សហគ្រាសខេត្តមណ្ឌលគិរី Archives - Kampuchea Thmey Daily

គម្រោងវិនិយោគចំនួន ៥ ក្នុងខេត្តមណ្ឌលគីរី ក្រោមទុនប្រមាណ ១២៣ លានដុល្លារ មន្រ្តីចុះពិនិត្យលើកទឹកចិត្តជំរុញការវិនិយោគ

Dy Bunnara — Tue, 13 Jan 2026 03:48:06 +0000

ក្រុមការងារជំរុញការវិនិយោគក្នុងភូមិភាគឦសាន (ក.វ.ឦសាន) បានដឹកនាំកិច្ចពិភាក្សាលើគម្រោងវិនិយោគចំនួន ៥ នៅខេត្តមណ្ឌលគីរី ក្រោមទុនវិនិយោគប្រមាណ ១២៣ លានដុល្លារអាម៉េរិក ដែលបានស្នើការលើកទឹកចិត្ត ការអនុគ្រោះ និងការសម្រួលនីតិវិធីផ្សេងៗ។

លោក ពេជ្រ សម្បត្តិ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអនុប្រធានលេខាធិការដ្ឋានក្រុមការងារជំរុញការវិនិយោគនៅភូមិភាគឦសាន (ក.វ.ឦសាន) បានសង្កត់ធ្ងន់លើសារៈសំខាន់នៃយន្តការ «ច្រកចេញចូលតែមួយ» ក្នុងការសម្របសម្រួលក្រសួងស្ថាប័នពាក់ព័ន្ធទាំងអស់ ដើម្បីពន្លឿនការអនុវត្តនីតិវិធីវិនិយោគ និងផ្តល់នូវដំណោះស្រាយជាកញ្ចប់ ស្របតាមអភិក្រម «ជវភាពនៃប្រព័ន្ធតួអង្គតែមួយ»។

លោកថា ក្រុមការងារជំរុញការវិនិយោគនៅភូមិភាគឦសាន នឹងបន្តរក្សាទំនាក់ទំនងជាប្រចាំជាមួយវិនិយោគិននៅទូទាំងខេត្តទាំងបួននៃភូមិភាគឦសាន ដើម្បីជំរុញការវិនិយោគកែច្នៃបង្កើនតម្លៃបន្ថែម និងបន្តផ្សព្វផ្សាយពីសក្តានុពលវិនិយោគរបស់ខេត្តមណ្ឌលគិរី និង ភូមិភាគឦសាន ជាពិសេសកត្តាអំណោយផលដ៏ធំធេងនៃតំបន់សម្រាប់ផលិតកម្ម និងការកែច្នៃ ក្នុងវិស័យកសិកម្ម កសិ-ឧស្សាហកម្ម និង ទេសចរណ៍។

ក្នុងឱកាសនោះ ក្រុមការងារបានចុះពិនិត្យទីតាំងនិងជួបពិភាក្សាផ្ទាល់ជាមួយតំណាងក្រុមហ៊ុននៃគម្រោងវិនិយោគទាំង ៥ ដែលវិនិយោគលើការដាំដុះ និងកែច្នៃកៅស៊ូ និង កាហ្វេ និង ការអភិវឌ្ឍតំបន់ទេសចរណ៍ពិសិដ្ឋ ដែលបានស្នើសុំ ដើម្បីពិនិត្យ និង ពិភាក្សាលើទិដ្ឋភាពបច្ចេកទេសនៃគម្រោង ក៏ដូចជាសំណើនិងបញ្ហាប្រឈមដែលក្រុមហ៊ុនបានលើកឡើង៕

The post គម្រោងវិនិយោគចំនួន ៥ ក្នុងខេត្តមណ្ឌលគីរី ក្រោមទុនប្រមាណ ១២៣ លានដុល្លារ មន្រ្តីចុះពិនិត្យលើកទឹកចិត្តជំរុញការវិនិយោគ appeared first on Kampuchea Thmey Daily.

