Piyane Ung ស្ថាបនិបផលិតផលថែរក្សាស្បែកម៉ាក Nalia Skin បាន​ឲ្យ​ដឹងថា Nalia Skin នៅតែ​ភ្ជាប់​ទំនាក់ទំនង​យ៉ាងជ្រាលជ្រៅទៅនឹងអត្តសញ្ញាណកម្ពុជា។

«រាល់​ផលិតផល Nalia Skin ​ត្រូវបាន​ផលិតនៅ​ប្រទេសអូស្ត្រាលី ប៉ុន្តែ​នៅ​តែរក្សា​បាន​នូវប្រវត្ត​និងអត្តសញ្ញាណ​ខ្មែរ​យ៉ាង​ច្បាស់លាស់»។ Piyane Ung បញ្ជាក់។

​ផលិតផល​ថែរក្សា​ស្បែក​ដែលមាន​ម្ចាស់កម្មសិទ្ធិជា​ជនជាតិខ្មែរ​នេះ ត្រូវ​បាន​ស្ថាប័ន​ព័ត៌មាន​​នៅ​ប្រទេស​អូស្ត្រាលី រួមមាន Forbes Australia, 7 News Australia, Vogue Australia, Marie Claire និង Inside Retail Australia បាន​ចុះ​ផ្សព្វផ្សាយ​​​បង្ហាញ​ពី​ការ​ពង្រឹង​ការ​ទទួលស្គាល់​ជា​អន្តរជាតិ​។

ដោយផលិតនៅប្រទេសអូស្ត្រាលី បំផុសគំនិតដោយខ្មែរ ស្ថាបនិក​រូបនេះថា Nalia Skin តំណាង​ឱ្យការ​លាយបញ្ចូលគ្នារវាងវិទ្យាសាស្ត្រសកល និងរឿងរ៉ាវរបស់ខ្មែរ។

មុនពេលចូលមកទីផ្សារកម្ពុជា ផលិតផលថែរក្សា​ស្បែក​របស់​សហគ្រិន​ខ្មែ​រូបនេះ​បានសម្ពោធន៍ និងដំណើរការនៅប្រទេសអូស្ត្រាលី ដែលជាទីផ្សារផលិតផលសម្ផស្សដែលមានការគ្រប់គ្រង និងមានការប្រកួតប្រជែងខ្លាំងបំផុតមួយរបស់ពិភពលោក។

ស្ថាបនិក Piyane Ung លើកឡើង​ថា Nalia Skin ជាម៉ាកផលិតផលថែរក្សាស្បែកដែលបានបង្កើតភាពជឿជាក់រួចហើយនៅក្នុងប្រទេសអូស្ត្រាលី និង​កំពុងរៀបចំខ្លួនចូលទីផ្សារកម្ពុជាជាផ្លូវការ។

«Nalia Skin លើសពីផលិតផលថែរក្សាស្បែក តែតំណាងឱ្យជំនាន់ថ្មី​នៃ​សហគ្រិនភាពខ្មែរ»។ Piyane Ung បន្ថែម។

Piyane Ung គឺជាសហគ្រិន អ្នកវិនិយោគ និងជាអ្នកនិពន្ធ និង​​ធ្លាប់​ទទួលបានពានរង្វាន់ Prestige 40 Under 40 ជាបុគ្គលច្នៃប្រឌិត និងមានឥទ្ធិពលបំផុតមួយ។

សហគ្រិនដើមកំណើត​​ខ្មែរ​រូបនេះ​ បានបង្កើតផលប័ត្រដែលមានតម្លៃរាប់លានដុល្លារក្នុងការអភិវឌ្ឍន៍អចលនទ្រព្យឧស្សាហកម្មនៅទូទាំងប្រទេសអូស្ត្រាលី និងកម្ពុជា និង​ក៏ជាអ្នកនិពន្ធសៀវភៅ Good Girl ដែលជាសៀវភៅលើកទឹកចិត្ត​ដល់ស្រ្តី​ដែលលក់ដាច់បំផុតមួយ​នៅលើគេហទំព័រ Amazon៕

The post សហគ្រិនស្រ្តីដើមកំណើតខ្មែរ បង្កើតផលិតផលថែរក្សាស្បែក​នៅ​អូស្រ្តាលី​ មាន​ផែនការ​ពង្រីក​អាជីវកម្ម​នៅ​ទឹក​ដីកំណើត appeared first on Kampuchea Thmey Daily.

ភ្នំពេញ ថ្ងៃទី១៦ ខែវិច្ឆិកា ឆ្នាំ២០២៥៖ សហគ្រិនខ្មែរបានរៀបចំ “ពិធីប្រកាសជ័យលាភីការប្រកួត ប្រជែងរចនាសំបកវេចខ្ចប់”  ដែលទទួលបានការចូលរួមពីសិស្សានុសិស្សប្រមាណ ១០០នាក់ ដើម្បី បង្ហាញពីនវានុវត្តន៍ និងជំនាញបច្ចេកទេសថ្មី ក្នុងវិស័យឧស្សាហកម្មវេចខ្ចប់។

ឯកឧត្តមបណ្ឌិត ឈៀង វណ្ណមុនិណ្ឌ ប្រតិភូរាជរដ្ឋាភិបាល ទទួលបន្ទុកជានាយកប្រតិបត្តិសហគ្រិនខ្មែរ បានស្វាគមន៍ ដៃគូសហការណ៍ គណៈកម្មការវិនិច្ឆ័យ បេក្ខជន  សហគ្រាសធនតូច និងធម្យម និងភ្ញៀវកិត្តិយ ដែលបានចូលរួមជាមួយសហគ្រិនខ្មែរក្នុងការគាំទ្រអាជីវកម្ម បង្កើតឱកាសផ្សារភ្ជាប់ទំនាក់ ទំនងថ្មីៗ និងចែករំលែកឧត្តមានុវត្តន៍ ដើម្បីពង្រឹងដល់វិស័យវេចខ្ចប់ឱ្យកាន់ តែមានភាពប្រកួតប្រជែង។ ម្ចាស់ជ័យលាភីនៃការប្រកួតប្រជែងរចនាវេចខ្ចប់៖

