សិទ្ធិមនុស្ស Archives - Kampuchea Thmey Daily

Oxfam៖ ចំនួនមហាសេដ្ឋីកើនឡើង ជាឱនភាពនយោបាយ និងបំផ្លាញសិទ្ធិមនុស្សធ្ងន់ធ្ងរ

Minea Neu — Mon, 19 Jan 2026 10:02:32 +0000

ទ្រព្យសម្បត្តិរបស់មហាសេដ្ឋីនៅសកលលោកបានកើនឡើងដល់កំណត់ត្រាមួយនៅឆ្នាំ២០២៥។ នេះបើតាមអង្គការសប្បុរសធម៌ Oxfam រាយការណ៍នៅថ្ងៃទី១៩ខែមករា ដោយព្រមានអំពីផលវិបាកនៃនយោបាយ ជាពិសេសគ្រោះថ្នាក់ខ្ពស់ នៅពេលដែលឥស្សរជនសកលប្រមូលផ្តុំនៅលើវេទិកាសេដ្ឋកិច្ចពិភពលោក (WEF)។

ការជួបជុំរបស់មហាសេដ្ឋីអាមេរិក។ Jacaranda FM

គោលនយោបាយរបស់ប្រធានាធិបតីអាមេរិក លោក ដូណាល់ ត្រាំ បានជំរុញទ្រព្យសម្បត្តិរបស់អ្នកមានខ្លាំង កើនឡើង ១៦.២ភាគរយក្នុងឆ្នាំដំបូងនៃអាណត្តិទីពីររបស់លោក រហូតដល់ ១៨.៣ទ្រីលានដុល្លារ។ នេះបើតាមអង្គការក្រៅរដ្ឋាភិបាលបានលើកឡើង នៅក្នុងរបាយការណ៍ដែលចេញផ្សាយជារៀងរាល់ឆ្នាំមុនវេទិកាសេដ្ឋកិច្ចសកលនៅទីក្រុង Davos ។

អង្គការ Oxfam បានលើកឡើងថា៖«សកម្មភាពរបស់ប្រធានាធិបតី លោក ដូណាល់ ត្រាំ រួមទាំងការរារាំងនឹងបទប្បញ្ញត្តិ និងការធ្វើឱ្យខូចដល់កិច្ចព្រមព្រៀង ក្នុងការបង្កើនការយកពន្ធសាជីវកម្មបានផ្តល់អត្ថប្រយោជន៍ដល់អ្នកមានបំផុតនៅជុំវិញពិភពលោក»។

តាមភ្នាក់ងារ AFP, ពិភពលោកនាពេលបច្ចុប្បន្នមានមហាសេដ្ឋីច្រើនជាង ៣ ០០០នាក់ជាលើកដំបូង មានអ្នកមានកំពូលទាំង១២ ដែលដឹកនាំដោយប្រធាន ក្រុមហ៊ុន Tesla និង SpaceX របស់លោក Elon Musk ដែលមានទ្រព្យសម្បត្តិច្រើនជាងពាក់កណ្តាលនៃមនុស្សជាតិក្រីក្របំផុត ឬច្រើនជាងបួនប៊ីលាននាក់។

មិនតែប៉ុណ្ណោះ Oxfam បានលើកឡើងទៀតថា ការកើនឡើងនៃប្រាក់ទាំងនេះកំពុងទិញអំណាចនយោបាយ ដែលមានសិទ្ធលើការទិញស្ថាប័នកាសែត និងប្រព័ន្ធផ្សព្វផ្សាយផ្សេងទៀត ដូចជាការកាន់កាប់កម្មវិធី X របស់លោក Musk ឬការទិញស្ថាប័ន The Washington Post ដោយ Jeff Bezos របស់ Amazon ។

នាយកប្រតិបត្តិរបស់ Oxfam លោក Amitabh Behar បានសម្តែងក្តីបារម្ភថា៖«គម្លាតកាន់តែឆ្ងាយទៅៗ រវាងអ្នកមាននិងអ្នកក្រ ជាពិសេសអ្នកផ្សេងទៀត បង្កើតឱ្យមានឱនភាពនយោបាយដែលមានគ្រោះថ្នាក់ខ្ពស់ និងមិនមាននិរន្តរភាព»។

តែយ៉ាងណា សម្រាប់ Oxfam ការសម្រេចចិត្តរបស់ទីក្រុងវ៉ាស៊ីនតោនក្នុងការលើកលែងពន្ធពហុជាតិសាសន៍របស់សហរដ្ឋអាមេរិកពីអត្រាពន្ធអប្បបរមា ដែលបានព្រមព្រៀងជាអន្តរជាតិចំនួន ១៥ភាគរយ គឺជាឧទាហរណ៍ជាក់ស្តែងនៃការមិនអើពើនឹងវិសមភាពដែលកំពុងកើនឡើង។

ក្នុងរបាយការណ៍ Oxfam បានបន្តថា៖ «នៅប្រទេសមួយទៅមួយប្រទេសផ្សេងទៀត មហាសេដ្ឋីមិនត្រឹមតែប្រមូលទ្រព្យសម្បត្តិច្រើនលើសលុបពេលដែលអាចចំណាយបាននោះទេ ប៉ុន្តែថែមទាំងបានប្រើទ្រព្យសម្បត្តិនេះ ដើម្បីធានាអំណាចនយោបាយដើម្បីបង្កើតច្បាប់ដែលកំណត់សេដ្ឋកិច្ច និងគ្រប់គ្រងប្រទេសជាតិផងដែរ»។

របាយការណ៍សង្កត់ធ្ងន់ថា៖ «អំណាចបែបនេះផ្តល់ឱ្យមហាសេដ្ឋីចាប់យកអនាគតរបស់យើងទាំងអស់គ្នា បំផ្លាញសេរីភាពនយោបាយ និងបំផ្លាញសិទ្ធិរបស់មនុស្សជាច្រើន»៕

ប្រែសម្រួល៖ ណឺ មិនា

The post Oxfam៖ ចំនួនមហាសេដ្ឋីកើនឡើង ជាឱនភាពនយោបាយ និងបំផ្លាញសិទ្ធិមនុស្សធ្ងន់ធ្ងរ appeared first on Kampuchea Thmey Daily.

