាសន៍ថា សង្គ្រាមបើកចំហមួយត្រូវបានប្រកាសដាក់មកលើពួកយើងហើយ។ សម្រាប់រឿងនេះ របបដឹកនាំទីក្រុងកៀវ ត្រូវបានគេប្រើប្រាស់ធ្វើជាមុខព្រួញ។ ប៉ុន្តែអ្នករាល់គ្នាដឹងហើយថា មុខព្រួញនេះនឹងមិនអាចធ្វើអ្វីបានឡើយ ប្រសិនបើគ្មានការគាំទ្រផ្នែកសម្ភារៈក្នុងទម្រង់ជាអាវុធរបស់បស្ចិមលោក ទិន្នន័យចារកម្ម ប្រព័ន្ធផ្កាយរណប ការជួយជ្រោមជ្រែងក្នុងការបណ្ដុះបណ្ដាលយោធា និងអ្វីៗជាច្រើនទៀតនោះ។

ជាក់ស្ដែង ​មន្ត្រី​ជាន់ខ្ពស់អាមេរិក​ទាំង​ពីរនេះ​ កំពុងប្រើប្រាស់វោហារសាស្ត្រនេះ ដើម្បីឆ្លើយតបទៅនឹងការកើនឡើងនៃកញ្ចប់ថវិកាយោធារបស់ណាតូ និងការចោទប្រកាន់ពីបណ្តាប្រទេសដូចជាប៊ែលហ្សិក និងអាល្លឺម៉ង់ ជាដើម៕

អត្ថបទ៖ សាង ស្រីល័ក្ខ

លោក Lavrov៖ លោកខាងលិចប្រកាស សង្គ្រាមបើកចំហនឹងរុស្ស៊ី ដោយប្រើអ៊ុយក្រែនជា «មុខព្រួញ»

The post ​អ្នក​នាំពាក្យ​វិមានក្រឹមឡាំង៖ រុស្ស៊ី មិនមែនជាការគំរាមកំហែងចំពោះ អឺរ៉ុប ឡើយ appeared first on Kampuchea Thmey Daily.

នេះគឺជាការឆ្លើយតបទៅនឹងពាក្យសម្តីរបស់លោកត្រាំ ដែលថា រុស្ស៊ីកំពុងមានវិបត្តិសេដ្ឋកិច្ចដ៏ធំ ហើយវាពេលដ៏ល្អសម្រាប់អ៊ុយក្រែនក្នុងការធ្វើសកម្មភាព ហើយប្រយុទ្ធនិងឈ្នះទឹកដីបានមកវិញ។

យ៉ាងណា ក្នុងបទសម្ភាសជាមួយសារព័ត៌មាន RBK កាលពីថ្ងៃពុធទី២៤ខែកញ្ញាឆ្នាំ២០២៥លោក Peskov បាននិយាយបែបចំអកទៅអាមេរិកថា «រុស្ស៊ីមិនមែនជាខ្លាទេ រុស្ស៊ីតែងត្រូវបានចាត់ទុកថាជាខ្លាឃ្មុំ ហើយក៏មិនមែនជាខ្លាក្រដាសដែរ រុស្ស៊ីគឺជាខ្លាឃ្មុំមែនទែន»។ 

ទន្ទឹមនោះ លោក Peskov បន្ថែមថា សេដ្ឋកិច្ចរុស្ស៊ីបានសម្របខ្លួនទៅនឹងជម្លោះដែលកំពុងបន្ត ហើយអាចផ្តល់សព្វាវុធចាំបាច់ទាំងអស់ឲ្យយោធារបស់ខ្លួន។

វិមានក្រឹមឡាំងក៏ច្រានចោលការអះអាងរបស់លោក ត្រាំ ដែលថា អ៊ុយក្រែនអាចដណ្តើមយកទឹកដីរបស់ខ្លួនមកវិញផងដែរ ដោយទទូចថា រុស្ស៊ីគ្មាន​ជម្រើស​អ្វីក្រៅពី​​បន្តសង្គ្រាម​ទៅ​មុខ​នោះ​ទេ ដើម្បី​ពលរដ្ឋ​ជំនាន់​ក្រោយ​របស់​ខ្លួន។

តាមសម្តីលោក Peskov, គំនិតដែលថា អ៊ុយក្រែនអាចយកមកវិញនូវអ្វីមួយ គឺខុសស្រឡះ។ រុស្ស៊ីនឹងបន្តធានាផលប្រយោជន៍ និងសម្រេចបាននូវគោលដៅរបស់ខ្លួន។ រុស្ស៊ីគ្មានជម្រើសជំនួស​ផ្សេង​ទេ។

សូមជម្រាបជាថ្មី រុស្ស៊ីបានបើកប្រតិបត្តិការយោធាពេញទំហឹងលើអ៊ុយក្រែន នៅថ្ងៃទី២៤ខែកុម្ភៈឆ្នាំ ២០២២ ជាមួយនឹងការលុកលុយគ្រប់ទិស។ យោងតាមតួលេខពីឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស, សង្គ្រាមអាយុកាលជាង៣ឆ្នាំមួយនេះ បានសម្លាប់ជនស៊ីវិល ១៣ ៨៨៣នាក់ និងរបួស ៣៥ ៥៤៨នាក់៕

អត្ថបទ៖ សុខ សុវណ្ណ

ចុចអាន៖ វិមានក្រឹមឡាំងបដិសេធ​ការ​លើក​ឡើង​របស់ ត្រាំ ដែល​ថា​អ៊ុយក្រែន​អាច​យកដីទាំង​អស់​​មក​វិញ

The post វិមានក្រឹមឡាំង ប្រាប់ទៅលោកត្រាំ៖ «រុស្ស៊ីជាខ្លាឃ្មុំ មិនមែនខ្លាក្រដាសទេ» appeared first on Kampuchea Thmey Daily.

