តាមការផ្សាយរបស់ Khaosod នៅថ្ងៃព្រហស្បតិ៍ទី៩ខែតុលាឆ្នាំ២០២៥, តំបន់ជាច្រើននៃខេត្តនេះ ត្រូវទឹកជន់លិចធ្ងន់ធ្ងរ ដល់ថ្នាក់លិចទាំងជម្រកធម្មជាតិ Bueng Boraphet ថែមទៀតផង ខណៈពលរដ្ឋកំពុងភ័យខ្លួន។

ដូច្នេះហើយ លោក Wachirawut Kwangkwang មន្ត្រីជាន់ខ្ពស់នៅការិយាល័យជលផលខេត្ត បានចេញការព្រមានមួយទាក់ទងនឹង «ការឃ្លាំមើលសត្វក្រពើ» ដោយអះអាងថា ពលរដ្ឋត្រូវប្រយ័ត្នខ្លួនឲ្យមែនទែន ហើយបើឃើញមានសត្វក្រពើនៅកន្លែងណាមួយ ត្រូវជូនដំណឹងដល់អាជ្ញាធរភ្លាម។

ប្រទេសថៃកំពុងជួបប្រទះគ្រោះទឹកជំនន់ដ៏អាក្រក់ ខណៈបើយោងតាមរបាយការណ៍ចុងក្រោយបំផុត ​គិតត្រឹមព្រឹកថ្ងៃអង្គារទី៧ខែតុលាឆ្នាំ២០២៥ តួលេខមនុស្សស្លាប់ បានកើនដល់២២នាក់ហើយ។ 

តាមរយៈរបាយការណ៍ពីនាយកដ្ឋានបង្ការនិងកាត់បន្ថយគ្រោះមហន្តរាយថៃ និងត្រូវបានផ្សាយបន្តដោយសារព័ត៌មាន Bangkok Post, ខេត្ត-ក្រុងចំនួន១៩គឺត្រូវវាយប្រហារខ្លាំងបំផុត ​ហើយក្នុងនោះមាន២ខេត្តគឺ Uttaradit និង Ayutthaya បូករួមជាមួយទីក្រុងបាងកក ដែលត្រូវរងទុក្ខធ្ងន់ធ្ងរជាងគេ។

យ៉ាងណាក្តី មានការព្យាករថា ជនរងគ្រោះអាចកើនឡើងជាបន្តទៀត ព្រោះថៃ មិនទាន់អស់ព្យុះបោកបក់លើទេ ជាពិសេសបច្ចុប្បន្ន ព្យុះដែលកំពុងគំរាមកំហែងប្រទេសនេះគឺព្យុះ ម៉ាតម៉ូ៕

អត្ថបទ៖ សុខ សុវណ្ណ

ចុចអាន៖ ​ប្រទះឃើញ​សត្វ​ក្រពើ​មួយក្បាលនៅ​ក្នុង​ស្រះ​មុខ​ផ្ទះប្រជាពលរដ្ឋ

The post ទឹកជំនន់នៅថៃ លិចជម្រកសត្វក្រពើ បណ្តាលឲ្យរួច, ពលរដ្ឋកំពុងភ័យខ្លួន appeared first on Kampuchea Thmey Daily.

យោង​តាម​​​របាយការណ៍​ពី​​អង្គការ CrocAttack ក្នុងឆ្នាំ២០២៤ ឥណ្ឌូណេស៊ីបានរាយការណ៍ពីការវាយប្រហាររបស់សត្វក្រពើចំនួន ១៧៩​ដង ដោយក្នុងនោះ​មនុស្ស ៩២​នាក់បានស្លាប់។ អ្នកជំនាញចាត់ទុកថា និន្នាការគួរឲ្យព្រួយបារម្ភនេះ បណ្ដាល​មក​ពី​ការបំផ្លាញទីជម្រក​ ជាពិសេសដោយសារតែការពង្រីកចម្ការដូងប្រេង ដែលរំលោភលើទឹកដីក្រពើ ជា​ដើម​​ហេតុ​បង្កើន​ហានិភ័យ​នៃ​​ការ​ប្រឈម​មុខ​​គ្នា​ដោយ​ផ្ទាល់​​រវាង​មនុស្ស​និង​សត្វ​​ក្រពើ។