សហគ្រាសចំនួនពីរនៅខេត្តមណ្ឌលគិរី ទទួលស្គាល់ផលិតកាហ្វេមានគុណភាព លក់ចែកចាយលើទីផ្សារ

Dy Bunnara — Thu, 13 Mar 2025 03:24:12 +0000

មណ្ឌលគិរីដែលជាខេត្តនៅតំបន់ខ្ពង់រាប មានសហគ្រាសចំនួនពីរដែលកំពុងផលិតកែច្នៃកាហ្វេ សម្រាប់លក់ចែកចាយនៅលើទីផ្សារ។

លោក ងិន សុវិមាន អភិបាលរងខេត្តមណ្ឌលគិរីបានគូសបញ្ជាក់ថា កាហ្វេមណ្ឌលគិរីមានកេរ្តិ៍ឈ្មោះល្បី ដោយសារតែគុណភាព និងរសជាតិទទួលស្គាល់ពីពលរដ្ឋទូទៅ។

ខណៈដែលខេត្តមណ្ឌលគីរីមានភូមិសាស្ត្រសមស្របសម្រាប់ដាំដុះដំណាំយុទ្ធសាស្រ្តនេះ លោក ងិន សុវិមាន បានបញ្ជាក់ថា បច្ចុប្បន្ននៅក្នុងខេត្តមានសហគ្រាសចំនួនពីរ ដែលមានលទ្ធភាពកែច្នៃកាហ្វេសម្រាប់លក់ចែកចាយនៅលើទីផ្សារ។

ក្នុងចំណោមសហគ្រាសចំនួនពីរដែលទទួលស្គាល់ពីអាជ្ញាធរខេត្ត លោក ងិន សុវិមាន បានលើកពីកាហ្វេ ចាយ ម៉ៅ នៅក្នុងខេត្តមណ្ឌលគិរី ដែលសហគ្រាសនេះមានទាំងចម្ការសម្រាប់ដាំកាហ្វេ រួមទាំងទីតាំងវេចខ្ចប់ ខណៈផលិតផលកាហ្វេរបស់សហគ្រាសមានការគាំទ្រ និងបានផ្គត់ផ្គង់ទៅទីផ្សារទាំងនៅក្នុងខេត្តនិងនៅរាជធានីភ្នំពេញ។

យ៉ាងណាមិញ បើតាមលោកអភិបាលរងខេត្ត ទោះបីកាហ្វេខេត្តមណ្ឌលគិរីទទួលស្គាល់គុណភាពអាចលក់លើទីផ្សារក្នុងស្រុកនិងនាំចេញបាន ប៉ុន្តែផ្ទៃដីដាំដុះនៅមានចំនួនតិច ហើយការផលិតកែច្នៃសម្រាប់លក់លើទីផ្សារក៏មិនទាន់បានទូលំទូលាយនៅឡើយ។

ពាក់ព័ន្ធដំណាំកាហ្វេនៅខេត្តមណ្ឌលគិរី ពូជកាហ្វេអារ៉ាបីកាឃើញថាមានការពេញនិយម ហើយត្រូវបានដាំដុះច្រើននៅខេត្តមណ្ឌលគិរី។

លោក ស៊ាន លៀងហី អ្នកបច្ចេកទេសដាំកាហ្វេអារ៉ាប៊ីកានៅចម្ការកាហ្វេ ភី ដា ក្នុងខេត្តមណ្ឌលគិរីបានឲ្យដឹងថា ពូជកាហ្វេអារ៉ាបីកា ដើម្បីដាំដុះលូតលាស់បានល្អត្រូវការដាំនៅរយៈកម្ពស់ចាប់ពី ៧០០ ម៉ែត្រ ដល់ ១ ០០០ ម៉ែត្រ។

តាមការស្រាវជ្រាវ ពូជកាហ្វេអារ៉ាប៊ីកា ធន់អាកាសធាតុ និងទទួលទិន្នផលខ្ពស់ ខណៈដែលភូមិសាស្ត្រទឹកដីខេត្តមណ្ឌលគិរីសមស្របសម្រាប់ការដាំពូជកាហ្វេនាំចូលពីបរទេសនេះ។

បើតាមលោក ស៊ាន លៀងហី កាហ្វេពូជអារ៉ាប៊ីកា ការថែទាំត្រូវការប្រើប្រាស់ប្រភេទជីកំប៉ុសច្រើន ហើយពាក់ព័ន្ធកម្រិត PH ដី និងការប្រើប្រាស់ថ្នាំបាញ់សម្លាប់សត្វល្អិត ក៏ត្រូវការពិនិត្យពិច័យយ៉ាងហ្មត់ចត់ផងដែរ។

លោក ស៊ាន លៀងហី បានអះអាងថា កន្លងទៅមានក្រុមអ្នកជំនាញជប៉ុនបានចុះពិនិត្យ ហើយវាយតម្លៃថាកាហ្វេមណ្ឌលគិរី មានគុណភាពល្អអាចនាំចេញបាន៕

The post សហគ្រាសចំនួនពីរនៅខេត្តមណ្ឌលគិរី ទទួលស្គាល់ផលិតកាហ្វេមានគុណភាព លក់ចែកចាយលើទីផ្សារ appeared first on Kampuchea Thmey Daily.

