សហព័ន្ធកីឡាបាល់ទាត់កម្ពុជា Archives - Kampuchea Thmey Daily

AFC ផ្តល់ដំណឹងផ្លូវការ ដល់កម្ពុជា ពីការទទួលបាន ២ ក្លិប លេងពានអាស៊ី រដូវកាលក្រោយ

chean virakbot — Tue, 28 Apr 2026 04:04:00 +0000

សហព័ន្ធកីឡាបាល់ទាត់ទ្វីបអាស៊ី (AFC) បានផ្តល់ដំណឹងជាផ្លូវការដល់សហព័ន្ធកីឡាបាល់ទាត់កម្ពុជា ចំពោះការទទួលបានកៅអីសម្រាប់ក្លិបចូលរួមប្រកួតពានរង្វាន់អាស៊ីនៅរដូវកាល ២០២៦-២៧។

កាលពីថ្ងៃទី២៧ ខែមេសា ឆ្នាំ ២០២៦ សហព័ន្ធកីឡាបាល់ទាត់អាស៊ី បានផ្តល់ដំណឹងថា កម្ពុជា ទទួលបាន ១កៅអីកន្លះសម្រាប់ការចូលរួមប្រកួតពានរង្វាន់ក្លិបអាស៊ីកម្រិតទី២ AFC Champions League Two ។ ១កៅអីសម្រាប់ក្លិបបាល់ទាត់របស់កម្ពុជា ប្រកួតនៅវគ្គសន្សំពិន្ទុក្នុងពូល និងកន្លះកៅអី ទៀតសម្រាប់ក្លិបមួយប្រកួតជម្រុះ។ ការប្រកួតជម្រុះនេះមានន័យថា បើជោគជ័យគឺឡើងទៅវគ្គសន្សំពិន្ទុក្នុងពូល ប៉ុន្តែប្រសិនបើចាញ់ ត្រូវធ្លាក់ទៅប្រកួតវគ្គសន្សំពិន្ទុក្នុងពូលពានរង្វាន់អាស៊ីកម្រិតទី៣ AFC Challenge League។

ប្រការនេះមានន័យថា នៅរដូវកាល ២០២៦-២៧ កម្ពុជាមានក្លិបចំនួន ២ ប្រកួតក្នុងពានរង្វាន់ទ្វីបអាស៊ី។

រហូតដល់ពេលនេះ ព្រះខ័នរាជស្វាយរៀង ទទួលបានកៅអី ដើម្បីប្រកួតក្នុងពានរង្វាន់ AFC Champions League Two នៅវគ្គសន្សំពិន្ទុក្នុងពូល ក្នុងនាមជាម្ចាស់ជើងឯកលីគបាល់ទាត់កំពូលកម្ពុជារដូវកាល ២០២៥-២៦។ ចំណែកក្លិបដែលត្រូវប្រកួតជម្រុះគឺជាក្រុមចំណាត់ថ្នាក់លេខ ២ នៃលីគបាល់ទាត់កំពូលកម្ពុជា បុន្តែនៅមិនទាន់រកឃើញទេ។

ក្លិបរបស់កម្ពុជាមានតែ ៤ ប៉ុណ្ណោះដែលត្រូវបានទទួលស្គាល់ក្នុងការបំពេញទៅតាមលក្ខខណ្ឌអាជ្ញាប័ណ្ណក្លិបអាស៊ីសម្រាប់ការចូលរួមប្រកួតពានរង្វាន់អាស៊ី គឺ ព្រះខ័នរាជស្វាយរៀង ភ្នំពេញក្រោន បឹងកេត និង វិសាខា៕

អត្ថបទ៖ វិរបុត្រ

The post AFC ផ្តល់ដំណឹងផ្លូវការ ដល់កម្ពុជា ពីការទទួលបាន ២ ក្លិប លេងពានអាស៊ី រដូវកាលក្រោយ appeared first on Kampuchea Thmey Daily.

សហព័ន្ធកីឡាបាល់ទាត់កម្ពុជា ត្រៀមផែនការអភិវឌ្ឍបាល់ទាត់រយៈពេលវែង

chean virakbot — Tue, 31 Mar 2026 07:39:51 +0000

សហព័ន្ធកីឡាបាល់ទាត់កម្ពុជានឹងរៀបចំផែនការអភិវឌ្ឍកីឡាបាល់ទាត់រយៈពេលវែង និងលំអិតដោយគិតចាប់ពីកម្រិតមត្តេយ្យ រហូតដល់កម្រិតអាជីពដែលមានក្រុមបាល់ទាត់ជម្រើសជាតិកម្ពុជា។

ផែនការលំអិតនឹងត្រូវបានធ្វើបទបង្ហាញដោយអ្នកជំនាញមកពីក្រៅប្រទេស នាព្រឹកថ្ងៃទី១ ខែមេសា ឆ្នាំ ២០២៦ នៅសណ្ឋាគារ Garden City។ នេះបើតាមការឲ្យដឹងពីសហព័ន្ធកីឡាបាល់ទាត់កម្ពុជាដែលបានអញ្ជើញអ្នកសារព័ត៌មានឲ្យចូលរួមយកព័ត៌មានដែរ។ អ្នកជំនាញបានលើកឡើងពីការអភិវឌ្ឍបាល់ទាត់គឺគិតចាប់ពីកម្រិតមត្តេយ្យឡើងពោល មិនមែនអាយុ ១០ ឡើងទើបចាប់ផ្តើមឲ្យកុមារស្គាល់ពីបាល់ទាត់នោះទេ។ ហេតុដូច្នេះហើយបានជាលោក សៅ សុខា ប្រធានសហព័ន្ធកីឡាបាល់ទាត់កម្ពុជាបានសម្រេចបង្កើតសាលាមត្តេយ្យបាល់ទាត់ ២ កន្លែងនៅខេត្តស្វាយរៀង។

