កម្មវិធីនេះ នឹងរៀបចំឡើងនៅថ្ងៃទី២៨ ខែឧសភា ឆ្នាំ២០២៦ ចាប់ពីវេលាម៉ោង៥ល្ងាច នៅពហុកីឡដ្ឋានជាតិអូឡាំពិក ក្រោមអធិបតីភាពឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងដោយមានការចូលរួមពីសំណាក់ថ្នាក់ដឹកនាំ សមាជិក សមាជិកា ស.ស.យ.ក. និងសាធារណជនទូទៅជាច្រើនពាន់នាក់។

«ដាស់ស្មារតីជាតិ ឬ Day of Reckoning» គឺជាបេសកកម្មនៃយុទ្ធនាការរំលឹក និងដាស់ស្មារតីប្រជាជាតិឱ្យចងចាំពីដំណើរប្រវត្តិសាស្ត្រ ការឈឺចាប់ ការបាត់បង់ និងការតស៊ូដែលប្រជាជនកម្ពុជា ធ្លាប់បានឆ្លងកាត់ ជាពិសេសការចងចាំមេរៀនឈឺចាប់ឆ្នាំ២០២៥ ដោយប្រែក្លាយមេរៀន ព្រមទាំងស្លាកស្នាមនៃអតីតកាលទាំងនេះ ឱ្យទៅជាកម្លាំងជំរុញចិត្តសម្រាប់ប្រជាជន ជាពិសេសយុវជនជំនាន់ក្រោយក្នុងការអភិវឌ្ឍសមត្ថភាព ការពង្រឹងស្មារតីស្នេហាជាតិ និងការចូលរួមថែរក្សាសន្តិភាព ស្ថិរភាព និងសមិទ្ធផលសង្គមដែលកម្ពុជាកំពុងមាននាពេលបច្ចុប្បន្ន។

«ដាស់ស្មារតីជាតិ» មិនមែនជាការរំលឹកអតីតកាល ដើម្បីបង្កើតការបែកបាក់ រើសអើង ឬការគុំកួនសងសឹកនោះឡើយ។ ប៉ុន្តែជាការដាស់តឿនស្មារតីប្រជាជាតិឱ្យយល់ដឹងពីតម្លៃនៃការរួបរួម សន្តិភាព ការអត់ឱន និងការកសាងអនាគតរួមគ្នា ដោយបញ្ចៀសដាច់ខាតនូវទស្សនៈជ្រុលនិយមគ្រប់ទម្រង់។

នៅក្នុងកម្មវិធីនេះ នឹងមានដាក់តាំងបង្ហាញផ្ទាំងគំនូរដែលលាតត្រដាងនូវការពិត ដែលកម្ពុជាបានឆ្លងកាត់ក្នុងឆ្នាំ២០២៥ (Truth Park) និងទីតាំងគោរពវិញ្ញាណក្ខន្ធដល់កងកម្លាំងដែលបានពលី ការតាំងបង្ហាញពីសំណល់សង្គ្រាម ដូចជា ឯកសណ្ឋានរបស់កងកម្លាំងដែលបានពលី ទង់ជាតិកម្ពុជា ដែលត្រូវបានកម្ទេចដោយយោធាថៃ បំណែកផ្ទះប្រជាពលរដ្ឋដែលបានបែកបាក់ និងខូចខាតដោយសារសង្គ្រាម។ បន្ថែមពីនេះ ក៏មានការរៀបចំផ្ទាំងដែលអនុញ្ញាតឱ្យអ្នកចូលរួមបានបង្ហាញនូវការប្ដេជ្ញាចិត្តក្នុងការឆ្ពោះទៅមុខជាប្រជាជាតិតែមួយ ការដង្ហែទង់ជាតិនៃព្រះរាជាណាចក្រកម្ពុជា ការចាក់វីដេអូនានា រួមទាំងការសម្ដែងទស្សនីយភាពដែលរំលេចពីអត្តសញ្ញាណ និងមោទនភាពជាតិផងដែរ។

