ថ្លែងនៅក្នុងពិព័រណ៍ធុរកិច្ចឌីជីថល ក្រោមមូលបទស្ដីពី «ធុរកិច្ចថ្មី នវានិវត្តុន៍ និងបច្ចេកវិទ្យា ក្នុងបរិបទសេដ្ឋកិច្ច និង សង្គមឌីជីថល» លោក គង់ មារី រដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការ នៃអគ្គលេខា ធិការដ្ឋាន គណៈកម្មាធិការសេដ្ឋកិច្ច និងធុរកិច្ចឌីជីថល បានលើកឡើងថា បច្ចុប្បន្ននេះ សេដ្ឋកិច្ចឌីជីថលមានការវិវឌ្ឃ លេចឡើងកាន់តែច្បាស់ និងបានក្លាយជាចន្ទល់ថ្មីសម្រាប់កំណើនសេដ្ឋកិច្ច របស់ប្រទេសជាច្រើនលើសកលលោក រួមទាំងកម្ពុជាផងដែរ។

លោកបានគូសបញ្ជាក់ថា សេដ្ឋកិច្ចឌីជីថលផ្ដល់នូវកាលានុវត្តភាពជាច្រើន ជាពិសេស តាមរយៈការបង្កើតឧស្សាហកម្ម និងទីផ្សារថ្មីៗ, ការជំរុញនវានុវត្តន៍ និងសហគ្រិនភាព, ការប្រើប្រាស់បច្ចេកវិទ្យាឌីជីថល ដើម្បីភ្ជាប់ទៅនឹងខ្សែច្រវាក់តម្លៃ សកល, ការកាត់បន្ថយភាពពឹងផ្អែកលើវិស័យឧស្សាហកម្មបែបប្រពៃណី, និងការជំរុញជីវភាពសេដ្ឋកិច្ច និងសមត្ថ ភាពប្រកួតប្រជែងជាដើម។

លោក គង់ ម៉ារី បានបន្ថែមថា សន្ទុះនៃបរិវត្តកម្មឌីជីថលនៅក្នុងសកម្មភាពសេដ្ឋកិច្ច ទាំងវិសាលភាពគ្របដណ្តប់ និងទំហំសេដ្ឋកិច្ចឌីជីថល ក៏មានការរីកលូតលាស់គួរឱ្យកត់សម្គាល់។

លើសពីនេះទៀត លោកណែនាំឱ្យមានការរៀបចំប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន ដែលជាការកែ ទម្រង់មួយដ៏សំខាន់ និងចាំបាច់ក្នុងដំណើរឆ្ពោះទៅការកសាងរដ្ឋាភិបាល សេដ្ឋកិច្ច និងសង្គមឌីជីថល ដោយគិតត្រឹម ពេលនេះ ប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានបានដាក់ឱ្យដំណើរការបាន ៣ ដំណាក់កាលរួចកន្លងមក ហើយ។

ជាមួយគ្នានេះ ការដាក់ចេញឱ្យអនុវត្តនូវកម្មវិធីបរិវត្តកម្មឌីជីថលសហគ្រាស ក៏បានជំរុញឱ្យសហគ្រាសគ្រប់កម្រិតអាច ទាញយកឧត្តមប្រយោជន៍ជាអតិបរិមាពីបច្ចេកវិទ្យាឌីជីថល ព្រមទាំងក្លាយទៅជាភ្នាក់ងារដ៏សកម្មនៅក្នុង សេដ្ឋកិច្ច និង ធុរកិច្ចឌីជីថល។

យោងតាមរបាយការណ៍របស់ធនាគារពិភពលោកឆ្នាំ ២០២៣ សេដ្ឋកិច្ចឌីជីថលរួមចំណែកប្រមាណ ១៥%  នៃផលិត ផលក្នុងស្រុកសរុបរបស់ពិភពលោក (World GDP)។ សម្រាប់ប្រទេសកម្ពុជា បច្ចុប្បន្ន មិនទាន់មានតួលេខផ្លូវការ លើទំហំនៃសេដ្ឋកិច្ចឌីជីថលនៅឡើយទេ។ ទោះយ៉ាងណា គេអាចដឹងថា សេដ្ឋកិច្ចឌីជីថលនៅកម្ពុជាពឹងផ្អែកលើវិស័យ មួយចំនួនដូចជា វិស័យពាណិជ្ជកម្មតាមប្រព័ន្ធអេឡិចត្រូនិក, សេវាហិរញ្ញវត្ថុ, ការដឹកជញ្ជូន និងអាហារ, ការកក់សេវាធ្វើ ដំណើរតាមអនឡាញ, និងការផ្សព្វផ្សាយតាមអនឡាញ ជាដើម។

ជាក់ស្ដែង យោងតាមរបាយការណ៍របស់ក្រសួងពាណិជ្ជកម្ម ប្រាក់ចំណូលពីពាណិជ្ជកម្មតាមប្រព័ន្ធអេឡិចត្រូនិកនៅ កម្ពុជាក្នុងឆ្នាំ ២០២២ មានចំនួន ១.១១ ពាន់លានដុល្លារអាមេរិក។

អត្ថបទ៖ ផល ធារិត

The post មន្រ្តីជាន់ខ្ពស់សេដ្ឋកិច្ច ជំរុញវិស័យ SME ពង្រឹង សមត្ថភាពលើការគ្រប់គ្រងតាមប្រព័ន្ធអេឡិចត្រូនិច appeared first on Kampuchea Thmey Daily.

