លោក Matthew McConkey Archives - Kampuchea Thmey Daily

ជាគ្រូបង្គោលឆ្នាំដំបូង លោក McConkey ទទួលបានជោគជ័យលើសពីបាល់ទាត់

chean virakbot — Tue, 26 May 2026 02:09:08 +0000

លោក Mattew McConkey ទទួលបានជោគជ័យដ៏អស្ចារ្យទាំងការងារ និងក្រុមគ្រួសារសម្រាប់តួនាទីជាគ្រូបង្គោលក្រុម ព្រះខ័នរាជស្វាយរៀង នៅឆ្នាំដំបូង។

បុរសសញ្ជាតិអៀរឡង់រូបនេះត្រូវបានក្លិប ព្រះខ័នរាជស្វាយរៀង តែងតាំងជាគ្រូបង្គោលកាលពីថ្ងៃទី៣ ខែមិថុនា ឆ្នាំ ២០២៥ ជំនួសលោក Pep Munoz ដែលបានចាកចេញ។ គ្រូបង្វឹកវ័យក្មេងរូបនេះមានភារកិច្ចសំខាន់ចំនួន ៥ ក្នុងការដឹកនាំក្លិប ព្រះខ័នរាជស្វាយរៀង គឺ ពានបើករដូវកាល ខេមបូឌានស៊ុបភើខាប់, ពានលីគបាល់ទាត់កំពូលកម្ពុជា និងពានរង្វាន់សម្តេចអគ្គមហាសេនាបតីតេជោ ហ៊ុន សែន ព្រមទាំងពានអន្តរជាតិ AFC Challenge League និងពានក្លិបអាស៊ាន ASEAN Club Championship។

ជាលទ្ធផល ព្រះខ័នរាជស្វាយរៀង បានឈ្នះជើងឯកក្នុងស្រុកទាំង ៣ តែម្តងគឺ ខេមបូឌានស៊ុបភើខាប់ ពានលីគបាល់ទាត់កំពូលកម្ពុជា និងពានរង្វាន់សម្តេចអគ្គមហាសេនាបតីតេជោ ហ៊ុន សែន និងទទួលបានចំណាត់ថ្នាក់លេខ ២ ពានរង្វាន់ AFC Challenge League ខណៈពាន ASEAN Club Championship ស្ថិតនៅចំណាត់ថ្នាក់លេខ ៣ ក្នុងពូល។ ជាពិសេសទៀតនោះ លោក McConkey បានឈ្នះពានរង្វាន់គ្រូបង្វឹកល្អបំផុត ២ ថែមទៀត។

នេះជាសមិទ្ធផលធំធេងសម្រាប់លោក Mattew McConkey និងក្រុមការងារក្លិប ព្រះខ័នរាជស្វាយរៀង ប៉ុន្តែនិយាយពីលក្ខណៈបុគ្គលរបស់គ្រូបង្គោលគឺលើសពីអ្វីដែលមហាជនបានយល់។

លោកបានប្រាប់«កម្ពុជាថ្មី»ក្នុងបទសម្ភាសថា ៖«ខ្ញុំពិតជាសប្បាយរីករាយណាស់ វាជារដូវកាលមួយដ៏អស្ចារ្យដែលយើងបានបញ្ចប់ដោយឈ្នះពានរង្វាន់ ៣ ផ្សេងគ្នា ។ អរគុណដល់កីឡាករទាំងអស់។ ពួកគេខំប្រឹងខ្លាំងនៅលើទីលាន ក្រុមការងារទាំងអស់ដែលខ្ញុំបានធ្វើការជាមួយ ពួកគេពិតជាអស្ចារ្យ។ ក្រុមការងារវិភាគ ក្រុមវិទ្យាសាស្ត្រកីឡា ក្រុមគ្រូពេទ្យ ពិតជាអស្ចារ្យ ហើយក៏មានក្រុមគ្រួសាររបស់ខ្ញុំ ភរិយា និងកូនរបស់ខ្ញុំដែលបានមកទីនេះដែរ»។

លោកបានបញ្ជាក់ថា ៖«វាប្រហែលជាជាឆ្នាំតឹងតែងបំផុតមួយនៅក្នុងជីវិតរបស់ខ្ញុំ ប៉ុន្តែក៏ប្រហែលជាកាដូដ៏មានន័យបំផុតសម្រាប់ខ្ញុំក្នុងនាមជាគ្រូបង្គោលឆ្នាំដំបូង។ អ្នកគ្រប់គ្នារំពឹងយើងឈ្នះគ្រប់ការប្រកួត ហើយបន្ទាប់មក ភរិយារបស់ខ្ញុំបានសម្រាកកូន ដូច្នេះមិនមែនជាជារឿងងាយស្រួលទេ។ ប៉ុន្តែនិយាយតាមត្រង់ ភរិយរបស់ខ្ញុំបានជួយសម្រាលបន្ទុកខ្ញុំច្រើនណាស់។ ខ្ញុំពិតជាមានមោទនភាពដែលមានគាត់ និងកូនឈ្មោះ Maggie ខ្ញុំពិតជារំភើបរីករាយមែនទែន»៕

FAIR PLAY PREAH KHAN REACH SVAY RIENG FC

អត្ថបទ៖ វិរបុត្រ

The post ជាគ្រូបង្គោលឆ្នាំដំបូង លោក McConkey ទទួលបានជោគជ័យលើសពីបាល់ទាត់ appeared first on Kampuchea Thmey Daily.

