លោក Ferdinand Marcos Jr Archives - Kampuchea Thmey Daily

ជំហរហ្វីលីពីន នឹងមិនខុសពីម៉ាឡេស៊ីទេ ក្នុងការដោះស្រាយជម្លោះកម្ពុជា-ថៃក្នុងឋានៈប្រធានអាស៊ាន

Rann Reuy — Sun, 28 Dec 2025 05:41:04 +0000

ការឈានទៅដល់ចំណុចត្រូវរ៉ូវគ្នារវាងកម្ពុជានិងថៃនៅមុនដំណាច់ឆ្នាំ២០២៥ អាចជាពរជ័យមួយសម្រាប់ប្រទេសហ្វីលីពីនដែលនឹងក្លាយជាប្រធានអាស៊ាននៅឆ្នាំ២០២៦។

លោក អាន់វ៉ា អ៊ីប្រាហ៊ីមប្រគល់ញញូរក្នុងឋានៈប្រធានអាស៊ានទៅឲ្យប្រធានាធិបតីហ្វីលីពីន។ FB/anwar

លោក អាន់វ៉ា អ៊ីប្រាហ៊ីម ក្នុងឋានៈជាប្រធានអាស៊ាននៅក្នុងឆ្នាំ២០២៥ ត្រូវបានគេមើលឃើញថា បានប្រឹងប្រែងយ៉ាងខ្លាំងក្នុងមធ្យោបាយការទូតដើម្បីសម្របសម្រួលក្នុងជម្លោះថៃនិងកម្ពុជាដែលបានផ្ទុះអាវុធផ្អើលពិភពលោកនៅថ្ងៃទី២៤ខែតុលាឆ្នាំ២០២៥ ហើយ តាមរយៈការផ្សះផ្សារបស់លោក អាន់វ៉ា ដោយមានការជួយគាំទ្រពីសំណាក់សហរដ្ឋអាមេរិកនិងចិន។

តាមរយៈការខិតខំប្រឹងប្រែងនោះ បទឈប់បាញ់លើកទី១ ត្រូវបានរកឃើញនៅថ្ងៃទី២៨ខែកក្កដា និង ការខិតខំចរចាបន្តបន្ទាប់ទៀតរបស់ប្រធានអាស៊ាន ភាគីជម្លោះបានសម្រេចបានកិច្ចព្រមព្រៀងសន្តិភាពផ្លូវការចុះថ្ងៃទី២៦ខែតុលាឆ្នាំ២០២៥ ដែលចុះហត្ថលេខាក្រោមវត្តមានប្រធានាធិបតីសហរដ្ឋអាមេរិក លោក ដូណាល់ ត្រាំ។

ប៉ុន្តែកិច្ចព្រមព្រៀងដ៏ផុយស្រួយនោះ បានធ្លុះធ្លាយទៅវិញដោយសារតែថៃប្រកាសលុបចោលជាឯកតោភាគី និង បង្កការផ្ទុះអាវុធជាថ្មីនៅថ្ងៃទី៧ខែធ្នូឆ្នាំ២០២៥ ដែលធ្វើឲ្យអន្តរជាតិប្រឹងប្រែងជាថ្មីដើម្បីផ្សះផ្សាជម្លោះនេះអស់រយៈពេល២១ថ្ងៃ ទើបកិច្ចព្រមព្រៀងថ្មីមួយទៀតរកឃើញ ដោយចាប់ផ្តើមអនុវត្តពីថ្ងៃទី២៧ខែធ្នូ និងមានតែរយៈពេលប៉ុន្មានថ្ងៃប៉ុណ្ណោះ ដែលប្រធានអាស៊ានត្រូវប្តូរ។

លោក អាន់វ៉ា អ៊ីប្រាហ៊ីម ដែលប្រឹងប្រែងក្នុងដំណាក់កាលចុងក្រោយក្នុងឋានៈជាប្រធានអាស៊ាននេះ បានបង្ហាញការស្វាគមន៍ចំពោះបទឈប់បាញ់ថ្មីដែលកម្ពុជានិងថៃសម្រេចបាន ដែលបទឈប់បាញ់នេះនឹងបញ្ឈប់រាល់ការប្រយុទ្ធគ្នា។

ទោះបីជាផុតតួនាទីជាប្រធានអាស៊ាននៅពាក់កណ្តាលរាត្រីថ្ងៃទី៣១ខែធ្នូឈានចូលថ្ងៃទី១ខែមករាឆ្នាំ២០២៦ លោក អាន់វ៉ា បានបង្ហាញការគាំទ្រគ្រប់បែបយ៉ាងដល់ប្រធានអាស៊ានថ្មី គឺប្រទេសហ្វីលីពីន។

លោក អាន់វ៉ា សរសេររៀបរាប់ថា៖«យើងនឹងគាំទ្ររាល់កិច្ចខិតខំប្រឹងប្រែងដើម្បីធានាថាកិច្ចការទាំងនេះត្រូវបានផ្តល់កិត្តិយស ហើយកិត្យានុភាព និងភាពជឿជាក់របស់អាស៊ានក្នុងនាមជាតំបន់សន្តិភាពត្រូវបានរក្សាទុក»។

រដ្ឋាភិបាលហ្វីលីពីនមិនទាន់បង្ហាញជំហរអ្វីមួយពាក់ព័ន្ធនឹងបទឈប់បាញ់ចុងក្រោយរវាងកម្ពុជានិងប្រទេសថៃចុងក្រោយនេះទេ ប៉ុន្តែប្រធានាធិបតីហ្វីលីពីន លោក Ferdinand R. Marcos Jr. បាននិយាយកាលពីខែកញ្ញាឆ្នាំ២០២៥ ក្នុងពេលដែលប្រទេសកម្ពុជានិងថៃអនុវត្តបទឈប់បាញ់លើកដំបូង ថា ប្រទេសហ្វីលីពីននឹងដាក់ពង្រាយតំណាងក្រុមអ្នកសង្កេតការណ៍បណ្តោះអាសន្នដែលត្រូវបានបង្កើតឡើងដើម្បីត្រួតពិនិត្យការអនុវត្តបទឈប់បាញ់នៅក្នុងតំបន់ព្រំដែនកម្ពុជា-ថៃ។

