សត្វខ្លា Archives - Kampuchea Thmey Daily

ថៃ ផ្ទុះជំងឺអាថ៌កំបាំង ងាប់សត្វខ្លា ៧២ក្បាលជាបន្តបន្ទាប់ នៅពុំទាន់ដឹងមូលហេតុ

Sok Sovann — Mon, 23 Feb 2026 07:50:17 +0000

អស់រយៈពេល១សប្តាហ៍មកហើយ ដែលប្រទេសថៃ នៅមិនទាន់រកមូលហេតុឃើញជុំវិញករណីផ្ទុះជំងឺអាថ៌កំបាំងនៅខេត្ត ឈៀងម៉ៃ បណ្តាលឲ្យងាប់សត្វខ្លាចំនួន៧២ក្បាល។

(រូប៖ Bangkok Post)

តាមសេចក្តីរាយការណ៍របស់ Bangkok Post នៅថ្ងៃចន្ទទី២៣ខែកុម្ភៈ សត្វខ្លាទាំង៧២ក្បាលត្រូវប្រទះឃើញងាប់នៅតំបន់អភិរក្ស Tiger Kingdom។

ក្រុមពិនិត្យបានចុះទៅដល់តំបន់នោះ ដោយរកឃើញថា សត្វខ្លាដែលងាប់មិនមានការវះយកស្បែកឬធ្មេញឡើយ ទើបពួកគេសន្មត់ថា នេះមិនមែនជាករណីសម្លាប់សត្វនោះទេ។

(រូប៖ Bangkok Post)

យ៉ាងណា មានការសន្និដ្ឋានថា សត្វខ្លាប្រហែលជាងាប់ដោយសារមេរោគនៅជាប់នឹងចំណី ជាសាច់ឆៅ គ្រាន់តែគេមិនច្បាស់ថាតើមេរោគនោះជាប្រភេទអ្វី។

តាមទិន្នន័យ មានសត្វខ្លាចំនួន២៤៦ក្បាល នៅ Tiger Kingdom។ សត្វខ្លាងាប់ទាំង៧២ក្បាល គឺជាការងាប់ច្រើនបំផុតមិនធ្លាប់មានសោះក្នុងប្រវត្តិសាស្រ្តរបស់សួនអភិរក្សនេះ។

បច្ចុប្បន្ន មន្ត្រីជំនាញកំពុងបើកការស៊ើបអង្កេត ដើម្បីរកមូលហេតុពិតនៅពីក្រោយរឿងនេះ៕

អត្ថបទ៖ សុខ សុវណ្ណ

៦០ខេត្តនៅថៃ នឹងជួបព្យុះខែប្រាំង ដ៏ធ្ងន់ធ្ងរ ចាប់ពីដើមសប្តាហ៍នេះ

The post ថៃ ផ្ទុះជំងឺអាថ៌កំបាំង ងាប់សត្វខ្លា ៧២ក្បាលជាបន្តបន្ទាប់ នៅពុំទាន់ដឹងមូលហេតុ appeared first on Kampuchea Thmey Daily.

ការស្តារជីវៈចម្រុះ និងប្រព័ន្ធអេកូឡូស៊ីប្រកបដោយនិរន្តរភាព ចាំបាច់តម្រូវឱ្យមានវត្តមានមំសាសី ជាពិសេសសត្វខ្លាធំ

