សមិទ្ធផលក្រសួងបរិស្ថាន Archives - Kampuchea Thmey Daily

ការអភិវឌ្ឍលំហែបៃតងភ្នំខ្នងផ្សារកំពុងលេចរូបរាង ទាញកំណើនទេសចរទៅកម្សាន្តយ៉ាងគំហុក

Dy Bunnara — Mon, 26 Jan 2026 03:30:08 +0000

ការរៀបចំអភិវឌ្ឍលំហែបៃតងនៅភ្នំខ្នងផ្សារក្នុងខេត្តកំពង់ស្ពឺ សម្រេចបានលទ្ធផលជាបន្តបន្ទាប់។ សមិទ្ធផលមានផ្លូវ បណ្តាញអគ្គិសនី ប្រព័ន្ធទឹកស្អាតរួមទាំងហេដ្ឋារចនាសម្ព័ន្ធផ្សេងៗជាច្រើនទៀតបានសាងសង់បញ្ចប់។

គិតត្រឹមដើមខែមករា ឆ្នាំ២០២៦នេះ ការងារអភិវឌ្ឍហេដ្ឋារចនាសម្ព័ន្ធជាច្រើននៅទីតាំងជើងភ្នំខ្នងផ្សារ ដែលគេហៅថាដំណាក់ដំរីនោះបានសាងសង់រួចរាល់។

សមិទ្ធផលទាំងនោះរួមមាន ផ្លូវលំក្រាលគ្រួសដែលនឹងបន្តក្រាលកៅស៊ូដោយក្រសួងអភិវឌ្ឍន៍ជនបទ មណ្ឌលព័ត៌មានជាមួយទីសង្គ្រោះបន្ទាន់ ផ្សារសហគមន៍ ហាងកាហ្វេសហគមន៍ ចំណតរថយន្តក្រុង រថយន្តទេសចរណ៍ ទោចក្រយានយន្ត ប្រព័ន្ធទឹកអណ្ដូងអនាម័យដើរដោយថាមពលពន្លឺព្រះអាទិត្យ ប្រព័ន្ធអគ្គិសនីដើរដោយថាមពលពន្លឺព្រះអាទិត្យ សួនច្បារ បន្ទប់ងូតទឹកប្រុសស្រី បន្ទប់អនាម័យ ប្រុស-ស្រី-ជនពិការ ផ្ទះស្នាក់នៅរបស់ប្រជាសហគមន៍ដែលជាអ្នកគ្រប់គ្រងគោលដៅលម្ភៃបៃតង និងផ្លូវថ្មើរជើងឡើងទៅទីតាំងដានព្រះអង្គ ដែលមានកន្លែងដាក់សំរាម និងកន្លែងអង្គុយសម្រាកតាមដងផ្លូវក្រោមម្លប់ឈើដ៏ត្រឈឹងត្រឈៃ។

ជាជំហានបន្ទាប់ ទីតាំងដានព្រះអង្គ (ចង្កេះភ្នំខ្នងផ្សារ) នឹងបន្តសាងសង់ហេដ្ឋារចនាសម្ព័ន្ធចាំបាច់មួយចំនួនទៀត រួមមានមណ្ឌលព័ត៌មានជាមួយទីសង្គ្រោះបន្ទាន់ ហាងលក់វត្ថុអនុស្សាវរីយ៍ ភោជនីយដ្ឋាន ចំណតរថយន្តទេសចរណ៍-ទោចក្រយានយន្ត អាងស្តុកទឹក អណ្តូងទឹកសម្រាប់អ្នកថ្មើរជើងប្រើប្រាស់ បន្ទប់ងូតទឹកប្រុស-ស្រី បន្ទប់អនាម័យប្រុស-ស្រី-ជនពិការ និងជាពិសេសកន្លែងអង្គុយលម្ហែ បណ្តែតអារម្មណ៍គយគន់ទេសភាព និងស្រូបខ្យល់អាកាសដ៏ល្អបរិសុទ្ធពីធម្មជាតិបៃតង។

ពាក់ព័ន្ធការអភិវឌ្ឍលំហែបៃតងនៅភ្នំខ្នងផ្សារ លោក ខ្វៃ អាទិត្យា មន្រ្តីអ្នកនាំពាក្យក្រសួងបរិស្ថានបានប្រាប់កម្ពុជាថ្មីថា ក្រោមការចង្អុលបង្ហាញដោយផ្ទាល់ពីសម្ដេចនាយករដ្ឋមន្ត្រី ហ៊ុន ម៉ាណែត ក្រសួងបរិស្ថានបានបញ្ចប់ការសាងសង់ហេដ្ឋារចនាសម្ព័ន្ធមានផ្លូវ ខ្លោងទ្វារចូល ផ្លូវថ្មើរជើងឡើងភ្នំ រួមទាំងសមិទ្ធផលជាច្រើនទៀត។

លោកថា ជាជំហានបន្ទាប់ ក្រសួងនឹងរៀបចំហេដ្ឋារចនាសម្ព័ន្ធបន្ថែមទៀតនៅលើកំពូលភ្នំ បន្ទាប់ពីទទួលបានការអនុញ្ញាតពីប្រមុខរាជរដ្ឋាភិបាល ដើម្បីធ្វើឱ្យតំបន់នេះកាន់តែមានភាពទាក់ទាញខ្លាំងជាងមុន។

មន្រ្តីអ្នកនាំពាក្យក្រសួងបរិស្ថាន បានមើលឃើញកំណើនភ្ញៀវទេសចរយ៉ាងគំហុកឡើងទៅកម្សាន្តភ្នំខ្នងផ្សារ ក្រោយមានដំណើរទស្សនកិច្ចរបស់សម្តេចធិបតីទៅកម្សាន្តក្នុងថ្ងៃឈប់សម្រាកទិវាសិទ្ធិនារី ០៨ មីនា ឆ្នាំ២០២៥។

នៅក្នុងឆ្នាំ ២០២៥ ចំនួនភ្ញៀវទេសចរទៅកម្សាន្តជាមធ្យមមានប្រមាណ ៥០០ នាក់ក្នុងមួយខែ។ ចំនួននេះកើនឡើងគួរឱ្យកត់សម្គាល់ បើធៀបនឹងឆ្នាំ ២០២៤ ដែលមានភ្ញៀវទៅកម្សាន្តត្រឹមតែជាង ៣០០ នាក់ ប៉ុណ្ណោះ។ លោក ខ្វៃ អាទិត្យា បញ្ជាក់។

កំណើនភ្ញៀវទេសចរមានចន្លោះពី ៣០ ទៅ ៤០%។ បើតាមមន្រ្តីអ្នកនាំពាក្យក្រសួងបរិស្ថាន ការអភិវឌ្ឍហេដ្ឋារចនាសម្ព័ន្ធនៅភ្នំខ្នងផ្សារ មិនត្រឹមតែផ្ដោតលើការសម្រួលដល់ការធ្វើដំណើររបស់ភ្ញៀវទេសចរប៉ុណ្ណោះទេ ប៉ុន្តែថែមទាំងមានគោលបំណងពង្រីកសក្តានុពលទេសចរណ៍ធម្មជាតិឱ្យកាន់តែរីកចម្រើនថែមទៀត។

ក្រសួងបរិស្ថានបានកំពុងយកចិត្តទុកដាក់លើការជំរុញ “ភាពបៃតង” ដោយផ្អែកលើអាទិភាពធំៗចំនួន ៣។ ទី១. ពង្រឹងផ្តោតសំខាន់លើការរឹតបន្តឹងការអនុវត្តច្បាប់ ដើម្បីទប់ស្កាត់ការប៉ះពាល់ និងបទល្មើសធនធានធម្មជាតិ។ ក្នុងនោះបានដាក់ចេញវិធានការចំនួន ៤ រួមមាន៖

