សហគ្រាស Archives - Kampuchea Thmey Daily

ត្រឹមឆ្នាំ ២០២៥ សហគ្រាសនៅកម្ពុជាកើន ៤,៦ ម៉ឺន ដែលផ្ដល់ការងារដល់កម្មករ-និយោជិត ជាង ២,១៤ លាននាក់

អ៊ិន ពិសី — Sat, 17 Jan 2026 03:47:37 +0000

គិតត្រឹមខែធ្នូ ឆ្នាំ ២០២៥ នេះ កម្ពុជា មានរោងចក្រ សហគ្រាស សរុបចំនួន ៤,៦ ម៉ឺនសហគ្រាស ដែលផ្ដល់ការងារដល់កម្មករ-និយោជិត សរុបប្រមាណ ២,១៤ លាននាក់។ នេះបើយោងតាម លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ។

លោកបានបន្តឱ្យដឹងថា រោងចក្រ និងសហគ្រាស ទាំងនោះ ត្រូវបានបែងចែកទៅតាមវិស័យសំខាន់ៗ រួមមាន វិស័យកសិកម្មចំនួន ៣៨៦ , វិស័យឧស្សាហកម្មចំនួន ៧ ៥៦៥ , វិស័យកម្មន្តសាលមាន ៤ ៩៦៤ និងវិស័យកាត់ដេរចំនួន ១ ៨៦៧ សហគ្រាស។

លោកបានគូសបញ្ជាក់ថា ការកើនឡើងចំនួន សហគ្រាស ក្រុមហ៊ុន រោងចក្រ ជាបន្តបន្ទាប់នេះ គឺជាសញ្ញាវិជ្ជមាន ដែលឆ្លុះបញ្ចាំងពីជំនឿចិត្តរបស់អ្នកវិនិយោគមកលើរាជរដ្ឋាភិបាលកម្ពុជាក្នុងការបណ្ដុះបណ្ដាលកម្លាំងពលកម្មជំនាញ។

បើតាមអ្នកនាំពាក្យដដែល បច្ចុប្បន្ន កម្ពុជា នៅមានឱកាសការងារជាង ៨ ម៉ឺនកន្លែងទៀត សម្រាប់ប្រជាពលរដ្ឋដែលកំពុងស្វែងរកការងារធ្វើ។ ជាមួយគ្នានេះ អ្នកនាំពាក្យក្រសួងការងារ ក៏បានអំពាវនាវដល់ អ្នកស្វែងរកការងារ ជាពិសេសអតីតពលករ អាចទំនាក់ទំនងមកកាន់លេខ ១២៩៧ របស់ក្រសួងការងារ និងបណ្តុះបណ្តាលវិជ្ជាជីវៈ ដែលបម្រើការ ៧ ថ្ងៃ ក្នុងមួយសប្ដាហ៍៕

The post ត្រឹមឆ្នាំ ២០២៥ សហគ្រាសនៅកម្ពុជាកើន ៤,៦ ម៉ឺន ដែលផ្ដល់ការងារដល់កម្មករ-និយោជិត ជាង ២,១៤ លាននាក់ appeared first on Kampuchea Thmey Daily.

រយៈពេល ១០ ខែ ដើមឆ្នាំ ២០២៥ សហគ្រាសនៅកម្ពុជា កើនឡើងជាង ៤ ម៉ឺនសហគ្រាស

អ៊ិន ពិសី — Tue, 25 Nov 2025 10:30:00 +0000

ក្នុងរយៈពេល ១០ ខែ ដើមឆ្នាំ ២០២៥ សហគ្រាសនៅកម្ពុជា កើនឡើងជាង ៤ ម៉ឺន ខណៈវិស័យកាត់ដេរកើនឡើងដល់ ១៨១០ រោងចក្រសហគ្រាស ដែលបានផ្តល់ឱកាសការងារដល់កម្មករ-និយោជិតប្រមាណជាង ២ លានកន្លែង។ នេះបើតាមការបញ្ជាក់ពី លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ។

អ្នកនាំពាក្យដដែលរូបនេះ គូសបញ្ជាក់ថា កំណើន នៃរោងចក្រសហគ្រាសនេះ បង្ហាញពីភាពល្អប្រសើរ នៃវិស័យការងារ និងសេចក្តីទុកចិត្តរបស់អ្នកវិនិយោគមកលើរាជរដ្ឋាភិបាលកម្ពុជា។

លោក ស៊ុន មេសា លើកឡើងថា “កំណើន នៃរោងចក្រដ៏ច្រើននេះ បង្ហាញពីវឌ្ឍនភាព នៃវិស័យកាត់ដេរនៅកម្ពុជា និងបង្ហាញពីសេចក្តីទុកចិត្តរបស់វិស័យឯកជន និងវិនិយោគិនមកលើរាជរដ្ឋាភិបាលកម្ពុជា ដែលតែងតែបន្តអនុគ្រោះទៅដល់រោងចក្រសហគ្រាសថ្មីៗ ជាបន្តបន្ទាប់ ក្នុងនោះ ក្រសួងការងារ បានកាត់បន្ថយនូវសេវារបស់ខ្លួន ជិត ២០ សេវា ដើម្បីសម្រួលដល់ការធ្វើអាជីវកម្មរបស់វិនិយោគិន”។

