សហព័ន្ធស្រូវអង្ករកម្ពុជា Archives - Kampuchea Thmey Daily

កម្ពុជារកចំណូលបានជាង ២០០ លានដុល្លារ ពីការនាំចេញអង្ករ នាត្រីមាសទី១

deth leng — Mon, 06 Apr 2026 02:24:44 +0000

នៅក្នុងរយៈពេល ៣ ខែ ២០២៦ កម្ពុជាសម្រេចបានការនាំចេញអង្ករចំនួនជាង ៣៦១ ពាន់តោន កើនពី ២១១ ពាន់តោន នៅឆ្នាំ ២០២៥ គិតជាទឹកប្រាក់ជាង ២០៧ លានដុល្លារ។ នេះបើយោងតាមទិន្នន័យរបស់សហព័ន្ធស្រូវអង្ករកម្ពុជា (CRF)។

ទិន្នន័យរបស់ CRF បង្ហាញថា នៅក្នុងរយៈពេល៣ខែ នៃឆ្នាំ២០២៦ កម្ពុជាបាននាំចេញអង្ករបានចំនួន ៣៦១ ៥៧៨ តោន តាមរយៈក្រុមហ៊ុននាំចេញអង្ករចំនួន ៥៨ ក្រុមហ៊ុនទៅកាន់គោលដៅ ៥៦ ដែលក្នុងនោះទៅកាន់បណ្តាប្រទេសនៅក្នុងតំបន់អឺរ៉ុបចំនួន ៣១ ប្រទេស បានបរិមាណអង្ករ ៩៨ ០៧៥ តោន គិតជាទឹកប្រាក់ ៦៨.១៦ លានដុល្លារ ទៅកាន់ប្រទេសសមាជិកអាស៊ានបានចំនួន ១៤៥ ៧៧១ តោន គិតជាទឹកប្រាក់ចំនួន ៥៦.៣៥ លានដុល្លារ ទៅកាន់ប្រទេសចិន និងតំបន់រដ្ឋបាលស្វ័យ័តចំនួន ៨៦ ២១៥ តោន គិតជាទឹកប្រាក់ ៥៦.៣៨ លានដុល្លារ និងគោលដៅ ១៨ ប្រទេសផ្សេងទៀត អាហ្វ្រិក មជ្ឈឹមបូព៌ាបានបរិមាណ ២៨ ៥១៧ តោន គិតជាទឹកប្រាក់ ២៦.៦៥ លានដុល្លារ។

លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជាបានប្រាប់ឱ្យដឹងថា ចំពោះប្រភេទអង្ករបាននាំចេញអង្ករក្រអូបចំនួន ៦០.១២% ប្រភេទអង្ករសគ្រាប់វែង ១៦.១៦% អង្ករចំហ៊ុយ ១.៥៥% អង្ករសរីរាង្គចំនួន ០.៨៨% និងអង្ករផ្សេងៗចំនួន ០.២%។

ទន្ទឹមនឹងនេះ កម្ពុជាក៏បាននាំចេញស្រូវចំនួន ២ ០០០ ៦០០ តោន គិតជាទឹកប្រាក់បានប្រមាណជាង ៤៣៣ លានដុល្លារ។

យោងតាមសហព័ន្ធស្រូវអង្ករកម្ពុជា នៅក្នុងឆ្នាំ ២០២៥ កម្ពុជាសម្រេចបានការនាំចេញអង្ករចំនួនជាង ៩៤ ម៉ឺនតោន (៩៤០ ៣២១ តោន) គិតជាទឹកប្រាក់ជាង ៦០០ លានដុល្លារ៕

អត្ថបទ៖ ឡេង ដេត

The post កម្ពុជារកចំណូលបានជាង ២០០ លានដុល្លារ ពីការនាំចេញអង្ករ នាត្រីមាសទី១ appeared first on Kampuchea Thmey Daily.

CRF នឹងចុះ MoU ជាមួយការិយាល័យតំណាងសភាពាណិជ្ជកម្មកម្ពុជាប្រចាំប្រទេសនូវែលហ្សេឡង់

Din Thary — Thu, 19 Mar 2026 08:41:00 +0000

សហព័ន្ធស្រូវអង្ករកម្ពុជា (CRF) នឹងចុះ MoU ជាមួយការិយាល័យតំណាងសភាពាណិជ្ជកម្មកម្ពុជាប្រចាំប្រទេសនូវែលហ្សេឡង់ លើការនាំចេញអង្ករកម្ពុជា ១ ម៉ឺនតោន ក្នុងមួយឆ្នាំ សម្រាប់រយៈពេល ៥ ឆ្នាំ កាន់ទីផ្សារណូវែលហ្សេឡង់។ នេះបើតាមការឱ្យដឹងពីលោក កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកនៃ ធនាគារអភិវឌ្ឍន៍ជនបទ និងកសិកម្ម (ARDB) នៅរសៀលថ្ងៃទី១៩ ខែមីនា ឆ្នាំ២០២៦ ។

