អគ្គសេនាធិការអ៊ីរ៉ង់ ដែលទទួលភារកិច្ចស៊ើបអង្កេតករណីនេះ បានចេញសេចក្តីថ្លែងការណ៍ថា “យើងក៏មិនទាន់ហ៊ានអះអាងដែរថា ឧទ្ធម្ភាគចក្រនោះហោះទៅបុកភ្នំហើយផ្ទុះឆេះ បណ្តាលមកពីស្នាដៃរបស់មនុស្ស”។

ទោះបីជាយ៉ាងណាក៏ដោយ ក្រុមអ្នកស៊ើបអង្កេតរកឃើញថា ឧបទ្ទវហេតុនេះពិតជាមិនទាក់ទងនឹងចន្លោះប្រហោង ដែលបណ្តាលមកពីការជួសជុលនិងថែទាំឧទ្ធម្ភាគចក្រមិនបានល្អនោះទេ។ ដូចគ្នានេះដែរ ទម្ងន់របស់ឧទ្ធម្ភាគចក្រនៅពេលហោះឡើងគឺ ស្ថិតក្នុងដែនកំណត់ដែលអនុញ្ញាត”។

តាមការស៊ើបអង្កេត, ឧទ្ធម្ភាគចក្រដឹកប្រធានាធិបតី បានទាក់ទងចុងក្រោយបំផុតជាមួយឧទ្ធម្ភាគចក្រពីរគ្រឿងទៀត ៦៩វិនាទីមុនពេលធ្លាក់ ប៉ុន្តែមិនបានបញ្ជូនសញ្ញាអាសន្នអ្វីទេ។ យ៉ាងណា លក្ខខណ្ឌអាកាសធាតុនៅតាមបណ្តោយផ្លូវត្រឡប់មកវិញ ចាំបាច់ត្រូវស៊ើបអង្កេតបន្ថែម។

សូមបញ្ជាក់ជាថ្មីថា ឧទ្ធម្ភាគចក្រ Bell 212 ផលិតដោយសហរដ្ឋអាមេរិក ដែលដឹកលោក Raisi និងរដ្ឋមន្ត្រីការបរទេស Hossein Amir-Abdollahian ព្រមទាំងមន្ត្រីអ្នកមុខអ្នកការច្រើននាក់ទៀត បានធ្លាក់កាលពីថ្ងៃទី១៩ខែឧសភា ក្នុងខេត្ត East Azerbaijan ប្រទេសអ៊ីរ៉ង់ ដោយ សម្លាប់អ្នកជិះទាំងអស់។

សពលោក Raisi ត្រូវ​បាន​បញ្ចុះកាលពី​ថ្ងៃ​ពុធ​សប្តាហ៍​មុន​ក្នុង​ទីក្រុង Mahshad ដែលជាស្រុកកំណើតរបស់​គាត់។ ស្របពេលជាមួយគ្នានោះដែរ រដ្ឋាភិបាលទីក្រុង តេហេរ៉ង់ បានប្រកាសថា ការបោះឆ្នោតជ្រើសរើសអ្នកស្នងតំណែងរបស់គាត់នឹងធ្វើឡើងនៅថ្ងៃទី ២៨ ខែមិថុនា។

ស្របពេលប្រទេសកំពុងជួបវិបត្តិនយោបាយ អនុប្រធានាធិបតី Mohammad Mokhber ត្រូវឡើងកាន់តំណែងជាប្រធានាធិបតីស្តីទី សិន៕

អត្ថបទ៖ សុខ សុវណ្ណ

ចុចអាន៖ អ៊ីរ៉ង់ រៀបចំពិធីបុណ្យសពប្រធានាធិបតី និងកាន់ទុក្ខរយៈពេល ៥ថ្ងៃ

The post អ៊ីរ៉ង់ មិនទាន់ចេញលទ្ធផលស៊ើបអង្កេតករណីធ្លាក់ឧទ្ធម្ភាគចក្រប្រធានាធិបតី ព្រោះនៅសង្ស័យ appeared first on Kampuchea Thmey Daily.

តាមការបញ្ជាក់ពីលោក Mohsen Mansouri អនុប្រធានទទួលបន្ទុករៀបចំពិធីបុណ្យ, ដំបូងបង្អស់ ពិធីបានចាប់ផ្តើមនៅថ្ងៃអង្គារ វេលាម៉ោង ៩:៣០ នាទី (ម៉ោងក្នុងស្រុក) នាទីក្រុង Tabriz ភាគពាយ័ព្យ ហើយសពរបស់លោក Raisi នឹងត្រូវដង្ហែបន្តទៅទីក្រុង Qom រួចរៀបចំកម្មវិធីបន្ទាប់នៅម៉ោង១៦:៣០នាទី។