បន្ថែមពីនេះ អ្នកនាំពាក្យរូបនេះ មានប្រសាសន៍ថា នៅកម្ពុជាមិនត្រឹមតែមានលក្ខខណ្ឌការងារល្អប្រសើរនោះទេ ថែមទាំងសម្បូរទៅដោយកម្លាំងពលកម្មដែលមានជំនាញគ្រប់គ្រាន់ ជាកត្តាគួរផ្សំក្នុងការទាក់ទាញអ្នកវិនិយោគផងដែរ។

លោក ស៊ុន មេសា បន្ថែមថា “យើងឃើញថា លក្ខខណ្ឌការងារនៅកម្ពុជាមានភាពល្អប្រសើរ ដែលធ្វើឱ្យអ្នកវិនិយោគចាប់អារម្មណ៍កាន់តែខ្លាំង មកលើព្រះរាជាណាចក្រកម្ពុជា បន្ថែមពីនេះ គឺការចូលរួមរៀនជំនាញបច្ចេកទេស និងវិជ្ជាជីវៈដែលក្រសួងការងារជាសេនាធិការជូនរាជរដ្ឋាភិបាល ផ្តល់នូវភាពបត់បែននូវឱកាស នៃការបណ្តុះបណ្តាលជូនបងប្អូនកម្មករ-កម្មការិនីគ្រប់ពេល។ យើងអាចនិយាយបានថា លក្ខខណ្ឌការងារល្អ កម្មករមានជំនាញ ស្ថិរភាពនយោបាយ និងការទាក់ទាញវិនិយោគិនកាន់តែសម្បូរបែបដែលធ្វើឱ្យមានការវិនិយោគជាបន្តបន្ទាប់”។

អ្នកនាំពាក្យក្រសួងការងារ គូសបញ្ជាក់ថា គិតត្រឹមខែតុលា ដើមឆ្នាំ ២០២៥ នេះ កម្ពុជា ទទួលបានគម្រោងវិនិយោគចំនួន ៥៧៩ គម្រោង ជាមួយនឹងទុនវិនិយោគ ៩,២ ពាន់លានដុល្លារអាមេរិក ដែលនឹងផ្តល់ឱកាសការងារ ៤០ ម៉ឺនកន្លែងបន្ថែមទៀត ពីលើឱកាសការងារជាង ៨,២ ម៉ឺនកន្លែង ដែលកម្ពុជាមានស្រាប់៕

The post រយៈពេល ១០ ខែ ដើមឆ្នាំ ២០២៥ សហគ្រាសនៅកម្ពុជា កើនឡើងជាង ៤ ម៉ឺនសហគ្រាស appeared first on Kampuchea Thmey Daily.

ក្រសួងឧស្សាហកម្ម នឹងរៀបចំកម្មវិធី«ពានរង្វាន់ឧស្សាហកម្មបៃតងកម្ពុជា ឆ្នាំ២០២៥» នៅខែធ្នូ ខាងមុខនេះ

Din Thary — Tue, 01 Jul 2025 08:37:45 +0000

ដើម្បីជាការទទួលស្គាល់ លើកទឹកចិត្ត និងផ្តល់រង្វាន់ ដល់ម្ចាស់រោងចក្រ សហគ្រាស និង សិប្បកម្មទាំងអស់នៅក្នុងព្រះរាជាណាចក្រកម្ពុជា ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នឹង រៀបចំកម្មវិធី «ពានរង្វាន់ឧស្សាហកម្មបៃតងកម្ពុជា ឆ្នាំ២០២៥» ដែលនឹងប្រព្រឹត្តទៅនៅខែធ្នូ ឆ្នាំ២០២៥ ខាងមុខ នេះ។

យោងតាមសេចក្តីជូនដំណឹងរបស់ក្រសួងឧស្សាហកម្ម បានគូសបញ្ជាក់ឱ្យដឹងថា ការរៀបចំកម្មវិធី «ពានរង្វាន់ឧស្សាហកម្មបៃតងកម្ពុជា ឆ្នាំ២០២៥» នេះឡើង គឺដើម្បីជាការទទួលស្គាល់ លើកទឹកចិត្ត និងផ្តល់រង្វាន់ដល់កិច្ច ខិតខំប្រឹងប្រែងប្រើប្រាស់ធនធានប្រកបដោយប្រសិទ្ធភាព និងបច្ចេកវិទ្យាថ្មីៗ ឈានទៅរកការអភិវឌ្ឍឧស្សាហកម្ម ប្រកបដោយចីរភាព និងរួមចំណែកដល់ការកាត់បន្ថយ និងបន្សំទៅនឹងការប្រែប្រួលអាកាសធាតុតាមវិស័យ។

ក្នុងនោះ អត្ថប្រយោជន៍ទទួលបានពីការចូលរួមកម្មវិធីនេះមាន ទទួលបានពានរង្វាន់ថ្នាក់ជាតិ(មាស ប្រាក់ សំរឹទ្ធ) វិញ្ញាបនបត្រជ័យលាភី ការផ្សព្វផ្សាយជាសាធារណៈ កេរ្តិ៍ឈ្មោះជាគំរូដល់រោងចក្រ សហគ្រាស និងសិប្បកម្មផ្សេងទៀត។

តាមក្រសួងឧស្សាហកម្មដដែល បានឱ្យដឹងបន្ថែមថា ការប្រកួតនឹងត្រូវបែងចែកជា ៣ ក្រុម៖ (១) រោងចក្រធុនធំ (២)សហគ្រាសធុនតូច និងមធ្យម (SMEs) និង (៣) ធុរៈកិច្ចបង្កើតថ្មី (Start-up)។ អនុវិស័យដែលអាចចូលរួមមាន កាត់ដេរ វាយនភ័ណ្ឌ ផលិតផលសម្រាប់ធ្វើដំណើរ ឬអនុវិស័យ ម្ហូបអាហារ ឬភេសជ្ជៈ ជាដើម។