ទីក្រុងមូស្គូ និងទីក្រុងវ៉ាស៊ីនតោន​កំពុង​ប្រែក្លាយ​ពី​ការ​ពឹងផ្អែក​ប្រទេសទី​៣​​​ក្នុង​ការ​ធ្វើ​ជាទីតាំង​សម្រាប់​ការសម្របសម្រួល​ការ​ចរចា មក​ការ​​ទាក់ទង​គ្នា​ដោយផ្ទាល់ទាក់ទងនឹងការលុបបំបាត់​នូវ​អ្វីដែលគេហៅថា «​​មួម៉ៅ​ក្តៅក្រហាយ (irritants)» នៅក្នុងទំនាក់ទំនងទ្វេភាគី។ ​នេះ​​បើ​យោង​តាម​អ្នកនាំពាក្យប្រធានាធិបតីរុស្ស៊ី លោក Dmitry Peskov។

នៅក្នុងសន្និសីទសារព័ត៌មានមួយនៅទីក្រុង​មូស្គូនៅថ្ងៃពុធ​នេះ​ លោក Peskov ត្រូវ​បានស្រង់​សម្តី​ ដូច​បាននិយាយថា «រុស្ស៊ី និងសហរដ្ឋអាមេរិករក្សាទំនាក់ទំនងដោយផ្ទាល់ដើម្បីលុបបំបាត់ភាព​ក្តៅ​ក្រហាយនៅក្នុងទំនាក់ទំនងទ្វេភាគី»។

ទីភ្នាក់ងារ​ព័ត៌មានរុស្ស៊ី ​TASS ​​​ផ្សាយ​ថា​ ឯកអគ្គរដ្ឋទូតរុស្ស៊ីប្រចាំនៅសហរដ្ឋអាមេរិក លោក Alexander Darchiev បាននិយាយនៅក្នុងបទសម្ភាសន៍​មួយ​កាលពីដើមសប្តាហ៍នេះថា ទីក្រុងមូស្គូ និងទីក្រុងវ៉ាស៊ីនតោន បាន​ឈានដល់កិច្ចព្រមព្រៀងបឋមមួយ ដើម្បីផ្លាស់ប្តូរការពិគ្រោះយោបល់ស្តីពីការដក «​ភាព​ក្តៅ​ក្រហាយ» នៅក្នុងទំនាក់ទំនងការទូតទ្វេភាគីចេញពីទីក្រុងអ៊ីស្តង់ប៊ុល របស់ប្រទេសតួកគី ដូច្នេះការចរចាបន្ទាប់នឹងប្រព្រឹត្តទៅ «នៅទីក្រុងមូស្គូ នាពេលខាងមុខ»។

​រដ្ឋមន្ត្រី​ការបរទេស​រុស្ស៊ី លោក Sergey Lavrov និង​សមភាគី​​សហរដ្ឋអាមេរិក​ លោក Marco Rubio បាន​​ជួបចរចា​គ្នា​​​ផ្ទាល់​យ៉ាងហោច​ណាស់៣​លើក​មកហើយ ចាប់​តាំងពី​ខែ​កុម្ភៈ​ឆ្នាំនេះ ដោយ​លើក​ដំបូង​ធ្វើ​ឡើង​នៅទីក្រុង​រីយ៉ាដ​ប្រទេសអារ៉ាប៊ីសាអូឌីត​​ និង​២លើក​ទៀត​​ ​ត្រូវ​បានរៀបចំឡើងនៅទីក្រុងអ៊ីស្តង់ប៊ុលនៃប្រទេសតួកកគីនៅថ្ងៃទី ២៧ ខែកុម្ភៈនិងថ្ងៃទី ១០​ ខែមេសា ។

តាមសេចក្តីរាយការណ៍​របស់ TASS ​លោក Darchiev បានដឹកនាំគណៈប្រតិភូរុស្សីទៅការពិគ្រោះយោបល់ទាំងពីរលើក ខណៈដែលគណៈប្រតិភូអាមេរិកដឹកនាំដោយឧបការីរងរដ្ឋមន្ត្រីទទួលបន្ទុកកិច្ចការអឺរ៉ុប និងអឺរ៉ាស៊ី ដឹកនាំ​ដោយ​លោកស្រី​ Sonata Coulter ។ បន្ទាប់​ពី​ការ​ចរចា​ជុំ​ទី​មួយ សហរដ្ឋ​អាមេរិក​បាន​ផ្តល់​ការ​យល់​ព្រម​ជា​ផ្លូវ​ការ​ដល់​ការ​តែងតាំង​លោក Darchiev ជា​ឯកអគ្គរដ្ឋទូត​រុស្ស៊ី​ប្រចាំ​ក្រុង​វ៉ាស៊ីនតោន៕​

រ៉ាន់ រើយ​

The post រុស្ស៊ី​និង​អាមេរិក​ឈានដល់​​ការ​ប្រើប្រាស់ប្រទេសពួកគេ​​​​ផ្ទាល់​សម្រាប់​ជាកន្លែងចរចា​​ appeared first on Kampuchea Thmey Daily.