ក្នុងការជ្រុមជ្រែងប្រទេសម៉ាឡេស៊ីក្នុងការអនុវត្តការតាមដានការអនុវត្តបទឈប់បាញ់ ហ្វីលីពីនបានបញ្ជូនបុគ្គលិកយោធាដើម្បីចូលរួមជាមួយក្រុមអង្កេតការណ៍អាស៊ាន ដឹកនាំដោយម៉ាឡេស៊ី និងបង្ហាញការប្តេជ្ញាចិត្តចំពោះការអនុវត្តបទឈប់បាញ់នោះឲ្យមានប្រសិទ្ធភាព។

សារព័ត៌មានហ្វីលីពីន Philippine Daily Inquirer បានស្រង់សម្តី លោក Marcos ដូចបាននិយាយកាលពីខែកញ្ញាថា៖«យើងបន្តនិយាយថា ដរាបណាវាទាក់ទងនឹងហ្វីលីពីន និងអាស៊ាន [សមាគមប្រជាជាតិអាស៊ីអាគ្នេយ៍] យើងនៅទីនេះដើម្បីជួយ។ ហើយចាប់តាំងពីប្រទេសទាំងពីរជាមិត្តរបស់យើង យើងជាមិត្តនឹងកម្ពុជា និងថៃ យើងទាំងអស់គ្នាជាសមាជិកអាស៊ាន យើងមិនចង់ឃើញរដ្ឋសមាជិកអាស៊ានជួបប្រទះបញ្ហានោះទេ»។

លោក Marcos បានបន្ថែមថា៖«នោះហើយជាមូលហេតុដែលខ្ញុំតែងតែពន្យល់ថាហ្វីលីពីនត្រៀមខ្លួនជាស្រេចដើម្បីដើរតួនាទីណាមួយដែលនឹងជួយពង្រឹងបទឈប់បាញ់»។

រហូតមកដល់ពេលនេះ ប្រទេសមហាអំណាចនានានិងស្ថាប័នអន្តរជាតិ កំពុងតាមដានយ៉ាងដិតដល់ចំពោះការអនុវត្តបទឈប់បាញ់រវាងកម្ពុជានិងថៃ ដែលបានចូលជាធរមានអស់រយៈពេលជាង២៤ម៉ោង ក្នុងកាលកំណត់៧២ម៉ោង មុនឈានទៅអនុវត្តបទកិច្ចព្រមព្រៀងសន្តិភាពដែលបានចុះហត្ថលេខានៅទីក្រុងកូឡាឡាំពួកាលពីចុងខែតុលា២០២៥៕

រ៉ាន់ រើយ

រូបភាពទទួលញញួរប្រធានអាស៊ានរបស់ប្រធានាធិបតីហ្វីលីពីន។

The post ជំហរហ្វីលីពីន នឹងមិនខុសពីម៉ាឡេស៊ីទេ ក្នុងការដោះស្រាយជម្លោះកម្ពុជា-ថៃក្នុងឋានៈប្រធានអាស៊ាន appeared first on Kampuchea Thmey Daily.

អតីតអភិបាលក្រុង នៅហ្វីលីពីន ត្រូវជាប់ពន្ធនាគារ១ជីវិត ព្រោះជួញដូរមនុស្ស

Rann Reuy — Thu, 20 Nov 2025 09:15:32 +0000

ទីភ្នាក់ងារប្រឆាំងឧក្រិដ្ឋកម្មរបស់រដ្ឋាភិបាលបាននិយាយកាលពីថ្ងៃព្រហស្បតិ៍ទី២០ វិច្ឆិកា ថា តុលាការជំនុំជម្រះហ្វីលីពីន បានកាត់ទោសអតីតអភិបាលក្រុងដែលត្រូវបានចោទប្រកាន់ពីបទមានទំនាក់ទំនងជាមួយក្រុមឧក្រិដ្ឋជនចិនឱ្យជាប់ពន្ធនាគារអស់មួយជីវិត បន្ទាប់ពីរកឃើញថា អតីតអភិបាលក្រុងជាស្រ្តីរូបនោះ មានទោសពីបទជួញដូរមនុស្ស។ នេះបើយោងតាមរ៉យទ័រ។

នាង Alice Guo ពេលនៅជាអភិបាលក្រុង។

នាង Alice Guo បានឈរឈ្មោះជាអភិបាលក្រុង Bamban ដែលជាទីក្រុងកសិកម្មភាគខាងជើងនៃទីក្រុងម៉ានីស ជាពលរដ្ឋហ្វីលីពីន ប៉ុន្តែក្រោយមកនាងត្រូវបានសមត្ថកិច្ចកំណត់អត្តសញ្ញាណថា ជាជនជាតិចិន មានឈ្មោះថា «Guo Hua Ping»។

តាមរ៉យទ័រ មេធាវីរបស់ នាង Guo មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។ នាង Guo ធ្លាប់បដិសេធមិនទាក់ទងនឹងឧក្រិដ្ឋជន ហើយក៏បានបញ្ជាក់ថា នាងជាពលរដ្ឋហ្វីលីពីនពីកំណើតផងដែរ។

ព្រឹទ្ធសភាហ្វីលីពីន បានចាប់ផ្តើមការស៊ើបអង្កេតសភាមួយទៅកាន់សំណុំរឿងរបស់នាង Guo កាលពីខែឧសភាឆ្នាំមុន ពីរខែបន្ទាប់ពីការឆ្មក់របស់ប៉ូលីសបានបង្ហាញពីមជ្ឈមណ្ឌលបោកប្រាស់ដែលប្រតិបត្តិការចេញពីកន្លែងសាងសង់នៅលើដីដែលកាន់កាប់ដោយផ្នែករបស់នាង Guo។ វាជាមជ្ឈមណ្ឌលមួយក្នុងចំនោមមជ្ឈមណ្ឌលឆបោកជាច្រើនដែលកើតមាននៅពាសពេញអាស៊ីអាគ្នេយ៍ក្នុងប៉ុន្មានឆ្នាំថ្មីៗនេះ។

ការឆ្មក់ចូលរបស់ប៉ូលិសកាលពេលនោះ បានរកឃើញកម្មកររាប់រយនាក់ដែលត្រូវបានជួញដូររួមទាំងជនបរទេសផងដែរ ដែលបណ្តាលឱ្យមានការប្តឹងពីការជួញដូរមនុស្សប្រឆាំងនឹង នាង Guo ពីគណៈកម្មាធិការប្រឆាំងឧក្រិដ្ឋកម្មដែលរៀបចំដោយប្រធានាធិបតី (PAOCC)។