ត្រូវ​បាន​អភិរក្ស​ចាប់​តាំង​​ពី​ឆ្នាំ​១៩៩៩​មក ក្រពើទឹកប្រៃ (Crocodylus Porosus) កំពុង​បង្កើន​វត្តមាន​ខ្លាំង​​នៅក្នុងប្រទេសឥណ្ឌូណេស៊ី។ ក្រពើ​ទឹក​ប្រៃ គឺ​ជា​ពូជ​ក្រពើ ដែល​​កាចសាហាវ​ជាង​ពូជ​ក្រពើ​ផ្សេងៗ ហើយការវាយប្រហារភាគច្រើន​គឺ​បង្ក​ឡើង​ដោយ​​ក្រពើ​ទឹក​ប្រៃ​នេះ​ឯង។ ការកើនឡើងនៃឧប្បត្តិហេតុ បានជំរុញឲ្យ​មានការជជែក​ដេញ​ដោល​រវាង​កិច្ចខិតខំប្រឹងប្រែងអភិរក្ស​និង​សុវត្ថិភាពមនុស្ស រួមទាំងការផ្លាស់ប្តូរទីតាំង​អភិរក្ស និងវិធានការគ្រប់គ្រងចំនួន​​ក្រពើ​ទឹក​​ប្រៃ។

នៅទូទាំងពិភពលោក ការវាយប្រហារដោយសត្វក្រពើគឺជាក្តីកង្វល់ដ៏សំខាន់មួយ ដោយមានការប៉ាន់ប្រមាណថា មនុស្សប្រហែល ១ ០០០​នាក់បានស្លាប់ជារៀងរាល់ឆ្នាំ ដែលលើសពីចំនួនអ្នកស្លាប់ដោយសារការវាយប្រហារដោយត្រីឆ្លាម៕

ដោយ៖ ឈាង

The post ឥណ្ឌូណេស៊ី មាន​ករណី​វាយ​ប្រហារ​ដោយ​សត្វ​ក្រពើ​ច្រើន​ជាង​គេ​បំផុត​នៅ​លើ​ពិភពលោក appeared first on Kampuchea Thmey Daily.

ហេតុការណ៍នេះ​បាន​កើតឡើង កាល​ពី​វេលា​ម៉ោង ៩ ព្រឹក ថ្ងៃទី ១៣ ខែមីនា ឆ្នាំ២០២៥ នៅត្រង់ចំណុចខាងកើត វត្តតាមិម ស្ថិតក្នុងភូមិវត្តតាមិម ឃុំអូរដំបង១ ស្រុកសង្កែ ខេត្តបាត់ដំបង។

បើ​តាម​ការ​រៀបរាប់ ពី​អ្នក​ដែល​ជួបហេតុការណ៍ គឺ​លោក កើត ប៊ុនឈើន បានឱ្យដឹងថា ស្រះ​ទឹក​របស់​លោក​ដែល​ស្ថិតនៅខាងមុខផ្ទះ គឺមានទំហំ ៨ x ១០ ម៉ែត្រ ដែល​ច្រៀង​រាល់​ឆ្នាំ ទឹក​នៅ​ក្នុង​ស្រះ​នេះ​ពុំ​ដែលរីងហួតហែងនោះឡើយ។

លោក​បាន​បន្ត​ថា ជា​ចៃដន្យ​នៅ​ឆ្នាំ​នេះ​ ទឹកនៅ​ក្នុងស្រះ​ខ្លះរបស់លោក គឺ​មាន​សភាពស្រកហួតហែង ដោយ​មាន​ជម្រៅ​ត្រឹមក្បាលជង្គង់ប៉ុណ្ណោះ ហើយ​ចៃដន្យ​នៅព្រឹកនេះដែរ លោកក៏​បាន​ប្រើ​ម៉ូទ័រ​ដើម្បីដាក់បូមទឹក​យក​ទៅ​ស្រោច​ផល​ដំណាំ​នៅ​ក្នុង​ចំការ ហើយ​ក៏​មិន​បាន​ចាប់​អារម្មណ៍​អ្វី​ទាំងអស់ ប៉ុន្តែ​នៅ​ពេល​នោះ​ដែរ​ សំឡេងឆ្កែរបស់លោកបាន​ព្រុស​សន្ធាប់​យ៉ាង​ខ្លាំង ដោយ​មាន​ការងឿង​ឆ្ងល់ ​លោក​ក៏​បានទៅពិនិត្យមើលនៅក្នុងស្រះទឹក ទើប​មាន​ការ​ភ្ញាក់ផ្អើល​ដោយសារតែប្រទះឃើញសត្វក្រពើមួយក្បាល ធំជាងភ្លៅទៅទៀត បើ​គិត​ជាទម្ងន់ប្រមាណជាង ២០ គីឡូក្រាម ទើបមានការភ្ញាក់ផ្អើលហើយលោកក៏បានស្រែកហៅអ្នកភូមិ ឱ្យមកជួយចាប់សត្វក្រពើនេះ។

