លោកបណ្ឌិតសភាចារ្យ ហ៊ាន សាហ៊ីប បានលើកឡើងនៅក្នុងឱកាសដឹកនាំប្រតិភូក្រុមការងារចូលរួម កម្មវិធីចែករំលែកចំណេះដឹង និងផ្លាស់ប្តូរបទពិសោធន៍ ពាក់ព័ន្ធ និងទំនើបកម្មប្រព័ន្ធគ្រប់គ្រងហិរញ្ញវត្ថុសាធារណៈ នៅទីក្រុងលីសបូន នៃសាធារណរដ្ឋព័រទុយហ្គាល់ ចាប់ពីថ្ងៃទី ១៥-១៩ ខែធ្នូ ឆ្នាំ ២០២៥។

លោកបណ្ឌិតសភាចារ្យបានបន្តថា រហូតមកដល់ពេលនេះ, FMIS បានដំណើរការអស់រយៈពេលជាងមួយទស្សវត្សមកហើយ ដោយមានការដ្ឋានច្រើនជាង ៣០០ ការដ្ឋាន និងមានអ្នកប្រើប្រាស់លើសពី ៣ ០០០ នាក់ ដោយបានភ្ជាប់ទំនាក់ទំនង និងប្រតិបត្តិការហិរញ្ញវត្ថុនៅទូទាំងប្រទេស។

លើសពីនេះ, FMIS ត្រូវបានទទួលស្គាល់ជាប្រព័ន្ធតែមួយគត់នៅកម្ពុជា សម្រាប់ការគ្រប់គ្រងថវិការដ្ឋ ការរៀបចំការអនុវត្ត និងការគ្រប់គ្រងចំណូល និងចំណាយ ដោយដើរតួរជាឧបករណ៍ស្នូលសម្រាប់ប្រតិបត្តិការហិរញ្ញវត្ថុសាធារណៈ និង ថវិកា។

លោកបណ្ឌិតសភាចារ្យ បានបន្ថែមថា រដ្ឋាភិបាលនានានៅទូទាំងពិភពលោកបានទទួលស្គាល់ថា ប្រព័ន្ធគ្រប់គ្រងហិរញ្ញវត្ថុសាធារណៈ ដែលមានប្រសិទ្ធភាព និងតម្លាភាព មិនគ្រាន់តែជាឧបករណ៍រដ្ឋបាលហិរញ្ញវត្ថុ សម្រាប់ការកត់ត្រាទិន្ន​ន័យ​តែប៉ុណ្ណោះនោះទេ, ប៉ុន្តែប្រព័ន្ធគ្រប់គ្រងហិរញ្ញវត្ថុសាធារណៈ គឺជាសសរស្តម្ភមូលដ្ឋាននៃ អភិបាលកិច្ចល្អ ស្ថិរភាពសេដ្ឋកិច្ច និងការអភិវឌ្ឍ ប្រកបដោយចីរភាព។

ក្នុងន័យនេះលោកបណ្ឌិតសភាចារ្យបានផ្តល់អនុសាសន៍ណែនាំឱ្យក្រុមការងារ ត្រូវយកចិត្តទុកដាក់ ក្នុងការដកស្រង់មេរៀន និងបទពិសោធន៍ល្អៗ ពីក្រុមហ៊ុន FreeBalance តាមរយៈការសិក្សារៀនសូត្រ អំពីការអនុវត្តគម្រោងប្រព័ន្ធបច្ចេកវិទ្យាព័ត៌មានសម្រាប់ការគ្រប់គ្រងហិរញ្ញវត្ថុសាធារណៈ ជាអន្តរជាតិ, បច្ចេកទេសក្នុងការគ្រប់គ្រង និងសមា​ហ​រណកម្មលើទិន្នន័យប្រព័ន្ធ, និងផលិតផលពាក់ព័ន្ធនឹងទំនើបកម្មប្រព័ន្ធគ្រប់គ្រងហិរញ្ញវត្ថុសាធារណៈ។

លោកបណ្ឌិតសភាចារ្យបានបញ្ជាក់ថា ខណៈដែលកំពុងស្ថិតក្នុងដំណាក់កាលអន្តរកាល ក្នុងការបន្តគោលដៅគម្រោង FMIS ជំហានទី៤, ក្រុមការងារ បាននិងកំពុងរៀបចំផែនការ និងវាយតម្លៃយ៉ាងប្រុងប្រយ័ត្នលើកត្តាធាតុផ្សំសំខាន់ៗ រួមមាន ប្រសិទ្ធភាពនៃការវិនិយោគ ភាពបត់បែន ការពង្រីក និរន្តរភាព និងមុខងាររបស់ប្រព័ន្ធ ដែលផ្តល់ការជំរុញប្រ​សិទ្ធភាព សម្រាប់ការគ្រប់គ្រងថវិកា គណនេយ្យ និងរបាយការណ៍ហិរញ្ញវត្ថុ ឱ្យបានកាន់តែប្រសើរ។

លោកបណ្ឌិតសភាចារ្យ បានសង្កត់ធ្ងន់ថា ក្រុមការងារគ្រប់គ្រងគម្រោង FMIS នឹងបន្តប្រមូលការយល់ដឹង ធ្វើការវាយតម្លៃលម្អិត និងចូលរួមជាមួយភាគីពាក់ព័ន្ធ ដើម្បីរៀបចំផែនការគាំទ្រចីរភាព នៃដំណើរការរបស់ប្រព័ន្ធ ដែលបម្រើតម្រូវ​ការគ្រប់គ្រងហិរញ្ញវត្ថុសាធារណៈរបស់កម្ពុជា ប្រកបដោយប្រសិទ្ធភាព ព្រមទាំងធានាបាននូវនិរន្តរភាពរយៈពេលវែង ជាមួយនឹងតម្លៃវិនិយោគសមរម្យ៕

អត្ថបទ៖ សំអឿន

The post ប្រព័ន្ធ «FMIS» ដើរតួនាទីសំខាន់ក្នុងដំណើរការធ្វើទំនើបកម្មគ្រប់គ្រងហិរញ្ញវត្ថុសាធារណៈ និងថវិកាជាតិ appeared first on Kampuchea Thmey Daily.