Din Thary — Tue, 30 Jul 2024 02:26:24 +0000

ការស្តារជីវៈចម្រុះ និងប្រព័ន្ធអេកូឡូស៊ីប្រកបដោយនិរន្តរភាព ចាំបាច់តម្រូវឱ្យមានវត្តមានមំសាសី ជាពិសេសសត្វខ្លាធំ ឬសត្វខ្លាដំបង ក្នុងតំបន់ការពារធម្មជាតិ ដែលពពួកសត្វទាំងនេះមានសារៈសំខាន់ និងចាំបាច់ដើម្បីថែរក្សាការពារសុខមាលភាពជីវៈចម្រុះ និងលំនឹងប្រព័ន្ធអេកូឡូស៊ីក្នុងទីជម្រកធម្មជាតិ។ នេះគឺជាការគូសបញ្ជាក់របស់លោក ជា សំអាង រដ្ឋលេខាធិការក្រសួងបរិស្ថាន ក្នុងពិធីប្រារព្ធទិវាសត្វខ្លាធំអន្តរជាតិ ជាមួយស្ថានទូតឥណ្ឌាប្រចាំកម្ពុជា និងអង្គការសម្ព័ន្ធមិត្តសត្វព្រៃ។

លោក ជា សំអាង មានប្រសាសន៍ថា ការស្តារជីវៈចម្រុះ និងប្រព័ន្ធអេកូឡូស៊ីប្រកបដោយនិរន្តរភាព ចាំបាច់តម្រូវឱ្យមានវត្តមានមំសាសី ជាពិសេស សត្វខ្លាធំ ឬសត្វខ្លាដំបង ក្នុងតំបន់ការពារធម្មជាតិ ព្រោះសត្វខ្លាធំ គឺជាអត្តសញ្ញាណរបស់ទ្វីបអាស៊ី ដែលមានវត្តមានតែក្នុងប្រទេសចំនួន ១៤ ប៉ុណ្ណោះរួមមាន៖ រុស្ស៊ី កាហ្សាក់ស្ថាន ចិន ឥណ្ឌា ប៊ូតាន នេប៉ាល់ បង់ក្លាដែស មីយ៉ាន់ម៉ា ថៃ ឡាវឥណ្ឌូនេស៊ី ម៉ាឡេស៊ី វៀតណាម និងកម្ពុជា ដែលវត្តមានចុងក្រោយត្រូវបានថតដោយកាមេរ៉ាថតសត្វនៅឆ្នាំ ២០០៧។

លោកបន្តថា «កម្ពុជាត្រូវបានអន្តរជាតិចាត់ជាប្រទេស ដែលមានទីជម្រកសមស្របសម្រាប់ការស្តារសត្វខ្លាធំឡើងវិញ ហើយរាជរដ្ឋាភិបាលកម្ពុជាបានប្តេជ្ញាស្តារសត្វខ្លាធំឡើងវិញ តាមរយៈការបង្កើតផែនការសកម្មភាពសត្វខ្លាធំនៅកម្ពុជា ២០១៥-២០២៤»។

គួរបញ្ជាក់ថា តាមរយៈអនុស្សរណៈយោគយល់ស្តីពីកិច្ចសហប្រតិបត្តិការក្នុងការអភិរក្សជីវៈចម្រុះ និងការគ្រប់គ្រងសត្វព្រៃរួមទាំងការស្តារសត្វខ្លាធំឡើងវិញនៅកម្ពុជា ក្រសួងបរិស្ថានបានកំពុងសហការជាមួយភាគីឥណ្ឌា និងអង្គការសម្ព័ន្ធមិត្តសត្វព្រៃរៀបចំ ផែនការយុទ្ធសាស្ត្រ សម្រាប់ស្តារសត្វខ្លាធំនៅតំបន់ជួរភ្នំក្រវាញ ដោយមានការសិក្សាចំនួនសត្វរំពារ និងជម្រក ការកសាងហេដ្ឋារចនាសម្ព័ន្ធរូបវន្តសម្រាប់ការស្តារសត្វធំ ជាផ្នែកមួយដើម្បីត្រៀមទទួលសត្វខ្លាធំដែលគ្រោងមកដល់ប្រទេសកម្ពុជានៅចុងឆ្នាំនេះ៕

The post ការស្តារជីវៈចម្រុះ និងប្រព័ន្ធអេកូឡូស៊ីប្រកបដោយនិរន្តរភាព ចាំបាច់តម្រូវឱ្យមានវត្តមានមំសាសី ជាពិសេសសត្វខ្លាធំ appeared first on Kampuchea Thmey Daily.