បន្ទាប់មកទៀត នៅថ្ងៃពុធ សពនឹងត្រូវបញ្ជូនទៅរដ្ឋធានី តេហេរ៉ង់ តែម្តង ដោយនៅទីនោះ មានវត្តមានមេដឹកនាំកំពូល Khamenei ដឹកនាំការអធិស្ឋានឧទ្ទិសដល់ដួងព្រលឹងលោក Raisi និងអ្នកដទៃ។ ម្យ៉ាងវិញទៀត ថ្ងៃ​ពុធនេះ ​ក៏​ត្រូវ​បាន​គេ​ប្រកាស​ជា​ថ្ងៃ​ឈប់​សម្រាក​ថ្នាក់ជាតិ ទូទាំងប្រទេសអ៊ីរ៉ង់ផងដែរ។

លុះដល់ព្រឹកថ្ងៃព្រហស្បតិ៍ សពរបស់លោក Raisi នឹងត្រូវដង្ហែទៅកាន់ទីក្រុង Birjand នៃខេត្ត South Khorasan ជាកន្លែងដែលលោកប្រធានាធិបតី ទើបជាប់ឆ្នោតអាណត្តិថ្មី ក្នុងនាមជាតំណាងរបស់ស្ថាប័នឃ្លាំមើលភាពជាអ្នកដឹកនាំនៃសភាអ្នកជំនាញ។

ជាចុងក្រោយ ពិធីបញ្ចុះសពរបស់លោក Raisi នឹងត្រូវធ្វើឡើងនៅទីក្រុង Mashhad ភាគឦសានក្នុងទីសក្ការបូជា Shia Imam Reza ទីប្រាំបី នៅល្ងាចថ្ងៃព្រហស្បតិ៍។

សូមជម្រាបជាថ្មីថា ប្រធានាធិបតីអ៊ីរ៉ង់លោក Ebrahim Raisi និងមន្ត្រីអ្នកមុខអ្នកការផ្សេងទៀត បានទទួលមរណភាពក្នុងហេតុការណ៍ធ្លាក់ឧទ្ធម្ភាគចក្រចូលជ្រលងភ្នំនៃខេត្ត​ East Azerbaijan ខណៈធ្វើដំណើ​រឆ្ពោះទៅកាន់ទីក្រុង Tabriz ក្រោយបញ្ចប់ពិធីសម្ពោធទំនប់វារីអគ្គិសនីមួយនៅព្រំដែន កាលពីថ្ងៃចន្ទទី២០ខែឧសភា ហើយបើតាមការបញ្ជាក់ពីប្រព័ន្ធផ្សព្វផ្សាយរដ្ឋ គ្រោះអកុសលនេះគឺបណ្តាលមកពីឧទ្ធម្ភាគចក្រធ្វើដំណើរឆ្លងកាត់ផ្ទៃមេឃដែលចុះអ័ព្ទក្រាស់៕ 

អត្ថបទ៖ សុខ សុវណ្ណ

ចុចអាន៖ តើការធ្លាក់ឧទ្ធម្ភាគចក្រប្រធានាធិបតីអ៊ីរ៉ង់ ជាឧបទ្ទវហេតុ ឬឃាតកម្ម?

The post អ៊ីរ៉ង់ រៀបចំពិធីបុណ្យសពប្រធានាធិបតី និងកាន់ទុក្ខរយៈពេល ៥ថ្ងៃ appeared first on Kampuchea Thmey Daily.

តាមការបញ្ជាក់ពីប្រព័ន្ធផ្សព្វផ្សាយរដ្ឋ គ្រោះអកុសលនេះគឺបណ្តាលមកពីឧទ្ធម្ភាគចក្រធ្វើដំណើរឆ្លងកាត់ផ្ទៃមេឃដែលចុះអ័ព្ទក្រាស់ ទើបបណ្តាលឲ្យឧទ្ធម្ភាគចក្របាត់ការគ្រប់គ្រង ហើយធ្លាក់ផ្ទុះឆេះតែម្តង។

ត្បិតតែប្រភពទាំងឡាយសុទ្ធតែចង្អុលគ្រោះថ្នាក់នេះថាបណ្តាលមកពីកត្តាអាកាសធាតុ ប៉ុន្តែអ្នកវិភាគមួយចំនួនក៏បានដាក់ការសង្ស័យទៅលើករណីឃាតកម្មផងដែរ ហើយថែមទាំងលើកឡើងពីសន្មតិកម្មខ្លះមកវែកញែកទៀតផង។

ជាក់ស្តែងលោក លោក Michael Maloof អ្នកវិភាគគោលនយោបាយសន្តិសុខជាន់ខ្ពស់មន្ទីរបញ្ចកោណ បានដាក់ជាសំណួរនៅក្នុងកម្មវិធី The Critical Hour របស់សារព័ត៌មាន Sputnik កាលពីថ្ងៃចន្ទថា “ជាការពិត អ្នកមានឧទ្ធម្ភាគចក្របីគ្រឿងហោះទន្ទឹមគ្នា! មួយគ្រឿងធ្លាក់ភ្លាមៗ ទាំងដែលគ្មានការផ្តល់សញ្ញាអ្វីទាំងអស់ គ្មានគ្រប់យ៉ាង ហើយ​បើពិតជាមាន​អ័ព្ទក្រាស់មែន ចុះ​តើ​ឧទ្ធម្ភាគចក្រពីរ​គ្រឿង​ទៀត ហោះ​ឆ្លង​កាត់ទៅម្តេចបាន? ម្តេចបានជាធ្លាក់តែឧទ្ធម្ភាគចក្ររបស់ប្រធានាធិបតីតែមួយគ្រឿងទៅវិញ?”។