វិស័យវេចខ្ចប់នៅកម្ពុជា កំពុងវិវឌ្ឍយ៉ាងឆាប់រហ័ស ហើយក៏ជាផ្នែកដ៏សំខាន់សម្រាប់ការចូលរួមប្រកួត ប្រជែងក្នុងទីផ្សាររបស់សហគ្រាសធុនមីក្រូ តូច និងមធ្យម (MSMEs) ដែលបាន ចូលរួមចំណែក ប្រមាណជាង ៥៨% នៃផលិតផលក្នុងស្រុកសរុប(GDP)។^[*] សំបកវេចខ្ចប់គឺជាផ្នែកដ៏សំខាន់មួយ ដែលបានចូលរួមចំណែកក្នុងការបង្ហាញពីមុខមាត់ថ្មីនៃអត្តសញ្ញាណខ្មែរ (Made in Cambodia) សម្រាប់ទីផ្សារនាំចេញ។ សហគ្រិនខ្មែរ បានរៀបចំកម្មវិធីប្រកួតរចនាសំបកវេចខ្ចប់ ដែលគាំទ្រ យុទ្ធសាស្ត្ររាជរដ្ឋាភិបាលក្នុងវិស័យវេចខ្ចស់នៅកម្ពុជា ក្នុងការលើកកម្ពស់គុណភាពផលិតផល បង្កើននិង សម្រួលដល់ការចូលទីផ្សារ។

ឯកឧត្តមបណ្ឌិត ឈៀង វណ្ណមុនិណ្ឌ បានមានប្រសាសន៍ថា “ខណៈពេលដែលគុណភាពស្តង់ដារ ផលិតផលមានសារៈសំខាន់ រីឯការវេចខ្ចប់ជាយុទ្ធសាស្ត្រប្រកួតប្រជែងសម្រាប់ទំនិញក្នុងទីផ្សារ។ កម្មវិធី នេះ បានផ្ដល់ការគាំទ្រដល់សហគ្រាស ធុនតូច និងមធ្យម (SMEs) ដើម្បីជួយអភិវឌ្ឍ ការរចនាសំបកវេចខ្ចប់ បង្កើនសោភ័ណភាពផលិតផល និងផ្សព្វផ្សាយពាណិជ្ជសញ្ញា។”

សហគ្រិនខ្មែរ សូមថ្លែងអំណរគុណ ចំពោះដៃគូពាក់ព័ន្ធទាំងអស់ រួមទាំងដៃគូយុទ្ធសាស្ត្រ គណៈកម្មការ គ្រូបណ្ដុះបណ្ដាល និងបេក្ខជនប្រកួតប្រជែង ដែលចូលរួមក្នុងការកសាងសហគ្រិនភាព លើកកម្ពស់ សមត្ថភាព និងបង្កើនភាពច្នៃប្រឌិត ធ្វើឱ្យមានភាពប្រកួតប្រជែងទាំងទីផ្សារក្នុងតំបន់ និងសកលលោក។

The post អបអរសាទរដល់ម្ចាស់ជ័យលាភី ក្នុងការរចនាសំបកវេចខ្ចប់ appeared first on Kampuchea Thmey Daily.

ថ្លែងប្រាប់ កម្ពុជាថ្មី លោក ឈុន វីរៈ បានឱ្យដឹងថា មូលហេតុដែលលោកចង់បង្កើតរោងចក្រផលិតគ្រឿងសង្ហារឹម និងសម្ភារៈផ្ទះបាយនេះឡើងមក ដោយសារតែចង់ប្រែក្លាយសហគ្រាសដែលមានស្រាប់ ឱ្យទៅទៅជារោងចក្រដែលមានស្ដង់ដាត្រឹមត្រូវ ពោលគឺប្ដូរពីការផលិតដោយដៃ មកជាការផលិតដោយម៉ាស៊ីនស្វ័យប្រវត្តិ ដូចនឹងបណ្ដាប្រទេសចំនួននៅលើសកលលោកដែលគេកំពុងផលិតតាមស្ដង់ដារោងចក្រ។

សហគ្រិនរូបនេះ បានបញ្ជាក់ដែរថា «ទាក់ទងនឹងរឿង​បង្កើតរោងចក្រផលិតគ្រឿងសង្ហារឹមនេះដែរ លោកក៏ត្រូវរងចាំឱ្យដល់ដាច់ឆ្នាំ២០២៥នេះ ដើម្បីសិក្សាមើលទីតាំង និងស្វែងរកដៃគូសហការគ្នា ខណៈរោងចក្រមួយ ចំណាយដើមទុនមិនក្រោមពី ៣លានដុល្លារសហរដ្ឋអាម៉េរិក នោះឡើយ»។

បច្ចុប្បន្ន សហគ្រាសរបស់លោក ឈុន វីរៈ អាចផលិតសម្ភារៈផ្ទះបាយ មានដូចជា៖ តុ ទូ ជ្រញ់ប្រណិតនិងសម្ភារៈការិយាល័យ ដែលភាគច្រើនផលិតផលទាំងនេះ បានមកពីដើមម៉ៃសាក់របស់លោកដែលមានផ្ទៃដីសរុប ១៣១ហិកតា ស្ថិតនៅភូមិភាគឦសាន ខេត្តរតនគិរីស្រាប់។

ទោះបីជាសហគ្រាសរបស់លោក ឈុន វីរៈ អាចផលិតបានសម្ភារប្រើប្រាស់ដែលមានស្ដង់ដាសម្រាប់ផ្គត់ផ្គង់ទីផ្សារក្នុងស្រុកបានយ៉ាងណាក្ដី ម្ចាស់សហគ្រាសរូបនេះ នៅតែទទូចស្នើសុំចិត្តប្រជាជនខ្មែរ សូមជួយគាំទ្រផលិតផលក្នុងស្រុកឱ្យច្រើន ដើម្បីធ្វើយ៉ាងណាអាចឱ្យសហគ្រាសក្នុងស្រុកកាន់តែរីកចម្រើន និងឈានទៅដល់ការបង្កើតរោងចក្រស្ដង់ដា ដូចបណ្ដាប្រទេសផ្សេងៗនៅលើសកលលោក។

សហគ្រាសរបស់លោក ឈុន វីរៈ ជាសហគ្រាសខ្នាតមធ្យមមួយ ដែលបានបើកដំណើតាំងពីឆ្នាំ ២០២១មកម្ល៉េះ។ បច្ចុប្បន្នសហគ្រាសរបស់កូនខ្មែរមួយនេះ មានទីតាំងស្ថិតនៅស្រុកលំផាត់ ខេត្តរតនគិរី៕

អត្ថបទ ៖ សួស សិត

The post សហគ្រិនឆ្នើមម្នាក់ គ្រោងបង្កើតរោងចក្រផលិតគ្រឿងសង្ហារឹម និងសម្ភារផ្ទះបាយ ដើម្បីឆ្លើយតបតម្រូវការទីផ្សារ កាត់បន្ថយការនាំចូល appeared first on Kampuchea Thmey Daily.

