លោកបានបញ្ជាក់ដូច្នេះ ក្នុងពិធីជួបសំណេះសំណាល និងពិសាអាហារសាមគ្គី ដើម្បីអបអរសាទរខួបអនុស្សាវរីយ៍លើកទី១៤០ ទិវាពលកម្មអន្តរជាតិ ១ ឧសភា ឆ្នាំ២០២៦ ដែលត្រូវបានរៀបចំឡើងនៅស្នាក់ការកណ្តាលសភាសម្ព័ន្ធសហជីពជាតិកម្ពុជា (ស.ស.ស.ក) នាព្រឹកថ្ងៃទី១ ខែឧសភា ឆ្នាំ២០២៦ ។

ក្នុងមតិសំណេះសំណាលទៅកាន់អង្គ លោករដ្ឋមន្ត្រី បានសង្កត់ធ្ងន់ថា «នៅឆ្នាំ២០២៧ ខាងមុខ នៅពេលកម្ពុជាមានរោងចក្រផលិតក្រណាត់ដោយខ្លួនឯង វានឹងក្លាយជាខឿនការពារភាពធន់យ៉ាងរឹងមាំ ដែលមានកម្លាំងផលិតកម្មលើសពីជាង ៤០% ដែលជាកត្តាគន្លឹះក្នុងការរក្សាបាននូវការលើកលែងពន្ធសម្រាប់ការនាំចេញទៅកាន់ទីផ្សារធំៗ ដូចជាសហរដ្ឋអាម៉េរិក និងសហគមន៍អឺរ៉ុបជាដើម»។

ទន្ទឹមនឹងការរម្លឹកពីប្រវត្តិដ៏យូរលង់នៃទិវាពលកម្មអន្តរជាតិ លោក ហេង សួរ បានពន្យល់ពីអត្ថន័យនៃប្រធានបទសម្រាប់ឆ្នាំ២០២៦ គឺ «រួមគ្នាកសាងភាពធន់ដើម្បីការងារសមរម្យ»។ ប្រធានបទនេះ គឺជាការឆ្លុះបញ្ចាំងពីការប្តេជ្ញាចិត្តយ៉ាងមុតមាំរបស់រាជរដ្ឋាភិបាល ក្នុងការលើកកម្ពស់ការអភិវឌ្ឍទីផ្សារការងារឱ្យមានចីរភាព តាមរយៈការបន្តកែលម្អលក្ខខណ្ឌការងារ ការធានាសិទ្ធិសេរីភាពអង្គការវិជ្ជាជីវៈ ការពង្រឹងប្រព័ន្ធគាំពារសង្គម និងការជំរុញកិច្ចសន្ទនាសង្គមឱ្យកាន់តែស៊ីជម្រៅគ្រប់ជ្រុងជ្រោយ។

ក្នុងឱកាសនោះដែរ លោករដ្ឋមន្ត្រី ក៏បាននាំយកនូវប្រសាសន៍ដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា កាលពីថ្ងៃទី២៦ ខែមេសា កន្លងទៅ ដែលបានផ្ដល់និយមន័យថា «ការងារសមរម្យ» គឺជាការងារដែលផ្ដោតលើសុខុមាលភាព មានលក្ខខណ្ឌការងារល្អប្រសើរ និងផ្តល់ប្រាក់កម្រៃខ្ពស់សម្រាប់បងប្អូនកម្មករនិយោជិត។

ជាមួយគ្នានេះ លោករដ្ឋមន្ត្រី បានផ្តល់អនុសាសន៍ និងលើកទឹកចិត្តដល់គ្រប់ភាគីពាក់ព័ន្ធទាំងអស់ ឱ្យបន្តប្រកាន់ខ្ជាប់នូវស្មារតីនៃទិវាពលកម្មអន្តរជាតិ ១ ឧសភា ដោយបានក្រើនរំលឹកថា ថ្ងៃទី១ ឧសភា គឺជាថ្ងៃរំលឹក ប៉ុន្តែការអនុវត្តជាក់ស្តែងគឺជាកាតព្វកិច្ចប្រចាំថ្ងៃដែលនិយោជក មន្ត្រីអធិការកិច្ចការងារ កម្មករនិយោជិត និងសហជីព ត្រូវតែបន្តសហការអនុវត្តតាមលក្ខខណ្ឌការងារឱ្យបានខ្ជាប់ខ្ជួន ដើម្បីជាផលប្រយោជន៍រួម និងជាកម្លាំងចលករក្នុងការជំរុញកំណើនសេដ្ឋកិច្ចជាតិឱ្យកាន់តែរីកចម្រើន៕

The post កម្ពុជាបន្តពង្រឹងវិស័យឧស្សាហកម្ម ខណៈរោងចក្រផលិតក្រណាត់ក្នុងស្រុកនឹងបើកដំណើរការឆ្នាំ២០២៧ appeared first on Kampuchea Thmey Daily.