-ការអនុវត្តច្បាប់ឱ្យបានម៉ឺងម៉ាត់
-ការពង្រឹងសមត្ថភាព និងកិច្ចសហការជាមួយអាជ្ញាធរថ្នាក់ក្រោមជាតិ
-ការជំរុញការដាំដុះឡើងវិញ
-ការអភិវឌ្ឍសហគមន៍

ទី២. ការពង្រីកគម្រោងបៃតង ដោយជំរុញឱ្យមានការដាំដុះ និងការចែកកូនឈើជូនដល់សាធារណជនយកទៅដាំឱ្យបានច្រើន។ គោលដៅគឺដាំឱ្យបានយ៉ាងតិច ១ លានដើមក្នុងមួយឆ្នាំ និងតាមគម្រោងដាំឱ្យបាន ៥ លានដើមនៅឆ្នាំ ២០២៦ និងទី ៣. គឺការអភិវឌ្ឍផ្តោតលើការអភិវឌ្ឍផែនការបៃតង ដើម្បីឱ្យសហគមន៍មានការចូលរួមកាន់តែប្រសើរ ក្នុងការការពារ និងអភិរក្សធនធានធម្មជាតិ។ គោលបំណងធំគឺជួយឱ្យប្រជាពលរដ្ឋមានជីវភាពល្អប្រសើរ និងមានការរីកចម្រើន ដោយមិនពឹងផ្អែកលើព្រៃឈើ៕

The post ការអភិវឌ្ឍលំហែបៃតងភ្នំខ្នងផ្សារកំពុងលេចរូបរាង ទាញកំណើនទេសចរទៅកម្សាន្តយ៉ាងគំហុក appeared first on Kampuchea Thmey Daily.

ឆ្នាំ ២០២៦ ក្រសួងបរិស្ថានដាក់ផែនការបញ្ចប់ការបោះបង្គោលព្រំតំបន់ការពារធម្មជាតិ ៨ តំបន់ថែមទៀត កើនទូទាំងប្រទេសដល់ ២១ តំបន់

Dy Bunnara — Thu, 15 Jan 2026 01:07:00 +0000

ឆ្នាំ ២០២៦ ក្រសួងបរិស្ថាន បានដាក់ផែនការបញ្ចប់ការកំណត់ព្រំតំបន់ការពារធម្មជាតិចំនួន ៦ តំបន់ថែមទៀត ដើម្បីគ្រប់គ្រងតំបន់ធនធានធម្មជាតិនៅក្នុងប្រទេសកម្ពុជាឱ្យកាន់តែមានប្រសិទ្ធភាព។

លោក ខ្វៃ អាទិត្យា អនុរដ្ឋលេខាធិការ និងជាមន្រ្តីអ្នកនាំពាក្យក្រសួងបរិស្ថានបានឲ្យកម្ពុជាថ្មីដឹងថា រហូតមកដល់ពេលនេះ ក្រសួងបានបញ្ចប់ការបោះបង្គោលកំណត់ព្រំតំបន់ការពារធម្មជាតិបានចំនួន ១៣ តំបន់ ក្នុងចំណោមតំបន់ការពារធម្មជាតិចំនួន ៧៣ តំបន់ទូទាំងប្រទេស ដែលក្នុងនោះឧទ្យានជាតិបានចំនួន ២ តំបន់ ដែនជម្រកសត្វព្រៃចំនួន ៦ តំបន់ និងតំបន់រ៉ាមសារចំនួន ៥ តំបន់។

លោកបន្តថា នៅឆ្នាំ ២០២៦ ក្រសួងដាក់ផែនការនឹងបញ្ចប់ការបោះបង្គោលកំណត់ព្រំតំបន់ការពារធម្មជាតិចំនួន ៨ តំបន់ថែមទៀត ដែលសរុបនឹងកើនដល់ ២១ តំបន់។

តំបន់ការពារធម្មជាតិក្នុងប្រទេសកម្ពុជាមានចំនួនសរុប ៧៣ តំបន់ ដែលគ្របដណ្តប់លើផ្ទៃដីទំហំជាង ៧ លានហិកតា ស្នើនឹង ៤១% នៃផ្ទៃដីសរុបរបស់ប្រទេស។

តំបន់ការពារធម្មជាតិ ត្រូវបានបែងចែកជាប្រភេទ រួមមាន៖ ឧទ្យានជាតិមានចំនួន ០៩ តំបន់ ឧទ្យានជាតិសមុទ្រមានចំនួន ០២ តំបន់ ដែនជម្រកសត្វព្រៃមានចំនួន ១៨ តំបន់ តំបន់ការពារទេសភាពមានចំនួន ១៤ តំបន់ តំបន់ប្រើប្រាស់ច្រើនយ៉ាងមានចំនួន ១១ តំបន់ តំបន់រាមសារមានចំនួន ០៥ តំបន់ និងតំបន់បេតិកភណ្ឌធម្មជាតិមានចំនួន ១៤ តំបន់។

នៅឆ្នាំ២០២៥ អគ្គនាយកដ្ឋានតំបន់ការពារធម្មជាតិនៃក្រសួងបរិស្ថាន បានពង្រឹងការគ្រប់គ្រងគម្របបៃតងនៅតាមតំបន់ការពារធម្មជាតិ ដោយធ្វើការបោះបង្គោលកំណត់ព្រំប្រទល់បានចំនួន ១០០០បង្គោល។ ហើយនៅក្នុងឆ្នាំ២០២៦ អគ្គនាយកដ្ឋានតំបន់ការពារធម្មជាតិគ្រោងនឹងបោះបង្គោលព្រំប្រទល់សរុបចំនួន ១០០០បង្គោលបន្ថែមទៀត ក្នុងគោលបំណងជំរុញការចុះបញ្ជីដីរដ្ឋនៅក្នុងតំបន់ការពារធម្មជាតិ។ នេះបើតាមលោក ខ្វៃ អាទិត្យា អនុរដ្ឋលេខាធិការ និងជាអ្នកនាំពាក្យក្រសួងបរិស្ថាន៕

The post ឆ្នាំ ២០២៦ ក្រសួងបរិស្ថានដាក់ផែនការបញ្ចប់ការបោះបង្គោលព្រំតំបន់ការពារធម្មជាតិ ៨ តំបន់ថែមទៀត កើនទូទាំងប្រទេសដល់ ២១ តំបន់ appeared first on Kampuchea Thmey Daily.