ពិធីចុះហត្ថលេខាត្រូវបានប្រារព្ធធ្វើឡើងនៅ វិទ្យាស្ថានទ្យាស្ថានអភិវឌ្ឍ និងបណ្តុះបណ្តាលធុរកិច្ចដែលស្ថិតក្នុងបរិវេណនៃសាកលវិទ្យាល័យ ជាតិជាស៊ីម កំចាយមារ ស្រុកកំចាយមារ ខេត្តព្រៃវែង ក្រោមអធិបតីភាពលោក​អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមប្រឹក្សាភិបាលនៃសាកលវិទ្យាល័យជាតិជាស៊ីមកំចាយមារ និង លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានក្រុមប្រឹក្សាភិបាលនៃសហគ្រិនខ្មែរ។

លោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមប្រឹក្សាភិបាលនៃសាកលវិទ្យាល័យជាតិជាស៊ីមកំចាយមារ មានថ្លែង​ថា ការចុះហត្ថលេខាលើអនុស្សរណៈយោគយល់នេះ គឺជាការប្តេជ្ញារួមគ្នា ដើម្បីវិនិយោគលើសហគ្រិនជំនាន់ថ្មីនៅកម្ពុជា។ តាមរយៈកម្មវិធី សហគ្រិនមហាវិទ្យាល័យ យើងសម្រួចអនាគតរបស់និស្សិតសាកលវិទ្យាល័យរបស់យើង និង ប្រែក្លាយគំនិតឲ្យទៅជាឱកាស តាមរយៈការសាកល្បងធ្វើអាជីវកម្ម និងដោះស្រាយបញ្ហា។”

លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានក្រុមប្រឹក្សា​បរធន​បាលនៃសហគ្រិនខ្មែរបានលើកឡើងថា ជាមួយនឹងការគាំទ្រសមស្រប យុវជនដែលមានបំណងក្លាយជាសហគ្រិន ធុរកិច្ចបង្កើតថ្មី និងសហគ្រាសធុនតូច និងមធ្យមនៅទូទាំងប្រទេស អាចប្រែក្លាយគំនិតរបស់ខ្លួន ឱ្យទៅជាអាជីវកម្មដែលមានឥទ្ធិពល ដើម្បីរួមចំណែកជំរុញពិពិធកម្មប្រភពកំណើននៃសេដ្ឋកិច្ចកម្ពុជា។”

កម្មវិធី សហគ្រិនមហាវិទ្យាល័យ មានគោលដៅបង្កើតការបណ្តុះបណ្តាលសហគ្រិនភាពជាសេរ៊ី នៅតាមសាកលវិទ្យាល័យ​ទូទាំងប្រទេសកម្ពុជា ពីការបណ្តុះគំនិតសហគ្រិនភាព រហូតដល់ដំណាក់កាលរួចរាល់ក្នុងការបង្កើតជាធុរកិច្ចថ្មី។

នៅឆ្នាំ ២០២៥ កម្មវិធីសហគ្រិនមហាវិទ្យាល័យ បានសហការជាមួយសាកលវិទ្យាល័យប្រមាណជាង ៥០ ដែលមាននិស្សិតសហគ្រិនចូល រួមវគ្គបណ្តុះបណ្តាល និងប្រកួតប្រជែងគម្រូអាជីវកម្មរបស់ពួកគេប្រមាណជាង ៣.០០០នាក់ និងនិស្សិតសហគ្រិនដែលចាប់អារម្មណ៍ចូលរួមប្រមាណជាង ៦.០០០នាក់ នៅឆ្នាំក្រោយ។

ពិធី​ចុះហត្ថលេខាដែលមាន​បណ្ឌិត ឈៀង វណ្ណមុនិណ្ឌ ប្រតិភូរាជរដ្ឋាភិបាល ទទួលបន្ទុកជានាយកប្រតិបត្តិនៃ សហគ្រិនខ្មែរ និង លោក បណ្ឌិត សិត ខន សាកលវិទ្យាធិការនៃសាកលវិទ្យាល័យជាតិជាស៊ីមកំចាយមារ។ កិច្ចសហការនេះជា ផ្នែកមួយនៃកម្មវិធីសហគ្រិនមហាវិទ្យាល័យ ដែលជាកម្មវិធីយុទ្ធសាស្រ្តរបស់ សហគ្រិនខ្មែរ ដែលជម្រុញការសហការគ្នារវាងស្ថាប័នទាំងពីរឲ្យកាន់តែប្រសើរ។

សហគ្រិនខ្មែរ និង វិទ្យាស្ថានអភិវឌ្ឍ និងបណ្តុះបណ្តាលធុរកិច្ច នឹងសហការក្នុងការរៀបចំកម្មវិធី បណ្តុះបណ្តាល​សហគ្រិន​ភាពផ្សេងៗ ដូចជាការប្រកួតប្រជែង នវានុវត្តន៍ កម្មវិធីបណ្ដុះបណ្ដាល មុនចាប់ផ្តើមធុរកិច្ចថ្មី (pre-incubation) និងកម្មវិធីបណ្តុះបណ្តាលធុរកិច្ច (incubation)ផងដែរ។ ស្ថាប័នទាំងពីរនឹងធ្វើការសហការយ៉ាងជិតស្និទ្ធក្នុងការកសាងសមត្ថភាព តាមរយៈការបណ្តុះ បណ្តាល ការប្រឹក្សាណែនាំ និងការចែករំលែកធនធាន ដើម្បីពង្រឹងសមត្ថភាពនិស្សិត គ្រូបង្រៀន និងសហគ្រាសធុនតូច និងមធ្យម (SMEs)។