ថ្លែងប្រាប់ «កម្ពុជាថ្មី» លោក កៅ ថាច បានគូសបញ្ជាក់ថា ក្រុមហ៊ុន Ecly Ltd ធ្លាប់នាំអង្ករពីកម្ពុជាប្រមាណ ៥ ពាន់តោនក្នុង ១ឆ្នាំ រួចទៅហើយទៅកាន់ទីផ្សារណូវែលហ្សេឡង់។ ជាក់ស្តែង ក្រុមហ៊ុនក៏នឹងបន្តបង្កើននូវការនាំចូលបន្ថែមទៀតបន្ទាប់ពីការចុះ MoU ជាមួយសហព័ន្ធស្រូវអង្ករកម្ពុជានៅថ្ងៃទី២០ ខែមីនា ឆ្នាំ២០២៦ ស្អែកនេះ ដែលធ្វើឱ្យការនាំចេញអង្កររបស់កម្ពុជា ទៅកាន់ណូវែលហ្សេឡង់ឈានទៅដល់ ១ ម៉ឺនតោនក្នុងមួយឆ្នាំ សម្រាប់រយៈពេល ៥ ឆ្នាំ។

បន្ថែមជាមួយគ្នានេះ លោក កៅ ថាច ក៏បានបញ្ជាក់ដែរថា «ក្រៅតែការនាំយកអង្ករកម្ពុជាទៅកាន់ទីផ្សារណូវែលហ្សេឡង់ហើយ បច្ចុប្បន្ន ក្រុមហ៊ុន Ecly Ltd ក៏មានបណ្តាញចែកចាយដ៏រឹងមាំ ហើយបាននិងកំពុងនាំចូលចែកចាយផលិតផលសក្តានុពលពីកម្ពុជា រួមមាន អង្ករខ្មែរ និង ស្រាបៀរហនុមាន (Hanuman Beer) បន្លែបង្កក ក៏ដូចជាប្រភេទត្រីបង្កកទឹកសាប ទៅក្នុងទីផ្សារណូវែលហ្សេឡង់បន្ថែមទៀតផងដែរ»។

តាមរយៈប្រធានការិយាល័យតំណាងសភាពាណិជ្ជកម្មកម្ពុជា ប្រចាំប្រទេសណូវែលហ្សេឡង់ និង MoU ជាមួយសហព័ន្ធស្រូវអង្ករកម្ពុជានេះ លោក កៅ ថាច៖«សង្ឃឹមថា ក្រុមហ៊ុន Ecly Ltd នឹងពង្រីកការនាំចូលនូវផលិតផលកសិកម្មរបស់ខ្មែរទៅកាន់ទីផ្សារណូវែលហ្សេឡង់ឱ្យបានកាន់តែច្រើនបន្ថែមទៀត»។

សូមជម្រាបថា ឃ្លាំងស្តុកទំនិញ(Warehouse) របស់ក្រុមហ៊ុន Ecly Ltd គឺមានទំហំធំដែលអាចស្តុកផលិតផលកសិកម្មបានដល់កម្ពស់ទៅលើជាង ១០ម៉ែត្រ និងមានផ្ទៃជាង ១ម៉ឺនការ៉េ ហើយបច្ចុប្បន្នបាននិងកំពុងពង្រីកបន្ថែម ២ ម៉ឺនការ៉េទៀតដើម្បីស្តុកទុកតែ ASEAM Food ។

ទន្ទឹមនេះ លោក កៅ ថាច ក៏បានសាទរចំពោះ ក្រុមហ៊ុន Ecly Ltd ដែលបានដើរតួនាទីជាស្ពានសេដ្ឋកិច្ចយ៉ាងសំខាន់ ក្នុងការនាំយកផលិតផលខ្មែរមកកាន់ទីផ្សារអន្តរជាតិតាមរយៈហេដ្ឋារចនាសម្ព័ន្ធឃ្លាំងទំនិញ និងបទពិសោធន៍ចែកចាយផលិតផលចំណីអាហារប្រកបដោយវិជ្ជាជីវៈ៕

The post CRF នឹងចុះ MoU ជាមួយការិយាល័យតំណាងសភាពាណិជ្ជកម្មកម្ពុជាប្រចាំប្រទេសនូវែលហ្សេឡង់ appeared first on Kampuchea Thmey Daily.

សហព័ន្ធស្រូវអង្ករ ទទួលបានជោគជ័យក្នុងការប្រមូលទិញស្រូវផ្ការំដួលពីកសិករ ក្រោយរដ្ឋាភិបាលទម្លាក់ទុន ៤០ លានដុល្លារ

