​ផ្លូវនេះ​ស្ថិត​នៅក្នុង​គម្រោងផ្លូវចំនួន​​ ១៤ ខ្សែ ដែលទទួលបានការ​ឧបត្ថម្ភថវិកា​​​ពី​សម្ដេចធិបតី ហ៊ុន ម៉ាណែត នៅ​ក្នុងក្រុងបាត់ដំបង ក្រៅពីផ្លូវចំនួន ២១ ខ្សែ ដែលជាគម្រោងរបស់ធនាគារអភិវឌ្ឍន៍អាស៊ី ADB។    

លោក ព្រួញ រិទ្ធថា ប្រធានមន្ទីរសាធារណការ និងដឹកជញ្ជូនខេត្តបាត់ដំបងបាន​ឲ្យ​ដឹង​ថា បច្ចុប្បន្នផ្លូវមួយចំនួនក្នុងក្រុងបាត់ដំបងដែលទទួលបានការគាំទ្រ​ថវិកា​ពី​សម្ដេចធិបតី​ កងវិស្វកម្មកំពុងស្ថាបនាជាបណ្ដើរៗ ដើម្បីជួយសម្រួលដល់ការធ្វើចរាចរណ៍​​របស់ប្រជាពលរដ្ឋ ខណៈ​គម្រោង​ផ្លូវខ្លះក៏​បានបញ្ចប់​រួចរាល់ជាស្ថាពរ។

ជាមួយ​គ្នានេះ ប្រធានមន្ទីរសាធារណការនិងដឹកជញ្ជូនខេត្ត ក៏ស្នើសុំ​ការយោគយល់ពីពលរដ្ឋ​លើ​ផ្លូវ​មួយចំនួន​ដែល​ខូចខាត​​បង្ក​ការ​លំបាក​សម្រាប់​ការ​ធ្វើដំណើរ​ ដោយសារតែមានការយឺតយ៉ាវពីការដេញថ្លៃរបស់ធនាគារអភិវឌ្ឍន៍អាស៊ី ADB ក្រោយពីការដាក់បង្កប់លូ ទាញយកទឹកកខ្វក់ចេញពីក្រុងរួចរាល់ ខណៈ​អាជ្ញាធរ​ក៏នឹងជួយ​សម្រួល​ផ្លូវដែលលំបាកខ្លាំងនៅកណ្ដាលក្រុង ដើម្បីពលរដ្ឋអាច​ធ្វើ​ដំណើរ​បណ្តោះ​អាសន្ន។

លោកសង្ឃឹមថា ផ្លូវទាំងអស់នេះនឹងអាចរួចរាល់ជាស្ថាពរនៅចុងឆ្នាំ ២០២៦ នេះ៕

អត្ថបទ សោ និយមរ័ត្ន

The post ក្រៅពីផ្លូវ ២១ ខ្សែ​​របស់ ADB ក្រុង​បាត់ដំបង​ទទួលបាន​គម្រោង​​ស្ថាបនាផ្លូវ​ ១៤ ខ្សែ​ទៀតផ្តល់​​ថវិកា​ដោយ​សម្តេចធិបតី ហ៊ុន ម៉ាណែត appeared first on Kampuchea Thmey Daily.

ជាមួយការដាក់ឱ្យដំណើរការប្រព័ន្ធនេះ រដ្ឋាករទឹកបាត់ដំបងបានបង្កើនសមត្ថភាពផលិតទឹកស្អាតរបស់ខ្លួនជាងពីរដង និងពង្រីកការតភ្ជាប់បណ្តាញថ្មីជូនដល់ ១៦.៧៩៨ គ្រួសារបន្ថែមទៀត ដែលគ្របដណ្តប់ប្រមាណ ៧៦% នៃតំបន់សេវាកម្មរបស់ខ្លួន។

