ពិព័រណ៍នេះ រៀបចំឡើងដើម្បីបង្ហាញពីវត្តមាននៃវត្ថុសិល្បៈ បច្ចេកទេសនានា និងផ្តត់គំនិតផ្សេងៗរបស់ទំនៀមទម្លាប់ប្រពៃណីជនជាតិចិននៅក្នុងសង្គមខ្មែរ និងឆ្លុះបញ្ចាំងអំពីការយល់ឃើញរបស់ប្រជាជនខ្មែរចំពោះប្រជាជនចិន។ ជាមួយគ្នានេះ ក៏នឹងបង្ហាញពីទំនាក់ទាក់ទងផ្នែកវប្បធម៌រវាងប្រជាជនទាំងពីរ ដែលបន្តឥតដាច់តាំងពីសម័យបុរាណរហូតមកដល់ពេលបច្ចុប្បន្នតាមរយៈកិច្ចសហប្រតិបត្តិការក្នុងកិច្ចការគាំពារនិងស្រាវជ្រាវអំពីវប្បធម៌ខ្មែរ ផងដែរ។

សម្រាប់ការតាំងពិព័រណ៍មិនអចិន្រៃ្តយ៍នេះ មានកិច្ចសហការរៀបចំរវាងនាយកដ្ឋានសារមន្ទីរ ជាមួយបណ្ឌិតសភាបេតិកភណ្ឌចិន ដោយមានការចូលរួមពីក្រុមការងាររដ្ឋាភិបាលចិន-កម្ពុជាដើម្បីថែរក្សារមណីយដ្ឋានអង្គរ អាជ្ញាធរជាតិអប្សរា អាជ្ញាធរជាតិព្រះវិហារ ក្រុមការងារស្រាវជ្រាវព្រះខ័នកំពង់ស្វាយ (ដឹកនាំដោយសាស្រ្ដាចារ្យ Mitch Hendrickson) ដោយមានការគាំទ្រពីក្រសួងវប្បធម៌និងវិចិត្រសិល្បៈនិងស្ថានទូតសាធារណរដ្ឋប្រជាមានិតចិនប្រចាំនៅកម្ពុជា៕

The post កម្ពុជា-ចិន នឹងរៀបចំពិព័រណ៍វប្បធម៌ និងសិល្បៈឆ្លុះបញ្ចាំងពីទំនាក់ទំនងប្រទេសទាំងពីរ នៅសារមន្ទីរជាតិ appeared first on Kampuchea Thmey Daily.

ព្រឹត្តិការណ៍នេះ នឹងមានការដាក់តាំងពិព័រណ៍រូបគំនូរដ៏ទាក់ទាញរបស់ជីដូនចាស់ខ្មែរចំនួន ៨រូប ព្រមទាំងបង្ហាញពីការតស៊ូ ភាពធន់ ភាពស្រស់ស្អាត និងកេរដំណែលវប្បធម៌ខ្មែរដែលបានបន្សល់ទុកតាំងពីដូនតា។ ការតាំងពិព័រណ៍នេះ ដើម្បីបង្ហាញពីភាពជោគជ័យនៃគម្រោង Apsara Granny បង្កើតឡើងដោយក្រុមច្នៃប្រឌិត “Feel the Warmth” ដែលជាគំនិតផ្តួចផ្តើមរបស់អ្នកថតរូបរួមមាន Ken Bo, Hao Taing និង Raphael Pech។

គំនិតផ្តួចផ្តើមដ៏កក់ក្តៅនេះ បានផ្តល់ឱកាសដល់ស្ត្រីវ័យចំណាស់ក្នុងការភ្ជាប់ទំនាក់ទំនងឡើងវិញជាមួយនឹងមរតករបស់ពួកគាត់ដោយការស្លៀកសម្លៀកបំពាក់បុរាណ និងពាក់ម្កុដ​​ដ៏​ភ្លឺ​ចែងចាំង​របស់​អ្នករបាំ​អប្សរា។