ទូតកម្ពុជានៅUN ជំរុញឱ្យលោក មុនតាប៊ន ប្រកាន់វិជ្ជាជីវៈលើបញ្ហាសិទ្ធិមនុស្សតាមបណ្ដោយព្រំដែន

hun sirivadh — Sun, 30 Nov 2025 07:25:00 +0000

ឯកអគ្គរាជទូតកម្ពុជាប្រចាំអង្គការសហប្រជាជាតិ និងអង្គការអន្តរជាតិនានានៅទីក្រុងហ្សឺណែវបានជំរុញទៅអ្នករាយការណ៍ពិសេសទទួលបន្ទុកស្ថានភាពសិទ្ធិមនុស្សនៅកម្ពុជាលោក វីទីត មុនតាប៊ន គោរពនូវស្ដង់ដាវិជ្ជាជីវៈ ឯករាជ និងមិនលម្អៀងចំពោះបញ្ហាសិទ្ធិមនុស្សនៅតាមបណ្ដោយព្រំដែនកម្ពុជា-ថៃ។

ក្នុងសេចក្ដីថ្លែងការណ៍ថ្ងៃទី២៩ ខែវិច្ឆិកា ឆ្នាំ២០២៥ ស្ថានបេសកម្មអចិន្ត្រយ៍កម្ពុជាបានកោតសរសេរចំពោះសេចក្ដីប្រកាសព័ត៌មានរបស់មុនតាប៊នពាក់ព័ន្ធនឹងជម្លោះកម្ពុជាថៃកាលពីកន្លងទៅតែថា «សេចក្ដីប្រកាសនោះមិនបានផ្ដោតលើបញ្ហាសិទ្ធិមនុស្សពាក់ព័ន្ធនឹងជម្លោះប្រដាប់អាវុធកម្ពុជា ថៃ នៅតាមបណ្ដោយព្រំដែនឡើយ»។

ក្នុងសេចក្ដីថ្លែងការណ៍នោះសរសេរថា៖ «ការបញ្ចេញបញ្ចេញមតិយោបល់ជាលកខណៈទូទៅ និងទូលំទូលាយបែបនេះពុំបានឆ្លុះបញ្ចាំងពេញលេញ ស្របតាមព័ត៌មានដែលបានចងក្រង ឬហានិភ័យចំពោះមុខដែលប្រជាជនស៊ីវិលរងផលប៉ះពាល់នោះទេ»។

ដោយរម្លឹកពីក្រមសីលធម៌ វិជ្ជាជីរៈ ភាពមិនលម្អៀងរបស់អ្នករាយការណ៍ពិសេសកម្ពុជាសង្ឃឹមថាលោក មុនតាប៊ន បន្តប្រកាន់ខ្ជាប់ចំពោះក្រមប្រតិបត្តិ និងធ្វើការពិចារណាដោយប្រុងប្រយ័ត្នចំពោះការព្រួយបារម្ភដែលកើតមានឡើងក្នុងន័យចូលរួមពង្រឹងសុចរិតភាពនៃប្រព័ន្ធនីតិវិធីពិសេសរបស់ក្រុមប្រឹក្សាសិទ្ធិមនុស្ស។

សេចក្ដីថ្លែងការណ៍របស់តំណាងកម្ពុជានៅពេលនេះគឺបន្ទាប់ពីអ្នករាយការណ៍ពិសេសស្ដីពីសិទ្ធិមនុស្សនៅកម្ពុជាដែលជាជនជាតិថៃលោក វីទីត មុនតាប៊ន ទើបតែចេញសេចក្ដីថ្លែងការណ៍លើកដំបូងទាក់ទងនឹងជម្លោះព្រំដេនកម្ពុជា-ថៃកាលពីថ្ងៃទី២៤ ខែវិច្ឆិកា កន្លងទៅដោយបានថ្លែងស្វាគមន៍សេចក្ដីថ្លែងការណ៍សន្ដិភាពកម្ពុជាថៃ និងថាការអនុវត្តន៍មនុស្សធម៌គឺជាកត្តាចាំបាច់ ដែលត្រូវកាត់បន្ថយនូវភាពតានតឹង និងដោះស្រាយជម្លោះដោយសន្ដិវិធីស្របតាមច្បាប់អន្តជាតិ។ ទោះជាយ៉ាងណាលោកមិនបានលើកពីបញ្ហានៃការរំលោភបំពានសិទ្ធិមនុស្សលើពលរដ្ឋកម្ពុជាពីសំណាក់ទាហានថៃនោះទេ។

គួរឱ្យដឹងផងដែរថាលោក វិទីត មុនតាប៊ន គឺជាអ្នករាយការណ៍ពិសេសស្តីពីសិទ្ធិមនុស្សនៅកម្ពុជាបន្តការងារពីលោកស្រី Rhona Smith នៅឆ្នាំ២០២១។ លោកកើតនៅខែវិច្ឆិកា ឆ្នាំ១៩៥២ គឺជាជនជាតិថៃ ដែលទទួលការអប់រំនៅចក្រភពអង់គ្លេស ជាអ្នកដែលធ្វើការច្រើនក្នុងស្ថាប័នសិទ្ធិមនុស្សសហប្រជាជាតិ និងជាសាស្ត្រាចារ្យផ្នែច្បាប់នៅប្រទេសថៃផងដែរ៕

អត្ថបទដោយ ហ៊ុន សិរីវឌ្ឍន៍

The post ទូតកម្ពុជានៅUN ជំរុញឱ្យលោក មុនតាប៊ន ប្រកាន់វិជ្ជាជីវៈលើបញ្ហាសិទ្ធិមនុស្សតាមបណ្ដោយព្រំដែន appeared first on Kampuchea Thmey Daily.

ទូតខ្មែរនៅUNលើកពីភាពអសកម្មរបស់ជនជាតិថៃដែលជាអ្នករាយការណ៍សិទ្ធិមនុស្សនៅកម្ពុជា

hun sirivadh — Sat, 22 Nov 2025 02:29:32 +0000

ឯកអគ្គរាជទូតកម្ពុជាប្រចាំអង្គការសហប្រជាជាតិលោក អ៊ិន តារា បានលើកឡើងពីការព្រួយបារម្ហអំពីភាពអសកម្មរបស់អ្នករាយការណ៍ពិសេសស្ដីពីស្ថានភាពសិទ្ធិមនុស្សនៅកម្ពុជាលោក វីទីត មុនតាប៊ន ដែលស្ងៀមស្ងាត់ចំពោះការបំពានសិទ្ធិមនុស្សធ្ងន់ធ្ងរនៅតាមព្រំដែនកម្ពុជា-ថៃ។ លោកក៏ព្រមានថាកម្ពុជានឹងចាត់វិធានការសមស្របផងដែរចំពោះភាពអសកម្មនេះ។

