ប្រធានសហគ្រាសអេកូឡូស៊ីខ្លាត្រី (FCEE) និងជាសមាជិកនៃអ្នកជំនាញបច្ចេកទេសអភិរក្សខ្លាត្រី លោកស្រី Vanessa Herranz Muñoz  បញ្ជាក់ថា រូបភាពនេះ គឺពិតជារូបសត្វខ្លាត្រីប្រាកដមែន។ លោកស្រីសង្កត់ធ្ងន់ថា៖«កំណត់ត្រាសត្វនេះនៅអាស៊ីអាគ្នេយ៍ គឺមានការខ្វះខាតខ្លាំង ហើយចំនួនវានៅក្នុងប្រទេសកម្ពុជាប្រហែលនៅមានតិចតួចប៉ុណ្ណោះ។ នេះគឺជាកំណត់ត្រាលើកទីពីរ ដែលត្រូវបានបញ្ជាក់វត្តមាននៃសត្វខ្លាត្រីនៅក្នុងតំបន់ទន្លេសាបទាំងមូល ហើយវាផ្តល់ឱ្យយើងនូវក្តីសង្ឃឹម សម្រាប់ការស្តារឡើងវិញនូវប្រភេទសត្វខ្លាដ៏សំខាន់នេះ។»

សត្វខ្លាត្រី (Prionailurus viverrinus) មានដើមកំណើតនៅតំបន់អាស៊ីខាងត្បូង និងអាស៊ីអាគ្នេយ៍ ហើយត្រូវបានចុះក្នុងបញ្ជីក្រហមរបស់អង្គការIUCN ជាក្រុមងាយរងគ្រោះ ដោយចំនួនរបស់វា ត្រូវបានអ្នកវិទ្យាសាស្រ្តប៉ាន់ប្រមាណថា មានតិចជាង១ម៉ឺន ក្បាលនៅទូទាំងពិភពលោក។ សត្វខ្លាត្រី ជាប្រភេទសត្វមានរូបរាងទាក់ទាញ វាមានមាឌធំជាងឆ្មាស្រុក២ដង ហើយច្រើនរស់នៅតែឯកឯង។ សត្វខ្លាត្រី ប្រមាញ់ និងរកចំណី ដោយប្រើក្រញាំមុខដ៏រឹងមាំរបស់វា។ សត្វនេះអាចហែលទឹកបានយ៉ាងជំនាញ ហើយមុជទឹកចាប់ត្រីយ៉ាងរហ័ស។ ចំណីចម្បងរបស់វាមានដូចជាសត្វត្រី សត្វកកេរ សត្វស្លាប និងសត្វល្មូន ជាដើម។ 

នៅប្រទេសកម្ពុជា កំណត់ត្រាដែលបានបញ្ជាក់អំពីខ្លាត្រី ពុំសូវមានច្រើននោះទេ ដោយគេឃើញមានកំណត់ត្រាវត្តមាននៃសត្វនេះនៅតំបន់មួយចំនួនដូចជាដែនជម្រកសត្វព្រៃគូលែនព្រហ្មទេព តំបន់ព្រៃកោងកាង ឧទ្យានជាតិរាម និងតំបន់រ៉ាមសារបឹងទន្លេឆ្មារ (គំហើញទី១កាលពីឆ្នាំ២០២២)។ ការបញ្ជាក់ពីវត្តមានសត្វនេះជារឿយៗប្រឈមនឹងបញ្ហាកំណត់អត្តសញ្ញាណដោយរូបរាងវាងាយច្រលំនឹងឆ្មារដាវ (Prionailurus bengalensis)។

នាយកប្រចាំប្រទេសនៃអង្គការអភិរក្សអន្តរជាតិកម្ពុជា លោក អ៊ុ សូនី  កត់សម្គាល់ថា ៖«ការត្រឡប់មកវិញរបស់ខ្លាត្រីនេះ គឺជាសក្ខីភាពនៃការស្តារតំបន់ដីសើមដែលផ្អែកមូលដ្ឋានវិធីសាស្រ្តបែបវិទ្យាសាស្ត្ររយៈពេលវែង ជាពិសេសគឺការចូលរួមពីសហគមន៍មូលដ្ឋាន ដោយគាំទ្រពីរាជរដ្ឋាភិបាល និងដៃគូនានាផងដែរ។»