លើក​ឡើង​ក្នុងសិក្ខាសាលា ស្តីពី «ការពង្រឹងភាពធន់ជាតិ និងកាលា​នុវត្តភាព​នៃ​យុទ្ធសាស្ត្រ​អភិបាល​កិច្ចវិទ្យាសាស្ត្រ បច្ចេកវិទ្យា នវានុវត្តន៍ ឧស្សាហកម្ម និងពាណិជ្ជកម្មកម្ពុជា» លោក ហែម វណ្ណឌី បានរំលេច​អំពី​សមត្ថភាព​ឧស្សាហកម្ម​កម្ពុជា ទោះ​បី​ប្រឈម​នឹង​បញ្ហានានា។

លោក​រដ្ឋមន្រ្តី​បានលើកឡើងថា «ប្រវត្តិសាស្ត្រ​បាន​បញ្ជាក់​ប្រាប់​យើងថា នៅពេល​កម្ពុជា​ទទួល​រងការ​គំរាម​កំហែង កម្ពុជា​នឹងងើបឡើង, នៅពេលគេព្យាយាមបិទខ្ទប់ទីផ្សាររបស់យើង យើងបង្កើតទីផ្សារថ្មីៗ, នៅពេល​គេ​ព្យាយាម​កាត់​ផ្តាច់​ខ្សែច្រវាក់ផ្គត់ផ្គង់របស់យើង យើងពង្រឹងសមត្ថភាពផលិតក្នុងស្រុក ហើយនៅ​ពេល​គេ​គៀប​សង្កត់​យើង​កាន់​តែខ្លាំង យើង​ច្នៃប្រឌិត និងបង្កើតនវានុវត្តន៍កាន់តែច្រើន»។

បន្ថែម​ជា​មួយ​គ្នា​នេះ លោក ហែម វណ្ណឌី ក៏​បាន​គូស​បញ្ជាក់​អំពី​ភាពខ្លាំង​សេដ្ឋកិច្ចគឺជាគ្រឹះសម្រាប់សន្តិសុខជាតិ ហើយ​កម្ពុជាត្រូវបន្តធ្វើពិពិធកម្មសេដ្ឋកិច្ច ពង្រីកទីផ្សារ និងពង្រឹងសមត្ថភាពផលិតក្នុងស្រុក ដើម្បី​កាត់​បន្ថយ​ការ​ពឹងផ្អែក និងបង្កើនភាពម្ចាស់ការ។

គិតត្រឹមចុងឆ្នាំ២០២៥ កម្ពុជាមានរោងចក្រធុនធំកំពុងដំណើរការចំនួន ៣.០៨៣ រោងចក្រ ដែលផ្តល់ការងារជាង ១,២៦ លាននាក់ ក្នុងនោះស្ត្រីមានជាង ៧១ ភាគរយ។

លោក ហែម វណ្ណឌី បានបញ្ជាក់ថា «ទោះបីការផ្គត់ផ្គង់ប្រេង និងឧស្ម័នលើទីផ្សារសកលកំពុងត្រូវបានរំខាន បច្ចុប្យន្ន កម្ពុជាមិនទាន់មានរោងចក្របិទទ្វារ ឬផ្អាកខ្សែច្រវាក់ផលិតកម្ម ដោយសារបញ្ហាថាមពលនោះទេ។

កម្ពុជាមានសហគ្រាសធុនមីក្រូ តូច និងមធ្យមប្រមាណ ៧៥ ម៉ឺនមូលដ្ឋាន ដែលប្រើកម្លាំងពលកម្មជិត ៣ លាននាក់ ដោយមិនទាន់គិតអ្នកសេដ្ឋកិច្ចក្រៅប្រព័ន្ធជាច្រើនលាននាក់ទៀត។

ជា​មួយ​គ្នា​នេះ លោក​រដ្ឋមន្ត្រីក៏បានអំពាវនាវឱ្យមានការគាំទ្រកាន់តែខ្លាំងចំពោះការផលិត និងកែច្នៃក្នុងស្រុក និងលើកកម្ពស់មនសិកាស្នេហាជាតិ ក្នុងការអភិវឌ្ឍសេដ្ឋកិច្ច ដោយលើកឡើងថា៖ “ការឆ្លើយតបដ៏មានឥទ្ធិពលបំផុតចំពោះការគំរាមកំហែងសេដ្ឋកិច្ច មិនមែនជាកំហឹងនោះទេ ប៉ុន្តែគឺ ផលិតភាព នវានុវត្តន៍ និងសាមគ្គីភាពជាតិ៕

The post លោក ហែម វណ្ណឌី៖ ទាំងសង្គ្រាមឈ្លានពាន-ពន្ធបដិកា-បញ្ហានៅមជ្ឈឹមបូព៌ា មិនបានធ្វើឱ្យរង្គោះរង្គើខឿនឧស្សាហកម្មកម្ពុជាឡើយ appeared first on Kampuchea Thmey Daily.