ទោះគ្មានការនិយាយចំឈ្មោះភាគីសង្ស័យពាក់ព័ន្ធរឿងនេះក៏ដោយ ប៉ុន្តែគេដឹងថា អ៊ីស្រាអែលមានប្រវត្តិធ្វើប្រតិបត្តិការសម្ងាត់នៅខាងក្នុងប្រទេសអ៊ីរ៉ង់ រួមទាំងការទម្លាក់គ្រាប់បែកលើបំពង់បង្ហូរប្រេង ការសម្លាប់អ្នកវិទ្យាសាស្ត្រនុយក្លេអ៊ែរ និងការសងសឹកថ្មីៗផងដែរ ត្បិតអីអ៊ីស្រាអែល បានចេញមុខបដិសេធរឿងនេះរួចទៅហើយក្តី។

លោកបន្តថា “ក៏មានរឿងកើតឡើងផងដែរនៅបស្ចិមប្រទេស ជាពិសេសការប៉ុនប៉ងធ្វើឃាតនាយករដ្ឋមន្ត្រីស្លូវ៉ាគី ដូច្នេះរឿងនេះទំនងជាមានប្រទាក់ក្រឡាគ្នា”។ 

ម្យ៉ាងទៀត នៅថ្ងៃដែលឧទ្ធម្ភាគចក្រប្រធានាធិបតីអ៊ីរ៉ង់ធ្លាក់នោះ មន្ត្រីនៃកងទ័ពសាធារណរដ្ឋប្រជាធិបតេយ្យកុងហ្គោ ក៏បានរារាំងការប៉ុនប៉ងធ្វើរដ្ឋប្រហារ ហើយចាប់ខ្លួនមនុស្ស៥០នាក់ផងដែរ ដោយក្នុងនោះរួមមានជនជាតិអាមេរិកចំនួន៣នាក់។

មេក្លោងដឹកនាំ​រដ្ឋប្រហារ​គឺមានឈ្មោះ Christian Malanga ត្រូវ​បាន​​សម្លាប់​ក្នុង​ការ​ប៉ុនប៉ង​នោះ។ Malanga បានរស់នៅក្នុងសហរដ្ឋអាមេរិកពេញមួយជីវិតមកហើយ ហើយបើយោងតាមវីដេអូបង្ហោះតាមអ៊ិនធឺណិត គាត់ធ្លាប់បានទៅជួបកងយោធាអ៊ីស្រាអែលម្តងដែរក្នុងឆ្នាំ ២០១៥។

ជាចុងក្រោយ លោក Maloof ព្រមានថា ប្រសិនបើរឿងរ៉ាវត្រូវបានលាតត្រដាងថា អ៊ីស្រាអែល ពិតជាជាប់ពាក់ព័ន្ធនឹងការស្លាប់របស់លោក Raisi មែននោះ ច្បាស់ណាស់ ការសងសឹកនឹងកើតឡើងហើយប្រហែលជាទ្រង់ទ្រាយធំទៀតផង មិនមែនលំៗទេ៕

ចុះតើប្រិយមិត្តគិតថា ការធ្លាក់ឧទ្ធម្ភាគចក្ររបស់លោក Raisi គឺជាឧបទ្ទវហេតុឬឃាតកម្ម?

អត្ថបទ៖ សុខ សុវណ្ណ

ចុចអាន៖ មរណភាពប្រធានាធិបតីអ៊ីរ៉ង់ ជះឥទ្ធិពលអាក្រក់២យ៉ាង ដល់ពិភពលោក

The post តើការធ្លាក់ឧទ្ធម្ភាគចក្រប្រធានាធិបតីអ៊ីរ៉ង់ ជាឧបទ្ទវហេតុ​ ឬឃាតកម្ម? appeared first on Kampuchea Thmey Daily.

១. តម្លៃប្រេង

តាមការចុះផ្សាយរបស់គេហទំព័រ Oilprice.com នៅថ្ងៃអង្គារទី២១ខែឧសភា, គ្រាន់តែលេចឮព័ត៌មានអំពីការស្លាប់របស់លោក Raisi ភ្លាម តម្លៃប្រេងឆៅម៉ាក Brent បានហក់ឡើងលើស ៨៤ដុល្លារក្នុងមួយបារ៉ែល ចំណែកឯម៉ាក West Texas Intermediate (WTI) បានឡើងដល់ ៨០ដុល្លារក្នុងមួយបារ៉ែល​ ប៉ុន្តែក្រោយមកតម្លៃក៏បានថយចុះមកវិញ។

យ៉ាងណាក្តី ក្រុមអ្នកព្យាករព្រមានថា តម្លៃប្រេងឆៅ អាចនឹងឡើងជាបន្តទៀត ប្រសិនបើស្ថានការណ៍ជុំវិញបញ្ហាអ៊ីរ៉ង់ នៅតែបន្តពុះកញ្ជ្រោល។