អ្នកចូលរួមនឹង​មាន​ឱកាស​ជួប​ជាមួយជីដូនចាស់ដែលគ្រងឈុតអប្សរា និង​បាន​ស្តាប់​រឿង​ដ៏​បំផុស​គំនិត​របស់​ពួកគាត់។
ជីដូនចាស់ទាំងនោះ បានស៊ូទ្រាំនឹងការលំបាក ភាពក្រីក្រ និងភាពធន់ ដើម្បីការរស់នៅក្រោមឆ្លងកាត់សង្គ្រាម ប៉ុន្តែនៅតែលើកទឹកចិត្តដល់យុវជនជំនាន់ឱ្យចេះថែរក្សាមរតក និងវប្បធម៌ខ្មែរដ៏ផូរផង៕

The post ពិព័រណ៍អប្សរាដូនចាស់ នឹងធ្វើឡើងរយៈពេលមួយខែនៅសារមន្ទីរជាតិចាប់ពីថ្ងៃទី​១២​តុលា appeared first on Kampuchea Thmey Daily.

ការប្រគល់ជូននេះ ធ្វើឡើងនៅថ្ងៃទី៤ ខែកុម្ភៈ ឆ្នាំ២០២៥ ក្នុងឱកាសក្រុមអង្គការគាំពារកុមារខ្មែរ ដឹកនាំដោយលោកស្រី Harumi Sekiguchi លោកស្រី ចាន់ ស្រី និង លោក ព្រំ ប៊ុនធឿន ជួបសម្តែងការគួរសមជាមួយ លោកស្រីបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ នៅសារមន្ទីរជាតិកម្ពុជា។

ក្រសួងវប្បធម៌បញ្ជាក់ថា គោលបំណងនៃការផ្តល់ហូលពិតាននេះ គឺដើម្បីធានាបាននូវនិរន្តរភាពនៃការអភិរក្ស ថែរក្សា និងផ្សព្វផ្សាយពីភាពប្រណិត និងល្អឯក នៃមរតកតម្បាញសូត្រខ្មែរ។ លើសពីនោះ ក្រុមការងារចង់ផ្តល់លទ្ធភាពនិងភាពងាយស្រួលដល់ក្រុមអ្នកតម្បាញសូត្រខ្មែរ ដែលមានបំណងចង់សិក្សាឈ្វែងយល់ពីទម្រង់ និងក្បាច់រចនានានានៅលើផ្ទាំងសូត្រ អាចចូលមកពិនិត្យផ្ទាល់បាននៅសារមន្ទីរជាតិ ដោយទាក់ទងផ្ទាល់មកសារមន្ទីរជាមុន ដើម្បីក្រុមការងារអាចរៀបចំសមុច្ច័យទាំងនោះទាន់ពេលវេលា ដោយពុំចាំបាច់ចំណាយពេលវេលារង់ចាំ។

បន្ថែមពីនេះ ក្រសួងលើកឡើងថា៖ «សមុច្ច័យទាំង៤០ផ្ទាំងនេះ ជាបណ្តុំសមុច្ច័យដ៏សំខាន់ដែលបានឆ្លុះបញ្ចាំងពីភាពសម្បូរបែបនៃការបន្តមរតកបេតិកភណ្ឌអរូបីនៃវិស័យតម្បាញខ្មែរនារយៈពេលជាងមួយសតវត្សរ៍កន្លងមកនេះ។ ក្បាច់លម្អដែលមាននៅលើផ្ទាំងសូត្របានរំលេចពីទិដ្ឋភាពទូទៅនៃជីវភាពប្រចាំថ្ងៃនិងជំនឿនានាដែលខ្មែរគោរពប្រតិបត្តិ ជាពិសេសគឺផ្ទាំងរឿងទាក់ទងនឹងពុទ្ធប្រវត្តិ»។

