សប្បុរសជន Archives - Kampuchea Thmey Daily

សមាគមអៃរាវត្តា និងសប្បុរសជន ចែកអំណោយជូនពលរដ្ឋ ២០០ គ្រួសារ និងកងទ័ពកម្ពុជា នៅខេត្តព្រះវិហារ

អ៊ិន ពិសី — Sun, 11 Jan 2026 03:39:21 +0000

សមាគមអៃរាវត្តា រួមជាមួយ ក្រុមហ៊ុនមេគង្គណិត MékongNet , សមាគមអាជីវកម្មកម្ពុជា-វៀតណាម (Vietnam-Cambodia Business Association) , សមាគមបារាំង សប្បុរសធម៌បន្ទាន់ Urgence Humanitaire , មូលនិធិសប្បុរសធម៌ទ្រទ្រង់វីរកងទ័ព និងជនភៀសសឹកដោយក្រុមហ៊ុន មុទិតា ត្រេឌីង , ភោជនីយដ្ឋានដើមចំប៉ា ព្រមទាំងសប្បុរសជនជាច្រើនទៀត បានរួមគ្នានាំយកអំណោយចែកជូនប្រជាពលរដ្ឋចំនួន ២០០ គ្រួសារ នៅភូមិធម្មជាតិសម្តេចតេជោ ឃុំស្រអែម ស្រុកជាំក្សាន្ត ខេត្តព្រះវិហារ។

តំណាងឱ្យសប្បុរសធម៌ដែលបានឧបត្ថម្ភទាំងថវិកា និងស្បៀងអាហារ លោកស្រី ខៃ ចិន្តា ប្រធានសមាគមអភិរក្សដំរីខ្មែរ អៃរាវត្តា បាននាំយកអង្ករ និងគ្រឿងឧបភោគបរិភោគសរុបប្រមាណ ១១ តោន ដើម្បីចែកជូនដល់កងទ័ពកម្ពុជានៅជួរមុខ ជនភៀសសឹកក្នុងជំរំ និងប្រជាពលរដ្ឋដែលនៅតែអត់ធ្មត់រស់នៅក្នុងភូមិកំណើត ដោយមិនបានរត់ចេញពីលំនៅឋាន ក្នុងអំឡុងពេលមានការវាយប្រហារពីចោរសៀមឈ្លានពាន កាលពីខែធ្នូ កន្លងទៅ។

នេះជាលើកទី ៣ ហើយ ដែលលោកស្រី ខៃ ចិន្តា បានចុះទៅចែកអំណោយដោយផ្ទាល់នៅតំបន់នេះ។ ក្នុងដំណើរនោះ លោកស្រីមានស្វាមី និងកូនៗ អមដំណើរ រួមជាមួយប្រធានសមាគម Urgence Humanitaire សប្បុរសធម៌បន្ទាន់ ក្រុមការងារតំណាងម្ចាស់ជំនួយ និងសប្បុរសជនផ្សេងៗ។ អំណោយដែលបានចែកជូន រួមមាន ថ្នាំពេទ្យ អង្ករ មី អំបិល ស្ករស ខ្ទឹមស ឆៃប៉ូវ ត្រីប្រឡាក់ ទឹកស៊ីអ៊ីវ ទឹកត្រី ត្រីខ សៀងឆា សាប៊ូ នំស្ករគ្រាប់ បារី ថ្នាំប៉ូវ និងអាហារសម្រាប់ទាហាន ទឹកសុទ្ធ សម្លៀកបំពាក់កុមារ និងសម្ភារៈសិក្សា ជាច្រើនប្រភេទទៀត។

ថ្វីត្បិតតែអំណោយទាំងនេះ មិនអាចប្រៀបធៀបទៅនឹងតម្រូវការពិតប្រាកដរបស់ជនភៀសសឹក និងកងទ័ពកម្ពុជានៅជួរមុខបានទាំងស្រុងក្តី ប៉ុន្តែទឹកចិត្តសប្បុរស និងក្តីស្រឡាញ់ដែលផ្តល់ជូន គឺមានតម្លៃយ៉ាងធំធេង មិនអាចវាស់វែងបាន។

គួររំលឹកថា កាលពីចុងខែធ្នូ កន្លងទៅ សមាគមអៃរាវត្តា ក៏បានឧបត្ថម្ភថវិកាចំនួន ៥,០០០ ដុល្លារអាមេរិក ដើម្បីជួយគាំទ្រដល់សមរភូមិមុខ និងជនភៀសសឹក នៅវិមាន ៧ មករា ផងដែរ។

សមាគមអៃរាវត្តា បានបញ្ជាក់ថា ក្រៅពីបេសកកម្មអភិរក្សសត្វដំរី ដែលជាសត្វកម្រ សមាគម ក៏ចូលរួមសកម្មក្នុងការងារសប្បុរសធម៌សង្គមផងដែរ។ ទោះជាប្រឈមនឹងការលំបាកផ្នែកហិរញ្ញវត្ថុក៏ដោយ សមាគម នៅតែបន្តខិតខំស្វែងរកជំនួយ ដើម្បីគាំទ្រកងទ័ពកម្ពុជា ដែលជាវីរជនដ៏ក្លាហាន បានបូជាជីវិតការពារបូរណភាពទឹកដីជាតិ។

ជាមួយគ្នានេះ សមាគមអៃរាវត្តា ក៏បានអំពាវនាវ និងសូមស្វាគមន៍ដល់សប្បុរសជនទាំងអស់ ដែលមានបំណងចូលរួមជួយឧបត្ថម្ភ និងរួមដៃជាមួយសមាគម ក្នុងការងារមនុស្សធម៌ នាពេលបន្តទៀត៕

The post សមាគមអៃរាវត្តា និងសប្បុរសជន ចែកអំណោយជូនពលរដ្ឋ ២០០ គ្រួសារ និងកងទ័ពកម្ពុជា នៅខេត្តព្រះវិហារ appeared first on Kampuchea Thmey Daily.