ថ្លែងក្នុងពិធីសម្ពោធ ប្រព័ន្ធផ្គត់ផ្គង់ទឹកស្អាតខេត្តបាត់ដំបង លោក​ ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បានលើកឡើងថា ប្រព័ន្ធផ្គត់ផ្គង់ទឹកស្អាតថ្មីនេះ​បង្កើនសមត្ថភាពផលិតទឹកស្អាតរបស់រដ្ឋាករទឹកបាត់ដំបងពី ៣៣.៥២០ ម^៣/ ថ្ងៃ ទៅដល់ ៨៣.៥២០ ម^៣/ ថ្ងៃ, កើន ១៤៨%។ មានន័យថា ប្រជាពលរដ្ឋ រួមទាំងផលិតករ សេវាករ និងអាជីវករជាច្រើន នឹងអាចទទួលបានសេវាទឹកស្អាតដែលមានគុណភាព សុវត្ថិភាព ចីរភាព និងថ្លៃសមរម្យ ដើម្បីធ្វើឱ្យសុខុមាលភាពកាន់តែល្អប្រសើរ និងជីវភាពកាន់តែរីកចម្រើន។

ប្រព័ន្ធផ្គត់ផ្គង់ទឹកស្អាតថ្មីដែលដាក់សម្ពោធ​ជា​ផ្លូវការ​ចំណាយថវិកាសរុបប្រមាណ ៣១,៧៧ លានដុល្លារអាមេរិក ដែលជាគម្រោង​សហហិរញ្ញប្បទាន​ពីធនាគារអភិវឌ្ឍន៍អាស៊ី ទីភ្នាក់ងារបារាំងសម្រាប់ការអភិវឌ្ឍ និងថវិកាបដិភាគរបស់រាជរដ្ឋាភិបាលកម្ពុជា។

គម្រោងនេះមានទីតាំងស្ថិតក្នុងភូមិកំពង់សីមានៃក្រុងបាត់ដំបង ដោយបានចាប់ផ្តើមសាងសង់ក្នុងខែកក្កដា ឆ្នាំ២០២២ និងបញ្ចប់ការសាងសង់ក្នុងខែធ្នូ ឆ្នាំ២០២៥ ដែលរួមមានស្ថានីយបូមទឹកឆៅមួយ រោងចក្រប្រព្រឹត្តកម្មទឹកស្អាតសមត្ថភាព ៥០.០០០ ម៉ែត្រគីបក្នុងមួយថ្ងៃ និងបណ្តាញចែកចាយប្រវែង ៩៤ គីឡូម៉ែត្រ។

អ្នកស្រី Yasmin Siddiqi នាយិកាប្រចាំប្រទេសកម្ពុជានៃធនាគារអភិវឌ្ឍន៍អាស៊ី បានរំលេចពីគុណប្រយោជន៍​ដ៏ទូលំទូលាយនៃគម្រោងដោយលើកឡើងថា ការផ្គត់ផ្គង់ទឹកស្អាតដែលអាចទុកចិត្តបាន លើកកម្ពស់សុខភាពសាធារណៈ សន្សំពេលវេលាសម្រាប់គ្រួសារ និងគាំទ្រកំណើនសេដ្ឋកិច្ចក្នុងមូលដ្ឋាន។

ខណៈដែលនគរូបនីយកម្មកំពុងមានសន្ទុះយ៉ាងលឿន ការទទួលបានទឹកស្អាតដែលមានសុវត្ថិភាព និងតម្លៃសមរម្យ មានសារសំខាន់ចំពោះផលិតភាព និងគុណភាពជីវិត។

ដៃគូសំខាន់មួយទៀតរបស់គម្រោងគឺទីភ្នាក់ងារបារាំងសម្រាប់ការអភិវឌ្ឍ (AFD) ដែលបាននិងកំពុងគាំទ្រវិស័យទឹកស្អាតនៅកម្ពុជាតាំងពីទសវត្សរ៍ឆ្នាំ១៩៩០។

អ្នកស្រី Sandrine Boucher នាយិកាប្រចាំប្រទេសកម្ពុជា របស់ AFD បានលើកឡើងថា សមិទ្ធផលថ្មីនេះ​គឺ​លើស​ពី​ហេដ្ឋារចនាសម្ព័ន្ធទឹកស្អាត។ វាគឺជាការវិនិយោគទៅលើប្រជាជន សុខភាពសាធារណៈ និងអនាគតរបស់ក្រុងបាត់ដំបង។