តាមរយៈការប្រគល់ជូននេះ សារមន្ទីរជាតិ សង្ឃឹមថាសាធារណជន នឹងពិនិត្យលទ្ធភាពនៃការប្រគល់សមុច្ច័យផ្សេងៗទៀតមកសារមន្ទីរទុកជាសម្បត្តិជាតិ ដូចដែលក្រុមការងារជប៉ុននេះបានធ្វើនាថ្ងៃនេះ ដ្បិតសមុច្ច័យទាំងនោះ នឹងក្លាយទៅជាឯកសាររស់សម្រាប់ការផ្សព្វផ្សាយ និងសិក្សាឈ្វែងយល់មរតកអរូបីដែលដូនតាខ្មែរបានបន្សល់ទុក។

សូមជម្រាបថា លោកស្រី Harumi Sekiguchi ក្រុមការងារជប៉ុនដែលបានជូនហូលនេះទៅក្រួងវប្បធម៌ពេលនេះ ក៏ធ្លាប់ប្រគល់ហូលពិតានទៅសារមន្ទីរជាតិកម្ពុជាចំនួន២លើករួចហើយកាលពីឆ្នាំ២០១៤ ពោល គឺ លើកទី១ ចំនួន ២៣ផ្ទាំង និង លើកទី២សរុបចំនួន ២ផ្ទាំង៕

The post ក្រសួងវប្បធម៌ទទួលបានហូលពិតាន ៤០ផ្ទាំង សម្រាប់រក្សាទុកនៅសារមន្ទីរជាតិ appeared first on Kampuchea Thmey Daily.

Ishowspeed ដែលត្រូវបានគេស្គាល់ថាជាអ្នកបង្កើតមាតិការបរទេសល្បីឈ្មោះ បានមកកាន់ប្រទេសកម្ពុជាលើកទី២ បន្ទាប់ពីលោកបានមកកាលពីសប្តាហ៍មុនអំឡុងពេលកម្មវិធី Gumball 3000។ នៅរសៀលថ្ងៃទី២៣ នេះ Ishowspeed ក៏បានមកឡាយវីដេអូម្តងទៀតនៅភ្នំពេញ ហើយក៏បានចូលទស្សនាសារមន្ទីរជាតិកម្ពុជាផងដែរ ដោយមានយុវជនខ្មែរជាច្រើនបានស្វាគមន៍ និងរត់តាមលោកអំឡុងពេលឡាយផ្ទាល់។ តាមការកត់សម្គាល់ អំឡុងពេលនោះឃើញថា យុវជនខ្មែរមួយចំនួនដែលទៅជាមួយ Ishowspeed ហាក់ដូចជាបង្ហាញអាកប្បកិរិយាមិនសមរម្យ ដែលធ្វើឱ្យមានភាពរញ៉េរញ៉ៃ និងបាត់បង់មុខមាត់ប្រទេសជាតិផងដែរ។

បើនិយាយពីទង្វើរបស់យុវជនដែលផ្លោះរបងចូលសារមន្ទីរជាតិវិញ នៅក្នុងសេចក្តីជូនដំណឹងរបស់សារមន្ទីរជាតិកម្ពុជា បានសរសេរថា៖ “សកម្មភាពនេះ បានបង្ហាញពីកង្វះខាតនៃការគោរព និងឱ្យតម្លៃទៅលើបេតិកភណ្ឌរបស់ជាតិ។ លើសពីនេះ សកម្មភាពខាងលើ ក៏បានបង្កឱ្យមានការភ័យខ្លាច ការព្រួយបារម្ភពីសុវត្ថិភាព ព្រមទាំងរំខានដល់ភ្ញៀវទេសចរផ្សេងៗដែលកំពុងចូលទស្សនាសារមន្ទីរដូចគ្នា”។

សារមន្ទីរជាតិ ក៏បានអំពាវនាវដល់យុវជនមួយចំនួន និងអ្នកបង្កើតមាតិកាតាមប្រព័ន្ធបណ្តាញសង្គមជាតិ និងអន្តរជាតិនានា មេត្តាពិចារណា និងពង្រឹងឡើងវិញនូវឥរិយាបថគោរពដល់ទីតាំងសក្ការៈបេតិកភណ្ឌនានា ទៅតាមទំនៀមទំលាប់ប្រពៃណីខ្មែរ។

