លោក Han Duck-soo Archives - Kampuchea Thmey Daily

ផ្លូវការហើយ! កូរ៉េខាងត្បូងនឹងរៀបចំបោះឆ្នោតប្រធានាធិបតីថ្មីនៅថ្ងៃទី៣មិថុនា

Rann Reuy — Tue, 08 Apr 2025 03:08:05 +0000

ប្រធានាធិបតីស្តីទីរបស់ប្រទេសកូរ៉េខាងត្បូង លោក Han Duck-soo ដែលទើបរួចផុតពីការចោទប្រកាន់ទម្លាក់អំណាច បានប្រកាសនៅព្រឹកថ្ងៃអង្គារនេះថា ប្រទេសកូរ៉េខាងត្បូងនឹងរៀបចំការបោះឆ្នោតប្រធានាធិបតីនៅថ្ងៃទី៣ខែមិថុនា គឺមានរយៈពេល៥៩ថ្ងៃ បន្ទាប់ពីអតីតប្រធានាធិបតី លោក Yoon Suk Yeol ត្រូវបានដកចេញពីតំណែងដោយតុលាការធម្មនុញ្កាលថ្ងៃទី៤ខែមេសានេះ។

នាយករដ្ឋមន្ត្រី និងជាប្រធានាធិបតីស្តីទី លោក Han Duck-soo បាននិយាយកាលពីថ្ងៃអង្គារថា រដ្ឋាភិបាលបានពិភាក្សាជាមួយគណៈកម្មាធិការជាតិរៀបចំការបោះឆ្នោត និងទីភ្នាក់ងារពាក់ព័ន្ធដទៃទៀត រួចរាល់ហើយ ដើម្បីគិតគូរពីតម្រូវការក្នុងការធានាឱ្យដំណើរការបោះឆ្នោតប្រព្រឹត្តទៅដោយរលូន និងទុកពេលគ្រប់គ្រាន់សម្រាប់គណបក្សនយោបាយក្នុងការរៀបចំចូលរួមការប្រកួតប្រជែង។ យោងបណ្តាញសារព័ត៌មានសំខាន់ៗរបស់កូរ៉េខាងត្បូងផ្សាយនៅព្រឹកថ្ងៃអង្គារនេះ។

ក្រោយការពិភាក្សា ពួកគេបានសម្រេចចិត្ត «កំណត់ថ្ងៃទី ៣ខែមិថុនា ជាកាលបរិច្ឆេទសម្រាប់ការបោះឆ្នោតប្រធានាធិបតីទី២១របស់កូរ៉េខាងត្បូង» ដោយលោកបានបន្ថែមថា ថ្ងៃនោះនឹងត្រូវកំណត់ជាថ្ងៃឈប់សម្រាកសាធារណៈបណ្តោះអាសន្ន ដើម្បីសម្រួលដល់ការបោះឆ្នោត។ នេះបើយោងតាម AFP។

លោក Han បានអំពាវនាវដល់ក្រសួង និងគណៈកម្មាធិការជាតិរៀបចំការបោះឆ្នោត «ធ្វើឱ្យមានភាពហ្មត់ចត់ ដើម្បីធានាឱ្យមានការបោះឆ្នោតមួយប្រកបដោយភាពយុត្តិធម៌ និងតម្លាភាពជាងពេលណាៗទាំងអស់ និងមួយដែលអាចទទួលបានទំនុកចិត្តពីប្រជាពលរដ្ឋ»។

មិនដូចការបោះឆ្នោតប្រធានាធិបតីដែលប្រព្រឹត្តទៅតាមធម្មតាទេ ប្រធានាធិបតីជាប់ឆ្នោតដែលកើតចេញពីការបោះឆ្នោតក្នុងរយៈពេលអន្តរកាលពីរខែនេះ បេក្ខភាពដែលឈ្នះការបោះឆ្នោតថ្ងៃទី៣ខែមិថុនា នឹងត្រូវធ្វើពិធីឡើងកាន់អំណាចភ្លាមៗនៅថ្ងៃបន្ទាប់ពីការប្រកាសលទ្ធផលតែម្តង។

ចៅក្រមតុលាការធម្មនុញ្ញ៨រូបក្នុងចំណោម៩រូប បានបោះឆ្នោតសម្រេចទម្លាក់លោកYoon Suk Yeol តាមការចោទប្រកាន់របស់សភា។ Reuters

តុលាការធម្មនុញ្ញកូរ៉េខាងត្បូងដែលមានចៅក្រម៨រូបក្នុងចំណោម៩រូប ស្ថិតនៅក្នុងតំណែងកាលពីថ្ងៃសុក្រទី៤ខែមេសាសប្តាហ៍មុន បានសម្រេចជាឯកច្ឆ័ន្ទដកតំណែងលោក Yoon Suk Yeol តាមការចោទប្រកាន់របស់សភា សម្រាប់ការប្រកាសច្បាប់អាជ្ញាសឹករយៈពេលខ្លីរបស់គាត់កាលថ្ងៃទី៣ខែធ្នូឆ្នាំ២០២៤។

ការចេញសាលក្រមដកលោក Yoon Suk Yeol ចេញពីអំណាចនេះ បន្ទាប់ពីតុលាការធម្មនុញ្ញរកឃើញកំហុសលើការរំលោភលើកាតព្វកិច្ចផ្លូវការរបស់គាត់ដោយការចេញក្រឹត្យច្បាប់អាជ្ញាសឹកកាលពីថ្ងៃទី៣ខែធ្នូ និងការចល័តកងទ័ពដើម្បីបញ្ឈប់ដំណើរការសភា។

ច្បាប់ធម្មនុញ្ញរបស់ប្រទេសកូរ៉េខាងត្បូងតម្រូវឱ្យមានការបោះឆ្នោតប្រធានាធិបតីថ្មីក្នុងរយៈពេល៦០ថ្ងៃ ប្រសិនបើអ្នកកាន់អំណាចស្លាប់ ឬត្រូវដកចេញពីតំណែង៕

ដោយ រ៉ាន់ រើយ

នាយករដ្ឋមន្ត្រី និងជាប្រធានាធិបតីស្តីទី លោក Han Duck-soo ទៅកាន់វិមានរដ្ឋាភិបាល ក្រោយតុលាការធម្មនុញ្ញច្រានចោលការចោទប្រកាន់របស់សភា និងប្រគល់អំណាចឲ្យគាត់វិញ។ REUTERS

The post ផ្លូវការហើយ! កូរ៉េខាងត្បូងនឹងរៀបចំបោះឆ្នោតប្រធានាធិបតីថ្មីនៅថ្ងៃទី៣មិថុនា appeared first on Kampuchea Thmey Daily.