អាស្រ័យហេតុដូចនេះហើយ ម្ចាស់រោងចក្រ សហគ្រាស និងសិប្បកម្ម ដែលមានបំណងចូលរួមក្នុងកម្មវិធីនេះ អាចបំពេញ ពាក្យសុំចូលរួមតាមរយៈតំណភ្ជាប់ https://forms.gle/qCsLUQTWbvs3znm77 ឬទាញយកពាក្យសុំចូលរួមតាមរយៈ https://drive.google.com/file/d/1aLb_SJJCA3g02WJh3jBI_Q5iBnc5DJBt/view?usp=sharing ៕

The post ក្រសួងឧស្សាហកម្ម នឹងរៀបចំកម្មវិធី«ពានរង្វាន់ឧស្សាហកម្មបៃតងកម្ពុជា ឆ្នាំ២០២៥» នៅខែធ្នូ ខាងមុខនេះ appeared first on Kampuchea Thmey Daily.

តើរោងចក្រ-សហគ្រាស ត្រូវអនុវត្ត ឬរៀបចំខ្លួនដូចម្ដេចខ្លះ ដើម្បីទទួលបាន ពានរង្វាន់«សហគ្រាសមួយជាសហគមន៍សុខសាន្តមួយ»?

អ៊ិន ពិសី — Mon, 28 Apr 2025 07:47:02 +0000

ពានរង្វាន់ «សហគ្រាសមួយជាសហគមន៍សុខសាន្តមួយ» ជាពានរង្វាន់ថ្នាក់ជាតិ ផ្តល់ជូនជាលើកដំបូងនៅឆ្នាំ ២០២៥ ដែលពាននេះត្រូវបានបែងចែកជា ៣ កម្រិត គឺ ពានមាស ពានប្រាក់ និងពានសំរឹទ្ធ ហើយសហគ្រាសជ័យលាភី ត្រូវប្រកាសជាផ្លូវការក្នុងពិធីអបអរសាទរខួបអនុស្សាវរីយ៍លើកទី ១៣៩ នៃទិវាពលកម្មអន្តរជាតិ ១ ឧសភា ក្រោមអធិបតី សម្ដេចនាយករដ្ឋមន្ត្រី ហ៊ុន ម៉ាណែត។

តើរោងចក្រ-សហគ្រាស ត្រូវអនុវត្ត ឬរៀបចំខ្លួនដូចម្ដេចខ្លះ ដើម្បីទទួលបានពានរង្វាន់ «សហគ្រាសមួយជាសហគមន៍សុខសាន្តមួយ»?

តាមរយៈស្មារតីកិច្ចប្រជុំជាបន្តបន្ទាប់របស់គណៈកម្មការវាយតម្លៃការជ្រើសរើសសហគ្រាសមួយជាសហគមន៍សុខសាន្តមួយ បានឱ្យដឹងថា ដើម្បីទទួលបានពានរង្វាន់ «សហគ្រាសមួយជាសហគមន៍សុខសាន្តមួយ» រោងចក្រ-សហគ្រាស ត្រូវបំពេញគ្រប់លក្ខខណ្ឌវិនិច្ឆ័យ នៃអនុលោមភាពចំនួន ៨ រួមមាន ៖ ១.អនុលោមភាព នៃលក្ខខណ្ឌការងារ , ២.អនុលោមភាព នៃការប្រើប្រាស់កម្មករ-និយោជិតវ័យក្មេង , ៣.អនុលោមភាព នៃទំនាក់ទំនងវិជ្ជាជីវៈ , ៤.អនុលោមភាព នៃលក្ខខណ្ឌស្ដីពីសុវត្ថិភាព និងសុខភាពការងារ , ៥.អនុលោមភាព នៃរបបសន្តិសុខសង្គម , ៦.អនុលោមភាព នៃការប្រើប្រាស់កម្មករ-និយោជិតជាជនពិការ , ៧.អនុលោមភាព នៃការអនុវត្តកម្មវិធីលើកកម្ពស់ផលិតភាពការងារ និង ៨.អនុលោមភាព នៃការអនុវត្តកម្មវិធីទទួលខុសត្រូវសង្គម។

លោក ហ្វា សាលី ប្រធានសម្ព័ន្ធសហជីពជាតិ ថ្លែងថា បើសិនជាក្រុមហ៊ុន រោងចក្រ សហគ្រាស នីមួយៗ ធ្វើបានតាមអនុលោមភាពទាំង ៨ នេះ ហើយទទួលបានពានរង្វាន់ គឺជារឿងល្អក្រៃលែង។ មិនតែប៉ុណ្ណោះ រោងចក្រ-សហគ្រាសមួយចំនួនទៀត អាចនឹងយកតម្រាប់តាម ទោះបីមិនទទួលបានពានរង្វាន់ក៏ដោយ។ លោកបន្តថា នេះជាមធ្យោបាយល្អមួយដែលតម្រូវនូវលក្ខខណ្ឌការងារល្អ ធ្វើឱ្យអ្នកបញ្ជាទិញជឿទុកចិត្ត។

