សុខភាពខួរក្បាល Archives - Kampuchea Thmey Daily

មកដឹងពីផលប៉ះពាល់នៃផ្សែងពុល ចំពោះខួរក្បាល

Saron Sela — Tue, 28 Feb 2023 08:19:15 +0000

យោងទៅតាមការសិក្សាថ្មីពិសោធន៍បង្ហាញថា ផ្សែងបំពុលចេញពីឡានម៉ូតូនិងរោងចក្រអាចរំខានដល់ប្រព័ន្ធប្រសាទដែលបញ្ជូនព័ត៌មានក៏ដូចជាកាត់បន្ថយការតភ្ជាប់ក្នុងបណ្តាញខួរក្បាល ។

មានការសិក្សាពីមុនៗ ជាច្រើនបានបង្ហាញថាមនុស្សដែលប៉ះពាល់នឹងខ្យល់បំពុលពីឡាននិងម៉ូតូកាន់តែច្រើន ទំនងជាទទួលរងពីផលប៉ះពាល់សុខភាពផ្លូវចិត្តនិងជំងឺសរសៃប្រសាទ។ លទ្ធផល នេះត្រូវបានជំរុញបន្ថែមទៀតដោយការសិក្សាដែលបានចេញផ្សាយនៅថ្ងៃទី ១៤ ខែមករានៅក្នុងទស្សនាវដ្តីសុខភាពបរិស្ថាន។ តាមការសិក្សានេះ ការប៉ះពាល់នឹងផ្សែងម៉ាស៊ូតដែលពនឺ កាត់បន្ថយការតភ្ជាប់ក្នុងបណ្តាញខួរក្បាល ។

ការតភ្ជាប់គឺជាសមត្ថភាពក្នុងការទំនាក់ទំនងប្រកបដោយប្រសិទ្ធភាពរវាងតំបន់ខួរក្បាលផ្សេងៗគ្នាអ្នកស្រាវជ្រាវបានរូបភាពសកម្មភាពខួរក្បាលចំពោះមនុស្សពេញវ័យ ២៥ នាក់ដោយប្រើរូបភាពអនុភាពម៉ាញេទិកមុខងារ (fMRI) ។ លទ្ធ ផលនៃការសិក្សាបានបង្ហាញថា បន្ទាប់ពីអ្នកចូលរួមក្នុងការ សិក្សាបានធ្វើលំហាត់ប្រាណក្នុងខ្យល់បរិសុទ្ធការតភ្ជាប់ក្នុងបណ្តាញខួរក្បាលបានកើនឡើងជាបណ្ដោះអាសន្ន ទោះយ៉ាងណាក៏ដោយ បន្ទាប់ពីការប៉ះពាល់នឹងខ្យល់ដែលបំពុលមានប៉ះពាល់តភ្ជាប់ខួរក្បាល ។

អ្នកស្រាវជ្រាវក៏បានពិនិត្យមើលផលប៉ះពាល់នៃផ្សែងឡានម៉ូតូ ទៅលើតំបន់ដែលមិនមែនជាលំនាំ ដើមនៃខួរក្បាល (DMN) ដែលជាតំបន់ខួរក្បាលដែលត្រូវបានផ្សារភ្ជាប់ជាមួយ នឹងគំនិតខាងក្នុងរបស់មនុស្សនោះ។ រងផលប៉ះពាល់ដោយការរំញោចខាងក្រៅ ហើយតាមការស្រាវជ្រាវបង្ហាញថា អ្នកអាចកើតមានជំងឺវិកលចរិក, ជំងឺធ្លាក់ទឹកចិត្តមានការផ្លាស់ប្តូរគួរឱ្យកត់សម្គាល់នៅក្នុង DMN ។