លើសពីនេះទៅទៀតនោះ កិច្ចសហការនេះ ក៏បានបញ្ជាក់ពីចក្ខុវិស័យរួមក្នុងការលើកកម្ពស់ ការអភិវឌ្ឍសេដ្ឋកិច្ចប្រកបដោយបរិយាបន្ន និងចីរភាព ដោយភ្ជាប់ សហគ្រិននៅតំបន់ជនបទ ជាមួយបណ្តាញជាតិ និងអន្តរជាតិ។ កិច្ចសហការនេះបញ្ជាក់ពីការប្តេជ្ញារបស់ភាគីទាំងពីរ ក្នុងការគាំទ្រយុទ្ធសាស្ត្រជាតិសម្រាប់ការអភិវឌ្ឍសហគ្រិនភាព តាមរយៈការអប់រំ ការផ្ដល់ ឱកាស និងការសហការជាយុទ្ធសាស្ត្រ។

The post សហគ្រិនខ្មែរ សហការ​ជាមួយ​សាកលវិទ្យាល័យ​ជាតិ​​ ជាស៊ីម កំចាយមារ លើកកម្ពស់សហគ្រិនភាពនៅតំបន់ជនបទកម្ពុជា appeared first on Kampuchea Thmey Daily.

អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាប្រឹក្សាធុរកិច្ចអាស៊ានសម្រាប់កម្ពុជាគូសបញ្ជាក់ថា អនុស្សរណៈនេះគឺដើម្បីផ្តល់នូវក្របខ័ណ្ឌទូទៅ និងវិសាលភាពសម្រាប់ទំនាក់ទំនងសហប្រតិបត្តិការ និងសកម្មភាពរវាងសភាពាណិជ្ជកម្មកម្ពុជា និងសហគ្រិនខ្មែរ ក្នុងការប្តេជ្ញាចិត្តទៅវិញទៅមកក្នុងការលើកកម្ពស់ប្រព័ន្ធអេកូឡូស៊ីប្រកបដោយនិរន្តរភាព និងផ្ដល់ផលប្រយោជន៍ដល់សហគ្រិន អ្នកចាប់ផ្តើមអាជីវកម្ម និងសហគ្រាសធុនតូច និងមធ្យមនៅកម្ពុជា។
 
លោក ឈៀង វណ្ណមុនិណ្ឌ ប្រតិភូរាជរដ្ឋាភិបាលទទួលបន្ទុកជានាយកប្រតិបត្តិនៃសហគ្រិនខ្មែរ បានមានប្រសាសន៍ថា កិច្ចសហប្រតិបត្តិការនេះ បានឱ្យសហគ្រិនខ្មែរមានឱកាសជំរុញគោលនយោបាយ និងការគាំទ្ររបស់រាជរដ្ឋាភិបាលកម្ពុជា តាមរយៈបណ្តាញដ៏ធំទូលំទូលាយរបស់សភាពាណិជ្ជកម្មកម្ពុជា ដូចជា សភាពាណិជ្ជកម្មខេត្ត ដែលផ្តល់ជាប្រយោជន៍ទៅដល់សមាជិករបស់ខ្លួន និងសហគ្រាសធុនតូច និងមធ្យមនៅ ទូទាំងប្រទេស។
 
តាមរយៈ​អនុស្សរណៈនេះ នឹង​ជំរុញកិច្ចសហប្រតិបត្តិការដ៏រឹងមាំរវាងសភាពាណិជ្ចកម្មកម្ពុជា និង សហគ្រិនខ្មែរ ដែល​នឹង​ជួយ​ដល់​ម្ចាស់អាជីវកម្មប្រមាណ ៤ ៦២៩ នាក់ តាមរយៈការរៀបចំវគ្គបណ្តុះបណ្តាល សិក្ខាសាលា និងការពង្រីកបណ្តាញ ដើម្បីពង្រីកឱកាសទីផ្សារ៕

The post សភាពាណិជ្ជកម្មកម្ពុជា និងសហគ្រិនខ្មែរ ឈានទៅ​ចុះអនុស្សរណៈយោគយល់គ្នា ជំរុញកិច្ចសហការអភិវឌ្ឍសហគ្រាសធុនតូច និងមធ្យមនៅ​កម្ពុជា appeared first on Kampuchea Thmey Daily.

ទស្សនាវដ្ដី The Nikkei ដែល​បាន​បោះពុម្ព​លក់​លើ​ទីផ្សារ ៣ ម៉ឺន​ច្បាប់ ​នៅ​ប្រទេស​ជប៉ុន​ បាន​រំលេច​នូវ​វត្តមាន​ក្រុមហ៊ុន Sisyphus គឺជា​ក្រុមហ៊ុន​មួយ​ដែល​បាន​បង្កើត​ដោយ​ស្ត្រី​ខ្មែរ​ គឺ ​អ្នកស្រី សែម ណាវី ដែល​ឈរឈ្មោះ​នៅ​ប្រទេស​ជប៉ុន និង​ត្រូវបាន​ក្រុមហ៊ុន​នៅ​ប្រទេស​ជប៉ុន​ទទួលស្គាល់ថា ជា​ដៃគូ​សហការ​វិនិយោគ​ដ៏​ល្អ​មួយ ទាំង​ដែល​ស្ថាបនិក​ក្រុមហ៊ុន​មិនបាន​រៀន​ចប់​សាកលវិទ្យាល័យ​ផង ប៉ុន្តែ​បាន​ជម្នះ​ឧបសគ្គ​រាប់មិនអស់ និង​អាច​ឈរ​ជើង​យ៉ាង​រឹងមាំ ព្រមទាំង​កំពុង​ប្រតិបត្តិការ​នៅ​បណ្ដា​ប្រទេស​ផ្សេងទៀត​ដូចជា ថៃ ម៉ាឡេស៊ី វៀតណាម ចិន និង​កម្ពុជា ជាដើម។