លោកបញ្ជាក់ថា «អ្នកបញ្ជាទិញគេជឿទុកចិត្តទៅលើអ្វីដែលម្ចាស់រោងចក្រសហគ្រាសបានអនុវត្តនូវអនុលោមទាំងអស់នេះ ដែលធ្វើឱ្យលក្ខខណ្ឌការងារកាន់តែប្រសើរ រោងចក្រកាន់តែល្អ មិនមានការប្រើប្រាស់ក្មេងមិនគ្រប់អាយុអីផ្សេងៗ។ អ្វីដែលជាអនុលោម ជាអនុសាសន៍នូវលក្ខខណ្ឌទាំង ៨ នេះ គឺជារឿងដែលខ្ញុំសាទរត្រេកអរបំផុត»។

ទន្ទឹមនេះ លោក អ៊ុន ដារ៉ា ប្រធានសហភាពសហជីពកម្ពុជាពន្លឺកម្មករ បានលើកឡើងថា អនុលោមទាំង ៨ ចំណុចនេះ បង្ហាញយ៉ាងច្បាស់ពីការយកចិត្តទុកដាក់ពីសំណាក់រាជរដ្ឋាភិបាលចំពោះកម្មករ-និយោជិត ក៏ដូចជាការពារអ្នកវិនិយោគឱ្យស្របតាមក្រមសីលធម៌ដែលអ្នកបញ្ជាទិញចង់បាន។

លោកថ្លែងថា «នៅពេលដែលអ្នកបញ្ជាទិញ ក៏ដូចជាអង្គការ ILO ចុះទៅជួបនឹងរោងចក្រ ជួបនឹងកម្មករ-និយោជិត គឺតែងតែបានកំណត់នូវលក្ខខណ្ឌមួយចំនួន ដើម្បីឱ្យរោងចក្រអនុវត្ត ពេលនេះយើងមើលឃើញជាក់ស្ដែង នៅពេលដែលរោងចក្រអនុវត្តតាមអនុលោមទាំង ៨ នេះ វាស្របទៅនឹងគំនិត និងការចង់បានរបស់អ្នកបញ្ជាទិញ»។

ចំណែក លោក ហង្ស រ៉ាវី ប្រធានសហភាពសហជីពរក្សាសិទ្ធិកម្មករកម្ពុជា បានបង្ហាញពីការពេញចិត្តចំពោះអនុលោមទាំង ៨ នេះ ព្រោះនៅពេលដែលក្រុមហ៊ុនអនុវត្តបាន នឹងអាចទទួលបានពានរង្វាន់«សហគ្រាសមួយជាសហគមន៍សុខសាន្តមួយ»។ មិនតែប៉ុណ្ណោះ អនុលោមទាំង ៨ នេះ នឹងធ្វើឱ្យអ្នកបញ្ជាទិញកាន់តែមានទំនុកចិត្តខ្ពស់ និងបញ្ជាទិញកាន់តែច្រើន។

លោកថ្លែងថា «ចំណុចទាំង ៨ នេះ គឺជាចំណុចស្នូល ចំណុចល្អ និងសំខាន់ ដែលប្រជាពលរដ្ឋកម្ពុជាគាត់ទទួលបាន ហើយអ្វីដែលក្រសួងការងារគិតគូរនេះ គឺគិតគូរពីសុខទុក្ខ សុវត្ថិភាព បងប្អូនកម្មករ-និយោជិតនៅទូទាំងប្រទេស ដើម្បីទទួលបានលក្ខខណ្ឌការងារកាន់តែល្អ ឈានទៅរកការអភិវឌ្ឍ និងជាប្រទេសជឿនលឿនក្នុងឆ្នាំ ២០២៥ ផងដែរ»។

សូមបញ្ជាក់ថា សហគ្រាសដែលទទួលបានជ័យលាភីក្នុងការប្រឡងប្រណាំង«សហគ្រាសមួយជាសហគមន៍សុខសាន្តមួយ» នឹងត្រូវទទួលបានការលើកទឹកចិត្តដូចជា ៖ ពានរង្វាន់«សហគ្រាសមួយជាសហគមន៍សុខសាន្តមួយ» ដែលមាន ៣ កម្រិត , វិញ្ញាបនបត្រ«សហគ្រាសមួយជាសហគមន៍សុខសាន្តមួយ» , ការលើកលែង ការចុះអធិការកិច្ចសាមញ្ញក្នុងរយៈពេលចាប់ពី ១ ឆ្នាំ ដល់ ៣ ឆ្នាំ ស្របតាមកម្រិត នៃពានរង្វាន់ទទួលបាន៕

The post តើរោងចក្រ-សហគ្រាស ត្រូវអនុវត្ត ឬរៀបចំខ្លួនដូចម្ដេចខ្លះ ដើម្បីទទួលបាន ពានរង្វាន់«សហគ្រាសមួយជាសហគមន៍សុខសាន្តមួយ»? appeared first on Kampuchea Thmey Daily.