រដ្ឋបាលខេត្តកណ្ដាលទទួលបានអំណោយពីសប្បុរសជន សម្រាប់ជូនដល់វីរកងទ័ពជួរមុខនិង ជនភៀសសឹក

Ung Meng — Tue, 16 Dec 2025 07:25:24 +0000

លោក គួច ចំរើន អភិបាល នៃគណៈអភិបាលខេត្តកណ្ដាល អញ្ជើញទទួលអំណោយ ជាថវិកា គ្រឿឧបភោគបរិភោគ និងសម្ភារៈប្រើប្រាស់មួយចំនួន ពីសប្បុរសជននានា ដើម្បីជូនដល់ជនភៀសសឹកត្រូវបានជម្លៀសខ្លួនមកកាន់មណ្ឌលសុវត្ថិភាពនានា នៅតាមបន្ទាត់ព្រំដែនកម្ពុជា-ថៃ និងជូនដល់វីរកងទ័ពជួរមុខ ដែលបាននឹងកំពុងខិតខំតស៊ូការពារបូរណភាពទឹកដី ប្រកបដោយភាពក្លាហាន មុះមុត ប្រឆាំងនឹងសត្រូវឈ្លានពានថៃ ដោយស្មារតីស្នេហាជាតិមាតុភូមិ។

ក្នុងនោះផងដែរលោក គួច ចំរើន សូមថ្លែងអំណរគុណយ៉ាងជ្រាលជ្រៅចំពោះ សប្បុរសជន ដែលបានចំណាយនូវទ្រព្យសម្បិត្តផ្ទាល់ខ្លួន ដើម្បីជូនដល់ជនភៀសសឹក និងជាការលើកទឹកចិត្តដល់វីរៈកងទ័ពរបស់យើងមានស្មារតីក្លាហាន មុះមុត ខិតខំតស៊ូការពារបូរណភាពទឹកដី ប្រឆាំងនឹងសត្រូវឈ្លានពានថៃ ដែលនេះសបញ្ជាក់ឱ្យឃើញថា បងប្អូនខ្មែរគ្រប់ស្រទាប់វណ្ណៈបានសាមគ្គីគ្នាជាធ្លុងមួយក្លាយជាខឿនការពារជាតិប្រជាជនគឺសមរភូមិក្រោយជួយដល់សមរភូមិមុខ និងបងប្អូនប្រជាពលរដ្ឋ ដែលត្រូវបានជម្លៀសខ្លួនមកកាន់មណ្ឌលសុវត្ថិភាពនានា។ លោកអភិបាលខេត្ត បានសន្យាថាអំណោយ និងសម្ភារៈទាំងអស់នេះ រដ្ឋបាលខេត្តកណ្តាល និងត្រូវបែងចែកដឹកជញ្ជូនទៅជូនកងទ័ពជួរមុខភ្លាមៗ និងប្រជាពលរដ្ឋ ដែលជាជនភៀសសឹកដែលកំពុងខ្វះខាតផងដែរ។

ជាចុងក្រោយក្នុងនោមរដ្ឋបាលខេត្តកណ្ដាល សូមបួងសួងដល់គុណព្រះរតនត្រ័យកែវទាំងបី សូមព្រះអង្គជួយប្រោះព្រំ ប្រសិទ្ធពរជ័យ បវរសួស្តី មហាប្រសើរ សូមជួយថែរក្សាដល់ សប្បុរសជនទាំងអស់ សូមទទួលបាននូវពុទ្ធពរទាំងបួនប្រការគឺ៖ អាយុ វណ្ណៈ សុខៈ ពលៈកុំបីឃ្លៀងឃ្លាតឡើយ៕

The post រដ្ឋបាលខេត្តកណ្ដាលទទួលបានអំណោយពីសប្បុរសជន សម្រាប់ជូនដល់វីរកងទ័ពជួរមុខនិង ជនភៀសសឹក appeared first on Kampuchea Thmey Daily.