គួរជម្រាបថា ក្នុងកាលៈទេសៈដែលប្រទេសកម្ពុជា ត្រូវបានរងការឈ្លានពានពីប្រទេសជិតខាង ដោយចាប់ផ្ដើមកាលពីឆ្នាំ២០២៥ ប្រជពលរដ្ឋខ្មែរទាំងអស់បានរួបរួមគ្នាជាធ្លុងមួយ មានស្មារតីជាតិតែមួយលើការការពារបូរណភាពទឹកដី និងអធិបតេយ្យភាពជាតិ។ ក្នុងនោះដែរ សហភាពសហព័ន្ធយុវជនកម្ពុជា ដែលអង្គការមហាជនដ៏ធំ ក្រោមការដឹកនាំរបស់ឯកឧត្តម ហ៊ុន ម៉ានី កន្លងមក ក៏បានផ្តួចផ្តើមគំនិតរៀបចំកម្មវិធីការធ្វើដំណើរថ្មើរជើង «Solidarity March» ដើម្បីបង្ហាញការរួមគ្នាជាធ្លុងមួយគាំទ្រដល់រាជរដ្ឋាភិបាល និងកងកម្លាំងជួរមុខកម្ពុជា៕

ដោយ៖ ធឿន វ៉ាន់សុង

The post «ដាស់ស្មារតីជាតិ» ព្រឹត្តិការណ៍បង្កើតឡើងដោយ ស.ស.យ.ក នឹងរៀបចំនៅថ្ងៃ២៨ ឧសភា ជាការចងចាំមេរៀនឈឺចាប់របស់កម្ពុជា appeared first on Kampuchea Thmey Daily.

នារសៀលថ្ងៃទី១៦ ខែមេសា ឆ្នាំ២០២៦ លោក ពៅ សោមាណាក់ ប្រធានមន្ទីរ បានដឹកនាំក្រុមកាងារមន្ទីរបរិស្ថានខេត្តកណ្តាល និងក្រុមយុវជនស.ស.យ.ក ខេត្ត សរុបចំនួន ៤៦នាក់ (ស្រី១៧នាក់) ធ្វើអនាម័យសំអាតសំរាម សំណល់រឹង សំណល់ប្លាស្ទិក តាមដងផ្លូវមួយចំនួន និងបរិវេណសួនច្បារមាត់ទន្លេ ក្រុងតាខ្មៅ។

យុទ្ធនាការនេះបានធ្វើឡើងភ្លាមៗ ក្រោមការណែនាំពីថ្នាក់ដឹកនាំខេត្តកណ្តាល ដោយបានចុះមកសំអាតតាំងពី ព្រឹកព្រលឹម ដើម្បីកាយប្រមូល និងរៀបចំសំរាមឱ្យមានសណ្ដាប់ធ្នាប់ ងាយស្រួលឡានសំរាមមកដឹក ។ ជាពិសេសក្នុងអំឡុងពេលបីថ្ងៃនៃពិធីបុណ្យចូលឆ្នាំថ្មីប្រពៃណីជាតិខ្មែរ ពីថ្ងៃទី១៤-១៥-១៦ ខែមេសា ឆ្នាំ២០២៦នេះ ឃើញថាបរិមាណសំរាមមានការថយចុះច្រើន បើប្រៀបធៀបទៅកាលពីឆ្នាំមុន។

គួរបញ្ជាក់ផងដែរថា ពិធីបុណ្យចូលឆ្នាំប្រពៃណីជាតិខ្មែរ ឬហៅថា នគរសង្រ្កាន្ត ចាប់ពីថ្ងៃទី១៤ដល់ថ្ងៃទី១៦ ដោយនៅថ្ងៃទីមួយ ត្រូវជាថ្ងៃ (មហាសង្រ្កាន្ត) , ថ្ងៃទី ពីរ (វារៈវ័នបត) និងថ្ងៃទី បី (ឡើងស័ក្ត ។ ហើយថ្ងៃទាំង០៣នេះ ជាថ្ងៃឈប់សម្រាកពីការងារ ដើម្បីធ្វើដំណើរទៅលេងស្រុកកំណើត និងដើរលេងកម្សាន្តតាមរមណីយដ្ឋាន នានាផងដែរ៕ អត្ថបទ ៖ រដ្ឋា

The post មន្ទីរបរិស្ថានខេត្តកណ្ដាល ដឹកនាំក្រុមយុវជនស.ស.យ.ក ធ្វើអនាម័យសំអាតបរិវេណសួនច្បារមាត់ទន្លេ ក្រុងតាខ្មៅ ក្រោយបញ្ចប់ពិធីបុណ្យចូលឆ្នាំ appeared first on Kampuchea Thmey Daily.