ខ្លា ៦ ប្រភេទស្ថិតក្នុងត្រកូលខ្លា ងាយរងគ្រោះចុះនៅក្នុងបញ្ជីក្រហម IUCN

Din Thary — Mon, 12 Dec 2022 09:43:56 +0000

ក្នុងចំណោមត្រកូលខ្លាទាំង ៨ មានប្រភេទខ្លា ៦ ប្រភេទ ដែលគេចាត់ជាសត្វងាយរងគ្រោះពីការបរបាញ់ និងអន្ទាក់នៅលើពិភពលោក និងបានចុះទៅក្នុងបញ្ជីក្រហម IUCN។

ខ្លាធំ ឬខ្លាដំបង, ខ្លាពពក, ខ្លារខិន, សត្វខ្លាលឿងមាស, ខ្លាត្រី, ឆ្មាដាវ ក្នុងចំណោមប្រភេទជាសត្វដែលងាយរងគ្រោះថ្នាក់បំផុត ហើយក៏នៅមានតិចតួចបំផុតនិងស្ទើរតែផុតពូជនៅក្នុងពិភពលោក។

១. ខ្លាធំ ឬខ្លាដំបង

ខ្លាធំ ឬខ្លាដំបង ជាប្រភេទសត្វដែលមានមាឌធំជាងគេបំផុតក្នុងចំណោមអំបូរឆ្មា ហើយពពួកវាមានសម្បុរក្រហម លឿង ឬត្នោតខ្ចី និងមានឆ្នូតបង្កង់ពណ៌ក្រមៅកាត់ទទឹងដងខ្លួន ហើយនៅផ្នែកខាងក្រោមចង្កា និងបំពង់កមានពណ៌ស ចំណែកកន្ទុយរបស់វាមានសម្បុរខ្មៅជាកង់ៗ និងខ្មៅផ្នែកខាងចុង។ ទោះជាយ៉ាងណា វាជាប្រភេទសត្វដែលទទួលរងគ្រោះថ្នាក់បំផុត ដោយការបរបាញ់ ដើម្បីយកឆ្អឹង ស្បែក ដើម្បីធ្វើពាណិជ្ជកម្ម ហើយវាក៏ត្រូវបានចុះបញ្ជីក្រហមអង្គការ IUCN ជាប្រភេទរងគ្រោះថ្នាក់ជិតផុតពូជ។

២. ខ្លាពពក

ខ្លាពពក ជាប្រភេទសត្វខ្លា ដែលមានមាឌធំ ជាងខ្លាភ្ញីថ្មកែវ ហើយមានសម្បុរ ពណ៌ក្រមៅប្រផេះនៅលើដងខ្លួនមានផ្ទាំងៗដូចពពកធំៗ ហើយពួកវាចូលចិត្តរស់នៅក្នុងព្រៃស្រោង ព្រៃពាក់កណ្ដាលស្រោង និងព្រៃចម្រុះ។ យ៉ាងណាមិញ ខ្លាពពក ជាសត្វរាត្រីចរ ច្រើនរស់នៅជាគូលើដើមឈើ ជាធម្មតាវាចាប់ចំណីដូចជាខ្លារខិនដែរ ដែលអាហាររបស់វាមាន បក្សី ពស់ ជ្រូកព្រៃ ឈ្លូស ប្រើស ស្វាជាដើម។ ប្រភេទសត្វនេះដែរ វាអាចបង្កើតកូនបានម្ដងចន្លោះពី ២ទៅ ៤ក្បាល បន្ទាប់ពីពពោះអស់រយៈពេលប្រហែលជា ៩០ ទៅ ៩៥ថ្ងៃ។