PAOCC បាននិយាយថា តុលាការក៏បានកាត់ទោសបុគ្គលប្រាំពីរនាក់ផ្សេងទៀតពីបទជួញដូរមនុស្ស និងកាត់ទោសពួកគេឱ្យជាប់ពន្ធនាគារអស់មួយជីវិត។ គ្រឿងបរិក្ខារដែលរឹបអូសបាន ត្រូវបានបញ្ជាប្រគល់ទៅឲ្យរដ្ឋាភិបាល។

ករណីរបស់ នាង Guo បានធ្វើឲ្យប្រទេសហ្វីលីពីន មានការសង្ស័យអំពីសកម្មភាពរបស់ចិន ត្រូវបានបង្កើតឡើងជាលទ្ធផលនៃភាពតានតឹងនៅក្នុងសមុទ្រចិនខាងត្បូង ដែលប្រទេសទាំងពីរមានការទាមទារតំបន់ត្រួតស៊ីគ្នា។

ព្រឹទ្ធសភាបានឃុំខ្លួននាង Guo ក្នុងការមើលងាយ ហើយបានបញ្ជាឱ្យចាប់ខ្លួននាង បន្ទាប់ពីនាងបដិសេធមិនចូលរួមសវនាការក្នុងសភា។ នាងបានភៀសខ្លួនចេញពីប្រទេស ប៉ុន្តែក្រោយមកត្រូវបានចាប់ខ្លួនក្នុងប្រទេសឥណ្ឌូណេស៊ី ហើយបាននិរទេសទៅប្រទេសហ្វីលីពីនវិញក្នុងខែកញ្ញា ឆ្នាំ២០២៤។

នាង Guo ដែលត្រូវបានដកចេញពីតំណែងដោយការិយាល័យចំពោះកិច្ចហ្វីលីពីន «Ombudsman» ក្នុងខែសីហា ឆ្នាំ ២០២៤ ពីបទប្រព្រឹត្តខុសធ្ងន់ធ្ងរ ក៏ប្រឈមមុខនឹងការចោទប្រកាន់ព្រហ្មទណ្ឌផ្សេងទៀត រួមទាំងអំពើពុករលួយ និងការលាងលុយកខ្វក់ផងដែរ៕

រ៉ាន់ រើយ

នាង Alice Guo ពេលនៅជាអភិបាលក្រុង។

The post អតីតអភិបាលក្រុង នៅហ្វីលីពីន ត្រូវជាប់ពន្ធនាគារ១ជីវិត ព្រោះជួញដូរមនុស្ស appeared first on Kampuchea Thmey Daily.

ប្រធានអាស៊ាន ជជែកអំពីជម្លោះព្រំដែន«កម្ពុជា-ថៃ»ជាមួយប្រធានាធិបតីហ្វីលីពីនដែលកំពុងបំពេញទស្សនកិច្ចនៅកម្ពុជា

Ngoeul Narath — Tue, 09 Sep 2025 03:02:50 +0000

នៅថ្ងៃទី០៨ ខែកញ្ញា នាយករដ្ឋមន្ត្រីម៉ាឡេស៊ីលោកអាន់វ៉ា អ៊ីប្រាហ៊ីម ប្រធានអាស៊ានប្ដូរវេនឆ្នាំ២០២៥ បានសន្ទនាតាមទូរស័ព្ទ អំពីជម្លោះព្រំដែនកម្ពុជា-ថៃ ជាមួយប្រធានាធិបតីហ្វីលីពីន Ferdinand Marcos Jr. ស្របពេលដែលកំពុងបំពេញទស្សនកិច្ចផ្លូវរដ្ឋនៅកម្ពុជា។នាយករដ្ឋមន្ត្រីម៉ាឡេស៊ីប្រកាសដូច្នេះតាមរយៈទំព័រ facebook ផ្លូវការនាល្ងាចថ្ងៃដដែល។

ប្រធានអាស៊ានឆ្នាំ២០២៥ នាយករដ្ឋមន្ត្រីម៉ាឡេស៊ី សរសេរលើទំព័រហ្វេសប៊ុកថា លោកបានជជែកជាមួយបេក្ខភាពប្រធានអាស៊ានឆ្នាំ២០២៦ ប្រធានាធិបតីហ្វីលីពីន ដូច្នេះ៖«យើងក៏បានពិភាក្សាផងដែរអំពីការអភិវឌ្ឍនៃជម្លោះថៃ-កម្ពុជា និងបន្តខិតខំប្រឹងប្រែងរួមគ្នាប្ដេជ្ញាចិត្តធ្វើឲ្យមានសន្តិភាព និងស្ថិរភាពក្នុងតំបន់។»។

នាយករដ្ឋមន្ត្រីម៉ាឡេស៊ី ក៏បានជជែកជាមួយប្រធានាធិបតីហ្វីលីពីន អំពីកិច្ចខិតខំប្រឹងប្រែងដើម្បីពង្រឹងទំនាក់ទំនងទ្វេភាគី និងពង្រឹងកិច្ចសហប្រតិបត្តិការក្នុងតំបន់ក្រោមក្របខណ្ឌអាស៊ាន និងបញ្ហាសន្តិសុខក្នុងតំបន់ ការអភិវឌ្ឍ សេដ្ឋកិច្ច និងតម្រូវការក្នុងការពង្រឹងឯកភាព និងកិច្ចសហប្រតិបត្តិការអាស៊ាន ក្នុងការប្រឈមមុខនឹងបញ្ហាភូមិសាស្ត្រនយោបាយនាពេលបច្ចុប្បន្ន។

ជម្លោះព្រំដែនកម្ពុជា ថៃ ចាប់ផ្ដើមតានតឹង ប្រឈមដាក់គ្នាខ្លាំងឡើង ក្រោយពីយោធាថៃបាញ់សម្លាប់យោធិនកម្ពុជាមួយរូប នៅវេលាព្រឹកព្រលឹមថ្ងៃទី២៨ ខែឧសភា នៅតំបន់មុំបីក្នុងដីកម្ពុជា។ ចាប់តាំងពីពេលនោះ នាយករដ្ឋមន្ត្រីម៉ាឡេស៊ី ដែលជាប្រធានអាស៊ាន បានជជែកជាមួយមេដឹកនាំកម្ពុជា និងថៃ ដើម្បីបន្ធូរបន្ថយភាពតានតឹង ប៉ុន្តែទោះបីមានការអន្តរាគមន៍ និងកិច្ចខិតខំប្រឹងប្រែងយ៉ាងណា ក៏ភាគីថៃនៅតែបំពាន និងបើកការបាញ់ប្រហារមកលើកងទ័ពកម្ពុជានៅព្រឹកថ្ងៃទី២៤ ខែកក្កដា ឆ្នាំ២០២៥ ដែលជាការបាញ់ប្រហារទ្រង់ទ្រាយធំ ប្រើប្រាស់អាវុធធន់ធ្ងន់ គ្រាប់បែកចង្កោម ផ្សែងពុល ដែលអន្តរជាតិហាមឃាត់ យន្តហោះចម្បាំងង ពង្រីកភូមិសាស្ត្រនៃការប្រយុទ្ធជាច្រើនទីតាំង។