លោកមានប្រសាសន៍ថា ៖«អ្នកជំនាញបានប្រាប់ពីសាលាមត្តេយ្យបាល់ទាត់នេះ ហើយខ្ញុំគិតថា គេនិយាយត្រូវ ពីព្រោះបាល់ទាត់សំខាន់ណាស់គឺការគ្រប់គ្រងបាល់។ រត់លឿនជារឿងមួយ មានកម្លាំងខ្លាំងជារឿងមួយផ្សេងទៀត បើឆ្លាតជារឿងមួយទៀត ប៉ុន្តែក្នុងចំណោមនេះគឺបច្ចេកទេសគ្រប់គ្រងបាល់សំខាន់ណាស់។ បើគេយកបាល់ពីយើងមិនបានទេគឺយើងជាម្ចាស់នៅលើទីលាន»។

លោកថា ៖«បើយើងមិនអាចស៊ុតទីរបស់ដៃគូប្រកួត ក៏គេមិនអាចស៊ុតចូលយើងបានដែរ ពីព្រោះបាល់នៅនឹងជើងយើង។ ដូច្នេះដើម្បីបាល់ទាត់នេះរីកចម្រើនខាងបច្ចេកទេស យើងត្រូវតែអភិវឌ្ឍ និងបណ្តុះថ្នត់គំនិតតាំងពីកុមារតូចៗ ជាពិសេសនៅតាមសាលាមត្តេយ្យតែម្តង»។

គម្រោងផែនការអភិវឌ្ឍបាល់ទាត់រយៈពេលវែងអាចត្រូវបានធ្វើឡើងស្របទៅតាមទិសដៅធំរបស់សហព័ន្ធកីឡាបាល់ទាត់កម្ពុជាដែលបានដាក់គោលឡើងវគ្គពាក់កណ្តាលផ្តាច់ព្រ័ត្រជើងឯកអាស៊ាន (ASEAN Championship) នៅឆ្នាំ ២០២៨ ឬ ឆ្នាំ២០៣០, ឡើងដល់ជុំចុងក្រោយជើងឯកអាស៊ី AFC Asian Cup នៅឆ្នាំ ២០៣២ និងឡើងដល់ជុំចុងក្រោយជើងឯកពិភពលោក FIFA World Cup ឆ្នាំ ២០៤២ ឬ ២០៤៦។

រយៈពេលប្រមាណ ១០ ឆ្នាំចុងក្រោយ ហេដ្ឋារចនាសម្ព័ន្ធកីឡាបាល់ទាត់កម្ពុជា បានកើតមានជាច្រើន និងស្ទើរគ្រប់ទីកន្លែងមានទីលានបាល់ទាត់។ ហេដ្ឋារចនាសម្ព័ន្ធបាល់ទាត់សំខាន់ៗមានដូចជា ពហុកីឡដ្ឋានជាតិមរតកតេជោ កីឡដ្ឋានគោកធ្លក កីឡដ្ឋានរបស់ក្លិបឯកជន ព្រមទាំងមានមជ្ឈមណ្ឌលបណ្តុះបណ្តាលថ្នាល់បាល់ទាត់ជាច្រើនដូចជា សាលាបាល់ទាត់ជាតិបាទី សាលាបាល់ទាត់មម្រង់ទិស ២៥ ខេត្ត-ក្រុង មជ្ឈមណ្ឌលបណ្តុះបាល់យុវជនរបស់ក្លិបព្រះខ័នរាជស្វាយរៀង វិសាខា ភ្នំពេញក្រោន និង អាយអេសអាយ ដង្កោសែនជ័យជាដើម៕

អត្ថបទ៖ វិរបុត្រ

The post សហព័ន្ធកីឡាបាល់ទាត់កម្ពុជា ត្រៀមផែនការអភិវឌ្ឍបាល់ទាត់រយៈពេលវែង appeared first on Kampuchea Thmey Daily.

សាលាបាល់ទាត់បាទី កែប្រែលក្ខន្តិកៈជ្រើសរើសយុវជន ក្រោយមិនសូវជោគជ័យ

chean virakbot — Thu, 26 Feb 2026 05:55:00 +0000

សហព័ន្ធកីឡាបាល់ទាត់កម្ពុជាបានកែប្រែលក្ខន្តិកៈនៃការជ្រើសរើសយុវជនដើម្បីចូលជំរំហ្វឹកហាត់នៅមជ្ឈមណ្ឌលបណ្តុះបណ្តាលបាល់ទាត់ជាតិបាទី ក្នុងខេត្តតាកែវ បន្ទាប់ពីប៉ុន្មានវគ្គកន្លងមកនេះចំណាយច្រើន ប៉ុន្តែមិនសូវទទួលបានលទ្ធផលល្អ។