យ៉ាងណាមិញ នៅក្នុងជីវិតពិត មនុស្សត្រូវបានប៉ះពាល់នឹងកំហាប់ខ្ពស់នៃការបំពុលបរិយាកាសក្នុង រយៈពេលយូរ។ ក្នុងពេលជាមួយគ្នានេះ ការសិក្សាមិនអាចបង្ហាញឱ្យច្បាស់ពីរបៀបដែលផ្សែងឡាន ម៉ូតូអាចបណ្តាលឱ្យមានការផ្លាស់ប្តូរដែលបានសង្កេតឃើញនៅក្នុងការតភ្ជាប់បណ្តាញខួរក្បាល ៕

ប្រែសម្រួល៖នាងតូច

ចុចអាន៖រោគសញ្ញាទាំង ៥ បង្ហាញថា អ្នកកំពុងទទួលរង “ជំងឺថប់បារម្ភ”

The post មកដឹងពីផលប៉ះពាល់នៃផ្សែងពុល ចំពោះខួរក្បាល appeared first on Kampuchea Thmey Daily.

អាហារល្អៗទាំង ៥ ជួយពង្រឹងសុខភាពខួរក្បាលកាន់តែប្រសើរ

Sonya — Thu, 25 Nov 2021 06:18:00 +0000

រាងកាយរបស់យើងត្រូវការសារធាតុInositol ដែលគេស្គាល់ថាជាវីតាមីនB8 ក្នុងបរិមាណតិចតួច ដើម្បីទទួលបានសុខភាពល្អ និងបំពេញមុខងារប្រកបដោយប្រសិទ្ធភាព។ ខួរក្បាល បេះដូង និងកញ្ចក់ភ្នែកមានកំហាប់សារធាតុInositolខ្ពស់បំផុត ទោះបីជាត្រូវវីតាមីននេះបានចែកចាយនៅក្នុងជាលិការាងកាយផ្សេងទៀតក៏ដោយ នេះបើយោងតាមវិទ្យាស្ថានអាហារូបត្ថម្ភកីឡារបស់ប្រទេសកាណាដា(Canadian Academy of Sports Nutrition)។

យ៉ាងណាមិញ ជាតិកាហ្វេអ៊ីនអាចធ្វើឲ្យសារធាតុនេះរលាយ និងអាចបង្កជាកង្វះសារធាតុInositol។ ដូច្នេះហើយ ដើម្បីបំពេញបន្ថែមសារធាតុInositolដែលខ្វះខាត ក៏ដូចជាពង្រឹងសុខភាពខួរក្បាល គ្នាយើងគប្បីញ៉ាំរបបអាហារខាងក្រោមនេះ។

១. សណ្ដែក

សណ្ដែកជាអាហារដែលផ្ទុកសារធាតុ Inositolដ៏ល្អបំផុត នេះបើយោងតាមការសិក្សារបស់ទស្សនាវដ្ដីអាមេរិកផ្នែកអាហារូបត្ថម្ភវេជ្ជសាស្ត្រ (The American Journal of Clinical Nutrition) ហើយសណ្ដែកក៏ជាប្រភពនៃជាតិសរសៃដ៏ល្អចំពោះបេះដូងផងដែរ។

២. អង្ករសម្រូប

ជាមួយគ្នានេះដែរ អង្ករសម្រូបក៏ជាប្រភពនៃសារធាតុInositolដ៏អស្ចារ្យ។ អង្ករប្រភេទនេះផ្ដល់តម្លៃប្រចាំថ្ងៃ (DV)ចំនួន៤៣ភាគរយនៃម៉ង់ហ្គាណែស ដែលជាសារធាតុចិញ្ចឹមសំខាន់ និងដើរតួនាទីប្រឆាំងនឹងអុកស៊ីតកម្ម ធ្វើមេតាប៉ូលីស បង្កើតឆ្អឹង និងឆ្អឹងខ្ចី ព្រមទាំងជួយឲ្យរបួសឆាប់ជាសះស្បើយ។