លោកស្រី ជា សិរី ទេសាភិបាលធនាគារជាតិនៃកម្ពុជា មានប្រសាសន៍នៅថ្ងៃទី ១៧ ខែធ្នូ ឆ្នាំ ២០២៥ថា វិស័យហិរញ្ញវត្ថុបានរីកចម្រើន​យ៉ាងឆាប់រហ័ស ដែលបានគាំទ្រយ៉ាង​សកម្មដល់​កំណើន​សេដ្ឋកិច្ច ការអភិវឌ្ឍ និងការកាត់បន្ថយភាពក្រីក្រនៅកម្ពុជា។

ប្រព័ន្ធធនាគារបន្តមានភាពធន់ និងមានដើមទុនគ្រប់គ្រាន់ ស្របពេលដែលប្រព័ន្ធ​ទូទាត់​សង​ប្រាក់អេឡិចត្រូនិកត្រូវបានអភិវឌ្ឍ និងពង្រីកវិសាលភាពឆាប់រហ័សដល់ធុរជន និងប្រជាពលរដ្ឋទូទៅនៅទូទាំងប្រទេស។

ម្យ៉ាងទៀត ការកែទម្រង់វិស័យហិរញ្ញវត្ថុមិនមែនធនាគារ ដូចជា វិស័យធានារ៉ាប់រង វិស័យ​មូលបត្រ វិស័យបរធ​ន-​​បាល​កិច្ច វិស័យសោធន និងហេដ្ឋារចនាសម្ព័ន្ធហិរញ្ញវត្ថុនានា ត្រូវបាន​អភិវឌ្ឍ ​និងបានដើរ​តួ​នា​ទីកា​ន់​តែ​សំខាន់នៅក្នុងសេដ្ឋកិច្ច។

លោកស្រី ជា សិរី បានបន្ថែមថា វិបត្តិជំងឺកូវីដ-១៩ និងផលប៉ះពាល់ដែលបន្សល់ទុក បានធ្វើឱ្យ​ប៉ះ​ពាល់ដល់ខ្សែច្រវាក់ផ្គត់ផ្គង់សកល កំណើនសេដ្ឋកិច្ច និងនាំឱ្យប្រជាពលរដ្ឋមួយចំនួន​ធ្លាក់ទៅ​ក្នុង​ភាពក្រីក្រ។

ការកើនឡើងនៃភាពតានតឹងភូមិសាស្ត្រនយោ​​បាយ សង្គ្រាមពាណិជ្ជកម្ម និងជម្លោះ​ប្រដាប់អាវុធបានបង្កផលរំខានបន្ថែមដល់ខ្សែច្រវាក់ផ្គត់ផ្គង់ ពាណិជ្ជកម្មអន្តរជាតិ ទំនុកចិត្ត​វិនិយោគិន និងធ្វើឱ្យស្ថានភាពសេដ្ឋកិច្ចពិភពលោ​ក កាន់តែមានភាពមិនច្បាស់លាស់។

វិស័យហិរញ្ញវត្ថុដែលរឹងមាំ មិនមែនជាគោលដៅចុងក្រោយនោះទេ ប៉ុន្តែជាមូលដ្ឋានគ្រឹះ​សម្រាប់​ការអភិវឌ្ឍសេដ្ឋកិច្ច និងលើកកម្ពស់ជីវភាពរបស់ប្រជាពលរដ្ឋកម្ពុជាទាំងអស់​។

លោកឧបនាយករដ្ឋមន្ត្រី អូន ព័ន្ធ មុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ មានប្រសាសន៍ថា សេដ្ឋកិច្ចកម្ពុជាបានស្ទុះងើបឡើងវិញយ៉ាងរហ័ស បន្ទាប់ពីជំងឺកូវីដ១៩ ទោះបីជាត្រូវបន្តពុះពារ​ជម្នះ​នូវបញ្ហាប្រឈម និងភាពមិនប្រាកដប្រជាខ្ពស់ នៃស្ថានភាពតំបន់ និងសាកល ដោយ​សារ​ការ​បន្តប្រឈមមុខខាងភូមិសាស្ត្រនយោបាយកាន់តែស្រួចស្រាល់, ការបែកខ្ញែកនៃ សេដ្ឋកិច្ច សាកល ដែលប៉ះពាល់ដល់កិច្ចសហប្រតិបត្តិការ និងពាណិជ្ជ​កម្មអន្តរជាតិ, ការងើប មកវិញ នៃនិន្នា ការឯកតោភាគីនិយម, ភាពមិនច្បាស់លាស់នៃ​ទស្សនវិស័យ​កំណើន​សេដ្ឋកិច្ច នៃបណ្ដា ប្រទេស និងតំបន់ ជាដៃគូពាណិជ្ជកម្មសំខាន់ៗ របស់កម្ពុជា និងការប្រែប្រួលអាកាសធាតុ។

លោកឧបនាយករដ្ឋមន្ត្រី បន្ថែមថា សេដ្ឋកិច្ចកម្ពុជា ត្រូវបានរំពឹងថា អាចនឹងសម្រេច​បានកំណើន​ក្នុង​រង្វង់ប្រមាណ ៥,២% ក្នុងឆ្នាំ ២០២៥ និង ៥% នៅឆ្នាំ ២០២៦ ទោះបីជា​ត្រូវ​ប្រឈម​នឹង​ការ​ដាក់ពន្ធគយបដិការ និងការឈ្លានពានពីប្រទេសជិតខាង។