ប្រធានាធិបតីស្តីទី Han Duck-soo គោរពសាលក្រម និងឲ្យគណៈរដ្ឋមន្ត្រីសហការជាមួយអាជ្ញាធរបោះឆ្នោត

Rann Reuy — Fri, 04 Apr 2025 07:19:11 +0000

បន្ទាប់ពីតុលាការធម្មនុញ្សម្រេចបញ្ចប់មុខតំណែងប្រធានាធិបតី Yoon Suk Yeol នៅថ្ងៃទី៤ខែមេសា២០២៥ ប្រធានាធិបតីស្តីទី Han Duck-soo បានប្រកាសថា រដ្ឋាភិបាលនឹងគោរពសេចក្តីសម្រេចរបស់តុលាការធម្មនុញ្ញ ដោយសន្យារក្សាស្ថិរភាពនយោបាយនិងជម្នះលើការបែកបាក់ផ្នែកនយោបាយដោយរៀបចំការបោះឆ្នោតស្របតាមរដ្ឋធម្មនុញ្ញដែលចែង។

ប្រធានាធិបតីស្តីទី Han Duck-soo។ Reuters

ភ្លាមៗបន្ទាប់ពីសេចក្តីសម្រេចជាឯកច្ឆ័ន្ទរបស់តុលាការធម្មនុញ្ញត្រូវបានប្រកាសជាសាធារណៈ ប្រធានាធិបតីស្តីទី លោក Han Duck-soo បាននិយាយនៅក្នុងសុន្ទរកថាតាមទូរទស្សន៍ថា លោកនឹងធ្វើការដើម្បីគ្រប់គ្រងការបោះឆ្នោតប្រធានាធិបតីដើម្បីបង្កើតរដ្ឋបាលថ្មីមួយ។

សារព័ត៌មានកូរ៉េខាងត្បូង Korea Times បានរាយការណ៍ថា តាមច្បាប់កូរ៉េខាងត្បូងត្រូវតែរៀបចំការបោះឆ្នោតប្រធានាធិបតីក្នុងរយៈពេល៦០ថ្ងៃ ប្រសិនបើប្រធានាធិបតីត្រូវបានដកចេញដោយតុលាការធម្មនុញ្ញ ឬក្នុងករណីមរណភាព។

ប្រធានាធិបតីស្តីទី Han ត្រូវបានស្រង់សម្តីដូចបាននិយាយថា៖«ថ្ងៃនេះ តុលាការធម្មនុញ្ញបានបញ្ជាក់ពីសាលក្រមរបស់ខ្លួនលើករណីចោទប្រកាន់ប្រធានាធិបតី។ ខ្ញុំមានអារម្មណ៍សោកស្ដាយយ៉ាងខ្លាំងចំពោះស្ថានការណ៍អកុសលមួយដែលប្រមុខរដ្ឋកាន់អំណាចម្នាក់ត្រូវបានចោទប្រកាន់ជាលើកទីពីរក្នុងប្រវត្តិសាស្ត្ររដ្ឋធម្មនុញ្ញ»។

លោក Han ក៏បានសន្យាថានឹងធានាការត្រៀមខ្លួនក្នុងសន្តិសុខជាតិ ដោះស្រាយភាពមិនច្បាស់លាស់ខាងពាណិជ្ជកម្ម និងបង្កើតសុវត្ថិភាពសាធារណៈ មុនពេលប្រធានាធិបតីជាប់ឆ្នោតថ្មីចូលកាន់តួនាទីរបស់ពួកគេ។

បន្ទាប់ពីសុន្ទរកថារបស់គាត់ ប្រធានាធិបតីស្តីទី Han បានធ្វើជាអធិបតីក្នុងកិច្ចប្រជុំបន្ទាន់មួយជាមួយសមាជិកនៃគណៈរដ្ឋមន្ត្រីនៅថ្ងៃសុក្រនៅពេលថ្ងៃត្រង់ ដោយបានបញ្ជាឱ្យរដ្ឋមន្ត្រីខុទ្ទកាល័យរក្សាភាពមិនច្បាស់លាស់ក្នុងការនិយាយកិច្ចការរដ្ឋក្នុងអំឡុងពេលបោះឆ្នោតដំបូង។ លោក Han ក៏បានជំរុញឱ្យក្រសួងនានារក្សាអព្យាក្រឹតនយោបាយ និងសហការជាមួយអាជ្ញាធររៀបចំការបោះឆ្នោត។

ជាមួយនឹងការបណ្តេញ ប្រធានាធិបតី Yoon ចេញពីអំណាច គំនិតផ្តួចផ្តើមកំណែទម្រង់ជាតិរបស់រដ្ឋបាលអភិរក្សនិយមរបស់គាត់ទំនងជានឹងរលាយបាត់។ យោងសេចក្តីរាយការណ៍របស់សារព័ត៌មានខាងលើ។

អតីតប្រធានាធិបតី Yoon Suk Yeol ពិភាក្សាជាមួយមេធាវីក្នុងតុលាការធម្មនុញ្ញក្នុងពេលកន្លងមក។REUTERS

ចាប់តាំងពីឡើងកាន់អំណាចប្រធានាធិបតីក្នុងខែឧសភា ឆ្នាំ២០២២ លោក Yoon Suk Yeol បានគូសវាសផែនការបង្ហាញពីផែនទីសសរស្តម្ភសំខាន់ៗនៃកំណែទម្រង់ជាតិ ដើម្បីដោះស្រាយបញ្ហាកង្វះបុគ្គលិកពេទ្យ និងការធ្លាក់ចុះប្រាក់សោធននិវត្តន៍ ក៏ដូចជាវិបត្តិទីផ្សារការងារ ការអប់រំ និងប្រជាជន។

Yoon បានពិពណ៌នាកំណែទម្រង់ទាំងនេះថាជា «បញ្ហានៃការរស់រានមានជីវិតសម្រាប់ប្រទេស» ប៉ុន្តែក្នុងពេលបោះឆ្នោតសភាកាលពីឆ្នាំ២០២៤ គណបក្សប្រជាធិបតេយ្យបានទទួលអាសនៈសភាកាន់តែច្រើន និងដាក់សម្ពាធនយោបាយកាន់តែខ្លាំងលើអំណាចប្រធានាធិបតី រហូតដល់ពេលស្នើច្បាប់ថវិកាឆ្នាំ២០២៥ កាលពីខែវិច្ឆិកាឆ្នាំ២០២៤ សភាដឹកនាំដោយគណបក្សប្រជាធិបតេយ្យ បានកាត់ការចំណាយលើគម្រោងជាច្រើនរបស់រដ្ឋាភិបាលដែលមានទឹកប្រាក់រហូតដល់ជិត៣ពាន់លានដុល្លារ។

ការកាត់ចំណាយដោយដកគម្រោងនានារបស់រដ្ឋាភិបាលរបស់ប្រធានាធិបតី Yoon Suk Yeol នោះ ជាដើមហេតុនាំឲ្យលោក ក្តៅស្លឹកត្រចៀកកើតគំនិតដាក់ច្បាប់អាជ្ញាសឹក ដោយយកលេសចោទប្រកាន់បក្សប្រឆាំងថាជា«ក្រុមប្រឆាំងរដ្ឋ និងគាំទ្រកូរ៉េខាងជើង» រហូតឈានដល់ប្រកាសច្បាប់អាជ្ញាសឹកនៅថ្ងៃទី៣ខែធ្នូឆ្នាំ២០២៤៕

ដោយ រ៉ាន់ រើយ

អតីតប្រធានាធិបតី Yoon Suk Yeol អរគុណអ្នកគាំទ្រពេលតុលាការសេអ៊ូលដោះលែងនៅក្រៅឃុំ។ REUTERS

The post ប្រធានាធិបតីស្តីទី Han Duck-soo គោរពសាលក្រម និងឲ្យគណៈរដ្ឋមន្ត្រីសហការជាមួយអាជ្ញាធរបោះឆ្នោត appeared first on Kampuchea Thmey Daily.