នៅក្នុងហេតុការណ៍នេះដែរ លោក កើតប៊ុនឈើន បានសន្និដ្ឋានថា សត្វ​ក្រពើ​ដែល​ចូល​មក​រស់នៅក្នុងស្រះខាងមុខផ្ទះ​នេះ គឺ​ប្រហែល​ជា​អាច​មក​រស់​នៅតាំងពីអំឡុងចុងឆ្នាំ ២០២៣ ដោយសារនៅពេលនោះ គឺ​មាន​ទឹក​ជំនន់​ធំ​ហើយ​ទឹក​បែក​វាល ដូច្នេះ​សត្វក្រពើ​អាច​មក​តាម​ទឹក​ហើយ​រស់​នៅ​ក្នុងស្រះនេះរហូតមកទល់បច្ចុប្បន្ន។

លោក​ក៏​បាន​អំពាវនាវ​ផង​ដែរ​សម្រាប់អ្នកដែលមានស្រះទឹកគួរបង្កើននូវការប្រុងប្រយ័ត្ន ព្រោះ​ក្រែង​មាន​សត្វក្រពើមករស់នៅដូចស្រះរបស់លោក នេះ​ជា​សំណាងល្អ ដែលកូនចៅរបស់លោកមិនបានចុះលេងក្នុងខ្លះទឹកនោះ៕

អត្ថបទ ៖ សោ និយមរ័ត្ន

The post ​ប្រទះឃើញ​សត្វ​ក្រពើ​មួយក្បាលនៅ​ក្នុង​ស្រះ​មុខ​ផ្ទះប្រជាពលរដ្ឋ appeared first on Kampuchea Thmey Daily.

តាមការបញ្ជាក់ពីលោក ឡុង យោធាវីរៈ អធិការនគរបាលស្រុកឯកភ្នំបានឲ្យដឹងថា ខ្មោចក្រពើទាំងនេះត្រូវបានប្រជាពលរដ្ឋប្រទះឃើញអណ្ដែតនៅក្នុងទឹកស្ទឹងសង្កែប្រហែលម៉ោង ៨និង៣០នាទី ព្រឹកថ្ងៃទី២០ ខែមករា ឆ្នាំ២០២៥ ប្រមាណ ៤ក្បាលប៉ុណ្ណោះ ស្ថិតនៅចំណុចភូមិខ្វិត ឃុំព្រែកខ្ពប ស្រុកឯកភ្នំ ខេត្តបាត់ដំបង។

លោកអធិការបានបន្តថា បន្ទាប់ពីបានធ្វើការស្រាវជ្រាវទើបដឹងថា ខ្មោចក្រពើទាំងនេះពុំមែនរស់នៅក្នុងស្ទឹងសង្កែតាមធម្មជាតិនោះឡើយ គឺត្រូវបានជនមិនស្គាល់មុខដឹកតាមរទេះយកមកទម្លាក់ចោលក្នុងស្ទឹង ហើយលោកក៏ទទួលបានបទបញ្ជាក្នុងការធ្វើការស្រាវជ្រាវរកមុខសញ្ញាទាំងនោះដើម្បីមកអនុវត្តតាមផ្លូវច្បាប់ ព្រោះនៅតំបន់ខាងលើផ្សារប្រហុកមានទីតាំងចិញ្ចឹមក្រពើជាច្រើនកន្លែង ដោយមិនទាន់ដឹងថា តើទីតាំងណាមួយដែលប្រព្រឹត្តទង្វើបែបនេះ។

នៅល្ងាចថ្ងៃដដែលនោះដែរលោក ជួង សុភា នាយខណ្ឌរដ្ឋបាលជលផលបានដាក់កម្លាំងឲ្យទៅកាប់រណ្ដៅ នៅមាត់ស្ទឹងសង្កែខាងមុខវត្ត ក្តាំងងា ស្ថិតក្នុងភូមិខ្វិត ឃុំព្រែកពក ដើម្បីកប់ខ្មោចក្រពើទាំងនេះ ដោយនៅពេលនោះដែរកម្លាំងជំនាញបានរកឃើញខ្មោចក្រពើមានរហូតដល់ ៩ក្បាល ហើយមានសភាពហើមស្អុយទៅហើយ ដែលក្រពើទាំងនេះមានប្រវែងចាប់ពី ១,៥០ ដល់ ១,៧០ ម៉ែត្រ និងមិនអាចកំណត់ញីឬឈ្មោលបាននោះឡើយ។