រាជរដ្ឋាភិបាលកម្ពុជា បង្កើតពានរង្វាន់ជាលើកដំបូង វាយតម្លៃរោងចក្រសហគ្រាស នៅកម្ពុជា ដែលមានភាពសុខសាន្ត ដើម្បីអបអរទិវាពលកម្មអន្តរជាតិ១ឧសភា

អ៊ិន ពិសី — Fri, 25 Apr 2025 02:51:59 +0000

រាជរដ្ឋាភិបាលកម្ពុជា បានប្រកាសផ្តល់ពានរង្វាន់ជូនរោងចក្រសហគ្រាសដែលបានអនុវត្តលក្ខខណ្ឌការងារល្អប្រសើរនៅក្នុងរោងចក្ររបស់ខ្លួនដែលបង្កើតបានជាសហគ្រាសប្រកបដោយភាពសុខសាន្ត។

យោងតាមលិខិតដែលបានផ្សព្វផ្សាយនៅថ្ងៃទី ២៣ ខែមេសា ឆ្នាំ ២០២៥ នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានប្រកាសផ្តល់ពានរង្វាន់ជាលើកទី ១ ដល់រោងចក្រសហគ្រាសដែលបំពេញលក្ខណវិនិច្ឆ័យគោរពតាមច្បាប់ស្ដីពីការងារ និងច្បាប់ពាក់ព័ន្ធផ្សេងៗ របស់រដ្ឋាភិបាល។ ការប្រកាសផ្តល់ពានរង្វាន់នេះ ដើម្បីអបអរសាទរខួបអនុស្សាវរីយ៍លើកទី ១៣៩ នៃទិវាពលកម្មអន្តរជាតិ ថ្ងៃទី ១ ខែឧសភា។

បើយោងតាមសារលិខិតដដែល ពានរង្វាន់ដែលរដ្ឋាភិបាល នឹងប្រគល់ជូនមានឈ្មោះថា ពានរង្វាន់ “សហគ្រាសមួយ ជាសហគមន៍សុខសាន្តមួយ”។ សហគ្រាសដែលត្រូវបានជ្រើសរើសគឺត្រូវអនុលោមទៅតាមលក្ខណវិនិច្ឆ័យចំនួន ៨ ចំណុច ដែលរួមមាន ៖ ១.អនុលោមភាព នៃលក្ខខណ្ឌការងារ។ ២.អនុលោមភាព នៃការប្រើប្រាស់កម្មករ-និយោជិតវ័យក្មេង។ ៣.អនុលោមភាពទំនាក់ទំនងវិជ្ជាជីវៈ។ ៤.អនុលោមភាព នៃលក្ខខណ្ឌស្ដីពីសុវត្ថិភាព និងសុខភាពការងារ។ ៥.អនុលោមភាព នៃរបបសន្តិសុខសង្គម។ ៦.អនុលោមភាព នៃការប្រើប្រាស់កម្មករ-និយោជិតជាជនពិការ។ ៧.អនុលោមភាព នៃការអនុវត្តកម្មវិធីលើកកម្ពស់ផលិតភាពការងារ និង ៨.អនុលោមភាព នៃការអនុវត្តកម្មវិធីទទួលខុសត្រូវសង្គម។

ជាមួយគ្នានេះ សម្តេចនាយករដ្ឋមន្ត្រី ក៏បានអបអរសាទរចំពោះជ័យលាភី ហើយក៏ថ្លែងអំណរគុណចំពោះគ្រប់រោងចក្រសហគ្រាស ជាពិសេសកម្មករ-និយោជិត អង្គការវិជ្ជាជីវៈ ដែលបានបន្តចូលរួមក្នុងចលនាជាតិ ដើម្បីប្រែក្លាយសហគ្រាសមួយ ជាសហគមន៍សុខសាន្តមួយ។

គួររំលឹកថា នៅក្នុងខួបលើកទី ១៣៩ នៃទិវាពលកម្មអន្តរជាតិ ១ ឧសភា រាជរដ្ឋាភិបាលកម្ពុជា បានកំណត់យកប្រធានបទរួមគ្នា ដើម្បីការងារសមរម្យ និងកំណើនប្រកបដោយចីរភាព និងភាពធន់ ធ្វើជាប្រធានបទសម្រាប់ទិវា ១ ឧសភា ឆ្នាំនេះ។

សម្រាប់រដ្ឋាភិបាលកម្ពុជា ការកំណត់យកប្រធានបទយ៉ាងដូច្នេះគឺជាការបង្ហាញឱ្យឃើញកាន់តែច្បាស់នូវការប្តេជ្ញាចិត្ត និងការយកចិត្តទុកដាក់ខ្ពស់របស់រដ្ឋាភិបាលក្នុងការបន្តលើកកម្ពស់លក្ខខណ្ឌការងារ សិទ្ធិការងារ សេរីភាពអង្គការវិជ្ជាជីវៈ អត្ថប្រយោជន៍របបសន្តិសុខសង្គម អត្ថប្រយោជន៍នានារបស់កម្មករ-និយោជិត និងការពង្រឹងយន្តការដោះស្រាយវិវាទការងារដែលធ្វើឱ្យទំនាក់ទំនងវិជ្ជាជីវៈកាន់តែល្អប្រសើរឡើង ដែលជាសូចនាករគន្លឹះរបស់រដ្ឋាភិបាលក្នុងគោលដៅប្រែក្លាយកម្ពុជាទៅជាប្រទេសដែលមានចំណូលមធ្យមកម្រិតខ្ពស់ឆ្នាំ ២០៣០ និងប្រទេសដែលមានចំណូលខ្ពស់នៅឆ្នាំ ២០៥០៕

The post រាជរដ្ឋាភិបាលកម្ពុជា បង្កើតពានរង្វាន់ជាលើកដំបូង វាយតម្លៃរោងចក្រសហគ្រាស នៅកម្ពុជា ដែលមានភាពសុខសាន្ត ដើម្បីអបអរទិវាពលកម្មអន្តរជាតិ១ឧសភា appeared first on Kampuchea Thmey Daily.