លោក សៅ សុខា

លោក សៅ សុខា ប្រធានសហព័ន្ធកីឡាបាល់ទាត់កម្ពុជាបានថ្លែងក្នុងមហាសន្និបាតបញ្ចប់អាណត្តិចាស់ និងបន្តអាណត្តិថ្មី ២០២៦-២០៣០ កាលពីថ្ងៃទី២១ ខែកុម្ភៈ ឆ្នាំ ២០២៦ ថា ចាប់ពីពេលនេះទៅ ការជ្រើសរើសយុវជនឲ្យចូលហ្វឹកហាត់នៅសាលាបាល់ទាត់ជាតិបាទី គឺ ត្រូវកំណត់ជ្រើសរើសត្រឹមអាយុ ១២ ឆ្នាំ ពីព្រោះការកំណត់អាយុជ្រើសរើសកន្លងមកមិនសូវទទួលបានលទ្ធផលល្អ។

សម្រាប់ការបណ្តុះបណ្តាលយុវជនមួយៗវគ្គមានរយៈពេល ៤ ឆ្នាំ សហព័ន្ធបានចំណាយថវិកាទាំងការបណ្តុះបណ្តាលបាល់ទាត់ និងសិក្សាចំណេះដឹងទូទៅរហូតចប់ថ្នាក់ទី១២ អស់ប្រមាណជាង ១ លានដុល្លារអាមេរិកក្នុងមួយវគ្គៗ ប៉ុន្តែលទ្ធផលមិនសូវទទួលបានល្អប្រសើរ។

យុវជនអាយុ ១៥ ឆ្នាំ កាលពីឆ្នាំ ២០២៤

លោកមានប្រសាសន៍ថា ៖«ចាប់ពីពេលនេះទៅ យើងកំណត់ជ្រើសរើសយុវជនត្រឹមអាយុ ១២ ឆ្នាំ ពីព្រោះយើងត្រូវបង្វឹកតាំងពីតូចៗ ហើយត្រូវគោរពតាមគោលការណ៍របស់សហព័ន្ធកីឡាបាល់ទាត់អន្តរជាតិ (FIFA) ដែលបានឧបត្ថម្ភដល់ការបណ្តុះបណ្តាលថ្នាលយុវជនទាំង ២៥ ខេត្ត-ក្រុងនៅកម្ពុជា។ ដោយសារយើងមិនសូវទទួលបានលទ្ធផលល្អក្នុងការបណ្តុះបណ្តាលចាប់ពីអាយុច្រើន ទើបយើងសម្រេចជ្រើសរើសត្រឹមអាយុ ១២ ឆ្នាំ និងបង្កើតឲ្យមានសាលាមត្តេយ្យបាល់ទាត់ថែមទៀត»។

សាលាបាល់ទាត់ជាតិបាទី ត្រូវបានបង្កើតឡើងជាច្រើនឆ្នាំមកហើយដោយជ្រើសរើសកីឡាករវ័យក្មេងអាយុ ១៥ ឆ្នាំ និងអាយុ ១៨ឆ្នាំ។ កីឡាករជាច្រើននាក់បានបញ្ចប់ការបណ្តុះបណ្តាលនៅទីនោះមានដូច កីឡាករ សៀង ចន្ធា, សេត ម៉ាន់ស៊ូត, ហេង ទីណា, រ័ត្ន ប៊ុននូ, ហ៊ុល គឹមហ៊ុយ, សឿត ណាវ៉ា, គង់ ពីលត់, ផុន តៃនិញ, ឡុង ម៉េងហាវ, ទូច គឹមឆាយ, អាត អូនតូច, ទៀត គឹមហេង, ផាច សុជាវីឡា, ឈឿង វិស៊ីនុ, លន ថេន សៀន សុភក្ត្រា និងកីឡាករមួយចំនួនទៀតដែលចេញមកមិនបានចូលរួមជាក្លិបអាជីព។ ក្នុងចំណោមកីឡាករទាំងនោះ សៀង ចន្ធា ជាកីឡាករលេចធ្លោជាងគេ៕

អត្ថបទ៖ វិរបុត្រ

The post សាលាបាល់ទាត់បាទី កែប្រែលក្ខន្តិកៈជ្រើសរើសយុវជន ក្រោយមិនសូវជោគជ័យ appeared first on Kampuchea Thmey Daily.

ប្រធានបាល់ទាត់កម្ពុជា បង្កើតសាលាមត្តេយ្យបាល់ទាត់ ២ កន្លែងនៅខេត្តស្វាយរៀង

chean virakbot — Mon, 23 Feb 2026 03:00:31 +0000

លោក សៅ សុខា ប្រធានសហព័ន្ធកីឡាបាល់ទាត់កម្ពុជា បានកំពុងសាងសង់សាលាមត្តេយ្យបាល់ទាត់ចំនួន ២ កន្លែង នៅខេត្តស្វាយរៀង ដែលនឹងក្លាយជាខេត្តដំបូងគេនៅក្នុងប្រទេសកម្ពុជាមានសាលាមត្តេយ្យបាល់ទាត់។

ការបង្កើតសាលាមត្តេយ្យបាល់ទាត់នេះឡើងដើម្បីឲ្យកុមារស្គាល់ និងស្និទ្ធស្នាលបាល់តាំងពីខ្លួននៅតូច ហើយក៏ជាផ្នែកមួយជួយបណ្តុះថ្នត់គំនិតឲ្យកុមារតូចៗឲ្យស្រឡាញ់ចូលចិត្តបាល់ទាត់ដើម្បីក្លាយជាមូលដ្ឋានគ្រឹះសម្រាប់ការអភិវឌ្ឍខ្លួនឲ្យក្លាយជាកីឡាករ កីឡាការិនីអាជីព។