លោកឧបនាយករដ្ឋមន្ត្រី ជំរុញឱ្យធនាគារជាតិ ពន្លឿនការដឹកនាំរៀបចំយន្តការការពារប្រាក់បញ្ញើ និងសិក្សាត្រៀមទប់​ទល់ ការគ្រប់គ្រងវិបត្តិ ព្រមទាំងរៀបចំសូចនាករហានិភ័យគន្លឹះ និងប្រព័ន្ធ​ផ្ដល់​សញ្ញាជាមុន សំដៅរួមចំណែកធានាស្ថិរភាពប្រព័ន្ធហិរញ្ញវត្ថុ៕

អត្ថបទ៖ ឡេង ដេត

The post កម្ពុជាដាក់ឱ្យប្រើប្រាស់ យុទ្ធសាស្ត្រអភិវឌ្ឍន៍វិស័យ​ហិរញ្ញវត្ថុ ឆ្នាំ២០២៥-២០៣០ ជំរុញការអភិវឌ្ឍសេដ្ឋកិច្ច appeared first on Kampuchea Thmey Daily.

លោក តូច ចៅចេក សមាជិកក្រុមប្រឹក្សានៃសមាគមធនាគារនៅកម្ពុជា (ABC) បានលើកឡើងថា ស្ថិតក្នុងបរិបទនៃស្ថានភាពសេដ្ឋកិច្ចសកលនិងក្នុងតំបន់ហាក់មានភាពមិនច្បាស់លាស់​ វិស័យហិរញ្ញវត្ថុនៅកម្ពុជារងឥទ្ធិពលដែលនឹងប៉ះពាល់ដល់អត្រាកំណើនក្នុងវិស័យនេះទាប់ជាងការរំពឹងទុក។

បើយោងតាមរបាយការណ៍របស់ការិយាល័យជំនាញសេដ្ឋកិច្ចនៃ ASEAN+3 (AMRO) ចេញផ្សាយកាលពីថ្ងៃចន្ទ តំបន់អាស៊ាន+៣ ដែលរួមមានអាស៊ានទាំង១០ (សមាគមប្រជាជាតិអាស៊ីអាគ្នេយ៍) អាស៊ានបូកចិន ជប៉ុន និងកូរ៉េខាងត្បូង ត្រូវបានព្យាករថានឹងសម្រេចបាននូវកំណើនសេដ្ឋកិច្ចក្នុងអត្រា ៤,៣% នៅឆ្នាំ២០២៥ ទាបជាង ៤,៤% ក្នុងឆ្នាំ២០២៤ នេះ ខណៈស្ថាប័នរូបិយវត្ថុអន្តរជាតិ ហៅកាត់ថា IMF កាលពីចុងខែមេសាបានធ្វើការកាត់បន្ថយការព្យាករណ៍កំណើនសេដ្ឋកិច្ចរបស់កម្ពុជាពី៥,៨%កាលពីខែមករា មក ៤ %ក្នុងឆ្នាំ២០២៥ និងថយថយទៅត្រឹម​៣,៤%នៅឆ្នាំ២០២៦។

សម្រាប់ការកាត់បន្ថយនៃការព្យាករណ៍កំណើនសេដ្ឋកិច្ចនេះដោយសារតែការផ្ទុះឡើងវិញនៃសង្រ្គាមពាណិជ្ជកម្មសកល ដោយសារតែការតំឡើងពន្ធគយបដិការរបស់លោកប្រធានាធិបតីសហរដ្ឋអាមេរិក លោកដូណាល់ ត្រាំកាលពីដើមខែមេសា។

លោកស្រី Kristalina Georgieva នាយិកានៃ IMF

លោក តូច ចៅចេក ក៏ជាប្រធាន​នាយក​ប្រតិបត្តិ​ធនាគារ​ប្រៃសណីយ៍​កម្ពុជា បានថ្លែងប្រាប់កម្ពុជាថ្មី​ថា ចាប់តាំងពីលោកប្រធានាធិបតីអាមេរិកក្រឡុករឿងពន្ធបដិការនេះ ក៏វាបានធ្វើឱ្យការព្យាករណ៍សេដ្ឋកិច្ចរបស់យើងមានការប្រែប្រួលផងដែរ ដែលកាលពីដើមឆ្នាំទាំងស្ថាប័នរដ្ឋ និងស្ថាប័នអន្តរជាតិនានាបានព្យារករណ៍ថាកំណើនសេដ្ឋកិច្ចយើងខ្ពស់ ប៉ុន្តែកាលពីពេលថ្មីៗនេះ ពួកគេបានកាត់បន្ថយកំណើនសេដ្ឋកិច្ចរបស់កម្ពុជាយើងនៅឆ្នាំនេះ។ ការណ៍នេះវានឹងប៉ះពាល់ដល់កំណើននៅក្នុងវិស័យហិរញ្ញវត្ថុផងដែរ។

លោកថា៖«ការតំឡើងពន្ធបដិការរបស់លោកត្រាំនឹងប៉ះពាល់ដល់សេដ្ឋកិច្ចសកល តំបន់ រួមទាំងកម្ពុជា ហើយវាក៏នឹងប៉ះពាល់ដល់វិស័យហិរញ្ញវត្ថុផងដែរ ដោយសារតែវានឹងជះឥទ្ធិពលអវិជ្ជមានដល់ចំណូលរបស់ពលរដ្ឋ​។ ​យើងធ្វើការនាំចេញទៅទីផ្សារអាមេរិកក៏ច្រើនដែរ។ ជាមួយគ្នានេះដែរ យើងក៏សង្កេតឃើញថារដ្ឋាភិបាលក៏បានបង្កើតក្រុមការងារជំពូបកិច្ចសម្រាប់ការចរចាជាមួយអាមេរិកផងដែរ។ យើងសង្ឃឹមថាការចរចានឹងបានសម្រេចដើម្បីរក្សាបាននូវកំណើននៃការនាំចេញរបស់យើងទៅកាន់ទីផ្សារអាមេរិក ដែលយើងគិតថាអត្រាពន្ធនឹងធ្លាក់ចុះមកកម្រិតណាមួយដែលសមរម្យដែលវានឹងមិនប៉ះពាល់ខ្លាំងដល់សេដ្ឋកិច្ចយើង»។