រដ្ឋបាលរាជធានី ទទួលបានថវិកាជិត ៩ ម៉ឺនដុល្លារ និងជាង ៥៣៧ លានរៀល ព្រមទាំងគ្រឿងឧបភោគបរិភោគ ថ្នាំពេទ្យ សម្ភារជាច្រើនមុខ ពីសប្បុរសជន

អ៊ិន ពិសី — Mon, 15 Dec 2025 09:24:49 +0000

រដ្ឋបាលរាជធានីភ្នំពេញ ទទួលបានថវិកាជិត ៩ ម៉ឺនដុល្លារ ប្រាក់ខ្មែរជាង ៥៣៧ លានរៀល និងគ្រឿងឧបភោគ បរិភោគ ថ្នាំពេទ្យ សម្ភារ ជាច្រើនមុខ ពីសប្បុរសជន ដើម្បីត្រៀមរៀបចំបែងចែកជូនទៅវីរកងទ័ពជួរមុខកម្ពុជា និងប្រជាពលរដ្ឋជាជនភៀសសឹក នៅតាមមណ្ឌលសុវត្ថិភាពនានា ដែលនេះពិតជាបានបញ្ជាក់ពីខឿនការពារជាតិប្រជាជន ក្រោមការដឹកនាំរបស់ សម្ដេចធិបតី ហ៊ុន ម៉ាណែត នាយករដ្ឋមន្ត្រី ដោយក្រោយពីផ្ទុះសង្គ្រាមជាថ្មីពីក្រុមទាហានថៃឈ្លានពានចូលបូរណភាពទឹកដីកម្ពុជា។

នៅថ្ងៃទី ១៥ ធ្នូ នេះ សប្បុរសជន ក្រុមហ៊ុនឯកជន និងស្ថាប័នរដ្ឋ បាននិងកំពុងបន្តទទួលអំណោយពីសប្បុរសជន នៅសាលារាជធានីភ្នំពេញ ក្រោមការអញ្ជើញទទួលដោយ លោក សុខ ពេញវុធ និងលោក ពេញ ធារម្យ អភិបាលរងរាជធានីភ្នំពេញ តំណាងលោក ឃួង ស្រេង អភិបាលរាជធានីភ្នំពេញ ដែលមានដូចជា ៖ រដ្ឋបាលខណ្ឌដង្កោ , រដ្ឋបាលខណ្ឌដូនពេញ , រដ្ឋបាលខណ្ឌចំការមន , គណៈកម្មការផ្សារសាមគ្គី , ក្រុមហ៊ុនឯកជន និងសប្បុរសជនជាច្រើនរូបទៀត។

ក្នុងឱកាសនោះ លោក សុខ ពេញវុធ និងលោក ពេញ ធារម្យ បានថ្លែងនូវការអរគុណយ៉ាងជ្រាលជ្រៅបំផុតចំពោះសប្បុរសជនទាំងអស់ដែលបានចូលរួមចែករំលែកនូវធនធានទៅតាមលទ្ធភាពរៀងៗ ខ្លួន ដើម្បីឧបត្ថម្ភដល់វីរកងទ័ពជួរមុខ និងក្រុមគ្រួសារពលរដ្ឋជាជនភៀសសឹកដែលបាននិងកំពុងជម្លៀសខ្លួនចេញពីផ្ទះសម្បែងទៅស្នាក់នៅទីកន្លែងសុវត្ថិភាព ដែលនេះពិតជាបានបង្ហាញឱ្យឃើញពីសាមគ្គីភាពជាធ្លុងមួយខ្មែរស្រលាញ់ខ្មែរ។

គិតត្រឹមព្រឹកថ្ងៃទី ១៥ ធ្នូ នេះ មានសប្បុរសជន ក្រុមហ៊ុនឯកជន និងស្ថាប័នរដ្ឋ ប្រមាណជាង ១៣០ ហើយ ដែលបានសម្រុកយកថវិកា គ្រឿងឧបភោគ បរិភោគ និងសម្ភារ មកប្រគល់ជូនរដ្ឋបាលរាជធានីភ្នំពេញ។

បើតាមលោកស្រី ដោ សម្ផស្ស នាយិការងរដ្ឋបាលរាជធានីភ្នំពេញ និងជាអ្នកនាំពាក្យរដ្ឋបាលរាជធានីភ្នំពេញ បានឱ្យដឹងថា គិតត្រឹមម៉ោង ១៨:០០ នាទី ថ្ងៃទី ១៤ ខែធ្នូ ឆ្នាំ ២០២៥ រដ្ឋបាលរាជធានីភ្នំពេញ បាននិងកំពុងបន្តទទួលនូវការបរិច្ចាគសរុបជាថវិកាចំនួន ៥៣៧.០១៨.៣២៤ រៀល ប្រាក់ដុល្លារចំនួន ៨៨.៩៣៤ ដុល្លារអាមេរិក និងគ្រឿងឧបភោគ បរិភោគ ថ្នាំពេទ្យ សម្ភារផ្សេងៗ ជាច្រើនមុខទៀត។ សូមគោរពថ្លែងអំណរគុណនូវទឹកចិត្តសប្បុរសធម៌របស់ប្រជាពលរដ្ឋក្នុងស្មារតីខ្មែរជួយជាតិខ្មែរ៕

អត្ថបទ ៖ ស្រីរ័ត្ន

The post រដ្ឋបាលរាជធានី ទទួលបានថវិកាជិត ៩ ម៉ឺនដុល្លារ និងជាង ៥៣៧ លានរៀល ព្រមទាំងគ្រឿងឧបភោគបរិភោគ ថ្នាំពេទ្យ សម្ភារជាច្រើនមុខ ពីសប្បុរសជន appeared first on Kampuchea Thmey Daily.