ក្រោយពេលត្រូវបានអង្គមហាសន្និបាតបោះឆ្នោតឲ្យបន្តជាប្រធានសហព័ន្ធកីឡាបាល់ទាត់កម្ពុជាអាណត្តិទី២០ (២០២៦-២០៣០) កាលពីថ្ងៃទី២១ ខែកុម្ភៈ ឆ្នាំ ២០២៦ លោក សៅ សុខា បានរៀបរាប់ថា នេះជាលើកដំបូងហើយដែលកម្ពុជានឹងមានសាលាមត្តេយ្យបាល់ទាត់ បន្ទាប់ពីលោកបានជួបពិភាក្សាជាមួយអ្នកជំនាញមកពីក្រៅប្រទេស។

«បើយើងមិនអាចស៊ុតទីរបស់ដៃគូប្រកួត ក៏គេមិនអាចស៊ុតចូលយើងបានដែរ ពីព្រោះបាល់នៅនឹងជើងយើង។ ដូច្នេះដើម្បីបាល់ទាត់នេះរីកចម្រើនខាងបច្ចេកទេស យើងត្រូវតែអភិវឌ្ឍ និងបណ្តុះថ្នត់គំនិតតាំងពីកុមារតូចៗ ជាពិសេសនៅតាមសាលាមត្តេយ្យតែម្តង»។

លោកប្រធានសហព័ន្ធកីឡាបាល់ទាត់កម្ពុជារូបនេះបានបញ្ជាក់ថា រហូតដល់ពេលនេះ លោកបានកំពុងសាងសង់សាលាមត្តេយយ្យដោយបានបញ្ចុះបឋមសិលាថ្មី។ លោកបានផ្លាស់ប្តូរចេញពីទីតាំងចាស់ពីក្នុងវត្តមកសាងសង់នៅខាងក្រៅវត្ត។ ភ្ជាប់ជាមួយសាលាមត្តេយ្យនោះលោកបានទិញដីដើម្បីរៀបចំសាលាមត្តេយ្យបាល់ទាត់។ ទីតាំងសាលាមត្តេយ្យបាល់ទាត់នេះស្ថិតឃុំស្វាយរំពារ ស្រុកស្វាយទាប ខេត្តស្វាយរៀង៕

អត្ថបទ៖ វិរបុត្រ

The post ប្រធានបាល់ទាត់កម្ពុជា បង្កើតសាលាមត្តេយ្យបាល់ទាត់ ២ កន្លែងនៅខេត្តស្វាយរៀង appeared first on Kampuchea Thmey Daily.

ដាក់ផែនការធំ៣ លោក សៅ សុខា ប្តេជ្ញារៀបចំការប្រកួតចាប់ពីថ្នាក់ខេត្តឲ្យបានទៀងទាត់

chean virakbot — Sat, 21 Feb 2026 05:00:22 +0000

លោក សៅ សុខា ប្រធានសហព័ន្ធកីឡាបាល់ទាត់កម្ពុជា បានដាក់គោលដៅរៀបចំការប្រកួតកីឡាបាល់ទាត់ចាប់ពីកម្រិតថ្នាក់ខេត្តឲ្យបានទៀងទាត់ដើម្បីពង្រឹងបាល់ទាត់ជម្រើសជាតិកម្ពុជាឲ្យកាន់តែល្អប្រសើរលើឆាកអន្តរចាតិ។

សហព័ន្ធកីឡាបាល់ទាត់កម្ពុជា បានរៀបចំមហាសន្និបាតបញ្ចប់អាណត្តិទី១៩ និងបោះឆ្នោតជ្រើសរើសប្រធាន អនុប្រធាន និងសមាជិកប្រតិបត្តិថ្មី ដើម្បីបន្តអាណត្តិថ្មីទី២០ (២០២៦-២០៣០) ព្រឹកថ្ងៃសៅរ៍ ទី២១ ខែកុម្ភៈ ឆ្នាំ ២០២៦ នៅសណ្ឋាគារ Le Royal Raffle ដោយមានការអញ្ជើញចូលរួមពីប្រធាន អនុប្រធាន សមាជិក តំណាងក្លិប សមាគម និងមន្ត្រីពាក់ព័ន្ធ។

លោក សៅ សុខា ដែលត្រូវបានអង្គមហាសន្និបាតបោះឆ្នោតជ្រើសរើសជាប្រធានដឹកនាំអាណត្តិថ្មី បានថ្លែងថា ៖«ដើម្បីសម្រេចឲ្យបានផែនការគឺយើងត្រូវពង្រឹងលើការអភិវឌ្ឍថ្នាក់ខេត្តឲ្យបានទូលំទូលាយ។ ការបង្កើតនូវប្រព័ន្ធប្រកួតចាប់ពីថ្នាក់ខេត្តឲ្យមានស្ថេរភាព បង្កលក្ខណៈប្រកួតប្រជែងទៀងទាត់។ មានក្រុមជំនាញបច្ចេកទេស ចុះធ្វើការត្រួតពិនិត្យ វាយតម្លៃ និងជ្រើសរើសកីឡាករ កីឡាការិនីដោយផ្ទាល់។

