ព្រឹត្តិការណ៍ “ នគរសង្ក្រាន្ត “ ខាងលើនឹងប្រារព្ធទៅរយៈពេល០៦ថ្ងៃ គិតចាប់ពីថ្ងៃទី១៤ ដល់ថ្ងៃទី១៩ ខែមេសា ឆ្នាំ២០២៦ នៅតាមទីតាំងសំខាន់មួយចំនួនដូចជា ៖ រមណីយដ្ឋានវប្បធម៌ប្រវត្តិសាស្ត្រវត្តភ្នំ , ផ្លូវថ្មើរជើងចតុមុខ , សួនច្បារវត្តបទុមវត្តី , បរិវេណបាសាក់លេន និងផ្សារទួលទំពូងជាដើម។

កាលពីថ្ងៃទី៣១ ខែមីនាឆ្នាំ២០២៦ លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានអញ្ជើញដឹកនាំកិច្ចប្រជុំបូកសរុបសភាពការណ៍លទ្ធផល នៃកិច្ចប្រតិបត្តិការការពារសន្តិសុខ រក្សាសណ្តាប់ធ្នាប់ សុវត្ថិភាពសង្គម ប្រចាំត្រីមាសទី១ និងលើកទិសដៅការងារបន្តសម្រាប់ត្រីមាសទី២ ឆ្នាំ២០២៦ និងផ្សព្វផ្សាយផែនការការពារ សន្តិសុខ សណ្តាប់ធ្នាប់ និងសុវត្ថិភាពសង្គម ក្នុងឱកាសប្រារព្ធពិធីបុណ្យចូលឆ្នាំថ្មី និងព្រឹត្តិការណ៍ “ នគរសង្រ្កាន្ត “ ក្នុងរាជធានីភ្នំពេញ។ កិច្ចប្រជុំនេះដែរ មានការចូលរួមពីលោក-លោកស្រីស្នងការរង លោកអនុប្រធានផែនការងារ លោក-លោកស្រីនាយការិយាល័យជំនាញទាំង៣៣ លោកអធិការនគរបាលខណ្ឌទាំង១៤ និងមន្រ្តីពាក់ព័ន្ធមួយចំនួនទៀតផងដែរ។

លោកស្នងការនគរបាលរាជធានីភ្នំពេញ ក៏បានលើកឡើងដាក់បទបញ្ជាឲ្យ លោក-លោកស្រីស្នងការរង លោកនាយការិយាល័យនាញ និងលោកអធិការនគរបាលខណ្ឌទាំង១៤ ត្រូវពង្រឹងយកចិត្តទុកដាក់ ដឹកនាំបញ្ជាកម្លាំង អនុវត្តសេចក្តីណែនាំរបស់រដ្ឋបាលរាជធានីភ្នំពេញ ស្តីពីការការពាររក្សាសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយ សាធារណៈ ក្នុងរាជធានីភ្នំពេញ ក្នុងឱកាសពិធីបុណ្យចូលឆ្នាំថ្មីប្រពៃណីខ្មែរ ឲ្យធានាបានសុខសុវត្ថិភាពជាដាច់ខាត។

លោកស្នងការ ក៏បានណែនាំឲ្យជំនាញព្រហ្មទណ្ឌ ជំនាញសន្តិសុខ ទាំងការិយាល័យជំនាញ និងអធិការដ្ឋាននគរបាលខណ្ឌ ត្រូវពង្រឹងបង្កើនសមត្ថភាព គ្រប់គ្រងតាមដានក្តោបសភាពការណ៍ការងារសន្តិសុខឲ្យបានម៉ឺងម៉ាត់ជាពិសេស រាល់មុខសញ្ញាបង្កចលាចលសង្គម និងមុខសញ្ញាចោរ លួច ឆក់ប្លន់ ក្មេងទំនើង ដើម្បីដាក់ចេញវិធានការបង្ការទប់ស្កាត់ឲ្យមានប្រសិទ្ធភាព។ ជំរុញពង្រឹងត្រៀមកម្លាំងអន្តរាគមន៍ ប្រចាំការរងចាំទទួលបទបញ្ជា  ពង្រឹងអនុវត្តរៀបចំផែនការសកម្មភាព ការពារ ទៅតាមមូលដ្ឋាន និងគោលដៅ នានាដូចជាវត្តអារាម កន្លែងសប្បាយភាព រមណីយដ្ឋាន ហើយចាត់កម្លាំងចុះអនុវត្ត ដោយមានការត្រួតពិនិត្យឲ្យបានច្បាស់លាស់។