មានសារព័ត៌មាននៅលោកខាងលិចជាច្រើន បានចេញផ្សាយព្រោងព្រាតអំពីទំនាក់ទំនងរុស្ស៊ី-អាមេរិក និងដំណើរការនៃកិច្ចខិតខំប្រឹងប្រែងរបស់ភាគីទាំងឡាយក្នុងការបង្កើតឲ្យមានសន្តិភាព ជាពិសេសកាសែត Politico តែម្តង ដែលផ្សាយថា ប្រធានាធិបតីអាមេរិក ដូណាល់ ត្រាំ កំពុងខឹងសម្បាដោយ​សារតែ ការសម្របសម្រួលរបស់ខ្លួនក្នុងការនាំភាគីជម្លោះឲ្យឈានដល់បទឈប់បាញ់ ហាក់គ្មានបានផលអ្វីសោះ។

ជុំវិញរឿងនេះ លោក Peskov និយាយថា ប្រព័ន្ធផ្សព្វផ្សាយច្រើនណាស់ បានខិតខំធ្វើយុទ្ធនាការបង្អាក់ដំណើរការសន្តិភាព និងញុះឲ្យសហរដ្ឋអាមេរិកដាក់ទណ្ឌកម្មថ្មីលើរុស្ស៊ី ហើយរឿងនេះកាន់តែលាតត្រដាងច្បាស់ទៅៗ។

ការអត្ថាធិប្បាយនេះកើតឡើងបន្ទាប់ពីសារព័ត៌មាន Reuters ចេញផ្សាយថា ត្រាំ ប្រហែលជាដកខ្លួនជាផ្លូវការ ឈប់ជួយដោះស្រាយជម្លោះនេះទៀតហើយ ព្រោះតែការខិតខំរបស់លោក មើលទៅដូចមិនទៅមុខសោះ។

ក្នុងសេចក្តីរាយការណ៍នោះ, Reuters អះអាងថា តាមពិតទៅ លោកត្រាំ បង្ហាញបំណងបែបនេះតាំងតែពីសប្តាហ៍មុនមកម្ល៉េះ ពោលគឺក្នុងអំឡុងពេលសន្ទនាតាមទូរស័ព្ទជាមួយមេដឹកនាំវិមានក្រឹមឡាំង វ្ល៉ាឌីមៀរ ពូទីន ប៉ុន្តែទើបត្រូវសារព័ត៌មានទម្លាយកាលពីថ្ងៃអង្គារទី២៧ខែឧសភាឆ្នាំ២០២៥ប៉ុណ្ណោះ៕

អត្ថបទ៖ សុខ សុវណ្ណ

ចុចអាន៖ រុស្ស៊ី ដាក់ចំៗថា អាល្លឺម៉ង់ កំពុងអុជភ្លើងសង្គ្រាមនៅអ៊ុយក្រែន ឲ្យកាន់តែឆេះ ធំទៅៗ

The post រុស្ស៊ី ចោទថា សារព័ត៌មានលោកខាងលិច ព្យាយាមផ្សាយ ដើម្បីបំផ្លាញកិច្ចចរចាសន្តិភាព appeared first on Kampuchea Thmey Daily.

​ក្នុង​ជំនួប​រយៈពេលខ្លី​នោះ​ ​មិន​ត្រូ​វបាន​​បង្ហាញ​លទ្ធ​ផល​​ជាក់ស្តែង​នៃ​ជំនួប​នោះទេ ប៉ុន្តែ​​ត្រូវ​បាន​​សារ​ព័ត៌មាន​​​អ៊ុយក្រែន​​រាយការណ៍ថា ​​កិច្ច​ប្រជុំ​បន្ត​​នឹង​ត្រូវ​រៀបចំ​ឡើង​​រវាង​មន្ត្រី​សហរដ្ឋអាមេរិកនិង​អ៊ុយក្រែន​ ដើម្បី​​ពិភាក្សា​បន្ត​​​លើ​​​​ខ្លឹមសា​រ​ដែល​​​​ប្រមុខ​រដ្ឋ​ទាំងពីរ​បាន​ពិភាក្សា​គ្នា​​យ៉ាង​តក់​ក្រហល់​​នៅ​ក្នុងផ្នែក​នៃ​ដំណើរ​ទៅចូលរួម​បុណ្យ​​​​​ឈាបនកិច្ច​​របស់​សម្តេច​សង្ឃកាតូលិក​ ដែល​ត្រូវ​បាន​គេ​ដឹងថា មានប្រមុខរដ្ឋ និងរដ្ឋាភិបាលជាង​៦០​ប្រទេសចូលរួម​។