ក្រសួងបរិស្ថានបើកសន្និបាតបូកសរុបលទ្ធផលការងារឆ្នាំ២០២៥ និងទិសដៅការងារបន្តឆ្នាំ២០២៦

Ngoeul Narath — Tue, 09 Dec 2025 10:10:45 +0000

ក្រសួងបរិស្ថាន នៅព្រឹកថ្ងៃទី៩ ខែធ្នូ ឆ្នាំ២០២៥ បានរៀបចំសន្និបាតបូកសរុបការងារឆ្នាំ២០២៥ និងទិសដៅការងារបន្តឆ្នាំ២០២៦ ក្រោមវត្តមាន លោក អ៊ាង សុផល្លែត រដ្ឋមន្ត្រីក្រសួងបរិស្ថាន និងមានការអញ្ជើញចូលរួមពី មន្ត្រីរាជការក្រសួងបរិស្ថាន តំណាងក្រសួង ស្ថាប័នថ្នាក់ជាតិ និងថ្នាក់ក្រោមជាតិ អភិបាលនៃគណៈអភិបាល រាជធានី ខេត្ត លោក លោកស្រី តំណាងអង្គការជាតិ អន្តរជាតិជាដៃគូ និងវិស័យឯកជនជាច្រើនរូបទៀត។

ថ្លែងទៅកាន់អង្គសន្និបាត លោក អ៊ាង សុផល្លែត បានគូសបញ្ជាក់ឱ្យដឹងថា ស្ថិតក្រោមម្លប់សន្តិភាព និងវឌ្ឍនភាពសង្គមដែលមាន សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី ដែលបច្ចុប្បន្នជាប្រធានព្រឹទ្ធសភា និងជាប្រធានឧត្តមក្រុមប្រឹក្សាព្រះមហាក្សត្រ ស្របតាមយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិត បញ្ញាឈ្លាសវៃ និងចក្ខុវិស័យច្បាស់លាស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ក្រសួងបរិស្ថានក៏បានរៀបចំដាក់ចេញនូវ «យុទ្ធសាស្រ្តចក្រាវិស័យបរិស្ថាន ឆ្នាំ២០២៣-២០២៨» ដែលមានសសរស្តម្ភ៣ គឺ «ភាពស្អាត» «ភាពបៃតង» និង «ចីរភាព» ។

នៅក្នុងឆ្នាំ២០២៥នេះ ក្រសួងបរិស្ថាន សម្រេចបាននូវស្នាដៃធំៗជាច្រើន តាមរយៈកិច្ចខិតខំប្រឹងប្រែងរបស់ មន្រ្តីគ្រប់ជាន់ថ្នាក់ និងដោយមានកិច្ចសហការល្អពីក្រសួងស្ថាប័នពាក់ព័ន្អ រដ្ឋបាលថ្នាក់ក្រោមជាតិ អាជ្ញាធរមូលដ្ឋាន មន្ទីរបរិស្ថានខេត្ត-រាជធានី និងដៃគូរ អង្គការជាតិ និងអន្តរជាតិនានា និងប្រជាពលរដ្ឋ ក្នុងការចូលរួមគ្រប់គ្រង និងការពារបរិស្ថាន។ លោកថា ក្រសួងបាននិងកំពុងធ្វើសកម្មភាពដាក់ចេញនូវវិធានការគន្លឹះជាជំហានៗក្នុងនោះតាមរយៈយុទ្ធនាការ «ថ្ងៃនេះ ខ្ញុំមិនប្រើថង់ប្លាស្ទិក ទេ» «កម្ពុជាស្អាត ខ្មែរធ្វើបាន» និង «ផ្លូវជាតិគ្មានសំរាម និងសំណល់ប្លាស្ទិក» ដែលជំរុញការអនុវត្តសកម្មភាពសម្អាត សំដៅប្រែក្លាយពីយុទ្ធនាការទៅជាចលនា ហើយឱ្យចលនាក្លាយទៅជាវប្បធម៌ និងទម្លាប់រក្សាភាពស្អាត។ ជាលទ្ធផលមនុស្សចំនួន១៥លាននាក់បានចូលរួមក្នុងយុទ្ធនាការរបស់ក្រសួអបរិស្ថាន ហើយបានចូល រួមកាត់បន្ថយថង់ប្លាស្ទិក បាន៨៤%។

ស្របពេលជាមួយគ្នានេះ យុទ្ធនាការពន្លកបៃតង គឺជាគម្រោងដាំដើមឈើដ៏ធំមួយ ដែលត្រូវបានក្រសួងបរិស្ថានចាប់ផ្ដើមឡើង ដើម្បីជំរុញការពង្រីភាពបៃតង។ ជាមួយគ្នានេះ ក្រសួងបរិស្ថានបានពង្រឹងការអនុវត្តច្បាប់តឹងរ៉ឹង និងបានចែកកូនឈើដល់ប្រជាពលរដ្ឋ ក៏ដូចជាសាធារណជនយកទៅដាំដោយឥតគិតថ្លៃ បានចំនួនជាង ៣លាន៤សែនដើមផងដែរ។ ដោយឡែកសម្រាប់ឆ្នាំ២០២៦ខាងមុខនេះ ក្រសួង បានពង្រីកការចែកកូនឈើនេះ តាមរយៈថ្នាលថ្នាក់តំបន់ដែលបានសាងសង់ហើយ ដែលមាននៅខេត្តចំនួន៥ គឺខេត្តកំពង់ស្ពឺ ខេត្តកោះកុង ខេត្តសៀមរាប ខេត្តមណ្ឌលគីរី និងខេត្តត្បូងឃ្មុំ ដែលថ្នាលថ្នាក់តំបន់នៅខេត្តទាំង៥នេះ អាចផលិតកូនឈើបាន៥លានដើម។ យុទ្ធនាការនេះ ឆ្លើយតបទៅនឹងគោលនយោបាយអភិវឌ្ឍន៍ប្រកបដោយចីរភាពរបស់រាជរដ្ឋាភិបាលកម្ពុជា និងបង្ហាញពីការខិតខំប្រឹងប្រែងក្នុងការបង្កើនគម្របបៃតង ក៏ដូចជាការពារបរិស្ថានផងដែរ។

សូមបញ្ជាក់ថា សម្រាប់អង្គសន្និបាតនៅឆ្នាំនេះ ក្រសួងបរិស្ថានបានជ្រើសរើស និងដាក់ចេញនូវប្រធានសំខាន់ៗតាមជំនាញ រួមមាន៖ ១-ភាពស្អាត ២-ការដាំស្តារឡើងវិញ និងការពង្រឹងការអនុវត្តច្បាប់ ៣-ការអភិវឌ្ឍសេដ្ឋកិច្ចបៃតងដើម្បីលើកកម្ពស់ជីវភាពសហគមន៍មូលដ្ឋាន ៤-ពង្រីកការអប់រំផ្សព្វផ្សាយដើម្បី ជំរុញប្រតិបត្តិមេត្រីភាពបរិស្ថាន និងទី៥-ការកសាងរដ្ឋបាលឌីជីថល៕

The post ក្រសួងបរិស្ថានបើកសន្និបាតបូកសរុបលទ្ធផលការងារឆ្នាំ២០២៥ និងទិសដៅការងារបន្តឆ្នាំ២០២៦ appeared first on Kampuchea Thmey Daily.

ក្រសួងបរិស្ថាន សហភាពអឺរ៉ុប ជំរុញការគ្រប់គ្រងសំណល់ប្លាស្ទិក តាមរយៈគម្រោងប្លាស្ទិកឆ្លាតវៃកម្ពុជា

Ngoeul Narath — Wed, 26 Nov 2025 07:50:54 +0000

រដ្ឋមន្ត្រីក្រសួងបរិស្ថាន អ៊ាង សុផល្លែត ឯកអគ្គរដ្ឋទូតសហភាពអឺរ៉ុបប្រចាំកម្ពុជា អ៊ីហ្គោរ៍ ឌ្រីសម៉ាន់ នៅថ្ងៃទី២៥ ខែវិច្ឆិកា បានដឹកនាំកិច្ចប្រជុំលើកទី១ គណៈកម្មការដឹកនាំតម្រង់ទិសគម្រោងប្លាស្ទិកឆ្លាតវៃកម្ពុជា ក្នុងគោលបំណង ពិនិត្យ និងអនុម័តលើផែនការសកម្មភាព និងផែនការថវិកាក្នុងឆ្នាំ២០២៦ របស់គម្រោងប្លាស្ទិកឆ្លាតវៃកម្ពុជា និង បង្ហាញពីទិដ្ឋភាពទូទៅរបស់គម្រោងប្លាស្ទិកឆ្លាតវៃកម្ពុជា។

