ការអំពាវនាវរបស់ក្រុមនិពន្ធនាយកសារព័ត៌មានពេលនេះ ក្រោយសង្កេតឃើញថា មានអ្នកសារព័ត៌មានមួយចំនួននៅតែមិនទាន់អនុវត្តនូវក្រមសីលធម៌វិជ្ជាជីវៈសារព័ត៌មានឱ្យបានត្រឹមត្រូវនៅឡើយ ដែលនាំឱ្យប៉ះពាល់ដល់វិស័យសារព័ត៌មាននៅកម្ពុជា។ ដោយឃើញបែបនេះហើយ ទើបក្រុមនិពន្ធនាយកសារព័ត៌មាននៅកម្ពុជា តាមរយៈក្លិបអ្នកកាសែតកម្ពុជា បានបើកវេទិកាជួបពិភាក្សាគ្នា នៅថ្ងៃទី២១ ខែធ្នូ ឆ្នាំ២០២៣នេះ ដោយបានផ្ដោតការពិភាក្សាលើក្រមសីលធម៌ និងវិជ្ជាជីវៈរបស់អ្នកសារព័ត៌មាន។

ក្រោយពីបានពិភាក្សាយ៉ាងផុលផុសរួចហើយ អង្គវេទិកានិពន្ធនាយកសារព័ត៌មានកម្ពុជា បានសម្រេចចេញសេចក្ដីថ្លែងរួមមួយ ដែលក្នុងគោលបំណងដើម្បីពង្រឹងក្រមសីលធម៌ និងវិជ្ជាជីវៈវិស័យសារព័ត៌មាននៅកម្ពុជា។​ តាមរយៈសេចក្ដីថ្លែងការណ៍នេះ ក្រុមនិពន្ធនាយកកម្ពុជា បានចាត់ទុកការពង្រឹងក្រមសីលធម៌វិជ្ជាជីវៈសារព័ត៌មាន គឺជាមូលដ្ឋានគ្រឹះកាន់តែមានសារសំខាន់សម្រាប់ការប្រតិបត្តិវិជ្ជាជីវៈសារព័ត៌មាននៅក្នុងការងារប្រចាំថ្ងៃ ក៏ដូចជាការលើកស្ទួយតម្លៃរបស់អ្នកសារព័ត៌មាន និងជំនឿរបស់មហាជនមកលើសារព័ត៌មាន ជាពិសេសក្នុងបរិបទនៃការរីកដុះដាលខ្លាំងនៃសារព័ត៌មានឌីជីថល ។

ដើម្បីពង្រឹងការអនុវត្តក្រមសីលធម៌វិជ្ជាជីវៈសារព័ត៌មានប្រកបដោយប្រសិទ្ធភាព ក្រុមនិពន្ធនាយកសារព័ត៌មានកម្ពុជា បានអំពាវនាវជាថ្មីម្តងទៀតដល់អ្នកសារព័ត៌មានទាំងអស់ ជាពិសេសអ្នកដែលទើបចូលបំពេញការងារក្នុងវិស័យសារព័ត៌មាន គប្បីយកចិត្តទុកដាក់ក្នុងការសិក្សាស្រាវជ្រាវ ឬក៏ចូលរួមក្នុងវគ្គបណ្តុះបណ្តាលវិជ្ជាជីវៈសារព័ត៌មាន និងក្រមសីលធម៌ បើសិនជាពួកគេមានបំណងចង់ក្លាយជាអ្នកសារព័ត៌មានអាជីព ហើយទទួលបានការគាំទ្រពីសាធារណជន។

បើតាមក្រុមនិពន្ធនាយក ការបណ្តុះបណ្តាល អប់រំ ផ្សព្វផ្សាយអំពីក្រមសីលធម៌វិជ្ជាជីវៈសារព័ត៌មាន នៅតែជាបញ្ហាស្នូលសម្រាប់អ្នកសារព័ត៌មាន ព្រោះស្ថាប័ន និងអ្នកសារព័ត៌មាន ហាក់មានកំណើនជាបន្តបន្ទាប់ ប៉ុន្តែមិនទាន់ទទួលបានការបណ្តុះបណ្តាលច្បាស់លាស់នៅឡើយ ដែលជាហេតុធ្វើឱ្យកំហុសឆ្គងលើវិជ្ជាជីវៈ និងក្រមសីលធម៌ងាយនឹងកើតឡើង៕

The post ក្រុមនិពន្ធនាយក បន្តជំរុញឱ្យអ្នកប្រឡូកក្នុងវិស័យព័ត៌មានចូលរួមវគ្គបណ្ដុះបណ្ដាលក្រមសីលធម៌ appeared first on Kampuchea Thmey Daily.