ជំរុញឲ្យមានការយកចិត្តទុកដាក់ដោះស្រាយសម្រួលចរាចរណ៍ជាពិសេសលំហូរចេញ នៅពេលចរាចរណ៍មានភាពមមាញឹក នៅតាមគោលដៅដែលមានបញ្ហាប្រឈមកកស្ទះ ដើម្បីពន្លឿនការធ្វើដំណើររបស់ប្រជាពលរដ្ឋឲ្យបានឆាប់រហ័ស និងមានសុវត្ថិភាព។ ត្រៀមរថយន្តបង្ការពន្លត់ និងសង្រ្គោះអគ្គិភ័យ ដើម្បីចេញអន្តរាគមន៍ ក្នុងករណីកើតឡើងអគ្គិភ័យជាយថាហេតុណាមួយ។

ជំរុញការផ្សព្វផ្សាយណែនាំ មិនអនុញ្ញាតឲ្យមានការលេងបាញ់ទឹក ប៉ាតម្សៅ គប់ទឹក ដោយចលនាឲ្យនាំគ្នាលេងល្បែងប្រជាប្រិយខ្មែរ និងចុះផ្សព្វផ្សាយណែនាំប្រជាពលរដ្ឋឲ្យប្រុងប្រយ័ត្នបញ្ហាអគ្គិភ័យ ត្រូវណែនាំឲ្យមានការចាក់សោរបិទទ្វារផ្ទះឲ្យបានត្រឹមត្រូវការពារទ្រព្យសម្បត្តិមុនបងប្អូនដើរលេងចាកចេញពីផ្ទះ និងពង្រឹងកម្លាំងល្បាតត្រួតពិនិត្យក្នុងមូលដ្ឋានឲ្យបានជាប្រចាំដើម្បីការពារទ្រព្យសម្បត្តិរបស់ប្រជាពលរដ្ឋឲ្យបានល្អ។

សូមបញ្ជាក់ថា: ក្នុងកិច្ចប្រជុំនេះផងដែរ លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ក៏បានប្រគល់បណ្ណសរសើរដែលជាការលើកចិត្តរបស់ថ្នាក់ដឹកនាំក្រសួងមហាផ្ទៃ ជូនចំពោះលោក-លោកស្រី ស្នងការរង លោក-លោកស្រីនាយ នាយរងការិយាល័យជំនាញ និងលោកអធិការ អធិការរង សរុបចំនួន២៨នាក់ ដែលមានស្នាដៃចូលរួមបំពេញភារកិច្ចជូនដល់អង្គភាព និងបម្រើប្រជាពលរដ្ឋបានល្អ៕ អត្ថបទ៖ សុភា

The post កម្លាំងនគរបាលរាជធានី ត្រៀមលក្ខណៈពេញលេញ ក្នុងការថែរក្សាការពារសន្តិសុខសុវត្ថិភាពជូនពលរដ្ឋក្នុងព្រឹត្តិការណ៍ “ នគរសង្ក្រាន្ត “ ខាងមុខ appeared first on Kampuchea Thmey Daily.

ក្រុមនិស្សិតយល់ឃើញយ៉ាងច្បាស់ថា កម្មវិធីសង្ក្រាន្តដែលរៀបចំឡើងក្នុងពេលខាងមុខ ដោយអមជាមួយការតាំងបង្ហាញ និងតាំងលក់ពីទំនិញ និងផលិតខ្មែរក្នុងស្រុក គឺជាការបង្ហាញឲ្យអន្តរជាតិបានឃើញ បានស្គាល់កាន់តែច្បាស់ពីកម្ពុជា ហើយវាក៏ជាផ្នែក នៃការជម្រុញសេដ្ឋកិច្ចប្រជាជន និងសេដ្ឋកិច្ចក្នុងស្រុកផងដែរ នៅពេលដែលកំណើនទេសចរណ៍មានការកើនឡើង។

រមណីយដ្ឋានប្រវត្តិសាស្ត្រវត្តភ្នំ ជាទីតាំងធំមួយ ក្នុងចំណោមទីតាំងមួយចំនួន ដែលត្រូវបានកំណត់យកជាទីកន្លែងរៀបចំព្រឹត្តិការណ៍នគរសង្ក្រាន្តធំៗ ក្នុងឱកាសបុណ្យចូលឆ្នាំថ្មី ឆ្នាំ២០២៦។