ឯកអគ្គរដ្ឋទូតសហភាពអឺរ៉ុបប្រចាំកម្ពុជា អ៊ីហ្គោរ៍ ឌ្រីសម៉ាន់ កោតសរសើរ និងសាទរចំពោះកិច្ចខិតខំប្រឹងប្រែងរបស់ក្រសួងបរិស្ថាន ក្នុងការពង្រឹងការគ្រប់គ្រងសំណល់ប្លាស្ទិក និង មីក្រូប្លាស្ទិក។ ជាមួយគ្នានេះ សហភាពអឺរ៉ុបនឹងចូលរួមពង្រឹងការគ្រប់គ្រង ការកែច្នៃ និងការទាក់ទាញការវិនិយោគបន្ថែមទៀត ដើម្បីលើកកម្ពស់ភាពស្អាតនៅកម្ពុជា។

រដ្ឋមន្ត្រីក្រសួងបរិស្ថាន បានថ្លែងអំណរគុណដល់សហភាពអឺរ៉ុប ក្នុងការគាំទ្រ និងសហការយ៉ាងជិតស្និតជាមួយក្រសួងបរិស្ថាន ដើម្បីដោះស្រាយសំណល់ប្លាស្ទិក ដែលជាក្តីកង្វល់របស់ពិភពលោកដោយមិនចំពោះតែកម្ពុជា និងតំបន់នោះទេ។ ជាក់ស្តែងការប្រយុទ្ធប្រឆាំងសំណល់ សំរាមប្លាស្ទិកនេះក្រសួងបានដាក់ចេញនូវយុទ្ធសាស្រ្តជាជំហានៗ រាប់ចាប់តាំងពីយុទ្ធនាការបន្តរហូតមកដល់ចលនា ដោយផ្តើមចេញពីការប្តេជ្ញាចិត្តរបស់ប្រជាពលរដ្ឋប្រមាណជាង១៤លាននាក់ នៅក្នុងយុទ្ធនាការ “ថ្ងៃនេះ ខ្ញុំមិនប្រើថង់ប្លាស្ទិកទេ” និងប្រមាណជាង ៧លាននាក់នៅក្នុងយុទ្ធនាការ “កម្ពុជាស្អាត ខ្មែរធ្វើបាន” និង “ផ្លូវជាតិស្អាត គ្មានសំរាម និងសំណល់ប្លាស្ទិក” ដែលទទួលបានភាពស្អាតប្រមាណជាង ៨០%។

លើសពីនេះ ក្រសួងបរិស្ថានក៏បានដាក់ចេញនូវយន្តការ និងដំណោះស្រាយជាច្រើន ដែលក្នុងនោះរួមមាន ការផ្តល់ជូនធុងសំរាមឱ្យប្រជាពលរដ្ឋបែងចែក និងទុកដាក់សំរាម ជាពិសេសការរៀបចំឱ្យមានទីលានទុកដាក់សំរាមឱ្យត្រឹមត្រូវ និងសមស្របតាមលក្ខណៈបច្ចេកទេស ដែលជាការការពារដល់សុខមាលភាពប្រជាពលរដ្ឋនៅតាមមូលដ្ឋាន។ ជាមួយគ្នានេះ ឯកឧត្តមរដ្ឋមន្រ្តី បានផ្តល់អនុសាសន៍ដល់អង្គការដៃគូសូមចូលរួមជាមួយក្រសួងបរិស្ថាន ដើម្បីឆ្ពោះទៅការគ្រប់គ្រងសំណល់ប្លាស្ទិកដ៏ប្រសើរ ដែលស្របទៅនឹងយុទ្ធសាស្ត្រចក្រាវិស័យបរិស្ថានដែលមាន ភាពស្អាត ភាពបៃតង និងចីរភាព៕

The post ក្រសួងបរិស្ថាន សហភាពអឺរ៉ុប ជំរុញការគ្រប់គ្រងសំណល់ប្លាស្ទិក តាមរយៈគម្រោងប្លាស្ទិកឆ្លាតវៃកម្ពុជា appeared first on Kampuchea Thmey Daily.

ចាប់ពីឆ្នាំ ២០២៦ រោងចក្រទាំងអស់ត្រូវបំពាក់ឧបករណ៍ស្វ័យត្រួតពិនិត្យតាមដានគុណភាពខ្យល់

Dy Bunnara — Fri, 17 Oct 2025 08:09:33 +0000

នៅក្នុងពិធីបិទយុទ្ធនាការប្រចាំឆ្នាំផ្ទៃមេឃពណ៌ខៀវ និងការបញ្ចេញឧស្មន័ស្មើសូន្យឆ្នាំ ២០៥០ នាថ្ងៃទី១៦ ខែតុលា ឆ្នាំ២០២៥ នៅវិទ្យាស្ថានបច្ចេកវិទ្យាកម្ពុជា លោក អ៊ាង សុផល្លែត រដ្ឋមន្រ្តីក្រសួងបរិស្ថានបានប្រកាសថា នៅឆ្នាំ ២០២៦ រោងចក្រទាំងអស់ត្រូវតែបំពាក់ឧបករណ៍ស្វ័យត្រួតពិនិត្យតាមដានគុណភាពខ្យល់។

លោករដ្ឋមន្រ្តីបានគូសបញ្ជាក់ថា ក្រសួងបរិស្ថាននឹងធ្វើការសហការជាមួយក្រសួងពាណិជ្ជកម្មចាត់វិធានការតាមផ្លូវច្បាប់ ប្រសិនបើក្រុមហ៊ុនណាល្មើសគុណភាពខ្យល់ឬធ្វើឱ្យខ្យល់មិនស្អាត។

នៅក្នុងពិធីបិទយុទ្ធនាការប្រចាំឆ្នាំផ្ទៃមេឃពណ៌ខៀវ និងការបញ្ចេញឧស្មន័ស្មើសូន្យឆ្នាំ២០៥០ លោក អ៊ាង សុផល្លែតបានលើករបាយការណ៍របស់អង្គការសហប្រជាជាតិ ដែលបានរកឃើញមូលហេតុចម្បងៗនៃវិស័យចំនួន ៦ រួមមាន វិស័យថាមពល វិស័យឧស្សាហកម្ម វិស័យកសិកម្ម វិស័យព្រៃឈើ វិស័យគីមី និងវិស័យសំរាម ដែលធ្វើឱ្យមានការប្រែប្រួលអាកាសធាតុ និងមានការកើនឡើងកម្តៅផែនដី។

លោកថា កម្ពុជាបានចូលរួមឆ្លើយតបបញ្ហាការប្រែប្រួលអាកាសធាតុ ស្របតាមគោលនយោបាយយុទ្ធសាស្រ្តរបស់រាជរដ្ឋាភិបាល ក្នុងនោះសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដែលបានចង្អុលបង្ហាញដល់ក្រសួងបរិស្ថាន ដាក់ចេញយុទ្ធសាស្រ្តចក្រាវិស័យបរិស្ថាន ឆ្នាំ២០២៣-២០២៨ ដែលមានសសរស្តម្ភ ចំនួន៣គឺភាពស្អាត ភាពបៃតង និងចីរភាព។

ភាពស្អាតនៃយុទ្ធសាស្រ្តចក្រាវិស័យបរិស្ថាន បានគ្របដណ្តប់លើវិស័យចំនួន ៥ ខាងលើដែលបង្កឱ្យមាន ឧស្ម័នផ្ទះកញ្ចក់ លើកលែងតែវិស័យព្រៃឈើ។