មានការព្រួយបារម្ភខ្លាំងជុំវិញអំពើហិង្សាផ្ទុះឡើងចំថ្ងៃប្រកាសសាលក្រម លោក Yoon

Rann Reuy — Thu, 03 Apr 2025 10:23:10 +0000

នៅព្រឹកថ្ងៃសុក្រទី៤ខែមេសាឆ្នាំ២០២៥ គឺជាថ្ងៃប្រវត្តិសាស្ត្រថ្មីមួយទៀតរបស់ប្រទេសកូរ៉េខាងត្បូង ដែលតុលាការធម្មនុញ្ញកូរ៉េខាងត្បូងនឹងប្រកាសសាលក្រមលើសំណុំរឿងទម្លាក់អំណាចរបស់ប្រធានាធិបតី Yoon Suk Yeol ដែលបានប្រកាសច្បាប់អាជ្ញាសឹកកាលពីថ្ងៃទី៣ខែធ្នូឆ្នាំ២០២៤។

ក្នុងដំណើរការរឿងក្តីដ៏ចម្រូងចម្រាស់របសប្រទេសកូរ៉េខាងត្បូងនេះ ស្ថានភាពកូរ៉េខាងត្បូងបានធ្លាក់ចូលទៅក្នុងស្ថានភាពដ៏យ៉ាប់យឺនក្នុងប្រវត្តិសាស្រ្តកូរ៉េសម័យទំនើប ដោយសារតែការបែងចែកក្នុងសង្គមកូរ៉េដ៏ខ្លាំងរវាងអ្នកគាំទ្របក្សប្រជាជាធិបតេយ្យ ( DPK) ដែលគ្រប់គ្រងអំណាចសភា និងគណបក្សអំណាចប្រជាជន (PPP) ដែលគ្រប់គ្រងអំណាចប្រធានាធិបតី។

ក្នុងថ្ងៃដ៏សំខាន់នេះ ប៉ូលីសកូរ៉េខាងត្បូងត្រូវបានគេរាយការណ៍ថា នឹងប្រមូលផ្តុំ«ធនធានដែលមានទាំងអស់» ដើម្បីការពារអំពើហឹង្សា នៅពេលដែលតុលាការធម្មនុញ្ញប្រកាសសាលក្រមនៅថ្ងៃសុក្រស្តីពីជោគវាសនារបស់ប្រធានាធិបតី លោក Yoon Suk Yeol ដែលត្រូវបានចោទប្រកាន់ទម្លាក់អំណាចដោយសារសភា ស្របពេលដែលតំបន់ទេសចរណ៍សំខាន់ៗក្នុងក្រុងសេអ៊ូល ត្រូវបានបិទ ហើយស្ថានទូតខ្លះបានព្រមានពលរដ្ឋឱ្យស្ថិតនៅឆ្ងាយ។

តុលាការធម្មនុញ្ញរបស់ប្រទេសនេះ នឹងសម្រេចសេចក្តីមួយដែលបិទផ្លូវតវ៉ា ថាតើត្រូវដកលោក Yoon ចេញពីដំណែង ជុំវិញការប្រកាសច្បាប់អាជ្ញាសឹករបស់គាត់ ដែលបណ្តាលឱ្យអំណាចរបស់គាត់ត្រូវបានព្យួរដោយសមាជិកសភារួចហើយ និងចាប់ខ្លួនពីបទបះបោរ ឬក៏ត្រូវប្រគល់អំណាចឲ្យគាត់វិញ។

ប្រធានស្តីទីនៃ តុលាការធម្មនុញ្ញកូរ៉េខាងត្បូង លោក Moon Hyung-bae

តុលាការធម្មនុញ្ញដែលស្ថិតនៅកណ្តាលទីក្រុងសេអ៊ូលបានក្លាយទៅជាចំណុចដ៏ក្តៅមួយ ជាមួយនឹងការតវ៉ាមិនឈប់ឈរនៅក្នុងតំបន់នេះក្នុងចាប់តាំងពីតុលាការបញ្ចប់សវនាការចុងក្រោយកាលថ្ងៃទី២៥ខែកុម្ភៈ រហូតដល់ប៉ូលីសបានផ្លាស់ប្តូរកាលពីថ្ងៃអង្គារ ដើម្បីបិទផ្លូវនានា ដើម្បីបញ្ចៀសការប៉ះទង្គិចដែលអាចកើតមានរវាងអ្នកគាំទ្ររបស់ភាគីទាំងពីរគណបក្ស។

ទីភ្នាក់ងារព័ត៌មានបារាំង AFP ដកស្រង់សម្តី លោក Lee Ho-young ប្រធានស្តីទីនៃទីភ្នាក់ងារប៉ូលីសជាតិកូរ៉េបាននិយាយកាលពីថ្ងៃពុធថា៖«ស្ថានភាពកាន់តែធ្ងន់ធ្ងរជាងពេលណាៗទាំងអស់»។

លោក Lee បាននិយាយក្នុងអំឡុងកិច្ចប្រជុំជាមួយមន្ត្រីប៉ូលិសកំពូលៗថា ប៉ូលីសមានការព្រួយបារម្ភថា ទោះជាសាលក្រមណាមួយត្រូវបានប្រកាសក៏ដោយ មនុស្សមួយចំនួន «អាចបង្កឲ្យមានការរំជើបរំជួល និងចូលរួមក្នុងការតវ៉ាដ៏ខ្លាំងក្លា ឬដោយហិង្សា»។

អ្នកគាំទ្ររបស់ Yoon បានសម្រុកចូលអគារតុលាការមួយកាលពីខែមករា បន្ទាប់ពីចៅក្រមបានបន្តការឃុំខ្លួនប្រធានាធិបតីដែលត្រូវបានព្យួរ។ ក្រោយមកគាត់ត្រូវបានដោះលែងពីមន្ទីរឃុំឃាំងតាមមូលដ្ឋាននីតិវិធី។

លោក Lee បាននិយាយថា៖«ប៉ូលីសនឹងប្រមូលធនធានដែលមានទាំងអស់ ដើម្បីធានាសុវត្ថិភាពសាធារណៈ និងដើម្បីការពារស្ថានភាពកុំឱ្យកើនឡើងទៅជាជម្លោះសង្គមធ្ងន់ធ្ងរ»។