លើកឡើងក្នុងជំនួបជាមួយឧត្តមស្នងការសិទ្ធិមនុស្សអង្គការសហប្រជាជាតិលោក Volker Türk នៅទីក្រុងហ្សឺណែវ កាលពីថ្ងៃទី១៩ ខែវិច្ឆិកា ឆ្នាំ២០២៥ លោក អ៊ិន តារា បានរាយការណ៍ពីសកម្មភាពបំពានរបស់កងទ័ពថៃលើជនស៊ីវិលកម្ពុជាដែលមានទាំងការបង្ចិតបង្ខំជនស៊ីវិលឱ្យចេញពីផ្ទះសំបែង ការបំផ្លាញទ្រព្យសម្បត្តិជនស៊ីវិល ការបាញ់ប្រហារសម្លាប់ពលរដ្ឋខ្មែរ និងការចាប់រំលោភស្ត្រីខ្មែរជាដើម។ លោកបានស្នើសុំឱ្យការិយាល័យឧត្តមស្នងការសិទ្ធិមនុស្សស៊ើបអង្កេត និងកត់ត្រាហេតុការណ៍ទាំងនេះ។

បន្ថែមលើនោះលោក អ៊ិន តារា ក៏បង្ហាញការសោកស្ដាយផងដែរដែលលោក វិទីត មុនតាប៊ន ដែលជាអ្នករាយការណ៍ពិសេសស្ដីពីសិទ្ធិមនុស្សនៅកម្ពុជា ដែលអសកម្មក្នុងការឆ្លើយតបពីការបំពានតាមព្រំដែនដោយថៃនេះ។

លោកថា៖ «អាណត្តិរបស់អ្នករាយការណ៍ពិសេសមិនមែនគ្របដណ្តប់ត្រឹមតែការអភិវឌ្ឍសិទ្ធិមនុស្សក្នុងស្រុកប៉ុណ្ណោះទេ ប៉ុន្តែថែមទាំងការបំពានសិទ្ធិដែលកើតចេញពី ឬជាប់ទាក់ទងនឹងជម្លោះប្រដាប់អាវុធដែលកំពុងបន្តផងដែរ»។

លោក វិទីត មុនតាប៊ន គឺជាអ្នករាយការណ៍ពិសេសស្តីពីសិទ្ធិមនុស្សនៅកម្ពុជាបន្តការងារពីលោកស្រី Rhona Smith នៅឆ្នាំ២០២១។ លោកកើតនៅខែវិច្ឆិកា ឆ្នាំ១៩៥២ គឺជាជនជាតិថៃ ដែលទទួលការអប់រំនៅចក្រភពអង់គ្លេស ជាអ្នកដែលធ្វើការច្រើនក្នុងស្ថាប័នសិទ្ធិមនុស្សសហប្រជាជាតិ និងជាសាស្ត្រាចារ្យផ្នែច្បាប់នៅប្រទេសថៃផងដែរ។

ថ្លែងក្នុងពិធីបើកអនុសំវច្ឆរមហាសន្និបាតមន្ត្រីសង្ឃទូទាំងប្រទេស ប្រចាំឆ្នាំ២០២៥ នៅថ្ងៃទី១៧វិច្ឆិកា ប្រធានព្រឹទ្ធសភាកម្ពុជា សម្ដេចតេជោ ហ៊ុន សែន បានដាក់ជាសំណួរថាហេតុអ្វីបានជាលោក មុនតាប៊ន ស្ងប់ស្ងាត់ម្លេះ ខណៈទាហានថៃដែលជាជាតិសាសន៍របស់លោកបានបំពានលើសិទ្ធិជនជាតិខ្មែរជាបន្តបន្ទាប់នោះ៕

អត្ថបទដោយ ហ៊ុន សិរីវឌ្ឍន៍

The post ទូតខ្មែរនៅUNលើកពីភាពអសកម្មរបស់ជនជាតិថៃដែលជាអ្នករាយការណ៍សិទ្ធិមនុស្សនៅកម្ពុជា appeared first on Kampuchea Thmey Daily.

បណ្ឌិត ស៊ឺន សំ៖ ស៊ុយអ៊ែត និយាយពីសិទ្ធិមនុស្សយ៉ាងពីរោះ ប៉ុន្តែលក់យន្តហោះចម្បាំងឱ្យថៃ ដែលបានប្រើវាយប្រហារកម្ពុជា សម្លាប់ពលរដ្ឋស្លូតត្រង់

Ngoeul Narath — Tue, 26 Aug 2025 04:01:48 +0000

បណ្ឌិត ស៊ឺន សំ អ្នកជំនាញវិទ្យាសាស្ត្រនយោបាយនៃរាជបណ្ឌិត្យសភា កត់សម្គាល់ឃើញថា ស៊ុយអែត ដកទូតចេញពីកម្ពុជាក្រោមលេសសិទ្ធិមនុស្សធ្លាក់ចុះខ្លាំង ប៉ុន្តែទៅបើកស្ថានទូតនៅកូរ៉េខាងជើង ដែលសិទ្ធិមនុស្សនិងលទ្ធិប្រជាធិបតេយ្យអន់ជាងកម្ពុជាទៅទៀត ហើយអ្វីលើសពីនេះស៊ុយអែតនិយាយពីបញ្ហាសិទ្ធិមនុស្សបានយ៉ាងពីរោះ ប៉ុន្តែបែជាលក់យន្តហោះចម្បាំងទៅឱ្យថៃ ទាំងដែលថ្មីៗនេះ ថៃ ធ្លាប់យកយន្តហោះចម្បាំងជំនាន់មុនបើកការវាយប្រហារទាំងកំរោលបំពានច្បាប់អន្តរជាតិ កម្ទេចហេដ្ឋារចនាសម្ព័ន្ធស៊ីវិល សម្លាប់ពលរដ្ឋស្លូតត្រង់ ប៉ះពាល់សិទ្ធិមនុស្ស។

បណ្ឌិត ស៊ឺន សំ ចេញមកប្រតិកម្មដូច្នេះនាព្រឹកថ្ងៃទី២៦ ខែសីហា បន្ទាប់ពីកាលពីថ្ងៃទី២៥ ខែសីហា ស៊ុយអែត ចុះហត្ថលេខាលក់យន្តហោះចម្បាំងជំនាន់ថ្មី Gripen E/F ឱ្យទៅថៃចំនួន៤គ្រឿង ដែលស៊ុយអែតនឹងប្រគល់ឱ្យចាប់ពីចុងឆ្នាំ២០២៥ ដល់ឆ្នាំ២០៣០ ខណៈដែលកាលពីចុងខែកក្កដា ក្នុងសង្គ្រាម៥ថ្ងៃ ថៃបានប្រើប្រាស់ យន្តហោះចម្បាំង Gripen C/D ដែលពួកគេបានទិញពីស៊ុយអែតកាលឆ្នាំ២០១១ រួមជាមួយយន្តហោះចម្បាំង បំពាក់គ្រាប់បែកចង្កោម គ្រាប់បែកទម្ងន់ធ្ងន់ដូចជា និងផ្សែងគីមីពុលវាយប្រហារលើកម្ពុជា កម្ទេចប្រាសាទព្រះវិហារសម្បត្តិបេតិកភណ្ឌពិភពលោក សម្លាប់ពលរដ្ឋស្លូតត្រង់ជាច្រើន។