​លោក ​ហែម វណ្ណឌី ​រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ មានប្រ​សា​សន៍​នៅ​ក្នុង​សន្និបាត​បូកសរុបលទ្ធផលការងារឆ្នាំ២០២៥ ​និង​លើកទិសដៅការងារឆ្នាំ២០២៦ ​នៅថ្ងៃ​ទី​ ២៣ ​ខែកុម្ភៈថា ​កម្ពុជា​រក្សា​បាន​នូវ​ស្ថិរភាព​ម៉ាក្រូសេដ្ឋកិច្ច ​និង​កំពុង​ឈាន​ចូល​ដំណាក់​កាល​ថ្មី​នៃ​ការ​អភិវឌ្ឍ ​ជាមួយ​នឹង​គោលដៅ​ចាកចេញ​ពីឋានៈជាប្រទេស​ដែល​មាន​ការ​អភិវឌ្ឍ​តិច​តួច​នៅ​ឆ្នាំ​២០២៩ ​និង​ចក្ខុវិស័យ​ឆ្នាំ ២០២៥០ ក្លាយជាប្រទេសមានចំណូលខ្ពស់​។ ​

​រដ្ឋមន្ត្រី​ក្រសួងឧស្សាហកម្មអះអាងថា ទោះ​បីត្រូវ​ប្រឈមនឹង​ការរំលោភលើអធិបតេយ្យជាតិ ​ក៏សេដ្ឋកិច្ច​កម្ពុជា​សម្រេចបានកំណើន​ប្រមាណ​ ៥,២% ក្នុង​ឆ្នាំ​ ២០២៥ និង​ប្រមាណ ៥% នៃផលិតផលក្នុង​ស្រុក​សរុប (ផ.ស.ស.) សម្រាប់ ឆ្នាំ ២០២៦ ​ទ្រទ្រង់​ដោយ​វិស័យ​ឧស្សាហកម្ម ដែល​រំពឹង​ថា​មាន​កំណើន​ប្រមាណ ៧,២%។​

លោកបណ្ឌិត គី សេរីវឌ្ឍន៍ ​អ្នកស្រាវជ្រាវសេដ្ឋកិច្ច ​នៃរាជបណ្ឌិត្យសភាកម្ពុជា ​យល់ឃើញថា៖ «វិស័យ​ដែល​ជំរុញ​កំណើន​សេដ្ឋកិច្ច​កម្ពុជា​ឱ្យ​រឹង​មាំ ​គឺវិស័យ​ឧស្សាហកម្មកម្មន្តសាល ​​បាន​ផ្ដល់​ការងារ​កម្លាំង​ពលកម្ម​ក្នុង​ស្រុក»។

ផលិតផលក្នុងស្រុកសរុប (ផ.ស.ស.) ​សម្រាប់មនុស្សម្នាក់ ​ត្រូវបានប៉ាន់ស្មានកើនឡើងដល់ ២.៨៥៨ ​ដុល្លារ ​ក្នុងឆ្នាំ២០២៥ និង​អាចឈានដល់ចំនួន ៣.០២០ ​ក្នុងឆ្នាំ២០២៦ ជាមួយនឹង​ទុន​បម្រុង​អន្តរជាតិ មាន​ចំនួន​ជាង ២៥ ពាន់លានដុល្លារ (២៥០៥១) នៅឆ្នាំ ២០២៥ ​និងជិត ២៨ ​ពាន់លានដុល្លារ (២៧៩៨៩) ​នៅឆ្នាំ ២០២៦។​

យោងតាមក្រុមប្រឹក្សាអភិវឌ្ឍន៍កម្ពុជា នៅក្នុងឆ្នាំ ២០២៥ កម្ពុជាបានអនុម័តគម្រោងវិនិយោគចំនួន ៦៣០ ក្នុងទំហំ​ទុនវិនិយោគប្រមាណ ១០ ពាន់លានដុល្លារ ក្នុងនោះវិស័យឧស្សាហកម្ម បានទាក់ទាញទុនវិនិយោគជាង ៥,៦ ពាន់លានដុល្លារ៕

អត្ថបទ៖ ឡេង ដេត

The post ​វិស័យ​ឧស្សាហកម្ម​កម្ពុជា ​រំពឹង​ទាក់​ទាញ​ទុន​វិនិយោគ​ដល់​ ២៨ ​ពាន់លានដុល្លារ​ ត្រឹមឆ្នាំ ២០២៦ appeared first on Kampuchea Thmey Daily.

​ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍​នៅថ្ងៃទី ២៣ ​ខែកុម្ភៈ ​ឆ្នាំ ២០២៦​ បាន​បើក​សន្និបាតបូកសរុបលទ្ធផលការងារឆ្នាំ២០២៥ ​និង​លើកទិសដៅការងារឆ្នាំ២០២៦ ដោយ​កំណត់​អាទិភាពពង្រឹងភាពប្រកួតប្រជែង​របស់កម្ពុជា លើសពីមូលដ្ឋានផលិតកម្មតម្លៃទាប និង​ការព​ង្រឹង​សមត្ថភាពស្ថាប័ន។ ​