បណ្តាញ​សង្គម​ហ្វេសប៊ុក​របស់​​​ការិយាល័យ​ប្រធានាធិបតី​សហរដ្ឋអាមេរិក «White House» បានបង្ហោះ​សារ​ក្រោយ​ជំនួប​នោះ​ថា​៖« លោកប្រធានាធិបតី ត្រាំ បាន​ជួបជាលក្ខណៈឯកជនជាមួយប្រធានាធិបតីអ៊ុយក្រែន លោក Volodymyr Zelenskyy នៅវិហារ St. Peter’s Basilica ក្នុងទីក្រុង Vatican នៅព្រឹកនេះ»។

​​តាមរយៈការ​បង្ហោះ​នោះ ​​ប្រធានាធិបតី​សហរដ្ឋអាមេរិក លោក ដូណាល់ ​ត្រាំ បាន​ជួ​ប​​​ជួប​ប្រធានាធិបតី​អ៊ុយក្រែន​ លោក Volodymyr Zelensky ភ្លាម​ៗ​តែម្តង ក្រោយ​ទៅដល់គោរព​វិញ្ញាណក្ខន្ធ​​សម្តេច​សង្ឃ​​ Pope Francis រួច​ ព្រោះ​​ កា​របង្ហោះ​​គឺ​នៅបន្តបន្ទាប់​គ្នា​ក្នុងចន្លោះ​ពេល​​កៀកៗគ្នា។

​​ប្រធានាធិបតី​ អ៊ុយក្រែន លោក Volodymyr Zelensky បានបង្ហោះសារ​ក្រោយ​ជំនួបនោះ ដែល​មាន​ន័យថា៖«​ជា​ការប្រជុំល្អ។ យើងបានពិភាក្សាច្រើនម្នាក់​ទល់ម្នាក់។ សង្ឃឹម​ថា​នឹង​ទទួល​បាន​លទ្ធផល​លើ​អ្វី​គ្រប់​យ៉ាង​ដែល​យើង​បាន​រ៉ាប់រង។ ការពារជីវិតប្រជាជនយើង។ បទឈប់បាញ់ពេញលេញ និងគ្មានលក្ខខណ្ឌ។ សន្តិភាព​ដែល​អាច​ទុក​ចិត្ត​បាន និង​ស្ថិតស្ថេរ​ដែល​នឹង​ការពារ​មិន​ឱ្យ​មាន​សង្គ្រាម​មួយ​ទៀត​ផ្ទុះ​ឡើង​ទៀត។ កិច្ចប្រជុំជានិមិត្តរូបដ៏សំខាន់​ដែលមានសក្តានុពលក្លាយជាប្រវត្តិសាស្ត្រ ប្រសិនបើយើងសម្រេចបានលទ្ធផលរួមគ្នា។ សូមអរគុណលោកប្រធានាធិបតី Donald J. Trump»​។

​ងាក​ទៅ​ស្ថានភាពសង្គ្រាម​នៅអ៊ុយក្រែនវិញ ​​ទីភ្នាក់ងារ​​ព័ត៌មាន​​រុស្ស៊ី​ TASS ​បានរាយការណ៍​នៅ​​ល្ងាចថ្ងៃ​សៅរ៍​នេះ ឲ្យ​ដឹង​ថា អ្នកនាំពាក្យវិមានក្រឹមឡាំង លោក Dmitry Peskov បាន​និយាយថា ប្រតិបត្តិការរំដោះតំបន់ Kursk ពីកងទ័ពអ៊ុយក្រែនត្រូវបានបញ្ចប់​ បន្ទាប់​ពី​​ ប្រធានាធិបតី​​រុស្ស៊ី លោក Vladimir Putin ដែលជា​អគ្គ​​មេបញ្ជាការ​កំពូល​របស់​រុស្សី​​ បានទទួលរបាយការណ៍ពាក់ព័ន្ធ។

សេចក្តី​រាយការណ៍ បាន​​បន្ត​ថា អ្នកនាំពាក្យប្រធានាធិបតីរុស្ស៊ី លោក Dmitry Peskov បាននិយាយថា៖«​អគ្គសេនាធិការនៃកងកម្លាំងប្រដាប់អាវុធរុស្ស៊ី លោក Valery Gerasimov បានរាយការណ៍ទៅអគ្គមេបញ្ជាការកំពូល Vladimir Putin ថាប្រតិបត្តិការរំដោះតំបន់ Kursk ពីអ៊ុយក្រែនត្រូវបានបញ្ចប់»​។

​​​​តាមសេចក្តី​រាយការណ៍​​​ដដែល​​នោះ ប្រធានអគ្គសេនាធិការរបស់រុស្ស៊ី លោក Gerasimov បានរាយការណ៍ទៅកាន់លោកប្រធានាធិបតី Putin ថា កងទ័ពរុស្ស៊ីបានរំដោះការ​បោះទីតាំង​​ចុងក្រោយនៅក្នុងតំបន់ Kursk។ ការ​​ឈរជើង​ចុងក្រោយនៅភូមិ Gornal លើទឹកដីនៃតំបន់ Kursk ត្រូវបានរំដោះពីកងទ័ពអ៊ុយក្រែន»។