ក្រោយមានការអន្តរាគមន៍ជាថ្មីពីសំណាក់ប្រធានអាស៊ានម៉ាឡេស៊ី និងពីសំណាក់ប្រធានាធិបតីអាមេរិក ទើបថៃ ព្រមទៅប្រជុំនៅម៉ាឡេស៊ីជាមួយភាគីកម្ពុជា ហើយឈាន់ដល់សម្រេចបានកិច្ចព្រមព្រៀងនៃបទឈប់បាញ់មួយជាបន្ទាន់ និងគ្មានលក្ខខណ្ឌ៕

The post ប្រធានអាស៊ាន ជជែកអំពីជម្លោះព្រំដែន«កម្ពុជា-ថៃ»ជាមួយប្រធានាធិបតីហ្វីលីពីនដែលកំពុងបំពេញទស្សនកិច្ចនៅកម្ពុជា appeared first on Kampuchea Thmey Daily.

ការប្រឌិតព័ត៌មានមិនពិតកើតឡើងច្រើននៅហ្វីលីពីន ជុំវិញរឿងក្តីរបស់ Duterte នៅ ICC

Rann Reuy — Sat, 22 Mar 2025 00:39:07 +0000

មានព័ត៌មានមិនពិតនិងប្រឌិតឡើងច្រើនជុំវិញក្រោយការចាប់ខ្លួនអតីតប្រធាធិបតីហ្វីលីពីន លោក Rodrigo Duterte បានវាយប្រហារយ៉ាងខ្លាំងលើបណ្តាញសង្គមនៅប្រទេសហ្វីលីពីន ជាទីដែលលោក Duterte សាងភាពល្បីល្បាញក្នុងសង្គ្រាមប្រឆាំងគ្រឿងញៀន និងត្រូវបានចាប់ខ្លួនពីបទប្រឆាំងមនុស្សជាតិរបស់តុលាការឧក្រិដ្ឋកម្មអន្តរជាតិ (ICC)។

លោក Duterter ត្រូវសាកសួរលើកដំបូងនៅតុលាការ ICC។ ICC

សារព័ត៌មាន South China Morning Post (SCMP) បានផ្សាយថា រលកនៃរឿងប្រឌិតលើបណ្តាញសង្គមនិងអ៊ីនធឺណិតពីអ្នកគាំទ្រអតីតប្រធានាធិបតីហ្វីលីពីនលោក Rodrigo Duterte បានលេចឡើងខ្លាំង បន្ទាប់ពីការចាប់ខ្លួនអតីតប្រធានាធិបតី Duterte ដោយតុលាការឧក្រិដ្ឋកម្មអន្តរជាតិ (ICC)។

ជាមួយការបញ្ចេញព័ត៌មានមិនពិតទាំងនោះ មានក្រុមអ្នកវិភាគអះអាងថា យុទ្ធនាការព័ត៌មានមិនពិតមិនត្រឹមតែមិនអាចជួយសំណុំរឿងរបស់លោក Duterte ប៉ុណ្ណោះទេ ប៉ុន្តែថែមទាំងធ្វើឱ្យប៉ះពាល់ដល់ការសម្រេចចិត្តរបស់តុលាការលើការដោះលែងបណ្តោះអាសន្នរបស់គាត់ថែមទៀតផង។

សូម្បីតែមុនពេលយន្តហោះចាកចេញពីទីក្រុងម៉ានីលក៏ដោយ ក៏ក្រុមអ្នកស្មោះត្រង់ Duterte បានចាប់ផ្តើមផ្សព្វផ្សាយរឿងក្លែងក្លាយ រួមទាំងការអះអាងថា តុលាការកំពូលហ្វីលីពីន បានផ្តល់ការហាមឃាត់បណ្តោះអាសន្ន ដើម្បីបញ្ឈប់ការផ្ទេររបស់គាត់។

ក្រៅពីនោះ ក៏មានការផ្សព្វផ្សាយមិនពិតដែលថា លោកស្រី Tomoko Akane ប្រធានចៅក្រមនៅតុលាការឧក្រិដ្ឋកម្មអន្តរជាតិ (ICC) បានដោះលែង លោក Duterte អតីតប្រធានាធិបតីហ្វីលីពីន នៅថ្ងៃទី២៦ខែមីនាឆ្នាំ២០២៥។

រូបភាពវ័យក្មេងរបស់លោកស្រី Tomoko Akane ដែលខុសឆ្ងាយពីវ័យចំណាស់របស់គាត់នាពេលបច្ចុប្បន្នជាប្រធានតុលាការឧក្រិដ្ឋកម្មអន្តរជាតិ ICC ដែលបង្ហោះលើបណ្តាញសង្គម បានសរសេរថា៖«ខ្ញុំជឿជាក់យ៉ាងខ្លាំងចំពោះភាពស្លូតបូតរបស់លោក Duterte។ ជាការឆ្លើយតបចំពោះការអំពាវនាវដ៏ទទូចពីប្រជាជនហ្វីលីពីន ព្រមទាំងការអំពាវនាវរបស់មេធាវី និងអ្នកជំនាញផ្នែកសិទ្ធិមនុស្ស ខ្ញុំបានសម្រេចចេញបញ្ជាឱ្យមានការដោះលែងរូបគាត់ នៅថ្ងៃទី២៦ខែមីនា ឆ្នាំ២០២៥នេះ ដើម្បីអនុញ្ញាតឱ្យគាត់អាចទៅធ្វើបុណ្យខួបកំណើតនៅផ្ទះរបស់គាត់។ ក្រៅពីនេះ ខ្ញុំក៏បានណែនាំឱ្យសាលាក្តីបដិសេធបទចោទប្រកាន់បទឧក្រិដ្ឋកម្មប្រឆាំងមនុស្សជាតិលើលោក Duterte និងឱ្យផ្តល់សេរីភាពដល់គាត់ជាបន្ទាន់»។