ស្មារតីសាមគ្គីភាពក្នុងនាមឈាមជ័រជាខ្មែរ កាន់តែខ្លាំងក្លា បន្តផ្តល់ជំនួយឧបត្ថម្ភទៅកាន់សមរភូមិមុខ

Ung Meng — Mon, 15 Dec 2025 02:49:59 +0000

កាលពីថ្ងៃទី១៤ ខែធ្នូ ឆ្នាំ២០២៥ មន្ត្រីរាជការ នៃរដ្ឋបាលខណ្ឌ៧មករា ក៏ដូចជាសប្បុរសជន ដឹកនាំដោយលោក ថេង សុថុល អភិបាល ខណ្ឌ៧មករា និងលោកស្រី ឥន លីម្មី បានរៀបចំច្រកអំបុកសាមគ្គី ក្នុងការផ្តល់ជួយទៅកាន់វីរជនកងទ័ពយើង និងប្រជាជនភៀសសឹក ដើម្បីជាការរួមចំណែកក្នុងគ្រាដែលប្រទេសជាតិ ត្រូវបានទទួលរងនូវការឈ្លានពានទឹកដីពីប្រទេសជិតខាង។

កម្លាំងស្មារតីសាមគ្គីភាពក្នុងនាមឈាមជ័រជាខ្មែរ ខ្មែររួមគ្នាជាធ្លុងមួយកាន់តែផុលផុសខ្លាំងក្លា ក្នុងការបន្តផ្តល់ជំនួយឧបត្ថម្ភជាច្រើន ទៅកាន់សមរភូមិមុខ ជូនវីរជនកងទ័ព និងជនភៀសសឹក។

លោកស្រី ស៊ូ គឹមឡេង ជាប្រជាពលរដ្ឋ ជាសប្បុរសជនដែលបានចូលរួមជាមួយសកម្មភាពសប្បុរស ក្នុងការផ្តល់ជំនួយឧបត្ថម្ភនិង ចូលរួមសកម្មភាពច្រកអំបុក បានបង្ហាញការយល់ឃើញថា ក្នុងកាលៈទេសៈពេលនេះ ប្រជាជនកម្ពុជាពុំអាច នៅស្ងៀមឈរឱបដៃមើលប្រទេសជាតិខ្លួនឯងត្រូវបានចោរឈ្លានពាននោះឡើយ ដូច្នោះហើយកម្លាំងសាមគ្គីភាព គឺជាផ្នែកដ៏សំខាន់បំផុតក្នុងការជួយគ្នា ដើម្បីការពារអធិបតេយ្យភាពទឹកដី។

គួរបញ្ជាក់ គិតត្រឹមថ្ងៃទី១៤ ខែធ្នូ ឆ្នាំ២០២៥នេះ មានរយៈពេល០៨ថ្ងៃហើយ ដែលកងកម្លាំងយោធាប្រទេសថៃ បានបើកការបាញ់ប្រហារឈ្លានពានចូលមកក្នុងដែនអធិបតេយ្យភាពរបស់កម្ពុជាយ៉ាងសាហាវព្រៃផ្សៃបំផុត ដោយបានបំផ្លិចបំផ្លាញហេដ្ឋារចនាសម្ព័ន្ធ ផ្ទះសម្បែងពលរដ្ឋ ,ប្រជាជនរ៉ាប់ម៉ឺននាក់ត្រូវភៀសសឹក ពិសេសបានសម្លាប់អាយុជីវិតពលរដ្ឋស្លូតត្រង់ជាច្រើនផងដែរ៕ អត្ថបទ ៖ សុភា

The post ស្មារតីសាមគ្គីភាពក្នុងនាមឈាមជ័រជាខ្មែរ កាន់តែខ្លាំងក្លា បន្តផ្តល់ជំនួយឧបត្ថម្ភទៅកាន់សមរភូមិមុខ appeared first on Kampuchea Thmey Daily.

រដ្ឋបាលខេត្តសៀមរាប បន្តទទួលអំណោយពីសប្បុរសជន ដើមី្បទ្រទ្រង់ដល់ជនភៀសសឹក និងវីរកងទ័ពជួរមុខ

Ken Malis — Fri, 01 Aug 2025 08:30:00 +0000

គិតត្រឹមថ្ងៃទី៣១ ខែកក្កដា ឆ្នាំ២០២៥ រដ្ឋបាលខេត្តសៀមរាប បានបន្តទទួលអំណោយពីសប្បុរសជនក្នុងមូលដ្ឋានខេត្ត និងបណ្តាក្រុមហ៊ុន សប្បុរសជនក្នុងស្រុក ដែលបានបរិច្ចាគជាថវិកា ស្បៀងអាហារ សម្ភារៈ ដើម្បីយកទៅជូនដល់វីរកងទ័ពជួរមុខ និងជនភៀសសឹក បន្ទាប់ពីមានជម្លោះប្រដាប់អាវុធបង្កឡើងដោយទាហានថៃឈ្លានពានមកលើដែនអធិបតេយ្យភាពរបស់កម្ពុជា។

ក្នុងពិធីទទួលអំណោយ មានវត្តមានរបស់លោក លី សំរិទ្ធ ប្រធានក្រុមប្រឹក្សាខេត្ត លោក ប្រាក់ សោភ័ណ អភិបាល នៃគណៈអភិបាលខេត្ត លោកនាយករដ្ឋបាលសាលាខេត្ត និង អស់លោក លោកស្រីមន្ត្រីរាជការ សហភាពសហព័ន្ធយុវជនកម្ពុជាខេត្ត និងក្រុមការងារផងដែរ។

