សាលី អ៊ូមើត Archives - Kampuchea Thmey Daily

ទីលានហ្វឹកហាត់ម៉ូតូទឹកទំហំ ១១ហិចតានេះរឹតតែអំណោយផលដល់ការរៀបចំព្រឹត្តិការណ៍ធំៗ

Sina Noun — Fri, 22 Aug 2025 07:29:02 +0000

អគ្គលេខាធិការសហព័ន្ធកីឡាម៉ូតូទឹកកម្ពុជា ថាទីលានហ្វឹកហាត់ទំហំ ១១ហិចតា នៅឯស្រុកស្នូល ខេត្តក្រចេះ នេះរឹតតែអំណោយផលដល់ការរៀបចំព្រឹត្តិការណ៍ប្រកួតធំៗនៅថ្ងៃខាងមុខឆាប់ៗនេះ។

លោក មាស ម៉ាប់ អគ្គលេខាធិការសហព័ន្ធកីឡាម៉ូតូទឹកកម្ពុជា បានឲ្យដឹងថា ទីលានហ្វឹកហាត់ឯខេត្តក្រចេះសាងសង់ស្ទើររួចរាល់ទាំងស្រុងទៅហើយ។ ចំណែកកីឡាករជម្រើសជាតិ និងយុវជនថ្នាល នឹងមកហ្វឹកហាត់នៅកម្ពុជាវិញអំឡុងខែធ្នូ ២០២៥ ឬដើមឆ្នាំ២០២៦ ខាងមុខ។

ទីលាននេះមិនត្រឹមតែសម្រាប់ហ្វឹកហាត់នោះទេគឺវាអំណោយផលខ្លាំងដល់ការរៀបចំព្រឹត្តិការណ៍ប្រកួតធំៗបានផងដែរ។ សហព័ន្ធគ្រោងនឹងរៀបចំជាការប្រកួតអបអរសារទរថ្ងៃបើកឲ្យប្រើប្រាស់ និងហ្វឹកហាត់នៅពេលឆាប់ៗនេះជូនអ្នកគាំទ្របានទស្សនាកម្សាន្តសប្បាយ។

ទីតាំងផ្សេងៗនៃកន្លែងហ្វឹកហាត់នៅក្រចេះ

តំណាងសហព័ន្ធម៉ូតូទឹកសូមអំពាវនាវដល់ស្ថាប័នពាក់ព័ន្ធទាំងអស់ជួយសម្រួលដល់ការធ្វើលិខិតស្នាមនៃការផ្ទេរពីថៃមកកម្ពុជា និងការដឹកជញ្ជូនសម្ភារហ្វឹកហាត់ដូចជាម៉ូតូ គ្រឿងជួសជុល ឬសម្ភារសំខាន់ៗមួយចំនួនទៀតដើម្បីឲ្យដំណើរការកាន់តែរលូនឆាប់បានចូលហ្វឹកហាត់។

ទីតាំងផ្សេងៗនៃកន្លែងហ្វឹកហាត់នៅក្រចេះ

បញ្ជាក់ដែរថា លោក សាលី អ៊ូមើត ដែលជាអនុប្រធានសហព័ន្ធកីឡាម៉ូតូទឹកកម្ពុជា បានចំណាយថវិកា និងធនធានផ្ទាល់ខ្លួនបង្កើតជាទីលានហ្វឹកហាត់ស្ដង់ដារមួយនៅឯស្រុកស្នូល ខេត្តក្រចេះ ដែលមានទំហំផ្ទៃដីរហូតដល់ ១១ហិចតា។ ក្រៅពីទីលានហ្វឹកហាត់ហើយនោះក៏មានអគារហូបចុក ស្នាក់នៅ និងកន្លែងហាត់រាងកាយ ទីលានបាល់ទាត់ សម្រាប់កម្សាន្តលេងថែមទៀតផង៕

ទិដ្ឋភាពទីលានហ្វឹកហាត់

អត្ថបទដោយ៖ នូន ស៊ីណា

The post ទីលានហ្វឹកហាត់ម៉ូតូទឹកទំហំ ១១ហិចតានេះរឹតតែអំណោយផលដល់ការរៀបចំព្រឹត្តិការណ៍ធំៗ appeared first on Kampuchea Thmey Daily.