ការផ្សព្វផ្សាយព័ត៌មានមិនពិតពី ICC លើបណ្តាញសង្គម។ Instagram

ការចុះផ្សាយចុងក្រោយពាក់ព័ន្ធលោក Duterte លើគេហទំព័រ www.philstar.com បានអះអាងថា មេធាវីរបស់អតីតប្រធានាធិបតី Rodrigo Duterte បានទទួលស្គាល់ថា កូនក្តីរបស់គាត់ទំនងជាមិនវិលត្រឡប់ទៅប្រទេសហ្វីលីពីនវិញទេ ខណៈលោកប្រឈមមុខនឹងការកាត់ទោសនៅចំពោះមុខតុលាការឧក្រិដ្ឋកម្មអន្តរជាតិ (ICC)។

លោកស្រី Tomoko Akane ប្រធានចៅក្រមនៅតុលាការឧក្រិដ្ឋកម្មអន្តរជាតិ (ICC) ដែលមាននៅលើគេហទំព័ររបស់ ICC ។

តាមការចុះផ្សាយនោះ មេធាវីដែលត្រូវបានទទួលស្គាល់ដោយ ICC លោក Joel Butuyan បាននិយាយកាលពីថ្ងៃសុក្រទី២១ខែមីនាថា លោក Duterte អាចត្រូវបានបញ្ជូនមកផ្ទះវិញក្រោមសេណារីយ៉ូពីរប៉ុណ្ណោះ គឺការដោះលែង ឬទទួលបានការដោះលែងបណ្តោះអាសន្ន។ ទោះជាយ៉ាងណាលោកបាននិយាយថាលទ្ធភាពទាំងពីរនេះទំនងជាមិនទំនងកើតឡើងនោះទេ។

សារព័ត៌មានដដែលបានស្រង់សម្តីមេធាវីដែលបាននិយាយនៅក្នុងបទសម្ភាសន៍មួយនៅទីក្រុង Quezon ថា «ខ្ញុំមិនគិតថា makakabalik pa siya (ខ្ញុំមិនគិតថាគាត់នឹងត្រលប់មកវិញទេ)»។

លោក Duterte ត្រូវបានចាប់ខ្លួននៅអាកាសយានដ្ឋានទីក្រុងម៉ានីលកាលពីថ្ងៃទី ១១ខែមីនា ខណៈដែលគាត់ត្រឡប់ពីទីក្រុងហុងកុង ហើយបន្ទាប់មកប៉ូលិសអន្តរជាតិ (Interpol) បានចាប់បញ្ជូនតាមជើងហោះហើរឯកជនដែលបង់ប្រាក់ដោយរដ្ឋាភិបាលទៅកាន់ទីក្រុងឡាអេ ជាកន្លែងដែលគាត់ប្រឈមមុខនឹងការចោទប្រកាន់ពីបទឧក្រិដ្ឋកម្មប្រឆាំងមនុស្សជាតិសម្រាប់ការសម្លាប់ក្រៅប្រព័ន្ធតុលាការរាប់ពាន់នាក់ដែលបានកើតឡើងក្នុងសង្គ្រាមដ៏ឃោរឃៅរបស់រដ្ឋបាលរបស់លោកលើគ្រឿងញៀន៕

ដោយ រ៉ាន់ រើយ

The post ការប្រឌិតព័ត៌មានមិនពិតកើតឡើងច្រើននៅហ្វីលីពីន ជុំវិញរឿងក្តីរបស់ Duterte នៅ ICC appeared first on Kampuchea Thmey Daily.

នយោបាយហ្វីលីពីន ធ្លាក់ចូលជ្រោះវិបត្តិយ៉ាងជ្រៅ ក្រោយអនុប្រធានាធិបតី គំរាមសម្លាប់ប្រធានាធិបតី

Sok Sovann — Tue, 26 Nov 2024 01:16:51 +0000

នយោបាយនៅក្នុងប្រទេសហ្វីលីពីន កំពុងធ្លាក់ចូលជ្រោះវិបត្តិកាន់តែជ្រៅ បន្ទាប់ពីលោកប្រធានាធិបតី Ferdinand Marcos រងការគំរាមធ្វើឃាតពីសំណាក់អនុប្រធានាធិបតីរបស់គាត់។

កាលពីចុងសប្តាហ៍ អនុប្រធានាធិបតីហ្វីលីពីន Sara Duterte ដែលត្រូវជាកូនស្រីអតីតប្រធានាធិបតី Rodrigo Duterte បានគំរាមថា បើអ្នកស្រីស្លាប់មែន លោក Marcos ក៏មិនរួចខ្លួនដែរ ឃាតករក៏នឹងទៅសម្លាប់លោកដូចគ្នា។ មិនត្រឹមប៉ុណ្ណឹង អ្នកស្រីបញ្ជាក់ថា ខ្លួនបានប្រាប់ឲ្យគេធ្វើឃាតរួចហើយ ពោលគឺមិនមែនតែលោក Marcos ទេប៉ុន្តែនឹងសម្លាប់ទាំងភរិយារបស់គាត់ និងប្រធានរដ្ឋសភាថែមទៀតផង។

ប្រធានាធិបតីហ្វីលីពីន លោក Ferdinand Marcos (រូបថត៖ AP)

ពាក់ព័ន្ធរឿងនេះ មកដល់ថ្ងៃចន្ទទី២៥ខែវិច្ឆិកាឆ្នាំ២០២៤ លោក Marcos បានប្តេជ្ញាវាយបក ដោយចេញសារជាវីដេអូនិយាយខ្លាំងៗថា មិនត្រូវឲ្យផែនការឧក្រិដ្ឋកម្មបែបនេះ ធ្វើឡើងបាននោះទេ! ត្រូវតែចាត់វិធានការដើម្បីកម្ទេច!