ក្នុងឱកាសនោះ លោក ប្រាក់ សោភ័ណ បានថ្លែងអំណរគុណយ៉ាងជ្រាលជ្រៅបំផុតចំពោះទឹកចិត្តសប្បុរសជនទាំងនៅក្នុងខេត្ត និងបណ្តាក្រុមហ៊ុន មកពីបណ្តារាជធានី ខេត្តនានា ដែលតែងតែចូលរួមចែករំលែកធនធាន តាមលទ្ធភាពរៀងៗខ្លួន ដើម្បីឧបត្ថម្ភដល់វីរៈកងទ័ពជួរមុខ និងក្រុមគ្រួសារប្រជាពលរដ្ឋ ដែលបាន និងកំពុងជម្លៀសចេញ ពីផ្ទះសម្បែងមកស្នាក់នៅទីកន្លែងសុវត្ថិភាពក្នុងភូមិសាស្ត្រខេត្តសៀមរាប។ សកម្មភាពទាំងនេះ ពិតជាបានបង្ហាញឱ្យឃើញពីសាមគ្គីភាពជាធ្លុងមួយខ្មែរស្រលាញ់ខ្មែរ។

លោកអភិបាលខេត្ត បានអរគុណនូវទឹកចិត្តរបស់ប្រជាពលរដ្ឋ និងសប្បុរសជនក្នុងស្មារតីខ្មែរ ជួយខ្មែរ នៃមហាសាមគ្គីគ្រួសារខ្មែរ។ ក្នុងនោះដែរ លោកក៏បានគូសបញ្ជាក់ថា ចំពោះអំណោយដែលសប្បុរសជន ទាំងជាតិ អន្តរជាតិ ដែលបានផ្តល់ជូនតាមរយៈរដ្ឋបាលខេត្តសៀមរាបមកដល់ពេលនេះ បានធ្វើការបែងចែក ផ្តល់ជូនដល់បងប្អូនដែលបានមកស្នាក់នៅទីកន្លែងមានសុវត្ថិភាព ទៅតាមបណ្តាក្រុង ស្រុក ព្រមទាំងបានដឹកជញ្ជូនយកទៅប្រគល់ជូនដល់កងកម្លាំងជួរមុខ ដែលកំពុងឈរជើងការពារនៅតាមបណ្តោយព្រំដែន។

សូមបញ្ជាក់ផងដែរថា អំណោយទាំងនេះ រដ្ឋបាលសាលាខេត្ត បានធ្វើការអំពាវនាវដល់ លោក លោកស្រី ជាពាណិជ្ជករ សិប្បករ វិនិយោគិន និងសប្បុរសជន ព្រមទាំងប្រជាពលរដ្ឋទាំងអស់ ចូលរួមបរិច្ចាគអំណោយជាថវិកា ស្បៀងអាហារ គ្រឿងឧបភោគបរិភោគ សម្ភារៈប្រើប្រាស់ផ្សេងៗ ឬថ្នាំពេទ្យ តាមលទ្ធភាព និងសទ្ធាជ្រះថ្លារៀងៗ ខ្លួន ដើម្បីចូលរួមគាំទ្រ និងលើកទឹកចិត្តដល់វីរកងទ័ពជួរមុខកម្ពុជា ដែលបាន និងកំពុងប្រយុទ្ធយ៉ាងអង់អាចក្លាហាន ដើម្បីការពារបូរណភាពទឹកដី តតាំងជាមួយសត្រូវឈ្លានពានមកលើដែនអធិបតេយ្យភាពរបស់កម្ពុជា។ ព្រមទាំងជួយដល់ប្រជាពលរដ្ឋដែលត្រូវបានជម្លៀសខ្លួនមកពីបណ្ដាខេត្តជាប់ព្រំដែនកម្ពុជា-ថៃ មកកាន់ទីកន្លែងសុវត្ថិភាពនានាក្នុងភូមិសាស្ត្រខេត្តសៀមរាប។

ម៉្យាងទៀត អំណោយទាំងនេះ បានដឹកយកទៅជូនតាមទីតាំងកន្លែងជនភៀសសឹកស្នាក់នៅតាមបណ្តាក្រុង ស្រុក ក្នុងខេត្តផងដែរ៕

ដោយ៖ គឿន វេត

The post រដ្ឋបាលខេត្តសៀមរាប បន្តទទួលអំណោយពីសប្បុរសជន ដើមី្បទ្រទ្រង់ដល់ជនភៀសសឹក និងវីរកងទ័ពជួរមុខ appeared first on Kampuchea Thmey Daily.

ចៅសង្កាត់បារ៉ុង ដឹកនាំគណៈប្រតិភូនាំយកថវិកា និងសម្ភារប្រគល់ជូនកងទ័ពជួរមុខការពារព្រំដែនកម្ពុជា-ថៃ

Sokhom Khon — Sat, 05 Jul 2025 02:10:24 +0000

ដោយឈរលើស្មារតីស្នេហាជាតិ លោក ឯម ទី ចៅសង្កាត់បារ៉ុង ក្រុងអរិយក្សត្រ ខេត្តកណ្តាល កាលពីថ្ងៃទី១ ខែកក្កដាឆ្នាំ២០២៥ បាននាំយកថវិកា និងសម្ភារផ្ទាល់ខ្លួនប្រគល់ជូនដល់ដៃកងទ័ពនៅជួរមុខការពារព្រំដែនកម្ពុជា-ថៃ។