ទស្សនាវដ្ដី The Nikkei ពណ៌នា​ថា ដោយសារ​ខ្លួន​ខកខាន​មិនបាន​ទៅ​សាលា ណាវី បាន​ជួយ​ប្អូនៗ និង​ក្មួយៗ​ ទាំងអស់ ឱ្យ​រៀន​ដល់​សាកលវិទ្យាល័យ ហើយ​ពួកគេ​បាន​អាហារូបករណ៍​ទៅ​សិក្សា​នៅ​ប្រទេស​ជប៉ុន ហើយ​បច្ចុប្បន្ន​ប្អូនៗ​ ទាំងអស់​ ក៏បាន​ជួយ​ការងារ​ខ្លះ​របស់​អ្នកស្រី ណាវី ផងដែរ។

ក្រុមហ៊ុន Sisyphus បង្កើតឡើង ដើម្បី​ចូលរួមចំណែក​ជួយ​ដល់​សុខភាព និង​សម្រស់​​ប្រជាជន​កម្ពុជា ដែល​ជួប​បញ្ហា​ប្រើប្រាស់​ផលិតផល​គ្មាន​ស្តង់ដារ បណ្ដាលឱ្យ​ជួប​បញ្ហា​មួយចំនួន ហើយ​មិនអាច​ដោះស្រាយ​បាន។ បច្ចុប្បន្ន Sisyphus បាន​នាំចេញ​ផលិតផល​សម្រេច និង​នាំចូល​គ្រឿងផ្សំ​ជា​វត្ថុធាតុដើម និង​ធ្វើ OEM(branding )skincare , joint health supplements , ផ្តល់​សេវាកម្ម​លើ​ការ​ផ្សាយ​ពាណិជ្ជកម្ម ឌី​សាញ ផលិតផល និង​អាជីវកម្ម​សំលៀកបំពាក់។

អ្នកស្រី ណាវី បានចាប់ផ្តើម​អាជីវកម្ម​ពី​ការ​កសាង​ទំនុក​ចិត្ត​ដល់​អតិថិជន​ដើម្បី​ឆ្លើយតប​នឹង​សំណើ​ពី​ហាង​កែ​សម្ផស្ស​ដែល​គ្រប់គ្រង​ដោយ​តារា​ម៉ូ​ឌែ​ល និង​តារា​សម្ដែង និង​ក្រុមហ៊ុន​ផ្សេងៗ ទៀត​ ដែល​នៅ​ក្នុង​ប្រទេស​កម្ពុជា និង​ប្រទេស​ផ្សេងៗ ​ទៀត ដែល​ចង់​លក់​ផលិតផល​ជប៉ុន។ នៅពេលដែល​អាជីវកម្ម​នេះ​ដំណើរការ​យើង​បានចាប់ផ្តើម​ទទួល​សំណើ​ពី​ពួកគេ ដើម្បី​អភិវឌ្ឍន៍​ចង់បាន​ផលិតផល ផ្ទាល់ខ្លួន ​OEM (original) ​របស់ខ្លួន​ដែល​ផលិតផល​នៅ​ប្រទេស​ជប៉ុន។ ដើម្បី​ឆ្លើយតប​នឹង​តម្រូវការ​នេះ យើង​បាន​ពង្រីក​អាជីវកម្ម​របស់​យើង​បន្តិច​ម្តងៗ ដែល​បន្ត​រហូតមកដល់​បច្ចុប្បន្ន។

ក្រុមហ៊ុន ណាវី អាច​ផលិត​ផលិតផល​ជប៉ុន​ប្រកប​ដោយ​សុវត្ថិភាព និង​គុណភាព​ខ្ពស់​មានការ​ពេញ​និយម​ខ្លាំង​នៅ​ប្រទេស​ជប៉ុន និង​អាស៊ីអាគ្នេយ៍ ប្រជាជន​ក្នុងស្រុក​មាន​ទំនោរ​នឹង​ផ្តល់​សារៈសំខាន់​លើ​ប្រសិទ្ធភាព​លើ​ការប្រើប្រាស់​គ្រឿងផ្សំ ដែលមាន​ប្រសិទ្ធភាព​ជាង​ម៉ាក​យីហោ នៅពេល​ជ្រើស​រើស​គ្រឿងសម្អាង​ប្រើប្រាស់។

ដោយ​ប្រើ​បទពិសោធ​អស់​រយៈពេល ​១៥ ឆ្នាំ ​នៅ​ប្រទេស​ជប៉ុន សែម ​ណាវី បាន​ចែករំលែក​ជា​គំនិត​យោគយល់​ដល់​អតិថិជន​របស់ខ្លួន ហើយ​បង្រៀន​វិធី ដើម្បី​ទាក់ទាញ​អតិថិជន ដោយសារ​មានការ​ជឿជាក់​ផលិតផល​ដែល​កំពុង​ផលិត​នៅ​ក្រុមហ៊ុន ណាវី អាច​ផលិត​ផលិតផល​ល្អ​មាន​គុណភាព និង​សុវត្ថិភាព ហើយ​គាត់​មានការ​សប្បាយចិត្ត​យ៉ាងខ្លាំង​នៅ​ពេលដែល​អ្នកប្រើប្រាស់​បាន​ផល​មកវិញ និង​មាន​ទំនុកចិត្ត ដោយ​មិន​ចំណាយ​ថវិកា​ដោយ​អត់​ប្រយោជន៍ អ្វី​ដែល​គាត់​ចង់បាន​គឺ​ប្រជាជន​ខ្មែរ​មាន​សុខភាព​ល្អ និង​ស្រស់ស្អាត​ បង្កើន​នូវ​ភាព​ជឿជាក់​ដល់​ស្ត្រី​គ្រប់រូប។

បច្ចុប្បន្ន​នេះ ក្រុមហ៊ុន​អ្នកស្រី ណាវី កំពុង​ផ្ដោតលើ​ការ​អភិវឌ្ឍ​វត្ថុធាតុដើម​សម្លឹង​មើលឃើញថា រុក្ខជាតិ​ជាច្រើន​ដែល​ដុះ​កកើត​នៅ​ប្រទេស​កម្ពុ​ជាមាន​ឥទ្ធិពល និង​អត្ថប្រយោជន៍ ​ពិសេស​កំពុង​ធ្វើការ​ស្រាវជ្រាវ​ដោយ​សហការ​ជាមួយ​ដៃគូ​រក​ក្រុមហ៊ុន សាកលវិទ្យាល័យ​ក្នុងប្រទេស​កម្ពុជា ដើម្បី​មើល​ថា តើ​រុក្ខជាតិ​ទាំងនេះ​អាច​ប្រើប្រាស់ក្នុងការ​អភិវឌ្ឍ​គ្រឿងសម្អាង​បាន​ដែរ​ឬទេ ដើម្បី​ចូលរួម​ចំណែក​ជួយ​ដល់​កសិករ​ក្នុងស្រុក ការនាំ​ផលិតផល​របស់​ខ្មែរ​លក់​នៅ​បរទេស គឺជា​ក្តី​សុបិន​ដ៏​ធំ​បំផុត​របស់​គាត់។