គម្រោងនេះក៏បង្ហាញពីភាពជាដៃគូដ៏រឹងមាំ រវាងរាជរដ្ឋាភិបាលកម្ពុជា និងដៃគូអភិវឌ្ឍន៍ ក្នុងការលើកកម្ពស់វិស័យទឹកស្អាត រួមចំណែកកែលម្អជីវភាពរស់នៅ និងគាំទ្រការអភិវឌ្ឍទីក្រុង និងតំបន់ប្រជុំជនប្រកបដោយចីរភាព​ និងបរិយាបន្ន។  

The post ​ទឹកស្អាតខេត្តបាត់ដំបងពង្រីក​សេវា​​ផ្គត់ផ្គង់ទឹកស្អាត​កើនគុណជាពីរ ក្រោយ​សម្ពោធប្រព័ន្ធផ្គត់​ផ្គង់ទឹកស្អាត​ថ្មី​បន្ថែម appeared first on Kampuchea Thmey Daily.

កាលពី​ថ្ងៃទី៣ ខែមេសា ឆ្នាំ២០២៦ លោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទបានដឹកនាំមន្ដ្រីបច្ចេកទេសក្រសួង និងមន្ទីរអភិវឌ្ឍន៍ជនបទខេត្តបាត់ដំបង ​ចុះ​ទៅពិនិត្យការដ្ឋានសាងសង់ផ្លូវជនបទចំនួន ២ ខ្សែ នៅក្នុងខេត្តបាត់ដំបង។

ខ្សែទី១៖ ឈ្មោះផ្លូវ NR.57B1-រូងជ្រៃ ជាផ្លូវក្រាលកៅស៊ូពីរជាន់និងក្រាលបេតុងមានប្រវែងសរុប ៩,៩០៧គ.ម ទទឹង ៨ ម៉ែត្រ តភ្ជាប់ពីភូមិរូងជ្រៃ ឃុំរូងជ្រៃ ទៅដល់ភូមិទួលតាសុខ ឃុំបន្សាយត្រែង ស្រុកថ្មគោល។ ផ្លូវនេះបានចាប់ផ្ដើម​បើកការដ្ឋាន​សាងសង់កាលពីខែកុម្ភៈ ឆ្នាំ២០២៥ ដែលបច្ចុប្បន្ន​សម្រេចវឌ្ឍនភាពបាន​ប្រហែល ៥៧% ហើយគ្រោងនឹងបញ្ចប់នៅត្រឹមពាក់កណ្ដាលឆ្នាំ ២០២៦។

ខ្សែទី២៖ ឈ្មោះផ្លូវ NR.57B-រូងជ្រៃ ជាផ្លូវក្រាលកៅស៊ូពីរជាន់និងក្រាលបេតុងមានប្រវែងសរុប ១០,៤០៤គ.ម ទទឹង ៧ ម៉ែត្រ តភ្ជាប់ពីភូមិបល្ល័ង្គក្រោម ឃុំរូងជ្រៃ ស្រុកថ្មគោល ទៅដល់ភូមិស្វាយជ្រុំ ឃុំបវេល ស្រុកបវេល។ ផ្លូវនេះបានចាប់ផ្ដើមសាងសង់នៅខែកុម្ភៈ ឆ្នាំ២០២៥ ដែលរហូតមកដល់ពេលនេះ​សម្រេចបានប្រហែល ៥៤% ហើយគ្រោងនឹងបញ្ចប់នៅត្រឹមពាក់កណ្ដាលឆ្នាំ២០២៦ ។

ផ្លូវទាំងពីរខ្សែនេះ ត្រូវបាន​ស្ថាបនា​ប្រទាក់ក្រឡា​គ្នា​មានប្រវែងសរុបជាង ២០ គីឡូម៉ែត្រ ដែលផ្តល់ផលប្រយោជន៍ផ្ទាល់ដល់​ប្រជាជនចំនួនសរុប ៣ ៧៩៨ គ្រួសារ ស្មើនឹង ១៤ ៨៧២ នាក់ និងប្រយោលប្រមាណ ៦ ៦៤៧ គ្រួសារ ស្មើនឹង ៣៥ ២៣៤ នាក់។