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា ចាត់ទុកវត្តមាននៃសត្វខ្លាត្រីនៅក្នុងតំបន់ព្រៃលិចទឹកនៃបឹងទន្លេសាប ជាសូចនាករដ៏សំខាន់មួយដែលបង្ហាញពីប្រសិទ្ធភាពនៃការងារគ្រប់គ្រងធនធានជលផល និងប្រព័ន្ធអេកូឡូស៊ីព្រៃលិចទឹករយៈពេលវែងរបស់កម្ពុជា។ លោក ឌិត ទីណា ថា៖«ការណ៍នេះសបញ្ជាក់ពីសារៈសំខាន់នៃការស្តារនិងការពារជម្រកព្រៃលិចទឹកឡើងវិញ ដែលមិនត្រឹមតែមានផលប្រយោជន៍ដល់ការអភិរក្សជីវៈចម្រុះប៉ុណ្ណោះទេ ប៉ុន្តែថែមទាំងជំរុញនិរន្តរភាពនៃការរក្សាធនធានជលផល និងពង្រឹងជីវភាពរស់នៅរបស់សហគមន៍ដែលពឹងផ្អែកលើតំបន់ដីសើមនេះផងដែរ។»

ចំណែករដ្ឋមន្ត្រីក្រសួងបរិស្ថាន លោក អ៊ាង សុផល្លែត ចាត់ទុកថា៖«របកគំហើញនេះ គឺភស្តុតាងបង្ហាញពីការរីកចម្រើននៃប្រភេទជីវៈចម្រុះដ៏សំខាន់នៅតាមតំបន់ការពារធម្មជាតិនៅកម្ពុជា និងពីការដាក់ចេញដ៏ត្រឹមត្រូវនៃគោលនយោបាយរបស់កម្ពុជា ក្នុងនោះមានយុទ្ធសាស្ត្រចក្រាវិស័យបរិស្ថាន និងកិច្ចខិតខំប្រឹងប្រែងរបស់រាជរដ្ឋាភិបាល និងអ្នកពាក់ព័ន្ធលើការងារអភិរក្ស គ្រប់គ្រង និងអភិវឌ្ឍវិស័យបរិស្ថាន និងធនធានធម្មជាតិយ៉ាងសកម្ម និងប្រកបដោយប្រសិទ្ធភាព។»

គួរកត់សម្គាល់ថា ចាប់តាំងពីឆ្នាំ២០១០មក អង្គការអភិរក្សអន្តរជាតិ សហការជាមួយសហគមន៍នេសាទក្នុងស្រុកចំនួន១៦ រដ្ឋបាលជលផល និងក្រសួងបរិស្ថាន បានស្តារព្រៃលិចទឹកដែលបានប្រមាណជាង១.០០០ហិកតា នៅជុំវិញបឹងទន្លេសាប។ កិច្ចខិតខំប្រឹងប្រែងរួមក្នុងការស្តារតំបន់ដីសើមឡើងវិញរួមមាន ការដាំដើមឈើឡើងវិញ និងការលើកទឹកចិត្តដល់ការការពារទីជម្រក ដោយល្បាតជាប្រចាំ អនុវត្តវិធានការបង្ការអគ្គីភ័យ និង គាំទ្រដោយផ្ទាល់ដល់ជីវភាពរស់នៅរបស់សហគមន៍ក្នុងតំបន់ ជាដើម៕

The post ខ្លាត្រីប្រភេទសត្វដ៏កម្របំផុតនៅអាស៊ីបង្ហាញវត្តមានម្ដងទៀតនៅតំបន់ព្រៃលិចទឹកដែលបានស្តារឡើងវិញនៃខេត្តពោធិ៍សាត់ជុំវិញបឹងទន្លេសាប appeared first on Kampuchea Thmey Daily.

តាមការបញ្ជាក់ពីមន្ត្រីឧទ្យានុរក្ស សត្វទន្សោងញីនេះត្រូវបានប្រទះឃើញជាប់អន្ទាក់ព្រានព្រៃ ដោយដាច់ជើងខាងស្តាំផ្នែកខាងក្រោយ មានសភាពហូរឈាមខ្លាំង និងខ្សោយខ្លាំង មិនអាចផ្លាស់ទីទៅកន្លែងផ្សេងបានឡើយ។ ភ្លាមៗនោះ ក្រុមការងារនៃដែនជម្រកសត្វព្រៃស្រែពក បានព្យាយាមស្វះស្វែងរកមធ្យោបាយដើម្បីដឹកសត្វទៅសង្គ្រោះឲ្យទាន់ពេលវេលា ប៉ុន្តែជាអកុសល សត្វទន្សោងនោះបានបាត់បង់ជីវិត មុនពេលក្រុមការងារយកមធ្យោបាយសង្គ្រោះទៅដល់។

ដើម្បីបញ្ចៀសការឆ្លងមេរោគទៅកាន់សត្វទន្សោង និងសត្វព្រៃផ្សេងៗទៀតដែលកំពុងរស់នៅក្នុងតំបន់ព្រៃ មន្ត្រីនៃដែនជម្រកបានសម្រេចដឹកសាកសពសត្វទន្សោងមកកប់នៅក្បែរស្នាក់ការបរិស្ថាន «ណាមរ៉ាម»។ មន្ត្រីបានអះអាងថា ការកប់សពនៅទីនោះ គឺដើម្បីរក្សាទុកសំណាកគ្រោងឆ្អឹង សម្រាប់ប្រយោជន៍ក្នុងការសិក្សាស្រាវជ្រាវអំពីជីវៈចម្រុះនៅពេលអនាគតផងដែរ។