បច្ចុប្បន្នគេសង្កេតឃើញក្រុមការងាររបស់រដ្ឋបាលរាជធានីភ្នំពេញ កំពុងមមាញឹកក្នុងការតុបតែងលម្អតម្លើងរោង និងរូបចំលាក់ធំៗមួយចំនួនជាបណ្តើរៗ អមជាមួយការរៀបចំសម្អាតបរិស្ថានអនាម័យសួនច្បារក្នុងបរិវេណទីធ្លារតំបន់រដ្ឋមនីយដ្ឋានវត្តភ្នំ ដើម្បីធានាសោភ័ណ្ឌភាព និងរបៀបរៀបរយ ខណៈព្រឹត្តិការណ៍សង្ក្រាន្ត ក៏កាន់តែគៀកគិតចូលមកដល់ ពោលនៅពាក់កណ្តាលខែមេសា ខាងមុខ។ ទន្ទឹមជាមួយការរៀបចំនៅតាំងទីតាំងសង្ក្រាន្តតូចធំ ការបញ្ជាទិញសម្ភារ និងគ្រឿងតុបតែងបែបខ្មែរ ក៏កំពុងមមាកញឹកក្នុងការលក់ដូរផងដែរ។

គួរបញ្ជាក់ថា ៖ ព្រឹត្តិការណ៍សង្ក្រាន្តឆ្នាំថ្មី គ្រោងនឹងធ្វើឡើងរយៈពេល ០៦ថ្ងៃ គិតចាប់ពីថ្ងៃទី១៤ ដល់ថ្ងៃទី១៩ ខែមេសា ឆ្នាំ២០២៦ នៅតាមទីតាំងធំៗមួយចំនួន រួមមាន ៖ តំបន់រដ្ឋមនីយដ្ឋានប្រវត្តិសាស្ត្រវត្តភ្នំ , ផ្លូវថ្មើរជើងចតុមុខ (Walk street) , សួនវត្តបទុមវតី , ផ្សារទួលទំពូង និងបណ្ដាទីតាំងមួយចំនួនដទៃ ផ្សេងទៀតផងដែរ៕ អត្ថបទ៖ សុភា

The post រមណីយដ្ឋានប្រវត្តិសាស្ត្រវត្តភ្នំ កំពុងមមាញឹកក្នុងការរៀប ចំតុបតែង សម្រាប់សង្គ្រាន្តនាពេលខាងមុខ appeared first on Kampuchea Thmey Daily.

ចូលឆ្នាំខ្មែរ ឆ្នាំ២០២៥នេះ រាជធានីភ្នំពេញកាន់តែសប្បាយ និងអ៊ូអរ តាមរយៈការរៀបចំព្រឹត្តិការណ៍សង្រ្កាន្តវត្តភ្នំ ផ្លូវថ្មើរជើង (Walk Street) និងកម្មវិធីនានានៅតាមបណ្ដាខណ្ឌទាំង១៤ក្នុងរាជធានីភ្នំពេញ។ ត្រឹមរយៈពេល៥ថ្ងៃ ចាប់ពីថ្ងៃទី១២-១៦ ខែមេសា រាជធានីភ្នំពេញ ទទួលបានទេសចរ និងពលរដ្ឋ ចូលរួមកម្សាន្តសប្បាយជិត ៤លាននាក់។ នេះបើតាមការបញ្ជាក់របស់លោកស្រី ដោ សម្ផស្ស អ្នកនាំពាក្យរដ្ឋបាលរាជធានីភ្នំពេញ។

ព្រឹត្តិការណ៍ “សង្រ្កាន្តវត្តភ្នំ” ចាប់ផ្ដើមនៅថ្ងៃទី១៤ មេសា ប៉ុន្តែប្រជាពលរដ្ឋ ជាពិសេសយុវវ័យ បានមកកម្សាន្ត និងលេងនៅតំបន់ត្រជាក់ចិត្តក្នុងរមណីយដ្ឋានវប្បធម៌ប្រវត្តិសាស្រ្តវត្តភ្នំ តាំងពីថ្ងៃទី១២ មេសាមកម៉្លេះ ពោលចំថ្ងៃភ្ជាប់នឹងផ្លូវថ្មើរជើង។ កំណើនទេសចរ និងពលរដ្ឋ ចូលរួមច្រើនកុះករ ក្នុងឆ្នាំ២០២៥នេះ លោកស្រី ដោ សម្ផស្ស ចាត់ទុកជាជោគជ័យមួយរបស់រដ្ឋបាលរាជធានីភ្នំពេញ ក្នុងការបង្កបរិយាកាសរីករាយដល់ពលរដ្ឋ និងទេសចរនៅក្នុងរាជធានីភ្នំពេញ។