សាកលវិទ្យាល័យទាំងនោះរួមមាន ទី១.សាកលវិទ្យាល័យភូមិន្ទភ្នំពេញ (អាហារូបករណ៍ថ្នាក់បរិញ្ញាបត្រ ១០០%) ចំនួន ២០កន្លែង ផុតកំណត់ ទទួលពាក្យនៅថ្ងៃទី២៥ ខែតុលា ឆ្នាំ២០២៥។ ទី២.សាកលវិទ្យាល័យជាតិគ្រប់គ្រង (អាហារូបករណ៍ ១០០%) ចំនួន ១២កន្លែង សម្រាប់ថ្នាក់បរិញ្ញាបត្រ ផុតកំណត់ទទួលពាក្យថ្ងៃទី២០ ខែកញ្ញា ឆ្នាំ២០២៥ រីឯសម្រាប់ថ្នាក់បរិញ្ញាបត្រជាន់ខ្ពស់ ផុតកំណត់ទទួលពាក្យថ្ងៃទី២៧ ខែកញ្ញា ឆ្នាំ២០២៥។ ទី៣.សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច (អាហារូបករណ៍ ១០០%) សម្រាប់ថ្នាក់បរិញ្ញាបត្រ ផុតកំណត់ទទួលពាក្យថ្ងៃទី២០ ខែកញ្ញា ឆ្នាំ២០២៥ និងសម្រាប់ថ្នាក់បរិញ្ញាបត្រជាន់ខ្ពស់ ផុតកំណត់ទទួលពាក្យថ្ងៃទី២៧ ខែកញ្ញា ឆ្នាំ២០២៥។

ទី៤.សាកលវិទ្យាល័យអាមេរិកាំងភ្នំពេញ (អាហារូបករណ៍ ១០០%) ចំនួន ១៥កន្លែង ថ្នាក់បរិញ្ញាបត្រ Single Degree និងផុតកំណត់ទទួលពាក្យថ្ងៃទី៨ ខែតុលា ឆ្នាំ២០២៥។ ទី៥.សាកលវិទ្យាល័យធនធានមនុស្ស (អាហារូបករណ៍ ៥០%) មិនកំណត់ចំនួន និងផុតទទួលពាក្យថ្ងៃទី១៦ ខែកញ្ញា ឆ្នាំ២០២៥។

លក្ខខណ្ឌនៃការជ្រើសរើស បេក្ខជនត្រូវមានសញ្ញាបត្រមធ្យមសិក្សាទុតិយភូមិ ឬឯកសារបញ្ជាក់ដែលមានតម្លៃស្មើ សម្រាប់សិក្សាថ្នាក់បរិញ្ញាបត្រ។ បេក្ខជនត្រូវមានសញ្ញាបត្របរិញ្ញាបត្រ ឬឯកសារបញ្ជាក់ដែលមានតម្លៃស្មើ សម្រាប់សិក្សាថ្នាក់ បរិញ្ញាបត្រជាន់ខ្ពស់។ បេក្ខជនត្រូវមានសញ្ញាបត្របរិញ្ញាបត្រជាន់ខ្ពស់ ឬឯកសារបញ្ជាក់ដែលមានតម្លៃស្មើ សម្រាប់សិក្សាថ្នាក់បណ្ឌិត។

បេក្ខជនត្រូវបំពេញលក្ខខណ្ឌចុះឈ្មោះប្រឡងដើម្បីចូលរៀនដែលកំណត់ដោយគ្រឹះស្ថានសិក្សានីមួយៗ។ បេក្ខជនត្រូវឆ្លងកាត់ការប្រកួតប្រជែងជ្រើសរើស ដែលរៀបចំដោយក្រុមការងារកម្មវិធីសាបព្រោះគ្រាប់ពូជ នៃសហភាពសហព័ន្ធយុវជនកម្ពុជា រាជធានីភ្នំពេញ។ បេក្ខជនត្រូវទទួលបន្ទុកចំណាយលើការចុះឈ្មោះចូលរៀន សេវារដ្ឋបាល និងលក្ខខណ្ឌផ្សេងៗ របស់គ្រឹះស្ថានសិក្សានីមួយៗ។ បេក្ខជនដែលជាប់ជ័យលាភីអាហារូបករណ៍ ត្រូវចូលរួមសកម្មភាពសង្គមនានារបស់ ស. ស. យ. ក.រាជធានីភ្នំពេញ។