ដើម្បីទប់ស្កាត់បាតុភាពដែលអាចកើតឡើងជាយថាហេតុនៅទីក្រុងសេអ៊ូល ប៉ូលិសកុបកម្មជាង ១៤០០០នាក់នឹងត្រូវដាក់ពង្រាយ ការពារសន្តិសុខ។

ជុំវិញតំបន់អគារតុលាការធម្មនុញ្ញនោះ សាលារៀននិងហាងជាច្រើននឹងបិទនៅថ្ងៃប្រកាសសាលក្រម ដោយសារបញ្ហាសុវត្ថិភាព។ ក្រៅពីនោះ តំបន់បម្រើឲ្យវិស័យសេវាកម្មទេសចរណ៍ ដូចជា វិមាន Gyeongbok និង Changdeok ទាំងនៅចម្ងាយផ្លូវដើរពីតុលាការក៏នឹងត្រូវបិទផងដែរ។

ស្ថានទូតចិននៅទីក្រុងសេអ៊ូល បានព្រមានប្រជាជនរបស់ខ្លួនឱ្យនៅឆ្ងាយពីការតវ៉ានយោបាយក្នុងស្រុក។ ទន្ទឹមនឹងនោះ ស្ថានទូតអាមេរិកបានព្រមានពលរដ្ឋរបស់ខ្លួនឱ្យ «ជៀសវាងតំបន់ដែលបាតុកម្មកំពុងកើតឡើង ហើយអនុវត្តការប្រុងប្រយ័ត្ននៅតំបន់ជុំវិញនៃហ្វូងមនុស្សច្រើន ការប្រមូលផ្តុំ ការតវ៉ា ឬការប្រមូលផ្តុំ»។

ប្រធានាធិបតីស្តីទី លោក Han Duck-soo បានជំរុញឱ្យមេដឹកនាំនយោបាយ ចៀសវាងការថ្លែងសុន្ទរកថា ដែលអាចញុះញង់ ឬលើកទឹកចិត្តឱ្យមានការតវ៉ាខុសច្បាប់ ឬអំពើហិង្សា៕

ដោយ រ៉ាន់ រើយ

ប្រធានាធិបតី Yoon Suk Yeol ពិភាក្សាជាមួយមេធាវី។ REUTERS

The post មានការព្រួយបារម្ភខ្លាំងជុំវិញអំពើហិង្សាផ្ទុះឡើងចំថ្ងៃប្រកាសសាលក្រម លោក Yoon appeared first on Kampuchea Thmey Daily.

ការិយាល័យប្រធានាធិបតីកូរ៉េខាងត្បូងសាទរ សាលក្រមតុលាការធម្មនុញ្ញនៅថ្ងៃនេះ

Rann Reuy — Mon, 24 Mar 2025 03:41:22 +0000

ការិយាល័យប្រធានាធិបតីបានប្រកាសនៅថ្ងៃទី២៤មីនានេះ បានបង្ហាញជំហរស្វាគមន៍របស់ខ្លួនលើសាលក្រមរបស់តុលាការធម្មនុញ្ញក្នុងការច្រានចោលការចោទប្រកាន់ទម្លាក់អំណាចប្រឆាំងនឹងប្រធានាធិបតីស្តីទី និងនាយករដ្ឋមន្ត្រី Han Duck-soo ដែលរដ្ឋសភាគ្រប់គ្រងដោយបក្សប្រជាធិបតេយ្យដែលជាបក្សប្រឆាំងបានធ្វើកាលថ្ងៃទី២៧ខែធ្នូឆ្នាំមុន។

ក្នុងសេចក្តីប្រកាសព័ត៌មានក្រោមឈ្មោះអ្នកនាំពាក្យរបស់វិមានប្រធានាធិបតី ដែលត្រូវបានផ្សព្វផ្សាយដោយព័ត៌មានក្នុងស្រុក្ ការិយាល័យនាំពាក្យរបស់ប្រធានាធិបតី បានអះអាងថា៖«សេចក្តីសម្រេចរបស់តុលាការធម្មនុញ្ញនៅថ្ងៃនេះបានបង្ហាញឱ្យឃើញជាថ្មីម្តងទៀតថា ការរំលោភលើការចោទប្រកាន់របស់រដ្ឋសភាគឺជាការវាយលុកនយោបាយដែលមិនប្រុងប្រយ័ត្ន និងមានចរិតព្យាបាទ» ហើយ «យើងសង្ឃឹមថាការវិលត្រឡប់មកធ្វើការវិញរបស់នាយករដ្ឋមន្ត្រី Han នឹងក្លាយជាចំណុចចាប់ផ្តើមសម្រាប់ការធ្វើឱ្យប្រក្រតីភាពនៃកិច្ចការរដ្ឋ»។

តុលាការធម្មនុញ្ញបានបញ្ជាក់ពីហេតុផលរបស់ខ្លួនក្នុងការច្រានចោលករណីនេះដោយនិយាយថា «វាមិនអាចកំណត់បានថាការបំពានច្បាប់របស់នាយករដ្ឋមន្ត្រី Han គឺជាការក្បត់ការជឿទុកចិត្តរបស់ប្រជាជនដែលផ្តល់ដោយប្រយោលតាមរយៈប្រធានាធិបតីដែលមានអំណាចតែងតាំងគាត់»។

តុលាការធម្មនុញ្ញរបស់កូរ៉េខាងត្បូងបានលុបចោលការចោទប្រកាន់ប្រឆាំងនាយករដ្ឋមន្ត្រី Han Duck-soo ដោយដាក់ឱ្យគាត់ជាប្រធានាធិបតីស្តីទីវិញ។ ការសម្រេចរបស់តុលាការត្រូវបានធ្វើឡើងដោយសំឡេង ៥-១ ដោយចៅក្រមទាំង៨រូប ខណៈចៅក្រមពី២រូបបានបោះឆ្នោតអនុប្បវាទ។

ប្រធានាធិបតីស្តីទី Han Duck-soo ត្រូវបានចោទប្រកាន់ទម្លាក់ពីអំណាចនៅថ្ងៃទី២៧ខែធ្នូ ឆ្នាំ២០២៤ បន្ទាប់ពីលោកបដិសេធក្នុងការតែងតាំងចៅក្រមបីរូបដែលអនុម័តដោយរដ្ឋសភាទៅកាន់កៅអីតុលាការធម្មនុញ្ញដែលនៅទំនេរ និងការវេតូរបស់លោកប្រឆាំងសេចក្តីព្រាងច្បាប់ប្រឹក្សាពិសេសដែលបង្កើតឡើងដោយសភា ក្នុងបំណងស៊ើបអង្កេតប្រធានាធិបតី Yoon Suk Yeol និងជំទាវទីមួយ Kim Keon-hee។ នៅពេលនោះ លោក Han កំពុងកាន់តំណែងជាប្រធានាធិបតីស្តីទី បន្ទាប់ពីការចោទប្រកាន់របស់ប្រធានាធិបតី Yoon ជុំវិញការប្រកាសច្បាប់អាជ្ញាសឹកដែលបរាជ័យ។