៣. គ្រាប់ធញ្ញជាតិ

ពពួកគ្រាប់ធញ្ញជាតិមានផ្ទុកសារធាតុ Inositolខ្ពស់។ ជាក់ស្ដែង គ្រាប់ធញ្ញជាតិជាជម្រើសអាហារសុខភាព ហើយអ្នកញ៉ាំគ្រាប់ធញ្ញជាតិ និងគ្រាប់ពូជតិចតួចត្រូវបានផ្សារភ្ជាប់នឹងការស្លាប់ទាក់ទងនឹងរបបអាហាររបស់មនុស្សពេញវ័យចំនួន៨,៥ភាគរយ ដែលបណ្ដាលមកពីជំងឺបេះដូង ជំងឺទឹកនោមផ្អែមប្រភេទ២ និងគ្រោះថ្នាក់សរសៃឈាមខួរក្បាល។ឮ

៤. ផ្លែចេក

ផ្លែឈើមួយប្រភេទទៀតដែលសម្បូរទៅដោយសារធាតុ Inositol គឺផ្លែចេក ហើយនៅក្នុងផ្លែចេកមួយផ្លែធំមានតម្លៃប្រចាំថ្ងៃនៃប៉ូតាស្យូមចំនួន១០ភាគរយ។

៥. ស្ពៃក្ដោប

ស្ពៃក្ដោប ក៏ជាប្រភពនៃសារធាតុ Inositol ដែលយើងមិនគួរមើលរំលងដែរ។ ជាធម្មតា បន្លែ និងផ្លែឈើស្រស់មានសារធាតុ Inositol ច្រើនជាងផលិតផលកំប៉ុង ឬបង្កង។ ចំពោះស្ពៃក្ដោបចំនួន ៨៩ក្រាម មានផ្ទុកតម្លៃប្រចាំថ្ងៃចំនួន ៥៦%នៃវីតាមីនK ដែលមានសារសំខាន់សម្រាប់បញ្ចៀសបញ្ហាកំណកឈាម និងជួយឲ្យឆ្អឹងរឹងមាំ៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ មើមឈូកជួយសុខភាពស្បែក ខួរក្បាល និងប្រព័ន្ធភាពស៊ាំ

ចុចអាន៖ ទម្លាប់សាមញ្ញទាំង៧ បំផ្លាញសុខភាពខួរក្បាលដោយមិនដឹងខ្លួន

The post អាហារល្អៗទាំង ៥ ជួយពង្រឹងសុខភាពខួរក្បាលកាន់តែប្រសើរ appeared first on Kampuchea Thmey Daily.

ដុះសាច់ក្នុងខួរក្បាល គ្រោះថ្នាក់ដល់ជីវិតអត់?

សាង ស្រីល័ក្ខ — Sat, 30 Oct 2021 04:50:00 +0000

ដូចដឹងស្រាប់ ខួរក្បាលជាផ្នែកមួយសំខាន់បំផុត ជាកន្លែងប្រមូលផ្តុំប្រព័ន្ធប្រសាទ បញ្ជាគ្រប់សរីរាង្គក្នុងរាងកាយ បើខួរក្បាលមានបញ្ហាអ្វីមួយ ភាពប្រក្រតីនឹងកើតឡើងចំពោះយើងដូចគ្នា។ ធ្លាប់ឮដុះសាច់ក្នុងខួរក្បាលអត់? គ្នាយើងច្បាស់ជាធ្លាប់ហើយ គ្រាន់តែមិនដឹងថា វាគ្រោះថ្នាក់ប៉ុនណា អាចស្លាប់ដែរអត់? ម្យ៉ាងជំងឺនេះកើតមិនរើសវ័យ រើសភេទទេ អាចកើតមានគ្រប់ពេល។ អ៊ីចឹង គួរស្វែងយល់ទាំងអស់គ្នា។