ចំពោះលិខិតដែលត្រូវភ្ជាប់ស្នើសុំអាហារូបករណ៍ រួមមាន ពាក្យស្នើសុំអាហារូបករណ៍ចំនួន ១ច្បាប់ ជីវប្រវត្តិសង្ខេបដែលមានបិតរូបថតថ្មី (៤x៦) ចំនួន ១ច្បាប់។ សញ្ញាបត្រមធ្យមសិក្សាទុតិយភូមិ ឬឯកសារបញ្ជាក់ដែលមានតម្លៃស្មើ ចំនួន១ច្បាប់។ សញ្ញាបត្របរិញ្ញាបត្រ ឬឯកសារបញ្ជាក់ដែលមានតម្លៃស្មើចំនួន ១ច្បាប់។ សញ្ញាបត្របរិញ្ញាបត្រជាន់ខ្ពស់ ឬឯកសារបញ្ជាក់ដែលមានតម្លៃស្មើចំនួន ១ច្បាប់។ ថតចម្លងអត្តសញ្ញាណបណ្ណ ឬលិខិតបញ្ជាក់សំបុត្រកំណើតចំនួន ១ច្បាប់។ ថតចម្លងសៀវភៅគ្រួសារ ឬសៀវភៅស្នាក់នៅចំនួន ១ច្បាប់។ រូបថតក្នុងពេលថ្មីៗ ទំហំ (៤x៦ ស.ម) ថតពីមុខ គ្មានវ៉ែនតា និងមានផ្ទៃខាងក្រោយពណ៌ស ចំនួន ៣សន្លឹក។

បេក្ខជនដែលមានចំណាប់អារម្មណ៍ សូមទាញយកសំណុំឯកសារស្នើសុំអាហារូបករណ៍របស់ ស.ស.យ.ក. រាជធានីភ្នំពេញ តាមរយៈ QR code ដើម្បីបំពេញ បន្ទាប់មក Upload ឯកសារទាំងអស់នេះ តាមរយៈតំណភ្ជាប់ ដាក់ពាក្យតាមសាកលវិទ្យាល័យនីមួយៗ៕

The post ស.ស.យ.ក ផ្តល់អាហារូបករណ៍១០០% ចំនួន ៥៩កន្លែង សម្រាប់ឆ្នាំសិក្សា២០២៥-២០២៦ appeared first on Kampuchea Thmey Daily.

តាមការគូសបញ្ជាក់របស់ឯកឧត្តម ហ៊ុន ម៉ានី ផ្នែកមួយនៃការចូលរួមរបស់ ស.ស.យ.ក គឺដើម្បីបង្ហាញនូវការគាំទ្រ និងភាពជឿជាក់ទៅលើការដឹកនាំរបស់លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ក្នុងការរៀបចំដំណើរការប្រឡងសញ្ញាបត្រមធ្យមសិក្សាទុតិយភូមិ ក្រោមស្មារតីកំណែទម្រង់ «អ្នកចេះ គឺជាប់»។

ថ្លែងនៅក្នុងឱកាសអញ្ជើញបើកវិញ្ញាសារប្រឡង នៅមណ្ឌលប្រឡងក្នុងវិទ្យាល័យព្រះស៊ីសុវត្ថិ នាព្រឹកថ្ងៃទី២៨ ខែសីហា ឆ្នាំ២០២៥នេះ ឯកឧត្តម ប្រធាន ស.ស.យ.ក ក៏បានលើកឡើងពីសកម្មភាពមួយចំនួនទៀតរបស់ក្រុមការងារ ក៏ដូចជាសមាជិក ស.ស.យ.ក បានចូលរួមគាំទ្រក្នុងដំណើរការប្រឡងបាក់ឌុប រាប់ចាប់តាំងពីការរៀបចំ និងផ្ដល់វគ្គបង្រៀនបំប៉នបន្ថែមដល់សិស្សត្រៀមមុនប្រឡង ដើម្បីជួយសម្រួចសមត្ថភាពបេក្ខជនដែលត្រូវប្រឡងអាចឈានដល់ការប្រឡងឱ្យបានទទួលជោគជ័យ។

សម្រាប់ក្នុងដំណាក់ការប្រឡង សហភាពសហព័ន្ធយុវជនកម្ពុជាបានចូលរួមផ្តល់សេវាមើលថែលើមធ្យោបាយធ្វើដំណើរពេលមកប្រឡងរបស់បេក្ខជននៅគ្រប់មណ្ឌលទាំងអស់ ពោលគឺយាមកង់ ម៉ូតូ ធ្វើយ៉ាងណាកុំឱ្យបេក្ខជនចូលប្រឡងមានការព្រួយបារម្ភពីមធ្យោបាយរបស់ខ្លួន។ ឯកឧត្តម ហ៊ុន ម៉ានី បង្ហាញយ៉ាងដូច្នេះ ហើយលើសពីនេះ ឯកឧត្តម បញ្ជាក់ថា ថ្នាក់ដឹកនាំសហភាពសហព័ន្ធយុវជនកម្ពុជានៅតាមរាជធានី ខេត្ត ក៏បានរៀបចំន្លែងស្នាក់នៅ រួមទាំងការហូបចុកសម្រាប់សិស្សមកពីតំបន់ឆ្ងាយផងដែរ ដោយឥតគិតថវិកា។