លោក ​ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ មានប្រ​សា​សន៍​នៅក្នុងសន្និបាត​ថា ​កម្ពុជា​រក្សា​បាននូវស្ថិរភាពម៉ាក្រូសេដ្ឋកិច្ច ​និង​កំពុងឈាន​ចូលដំណាក់​កាល​ថ្មី​នៃ​ការ​អភិវឌ្ឍ ​ជាមួយ​នឹង​គោលដៅ​ចាកចេញ​ពីឋានៈជាប្រទេស​ដែល​មាន​ការ​អភិវឌ្ឍ​តិច​តួច​នៅ​ឆ្នាំ២០២៩ ​និង​ចក្ខុវិស័យ​ឆ្នាំ២០២៥០ ក្លាយជាប្រទេសមានចំណូលខ្ពស់​។ ​កម្ពុជាត្រូវមានមូលដ្ឋានគ្រឹះសេដ្ឋកិច្ចរឹងមាំ ​អភិបាលកិច្ចល្អ​ និង​ប្រព័ន្ធ​នានា​របស់​ជាតិ​ដែល​ខ្លាំងក្លា។

​លោក ​ហែម វណ្ណឌី ​បញ្ជាក់ថា៖ ​«វាជាបេសកកម្មដែលតម្រូវឱ្យ​កម្ពុជាមិន​មែនត្រឹមតែផលិត​បាន​ទំនិញ​ច្រើនប៉ុណ្ណោះទេ ​ប៉ុន្តែជាទំនិញប្រកបដោយតម្លៃបន្ថែម មានកម្លាំងពលកម្ម​ប្រកប ដោយ​ជំនាញ ​គុណភាពដែលមានការបញ្ជាក់ត្រឹមត្រូវ សេវាកម្មដែលជឿជាក់បាន អនុ​លោម​ភាព​ដែល​អន្តរ​ជាតិទទួលស្គាល់ ​និង​នវានុវត្តន៍ដែលដោះស្រាយ​បញ្ហាប្រឈម​ជាក់ស្តែង»។​

​លោករដ្ឋមន្ត្រីបាន​បន្ថែមថា ​ប្រៀប​ប្រកួតប្រជែងខាងសេដ្ឋកិច្ច លែងត្រូវ​បានកំណត់​ដោយកត្តា​ថ្លៃ​ដើម​ទាបតែមួយមុខ​ហើយប៉ុន្តែគុណភាព​​ ស្តង់ដារ អនុលោមភាព ផលិតភាព នវានុវត្តន៍ សុវត្ថិភាព និរន្តរភាព និងសមត្ថភាពឈានទៅចាប់យកតម្លៃបន្ថែមក្នុងខ្សែច្រវាក់តម្លៃទើបជាកត្តាកំណត់។

​លោក បណ្ឌិត គី សេរីវឌ្ឍន៍ ​អ្នកស្រាវជ្រាវសេដ្ឋកិច្ច ​នៃរាជបណ្ឌិត្យសភាកម្ពុជា ​យល់ឃើញថា ​វិស័យ​ដែល​ជំរុញ​កំណើន​សេដ្ឋកិច្ច​កម្ពុជា​ឱ្យ​រឹង​មាំ ​គឺវិស័យ​ឧស្សាហកម្មកម្មន្តសាល ​​ដែល​ផ្ដល់​ការងារ​កម្លាំង​ពលកម្ម​ក្នុង​ស្រុក។

​ស្ថានភាពម៉ាក្រូសេដ្ឋកិច្ចកម្ពុជា​ បន្តរក្សាស្ថិរភាព ឆ្លុះបញ្ចាំងតាមរយៈតុល្យភាព​ខាងក្នុង ​និង​ខាងក្រៅ។ ​សេដ្ឋកិច្ចកម្ពុជា ​សម្រេចបានកំណើន ៥% ​នៅក្នុងឆ្នាំ ២០២៥ ​ដែលគាំទ្រជាចម្បងដោយ​ការ​នាំ​ចេញ​នៃវិស័យកម្មន្តសាល។ ​យោងតាមធនាគារជាតិកម្ពុជា៕

អត្ថបទ៖ ឡេង ដេត

The post ​វិស័យ​ឧស្សាហកម្ម​នៅ​តែ​នាំមុខ ​ជំរុញ​កំណើន​សេដ្ឋកិច្ច​កម្ពុជា appeared first on Kampuchea Thmey Daily.

​យោង​តាម​ក្រសួងពាណិជ្ជកម្ម​ គិត​ចាប់​ពី​ខែ​មករា ដល់ខែកញ្ញា ឆ្នាំ ២០២៥​ ការនាំចេញសម្លៀក​បំពាក់​មានទឹកប្រាក់ ​៨,៦៣ ពាន់លានដុល្លារ កើនឡើង ១៦,៨៩ ភាគរយ សម្ភារៈធ្វើដំណើរចំនួន ១,៥៣ ពាន់លានដុល្លារ កើនឡើង ៣,២០ ភាគរយ និងស្បែកជើង ១,៥៣ ពាន់លានដុល្លារ កើន ២៦,៧០ ភាគរយ។​​

