សម្តេចមហាបវរធិបតី ហ៊ុន ម៉ាណែត មានប្រសាសន៍ថា យោងលើតម្រូវការចាំបាច់ចំពោះមុខ ដើម្បីធានានិរន្តរភាព និងប្រសិទ្ធភាពការងារ សម្រាប់ដំណើរការងាររបស់ក្រសួង និងរដ្ឋលេខាធិការដ្ឋានទាំងអស់ ចំណុះឱ្យរាជរដ្ឋាភិបាល ខ្ញុំសូមណែនាំ ក៏ដូចជារម្លឹកដាស់តឿន រដ្ឋមន្ត្រីទាំងអស់ អំពីកិច្ចការចាំបាច់ និងអាទិភាព ពាក់ព័ន្ធទៅនឹងការរៀបចំ និងដំណើរក្រសួង និងរដ្ឋលេខាធិការដ្ឋាននីមួយៗ ដោយយកចិត្តទុកដាក់ទៅលើកិច្ចការមួយចំនួន៖

ទី១ ចំពោះក្រសួង ដែលមិនទាន់បានធ្វើការបែងចែកភារកិច្ចឱ្យបានច្បាស់លាស់ ជូនដល់ថ្នាក់ដឹកនាំ ថ្នាក់រដ្ឋលេខាធិការ និងអនុរដ្ឋលេខាធិការ ត្រូវរស់រាន់ធ្វើឱ្យចប់នៅក្នុងសប្ដាហ៍ក្រោយនេះ ដើម្បីធានាដល់និរន្តរភាព និងចីរភាព ទាំងលើការដឹកនាំ ទាំងលើការងារអនុវត្តការងាររបស់ក្រសួងស្ថាប័ន។

ទី២ ក្នុងការកំណត់ការបែងចែកភារកិច្ច និងការទទួលខុសត្រូវជូនថ្នាក់ដឹកនាំ ជារដ្ឋលេខាធិការ ឬអនុរដ្ឋលេខាធិការ ត្រូវដាច់ខាតធានាឱ្យបាននូវការបែងចែកឱ្យបានច្បាស់លាស់រវាងការដឹកនាំខាងនយោបាយ និងការដឹកនាំខាងបច្ចេកទេស ដើម្បីធានាប្រសិទ្ធភាពស្ថាប័ន និងប្រសិទ្ធភាពការងារ ដោយចៀសវាងការលូកដៃទៅក្នុងការដឹកនាំផ្ទាល់លើការងាររបស់អង្គភាពជំនាញរបស់ក្រសួង ស្ថាប័ន ដោយមិនឆ្លង ឬដោយរំលងឋានានុក្រមបច្ចេកទេស។ ប្រសិនបើមានការរៀបចំប្រគល់ភារកិច្ចឱ្យមន្ត្រីថ្នាក់ដឹកនាំនយោបាយទទួលបន្ទុក លើការងារជួយនូវការងាររបស់នាយកដ្ឋាន ដាច់ខាតមិនត្រូវអនុញ្ញាតឱ្យមានការរំលងឋានានុក្រមដឹកនាំផ្នែកបច្ចេកទេស ដូចជាការរំលង ឬមិនឆ្លងថ្នាក់ដឹកនាំអគ្គនាយកដ្ឋាន ឬអគ្គលេខាការដ្ឋាននោះទេ។ ត្រូវចាត់ទុកថា ការធានានូវឯកភាព សាមគ្គីភាព និង សុខដមរមនីកម្មការងារ នៅក្នុងស្ថាប័ន រដ្ឋបាលសាធារណៈ ដើម្បីលើកកម្ពស់ប្រសិទ្ធភាពការងារ គឺជាកិច្ចការអាទិភាព ដែលយើងត្រូវយកចិត្តទុកដាក់ខ្ពស់ទាំងអស់គ្នា។