៣. ខ្លារខិន

ខ្លារខិន ត្រូវបានគេដឹងថា ជាសត្វជើង ៤ រត់លឿនជាងគេក្នុងលោក ហើយវាជាអំបូរឆ្មា ដែលមានមាឌធំលំដាប់ទី២ បន្ទាប់ពីខ្លាធំ ដោយសត្វឈ្មោលអាចមានទម្ងន់ ៥៥គីឡូក្រាម និងខ្លាញីមានទម្ងន់ ៣៥គីឡូក្រាម ដែលវាងាយចំណាំព្រោះ វាមានពណ៌លឿង ក្រហម ត្នោត និងមានអុចៗ ពណ៌ខ្មី ជាកញ្ចុំនៅពាសពេញខ្លួន។ ខ្លារខិន វារស់នៅក្នុងព្រៃស្ទើរគ្រប់ប្រភេទ ចាប់ពីព្រៃស្រោងរហូតដល់ព្រៃគុម្ពោតដែលមានផ្ទាំងថ្ម ហើយវាជាសត្វរហ័សរហួន និងចូលចិត្តឡើងដើមឈើ ដែលជាជំនាញពិសេសរបស់វា។ ចំណែកចំណីរបស់វា មានពពួកប្រើស ឈ្លូស ជ្រូកព្រៃ ស្វា សត្វស្លាប សត្វកកេរ និងសត្វល្អិត ជាដើម ដោយវាអាចបង្កើតកូនបានពី ១-៤ ក្បាល បន្ទាប់ពីពពោះអស់រយៈពេល ៩០-៩៦ថ្ងៃ កូនរស់នៅជាមួយមេរហូតដល់អាយុ ១-២ ឆ្នាំ។

៤. សត្វខ្លាលឿងមាស

សត្វខ្លាលឿងមាស ជាប្រភេទសត្វមុំសា សត្វមាឌតូច ស្ថិតក្នុងត្រកូលខ្លាទាំង ៨ប្រភេទដូចជា ខ្លាធំ ឬខ្លាដំបង ខ្លារខិន ខ្លាពពក ខ្លាត្រី ខ្លាលឿងមាស ខ្លាភ្ញីថ្មកែវ ឆ្មាព្រៃ និងឆ្មា ដាវ ហើយពពួកនេះមានទម្ងន់ប្រមាណ ៩-១៦គីឡូក្រាម។ សត្វខ្លាលឿងមាស ភាគច្រើនស៊ីពពួកសត្វដង្កេរ( កំប្រុក កណ្ដុរ កង្ហិច កង្ហែន) សត្វស្លាប ល្មូន ក្តាន់ញ៉ែង ពពួកពានរ និងជួនកាលវាស៊ីសត្វឈ្លូសជាចំណី។ ជាមួយគ្នានេះ ពួកវាច្រើនរស់នៅតំបន់ការពារធម្មជាតិមួយចំនួននៅភូមិភាគឦសាន ភូមិភាគខាងជើង និងភូមិភាគនិរតី នៃប្រទេសកម្ពុជា។