Din Thary — Tue, 25 Nov 2025 03:56:45 +0000

ទាក់ទងទៅនឹងការប្រមូលទិញស្រូវពីកសិករ លោកឧកញ៉ា ឡាយ ឈុនហួ ប្រធានសហព័ន្ធស្រូវអង្ករកម្ពុជា បានឱ្យ «កម្ពុជាថ្មី» ដឹងនៅព្រឹកថ្ងៃទី ២៥ ខែវិច្ឆិកា នេះថា ការប្រមូលទិញស្រូវនូវប្រភេទផ្ការំដួលក្នុងរដូវប្រមូលផលនេះ សហព័ន្ធស្រូវអង្ករកម្ពុជា ក៏ដូចជាបណ្តាសមាជិកទាំងអស់ទទួលបានជោគជ័យជាផ្លែផ្កាច្រើន តាមរយៈទុនអន្តរាគមន៍ពីក្រសួងសេដ្ឋកិច្ច និងហិរញ្ញវត្ថុ តាមរយៈធនាគារអភិវឌ្ឍន៍ជនបទ (ARDB) នេះ។

លោកឧកញ៉ា ឡាយ ឈុនហួ បានមានប្រសាសន៍ថា ក្រោយទទួលបានទុនអន្តរាគមន៍ បណ្តាសមាជិករោងម៉ាស៊ីនកិនស្រូវទាំងអស់របស់សហព័ន្ធ បានសម្រុកប្រមូលទិញស្រូវប្រភេទផ្ការំដួលពីប្រជាកសិករក្នុងរដូវប្រមូលផល ហើយយ៉ាងយូរ ៤ ទៅ ៥ ថ្ងៃទៀតប៉ុណ្ណោះការប្រមូលទិញស្រូវនឹងអស់ហើយ។

លោកឧកញ៉ាបន្ថែមថា ក្នុងរយៈពេលនេះ សហព័ន្ធ ក៏ដូចជាបណ្តារោងម៉ាស៊ីនកិនស្រូវនានាមិនមានជួបនូវបញ្ហាប្រឈមអ្វីនោះទេ ដោយរោងម៉ាស៊ីនទាំងអស់នៅតែបន្តការប្រមូលទិញស្រូវពីកសិករជាធម្មតា។

«ប៉ុន្តែបន្ទាប់ចប់ពីរដូវប្រមូលផលផ្ការំដួលនេះ ឃ្លាំងរបស់រោងម៉ាស៊ីននីមួយៗ អាចនឹងពេញច្រើន ដូច្នេះជាជំហានបន្ទាប់ គឺត្រូវស្វែងរកទីផ្សារបញ្ចេញផ្ការំដួលនេះសិន ព្រោះក្នុងរយៈពេលយ៉ាងយូរ ១០ថ្ងៃ ទៅមុខទៀត ប្រជាពលរដ្ឋអាចនឹងមានការប្រមូលផលច្រើន ដូចជាស្រូវប្រភេទនាងខុន ហើយនិងស្រូវធ្ងន់ប្រភេទមួយចំនួនផ្សេងទៀតគួបផ្សំជាមួយស្រូវ 54-51 និងប្រភេទស្រូវស្រងែ ជាដើមនោះ នឹងចាប់ផ្តើមដល់ចាប់ផ្តើមពីដើមខែធ្នូ តទៅ»។ លោកឧកញ៉ា ឡាយ ឈុនហួ បន្ថែមបែបនេះ។

ដើម្បីអន្តរាគមន៍រក្សាលំនឹងថ្លៃស្រូវនារដូវប្រមូលផលក្នុងខែវិច្ឆិកា ដល់ខែធ្នូ ឆ្នាំ២០២៥ រាជរដ្ឋាភិបាលកម្ពូជា បានសម្រេចបញ្ចេញមូលនិធិចំនួន ៤០ លានដុល្លារអាមេរិក បន្ថែមទៀត ក្រោមកម្មវិធីហិរញ្ញប្បទានរបស់រាជរដ្ឋាភិបាល ដើម្បីលើកស្ទួយផលិតផលកសិកម្ម រកទីផ្សារ និងរក្សាលំនឹងថ្លៃកសិផល តាមរយៈធនាគារ ARDB សម្រាប់ផ្តល់ឥណទានជាទុនបង្វិលដល់រោងម៉ាស៊ីនកិនស្រូវដៃគូ ប្រមូលទិញស្រូវឱ្យអស់លទ្ធភាព និងតាមតម្លៃសមរម្យពីប្រជាកសិករ៕

The post សហព័ន្ធស្រូវអង្ករ ទទួលបានជោគជ័យក្នុងការប្រមូលទិញស្រូវផ្ការំដួលពីកសិករ ក្រោយរដ្ឋាភិបាលទម្លាក់ទុន ៤០ លានដុល្លារ appeared first on Kampuchea Thmey Daily.