គម្រោងវិនិយោគអេកូទេសចរណ៍ ១៥ គម្រោងចាយទុនខ្ទង់លានដុល្លារ នៅខេត្តមណ្ឌលគិរី កំពុងឆ្លងកាត់ការពិនិត្យសម្រេច

Din Thary — Wed, 26 Feb 2025 04:45:16 +0000

លោក ងិន សុវិមាន អភិបាលរងខេត្តមណ្ឌលគិរី បានបង្ហើបពីគម្រោងវិនិយោគតំបន់អេកូទេសចរណ៍ចំនួន ១៥ នៅខេត្តមណ្ឌលគិរី កំពុងស្ថិតនៅក្រោមការពិនិត្យវាយតម្លៃ ដើម្បីអាចឈានទៅដំណើរការនៅពេលខាងមុខ។

គម្រោងវិនិយោគទាំងនោះត្រូវបានរដ្ឋាភិបាលកំពុងពិនិត្យសិក្សា តាមរយៈការផ្តល់ដីសម្បទានក្រោម ១០ ហិកតាសម្រាប់ការអនុវត្តគម្រោងនីមួយៗ នៅដែនជម្រកធម្មជាតិដើម្បីអភិវឌ្ឍជាគោលដៅអេកូទេសចរណ៍។

លោក ងិន សុវិមាន អភិបាលរងខេត្តមណ្ឌលគិរី (ខាងឆ្វេង)

ក្នុងដំណើរបេកសកកម្មចុះទៅខេត្តមណ្ឌលគិរីកាលពីពេលថ្មីៗនេះដឹកនាំដោយក្លិបអ្នកកាសែតកម្ពុជា ឆ្លើយតបទៅសំនួរ «កម្ពុជាថ្មី» លោក ងិន សុវិមាន បានមានប្រសាសន៍ថា តាមតួលេខផ្លូវការដែលលោកទទួលបាន មានគម្រោងវិនិយោគចំនួន ១៥ ដែលអាជ្ញាធរខេត្តកំពុងសិក្សាវាយតម្លៃដើម្បីអនុញ្ញាតិឲ្យដំណើរការអភិវឌ្ឍជាតំបន់គោលដៅអេកូទេសចរណ៍។

បើតាមលោកអភិបាលរងខេត្ត កន្លងទៅខេត្តមណ្ឌលគិរីមានការវិនិយោគវិស័យអេកូទេសចរណ៍តែ ១ កន្លែងប៉ុណ្ណោះដែលកំពុងដំណើរការគឺនៅរមណីយដ្ឋានទឹកជ្រោះប៊ូស្រា។

ស្របតាមចក្ខុវិស័យរបស់រដ្ឋាភិបាល ដែលចង់ប្រែក្លាយខេត្តមណ្ឌលគិរីជាតំបន់អេកូទេសចរណ៍នៅភាគឦសាន លោកអភិបាលរងបានបញ្ជាក់ថា គម្រោងទាំងនោះក៏បានការយល់ព្រមពីក្រសួងបរិស្ថាន ហើយលោកសង្ឃឹមថានឹងទទួលបានការពិនិត្យវាយម្លៃនិងអនុញ្ញាតិឲ្យដំណើរការទៅមុខ។

ជាមួយគ្នានេះ លោក ងិន សុវិមាន បានឱ្យដឹងថា ក្រោមការយកចិត្តទុកដាក់ពីសំណាក់រាជរដ្ឋាភិបាលកម្ពុជា ដែលបានជំរុញឱ្យអ្នកឧកញ៉ា ឧកញ៉ា ក៏ដូចជាបណ្តាអ្នកមាននៅក្នុងស្រុកឱ្យចូលមកបណ្តាក់ទុនវិនិយោគឱ្យបានច្រើននៅក្នុងខេត្តភាគឦសាន ឃើញថាពេលបច្ចុប្បន្នក្នុងខេត្តមណ្ឌលគិរីមានលំហូរនៃការចូលមកវិនិយោគជាបន្តបន្ទាប់ទៅលើវិស័យកសិកម្មនៅក្នុងកម្រិតមួយខ្ពស់ ដោយមានការដាំដុះដំណាំកៅស៊ូនៅលើផ្ទៃជាច្រើនពាន់ហិតា និងឈានដល់ខ្ទង់ម៉ឺនហិតា។

បន្ថែមពីនេះលោកអភិបាលរងខេត្ត ក៏បានបង្ហើបឱ្យដឹងដែរថា បច្ចុប្បន្នរដ្ឋបាលខេត្តក៏កំពុងសិក្សារៀបចំបង្កើតឲ្យមានតំបន់សេដ្ឋកិច្ចពិសេស នៅក្នុងខេត្តមណ្ឌលគិរីផងដែរ៕

The post គម្រោងវិនិយោគអេកូទេសចរណ៍ ១៥ គម្រោងចាយទុនខ្ទង់លានដុល្លារ នៅខេត្តមណ្ឌលគិរី កំពុងឆ្លងកាត់ការពិនិត្យសម្រេច appeared first on Kampuchea Thmey Daily.