អ្នកនាំពាក្យបានបន្តថា ក្នុងឱកាសពិធីបុណ្យចូលឆ្នាំខ្មែរនេះ រដ្ឋបាលរាជធានីភ្នំពេញ មានទិសដៅធ្វើយ៉ាងណាឱ្យប្រជាពលរដ្ឋក្នុងរាជធានី ទទួលបានភាពសប្បាយរីករាយ ចូលរួមលេងល្បែងប្រជាប្រិយ រាំលេងកម្សាន្តតាមចង្វាក់ប្រពៃណីខ្មែរ ជាពិសេសជួបជុំនៅតំបន់ត្រជាក់ចិត្តនៅមុខរមណីយដ្ឋានវត្តភ្នំ។

ជាក់ស្ដែង​ក្រៅ​ពី​តំបន់​វត្ត​ភ្នំ តំបន់ផ្សារចាស់ និងផ្សារកណ្ដាល ក៏​មាន​សភាពណែនណាន់តាន់តាប់ ដែលពលរដ្ឋមកលេងទឹកកម្សាន្តនៅពេលល្ងាច និងយប់ផងដែរ។

លោកស្រី ដោ សម្ផស្ស អះអាងថា សម្រាប់បញ្ហាសន្តិសុខ សណ្ដាប់ធ្នាប់វិញ អាជ្ញាធរ និងកម្លាំងសមត្ថកិច្ចបានយកចិត្តទុកខ្ពស់ ដើម្បីធានាសុវត្ថិភាព និងបង្កលក្ខណងាយស្រួលដល់អ្នកចូលរួម។ តាមរយៈព្រឹត្តិការណ៍ក្នុងថ្ងៃចូលឆ្នាំនេះ បានចូលរួមចំណែកលើកស្ទួយ និងបង្កើនចរន្តសេដ្ឋកិច្ចបន្ថែមផងដែរ។

ក្នុងឱកាសបុណ្យចូលឆ្នាំខ្មែរនេះ លោកឃួង ស្រេង អភិបាលរាជធានីភ្នំពេញ និង​លោក​ស្រី​ក៏​បានចូលរួមលេងកំសាន្តយ៉ាងសាមញជាមួយប្រជាពលរដ្ឋ ភ្ញៀវ​ទេសចរជាតិ​និង​អន្តរជាតិនៅសង្ក្រាន្តវត្តភ្នំផងដឹកនាំបញ្ជាកងកម្លាំងសមត្ថកិច្ចនិងអាជ្ញាធរក្នុងកិច្ចការពារសន្តិសុខ និងសណ្ដាប់ធ្នាប់ជូនប្រជាពលរដ្ឋបានយ៉ាងល្អប្រសើរថែមទៀត៕

ដោយ ៖ ស្រីរ័ត្ន

The post សង្រ្កាន្តវត្តភ្នំ ភ្ជាប់​ផ្លូវ​ថ្មើរ​ជើង​មាន​ពលរដ្ឋ និង​អ្នកទេសចរ​មក​កម្សាន្តជិត ៤លាននាក់ appeared first on Kampuchea Thmey Daily.

សង្ក្រាន្តវត្តភ្នំ ចាប់ផ្តើមឡើងនៅព្រឹកថ្ងៃទី១៤-១៦ ខែមេសា ឆ្នាំ២០២៥ រហូតដល់ម៉ោង ២០:០០នាទីយប់ អមដោយការរៀបចំកម្មវិធីបែបប្រពៃណីជាតិ និងកម្មវិធី កម្សាន្តសប្បាយជាច្រើន ដូចជា ពិធីទទួលទេវតាឆ្នាំថ្មី ដង្ហែព្រះពុទ្ធរូប ពូនភ្នំខ្សាច់ ស្រង់ព្រះ សម្តែងសិល្បៈរបាំប្រពៃណី លេងល្បែងប្រជាប្រិយជាតិ ប្រគំតន្ត្រីបុរាណ-សម័យ រាំលេងកម្សាន្ត ការតាំងបង្ហាញម្កុដអប្សរា-ពិណខ្នាតធំ និងការតាំងបង្ហាញផលិតផលខ្មែរជាដើម។