មន្ត្រីជាន់ខ្ពស់ ៖ ការចុះបញ្ជិកាសហគ្រាស គ្រឹះស្ថាន និងកម្មករ ជាការធានា សុខុមាលភាពរបស់កម្មករពេលមានជំងឺ ឬគ្រោះថ្នាក់ផ្សេងៗ

អ៊ិន ពិសី — Thu, 20 Mar 2025 03:28:46 +0000

លោក គឹម កែវរស្មី អគ្គនាយករង ប.ស.ស តំណាង លោក ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស នៃក្រសួងការងារ និងបណ្ដុះបណ្ដាលវិជ្ជាជីវៈ បានថ្លែងថា ការចុះបញ្ជិកាសហគ្រាស គ្រឹះស្ថាន និងបង់ភាគទានតាមគោលការណ៍បទប្បញ្ញត្តិ នៃច្បាប់ គឺជាទំនួលខុសត្រូវរបស់និយោជក និងជាការធានានូវសុខុមាលភាពកម្មករ-និយោជិតរបស់ខ្លួននៅពេលមានជំងឺ ឬគ្រោះថ្នាក់ផ្សេងៗ ក្នុងអំឡុងពេលបំពេញការងារ ពិសេសការទទួលបាននូវអត្ថប្រយោជន៍របបសន្តិសុខសង្គមផ្នែកប្រាក់សោធននៅពេលពួកគាត់ដល់វ័យចាស់ជរា។

ថ្លែងក្នុងឱកាសបើកពិធីផ្សព្វផ្សាយ “គោលការណ៍បទប្បញ្ញត្តិច្បាប់ និងអត្ថប្រយោជន៍របបសន្តិសុខសង្គម” និង “ដំណើរការចុះបញ្ជិកាសហគ្រាស គ្រឹះស្ថាន កម្មករ-និយោជិត និងបង់ភាគទានមកបេឡាជាតិសន្តិសុខសង្គម” ជូនតំណាងសហគ្រាស គ្រឹះស្ថាន ក្នុងមូលដ្ឋានខណ្ឌមានជ័យ និងដង្កោ សរុបប្រមាណជា ៣០០ រូប នៅផ្សារទំនើប អ៊ីអន ម៉ល មានជ័យ កាលពីរសៀលថ្ងៃទី ១៩ ខែមីនា ឆ្នាំ ២០២៥ នេះ លោកអគ្គនាយករង ប.ស.ស បានបន្ថែមថា «កន្លងមកមានសហគ្រាស គ្រឹះស្ថានមួយចំនួន បានអនុវត្តការចុះបញ្ជិកាសហគ្រាសខ្លួនមក ប.ស.ស បានយ៉ាងត្រឹមត្រូវ ប៉ុន្តែកម្មករ-និយោជិតមិនព្រមមកធ្វើប័ណ្ណសមាជិក ប.ស.ស ដែលទាមទារឱ្យសហគ្រាស គ្រឹះស្ថាន ជំរុញទៅកាន់សាមីខ្លួនផ្ទាល់ ឱ្យមកធ្វើប័ណ្ណសមាជិក ប.ស.ស ឱ្យបានគ្រប់ៗ គ្នា ព្រោះនៅពេលដែលនិយោជិតម្នាក់នោះមានបញ្ហាសុខភាព ឬគ្រោះថ្នាក់អ្វីមួយ និងមានបណ្ដឹង មក ប.ស.ស. នោះ សហគ្រាស គ្រឹះស្ថាន ជាអ្នកទទួលខុសត្រូវទាំងស្រុងចំពោះមុខច្បាប់ជាធរមាន»។

លោកអគ្គនាយករង ប.ស.ស ក៏បានអំពាវនាវដល់តំណាងសហគ្រាស គ្រឹះស្ថាន សូមផ្សព្វផ្សាយបន្តដល់កម្មករ-និយោជិតរបស់ខ្លួន ដែលជាសមាជិក ប.ស.ស ប្រសិនបើមានប្ដី-ប្រពន្ធ ឬកូននៅក្នុងបន្ទុក សូមជួយជំរុញពួកគាត់ឱ្យទៅចុះឈ្មោះជាសមាជិក ប.ស.ស នៅគ្រប់សាខា ប.ស.ស ដែលនៅជិតបំផុតឱ្យបានគ្រប់ៗ គ្នា ដើម្បីក្លាយជាសមាជិក ប.ស.ស និងទទួលបានអត្ថប្រយោជន៍របបសន្តិសុខសង្គមស្របតាមបទប្បញ្ញត្តិជាធរមាន។

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា ឆ្នាំ ២០២៤ កម្ពុជា មានរោងចក្រសហគ្រាសចំនួន ៤៤ ៧៩៨ មានកម្មករ-និយោជិតចំនួន ១ ៨១៦ ០៤៦ នាក់ ស្រី ១ ០៦៤ ៦៨១ នាក់ ក្នុងនោះ រោងចក្រកាត់ដេរមានចំនួន ១៥៦៦ មានកម្មករ-និយោជិតចំនួន ៩២៤ ០៤៥ នាក់ ស្រី ៦៩១ ៤២៣ នាក់ បើធៀបទៅនឹងឆ្នាំ ២០២៣ ឃើញថា មានការកើនឡើង ខណៈឆ្នាំ ២០២៣ មានរោងចក្រសហគ្រាសចំនួន ៤០ ៩៧៥ រោងចក្រ មានកម្មករចំនួន ១ ៧១៥ ០២៩ នាក់ ស្រី ១ ០៣៩ ៦៩៩ នាក់ ក្នុងនោះ រោងចក្រកាត់ដេរ មាន ១ ៤៩៩ មានកម្មករ-និយោជិតចំនួន ៨៨៦ ៣៥៥ នាក់ ស្រី ៦៧៣ ៧៣៦ នាក់។