រោងម៉ាស៊ីនកិនស្រូវជាង ៣០ បាននិងកំពុងទិញស្រូវពីកសិករប្រចាំថ្ងៃ

Din Thary — Thu, 13 Nov 2025 08:00:40 +0000

លោក ឧកញ៉ា ឡាយ ឈុនហួ ប្រធានសហព័ន្ធស្រូវអង្ករកម្ពុជា (CRF) បានប្រាប់ «កម្ពុជាថ្មី» នៅថ្ងៃទី១៣ ខែវិច្ឆិកា ឆ្នាំ២០២៥ នេះ ដឹងថា បច្ចុប្បន្ន រោងម៉ាស៊ីនកិនស្រូវជាង ៣០ ដែលបានសហការជាមួយក្រសួងកសិកម្ម និងប្រើប្រាស់នូវកញ្ចប់ថវិការបស់រាជរដ្ឋាភិបាល បាននិងកំពុងប្រមូលទិញស្រូវពីកសិករប្រចាំថ្ងៃ ដោយជាមធ្យមក្នុងរង្វង់ ១ ម៉ឺន ៥ ពាន់តោន។

បើតាមការឱ្យដឹងពី លោក ឧកញ៉ា ឡាយ ឈុនហួ នាពេលបច្ចុប្បន្ននេះ រោងម៉ាស៊ីនកិនស្រូវដែលបានសហការគ្នាជាមួយនឹងក្រសួងកសិកម្ម ធនគារអភិវឌ្ឍន៍ជនបទ (ARDB) ក្រសួងសេដ្ឋកិច្ច និងហិរញ្ញវត្ថុ និងប្រើប្រាស់នូវកម្ចីជាទុនអន្តរាគមន៍ពិសេសរបស់រាជរដ្ឋាភិបាល មានចំនួនប្រមាណ ៣១ ទៅ ៣២ រោងម៉ាស៊ីនកិនស្រូវ ដើម្បីជួយប្រមូលទិញស្រូវពីប្រជាកសិករនៅក្នុងរដូវប្រមូលផលក្នុងតម្លៃមួយសមរម្យតាមដែលអាចធ្វើទៅបាន។

ក្នុងនោះដែរ រោងម៉ាស៊ីនកិនស្រូវដែលជាសមាជិកទាំងអស់នេះ ជាមធ្យមក្នុងមួយថ្ងៃ គឺប្រមូលទិញស្រូវក្នុងរង្វង់ ១ ម៉ឺន ៥ ពាន់តោន ពីប្រជាកសិករ។

លោកឧកញ៉ា ក៏បានបញ្ជាក់ដែរថា ក្រៅពីរោងម៉ាស៊ីនកិនស្រូវធំៗដែលបានប្រើប្រាស់ទុនរបស់រាជរដ្ឋាភិបាល ក៏នៅមានរោងម៉ាស៊ីនកិនស្រូវផ្សេងៗជាច្រើនដទៃទៀតក៏បានជួយប្រមូលទិញស្រូវពីកសិករផងដែរទៅតាមលទ្ធភាពរៀងៗខ្លួនតាមដែលធ្វើទៅបាន។

ជាក់ស្តែងសរុបទាំងអស់នូវរោងម៉ាស៊ីនទាំងខ្នាតតូច និងខ្នាតធំ មានប្រមាណជាង ២០០ រោងម៉ាស៊ីនកិនស្រូវដែលបានទិញស្រូវជាប្រចាំថ្ងៃពីកសិករ។ មានន័យថា រោងម៉ាស៊ីនកិនទាំងអស់នៅទូទាំងប្រទេស គឺនៅជាប់ជាមួយប្រជាកសិករជាប់ជានិច្ច។

កន្លងមកប្រធានសហព័ន្ធស្រូវអង្ករកម្ពុជារូបនេះ ក៏បានអះអាងដែរថា ដើម្បីបន្តដោះស្រាយបញ្ហាតម្លៃស្រូវជូនប្រជាកសិករក្នុងរដូវប្រមូលផល សហព័ន្ធស្រូវអង្ករកម្ពុជានិងបន្តសហការណ៍ជាមួយបណ្តាសមាជិកដែលជាដៃគូរទាំងអស់ ព្រមទាំងក្រុមហ៊ុននាំចេញធំៗផ្សេងៗ ដើម្បីប្រមូលទិញស្រូវទាំងអស់ពីកសិករក្នុងតម្លៃសមរម្យណាមួយ៕

ដោយ៖ ឌិន ថារី

The post រោងម៉ាស៊ីនកិនស្រូវជាង ៣០ បាននិងកំពុងទិញស្រូវពីកសិករប្រចាំថ្ងៃ appeared first on Kampuchea Thmey Daily.

CRF បន្តសហការណ៍ជាមួយដៃគូ និងក្រុមហ៊ុនធំៗ ប្រមូលទិញស្រូវពីកសិករក្នុងតម្លៃសមរម្យ

Din Thary — Tue, 11 Nov 2025 06:49:54 +0000

ប្រធានសហព័ន្ធស្រូវអង្ករកម្ពុជា (CRF) លោកឧកញ៉ា ឡាយ ឈុនហួរ បានអះអាងថា ដើម្បីបន្តដោះស្រាយបញ្ហាតម្លៃស្រូវជូនប្រជាកសិករក្នុងរដូវប្រមូលផលនេះ សហព័ន្ធស្រូវអង្ករកម្ពុជាបន្តសហការណ៍ជាមួយបណ្តាសមាជិកដែលជាដៃគូរទាំងអស់ ព្រមទាំងក្រុមហ៊ុននាំចេញធំៗផ្សេងៗ ដើម្បីប្រមូលទិញស្រូវទាំងអស់ពីកសិករក្នុងតម្លៃសមរម្យណាមួយ។