នាយខណ្ឌរដ្ឋបាលជលផលបានបន្ថែមថា បើតាមការសាកសួរប្រជាពលរដ្ឋដែលរស់នៅជិតខាងត្រង់ចំណុចកើតហេតុខាងលើ គឺបានឲ្យដឹងថា កាលពីវេលាម៉ោង ៧ទៅម៉ោង៨យប់ ថ្ងៃទី១៧ ខែមករា មានជនមិនស្គាល់មុខមួយក្រុមបានដឹកក្រពើទាំងនេះតាមរទេះយកមកទម្លាក់ចោលក្នុងស្ទឹង ដែលមានចន្លោះពី១៨ ទៅ២០ក្បាល ប៉ុន្តែក្រពើមួយចំនួនបានអណ្ដែតទៅបែកខាងក្រោមអស់ទៅហើយ នៅសល់មួយចំនួនទៀតទើបតែហើមអណ្ដែតទឹកនៅថ្ងៃម្សិលមិញនេះ ក៏បានបង្កឲ្យមានការភ្ញាក់ផ្អើលតែម្ដង។ 

លោកក៏បានអំពាវនាវឲ្យអាជ្ញាធរមូលដ្ឋានធ្វើយ៉ាងណាត្រូវណែនាំដល់ម្ចាស់កសិដ្ឋាន គឺត្រូវចេះកប់ចោល ឬដុតដោយមិនត្រូវយកមកបោះចោលពាសវាលពាសកាលតាមទីសាធារណៈ ឬក្នុងទឹកស្ទឹងសង្កែបែបនេះឡើយ ដែលបង្កឲ្យមានការភ័យខ្លាចដល់សំណាក់ប្រជាពលរដ្ឋ។

កាលពីថ្ងៃទី២០មករា លោក សុខ លូ អភិបាលនៃគណៈអភិបាលខេត្តបាត់ដំបង ក៏បានចេញបទបញ្ជាឲ្យសមត្ថកិច្ចជំនាញធ្វើយ៉ាងណាស្រាវជ្រាវរកមុខសញ្ញាទាំងនោះយកមកធ្វើការអប់រំ និងពិន័យទៅតាមផ្លូវច្បាប់ដើម្បីជាគំរូទៅដល់ជនដទៃទៀត មិនឱ្យអនុវត្តបែបនេះមានជាលើកទីពីរទៀតនោះឡើយ៕

អត្ថបទ៖ សោ និយមរ័ត្ន

The post សមត្ថកិច្ចកំពុងស្រាវជ្រាវរកអ្នកដឹកសត្វក្រពើងាប់ជិត២០ក្បាលទៅបោះ​ចោល​ក្នុងស្ទឹងសង្កែ appeared first on Kampuchea Thmey Daily.

នៅវេលាម៉ោងប្រមាណជា៨ព្រឹក ថ្ងៃទី២០ ខែមករា ឆ្នាំ២០២៥នេះ មានការភ្ញាក់ផ្អើលយ៉ាងខ្លាំង ពីសំណាក់ប្រជាពលរដ្ឋក៏ដូចជាសមត្ថកិច្ច និងអាជ្ញាធរមូលដ្ឋានដោយសារតែគេប្រទះឃើញមានសត្វក្រពើងាប់អណ្ដែតទឹកចំនួន៤ក្បាល នៅត្រើយខាងកើតស្ទឹង ស្ថិតក្នុងភូមិខ្វិត ឃុំព្រែកខ្ពប ស្រុកឯកភ្នំ ខេត្តបាត់ដំបង។

បើតាមការបញ្ជាក់ពីលោក ណាប់ ស៊ីថា មេបញ្ជាការមូលដ្ឋានកងរាជអាវុធហត្ថស្រុកឯកភ្នំ បានអោយដឹងថា ព័ត៌មាននេះ គឺលោកទទួលបានប្រហែលម៉ោង ៨និង៣០នាទីព្រឹកមិញ ប៉ុន្តែតាមភិនភាគរបស់សត្វក្រពើ គឺពុំមែនជាក្រពើដែលមានរស់នៅក្នុងទឹកស្ទឹងសង្កែនោះទេ គឺក្រពើនេះអាចងាប់ស្រាប់ហើយត្រូវបានគេយកមកបោះចោលក្នុងទឹកស្ទឹង ដែលឥឡូវនេះសមត្ថកិច្ចកំពុងពិនិត្យ និងអាចសុំគោលការណ៍ដើម្បីយកទៅកប់ចោល ហើយនៅប៉ែកខាងលើស្ទឹងគឺម្ដុំផ្សារប្រហុកក៏មានទីតាំងចិញ្ចឹមក្រពើជាច្រើនកន្លែងផងដែរ។