ជុំវិញករណីខាងលើនេះ​ប្រជាពលរដ្ឋខ្មែរមួយចំនួន បានបង្ហាញការមិនពេញចិត្តចំពោះយុវជនខ្មែរមួយចំនួនដែលបង្កឥរិយាបថមិនសមរម្យ លេងសើចជ្រុលហួសហេតុ ដែលអាចធ្វើឱ្យបាត់បង់មុខមាត់ប្រទេសជាតិ។ ករណីនេះ ក៏ក្លាយជាប្រធានបទមួយ ដែលត្រូវបានលើកយកមកវែកញែកពេញបណ្តាញសង្គមបន្ទាប់ពី Ishowspeed ឡាយវីដេអូចប់ ព្រមទាំងមានការរិះគន់ជាច្រើនលើទង្វើរបស់យុវជនមួយចំនួនអំឡុងពេលនោះដូចគ្នា៕

ដោយ៖ អុន ស្រីមាន

The post សារមន្ទីរជាតិ សោកស្តាយយ៉ាងខ្លាំងចំពោះយុវជនខ្មែរមួយចំនួនសម្រុកផ្លោះរបងចូលសារមន្ទីរពេល Ishowspeed ទៅទស្សនាទីនោះ appeared first on Kampuchea Thmey Daily.

ក្នុងចំណោមវត្ថុទាំង ១៤ នោះ មានវត្ថុពិចិត្រមួយចំនួនដែលត្រូវបានយកចេញពីប្រទេសកម្ពុជាទៅដូចជា៖ រូបប្រតិមាព្រះនាងឧមា ធ្វើពីថ្មភក់ ដែលត្រូវបានលួចយកចេញទៅក្នុងឆ្នាំ១៩៩៧, ព្រះសិរលោកេសូរ ធ្វើពីសំរិទ្ធដែលមានដងខ្លួនរក្សាទុកនៅក្នុងសារមន្ទីរជាតិ និងប្រតិមាព្រះលោកេសូរធ្វើពីសំរិទ្ធដែលសារមន្ទីរ MET ទិញពី លោក ឌូគ្លាស ឡាដហ្វដ (Douglas Latchford) ក្នុងឆ្នាំ១៩៩២។

ក្រៅពីនេះមានប្រតិមាផ្សេងៗទៀតធ្វើពីថ្មភក់ និងលោហធាតុចំនួន ១១ ផ្សេងទៀតក៏បានយាងដំណើរត្រលប់មកមាតុប្រទេសវិញដោយសុខសុវត្ថិភាព។

គួរបញ្ជាក់ថា ក្នុងឱកាសព្រះពិធីចម្រើនព្រះជន្ម សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល សារមន្ទីរជាតិកម្ពុជា សារមន្ទីរជាតិកម្ពុជា បានបើកពិព័រណ៍មួយស្តីពី «រូបចម្លាក់ខ្មែរដែលប្រគល់ត្រឡប់មកព្រះរាជាណាចក្រកម្ពុជាវិញ» រយៈពេល ៦ ខែ ចាប់ពីថ្ងៃទី១៨ ខែមិថុនា ដល់ថ្ងៃទី១៨ ខែធ្នូ ឆ្នាំ២០២៤៕

The post រតនសម្បត្តិជាតិកម្ពុជា ១៤ រូប ពីសារមន្ទីរ Met អាមេរិក បញ្ជូនមកដល់កម្ពុជា appeared first on Kampuchea Thmey Daily.