បើតាមលោក អ៊ាង សុផល្លែត ក្រសួងបរិស្ថានប្តេជ្ញាដោះស្រាយបញ្ហានៃការប្រែប្រួលអាកាសធាតុ ដើម្បីកម្ពុជាឈានឆ្ពោះទៅជាប្រទេសអព្យាក្រឹតកាបូននៅឆ្នាំ២០៥០។ ជាមួយគ្នានេះ ក្រសួងបរិស្ថានកំពុងរៀបចំកោះស្រឡៅ នៅក្នុងខេត្តកោះកុងជាកោះអាព្យាក្រឹតកាបូន។ ក្រសួងបរិស្ថាន នឹងផ្តល់ជូនប្រជាពលរដ្ឋនៅទីនោះប្រើប្រាស់អំពូលអគ្គិសនីដើរដោយពន្លឺព្រះអាទិត្យ និងរៀបចំដាក់ឧបករណ៍ត្រួតពិនិត្យគុណភាពខ្យល់ ការរៀបចំហេដ្ឋារចនាសម្ព័នគ្រប់គ្រងសំរាម សំណល់ប្លាស្ទិក និងជំរុញការគ្រប់គ្រងធនធានធម្មជាតិ ដាំស្តារព្រៃកោងកាងជាពិសេស។

ក្នុងឱកាសនេះរដ្ឋមន្រ្តីក្រសួងបរិស្ថាន បានអំពាវនាវឱ្យមានការចូលរួមក្នុងយុទ្ធនាការរបស់ក្រសួងបរិស្ថាន ដែលបានអនុវត្តកន្លងមកនិងរួមគ្នា “យកជំហានឆ្លាតវៃ រួបរួមគ្នា” (take smart, united steps) ឆ្ពោះទៅរកខ្យល់ស្អាត និងការគ្រប់គ្រងសំរាម និងសំណល់រឹងប្រកបដោយចីរភាព។

«ការចូលរួមពីគ្រប់ភាគីពាក់ព័ន្ធទាំងអស់នៅក្នុងសង្គមកម្ពុជា អាចធ្វើឱ្យផ្ទៃមេឃពណ៌ខៀវ និង ប្រែក្លាយកម្ពុជាជាប្រទេសអព្យាក្រឹតកាបូន នៅឆ្នាំ២០៥០។ វាក្លាយជាការពិត មិនមែនត្រឹមតែជាចក្ខុវិស័យ។» មានប្រសាសន៍បន្ថែម ឯកឧត្តមរដ្ឋមន្រ្តីក្រសួងបរិស្ថាន។

សូមបញ្ជាក់ថា ក្រមបរិស្ថាននិងធនធានធម្មជាតិត្រង់មាត្រា ៣១៦ បានចែងស្តីពីការទទួលខុសត្រូវរបស់ម្ចាស់និងប្រតិបត្តិករ ចំពោះការបញ្ចេញសាធាតុនៃការបំពុលខ្យល់៕

The post ចាប់ពីឆ្នាំ ២០២៦ រោងចក្រទាំងអស់ត្រូវបំពាក់ឧបករណ៍ស្វ័យត្រួតពិនិត្យតាមដានគុណភាពខ្យល់ appeared first on Kampuchea Thmey Daily.

កម្ពុជាប្រកាសដាក់ឱ្យប្រើប្រាស់ផែនការជាតិ ឆ្លើយតបការប្រែប្រួលអាកាសធាតុ

Dy Bunnara — Fri, 19 Sep 2025 02:39:37 +0000

ផែនការជាតិរួមចំណែកឆ្លើយតបនឹងការប្រែប្រួលអាកាសធាតុនៅកម្ពុជាដំណាក់កាលទី៣ (NDC 3.0) ជាសមិទ្ធផលថ្មីមួយទៀតរបស់រាជរដ្ឋាភិបាលកម្ពុជា ដែលបញ្ជាក់អំពីការបេ្តជ្ញាចិត្តដោយឥតងាករេរបស់កម្ពុជា លើឆាកអន្តរជាតិក្នុងការប្រយុទ្ធប្រឆាំង នឹងការប្រែប្រួលអាកាសធាតុ និងដើម្បីជំរុញល្បឿន នៃការអភិវឌ្ឍរបស់កម្ពុជា ប្រកបដោយនិរន្តរភាព ធន់នឹងអាកាសធាតុ ស្របតាមយុទ្ធសាស្រ្តជាតិ ដែលមានស្រាប់ និងដំណើរវិវត្តន៍ឥតឈប់ឈរនៃការប្រែប្រួលអាកាសធាតុសកល ដើម្បីឈានឆ្ពោះទៅ សម្រេចឱ្យបាននូវកិច្ចព្រមព្រៀងទីក្រុងប៉ារីស ស្តីពីការប្រែប្រួលអាកាសធាតុ ក្រោមអនុសញ្ញាអង្គការសហប្រជាជាតិ ស្តីពីការប្រែប្រួលអាកាសធាតុ UNFCCC។

នេះជាប្រសាសន៍លើកឡើងរបស់លោក អ៊ាង សុផល្លែត រដ្ឋមន្ត្រីក្រសួងបរិស្ថាន ក្នុងពិធីប្រកាសដាក់ឱ្យប្រើប្រាស់ជាផ្លូវការនូវ ផែនការជាតិរួមចំណែកឆ្លើយតប នឹងការប្រែប្រួលអាកាសធាតុនៅកម្ពុជា ដំណាក់កាលទី៣ (NDC 3.0) កាលពីថ្ងៃទី១៨ ខែកញ្ញា ឆ្នាំ២០២៥ នៅទីស្តីការក្រសួងបរិស្ថាន។

កម្ពុជាមានប្តេជ្ញាយ៉ាងមោះមុត ក្នុងការដឹកនាំវិស័យបរិស្ថានប្រទេសកម្ពុជា ឆ្ពោះទៅរកអនាគតដែលមានការអភិវឌ្ឍប្រកបដោយចីរភាព មានភាពធន់នឹងការប្រែប្រួលអាកាសធាតុ និងមានតុល្យភាពបរិស្ថាន។ តាមរយៈគោលនយោបាយ និងកិច្ចផ្តួចផ្តើមយុទ្ធសាស្ត្រជាបន្តបន្ទាប់របស់កម្ពុជា ក្នុងនោះយុទ្ធសាស្ត្រចក្រាក្នុងវិស័យបរិស្ថាន សំដៅលើកកម្ពស់កិត្យានុភាពរបស់ប្រទេសកម្ពុជា តាមរយៈការតម្រង់ទិសនិងការជំរុញការអនុវត្តសកម្មភាពនានា ដើម្បីធ្វើឱ្យកម្ពុជាមានភាពស្អាត ភាពបៃតង និងចូលរួមសម្រេចគោលដៅ ដូចមានចែងក្នុងយុទ្ធសាស្រ្តបញ្ចកោណ ដំណាក់កាលទី១ និងគោលដៅអភិវឌ្ឍន៍ដោយចីរភាពរបស់កម្ពុជា។

លោករដ្ឋមន្រ្តីបានថ្លែអថា ការអនុវត្ត NDC 3.0 ជោគជ័យទៅបាន ទាមទារឱ្យមានការចូលរួមពីគ្រប់វិស័យ មិនត្រឹមតែវិស័យរដ្ឋប៉ុណ្ណោះទេ ប៉ុន្តែក៏ត្រូវមានការចូលរួមយ៉ាងសកម្មពីសហគមន៍មូលដ្ឋាន វិស័យឯកជន អង្គការសង្គមស៊ីវិល និងដៃគូអន្តរជាតិជាអាទិ៍៖ ការបន្តកិច្ចសហប្រតិបត្តិការ និងមធ្យោបាយនៃការគាំទ្រទាំងបច្ចេកទេស និងហិរញ្ញវត្ថុ។