យោងតាមក្រមបរិស្ថាននិងធនធានធម្មជាតិបានចែងថា ដោយជនណា ដាក់អន្ទាក់ ខ្នារ អង្គប់ បណ្តឹង លប់ បង្កៃ ឬដោយប្រមាញ់ដែលធ្វើឲ្យរបួសបំពុលសម្លាប់ឬប្រមូលពងនិងកូនសត្វព្រៃគ្រប់ប្រភេទ នឹងត្រូវផ្តន្ទាទោសដាក់ពន្ធនាគារ ពី(១ដល់៥)ឆ្នាំ និងពិន័យជាប្រាក់ ចំនួន១០០.០០០.០០០រៀលទៅ៥០០.០០០.០០០រៀល ផងដែរ។

ក្នុងន័យនេះមន្ទីរបរិស្ថានខេត្តមណ្ឌលគិរី នៅតែបន្តអំពាវនាវទៅដល់ប្រជាពលរដ្ឋសហគមន៍ដែលរស់នៅក្បែរតំបន់ការពារធនធានធម្មជាតិនិងសាធារណជនទាំងអស់ សូមចូលរួមជួយថែរក្សាការពារសម្បត្តិធនធានធម្មជាតិនិងព្រៃឈើសត្វព្រៃ ដើម្បីជាកេរដំណែលសម្រាប់កូនចៅជំនាន់ក្រោយ។ ជាងនេះទៅទៀត ថែមទាំងអាចទាក់ទាញភ្ញៀវទេសចរ មកទស្សនាកម្សាន្ត នៅក្នុងដែនជម្រកព្រៃសហគមន៍ ដែលអាចជាចំណូល ដើម្បីសម្រួលទៅដល់ជីវភាពគ្រួសារ ប្រជាពលរដ្ឋក្នុងមូលដ្ឋានទៀតផង៕

ដោយ៖ រៀម សុខហេង

The post សត្វទន្សោងញីមួយក្បាលបាត់បង់ជីវិត បន្ទាប់ពីជាប់អន្ទាក់ព្រានព្រៃ ក្នុងដែនជម្រក​សត្វ​ព្រៃ​ស្រែពក appeared first on Kampuchea Thmey Daily.

ក្នុងជំរំចាហ៊ូមានកន្លែងកម្សាន្តសំខាន់ៗចំនួន៥ទីតាំង ជាទូទៅភ្ញៀវទេសចរដែលមកកម្សាន្តទីកន្លែងនេះត្រូវមកដល់ជំរំចាហ៊ូមក៤កន្លះទៅ៥ព្រឹក ដើម្បីធ្វើដំណើរប្រមាណ២ ទៅ៣ គីឡម៉ែត្រ ដោយថ្មើរជើងទៀត ទើបអាចទៅមើលសត្វទោចទោចថ្ពាល់លឿងទាំងនេះបាន។ក្រៅអំពីទស្សនាសត្វទោចថ្ពាល់លឿង នៅពេលថ្ងៃអ្នកទេសចរ ក៏អាចទស្សនាពពួកសត្វស្វា សត្វស្លាប និងសត្វដទៃទៀត។ក្រៅពីនេះអ្នកទេសចរអាចទស្សនាទឺកធ្លាក់ មើលដើមឈើធំៗក្នុងព្រៃ មើលជីវភាពរស់នៅរបស់ជនជាតិភាគតិចរបស់សហគមន៍ និងមើលការដើរដងជ័រទឹករបស់បងប្អូនសហគមន៍។

តំបន់អេកូទេសចរណ៍នេះត្រូវបានបង្កើតឡើងកាលពីឆ្នាំ២០១៣ ក្នុងដែនជម្រកសត្វព្រៃកែវសីមា ដោយមានការផ្តល់មូលនិធិពីគម្រោងរេដបូកកែវសីមា ក៏ដូចជាអង្គការសមាគមអភិរក្សសត្វព្រៃ (WCS) ការគាំទ្រដោយក្រសួងបរិស្ថាន ក្រុមហ៊ុន SVC Stay និងដៃគូផ្សេងទៀតផងដែរ។ ក្នុងឆ្នាំ២០១៤តំបន់នេះ បានចាប់ផ្តើមទទួលភ្ញៀវទេសចរណ៍ជាតិ និងអន្តរជាតិឱ្យចូលទស្សនា ជាពិសេសគឺប្រភេទសត្វជិតផុតពូជសត្វទោចថ្ពាល់លឿង ដែលមានវត្តមានតែជាង១ពាន់ក្បាលប៉ុណ្ណោះ។