ដោយឡែកលោក មុិល សុផល អភិបាលស្រុកឯកភ្នំ បានបញ្ជាក់យ៉ាងខ្លីថា លោកទើបបានទទួលសេចក្តីរាយការណ៍ពីសមត្ថកិច្ចដោយសារថ្ងៃនេះ លោកមានធុរៈ និងបានច្បាប់ដោយមិនបានធ្វើការនោះឡើយ។ ប៉ុន្តែសម្រាប់លោក ឡុង យោធាវីរៈ អធិការនគរបាលស្រុកឯកភ្នំ បានបញ្ជាក់ថា ការងារនេះ គឺលោកទទួលបានព័ត៌មានមកថា គឺមានរទេះមួយបានដឹកសត្វក្រពើងាប់ទាំងនេះ យកមកចាក់ចោលក្នុងស្ទឹងសង្កែ ដែលពេលនេះលោកកំពុងចាត់កម្លាំងឲ្យចុះស្រាវជ្រាវរកអ្នកដែលដឹកខ្មោចក្រពើនេះឲ្យឃើញ៕

អត្ថបទ៖ សោ និយមរ័ត្ន

The post ពលរដ្ឋភ្ញាក់ផ្អើលពេលឃើញសត្វក្រពើងាប់ច្រើនក្បាលអណ្ដែតក្នុងស្ទឹងសង្កែ appeared first on Kampuchea Thmey Daily.

តាមសេចក្តីរាយការណ៍របស់ Bangkok Post, ការរកឃើញហ្វូស៊ីល Varanosuchus sakonnakhonensis បានជំរុញឲ្យមានការសន្និដ្ឋានថា ដាននៃសត្វសម័យបុរេប្រវត្តិផ្សេងទៀត ក៏អាចលាក់ពួន នៅក្នុងតំបន់តែមួយនៃភាគឦសានប្រទេសថៃ ដែរ។

តាមពិតទៅ ហ្វូស៊ីលនេះ ត្រូវបានក្រុមអ្នកជំនាញមកពីក្លឹបអរិយធ៌ម Sakon Nakhon រកឃើញតាំងតែពីឆ្នាំ២០១៨មកម្ល៉េះ ប៉ុន្តែអាជ្ញាធរទើបតែបញ្ជាក់ច្បាស់កាលពីថ្ងៃព្រហស្បតិ៍ទី១៨ខែមករាឆ្នាំ២០២៤ប៉ុណ្ណោះ។

ក្រោយការរកឃើញ, ហ្វូស៊ីលនេះ ត្រូវបានបញ្ជូនទៅឲ្យក្រុមអ្នកជំនាញពិនិត្យ នៅឯសារមន្ទីរ Sirindhorn និងសកលវិទ្យាល័យ Mahasarakham រួចមកក៏ឆ្លងកាត់ការស្កេន CT ដោយមានជំនួយពីសកលវិទ្យាល័យ Claude Bernard University Lyon 1 ក្នុងប្រទេសបារាំង។

មន្ត្រីថៃបញ្ជាក់ថា ហ្វូស៊ីលនេះ នឹងត្រូវរក្សាទុកនៅសារមន្ទីរ Phu Phan ត្រៀមដាក់បញ្ជូនជូនសាធារណជនដើម្បីទស្សនាក្នុងពេលឆាប់ៗ៕

អត្ថបទ៖ សុខ សុវណ្ណ

ចុចអាន៖ ក្រពើ ៧៥ក្បាល រួចចេញពីកសិដ្ឋាននៅចិន 

The post ថៃ បញ្ជាក់ពីការរកឃើញហ្វូស៊ីលសត្វក្រពើតឿ អាយុកាល១៣០លានឆ្នាំ appeared first on Kampuchea Thmey Daily.