តាមរយៈ សេចក្តីជូនដំណឹង នៅថ្ងៃទី១៧ ខែមិថុនា ឆ្នាំ២០២៤ នេះ បានបញ្ជាក់ថា ក្នុងឱកាសព្រះពិធីចំរើនព្រះជន្ម សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល សារមន្ទីរជាតិកម្ពុជា មានកិត្តិយសជម្រាបជូនសារធារណជនមេត្តាជ្រាបថា សារមន្ទីរជាតិកម្ពុជានឹងបើកពិព័រណ៍មួយស្តីពី “រូបចម្លាក់ខ្មែរដែលប្រគល់ត្រឡប់មកព្រះរាជាណាចក្រកម្ពុជាវិញ” រយៈពេល ៦ខែ ចាប់ពីថ្ងៃអង្គារ ទី១៨ ខែមិថុនា ដល់ថ្ងៃពុធ ទី១៨ ខែធ្នូ ឆ្នាំ២០២៤។

គួរបញ្ជាក់ថា ព្រះរាជពិធីបុណ្យចម្រើនព្រះជន្ម សម្តេចព្រះមហាក្សត្រី សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល គម្រប់ព្រះជន្ម ៨៨ ព្រះវស្សា យាងចូល ៨៩ ព្រះវស្សា នឹងប្រព្រឹត្តទៅនៅថ្ងៃអង្គារ ១២កើត ខែជេស្ឋ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៨ ខែមិថុនា ឆ្នាំ២០២៤ នេះ។

ស្ថិតក្នុងព្រះបរមវរោកាសដ៏មហាជ័យមង្គលាភិរម្យថ្លៃថ្លានេះ ទូលព្រះបង្គំ យើងខ្ញុំទាំងអស់គ្នា សូមអភិវន្ទលំឱនកាយវាចាចិត្ត ក្រាបបង្គំសម្តែងនូវកតញ្ញូកតវេទិតាធម៌ដ៏ជ្រាលជ្រៅ ថ្វាយចំពោះ សម្តេចព្រះមហាក្សត្រី ព្រះវររាជមាតាជាតិខ្មែរ ដែល ជានិច្ចកាលតែងតែយកព្រះទ័យទុកដាក់អស់ពីព្រះកាយពល និងព្រះបញ្ញាញាណ បំពេញព្រះរាជសកម្មភាពដ៏វិសេសវិសាលបំផុត ក្នុងវិស័យអប់រំសិក្សាធិការ សង្គហភាព សុខុមាលភាព វប្បធម៌ ប្រពៃណី ទំនៀមទម្លាប់ និងសាសនា ជាពិសេសព្រះរាជកិច្ចដ៏ ឧត្តង្គឧត្តមក្នុងព្រះរាជតួនាទីជា “ព្រះប្រធានកិត្តិយសកាកបាទក្រហមកម្ពុជា និងជាព្រះប្រធានកិត្តិយស នៃក្រុមប្រឹក្សាជាតិកម្ពុជា ដើម្បីស្ត្រី” ដែលបានរួមចំណែកយ៉ាងធំធេងក្នុងបុព្វហេតុមនុស្សធម៌ និងការលើកកម្ពស់សិទ្ធិស្ត្រីខ្មែរ ឱ្យកាន់តែប្រសើរឡើង។

ទូលព្រះបង្គំ យើងខ្ញុំទាំងអស់គ្នា សូមលំឱនកាយវាចាចិត្ត លើកហត្ថប្រណម្យ បួងសួងដល់គុណបុណ្យព្រះរតនត្រ័យ កែវ ទាំងបី វត្ថុស័ក្តិសិទ្ធិទាំងឡាយក្នុងលោក ទេវតាថែរក្សាទឹកដីនៃព្រះរាជាណាចក្រកម្ពុជា ឫទ្ធិបារមីទេវតាថែរក្សាព្រះមហាស្វេតច្ឆត្រ និងបុណ្យ បារមីនៃដួងព្រះវិញ្ញាណក្ខន្ធអតីតព្រះមហាក្សត្រ-ព្រះមហាក្សត្រីយានីខ្មែរគ្រប់ព្រះអង្គ សូមជួយបីបាច់ថែរក្សាអភិបាល ប្រោះព្រំ ព្រំ ព្រះសព្ទសាធុការពរជ័យគ្រប់ប្រការ ថ្វាយជូន សម្តេចព្រះមហាក្សត្រី ព្រះវររាជមាតាជាតិខ្មែរ សូមបានសម វាយព្រះពុទ្ធពរបួនប្រការតី អាយុ វណ្ណៈ សុខៈ និងពលៈ ជានិច្ចនិរន្តរ៍កុំបីឃ្លៀងឃ្លាតឡើយ៕​

The post ពិព័រណ៍ រូបចម្លាក់ខ្មែរដែលប្រគល់ត្រឡប់មកព្រះរាជាណាចក្រកម្ពុជាវិញ appeared first on Kampuchea Thmey Daily.