តាមរយៈគណនីហ្វេសប៊ុកផ្លូវការ បណ្ឌិត ស៊ឺន សំ បង្ហាញការកត់សម្គាល់ដូច្នេះ៖«ប្រទេសស៊ុយអែត បានសម្រេចចិត្តដកស្ថានទូតចេញពីប្រទេសកម្ពុជា ដោយលើកហេតុផលថាមានការធ្លាក់ចុះខ្លាំងនៃសិទ្ធិមនុស្ស និងលទ្ធិប្រជាធិបតេយ្យនៅក្នុងប្រទេសនេះ។ ប៉ុន្តែក្រោយមក គាត់បែរជាទៅបើកស្ថានទូតឡើងវិញនៅកូរ៉េខាងជើង ដែលជាប្រទេសមួយត្រូវបានគេស្គាល់ថាមានកំណត់ត្រាសិទ្ធិមនុស្ស និងលទ្ធិប្រជាធិបតេយ្យមិនល្អជាងកម្ពុជាទៅទៀត។ មិនត្រឹមតែប៉ុណ្ណោះ គាត់ថែមទាំងបានចូលរួមក្នុងការលក់យន្តហោះទម្លាក់គ្រាប់បែកទៅឱ្យប្រទេសផ្សេងទៀត ដែលបានប្រើប្រាស់សព្វាវុធទាំងនោះដើម្បីវាយប្រហារនៅកម្ពុជាបណ្តាលឱ្យជនស្លូតត្រង់ជាច្រើនបាត់បង់ជីវិត។»។

តាមលោកបណ្ឌិត ស៊ឺន សំ សកម្មភាពរបស់ស៊ុយអែតបែបនេះ បានបង្ហាញឱ្យឃើញច្បាស់ថា ការនិយាយអំពីសិទ្ធិមនុស្ស និងលទ្ធិប្រជាធិបតេយ្យ ជួនកាលគ្រាន់តែជាពាក្យសំដីដ៏ស្រស់ស្អាតដែលប្រើដើម្បីបិទបាំងផលប្រយោជន៍ផ្ទាល់ខ្លួន ឬគោលបំណងនយោបាយប៉ុណ្ណោះ។ ពាក្យសំដីទាំងនោះ ទោះបីជាស្តាប់ទៅហាក់មានឧត្តមគតិក៏ដោយ ប៉ុន្តែបើគ្មានការអនុវត្តជាក់ស្តែងដែលស្របនឹងគោលការណ៍ទាំងនោះទេ វាគ្រាន់តែជាពាក្យទទេប៉ុណ្ណោះ។ ផ្ទុយទៅវិញ អ្វីដែលសំខាន់គឺត្រូវសង្កេតមើលទង្វើជាក់ស្តែង និងផលប៉ះពាល់នៃសកម្មភាពទាំងនោះ ដើម្បីវាយតម្លៃថាតើមានភាពស្មោះត្រង់ ឬគ្រាន់តែជាការប្រើឧត្តមគតិជាលេសដើម្បីសម្រេចផលប្រយោជន៍ផ្សេង។

អ្នកជំនាញវិទ្យាសាស្ត្រនយោបាយ បណ្ឌិត ស៊ឺន សំ ប្រាប់ពលរដ្ឋកម្ពុជាថា មុននឹងជឿសម្ដីរបស់បរទេស ត្រូវពិនិត្យមើលទង្វើជាក់ស្ដែងសិន។ លោកសង្កត់ធ្ងន់ថា៖« នៅពេលដែលគេនិយាយអំពីសិទ្ធិមនុស្ស ឬលទ្ធិប្រជាធិបតេយ្យ យើងគួរតែប្រុងប្រយ័ត្ន និងពិនិត្យឱ្យច្បាស់លាស់អំពីបរិបទ និងគោលបំណងនៅពីក្រោយ។ ការវិនិច្ឆ័យមិនគួរផ្អែកតែលើពាក្យសំដីដ៏ល្អផូរផង់នោះទេ ប៉ុន្តែត្រូវផ្អែកលើទង្វើ និងលទ្ធផលជាក់ស្តែងដែលអាចវាស់វែងបាន។ តាមរយៈការសង្កេតបែបនេះ យើងនឹងអាចស្វែងយល់បានកាន់តែច្បាស់អំពីភាពស្មោះត្រង់ និងគោលបំណងពិតប្រាកដនៅពីក្រោយការប្តេជ្ញាចិត្តទាំងនោះ។»។

សូមរម្លឹកថា ស៊ុយអែតបានប្រកាសបិទទ្វារការិយាល័យស្ថានទូតរបស់ខ្លួនប្រចាំនៅកម្ពុជាចាប់ពីចុងខែកញ្ញា ឆ្នាំ២០២៤ ទាំងដែលប្រទេសស៊ុយអែតបានភ្ជាប់ទំនាក់ទំនងការទូតជាផ្លូវការជាមួយកម្ពុជានៅក្នុងឆ្នាំ១៩៦១។

កាលពីថ្ងៃទី០៦ ខែសីហា សម្ដេចតេជោ ហ៊ុន សែន ធ្លាប់លើកឡើងថា ប្រទេសដែលលក់យន្តហោះ ចម្បាំងឲ្យថៃ ត្រូវរឹតបណ្តឹងលើកិច្ចសន្យាប្រើប្រាស់យន្តហោះ ព្រោះកន្លងទៅនេះថៃបានប្រើយន្តហោះ ដែលទិញពីអាមេរិក និងស៊ុយអែត វាយចូលជ្រៅក្នុងទឹកដីកម្ពុជា។ កម្ពុជាមិនជំទាស់នឹងស៊ុយអែត ដែលលក់យន្តហោះចម្បាំងឲ្យថៃទេ តែត្រូវកំណត់កុំឲ្យថៃប្រើប្រាស់យន្តហោះវាយប្រហារចូលទឹកដីកម្ពុជា ឬទឹកដីឡាវ ឬម៉ាឡេសុី ឬមីយ៉ាន់ម៉ា ដែលជាប្រទេសជាប់ព្រំដែនជាមួយថៃ៕

ដោយ៖ ង៉ិល ណារ៉ាត់

The post បណ្ឌិត ស៊ឺន សំ៖ ស៊ុយអ៊ែត និយាយពីសិទ្ធិមនុស្សយ៉ាងពីរោះ ប៉ុន្តែលក់យន្តហោះចម្បាំងឱ្យថៃ ដែលបានប្រើវាយប្រហារកម្ពុជា សម្លាប់ពលរដ្ឋស្លូតត្រង់ appeared first on Kampuchea Thmey Daily.