ទីតាំងហ្វឹកហាត់ម៉ូតូទឹករបស់ សាលី អ៊ូមើត ដែលសាងសង់លើដីរាប់ហិចតាដំណើរការដល់ណាហើយ…

Sina Noun — Wed, 06 Aug 2025 10:12:13 +0000

ជើងខ្លាំងផ្នែកកីឡាម៉ូតូទឹក (Jetski) កីឡាករ សាលី អ៊ូមើត សាងសង់ទីលានសម្រាប់ហ្វឹកហាត់កីឡាមួយនេះលើទំហំដី ១១ ហិចតា នៅឯស្រុកស្នូល ខេត្តក្រចេះ រហូតមកដល់ពេលនេះបានប្រមាណ ៨០% និងអាចដំណើរការហ្វឹកហាត់នៅឆ្នាំក្រោយបាន។

កីឡាករ សាលី អ៊ូមើត និងសម្ដេច តេជោ

សាលី អ៊ូមើត បានឲ្យដឹងថា ការហ្វឹកហាត់ប្រភេទកីឡាម៉ូតូទឹកនេះនៅឯក្រៅប្រទេសត្រូវចំណាយច្រើនលើការស្នាក់នៅហូបចុក និងធ្វើដំណើរជាដើម។ ប៉ុន្តែបើមានទីលានហ្វឹកហាត់នៅក្នុងស្រុកគឺល្អ និងជួយកាត់បន្ថយបានច្រើនចំពោះកីឡាករដែលចង់ហ្វឹកហាត់។

កីឡាករ សាលី អ៊ូមើត

ម្ចាស់មេដាយមាសអន្តរជាតិជាច្រើនគ្រឿងរូបនេះបន្ថែមទៀតថា ទីលានដែលកំពុងសាងសងនេះមិនមែនសម្រាប់រូបខ្លួននោះទេគឺសម្រាប់ប្រទេសកម្ពុជា និងសម្រាប់យុវជនជំនាន់ក្រោយដែលមានបំណងចង់ហ្វឹកហាត់ ឬចង់ក្លាយជាកីឡាករម៉ូតូទឺកអាជីពអាចមកហ្វឹកហាត់នៅទីនោះបាន។ ទីលានដែលកំពុងជីកធ្វើជាបឹងនេះមានទំហំ ១១ហិចតា និងអាចចូលហ្វឹកហាត់បាននៅឆ្នាំក្រោយនេះហើយសម្រាប់ត្រៀមការប្រកួតផ្សេងៗ។

ទីតាំងកំពុងសាងសង់

បញ្ជាក់ដែរថា ទីតាំងហ្វឹកហាត់ដែលកីឡាករ សាលី អ៊ូមើត កំពុងសាងសង់នេះគឺនៅភូមិគ្រញ៉ូងសែនជ័យ ឃុំគ្រញ៉ូងសែនជ័យ ស្រុកស្នូល ខេត្តក្រចេះ។ ទីតាំងហ្វឹកហាត់នេះមានទំហំដីរហូតដល់ ១១ហិចតាឯណោះដែលវានឹងក្លាយជាទីលានបណ្ដុះធនធានកីឡាម៉ូតូទឹកដ៏សំខាន់នៅពេលខាងមុខ។ សាលី អ៊ូមើត ជាវីរះកីឡាករដែលមានស្នាដៃរបស់ប្រទេសកម្ពុជា រូបគេធ្លាប់ឈ្នះមេដាយមាស ពានរង្វាន់ គ្រប់កម្រិតលើពិភពលោកជូនជាតិមាតុភូមិ។ រូបគេជាធនធានថ្នាក់ដឹកនាំ ជាគ្រូ ជាកីឡាករ ដ៏សំខាន់ផងក្នុងការពង្រីកផ្សព្វផ្សាយកីឡាមួយនេះ៕

អត្ថបទដោយ៖ នួន ស៊ីណា

The post ទីតាំងហ្វឹកហាត់ម៉ូតូទឹករបស់ សាលី អ៊ូមើត ដែលសាងសង់លើដីរាប់ហិចតាដំណើរការដល់ណាហើយ… appeared first on Kampuchea Thmey Daily.

សាលី អ៊ូមើត៖ ខ្ញុំធ្វើឲ្យពិភពលោកស្គាល់កម្ពុជារួចហើយតទៅនេះជាពេលវេលាអាចចូលនិវត្តន៍បានហើយ

Sina Noun — Wed, 04 Jun 2025 02:05:25 +0000

កីឡាករឆ្នើមលំដាប់អន្តរជាតិ សាលី អ៊ូមើត ថាលោកនៅជាមួយកីឡាម៉ូតូទឹកនេះប្រហែលជាង ១៨ឆ្នាំ និងធ្វើឲ្យពិភពលោកស្គាល់កម្ពុជាតាមរយៈមេដាយពិភពលោកគ្រប់កម្រិតរួចហើយ ដូច្នេះជាពេលវេលាសមល្មមមួយដែលអាចចូលនិវត្តន៍បានហើយ។