សង្ក្រាន្តវត្តភ្នំ ឆ្នាំ២០២៥ នេះ ត្រូវបានរដ្ឋបាលរាជធានីភ្នំពេញ រៀបចំកម្មវិធីយ៉ាងអធឹកអធមនៅរមណីយដ្ឋានប្រវត្កិសាស្ត្រវត្តភ្នំ ចំនួន៣ថ្ងៃ ដោយចាប់ពីថ្ងៃទី១៤, ១៥ និងថ្ងៃទី១៦ ខែមេសា ឆ្នាំ២០២៥ បន្ថែមពីនេះ សម្រាប់ផ្លូវថ្មើរជើង ឬ Walk Street វិញ ក៏បានរៀបចំមុនថ្ងៃចូលឆ្នាំ២ថ្ងៃ ហើយថែម៣ថ្ងៃក្នុងថ្ងៃចូលឆ្នាំទៀត ឡើងដល់៥ថ្ងៃ សម្រាប់បម្រើជូនប្រជាពលរដ្ឋ និងទេសចរជាតិ-អន្តរជាតិ កម្សាន្តសប្បាយ។

ពាក់ព័ន្ធផ្លូវថ្មីរជើង (Walk Street)នេះដែរ សំរាប់សប្ដាហ៍នេះ និងសប្ដាហ៍ក្រោយពោលគឺ ចាប់ពីថ្ងៃទី១២ដល់ថ្ងៃទី១៦មេសា ក្នុងនោះសំរាប់ថ្ងៃសៅរ៍ទី១២មេសាមានរបាំបួងសួង,ថ្ងៃអាទិត្យទី១៣មេសា មានល្ខោនខោល របាំកន្តែរ៉ែ,ថ្ងៃទី១៤មេសាមានល្ខោនបាសាក់ យក្ខីនី,ថ្ងៃទី១៥ល្ខោនបាសាក់ និងថ្ងៃទី១៦មេសាការសម្តែងក្បាច់គុណល្បុកតោផងដែរ។

ជាមួយគ្នានេះ រដ្ឋបាលរាជធានីភ្នំពេញបានចេញសេចក្តីណែនាំជាបន្តបន្ទាប់ ស្តីពីការរក្សាសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈក្នុងរាជធានីភ្នំពេញនាឱកាសបុណ្យចូលឆ្នាំថ្មីប្រពៃណីជាតិ ឆ្នាំម្សាញ់សប្តស័ក ព.ស២៥៦៩ គ.ស២០២៥ ក្នុងន័យលើកកំពស់សន្តិសុខ សណ្តាប់ធ្នាប់ក្នុងទី ក្រុងនិងបានអំពាវនាវដល់បងប្អូនប្រជាពលរដ្ឋយកចិត្តទុកដាក់ការពារគ្រោះអគ្គីភ័យ ចូលរួមគោរពច្បាប់ចរាចរណ៏ផ្លូវគោក ដើម្បីជៀសវាងគ្រោះថ្នាក់ផ្សេងៗ៕

អត្ថបទ៖ ស្រីរ័ត្ន

The post សង្ក្រាន្តវត្តភ្នំ ឆ្នាំ២០២៥ ចាប់ផ្តើមបើកហើយ ក្រោម​អធិបតីភាព អភិបាលរាជធានី appeared first on Kampuchea Thmey Daily.

លោកស្រី ដោ សម្ផស្ស នាយិការងរដ្ឋបាល និងជាអ្នកនាំពាក្យសាលារាជធានីភ្នំពេញ បានឱ្យដឹងនាថ្ងៃទី១២ នេះថា សង្រ្កាន្តវត្តភ្នំ នៅរមណីដ្ឋានវប្បធម៏ប្រវត្តិសាស្ត្រវត្តភ្នំ ដើម្បីអបអរសាទរទេវតាឆ្នាំថ្មី ព្រះនាម “គោរាគទេវី” ត្រូវបានរដ្ឋបាលរាជធានីភ្នំពេញ រៀបចំស្ទើតែរាល់១០០%ហើយ ពោលគឺ ការងារធំៗត្រូវបានក្រុមការងារអនុវត្តបញ្ចប់១០០% អ្វី ដែលនៅសេសសល់នោះ គឺការងារកែច្នៃតិចតូចប៉ុណ្ណោះ គ្មានអ្វីជាដុំកំភួនទេ។

សង្ក្រាន្តឆ្នាំថ្មីនេះ មានផ្ទាំងទស្សនីយភាពជាច្រើនប្លែកៗពីគ្នាដែលរួមបញ្ចូលដោយរចនាបថខ្មែរដ៏ស្រស់ស្អាតត្រូវបានរៀបចំរួចរាល់ សម្រាប់ទទួលទេវតាឆ្នាំថ្មី ឆ្នាំម្សាញ់ ដែលនឹងឈានចូលមកដល់នារយៈពេលប៉ុន្មានថ្ងៃខាងមុខនេះ។