ជាការកត់សម្គាល់ គិតចាប់ពីឆ្នាំ២០១៤មក ជារៀងរាល់ឆ្នាំ ស.ស.យ.ក តែងតែចូលរួមជាមួយក្រសួងអប់រំ យុវជន និងកីឡា ក្នុងការសម្របសម្រួលដល់ការប្រឡងសញ្ញាបត្រមធ្យមសិក្សាទុតិយភូមិ ដើម្បីធានាឱ្យការប្រឡងបានប្រព្រឹត្តទៅដោយ​រលូន និងទទួល​បានជោគជ័យ​​។ សមាជិក សមាជិកា​របស់ ស.ស.យ.ក នៅទូទាំងប្រទេស ​ក៏​បាននិង​កំពុង​ចូលរួម​ជួយ​សម្របសម្រួល​ដល់​បេក្ខជន​ប្រឡង​ ដែលមាន​សកម្មភាព​ផ្សេងៗ​ដូចជា រៀបចំ​កន្លែង​ផ្ញើ​កង់​ ម៉ូតូ ឥតគិតថ្លៃ ជួយ​រៀបចំ​ទីកន្លែងស្នាក់​នៅ ចែកទឹកសុទ្ធ និងភេសជ្ជៈ​ជាដើម​៕

ដោយ៖ ធឿន វ៉ាន់សុង

The post ឯកឧត្តម ហ៊ុន ម៉ានី បង្ហាញពីការចូលរួមដ៏សកម្មរបស់ ស.ស.យ.ក ដើម្បីគាំទ្រការប្រឡងបាក់ឌុប appeared first on Kampuchea Thmey Daily.

ព្រឹត្តិការណ៍អង្គរសង្ក្រាន្ត នឹងរៀបចំឡើងរយៈពេល ៣ថ្ងៃ ចាប់ពីថ្ងៃទី ១៤-១៦ ខែមេសា នៅលើទឹកដីអង្គរ នាខេត្តសៀមរាប ដើម្បីចូលរួមអបអរសាទរពិធីបុណ្យចូលឆ្នាំប្រពៃណីជាតិខ្មែរ ដែលជាព្រឹត្តិការណ៍វប្បធម៌ប្រចាំឆ្នាំ និងទាក់ទាញទេសចរជាតិ-អន្តរជាតិច្រើនបំផុត។

អនុប្រធានក្រុមការងារទំនាក់ទំនងសាធារណៈនៃព្រឹត្តិការណ៍អង្គរសង្ក្រាន្ត លោក សុខន តារាពី បានបង្ហើបឱ្យដឹងថា ព្រឹត្តិការណ៍អង្គរសង្ក្រាន្តឆ្នាំនេះ​ នឹងផ្តល់ភាពភ្ញាក់ផ្អើល កាន់តែអស្ចារ្យ ដោយនឹងមានការសម្តែង​ទស្សនីភាពមហោស្រពបុរាណខ្នាតធំ។

លោកថា ព្រឹត្តិការណ៍នេះ នឹងមានការលេងល្បែងប្រជាប្រិយខ្មែររហូតទៅដល់ជា ២០ ប្រភេទ ហើយល្បែងប្រជាប្រិយខ្លះយើងប្រហែលមិនធ្លាប់ឃើញ ឬមិនធ្លាប់លេង ប៉ុន្តែនៅអង្គរសង្ក្រាន្តយើងនឹងយកល្បែងទាំងនោះនាំឱ្យបងប្អូងលេង ហើយត្រូវតាមក្បួនខ្នាតដូនតាយើង ។ លោកបន្តថា៖«ព្រោះល្បែងប្រជាប្រិយខ្លះ យើងយកចេញពីចម្លាក់តាមប្រាសាទ និងមានការស្រាវជ្រាវតាមតំបន់តាមមូលដ្ឋាន»៕

The post ផ្ទាំងទស្សនីយភាពជាច្រើន ត្រៀមបង្ហាញនៅអង្គរសង្ក្រាន្ត appeared first on Kampuchea Thmey Daily.