បើតាមមន្រ្តីក្រសួងអភិវឌ្ឍន៍ជនបទ ផ្លូវទាំង ២ ខ្សែខាងលើនេះ អនុវត្ត​ដោយ​ក្រសួងអភិវឌ្ឍន៍ជនបទ ក្នុងក្រប​ខ័ណ្ឌគម្រោងគាំទ្រនិរន្តរភាពហេដ្ឋារចនាសម្ព័ន្ធជនបទ ដើម្បីទីផ្សារកសិករនិងពាណិជ្ជូបនីយកម្មកសិកម្ម (SAAMBAT) ក្រោមហិរញ្ញប្បទានកិច្ចសហប្រតិបត្តិការរវាងរាជរដ្ឋាភិបាលកម្ពុជា មូលនិធិអន្តរជាតិសម្រាប់អភិវឌ្ឍន៍កសិកម្ម (IFAD) ធនាគារវិនិយោគអឺរ៉ុប (EIB) និងមូលនិធិវិនិយោគអាស៊ី នៃសហភាពអឺរ៉ុប (EU-AIF)។

ក្នុងឱកាសពិនិត្យការដ្ឋានស្ថាបនា​ផ្លូវដោយមានការចូលរួមពីមន្រ្តីពាក់ព័ន្ធ លោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានណែនាំដល់ទីប្រឹក្សាបច្ចេកទេស និងក្រុមហ៊ុនទទួលការសាងសង់ប្រចាំការនៅការដ្ឋានផ្ទាល់ ត្រូវ​សាងសង់​ដោយ​អនុវត្តឱ្យបានត្រឹមត្រូវតាមបទដ្ឋានបច្ចេកទេស និងពន្លឿនការងារសាងសង់ឱ្យលឿនស្របតាមកិច្ចសន្យាការងារ៕

The post ផ្លូវលំពីរខ្សែ​នៅក្នុងខេត្តបាត់ដំបងកំពុង​សាង​សង់​ ត្រឹ​មពាក់កណ្តាលឆ្នាំ ២០២៦ នឹង​ក្លាយ​ទៅជា​ផ្លូវកៅស៊ូនិងបេតុង appeared first on Kampuchea Thmey Daily.

លោក មុិល សុផល អភិបាលស្រុកឯកភ្នំបានឲ្យដឹងថា ផ្លូវដែលកំពុងស្ថាបនា​នេះ​មានប្រវែង ១៨ គីឡូម៉ែត្រ ​ក្រាលកៅ​ស៊ូ​​តភ្ជាប់​ឃុំចំនួន ៥ រួមមាន ឃុំសំរោង ឃុំព្រែកខ្ពប ឃុំព្រែកនរិន្ទ និងឃុំពាមឯក។

ក្រោយទទួលបានផ្លូវក្រាលកៅស៊ូប្រវែង ១៨ គីឡូម៉ែត្រភ្ជាប់ឃុំជាច្រើននេះ ប្រជាកសិករសប្បាយចិត្ត​ជា​ខ្លាំង ខណៈ​ដែល​រដ្ឋបាលស្រុកមានផែនការ​នឹងខិតខំរៀបចំទីប្រជុំជនឲ្យកាន់តែមានវិសាលភាពទូលំទូលាយថែមទៀត។

លោក មុិល សុផល បានអះអាងថា តាមរយះមូលនិធិស្រុក នៅ​ឆ្នាំ ២០២៦ រដ្ឋបាលស្រុកនឹងបន្តសាងសង់ផ្លូវចាក់បេតុងក្នុងទីប្រជុំជនស្រុកបន្ត​ទៀត​ដើម្បីផ្តល់​​បរិយាកាសល្អ និង​ផាសុខភាពសម្រាប់ពលរដ្ឋរស់នៅ​​។