តាមសេចក្តីរាយការណ៍័ដដែលនោះ ប្រមុខយោធារុស្ស៊ី​ បាននិយាយថា ​អ៊ុយក្រែន​បានបាត់បង់កងទ័ពជាង ៧៦​០០០នាក់ នៅក្នុងការលុកលុយរបស់ខ្លួននៅក្នុងតំបន់ Kursk ព្រំដែនរបស់រុស្ស៊ី។ ទោះបី​ជាបែបណា មិ​ន​មាន​​ការ​បញ្ជាក់​ផ្លូវការ​ពី​ខាង​ភាគី​អ៊ុយក្រែន​នៅឡើយ​ទេ​អំពី​កា​របាត់បង់​ចំនួន​​យោធា​ដ៏ច្រើន​នេះ​។

យោ​ងសេចក្តីរាយការណ៍​របស់​ទីភ្នាក់ងារ​ព័ត៌មាន AFP ​ភ្លាមៗបន្ទាប់ពី​ការអះអាង​របស់​មេបញ្ជាការ​របស់រុស្ស៊ី កងទ័ពអ៊ុយក្រែនបានបដិសេធការអះអាងរបស់រុស្ស៊ីក្នុងការបណ្តេញកងកម្លាំង​របស់​អ៊ុយក្រែន​ ចេញពីទីតំបន់​ Kursk ដោយនិយាយថា «សេចក្តីថ្លែងការណ៍របស់ថ្នាក់ដឹកនាំសត្រូវអំពី «ការបរាជ័យ»​ របស់កងទ័ពអ៊ុយក្រែនគឺគ្មានអ្វីក្រៅពីល្បិចឃោសនា​បែបមនោគមវិជ្ជានោះទេ»។

​សេចក្តីរាយការណ៍​នោះ បាន​បន្តថា ទោះជាយ៉ាងណាក៏ដោយ អគ្គសេនាធិការអ៊ុយក្រែនបានទទួលស្គាល់ស្ថានភាពនៅសមរភូមិគឺ «លំបាក» ខណៈពេលដែលទទូចថា កងកម្លាំងអ៊ុយក្រែននៅតែកាន់កាប់ទីតាំងនៅ Kursk ដដែល​ទេ​។

​កង​ទ័ព​បាន​វា​​យចូល​តំបន់​ Kursk​ ក្នុងទឹកដី​រុស្ស៊ី​កាល​ពី​ដើម​ខែសីហា​ឆ្នាំ​២០២៤ ដើម្បី​បង្កើត​ជាតំបន់​ទ្រនាប់​​ការ​ពារ​សង្គ្រាម​ពីការ​វាយលុក​និង​ផ្លោង​​រយៈចម្ងាយឆ្ងាយ​របស់​រុស្ស៊ី។​ ​រហូតដល់​ពេលនេះ រុស្ស៊ី​បាន​កាន់​កាប់​ទឹកដី​អ៊ុយក្រែន​​ជាង​១១ម៉ឺនគីឡូម៉ែត្រ​ការ៉េ ឬ​ប្រមាណ១ភាគ៥​នៃ​ទឹកដី​អ៊ុយក្រែន​ទាំងមូល​៕​

ដោយ រ៉ាន់ រើយ​

The post ​​​យោធា​​រុស្ស៊ី​​អះអាងថា​ រំដោះ​តំបន់​ Kursk ​ទាំង​​ស្រុង​​ ចំថ្ងៃ​ លោក ​ត្រាំ ជួប​​​​ហ្សេលេនស្គី និង​មេដឹកនាំអឺរ៉ុប appeared first on Kampuchea Thmey Daily.

​យោង​​ការ​ផ្សាយ​របស់​ទីភ្នាក់​ងារ​ព័ត៌មាន​​រុស្ស៊ី​ TASS អ្នកនាំពាក្យវិមានក្រឹមឡាំង លោក Dmitry Peskov បានប្រាប់ពិធីករទូរទស្សន៍រុស្ស៊ី លោក Pavel Zarubin ថា រុស្ស៊ី និងសហរដ្ឋអាមេរិក កំពុងឆ្ពោះទៅមុខដ៏ល្អក្នុងការបង្កើតទំនាក់ទំនងឡើងវិញ។

លោក​បាន​បន្ត​ថា​៖ «​តាម​ពិត​ទៅ​អ្វីៗ​កំពុង​ដើរ​ទៅ​មុខ​យ៉ាង​ល្អ​។ ការរស់ឡើងវិញនូវទំនាក់ទំនងជាមូលដ្ឋានពីដំបូង គឺជារឿងដ៏ស្មុគស្មាញដែលត្រូវធ្វើ។ វាទាមទារឱ្យមានកិច្ចខិតខំប្រឹងប្រែងការទូត និងកិច្ចខិតខំប្រឹងប្រែងផ្សេងៗទៀត»។