លោក កត្តា អ៊ន បានបន្តថា គិតត្រឹមសប្ដាហ៍ទី ៤ ខែមករា ឆ្នាំ ២០២៥ នេះ ប.ស.ស មានសមាជិកកើនឡើងដល់ ២ ៧៨៥ ៥២៦ នាក់ ស្រី ១ ៥៤៤ ២២៣ នាក់ ក្នុងនោះ បុគ្គលស្ថិតក្នុងវិស័យសាធារណៈចំនួន ៤៩៥ ៥៩៣ នាក់ , បុគ្គលក្រោមបទប្បញ្ញត្តិច្បាប់ស្ដីពីការងារចំនួន ១ ៦០៣ ៤៨២ នាក់ , បុគ្គលស្វ័យនិយោជន៍ ចំនួន ៥២៣ ០១៣ នាក់ និងអ្នកក្នុងបន្ទុកសមាជិក ប.ស.ស ចំនួន ១៦៣ ៤៣៨ នាក់។

លោក កត្តា អ៊ន បានបន្តទៀតថា ការកើនឡើង នៃចំនួនសមាជិក ប.ស.ស ជាបន្តបន្ទាប់នេះ ដោយសារប្រជាពលរដ្ឋមានជំនឿទុកចិត្តមកលើសេវា ប.ស.ស និងយល់ដឹងពីអត្ថប្រយោជន៍ផ្សេងៗ។ មានប័ណ្ណ ប.ស.ស ជួយសម្រាលបន្ទុកក្នុងគ្រួសារបានយ៉ាងច្រើននៅពេលទៅពិគ្រោះ និងព្យាបាលជំងឺផ្សេងៗ តាមមូលដ្ឋានសុខាភិបាលជាដៃគូជាមួយ ប.ស.ស ព្រោះរាល់ការចំណាយគឺជាបន្ទុករបស់ ប.ស.ស៕

អត្ថបទ ៖ សំអឿន

The post មន្ត្រីជាន់ខ្ពស់ ៖ ការចុះបញ្ជិកាសហគ្រាស គ្រឹះស្ថាន និងកម្មករ ជាការធានា សុខុមាលភាពរបស់កម្មករពេលមានជំងឺ ឬគ្រោះថ្នាក់ផ្សេងៗ appeared first on Kampuchea Thmey Daily.

សហគ្រាស មិនអនុវត្តកាតព្វកិច្ចបង់ភាគទានតាមកាលកំណត់ ឬ ប្រកាសប្រាក់ឈ្នួលជាប់ភាគទានមិនត្រឹមត្រូវប្រឈមនឹងផ្លូវច្បាប់

អ៊ិន ពិសី — Tue, 18 Feb 2025 07:40:15 +0000

មន្ត្រីជាន់ខ្ពស់ ប.ស.ស បានអះអាងថា សហគ្រាស គ្រឹះស្ថានទាំងឡាយណាដែលមិនអនុវត្តកាតព្វកិច្ចបង់ភាគទានតាមកាលកំណត់ ឬប្រកាសប្រាក់ឈ្នួលជាប់ភាគទានមិនត្រឹមត្រូវ នឹងត្រូវប្រឈមមុខនឹងផ្លូវច្បាប់ជាធរមាន។

លោក គឹម កែវរស្មី អគ្គនាយករង ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា ក្រៅពីនេះ សហគ្រាស គ្រឹះស្ថាន ដែលមិនអនុវត្តកាតព្វកិច្ចរាយការណ៍អំពីចំនួនកម្មករ-និយោជិតឱ្យបានត្រឹមត្រូវ ឬការដកយកភាគទានមិនអនុលោមតាមបទប្បញ្ញត្តិ នៃច្បាប់ស្តីពីរបបសន្តិសុខសង្គម ក៏ត្រូវចាត់វិធានការតាមផ្លូវច្បាប់ជាធរមានផងដែរ។

លោក គឹម កែវរស្មី បានជំរុញឱ្យតំណាងសហគ្រាស គ្រឹះស្ថាន និងក្រុមហ៊ុន ចូលរួមឈ្វេងយល់អំពី “គោលការណ៍ បទប្បញ្ញត្តិច្បាប់ និងអត្ថប្រយោជន៍របបសន្តិសុខសង្គម” ឱ្យកាន់តែមានប្រសិទ្ធភាព និងមានវិសាលភាពគ្របដណ្ដប់សមាជិកឱ្យកាន់តែទូលំទូលាយ ដើម្បីចៀសវាងប្រឈមនឹងផ្លូវច្បាប់។

លោកបានបន្តថា តួលេខនេះបើធៀបទៅនឹងឆ្នាំ ២០២៣ ឃើញថា មានការកើនឡើង ខណៈឆ្នាំ ២០២៣ មានរោងចក្រសហគ្រាសចំនួន ៤០ ៩៧៥ រោងចក្រ មានកម្មករចំនួន ១ ៧១៥ ០២៩ នាក់ ស្រី ១ ០៣៩ ៦៩៩ នាក់ ក្នុងនោះរោងចក្រកាត់ដេរ មាន ១ ៤៩៩ មានកម្មករ-និយោជិតចំនួន ៨៨៦ ៣៥៥ នាក់ ស្រី ៦៧៣ ៧៣៦ នាក់។