សម្រាប់វិស័យធនាគារ លោក តូច ចៅចេក បានគូសបញ្ជាក់ថា វិស័យនេះបានធ្វើការប្រយ័ត្នប្រយែងនៃការបញ្ចេញឥណទានចាប់តាំងពីក្រោយការគ្រប់គ្រងបាននៃការរីករាលដាលជំងឺកូវីដ១៩ ដោយសារតែអត្រាឥណទានមិនដំណើការកើនឡើង។

លោកថា៖«ប៉ុន្តែមិនមែនន័យថាយើងមិនបញ្ចេងឥណទាននោះទេ យើងហាក់បញ្ចេញច្រើនដោយសារយើងត្រូវការប្រាក់ចំណូលដើម្បីទប់ទាល់នឹងចំណាយប្រតិបត្តិការ ប៉ុន្តែគ្រាន់តែយើងមានការកំណត់លក្ខខណ្ឌមួយចំនួនតឹងតែង​ និងប្រុងប្រយ័ត្នខ្ពស់ជាងមុន ប៉ុន្តែអតិថិជនអាចទទួលបានឥណទានច្រើនជាងមុន និងអត្រាការប្រាក់ល្អជាងមុនផងដែរ»។

​លោកស្រីបណ្ឌិត ជា សិរី ទេសាភិបាល NBC បានដឹកនាំគណៈប្រតិភូធនាគារជាតិនៃកម្ពុជា ចូលរួមកិច្ចប្រជុំរួមថ្នាក់រដ្ឋមន្ត្រីហិរញ្ញវត្ថុនិងទេសាភិបាលធនាគារកណ្តាលអាស៊ាន+៣ នាថ្ងៃទី៤ ខែឧសភា ឆ្នាំ២០២៥ នៅទីក្រុងមីឡង់ ប្រទេសអ៊ីតាលី លោកស្រីបណ្ឌិត បានសរសេរនៅលើបណ្តាញសង្គមផ្លូវការរបស់ខ្លួនថា៖«ខ្ញុំបានចូលរួមកិច្ចប្រជុំប្រចាំឆ្នាំរវៀងរដ្ឋមន្ត្រីក្រសួងសេដ្ឋកិច្ច និងទេសាភិបាលធនាគារកណ្តាល ASEAN+3 (ចិន កូរ៉េខាងត្បូង ជប៉ុន) នៅ ទីក្រុង មីឡង់ ប្រទេសអ៊ីតាលី។ កិច្ចប្រជុំឆ្នាំនេះមានសារៈសំខាន់ជាងឆ្នាំមុន ដោយថ្នាក់ដឹកនាំវិស័យហិរញ្ញវត្ថុ នៃតំបន់នេះត្រូវពិភាក្សា និងពន្លឿន សមាហរណ៍កម្មវិស័យហិរញ្ញវត្ថុ និងពង្រឹងសំណាញ់សុវត្តិភាពវិស័យនះក្នុងស្ថានភាពមួយដែលមានភាពមិនច្បាស់លាស់ខ្លាំង»។

«សម្រាប់ខាងវិស័យហិរញ្ញវត្ថុដែលធ្លាប់ជួបប្រទះពេលសេដ្ឋកិច្ចមិនប្រាកដប្រជា គឺយើងតែងតែព្យាយាមក្នុងការរស់នៅប្រកបដោយភាពប្រុងប្រយ័ត្នខ្ពស់ ដោយយើងនៅតែបញ្ចេញឥណទានដើម្បីជំរុញសកម្មភាពសេដ្ឋកិច្ច គ្រាន់តែប្រាក់ចំណេញ និងការប្រាក់ទាបជាងមុន ដូច្នេះកំណើននៅក្នុងវិស័យនេះនៅតែមានកំណើន​ គ្រាន់តែការកើនទាបជាងមុនដែលស្ថិតក្នុងកម្រិតមួយដែលវិស័យធនាគារអាចរស់បាន»។ នេះបើយោងតាមលោក តូច ចៅចេក៕

The post វិស័យធនាគារ និងហិរញ្ញវត្ថុកម្ពុជានឹងមានកំណើន​​ទាបជាងការរំពឹងទុក​ ជាមួយស្ថានភាពសេដ្ឋកិច្ចមិនច្បាស់លាស់​ក្នុងឆ្នាំ​នេះ appeared first on Kampuchea Thmey Daily.

​ក្រុមការងារផ្នែកឯកជន ក្រុម «ង» ផ្នែកសេវាធនាគារ និងហិរញ្ញ​វត្ថុ​ នៃវេទិការាជរដ្ឋាភិបាល-ផ្នែកឯកជនបានលើកឡើងនូវបញ្ហាប្រឈមសំខាន់ៗមួយចំនួនរួមមានបញ្ហាកម្ចីមិនស្របច្បាប់ ,បញ្ហានៃការឆបោកតាមប្រព័ន្ធអនឡាញក្នុងវិស័យធនាគារ, នីតិវិធីក្នុងការវាយតម្លៃអចលនវត្ថុពីសំណាក់ធនាគារ និងបញ្ហាមួយចំនួនទៀតដើម្បីឱ្យ​​រដ្ឋាភិបាលចាត់វិធាន​ការ​ដោះស្រាយ។