នៅថ្ងៃទី១១ ខែវិច្ឆិកា នេះ លោកឧកញ៉ា ឡាយ បានលើកឡើងថា បញ្ហាស្រូវធ្លាក់ថ្លៃ យើងឃើញថាបណ្តាប្រទេសស្ទើរតែទាំងអស់នៅតំបន់អាស៊ីបាននិងកំពុងជួបបញ្ហានេះយ៉ាងខ្លាំង។ ក្នុងនោះ រាជរដ្ឋាភិបាលនៃប្រទេសផ្សេងៗបានចេញមុខជួយអន្តរាគមន៍ ហើយសម្រាប់រាជរដ្ឋាភិបាលកម្ពុជា ក៏បានដុតដៃដុតជើងដើម្បីធ្វើការទម្លាក់ទុនទៅឱ្យរោងម៉ាស៊ីនកិនស្រូវភាគច្រើនដែលបានសហការគ្នាជាមួយនឹងក្រសួង ដើម្បីធ្វើការប្រមូលទិញស្រូវពីប្រជាកសិករទាំងអស់ឱ្យបានទាន់ពេលវេលាស្ថិតក្នុងតម្លៃដែលសមរម្យមួយ។

លោកឧកញ៉ា បានអះអាងថា «ដូច្នេះហើយតួនាទីរបស់សហព័ន្ធស្រូវអង្ករកម្ពុជា គឺប្រមូលសមាជិកទាំងអស់ ជាពិសេសសមាជិកអ្នកនាំចេញ និងក្រុមហ៊ុនធំៗផ្សេងទៀតដើម្បីប្រមូលទិញស្រូវទាំងអស់ពីកសិករនៅក្នុងតម្លៃសមរម្យណាមួយ»។

ប្រធានសហព័ន្ធរូបនេះ ក៏បានបន្ថែមដែរថា ជាក់ស្តែង ដូចជាផ្ការំដួលនេះ យើងព្យាយាមទិញស្រូវពីស្រែក្នុងរង្វង់ពី ៩៧០៛ រហូតមកដល់តម្លៃ ១០២០៛ សម្រាប់ស្រូវគុណភាពល្អលេខមួយ។ ការងារនេះ សហព័ន្ធ បានធ្វើការសហការគ្នាជាមួយក្រសួងកសិកម្ម ក្រសួងសេដ្ឋកិច្ច និងធនាគារអភិវឌ្ឍន៍ជនបទ ARDB ជាដើម។

សូមបញ្ជាក់ថា ដើម្បីអន្តរាគមន៍រក្សាលំនឹងថ្លៃស្រូវនារដូវប្រមូលផលក្នុងខែវិច្ឆិកាដល់ខែធ្នូ ឆ្នាំ២០២៥ និងដើមឆ្នាំ ២០២៦ ខាងមុខនេះ រាជរដ្ឋាភិបាលកម្ពុជា បានសម្រេចបញ្ចេញមូលនិធិចំនួន ៤០ លានដុល្លារអាមេរិក បន្ថែមទៀត ក្រោមកម្មវិធីហិរញ្ញប្បទានរបស់រាជរដ្ឋាភិបាល ដើម្បីលើកស្ទួយផលិតផលកសិកម្ម រកទីផ្សារ និងរក្សាលំនឹងថ្លៃកសិផល តាមរយៈធនាគារ ARDB សម្រាប់ផ្តល់ឥណទានជាទុនបង្វិលដល់រោងម៉ាស៊ីនកិនស្រូវដៃគូ ប្រមូលទិញស្រូវឱ្យអស់លទ្ធភាព និងតាមតម្លៃសមរម្យពីប្រជាកសិករ៕

The post CRF បន្តសហការណ៍ជាមួយដៃគូ និងក្រុមហ៊ុនធំៗ ប្រមូលទិញស្រូវពីកសិករក្នុងតម្លៃសមរម្យ appeared first on Kampuchea Thmey Daily.

ប្រធាន CRF៖ ពូជអង្ករផ្ការំដួលខ្មែរ ជាពូជបុរាណពីដូនតា នៅតែរក្សាបានគុណភាពល្អ

Din Thary — Mon, 10 Nov 2025 07:31:53 +0000

លោកឧកញ៉ា ឡាយ ឈុនហួរ ប្រធានសហព័ន្ធស្រូវអង្ករកម្ពុជា (CRF) បានគូសបញ្ជាក់ថា ថ្វីដ្បិតពូជអង្ករផ្ការំដួល ជាពូជពីបុរាណបន្សល់មកពីដូនតា ប៉ុន្តែពូជនេះគុណភាពនៅតែល្អមិនសាបសូន្យដដែល។ លោកឧកញ៉ា បានលើកឡើងបែបនេះក្រោយពេលដែលកម្ពុជាបានឈ្នះពានរង្វាន់ជាអង្ករល្អប្រណិតល្អផ្តាច់គេ លើពិភពលោក ជាលើកទី៧។