មុនជួបគ្នាស្អែក លោក McConkey បង្ហើបចំណុចគ្រោះថ្នាក់មួយរបស់ វិសាខា ក្រោមការដឹកនាំរបស់គ្រូថ្មី

Kosal Sem — Sat, 23 May 2026 11:26:47 +0000

មុនជួបគ្នាក្នុងវគ្គផ្តាច់ព្រ័ត្រពានសម្តេចអគ្គមហាសេនាបតីតេជោ ហ៊ុន សែន លើកទី ១៩ លោក Matthew McConkey គ្រូបង្វឹករបស់ក្រុម ព្រះខ័នរាជស្វាយរៀង បានបង្ហើបពីចំណុចគ្រោះថ្នាក់មួយរបស់ក្រុម វិសាខា ក្រោមការដឹកនាំរបស់គ្រូបង្វឹកថ្មីលោក Scott Cooper គឺត្រង់ការ «ផ្លាស់ប្តូរចង្វាក់លេងលឿន»។

លោក McConkey នឹងត្រូវដឹកនាំក្រុម ព្រះខ័នរាជស្វាយរៀង ប្រកួតតទល់នឹងក្រុម វិសខា នៅក្នុងវគ្គផ្តាច់ព្រ័ត្រពានសម្តេចតេជោ នៅពហុកីឡដ្ឋានជាតិមរតកតេជោ ថ្ងៃ អាទិត្យ ទី ២៤ ខែ ឧសភា ឆ្នាំ ២០២៦។ មុនជំនួបដ៏ធំនេះមកដល់ គ្រូបង្វឹកសញ្ជាតិ អៀរឡង់ វ័យ ៣២ ឆ្នាំ បានសរសើរពីការដឹកនាំរបស់លោក Cooper នាមួយរយៈចុងក្រោយនេះ ដែលក្រុមមិនទាន់ចាញ់ទាល់តែសោះ។

ទន្ទឹមនឹងនេះ លោកក៏បានលើកឡើងពីការព្រួយបារម្ភ ចំពោះចំណុចគ្រោះថ្នាក់ ដែលក្រុម វិសខា មានផងដែរ នោះគឺការប្តូររបៀបលេងលឿន តាមរយៈការប្តូរពីការពារ ទៅប្រយុទ្ធវាយបក។ លោក McConkey បានមានប្រសាសន៍នៅក្នុងសន្និសីទសារព័ត៌មាន ថា៖ «ខ្ញុំយល់ឃើញ ថា ក្រុម វិសាខា លេងដោយមានវិន័យ នៅពេលដែលពួកគេការពារ ឬគ្មានបាល់»។

គ្រូបង្វឹកក្រុម ព្រះខ័នរាជស្វាយរៀង បានបន្ត ថា៖ «ពួកគេមានភាពគ្រោះថ្នាក់ច្រើន នៅពេលពួកគេផ្លាស់ប្តូរចង្វាក់លេង ហើយនៅពេលពួកគេមានបាល់វិញ គឺព្យាយាមប្រយុទ្ធលឿន ទៅតាមគុណភាពកីឡាករ ដែលមាន។ខ្ញុំក៏បានដឹងដែរ ថា គ្រូរបស់ វិសាខា ធ្វើបានល្អ ក្នុងរយៈពេលប៉ុន្មានប្រកួតចុងក្រោយនេះ។ លទ្ធផលប៉ុន្មានប្រកួតចុងក្រោយនេះ គាត់បានឈ្នះគ្រប់ការប្រកួត។ សង្ឃឹម ថាការប្រកួតថ្ងៃស្អែក នឹងក្លាយជាការប្រកួតដ៏ល្អមួយសម្រាប់ពូកយើង»។

លោក McConkey និងខ្សែប្រយុទ្ធ Patrick Robson ដែលបានចូលរួមសន្និសីទសារព័ត៌មាន បានបញ្ជាក់ ថា ក្រុមរបស់លោកបានត្រៀមខ្លួនរួចរាល់ហើយ ដើម្បីដណ្តើមយកជ័យជម្នះ និងពានសម្តេចតេជោរដូវកាល ២០២៥-២០២៦៕

អត្ថបទ៖ សេម កុសល

The post មុនជួបគ្នាស្អែក លោក McConkey បង្ហើបចំណុចគ្រោះថ្នាក់មួយរបស់ វិសាខា ក្រោមការដឹកនាំរបស់គ្រូថ្មី appeared first on Kampuchea Thmey Daily.