ស្រុកឯកភ្នំមិនមានផ្លូវប្រវែងវែង​ដូចបណ្តាស្រុកផ្សេងៗនោះទេ ទើបមានស្ថាបនា​ផ្លូវក្រាលកៅស៊ូមួយខ្សែប្រវែង ១៨ គីឡូម៉ែត្រសាងសង់តភ្ជាប់ពីឃុំមួយទៅឃុំមួយ​រហូតដល់ទៅ ៥ ឃុំ។

ប្រជាកសិករនៅតាមបណ្តាឃុំទាំង ៥ សម្តែងក្តី​​រីករាយយ៉ាងក្រៃលែងដោយពួកគេលើកឡើងថា ផ្លូវ​នេះជាសរសៃឈាម​សេដ្ឋកិច្ចរបស់ពួកគេ តាមរយះការដឹកជញ្ជូនកសិផលបានចូលដលទីផ្សារយ៉ាងឆាប់រហ័សមិនរអាក់រអ៊ួលដូចគ្រាកន្លងទៅ​។

កសិករម្នាក់ក្នុងឃុំព្រែកនរិន្ទ អ្នក​ស្រី ចាន់ រ៉ា បាននិយាយថា អ្នកស្រី​សប្បាយចិត្ត ដែលរដ្ឋបាលស្រុកបានគិតគួរសាងសង់​ហេដ្ឋារចនាមសម្ព័ន្ធ​ផ្លូវថ្នល់​ជូនពលរដ្ឋ។ តាមរយៈ​ហេដ្ឋារចនាសម្ព័ន្ធ​ផ្លូវ​ដែល​បាន​ស្ថាបនារួចនេះ​​មិនត្រឹមតែងាយស្រួលក្នុង​ដឹកជញ្ជូនកសិករ​ចូលទីផ្សារប៉ុណ្ណោះទេ សូម្បី​តែ​ឈ្មួញ​ក៏មានការងាយស្រូលចូលមក​ដល់​ចម្ការ​របស់ពលរដ្ឋ​ ដើម្បីមកលើកបន្លែពីកសិករ​ទៅលក់បន្តក្នុងនោះមានដូចជា ម្ទេស ននោង ម្រះ ត្រឡាច និងឪឡឹកជាដើម។

អ្នកស្រី ឃួន ធឿន ជាអាជីវកររស់នៅក្នុងក្រុងបាត់ដំបងបាននិយាយប្រាប់ថា វាជាការល្អ​ប្រសើរ​ដែលតាមភូមិឃុំមានការស្ថាបនា​ផ្លូវតភ្ជាប់ អាច​​ឲ្យ​ឈ្មួញ​ចូល​​ទៅ​ទិញ​​កសិផល​ពីពលរដ្ឋ​ដូចជា ប្រហុក ត្រីស្រស់ ត្រីងៀត ត្រីឆ្អើរ យកមកលក់បន្តនៅទីផ្សារក្នុងក្រុង ដែលបាន​ជួយពង្រឹង​សេដ្ឋកិច្ចគ្រួសារបានល្អ​ប្រសើរ​ជាងមុន៕

អត្ថបទ÷សៅ សារិទ្ធ

The post ផ្លូវមួយខ្សែប្រវែង ១៨ គីឡូម៉ែត្រ ស្ថាបនា​ឆ្លងកាត់ឃុំ​ចំនួន ៥ ក្នុងស្រុកឯកភ្នំ ក្លាយ​ជាសសៃឈាមសេដ្ឋកិច្ច​ពលរដ្ឋតាមជនបទ appeared first on Kampuchea Thmey Daily.

លោក ព្រួញ រិទ្ធថា ប្រធានមន្ទីរសាធារណះការខេត្តបាត់ដំបង​បាន​ឲ្យ​ដឹង​ថា តាម​គម្រោងក្នុងឆ្នាំ ២០២៦ ផ្លូវក្នុងក្រុងបាត់ដំបង​គ្រោង​ត្រូវជួសជុលស្តារឡើងវិញសរុប​ចំនួន​ ១៧ ខ្សែ។