ក្នុងនាម​សហគ្រិន​ខ្មែរ​នៅ​ប្រទេស​ជប៉ុន ​អ្នកស្រី ណាវី តែងតែ​ជួយ​យកអាសា និង​ភ្ជាប់​ទំនាក់ទំនង​ជាមួយ​សិស្សានុសិស្ស​ និស្សិត ដែល​ប្រឡង​ជាប់​អាហារូបករណ៍ និង​បងប្អូន​ខ្មែរ​ដទៃ​ទៀត ដែល​មក​រៀន​នៅ​ប្រទេស​ជប៉ុន ដោយ​គិត និង​ចាត់ទុកថា នៅផ្ទះ​ម្ដាយ​ទីទៃ នៅ​ព្រៃ​ម្តាយ​តែមួយ។ រហូត​អ្នក​ខ្លះ ទោះបី​ដល់​ប្រទេស​កម្ពុជា​វិញ នៅតែ​រក្សាបាន​យ៉ាង​ល្អ តាមរយៈ​ការផ្តល់ និង​ចែករំលែក​ព័ត៌មាន​ឱ្យ​គ្នា​ទៅវិញទៅមក​ ពិសេស​ទាក់ទង​នឹង​ការ​កៀរគរ​អ្នក​វិនិយោគ​ជប៉ុន​ទៅ​រកស៊ី​នៅ​ប្រទេស​កម្ពុជា។ អ្នកស្រី​សប្បាយចិត្ត​ទៅ​នឹង​កិច្ចការ​ទាំងនេះ ដើម្បី​រួមចំណែក​ជួយ​ប្រទេសជាតិ​តាម​លទ្ធភាព​របស់​ខ្លួន ទោះ​តិច​ក្ដី​ច្រើន​ក្ដី៕

​

The post សហគ្រិនខ្មែរមួយរូប ត្រូវបានទស្សនាវដ្ដីល្បីឈ្មោះនៅជប៉ុនសរសើរជា «ដៃគូវិនិយោគដ៏ល្អនៅប្រទេសជប៉ុន»បោះ​ផ្សាយ​លក់​៣០០០០​ច្បាប់​ appeared first on Kampuchea Thmey Daily.

នៅ​​ក្នុង​កិច្ចប្រជុំ​ក្រុម​ប្រឹក្សា​បរធនបាល​លើកទី១៧ ដើម្បី​បូក​សរុប​ការងារ​ និង​វាយតម្លៃ​សមិទ្ធផល​សំខាន់​ៗដែល​សម្រេច​បាន​ក្នុងឆ្នាំ២០២៤ ព្រម​ទាំង​ពិភាក្សា​អំពី​ទិសដៅ​យុទ្ធ​សាស្ត្រ​សម្រាប់​ឆ្នាំ២០២៥ ក្នុង​ការ​លើក​ស្ទួយ​ប្រព័ន្ធ​អេកូឡូស៊ី​សហគ្រិនភាព​នៅ​កម្ពុជា នៅថ្ងៃទី០៥ ខែកុម្ភៈ ឆ្នាំ២០២៥ នេះ លោក ហែម វណ្ឌឌី បាន​គូស​បញ្ជាក់​ថា លទ្ធផល​ដែល​សហគ្រិន​ខ្មែរ​សម្រេច​បាន​នៅ​ក្នុងឆ្នាំ២០២៤ បាន​បង្ហាញ​ពីភាព​រឹងមាំ និង​កិច្ច​ខិតខំ​ប្រឹងប្រែង​របស់​សហគ្រិន​ខ្មែរ ដែល​ដើរ​តួយ៉ាង​សំខាន់​​ក្នុង​ការ​ជំរុញ​ភាព​រីកចម្រើន​របស់​អាជីវកម្ម និង​ពង្រឹង​ឧត្តមភាព​ក្នុង​ប្រព័ន្ធ​អេកូឡូស៊ី​សហ​គ្រិន​ភាព។ សម្រាប់ឆ្នាំ២០២៥ បេសកកម្មរបស់​សហគ្រិនខ្មែរ នឹង​បន្តផ្តោត​លើការ​ផ្តល់នូវ​ធនធាន​ចាំបាច់ ជំនាញបច្ចេកទេស និង​ឱកាសផ្សេង​ៗ​សម្រាប់​សហគ្រិន​កម្ពុជា ដើម្បីឱ្យពួកគេ​អាចរីកចម្រើននៅក្នុងទីផ្សារសកល។

លោក​រដ្ឋមន្ត្រី បាន​សង្កត់ធ្ងន់​ថា «ឆ្នាំ​២០២៥ នេះ ជាឆ្នាំដ៏​សំខាន់សម្រាប់ សហគ្រិនខ្មែរ ក្នុងការពង្រឹង​កិច្ចសហ​ប្រតិបត្តិការ​បន្ថែម​ទៀត​ជាមួយដៃគូជាតិ និងអន្តរជាតិ ដើម្បី​កសាងមូលដ្ឋានដែលមានភាពប្រកួតប្រជែង សម្រាប់​ការ​អភិវឌ្ឍរយៈ​ពេលវែង​របស់កម្ពុជាប្រកបដោយចីរភាព ភាពធន់ និងបរិយាប័ន្ន។ សហគ្រិនខ្មែរ នឹងបំពេញភារកិច្ចជា​យុទ្ធសាស្ត្រ​បន្ថែមទៀត ជាកាតាលីករ ជាអ្នកលើកស្ទួយ និងជាអ្នកសម្របសម្រួល​ក្នុងការ​អភិវឌ្ឍ​អនុវិស័យ​សំខាន់​ៗ​នៃសេដ្ឋកិច្ចដែលជាអាទិភាពគន្លឹះ»។