លោក ឆាយ វិសុទ្ធ បញ្ជាក់ថា លោហៈកំពូលប្រាសាទបន្ទាយឆ្មារ គឺជា សំរឹទ្ធទឹបទឹកមាស ពោលគឺមិនមែនជាមាសសុទ្ធទេ។ លោកបានរំលឹកថា លោហៈកំពូលប្រាសាទនេះ ត្រូវបានរកឃើញនៅ ថ្ងៃទី២៥ ខែសីហា ឆ្នាំ២០១១ នៅពេលជួសជុលប្រាសាទ។

លោក ឆាយ វិសុទ្ធ មានប្រសាសន៍បន្តថា៖ “ពេលឃើញស្នាមប្រលាក់កប់ក្នុងដីសើមនាំឱ្យលោហៈប្រែពណ៌ដូចមាស នាំឱ្យមានការសន្និដ្ឋានថា កំពូលនេះជាដុំមាសសុទ្ធ ប៉ុន្តែក្រុមការងារដោយសហការជាមួយក្រុមបរទេសដែលជួយជួសជុលប្រាសាទ បានបញ្ជាក់ថា កំពូលនេះជាលោហៈសំរិទ្ធិទឹបទឹកមាស ឬស្រោបទឹកមាស ដោយមានការទទួលស្គាល់អន្តរភាគីត្រឹមត្រូវ”។

ប្រធាននាយកដ្ឋានសារមន្ទីរ រូបនេះ សំណូមពរកុំបន្តចែករំលែកថា មានការលួចដូរ ឬលក់ឱ្យបរទេសទៀត។ លោកបញ្ជាក់ថា កាលមុនវិបត្តិកូវីដ-១៩ អំឡុងឆ្នាំ២០១៧ ដល់ ២០១៩ មានស្ថាប័នសារមន្ទីរនៅអឺរ៉ុប បានខ្ចីវត្ថុបុរាណខ្មែរ ទាំងលោហៈ ភាជន៍ ថ្ម ជាង មួយរយមុខ ដើម្បីតាំងពិព័រណ៍ចល័ត។ លោកបញ្ជាក់ថា បរទេស គេមានជំនាញ គេស្គាល់វត្ថុបុរាណពិត ហើយគេមិនយកវត្ថុក្លែងក្លាយទៅតាំងពិព័រណ៍ និងហ៊ានធ្វើបណ្ណធានាទឹកប្រាក់លានដុល្លារទេ។

ភាគី កម្ពុជា និង ស្ថាប័នសារមន្ទីរអឺរ៉ុប បានឯកភាពចុះកិច្ចព្រមព្រាងជាមួយគ្នានៅឆ្នាំ២០២១ ដោយបាន និងកំពុងរៀបចំតាំងពិព័រណ៍វត្ថុបុរាណកម្ពុជាទាំងនោះដូចជា៖

ទីតាំងទី១ នៅសារមន្ទីរ កាលីហ្វ័រញ៉ា សហរដ្ឋអាមេរិក ខែកុម្ភៈ ឆ្នាំ២០២២

ទីតាំងទី២ នៅ សារមន្ទីរ UTAH សហរដ្ឋអាមេរិក ពីខែតុលា ឆ្នាំ២០២២ ដល់ ខែមេសា ឆ្នាំ២០២៣