លោក McConkey ថា យប់់នេះ ក្រុមម្ចាស់ផ្ទះ Kuwait SC នឹងជួបបញ្ហា ដែលមិនធ្លាប់ជួបពីមុន

Kosal Sem — Wed, 13 May 2026 02:46:21 +0000

លោក Matthew McConkey គ្រូបង្វឹករបស់ក្រុម ព្រះខ័នរាជស្វាយរៀង បានព្រមានក្រុមម្ចាស់ផ្ទះ Kuwait SC នឹងធ្វើឱ្យពួកគេជួបបញ្ហា ដែលមិនធ្លាប់ជួបពីមុនមក ក្នុងវគ្គផ្តាច់ព្រ័ត្រពានរង្វាន់ AFC Challenge League រាត្រីនេះ។

មុនការប្រកួតវគ្គផ្តាច់ព្រ័ត្រពាន ACGL នារាត្រីម៉ោង ១១:៤៥ នាទី (ម៉ោងនៅ កម្ពុជា) ថ្ងៃទី ១៣ ខែ ឧសភា ឆ្នាំ ២០២៦ លោក McConkey បានលើកឡើង ថា ក្រុមរបស់លោកបានត្រៀមរួចរាល់ហើយ។ ក្រុមរបស់លោកនឹងយកបទពិសោធបរាជ័យកាលពីឆ្នាំមុន ដើម្បីប្រើនៅក្នុងការប្រកួតយប់នេះ។

ជាមួយគ្នានេះ គ្រូបង្វឹកសញ្ជាតិ អៀរឡង់ វ័យ ៣៣ ឆ្នាំបានបន្ថែម ថា ក្រុមលោកនឹងផ្តល់ជាបញ្ហាដល់ក្រុមម្ចាស់ផ្ទះ Kuwait SC ដែលពួកគេមិនដែលបានជួបពីមុនមក។ ថ្លែងនៅក្នុងសន្និសីទសារព័ត៌មាន លោក McConkey បានមានប្រសាសន៍ ថា៖ «ផ្នែកផ្លូវចិត្ត ពួកយើងបានត្រៀមខ្លួនរួចរាល់ហើយ។ ពួកយើងនឹងយកបទពិសោធពីឆ្នាំមុនមកប្រើ ដែលពេលនោះយើងមិនអាចសម្រេចគោលដៅបាន»។

លោក McConkey បានបន្ត ថា៖ «ពួកយើងបានសិក្សាពីការប្រកួតរបស់ក្លិប Kuwait SC រួចហើយ។ ខ្ញុំជឿថា ពួកយើងនឹងបង្កបញ្ហាដល់ពួកគេក្នុងរបៀប ដែលពួកគេមិនធ្លាប់ជួបពីមុនមក។ ពួកយើងមានកាលវិភាគមមាញឹកខ្លាំងក្នុងរយៈពេលប៉ុន្មានខែកន្លងមកនេះ ដូច្នេះបន្ទាប់ពីការប្រកួតចុងក្រោយបានបញ្ចប់ ពួកយើងសម្រេចចិត្តមកទីនេះមុន។ នេះជាសប្ដាហ៍ដំបូងក្នុងរយៈពេលយូរដែលពួកយើងមានពេលហ្វឹកហាត់ពេញលេញ ហើយវាពិតជាល្អណាស់។ គ្រប់គ្នាបានត្រៀមខ្លួនរួចរាល់ហើយ»។

គួរឱ្យដឹង ថា នេះជាលើកទី ២ ហើយ ដែល ព្រះខ័នរាជស្វាយរៀង បានឡើងដល់វគ្គផ្តាច់ព្រ័ត្រពានរង្វាន់ AFC Challenge League ខណៈកាលពីរដូវកាលមុនបានបរាជ័យក្រោមថ្វីជើងក្រុម FK Arkadag នៅវគ្គផ្តាច់ព្រ័ត្រក្នុងទឹកដី កម្ពុជា ដោយលទ្ធផល ២-១៕

អត្ថបទ៖ សេម កុសល

The post លោក McConkey ថា យប់់នេះ ក្រុមម្ចាស់ផ្ទះ Kuwait SC នឹងជួបបញ្ហា ដែលមិនធ្លាប់ជួបពីមុន appeared first on Kampuchea Thmey Daily.

មុនជួបគ្នាស្អែក លោកគ្រូ McConkey និង Cristian បារម្ភចំណុចមួយរបស់ Manila Digger

Kosal Sem — Wed, 08 Apr 2026 06:35:44 +0000

គ្រូបង្វឹករបស់ ព្រះខ័នរាជស្វាយរៀង លោក Matthew McConkey និងខ្សែបម្រើប្រយុទ្ធ Cristiano Roque បានមើលឃើញដូចគ្នាពីចំណុចពិសេសមួយរបស់ក្រុម Manila Digger ដែលគួរឱ្យព្រួយបារម្ភ គឺ «ការលេងវាយបកលឿន»។

ព្រះខ័នរាជស្វាយរៀង និង Manila Digger ធ្លាប់បានជួបគ្នារួចម្តងហើយ កាលពីវគ្គចែកពូលនៃពូល D ក្នុងពាន AFC Challenge League នេះ កាលពីថ្ងៃទី ១ ខែ វិច្ឆិកា ឆ្នាំ ២០២៥ ដោយលទ្ធផលពេលនោះស្មើគ្នា ២-២។ តាមរយៈបទពិសោធនេះ បានធ្វើឱ្យលោក McConkey និងកីឡាករក្រុមរហស្សនាមព្រះខ័នខៀវ ទាំងមូលបានដឹងច្រើនអំពីរបៀបលេងរបស់ Manila Digger។