ថវិកា និងសម្ភារប្រគល់ជូនកងទ័ពរួមមាន៖ ១-ថវិកាចំនួន៤០លានរៀល ២-អង្រឹង១០០០ ៣-ស៊ីម៉ង់ត៍៤០តោន។

ឯកឧត្តម ភឺន ផល្លា ជំនួយការផ្ទាល់សម្ដេចតេជោ ហ៊ុន សែន និងជាអនុប្រធានចលនាកសាងបក្សរាជធានី-ខេត្ត សូមថ្លែងអំណរគុណយ៉ាងជ្រាលជ្រៅបំផុតដល់លោក ឯម ទី ចៅសង្កាត់បារ៉ុង ក្រុងអរិយក្សត្រ ខេត្តកណ្តាល ដែលបានចូលរួមជួយផ្ដល់អំណោយជាថវិកា និងសម្ភារៈប្រើប្រាស់ផ្សេងៗដើម្បីឧបត្ថម្ភជូនដល់កងទ័ពដែលកំពុងឈរជើងការពារទឹកដីនៅតាមបន្ទាត់ព្រំដែនជួរមុខ និងសូមប្រសិទ្ធពរជ័យ សិរីសួស្តី ជូនចំពោះ ដល់លោក ឯម ទី ព្រមទាំងក្រុមគ្រួសារ សូមជួបនូវពុទ្ធពរទាំងបួនប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

សូមជម្រាបជូនថា សម្ភារដូចជាអង្រឹង១០០០ ក្រមា២០០០ ស៊ីម៉ង់ត៍៤០តោន ហើយសាច់ប្រាក់សុទ្ធចំនួន៤០លានរៀលដល់នាយឧត្តមសេនីយ៍ ម៉ៅ សុផាន់។ នាយឧត្តមសេនីយ៍ ម៉ៅ សុផាន់ ជួសមុខឱ្យកងទ័ពខេមរភូមិន្ទបានថ្លែងអំណរអរគុណយ៉ាងជ្រាលជ្រៅចំពោះក្រុមការងារដែលដឹកនាំដោយលោក ឯម ទី ព្រមទាំងសមាជិកសមាជិកាបងប្អូនប្រជាពលរដ្ឋដែលបានចូលរួមគាំទ្រដល់កងកម្លាំងប្រដាប់អាវុធដែលកំពុងឈរជើងការពារព្រំដែនកម្ពុជា-ថៃ៕

The post ចៅសង្កាត់បារ៉ុង ដឹកនាំគណៈប្រតិភូនាំយកថវិកា និងសម្ភារប្រគល់ជូនកងទ័ពជួរមុខការពារព្រំដែនកម្ពុជា-ថៃ appeared first on Kampuchea Thmey Daily.

ពីក្មេងស្រីក្រីក្រកម្ពុជា ក្លាយជាសប្បុរសជនលំដាប់ពិភពលោក

Sokhom Khon — Fri, 27 Jun 2025 02:39:23 +0000

នេះជាដំណើរជីវិតដ៏អស្ចារ្យរបស់ស្ត្រីម្នាក់ ដែលបានប្រើប្រាស់ភាពឈឺចាប់កាលពីកុមារភាព និងរឿងរ៉ាវលំបាកជាច្រើនក្នុងអតីតកាល ទៅជាស្មារតីនៃការតស៊ូរហូតក្លាយជាបុគ្គលមួយរូប ដែលទទួលបានជោគជ័យក្នុងជីវិត ដោយបានសាបព្រួសនូវអំពើសប្បុរសមកកាន់ប្រទេសកម្ពុជា ជាទឹកដីកំណើត ក៏ដូចជាមនុស្សម្នាជាច្រើននៅលើពិភពលោកផងដែរ។ នោះគឺលោកស្រី សុភា បុត្រឈើ។

លោកស្រី សុភា បុត្រឈរ ( Sophea Bottcher) កើតនៅឆ្នាំ១៩៧៩ ក្នុងខេត្តកំពង់ធំ ប្រទេសកម្ពុជា។ ពេលនោះ ប្រទេសទើបចេញពីរបបប្រល័យពូជសាសន៍ប៉ុល ពត ដែលនាំឲ្យជីវិតមនុស្សរាប់លាននាក់រងគ្រោះ ក្នុងនោះក៏មានក្រុមគ្រួសាររបស់អ្នកស្រីផងដែរ។ ក្នុងបរិយាកាសដ៏ស្ទើរតែមិនអាចរស់នៅបាននោះ លោកស្រីបានធំឡើងដោយទទួលបានការចិញ្ចឹមបីបាច់ថែរក្សាពីជីដូនជីតា ដែលពោរពេញដោយក្តីស្រឡាញ់ ដ្បិតថាជីវភាពក្រីក្រលំបាក និងមិនបានទទួលភាពកក់ក្ដៅពីឪពុកម្ដាយដោយផ្ទាល់យ៉ាងណាក៏ដោយ។