អ្នកនាង នេត្រ បូរមី មន្រ្តីហិរញ្ញវត្ថុ និងរដ្ឋបាលតំបន់អេកូទេសចរណ៍ជំរំ ចាហ៊ូ ខេត្តមណ្ឌលគិរី ឱ្យដឹងថា តាមរយៈអង្គការ WCS បានផ្តល់ជាជំនួយដើម្បីធ្វើការអភិវឌ្ឍន៍ និងពង្រីកជំរំមួយនេះជាបន្តបន្ទាប់។ ក្នុងនេះដូចជាអភិវឌ្ឍន៍ហេដ្ឋារចនាសម្ព័ន្ធ កន្លែងស្នាក់នៅរបស់ភ្ញៀវ ការបណ្តុះបណ្តាលវិជ្ជាជីវៈដល់បុគ្គលិក តំបន់អេកូទេសចរណ៍។ ដោយសារការអភិវឌ្ឍនេះទើបទីកម្សាន្តក្នុងតំបន់ព្រៃភ្នំមួយនេះក៏មានការរៀបចំបានជាបន្ទប់ទទួលភ្ញៀវ កន្លែងភោជនីយដ្ឋាន ទីកន្លែងប្រជុំ ទីកន្លែងសម្រាប់បើកវគ្គបណ្តុះបណ្តាល កន្លែងសិក្សាស្រាវជ្រាវជាដើម។

អ្នកនាង នេត្រ បូរមី បានថ្លែងប្រាប់ក្រុមអ្នកសារព័ត៌មាន ៣០នាក់ ដែលបានទៅធ្វើទស្សនកិច្ចនៅទីនាថ្ងៃទី២៤ ខែតុលា ឆ្នាំ២០២៥ថា គិតរហូតមកដល់ពេលនេះ សត្វទោចថ្ពាល់លឿងបានទាក់ទាញភ្ញៀវទេសចរមកកម្សាន្តចំនួន២,៧៥៤នាក់ ដែលភាគច្រើនជាជនជាតិបរទេស ក្នុងនោះក៏មានមន្រ្តីទូតជាច្រើនរូបផងដែរ។

មន្រ្តីហិរញ្ញវត្ថុ និងរដ្ឋបាលតំបន់អេកូទេសចរណ៍ជំរំ ចាហ៊ូ បានបញ្ជាក់ថា៖ «ជំរំចាហ៊ូសម្បូរភ្ញៀវទេសចរបំផុតចាប់ពីខែវិច្ឆិកា ដល់ខែមីនា ផុតពីនេះពោល គឺដល់ខែមេសាដល់ខែតុលាចំនួនភ្ញៀវទេសចរមានការថមថយចុះបន្តិចវិញ។ ដោយឡែកបើគិតចាប់ពីដើមឆ្នាំ២០២៥ មកដល់ចុងខែកញ្ញាកន្លងមកមានភ្ញៀវទេសចរចូលកម្សាន្តជំរំ ចាហ៊ូ ប្រមាណ៣០០ ទៅ៤០០នាក់ ហើយចំណូលជាថវិកាបានជាង ៦ម៉ឺនដុល្លារ»។

អ្នកនាង បូរមី បានឱ្យដឹងថា ចំណូលទាំងនោះត្រូវបានធ្វើវិភាគទានជាង១ម៉ឺនដុល្លារអាមេរិក ទៅដល់មន្ទីរបរិស្ថានខេត្តមណ្ឌលគិរី ដើម្បីចូលរួមអភិរក្សដែនជម្រកសត្វព្រៃកែវសីមា។ ក្រៅពីនោះ ក៏បានផ្តល់ជូនសហគមន៍ជិត ៦ម៉ឺនដុល្លារ ដើម្បីធ្វើការអភិវឌ្ឍន៍ ហើយបន្ថែមពីនេះ គម្រោងនេះក៏បានផ្តល់ឱកាសការងារដល់សមាជិកសហគមន៍ចំនួន២៨រូប ក្នុងនោះមានស្រ្តីចំនួន១១នាក់ផងដែរ។

បូរមី បាននិយាយដូច្នេះថា៖ «អ៊ីចឹងភ្ញៀវមកលេងទីនេះមិនត្រឹមតែបានទស្សនាសត្វព្រៃ និងព្រៃឈើប៉ុណ្ណោះទេ អ្វីដែលសំខាន់នោះ ការមកទីនេះ គឺបានជួយដល់សហគមន៍អណ្តូងក្រឡឹងមួយចំណែក។ ក្នុងភ្ញៀវម្នាក់ គឺធ្វើការបែងចែកវិភាគទានចំនួន៣០ដុល្លារ និង៥ដុល្លារទៀតទៅកាន់មន្ទីរបរិស្ថាន។ ខ្ញុំបានប្រាប់ភ្ញៀវថា វត្តមានអ្នកមកទីនេះមិនត្រឹមតែមកកម្សាន្តប៉ុណ្ណោះទេ តែជួយអភិវឌ្ឍន៍សហគមន៍ និងការពារសត្វព្រៃផងដែរ»។