បញ្ហាប្រឈមនៅក្នុងវិស័យហិរញ្ញវត្ថុនេះត្រូវធ្វើឡើងក្នុងកិច្ច​ប្រជុំក្រុម «ង»កាលពីចុង​សប្តាហ៍មុន ដែលដឹកនាំដោយ លោក​លឹម សុជាតិ អនុប្រធានសភាពាណិជ្ជកម្មកម្ពុជា (CCC) ​។  កិច្ចប្រជុំនោះក៏មានការចូលរួម​ពីអគ្គនាយកសភាពាណិជ្ជកម្មកម្ពុជា,  ​​ តំណាងសមាគមធនាគារនៅកម្ពុជា, តំណាងសមាគមគ្រឹះស្ថានមីក្រូហិរញ្ញវត្ថុនៅកម្ពុជា, តំណាងសមាគមអ្នកវាយតម្លៃអចលនវត្ថុនៅកម្ពុជា, តំណាងធនាគារ និងគ្រឹះស្ថានមីក្រូហិរញ្ញវត្ថុផ្នែកឯកជន និងសមាជិក សមាជិកានៃក្រុមការងារ “ង” ផ្នែកឯកជនជាច្រើនទៀតផងដែរ។

បើយោងតាម CCC កិច្ចប្រជុំបានលើកនូវបញ្ហាប្រឈមធំៗដែលវិស័យនេះកំពុងជួបប្រទះរួមមាន បញ្ហាកម្ចីមិនស្របច្បាប់, ​បញ្ហានៃការឆបោកតាមប្រព័ន្ធអនឡាញក្នុងវិស័យធនាគារ, ​ ការការពារទិន្នន័យ , ​ករណីអនុវត្តថ្លៃសេវារដ្ឋបាលលើការផ្ទៀងផ្ទាត់ទិន្នន័យអត្តសញ្ញាណបុគ្គល, ​ ការបើកគណនីធនាគារជាប្រាក់រៀល, ​នីតិវិធីក្នុងការវាយតម្លៃអចលនវត្ថុពីសំណាក់ធនាគារ រួមនិងបញ្ហាប្រឈមមួយចំនួនផ្សេងទៀតផងដែរ។

«កិច្ចប្រជុំនេះមានគោលបំណងដើម្បីបន្តពិគ្រោះ ពិនិត្យ ពិភាក្សា នូវបញ្ហាប្រឈមដែលមានស្រាប់ និងជាកង្វល់របស់ផ្នែកឯកជន និងបន្តលើកឡើងនូវបញ្ហាប្រឈមថ្មីបន្ថែមទៀត ពាក់ព័ន្ធនឹងវិស័យធនាគារ និងហិរញ្ញវត្ថុ ដើម្បីដាក់ស្នើសុំដំណោះស្រាយពីសំណាក់ដៃគូ គឺធនាគារជាតិនៃកម្ពុជា នាពេលឆាប់ៗខាងមុខនេះ»៕

The post បញ្ហាប្រឈមធំៗមួយចំនួននៃវិស័យហិរញ្ញវត្ថុ​នឹងត្រូវបានដាក់ស្នើទៅកាន់រដ្ឋាភិបាល appeared first on Kampuchea Thmey Daily.

កាលពីថ្ងៃទី២៩ ខែ វិច្ឆិកា លោកស្រីបណ្ឌិត ជា សិរី ទេសាភិបាល ធនាគារជាតិនៃកម្ពុជា បាន​ដឹកនាំគណៈប្រតិភូជាន់ខ្ពស់ធនាគារជាតិនៃកម្ពុជា ចូលរួមកិច្ចប្រជុំទ្វេភាគីប្រចាំឆ្នាំ ជាមួយថ្នាក់ដឹកនាំជាន់ខ្ពស់ធនាគាររដ្ឋវៀតណាម ដឹកនាំដោយលោកជំទាវ Nguyen Thi Hong ទេសាភិបាល ធនាគាររដ្ឋវៀតណាម នៅទីក្រុងហាណូយ ប្រទេសវៀតណាម។

បើយោងតាម NBC កិច្ចប្រជុំទ្វេភាគីឆ្នាំ២០២៤នេះត្រូវបានរៀបចំឡើងក្នុងគោលបំណងពង្រឹង និងពង្រីកកិច្ចសហប្រតិបត្តិការទ្វេភាគី សំដៅជំរុញការអភិវឌ្ឍឱ្យកាន់តែប្រសើរថែមទៀតលើវិស័យធនាគារនៅក្នុងប្រទេសទាំងពីរ។

ជាមួយគ្នានោះដែរ ​ថ្នាក់ដឹកនាំនៃធនាគារកណ្តាលទាំងពីរបានពិភាក្សាផ្លាស់ប្តូរយោបល់ពីស្ថានភាពសេដ្ឋកិច្ច នយោបាយរូបិយវត្ថុ ដំណើរការអភិវឌ្ឍន៍វិស័យធនាគារនៃប្រទេសទាំងពីរ និងវឌ្ឍនភាពនៃកិច្ចសហប្រតិបត្តិការលើគម្រោងតភ្ជាប់ប្រព័ន្ធទូទាត់ឆ្លងដែន។

កាលពីថ្ងៃទី៣​ ខែធ្នូ​ ឆ្នាំ២០២៣​ ធនាគារកណ្តាលនៃប្រទេសទាំងពីរបានប្រកាសដាក់ឱ្យប្រើប្រាស់ជាផ្លូវការ ការទូទាត់ឆ្លងដែនតាម​ QR Code  ​ដើម្បីជំរុញការទូទាត់ឌីជីថល ជួយលើកកម្ពស់ការប្រើប្រាស់រូបិយវត្ថុជាតិក្នុងទីផ្សារ ប្រកបដោយភាពងាយស្រួល ឆាប់រហ័ស តម្លៃសមរម្យ សុវត្ថិភាព និងជួយជំរុញកំណើនសេដ្ឋកិច្ច ទេសចរណ៍ និងពាណិជ្ជកម្មឆ្លងដែនរវាងកម្ពុជា និងសាធារណៈរដ្ឋសង្គមនិយមវៀតណាម។