បន្ថែម​ពី​នេះ ក្រុមប្រឹក្សាបរធនបាល បាន​បង្ហាញការបន្តគាំទ្រចក្ខុវិស័យរបស់សហគ្រិនខ្មែរ ក្នុងការរួមចំណែក​កសាង​ប្រព័ន្ធ​នវានុវត្តន៍ ជំរុញ​កំណើន​ធុរកិច្ច និង​លើក​កម្ពស់​ភាព​ជាដៃគូជាមួយដៃគូ​អភិវឌ្ឍន៍ និងភាគីពាក់ព័ន្ធ​នៅក្នុង​ប្រព័ន្ធ​អេកូឡូស៊ី​សហគ្រិន​ភាព ដើម្បី​បង្កើត​បរិយាកាស​អំណោយ​​ផល​​សម្រាប់ធុរកិច្ចបង្កើតថ្មី និង​សហគ្រាស​ធុនតូច និងមធ្យមនៅកម្ពុជា។

គួរ​ជម្រាប​ថា ឆ្នាំ​២០២៤ សហគ្រិនខ្មែរ សម្រេចបានសមិទ្ធផល​ធំ​ៗ​ចំនួន ៤ គួរឱ្យកត់សម្គាល់ ដូច​ជា​​ កម្មវិធី​សហគ្រិន​មហាវិទ្យាល័យ (UniPreneur Program)៖ និស្សិត​ប្រមាណ ១.០០០នាក់ មកពី​សាកល​វិទ្យា​ល័យ​ចំនួន២៥​ នៅទូទាំងប្រទេស បានចូលរួមបង្ហាញគំនិតអាជីវកម្មរបស់ពួកគេ។ ទី​២. កម្មវិធីពានរង្វាន់សហគ្រិនខ្មែរ ឆ្នាំ២០២៤៖ បាន​ជ្រើសរើស និង​ប្រគល់​ពានរង្វាន់​ដល់ជ័យលាភីចំនួន ១៤ ក្រុមហ៊ុន/ក្រុម​ ក្នុងចំណោម​បេក្ខជន​ដាក់ពាក្យប្រមាណ ២.០០០នាក់។

ទី​៣. ទិវាប្រព័ន្ធអេកូឡូស៊ីសហគ្រិនភាព៖ ព្រឹត្តិការណ៍សំខាន់​ប្រចាំឆ្នាំនេះ​បាន​ប្រមូល​ផ្តុំ​សហគ្រិន​ជាច្រើន​មក​ជួបជុំគ្នា និង​មានអ្នកចូលរួមប្រមាណ ២០.០០០ នាក់ រួមទាំងសហគ្រិន​កម្រិតវិទ្យាល័យ សហគ្រិន​មហាវិទ្យាល័យ ធុរកិច្ចបង្កើតថ្មី​ សហគ្រាស​ធុនតូចនិងមធ្យម និងអ្នកវិនិយោគ​ទាំងក្នុង និងក្រៅប្រទេស ព្រម​ទាំងមា​នការតាំងបង្ហាញផលិតផល និង​សេវា​​កម្ម​ផងដែរ។

និង​ទី​៤. ការពង្រីកសហគ្រិនភាពក្នុងទីផ្សារសកល៖ សហគ្រិនខ្មែរ​​​បាន​គាំទ្រ​សហព័ន្ធស្រូវអង្ករកម្ពុជា ក្នុងការដឹក​នាំ​ក្រុមហ៊ុន ​នាំ​ចេញ​អង្ករ​ចំនួន ១២​ ចូលរួមតាំង​ពិព័រណ៍​អន្តរជាតិ Salon International  de l’Alimentation (SIAL) Paris នៅប្រទេសបារាំង​។ ក្នុង​ឆ្នាំ២០២៤​ កម្មវិធីតាំងពិព័រណ៍ម្ហូបអាហារអន្តរជាតិនេះ​ មាន​ក្រុមហ៊ុន​ប្រមាណ ៧​.៨០០ ក្រុម​ហ៊ុន​មកពី​ ១៣០​ ប្រទេស​ បាន​មក​ចូលរួម​តាំង​ពិព័រណ៍​ និងមាន​ផលិតផល​ចំនួន ៤០០.០០០ ប្រភេទ​ ដែល​រួមមាន​ផលិត ផល​ចំណីអាហារ ភេសជ្ជៈ និងគ្រាប់ធុញ្ញជាតិ ហើយ​មាន​អ្នក​ចូលទស្សនា​សរុបប្រមាណ ២៨៥.០០០ នាក់ មកពីប្រមាណ ២០០ ប្រទេស។

គិត​ត្រឹម​ឆ្នាំ​២០២៤ សហគ្រិន​ខ្មែរ​​បាន​ផ្តល់​ជំនួយ​ថវិកា​គាំទ្រ​ដល់​សហគ្រិន​ចំនួន ៩០៧ នាក់ ​តាមរយៈ​កម្មវិធី​កញ្ចប់​ជំនួយ​សហគ្រិន​ខ្មែរ និង​កម្មវិធី​កៀរគរ​ថវិកា​សម្រាប់​សហគ្រាស​ធុនតូច និង​មធ្យម។

លើសពីនេះ សហគ្រិន​ខ្មែរ​ក៏​បាន​ផ្តល់​ជំនួយ​បច្ចេកទេស និង​ជំនួយ​ហិរញ្ញវត្ថុ​ដល់​សហគ្រាសធុនតូច និងមធ្យមជា​ច្រើន​នៅ​កម្ពុជា ដែល​ផ្តល់​លទ្ធភាព​ឱ្យ​អ្នក​ទទួល​ផល​ទាំង​នោះ​ទាក់ទាញ​ហិរញ្ញប្បទាន​ខាងក្រៅ​បន្ថែម ដែលក្នុងនោះ​រួមមាន​ហិរញ្ញប្បទាន​វិនិយោគ​ប្រមាណ ២៥.២ លាន​ដុល្លារ និង​កម្ចី​ប្រមាណ ១២.៣ លានដុល្លារ ចាប់តាំងពីឆ្នាំ២០២០ មក៕

The post រដ្ឋមន្ត្រីឧស្សាហកម្ម ជំរុញឱ្យសហគ្រិនខ្មែរ ពង្រឹងកិច្ចសហប្រតិបត្តិការជាមួយដៃគូជាតិ-អន្តរជាតិ appeared first on Kampuchea Thmey Daily.