១- ប្រភេទដុំសាច់ដុះក្នុងខួរក្បាល

ដុះសាច់ក្នុងខួរក្បាល មិនមែនសុទ្ធតែបណ្ដាលឲ្យស្លាប់ទាំងអស់នោះទេ ដោយសាច់ដុះក្នុងខួរក្បាលត្រូវចែកជា ៤កម្រិត ហើយដុំសាច់កម្រិតទី ១ និងទី ២ មានភាគរយតិចតួចវិវត្តទៅជាមហារីក។ ប៉ុន្តែដុំសាច់ខួរក្បាលមានគ្រោះថ្នាក់បំផុត (សាច់កាច) គឺស្ថិតក្នុងកម្រិតទី ៣ ឬទី ៤ អាចវិវត្តជាមហារីក។ ដុំសាច់កាចភាគច្រើន គឺរាលដាលមកពីតំបន់ផ្សេងក្នុងរាងកាយ និងបន្តទៅដល់ខួរក្បាល។

២- ធ្វើម៉េចអាចដឹងថាមានដុំសាច់គ្រោះថ្នាក់ដល់ស្លាប់?

អាស្រ័យទៅលើទីតាំង និងទំហំរបស់ដុំសាច់ ខណៈរោគសញ្ញាផ្សេងៗពាក់ព័ន្ធករណីដុះសាច់ក្នុងខួរក្បាល រួមមាន ឧស្សាហ៍ឈឺក្បាលរ៉ាំរ៉ៃ ប្រកាច់ ក្អួតចង្អោររ៉ាំរ៉ៃ និងងងុយគេង។

គ្នាយើងដែលមានបញ្ហាដុំសាច់ ក្នុងកម្រិតអាចឈានដល់ស្លាប់ តែងរងផលប៉ះពាល់ខ្លាំងទៅលើផ្នែកចងចាំ ប្រែប្រួលបុគ្គលិកលក្ខណៈ កាយសម្បាទាទន់ខ្សោយ ឬពិការផ្នែកណាមួយនៃរាងកាយ ភ្នែកមើលមិនឃើញ និងនិយាយមិនចេញជាដើម។

បើសម្គាល់មានរោគសញ្ញាទាំងនេះ ប្រញាប់ទៅជួបគ្រូពេទ្យជាបន្ទាន់ បើទោះមិនមែនជាដុំសាច់ក្នុងខួរក្បាលក៏ដោយ តែអាចមានបញ្ហាសុខភាពផ្សេងទៀត ទាមទារការព្យាបាលឲ្យបានទាន់ពេលវេលា។

៣- ប្រភេទដុំសាច់កាច

ករណីភាគច្រើន ដុំសាច់កាច តែងលូតលាស់ចេញពីជាលិកាប្រព័ន្ធប្រសាទ ដែលជាកោសិកាគាំទ្រកោសិកាសរសៃប្រសាទរបស់ខួរក្បាល ហើយត្រូវគេឲ្យឈ្មោះថា Gliomas ដោយសណ្ឋានជាកោសិកាតូចៗ អាស្រ័យតាមប្រភពរបស់វា ហើយកោសិកាទាំងនោះមានដូចជា៖

– Astrocytoma មានប្រភពចេញពីកោសិកាដែលជារចនាសម្ព័ន្ធនៃខួរក្បាល។
– Oligodendroglioma មានប្រភពចេញពីកោសិកាដែលផលិតខ្លាញ់គ្របដណ្ដប់សរសៃប្រសាទ។
– Ependymoma មានប្រភពចេញពីកោសិកាប្រហោង ដែលជាសរីរាង្គសម្រាប់ផ្ទុកខួរក្បាល។