ថ្លែងប្រាប់ «កម្ពុជាថ្មី» នៅថ្ងៃទី១០ ខែវិច្ឆិកា នេះថា លោកឧកញ៉ា ឡាយ ឈុនហួរ បានមានប្រសាសន៍ថា នេះគឺជាលើកទី៧ ដែលកម្ពុជាបានជាប់ពានរង្វាន់អង្ករល្អផ្តាច់គេលើពិភពលោក។ ឆ្នាំនេះ កម្ពុជាបានជ្រើសរើសយកស្រូវប្រភេទផ្ការំដួលដែលយើងបានប្រមូលសម្រិតសម្រាំងពីកសិករដើម្បីទៅប្រកួតប្រជែង។

លោកឧកញ៉ា បានសង្កត់ធ្ងន់ថា «ថ្វីដ្បិតតែកម្ពុជាយើង ពូជផ្ការំដួល ជាពូជពីបុរាណបន្សល់មកដូនតាហើយក្តី ប៉ុន្តែពូជនេះមិនសាបសូន្យនោះទេ គុណភាពនៅតែល្អប្រណិតដដែល»។

«ដូច្នេះហើយការឈ្នះពានរង្វាន់លើកទី៧ នេះ គឺជាមោទនភាពខ្លាំងរបស់ជាតិ ហើយដូចយើងបានឃើញហើយឆ្នាំនេះតម្លៃស្រូវបានធ្លាក់យ៉ាងខ្លាំងមិនថាតែប្រទេសកម្ពុជានោះទេ សូម្បីតែបណ្តាប្រទេសផ្សេងៗក៏មានការធ្លាក់ថ្លៃដូចគ្នាដែរ ជាពិសេសស្រូវដែលយកមកផលិតជាអង្ករសធម្មតា»។ លោកឧកញ៉ា បន្ថែមបែបនេះ។

ជាក់ស្តែង សូម្បីតែប្រភេទស្រូវក្រអូបខ្លះក៏មានការធ្លាក់ចុះយ៉ាងខ្លាំង ដោយឡែកសម្រាប់ផ្ការំដួលនេះតម្លៃទាបជាងឆ្នាំមុន អាចក្នុងរង្វង់ ១០% ទៅ ១១% ធៀបនឹងឆ្នាំ២០២៤ ប៉ុន្តែតម្លៃនេះមិនអាចធៀបនឹងឆ្នាំ២០២២ បាននោះទេ ព្រោះតម្លៃស្រូវមានការខ្ពស់ខ្លាំង។

ឆ្នាំដែលកម្ពុជាឈ្នះពានរង្វាន់ជាអង្ករល្អប្រណិតល្អផ្តាច់គេ លើពិភពលោក ទាំង ៧ លើករួមមាន លើកទី១ នៅឆ្នាំ២០១២, លើកទី២ នៅឆ្នាំ២០១៣ , លើកទី៣ នៅឆ្នាំ២០១៤, លើកទី៤ នៅឆ្នាំ២០១៨, លើកទី៥ នៅឆ្នាំ២០២២, លើកទី៦ នៅឆ្នាំ២០២៤, និងលើកទី៧ នៅឆ្នាំ២០២៥។

ការឈ្នះពានរង្វាន់នេះ គឺបានមកពីការគិតខំប្រឹងប្រែងរបស់រប្រជាកសិករកម្ពុជា ដែលបានចូលរួមខិតខំប្រឹងប្រែងផលិតអង្ករកម្ពុជា ជំរុញធ្វើយ៉ាងណាឲ្យមានគុណភាពខ្ពស់រហូតមានការទទួលស្គាល់ពីអន្តរជាតិនូវគុណតម្លៃ និងគុណភាពនៃអង្ករកម្ពុជារហូតមក៕

The post ប្រធាន CRF៖ ពូជអង្ករផ្ការំដួលខ្មែរ ជាពូជបុរាណពីដូនតា នៅតែរក្សាបានគុណភាពល្អ appeared first on Kampuchea Thmey Daily.

អង្ករ«ផ្ការំដួល»របស់កម្ពុជាឈ្នះពានរង្វាន់លើកទី ៧

deth leng — Sun, 09 Nov 2025 05:00:25 +0000

អង្ករពូជ«ផ្ការំដួល» របស់កម្ពុជា ទទួលបានជ័យលាភីលេខ១ សម្រាប់ឆ្នាំ ២០២៥ ជាអង្ករល្អដាច់គេលំដាប់ថ្នាក់ពិភពលោក នៅក្នុងកម្មវិធីប្រកួតប្រជែង នៃសន្និសីទស្រូវអង្ករពិភពលោកនៅថ្ងៃទី ០៩ ខែវិច្ឆិកា ឆ្នាំ ២០២៥។

មន្ត្រីក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់ថា នេះជាលើកទី ៧ ហើយដែលអង្ករកម្ពុជា បានទទួលជ័យលាភីជាអង្ករដែលមានគុណភាពល្អ ហើយនេះ គឺជាមោទនភាពសម្រាប់កម្ពុជា និងជាឱកាសក្នុងការជំរុញការនាំចេញអង្ករកម្ពុជា ទៅកាន់ទីផ្សារអន្តរជាតិ បន្ថែមទៀត។