ហុងគ្រី ទទួលស្គាល់ថា រដ្ឋាភិបាលកម្ពុជាប្រឹងប្រែងអភិវឌ្ឍ និងលើកកម្ពស់សិទ្ធិមនុស្ស និងចាត់ទុកជាប្រទេសគំរូ

Ngoeul Narath — Wed, 05 Feb 2025 09:08:29 +0000

នៅក្នុងក្របខណ្ឌអង្គការសហប្រជាជាតិ, អនុប្រធានរដ្ឋសភាហុងគ្រី ថ្លែងថា រដ្ឋាភិបាលហុងគ្រី ទទួលស្គាល់ថា រដ្ឋាភិបាលកម្ពុជាបានប្រឹងប្រែងអភិវឌ្ឍ និងលើកកម្ពស់សិទ្ធិមនុស្ស និងចាត់ទុកកម្ពុជាជាប្រទេសគំរូមួយ។ នេះបើតាមសេចក្ដីប្រកាសព័ត៌មាន ដែលស្រង់សម្ដីលោកស្រី Marta Martrai អនុប្រធានទី១ រដ្ឋសភាហុងគ្រី នៅក្នុងជំនួបរវាងសម្ដេចតេជោ ហ៊ុន សែន ប្រធានព្រឹទ្ធសភា នាព្រឹកថ្ងៃទី០៥ ខែកុម្ភ នេះ។

សេចក្ដីប្រកាសព័ត៌មាន បានស្រង់សម្ដី លោកស្រី Marta Martrai នៅក្នុងជំនួប ដោយសរសេរដូច្នេះ៖«នៅក្នុងក្របខណ្ឌអង្គការសហប្រជាជាតិវិញ លោកស្រី អនុប្រធានរដ្ឋសភាហុងគ្រី បានគូសបញ្ជាក់ថា រដ្ឋាភិបាលហុងគ្រីទទួលស្គាល់នូវកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការអភិវឌ្ឍ និងលើកកម្ពស់សិទ្ធិមនុស្ស និងបានចាត់ទុកកម្ពុជាជាប្រទេសគំរូមួយ»។

នៅក្នុងជំនួបដែលធ្វើឡើងនៅវិមានព្រឹទ្ធសភា លោកស្រីអនុប្រធានទី១ រដ្ឋសភាហុងគ្រី បានបង្ហាញការគាំទ្រចំពោះ ការអនុម័តធម្មនុញ្ញសន្តិភាពសកលសម្រាប់មនុស្សជាតិ និងភពផែនដី នៅក្នុងកិច្ចប្រជុំ IPTP នៅកម្ពុជា។ លោកស្រី បានអះអាងថា អនុម័តធម្មនុញ្ញសន្តិភាពសកលសម្រាប់មនុស្សជាតិ និងភពផែនដី បានបង្ហាញអំពីគោលគំនិតដូចគ្នារវាងកម្ពុជា និងហុងគ្រីផងដែរ។

ជាការឆ្លើយរបស់របស់សម្ដេចតេជោ ហ៊ុន សែន ចំពោះបញ្ហាសិទ្ធិមនុស្ស សម្តេចបានថ្លែងអំណរគុណហុងគ្រីដែលបានគ្រាំទ្រធម្មនុញ្ញសន្តិភាពសកលសម្រាប់មនុស្សជាតិ និងភពផែនដី។ សម្តេចបានគូសបញ្ជាក់ ទៅកាន់អនុប្រធានទី១ រដ្ឋសភាហុងគ្រី ថា តើយើងអាចនិយាយពីបញ្ហាសិទ្ធិមនុស្ស និងប្រជាធិបតេយ្យបានដែរឬទេ នៅពេលប្រទេសមានសង្គ្រាម ដែលសិទ្ធិរស់រានមានជីវិតក៏គ្មានដែរ ដូចស្តែងឱ្យឃើញនៅបណ្តាប្រទេសមួយចំនួន នៅក្នុងតំបន់នានា រួមទាំងអឺរ៉ុបផងដែរ។

គួររម្លឹកថា ស្របពេលដែលកម្ពុជា កំពុងមានសុខសន្តិភាពពេញលេញ គ្មានសង្គ្រាម សម្ដេចតេជោ ហ៊ុន សែន ធ្លាប់បានលើកឡើងថា បើគ្មានសន្តិភាពនោះទេ មិនចាំចាច់និយាយពីបញ្ហាសិទ្ធិមនុស្ស ប្រជាធិបតេយ្យនិងការអភិវឌ្ឍនោះឡើយ៕

ដោយ៖ ង៉ិល ណារ៉ាត់

The post ហុងគ្រី ទទួលស្គាល់ថា រដ្ឋាភិបាលកម្ពុជាប្រឹងប្រែងអភិវឌ្ឍ និងលើកកម្ពស់សិទ្ធិមនុស្ស និងចាត់ទុកជាប្រទេសគំរូ appeared first on Kampuchea Thmey Daily.

នគរបាលបញ្ជូនជនបរទេសជិត៦០នាក់ដែលដើរចេញពីកាស៊ីណូមួយនៅឧត្តរមានជ័យទៅស្នាក់ការអន្តោប្រវេសន៍

hun sirivadh — Wed, 08 Jan 2025 04:03:46 +0000

ស្នងការដ្ឋាននគរបាលខេត្តឧត្តរមានជ័យបានសម្រេចបញ្ជូនជនបរទេសជិត៦០នាក់ដែលបានតវ៉ា និងនាំគ្នាដើរចេញពីការស៊ីណូអូរស្មាច់រីសត ក្នុងខេត្តឧត្តរមានជ័យ ទៅស្នាក់ការអន្តោប្រវេសន៍ប្រចាំខេត្តសៀមរាបដើម្បីបន្តនីតិវិធី។

ការបញ្ជូននេះគឺបន្ទាប់ពីពួកគេទាំង៥៧នាក់ក្នុងនោះជនជាតិប៉ាគីស្ថាន៥៣នាក់ និងណេប៉ាល់ ៤នាក់ បាននាំគ្នាតវ៉ា និងដើរចេញពីក្រុមហ៊ុន បង្ករការភ្ញាក់ផ្អើលកាលពីថ្ងៃទី៥ ខែមករា ឆ្នាំ២០២៥កន្លងទៅ។