តាមរយៈផែនទីបង្ហាញផ្លូវ អភិវឌ្ឍវិស័យយានយន្ត និងអេឡិចត្រូនិកនៅកម្ពុជា រាជរដ្ឋាភិបាល បានដាក់គោល​ដៅបង្កើនទំហំនាំចេញ ក្នុងវិស័យអេឡិចត្រូនិកឱ្យបាន ១៦០០លានដុល្លារអាមេរិក ​និងបង្កើតការងារថ្មីជាង ១ម៉ឺនកន្លែង ត្រឹមឆ្នាំ២០២៧។

ផែនទីបង្ហាញផ្លូវនេះ បានគូសបញ្ជាក់ថា ការនាំចេញរបស់វិស័យអេឡិត្រូនិក ១០ឆ្នាំចុងក្រោយ បានកើនឡើង ៦ដងប្រមាណ ៩២៣លានដុល្លារអាមេរិក ក្នុងឆ្នាំ២០១៩ ខណៈចំនួនគម្រោងវិនិយោគ មានលក្ខណៈសម្បត្តិគ្រប់គ្រាន់ បានកើនឡើងរហូតដល់ ៨៩គម្រោង ក្នុងឆ្នាំ២០១៩។

ជាការកត់សម្គាល់ជប៉ុន និងចិន ជាប្រភពទុនវិនិយោគសំខាន់ ក្នុងវិស័យអេមឡិចត្រូនិកនៅកម្ពុជា ខណៈដែលទីផ្សារ​នាំចេញ​សំខាន់ៗមាន៖ សហរដ្ឋអាមេរិក អាស៊ាន ចិន ជប៉ុន និងកូរ៉េខាងត្បូង។ កំណើននៃការវិនិយោគក្នុងវិស័យនេះ បានជំរុញឱ្យកម្លាំងពលកម្មកើនឡើងយ៉ាងឆាប់រហ័ស រហូតដល់៧០ដង ក្នុងរយៈពេល១០ឆ្នាំចុងក្រោយ បច្ចុប្បន្នកម្លាំង​ពលកម្មសរុបប្រមាណ ៣ម៉ឺននាក់។

តាមការព្យាករណ៍របស់ស្ថាប័នស្រាវជ្រាវ ទីផ្សារបរិក្ខារអេឡិចត្រូនិកជាសកលថា នឹងឈានដល់ ១.៤ទ្រីលានដុល្លារ​អាមេរិក នៅឆ្នាំ២០២៥ ហើយអាស៊ានជាទីផ្សារ ដែលរីកលូតលាស់លឿនបំផុត សម្រាប់ឧបករណ៍អេឡិចត្រូនិក មានកំណើនជាមធ្យមប្រចាំឆ្នាំ ៦.៥% បន្ទាប់ពីប្រទេសប្រេស៊ីល និងឥណ្ឌា។

តាមផែនទីបង្ហាញផ្លូវលើកឡើងថា ការកើនឡើងនូវតម្រូវការបរិក្ខារអេឡិចត្រូនិកទូទាំងពិភពលោក បាននិងកំពុងផ្តល់​កាលានុវត្តភាពកាន់តែច្រើនដល់កម្ពុជា ក្នុងការចាប់យកចំណែកទីផ្សារនៃ ផលិតផលផ្សេងទៀត ដែលមានកំណើន​តម្រូវការខ្ពស់។

ទោះជាយ៉ាងនេះក្តី ក៏មានសញ្ញាណវិជ្ជមានផងដែរ នៃសក្តានុពលកំណើន ក្នុងផ្នែកផលិតកម្ម គ្រឿងដំឡើងបន្ទាប់បន្សំ ឬគ្រឿងបង្គុំបន្ទះសៀគ្វីបោះពុម្ភរួច ព្រមទាំងការផ្តុំដំឡើងផលិតផលប្រើប្រាស់ផ្សេងទៀត ដូចជាឧបករណ៍បំពងសំលេង និងម៉ាស៊ីនថតរូបជាដើម។

សូមបញ្ជាក់ថា វិស័យអេឡិចត្រូនិកនៅតែមានភាពធន់ និងវិវត្តជាបន្តបន្ទាប់ ស្របជាមួយនឹងការពន្លឿនរេខូបនីយកម្ម (Digitization) គួបផ្សំកំណើនប្រជាជន មានកម្រិតជីវភាពមធ្យម ពិសេសក្នុងបរិការណ៍ជំងឺកូវីដ១៩។ ជាមួយគ្នានេះ កំណើនប្រជាជន មានកម្រិតជីវភាពមធ្យម តម្រូវការបរិក្ខាអេឡិចត្រូនិក បាននិងកំពុងកើនឡើងយ៉ាងរហ័ស ពិសេសក្នុងទីផ្សារកំពុងរីកលូតលាស់ដូចជាអាស៊ាន ជាដើម៕

The post កម្ពុជា គ្រោងនាំចេញវិស័យអេឡិចត្រូនិក​ឱ្យបាន ១៦០០លានដុល្លារអាមេរិក ត្រឹមឆ្នាំ ២០២៧ appeared first on Kampuchea Thmey Daily.