​លោក កាំង ម៉ូនីកា អគ្គលេខាធិការរងសមាគមវាយនភណ្ឌ សម្លៀកបំពាក់ស្បែកជើង និង​ផលិត​ផល​ធ្វើដំណើរ (TAFTAC) មានប្រសាសន៍ថា ​ស្ថានភាពក្នុងវិស័យកាត់ដេរ​របស់កម្ពុជា​នៅ​ដំណើរ​​​ការល្អ បើទោះបីជារងសម្ពាធពីកត្តាខាងក្រៅ ខណៈការប្រកាសដាក់ពន្ធ​បដិការរបស់​ប្រធា​នា​ធិបតី​អា​មេរិកនាពេលកន្លងមកនេះក៏ពុំទាន់មានការបង្ករឱ្យមាន​ការរអាក់រអួលនៅ​ក្នុងវិស័យ​នេះដែរ។

​លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មបានមានប្រសាសន៍ថា​​ ក្រសួងពាណិជ្ជកម្មមានគោលនយោបាយធ្វើពិពិធកម្មទីផ្សារ និងពិពិធកម្មទំនិញ ពិពិធកម្ម​ទីផ្សារ​បាន​ន័យថា ពង្រីកតាមរយៈកិច្ចព្រមព្រៀងពាណិជ្ជកម្មសេរី ពិពិធកម្មទំនិញ​បាន​ន័យ​ថា ជំរុញឱ្យ​ឧស្សា​ហកម្មក្នុងស្រុកផលិតទំនិញឱ្យបាន​សម្បូរបែប​សម្រាប់​ស្រូបទីផ្សារ។

​លោកបណ្ឌិត ជ័យ តិច អ្នកស្រាវជ្រាវការអភិវឌ្ឍសង្គម-សេដ្ឋកិច្ច ​ប្រាប់កម្ពុជាថ្មីថា ការនាំចេញ​ក្នុង​វិស័យឧស្សាហកម្មកម្ពុជាមានការកើនឡើង ​ដូចជាសម្លៀកបំពាក់ និងកម្មន្តសាល កង់ គ្រឿងបង្គុំអគ្គិសនី។

​លោកបណ្ឌិត ជ័យ តិច ​យល់ឃើញថា៖ « ការវិនិយោគកើនឡើង ​និងការនាំចេញក៏កើនឡើង ​ដោយសារតែការទទួលបាននូវអត្រាពន្ធ ​ដូចជាអង់គ្លេស​ដែលយើងនាំចូលគ្រឿងបង្គុំអគ្គិសនី ​ក៏ដូចជាវាយនភណ្ឌអត្រា សូន្យភាគរយ ​ហើយរំពឹងថា​​នឹងកើនឡើង​បន្ថែមទៀត ​នៅឆ្នាំខាងមុខ»។

លោកបណ្ឌិត ជ័យ តិច ​បន្ថែមថា ការនាំចេញរបស់កម្ពុជា​ទៅអាមេរិក ​ក៏មានការកើនឡើងខ្លាំង ​ដោយសារតែអត្រាពន្ធ ១៩% ​បើធៀបនឹងសមាជិកអាស៊ាន និងប្រទេសដៃគូប្រកួតប្រជែង គឺកម្ពុជា ទាបជាងគេយើងស្មើតែឥណ្ឌូនេស៊ីមួយ៕​

អត្ថបទ៖ ឡេង ដេត

The post កម្ពុជា​រកចំណូល​បានជាង $១២ ពាន់​លាន​ ពី​ការ​នាំចេញ​សម្លៀក​បំពាក់​ ស្បែកជើង ​និងសម្ភារធ្វើដំណើរ​ appeared first on Kampuchea Thmey Daily.

វិស័យឧស្សាហកម្មត្រូវបានព្យាករណ៍ថា នឹងបន្តនិន្នាការកើនឡើងក្នុងរង្វង់ ៨,៦% ក្នុងឆ្នាំ ២០​២៥ ដោយគាំទ្រដោយការរក្សាបានតុល្យភាពនៃអនុវិស័យកាត់ដេរ និងអនុវិស័យកម្មន្តសាល​មិន​មែនកាត់ដេរ ខណៈដែលអនុវិស័យសំណង់នៅបន្តមានកំណើនទាប។

លោក ហែម វណ្ឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ មាន​ប្រសាសន៍ថា ទោះបីជាសេដ្ឋកិច្ច​សកល​នៅបន្ត​ប្រឈម​បញ្ហា កម្ពុជានៅតែអាចរក្សា​បាននូវស្ថិរ​ភាពម៉ាក្រូសេដ្ឋកិច្ច ធានាបាននូវអត្រាការងារខ្ពស់ ទាក់​ទាញ​ការវិនិយោគ និងការ​បង្កើត​រោង​ចក្រសហគ្រាសជាបន្តបន្ទាប់ រហូតទទួលបានកំណើន​នៃ​ការ​នាំចេញ ជាពិសេសការដាក់​ចេញ​វិធាន​ការជាបន្តបន្ទាប់របស់ប្រមុខដឹកនាំ​រាជរដ្ឋាភិបាល​ក្នុង​​​ការ​ជួយ​ដល់សហគ្រាស​ធុនតូច និងមធ្យម ដែលជាឆ្អឹងខ្នងនៃកំណើនសេដ្ឋកិច្ចជាតិ ដើម្បី​រក្សា​បាន​ដំណើរការផលិតកម្ម ធុរកិច្ច និងការវិនិយោគនានា ក៏ដូចជារក្សាបានការ​ងារជូន​ប្រជា​ពល​រដ្ឋ។