ក្រៅពីទស្សនាសត្វព្រៃ អ្នកទេសចរណ៍ក៏បានសិក្សាស្វែងយល់ពីទំនៀមទម្លាប់ ប្រពៃណី វប្បធម៌ ក៏ដូចជាការរស់នៅរបស់ប្រជាពលរដ្ឋជនជាតិដើមភាគតិចក្នុងតំបន់ជាដើម។

ទាក់ទិនក្នុងរឿងនេះ លោក សុខបញ្ញាវុធ អ្នកស្រាវជ្រាវនៅ ជំរំ ចាហ៊ូ ប្រាប់ឱ្យដឹងថា កន្លងមកក្រុមរបស់លោកបានសិក្សាស្រាវជ្រាវទៅលើសត្វទោច ដោយក្នុងនេះសិក្សាទៅលើអាកប្បកិរិយាប្រចាំថ្ងៃរបស់វា ការរស់នៅ និងការច្រៀងរបស់វាក្នុងទំនាក់ទំនងជាមួយដៃគូ និងការការពារទឹកដីរបស់សត្វទោច។វាខុសពីសត្វដទៃពោលគឺសត្វទោចនៅពេលការពារទឹកដីវាតែងសម្តែងចេញជាការច្រៀងដើម្បីប្រាប់ជាសញ្ញាដល់ក្រុមនីមួយៗរបស់ពួកវា។

ទាក់ទិនទៅនឹងការនាំភ្ញៀវទេសចរទៅទស្សនាសត្វទោចវិញ លោកបានប្រាប់ថាគឺអនុញ្ញាត្តិឱ្យទៅទស្សនាតែចំនួនមួយម៉ោងទេ ហើយចំនួនទៀតសោតបានត្រឹមតែ៦នាក់ប៉ុណ្ណោះ ដើម្បីធ្វើយ៉ាងណាកុំឱ្យពួកវាតានតឹងអារម្មណ៍ឬរំខានផ្លូវចិត្តពួកវា។

លោក សុខបញ្ញាវុធ បានឱ្យដឹងថា៖ «បើយោងតាមអង្គការ WCS កាលពីឆ្នាំ២០២២ គឺចំនួនសត្វទោចថ្ពាល់លឿងនៅទីកន្លែងនេះមានចំនួនប្រមាណ ១១២៩ក្បាល ហើយចំនួននេះថេររហូតដល់បច្ចុប្បន្ន»៕

The post ៩ខែ នៃឆ្នាំ២០២៥ ទីតាំងអេកូទេសចរណ៍សត្វទោចថ្ពាល់លឿងជំរំ «ចាហ៊ូ» រកចំណូលបានជាង ៦ម៉ឺនដុល្លារ ទុកអភិរក្សសម្បត្តិធម្មជាតិ និងអភិវឌ្ឍន៍សហគមន៍ appeared first on Kampuchea Thmey Daily.

ប្រភពព័ត៌មានបានឲ្យដឹងថា ដោយមានសេចក្តីរាយការណ៍ថា ឈ្មួញខាងលើបានលួចទទួលទិញសត្វព្រៃគ្រប់ប្រភេទ យកមកចែកចាយនៅក្នុងខេត្តសៀមរាប ទើបកម្លាំងជំនាញចុះមកបង្ក្រាប និងដករហូតសត្វព្រៃទាំងនោះយកទៅព្រលែងវិញ។

ជាមួយគ្នានេះ មន្ត្រីជំនាញរដ្ឋបាលព្រៃឈើខេត្តសៀមរាប បានឲ្យដឹងថា ប្រតិបត្តិការនេះ ដកហូតបានសត្វ ក្អែកទឹកតូចរស់ចំនួន៦០ក្បាល និងមាន់ទឹករស់១ក្បាល ហើយសត្វទាំងនេះ ត្រូវបានក្រុមអន្តរាគមន៍បង្ក្រាបបទល្មើសសត្វព្រៃចល័តយកទៅរក្សាទុកនៅសួនសត្វភ្នំតាម៉ៅ។ ចំពោះម្ចាស់ទីតាំងខាងលើត្រូវបានកម្លាំងសមត្ថកិច្ចកសាងសំណុំរឿង បញ្ជូនទៅតុលាការដើម្បីចាត់ការទៅតាមផ្លូវច្បាប់៕

ដោយ៖ជុន កុសល

The post សមត្ថកិច្ច បង្ក្រាបបានឈ្មួញស្តុកសត្វព្រៃខុសច្បាប់មួយកន្លែង នៅកណ្ដាលក្រុងសៀមរាប appeared first on Kampuchea Thmey Daily.