៥. ខ្លាត្រី

ខ្លាត្រី ប្រសិនបើយើងមើលទៅវាមានរូបរាងដូចស្រដៀងសត្វឆ្មាស្រុកទូទៅ ប៉ុន្តែវាមានជំនាញមួយឈុតគួរឱ្យភ្ញាក់ផ្អើល និងរោមដែលមិនខ្លាចទទឹក ហើយវាសម្របខ្លួនទៅនឹងជីវិតក្នុងទឹក និងលើគោកជានឹងរោមខ្លី ក្រាស់ពីស្រទាប់ មិនជក់ទឹក។ ឆ្មាដែលប្រកបដោយធនធានមួយនេះ ត្រូវបានគេដាក់ឈ្មោះតាមសមត្ថភាពដ៏ល្បីល្បាញ របស់វាក្នុងការប្រមាញ់ចំណីយ៉ាងសកម្មបំផុតនៅពេលយប់ នឹងស៊ីសត្វកកេរតូចៗ បក្សី ត្រីទឹកសាប។ លើសពីនេះទៀត ខ្លាត្រី វាអាចផ្លាស់ទីដោយសម្រាលខ្លួន(ហោះ) យ៉ាងលឿន និងស្ងៀមស្ងាត់ឆ្លងកាត់ទឹករាក់នៃតំបន់ដីសើម ហើយពុកមាត់វែងរបស់ពូកវាប៉ះនឹងផ្ទៃទឹកដែលប្រៀបបាននិងអង់តែន ដើម្បីចាប់រកចលនានៅក្រោមទឹក ហើយពួកវាធ្វើការដោយប្រុងប្រយ័ត្ននៅចម្ងាយពិតប្រាកដនៃចំណី។ ជាទូទៅ ទីជម្រកដែលគេបានជួបប្រទះ នៅទូទាំងអាស៊ីខាងត្បូង និងអាស៊ីអាគ្នេយ៍ ប៉ុន្តែជម្រកពិតប្រាកដរបស់វាគេមិនអាចដឹងច្បាស់នោះទេ ដោយសារតែធម្មជាតិដ៏អាថ៌កំបាំងរបស់វា។

៦. ឆ្មាដាវ

ឆ្មាដាវ ជាសត្វពូកែហែលទឹក មានសម្បុរលឿង-ត្នោត លាយជាមួយរោមអុចៗពណ៌ខ្មៅដែលមានអង្កត់ផ្ចិត ២,៥ស.ម ឬលើសពីនេះ និងមានឆ្នូត ៤-៦ សម្បុរត្នោតចាស់ចាប់ផ្ដើមចេញពីលើក្បាល និងផ្នែកខាងក្រោយនៃករហូតដល់ស្មា។ ផ្នែកចំហៀង និងជើងទាំង៤មានដុំអុចៗក្រមៅចាស់ក្នុងទំហំ និងរាងខុសៗគ្នា កន្ទុយមានលាយរបាយពណ៌ខ្មៅអុចៗក្នុងទំហំខុសៗគ្នាចាប់ពីគល់កន្ទុយរហូតដល់ចុង ចំណែកឯផ្នែកខាងក្រោយ និងក្រោមភ្នែកមានឆ្នូតក្រម៉ៅ ខណ្ឌចែកដោយបន្ទះពណ៌ស។ ជាទូទៅ សត្វឆ្មាដាវ វាអាចស៊ី ពពួកបក្សី សត្វកកេរ ត្រកួត អន្សង ក្ដាន់ញ៉ែងជាដើម ហើយសត្វនេះ វាអាចបន្តពូជបានពេញមួយឆ្នាំ រយៈពេលពពោះពី ៦៥-៧២ថ្ងៃ អាចមានកូនម្តងពី ១-៤ក្បាល កូនរបស់វាអាចបើកភ្នែកបានក្នុងរយៈពេលប្រហែល ១០ថ្ងៃ ក្រោយពេលកើត មិនតែប៉ុណ្ណោះកូនរបស់វាអាចបន្តពួជបាននៅអាយុ ១៨ខែ និងអាចរស់បានពី ១២-១៣ឆ្នាំ៕

ដោយ៖ ថារី

The post ខ្លា ៦ ប្រភេទស្ថិតក្នុងត្រកូលខ្លា ងាយរងគ្រោះចុះនៅក្នុងបញ្ជីក្រហម IUCN appeared first on Kampuchea Thmey Daily.