២. ភាពតានតឹងនៃភូមិសាស្រ្តនយោបាយ

ត្បិតតែការសន្និដ្ឋានដំបូងបានចង្អុលទៅកត្តាអាកាសធាតុ ថាជាមូលហេតុនៃឧបទ្ទវហេតុធ្លាក់ឧទ្ធម្ភាគចក្រដឹកប្រធានាធិបតីអ៊ីរ៉ង់ និងរដ្ឋមន្ត្រីការបរទេសពិតមែន ប៉ុន្តែក៏នៅតែមានមន្ទិលសង្ស័យលើការធ្វើឃាតនៅពីក្រោយរឿងនេះផងដែរ។ នេះបើតាមការចុះផ្សាយរបស់សារព័ត៌មាន NDTV។

ឧបទ្ទវហេតុនេះ កើតឡើងនៅពេលលោក Raisi វិលត្រឡប់ពីពិធីសម្ពោធទំនប់វារីអគ្គិសនីថ្មីមួយ ដែលសាងសង់នៅព្រំដែនជាមួយប្រទេស អាស៊ែរបៃហ្សង់។

តាមពិតទៅឧទ្ធម្ភាគចក្រទាំងអស់មានចំនួន៣គ្រឿង ដោយ២គ្រឿងមានដឹកមន្ត្រីរដ្ឋាភិបាលប៉ុន្តែបានធ្វើដំណើរទៅដល់គោលដៅដោយសុវត្ថិភាព អកុសលតែឧទ្ធម្ភាគចក្រមួយគ្រឿង ដឹកលោកប្រធានធិបតីនិងរដ្ឋមន្ត្រីការបរទេស Hossein Amir-Abdollahian ព្រមទាំងអ្នកមុខអ្នកការផ្សេងទៀត បែរជាត្រូវធ្លាក់នៅក្នុងតំបន់ជួរភ្នំដាច់ស្រយាល។

លោក Raisi គឺជាបុគ្គលអភិរក្សនិយមជ្រុល និងបានចេញបញ្ជាឲ្យមានការបង្ក្រាបនានាលើគូប្រជែង ជាពិសេសលោកគឺជាអ្នកប្រឆាំងដាច់ខាតជាមួយអ៊ីស្រាអែល។ ម្យ៉ាងវិញទៀត លោកក៏ជាអ្នកគាំទ្រខ្លាំងក្លារបស់ក្រុមហាម៉ាសផងដែរ ខណៈបច្ចុប្បន្នចលនាសកម្មប្រយុទ្ធប៉ាឡេស្ទីនមួយនេះ កំពុងជាប់ដៃធ្វើសង្គ្រាមជាមួយអ៊ីស្រាអែល។ លោក Raisi ក៏ជាអ្នកចេញបញ្ជាឲ្យបាញ់មីស៊ីលនិងដ្រូន ទៅវាយប្រហារប្រទេសអ៊ីស្រាអែលផងដែរ។

ទោះបីជាយ៉ាងណាក៏ដោយ ទីក្រុងហ្ស៊េរុយសាឡិម បានចេញមុខបដិសេធហើយថា ខ្លួនគ្មានអ្វីពាក់ព័ន្ធនឹងហេតុការណ៍នេះទេ ហើយភាគីអ៊ីរ៉ង់ ក៏មិនទាន់និយាយអ្វីខ្លាំងទាក់ទងរឿងនេះដែរ។

ត្បិតមានការលើកឡើងបែបនេះក្តី តែក្រុមអ្នកវិភាគអន្តរជាតិមួយចំនួនបានបង្ហាញក្តីបារម្ភថា ប្រសិនបើទីក្រុងតេហេរ៉ង់ រកឃើញតម្រុយណាមួយ ពាក់ព័ន្ធការធ្វើឃាតមែននោះ ច្បាស់ណាស់ស្ថានការណ៍នៅមជ្ឈិមបូព៌ា នឹងឡើងកម្តៅខ្លាំង ហើយឈានទៅដល់ការផ្ទុះសង្គ្រាមធំជាក់ជាមិនខាន ស្របពេលដែលភាពវឹកវរបច្ចុប្បន្ន បាននាំតំបន់នេះឲ្យដើរដល់មាត់ជ្រោះមរណៈរួចទៅហើយ៕ 

អត្ថបទ៖ សុខ សុវណ្ណ

ចុចអាន៖ លម្អិតហេតុការណ៍ធ្លាក់ឧទ្ធម្ភាគចក្រ ឆក់យកជីវិត ប្រធានាធិបតីអ៊ីរ៉ង់

The post មរណភាពប្រធានាធិបតីអ៊ីរ៉ង់ ជះឥទ្ធិពលអាក្រក់២យ៉ាង ដល់ពិភពលោក appeared first on Kampuchea Thmey Daily.