លោកថា គិត​មកត្រឹមពេលនេះ ក្រុមការងារមន្ទីរបានបើកការដ្ឋាន​សាងសង់​បាន​ចំនួន​ ៧ ខ្សែ និង​នៅសល់ ១០ ខ្សែទៀត នឹង​បន្ត​បើកដំណើរការ​បើកការដ្ឋាន​សាងសង់​បន្ត​បន្ទាប់នៅ​ពេលដ៏ខ្លីខាងមុខនេះ។

ផ្លូវក្នុងក្រុងបាត់ដំបង ត្រូវ​បានអាជ្ញាធរឈូស​បើក​ផ្លូវ​ឲ្យបាន​ធំទូលាយ ដោយ​បាន​​ណែនាំ​ឲ្យប្រជាពលរដ្ឋ​ចូលរួមរុះរើដូចជា រោង រាន របង តូប សំយាប ដែលបានសង់រំលោភ​លើដីចំណីផ្លូវសាធារណៈរបស់រដ្ឋ ដូចជា​តាមបណ្តោយផ្លូវ ១៥៤ ផ្លូវ ៤០៦ ផ្លូវ ៥២០ ដែលកន្លងទៅ​មាន​ភាព​តូចចង្អៀត មិន​មានផាសុខភាព និងបរិយាកាសអាប់អ៊ួ។

ប្រជាពលរដ្ឋរស់នៅក្នុងក្រុងបាត់ដំបងសាទរចំពោះការរៀបចំរបស់រដ្ឋបាលក្រុង ដែលក្រោយ​ហេដ្ឋារចនាសម្ព័ន្ធ​ផ្លូវ​ក្នុង​ក្រុង​បានស្តារ​ជួសជុលមានភាព​ស្រឡះ​ កាត់បន្ថយ​ការកកស្ទះ និងបញ្ចៀសគ្រោះថ្នាក់ចរាចរជាដើម។

អាជីវករលក់និងជួសជុលទូរស័ព្ទដៃក្នុងក្រុងបាត់ដំបង លោក ឡាយ សុប៊ិន បានឲ្យដឹងថា លោកសាទរចំពោះកិច្ចខិតខំរបស់រដ្ឋបាលក្រុងក៏ដូចជាអាជ្ញាធរខេត្ត ដែលបានរៀបចំក្នុងក្រុង​បើក​ស្តារ​ឲ្យ​មាន​ភាព​ទូលាយជាង​មុន​ ងាយស្រួល​សម្រាប់​ពលរដ្ឋ​ធ្វើដំណើរ និង​​ភ្ញៀវបរទេសដើរកម្សាន្តប្រកបដោយផាសុខភាព​ល្អ៕

អត្ថបទ÷សៅ សារិទ្ធ

The post ផ្លូវក្នុងក្រុងបាត់ដំបង​​ក្នុង​ផែនការ ១៧ ខ្សែ បើកការដ្ឋាន​ស្ថាបនា​បន្ត​បន្ទាប់​បាន​​ចំនួន ៧ ខ្សែ appeared first on Kampuchea Thmey Daily.

លោក សុខ លូ បានប្រកាស​បែបនេះ ក្នុង​ឱកាស​បើកការដ្ឋានសាងសង់​ប្រព័ន្ធលូ​និងស្ដារប្រឡាយស្ថិតនៅ​ក្នុងស្រុកមោងឫស្សី ខេត្ត​បាត់ដំបង។

លោក​សូខ លូ បាន​បញ្ជាក់​ថា គម្រោង​រៀបចំដាក់អំពូល​សូឡាបំភ្លឺផ្លូវក្នុងភូមិសាស្រ្ត​ខេត្តបាត់ដំបងទទួល​​បានការឧបត្ថម្ភ​គាំទ្រពី​លោក កែវ រតនៈ រដ្ឋមន្រ្តីក្រសួងរ៉ែ និងថាមពល។

ផ្លូវជាតិលេខ ៥ ​មានប្រវែងសរុប ៤០៧,៤៥ គីឡូម៉ែត្រ ឆ្លងកាត់ខេត្តកណ្តាល ខេត្តកំពង់ឆ្នាំង ខេត្តពោធិ៍សាត់ ខេត្តបាត់ដំបង និងខេត្តបន្ទាយមានជ័យ។