រណ្តៅជីករ៉ែមាសនៅអូរខ្វាវខេត្តមណ្ឌលគិរី បំពាក់ប្រព័ន្ធសេនស័រ ផ្តល់សញ្ញាព្រមានដឹងមុន ពេលមានគ្រោះថ្នាក់

Dy Bunnara — Wed, 19 Feb 2025 02:58:41 +0000

ក្រុមហ៊ុន រ៉ឺនេសង់ មីនើរ៉ល ដែលជាក្រុមហ៊ុនឧស្សាហកម្មមានមូលដ្ឋាននៅប្រទេសអូស្រ្តាលី បានអះអាងពីការអនុវត្តស្តង់ដាសុវត្ថិភាពជាអន្តរជាតិ លើប្រតិបត្តិការរុករករ៉ែមាសនៅតំបន់អូរខ្វាវខេត្តមណ្ឌលគិរី។

ខណៈដែលកន្លងទៅ ឃើញមានហេតុការណ៍និងការផ្សព្វផ្សាយពីករណីកើតគ្រោះថ្នាក់នៅតាមការដ្ឋានរ៉ែដូចជាការបាក់ដី ការជន់លិចតាមការដ្ឋាន ប៉ុន្តែសម្រាប់ក្រុមហ៊ុនរ៉ឺណេសង់ បានអនុវត្តិគោលការណ៍ច្បាប់សុវត្ថិភាព ១០០% ស្របតាមស្តង់ដាអន្តរជាតិ ដើម្បីការពារបុគ្គលិកបម្រើការងារ។ នេះបើតាមការអះអាងរបស់ប្រធានរដ្ឋបាល នៃក្រុមហ៊ុនរីណេសង់ឆ្លើយតបសំនួររបស់កម្ពុជាថ្មី។

លោក នូ ផល្លា ប្រធានរដ្ឋបាល និងធនធានមនុស្សក្រុមហ៊ុនរឺណេសង់ បានគូសបញ្ជាក់ថា ក្នុងប្រតិបត្តិការអាជីវកម្ម ក្រុមហ៊ុនបានដាក់ចេញការអនុវត្តគោលការណ៍សុវត្ថិភាពជាចម្បង ទៅលើបុគ្គលិកបម្រើការងារនៅការដ្ឋាន ដែលទាមទារត្រូវអនុវត្តពេញលេញ ខណៈស្តង់ដាសុវត្ថិភាពត្រូវរៀបចំយ៉ាងល្អិតល្អន់ហើយរាល់បុគ្គលិកត្រូវតែគោរព។

«គោលការណ៍សុវត្ថិភាពរបស់ក្រុមហ៊ុនសម្រាប់បុគ្គលិកទូទៅ និងក្រុមហ៊ុនម៉ៅការ ត្រូវអនុវត្តឲ្យបានដាច់ខាតតែម្តង។ នៅពេលលក្ខខណ្ឌស្តង់ដារអន្តជាតិត្រូវបានអនុវត្ត គ្រោះថ្នាក់សឹងតែគ្មាន»។ នេះបើតាមលោក នូ ផល្លា។

បន្ថែមពីនេះ ក្រុមហ៊ុនមានអ្នកជំនាញមកពីស្រុកក្រៅ ដើម្បីវាយតម្លៃពីច្បាប់សុវត្ថិភាព និងសុខុមាលភាពបុគ្គលិកបម្រើការនៅតាមការដ្ឋាន។

ទិដ្ឋភាពនៅក្នុងការដ្ឋានរ៉ែមាសនៅអូរខ្វាវ កន្លងទៅក៏កើតមានកត្តាធម្មជាតិមួយចំនួន។ ពេលខ្លះទឹកភ្លៀងច្រើនពេក បានធ្វើឲ្យរចនាសម័្ពន្ធជួបផលលំបាក ប៉ុន្តែលក្ខណបណ្តាលមកពីបញ្ហាបច្ចេកទេសគឺអត់មានទេ។ នេះបើតាម លោក នូ ផល្លា។