ថ្ងៃនេះកម្ពុជាថ្មី សូមជម្រាបជូនពីប្រវត្តិខ្លះៗរបស់លោក Raisi ដែលជាមេដឹកនាំមួយរូប ប្រឈមមុខនឹងការដាក់ទណ្ឌកម្មពីសហរដ្ឋអាមេរិក ​ព្រមទាំងប្រជាជាតិដទៃទៀត ពាក់ព័ន្ធការប្រហារជីវិតអ្នកទោសទ្រង់ទ្រាយធំក្នុងឆ្នាំ១៩៨៨។

Raisi កើតក្នុងគ្រួសារត្រកូល Raissi ជាបព្វជិតឥស្លាមនិកាយស៊ីអ៊ីតនាទីក្រុង Mashhad នៅថ្ងៃទី១៤ខែធ្នូ ឆ្នាំ១៩៦០។ គាត់រៀបការក្នុងឆ្នាំ១៩៨៣ ជាមួយភរិយា Jamileh Alamolhoda និងមានកូន២នាក់ជាចំណងដៃ។ កាលនៅក្មេង គាត់គឺជាអ្នកគាំទ្របដិវត្តឥស្លាមឆ្នាំ ១៩៧៨-៧៩ ហើយថែមទាំងបានចូលរួមក្នុងការបះបោររបស់និស្សិតថែមទៀតផង។

ក្រោយបញ្ចប់ការសិក្សានៅសាលាឥស្លាមក្នុងខេត្ត Qom និងបញ្ចប់ការសិក្សាផ្នែកច្បាប់ឥស្លាមនៅសកលវិទ្យាល័យ Shaheed Motahari, លោក Raisi បានបន្តអាជីពក្នុងប្រព័ន្ធតុលា​ការរបស់ប្រទេសអ៊ីរ៉ង់ ដោយបម្រើការជារដ្ឋអាជ្ញារងនៃទីក្រុងតេហេរ៉ង់ ចាប់ពីឆ្នាំ១៩៨៥រហូតដល់ឆ្នាំ១៩៨៩ ហើយក្រោយមក គាត់ត្រូវបានតែងតាំងជា រដ្ឋអាជ្ញាទីក្រុងតេហេរ៉ង់ តែម្តង។

នៅឆ្នាំ១៩៩៤ គាត់បានក្លាយជាប្រធានអង្គការអធិការកិច្ចទូទៅរបស់អ៊ីរ៉ង់ ដោយកាន់មុខតំណែងនេះរហូតដល់ឆ្នាំ២០០៤ មុនពេលត្រូវបានតែងតាំងជាអនុប្រធានចៅក្រមនៃប្រទេសអ៊ីរ៉ង់។ ចាប់ពីឆ្នាំ២០១២ដល់ឆ្នាំ២០២១ លោក Raisi ក៏បានកាន់តំណែងជាអគ្គរដ្ឋអាជ្ញានៃតុលាការពិសេសសម្រាប់បព្វជិតផងដែរ។

នៅឆ្នាំ២០២១ដដែលនោះ លោក Raisi ដែលតំណាងឲ្យក្រុមសមាគមបព្វជិតអភិរក្សនិយម គឺត្រូវបានជ្រើសរើសជាប្រធានាធិបតីនៃសាធារណរដ្ឋឥស្លាមអ៊ីរ៉ង់ ដោយទទួលបានសំឡេងគាំទ្រ៦២%។

ក្នុង​អំឡុង​ពេល​កាន់​តំណែង​ជា​ប្រធានាធិបតី​ ​លោក Raisi បាន​តស៊ូ​មតិឲ្យ​មាន​ទំនាក់ទំនងស្អិតរមួត​ជាមួយ​រុស្ស៊ីនិង​ចិន ហើយព្យាយាមស្តារ​ទំនាក់ទំនង​ជាមួយ​អារ៉ាប៊ីសាអូឌីត ​ដែល​គ្រប់គ្រង​ដោយ​និកាយ​ស៊ុននី តាមរយៈការ​បង្កើត​ទំនាក់ទំនង​ការទូត​ឡើងវិញ​ជាមួយទីក្រុងរីយ៉ាដ។

លើសពីនេះ ក្រោមការដឹកនាំរបស់គាត់ ប្រទេសអ៊ីរ៉ង់បានពង្រឹងសមត្ថភាពរបស់ខ្លួនដើម្បីការពារផលប្រយោជន៍និងអធិបតេយ្យ មិនត្រឹមតែផ្នែកការទូតប៉ុណ្ណោះទេ ប៉ុន្តែថែមទាំងកម្លាំងយោធាទៀតផង។

ដោយត្រូវបានគេមើលឃើញថាទាំងជាមនុស្សគួរឲ្យគោរព និងជាបុគ្គលដែលមានភាពចម្រូងចម្រាស, លោក Raisi តែងគាំទ្រសេវាសន្តិសុខអ៊ីរ៉ង់ រាល់ពេលពួកគេបើកការបង្ក្រាបលើក្រុមប្រឆាំង រួមទាំងបន្ទាប់ពីការស្លាប់ក្នុងឆ្នាំ២០២២របស់នាង Mahsa Amini ក្រោយត្រូវបានចាប់ខ្លួនពីបទចោទប្រកាន់ថា មិនពាក់ hijab ឲ្យបានត្រឹមត្រូវផងដែរ។