សូម្បីសត្វតោ និងខ្លាក៏ត្រូវបានជម្លៀសចេញពីអ៊ុយក្រែនទៅប៉ូឡូញ

chean virakbot — Fri, 04 Mar 2022 07:22:45 +0000

អ្នកនាំពាក្យសួនម្នាក់បាននិយាយថា សត្វតោ និងខ្លាចំនួន៦ក្បាលដែលត្រូវបានគេជម្លៀសចេញពីកន្លែងជិតទីក្រុងកៀវ ប្រទេសអ៊ុយក្រែនបានទៅដល់សួនសត្វមួយក្នុងប្រទេសប៉ូឡូញហើយកាលពីថ្ងៃព្រហស្បតិ៍ បន្ទាប់ពីស្ថិតក្នុងទីតាំងប្រឈមមុខដាក់គ្នានៃការវាយប្រហារពីរថ្ងៃនាជាយក្រុង និងប្រឈមមុខនឹងរថក្រោះរុស្ស៊ីដែលនឹងមកដល់។

ស្ត្រីអ្នកនាំពាក្យឈ្មោះ Malgorzata Chodyla បានឲ្យដឹងថា រថយន្តបានដឹកសត្វតោ ខ្លា ព្រមទាំងមានឆ្មាព្រៃ២ក្បាល និងឆ្កែព្រៃមួយក្បាលចម្ងាយជិត១០០០គីឡូម៉ែត្រដើម្បីទៅព្រំដែនប៉ូឡូញ ខណៈការធ្វើដំណើរត្រូវជៀសតំបន់ Zhytomyr ដែលកំពុងវាយប្រហារដោយកម្លាំងទ័ពរុស្ស៊ី។

អ្នកនាំពាក្យបន្តថា នៅយប់មួយរថយន្តដឹកបានឈប់សម្រាកទល់មុខនឹងរថក្រោះរបស់រុស្ស៊ី។ អ្នកបើកបរដេកនៅក្រោមរថយន្ត ខណៈម្ចាស់ផ្ទះដែលឲ្យសម្រាកជាអ្នកផ្តល់ចំណីដល់សត្វ ពីព្រោះក្រុមដឹកនាំជញ្ជូនមិនដឹងពីរបៀបផ្តល់ចំណី។

នៅព្រំដែន សត្វទាំងអស់ត្រូវបានប្តូរចូលរថយន្តដឹករបស់ប្រទេសប៉ូឡូញ ហើយអ្នកបើកបរជនជាតិអ៊ុយក្រែនបានវិលត្រឡប់ទៅផ្ទះវិញ។ ឥឡូវនេះ សត្វទាំងអស់ត្រូវមើលថែនៅសួនសត្វ Poznan ។

ប្រធានសួនសត្វ អ្នកស្រី Ewa Zgrabczynska ដែលបានជួយសម្រួលក្នុងការជម្លៀសនេះបាននិយាយថា អ្នកស្រីបានទាក់ទងរួចហើយទៅអង្គការនៅប្រទេសលោកខាងលិចជាច្រើនដែលចង់បានសត្វទាំងនេះ៕

ប្រែសម្រួល៖ វីរបុត្រ
ប្រភព៖ freshheadline

The post សូម្បីសត្វតោ និងខ្លាក៏ត្រូវបានជម្លៀសចេញពីអ៊ុយក្រែនទៅប៉ូឡូញ appeared first on Kampuchea Thmey Daily.

ដុតសាកសពខ្លា ៦ ក្បាល ដែលងាប់នៅក្នុងសួនសត្វ

Bo Doula — Thu, 29 Oct 2020 02:53:44 +0000

សត្វខ្លា ចំនួន ៦ ក្បាល ដែលក្នុងនោះ មាន ៤ ក្បាល ជាខ្លាចំណាស់ និង ២ ក្បាលទៀត ជាខ្លាជំទង់ ដែលបានងាប់នៅក្នុងសួនសត្វមួយកន្លែងក្នុងប្រទេសថៃ ត្រូវបានក្រុមអភិរក្សសត្វព្រៃ រួមជាមួយអង្គភាពពាក់ព័ន្ធ បានដុតកម្ទេចចោល និងមិនអនុញ្ញាតឲ្យយកចំណែកណាមួយ នៃរាងកាយទៅលក់នៅលើទីផ្សារងងឹតទេ ។