តុលាការបានរកឃើញថាការចោទប្រកាន់ប្រឆាំងនឹងលោក Han មិនគ្រប់គ្រាន់ដើម្បីបង្ហាញអំពីភាពត្រឹមត្រូវនៃការដកតំណែងរបស់គាត់ ដែលនាំឱ្យគាត់ចូលកាន់តំណែងឡើងវិញ។ បន្ទាប់ពីការសម្រេចនេះ លោក Han បានបង្ហាញការប្ដេជ្ញាចិត្តក្នុងការដោះស្រាយបញ្ហាប្រឈមពាណិជ្ជកម្មពិភពលោក និងបានបញ្ជាក់ពីតម្រូវការសម្រាប់ការឯកភាពជាតិ។

តុលាការធម្មនុញ្ញមិនទាន់ប្រកាសអំពីកាលបរិច្ឆេទលើសេចក្តីសម្រេចរបស់ខ្លួនទាក់ទងនឹងការចោទប្រកាន់លោកប្រធានាធិបតី Yoon នៅឡើយទេ។ ប្រសិនបើការចោទប្រកាន់របស់លោក Yoon ត្រូវបានតុលាការធម្មនុញ្ញតម្កល់ការចោទប្រកាន់របស់សភា នោះការបោះឆ្នោតប្រធានាធិបតីថ្មីនឹងត្រូវបានទាមទារក្នុងរយៈពេល៦០ថ្ងៃ។

ក្នុងករណីតុលាការធម្មនុញ្ញបដិសេធការចោទប្រកាន់ដូចករណី លោក Han ពេលនោះ លោក Yoon Suk Yeol នឹងបន្តតួនាទីជាប្រធានាធិបតីវិញ។ ក្នុងពេលជាមួយគ្នានេះ Yoon ប្រឈមមុខនឹងការចោទប្រកាន់ផ្លូវច្បាប់យ៉ាងធ្ងន់ធ្ងរ រួមទាំងការចោទប្រកាន់ពីការបះបោរ ដែលរួមចំណែកដល់បរិយាកាសនយោបាយដ៏តានតឹងក្នុងប្រទេសកូរ៉េខាងត្បូង៕

ដោយ រ៉ាន់ រើយ

The post ការិយាល័យប្រធានាធិបតីកូរ៉េខាងត្បូងសាទរ សាលក្រមតុលាការធម្មនុញ្ញនៅថ្ងៃនេះ appeared first on Kampuchea Thmey Daily.

តុលាការធម្មនុញ្ញកូរ៉េស្តារអំណាចឲ្យលោក Han Duck-soo វិញ មុនប្រកាសសាលក្រម Yoon

Rann Reuy — Mon, 24 Mar 2025 02:36:28 +0000

តុលាការធម្មនុញ្ញនៅថ្ងៃទី២៤ខែមីនានេះ បានចេញសាលក្រមច្រានចោលការចោទប្រកាន់របស់រដ្ឋសភាទម្លាក់អំណាចរបស់នាយករដ្ឋមន្ត្រី Han Duck-soo កាលថ្ងៃទី២៧ខែធ្នូឆ្នាំ២០២៤ ដោយចៅក្រមនៃតុលាការធម្មនុញ៨រូប ក្នុងនោះ ចៅក្រម៥រូបបើឆ្នោតឲ្យបន្តតូនាទី ១រូបបោះឆ្នោតប្រឆាំង និង ២រូបអនុប្បវាទ។

ទីភ្នាក់ងារព័ត៌មានរ៉យទ័របានរាយការណ៍ថា៖«តុលាការធម្មនុញ្ញកូរ៉េបានច្រានចោលការចោទប្រកាន់ប្រឆាំងនឹងនាយករដ្ឋមន្រ្តី Han ហើយបានបញ្ជាឲ្យអំណាចរបស់គាត់ឡើងវិញ» ដោយកត់សម្គាល់ថា៖«ស្ថានភាពនយោបាយដែលមានភាពចលាចលចាប់តាំងពីនាយករដ្ឋមន្ត្រីហានត្រូវបានចោទប្រកាន់កាលពីពីរខែមុនបានឈានដល់ចំណុចរបត់មួយ»។

Bloomberg ក៏បានរាយការណ៍ផងដែរថា ៖«តុលាការធម្មនុញ្ញបានលុបចោលការចោទប្រកាន់ប្រឆាំងនឹងនាយករដ្ឋមន្ត្រី Han ហើយបានបញ្ចូលគាត់ជាប្រធានាធិបតីស្តីទី” ដោយបន្ថែមថា៖«សេចក្តីសម្រេចនេះបានទាក់ទាញការយកចិត្តទុកដាក់ដូចដែលវាបានកើតឡើងមុនពេលការសម្រេចចិត្តទាក់ទងនឹងការចោទប្រកាន់ប្រធានាធិបតី Yoon Suk-yeol»។

វាត្រូវបានគេលើកឡើងថា ៖«សេចក្តីសម្រេចទាក់ទងនឹងនាយករដ្ឋមន្ត្រី Han គឺជាករណីដំបូងដែលតុលាការធម្មនុញ្ញបានធ្វើសេចក្តីសម្រេចទាក់ទងនឹងច្បាប់អាជ្ញាសឹករបស់ប្រធានាធិបតី Yoon” ហើយថា “អ្នកតវ៉ារាប់ពាន់នាក់បានប្រមូលផ្តុំគ្នានៅទីក្រុងសេអ៊ូល ដើម្បីមើលថាតើតុលាការធម្មនុញ្ញនឹងទទួលយកឬក៏ច្រានចោលការចោទប្រកាន់ប្រឆាំងនឹងប្រធានាធិបតី Yoon”។

កាសែត Washington Post (WP) បានរាយការណ៍ថា៖«តុលាការធម្មនុញ្ញបានដាក់នាយករដ្ឋមន្ត្រី Han ឡើងវិញ ចំពេលមានចលាចលនយោបាយធ្ងន់ធ្ងរ» ដោយបន្ថែមថា៖«ការសម្រេចចិត្តនេះត្រូវបានធ្វើឡើងមុនពេលរដ្ឋសភាបានបោះឆ្នោតលើសំណើចោទប្រកាន់លើប្រធានាធិបតីស្តីទី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ Choi Sang-mok»។

កន្លងមក រដ្ឋសភាបានអនុម័តលើការចោទប្រកាន់លើលោកនាយករដ្ឋមន្ត្រី Han ក្នុងសម័យប្រជុំពេញអង្គកាលពីថ្ងៃទី ២៧ខែធ្នូឆ្នាំមុន។ ការប្រកាសសាលក្រមនាពេលនេះ គឺនៅមុនការប្រកាសសាលាក្រមលើការចោទប្រកាន់ទម្លាក់អំណាច ប្រធានាធិបតី Yoon Suk Yeol ដែលត្រូវបានគេរំពឹងយ៉ាងទូលំទូលាយថា តុលាការធម្មនុញ្ញនឹងចេញនៅសប្តាហ៍នេះ បន្ទាប់ពីការបញ្ចប់សេចក្តីសន្និដ្ឋានកាលពីថ្ងៃទី២៥ខែកុម្ភៈដែលមានរយៈពេលជិត១ខែទៅហើយ៕

ដោយ រ៉ាន់ រើយ

The post តុលាការធម្មនុញ្ញកូរ៉េស្តារអំណាចឲ្យលោក Han Duck-soo វិញ មុនប្រកាសសាលក្រម Yoon appeared first on Kampuchea Thmey Daily.