លោក នូ ផល្លា បានថ្លែងថា នៅការដ្ឋានរ៉ែមាសដែលក្រុមហ៊ុនកំពុងប្រតិបត្តការនៅអូរខ្វាវ ខេត្តមណ្ឌលគិរី បានរៀបចំដំឡើងប្រព័ន្ធព្រមាន ករណីកើតមានដូចជាបាក់ជញ្ជាំងដែលផ្តល់សញ្ញាឲ្យកម្មករបានដឹងមុនដើម្បីបញ្ចៀសគ្រោះថ្នាក់។

«នៅតាមជញ្ជាំងរណ្តៅ គឺយើងបានដាក់ប្រព័ន្ធសេនស័រ រាល់មានការរំកិលជញ្ជាំងខុសប្រក្រតី វានឹងផ្តល់សញ្ញាឲ្យដឹងភ្លាមៗ ខណៈបុគ្គលិកដែលពាក់ព័ន្ធការងារក្នុងការដ្ឋាន បានអនុវត្តគោលការណ៍សុវត្ថិភាពបង្ការមិនឲ្យមានគ្រោះថ្នាក់»។

បើតាម លោក នូ ផល្លា គ្រោះថ្នាក់នៅការដ្ឋានរ៉ែភាគច្រើន ពាក់ព័ន្ធទៅអ្នករុករករ៉ែមាសខុសច្បាប់ ដែលមិនបានអនុវត្តស្តង់ដាសុវត្ថិភាពបានត្រឹមត្រូវ។ ដូចជាទឹកភ្លៀងជន់ ឬការបំផ្ទុះដែលមិនគោរពគោលការណ៍សុវត្ថិភាព ដែលជាការប្រថុយប្រថាននាំឲ្យកើតមានគ្រោះថ្នាក់។

ក្រុមហ៊ុន រ៉ឺនេសង់ មីនើរ៉ល ដែលទទួលសិទ្ធិធ្វើអាជីវកម្មពីរដ្ឋាភិបាល បានចាប់ផ្តើមរុករករ៉ែមាសនៅក្នុងតំបន់អូខ្វាវ ខេត្តមណ្ឌលគិរីតាំងពីឆ្នាំ ២០២១ ដែលបច្ចុប្បន្នក្រុមហ៊ុនកំពុងប្រតិបត្តិនៅក្នុងរណ្ដៅរ៉ែមាសចំនួន ៧ រណ្ដៅ និងគ្រោងនឹងបន្តរណ្តៅទី ៨ បន្ថែមទៀត។ សមត្ថភាពទាញចម្រាញ់រ៉ែមាសរបស់ក្រុមហ៊ុនបានពី ៣០០ ទៅ ៤០០ គីឡូក្រាមក្នុង ១ ខែ។ នេះបើតាមប្រភពក្រុមហ៊ុន។

បើតាមអគ្គនាយកដ្ឋានធនធានរ៉ែ បច្ចុប្បន្នកម្ពុជាបានផ្តល់សិទ្ធិដល់ក្រុមហ៊ុនធ្វើអាជីវកម្មរ៉ែមាសចំនួន ១១ ក្រុមហ៊ុន ដែលប្រតិបត្តិការនៅ ៦ ខេត្ត ដោយនៅក្នុងនោះមាន ៧ គម្រោង កំពុងធ្វើប្រតិបត្តិការទាញយករ៉ែពេញលេញតាំងឆ្នាំ២០២១ និង ៤ គម្រោង ស្ថិតក្នុងដំណាក់កាលអភិវឌ្ឍន៍៕

The post រណ្តៅជីករ៉ែមាសនៅអូរខ្វាវខេត្តមណ្ឌលគិរី បំពាក់ប្រព័ន្ធសេនស័រ ផ្តល់សញ្ញាព្រមានដឹងមុន ពេលមានគ្រោះថ្នាក់ appeared first on Kampuchea Thmey Daily.

សហគ្រាសខេត្តមណ្ឌលគិរី Archives - Kampuchea Thmey Daily

សហគ្រាស​ចំនួន​ពីរ​នៅ​ខេត្ត​មណ្ឌលគិរី ទទួលស្គាល់​ផលិត​កាហ្វេ​មានគុណភាព ​​លក់ចែកចាយ​​លើ​ទីផ្សារ

សហគ្រាសចំនួនពីរនៅខេត្តមណ្ឌលគិរី ទទួលស្គាល់ផលិតកាហ្វេមានគុណភាព លក់ចែកចាយលើទីផ្សារ