ទីតាំងទី៣ នៅ សារមន្ទីរ Royal BC ប្រទេសកាណាដា

ទីតាំងទី៤ នៅ សារមន្ទីរ RAM ប្រទេសកាណាដា ពីខែកុម្ភៈ ដល់ កក្កដា ឆ្នាំ២០២៤ នេះ

ការផ្ដល់វត្ថុបុរាណកម្ពុជាទៅពិព័រណ៍នៅបរទេសនេះ ដើម្បីទាក់ទាញជនបរទេសចូលមកកម្ពុជាដើម្បីទស្សនាប្រាសាទនានាផ្ទាល់។ រាល់ពេលយកវត្ថុបុរាណខ្មែរទៅតាំងពិព័រណ៍នោះ តែងមានអ្នកជំនាញកម្ពុជាទៅតាមពិនិត្យការវេចខ្ចប់ ដឹកជញ្ជូន ដំឡើងជាដើម។

លោក ឆាយ វិសុទ្ធ លើកឡើងថា ការបង្ហោះព័ត៌មាន ចែករំលែក និងបញ្ចេញមតិថា មានការលួចលក់វត្ថុបុរាណដែលនាំឱ្យប៉ះពាល់កេរ្តិ៍ឈ្មោះស្ថាប័ន និងរាជរដ្ឋាភិបាល។ លោកសូមថ្លែងអំណរគុណដល់សាធារណជនដែលបង្ហាញការព្រួយបារម្ភទាក់ទងការបាត់បង់វត្ថុបុរាណជាតិ ប៉ុន្តែសូមផ្ទៀងផ្ទាត់ព័ត៌មានមុនជឿ ចែករំលែកបន្ត និងបញ្ចេញមតិរិះគន់នានា។ ប្រសិនចង់បានព័ត៌មានលម្អិត អាចមកសួរ និងទទួលនៅសារមន្ទីរជាតិបាន។

គួរបញ្ជាក់ថា ប្រាសាទបន្ទាយឆ្មារ ត្រូវបានកសាងឡើងពីចុងសតវត្សរ៍ទី១២ ដល់ដើមសតវត្សរ៍ទី១៣ ក្នុងរជ្ជកាលព្រះបាទជ័យវរ្ម័នទី៧ ដើម្បីឧទ្ទិសដល់បុត្រា និងមេទ័ព ៤ រូបរបស់ព្រះអង្គ​ ដែលបានពលី​នៅក្នុងសមរភូមិដេញចាមនៅឆ្នាំ១១៧៧។ ប្រាសាទបន្ទាយឆ្នា មានទីតាំងស្ថិតនៅ ភូមិបន្ទាយឆ្មារ ស្រុកពួក ខេត្តបន្ទាយមានជ័យ និងមានចម្ងាយប្រមាណ ៧ គីឡូម៉ែត្រខាងជើងពីទីប្រជុំជនខេត្តបន្ទាយមានជ័យ៕

The post តើ កំពូលប្រាសាទបន្ទាយឆ្មារជាដុំមាស ហើយត្រូវបានលួចចម្លង និងលក់ឱ្យបរទេស មែន ឬទេ? appeared first on Kampuchea Thmey Daily.

លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានលើកឡើងនៅក្នុងកម្មវិធីថា ការបញ្ជូនប្រតិមាសំរិទ្ធដ៏វិចិត្រនេះ គឺជាគម្រោងសហប្រតិបត្តិការផ្នែកវិទ្យាសាស្ត្រ និងបច្ចេកទេសរវាងកម្ពុជា និងបារាំង បានឯកភាពគ្នាតាំងពីឆ្នាំ២០១៩ម្ល៉េះ ប៉ុន្តែត្រូវបានពន្យាពេលដោយសារតែវិបត្តិកូវីដ ១៩។ គម្រោងនេះមានគោលបំណងក្នុងការជួសជុល អភិរក្ស និងសិក្សាវិភាគសមាសភាពផ្សំលើប្រតិមាព្រះនរាយណ៍ផ្ទុំ នៅវិទ្យាស្ថានក្នុងប្រទេសបារាំង ដើម្បីធ្វើការឈ្វេងយល់បន្ថែមពីបច្ចេកទេសផ្សេងៗ។ ក្រៅពីការងារវិភាគបច្ចេកទេសនេះ ក្រុមជំនាញនឹងសាកល្បងផ្គុំបំណែកទាំង៣៩ ដែលបានដាច់ចេញពីដងខ្លួនអស់រយៈកាលជិត១០០០ឆ្នាំ និងរៀបចំដំឡើងជា 3D ដើម្បីបានដឹងពីទីតាំងបំណែកទាំងនោះ។