បក្សប្រឆាំងកូរ៉េខាងត្បូងដាក់សំណើទម្លាក់អំណាចប្រធានាធិបតីស្តីទី Choi Sang-mok

Rann Reuy — Sat, 22 Mar 2025 04:44:12 +0000

គណបក្សប្រឆាំងកូរ៉េខាងត្បូងបានដាក់សំណើចោទប្រកាន់ទម្លាក់ប្រធានាធិបតីស្តីទី លោក Choi Sang-mok នៅថ្ងៃសុក្រទី២១ខែមីនា ខណៈពេលដែលតុលាការធម្មនុញ្ញស្ថិតក្នុងដំណាក់កាលចេញសាលក្រមជម្រះក្តីលើប្រធានាធីបតី Yoon Suk Yeol ដែលត្រូវបានសភាបោះឆ្នោតព្យួរអំណាចកាលថ្ងៃទី១៤ខែធ្នូឆ្នាំមុន។

ការចោទប្រកាន់ទម្លាក់ប្រធានាធិបតីស្តីទី លោក Choi Sang-mok បើសិនកើតមាន នឹងនាំទៅដល់ការចោទប្រកាន់ទម្លាក់ប្រធានាធិបតីនិងប្រធានាធិបតីស្តីទីរហូតដល់ទៅ៣រូបក្នុងរយៈពេល៤ខែ ចាប់តាំងពីការប្រកាសច្បាប់អាជ្ញាសឹករបស់ លោក Yoon Suk Yeol កាលថ្ងៃទី៣ខែធ្នូឆ្នាំ២០២៤មក។

គណបក្សប្រជាធិបតេយ្យដែលគ្រប់គ្រងសមាជិកសភាភាគច្រើន បាននិយាយនៅក្នុងសេចក្តីជូនដំណឹងមួយទៅកាន់អ្នកសារព័ត៌មាន អំពីការដាក់ញត្តិចោទប្រកាន់ដែលបានទៅដល់ដៃរដ្ឋសភានៅថ្ងៃទី២១ខែមីនា និងបានកត់ត្រាចូលនៅម៉ោង ២រសៀលម៉ោងក្នុងស្រុក (ប្រហែលម៉ោង១២ថ្ងៃត្រង់ម៉ោងនៅកម្ពុជា)។

ទោះបីជាបែបណា ពេលវេលានៃការប្រជុំបោះឆ្នោតទម្លាក់ប្រធានាធិបតីស្តីទី Choi Sang-mok នៅមិនទាន់បានកំណត់នៅឡើយទេ និងមិនទាន់បានផ្សព្វផ្សាយភ្លាមៗនោះទេ។

ជម្លោះនយោបាយក្នុងប្រទេសកូរ៉េខាងត្បូងនឹងកាន់តែមានភាពតានតឹងក្នុងពេលថ្មីៗនេះ បន្ថែមទៀត ស្របពេលដែលតុលាការធម្មនុញ្ញនឹងចេញសាលកម្រលើសំណុំរឿងទម្លាក់អំណាចប្រធានាធិបតីស្តីទី លោក Han Duck-soo នៅថ្ងៃចន្ទទី២៤ខែមីនាខាងមុខនេះ ហើយ សាលក្រមលើសំណុំរឿងចោទប្រកាន់ទម្លាក់អំណាចរបស់ប្រធានាធិបតី Yoon Suk Yeol ក៏ត្រូវបានអ្នកជំនាញច្បាប់យល់ថា គ្រោងធ្វើនៅការប្រកាសសាលក្រម លោក Han។

ប្រធានាធិបតីស្តីទី Choi ដែលជារដ្ឋមន្ត្រីហិរញ្ញវត្ថុកំពុងដឹកនាំប្រទេសជំនួសចាប់តាំងពីថ្ងៃទី២៧ខែធ្នូឆ្នាំ២០២៤មក បន្ទាប់ពីសភាទម្លាក់លោក Han Duck-Soo កាលថ្ងៃទី១៤ខែធ្នូ។ លោក Han បានឡើងកាន់អំណាចស្តីទីក្រោយសភាបោះឆ្នោតទម្លាក់ប្រធានាធិបតី Yoon Suk Yeol ដែលរងការចោទប្រកាន់ពីបទប្រកាសប្រើច្បាប់អាជ្ញាសឹករយៈពេលខ្លីដែលខុសច្បាប់ និងរំលោភអំណាច។

ប្រធានាធិបតីស្តីទី Choi បានធ្វើឱ្យគណបក្សប្រឆាំងខឹងសម្បារ ដែលរួមគ្នាមានមតិភាគច្រើននៅក្នុងសភា ដោយបានបោះឆ្នោតវេតូម្តងហើយម្តងទៀត និងបញ្ឈប់ការតែងតាំងតុលាការធម្មនុញ្ញដែលអនុម័តដោយសភា។

បច្ចុប្បន្នតុលាការកំពុងពិនិត្យមើលការចោទប្រកាន់របស់លោក Yoon ហើយត្រូវបានគេរំពឹងថានឹងចេញសេចក្តីសម្រេចរបស់ខ្លួនលើថាតើត្រូវដកគាត់ចេញពីតំណែងជាអចិន្ត្រៃយ៍ ឬដាក់គាត់ឡើងវិញ។

នៅពេលដែលការរង់ចាំសេចក្តីសម្រេចរបស់តុលាការធម្មនុញ្ញបានអូសបន្លាយយូរជាងការរំពឹងទុក ភាពតានតឹងរវាងភាគីប្រឆាំងនៅក្នុងសភា និងនៅតាមដងផ្លូវបានកាន់តែខ្លាំងឡើង ចំពេលមានការអំពាវនាវ និងប្រឆាំងនឹងការបណ្តេញលោក Yoon ចេញពីតំណែង។

គណបក្សប្រជាធិបតេយ្យ បាននិយាយថា លោក Choi បានរំលោភលើកាតព្វកិច្ចរដ្ឋធម្មនុញ្ញរបស់គាត់ ដោយបដិសេធមិនតែងតាំងចៅក្រមតុលាការធម្មនុញ្ញ បើទោះបីជាមានសេចក្តីសម្រេចដោយតុលាការកំពូលថា អសកម្មបែបនេះកំពុងរំលោភលើសិទ្ធិអំណាចរបស់សភាក៏ដោយ៕

ដោយ រ៉ាន់ រើយ

The post បក្សប្រឆាំងកូរ៉េខាងត្បូងដាក់សំណើទម្លាក់អំណាចប្រធានាធិបតីស្តីទី Choi Sang-mok appeared first on Kampuchea Thmey Daily.