លោករដ្ឋមន្រ្តីស្នើឱ្យដៃគូអភិវឌ្ឍន៍និងអ្នកពាក់ព័ន្ធ បង្កើនការគាំទ្រតាមរយៈហិរញ្ញប្បទានអាកាសធាតុ ការផ្ទេរបច្ចេកវិទ្យា និងការកសាងសមត្ថភាពជាដើម ព្រមទាំងខិតខំប្រឹងប្រែងនិងទំនួសខុសត្រូវរួមគ្នា ដើម្បីធានាថាសកម្មភាពអាកាសធាតុរបស់កម្ពុជា ផ្តល់អត្ថប្រយោជន៍ ពិតប្រាកដសម្រាប់ប្រជាជន សេដ្ឋកិច្ច និងបរិស្ថាន។

ក្នុងឱកាសនេះ លោក Igor Driesmans ឯកអគ្គរដ្ឋទូតនៃសហភាពអឺរ៉ុប (EU) ប្រចាំនៅកម្ពុជា និងលោក Enrico Gaveglia អ្នកតំណាងកម្មវិធីអភិវឌ្ឍន៍សហប្រជាជាតិ (UNDP) ប្រចាំកម្ពុជា លោក Stelios Pesmajoglou ប្រធានគ្រប់គ្រង ផ្នែកកាត់បន្ថយការបញ្ចេញឧស្ម័នផ្ទះកញ្ចក់ប្រចាំតំបន់ អាស៊ី ប៉ាស៊ីហ្វិក, UNFCCC បានលើកឡើង អំពីការប្តេជ្ញាចិត្តរបស់ដៃគូអភិវឌ្ឍន៍ ដើម្បីគាំទ្រដល់ការជំរុញការអនុវត្តផែនការសកម្មភាព ដើម្បីរួមចំណែកឆ្លើយតបនឹងការប្រែប្រួលអាកាសធាតុ និងការអភិវឌ្ឍប្រកបដោយនិរន្តរភាពនៅកម្ពុជា។

តំណាងដៃគូអភិវឌ្ឍន៍បានបានកោតសរសើរ និងសាទរដល់ការខិតខំប្រឹងប្រែងរបស់កម្ពុជា ដែលមានក្រសួងបរិស្ថានជាសេនាធិការរួមជាមួយ ក្រសួង ស្ថាប័នជាតិ អង្គការជាតិ អន្តរជាតិ អង្គការសង្គមស៊ីវិល លើកិច្ចខិតខំប្រឹងប្រែងដោះស្រាយ ការប្រែប្រួលអាកាសធាតុ ជាពិសេសការដាក់ចេញនូវ NDC 3.0 នេះឡើង ដើម្បីកម្ពុជាមានការអភិវឌ្ឍន៍ប្រកបដោយអព្យាក្រឹតកាបូននៅថ្ងៃអនាគត។

លោកស្រី ភាណ សោភ័ណ នាយិកានៃអង្គការ Oxfam បានវាយតម្លៃខ្ពស់ចំពោះការខិតខំប្រឹងប្រែង របស់កម្ពុជា ជាពិសេសក្រុមការងារក្រសួងបរិស្ថាន ដែលបានពង្រឹងការប្តេជ្ញាចិត្តជាមួយសហគមន៍អន្តរជាតិ ដោះស្រាយបញ្ហាប្រែប្រួលអាកាសធាតុ ជាពិសេសការបង្កើតបាន ផែនការជាតិរួមចំណែកឆ្លើយតបនឹងការប្រែប្រួលអាកាសធាតុនៅកម្ពុជា ដំណាក់កាលទី៣ (NDC 3.0) ដើម្បីធានាអនាគតប្រកបដោយចីរភាពសម្រាប់ប្រជាជនកម្ពុជា។

កម្ពុជាបានរៀបចំនិងដាក់ជូនផែនការជាតិ NDC3.0 ទៅកាន់លេខាធិការដ្ឋាន UNFCCC កាលពីថ្ងៃទី៨ ខែសីហា ឆ្នាំ២០២៥ ដែលមកទល់នឹងពេលនេះ យើងជាប្រទេសទី២៩ ប៉ុណ្ណោះលើពិភពលោក និងជាប្រទេសទី៤ ក្នុងតំបន់អាស៊ី ដែលបានដាក់ជូន NDC 3.0 ទាន់ពេលវេលាមុនកិច្ចប្រជុំ COP30 នៅប្រទេសប្រេស៊ីល នាពេលខាងមុខ។ ផែនការជាតិ NDC3.0 បានបង្កើតឡើងដោយបង្កប់នូវអត្ថន័យសំខាន់ៗ៖

១. ការបង្កើនមហិច្ឆតា កាត់បន្ថយការបញ្ចេញឧស្ម័នផ្ទះកញ្ចក់៖ យើងបានធ្វើបច្ចុប្បន្នភាព និងពង្រីកគោលដៅកាត់បន្ថយការបញ្ចេញឧស្ម័នផ្ទះកញ្ចក់តាមវិស័យសំខាន់ៗ ជាពិសេសក្នុងវិស័យថាមពល ដឹកជញ្ជូន គ្រប់គ្រងកាកសំណល់ ឧស្សាហកម្ម កសិកម្ម និងព្រៃឈើ និងការប្រើប្រាស់ដីផ្សេងទៀត ស្របតាមគោលដៅរយៈពេលវែងប្រកបដោយអព្យាក្រឹតភាពកាបូនរបស់យើងសម្រាប់ឆ្នាំ ២០៥០។ ប្រការនេះសបញ្ជាក់ថា ទោះបីកម្ពុជា ជាប្រទេសដែលបញ្ចេញឧស្ម័នផ្ទះកញ្ចក់តិចតួចក៏ដោយ តែយើងបានត្រៀមខ្លួនរួចជាសម្រេចក្នុងការចូលរួមដោះស្រាយបញ្ហាសកលនេះ និងបង្ហាញពីគំរូវីរៈភាពនៃភាពជាអ្នកដឹកនាំ លើការងារប្រែប្រួលអាកាសធាតុ លើឆាកអន្តរជាតិ ស្របតាមសមត្ថភាព និងធនធានរបស់ខ្លួន។
២. ការពង្រឹងការងារបន្ស៊ាំនឹងអាកាសធាតុ៖ យើងបានសង្កត់ធ្ងន់លើភាពធន់ក្នុងវិស័យកសិកម្ម សុខភាពមនុស្ស ទឹកនិងអនាម័យ (WASH) ហេដ្ឋារចនាសម្ព័ន្ធ ជីវភាពរស់នៅនិងប្រព័ន្ធអេកូឡូស៊ី ការគ្រប់គ្រងគ្រោះមហន្តរាយ និងហានិភ័យអាកាសធាតុ កិច្ចគាំពារសង្គម សេវាសង្គម និងកិច្ចគាំពារកុមារ ប្រព័ន្ធស្បៀង និងការគ្រប់គ្រងគុណភាពខ្យល់ ដោយយកចិត្តទុកដាក់ជាពិសេសលើសហគមន៍ងាយរងគ្រោះ ស្ត្រី កុមារ និងយុវជន។
៣. ការពង្រឹងមធ្យោបាយនៃការអនុវត្ត ៖ យើងបានគិតគូរអំពីតម្រូវការ ហិរញ្ញវត្ថុជាក់លាក់ ការផ្ទេរបច្ចេកវិទ្យា ការកសាងសមត្ថភាព និងការចូលរួមពីគ្រប់ភាគីទាំងអស់ ហើយយើងសូមអំពាវនាវឱ្យមានកិច្ចសហប្រតិបត្តិការអន្តរជាតិកាន់តែខ្លាំង ជាពិសេសការផ្តល់ហរិញ្ញប្បទានតាមតម្រូវការ ដើម្បីប្រែក្លាយការប្តេជ្ញាចិត្តរបស់យើងឱ្យទៅជាសកម្មភាពជាក់ស្តែង និងផលប្រយោជន៍ពិតប្រាកដចំពោះប្រជាជន៕

The post កម្ពុជាប្រកាសដាក់ឱ្យប្រើប្រាស់ផែនការជាតិ ឆ្លើយតបការប្រែប្រួលអាកាសធាតុ appeared first on Kampuchea Thmey Daily.