គោលបំណងនៃការរៀបចំកិច្ចប្រជុំនាឱកាសនេះ គឺធ្វើឡើងដើម្បីបង្ហាញពីវឌ្ឍនភាពការងាររៀបចំរបស់ក្រុមការងារគ្រប់ចង្កោមនៃគណៈកម្មការរៀបចំព្រឹត្តិការណ៍អង្គរសង្រ្កាន្តឆ្នាំ២០២៥ ក៏ដូចជាពិនិត្យ ពិភាក្សា ឆ្លងយោបល់ និងបន្តរៀបចំផែនការដើម្បីអនុវត្តការងារត្រៀមឆ្ពោះទៅថ្ងៃព្រឹត្តិការណ៍ ធ្វើយ៉ាងណាឱ្យអង្គរសង្ក្រាន្តឆ្នាំ២០២៥ បានប្រព្រឹត្តទៅដោយរលូន និងជោគជ័យ។ កិច្ចប្រជុំនេះមានការចូលរួមពីសំណាក់ឯកឧត្តម លោកជំទាវ អស់លោក លោកស្រី ជាប្រធានចង្កោម ប្រធាន និងតំណាងក្រុមការងារ ព្រមទាំងសមាជិកសមាជិកាក្រុមការងាររៀបចំប្រមាណ ២០០ នាក់។

សូមជម្រាបជូនថា ការវិលត្រឡប់មកវិញនៃព្រឹត្តិការណ៍អង្គរសង្ក្រាន្តឆ្នាំ២០២៥ ក្រោមប្រធានបទ «ញញឹមសាទរសង្ក្រាន្តឆ្នាំថ្មី» គឺដើម្បីឆ្លើយតបទៅនឹងបំណងរបស់ប្រជាពលរដ្ឋជាច្រើនដែលតែងទន្ទឹងរង់ចាំវត្តមានព្រឹត្តិការណ៍នៅលើទឹកដីនៃខេត្តសៀមរាប។

ទន្ទឹមនឹងនេះ គោលបំណងចម្បងនៃការរៀបចំព្រឹត្តិការណ៍អង្គរសង្ក្រាន្ត គឺដើម្បីចូលរួមលើកស្ទួយមរតកវប្បធម៌អរូបី លើទីតាំងនៃមរតកវប្បធម៌រូបី ជាពិសេសបង្កើតនូវឱកាសជួបជុំ ផ្ដល់នូវបរិយាកាសសប្បាយរីករាយ ស្នាមញញឹម ដល់មហាគ្រួសារខ្មែរនាឱកាសបុណ្យចូលឆ្នាំថ្មីប្រពៃណីជាតិ។

នាសន្និសីទសារព័ត៌មាន ស្តីពីព្រឹត្តិការណ៍អង្គរសង្ក្រាន្ត ឯកឧត្តម ហ៊ុន ម៉ានី បានបញ្ជាក់ថាព្រឹត្តិការណ៍អង្គរសង្ក្រាន្ត ឆ្នាំ២០២៥ នៅខេត្តសៀមរាប នឹងមានភាពអស្ចារ្យ សប្បាយរីករាយលើសពីធម្មតា ដោយមានការយាងរបស់ព្រះករុណា ព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រកម្ពុជា ដើម្បីបួងសួងចម្រើនសេចក្តីសុខដល់កម្ពុជា។

ឯកឧត្តម ហ៊ុន ម៉ានី បានបន្តថា ៖«ព្រឹត្តិការណ៍អង្គរសង្ក្រាន្ត ឆ្នាំនេះ គឺមានប្រធានបទ«ញញឹមសាទរសង្ក្រាន្តឆ្នាំថ្មី» ប្រាកដណាស់ នឹងរៀបចំពិធីនេះឱ្យកាន់តែមានភាពទាក់ទាញថែមទៀត ដោយនឹងនាំយកនូវកម្មវិធីសប្បាយៗផ្សេងៗ ទៅតាមទំនៀមទម្លាប់ប្រពៃណីរបស់ខ្មែរ យកមកបង្ហាញដល់ប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិ បានទស្សនាដោយក្តីរីករាយ»៕

The post ស.ស.យ.ក. កំពុងរៀបចំផែនការឆ្ពោះទៅព្រឹត្តិការណ៍អង្គរសង្ក្រាន្ត appeared first on Kampuchea Thmey Daily.

លោកប្រធានសហភាពសហព័ន្ធយុវជនកម្ពុជា ខេត្តកំពង់ចាម បានលើកឡើងថា ឈាមមានសារៈសំខាន់ណាស់ដែលមនុស្សគ្រប់គ្នាត្រូវការ ជាពិសេសអ្នករងគ្រោះ ដោយសារជំងឺ និងឧបទ្ទវហេតុផ្សេងៗ ដែលត្រូវការឈាមជាចាំបាច់ ក្នុងការសង្គ្រោះអាយុជីវិត។ ហេតុនេះទើប ស.ស.យ.ក ខេត្តកំពង់ចាម និងប្រជាពលរដ្ឋទាំងអស់គ្នា រួមគ្នាដោយស្ម័គចិត្តបរិច្ចាគឈាមដើម្បីសង្គ្រោះអាយុជីវិតប្រជាពលរដ្ឋនៅទូទាំងប្រទេស។