សហគ្រិនខ្មែរ បានសម្រិតសម្រាំង និងជ្រើសរើសបានធុរកិច្ចថ្មី និងសហគ្រាសធុនតូច និងមធ្យមចំនួន៣៨ សម្រាប់កម្មវិធីកញ្ចប់ជំនួយសហគ្រិនខ្មែរ ដែលមានគោលបំណងផ្តល់ថវិកាជូនសហគ្រាសធុនតូច និង​មធ្យម ដើម្បីគាំទ្រការស្តារ ​អាជីវកម្ម និងការរក្សាលំនឹងក្នុងការចាប់យកឱកាសថ្មីដើម្បីពង្រីកអាជីវកម្ម​ទៅ​តាមវិស័យរៀងៗខ្លួន។

លោក ហែម វណ្ណឌី បានថ្លែងថា សហគ្រិនខ្មែរ ដែលជាបរធនបាលរបស់រាជ​រដ្ឋាភិបាល​បានកសាង​សមិទ្ធផលជោគជ័យមួយចំនួន ហើយនឹងបន្តបេសកកម្មរបស់ខ្លួន ដើម្បីពង្រឹងប្រព័ន្ធអេកូឡូ​ស៊ី​សហគ្រិន​ភាព​បន្ថែមទៀត ដោយផ្តោតពិសេសលើការថែបំប៉នសហគ្រាសធុនតូច និងមធ្យម និង​ធុរកិច្ចថ្មី។

លោករដ្ឋមន្ត្រី បានបន្តថា តាមរយៈវិធីសាស្រ្តដ៏ទូលំទូលាយដែលរួមមានទាំងការផ្តល់ជំនួយបច្ចេកទេស និងយន្តការ​ហិរញ្ញប្បទានដ៏រឹងមាំ សហគ្រិនខ្មែរ មានបំណងផ្តល់នូវភាពអង់ អាចដល់សហគ្រាសទាំងនេះ ​ដើម្បីលើក​កម្ពស់​ភាពប្រកួតប្រជែងក្នុងតំបន់ និងពិភពលោករបស់ពួកគេ ក៏ដូចជាការរួមចំណែកដល់ការបង្កើតការងារ និង​កំណើនសេដ្ឋកិច្ចនៅកម្ពុជា។

ចាប់តាំងពី​ឆ្នាំ២០២០មក សហគ្រិនខ្មែរ បាននឹងកំពុងអនុវត្ដកម្មវិធីជាច្រើន ​ដើម្បីផ្តល់​ជំនួយ​ហិរញ្ញប្បទាន​ដោយ​ផ្ទាល់​ដល់ធុរកិច្ចថ្មី និងសហគ្រាសធុនតូច និងមធ្យមរាប់រយមកពីបណ្ដារាជធានី-ខេត្តទូទាំងប្រទេស​កម្ពុជា។ ការគាំទ្រ​របស់ សហគ្រិនខ្មែរដល់សហគ្រាសក្នុងស្រុក មានដូចជា ការបណ្តុះពន្លកសហគ្រិន​កម្រិត​វិទ្យា​ល័យ​ ដើម្បីចាក់​ឫសវប្បធម៌ សហគ្រិនភាព ការផ្តល់វគ្គបណ្តុះបណ្តាលទៅកាន់ធុរកិច្ចបង្កើតថ្មី ការបង្កើត​វេទិកាប្រកួតប្រជែងគំរូ​អាជីវ​កម្ម ការភ្ជាប់ ទំនាក់ទំនងសហគ្រិនជាមួយវិនិយោគិន និងការផ្តល់​ហិរញ្ញប្ប​ទាន​តាមរយៈកម្មវិធីនានា។

ថ្លែងក្នុងកម្មវិធី​ប្រគល់កញ្ចប់​ជំនួយហិរញ្ញប្បទាននេះ​ លោកបណ្ឌិត ឈៀង វណ្ណមុនិណ្ឌ ប្រតិភូរាជរដ្ឋាភិបាល ទទួលបន្ទុកជានាយកប្រតិ​បត្តិនៃសហគ្រិនខ្មែរ បានលើកឡើងថា តបតាមការណែនាំរបស់ក្រុមប្រឹក្សាបរធនបាល សហគ្រិនខ្មែរ នឹង​បន្ត​ការ​គាំទ្រ​របស់ខ្លួនតាមរយៈការបង្កើតកម្មវិធីដែលមានអត្ថប្រយោជន៍បន្ថែមទៀត ដែលហៅថា កញ្ចប់ជំនួយ​សហគ្រិនខ្មែរ ++ ដល់សហគ្រិន​ដែលធ្លាប់បានឆ្លងកាត់ និងទទួលភាពជោគជ័យជាមួយ​សហគ្រិនខ្មែរ កន្លងមក។

លោកបណ្ឌិត ឈៀង វណ្ណមុនិណ្ឌ បាបន្តថា កិច្ចការនេះត្រូវបានធ្វើ​ឡើង​ដើម្បីពង្រឹង​សមត្ថភាពសហគ្រិន និងបង្កើនលទ្ធភាពឈរជើងនៅលើ​ទីផ្សារបានទូលំទូលាយព្រមទាំងបង្កើននូវប្រសិទ្ធភាពប្រតិបត្តិការអាជីវកម្មរបស់ពួកគាត់។

សម្រាប់សហគ្រិន ដែលមានបំណងចូលរួមក្នុងកម្មវិធីខាងលើ សូមចុះឈ្មោះបង្ហាញចំណាប់អារម្មណ៍​តាម​តំណភ្ជាប់ នេះ៖ កញ្ចប់ជំនួយសហគ្រិនខ្មែរ ++ ៕

The post ធុរកិច្ចថ្មី និងសហគ្រាសធុនតូច-មធ្យមចំនួន៣៨ ទទួលបាន​ជំនួយហិរញ្ញប្បទានសហគ្រិនខ្មែរ ដើម្បីស្តារ និងពង្រីកអាជីវកម្ម appeared first on Kampuchea Thmey Daily.