អង្ករកម្ពុជាពូជ «ផ្ការំដួល» ត្រូវបានឈ្នះពានជាអង្ករល្អដាច់គេលំដាប់ពិភពលោក ក្នុងចំណោមប្រទេសជាច្រើនដែលបានចូលរួមលើពិភពលោក។

ការឈ្នះពានរង្វាន់អង្ករល្អបំផុតក្នុងពិភពលោក (Worlds Best Rice 2025) នៅក្នុងសន្និសីទស្រូវអង្ករពិភពលោក ឆ្នាំ២០២៥ នៅកម្ពុជា រៀបចំដោយ The Rice Trader រយៈពេល៣ថ្ងៃចាប់ពីថ្ងៃទី ៧-៩ ខែវិច្ឆិកា ឆ្នាំ២០២៥ នៅរាជធានីភ្នំពេញ ដែលនេះជាលើកទី ៧ ហើយ ដែលកម្ពុជាឈ្នះពានរង្វាន់អង្ករល្អដាច់ ក្នុងកម្មវិធីលំដាប់ពិភពលោកមួយនេះ ដោយ លើកទី១ទទួលបានកាលពីឆ្នាំ២០១២, លើកទី២ នៅឆ្នាំ២០១៣, លើកទី៣ នៅឆ្នាំ២០១៤, លើកទី៤ នៅឆ្នាំ២០១៨, លើកទី៥ នៅឆ្នាំ២០២២, លើកទី៦ នៅឆ្នាំ២០២៤, និងចុងក្រោយនៅឆ្នាំ២០២៥ នេះ។

របាយការណ៍របស់អគ្គនាយកដ្ឋានកសិកម្ម បង្ហាញថា ក្នុងរយៈពេល ៩ ខែ ឆ្នាំ ២០២៥ កម្ពុជានាំចេញអង្ករចំនួន ជិត ៦០ ម៉ឺនតោន (៥៩៦ ៣៤៣) ទៅកាន់ទិសដៅ ៨៨ ប្រទេស គិតជាទឹកប្រាក់ប្រមាណ ៤៥៥ លានដុល្លារ កើនឡើង ៣០,៤៣% ធៀបនឹងរយៈពេលដូចគ្នានៅឆ្នាំ ២០២៤៕

The post អង្ករ«ផ្ការំដួល»របស់កម្ពុជាឈ្នះពានរង្វាន់លើកទី ៧ appeared first on Kampuchea Thmey Daily.

ស្រូវសើមជិត ១ ម៉ឺនតោន ត្រូវបានរោងម៉ាស៊ីនដៃគូជាមួយក្រសួងកសិកម្ម សម្រុកទិញពីកសិករទូទាំងប្រទេស

Din Thary — Fri, 07 Nov 2025 06:27:59 +0000

បើតាមការឱ្យដឹងពីលោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់ថា បរិមាណស្រូវសើមជិត ១ ម៉ឺនតោន ត្រូវបានរោងម៉ាស៊ីនដែលជាដៃគូជាមួយក្រសួងកសិកម្ម សម្រុកប្រមូលទិញពីប្រជាកសិករទូទាំងប្រទេសក្នុងមួយថ្ងៃ នៅថ្ងៃទី០៦ ខែវិច្ឆិកា ឆ្នាំ២០២៥។

លោក ឃឹម ហ្វីណង់ បានមានប្រសាសន៍ថា ចំនួននៃការប្រមូលទិញស្រូវពីកសិករនេះត្រូវបានរំពឹងទុកថានឹងហក់ឡើងខ្ពស់ខ្លាំងនៅក្នុងខែវិច្ឆិកានេះ ដែលជាខែប្រមូលផលធំក្នុងរដូវនេះ លើផ្ទៃដីដាំដុះប្រហែល ១,៥ លានហិកតា ជាមួយនឹងបរិមាណផលចន្លោះពី ៤-៥ លានតោនស្រូវសើម។

អ្នកនាំពាក្យរូបនេះ បានសង្កត់ធ្ងន់ថា «ប៉ុន្មានខែកន្លងមកនេះ តាមរយៈមន្ត្រីកសិកម្មឃុំ និងរោងម៉ាស៊ីនដៃគូទាំងអស់ ក្រសួងកសិកម្ម និងសហព័ន្ធស្រូវអង្ករបានធ្វើការជាមួយគ្នាយ៉ាងជិតស្និទ្ធស្ទើរតែរៀងរាល់ថ្ងៃជាមួយនឹងវិសាលភាពដ៏ធំធេង ដើម្បីធានាឱ្យបានថាការប្រមូលទិញស្រូវពីកសិករនៅតាមទីវាលនៅតែមានលំហូរជាប់ជាប្រចាំ និងជួយមិនឱ្យកសិករកកស្ទះរហូតដល់ខូចស្រូវនោះឡើយ។