«ពេលនោះ យើងនឹងមានមូលដ្ឋានរឹងមាំ ក្នុងការអភិវឌ្ឍឲ្យមានប្រសិទ្ធភាព និងប្រសិទ្ធផលនៃការប្រកួតរបស់ជម្រើសជាតិគ្រប់កម្រិតឲ្យបានល្អប្រសើរ។ ជាពិសេស សម្រាប់គោលដៅរបស់យើងឈានឲ្យវគ្គពាក់កណ្តាលនៅតំំបន់អាស៊ាន នៅឆ្នាំ ២០២៨ ឬ ២០៣០ ហើយ ក៏ដូចជាឈានឲ្យដល់តាមគោលដៅនៅជើងឯកអាស៊ី និងពិភពលោកតាមឆ្នាំ បន្តបន្ទាប់»។

ការដាក់ផែនការប្រកួតកម្រិតខេត្តឲ្យបានទៀតទាត់នេះ ប្រធានសហព័ន្ធកីឡាបាល់ទាត់កម្ពុជា បានដាក់គោលដៅសំខាន់ៗជាច្រើនគឺ

ឆ្នាំ ២០២៨ ឆ្នាំ២០៣០ គោលដៅឡើងវគ្គពាក់កណ្ដាលផ្ដាច់ព្រ័ត្រ ពានប្រចាំតំបន់អាស៊ាន AFF
ឆ្នាំ ២០៣២ គោលដៅឡើងទៅលេងជុំផ្ដាច់ព្រ័ត្រពានទ្វីបអាស៊ី AFC
ឆ្នាំ ២០៤២ ឆ្នាំ២០៤៦ គោលដៅលេង 𝗙𝗜𝗙𝗔 𝗪𝗢𝗥𝗟𝗗 𝗖𝗨𝗣

The post ដាក់ផែនការធំ៣ លោក សៅ សុខា ប្តេជ្ញារៀបចំការប្រកួតចាប់ពីថ្នាក់ខេត្តឲ្យបានទៀងទាត់ appeared first on Kampuchea Thmey Daily.

វិសាខា និង កំពង់ដេវ៉ា ប្រជែង Top 6 ម៉ោងដំណាលគ្នាថ្ងៃសៅរ៍នេះ

chean virakbot — Thu, 19 Feb 2026 05:30:00 +0000

ក្លិបបាល់ទាត់ វិសាខា និង អឹមអូអាយ កំពង់ដេវ៉ា ត្រូវបានរៀបចំឲ្យប្រកួតចំម៉ោងដំណាលគ្នាដើម្បីប្រជែងកៅអីលំដាប់កំពូលទាំង ៦ (Top 6) សម្រាប់ការប្រកួតចុងក្រោយ ជុំទី២ នៃលីគបាល់ទាត់កំពូលកម្ពុជា។

ក្រុម វិសាខា

តាមកាលវិភាគកំណត់សម្រាប់ការប្រកួតសប្តាហ៍ចុងក្រោយ វិសាខា ប៉ះ ភ្នំពេញក្រោន វេលាម៉ោង ៦ ល្ងាច ថ្ងៃសៅរ៍ ទី២១ ខែកុម្ភៈ ហើយក្រុម អឹមអូអាយ កំពង់ដេវ៉ា ត្រូវប៉ះ អាយអេសអាយ ដង្កោសែនជ័យ នៅថ្ងៃអាទិត្យ ទី២២ ខែកុម្ភៈ ប៉ុន្តែគណៈកម្មការរៀបចំការប្រកួតបានសម្រេចរៀបចំពេលវេលាប្រកួតដំណាលគ្នាគឺនៅថ្ងៃសៅរ៍ ទី២១ ខែកុម្ភៈ។

ក្រុម ភ្នំពេញក្រោន

វិសាខា មាន ២៩ ពិន្ទុ ស្ថិតនៅលេខ ៦ ក្នុងតារាងពិន្ទុ បន្ទាប់ពីឈ្នះ ៧ ប្រកួត ស្មើ ៨ ប្រកួត និងចាញ់ ៤ ប្រកួត។ ការប្រកួតសប្តាហ៍ចុងក្រោយ ពួកគេត្រូវធ្វើការធ្ងន់មែនទែនដោយត្រូវជួបក្រុមលេខ ២ ភ្នំពេញក្រោន វេលាម៉ោង ៦ ល្ងាច ថ្ងៃសៅរ៍ ទី២១ ខែកុម្ភៈ ឆ្នាំ ២០២៦ នៅកីឡដ្ឋានភ្នំពេញក្រោន។

ពួកគេត្រូវការឈ្នះដាច់ខាត ដើម្បីស្ថិតនៅវគ្គ Top 6 ដោយស្វ័យប្រវត្តិ។ ប្រសិនបើស្មើ ឬ ចាញ់នោះ ពួកគេប្រឈមនឹងហានិភ័យខ្ពស់។ ទោះបីជាយ៉ាងណា វាពិបាកខ្លាំងសម្រាប់ វិសាខា ពីព្រោះ ភ្នំពេញក្រោន ទើបតែចាញ់ អង្គរថាយហ្គឺរ ៣-៤ ដូច្នេះពួកគេត្រូវការពិន្ទុដើម្បីប្រជែងជើងឯក។

ក្រុម ដង្កោសែនជ័យ

ចំណែក ក្រុមអឹមអូអាយ កំពង់ដេវ៉ា វិញ ប្រសិនបើ វិសាខា ឈ្នះ ភ្នំពេញក្រោន នោះ កំពង់ដេវ៉ា អស់ឱកាសវគ្គ Top 6 ប៉ុន្តែប្រសិនបើ វិសាខា ចាញ់ ភ្នំពេញក្រោន គឺជាឱកាសមាសសម្រាប់ កំពង់ដេវ៉ា។ ក្រុម កំពង់ដេវ៉ា មាន ២៧ ពិន្ទុ តាមពីក្រោយ វិសាខា តែ ២ ពិន្ទុប៉ុណ្ណោះ បន្ទាប់ពីឈ្នះ ៧ ស្មើ ៦ និងចាញ់ ៦ ស្ថិតនៅលេខ ៧ ក្នុងតារាង។