បើយោងតាម NBC ចំពោះគម្រោងតភ្ជាប់ប្រព័ន្ធទូទាត់ឆ្លងដែន​ រវាងប្រទេសទាំងពីរអនុញ្ញាតឱ្យប្រជាជនកម្ពុជា​ ដែលមានគណនីធនាគារជាប្រាក់រៀល អាចប្រើប្រាស់កម្មវិធីធនាគារចល័ត ក្នុងប្រតិបត្តិការទូទាត់ជាប្រាក់ដុងវៀតណាម ដោយស្កេន VietQR Code របស់ពាណិជ្ជករ ឬនៅតាមបណ្តាហាងទំនិញ-សេវាកម្មនៅប្រទេសវៀតណាម។

ជាមួយគ្នានោះដែរ ចំពោះប្រជាជនវៀតណាម​ ដែលមានគណនីធនាគារជាប្រាក់ដុងវៀតណាម ក៏អាចស្កេន ខេអេចឃ្យូអរកូត (KHQR Code) របស់ពាណិជ្ជករ ឬនៅតាមហាងទំនិញ-សេវាកម្មនៅប្រទេសកម្ពុជា ដោយប្រើប្រាស់កម្មវិធីធនាគារចល័ត ដើម្បីទូទាត់ថ្លៃទំនិញឬសេវាកម្មជាប្រាក់រៀលផងដែរ៕

​

The post ធនាគារកណ្តាលកម្ពុជា-វៀតណាមបន្តកិច្ចប្រតិបត្តិការលើវិស័យហិរញ្ញវត្ថុនៃប្រទេសទាំងពីរ appeared first on Kampuchea Thmey Daily.

ធនាគារកណ្តាលអាមេរិក កាលពីខែកញ្ញា បានកាត់បន្ថយអត្រាការប្រាក់ប្រមាណ 0,៥%។ សមាជិកក្រុមប្រឹក្សានៃ Fed បានព្យាករថា នឹងមានការកាត់បន្ថយអត្រាការ 0,៥% ​បន្ថែមទៀតនៅឆ្នាំនេះ ហើយការបន្ធូរបន្ថយការប្រាក់របស់ Fed នេះអាចនឹងបន្តរហូតដល់ឆ្នាំ ២០២៥។

 លោក តូច ចៅចេក ប្រធាននាយកប្រតិបត្តិធនាគារ ប្រៃសណីយ៍កម្ពុជាបានថ្លែងប្រាប់កម្ពុជាថ្មីថា សម្រាប់ការកាត់បន្ថយឬតម្លើងអត្រាការប្រាក់ធនាគារកណ្តាលរបស់សហរដ្ឋ​អាមេរិកគឺជារឿងតែងតែងកើតឡើងជារឿយៗនៅពេលដែលពួកគាត់ចង់កាត់បន្ថយអត្រាអតិផរណាក្នុងប្រទេសខ្លួន។

លោកបានពន្យល់ថា៖«កាលពីដើមឡើយសហរដ្ឋអាមេរិកទទួលរងនូវការកើនឡើងនៃអត្រាអតិផរណាខ្ពស់ ដូច្នេះសម្រាប់ការតម្លើងអត្រាការប្រាក់នេះគឺប្រាកដណាស់វានឹងប៉ះពាល់ដល់ប្រទេសយើងច្រើន។ ដូច្នេះអ្នកវិនិយោគមួយចំនួនដែលដាក់ប្រាក់បញ្ញើរប្រហាក់ប្រហែលឬកទាបជាង ដូច្នេះពួកគាត់នឹងដកលុយនេះទៅវិនិយោគនៅក្រៅប្រទេសវិញ»

«ប៉ុន្តែនៅពេលដែលពួកគាត់បញ្ចុះអត្រាការប្រាក់មកវិញគឺវាផ្តល់ផលល្អច្រើនជាងផលអាក្រក់ ធ្វើឱ្យសេដ្ឋកិច្ចជាទូទៅមានលំហូរសាច់ប្រាក់ក្នុងសេដ្ឋកិច្ចកាន់តែច្រើនឡើងវិញ។ ​ដូច្នេះសម្រាប់កម្ពុជាយើងគឺកាន់តែល្អ ដោយសារតែនៅពេលអត្រាការប្រាក់គោលរបស់ធនាគារកណ្តាលអាមេរិកកាន់តែទាប ដូច្នេះសម្រាប់វិស័យមីក្រូហិរញ្ញវត្ថុអាចមានលទ្ធភាពខ្ចីលុយពីក្រៅប្រទេសកាន់តែថោក ដូច្នេះគាត់អាចផ្តល់កម្ចីដល់អតិថិជនក្នុងអត្រាកាន់តែទាបបានផងដែរ»។​ នេះបើយោងតាមលោក តូច ចៅចេក។

ជាមួយគ្នានេះដែរ សម្រាប់វិស័យធនាគារ​ នៅពេលដែលអត្រាការប្រាក់របស់ធនាគារកណ្តាលរបស់សហរដ្ឋអាមេរិកកាត់បន្ថយ ដូច្នេះអ្នកវិនិយោគមួយចំនួនគេប្រាដកណាស់នឹងមិនដាក់លុយនៅក្រៅប្រទេសទៀតនោះទេដោយសារតែការប្រាក់ថោក ដូច្នេះពួកគាត់អាចងាកមកដាក់លុយនៅកម្ពុជាវិញដោយសារការប្រាក់អាចខ្ពស់ជាងបន្តិចដែរ។​

លោក Matteo Lanzafame អ្នកវិភាគសេដ្ឋកិច្ចរបស់  ADB ​បានលើកឡើងនៅក្នុងបណ្តាញសង្គមរបស់ខ្លួនកាលពីថ្ងៃទី៨ ខែវិច្ឆិកានេះថាការកាត់បន្ថយអត្រាការប្រាក់​របស់​Fed អាចនឹងធ្វើឱ្យ បណ្តាធនាគារកណ្តាលនៅក្នុងតំបន់នេះ ប្រឈមមុខភាពស្មុគស្មាញ នៅពេលដែលពួកគេឆ្លើយតបនឹងការផ្លាស់ប្តូរគោលនយោបាយនេះ។