សង្ក្រាន្តវត្តភ្នំ ឆ្នាំ២០២៥ ឆ្នាំម្សាញ់ ព.ស ២៥៦៩ រដ្ឋបាលរាជធានីភ្នំពេញ នឹងរៀបចំកម្មវិធីឱ្យបានអធឹកអធមនៅរមណីយដ្ឋានប្រវត្កិសាស្ត្រវត្តភ្នំ ចំនួន៣ថ្ងៃ ត្រូវនឹងថ្ងៃទី១៤, ១៥ និងថ្ងៃទី១៦ ខែមេសា ឆ្នាំ២០២៥ បន្ថែមពីនេះ សម្រាប់ផ្លូវថ្មើរជើង ឬ Walk Street វិញ ក៏បានរៀបចំ មុនថ្ងៃចូលឆ្នាំ២ថ្ងៃ ហើយថែម៣ថ្ងៃក្នុងថ្ងៃចូលឆ្នាំ ឡើងដល់៥ថ្ងៃ សម្រាប់បម្រើជូនប្រជាពលរដ្ឋ និងទេសចរជាតិ-អន្តរជាតិ កម្សាន្តសប្បាយ៕

អត្ថបទ៖ ស្រីរ័ត្ន

The post នៅពេលនេះ សង្ក្រាន្តវត្តភ្នំ ត្រូវបានរៀបចំរួចរាល់ដើម្បីទទួលទេវតាឆ្នាំថ្មី appeared first on Kampuchea Thmey Daily.

បើតាមមន្ទីរវប្បធម៌ និងវិចិត្រសិល្បៈរាជធានីភ្នំពេញ បានផុសលើទំព័រហ្វេសប៊ុក នៅរសៀលថ្ងៃទី១០ ខែមេសា ឆ្នាំ២០២៥ ពីសកម្មភាពអ្នកសិល្បៈខ្មែរកំពុងហាត់សមសម្តែងល្ខោនយីកេ រឿង “ពុទ្ធិសែន នាងកង្រី” ដើម្បីត្រៀមសម្តែងក្នុងព្រឹត្តិការណ៍សង្ក្រាន្តវត្តភ្នំ។ ប្រភពដដែល សរសេរថា៖ “មន្ទីរវប្បធម៌ និងវិចិត្រសិល្បៈរាជធានីភ្នំពេញ និងលើកយកទស្សនីយភាពសិល្បៈល្ខោនយីកេរឿង < ពុទ្ធិសែន នាងកង្រី > មកសម្ដែងជូនភ្ញៀវជាតិ និងអន្តរជាតិ ទស្សនាក្នុងព្រឹត្តិការណ៍ * សង្ក្រាន្តវត្តភ្នំ * នាឱកាសបុណ្យចូលឆ្នាំប្រពៃណីជាតិខ្មែរ នាពេលខាងមុខនេះ សូមចូលរួមទស្សនាអោយបានច្រើនកុះករទាំងអស់គ្នា”។

សង្ក្រាន្តវត្តភ្នំ នឹងធ្វើឡើងរយៈពេល៣ថ្ងៃ ចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៥ នៅបរិវេណរមណីយដ្ឋានវត្តភ្នំ។ កម្មវិធីនេះ នឹងមានរៀបចំនូវកម្មវិធីវប្បធម៌ខ្មែរជាច្រើន ដើម្បីបង្ហាញឱ្យសាធារណជនបានឃើញ និងជាការអភិរក្ស លើកស្ទួយនូវសម្បត្តិវប្បធម៌ខ្មែរ។

បន្ថែមពីនេះ រដ្ឋបាលរាជធានីភ្នំពេញ ក៏បានប្រកាសកាលពីដើមខែមេសាថា រដ្ឋបាលរាជធានីភ្នំពេញ នឹងបើកដំណើរកាលផ្លូវថ្មើរជើង (Walk Street) រយៈពេល ៥ថ្ងៃ ចាប់ពីថ្ងៃទី១២ ដល់ថ្ងៃទី១៦ ខែមេសា ឆ្នាំ២០២៥ ចាប់ពីមុខព្រះបរមរាជវាំង រហូតដល់រមណីយដ្ឋានវត្តភ្នំតែម្តង ដើម្បីឱ្យប្រជាពលរដ្ឋទទួលបានភាពសប្បាយរីករាយក្នុងឱកាសបុណ្យចូលឆ្នាំខ្មែរ៕

The post ល្ខោនយីកេរឿង “ពុទ្ធិសែន នាងកង្រី” នឹងយកទៅសម្តែងក្នុងព្រឹត្តិការណ៍ សង្ក្រាន្តវត្តភ្នំ appeared first on Kampuchea Thmey Daily.