មុនជួបគ្នាក្នុងជើងទី ១ វគ្គពាក់កណ្តាលផ្តាច់ព្រ័ត្រពាន ACGL នៅល្ងាចថ្ងៃ ព្រហស្បតិ៍ ទី ៩ ខែ មេសា ស្អែក ទាំងលោក McConkey និង Cristian បានបង្ហាញការយល់ឃើញអំពីចំណុកពិសេសច្រើនរបស់ក្រុម Manila Digger ប៉ុន្តែចំណុចមួយ ដែលអ្នកទាំង ២ មើលឃើញដូចគ្នា គឺក្រុម Manila Digger លេងលឿនជាមួយការការពារវាយបក។

ថ្លែងនៅក្នុងសន្និសីទសារព័ត៌មាននាព្រឹកថ្ងៃ ពុធ ទី ៨ ខែ មេសា នេះ លោក McConkey បានមានប្រសាសន៍ ថា៖ «យើងបានធ្វើអ្វីៗគ្រប់យ៉ាង តាមរយៈការវិភាគ ហើយយើងបានពិនិត្យមើលការប្រកួតមុនៗទាំងអស់រួចហើយ។ ថ្ងៃស្អែក យើងនឹងត្រូវប្រកួតជាមួយក្រុមមួយដែលខ្លាំងណាស់ មានសមត្ថភាពផ្នែកកាយសម្បទាល្អ មានល្បឿនលឿន ហើយអាចក្លាយជាគ្រោះថ្នាក់ខ្លាំងនៅក្នុងពេលខ្លះៗ»។

គ្រូបង្វឹកសញ្ជាតិ អៀឡង់ បានបន្ថែម ថា៖ «ខ្ញុំគិតថា ចំណុចសំខាន់បំផុតរបស់ពួកគេគឺ ពួកគេគ្រោះថ្នាក់ខ្លាំងនៅពេលប្ដូរពីការការពារទៅវាយប្រហារ។ ដូច្នេះ បើអ្នកបាត់បង់បាល់នៅតំបន់ដែលមិនគួរបាត់ ជាពិសេសនៅតំបន់កណ្ដាលទីលាន វាអាចបង្កបញ្ហាឲ្យយើងបាន។ ដូច្នេះយើងត្រូវគ្រប់គ្រងស្ថានភាពទាំងនោះឲ្យបានល្អ។ ពួកគេមានគុណភាពល្អក្នុងចំណុចជាច្រើន ដូចជា បាល់រៀបចំ ហើយពេលខ្លះក៏អាចរៀបចំការលេងពីក្រោមបានល្អផងដែរ។ ប៉ុន្តែ ចំណុចសំខាន់មួយដែលពួកគេល្អខ្លាំងបំផុត គឺការប្ដូរល្បឿនពីការការពារទៅវាយបក»។

ងាកមកកាន់ Cristian វិញ បានលើកឡើងនៅក្នុងសន្និសីទសារព័ត៌មាន ថា៖ «នេះជាការប្រកួតដ៏លំបាកមួយ ព្រោះពួកគេលេងខ្លាំង និងល្បឿនលឿនយ៉ាងស្វាហាប់។ ប៉ុន្តែយើងត្រូវតែអនុវត្តតាមផែនការរបស់យើង។ ប្រសិនបើយើងអាចគ្រប់គ្រងការប្រកួត ចាត់ចែងការប្រកួតបានល្អ និងបង្កើតឱកាសបាន ខ្ញុំសង្ឃឹមថា យើងនឹងឈ្នះការប្រកួតនេះនៅថ្ងៃស្អែក»។

ទោះបីជាយ៉ាងណា លោក McConkey បានបញ្ជាក់រួចហើយ ថា ក្រុមព្រះខ័នរាជស្វាយរៀង បានត្រៀមរួចរាល់សម្រាប់ការប្រកួតទល់នឹងក្រុម Manila Digger ដើម្បីដណ្តើមជ័យជម្នះ មុនការប្រកួតជើងទី ២ ដែលនឹងត្រូវប្តូរទឹកដីទៅប្រទេស ហ្វីលីពីន នៅថ្ងៃទី ១៦ ខែ មេសា ឆ្នាំ ២០២៦៕

អត្ថបទ៖ សេម កុសល

The post មុនជួបគ្នាស្អែក លោកគ្រូ McConkey និង Cristian បារម្ភចំណុចមួយរបស់ Manila Digger appeared first on Kampuchea Thmey Daily.

