របាយការណ៍របស់​វិទ្យាស្ថានសម្រាប់ការគ្រប់គ្រងការផ្គត់ផ្គង់ (ISM) បង្ហាញថា​ សន្ទស្សន៍អ្នកគ្រប់គ្រងការបញ្ជាទិញ（PMI) ដែលជារង្វាស់សកម្មភាពផលិតកម្ម​ ​បានធ្លាក់ចុះដល់ ៤៩,០ ពិន្ទុ នៅខែមីនា ពី​ ៥០,៣ ពិន្ទុ នៅខែកុម្ភៈ និងទាប​ជាងការរំពឹងទុករបស់សេដ្ឋវិទូ ៤៩,៥ ពិន្ទុ។ PMI ទាបជាង ៥០ បង្ហាញពីការធ្លាក់ចុះ ខណៈលើសនេះគឺបង្ហាញពីកំណើន​។

ផ្ទុយទៅវិញ សន្ទស្សន៍តម្លៃដែលទូទាត់រួចរាល់ (PPI)​ បានកើនឡើងដល់ ៦៩,៤ ពិន្ទុ នៅខែមីនា ដោយ​កើនពី ៦២,៤ ពិន្ទុ នៅខែ​កុម្ភៈ និង​ខ្ពស់បំផុតចាប់តាំងពីខែមិថុនា ឆ្នាំ ២០២២ ដែលឆ្លុះបញ្ចាំង​ថា ក្រុមហ៊ុនអាមេរិក​កំពុងចំណាយកាន់តែច្រើន។

ប្រធានវិទ្យាស្ថាន ISM លោក​ Timothy Fiore បានសរសេរ​ក្នុង​របាយការណ៍ថា​៖ «តម្រូវការ និងផលិតកម្មបានធ្លាក់ចុះ ហើយ​ការកាត់បន្ថយការងារក៏បន្ត​ ​ខណៈ​ក្រុមហ៊ុនសម្រួល​ផលិតកម្មឱ្យស្របទៅនឹងតម្រូវការ»។ លោក​បន្តថា​៖ «​កំណើន​តម្លៃបានកើនឡើង ដោយសារតែពន្ធគយ បណ្តាលឱ្យមានការធ្លាក់ចុះនៃការបញ្ជាទិញថ្មី ការធ្លាក់ចុះនៃការដឹកជញ្ជូនរបស់អ្នកផ្គត់ផ្គង់ និងកំណើនសារពើភ័ណ្ឌផលិតកម្ម»។

​ក្រុមហ៊ុនអាមេរិក ដែល​បាន​ឆ្លើយតបការស្ទង់មតិ បានលើកឡើង​ពីកំណើននៃភាពមិនច្បាស់លាស់​ដោយសារតែពន្ធគយ នៅពេលដែលក្រុមហ៊ុនព្យាយាមស្តុក​ទំនិញ​ឡើងវិញ មុនការចេញគោលនយោបាយនាពេលអនាគត ​ខណៈពន្ធឆ្លើយតបឱ្យស្មើគ្នាគ្រោងចូលជាធរមាននៅថ្ងៃពុធ ២ មេសា នេះ៕

The post ផលិតកម្ម​អាមេរិកធ្លាក់ចុះ ខណៈតម្លៃ​កើនឡើង ជំរុញដោយសម្ពាធពន្ធ appeared first on Kampuchea Thmey Daily.