ជាក់ស្ដែង​សង្កេតឃើញ​ក្រុម​មន្ត្រី​ជំនាញ កំពុង​យកចិត្តទុកដាក់​ក្នុង​ការ​រៀបចំ​ទាំង​បរិវេណ​ខាងក្នុង និង​ខាងក្រៅ​ជុំវិញ​តំបន់​វត្តភ្នំ ដោយ​តុបតែង​លម្អ​តាម​បែប​ប្រពៃណី​របស់​ខ្មែរ​ជាច្រើន ដើម្បី​បង្ហាញ​ពី​អរិយធម៌ និង​វប្បធម៌​របស់​ប្រទេសជាតិ។

ប្រជាពលរដ្ឋ សម្តែង​ក្តីសប្បាយ​រីករាយ ខណៈ​សង្ក្រាន្ត​កាន់តែ​កៀក​ខិតចូល​មកដល់ អារម្មណ៍​របស់​ពួកគាត់​រំភើប និង​រំពៃ​ខ្ពស់​ថា នឹង​ចូលរួម​លេង​កម្សាន្ត​សប្បាយ​ជាមួយ​កម្មវិធី​សប្បាយ​ភាព​ផ្សេងៗ ពិសេស​ការ​លេង​ល្បែង​ប្រពៃណី​របស់​ខ្មែរ ដែល​នឹង​រៀបចំ​ឡើង​យ៉ាង​អធិកអធម នៅ​ថ្ងៃ​រៀបចំ​សង្ក្រាន្ត។ ប្រជាពលរដ្ឋ​ជាច្រើន បាន​នាំគ្នា​មកលេង​កម្សាន្ត និង​ថតរូប​អនុស្សាវរីយ៍ ទីតាំង​ប្រវត្តិសាស្ត្រ​វត្តភ្នំ ដែល​ជា​ទីកន្លែង​រៀបចំ​សង្ក្រាន្ត។

ភ្ញៀវ​អន្តរជាតិ ដែល​បាន​អញ្ជើញ​មកលេង​កម្សាន្ត​កម្ពុជា​លើកដំបូង បាន​បង្ហាញ​ការ​ភ្ញាក់ផ្អើល​ចំពោះ​ការ​រៀបចំ ព្រោះ​ពួកគាត់​ពុំ​ធ្លាប់​ឃើញ​ពី​ការ​រៀបចំ​បែបនេះ​កន្លងមក​នោះ​ឡើយ។ ពួកគាត់​សរសើរ​ការ​រៀបចំ​ថា ប្លែក​ភ្នែក និង​មាន​ភាព​ទាក់ទាញ។

សូម​បញ្ជាក់​ថា សង្ក្រាន្ត​វត្តភ្នំ ឆ្នាំនេះ នឹង​រៀបចំ​ឡើង​នៅ​ថ្ងៃទី ១៤ , ១៥ និង ១៦ ខែ​មេសា ឆ្នាំ ២០២៥ ខាងមុខ។ ក្នុង​កម្មវិធី​ដដែល​នោះ អាជ្ញាធរ នឹង​ត​ភ្ជាប់​កម្មវិធី​ទៅ​ជាមួយ​ផ្លូវ​ថ្មើរជើង Walk street ផង​ដែរ ពោល​នៅ​លើ​តីរវិថី​ព្រះស៊ីសុវត្ថិ គិត​ពី​មហាវិថី​បក្សី​ចាំ​ក្រុង ដល់​មុខ​ព្រះបរមរាជវាំង នឹង​ត្រូវ​បិទ​ចរាចរណ៍​ធ្វើដំណើរ​ទាំងស្រុង ដើម្បី​ទុក​លទ្ធភាព​ឱ្យ​ប្រជាពលរដ្ឋ និង​បណ្តា​ភ្ញៀវ​ជាតិ-អន្តរជាតិ អាច​ដើរ​លេង​កម្សាន្ត​សប្បាយ​ដោយ​សេរី៕

អត្ថបទ ៖ សុភា

The post សង្ក្រាន្តវត្តភ្នំ កៀកថ្ងៃមកដល់ ការរៀបចំតុបតែងលម្អកាន់តែជិតរួចរាល់ appeared first on Kampuchea Thmey Daily.