យ៉ាងណា ដុំសាច់កាច អាចកើតចេញពីផ្នែកផ្សេងៗទៀតរបស់ខួរក្បាលដូចគ្នា។

៤- វិធីព្យាបាលដុំសាច់កាចក្នុងខួរក្បាល

ដុំសាច់កាចដុះក្នុងខួរក្បាល តម្រូវឲ្យមានការព្យាបាលទាន់ពេលវេលា បើយឺតយ៉ាវអាចធ្វើឲ្យដុំសាច់រីករាលដាលពេញខួរក្បាល និងធ្វើឲ្យប៉ះពាល់ដល់តំបន់ខួរឆ្អឹងខ្នងទៀតផង។

បើធ្វើរោគវិនិច្ឆ័យឃើញថា មានសាច់កាចដុះក្នុងខួរក្បាល ចាំបាច់ត្រូវវះកាត់យកដុំសាច់ចេញឲ្យបានឆាប់បំផុតតាមអាចធ្វើទៅបាន។ ក្នុងករណីវះកាត់មិនអាចយកកោសិកាមហារីកចេញបានទេ ការព្យាបាលដោយប្រើកាំរស្មី ឬគីមីនឹងត្រូវធ្វើឡើង ដើម្បីកាត់បន្ថយការកើតមានឡើងវិញនៃកោសិកាមហារីក។

ទោះជាយ៉ាងណា ដុំសាច់កាចនេះទំនងជានឹងត្រឡប់មកវិញ ហើយវិវត្តទៅជាដុំសាច់មហារីក និងរាលដាលទៅកន្លែងផ្សេង។ ក្នុងស្ថានភាពបែបនេះ យើងមិនអាចព្យាបាលឲ្យជាសះស្បើយបានទេ គឺគ្រាន់តែអាចព្យាបាលដើម្បីបន្ថយរោគសញ្ញា និងពន្យារអាយុជីវិតប៉ុណ្ណោះ។

៤- ទម្លាប់ខ្លួនជាមួយដុំសាច់ខួរក្បាល

ជាការពិតណាស់ ពេលដឹងថា ខ្លួនយើងមានសាច់ដុះក្នុងខួរក្បាល ច្បាស់ជាធ្វើឲ្យយើងពិបាកនឹងបន្តរស់នៅជាមួយវា ធ្វើឲ្យយើងមានការថប់បារម្ភ និងបាក់ទឹកចិត្តមិនខាន។ ប៉ុន្តែបើយើងដឹងថាមានវិធីព្យាបាល ក៏ដូចជាយល់ដឹងគ្រប់គ្រាន់ពីដុំសាច់ទាំងនោះ វាអាចជួយឲ្យជីវិតយើង សប្បាយរីករាយឡើងវិញបាន ហេតុនេះកុំស្ទាក់ស្ទើរសាកសួរព័ត៌មាន ពីក្រុមគ្រូពេទ្យ ដើម្បីជួយយើងធ្វើការសម្រេចចិត្តត្រឹមត្រូវពីវិធីថែទាំសុខភាព បើទោះជាត្រូវរស់នៅជាមួយដុំសាច់ក៏ដោយ៕

អត្ថបទផ្ដល់ដោយ៖ Hello Krupet

ចុចអាន៖ប្រយ័ត្ន បើធ្វើរឿងទាំងនេះ ធ្វើឲ្យខួរក្បាលស្ពឹក និងងាប់កោសិកា

The post ដុះសាច់ក្នុងខួរក្បាល គ្រោះថ្នាក់ដល់ជីវិតអត់? appeared first on Kampuchea Thmey Daily.