រោងចក្រចំនួន ៤២ បំពាក់ឧបករណ៍ស្វ័យប្រវត្តិតាមដានការបញ្ចេញសំណល់រាវបំពុល ចូលប្រភពទឹកធម្មជាតិ

Dy Bunnara — Tue, 02 Sep 2025 04:53:14 +0000

គិតត្រឹមខែសីហា ឆ្នាំ២០២៥ នេះ មានរោងចក្រចំនួន៥២ បានចុះកិច្ចសន្យារួច ក្នុងនោះមានរោងចក្រចំនួន៤២ បានបំពាក់ឧបករណ៍ស្វ័យប្រវត្តិតាមដានសំណល់រាវបំពុលចូលប្រភពទឹកធម្មជាតិរួចរាល់។ នេះបើតាមលោក ខ្វៃ អាទិត្យា អ្នកនាំពាក្យក្រសួងបរិស្ថាន។

ម្ចាស់ទីតាំងនិងឧស្សាហកម្មទាំងអស់ ដែលមានប្រភពសក្តានុពលបំពុល ត្រូវបំពាក់ឧបករណ៍ស្វ័យត្រួតពិនិត្យ និងប្រព័ន្ធគ្រប់គ្រងទិន្នន័យ ការបញ្ចេញសំណល់រាវ តាមក្រមបរិស្ថាន និងធនធានធម្មជាតិ ត្រង់មាត្រា១៧៨ មាត្រា២៨៧ មាត្រា២៨៨ មាត្រា៨២៩ ទាក់ទងនឹង ការបញ្ចេញសំណល់ ឬ សារធាតុបំពុលទៅក្នុងបរិស្ថាន មិនស្របតាមស្តង់ដារបញ្ចេញ សំណល់ ត្រង់មាត្រា៨៤៥ ការមិនអនុវត្តកាតព្វកិច្ចក្នុងការគ្រប់គ្រងសំណល់រាវ និងទឹកកខ្វក់។

មន្រ្តីអ្នកនាំពាក្យក្រសួងបរិស្ថានបានបញ្ជាក់ថា សម្រាប់កិច្ចការការទប់ស្កាត់ និងកាត់បន្ថយការបំពុលទឹកពីរោងចក្រ សហគ្រាស ក្រសួងបានអនុវត្តច្បាប់ ១០០% ដោយត្រូវឱ្យប្រភពបំពុលដែលមានហានិភ័យការបំពុលខ្លាំង ត្រូវបំពាក់និងដំណើរការប្រព្រឹត្តកម្មសំណល់រាវ និងធ្វើការបំពាក់ឧបករណ៍ស្វ័យប្រវត្តិតាមដានសំណល់រាវ ស្របតាមច្បាប់ជាធរមាន។

បើតាមមន្រ្តីអ្នកនាំពាក្យក្រសួងបរិស្ថាន ការត្រួតពិនិត្យការបំពុលទឹក ការកាត់បន្ថយនិងទប់ស្កាត់ការបំពុលតំបន់ទឹកសារធារណៈ ក៏មានចែងក្នុងបទដ្ឋានគត្តិយុត្តមួយចំនួនផ្សេងទៀត ដែលបានចូលជាធរមាន របស់ព្រះរាជាណាចក្រកម្ពុជាផងដែរ។

ក្រសួងបរិស្ថានបានទប់ស្កាត់ការបញ្ចេញទឹកកខ្វក់ ពីរោងចក្រនិងក្រុមហ៊ុននានាបានចំនួន ១១ ៩២៤ ១៩៤ ម៉ែត្រគូប មិនឱ្យមានការបំពុលដល់តំបន់ទឹកសាធារណៈ ប៉ះពាល់ដល់ការរស់នៅរបស់ប្រជាពលរដ្ឋនិងបរិស្ថាន ចាប់ពីខែមករា ដល់ដំនាច់ខែសីហា ឆ្នាំ២០២៥។

លោក ខ្វៃ អាទិត្យា អ្នកនាំពាក្យក្រសួងបរិស្ថាន បានឱ្យដឹងថា តាមរយៈការពង្រឹងការអនុវត្តក្រមបរិស្ថាននិងធនធានធម្មជាតិ ក្រសួងបរិស្ថានបានតាមដាន ត្រួតពិនិត្យ ការបញ្ចេញសំណល់រាវ ពីក្រុមហ៊ុននិងរោងចក្រ ចូលតំបន់ទឹកសាធារណៈ អនុលោមតាមស្តង់ដារ មានប្រមាណ ១,៩ លានម៉ែត្រគីប ក្នុងខែ។

លទ្ធផលសម្រេចបាននាពេលនេះ គឺបានបង្ហាញពីកិច្ចខិតខំប្រឹងប្រែង និងចូលរួមសហការល្អពីថ្នាក់ដឹកនាំ និងមន្រ្តីក្រសួងបរិស្ថានពីក្រសួង ស្ថាប័នពាក់ព័ន្ធ រដ្ឋបាលរាជធានីខេត្ត អាជ្ញាធរមូលដ្ឋានគ្រប់ថ្នាក់ ម្ចាស់រោងចក្រនិងក្រុមហ៊ុន រួមជាមួយអ្នកសារព័ត៌មាន និងប្រជាពលរដ្ឋ ក្នុងអនុវត្តគោលនយោបាយ យុទ្ធសាស្រ្តរបស់រាជរដ្ឋាភិបាលកម្ពុជា យុទ្ធសាស្រ្តចក្រាវិស័យបរិស្ថាន ដែលសសរស្តមទី១ គឺ«ភាពស្អាត» និងប្រសាសន៍ដឹកនាំដ៏ខ្ពង់ខ្ពស់ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដែលបានយកចិត្តទុកដាក់ខ្ពស់ លើវិធានការទប់ស្កាត់ និងកាត់បន្ថយការបំពុលតំបន់ទឹកសាធារណៈ និងលើការគ្រប់គ្រងគុណភាពទឹក ប្រកបដោយចីរភាព សម្រាប់ការអភិរក្សជីវៈចម្រុះនៅក្នុងទឹក និងការពារសុខភាពសាធារណៈ។

អ្នកនាំពាក្យក្រសួងបរិស្ថាន បានបញ្ជាក់បន្ថែមថា ក្រសួងបរិស្ថាន បាននិងកំពុងអនុវត្ត «យុទ្ធនាការផ្ទៃទឹកស្អាត» ដោយផ្តោតលើការសម្អាតទន្លេ និងប្រភពទឹកសាធារណៈពីសំណល់ប្លាស្ទិក ការពង្រឹងការតាមដានគុណភាពទឹកសាធារណៈ ការរៀបចំលិខិតបទដ្ឋានគតិយុត្ត និងគោលការណ៍ណែនាំបច្ចេកទេស និងការបំពាក់ប្រព័ន្ធប្រព្រឹត្តិកម្មសំណល់រាវ និងឧបករណ៍ស្វ័យត្រួតពិនិត្យការបញ្ចញសំណល់រាវ នៅគ្រប់ប្រភពបញ្ចេញសំណល់រាវ ស្របតាមច្បាប់ជាធរមាន។

The post រោងចក្រចំនួន ៤២ បំពាក់ឧបករណ៍ស្វ័យប្រវត្តិតាមដានការបញ្ចេញសំណល់រាវបំពុល ចូលប្រភពទឹកធម្មជាតិ appeared first on Kampuchea Thmey Daily.