ក្រុមកំពង់ដេវ៉ា

សូមបញ្ជាក់ថា ក្រុមស្ថិតនៅ Top 6 ដោយជោគជ័យគឺ ព្រះខ័នរាជស្វាយរៀង ភ្នំពេញក្រោន អង្គរថាយហ្គឺរ ណាហ្គាវើលដ៍ និង បឹងកេត។ នៅជុំទី៣ ក្រុមទាំង ៦ ត្រូវធ្វើការប្រកួតពីរជើងទៀតគឺក្នុងដី និងក្រៅដី សរុបចំនួន ១០ ប្រកួតម្នាក់ទៀតទើបចប់លីគកំពូលកម្ពុជារដូវកាល ២០២៥-២៦៕

អត្ថបទ៖ វិរបុត្រ

The post វិសាខា និង កំពង់ដេវ៉ា ប្រជែង Top 6 ម៉ោងដំណាលគ្នាថ្ងៃសៅរ៍នេះ appeared first on Kampuchea Thmey Daily.

FFC ត្រៀមសាងសង់ទីស្នាក់ការ និងកីឡដ្ឋានផ្ទាល់ខ្លួនតម្លៃ៤.៤លានដុល្លារ

chean virakbot — Sat, 01 Mar 2025 03:19:34 +0000

សហព័ន្ធកីឡាបាល់ទាត់កម្ពុជា (FFC) គ្រោងនឹងកសាងទីស្នាក់ការ និងកីឡដ្ឋានផ្ទាល់ខ្លួនដោយចំណាយថវិកាប្រមាណ៤.៤លានដុល្លារអាមេរិកដើម្បីជំរុញឲ្យវិស័យកីឡាបាល់ទាត់កាន់តែរីកចម្រើននៅក្នុងប្រទេសកម្ពុជា។

លោក សៅ សុខា ប្រធានសហព័ន្ធកីឡាបាល់ទាត់កម្ពុជា មានប្រសាសន៍ក្នុងសន្និបាតប្រចាំឆ្នាំ នៅព្រឹកថ្ងៃទី១ ខែមីនា ឆ្នាំ២០២៥ នៅសណ្ឋាគារ Raffles Hotel Le Royal ថា សហព័ន្ធបាល់ទាត់កម្ពុជាកំពុងត្រៀមចំសាងសងទីស្នាក់ការ និងកីឡដ្ឋានផ្ទាល់ខ្លួន ដែលគ្រោងចំណាយថវិកាសរុប៤.៤លានដុល្លារអាមេរិក។ កីឡដ្ឋានថ្មីនេះឈ្មោះថា គោកធ្លក ដែលអាចផ្ទុកអ្នកទស្សនាផ្ទាល់ប្រមាណ១២០០០នាក់ ស្ថិតនៅព្រែកអញ្ចាញ ស្រុកមុខកំពូល ខេត្តកណ្តាល និងគ្រោងបញ្ចប់នៅចុងឆ្នាំ២០២៦។

បច្ចុប្បន្ន សហព័ន្ធកីឡាបាល់ទាត់កម្ពុជាមានការិយាល័យស្ថិតនៅក្នុងពហុកីឡដ្ឋានជាតិអូឡាំពិក និងមានមជ្ឈមណ្ឌលបណ្តុះបណ្តាលថ្នាលបាល់ទាត់ជាតិបាទី ព្រមទាំងទីលានបាល់ទាត់សាលាតម្រង់ទិស២៤ខេត្ត-ក្រុង ប៉ុន្តែមិនទាន់មានកីឡដ្ឋាន ក៏ដូចជាទីស្នាក់ការផ្ទាល់ខ្លួនទេ៕

អត្ថបទ៖ វីរបុត្រ

The post FFC ត្រៀមសាងសង់ទីស្នាក់ការ និងកីឡដ្ឋានផ្ទាល់ខ្លួនតម្លៃ៤.៤លានដុល្លារ appeared first on Kampuchea Thmey Daily.

ខ្សែប្រយុទ្ធ Andres Nieto ជោគជ័យលើសពីការគិត ក្នុងអាជីព៥ឆ្នាំនៅកម្ពុជា

Pha Rothana — Wed, 04 Dec 2024 08:45:32 +0000

ខ្សែប្រយុទ្ធវ័យ២៨ឆ្នាំសញ្ជាតិដើមកូឡុំប៊ី Andres Nieto បានសម្រេចសមិទ្ធផលលើពីការំពឹងទុក ក្រោយផ្លាស់មកលេងជាមួយក្លិបភ្នំពេញក្រោន ក្នុងលីគកំពូលកម្ពុជាតាំងពីឆ្នាំ២០២០។