លោកថា៖«ការកាត់បន្ថយអត្រាការប្រាក់នេះ មានការអនុញ្ញាតឱ្យ​ធនាគារកណ្តាលអាចបន្ធូរបន្ថយគោលនយោបាយសេដ្ឋកិច្ច ដើម្បីលើកកម្ពស់តម្រូវការក្នុងស្រុកនិងការកើនឡើងតាមរយៈការ ​មិនធ្វើឱ្យមានការបង្ហូរទុននិងការធ្វើឱ្យធ្លាក់ចុះអត្រាប្តូរប្រាក់»។

ទោះបីជាយ៉ាងណា លោកថា អ្នកធ្វើគោលនយោបាយត្រូវតែប្រើប្រាស់នូវវិធីសាស្រ្តនានាដើម្បីរក្សាបាននូវតុល្យភាពនិងស៊ីសង្វាគ្នា​ដើម្បីអនុវត្តន៍នៅក្នុង​ប្រទេស ដើម្បីរៀបចំយុទ្ធសាស្រ្តទប់ទាល់នៃការដែលអាចកើនឡើងអត្រាអតិផរណា​​ ការប្រែប្រួលនៃអត្រាប្តូរប្រាក់​ និងលំហូរវិនិយោគ។

លោកបានគូសបញ្ជាក់ថា​ អត្រាការប្រាក់ទាបនៅសហរដ្ឋអាមេរិក អាចជំរុញឱ្យលំហូរទុនទៅកាន់តំបន់អាស៊ីនិងប៉ាស៊ីហ្វិក ជំរុញកំណើនទីផ្សារមូលបត្រនិងតំលៃភាគហ៊ុនក្នុងតំបន់នេះ។ ការណ៍នេះអាចផ្ដល់ចន្លោះដកដង្ហើមសម្រាប់ប្រទេសដែលមានសេដ្ឋកិច្ចទន់ខ្សោយ។​ ​ ប៉ុន្តែសម្រាប់ការរផ្លាស់ប្តូរគោលដៅដ៏ធំ ក្នុងការវិនិយោគរយៈពេលខ្លី អាចបង្កើនភាពអស្ថិរភាពនៃទីផ្សារហិរញ្ញវត្ថុ។

លោកបានថ្លែងបន្តទៀតថា៖«ជារួម ការកាត់បន្ថយអត្រាការប្រាក់នាពេលថ្មីៗនេះដោយធនាគារកណ្តាលសហរដ្ឋអាមេរិកបង្ហាញពីឱកាស និង បញ្ហាប្រឈមសម្រាប់ធនាគារកណ្តាលនៅអាស៊ី និងប៉ាស៊ីហ្វិក។ អ្នកបង្កើតគោលនយោបាយត្រូវតែប្រកាន់យកនូវវិធីសាស្រ្តប្រកបដោយតុល្យភាពនិងជាក់លាក់សម្រាប់ប្រទេស ដើម្បីដោះស្រាយសម្ពាធអតិផរណា ការប្រែប្រួលអត្រាប្តូរប្រាក់ និងលំហូរចូលមូលធន ដែលអាចកើតមាន»៕

The post អ្នកជំនាញ៖កម្ពុជារំពឹងថាការកាត់បន្ថយអត្រាការប្រាក់គោលរបស់ធនាគារកណ្តាលអាមេរិកទាក់ទាញលំហូវិនិយោគ​ appeared first on Kampuchea Thmey Daily.

ការលើកឡើងរបស់លោក Robert Kaproth  ធ្វើឡើងកាលពីពីថ្ងៃទី៧ កាលដែលលោកបានដឹកនាំ ប្រតិភូក្រសួងរតនាគារសហរដ្ឋអាមេរិកជួបពិភាក្សាជាមួយលោកស្រីបណ្ឌិត ជា សិរី ទេសាភិបាល ធនាគារជាតិនៃកម្ពុជា នៅធនាគារជាតិនៃកម្ពុជា អគារវត្តភ្នំ។

ក្នុងជំនួបនេះ ភាគីទាំងពីរបានពិភាក្សាអំពីប្រធានបទមួយចំនួនពាក់ព័ន្ធនឹងស្ថានភាពសេដ្ឋកិច្ច និងប្រព័ន្ធហិរញ្ញវត្ថុនៅប្រទេសកម្ពុជា រួមទាំងវឌ្ឍនភាព និងប្រសិទ្ធភាពនៃជំនួយបច្ចេកទេសសម្រាប់អភិវឌ្ឍប្រព័ន្ធហិរញ្ញវត្ថុកម្ពុជានាពេលកន្លងមក។ នេះបើយោងតាមសេចក្តីប្រកាសព័ត៌មានរបស់​ NBC។

លោក Robert Kaproth បានថ្លែងអំពីកិច្ចសហការផ្តល់ការសម្របសម្រួលមួយចំនួនដើម្បីភ្ជាប់ទំនាក់ទំនងជាមួយក្រុមការងារក្រសួង សំដៅស្វែងរកលទ្ធភាពបន្តកិច្ចសហប្រតិបត្តិការលើក្របខណ្ឌជំនួយបច្ចេកទេសទៅតាមតម្រូវការជាក់លាក់នៅធនាគារជាតិនៃកម្ពុជា។ លើសពីនេះ លោកក៏បានជម្រាបសួរពីវឌ្ឍនភាពនៃការធ្វើបដិដុល្លារូបនីយកម្មនៅកម្ពុជាផងដែរ។