ក្រពើចំនួន៧៥ក្បាល បានរួចចេញ នៅពេលទឹកបឹងក្នុងទីក្រុង Maoming នៃខេត្ត Guangdong ឡើងហូរហៀរ។

ទោះបីជាយ៉ាងណាក៏ដោយ ក្រពើចំនួន៨ក្បាលត្រូវបានចាប់មកវិញ ហើយពេលខ្លះ អាជ្ញាធរមូលដ្ឋានត្រូវបង្ខំចិត្តបាញ់ឬប្រើឧបករណ៍ឆក់ សម្រាប់ហេតុផលសុវត្ថិភាព។

ទន្ទឹមនោះ មិន​មាន​ជនរងគ្រោះ​ត្រូវ​បាន​រាយការណ៍​ទេ ប៉ុន្តែ​មន្ត្រី​​ទទួល​ស្គាល់​ថា សត្វក្រពើមួយ​ចំនួនកំពុងស្ថិត​ក្នុង​ទឹក​ជ្រៅ​នៅឡើយ ខណៈសេវាសង្គ្រោះបន្ទាន់ បាននិងកំពុងប្រើប្រាស់ឧបករណ៍ សូណា ដើម្បីស្វែងរក ហើយអ្នក​ភូមិ​នៅ​ក្បែរ​នោះ ត្រូវ​បាន​គេ​ប្រាប់​ឲ្យ​នៅ​ផ្ទះ កុំចេញទៅណាឲ្យសោះ ។

គួរបញ្ជាក់ជាថ្មី ព្យុះទីហ្វុង Haikui បានបោកបក់ពាសពេញតំបន់អាស៊ីខាងត្បូង អស់រយៈពេលជាងមួយសប្តាហ៍មកហើយ ដោយបានប៉ះពាល់ដល់ប្រទេសចិន ទីក្រុងហុងកុង កោះតៃវ៉ាន់ និងប្រទេសជប៉ុន ខណៈនៅភាគខាងត្បូងប្រទេសចិន មនុស្ស ៧ នាក់បានស្លាប់ និង ៣ នាក់ផ្សេងទៀតបាត់ខ្លួន បន្ទាប់ពីព្យុះនេះ បណ្តាលឲ្យមានការរអិលបាក់ដីនិងគ្រោះទឹកជំនន់ ៕

ប្រែសម្រួល៖ Vann Vann

ប្រភព៖ BBC

ចុចអាន៖ កសិករម្នាក់បាត់ខ្លួន ៤ ថ្ងៃ រកឃើញសពក្នុងពោះក្រពើជិត ៤ ម៉ែត្រ នៅម៉ាឡេស៊ី

The post ក្រពើ ៧៥ក្បាល រួចចេញពីកសិដ្ឋាននៅចិន  appeared first on Kampuchea Thmey Daily.

អ្នកតំណាងនៃនាយកដ្ឋានសត្វព្រៃ Sabah បានរកឃើញបំណែកសាកសពរបស់លោក Addi Bangsa វ័យ ៦០ ឆ្នាំ ក្នុងពោះក្រពើ បន្ទាប់ពីពួកគេបានបាញ់ រួចវះពោះរបស់វា ។ សត្វក្រពើឈ្មោលដ៏ធំខាងលើត្រូវគេបាញ់សម្លាប់វេលាម៉ោង ៣ ព្រឹក ថ្ងៃទី២២ ខែកក្កដា និងវះពោះចំពោះមុខគ្រួសារជនរងគ្រោះម៉ោង ១១ ព្រឹក ។

ប្រធានស្ថានីយ៍ពន្លត់អគ្គីភ័យ និងជួយសង្គ្រោះ Tawau លោក Jemishin Ujin បានបញ្ជាក់ឲ្យដឹងថា នៅពេលវះពោះក្រពើ សមាជិកគ្រួសាររបស់អ្នកស្លាប់សុទ្ធតែមានវត្តមាននៅទីនោះទាំងអស់ ។

ដោយឡែកមូលហេតុនៃការចាប់ក្រពើ និងរបៀបនៃការរកឃើញសាកសព នៅមិនទាន់បកស្រាយនៅឡើយទេ មកទល់ពេលនេះ ៕

ប្រែសម្រួល៖ វារី

ប្រភព៖ dailystar

ចុចអាន៖ មិនគួរឲ្យជឿ ក្រពើពាំសពក្មេងលង់ទឹក ទៅឲ្យមនុស្សវិញនៅ ឥណ្ឌូណេស៊ី

The post កសិករម្នាក់បាត់ខ្លួន ៤ ថ្ងៃ រកឃើញសពក្នុងពោះក្រពើជិត ៤ ម៉ែត្រ នៅម៉ាឡេស៊ី appeared first on Kampuchea Thmey Daily.