លោកស្រីបាននិយាយថា៖ «ក្រោយគម្រោងអភិរក្ស និងវិភាគស្រាវជ្រាវនេះបញ្ចប់ ប្រតិមាដ៏វិចិត្រនេះនឹងត្រូវដាក់តាំងបង្ហាញក្នុងពិព័រណ៍មិនអចិន្ត្រៃយ៍នៅសារមន្ទីរសិល្បៈអាស៊ីហ្គីមេ ហើយការដាក់តាំងនេះ និងមានបន្ថែមរូបចម្លាក់អំពីសំរិទ្ធចំនួន១២៦ផ្សេងទៀត ដែលខ្ចីបន្ថែមពីសារមន្ទីរជាតិកម្ពុជា នាដំណាក់កាលទី២»។ លោកស្រីបន្ថែមថា ពិព័រណ៍ប្រតិមានេះនឹងរៀបចំនៅប្រទេសបារាំងអំឡុងពាក់កណ្តាលឆ្នាំ២០២៥ ក្រោយពីបញ្ចប់ពិព័រណ៍នៅទីនោះ ប្រតិមានេះនឹងត្រូវបន្តដំណើរទៅដាក់តាំងនៅសហរដ្ឋអាមេរិកចំនួន៣ទីតាំងបន្ថែមទៀត។ ការធ្វើដំណើររបស់ប្រតិមាដ៏វិចិត្រទៅកាន់ឆាកអន្តរជាតិនេះ ប្រៀបដូចជាការនាំយកទេពកោសល្យល្អឯកនៃបច្ចេកទេសសិតលោហៈដ៏អស្ចារ្យរបស់កម្ពុជា ទៅផ្សព្វផ្សាយឱ្យបានទូលំទូលាយនៅលើឆាកអន្តរជាតិផងដែរ។

ចំណែកលោក ឆាយ វិសុទ្ធ ប្រធាននាយកដ្ឋានសារមន្ទីរជាតិបានលើកឡើងថា គម្រោងនេះត្រូវបានចំណាយពេលជាង៥ឆ្នាំមកហើយ ដើម្បីភ្ជាប់ទំនាក់ទំនងរួមគ្នាជាមួយបារាំងនិងកម្ពុជា ដោយបានចុះហត្ថលេខាចុងឆ្នាំ២០១៩ ប៉ុន្តែត្រូវបានផ្អាកដោយជំងឺរាតត្បាត បន្ទាប់មកក៏បានភ្ជាប់ទំនាក់ទំនងម្តងទៀតនៅចុងឆ្នាំ២០២៣។ លោកបន្តថា គម្រោងនេះ ផ្តល់អត្ថប្រយោជន៍យ៉ាងធំធេងសម្រាប់ក្រសួង និងសារមន្ទីរជាតិ ដោយគម្រោងនេះបានជួយផ្សព្វផ្សាយស្នាដៃសិល្បៈខ្មែរលើឆាកអន្តរជាតិ។ ទន្ទឹមនោះ ក៏ផ្តល់អត្ថប្រយោជន៍ដល់ការបណ្តុះបណ្តាលមួយផ្នែកដល់អ្នកជំនាញកម្ពុជាក្នុងការ ជួសជុសស្រាវជ្រាវលោហៈធាតុផងដែរ៕

The post ប្រតិមាព្រះនរាយណ៍ផ្ទុំ នឹងយកទៅប្រទេសបារាំងដើម្បីជួសជុស និងរៀបចំពិព័រណ៍ឆ្នាំក្រោយ appeared first on Kampuchea Thmey Daily.