តាម​សេចក្តីជូន​ដំណឹងស្តីពី​ការ​រៀបចំសណ្តាប់ធ្នាប់ និង​របៀបរៀបរយសាធារណៈ​ជុំវិញ​រមណីយដ្ឋាន វប្បធម៌​ប្រវត្តិសាស្ត្រវត្តភ្នំ ក្នុង​ឱកាសរៀបចំសង្ក្រាន្តវត្តភ្នំ”បាន​ឱ្យ​ដឹង​ថា រដ្ឋបាល​រាជធានីភ្នំពេញ សូម​ជម្រាប​ជូន​ដំណឹង​ដល់​បង​ប្អូន​ប្រជាពលរដ្ឋ​ទាំង​អស់​ឱ្យ​បាន​ជ្រាប​ថា ដើម្បី ចូល​រួម​អបអរសាទរ ក្នុង​ឱកាស​ពិធីបុណ្យ​ចូលឆ្នាំថ្មីប្រពៃណីជាតិ ឆ្នាំម្សាញ់ សប្ដស័ក ព.ស.២៥៦៩ រដ្ឋបាល រាជធានី​ភ្នំពេញនឹងរៀបចំ “សង្ក្រាន្តវត្តភ្នំ” នៅ​រមណីយដ្ឋាន​វប្បធម៌​ប្រវត្តិសាស្ត្រវត្តភ្នំ រយៈពេល ០៣ថ្ងៃ ចាប់ពី ថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៥ ដោយមានរៀបចំកម្មវិធីបែបប្រពៃណីជាតិ និង​កម្សាន្ត​សប្បាយ ជា​ច្រើន​ដូច​ជា កម្មវិធី​ទទួល​ទេវតាឆ្នាំថ្មី ដង្ហែព្រះពុទ្ធរូប ពូនភ្នំខ្សាច់ ស្រង់ព្រះ សម្តែងសិល្បៈ របាំប្រពៃណី របាំបុរាណ ល្បែងប្រជាប្រិយជាតិ (ទាញព្រ័ត្រ បោះអង្គញ់ វាយក្អម ចោលឈូង លាក់កន្សែង ចាប់កូនខ្លែង និងដណ្តើមស្លឹកឈើ) ប្រគំតន្ត្រីបុរាណ-សម័យ រាំលេងកម្សាន្ត តាំងបង្ហាញគំនូរបុរាណ និងវត្ថុសិល្បៈវប្បធម៌។

ដើម្បី​ឱ្យ​ការ​រៀបចំ​កម្មវិធី​អបអរសាទរ​ក្នុង​ឱកាស​ពិធីបុណ្យ​ចូលឆ្នាំថ្មីប្រពៃណីជាតិ ប្រព្រឹត្តទៅដោយរលូន រក្សាបាននូវសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ ព្រម​ទាំង​បញ្ចៀស​បាន​នូវ​ការ កកស្ទះ​ចរាចរ អាជ្ញាធរ​មាន​សមត្ថកិច្ចនឹងរៀបចំ​ចំណត​យានយន្ត​សម្រាប់​អ្នក​ចូល​រួម​កម្មវិធី​សង្រ្កាន្តវត្តភ្នំ ចាប់ពី ថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៥។ ដោយឡែកចំពោះបងប្អូនប្រជាពលរដ្ឋដែលពុំមានការចាំបាច់ ពុំ​គួរ​ធ្វើ​ដំណើរ​ឆ្លងកាត់បរិវេណ​ទី​តាំង​ប្រារព្ធ​ពិធី​ឡើយ ព្រោះ​អាច​មាន​ចរាចរណ៍​មមាញឹក​ខ្លាំង​ដោយ​សារ មធ្យោយបាយ​ធ្វើ​ដំណើរ​របស់​អ្នក​មក​ចូលរួម​កម្មវិធី អាស្រ័យ​ហេតុនេះ​សូម​បងប្អូនប្រជាពលរដ្ឋ មេត្តា​យោគយល់ អធ្យាស្រ័យ និង​បញ្ចៀស​ការ​ធ្វើ​ដំណើរ​ឆ្លង​កាត់​ទីតាំង​ប្រារព្ធ​ពិធី៕

ដោយ ៖ ស្រីរ័ត្ន

The post សមត្ថកិច្ច​នឹង​រៀប​ចំ​ចំណតយានយន្ត​សម្រាប់​អ្នក​មក​ចូលរួមសង្រ្កាន្តវត្តភ្នំ ពីថ្ងៃទី១៤ ដល់ថ្ងៃទី១៦ខែមេសា appeared first on Kampuchea Thmey Daily.