លោកបន្តថា ថ្ងៃទី១៤ កុម្ភៈគឺជាទិវានៃការបង្ហាញអំពីក្តីស្រលាញ់របស់ខ្លួនជូនទៅកាន់អ្នកដទៃ ទាំងឪពុកម្តាយ មិត្តភក្តិ បងប្អូនសាច់ញាតិ ក៏ដូចជាមនុស្សដទៃនៅក្នុងសង្គម។ លោកចង់ឱ្យថ្ងៃទី១៤ ខែកុម្ភៈ រៀងរាល់ឆ្នាំនេះក្លាយទៅជាទិវានៃការផ្តល់ក្តីស្រលាញ់តាមរយៈការបង្ហាញអំពីសកម្មភាពសប្បុរសធម៌នានា ជាពិសេស គឺការបរិច្ចាកឈាមនេះតែម្តង។

ក្នុងឱកាសនោះដែរ លោកប្រធានស.ស.យ.ក ខេត្តកំពង់ចាម ក៏បានអំពាវនាវដល់ពលរដ្ឋទាំងអស់ដែលមានសមាចិត្តក្នុងការបរិច្ចាកឈាមសប្បុរសធម៌ ដើម្បីជួយសង្គ្រោះជីវិតមនុស្សដែលត្រូវការឈាមជាចាំបាច់ ចូលរួមផ្សព្វផ្សាយ ចែករំលែកបន្ត និងលើកទឹកចិត្តឱ្យមិត្តភក្តិ សាច់ញាតិ បងប្អូនផ្សេងៗទៀតដែលមិនទាន់បានបរិច្ចាកឈាម ឬមិនដែលបរិច្ចាកឈាម ឬធ្លាប់បរិច្ចាកឈាមរួចស្រេចហើយ ក៏សូមបន្តការបរិច្ចាកឈាមបន្តទៀត ដើម្បីបុព្វហេតុនៃការជួយសង្គ្រោះជីវិតមនុស្សបន្ថែមទៀត៕

The post សហភាពសហព័ន្ធយុវជនកម្ពុជាខេត្តកំពង់ចាម និងអ្នកស្ម័គ្រចិត្តជាច្រើននាក់ ចូលរួមបរិច្ចាគឈាមក្នុងថ្ងៃ១៤ កុម្ភៈ appeared first on Kampuchea Thmey Daily.

ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា សម្ដែងថ្វាយនូវកតញ្ញូកតវេទិតាធម៌ ថ្វាយព្រះមហាក្សត្របែបនេះ នៅក្នុងពិធីបើកពិព័រណ៌ព្រះបរមឆាយាល័ក្ខណ៍ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរព សក្ការៈដ៏ខ្ពង់ខ្ពស់បំផុត”  នាព្រឹកថ្ងៃទី២៧ ខែតុលា ឆ្នាំ ២០២៤។

 ឯកឧត្តម ហ៊ុន ម៉ានី បានសម្តែងនូវសេចក្តីសោមនស្សក្រៃលែងដែលបានចូលរួមជាមួយ សម្តេចរាជបុត្រី ព្រះអនុជ  លោក លោកស្រី យុវជនក្នុង “ពិធីបើក នាឱកាសនោះ។ 

ឯកឧត្តម ហ៊ុន ម៉ានី បាន ថ្លែងអំណរគុណចំពោះ ក្រសួង ព្រះបរមរាជវាំង, ក្រសួងព័ត៌មាន និងរដ្ឋបាលរាជធានីភ្នំពេញ ដែលបានផ្តល់កិច្ចសហការ គាំទ្រយ៉ាងស្អិតរមួត ដល់សហភាពសហព័ន្ធយុវជនកម្ពុជា ក្នុងការរៀបចំកម្មវិធីនេះ រហូតប្រព្រឹត្តទៅដោយភាពរលូន និងសម្រេចបានលទ្ធផលជារូបរាងឡើងនាពេលនេះ។