លោក McConkey និង លោក Munoz សុទ្ធតែរិះគន់ស្មៅស្តាតអូឡាំពិកមិនល្អ

chean virakbot — Tue, 24 Mar 2026 01:16:54 +0000

លោក Mattew McConkey និងលោក Pep Munoz សុទ្ធតែរិះគន់ស្មៅធម្មជាតិនៃទីលានបាល់ទាត់ក្នុងពហុកីឡដ្ឋានជាតិអូឡាំពិកមិនល្អដែលធ្វើឲ្យប៉ះពាល់ដល់ការលេងរបស់កីឡាករ។

លោកគ្រូបង្វឹករបស់ព្រះខ័នរាជស្វាយរៀងបច្ចុប្បន្ន និងអតីតគ្រូបង្វឹកបានលើកឡើងជារឿយៗអំពីបញ្ហាស្មៅនៅក្នុងពហុកីឡដ្ឋានជាតិអូឡាំពិកមិនល្អ។ លោក Pep Munoz បានមកទស្សនាការប្រកួតចុងក្រោយរបស់លោកនៅពហុកីឡដ្ឋានជាតិអូឡាំពិក កាលពីថ្ងៃទី៥ ខែមីនា ឆ្នាំ ២០២៦ ជាពេល ព្រះខ័នរាជស្វាយរៀង បានឈ្នះ ភ្នំពេញក្រោន ៤-១ ក្នុងពានរង្វាន់ AFC Challenge League។

ក្រោយទស្សនាការប្រកួតនោះ លោក Pep Munoz បានផ្តល់បទសម្ភាសដល់«កម្ពុជាថ្មី»។ ក្នុងបទសម្ភាសនោះ បុរសញ្ជាតិអេស្ប៉ាញបានលើកឡើងថា ៖«គុណភាពស្មៅនៅទីលានពហុកីឡដ្ឋានជាតិអូឡាំពិកពិត បើយើងមើលពីកន្លែងអង្គុយទៅ យើងមិនអាចមើលឃើញច្បាស់ពីបញ្ហាយ៉ាងណាទេ ប៉ុន្តែបើចុះទៅដល់ទីលានផ្ទាល់ ហើយសាកល្បងបញ្ជូនបាល់។ យើងនឹងឃើញថា បាល់លោតខ្លាំង ពិបាកទប់ ពិបាកបញ្ឈប់ ពិបាកគ្រប់គ្រង។ យើងអាចទប់បាន តែមិនសូវបានល្អ ហើយត្រូវទប់ពីរបីដង»។

ចំណែកលោក Mattew McConkey បានរិះគន់ពីស្មៅធម្មជាតិនៅក្នុងពហុកីឡដ្ឋានជាតិអូឡាំពិកតាំងពីដើមរដូវកាលមកម្ល៉េះពោលគឺតាំងពីលោកដឹកនាំ ព្រះខ័នរាជស្វាយរៀង ប្រកួតជាមួយ ភ្នំពេញក្រោន ក្នុងពានរង្វាន់បើករដូវកាល ខេមបូឌានស៊ុបភើខាប់។ ការប្រកួតជាបន្តបន្ទាប់ទៀតនៅទីលានដដែលនេះ លោកក៏តែងតែលើកឡើងពីបញ្ហាស្មៅជារឿយៗទៀត។

ចុងក្រោយបំផុតនៅពេល ព្រះខ័នរាជស្វាយរៀង ស្មើជាមួយ បឹងកេត ០-០ កាលពីថ្ងៃទី២២ ខែមីនា ឆ្នាំ ២០២៦ លោក Mattew McConkey បានលើកឡើងទៀតថា ៖«ខ្ញុំបាននិយាយអំពីស្មៅនៅទីនោះរាល់ពេលចប់ការប្រកួត រាប់ចាប់តាំងពីពាន Super Cup លីគ និងសន្និសីទក្រោយការប្រកួត AFC។ សូមអ្នករាល់គ្នាទៅមើលដោយសេរី។ វាមិនមែនជាលេសទេ តែវាពិតជាប៉ះពាល់ដល់ការប្រកួតមែន»។

រហូតដល់ពេលនេះ លោក Mattew McConkey បានដឹកនាំក្រុមប្រកួតនៅទីលានពហុកីឡដ្ឋានជាតិអូឡាំពិកចំនួន ៤ លើកហើយក្នុងនោះឈ្នះ ២ ស្មើ ១ និងចាញ់ ១ មានដូចជា ឈ្នះ ភ្នំពេញក្រោន ដោយប៉េណាល់ទី ៥-៣ បន្ទាប់ពីស្មើគ្នា ២-២ ពានបើករដូវកាលខេមបូឌានស៊ុបភើខាប់, ឈ្នះ ភ្នំពេញក្រោន ៤-១ ក្នុងពាន AFC និងការប្រកួតក្នុងលីគបានចាញ់ បឹងកេត ១-២ មុនពេលស្មើ ០-០៕

អត្ថបទ៖ វិរបុត្រ

The post លោក McConkey និង លោក Munoz សុទ្ធតែរិះគន់ស្មៅស្តាតអូឡាំពិកមិនល្អ appeared first on Kampuchea Thmey Daily.