ការ​សិក្សា​រួម​គ្នា​នេះ បាន​បង្ហាញ​ថា នៅ​ក្នុង​តំបន់​ប្រើប្រាស់​ច្រើន​យ៉ាង​សំឡូត បាន​រកឃើញ​នូវ​សត្វព្រៃ​ជា​ច្រើន​ប្រភេទ ក្នុង​នោះ​ក៏​មាន​វត្តមាន​ប្រភេទ​សត្វ​ជិត​ផុត​ពូជ​បំផុត និង​ជិត​ផុត​ពូជ​ជា​ច្រើន រួមមាន ពង្រួល ដំរីអាស៊ី និង​ឆ្កែ​ព្រៃ​ជា​ដើម​។

ការសិក្សាស្រាវជ្រាវជីវៈចម្រុះត្រូវបានធ្វើឡើង ចាប់ពីខែតុលា ឆ្នាំ២០២១ ដល់ខែមិថុនា ឆ្នាំ២០២២ ក្នុង គោលបំណងដើម្បីប្រមូលទិន្នន័យព័ត៌មានស្តីពីជីវៈចម្រុះក្នុងតំបន់ ដែលការសិក្សានេះផ្តោតលើក្រុមចំនួន ៥ ដែលរួមមាន ប្រចៀវ អ័រគីដេ ឧរង្គសត្វ សត្វស្លាប និងការប្រើប្រាស់ម៉ាស៊ីនថតស្វ័យប្រវត្តិ។

ការសិក្សាស្រាវជ្រាវសត្វប្រចៀវបានកត់ត្រានូវប្រភេទប្រចៀវជាច្រើន ដែលជាទិន្នន័យដ៏មានតម្លៃទាក់ទង នឹងវត្តមានប្រចៀវ នៅក្នុងតំបន់នេះ និងសារៈសំខាន់នៃតំបន់នេះសម្រាប់ការអភិរក្សសត្វប្រចៀវ។

ការសិក្សាប្រភេទឧរង្គសត្វ បានកត់ត្រា ៥១ ប្រភេទរួមមាន ថលជលិកសត្វ ២១ប្រភេទ ប្រភេទ (agamids) ៦ប្រភេទ តុកកែ ៤ប្រភេទ ប្រភេទ (skinks) ៥ ប្រភេទ ពស់ ១៤ប្រភេទ និងអណ្ដើក ១ប្រភេទ ហើយក្នុងការសិក្សា ស្រាវជ្រាវសត្វស្លាប បានកត់ត្រាប្រភេទសត្វស្លាបសរុបចំនួន ១៤២ ប្រភេទ មកពី៤៨គ្រួសារ។ ការសិក្សាអ័រគីដេ បានកត់ត្រាជាង ៥០ ប្រភេទ ពី ២៩ពួក។

ការសិក្សានេះក៏បានកត់ត្រាផងដែរនូវប្រភេទ រុក្ខជាតិចំនួន ៧ ប្រភេទបន្ថែមទៀតនៃគ្រួសារចំនួនប្រាំ រួមទាំងកំណត់ត្រាប្រភេទថ្មីចំនួនពីរសម្រាប់ប្រទេសកម្ពុជា ផងដែរ រួមមានប្រភេទកម្រ (Pycnospatha arietina) និង (aroid Amorphophallus tenuistylis)។

ចំណែកការសិក្សាដោយម៉ាស៊ីនថតស្វ័យប្រវត្ត បានកត់ត្រាសត្វព្រៃចំនួន ៤៤ ប្រភេទ ក្នុងនោះមាន ថនិកសត្វ ២៨ប្រភេទ និង សត្វស្លាប ១៥ប្រភេទ។ ក្នុងចំណោមប្រភេទសត្វទាំងនោះ មាន១២ ប្រភេទ ជាប្រភេទរងការ គំរាមកំហែងនៅក្នុងបញ្ជីក្រហមរបស់អង្គការ IUCN ១ប្រភេទ ជាប្រភេទជិតផុតពូជបំផុត ៣ ប្រភេទជាប្រភេទជិតផុតពូជ និង ៨ ប្រភេទទៀតជាប្រភេទងាយរងគ្រោះថ្នាក់។

ជា​មួយ​គ្នា​នេះ​ លោក អ៊ាង សុផល្លែត រដ្ឋមន្ត្រី​ក្រសួង​បរិស្ថាន បាន​គូស​បញ្ជាក់​ថា ជុំ​លទ្ធផលនៃរបាយការណ៍នេះ គឺ​បាន​ស​បញ្ជាក់​ឱ្យ​ឃើញ​ការយល់ដឹងកាន់​តែ​ច្រើនអំពីតម្លៃនៃជីវៈ ចម្រុះ​នៅ​តំបន់សំឡូត ដែលបង្ហាញ​ពីតម្លៃនៃបេតិកភណ្ឌធម្មជាតិតែមួយគត់នៃតំបន់នេះ និងបញ្ជាក់ពីការទទួលខុសត្រូវ រួមគ្នារបស់យើង​ក្នុងការការពារ និងអភិរក្សធនធានជីវៈចម្រុះទាំងអស់នោះ។