ឯកឧត្តម សង្កត់ធ្ងន់ថា សហភាពសហព័ន្ធយុវជនកម្ពុជាពិតជាមានមោទនភាពក្រៃលែង ដែលតែងតែ ទទួលបានការសព្វព្រះរាជហឫទ័យ និងព្រះបរមរាជានុញ្ញាតរៀបចំព្រះរាជពិធីថ្វាយ ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ជាបន្តបន្ទាប់ ដែលកាលពីឆ្នាំ២០១៦ សហភាពសហព័ន្ធយុវជនកម្ពុជា បានរៀបចំព្រះរាជពិធីថ្វាយ ព្រះពរសង្ក្រាន្តឆ្នាំថ្មី និងជាពិសេសនាឱកាសនេះ សហភាពសហព័ន្ធយុវជនកម្ពុជាទទួលបានព្រះបរមរាជានុញ្ញាតដ៏ខ្ពង់ខ្ពស់បំផុត រៀបចំ “ពិព័រណ៌ព្រះបរមឆាយាល័ក្ខណ៍” ដើម្បីថ្វាយព្រះពរអបអរសាទរខួប ២០ព្រះវស្សា នៃព្រះរាជពិធីគ្រងព្រះបរមរាជសម្បត្តិ របស់ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត។

សូមជម្រាបថាពិព័រណ៍ព្រះបរមឆាយាល័ក្ខណ៍នេះ នឹងប្រព្រឹត្តទៅរយៈពេល ២២ថ្ងៃ ចាប់ពី ថ្ងៃទី២៧ ខែតុលា រហូតដល់ថ្ងៃទី១៧ ខែវិច្ឆិកា ឆ្នាំ២០២៤ នៅទីតាំងសួនព្រះរាជបណ្តាំនេះផ្ទាល់តែម្តង ដែលមានការតាំងបង្ហាញអំពីព្រះរាជជីវប្រវត្តិ ព្រះរាជកាតព្វកិច្ច ស្នាព្រះហស្ត និងព្រះរាជសកម្មភាពសប្បុរសធម៌របស់ ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត។ 

 ពិព័រណ៍នេះផងដែរ ត្រូវបានរៀបចំឡើងក្នុងគោលបំណងបង្ហាញពីការដឹងគុណ ចំពោះព្រះគុណូបការៈ ព្រះគំរូវីរភាព និងព្រះរាជបូជនីយ៍កិច្ចដ៏ឧត្តុង្គឧត្តមរបស់ ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ដែលទ្រង់បាន បំពេញព្រះរាជតួនាទី និងព្រះរាជកិច្ចរបស់ព្រះអង្គយ៉ាងខ្ជាប់ខ្ជួនស្របតាមរដ្ឋធម្មនុញ្ញនៃ ព្រះរាជាណាចក្រកម្ពុជា ហើយព្រះអង្គតែងតែគង់ប្រថាប់ជាម្លប់ដ៏ត្រជាក់ត្រជុំ និង យកព្រះទ័យទុកដាក់យ៉ាងខ្លាំងចំពោះប្រជានុរាស្ត្ររបស់ព្រះអង្គនៅគ្រប់កាលៈទេសៈ ទាំងអស់។

ឯកឧត្តម ហ៊ុន ម៉ានី អះអាងថា សហភាពសហព័ន្ធយុវជនកម្ពុជា ប្តេជ្ញាបន្តចូលរួមទទួលខុសត្រូវចំពោះជោគវាសនា កម្ពុជា តាមរយៈការបន្តចូលរួមចំណែកជាមួយរាជរដ្ឋាភិបាលកម្ពុជាក្នុងបេសកកម្ម សប្បុរសធម៌ វប្បធម៌ និងសង្គម ក្នុងទិសដៅបន្តរក្សាការពារឲ្យបាននូវអធិបតេយ្យជាតិបូរណភាពទឹកដី ឯករាជ្យភាព សន្តិភាព ស្ថិរភាព សណ្តាប់ធ្នាប់សង្គម របបរាជានិយម អាស្រ័យរដ្ឋធម្មនុញ្ញ ការលើកស្ទួយលទ្ធិប្រជាធិបតេយ្យសេរីពហុបក្ស។

គួរឲ្យដឹងថា កម្មវិធីនេះ មានការអញ្ជើញចូលរួមពីសំណាក់ អនុប្រធាន ឯកឧត្តម លោកជំទាវ សមាជិកគណៈអចិន្ត្រៃយ៍ សមាជិក គណៈកម្មាធិការកណ្តាល រួមទាំងសមាជិក សមាជិកាជាច្រើនរូប៕

The post ឯកឧត្តម ហ៊ុន ម៉ានី ថ្វាយនូវកតញ្ញូកតវេទិតាធម៌ចំពោះ ព្រះករុណាដែលលះបង់ព្រះកាយពល និងព្រះបញ្ញាញាណ  សម្រាប់ប្រយោជន៍ជាតិ និងប្រជាជនកម្ពុជា appeared first on Kampuchea Thmey Daily.