ផ្អែកតាមការវាយតម្លៃ សេដ្ឋកិច្ចកម្ពុជាបន្តសម្រេចបានកំណើន ៦% ក្នុងឆ្នាំ ២០២៤ និងទំហំ ៦,៣% ក្នុងឆ្នាំ ២០២៥ ក្នុងនោះវិស័យឧស្សាហកម្មបានរួមចំណែកដល់កំណើនប្រមាណ ៨,៥% នៅឆ្នាំ ២០២៤ និងព្យាករណ៍ថា នឹងបន្តនិន្នាការកើនឡើងក្នុងរង្វង់ ៨,៦% ក្នុងឆ្នាំ ២០​២៥។

គិតត្រឹមចុងឆ្នាំ ២០២៤ មានរោងចក្រ មាន​រោង​ចក្រធុនធំដំណើរការចំនួន ២៤២៥ ក្នុង​នោះ​រោងចក្រធុនធំកើតថ្មីមានចំនួន ៣២៦ រោង​ចក្រ ដែលបានផ្ដល់ឱកាសការងារដល់​ប្រជា​ពលរដ្ឋចំនួន ១,១៦ លាននាក់ ដែលមានស្ត្រីជាង ៧៣ ភាគរយ។ ទុនវិនិយោគសរុបនៅក្នុង​វិស័យ​ឧស្សា​ហ​កម្ម មានចំនួនជាង ២០,៤៥ ពាន់​លាន​ដុល្លារ កើនឡើង ១០,១៨ ភាគរយ ធៀបនឹងឆ្នាំ ២០២៣៕

អត្ថបទ៖ ឡេង ដេត

The post ទុនវិនិយោគក្នុងវិស័យឧស្សាហកម្មសម្រេចបានជិត ៥ ពាន់លានដុល្លារ នៅរយៈពេល ៧ ខែ appeared first on Kampuchea Thmey Daily.

ក្នុង​ឱកាស​នោះ​ លោក រដ្ឋមន្ត្រី ហែម វណ្ណឌី បាន​លើក​ឡើង​ថា ទោះបីកម្ពុជា​កំពុងប្រឈម​នឹងការ​គំរាមកំហែង​លើ​បូរណភាព​ទឹកដី និង​អធិបតេយ្យភាព​របស់ខ្លួនក្តី ប៉ុន្តែ​ស្មារតី​សាមគ្គី​ឯកភាព​ជាតិ​ដ៏រឹងមាំ និង​ការ​បំពេញ​ភារកិច្ច និង​កាតព្វកិច្ចរៀងៗខ្លួន ទាំង​ជួរមុខ និងជួរក្រោយ បានក្លាយជាថាមពលដ៏ខ្លាំងក្លា សម្រាប់ភាពធន់ និងការបន្តវឌ្ឍនភាពរបស់យើង។

លោក​រដ្ឋមន្ត្រី បាន​ថ្លែង​កោត​សរសើរ​ដោយ​អះអាងថា «ការរៀបចំពិព័រណ៍នេះ ជាសក្ខីកម្ម​បង្ហាញនូវ​ដំណើរឆ្ពោះ​ទៅមុខ និង​ការប្តេជ្ញាចិត្តរួមគ្នា​រវាងរាជរដ្ឋាភិបាល និងផ្នែកឯកជន ដើម្បីអភិវឌ្ឍវិស័យឧស្សាហកម្ម និង​កម្មន្តសាល​របស់​កម្ពុជា​ឱ្យកាន់តែរឹងមាំ»។

លោក​រដ្ឋមន្ត្រី ហែម វណ្ណឌី បានគូសរំលេចការវិវត្តថ្មីៗនៃគោលនយោបាយពាណិជ្ជកម្មសកល ពិសេសការ បន្ថយអត្រាពន្ធបដិការបស់សហរដ្ឋអាមេរិកមកលើកម្ពុជា ដោយលើកឡើងថា គោលនយោបាយ​ពន្ធបដិកាថ្មី​របស់​សហរដ្ឋអាមេរិក បាន​ផ្តល់ឱ្យកម្ពុជានូវភាពប្រាកដប្រជា និងឱកាសប្រកួតប្រជែងមួយ ដែលយើងទាំង​អស់គ្នាត្រូវ​ចាប់យក ក្នុងការពង្រីកការវិនិយោគ និងពង្រឹងសមត្ថភាព ដើម្បីប្រែក្លាយកម្ពុជា ជាមូលដ្ឋានផលិតកម្មចម្រុះសម្រាប់តំបន់ និងពិភពលោក។