លោក រដ្ឋមន្ត្រី​ បាន​អះអាង​ថា «យើងកំពុងពង្រឹងកិច្ចខិតខំប្រឹងប្រែង ដើម្បីទប់ស្កាត់ការកាប់បំផ្លាញព្រៃឈើ និង​កត្តា​ផ្សេង​ៗ​ទៀត​ដែល​​បំផ្លាញ​ធម្មជាតិ នៅ​ក្នុង​តំបន់ប្រើប្រាស់ច្រើនយ៉ាង សំឡូតក្នុងភូមិ​សាស្ត្រ​ខេត្ត​បាត់ដំបង និង​ខេត្ត​ប៉ៃលិន»។

​ជាមួយនឹងកិច្ចសហការដ៏ល្អពីដៃគូអភិរក្ស ក្រសួងនឹងពង្រឹង ការគ្រប់គ្រងការការពារ និងអភិរក្សធនធានជីវៈចម្រុះរបស់ប្រទេសកម្ពុជាសម្រាប់មនុស្សជំនាន់ក្រោយ។ តាមរយៈការ ធ្វើការរួមគ្នា អាចរក្សាតុល្យភាពរវាងការអភិរក្ស និងការអភិវឌ្ឍប្រកបដោយចីរភាព ដោយធានាបានទាំងធនធានធម្ម ជាតិ និងភាពរីកចម្រើនរុងរឿងរបស់ប្រទេសជាតិ។

គួរ​ជម្រាប​ថា តំបន់សំឡូត ជាជម្រកនៃពពួករុក្ខជាតិ និងសត្វព្រៃកម្រជាច្រើនប្រភេទ រួមទាំងប្រភេទសត្វជិតផុតពូជបំផុត និងជិតផុតពូជមួយចំនួនផងដែរ។ ព័ត៌មានដែលទទួលបានតាមរយៈការសិក្សានេះ ពិតជាមានសារ:សំខាន់យ៉ាងខ្លាំង ក្នុងការរៀបចំគោលនយោបាយ និងការអនុវត្តការគ្រប់គ្រង ដើម្បីប្រើប្រាស់ធនធានទាំងនេះប្រកបដោយនិរន្តរភាព ដោយធានាបាននូវអភិរក្សរយៈពេលយូរអង្វែងនៃធនធានទាំងអស់នោះ៕

The post សត្វព្រៃជិតផុតពូជបំផុតជាច្រើនប្រភេទ បង្ហាញវត្តមាននៅតំបន់ប្រើប្រាស់ច្រើនយ៉ាងសំឡូត appeared first on Kampuchea Thmey Daily.

លោក ញឹម វណ្ណៈ អនុប្រធានការិយាល័យដែនជម្រកសត្វព្រៃភ្នំព្រេច លំផាត់ បានឲ្យដឹងថា កូនសត្វដំរីព្រៃ (ឈ្មោល) នោះ មានអាយុប្រហែល ៥ខែ ទំងន់ប្រហែល២០០គីឡូក្រាម។ មន្ត្រីឧទ្យានុរក្សបាននាំគ្នាស្ទាក់ព័ទ្ធចាប់ រួចបានពិនិត្យឃើញមាន ស្នាមរបួសនៅត្រង់ចំណុច ក ជើងមុខ ខាងស្តាំ។ ក្រោយពីមន្ត្រីឧទ្យានុរក្សពិនិត្យលើមុខរបួសដោយ យកចិត្តទុកដាក់ រួចធ្វើសេចក្តីសន្និដ្ឋានបានថា គឺរបួសដោយសារជាប់អន្ទាក់។ ចំពោះសុខភាពកូនសត្វដំរីឈ្មោលខាងលើ គឺនៅមានកម្លាំងមាំមួននៅឡើយ។

បច្ចុប្បន្នមន្ត្រីឧទ្យានុរក្សដែនជម្រកសត្វព្រៃលំផាត់ កំពុងមើលថែរក្សានៅទីស្នាក់ការកណ្ដាលរយ៉លើ ដែនជម្រកសត្វព្រៃលំផាត់ ភូមិមេមុំ ឃុំរយ៉ ស្រុកកោះញែក ខេត្តមណ្ឌលគិរី៕

អត្ថបទ៖ រៀម សុខហេង

The post កូនដំរីព្រៃ រងរបួសដោយសារអន្ទាក់ រត់រកជំនួយពីមន្ត្រីឧទ្យានុរក្ស នៅមណ្ឌលគិរី appeared first on Kampuchea Thmey Daily.