នាយករដ្ឋមន្ត្រីកូរ៉េខាងត្បូង Han Duck-soo អះអាងថា ច្បាប់អាជ្ញាសឹកគឺខុស

Rann Reuy — Wed, 15 Jan 2025 09:33:07 +0000

នាយករដ្ឋមន្ត្រី និងជាប្រធានាធិបតីស្តីទីរយៈពេល១៣ថ្ងៃ លោក Han Duck-soo បានឆ្លើយបំភ្លឺនៅកិច្ចប្រជុំរបស់គណៈកម្មាធិការពិសេសរបស់រដ្ឋសភានៅថ្ងៃពុធនេះ ដោយទទួលស្គាល់ថា «ការប្រកាសច្បាប់អាជ្ញាសឹករបស់ប្រធានាធិបតី Yoon Suk Yeol គឺខុសច្បាប់»។

លោក Han បានធ្វើការកត់សម្គាល់នៅក្នុងសម័យប្រជុំគណៈកម្មាធិការសភាពិសេសមួយនៅក្នុងការប្រកាសច្បាប់អាជ្ញាសឹករបស់លោក Yoon ដែលត្រូវបានចាប់ខ្លួនដោយការិយាល័យស៊ើបអង្កេតពុករលួយនៅថ្ងៃពុធនេះ។

សារព័ត៌មាន Korea Times បានស្រង់សម្តី លោក Han ដូចបាននិយាយថា៖«ខ្ញុំតែងតែមានអារម្មណ៍សុំទោសដែលមនុស្សគ្រប់គ្នាដែលពាក់ព័ន្ធ រួមទាំងខ្លួនខ្ញុំផងដែរ មិនអាចរារាំងស្ថានភាពមិនឱ្យឈានដល់ចំណុចនេះ ។ ដោយក្រឡេកមើលគុណវិបត្តិសំខាន់ៗរបស់វា រួមទាំងនីតិវិធី ខ្ញុំជឿថា (ច្បាប់អាជ្ញាសឹក) មិនមែនជារឿងធម្មតាទេ»។

លោកបានថ្លែងថា៖«ខ្ញុំគិតថាច្បាប់អាជ្ញាសឹកគឺខុស»។

តាមសេចក្តីរាយការណ៍របស់សារព័ត៌មាន Yonhap លោក Han ស្ថិតក្នុងចំណោមអ្នកចូលរួមនៃកិច្ចប្រជុំគណៈរដ្ឋមន្ត្រីដែល Yoon បានកោះប្រជុំភ្លាមៗមុនពេលការប្រកាសច្បាប់អាជ្ញាសឹករបស់គាត់នៅថ្ងៃទី៣ខែធ្នូ។

Han បាននិយាយថាគាត់បានស្នើឱ្យរៀបចំកិច្ចប្រជុំនេះ ខណៈដែលគាត់ជឿថាសមាជិកគណៈរដ្ឋមន្ត្រីទាំងអស់នឹងប្រឆាំងនឹងផែនការនេះ។ តាមសេចក្តីរាយការណ៍ដដែលនោះ។

នាយករដ្ឋមន្ត្រី Han បានឡើងកាន់តួនាតីជាប្រធានាធិបតីស្តីទីនៅថ្ងៃទី១៤ខែធ្នូ នៅពេលដែលសភាចោទប្រកាន់និងបោះឆ្នោតចោទទម្លាក់លោក Yoon Suk Yeol។ ប៉ុន្តែការកាន់អំណាចរបស់ នាយករដ្ឋមន្ត្រី Han ជាប្រធានាធិបតីស្តីទីបានត្រឹម១សប្តាហ៍ប៉ុណ្ណោះ ក៏ត្រូវបានសភាបោះឆ្នោតទម្លាក់ពីអំណាចទៀត ដោយសារតែលោក បដិសេធក្នុងការចុះហត្ថលេខាលើក្រឹត្យតែងតាំងចៅក្រម៣រូបដែលតែងតាំងឡើងដោយសភា ដើម្បីបំពេញកន្លែងដែលចៅក្រមផុតសុពលភាព និងការបដិសេធការចុះហត្ថលេខាលើក្រឹត្យដាក់ឲ្យប្រើច្បាប់បង្កើតក្រុមស៊ើបអង្កេតពិសេស ដែលស្នើឡើងដោយសភាដូចគ្នា៕

The post នាយករដ្ឋមន្ត្រីកូរ៉េខាងត្បូង Han Duck-soo អះអាងថា ច្បាប់អាជ្ញាសឹកគឺខុស appeared first on Kampuchea Thmey Daily.

មេធាវី លោក Yoon ថា កូនក្តីខ្លួនមិនអាចចូលខ្លួនបំភ្លឺដោយសារដីកាកោះច្រើនពេក

Rann Reuy — Sat, 28 Dec 2024 05:21:18 +0000

មេធាវីការពារក្តីឲ្យប្រធានាធិបតី Yoon Suk Yeol បានឆ្លើយតបចំពោះសំណួរអ្នកសារព័ត៌មាននៅពេលលោកចូលរួមសវនាការលើអង្គសេចក្តីលើកដំបូងរបស់តុលាការធម្មនុញ្ញ កាលពីថ្ងៃសុក្រថា ប្រធានាធិបតី Yoon Suk Yeol ដែលរងការចោទនិងព្យូរអំណាចដោយរដ្ឋសភាជាតិ នឹងចូលខ្លួនទៅឆ្លើយបំភ្លឺនៅក្នុងតុលាការ «នៅពេលវេលាសមស្រប»។

លោក Yun Gap-geun មេធាវីប្រធានាធិបតីព្យួរអំណាច លោក Yoon Suk Yeol ពេលឆ្លើយសំណួរអ្នកកាសែតនៅមុខតុលាការធម្មនុញ្ញកាលថ្ងៃសុក្រ។ Yonhap

ក្នុងអំឡុងពេលសវនាការ មេធាវីរបស់លោក Yoon បាននិយាយថា ពួកគេនឹងជំទាស់នឹងភាពស្របច្បាប់នៃនីតិវិធីដែលរដ្ឋសភាបានធ្វើឡើងសម្រាប់ដំណើរការចោទប្រកាន់ប្រឆាំងកូនក្តីរបស់គាត់ ខណៈកំពុងសាកសួរអំពីភាពស្របច្បាប់នៃសំណើរបស់តុលាការធម្មនុញ្ញសម្រាប់ការជំនុំជម្រះក្តី។