លោក McConkey ចាត់ទុកការជួប Manila វគ្គ ១/២ ពាន ACGL ជាជំនួបតឹងតែង

Kosal Sem — Sat, 14 Mar 2026 01:01:00 +0000

គ្រូបង្គោលរបស់ក្រុម ព្រះខ័នរាជស្វាយរៀង លោក Matthew McConkey បានចាត់ទុកការជួបក្រុម Manila Digger នៅវគ្គពាក់កណ្តាលផ្តាច់ព្រ័ត្រពានរង្វាន់ AFC Challenge League ជាជំនួបដ៏តឹងតែងខ្លាំង ហើយចំណុចមួយ ដែលលោកមានការព្រួយបារម្ភចំពោះក្រុម ហ្វីលីពីន គឺពួកគេមានកីឡាករបរទេសច្រើន។

លទ្ធផលសរុបទាំង ២ ជើងកាលពីវគ្គ ៨ ក្រុមចុងក្រោយ ព្រះខ័នរាជស្វាយរៀង បានយកឈ្នះលើក្រុម ភ្នំពេញក្រោន ក្នុងលទ្ធផល ៦-២។ ចំណែកក្រុមរបស់ ហ្វីលីពីន Manila Digger បានឈ្នះក្រុម Dewa United របស់ ឥណ្ឌូណេស៊ី ៣-២។ តាមរយៈលទ្ធផលនេះ បានបង្ហាញ ថា ក្រុម ព្រះខ័នរាជស្វាយរៀង ត្រូវជួបក្រុម Manila Digger នៅវគ្គពាក់កណ្តាលផ្តាច់ព្រ័ត្រពាន ACGL។

ជុំវិញការជួបដៃគូចាស់ Minila នៅវគ្គពាក់កណ្តាលផ្តាច់ព្រ័ត្រ លោក McConkey បានមានប្រសាសន៍នៅក្នុងសន្និសីទសារព័ត៌មាន ក្រោយបញ្ចប់ការប្រកួតទល់ក្រុម ភ្នំពេញក្រោន ថ្ងៃទី ១២ ខែ មីនា ម្សិលមិញ ថា៖ «ខ្ញុំរំពឹង ថា ជាការប្រកួតមួយដ៏តានតឹងសម្រាប់ការជួបក្រុម Manila ព្រោះការប្រកួតថ្មីនេះ ពួកគេក៏មានកីឡាករថ្មីបន្ថែម ហើយយើងក៏មានកីឡាករថ្មីបន្ថែម បន្ទាប់ពីការប្រកួតក្នុងវគ្គចែកពូល»។

គួររម្លឹក ថា កាលពីការប្រកួតវគ្គចែកពូលក្នុងពូល D ក្រុម ព្រះខ័នរាជស្វាយរៀង បានជួបក្រុម Manila Digger រួចម្តងហើយនៅ ពហុកីឡដ្ឋានជាតិមរតកតេជោ ដោយពេលនោះក្រុមទាំង ២ ស្មើគ្នា ២-២៕

អត្ថបទ៖ សេម កុសល

The post លោក McConkey ចាត់ទុកការជួប Manila វគ្គ ១/២ ពាន ACGL ជាជំនួបតឹងតែង appeared first on Kampuchea Thmey Daily.

លោក McConkey ថា ជួប ភ្នំពេញក្រោន យប់នេះមិនលេងទប់ទេ ព្រោះវាមិនមែនអត្តសញ្ញាណក្រុម

Kosal Sem — Thu, 12 Mar 2026 02:57:48 +0000

លោក Matthew McConkey គ្រូបង្វឹករបស់ក្រុម ព្រះខ័នរាជស្វាយរៀង បានបង្ហើបអំពីផែនការនៃការលេងរបស់ក្រុមលោកទល់ ភ្នំពេញក្រោន នាល្ងាចថ្ងៃ ព្រហស្បតិ៍ ទី ១២ ខែ មីនា នេះ នឹងមិនទប់ការពារនោះទេ ទោះកាលពីជើងទី ១ បានយកឈ្នះក្នុងលទ្ធផលរហូតដល់ទៅ ៤-១ ក៏ដោយ។

ទោះបីជាមានគ្រាប់បាល់ចំណេញ ៣ គ្រាប់ក្នុងដៃហើយក៏ដោយ ក៏លោក McConkey អះអាង ថា ក្រុមលោកនឹងមិនលេងទប់ ឬការការពារសុទ្ធ ដើម្បីយកជ័យជម្នះត្រឹមលទ្ធផលប៉ុណ្ណេះ ដើម្បីឡើងទៅកាន់វគ្គបន្តឡើយ ព្រោះទាំងនេះមិនមែនជាអត្តសញ្ញាណរបស់លោក និងក្រុមលោកទាំងមូលទេ។ លោកបានសង្កត់ធ្ងន់ ថា នឹងបន្តលេងខ្លាំងទល់ ភ្នំពេញក្រោន ដដែល ដើម្បីរកគ្រាប់បាល់បន្ថែម តាមដែលអាចធ្វើទៅបាន។