ជីវិតក្មេងស្រីម្នាក់នៅជិតព្រៃភ្នំ ពោរពេញដោយធម្មជាតិ និងសព្វសត្វនានា។ តែការរស់នៅពោរពេញដោយការតស៊ូ រែកទឹកក្រោមថ្ងៃក្ដៅ ពុះអុស ប្រមូលសំណល់អាវុធ ដើម្បីលក់រកចំណូលជួយគ្រួសារ ព្រមទាំងខិតខំបំពេញការតព្វកិច្ចជាចៅស្រីដ៏ល្អម្នាក់សម្រាប់ជីដូនជីតារបស់នាង។ ដ្បិតតែជីវិតជួបការលំបាក ឆ្ងាយសាលារៀនយ៉ាងណាក៏ដោយ ប៉ុន្តែ សុភា តែងខិតខំតស៊ូរៀនសូត្រដូចទៅនឹងកូនចៅអ្នកភូមិដទៃ និងជាសិស្សពូកែប្រចាំសាលាផងដែរ។ នៅពេលបញ្ចប់ថ្នាក់វិទ្យាល័យ លោកស្រីបានបន្តមកសិក្សានៅភ្នំពេញ និងបានបញ្ចប់វគ្គបណ្តុះបណ្តាលផ្នែកគណនេយ្យ និងកុំព្យូទ័រ។

សុភា បានចាប់ផ្តើមការងារតូចៗដូចជា រោងចក្រ និងបុគ្គលិកតាមហាងលក់ទំនិញ រហូតបានបានបំពេញការងារផ្នែកសេវាកម្មនៅសណ្ឋាគារ Raffles Hotel Le Royal។ នៅទីនោះ លោកស្រីទទួលបានពាន “បុគ្គលិកឆ្នើមប្រចាំឆ្នាំ” ជាច្រើនឆ្នាំដោយសារកិច្ចខិតខំប្រឹងប្រែង។ ដ្បិតតែមានការងារសមរម្យប្រាក់ខែអាចចិញ្ចឹមជីវិតបានប្រសើរបន្តិចក៏ពិតមែន តែស្ត្រីរូបនេះនៅតែបន្តអភិវឌ្ឍខ្លួនជាបន្តបន្ទាប់ ព្រមទាំងកសាងទំនាក់ទំនងល្អជាមួយមជ្ឍដ្ឋានដទៃ។

ជាដំណាក់កាលនៃជីវិតថ្មីមួយ លោកស្រីបានធ្វើការជាជំនួយការផ្ទាល់ (Personalassistent) របស់វេជ្ជបណ្ឌិតល្បីឈ្មោះ Dr. Beat Richner នៅមន្ទីរពេទ្យគុន្ធបុប្ផា។ បទពិសោធន៍នោះកាន់តែធ្វើឱ្យលោកស្រីឃើញថា សប្បុរធម៌អាចផ្លាស់ប្តូរជីវិតមនុស្សបានពិតប្រាកដ។ ក្នុងដំណើរវែងឆ្ងាយជាមួយលោក Dr Beat Richner បានធ្វើឱ្យលោកស្រីកាន់តែមានជំនក់ចិត្តជាមួយនឹងអំពើសប្បុរសធម៌។

«បំណងមួយតាំងពីនៅក្មេង…ខ្ញុំតែងតែសន្យាចិត្តថា បើមួយថ្ងៃអាចក្លាយជាមានទ្រព្យសម្បត្តិជាច្រើន ខ្ញុំចង់ជួយមនុស្សក្រីក្រ កុមារ និងអ្នកគ្មានផ្ទះសម្បែងឱ្យបានច្រើន។ នេះជាក្តីប្រាថ្នាដែលខ្ញុំបានរក្សាទុកក្នុងបេះដូងរហូតមក»។

សេចក្ដីស្រមៃបានក្លាយជាការពិត ចំពោះចិត្តសប្បុរស ឧស្សាហ៍ព្យាយាម និងសេចក្តីស្រលាញ់បរិសុទ្ធ បុរសជាអ្នកជោគជ័យម្នាក់បានជួបនាង។ គាត់គឺជាមហាសេដ្ឋីអាល្លឺម៉ង់ ដែលមានបុគ្គលិកជិត ១០០០ នាក់ និងឈ្នះពានរង្វាន់ “អ្នកលក់អនឡាញល្អបំផុត ២០២៣/២០២៤” នៅអឺរ៉ុប។ គាត់បានស្រឡាញ់នាងមិនមែនត្រឹមតែសម្រស់ ឬអតីតកាលទេ ប៉ុន្តែស្រឡាញ់ចិត្តបរិសុទ្ធ និងភាពស្មោះត្រង់របស់នាង។

បច្ចុប្បន្ននេះ លោកស្រី និងស្វាមីបានបរិច្ចាគប្រាក់ចំនួន ១២ លានអឺរ៉ូ ទៅដល់ប្រទេសកម្ពុជា អាល្លឺម៉ង់ និងប្រទេសផ្សេងៗ។ ពួកគេបានជួយកុមារកំព្រាចំនួនជាង ២០០នាក់ តាមរយៈមជ្ឈមណ្ឌលមែកឈើរបស់លោក ផន ផល្លា ជួយអ្នកមានពិការភាព ជនចាស់ជរា អ្នកគ្មានផ្ទះសម្បែង សូម្បីតែសត្វដែលត្រូវការជំនួយ។ ពួកគេក៏បានសាងសង់ផ្ទះ និងផ្តល់អាហារ ការអប់រំ និងសុវត្ថិភាពដល់មនុស្សក្នុងតំបន់ដែលរងនូវការឈឺចាប់ ជាពិសេសដោយសារសង្គ្រាមជាច្រើន។ “ការធ្វើសប្បុរធម៌សម្រាប់ខ្ញុំ មិនមែនជាកាតព្វកិច្ចទេ វាជាស្មារតី ដែលនាំមកពីបេះដូង។”