ពាក់ព័ន្ធការ​រៀបចំប្រព័ន្ធសូឡា​តាម​ដងផ្លូវជាតិ​ អាជ្ញាធរ​ខេត្ត​ពោធិ៍សាត់​បាន​បញ្ចប់​ការ​ដំឡើង​បង្គោលអំពូល​​សូឡា​ក្នុង​ភូមិសាស្រ្ត​ខេត្ត​ពោធិ៍សាត់​ចាប់​ពីប្រទល់​ខេត្ត​កំពង់ឆ្នាំង​ដល់​​ខេត្ត​បាត់ដំបង។

លោក ខូយ រីដា អភិបាល​នៃ​គណៈអភិបាល​ខេត្ត​ពោធិ៍សាត់​​បាន​គូស​បញ្ជាក់​ថា ការ​រៀបចំអំពូល​សូឡា​តាម​ដង​ផ្លូវជាតិ​សំខាន់ៗ​ពិត​ជា​​មាន​សារៈសំខាន់ណាស់ ជួយ​កាត់បន្ថយគ្រោះថ្នាក់ចរាចរណ៍ ធានាបាននូវសន្តិសុខ សុវត្ថិភាព និងភាពងាយស្រួលក្នុងការធ្វើដំណើរជូនប្រជាពលរដ្ឋនាពេលយប់៕

The post ខេត្ត​បាត់ដំបង នឹង​​ចាប់ផ្តើមរៀបចំ​បំពាក់អំពូល​​​សូឡាពីព្រំប្រទល់​ខេត្តពោធិ៍សាត់ រហូតដល់ខេត្តបន្ទាយមានជ័យ appeared first on Kampuchea Thmey Daily.

គោលបំណងគឺដើម្បីចុះត្រួតពិនិត្យការងារប្រគល់-ទទួលបច្ចេកទេស អនុគម្រោងសាងសង់ប្រព័ន្ធលូរំដោះទឹកកខ្វក់ និង​សាងសង់ស្ថានីយចម្រោះទឹកកខ្វក់ក្រុងបាត់ដំបង (ផ្នែកខាងកើតស្ទឹង) ស្ថិតក្រោមគម្រោងគ្រប់គ្រងកែលម្អបរិស្ថានជុំវិញបឹងទន្លេសាបជំហាន២ និងអនុគម្រោងសាងសង់ប្រព័ន្ធលូ និងស្ថានីយប្រព្រឹត្តកម្មទឹកកខ្វក់ក្រុងបាត់ដំបង (ផ្នែកខាងលិចស្ទឹង) ស្ថិតក្រោមគម្រោងផ្គត់ផ្គង់ទឹកស្អាត និងអនាម័យខេត្ត ដែលនឹងត្រូវត្រៀមសម្ពោធដាក់ឱ្យប្រើប្រាស់ជាផ្លូវការនាពេលឆាប់ៗខាងមុខនេះ។

អនុគម្រោងសាងសង់ប្រព័ន្ធលូរំដោះទឹកកខ្វក់ និងសាងសង់ស្ថានីយចម្រោះទឹកកខ្វក់ ស្ថិតនៅក្នុងគម្រោងគ្រប់គ្រងកែ​លម្អបរិស្ថានជុំវិញបឹងទន្លេសាបជំហាន២ ដែលគម្រោងផ្នែកខាងកើតស្ទឹងគ្របដណ្តប់លើផ្ទៃដីសរុបចំនួន ៦១២,៣៤​ហិកតា ដែលស្ថិតនៅក្នុងសង្កាត់ចំនួន២គឺ សង្កាត់ព្រែកព្រះស្តេច និងសង្កាត់រត្តនៈ។