ក្នុងសេចក្ដីបំភ្លឺព័ត៌មានចុះថ្ងៃទី៧ ខែមករា ឆ្នាំ២០២៥ ស្នងការដ្ឋាននគរបាលខេត្តឧត្តរមានជ័យ ឱ្យដឹងថា បន្ទាប់ពីសាកសួរជនបរទេសទាំងអស់នោះបានឆ្លើយថា ពួកគេបានមកធ្វើការនៅកម្ពុជា ២-៣ខែហើយដោយមិនទទួលបានប្រាក់ខែនោះទេនិងត្រូវបានក្រុមហ៊ុនបញ្ជូនពីខេត្តព្រះសីហនុ មកធ្វើការនៅក្រុមហ៊ុនកាស៊ីណូអូរស្មាច់រីសតនេះ។

ក្នុងសេចក្ដីបំភ្លឺនោះលើកឡើងថា៖ «ក្រោយពួកគាត់បានមកធ្វើការនៅក្រុមហ៊ុនក្នុងការស៊ីណូអូរស្មាច់រីសតបានរយៈពេល១០ថ្ងៃ ត្រូវអ្នកគ្រប់គ្រងជនជាតិចិន(មិនស្គាល់ឈ្មោះ) ឱ្យពួកគាត់ធ្វើការគ្មានថ្ងៃសម្រាក និងដោយភ័យខ្លាចថាខ្លួនមិនបានទទួលប្រាក់ខែដូចក្រុមហ៊ុននៅឯខេត្តព្រះសីហនុ ទើបនាំគ្នាតវ៉ា ហើយដើរចេញពីក្រុមហ៊ុន»។

បើតាមស្នងការដ្ឋាននគរបាលខេត្តឧត្តរមានជ័យក្រោយសាកសួរពួកគេខ្លះចង់បន្តការងារនៅកន្លែងដដែល ខ្លះចង់ទៅធ្វើការនៅក្រុមហ៊ុនក្នុងខេត្តព្រះសីហនុ និងខ្លះទៀតចង់ត្រឡប់ទៅប្រទេសកំណើតវិញ ដោយកម្លាំងបានបញ្ជូនពួកគេទាំង៥៧នាក់ទៅកាន់ស្នាក់ការអន្តោប្រវេសន៍នៅខេត្តសៀមរាប ដើម្បីបន្តនីតិវិធី៕

អត្ថបទដោយ ហ៊ុន សិរីវឌ្ឍន៍

The post នគរបាលបញ្ជូនជនបរទេសជិត៦០នាក់ដែលដើរចេញពីកាស៊ីណូមួយនៅឧត្តរមានជ័យទៅស្នាក់ការអន្តោប្រវេសន៍ appeared first on Kampuchea Thmey Daily.

តំណាងកម្ពុជានៅ UN ទទួចឱ្យអ្នករាយការណ៍សិទ្ធិមនុស្សរក្សានូវក្រមសីលធម៌របស់ខ្លួន

hun sirivadh — Fri, 20 Dec 2024 04:15:29 +0000

ស្ថានបេសកម្មអចិន្ត្រៃយ៍កម្ពុជាប្រចាំអង្គការសហប្រជាជាតិ និងអង្គការអន្តរជាតិនានានៅទីក្រុងហ្សឺណែវទទួចឱ្យអ្នកជំនាញសិទ្ធិមនុស្សUN ប្រកាន់ខ្ជាប់នូវក្រមសីលធម៌សម្រាប់នីតិវិធីពិសេសរបស់អ្នកកាន់អាណត្តិ ក្នុងការបំពេញមុខងាររបស់ខ្លួន រួមទាំងធ្វើសេចក្ដីថ្លែងការណ៍ជាសាធារណៈដែលអាចជាការជ្រែតជ្រែកក្នុងដែនសមត្ថកិច្ចកម្ពុជា។

ការទទួចនេះធ្វើឡើងតាមសេចក្ដីថ្លែងការណ៍មួយចុះថ្ងៃទី១៩ ខែធ្នូ ឆ្នាំ២០២៤ ឆ្លើយតបទៅនឹងការចេញផ្សាយរបស់ក្រុមអ្នកជំនាញសិទ្ធិមនុស្សពាក់ព័ន្ធនឹងការតាំងទីលំនៅថ្មីរបស់ប្រជាពលរដ្ឋនៅតំបន់អភិរក្សអង្គរ ដោយបានលើកឡើងថាការផ្លាស់ប្ដូរទីលំនៅរបស់ពលរដ្ឋនៅតំបន់អង្គរទៅកាន់ទីតាំងថ្មី «ពុំមានការបណ្ដេញចេញដោយបង្ខំ ឬផ្លាស់ប្ដូរដោយបំពាន» ដូចការលើកឡើងរបស់អ្នកជំនាញទាំងនោះទេ។

តំណាងកម្ពុជានៅសហប្រជាជាតិបញ្ជាក់ថា៖ «ដោយសារខ្វះព័ត៌មាន ឬចេតនាមិនអើពើនឹងការពិតទាំងស្រុង ក្រុមអ្នកជំនាញបានធ្វើការអះអាងមិនត្រឹមត្រូវនិងគ្មានការទទួលខុសត្រូវ»។

ស្ថានបេសកម្មអចិន្ត្រៃយ៍កម្ពុជាបានបញ្ជាក់ថា ការផ្ដល់ទីតាំងថ្មីនេះគឺមានផែនការទីតាំង គោលនយោបាយពាក់ព័ន្ធ សម្របសម្រួល គោរពនូវគោលការណ៍សិទ្ធិមនុស្ស មានការប្រជុំ ពិគ្រោះយោបល់ច្បាស់លាស់ជាមួយប្រជាជនដោយពុំមានការបង្ខិតបង្ខំពលរដ្ឋនោះទេ ហើយពលរដ្ឋភាគច្រើនមានសេចក្ដីរីករាយក្នុងការទទួលបានដំណោះស្រាយពីរដ្ឋាភិបាល។

លោក អុិន តារា តំណាងអចិន្ត្រៃយ៍កម្ពុជា ប្រចាំអង្គការសហប្រជាជាតិ

ក្នុងសេចក្ដីថ្លែងការណ៍នោះបានបញ្ជាក់ថា៖ «ពុំមានវិធានការបង្ខិតបង្ខំដោយអាជ្ញាធរក្នុងការបង្ខំប្រជាពលរដ្ឋឱ្យចាក់ចេញពីតំបន់អង្គរឡើយ។ វិធានការខ្លះគឺគ្រាន់តែអនុវត្តឡើងទៅលើជនអនាធិបតេយ្យ ដែលចូលកាន់កាប់ដីដោយខុសច្បាប់ ក្នុងតំបន់អភិរក្សអង្គរដែលនេះជារឿងទូទៅនៅគ្រប់ប្រទេសលើពិភពលោក»។