លោកបានបន្តទៀតថា ចំនួនរោងចក្រសហគ្រាសកើនឡើងនេះ នឹងផ្តល់ឱកាសការងារកាន់តែច្រើនដល់កម្មករ-និយោជិតទទួលបានប្រាក់ចំណូល ដើម្បីដោះស្រាយជីវភាពប្រចាំថ្ងៃ និងក្រុមគ្រួសារ ដែលទាំងនេះជាការរួមចំណែកទ្រទង់សេដ្ឋកិច្ចគ្រួសារ សេដ្ឋកិច្ចជាតិ និងកាត់បន្ថយភាពក្រក្រី៕

អត្ថបទ ៖ សំអឿន

The post សហគ្រាស មិនអនុវត្តកាតព្វកិច្ចបង់ភាគទានតាមកាលកំណត់ ឬ ប្រកាសប្រាក់ឈ្នួលជាប់ភាគទានមិនត្រឹមត្រូវប្រឈមនឹងផ្លូវច្បាប់ appeared first on Kampuchea Thmey Daily.

គិតត្រឹមដើមខែនេះ មានសហគ្រាស គ្រឹះស្ថាន ចុះបញ្ជីផ្នែកថែទាំសុខភាព ជិត ៣ ម៉ឺន មានសមាជិកជាង ២ លាន ៤ សែននាក់

អ៊ិន ពិសី — Thu, 19 Sep 2024 01:37:10 +0000

លោក គឹម កែវរស្មី អគ្គនាយករង ប.ស.ស. តំណាង លោក ម៉េង ហុង ប្រតិភូរាជរដ្ឋាភិបាលទទួល បន្ទុកជាអគ្គនាយក ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ បានលើកឡើងថា គិតត្រឹមថ្ងៃទី ៥ ខែកញ្ញា ឆ្នាំ ២០២៤ នេះ ផ្នែកថែទាំសុខភាព មានសហគ្រាស គ្រឹះស្ថាន បានចុះបញ្ជីសរុបចំនួន ២៨,៥១០ សហគ្រាស និងមានសមាជិក ប.ស.ស. សរុបចំនួន ២ ៤៥៩ ២៣៩ នាក់។

ថ្លែងក្នុងកម្មវិធីផ្សព្វផ្សាយស្ដីពី “គោលការណ៍បទប្បញ្ញត្តិច្បាប់ និងអត្ថប្រយោជន៍របបសន្តិសុខសង្គម” ជូនដល់តំណាងសមាគម ក្រុមហ៊ុន សហគ្រាស ក្នុងវិស័យដឹកជញ្ជូន កាលពីថ្ងៃទី ១៨ កញ្ញា លោក គឹម កែវរស្មី បានបន្តថា ចំនួនសហគ្រាសគ្រឹះស្ថានចុះបញ្ជីផ្នែកថែទាំសុខភាពមានការកើន ឡើងដោយសារ ប.ស.ស បានកម្មវិធីទូរស័ព្ទដៃ របស់ ប.ស.ស. ដែលហៅថា “NSSF MEMBER APP” បានដាក់ឱ្យដំណើរការ កាលពីថ្ងៃទី ១ ខែសីហា ឆ្នាំ ២០២៤ កន្លងទៅ អាចជួយឱ្យសមាជិក ប.ស.ស. ជាបុគ្គលស្វ័យនិយោជន៍ និងអ្នកក្នុងបន្ទុកសមាជិក ប.ស.ស. អាចចុះបញ្ជីបានដោយខ្លួនឯង និងមានភាពងាយស្រួលជាងមុន។

លោកអគ្គនាយករង ប.ស.ស. បានបន្តទៀតថា កម្មវិធីផ្សព្វផ្សាយខាងលើ ដើម្បីបញ្ជ្រាបការឈ្វេង យល់បន្ថែម ឱ្យកាន់តែច្បាស់អំពីគោលការណ៍ បទប្បញ្ញត្តិច្បាប់ អត្ថប្រយោជន៍ និងវឌ្ឍនភាពថ្មីៗ នៃការអនុវត្តរបបសន្តិសុខសង្គមដែលជាមូលដ្ឋានគ្រឹះក្នុងការយកទៅផ្សព្វផ្សាយបន្តឱ្យកាន់តែទូលំទូលាយ និងអនុវត្តឱ្យកាន់តែប្រសើរឡើង។

ជាមួយគ្នានោះ អគ្គនាយករង សង្ឃឹម និងជឿជាក់ថា អ្នកចូលរួមទាំងអស់ យកចិត្តទុកដាក់ស្តាប់ និងសួរឱ្យបានច្រើន ដើម្បីទទួលបាននូវភាពច្បាស់លាស់ទៅលើចំណុចគន្លឹះសំខាន់ៗ ដែលគ្រូឧទ្ទេសបានធ្វើបទបង្ហាញជូន៕

អត្ថបទ ៖ សំអឿន

The post គិតត្រឹមដើមខែនេះ មានសហគ្រាស គ្រឹះស្ថាន ចុះបញ្ជីផ្នែកថែទាំសុខភាព ជិត ៣ ម៉ឺន មានសមាជិកជាង ២ លាន ៤ សែននាក់ appeared first on Kampuchea Thmey Daily.