អ្នក​នាំពាក្យ​រូប​នេះ​បាន​បន្ត​ថា​៖ «​ផ្លូវ​ទាំង​មូល​មាន​ជំហាន​តូចៗ​ដើម្បី​បង្កើត​បរិយាកាស​នៃ​ការ​ទុក​ចិត្ត​គ្នា​ទៅ​វិញ​ទៅ​មក​យ៉ាង​ហោច​ណាស់​ដើម្បី​ពង្រឹង​ទំនុក​ចិត្ត​គ្នា​ទៅ​វិញ​ទៅ​មក​។ នេះ​ជា​អ្វី​ដែល​កំពុង​ត្រូវ​បាន​ធ្វើ​នៅ​ពេល​នេះ។​ ការ​ទំនាក់​ទំនង​កំពុង​កើត​ឡើង​រវាង​ក្រសួង​ការ​បរទេស និង​ក្រសួង​ការ​បរទេស»​។

​ទោះបី​មើល​ឃើញ​នៅការរីកចម្រើន​ខ្លះ​លើ​ការ​ពិភាក្សា​​​​ក្នុងរយៈពេល​​២ខែ​កន្លង​មក​នេះ យោងតាមលោក Peskov កិច្ចពិភាក្សារវាងរុស្ស៊ី និងអាមេរិកមាន «ភាពមិនច្បាស់លាស់» ជាច្រើនទាក់ទងនឹងការបន្តដំណើរការធម្មតានៃបេសកកម្មការទូតរបស់ពួកគេ។

សេចក្តីរាយការណ៍នោះ​មិន​បាន​​​លើក​ឡើង​នូវ​​​​ចំណុច​ដែល​​ភាព​មិនច្បាស់លាស់​បាន​កើត​ឡើង ប៉ុន្តែ​​​គេ​អាច​ដឹង​បាន​ថា ​ទំនាក់​ទំនង​​រវាង​មហាអំណាច​ទាំងពីរ​អាច​មិនទុក​ចិត្ត​គ្នា​​​​​លើ​ចំណុច​ជា​ច្រើន ដោយសារ​ប្រធានាធិបតីសហរដ្ឋអាមេរិក​ លោក ដូណាល់ ត្រាំ ​បាន​បង្កើតនយោបាយ​អរិភាព​​​​​​ជាច្រើន​​ជាមួយបណ្តាប្រទេស​នានា​​​​ទាំងសម្ព័ន្ធភាព​របស់ខ្លួន និង​​​​​​ប្រទេសគូប្រជែង​​ឥទ្ធិពលភូមិសាស្រ្តនយោបាយ​។

​​សហរដ្ឋអាមេរិក​ដឹកនាំ​ដោយ​រដ្ឋបាល​ លោក ដូណាល់ ត្រាំ ​មាន​បំណង​​​​ទាញ​រុស្ស៊ី​​ឲ្យទទួលយក​បទ​ឈប់បាញ់​​​ក្នុងសង្គ្រាម​នៅអ៊ុយក្រែនដែលបាន​អូសបន្លាយ​​រយៈពេល​ជាង​៣ឆ្នាំ ប៉ុន្តែ​​​ការ​រីកចម្រើន​​ក្នុងការ​ពិភាក្សា​​​អំពី​ការ​បញ្ចប់សង្គ្រាម ជារឿង​ដែលលំបាក​​ដោយសារ​តែ​​រុស្ស៊ីបាន​បដិសេធ​​បទ​ឈប់បាញ់​ដែល​រៀបចំឡើង​ដោយសហរដ្ឋអាមេរិក ហើយ​រុស្ស៊ី​​​បន្ថែម​​លក្ខខណ្ឌថ្មី​ៗ​រហូត​ដែល​ជា​លេស​​​មិន​អនុវត្តបទ​ឈប់បាញ់​ណាមួយ​ដែលផ្តួច​ផ្តើម​ដោយភាគី​អាមេរិក​។

​ការ​រស់​ឡើង​វិញ​នៃ​ទំនាក់​ទំនង​​របស់​មហាអំណាច​ទាំងពីរ​​នាំ​ទៅដល់​ការ​អាក់អន់​ស្រពន់​ចិត្ត​ យ៉ាង​ខ្លាំង​ពីសំណាក់​​សហភាព​​អឺរ៉ុប និង​ប្រទេស​មហាអំណាច​តំបន់​អឺរ៉ុប ដែលធ្លាប់តែ​​​មាន​សម្ព័ន្ធ​ភាព​យ៉ាង​​ល្អូនល្អើន​ជាមួយសហរដ្ឋអាមេរិក​ជា​យូរ​យារណាស់​មក​ហើយ​។

​​ទំនាក់​ទំនង​​​​របស់​មហាអំណាច​ទាំងពីរ​​បាន​កំណត់ស្តារឡើង​វិញ​​ ​តាមរយៈ​ការពិភាក្សា​យ៉ាង​​លម្អិត​​​ក្នុងជំនួប​​រដ្ឋមន្ត្រីការបរទេស​​​​សហរដ្ឋអាមេរិក លោក Marco Rubio ​និង​សមភាគី​រុស្ស៊ី​​​​ លោក Sergey Lavrov ​កាលថ្ងៃទី​​១៨​ខែកុម្ភៈ​ឆ្នាំ​២០២៥ នៅ​ទីក្រុង​​រីយ៉ាដ​ ប្រទេស​អារ៉ាប៊ី​ សាអ៊ូឌីត​​៕​

ដោយ រ៉ាន់ រើយ​

The post ​វឌ្ឍននៃ​ទំនាក់​ទំនងរុស្ស៊ី-អាមេរិក​​ ប៉ុន្តែ​រឿង​​ជាច្រើន​​​ពិបាក​ទុក​ចិត្តគ្នា​​​ appeared first on Kampuchea Thmey Daily.