អ្នកគាំទ្របាល់ទាត់នៅកម្ពុជាបានស្គាល់កីឡាករ Andres Nieto យ៉ាងច្បាស់ បន្ទាប់ពីរូបគេចំណាយពេលវេលា៥ឆ្នាំជាមួយជាមួយក្លិបបាល់ទាត់ភ្នំពេញកាលពីចុងឆ្នាំ២០១៩។ ក្នុងរយៈពេលនេះ រូបគេបានសម្រេចសមិទ្ធផលជាច្រើនជូនក្លិប។ មុនពេលផ្លាស់មកកម្ពុជា Andres Nieto ធ្លាប់លេងឲ្យក្លិបអាជីពរបស់កូឡុំប៊ី Deportes Tolima។ បន្ទាប់មក រូបគេបានចេញទៅប្រកបអាជីពក្រៅស្រុកលើកដំបូងជាមួយក្លិប Real Frontera នៅប្រទេសវេណេស៊ុយអេឡា មុនផ្ទេរទៅកាន់ក្លិប Club 6 de Febrero, Atlético San Francisco និង O&M FC នៅសាធារណរដ្ឋដូមីនីក។

ក្នុងវីដេអូនៃបទសម្ភាសន៍ជាមួយក្លិបភ្នំពេញកាលពីថ្ងៃទី២៩ ខែធ្នូ ឆ្នាំ២០១៩ កីឡាករ Andres Nieto បាននិយាយថា៖«ជំរាបសួរ ខ្ញុំមានអារម្មណ៍ថា សប្បាយចិត្តពេលមកដល់ទីនេះ។ ខ្ញុំពិតជារីករាយដោយទទួលបានការស្វាគមន៍ពីកីឡាករ និងថ្នាក់ដឹកនាំ។ អ្នកគាំទ្រទុកយើងដូចជាគ្រួសារតែមួយ។ ជាការពិតណាស់ភ្នាក់ងាររបស់ខ្ញុំបានទាក់ទងជាមួយគ្រូបង្វឹក ស៊ុំ សុវណ្ណា ដោយសារគាត់អាចប្រើភាសអេស្ប៉ាញបាន ដូច្នេះហើយបានជាខ្ញុំអាចឈានមកដល់ក្លិបភ្នំពេញក្រោន។ យើងស្គាល់លោក ដោយសារលោកជាគ្រូបង្វឹកម្នាក់បានទៅរៀននៅតំបន់អាមេរិកឡាទីន»។

ក្នុងរយៈពេល៥ឆ្នាំជាមួយក្លិបភ្នំពេញក្រោន Andres Nieto បានជួយក្រុមឈ្នះពានរង្វាន់លីគកំពូលកម្ពុជា២លើក, ពានរង្វាន់ខេមបូឌានលីគខាប់២លើក និងខេមបូឌានស៊ូបភើខាប់២លើក។ ការបង្ហាញសមត្ថភាពបានយ៉ាងនៅលើទីលាន ជាមួយបច្ចេកនៃការបត់បែន បូករួមទាំងជំនាញក្នុងអូសបាល់ និងបញ្ចប់ទីបានយ៉ាងល្អ Andres Nieto ត្រូវបានអ្នកគាំទ្របាល់ទាត់កម្ពុជាចិញ្ចឹមចង់បានរូបគេចូលរួមជាមួយក្រុមជម្រើសជាតិ។ មិនមែនតែអ្នកគាំទ្រប៉ុណ្ណោះទេ សូម្បី Nieto ផ្ទាល់ក៏ចង់ចូលរួមជាមួយក្រុមជម្រើសជាតិកម្ពុជាយ៉ាងខ្លាំង ក្រោយឃើញមិត្តរួមក្រុមកីឡាករ Yudai Ogawa ត្រូវបានសហព័ន្ធកីឡាបាល់ទាត់កម្ពុជាផ្តល់សញ្ជាតិខ្មែរ។

ថ្ងៃទី១ ខែធ្នូ ឆ្នាំ២០២៤ ក្ដីសុបិនរបស់អ្នកគាំទ្រ និងកីឡាករ Andres Nieto បានក្លាយជាពិត ដោយសហព័ន្ធកីឡាបាល់ទាត់កម្ពុជា បានកៅហោះកីឡាកររូបគេ រួមទាំងកីឡាករ២រូបទៀតគឺ Takaki Ose របស់ភ្នំពេញក្រោន និង ខ្សែប្រយុទ្ធ Abdel Kader Coulibaly របស់ក្លិបអាយអេសអាយ ដង្កោសែនជ័យ ប្រមូលផ្ដុំហ្វឹកហាត់ជាមួយក្រុមជម្រើសជាយិកម្ពុជា ដើម្បីត្រៀមពានរង្វាន់ AFF Championship។

រយៈពេល២ថ្ងៃក្រោយមកពោលគឺនៅថ្ងៃទី៤ ខែធ្នូ សហព័ន្ធកីឡាបាល់ទាត់កម្ពុជាបានប្រកាសពីកីឡាករទាំង៣នាក់ទទួលបានការយល់ព្រមជាផ្លូវការពីសហព័ន្ធកីឡាបាល់ទាត់អន្តរជាតិ (FIFA) ដើម្បីឲ្យពួកគេលេងតំណាងឲ្យជម្រើសជាតិកម្ពុជាស្របច្បាប់។