ផ្ទៃដីសម្រាប់សាងសង់ស្ថានីយប្រព្រឹត្តកម្មទឹកកខ្វក់មានទំហំ ១០,០២ហិកតា។ រីឯអនុគម្រោងសាងសង់ប្រព័ន្ធលូ និងស្ថានីយប្រព្រឹត្តកម្មទឹកកខ្វក់ក្រុងបាត់ដំបង (ផ្នែកខាងលិចស្ទឹង) ស្ថិតក្រោមគម្រោងផ្គត់ផ្គង់ទឹកស្អាត និងអនាម័យខេត្ត គ្របដណ្តប់លើផ្ទៃដីសរុបចំនួន ២០០ហិកតា ដែលស្ថិតនៅក្នុងសង្កាត់ចំនួន៥គឺ សង្កាត់ចំការសំរោង អូចារ ស្លាកែត ទួលតាឯក និងស្វាយប៉ោ។ ផ្ទៃដីសម្រាប់សាងសង់ស្ថានីយប្រព្រឹត្តកម្មទឹកកខ្វក់មានទំហំ ៨,៩ហិកតា ជាមួយគ្នានេះដែរតាមផែនការគ្រោងទុកប្រព័ន្ធទាំងមូលនឹងត្រូវប្រើប្រាស់បានរយៈពេល ២០ ឆ្នាំ។

ចំពោះស្ថានីយប្រព្រឹត្តកម្មនៅផ្នែកខាងកើតស្ទឹងប្រើប្រាស់នូវបច្ចេកវិទ្យា LAGOON និងផ្នែកខាងលិចស្ទឹងប្រើប្រាស់បច្ចេកវិទ្យា Trickling Filter Biological Treatment៕

The post ប្រព័ន្ធលូរំដោះទឹកកខ្វក់ និងស្ថានីយចម្រោះទឹកកខ្វក់ក្រុងបាត់ដំបងបញ្ចប់ការ​សាងសង់ មន្រ្តីបច្ចេកទេស​ចុះពិនិត្យ​ប្រគល់ទទួល appeared first on Kampuchea Thmey Daily.

ទីតាំងវិមានឈ្នះឈ្នះ ដែលរដ្ឋបាលខេត្តបានសាងសង់ឡើងតាមខ្នាតពង្រួញ គឺស្ថិតនៅក្បាលស្ពានត្រើយខាងកើត លើសួនដ៏វែងអន្លាយ ចាប់ពីស្ពានសម្ដេចសខេង ទៅទល់ស្ពានថ្មី ដែលការស្ថាបនា និងរៀបចំជាសួនយ៉ាងស្រស់ស្អាតរបស់រដ្ឋបាលខេត្តនេះ បានធ្វើឲ្យតំបន់នេះ ក្លាយជាតំបន់ដ៏ពេញនិយមរបស់ប្រជាពលរដ្ឋទាំងក្នុងក្រុង ទាំងមកពីទីជិតទីឆ្ងាយ ដើម្បីចូលរួមហាត់ប្រាណយកកាយសម្បទារឹងមាំ ដែលខ្លះទៀតមកអង្គុយគយគន់ទឹកស្ទឹងសង្កែនាពេលសាយ័នអស្ដង្គត។

មិនត្រឹមតែសួននៅត្រើយខាងកើតស្ទឹងប៉ុណ្ណោះទេ បច្ចុប្បន្នរដ្ឋបាលខេត្តកំពុងរៀបចំសួនមួយខ្សែទៀតដែលស្ថិតនៅខាងលិចស្ទឹងសង្កែ ទល់មុខគ្នានឹងសួនវិមានឈ្នះឈ្នះដែលមានប្រវែងបណ្ដោយស្មើគ្នា ដើម្បីកែសោភ័ណភាពក្រុងបាត់ដំបងឲ្យកាន់តែស្រស់ស្អាត និងមានពណ៌ខៀវស្រងាត់ដោយសារការដាំដើមឈើលម្អតាមសួនដែលមិនយូរប៉ុន្មានទេក្រុងបាត់ដំបង នឹងក្លាយជាក្រុងមួយដ៏ស្រស់ស្អាត និងស៊ីវីល័យ៕

អត្ថបទ៖ សោ និយមរ័ត្ន

The post សួនវិមានឈ្នះឈ្នះ ជាប់ដងស្ទឹងសង្កែ ក្លាយជាទីកន្លែងហាត់ប្រាណយ៉ាងល្អសម្រាប់ប្រជាពលរដ្ឋក្នុងក្រុងបាត់ដំបង appeared first on Kampuchea Thmey Daily.