ថ្លែងប្រាប់ទូរទស្សន៍ Rossiya 1 កាលពីថ្ងៃអង្គារទី៤ខែមីនាឆ្នាំ២០២៥, លោក Peskov និយាយថា ដ្បិតរឿងរ៉ាវនៃការផ្អាកជំនួយនេះ មិនទាន់មានការលាតត្រដាងឲ្យលម្អិតខ្លាំងក៏ពិតមែនប៉ុន្តែជាក់ស្តែង វិធានការនេះនឹងឈានទៅរកការបន្ថូរបន្ថយភាពតានតឹង និងបញ្ចប់សង្គ្រាម។ 

យោងតាមលោក Peskov, អាមេរិក ជាម្ចាស់ជំនួយយោធាធំបំផុតរបស់អ៊ុយក្រែន ហើយបើសិនអាមេរិកលែងខ្វាយខ្វល់និងដកដៃផ្អាកការផ្អត់ផ្គង់មែននោះ វានឹងក្លាយជាការរួមចំណែកដ៏ល្អបំផុតដល់បុព្វហេតុសន្តិភាព។ អ៊ុយក្រែន នឹងលែងសូវសម្បូរគ្រាប់ដូចមុន ព្រមទាំងខ្វះគ្រឿងសឹកនិងផ្នែកចារកម្ម ដូច្នេះពួកគេនឹងងាកមករកដំណោះស្រាយស្ថានការណ៍ដោយសន្តិវិធី។ 

សូមជម្រាបជាថ្មី លោក ត្រាំ បានបញ្ជាឲ្យក្រសួងការពារជាតិផ្អាកជំនួយទាំងអស់ទៅអ៊ុយក្រែន ក្រោយការឈ្លោះប្រកែកគ្នាបែកផ្សែងនៅសេតវិមាន កាលពីចុងសប្តាហ៍មុន ហើយការផ្អាកជំនួយនេះទៀតសោត ក៏រួមបញ្ចូលទាំងសព្វាវុធដែលត្រៀមដឹកជញ្ជូនឆ្លងកាត់និងនៅក្នុងប្រទេសប៉ូឡូញ ផងដែរ។

ទន្ទឹមនោះ កាសែត Washington Post រាយការណ៍ថា ក្រៅពីបញ្ឈប់ការដឹកជញ្ជូនសព្វាវុធទៅឲ្យទីក្រុងកៀវហើយនោះ អាមេរិកក៏កំពុងពិចារណាលែងចែករំលែកព័ត៌មានសម្ងាត់ និងការបណ្តុះបណ្តាលសម្រាប់កងទ័ពនិងអាកាសយានិកអ៊ុយក្រែនផងដែរ។

ច្បាស់ណាស់ វិធានការនេះគឺជាបញ្ហាប្រឈមដ៏ធំនិងជាកង្វល់យ៉ាងខ្លាំងចំពោះអ៊ុយក្រែន ព្រោះថាទីក្រុងកៀវ បានពឹងផ្អែកស្ទើរតែទាំងស្រុងលើជំនួយលោកខាងលិច ក្នុងសង្គ្រាមរបស់ខ្លួនជាមួយរុស្ស៊ី។

យ៉ាងណា មួយរយៈចុងក្រោយនេះ គេឃើញថា សម្ព័ន្ធមិត្តអឺរ៉ុបមិនឱបដៃឈរមើលឡើយ និងថែមទាំងព្យាយាមជួយអ៊ុយក្រែនតាមលទ្ធភាពផងដែរ ខណៈប្រទេសដែលចេញមុខចេញមាត់ជាងគេគឺអង់គ្លេសនិងបារាំង៕

អត្ថបទ៖ សុខ សុវណ្ណ

ចុចអាន៖ ប្រតិកម្ម​អន្តរជាតិ ក្រោយអាមេរិក​ផ្អាក​ជំនួយ​​ដល់​អ៊ុយក្រែន

The post រុស្ស៊ី ពេញចិត្តខ្លាំងដែលអាមេរិក ផ្អាកជំនួយទៅអ៊ុយក្រែន appeared first on Kampuchea Thmey Daily.