បើតាមតំណាងកម្ពុជា ការផ្លាស់ប្ដូរពលរដ្ឋឱ្យទៅនៅទីតាំងថ្មីគឺផ្អែកលើជំរឿនឆ្នាំ២០០៤ របស់ប្រជាពលរដ្ឋក្នុងភូមិទាំងអស់ក្នុងតំបន់អង្គរដើម្បីធ្វើជាមូលដ្ឋានសម្រាប់ការគ្រប់គ្រងតំបន់អភិរក្ស និងវិធានការការពារអ្នកស្រុកអង្គរ។ ដោយបញ្ជាក់ថា ប្រជាពលរដ្ឋដែលបានចុះបញ្ជីនៅក្នុងជំនឿឆ្នាំ២០០៤ មិនត្រូវបានរាប់បញ្ជូលក្នុងផែនការផ្លាស់ទីលំនៅនោះទេ។

ក្រុងរុនតាឯកតេជោសែន ខេត្តសៀមរាប

គួរឱ្យដឹងថាដំណើរការនៃការផ្លាស់ប្ដូរទីលំនៅពលរដ្ឋពីរមណីយដ្ឋានអង្គរទៅទីតាំងថ្មីចាប់ផ្ដើមក្នុងឆ្នាំ២០២២ ដើម្បីឆ្លើយតបទៅនឹងអង្គការយូនេស្គូដែលបង្ហាញក្ដីបារម្ភពីកើតឡើងសំណង់ផ្ទះពលរដ្ឋជុំវិញអង្គរដែលនឹងអាចធ្វើឱ្យរមណីដ្ឋានប្រវត្តិសាស្ត្រមួយនេះត្រូវបានដកចេញពីបញ្ជីបេតិកភ័ណ្ឌពិភពលោក។ មានទីតាំងចំនួន២ដែលរដ្ឋបានផ្ដល់ដីនិងផ្ទះជូនពលរដ្ឋដែលត្រូវបានផ្លាស់ទីលំនៅគឺតំបន់ពាក់ស្នែង និងក្រុងរុនតាឯក៕

ដោយ ហ៊ុន សិរីវឌ្ឍន៍

The post តំណាងកម្ពុជានៅ UN ទទួចឱ្យអ្នករាយការណ៍សិទ្ធិមនុស្សរក្សានូវក្រមសីលធម៌របស់ខ្លួន appeared first on Kampuchea Thmey Daily.

បាតុកម្មក្រុមជ្រុលនិយមនៅកូរ៉េខាងត្បូង ក្រោមលេសថ្ងៃសិទ្ធិមនុស្ស ១០ ធ្នូ គ្មានអ្នកចូលរួម បង្ហាញថា ពលរដ្ឋអស់ជំនឿលើក្រុមប្រឆាំង

អ៊ិន ពិសី — Sun, 08 Dec 2024 10:55:40 +0000

បាតុកម្មថ្ងៃទី ៨ ខែធ្នូ របស់ក្រុមជ្រុលនិយមនៅប្រទេសកូរ៉េខាងត្បូង ដែលប្រើលេសថ្ងៃសិទ្ធិមនុស្ស ១០ ធ្នូ ដើម្បីប្រមូលផ្ដុំគ្នា ស្រែកលាបពណ៌លើរដ្ឋាភិបាលកម្ពុជា ត្រូវបានទទួលការបរាជ័យយ៉ាងដំណំ ព្រោះគ្មានពលរដ្ឋណាចូលរួមជាមួយឡើយ។

អ្នកវិភាគភូមិសាស្ត្រនយោបាយកម្ពុជា លោក ថុង ម៉េងដាវិត មើលឃើញថា បាតុកម្មគ្មានអ្នកចូលរួមនេះ ដោយសារតែក្រុមប្រឆាំងតែងនិយាយកុហកបោកប្រាស់ពលរដ្ឋ យកពលរដ្ឋជាខែលម្តងហើយម្តងទៀត ដើម្បីកេងចំណេញយកប្រយោជន៍សម្រាប់ក្រុមបក្ខពួករបស់ខ្លួន។

លោកថ្លែងថា «ការធ្វើបាតុកម្មរបស់ក្រុមនេះកាន់តែចុះខ្សោយទៅៗ រហូតដល់មិនមាន ឬក៏មានអ្នកចូលរួមតិចបំផុត។ បញ្ហាដែលក្រុមទណ្ឌិត សម រង្ស៊ី និងបក្ខពួក តែងតែលើកឡើងនោះ គឺជាបញ្ហាដដែលៗ ដែលប្រជាពលរដ្ឋបានយល់ដឹងច្បាស់ និងមានភាពចាស់ទុំគ្រប់គ្រាន់ ក្នុងការស្វែងយល់អំពីផលបច្ច័យ នៃការប៉ះពាល់ពីការធ្វើបាតុកម្មនៅក្រៅប្រទេស»។

បើតាម លោក ថុង ម៉េងដាវិត ពលរដ្ឋបានដឹងច្បាស់ពីក្រយៅដ៏អាក្រក់របស់ក្រុមប្រឆាំងជ្រុលនិយមទាំងនោះ គឺបង្កូកប្រកាសធ្វើបាតុកម្មដើម្បីតែប្រមូលលុយ មិនមែនបម្រើប្រយោជន៍ប្រជាជនខ្មែរនៅប្រទេសកូរ៉េនោះទេ។ ពោលគឺបាតុកម្មនេះ គ្រាន់តែយកពលរដ្ឋធ្វើជាឆាកល្ខោនរបស់ខ្លួន ដើម្បីបំភ្លៃ បំភាន់ការពិត លាបពណ៌លើរដ្ឋាភិបាលកម្ពុជា ប៉ុណ្ណោះ។

ចំណែក លោក សំ សឿន អ្នកឃ្លាំមើលនយោបាយកម្ពុជា មើលឃើញថា បាតុកម្មក្រុមប្រឆាំងនៅប្រទេសកូរ៉េខាងត្បូង លែងមានការចូលរួមពីសំណាក់ពលករ និងប្រជាពលរដ្ឋស្នាក់នៅ និងធ្វើការនៅទីនោះទៀតហើយ ជាក់ស្ដែងអ្នកចូលរួមមានតែមនុស្សបួនដប់នាក់ ដែលសុទ្ធតែជាគ្នីគ្នាក្រុមប្រឆាំង ដែលញៀនធ្វើបាតុកម្ម និងបន្តុះបង្អាប់ជាតិឯងប៉ុណ្ណោះ។