ក្រោយមកក៏ផ្ទុះមហាបាតុកម្ម ហើយការ​បង្រ្កាប​សន្តិសុខ​រយៈពេលរាប់​ខែ ​បាន​សម្លាប់​មនុស្ស​ជាង៥០០នាក់ ខណៈ​ជាង ២២ ០០០នាក់​ត្រូវបានចាប់​ឃុំខ្លួន។

ចុងក្រោយបំផុត ពោលគឺនៅខែមេសា គាត់ក៏គាំទ្រសេចក្តីសម្រេច ឲ្យបើកការវាយប្រហារដោយយន្តហោះដ្រូន និងមីស៊ីលលើអ៊ីស្រាអែលផងដែរ ចំពេលមានសង្រ្គាមជាមួយក្រុមហាម៉ាស៕

អត្ថបទ៖ សុខ សុវណ្ណ

ចុចអាន៖ លម្អិតហេតុការណ៍ធ្លាក់ឧទ្ធម្ភាគចក្រ ឆក់យកជីវិត ប្រធានាធិបតីអ៊ីរ៉ង់

The post ប្រធានាធិបតីអ៊ីរ៉ង់ Ebrahim Raisi មានប្រវត្តិបែបណា? appeared first on Kampuchea Thmey Daily.

តាមពិតទៅដំបូងឡើយ ឧទ្ធម្ភាគចក្រប្រភេទនេះ ត្រូវបានក្រុមហ៊ុន Bell Helicopter ផលិតឲ្យយោធាកាណាដាទេ កាលពីចុងទសវត្សរ៍ឆ្នាំ១៩៦០ ដោយមានស៊េរីដើមឈ្មោះថា UH-1 Iroquois។ 

ក្រោយមកឧទ្ធម្ភាគចក្រនេះ ត្រូវបានរចនាថ្មីដោយប្រើម៉ាស៊ីន Turboshaft ចំនួន២ ដើម្បីឲ្យវាមានកម្លាំងផ្ទុកបានកាន់តែច្រើន ខណៈស៊េរីចាស់មានបំពាក់ត្រឹមតែម៉ាស៊ីនមួយប៉ុណ្ណោះ។

អ្វីដែលគេសរសើរលើ Bell 212 គឺថា ឧទ្ធម្ភាគចក្រនេះអាចសម្របខ្លួនបានគ្រប់ស្ថានភាពទាំងអស់ រួមទាំងការដឹកមនុស្ស ដាក់ពង្រាយឧបករណ៍ពន្លត់អគ្គិភ័យ ដឹកទំនិញនិងបំពាក់អាវុធបានទៀតផង។

មិនមែនតែអ៊ីរ៉ង់ទេ ឧទ្ធម្ភាគចក្រ Bell 212 នេះក៏ត្រូវបានប្រទេសមួយចំនួនទៀតប្រើប្រាស់ផងដែរ តួយ៉ាងដូចជាឆ្មាំសមុទ្រជប៉ុន, ភ្នាក់ងារអនុវត្តច្បាប់និងនាយកដ្ឋានពន្លត់អគ្គិភ័យអាមេរិក និងប៉ូលិសជាតិថៃ ជាដើម។

ទោះបីជាយ៉ាងណាក៏ដោយ គេមិនច្បាស់ទេថាតើរដ្ឋាភិបាលអ៊ីរ៉ង់ប្រតិបត្តិការឧទ្ធម្ភាគចក្រ ប្រភេទនេះសរុបប៉ុន្មានគ្រឿង ប៉ុន្តែបើយោងតាមបញ្ជីកម្លាំងទ័ពអាកាសពិភពលោកឆ្នាំ២០២៤ របស់គេហទំព័រ FlightGlobal បានបង្ហាញថា ទ័ពអាកាសនិងកងទ័ពជើងទឹកអ៊ីរ៉ង់ មានឧទ្ធម្ភាគចក្រនេះសរុបចូលគ្នាចំនួន១០គ្រឿង។

សូមបញ្ជាក់ថា មុនគ្រោះអកុសលឆក់យកជីវិតមន្ត្រីជាន់ខ្ពស់អ៊ីរ៉ង់, ហេតុការណ៍ធ្លាក់ឧទ្ធម្ភាគចក្រ Bell 212 លើកចុងក្រោយបំផុត គឺកើតឡើងក្នុងខែកញ្ញាឆ្នាំ២០២៣ ដែលកាលនោះ គឺជាការធ្លាក់ឧទ្ធម្ភាគចក្រឯកជននៅឯឆ្នេរសមុទ្រនៃប្រទេសអារ៉ាប់រួម៕

អត្ថបទ៖ សុខ សុវណ្ណ

ចុចអាន៖ លម្អិតហេតុការណ៍ធ្លាក់ឧទ្ធម្ភាគចក្រ ឆក់យកជីវិត ប្រធានាធិបតីអ៊ីរ៉ង់

The post ឧទ្ធម្ភាគចក្រដឹកប្រធានាធិបតីអ៊ីរ៉ង់ គឺផលិតដោយអាមេរិក មួយគ្រឿងតម្លៃ ១លាន ៨សែនដុល្លារ appeared first on Kampuchea Thmey Daily.