ថ្លែងនៅក្នុងសន្និសីទសារព័ត៌មានកាលពីថ្ងៃទី ១១ ខែ មីនា គ្រូបង្វឹកសញ្ជាតិ អៀឡង់ វ័យ ៣២ ឆ្នាំ បានមានប្រសាសន៍ ថា ៖ «បាទ! ខ្ញុំរំពឹងថា ភ្នំពេញក្រោន នឹងចាប់ផ្តើមលេងខ្លាំង។ ខ្ញុំក៏រំពឹងថា ពួកយើងនឹងចាប់ផ្តើមខ្លាំងទៅវិញដែរ។ វាមានរយៈពេល ៩០នាទី ដូច្នេះអ្វីៗក៏អាចកើតឡើងបានដែរ»។

លោក McConkey បានបន្ថែម ថា ៖«ការប្រកួតទាំងអស់ដែលយើងបានលេងកន្លងមកមានគ្រាប់បាល់យ៉ាងច្រើន។ ដូច្នេះ ការគិត ដែលថាយើងអាចគ្រាន់តែលេងទប់ៗ ៩០នាទី ដើម្បីឡើងទៅវគ្គបន្ត មិនមែនជារបៀបដែលយើងលេងទេ។ វាមិនមែនជារបៀបដែលក្រុមនេះត្រូវបានកសាងឡើងឡើយ។ វាមិនមែនជាអត្តសញ្ញាណរបស់ខ្ញុំទេ ហើយវាមិនមែនជារបៀបដែលខ្ញុំចង់ឲ្យកើតឡើងទេ។ នៅពេលខ្លះ យើងត្រូវតែអត់ធ្មត់ និងការពារឲ្យបានល្អ ត្រូវនៅជាមួយគ្នា និងរៀបចំឲ្យល្អ ប៉ុន្តែឥឡូវនេះយើងប្រកួត ដើម្បីរកគ្រាប់បាល់។ យើងទៅស៊ុតបញ្ចូលទីឲ្យបានច្រើនតាមដែលអាចធ្វើបាន ហើយឈ្នះការប្រកួតនេះ»។

រម្លឹកថា ជើងទី ១ វគ្គ ៨ ក្រុមចុងក្រោយពានរង្វាន់ AFC Challenge League ដែលធ្វើឡើងកាលពីថ្ងៃទី ៥ ខែ មីនា ឆ្នាំ ២០២៦ នៅពហុកីឡដ្ឋានជាតិអូឡាំពិក ក្រុម ព្រះខ័នរាជស្វាយរៀង បានយកឈ្នះក្រុមម្ចាស់ផ្ទះ ភ្នំពេញក្រោន ក្នុងលទ្ធផលយ៉ាងធំធេង ៤-១។ ក្រុមទាំង ២ នឹងត្រូវជួបគ្នាជាថ្មី ក្នុងការប្រកួតជើងទី ២ ល្ងាចនេះនៅពហុកីឡដ្ឋានជាតិមរតកតេជោ ដើម្បីកាត់សេចក្តីរកមួយក្រុមឡើងវគ្គពាក់កណ្តាលផ្តាច់ព្រ័ត្រពាន ACGL៕

អត្ថបទ៖ សេម កុសល

The post លោក McConkey ថា ជួប ភ្នំពេញក្រោន យប់នេះមិនលេងទប់ទេ ព្រោះវាមិនមែនអត្តសញ្ញាណក្រុម appeared first on Kampuchea Thmey Daily.

លោក McConkey ថា ជួប ភ្នំពេញក្រោន នៅពានផ្សេង និងពានអាស៊ី មានភាពខុសគ្នាធំមួយ

Kosal Sem — Thu, 05 Mar 2026 05:30:00 +0000

លោក Matthew McConkey គ្រូបង្វឹករបស់ក្រុម ព្រះខ័នរាជស្វាយរៀង បានលើកឡើងពី «សមាសភាពកីឡាករបរទេស» ជាភាពខុសប្លែកគ្នាធំ ១ រវាងការជួប ភ្នំពេញក្រោន ក្នុងពានក្នុងស្រុក និងពានអន្តរជាតិ AFC Challenge League។

លោក McConkey បានលើកឡើង ដោយស្គាល់ ភ្នំពេញក្រោន ជាគូប្រជែងដ៏ពិបាកបំផុតសម្រាប់លោករាល់ការជួបគ្នាម្តងៗ។ ទោះបីជាយ៉ាងណា សម្រាប់ការជួបគ្នានៅពានអន្តរជាតិកម្រិត AFC ជាលើកដំបូង លោកយល់ ថា មិនមានអ្វីខុសប្លែកគ្នាច្រើនពីការជួបគ្នាមុនៗទេ ប៉ុន្តែរឿងធំមួយគត់ ដែលជាចំណុចខុសប្លែកគ្នា គឺសមាសភាពកីឡាករបរទេស។