កាលពីថ្ងៃអង្គារ ក្នុងសន្និសីទសារព័ត៌មាននៅ Mar-a-Lago លោកត្រាំ បានប្រកាសថាលោកអាចប្រើកម្លាំងយោធាឬវិធានការសេដ្ឋកិច្ច ដើម្បីយកមិនត្រឹមតែកោះ Greenland ទេប៉ុន្តែក៏អាចយកព្រែកជីកបាណាម៉ា មកគ្រប់គ្រងផងដែរ។

លោកនិយាយថា «យើងត្រូវការពួកគេសម្រាប់សន្តិសុខសេដ្ឋកិច្ច។ វាចាំបាច់ណាស់សម្រាប់សន្តិសុខរបស់អាមេរិក។ Greenland មានសារៈសំខាន់ផ្នែកយោធា ដើម្បីតាមដាននាវាចិននិងរុស្ស៊ី។ ខ្ញុំកំពុងនិយាយអំពីការការពារពិភពលោកសេរី»។

យ៉ាងណា ពាក់ព័ន្ធរឿងនេះ អ្នកនាំពាក្យវិមានក្រឹមឡាំងលោក Dmitry Peskov បានប្រតិកម្មតបទៅវិញថា «យើងកំពុងតាមដានការវិវត្តស្ថានការណ៍យ៉ាងយកចិត្តទុកដាក់ជាទីបំផុត។ យើងក៏មានវត្តមាននៅក្នុងតំបន់អាក់ទិកដែរ ហើយយើងនឹងបន្តវត្តមាននៅទីនោះទៀត។ យើងផ្តោតលើការរក្សាសន្តិភាពនិងស្ថិរភាពនៅក្នុងតំបន់នេះ ហើយត្រៀមខ្លួនជាស្រេចដើម្បីធ្វើកិច្ចសហប្រតិបត្តិការជាមួយភាគីណាមួយដើម្បីសន្តិភាព និងស្ថិរភាព»។

ជុំវិញបញ្ហានេះដែរ មហាអំណាចអឺរ៉ុប២ប្រទេសគឺបារាំងនិងអាល្លឺម៉ង់ បានចេញមុខព្រមានលោកត្រាំរួចទៅហើយ ដោយអធិការបតីអាល្លឺម៉ង់លោក Olaf Scholz និយាយថា «គោលការណ៍មិនរំលោភព្រំដែនប្រទេសដទៃ ត្រូវតែអនុវត្តចំពោះគ្រប់ប្រទេសមិនថានោះគឺជាប្រទេសតូច ឬប្រទេសមានអំណាចក៏ដោយ។ យើងពិតជាមិនយល់ទាល់តែសោះអំពីសេចក្តីថ្លែងការណ៍ ចេញពីមាត់រដ្ឋបាលសហរដ្ឋអាមេរិកអាណត្តិថ្មី»។

ចំណែករដ្ឋមន្ត្រីការបរទេសបារាំងលោក Jean-Noël Barrot បានប្រាប់វិទ្យុ France Inter ថា «សហភាព​អឺរ៉ុប​មិន​គួរ​ឲ្យ​គេ​បំភិត​បំភ័យបានឡើយ។ អឺរ៉ុប​គួរ​តែ​ភ្ញាក់​ខ្លួននិង​ពង្រឹងកម្លាំង។ អឺរ៉ុបនឹងមិនបណ្តោយឲ្យប្រទេសផ្សេង វាយប្រហារលើព្រំដែនអធិបតេយ្យរបស់ខ្លួនទេ ទោះពួកគេជានរណាក៏ដោយ។ យើងជាទ្វីបដ៏រឹងមាំ»។

Greenland គឺជាដែនដីស្វយ័តរបស់ដាណឺម៉ាក ដែលស្ថិតក្រោមការគ្រប់គ្រងរបស់ប្រទេសនេះអស់រយៈពេលជាង៦០០ឆ្នាំមកហើយ។ វាស្ថិតនៅចន្លោះមហាសមុទ្រអាត្លង់ទិកនិងអាកទិក ត្រូវ​បាន​គ្របដណ្ដប់ដោយផ្ទាំងទឹកកក​ចំនួន​ ៨០% និងជាជម្រករបស់មូលដ្ឋានយោធាអាមេរិកដ៏ធំមួយ។ កោះដ៏ធំបំផុតរបស់ពិភពលោក​មួយ​នេះ មានរដ្ឋធានីនៅជិតទីក្រុងញូវយ៉ក ជាងរដ្ឋធានីកូប៉ិនហាករបស់ដាណឺម៉ាក ហើយ​សម្បូរ​​ធនធានរ៉ែ ប្រេង និងឧស្ម័នធម្មជាតិ ប៉ុន្តែការអភិវឌ្ឍ​មានសភាពយឺតយ៉ាវ ដែលធ្វើឲ្យសេដ្ឋកិច្ចរបស់ខ្លួន​ត្រូវ​ពឹងផ្អែកលើការនេសាទ និងការឧបត្ថម្ភធនប្រចាំឆ្នាំពីប្រទេសដាណឺម៉ាក៕

អត្ថបទ៖ សុខ សុវណ្ណ

ចុចអាន៖ មហាអំណាចអឺរ៉ុប២ប្រទេស ចេញមុខព្រមានលោក ត្រាំ ក្រោយគំរាមប្រើកម្លាំងយោធា ដណ្តើមយក Greenland 

The post រឿង Greenland! វិមានក្រឹមឡាំង ផ្តាំទៅ ត្រាំ ថា សូមកុំភ្លេច រុស្ស៊ីក៏មានវត្តមាននៅតំបន់អាកទិកដែរ  appeared first on Kampuchea Thmey Daily.