លោកនិយាយថា «មានការប្រើពាក្យពេច៍ប្រមាថនិងគំរាមសម្លាប់យើង ទាំងមិនចេះគិត។ ខ្ញុំនឹងប្រយុទ្ធជាមួយពួកគេ។ ប្រសិនបើការរៀបគម្រោងធ្វើឃាតប្រធានាធិបតី អាចធ្វើស្រួលៗបែបនេះ ចុះតើចំពោះពលរដ្ឋសាមញ្ញនឹងទៅជាយ៉ាងណាទៅ?»។

តាមពិតទៅ លោក Marcos និងគ្រួសារលោក Duterte មិនត្រូវគ្នាយូរមកហើយ ត្បិតតែកូនស្រីលោក Duterte កាន់តំណែងជាអនុប្រធានាធិបតីហ្វីលីពីនក៏ពិតមែន។

អនុប្រធានាធិបតីហ្វីលីពីនអ្នកស្រី Sara Duterte (រូបថត៖ AP)

ភាគីទាំងសងខាងតែងប៉ះសម្តី ជាពិសេសចាប់តាំងពីការដួលរលំនៃសម្ព័ន្ធភាពរវាងគ្រួសារដ៏មានអំណាចទាំងពីរ ក្រោយលោក Marcos ឈ្នះការបោះឆ្នោតឆ្នាំ២០២២យ៉ាងលើសលប់។

អ្នកស្រី Sara Duterte បានបោះចោលតំណែងគណៈរដ្ឋមន្ត្រីកាលពីខែមិថុនា ហើយត្រូវគេតាមសង្កេតមើលជុំវិញការចំណាយរបស់អ្នកស្រីពេលកំពុងកាន់តំណែង។ ពេលខ្លះ អ្នកស្រីបាននិយាយខ្លាំងៗដាក់សមាជិកសភា ហើយខកខានបង្ហាញខ្លួន ក្នុងដំណើរការនីតិវិធីមួយចំនួនទៀតផង។

ការគំរាមសម្លាប់លោក Marcos ថ្មីៗនេះ គឺបន្ទាប់ពីសមាជិកសភា ចេញបញ្ជាឲ្យដាក់ពន្ធនាគារប្រធានបុគ្គលិករបស់អ្នកស្រី Sara Duterte ជុំវិញបទចោទប្រកាន់ថា បានរារាំងការស៊ើបអង្កេតលើការប្រើប្រាស់មូលនិធិសាធារណៈមិនត្រឹមត្រូវរបស់អនុប្រធានាធិបតី។

យោងតាមមន្ត្រីជាន់ខ្ពស់នៃក្រសួងយុត្តិធម៌ លោកស្រីមិនមានអភ័យឯកសិទ្ធិពីការកាត់ទោសទេ ហើយនាងនឹងត្រូវបានកោះហៅឲ្យបង្ហាញខ្លួននៅការិយាល័យស៊ើបអង្កេតជាតិជុំវិញការគំរាមនេះ៕

អត្ថបទ៖ សុខ សុវណ្ណ

ចុចអាន៖ កូនលោក Duterte ថា ប្រធានាធិបតីហ្វីលីពីន ជា មនុស្សខ្ជិល គួរលាលែងតំណែង

The post នយោបាយហ្វីលីពីន ធ្លាក់ចូលជ្រោះវិបត្តិយ៉ាងជ្រៅ ក្រោយអនុប្រធានាធិបតី គំរាមសម្លាប់ប្រធានាធិបតី appeared first on Kampuchea Thmey Daily.

រឹបអូសគ្រឿងញៀន ១.៨តោន ប្រធានាធិបតី ហ្វីលីពីន ថា នេះជាការបង្ក្រាបគ្មានបង្ហូរឈាម

សាង ស្រីល័ក្ខ — Tue, 16 Apr 2024 09:50:00 +0000

លោកប្រធានាធិបតី Ferdinand Marcos បាននិយាយនៅថ្ងៃអង្គារថា ប្រទេសហ្វីលីពីនបានរឹបអូសថ្នាំញៀនប្រភេទមេតំហ្វេតាមីនគ្រីស្តាល់ចំនួន ១.៨ តោន ដោយពណ៌នាអំពីការធ្លាក់ចុះនេះថា ជាកំណត់ត្រាមួយនិងជាវិធីសាស្រ្តត្រឹមត្រូវចំពោះសង្គ្រាមគ្រឿងញៀន។

យោងតាមកាសែត Barrons បានរាយការណ៍ថា ប៉ូលិសបានរកឃើញថ្នាំញៀនខុសច្បាប់ ដែលប៉ាន់ស្មានថាមានតម្លៃជាង ២៣០ លានដុល្លារកាលពីថ្ងៃច័ន្ទ អំឡុងពេលឆែកឆេររថយន្តនៅក្នុងខេត្ត Batangas ភាគខាងត្បូងទីក្រុងម៉ានីល ហើយអ្នកបើកបរត្រូវបានចាប់ខ្លួនភ្លាមៗ។

ក្រោយមកទៀត លោក Marcos បានត្រួតពិនិត្យគ្រឿងញៀនដែលចាប់បាននៅថ្ងៃអង្គារ ហើយនិយាយថា វាគឺជាការដឹកជញ្ជូនធំបំផុតមិនធ្លាប់ចាប់បាននៅក្នុងប្រទេសហ្វីលីពីន។ ប៉ុន្តែគ្មាននរណាម្នាក់ស្លាប់ គ្មានការបាញ់ប្រហារ គ្មានអ្នកណាម្នាក់រងរបួសនោះទេ។ យើងបានធ្វើប្រតិបត្តិការដោយប្រុងប្រយ័ត្ន នោះជាវិធីសាស្រ្តត្រឹមត្រូវសម្រាប់ខ្ញុំ នោះគួរតែជាវិធីសាស្រ្តក្នុងសង្គ្រាមគ្រឿងញៀន”។

ថ្វីបើយ៉ាងណាក៏ដោយ នៅក្នុងប្រតិបត្តិការប្រឆាំងគ្រឿងញៀនក្រោមការដឹកនាំរបស់អតីតប្រធានាធិបតី Rodrigo Duterte បានធ្វើឲ្យមនុស្សរាប់ពាន់នាក់ស្លាប់ ដែលបង្កឲ្យមានការស៊ើបអង្កេតអន្តរជាតិលើការចោទប្រកាន់ពីបទរំលោភសិទ្ធិមនុស្ស។ ក្រោយមក សង្រ្គាមគ្រឿងញៀនបានបន្តនៅក្រោមដៃ លោក Marcos ទោះបីជាគាត់បានជំរុញឲ្យមានការសង្កត់ធ្ងន់បន្ថែមទៀតលើការការពារ និងការស្តារនីតិសម្បទាក៏ដោយ។