នីតិកាលទី៧ ក្រសួងបរិស្ថានដាក់ចេញយុទ្ធនាការអ្វីខ្លះ ដើម្បីលើកកម្ពស់ការអភិវឌ្ឍន៍បៃតង?

Dy Bunnara — Sun, 25 May 2025 07:23:58 +0000

រាជរដ្ឋាភិបាលក្នុងនីតិកាលទី៧ នៃរដ្ឋសភា បានប្រគល់បេសកកម្ម ឱ្យក្រសួងបរិស្ថាន ដឹកនាំ និងគ្រប់គ្រងកិច្ចគាំពារបរិស្ថាន ការគ្រប់គ្រងធនធានធម្មជាតិ ការអភិរក្សជីវៈចម្រុះ និងការអភិវឌ្ឍដោយចីរភាព ដើម្បីធានានូវឧត្តមប្រយោជន៍យូរអង្វែងរបស់ប្រជាជនកម្ពុជាគ្រប់រូប និងគ្រប់ជំនាន់។

យុទ្ធសាស្ត្របញ្ចកោណ ដំណាក់កាលទី១ បានគូសបញ្ជាក់អំពីបេសកកម្ម និងការប្តេជ្ញាចិត្តខ្ពស់ របស់រាជរដ្ឋាភិបាលក្នុងវិស័យបរិស្ថាន ដើម្បីឆ្លើយតបទៅនឹងបំណងប្រាថ្នារបស់ប្រជាពលរដ្ឋ សំដៅឈានឆ្ពោះទៅកាន់ការអភិវឌ្ឍប្រកបដោយចីរភាព។

ក្រសួងបរិស្ថានបានដាក់ចេញនូវ យុទ្ធសាស្ត្រចក្រាវិស័យបរិស្ថាន ២០២៣-២០២៨ ដោយមានយុទ្ធសាស្ត្រស្នូលផ្តោតសំខាន់លើមុំបីគឺ ការពង្រឹងគោលនយោបាយ ការកសាងរដ្ឋបាលឌីជីថល និងការពង្រីកការផ្សព្វផ្សាយ ដែលជាកម្លាំងចលកររុញបង្វិលយុទ្ធសាស្រ្តចំនួនបី គឺ «ភាពស្អាត ភាពបៃតង និងចីរភាព» មកធ្វើជាមូលដ្ឋានគ្រឹះ សម្រាប់តម្រង់ទិស និងចង្អុលបង្ហាញអាទិភាពការងារក្នុងការលើកកម្ពស់កិច្ចគាំពារបរិស្ថាន ការការពារធនធានធម្មជាតិ និងការអភិវឌ្ឍន៍ប្រកបដោយចីរភាព តាមរយៈការរៀបចំគោលនយោបាយ ផែនការយុទ្ធសាស្រ្ត និងផែនការសកម្មភាពនានា សំដៅធានាឱ្យបាននូវចីរភាពបរិស្ថាន និងសុក្រឹតកម្មបរិស្ថានកិច្ច ដើម្បីឆ្លើយតបនឹងការប្រែប្រួលអាកាសធាតុ និងលើកកម្ពស់ការអភិវឌ្ឍន៍បៃតង។

ក្នុងនីតិកាលទី ៧ នៃរដ្ឋាភិបាល ក្រសួងបរិស្ថាន បានដាក់ចេញនូវយុទ្ធនាការជាច្រើនជាជំហានៗ និងដំណាក់កាលរួមមានជាអាទិ៍៖

១) យុទ្ធនាការ «ថ្ងៃនេះ ខ្ញុំមិនប្រើថង់ប្លាស្ទិកទេ»
២) យុទ្ធនាការ «ដាំដើមឈើយ៉ាងតិច ១ លានដើមក្នុង ១ឆ្នាំ»
៣) យុទ្ធនាការ «សម្អាតទន្លេ»
៤) យុទ្ធនាការ «កម្ពុជាស្អាត ខ្មែរធ្វើបាន»
៥) យុទ្ធនាការ «ផ្ទៃមេឃពណ៌ខៀវ»
៦) យុទ្ធនាការ «ផ្លូវជាតិស្អាត គ្មានសំរាមប្លាស្ទិក»

ទន្ទឹមនឹងនេះ ក្រសួងបរិស្ថានក៏បានដាក់ចេញនូវវិធានការគន្លឹះចំនួន ៤ ដើម្បីថែរក្សាការពារ និងធ្វើឱ្យប្រសើរឡើងនូវតំបន់ការពារធម្មជាតិ និងព្រៃឈើគឺ៖

១) ការអនុវត្តច្បាប់ ១០០% ដោយពុំមានការលើកលែង និងយោគយល់
២) កិច្ចសហប្រតិបត្តិការជិតស្និទ្ធជាមួយអាជ្ញាធរមូលដ្ឋាន
៣) កិច្ចសហការល្អជាមួយកងកម្លាំងមានសមត្ថកិច្ច និងអង្គភាពប្រឆាំងអំពើពុករលួយ
៤) ការដាំដើមឈើយ៉ាងតិច ១ លានដើមក្នុង ១ ឆ្នាំ

លោក អ៊ាង សុផល្លែត រដ្ឋមន្រ្តីក្រសួងបរិស្ថានបានគូសបញ្ជាក់ថា កម្ពុជាកំពុងបោះជំហានយ៉ាងម៉ឺងម៉ាត់លើមាគ៌ាបៃតង ឆ្ពោះទៅរកអព្យាក្រឹត្យកាបូន និងការអភិវឌ្ឍប្រកបដោយចីរភាព។ កម្ពុជាកំពុងចូលរួមយ៉ាងសកម្ម និងស្មើមុខស្មើមាត់ជាមួយសហគមន៍អន្តរជាតិក្នុងកិច្ចការពារបរិស្ថាន ការអភិរក្សជីវៈចម្រុះ ប្រព័ន្ធអេកូឡូស៊ី និងការឆ្លើយតបទៅនឹងការប្រែប្រួលអាកាសធាតុ។

បើតាមលោករដ្ឋមន្រ្តីលើកិច្ចគាំពារបរិស្ថាន កម្ពុជាត្រូវតែមានម្ចាស់ការលើការការពារធនធានធម្មជាតិរបស់ខ្លួន ដើម្បីអាចធានាបានថា ធនធានធម្មជាតិរបស់ជាតិត្រូវបានការពារបន្តដល់អ្នកជំនាន់ក្រោយ៕

The post នីតិកាលទី៧ ក្រសួងបរិស្ថានដាក់ចេញយុទ្ធនាការអ្វីខ្លះ ដើម្បីលើកកម្ពស់ការអភិវឌ្ឍន៍បៃតង? appeared first on Kampuchea Thmey Daily.

សមិទ្ធផលក្រសួងបរិស្ថាន Archives - Kampuchea Thmey Daily

ការ​អភិវឌ្ឍ​លំហែ​បៃតង​ភ្នំ​ខ្នង​ផ្សារ​កំពុង​លេច​រូបរាង ទាញ​កំណើន​ទេសចរ​ទៅ​កម្សាន្ត​យ៉ាង​គំហុក