កីឡាករបានរៀបរាប់នៅលើ Instagram របស់ខ្លួនដោយមានខ្លឹមសារថា ៖«ខ្ញុំកំពុងរស់នៅក្នុងដំណាក់កាលដ៏រំភើប និងវិសេសវិសាល បន្ទាប់ពីប្រកបអាជីពបាល់ទាត់រយៈពេល៥ឆ្នាំនៅកម្ពុជា។ ទីបំផុតខ្ញុំបានក្លាយជាពលរដ្ឋកម្ពុជាដែលសុបិនក្លាយជាការពិត។ សម្រាប់សុបិននេះ ខ្ញុំពិតជាថ្លែងអំណរគុណជាពិសេសដល់ក្លិបបាល់ទាត់ភ្នំពេញក្រោនដែលបានបើកទ្វារទទួលយកខ្ញុំចូលមកទឹកដីកម្ពុជាដើម្បីបង្ហាញពីទេពកោសល្យរបស់ខ្ញុំ»។

កីឡាករបានបន្តថា ៖«ខ្ញុំពិតជាអរគុណជាអនេកដល់ព្រះរាជាណាចក្រកម្ពុជា សហព័ន្ធកីឡាបាល់ទាត់កម្ពុជា និងអ្នកពាក់ព័ន្ធទាំងអស់គ្នាដែលបានរួមចំណែកនៅក្នុងអាជីពបាល់ទាត់របស់ខ្ញុំដ៏ភ្លឺស្វាងទាំងពេលនេះ និងអនាគត។ ខ្ញុំសន្យាទុកជាមុនសម្រាប់ការតំណាងឲ្យប្រទេសដ៏ស្រស់ស្អាតមួយនេះប្រកបដោយគារវកិច្ច វិជ្ជាជីវៈ និងសេចក្តីថ្លៃថ្នូរ។ ជាមួយគ្នានេះ ខ្ញុំនៅតែបន្តប្រកាន់ភ្ជាប់នូវប្រទេសកំណើតរបស់ខ្ញុំគឺកូឡុំប៊ី»៕

អត្ថបទ៖ ផា រតនា

The post ខ្សែប្រយុទ្ធ Andres Nieto ជោគជ័យលើសពីការគិត ក្នុងអាជីព៥ឆ្នាំនៅកម្ពុជា appeared first on Kampuchea Thmey Daily.

សហព័ន្ធកីឡាបាល់ទាត់កម្ពុជា Archives - Kampuchea Thmey Daily

AFC ​ផ្តល់​ដំណឹង​ផ្លូវ​ការ ដល់​​កម្ពុជា ពី​ការទទួល​បាន ២ ក្លិប​ លេង​ពាន​អាស៊ី រដូវ​កាល​ក្រោយ

សហព័ន្ធ​​កីឡា​បាល់ទាត់​កម្ពុជា ត្រៀម​ផែន​ការ​​អភិវឌ្ឍ​បាល់ទាត់​រយៈ​ពេល​វែង​

សាលា​បាល់ទាត់​បាទី កែ​ប្រែ​លក្ខន្តិកៈ​ជ្រើស​រើស​យុវជន ក្រោយមិន​សូវ​ជោគជ័យ

ប្រធាន​បាល់ទាត់​កម្ពុជា បង្កើត​សាលា​មត្តេយ្យ​បាល់ទាត់ ២ កន្លែង​នៅ​ខេត្ត​ស្វាយរៀង

ដាក់​ផែន​ការ​ធំ​៣ លោក សៅ សុខា ប្តេជ្ញា​រៀប​ចំការ​ប្រកួត​ចាប់​ពី​ថ្នាក់​ខេត្ត​ឲ្យ​បាន​ទៀង​ទាត់

វិសាខា និង កំពង់ដេវ៉ា ប្រជែង Top 6 ម៉ោង​ដំណាល​គ្នា​ថ្ងៃ​សៅរ៍​នេះ

FFC ត្រៀម​​សាង​សង់​ទី​ស្នាក់​ការ និង​កីឡដ្ឋាន​ផ្ទាល់​ខ្លួនតម្លៃ​៤.៤​លាន​ដុល្លារ

ខ្សែប្រយុទ្ធ Andres Nieto ជោគជ័យ​​លើស​ពី​ការ​គិត​ ក្នុង​អាជីព​៥​ឆ្នាំ​នៅ​កម្ពុជា

AFC ផ្តល់ដំណឹងផ្លូវការ ដល់កម្ពុជា ពីការទទួលបាន ២ ក្លិប លេងពានអាស៊ី រដូវកាលក្រោយ

សហព័ន្ធកីឡាបាល់ទាត់កម្ពុជា ត្រៀមផែនការអភិវឌ្ឍបាល់ទាត់រយៈពេលវែង

សាលាបាល់ទាត់បាទី កែប្រែលក្ខន្តិកៈជ្រើសរើសយុវជន ក្រោយមិនសូវជោគជ័យ

ប្រធានបាល់ទាត់កម្ពុជា បង្កើតសាលាមត្តេយ្យបាល់ទាត់ ២ កន្លែងនៅខេត្តស្វាយរៀង

ដាក់ផែនការធំ៣ លោក សៅ សុខា ប្តេជ្ញារៀបចំការប្រកួតចាប់ពីថ្នាក់ខេត្តឲ្យបានទៀងទាត់

វិសាខា និង កំពង់ដេវ៉ា ប្រជែង Top 6 ម៉ោងដំណាលគ្នាថ្ងៃសៅរ៍នេះ

FFC ត្រៀមសាងសង់ទីស្នាក់ការ និងកីឡដ្ឋានផ្ទាល់ខ្លួនតម្លៃ៤.៤លានដុល្លារ

ខ្សែប្រយុទ្ធ Andres Nieto ជោគជ័យលើសពីការគិត ក្នុងអាជីព៥ឆ្នាំនៅកម្ពុជា