ដដែល​នោះ លោក​រដ្ឋមន្ត្រី ក៏បានជំរុញឱ្យ​បន្តកិច្ចខិតខំប្រឹងប្រែងធ្វើទំនើបកម្មហេដ្ឋារចនាសម្ព័ន្ធ និងគោលនយោបាយ ដើម្បីទាក់ទាញការវិនិយោគថ្មីៗបន្ថែមទៀត។ មិន​តែ​ប៉ុណ្ណោះ ព្រឹត្តិការណ៍ពិព័រណ៍រយៈពេល ៤ថ្ងៃ ពីថ្ងៃទី៦ ដល់ថ្ងៃទី៩ ខែសីហានេះ ផ្តល់​នូវ​វេទិកា​យុទ្ធសាស្ត្រ​មួយ​សម្រាប់​ការ​ផ្លាស់​ប្តូរ​ចំណេះ​ដឹង ការស្វែងរកដៃគូអាជីវកម្ម និងការទាក់ទាញវិនិយោគផ្ទាល់ពីបរទេស។ ក្នុងនោះ យើង​ក៏​ត្រូវប្តេជ្ញាបោះ​ជំហានចូលទៅ​កាន់​សករាជ​ថ្មី ដែលប្រើប្រាស់បច្ចេកវិទ្យា បច្ចេកទេស គ្រឿងម៉ាស៊ីន និងឧបករណ៍ទំនើបៗ រួមទាំង​ស្វ័យ​ប្រវត្តិកម្ម ដើម្បី​កសាងមូលដ្ឋានឧស្សាហកម្ម និងសេវាកម្ម ប្រកបដោយស្តង់ដា គុណភាព និងផលិតភាពខ្ពស់។

លោក Akai Lin នាយកក្រៅប្រទេសនៃក្រុមហ៊ុន Yorkers បានលើកឡើងថា គ្រឿងម៉ាស៊ីន និងបច្ចេកវិទ្យាមាន​សារៈ​សំខាន់​កាន់តែខ្លាំង សម្រាប់ដំណាក់កាលបន្ទាប់នៃការអភិវឌ្ឍឧស្សាហកម្ម ហើយទីតាំង​ភូមិសាស្ត្រ​ដ៏ល្អរបស់​កម្ពុជា​នៅក្នុងតំបន់ ធ្វើឱ្យកម្ពុជាក្លាយជាគោលដៅសម្រាប់អ្នកវិនិយោគ និងក្​រុមហ៊ុន​ផ្គត់ផ្គង់​អន្តរជាតិ។

សូម​ជម្រាប​ថា ពិព័រណ៍ឧស្សាហកម្មគ្រឿងយន្តកម្ពុជាអន្តរជាតិ (CIMIF 2025) និង​ពិព័រណ៍​ឧស្សាហកម្ម​សំលៀកបំពាក់ និង​វាយនភ័ណ្ឌកម្ពុជាអន្តរជាតិ (CTG 2025) បានបើកជាផ្លូវការនៅរាជធានីភ្នំពេញ ដោយ​បង្ហាញ​ចក្ខុវិស័យនៃបរិវត្តកម្មឧស្សាហកម្មកម្ពុជា។ ពិព័រណ៍នេះបានប្រមូលផ្តុំក្រុមហ៊ុនផលិត នវានុវត្តន៍ករ និងវិនិយោគិនជាង ២០០ ក្រុមហ៊ុន មកពី ១៥ ប្រទេស ដើម្បី​ស្វែងយល់​អំពី​ដំណាក់កាល​បន្ទាប់​នៃ​កំណើន​ឧស្សាហកម្ម​របស់​កម្ពុជា។

ពិព័រណ៍ CIMIF និង CTG ឆ្នាំ២០២៥ ត្រូវបានរៀបចំឡើងដោយក្រុមហ៊ុន Yorkers Trade & Marketing Service ជាក្រុមហ៊ុនរៀបចំពិព័រណ៍ឈានមុខមួយក្នុងតំបន់អាស៊ី បាននាំយកក្រុមហ៊ុនសកល មកតាំងបង្ហាញគ្រឿងយន្ត គ្រឿងម៉ាស៊ីនទំនើបៗ ដំណោះស្រាយស្វ័យប្រវត្តិកម្ម និងបច្ចេកវិទ្យាផលិតកម្ម សម្រាប់គាំទ្រឧស្សាហកម្មក្នុងស្រុក ពិសេសឧស្សាហកម្មវាយនភ័ណ្ឌ និងសម្លៀកបំពាក់ ដែលកំពុងផ្តល់ការងារជាងមួយលានកន្លែង និងបន្តជាវិស័យនាំមុខសម្រាប់ការនាំចេញរបស់កម្ពុជា។

ពិព័រណ៍ CIMIF និង CTG ឆ្នាំ២០២៥ មានតាំងបង្ហាញគ្រឿងម៉ាស៊ីន និងខ្សែច្រវាក់ផលិតកម្មច្រើនប្រភេទ រួមមានផ្នែកផ្លាស្ទិច និងកៅស៊ូ ការវេចខ្ចប់ ការបោះពុម្ព ឧបករណ៍កែច្នៃអាហារ គ្រឿងបន្លាស់រថយន្ត ម៉ាស៊ីន និងឧបករណ៍ស្វ័យប្រវត្តិកម្ម។ ទន្ទឹមនឹងនេះ ពិព័រណ៍ក៏មានផ្នែកវាយនភ័ណ្ឌ សម្លៀកបំពាក់ គ្រឿងបន្លាស់ សរសៃអំបោះ កប្បាស ក្រណាត់ និងបច្ចេកវិទ្យាពាក់ព័ន្ធផងដែរ៕

ដោយ៖ ឌិន ថារី

The post រដ្ឋមន្ត្រីឧស្សាហកម្ម៖ ពិព័រណ៍ CIMIF-CTG ឆ្នាំ២០២៥ ជាសក្ខីកម្មបង្ហាញនូវដំណើរឆ្ពោះទៅមុខរួមគ្នាអភិវឌ្ឍវិស័យឧស្សាហកម្មកម្ពុជាឱ្យកាន់តែរឹងមាំ appeared first on Kampuchea Thmey Daily.

ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ (MISTI) បានព្យាករថា វិស័យឧស្សាហកម្មត្រូវបានព្យាករថា នឹងកើនឡើងក្នុងរង្វង់ ៨.៦% ដែលគាំទ្រដោយការរក្សាបានតុល្យភាពនៃអនុវិស័យកាត់ដេរ និងអនុវិស័យកម្មន្តសាលមិនមែនកាត់ដេរ ខណៈដែលអនុវិស័យសំណង់នៅបន្តមានកំណើនទាប ខណៈសេដ្ឋកិច្ចកម្ពុជានឹងបន្តនិន្នាការកើនឡើងក្នុងរង្វង់ ៦,៣% នៃ ផ.ស.ស. ហើយចំណូលមធ្យម សម្រាប់ពលរដ្ឋម្នាក់ៗរំពឹងថានឹងកើនឡើងដល់ ២.៩២៤ដុល្លារអាមេរិក។

លោក ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ (MISTI) បានថ្លែងក្នុងកម្មវិធី របស់សម្ព័ន្ធសមាគមសហគ្រាសធុនតូច និងមធ្យមកម្ពុជា កាលពីសប្តាហ៍មុនថា កាលពីឆ្នាំ២០២៤ កន្លងទៅ សេដ្ឋកិច្ចកម្ពុជាបន្តនិន្នាការកើនឡើងក្នុងរង្វង់ ៦% នៃ ផលិតក្នុងស្រុកសរុប (GDP) ដោយចំណូលមធ្យមសម្រាប់ពលរដ្ឋម្នាក់ៗ មានចំនួន ២ ៧១៣ដុល្លារអាមេរិក។ កំណើននេះគាំទ្រដោយវិស័យសេដ្ឋកិច្ចសំខាន់ៗមួយចំនួន ក្នុងនោះវិស័យឧស្សាហកម្មបន្តកើនឡើងក្នុងរង្វង់ ៨,៥% ពីប្រមាណ ៥% ក្នុងឆ្នាំ២០២៣។

លោកបានគូសបញ្ជាក់ថា៖«តួលេខជាក់ស្តែងគឺ រោងចក្រធុនធំដំណើរការមានចំនួន ២ ៤២៥ រោងចក្រ កើតថ្មីចំនួន ៣២៦ រោងចក្រ និង បិទទ្វារចំនួន ២៦រោងចក្រ កម្លាំងពលកម្មសរុបចំនួន ១ ១៦០ ១៨១ នាក់ (ស្រីចំនួន ៨៥៤.៨១៩ នាក់ ស្មើនឹង ៧៣,៦៨%) គឺកើនឡើងចំនួន ១១៩.៨៤៨នាក់ ធៀបនឹងឆ្នាំ២០២៣។ តំបន់សេដ្ឋកិច្ចពិសេស មានរោងចក្រដំណើរការសរុបចំនួន ៣០ តំបន់ ស្ថិតនៅក្នុង ១២ រាជធានី-ខេត្ត កើនឡើងចំនួន ៤ តំបន់ ធៀបនឹងឆ្នាំ២០២៣»។

បច្ចុប្បន្ន កម្ពុជាមានតំបន់​សេដ្ឋកិច្ច​ពិសេស​ចំនួន ២៦ កន្លែងក្នុងចំណោម ៤៤ កន្លែង កំពុង​ដំណើរការ​នៅ ៩ រាជធានី​ខេត្ត ដែល​បាន​​បង្កើត​ការងារ​បាន​​ជិត ២០ ម៉ឺន​កន្លែងដល់ពលរដ្ឋក្នុងមូលដ្ឋាន​។ គិត​ត្រឹម​ខែ​ឧសភា ឆ្នាំ ២០២៤ ​តំបន់​សេដ្ឋកិច្ច​ពិសេស​ទាំង ២៦ កន្លែង​ មាន​គម្រោង​វិនិយោគ​ចំនួន​ ៧៣៤ គម្រោង ជាមួយ​ទុន​វិនិយោគ​ប្រមាណ ៨.៩ ប៊ីលាន​ដុល្លារ។ នេះបើតាម​ក្រុមប្រឹក្សាអភិវឌ្ឍន៍កម្ពុជា​៕

​

The post វិស័យឧស្សាហកម្មត្រូវបានព្យាករថា នឹងកើនឡើងក្នុងរង្វង់ ៨,៦% នៅឆ្នាំនេះ appeared first on Kampuchea Thmey Daily.