លើសពីនេះទៀត មនុស្សជាង ៦០០នាក់ត្រូវបានសម្លាប់ទាក់ទងនឹងគ្រឿងញៀន ចាប់តាំងពីគាត់បានឡើងកាន់អំណាចក្នុងខែមិថុនាឆ្នាំ២០២២ នេះបើយោងតាមតួលេខដែលចងក្រងដោយ Dahas ដែលជាគម្រោងស្រាវជ្រាវដែលគាំទ្រដោយសាកលវិទ្យាល័យហ្វីលីពីនដែលរក្សាចំនួននៃការសម្លាប់បែបនេះ។

អ្នកស្រាវជ្រាវជាន់ខ្ពស់របស់អង្គការឃ្លាំមើលសិទ្ធិមនុស្ស Human Rights Watch លោក Carlos Conde បាននិយាយថា ការបង្ក្រាបគ្រឿងញៀនកាលពីថ្ងៃច័ន្ទ បានបង្ហាញថា ការគ្រប់គ្រងគ្រឿងញៀនអាចធ្វើបានដោយគ្មានអំពើហិង្សា ប្រសិនបើអាជ្ញាធរពិតជាធ្វើការងាររបស់ពួកគេ និងអនុវត្តតាមនីតិវិធីត្រឹមត្រូវ។

លោក Conde បានជំទាស់នឹងរដ្ឋបាល Marcos ឲ្យប្រកាសបញ្ចប់សង្គ្រាមគ្រឿងញៀនដ៏ហិង្សា និងលុបចោលការបញ្ជាទិញរបស់លោក Duterte សម្រាប់ការបង្ក្រាបដ៏បង្ហូរឈាមនេះហើយថា «វាដល់ពេលហើយសម្រាប់លោក Marcos ដើម្បីដើរការពិភាក្សាអំពីកំណែទម្រង់គោលនយោបាយគ្រឿងញៀន»៕

លោកប្រធានាធិបតី Ferdinand Marcos

អត្ថបទ៖ សាង ស្រីល័ក្ខ

ចុចអាន៖វៀតណាម បារម្ភខ្លាំង ពីភាពតានតឹងនៅមជ្ឈិមបូព៌ា

The post រឹបអូសគ្រឿងញៀន ១.៨តោន ប្រធានាធិបតី ហ្វីលីពីន ថា នេះជាការបង្ក្រាបគ្មានបង្ហូរឈាម appeared first on Kampuchea Thmey Daily.

កូនលោក Duterte ថា ប្រធានាធិបតីហ្វីលីពីន ជា មនុស្សខ្ជិល គួរលាលែងតំណែង

Sok Sovann — Mon, 29 Jan 2024 02:03:50 +0000

នៅក្នុងជម្លោះកាន់តែរីកធំរវាងគ្រួសារមានអំណាចនយោបាយទាំងពីរ, លោក Sebastian Duterte ដែលត្រូវជាកូនប្រុសរបស់អតីតមេដឹកនាំហ្វីលីពីន Rodrigo Duterte បានជំរុញឲ្យប្រធានាធិបតី Ferdinand Marcos Jr លាលែងពីតំណែង ដោយហៅគាត់ថាជាមនុស្សខ្ជិល។ នេះបើតាមសេចក្តីរាយការណ៍របស់ Reuters កាលពីថ្ងៃអាទិត្យទី២៨ខែមករា។

លោក Sebastian Duterte (រដ្ឋបាលក្រុង Davao)

លោក Marcos បានសហការជាមួយកូនស្រីលោក Duterte ឈ្មោះ Sara ដោយយកនាងធ្វើជាអនុប្រធានាធិបតីក្នុងការបោះឆ្នោតឆ្នាំ២០២២ ប៉ុន្តែក្រោយមក សម្ព័ន្ធភាពគ្រួសារទាំងពីរហាក់បែកបាក់ ពេលប្រធានាធិបតីថ្មី ងាកចេញពីគោលនយោបាយប្រឆាំងគ្រឿងញៀន និងគោលនយោបាយបរទេសរបស់អ្នកកាន់តំណែងមុន។

លោក Sebastian ដែលជាអភិបាលក្រុង Davao បាននិយាយក្នុងវេទិកាថ្នាក់ដឹកនាំមួយថា ពេលដែលយុទ្ធនាការឪពុករបស់ខ្លួនថមថយ ស្រាប់តែករណីឧក្រិដ្ឋកម្ម បានរើបឡើងសាជាថ្មី។

ពាក់ព័ន្ធការបើកដៃឲ្យសហរដ្ឋអាមេរិកដាក់មូលដ្ឋានយោធា រួមទាំងនៅជិតកោះតៃវ៉ាន់ផងដែរនោះ លោកក៏បានចោទប្រកាន់លោក Marcos ពីបទបង្កគ្រោះថ្នាក់ដល់ប្រជាជនហ្វីលីពីនស្លូតត្រង់ ដោយអនុញ្ញាតឲ្យអាមេរិកចូលប្រទេសផងដែរ។

លោក Ferdinand Marcos Jr (រូបថត៖ AP)

មិនត្រឹមប៉ុណ្ណឹង លោក Sebastian ថែមទាំងជំទាស់ចំពោះសេចក្តីសម្រេចរបស់លោក Marcos ក្នុងការចាប់ផ្តើមកិច្ចចរចាសន្តិភាពឡើងវិញជាមួយពួកឧទ្ទាមកុម្មុយនិស្តផងដែរ ដោយនិយាយថា លោក Marcos មិនបានដឹងអ្វីទាំងអស់អំពីទុក្ខលំបាករបស់ប្រជាជនដែលរស់នៅក្នុងតំបន់ធ្លាប់ជាមូលដ្ឋានរបស់ពួកឧទ្ទាម។ អ្នកខ្ជិលណាស់! នេះជាមូលហេតុដែលយើងមិនសប្បាយចិត្ត”។

ទោះបីជាយ៉ាងណាក៏ដោយ មិនមានការឆ្លើយតបភ្លាមៗទេ ពីការិយាល័យរបស់ប្រធានាធិបតី Marcos ហើយរឿងនេះ កើតឡើងមុនពេលលោក Marcos ចូលរួមការជួបជុំ ដែលដឹកនាំដោយរដ្ឋាភិបាលក្នុងរដ្ឋធានីម៉ានីល ដើម្បីប្រមែប្រមូលការគាំទ្រសម្រាប់យុទ្ធនាការ “New Philippines” ឈានទៅរកការបោះឆ្នោតពាក់កណ្តាលអាណត្តិ។