បុរសសញ្ជាតិ អៀរឡង់ វ័យ ៣២ ឆ្នាំប្រាប់ ថា របៀបប្រកួតរបស់ក្រុមនឹងមិនខុសគ្នាពីការប្រកួតមុនៗទេ ប៉ុន្តែរឿងមួយដែលជាចំណុចខុសប្លែក គឺសមាសភាពកីឡាករ ១១ នាក់នៅលើទីលាន។ ជាការពិត រាល់ការជួបគ្នាមុនៗដូចជាក្នុងពាន Cambodian Super Cup, ពានលីគកំពូល កម្ពុជា និងពានសម្តេចតេជោ ត្រូវបានកំណត់ការប្រើប្រាស់កីឡាករបរទេសនៅក្នុងក្រុម ប៉ុន្តែក្នុងពាន ACGL គឺអនុញ្ញាតឱ្យប្រើកីឡាករបរទេសដោយសេរី ស្របពេលក្រុមទាំង ២ សុទ្ធតែបានបន្ថែមសមាជិកកីឡាករបរទេសថ្មីផងដែរ។

ថ្លែងនៅក្នុងសន្និសីទសារព័ត៌មានកាលពីថ្ងៃ ពុធ ទី ៤ ខែ មីនា ឆ្នាំ ២០២៦ លោក McConkey បានមានប្រសាសន៍ ថា ៖ «ខ្ញុំគិតថា នៅក្នុងការប្រកួតមុនៗ ជាមួយការប្រកួត ACGL ភាពខុសគ្នាធំបំផុតគឺអ្នកលេងដែលនៅលើទីលាន។ ច្បាស់ណាស់ ពួកគេត្រូវការជ្រើសរើសកីឡាករបន្ថែម ហើយពួកគេបានធ្វើរួចហើយ។ ពួកយើងក៏មានកីឡាករបន្ថែមដែរ។ ដូច្នេះ បាទខ្ញុំគិតថា នេះជាភាពខុសគ្នាធំបំផុតតែមួយប៉ុណ្ណោះ។ ប៉ុន្តែសម្រាប់របៀបដែលការប្រកួតនឹងដំណើរការ ខ្ញុំមិនគិតថាវានឹងខុសពីការប្រកួតមុនៗច្រើនទេ។ ខ្ញុំគ្រាន់តែគិតថា សក្តានុពលរបស់អ្នកលេង ១១ នាក់ នឹងក្លាយជាភាពខុសគ្នាធំបំផុត»។

គួរបញ្ជាក់ផងដែរ ថា សម្រាប់ការជួបគ្នាជើងទី ១ វគ្គ ៨ ក្រុមចុងក្រោយពាន ACGL នាល្ងាចថ្ងៃទី ៥ ខែ មីនា នេះ ក្រុម ភ្នំពេញក្រោន បានត្រៀមកីឡាករបរទេសសរុបដល់ទៅ ១១ នាក់។ ចំណែក ព្រះខ័នរាជស្វាយរៀង វិញ មានកីឡាករបរទេសសរុបចំនួន ៨ នាក់៕

អត្ថបទ៖ សេម កុសល

The post លោក McConkey ថា ជួប ភ្នំពេញក្រោន នៅពានផ្សេង និងពានអាស៊ី មានភាពខុសគ្នាធំមួយ appeared first on Kampuchea Thmey Daily.

លោក Matthew McConkey Archives - Kampuchea Thmey Daily

ជា​គ្រូ​បង្គោល​ឆ្នាំ​ដំបូង លោក McConkey ទទួល​បាន​ជោគជ័យ​លើស​ពី​បាល់ទាត់

មុនជួបគ្នាស្អែក លោក McConkey បង្ហើបចំណុចគ្រោះថ្នាក់មួយរបស់ វិសាខា ក្រោមការដឹកនាំរបស់គ្រូថ្មី

លោក McConkey ​ថា យប់់​នេះ ក្រុម​​ម្ចាស់ផ្ទះ Kuwait SC នឹង​ជួបបញ្ហា ដែល​មិនធ្លាប់ជួបពីមុន

មុនជួបគ្នាស្អែក លោកគ្រូ McConkey និង Cristian បារម្ភចំណុចមួយរបស់ Manila Digger

លោក McConkey និង លោក Munoz សុទ្ធ​តែ​រិះ​គន់​​ស្មៅ​ស្តាត​អូឡាំពិក​មិន​ល្អ

លោក McConkey ចាត់ទុកការជួប Manila វគ្គ ១/២ ពាន ACGL ជាជំនួបតឹងតែង

លោក McConkey ថា ជួប ភ្នំពេញក្រោន យប់នេះមិនលេងទប់ទេ ព្រោះវាមិនមែនអត្តសញ្ញាណក្រុម

លោក McConkey ថា ជួប ភ្នំពេញក្រោន នៅពានផ្សេង និង​ពាន​អាស៊ី មានភាពខុសគ្នាធំមួយ

ជាគ្រូបង្គោលឆ្នាំដំបូង លោក McConkey ទទួលបានជោគជ័យលើសពីបាល់ទាត់

លោក McConkey ថា យប់់នេះ ក្រុមម្ចាស់ផ្ទះ Kuwait SC នឹងជួបបញ្ហា ដែលមិនធ្លាប់ជួបពីមុន

លោក McConkey និង លោក Munoz សុទ្ធតែរិះគន់ស្មៅស្តាតអូឡាំពិកមិនល្អ

លោក McConkey ថា ជួប ភ្នំពេញក្រោន នៅពានផ្សេង និងពានអាស៊ី មានភាពខុសគ្នាធំមួយ