លោកស្រីទេសាភិបាលបានថ្លែងអំណរគុណចំពោះការលើកឡើងពីលទ្ធភាពបន្តជំនួយបច្ចេកទេសសម្រាប់អភិវឌ្ឍប្រព័ន្ធធនាគារនៅកម្ពុជា និងបានជម្រាបជូនអំពីសកម្មភាពលើកកម្ពស់ការប្រើប្រាស់ប្រាក់រៀល ក្នុងគោលដៅគាំទ្រដល់ដំណើរការអនុវត្តន៍គោលនយោបាយរូបិយវត្ថុឱ្យកាន់តែមានប្រសិទ្ធភាព។

លោកស្រីក៏បានលើកឡើងពីការវិនិយោគទុនបម្រុងអន្តរជាតិមួយផ្នែករបស់ ធនាគារជាតិនៃកម្ពុជា លើសញ្ញាប័ណ្ណបៃតងផងដែរ៕

The post អាមេរិកនឹងបន្តផ្តល់ជំនួយបច្ចេកទេសដល់ការអភិវឌ្ឍប្រព័ន្ធធនាគារនៅកម្ពុជា appeared first on Kampuchea Thmey Daily.

លោកស្រីបណ្ឌិត ជា សិរី ទេសាភិបាល NBC បានជួបពិភាក្សាជាមួយលោក អាសាដ យ៉ាកុប (Asad Yaqub) តំណាងសាជីវកម្មហិរញ្ញវត្ថុអន្តរជាតិ (IFC) ​នៃធនាគារពិភពលោកប្រចាំនៅកម្ពុជាដែលជិតចប់អាណត្តិ ​ នារសៀលថ្ងៃចន្ទ ទី១២ ខែសីហា ឆ្នាំ២០២៤ នៅធនាគារជាតិនៃកម្ពុជា អគារវត្តភ្នំ។

លោក អាសាដ យ៉ាកុប   បានលើកឡើងពីកិច្ចសហប្រតិបត្តិការល្អរវាង IFC និងធនាគារជាតិនៃកម្ពុជា នាពេលកន្លងមក និងកោតសរសើរពីការរីកចម្រើននៃប្រព័ន្ធធនាគារកម្ពុជា សម្រាប់ការគាំទ្រដល់កំណើនសេដ្ឋកិច្ច។

លោកស្រីទេសាភិបាល ជា សិរី ទទួលស្កាល់ថា​ជំនួយបច្ចេកទេសរបស់ IFC និងកិច្ចសហប្រតិបត្តិការល្អនាពេលកន្លងមក និងបានលើកទឹកចិត្តឱ្យ IFC បង្កើនការវិនិយោគបន្ថែមទៀតទៅក្នុងវិស័យធនាគារនៅកម្ពុជា។

បើតាមរបាយការណ៍របស់ធនាការជាតិនៃកម្ពុជា​គិតត្រឹមដំណាច់ឆមាសទី១ ឆ្នាំ២០២៤នេះកម្ពុជាមានគ្រឹះស្ថានធនាគារនិងហិរញ្ញវត្ថុប្រមាណជាង៣៣០បានបន្តចូលរួមចំណែកយ៉ាងសំខាន់ដល់ការគាំទ្រ និងការ អភិវឌ្ឍសេដ្ឋកិច្ច។

ទ្រព្យសកម្មរបស់ប្រព័ន្ធធនាគារមានកំណើន ៦,១% ដល់ ៣៥៦,៩  ទ្រីលានរៀល (៨៨,៣ ប៊ីលានដុល្លារអាមេរិក) ក្នុងនោះវិស័យធនាគារមាន ៩៥,៩% នៃទ្រព្យសកម្មប្រព័ន្ធធនាគារ វិស័យមីក្រូហិរញ្ញវត្ថុ ៣,៦% និងវិស័យភតិសន្យាហិរញ្ញវត្ថុ ០,៥%។ ឥណទានអតិថិជនបានកើនឡើង ២,៦% ដល់ ២៣៨,១ ទ្រីលានរៀល (៥៨,៩ ប៊ីលានដុល្លារអាមេរិក)។ ទន្ទឹមនេះ ប្រាក់បញ្ញើអតិថិជន មានកំណើន ១៣,៤% ដល់ ២០៩,៩ ​ទ្រីលាន​​រៀល (៥១,៩ ប៊ីលានដុល្លារអាមេរិក) ចំណែកឯដើមទុន មានកំណើន ៩,៧% ដល់ ៤០,១ ទ្រីលានរៀល (៩,៩ ប៊ីលានដុល្លារអាមេរិក)។

​គិតត្រឹមដំណាច់ឆមាសទី១ ឆ្នាំ២០២៤ ប្រព័ន្ធធនាគារនៅកម្ពុជា រួមមាន ធនាគារពាណិជ្ជចំនួន ៥៩ ធនាគារឯកទេសចំនួន ៩ គ្រឹះស្ថាន មីក្រូហិរញ្ញវត្ថុទទួលប្រាក់បញ្ញើចំនួន ៤ គ្រឹះស្ថានមីក្រូហិរញ្ញវត្ថុមិនទទួលប្រាក់បញ្ញើចំនួន ៨៣ គ្រឹះស្ថានឥណទានជនបទចំនួន ១១៥ គ្រឹះស្ថានភតិសន្យាហិរញ្ញវត្ថុចំនួន ១៦ អ្នកដំណើរការ តតិយភាគីចំនួន ៦ គ្រឹះស្ថានផ្តល់សេវាទូទាត់សងប្រាក់ចំនួន ៣៣ អ្នកផ្តល់សេវាប្រព័ន្ធចែករំលែកព័ត៌មានឥណទានចំនួន ១ និងការិយាល័យតំណាងធនាគារបរទេសចំនួន ៥៕

The post កម្ពុជាស្នើដល់ IFC បង្កើនការវិនិយោគលើវិស័យហិរញ្ញវត្ថុ appeared first on Kampuchea Thmey Daily.