សម្ព័ន្ធភាពរបស់លោក Marcos ជាមួយគ្រួសារ Duterte ពិតជាមានសារៈសំខាន់ចំពោះជ័យជម្នះជាប្រធានាធិបតីរបស់គាត់ ដូច្នេះទំនាក់ទំនងរបស់ពួកគេអាចមានឥទ្ធិពលទៀត ក្នុងការទាញសំឡេងគាំទ្រមុនការបោះឆ្នោតពាក់កណ្តាលអាណត្តិ និងការបោះឆ្នោតសភាឆ្នាំ២០២៥៕

អត្ថបទ៖ សុខ សុវណ្ណ

ចុចអាន៖ ប្រធានាធិបតី ហ្វីលីពីន នឹងបើកទំព័រថ្មីក្នុងកិច្ចសហប្រតិបត្តិការជាមួយ ចិន

The post កូនលោក Duterte ថា ប្រធានាធិបតីហ្វីលីពីន ជា មនុស្សខ្ជិល គួរលាលែងតំណែង appeared first on Kampuchea Thmey Daily.

ប្រធានាធិបតី ហ្វីលីពីន នឹងបើកទំព័រថ្មីក្នុងកិច្ចសហប្រតិបត្តិការជាមួយ ចិន

Sok Chivon — Thu, 05 Jan 2023 08:01:05 +0000

ថ្លែងនៅពេលអញ្ជើញចាកចេញពីប្រទេសចិន ក្រោយដំណើរទស្សនកិច្ចផ្លូវរដ្ឋរយៈពេល ៣ ថ្ងៃ លោកប្រធានាធិបតីហ្វីលីពីន Ferdinand Marcos Jr បាននិយាយថា “ខ្ញុំនឹងបើកទំព័រថ្មីមួយនៅក្នុងកិច្ចសហប្រតិបត្តិការយុទ្ធសាស្ត្រដ៏ទូលំទូលាយរបស់យើងជាមួយនឹងប្រទេសចិន” ។

លោក Marcos បានថ្លែងនៅឯមូលដ្ឋានទ័ពអាកាសក្នុងទីក្រុងម៉ានីលថា “យើងនឹងស្វែងរកការជំរុញទំនាក់ទំនងដ៏មានអត្ថន័យ និងពង្រីកកិច្ចសហប្រតិបត្តិការរបស់យើងក្នុងវិស័យផ្សេងៗដូចជា កសិកម្ម ថាមពល ហេដ្ឋារចនាសម្ព័ន្ធ វិទ្យាសាស្ត្រ បច្ចេកវិទ្យា ពាណិជ្ជកម្ម ការវិនិយោគ និងការដោះដូរធនធានមនុស្សទៅវិញទៅមក” ។

ទន្ទឹមនោះ លោកប្រធានាធិបតីហ្វីលីពីនរំពឹងថា ក៏នឹងនាំទំនាក់ទំនងទីក្រុងម៉ានីល-ប៉េកាំង ទៅកាន់ឱកាសដ៏សម្បូរបែបសម្រាប់សន្តិភាព និងការអភិវឌ្ឍន៍ដល់ប្រជាជននៃប្រទេសទាំងពីរផងដែរ ដោយសារតែ ចិនគឺជាដៃគូពាណិជ្ជកម្មដ៏ធំបំផុតរបស់ប្រទេសហ្វីលីពីន ក៏ដូចជាជាប្រភពជំនួយអភិវឌ្ឍន៍ផ្លូវការដ៏សំខាន់ និងជាប្រភពនៃអ្នកទេសចរធំជាងគេទី ២ មុនពេលជំងឺរាតត្បាតកូវីដ ១៩ ។

លោក Marcos បញ្ជាក់ថា លោកនឹងចាប់យកឱកាសដើម្បីពង្រឹងទំនាក់ទំនងពាណិជ្ជកម្ម និងការវិនិយោគដ៏រស់រវើកជាមួយប្រទេសចិន នៅពេលដែលហ្វីលីពីនបង្កើនល្បឿននៃការស្តារសេដ្ឋកិច្ចរបស់ខ្លួន ខណៈលោក Marcos ក៏បានអញ្ជើញប្រជាជនចិនឲ្យមកទស្សនាប្រទេសហ្វីលីពីន ក្នុងនាមជាអ្នកទេសចរ និស្សិត និងអ្នកវិនិយោគផងដែរ ។

បន្ថែមពីនេះ លោក Marcos ក៏បានថ្លែងអំណរគុណចំពោះជំនួយរបស់ប្រទេសចិនក្នុងការប្រយុទ្ធប្រឆាំងនឹងជំងឺរាតត្បាតកូវីដ ១៩ ដល់ប្រទេសហ្វីលីពីនផងដែរ ដោយកត្តានេះហើយបានពង្រឹងទំនុកចិត្តរវាងប្រទេសទាំងពីរ ។

លោក Marcos បាននិយាយថា “ខ្ញុំសូមចងចាំ និងដឹងគុណយ៉ាងជ្រាលជ្រៅចំពោះប្រទេសចិនដែលបានពង្រីកការជួយដល់ប្រទេសហ្វីលីពីនក្នុងទម្រង់ជាវ៉ាក់សាំង សម្លៀកបំពាក់ការពារមេរោគ (PPE) និងជំនួយបច្ចេកទេសផ្សេងៗទៀតជាដើម” ។

គួរបញ្ជាក់ថា ដំណើរទស្សនកិច្ចរបស់លោក Marcos ទៅកាន់ប្រទេសចិន គឺជាដំណើរទស្សនកិច្ចផ្លូវការលើកដំបូងរបស់លោកទៅកាន់ប្រទេសមិនមែនអាស៊ាន ចាប់តាំងពីឡើងកាន់តំណែងជាប្រធានាធិបតីក្នុងខែមិថុនា ឆ្នាំ ២០២២ ៕

ប្រែសម្រួលដោយ ៖ ជីវ័ន្ត

ប្រភព ៖ Xinhua

ចុចអាន ៖ ហ្វីលីពីន បញ្ជាឲ្យមន្ត្រីប៉ូលិសពាក់សក្ដិធំៗ ជាប់ពាក់ព័ន្ធការជួញដូរគ្រឿងញៀន លាលែងពីតំណែង

The post ប្រធានាធិបតី ហ្វីលីពីន នឹងបើកទំព័រថ្មីក្នុងកិច្ចសហប្រតិបត្តិការជាមួយ ចិន appeared first on Kampuchea Thmey Daily.