លោកបញ្ជាក់ថា «សកម្មភាពធ្វើបាតុកម្មរបស់ពួកគាត់នេះ លែងមានអ្នកចូលរួមហើយ មានតែបួនដប់នាក់ គ្នីគ្នាគាត់តែប៉ុណ្ណោះ ដែលជាក្រុមជ្រុលនិយមញៀននឹងការធ្វើបាតុកម្ម ញៀននឹងការបន្តុះបង្អាប់ជាតិខ្លួនឯង»។

អ្នកឃ្លាំមើលនយោបាយកម្ពុជារូបនេះ បន្ថែមថា បាតុកម្មលែងមានអ្នកចូលរួម ក៏ព្រោះតែ ក្រុមនេះតែងកុហកពលរដ្ឋក្រោមលេសផ្សេងៗ ដើម្បីទាញមនុស្សឱ្យចូលរួមធ្វើបាតុកម្ម ប៉ុន្តែពេលពលរដ្ឋចូលរួមជាក់ស្ដែង ក្រុមនេះបែរជានិយាយខុសប្រធានបទ ដែលបានប្រកាសប្រាប់ពលរដ្ឋ ហើយរុញច្រានពលរដ្ឋឱ្យទៅជាអ្នកលាបពណ៌ជាន់ពន្លិចរាជរដ្ឋាភិបាលទៅវិញ ទាំងដែលការលាបពណ៌នោះ គឺពួកគេជាអ្នកនិយាយ។

រីឯ លោក ហេង សំណាង ប្រធានក្រុមយុវជនសង្គមស៊ីវិល និងក្រុមសេដ្ឋកិច្ចក្រៅប្រព័ន្ធ មើលឃើញថា នយោបាយកៀរគរមនុស្សទៅធ្វើបាតុកម្មរបស់ក្រុមជ្រុលនិយមកំពុងតែសាបរលាបទៅហើយ។ ពេលនេះប្រជាពលរដ្ឋខ្មែរទូទៅ សិស្ស-និស្សិត បញ្ញវន្ត មន្ត្រីរាជការ មានតែការរួបរួមគ្នាអភិវឌ្ឍន៍ ព្យាយាមទប់ស្កាត់មនោគមវិជ្ជាខ្មៅអាក្រក់ ដើម្បីរក្សាបានសន្តិភាព និងការអភិវឌ្ឍ។

លោកនិយាយថា «យើងឃើញថា អស់ពីបញ្ហារឿងមួយចូលរឿងមួយ នៃការបង្កើតព្រឹត្តិការណ៍របស់ក្រុមជ្រុលនិយម ក៏ដូចជាបងប្អូនពលករនៅបណ្ដាប្រទេសមួយចំនួន បច្ចុប្បន្នគឺមិនមានអ្នកចូលរួមនោះទេ ដោយសារតែបទពិសោធកន្លងមកយន្តការរបស់ក្រុមប្រឆាំង គឺជាទង្វើខុសច្បាប់ ជាក្រុមឧទ្ទាម អញ្ចឹងនៅពេលណាមានប្រជាពលរដ្ឋចូលរួមទង្វើខុសច្បាប់ណាមួយតែងតែមានវិធានពីរាជរដ្ឋាភិបាល»។

លោកប្រធានក្រុមយុវជនសង្គមស៊ីវិល បន្ថែមថា ក្រុមប្រឆាំងជ្រុលនិយម ដែលលក់ក្បាលបម្រើបរទេសមើលមិនឃើញ និងមិនសាទរសមិទ្ធផលសម្រេចបានរបស់រាជរដ្ឋាភិបាលនោះឡើយ។ ក្នុងខួរក្បាលពួកគេតែងបំភ្លៃការពិតពីបញ្ហាសិទ្ធិមនុស្ស ប្រជាធិបតេយ្យ ការការពារទឹកដី ព្រៃឈើ ធនធានធម្មជាតិផ្សេងៗ ហើយបន្តុះបង្អាប់ ជាន់ពន្លិច និងទម្លាក់កំហុសគ្រប់យ៉ាងលើថ្នាក់ដឹកនាំប្រទេសទៅវិញ៕

The post បាតុកម្មក្រុមជ្រុលនិយមនៅកូរ៉េខាងត្បូង ក្រោមលេសថ្ងៃសិទ្ធិមនុស្ស ១០ ធ្នូ គ្មានអ្នកចូលរួម បង្ហាញថា ពលរដ្ឋអស់ជំនឿលើក្រុមប្រឆាំង appeared first on Kampuchea Thmey Daily.

សិទ្ធិមនុស្ស Archives - Kampuchea Thmey Daily

Oxfam៖ ចំនួន​មហាសេដ្ឋី​កើន​ឡើង ​ជាឱនភាព​នយោបាយ និងបំផ្លាញ​​​សិទ្ធិ​​មនុស្សធ្ងន់ធ្ងរ

ទូត​កម្ពុជា​នៅ​UN ជំរុញ​ឱ្យ​លោក មុនតាប៊ន ប្រកាន់​វិជ្ជាជីវៈ​លើ​បញ្ហា​សិទ្ធិ​មនុស្ស​តាម​បណ្ដោយ​ព្រំដែន

ទូតខ្មែរនៅ​UNលើក​​ពី​ភាព​អសកម្ម​របស់​ជន​ជាតិ​ថៃ​ដែល​ជា​អ្នក​រាយការណ៍​សិទ្ធិ​មនុស្ស​នៅ​កម្ពុជា

នគរបាលបញ្ជូនជនបរទេសជិត៦០នាក់ដែលដើរចេញពីកាស៊ីណូមួយនៅឧត្តរមានជ័យទៅស្នាក់ការអន្តោប្រវេសន៍

តំណាងកម្ពុជានៅ UN ទទួចឱ្យអ្នករាយការណ៍សិទ្ធិមនុស្សរក្សានូវក្រមសីលធម៌របស់ខ្លួន

Oxfam៖ ចំនួនមហាសេដ្ឋីកើនឡើង ជាឱនភាពនយោបាយ និងបំផ្លាញសិទ្ធិមនុស្សធ្ងន់ធ្ងរ

ទូតកម្ពុជានៅUN ជំរុញឱ្យលោក មុនតាប៊ន ប្រកាន់វិជ្ជាជីវៈលើបញ្ហាសិទ្ធិមនុស្សតាមបណ្ដោយព្រំដែន

ទូតខ្មែរនៅUNលើកពីភាពអសកម្មរបស់ជនជាតិថៃដែលជាអ្នករាយការណ៍សិទ្ធិមនុស្សនៅកម្ពុជា