មានចម្ងាយប្រមាណជាង ៣០គីឡូម៉ែត្រពីទីរួមខេត្តមណ្ឌលគិរី សួនសត្វមយូរ៉ា បានទាក់ទាញភ្ញៀវទេសចរ​ឲ្យមកទស្សនា និងថតរូបជាមួយសត្វព្រៃ អស់រយៈពេលជាង ៨ឆ្នាំមកហើយ។ សួនសត្វនេះ លាតសន្ធឹងលើផ្ទៃដីសរុបជាង ១០ហិកតា និងមានសត្វចំនួន ៤ប្រភេទ គឺសត្វប្រើស ២៤ក្បាល ឈ្លូស ១ក្បាល ជ្រូកព្រៃ ៦ក្បាល និងក្ងោក ៩ក្បាល។ ប៉ុន្តែបើតាមការឲ្យដឹងពីលោក ជឿន ផា សួនសត្វនេះ មិនសូវមានអ្នកទស្សនាប៉ុន្មានទេ នារយៈពេលចុងក្រោយនេះ។

អ្នកថែទាំប្រចាំសួនសត្វដដែល បានបញ្ជាក់ដែរថា សត្វព្រៃទាំងអស់នឹងប្ដូរទៅកាន់ទីតាំងថ្មី នៅឯរមណីយដ្ឋានធម្មជាតិទឹកជ្រោះប៊ូស្រា ដោយសារទីតាំងបច្ចុប្បន្ននៅឆ្ងាយពីទីប្រជុំជន និងតំបន់ទេសចរណ៍។ យ៉ាងណាក្ដី លោកមិនទាន់អាចបញ្ជាក់បានទេ ពីពេលវេលាជាក់លាក់នៃការផ្លាស់ប្ដូរទីតាំងនេះ។ ការផ្លាស់ប្ដូរនេះ គឺចំពេលដែលក្រុមហ៊ុនអភិវឌ្ឍន៍រមណីយដ្ឋានទឹកជ្រោះប៊ូស្រា បានប្រកាសពីគម្រោងថ្មី ៣ ដែលក្នុងនោះ ក៏មានគម្រោងបង្កើតសួនសត្វថ្មីផងដែរ។ គម្រោងថ្មី២ទៀត គឺគម្រោងស្ពានកញ្ចក់ និងគម្រោងផ្លូវជិះម៉ូតូកង់បួន ATV ទៅកាន់ទឹកធ្លាក់ទី៣៕

អត្ថបទ៖ រៀម សុខហេង

The post សួនសង្រ្គោះសត្វព្រៃ ល្បីទាក់ទាញទេសចរនៅមណ្ឌលគិរី ជិតប្ដូរទីតាំងថ្មីហើយ appeared first on Kampuchea Thmey Daily.

ហេតុការណ៍បានកើតឡើងនៅវេលាទៀបភ្លឺ ថ្ងៃទី៦ ខែវិច្ឆិកា ឆ្នាំ២០២៤។ ជនរងគ្រោះមានឈ្មោះ ណ្អើក តូន ភេទប្រុស អាយុ៣៩ឆ្នាំ ជនជាតិ ព្នង សញ្ជាតិខ្មែរ មុខរបរកសិករ មានទីលំនៅបច្ចុប្បន្នភូមិពូទឺត ឃុំប៊ូស្រា ស្រុកពេជ្រាដា ខេត្តមណ្ឌលគិរី។

តាមប្រភពព័ត៌មាន មុនពេលកើតហេតុគេឃើញជនរងគ្រោះបានចេញពីផ្ទះទៅចម្ការវេលាម៉ោង៥រសៀលថ្ងៃទី៥ ខែវិច្ឆិកាឆ្នាំ២០២៤ ប៉ុន្តែបាត់យូរពេកទើបស្ត្រីជាប្រពន្ធទៅតាមដល់ចម្ការក៏ប្រទះឃើញប្តីរបស់ខ្លួនស្លាប់នៅកន្លែងដាក់អន្ទាក់នោះតែម្ដង។

អធិកានគបាលស្រុកពេជ្រាដា លោក ផ្លង ជំនិត បានឲ្យដឹងថា បន្ទាប់ពីមន្ត្រីជំនាញនៃអធិការដ្ឋាននគរបាលស្រុកពេជ្រាដា កោសល្យវិច័យរួចសន្និដ្ឋានថា ជនរងគ្រោះពិតជាបានដាក់អន្ទាក់ ប្រើឧបករណ៍អគ្គិសនី រួចភ្លេចខ្លួនដើរជាន់ខ្លួនឯងស្លាប់ពិតប្រាកដមែន។ បច្ចុប្បន្នសព ត្រូវបានមន្រ្តីជំនាញប្រគល់ជូនសាច់ញាតដើម្បីធ្វើបុណ្យតាមប្រពៃណី៕

អត្ថបទ៖ រៀម សុខហេង

The post ច្នៃឧបករណ៍អគ្គិសនីធ្វើជាអន្ទាក់សត្វ តែត្រូវជាប់ខ្លួនឯងស្លាប់ក្នុងព្រៃ appeared first on Kampuchea Thmey Daily.