ទី៣ ចំពោះមុខ ត្រូវខិតខំធានាឱ្យបាន នូវនិរន្តរភាព និងស្ថេរភាព នៃការអនុវត្តការងារនៅក្នុងស្ថាប័ន ក្នុងករណីចាំបាច់ដែលត្រូវធ្វើវិចារណកម្មមុខងារ នៅក្នុងថ្នាក់បច្ចេកទេស និងរៀបចំមន្ត្រីឡើងវិញ ត្រូវគិតគូរលើកគោលការណ៍ជាមូលដ្ឋានចំនួន២ ដែលខ្ញុំធ្លាប់ណែនាំកន្លងមកនេះ។ ទី១ គឺ គោលការណ៍គុណាធិបតេយ្យ ដែលផ្អែកជាចម្បងលើគុណសម្បត្តិ ស្នាដៃការងារ សមត្ថភាព ចំណេះដឹង ទេពកោសល្យ និងក្រមសីលធម៌របស់មន្ត្រី ដើម្បីបង្កើនប្រសិទ្ធភាពការងារ និងទី២ គឺគោលការណ៍គុណធម៌ ដើម្បីធានាបានឯកភាព និងសាមគ្គីភាពផ្ទៃក្នុងស្ថាប័ន។ ទន្ទឹមនេះ ត្រូវយកចិត្តទុកដាក់រៀបចំចាត់តាំងប្រគល់ភារកិច្ចជូនមន្ត្រីដោយផ្នែកលើមូលដ្ឋាន ការប្រមូលផ្ដុំមន្ត្រីទាំងអស់ជាកម្លាំងសរុបរបស់ស្ថាប័ន តាមរយៈការធ្វើ សុខដុមរមនីកម្ម និងការរៀបចំឱ្យមន្ត្រីចាស់ដែលមានបទពិសោធន៍ និងជំនាញ និងមន្ត្រីថ្មីដែលជាកម្លាំងថ្មី បានរួមធ្វើការជាមួយគ្នាតាមពាក្យស្លោក ចាស់ស្គាល់ផ្លូវ ក្មេងមានកម្លាំង។ ធ្វើយ៉ាងនេះគឺសំដៅលើកកម្ពស់សមត្ថភាពស្ថាប័នឱ្យកាន់តែរឹងមាំ និងប្រកបដោយប្រសិទ្ធភាព៕

The post សម្តេចមហាបវរធិបតី ហ៊ុន ម៉ាណែត ណែនាំឱ្យរដ្ឋមន្រ្តី ប្រញាប់បែងចែកភារកិច្ចជូនថ្នាក់ដឹកនាំ appeared first on Kampuchea Thmey Daily.

សម្តេចតេជោនាយករដ្ឋមន្ត្រី បានលើកឡើងយ៉ាងដូច្នេះថា «ថ្ងៃនេះខ្ញុំព្រះករុណាខ្ញុំ សូមក្រាបថ្វាយបង្គំលា និងលាបងប្អូនជនរួមជាតិក្នុងរយៈពេលខ្លី ដើម្បីចូលរួមប្រជុំអាស៊ានសហរដ្ឋអាមេរិក តាមការអញ្ជើញរបស់ប្រធានាធិបតីសហរដ្ឋអាមេរិក»។

សម្តេចតេជោបញ្ជាក់ថា ការចាកចេញនេះ សម្ដេចនៅមិនទាន់អស់ចិត្ត ទៅនឹងការបំពេញកាតព្វកិច្ចក្នុងឋានៈជាប្អូនប្រុស ជាឪពុកមា ជាប្អូនថ្លៃ ជាជីតា ក្នុងការធ្វើបុណ្យសម្រាប់បងប្រុសជាទីស្រឡាញ់របស់សម្ដេចនៅឡើយទេ។ ប៉ុន្តែដោយសារតែភារកិច្ចរបស់ប្រទេសជាតិតម្រូវ សម្រេចត្រូវចេញដើម្បីបំពេញការងារឲ្យបានល្អ នៅក្នុងក្របខណ្ឌជាប្រធានអាស៊ានប្ដូរវេននៅឆ្នាំ ២០២២នេះ ដែលត្រូវធ្វើដោយខានមិនបាន។

បើតាមសម្ដេចតេជោ ហ៊ុន សែន នៅឯសហរដ្ឋអាមេរិក សម្តេចនឹងជួបជាមួយប្រជាពលរដ្ឋខ្មែរនៅទីនោះផងដែរ នៅថ្ងៃទី ១០ និងទី ១១ ខែឧសភាស្អែកនេះ (ពេលវេលានៅសហរដ្ឋអាមេរិក)។ បន្ទាប់ពីនេះទៅ សម្តេចនឹងត្រូវបំពេញការងារ ទៅតាមការរៀបចំរបស់ម្ចាស់ផ្ទះ គឺរដ្ឋាភិបាលសហរដ្ឋអាមេរិក ជាមួយនឹងវត្តមានរបស់សម្ដេច ក្នុងនាមជាប្រធានអាស៊ាន ហើយក៏នៅមានជំនួបផ្សេងៗទៀត ជាមួយថ្នាក់ដឹកនាំនៃបណ្ដាប្រទេសជាមិត្ត ដែលបានសន្យាជួបគ្នានៅទីនោះ ហើយសម្តេចក៏នឹងមានជំនួបជាមួយមិត្តភ័ក្កិ ដែលជាជនជាតិសហរដ្ឋអាមេរិក ដើម្បីធ្វើការងារមួយចំនួនផងដែរ៕

អត្ថបទ៖ កោះកែវ

The post សម្ដេចតេជោ ហ៊ុន សែន ចេញសារបញ្ជាក់អំពីកម្មវិធីមួយចំនួន នៅក្នុងកិច្ចប្រជុំកំពូលពិសេសអាស៊ាន-អាមេរិក appeared first on Kampuchea Thmey Daily.