លោកស្រី សុភា បុត្រឈើ ជាស្ត្រីកម្ពុជាដែលបង្ហាញនូវគំរូនៃភាពសាមញ្ញ ភាពសប្បុរស និងការរស់នៅដើម្បីជួយអ្នកដទៃ។ លោកស្រីមិនត្រឹមជាឧត្តមភរិយារបស់មហាសេដ្ឋីទេ ប៉ុន្តែជាម្តាយនៃសេចក្ដីសង្ឃឹមសម្រាប់មនុស្សជាច្រើនជុំវិញពិភពលោក៕

The post ពីក្មេងស្រីក្រីក្រកម្ពុជា ក្លាយជាសប្បុរសជនលំដាប់ពិភពលោក appeared first on Kampuchea Thmey Daily.

ឧកញ៉ា ឡេង និមល តំណាងអ្នកឧកញ៉ា ឡេង ណាវ៉ាត្រា ដឹកនាំប្រតិភូយុវជនបូជាការពារយុត្តិធម៌ គោរពវិញ្ញាណក្ខន្ធសពព្រឹន្ទបាលឯក សួន រ៉ោន ពលីជីវិតដោយហេតុការណ៍ប៉ះទង្គិចគ្នារវាងកងទ័ពកម្ពុជា-ថៃ នៅព្រំដែនតំបន់មុំបី

Kang Tola — Thu, 29 May 2025 11:50:18 +0000

ខេត្តព្រះវិហារ ៖ លោកឧកញ៉ា ឡេង និមល តំណាងអ្នកឧកញ៉ា ឡេង ណាវ៉ាត្រា ប្រធានយុវជនបូជាការពារយុត្តិធម៌ នារសៀលថ្ងៃទី២៩ ខែឧសភានេះ បានដឹកនាំប្រតិភូក្រុមយុវជនបូជាការពារយុត្តិធម៌ ចូលរួមគោរពវិញ្ញាណក្ខន្ធ និងចូលរួមរំលែកទុក្ខក្រុមគ្រួសារនៃសព ព្រឹន្ទបាលឯក សួន រ៉ោន ចំពោះមរណភាពរបស់ព្រឹន្ទបាលឯក សួន រ៉ោន ដោយហេតុការណ៍ប៉ះទង្គិចគ្នារវាង កងទ័ពកម្ពុជា-ថៃ នៅព្រំដែនតំបន់មុំបី ស្ថិតក្នុងខេត្តព្រះវិហារ នាព្រឹកថ្ងៃទី២៨ ខែឧសភា ឆ្នាំ២០២៥ ស្ថិតនៅតំបន់មុំបី ស្ថិតក្នុងស្រុកជាំក្សាន្ត ខេត្តព្រះវិហារ។

នៅក្នុងឱកាសដ៏ក្រៀមក្រំនេះ លោកឧកញ៉ា ឡេង និមល បានសម្តែងនូវការសោកស្តាយយ៉ាងក្រៃលែងចំពោះការបាត់បង់វីរៈបុរសដ៏អង់អាចក្លាហាន ដែលបានលះបង់អស់ពីកម្លាំងកាយចិត្តបញ្ញាស្មារតី និងធ្វើពលិកម្មគ្រប់បែបយ៉ាងដើម្បីបុព្វហេតុ ជាតិ សាសនា ព្រះមហាក្សត្រ ជាពិសេស លោកបាន រួមចំណែកយ៉ាងសកម្ម នៅក្នុងកិច្ចការការពារអធិបតេយ្យភាព បូរណភាពទឹកដី ដើម្បីសេចក្តីសុខក្សេមក្សាន្ត របស់ប្រជាជនកម្ពុជា។

លោកឧកញ៉ា ឡេង និមល អនុប្រធានយុុវជនបូជាការពារយុត្តិធម៌ ក៏បានពាំនាំនូវការផ្តាំផ្ញើសាកសួរសុខទុក្ខ និងការចូលរួមរំលែកទុក្ខដ៏ជ្រាលជ្រៅបំផុតពីសំណាក់អ្នកឧកញ៉ា ឡេង ណាវ៉ាត្រា ជូនចំពោះក្រុមគ្រួសារសព។

ជាមួយគ្នានេះ លោកឧកញ៉ា បានចូលរួមបច្ច័យ និងអង្ករ ដើម្បីជួយសម្រាលទុក្ខលំបាករបស់ក្រុមគ្រួសារសពក្នុងគ្រាដ៏សោកសៅនេះផងដែរ៕

The post ឧកញ៉ា ឡេង និមល តំណាងអ្នកឧកញ៉ា ឡេង ណាវ៉ាត្រា ដឹកនាំប្រតិភូយុវជនបូជាការពារយុត្តិធម៌ គោរពវិញ្ញាណក្ខន្ធសពព្រឹន្ទបាលឯក សួន រ៉ោន ពលីជីវិតដោយហេតុការណ៍ប៉ះទង្គិចគ្នារវាងកងទ័ពកម្ពុជា-ថៃ នៅព្រំដែនតំបន់មុំបី appeared first on Kampuchea Thmey Daily.