គួរគូសបញ្ជាក់ថា រោងម៉ាស៊ីនដែលប្រមូលលទិញស្រូវពីកសិករនោះរួមមាន៖ ១. រោងម៉ាស៊ីន ហ្វាងលី មង្គលបុរី ខេត្តបន្ទាយមានជ័យ ទិញចំនួន ៥០០តោន, ២. ក្រុមហ៊ុន Amru Rice បាត់ដំបង និងកំពង់ធំ ប្រមូលទិញចំនួន ១២០០តោន, ៣. រោងម៉ាស៊ីន ងួនហុង ស្ទោង ខេត្តកំពង់ធំ ទិញចំនួន ៣០០តោន, ៤. រោងម៉ាស៊ីន ស៊ីនេឈ័រអហ្វអេស៊ា សិរីសោភ័ណ្ឌ ខេត្តបន្ទាយមានជ័យ ប្រមូលទិញចំនួន ១៧០តោន។

៥. រោងម៉ាស៊ីន ថន ជា ស្រុកអូរាំងឪ ខេត្តត្បូងឃ្មុំ ប្រមូលទិញចំនួន ៣០០តោន, ៦.រោងម៉ាស៊ីន១៦៨៨ ស្ទោង កំពង់ធំ ២៨០តោន, ៧.រោងម៉ាស៊ីន យិន ម៉ាន់ បវេល បាត់ដំបង ២៥០តោន, ៨.រោងម៉ាស៊ីន ហួង ឡុង ស្វាយអន្ទរ ព្រៃវែង ទិញចំនួន ១២០តោន, ៩. រោងម៉ាស៊ីនស្រូវ លី ឈាន ពាមរក៍ ព្រៃវែង ទិញស្រូវចំនួន ១៨០តោន, ១០. រោងម៉ាស៊ីន សៀ ហេង ថ្មគោល បាត់ដំបង ទិញចំនួន ៥០០តោន។

១១. រោងម៉ាស៊ីន វ៉ាន់ សារ ពញាឮ កណ្តាល ប្រមូលទិញចំនួន ១០០តោន, ១២. រោងម៉ាស៊ីន ជើង មី ថ្មគោល បាត់ដំបង ប្រមូលទិញចំនួន ១៦០តោន, ១២.រោងម៉ាស៊ីន ផ្លូវ ថូវ បាត់ដំបង ប្រមូលទិញចំនួន ២០០តោន, ១៤. រោងម៉ាស៊ីន ភូមិយើង បាធាយ កំពង់ចាម ប្រមូលទិញចំនួន ២៥០តោន, ១៥.សហគ្រាសកិនស្រូវ អៀង ហ៊ាង សង្កែ បាត់ដំបង ប្រមូលទិញចំនួន ៤០០តោន, ១៦. ក្រុមហ៊ុន City Rice មង្គលបុរី បន្ទាយមានជ័យ ប្រមូលទិញចំនួន ១២០០តោន, ១៧.រោងម៉ាស៊ីនកិនស្រូវ ឈុន ធំ ស្វាយអន្ទរ ព្រៃវែង ប្រមូលទិញចំនួន ៣០០តោន។

១៨. រោងម៉ាស៊ីន ស៊ីវឡាយ មង្គលបុរី បន្ទាយមានជ័យ ប្រមូលទិញចំនួន ៥៤០តោន, ១៩.រោងម៉ាស៊ីន ឈិត ប៊ុនថន ព្រៃវែង ប្រមូលទិញចំនួន ៥២០តោន, ២០.រោងម៉ាស៊ីនខ្មែរហូតគ្រុប កំពង់ស្ពឺ និងបាត់ដំបង ប្រមូលទិញចំនួន ១២០០តោន, ២១.រោងម៉ាស៊ីន ភូ ពុយ មោងឫស្សី បាត់ដំបង ប្រមូលទិញចំនួន ៦០០តោន និង២២.រោងម៉ាស៊ីន Fedrice ថ្មគោល បាត់ដំបង ប្រមូលទិញចំនួន ៣០០តោន៕

The post ស្រូវសើមជិត ១ ម៉ឺនតោន ត្រូវបានរោងម៉ាស៊ីនដៃគូជាមួយក្រសួងកសិកម្ម សម្រុកទិញពីកសិករទូទាំងប្រទេស appeared first on Kampuchea Thmey Daily.

សហព័ន្ធស្រូវអង្ករកម្ពុជា Archives - Kampuchea Thmey Daily

​កម្ពុជា​រកចំណូល​បាន​ជាង ​២០០ ​លានដុល្លារ ​ពីការ​នាំចេញ​អង្ករ ​នាត្រីមាសទី១

CRF នឹងចុះ MoU ជាមួយការិយាល័យតំណាងសភាពាណិជ្ជកម្មកម្ពុជាប្រចាំប្រទេសនូវែលហ្សេឡង់

រោងម៉ាស៊ីនកិនស្រូវជាង ៣០ បាននិងកំពុងទិញស្រូវពីកសិករប្រចាំថ្ងៃ ​

CRF បន្តសហការណ៍ជាមួយដៃគូ និងក្រុមហ៊ុនធំៗ ប្រមូលទិញស្រូវ​ពីកសិករក្នុងតម្លៃសមរម្យ