រាជរដ្ឋាភិបាល បានយកចិត្តទុកដាក់លើកកម្ពស់ សេរីភាពនៃការបញ្ចេញមតិ សេរីភាពសារព័ត៌មាន និងជំរុញឱ្យមាន​ការបណ្តុះបណ្ដាលផ្នែកសារព័ត៌មាន និងបច្ចេកវិទ្យាប្រព័ន្ធផ្សព្វផ្សាយទំនើប ក៏ដូចជាពង្រឹងការអនុវត្តក្រមសីលធម៌ វិជ្ជាជីវៈ ដើម្បីឱ្យអ្នកសារព័ត៌មាន បំពេញភារកិច្ចប្រកបដោយវិជ្ជាជីវៈ និងការទទួលខុសត្រូវ។

លើសពីនេះទៀត សម្តេច ហ៊ុន ម៉ាណែត នាយករដ្ឋមន្រ្តីកម្ពុជា បានលើកឡើងថា សារព័ត៌មានត្រូវតែធ្វើជាកញ្ចក់​ឆ្លុះ​បញ្ចាំងអំពី​ភាពពិតជាក់ស្តែង និងភាពអសកម្មនៅក្នុងសង្គម ដើម្បីរាជរដ្ឋាភិបាល ដោះស្រាយបញ្ហាចំគោល​ដៅមាន​ប្រសិទ្ធភាព ស្របតាមកម្មវិធីកំណែទម្រង់របស់រាជរដ្ឋាភិបាល។ សម្តេច​លើកឡើងបែបនេះ នៅក្នុងលិខិតផ្ញើជូនវេទិកា​និពន្ធនាយក​សារព័ត៌មានកម្ពុជា ឆ្នាំ២០២៣ នាថ្ងៃទី ២១ ខែ ធ្នូនេះ។

តាមរយៈលិខិតសម្តេច ហ៊ុន ម៉ាណែត បានបញ្ជាក់ថា វេទិកានិពន្ធនាយកសារព័ត៌មានកម្ពុជា ឆ្នាំ២០២៣ ក្រោមប្រធាន​បទ «ក្រមសីលធម៌ និងវិជ្ជាជីវៈ សារព័ត៌មាន» ពិតជាមានសាសំខាន់បំផុត ខណៈដែលការអនុវត្តក្រមសីលធម៌ វិជ្ជាជីវៈរបស់អ្នកសារព័ត៌មាន មួយចំនួននៅមានកម្រិត ជាពិសេសអ្នកសារព័ត៌មានតាមប្រព័ន្ធអនឡាញ ដែលទាម​ទារឱ្យមានការយកចិត្ត ទុកដាក់ពង្រឹងការអនុវត្តក្រមសីលធម៌វិជ្ជាជីវៈ និងការបណ្តុះបណ្តាលជំនាញ ដើម្បីបង្កើន​សមត្ថភាព​របស់ អ្នកសារព័ត៌មាន និងបង្កើនទំនុកចិត្តដល់សាធារណជន។

ទន្ទឹមនឹងនេះ សម្តេច កោតសរសើរចំពោះស្ថាប័នសារព័ត៌មាន និងអ្នកសារព័ត៌មានទាំងអស់ ដែលបានគាំទ្រគោល​នយោបាយរបស់រាជរដ្ឋាភិបាលនាពេលកន្លងមក ក៏ដូចជា គោលនយោបាយរបស់រាជរដ្ឋាភិបាល​នីតិកាលទី៧​នៃរដ្ឋសភា ដែលនេះជាកម្លាំងចលករក្នុងការចូលរួម ចំណែកថែរក្សាសុខសន្តិភាព និងការកសាងប្រទេស​ឱ្យមានការរីកចម្រើនប្រកបដោយចីរភាព ដោយសម្លឹង ឆ្ពោះទៅបង្គោលចរណ៍ ចក្ខុវិស័យកម្ពុជា ឆ្នាំ២០៥០។

ដើម្បីជាមូលដ្ឋានក្នុងការពិភាក្សាដោះស្រាយបញ្ហាប្រឈម ដែលពាក់ព័ន្ធការបំពានក្រមសីលធម៌ វិជ្ជាជីវៈ ការផ្សព្វផ្សាយ​ព័ត៌មានក្លែងក្លាយ បំភ្លៃការពិត មានចរិតបំពុលសង្គម ជេរប្រមាថ និងញុះញង់ បង្កឱ្យកើតមាន អរិភាព ការបែកបាក់​សាមគ្គីភាពជាតិ សម្តេចនាយករដ្ឋមន្រ្តីបានផ្តល់ជាអនុសាសន៍ដូច្នេះថា អ្នកសារព័ត៌មាន ត្រូវផ្សព្វផ្សាយអប់រំ​ដល់សា​ធារណជនអំពីវិធានការបង្ការគ្រោះថ្នាក់ចរាចរណ៍ គ្រោះថ្នាក់នៃការប្រើប្រាស់ គ្រឿងញៀន ការជួញដូរមនុស្ស គោលនយោបាយភូមិឃុំមានសុវត្ថិភាព ដើម្បីកាត់បន្ថយគ្រោះថ្នាក់ ចរាចរណ៍ ការប្រើប្រាស់គ្រឿងញៀន និងរក្សា​សុវត្ថិភាពសង្គម។ ប្រកាន់ខ្ជាប់ក្រមសីលធម៌ វិជ្ជាជីវៈ ផ្សាយព័ត៌មានពិត មានតុល្យភាព គ្រប់ជ្រុងជ្រោយ ចៀសវាង ការផ្សព្វផ្សាយព័ត៌មានដែលធ្វើឱ្យខូចផលប្រយោជន៍ជាតិ និងបាត់បង់ទំនុកចិត្តពីសាធារណជនជាដើម៕

The post រាជរដ្ឋាភិបាល ជំរុញឱ្យមានការបណ្តុះបណ្ដាល​ផ្នែកសារព័ត៌មាន និងបច្ចេកវិទ្យា​ប្រព័ន្ធផ្សព្វផ្សាយទំនើប appeared first on Kampuchea Thmey Daily.