ដំណឹងដ៏រន្ធត់នេះ បានធ្វើឲ្យពិភពលោកមានភាពតក់ស្លុតយ៉ាងខ្លាំង ហើយកើតឡើងចំពេលស្ថានភាពភូមិសាស្រ្តនយោបាយជាសកល កំពុងឡើងកម្តៅខ្លាំងដូចបាយពុះ ប៉ុន្តែអ៊ីស្រាអែល បានចេញមុខបញ្ជាក់ហើយថា ខ្លួនមិនពាក់ព័ន្ធនឹងរឿងនេះទេ។

ដូចនេះ មកដឹងហេតុការណ៍ខាងលើ ឲ្យលម្អិតទាំងអស់គ្នា!

តាមរយៈការផ្សាយរបស់ទីភ្នាក់ងារសារព័ត៌មាន Tasnim, ឧបទ្ទវហេតុនេះ កើតឡើងនៅពេលលោក Raisi វិលត្រឡប់ពីពិធីសម្ពោធទំនប់វារីអគ្គិសនីថ្មីមួយ ដែលសាងសង់នៅព្រំដែនជាមួយប្រទេស អាស៊ែរបៃហ្សង់។

តាមពិតទៅឧទ្ធម្ភាគចក្រទាំងអស់មានចំនួន៣គ្រឿង ដោយ២គ្រឿងមានដឹកមន្ត្រីរដ្ឋាភិបាលប៉ុន្តែបានធ្វើដំណើរទៅដល់គោលដៅដោយសុវត្ថិភាព អកុសលតែឧទ្ធម្ភាគចក្រមួយគ្រឿង ដឹកលោកប្រធានធិបតីនិងរដ្ឋមន្ត្រីការបរទេស Hossein Amir-Abdollahian ព្រមទាំងអ្នកមុខអ្នកការផ្សេងទៀត បែរជាត្រូវធ្លាក់នៅក្នុងតំបន់ជួរភ្នំដាច់ស្រយាល។

ក្រៅពីប្រធានាធិបតីនិងរដ្ឋមន្ត្រីកាបរទេស, មនុស្សស្លាប់ផ្សេងទៀតក្នុងហេតុការណ៍នេះ មានដូចជាលោក Ayatollah Mohammad Ali Al-e Hashem ដែលបុព្វជិតរៀបចំការអធិស្ឋានថ្ងៃសុក្រនៅទីក្រុង Tabriz, ឧត្តមសេនីយ៍ Malek Rahmati អភិបាលខេត្ត East Azerbaijan, មេបញ្ជាការ​អង្គភាព​ការពារ​ប្រធានាធិបតី Sardar Seyed Mehdi Mousavi ព្រមទាំងអង្គរក្សនិង​ក្រុម​នាវិក​ឧទ្ធម្ភាគចក្រ​ សរុបទាំងអស់ ៩នាក់។

ឧទ្ធម្ភាគចក្រ Bell 212 ដែលដឹកលោកប្រធានាធិបតិ គឺជាឧទ្ធម្ភាគចក្រផលិតដោយសហរដ្ឋអាមេរិក ជំនាន់ថ្មី ប៉ុន្តែមានជាប់សែស្រឡាយជាមួយឧទ្ធម្ភាគចក្រផលិតក្នុងទសវត្សរ៍ឆ្នាំ១៩៦០មកម្ល៉េះ​ ហើយឧទ្ធម្ភាគចក្រនេះ មានសមត្ថភាពផ្ទុកមនុស្សបាន១៥នាក់ រួមទាំងអ្នកបើក។

ងាកទៅមើលការស្លាប់របស់លោក Raisi ឯណោះវិញ, យោងតាមរដ្ឋធម្មនុញ្ញរបស់ប្រទេសអ៊ីរ៉ង់, បើប្រធានាធិបតីស្លាប់នៅក្នុងតំណែង មាត្រា១៣១ បានចែងថា អនុប្រធានាធិបតីទីមួយ គឺលោក Mohammad Mokhber នឹងចូលកាន់តំណែងជំនួស ដោយមានការបញ្ជាក់ពីមេដឹកនាំ ហើយក្រុមប្រឹក្សាដែលមានអនុប្រធានាធិបតីទីមួយ ប្រធានសភា និងប្រធានតុលាការ ត្រូវរៀបចំការបោះឆ្នោតជ្រើសរើសប្រធានាធិបតីថ្មីក្នុងរយៈពេលអតិបរមា ៥០ថ្ងៃ៕

អត្ថបទ៖ សុខ សុវណ្ណ

ចុចអាន៖ ប្រធានាធិបតីអ៊ីរ៉ង់និងរដ្ឋមន្ត្រីការបរទេស ធ្លាក់ឧទ្ធម្ភាគចក្រជាមួយគ្នា មិនទាន់ដឹងជោគវាសនាបែបណា

The post លម្អិតហេតុការណ៍ធ្លាក់ឧទ្ធម្ភាគចក្រ ឆក់យកជីវិត ប្រធានាធិបតីអ៊ីរ៉ង់ appeared first on Kampuchea Thmey Daily.