ពិធីដុតសាកសពខ្លា ទាំង៦ក្បាលនេះ បានធ្វើឡើង កាលពីថ្ងៃទី ២៨ ខែតុលា ឆ្នាំ២០២០ វេលាម៉ោង ១១និង ៣០ នាទី ថ្ងៃត្រង់ នៅក្បែសួនសត្វ សិរី រ៉ាតឆា ក្នុងភូមិសាស្ត្រ ខេត្តឈុនបុរី ប្រទេសថៃ ដែលនេះគឺជាលើកដំបូងហើយ ក្នុងការដុតកម្ទេចសាកសពសត្វខ្លា ដែលជាសត្វកម្រ និងជិតផុតពូជ ក្រោមការត្រួតពិនិត្យ របស់ក្រុមការងារអភិរក្សសត្វព្រៃ និងក្រុមការងារ ឧទ្យានជាតិ ។

យោងតាមរបាយការណ៍ របស់អាជ្ញាធរ បានឲ្យដឹងថា ក្នុងចំណោមសត្វខ្លាទាំង ៦ ក្បាល គឺមាន ៤ ក្បាល ជាខ្លាងាប់ ដោយសារចាស់ជរា និងសាកសពខ្លាជំទង់ ២ ក្បាលទៀត គឺងាប់ដោយសារ ជំងឺ ដោយសត្វខ្លានីមួយៗមានបំពាក់ស្លាកលេខយ៉ាងត្រឹមត្រូវ ហើយក៏ជាសត្វកម្រ នៅក្នុងចំណោមពូជខ្លាទាំង ៥ ប្រភេទ ដែលត្រូវបានក្រុមអភិរក្សកំពុងយកចិត្តទុកដាក់ក្នុងការការពារ ព្រោះពពួកសត្វប្រភេទនេះ ត្រូវបានគេសម្លាប់យកបំណែកនៃរាងកាយ ទៅលក់នៅលើទីផ្សារសត្វព្រៃ ឬក៏នៅលើទីផ្សារងងឹត ដោយសារតែបច្ចុប្បន្នពពួកសត្វប្រភេទនេះកំពុងពេញនិយមយ៉ាងខ្លាំង នៅក្នុងទ្វីបអាសុី ដោយវាមានតម្លៃខ្ពស់ បន្ទាប់ពីភ្លុកដំរី ៕

អត្ថបទ ៖ សោ និយមរ័ត្ន

The post ដុតសាកសពខ្លា ៦ ក្បាល ដែលងាប់នៅក្នុងសួនសត្វ appeared first on Kampuchea Thmey Daily.

សត្វខ្លា Archives - Kampuchea Thmey Daily

ថៃ ផ្ទុះជំងឺអាថ៌កំបាំង ងាប់សត្វខ្លា ៧២ក្បាលជាបន្តបន្ទាប់ នៅពុំទាន់ដឹងមូលហេតុ

ខ្លា ៦ ​ប្រភេទ​ស្ថិត​ក្នុង​ត្រកូល​ខ្លា ងាយ​រង​គ្រោះ​ចុះ​នៅ​ក្នុង​បញ្ជី​ក្រហម IUCN

សូម្បី​​សត្វ​​តោ និង​​ខ្លា​ក៏​​ត្រូវ​​បាន​​​ជម្លៀស​​ចេញ​​ពី​អ៊ុយក្រែន​​ទៅ​ប៉ូឡូញ

​​ដុត​សាក​សព​ខ្លា ៦ ក្បាល ដែល​ងាប់​នៅ​ក្នុង​សួនសត្វ ​

ខ្លា ៦ ប្រភេទស្ថិតក្នុងត្រកូលខ្លា ងាយរងគ្រោះចុះនៅក្នុងបញ្ជីក្រហម IUCN

សូម្បីសត្វតោ និងខ្លាក៏ត្រូវបានជម្លៀសចេញពីអ៊ុយក្រែនទៅប៉ូឡូញ

ដុតសាកសពខ្លា ៦ ក្បាល ដែលងាប់នៅក្នុងសួនសត្វ