តុលាការបាននិយាយកាលពីថ្ងៃចន្ទថា ខ្លួនចាត់ទុកថា Yoon បានទទួលច្បាប់ដើមនៃដំណោះស្រាយការចោទប្រកាន់ បន្ទាប់ពីការផ្តល់សេចក្តីសម្រេចរបស់សភាបានបរាជ័យជាច្រើនលើក ដែលត្រូវបានគេមើលឃើញយ៉ាងទូលំទូលាយថា Yoon មានចេតនាជៀសវាងវា។ នេះតាមការចេញផ្សាយរបស់ Korea Herald កាលពីថ្ងៃសុក្រ។

លោក Yun Gap-geun មេធាវីម្នាក់ក្នុងចំណោមមេធាវីរបស់ Yoon បានប្រាប់អ្នកសារព័ត៌មានបន្ទាប់ពីសវនាការលើកដំបូងនៅតុលាការធម្មនុញ្ញ នៅសង្កាត់ Jongno-gu កណ្តាលទីក្រុងសេអ៊ូលកាលពីថ្ងៃសុក្រ តាមសម្រង់សម្តីដើមថា៖«ដោយសារតែមធ្យោបាយរបស់តុលាការក្នុងការផ្តល់ឯកសាររបស់ខ្លួនត្រូវបានរកឃើញថាខុសច្បាប់ ក្រុមមេធាវីការពារក្តីមិនអាច «រៀបចំពេញលេញ» សម្រាប់សវនាការត្រៀមលើកដំបូងបានទេ។ យើងនឹងរៀបចំខ្លួនយើងសម្រាប់សវនាការលើកក្រោយ»។

ប្រធានាធិបតីដែលត្រូវបានព្យួរអំណាច Yoon Suk Yeol បានបង្ហាញមុខតាមកញ្ចក់ទូរទស្សន៍តែពីលើកប៉ុណ្ណោះចាប់តាំងពីថ្ងៃប្រកាសច្បាប់អាជ្ញាសឹកបរាជ័យមក ដោយការបង្ហាញមុខលើកដំបូង គឺសុំទោសប្រជាជនកូរ៉េដោយសារតែភាពវឹកវរក្នុងប្រទេស ហើយ ការបង្ហាញមុខលើកទី២គឺនៅមុខសភាបោះឆ្នោតព្យួរអំណាច ដោយលោកនិយាយពីការប្រយុទ្ធតតាំងរហូតដល់ទីបញ្ជប់។

លោក Yoon Suk Yeol បានបាត់ពីការទំនាក់ទំនងជាសាធារណៈចាប់តាំងពីពេលនោះមក ហើយ ក្រុមស៊ើបការណ៍ចម្រុះពិសេសដែលបង្កើតឡើងដោយរដ្ឋសភា បានបញ្ជួនដីកាឲ្យចូលខ្លួនបំភ្លឺរបស់លោក Yoon យ៉ាងហោចណាស់ពីរលើក ហើយត្រូវលោកបដិសេធចូលខ្លួនបំភ្លឺ។

លោក Yun Gap-geun មេធាវីរបស់លោក Yoon បានប្រាប់អ្នកសារព័ត៌មានថា កូនក្តីរបស់លោក មិនអាចឆ្លើយតបបានភ្លាមៗ ដោយសារអំឡុងពេលនេះមានដីកាកោះហៅច្រើនពេកសម្រាប់ការឆ្លើយបំភ្លឺលើកករណីស៊ើបអង្កេតនោះ៕

ដោយ រ៉ាន់ រើយ

The post មេធាវី លោក Yoon ថា កូនក្តីខ្លួនមិនអាចចូលខ្លួនបំភ្លឺដោយសារដីកាកោះច្រើនពេក appeared first on Kampuchea Thmey Daily.

លោក Han Duck-soo Archives - Kampuchea Thmey Daily

​ផ្លូវការហើយ​! កូរ៉េខាងត្បូង​នឹងរៀបចំបោះឆ្នោត​ប្រធានាធិបតីថ្មីនៅថ្ងៃ​ទី​៣មិថុនា​​

ប្រធានាធិបតីស្តីទី​ Han Duck-soo ​​គោរព​​សាលក្រម និង​ឲ្យ​គណៈរដ្ឋមន្ត្រី​សហការ​ជាមួយ​អាជ្ញាធរ​បោះឆ្នោត

​​​មានការ​ព្រួយបារម្ភ​ខ្លាំង​ជុំវិញអំពើ​ហិង្សា​​​ផ្ទុះ​​​ឡើង​ចំថ្ងៃ​ប្រកាសសាលក្រម លោក Yoon

ការិយាល័យ​ប្រធានាធិបតី​កូរ៉េខាងត្បូង​​សាទរ​ សាលក្រម​តុលាការ​ធម្មនុញ្ញ​នៅថ្ងៃនេះ​​

​តុលាការ​ធម្មនុញ្ញ​កូរ៉េ​​ស្តារ​​អំណា​ចឲ្យលោក Han Duck-soo វិញ​ ​មុន​ប្រកាស​សាលក្រម Yoon

បក្សប្រឆាំង​កូរ៉េខាងត្បូង​ដាក់​សំណើ​ទម្លាក់​អំណាច​ប្រធានាធិបតីស្តីទី Choi Sang-mok

នាយករដ្ឋមន្ត្រី​កូរ៉េខាងត្បូង​ Han Duck-soo អះអាងថា ច្បាប់​អាជ្ញាសឹក​គឺខុស​

មេធាវី​ លោក Yoon ថា កូនក្តី​ខ្លួន​មិនអាច​ចូលខ្លួន​បំភ្លឺ​​ដោយសារ​ដីកាកោះច្រើនពេក​

ផ្លូវការហើយ! កូរ៉េខាងត្បូងនឹងរៀបចំបោះឆ្នោតប្រធានាធិបតីថ្មីនៅថ្ងៃទី៣មិថុនា

ប្រធានាធិបតីស្តីទី Han Duck-soo គោរពសាលក្រម និងឲ្យគណៈរដ្ឋមន្ត្រីសហការជាមួយអាជ្ញាធរបោះឆ្នោត

មានការព្រួយបារម្ភខ្លាំងជុំវិញអំពើហិង្សាផ្ទុះឡើងចំថ្ងៃប្រកាសសាលក្រម លោក Yoon

ការិយាល័យប្រធានាធិបតីកូរ៉េខាងត្បូងសាទរ សាលក្រមតុលាការធម្មនុញ្ញនៅថ្ងៃនេះ

តុលាការធម្មនុញ្ញកូរ៉េស្តារអំណាចឲ្យលោក Han Duck-soo វិញ មុនប្រកាសសាលក្រម Yoon

បក្សប្រឆាំងកូរ៉េខាងត្បូងដាក់សំណើទម្លាក់អំណាចប្រធានាធិបតីស្តីទី Choi Sang-mok

នាយករដ្ឋមន្ត្រីកូរ៉េខាងត្បូង Han Duck-soo អះអាងថា ច្បាប់អាជ្ញាសឹកគឺខុស

មេធាវី លោក Yoon ថា កូនក្តីខ្លួនមិនអាចចូលខ្លួនបំភ្លឺដោយសារដីកាកោះច្រើនពេក