រូបភាពលើហ្វេសបុក សាលី អ៊ូមើត

កីឡាករ សាលី អ៊ូមើត បានឲ្យដឹងថា គិតមកដល់ពេលនេះគឺលោកនៅជាមួយកីឡាម៉ូតូទឹកនេះអស់ជាង ១៨ឆ្នាំមកហើយ បង្កើតស្នាដៃ និងឈ្នះមេដាយកម្រិតពិភពលោកជាច្រើនរួចមកហើយដែរ។ មានបរទេសរាប់រយប្រទេសដែលស្គាល់កម្ពុជា និងមើលឃើញទង់ជាតិកម្ពុជាតាមរយៈការប្រកួតជាង ១៨ឆ្នាំមកនេះ។

រូបភាពលើហ្វេសបុក សាលី អ៊ូមើត

ជើងខ្លាំងខាងម៉ូតូទឹករបស់កម្ពុជាខាងលើបន្ថែមទៀតថា ពេលវេលានៅជាមួយកីឡាមួយនេះក៏យូរឆ្នាំមកហើយដែរ រួមផ្សំមិនសូវមានការលើកទឹកចិត្តផងនោះ និងមិនសូវមានការរួបរួមក្នុងការជួយអភិវឌ្ឍន៍ផងនោះទើបធ្វើឲ្យរូបលោករឹតតែចង់ដកខ្លួនហើយចូលនិវត្តន៍បែបនេះ។

រូបភាពលើហ្វេសបុក សាលី អ៊ូមើត

ម្ចាស់មេដាយមាសកីឡាអាស៊ីនៅប្រទេសឥណ្ឌូណេស៊ីខាងលើនេះបន្ថែមទៀតថា បញ្ហាមួយទៀតលោកក៏អស់លទ្ធភាពក្នុងការជំរុញអភិវឌ្ឍន៍ និងសម្របសម្រួលលើការប្រកួតផ្សេងៗហើយដែរ។ លោកអស់លទ្ធភាពត្រឹមនេះហើយ ដូច្នេះដូចធ្លាប់បានលើកឡើងថាបន្ទាប់ពីសម្រេចក្ដីបំណងលើកមេដាយពិភពលោកបង្ហាញទង់ជាតិខ្មែរឲ្យគេស្គាល់ហើយនោះគឺសមល្មមចូលនិវត្តន៍ហើយដែរ។

រូបភាពលើហ្វេសបុក សាលី អ៊ូមើត

បញ្ជាក់ដែរថា គម្រោងនៃការចូលនិវត្តន៍របស់កីឡាករ សាលី អ៊ូមើត ពីកីឡាម៉ូតូទឹកនេះអាចនឹងធ្វើឡើងបន្ទាប់ពីបញ្ចប់ការប្រកួតស៊ីហ្គេម លើកទី៣៣ ឆ្នាំ២០២៥ នៅប្រទេសថៃ។ សាលី អ៊ូមើត ជាជើងខ្លាំងរបស់កម្ពុជាដែលមានបទពិសោធកម្រិតពិភពលោក។ កីឡាកររូបនេះធ្លាប់ប្រកួតកីឡាម៉ូតូទឹកស្ទើរគ្រប់ប្រទេស គ្រប់កម្មវិធីទៅហើយនៅលើពិភពលោក។ រូបគេក៏ជាម្ចាស់មេដាយពិភពលោក និងជាម្ចាស់មេដាយមាសកីឡាស៊ី នៅប្រទេសឥណ្ឌូណេស៊ី ជូនកម្ពុជាផងដែរ៕

សាលី អ៊ូមើត និងសម្ដេចតេជោ

អត្ថបទដោយ៖ នួន ស៊ីណា

The post សាលី អ៊ូមើត៖ ខ្ញុំធ្វើឲ្យពិភពលោកស្គាល់កម្ពុជារួចហើយតទៅនេះជាពេលវេលាអាចចូលនិវត្តន៍បានហើយ appeared first on Kampuchea Thmey Daily.

សាលី អ៊ូមើត Archives - Kampuchea Thmey Daily

ទីលាន​ហ្វឹកហាត់​ម៉ូតូទឹក​ទំហំ​ ១១ហិចតា​នេះ​រឹតតែ​អំណោយផល​ដល់​ការ​រៀបចំ​ព្រឹត្តិការណ៍​ធំៗ

ទីតាំងហ្វឹកហាត់ម៉ូតូទឹករបស់ សាលី អ៊ូមើត ដែលសាងសង់លើដីរាប់ហិចតាដំណើរការដល់ណាហើយ…

ទីលានហ្វឹកហាត់ម៉ូតូទឹកទំហំ ១១ហិចតានេះរឹតតែអំណោយផលដល់ការរៀបចំព្រឹត្តិការណ៍ធំៗ