គ្រោះអាក្រក់នេះកើតឡើង នៅពេលលោក Raisi វិលត្រឡប់ពីដំណើរទស្សនកិច្ចទៅកាន់ព្រំដែនជាមួយអាស៊ែបៃហ្សង់ នៅភាគពាយព្យប្រទេសអ៊ីរ៉ង់។

តាមការចុះផ្សាយរបស់ទីភ្នាក់ងារព័ត៌មានរដ្ឋអ៊ីរ៉ង់ IRNA បានឲ្យដឹងថា ឧទ្ធម្ភាគចក្រដែលលោក Raisi ជិះគឺជាប្រភេទ Bell 212 ផលិតដោយសហរដ្ឋអាមេរិក ហើយដោយសារតែបញ្ហាអាកាសធាតុ ទើបបណ្តាលឲ្យក្រុមជួយសង្គ្រោះពិបាកធ្វើការ ដើម្បីទៅឲ្យដល់ទីតាំងធ្លាក់។

ភ្លាមៗក្រោយដឹងព័ត៌មានអំពីគ្រោះអាក្រក់នេះ ទូរទស្សន៍ជាតិ បានបញ្ឈប់រាល់កម្មវិធីធម្មតាទាំងអស់ ជំនួសមកវិញដោយការអធិស្ឋានសម្រាប់លោក Raisi នៅទូទាំងប្រទេស។

ពាក់ព័ន្ធបញ្ហានេះដែរ ប្រទេសជិតខាងគឺតួកគី បានបញ្ជូនយន្តហោះគ្មានមនុស្សបើក ឧទ្ធម្ភាគចក្រ យានជំនិះ និងក្រុមជួយសង្គ្រោះ តាមការសុំជំនួយពីអាជ្ញាធរអ៊ីរ៉ង់ ខណៈសហភាពអឺរ៉ុបបានផ្តល់បច្ចេកវិទ្យាផែនទីផ្កាយរណបសង្គ្រោះបន្ទាន់ ដើម្បីជួយដល់ការស្វែងរក។

ហេតុការណ៍នេះកើតឡើង ចំពេលប្រទេសអ៊ីរ៉ង់ កំពុងជួបបញ្ហាបែកបាក់ផ្ទៃក្នុងកាន់តែខ្លាំងឡើង ជុំវិញវិបត្តិនយោបាយ សង្គម និងសេដ្ឋកិច្ច ហើយមេដឹកនាំអ៊ីរ៉ង់ ត្រូវប្រឈមមុខនឹងសម្ពាធធ្ងន់.ក ជាអន្តរជាតិជុំវិញកម្មវិធីនុយក្លេអ៊ែរ និងទំនាក់ទំនងយោធាកាន់តែស្អិតរមួតជាមួយរុស្ស៊ី ជុំវិញសង្គ្រាមនៅអ៊ុយក្រែន។

លើសពីនេះ ចាប់តាំងពីសម្ព័ន្ធរបស់ខ្លួនគឺក្រុមហាម៉ាស បើកការវាយប្រហារអ៊ីស្រាអែលកាលពីថ្ងៃទី៧ខែតុលាឆ្នាំ២០២៣មក ការប៉ះទង្គិចគ្នាដែលពាក់ព័ន្ធនឹងក្រុមសម្ព័ន្ធមិត្តអ៊ីរ៉ង់ បានផ្ទុះឡើងឥតស្រានស្រាន្តនៅទូទាំងតំបន់មជ្ឈិមបូព៌ា។

សូមបញ្ជាក់ថា Raisi វ័យ៦៣ឆ្នាំ បានជាប់ឆ្នោតជាប្រធានាធិបតីក្នុងឆ្នាំ២០២១ ហើយចាប់តាំងពីការឡើងកាន់តំណែងមក លោកបានបញ្ជាឲ្យរឹតបន្តឹងច្បាប់សីលធម៌ បើកការបង្រ្កាបបង្ហូរឈាមលើបាតុកម្មប្រឆាំងរដ្ឋាភិបាល និងថែមទាំងជំរុញឲ្យមានកិច្ចចរចានុយក្លេអ៊ែរជាមួយមហាអំណាចពិភពលោកទៀតផង៕

អត្ថបទ៖ សុខ សុវណ្ណ

ចុចអាន៖ អ៊ីរ៉ង់​ គំរាមកម្ទេចអ៊ីស្រាអែល ឲ្យក្លាយជាផេះ

The post ប្រធានាធិបតីអ៊ីរ៉ង់និងរដ្ឋមន្ត្រីការបរទេស ធ្លាក់ឧទ្ធម្ភាគចក្រជាមួយគ្នា មិនទាន់ដឹងជោគវាសនាបែបណា appeared first on Kampuchea Thmey Daily.