ប្រយ័ត្ន បើធ្វើរឿងទាំងនេះ ធ្វើឲ្យខួរក្បាលស្ពឹក និងងាប់កោសិកា

សាង ស្រីល័ក្ខ — Sat, 30 Oct 2021 03:31:47 +0000

ទម្លាប់ក្នុងការរស់នៅ របបអាហារ និងការហាត់ប្រាណ មានឥទ្ធិពលយ៉ាងខ្លាំងមកលើសុខភាពរបស់យើង ទាំងសុខភាពផ្លូវកាយ និងផ្លូវចិត្ត ហើយមានកត្ដាមួយចំនួន បានប៉ះពាល់ដល់ខួរក្បាលរបស់យើងដោយពុំដឹងខ្លួន ដោយធ្វើឲ្យស្ពឹក រកគិតអ្វីពុំឃើញ ឬងាប់កោសិកាខួរក្បាល ដែលបណ្ដាលឲ្យប្រឈមនឹងការភ្លេចភ្លាំង ពេលចាស់ទៅ។

ខាងក្រោមនេះ ជារឿងមួយចំនួន ដែលបណ្ដាលឲ្យខួរក្បាលស្ពឹក និងងាប់កោសិកាខួរក្បាល៖

១. ខ្សោះជាតិទឹក បណ្ដាលឲ្យកោសិកាខួរក្បាលរួញតូច

កោសិកាខួរក្បាល ក៏ដូចកោសិកាផ្សេងៗទៀតក្នុងរាងកាយដែរ ត្រូវការទឹក ដើម្បីបំប៉នពួកវា។ បើរាងកាយខ្សោះជាតិទឹក នោះកោសិកានឹងរួញតូច ហើយបណ្ដាលឲ្យខួរក្បាលដំណើរការមុខងារមិនល្អ។

២. គ្រឿងស្រវឹង គ្មានផ្ដល់ផលល្អណាមួយដល់ខួរក្បាលទេ

កោសិកាខួរក្បាល នឹងរួញតូច នៅពេលវារងការប៉ះពាល់ដោយគ្រឿងស្រវឹង ហើយក្នុងការសិក្សានានា តាមរយៈការពិនិត្យ CT Scan ក៏រកឃើញដែរថា ខួរក្បាលរួញតូច ដោយសារតែគ្រឿងស្រវឹង។ គ្រឿងស្រវឹង បង្កឲ្យមានការធ្លាក់ចុះវីតាមីន Thiamine ដែលបណ្ដាលឲ្យមានបញ្ហាខួរក្បាលធ្ងន់ធ្ងរ ហៅថា ជំងឺរលាកខួរក្បាល Wernicke។ រោគសញ្ញា រួមមាន ច្រឡំ បញ្ហាសម្រួលសាច់ដុំដែលអាចឈានដល់ដើរមិនរួច និងបញ្ហាចលនាភ្នែក ដោយសារខូចសរសៃប្រសាទ។ ទាំងនេះ អាចវិវត្តទៅការភ្លេចជាអចិន្ត្រៃយ៍ និងអសមត្ថភាពក្នុងការរៀន និងចងចាំអ្វីថ្មីៗ។

៣. Hot Dogs និង Pizza ពាក់ព័ន្ធជាមួយការខូចកោសិកាខួរក្បាល

អាហារប្រភេទ Hot Dogs និង Pizza ស្ថិតនៅក្នុងក្រុមសារធាតុ Advanced Glycation End (ផលិតផលមានស្ករ និងប្រូតេអ៊ីន កម្រិតខ្ពស់)។ ក្រុម AGEs មានការបំបែកមូលេគុលតូចៗ ដែលបង្កការបំផ្លាញជាងពពួករ៉ាឌីកាល់សេរីទៀត។ នៅពេល AGEs ចូលទៅក្នុងសរីរាង្គណា វាបំផ្លាញប្រូតេអ៊ីន តាមរយៈការចងភ្ជាប់ DNA។ នៅពេល DNA ត្រូវចងភ្ជាប់ជាមួយ AGEs វាដំណើរការមុខងារមិនបានល្អ។ ជាងនេះទៅទៀត ពេលប្រូតេអ៊ីនកាន់តែច្រើន បានបំផ្លាញដោយ AGEs នៅក្នុងសរីរាងណាមួយ វាពន្លឿនភាពចាស់ នៅក្នុងសរីរាង្គនោះ។

៤. កម្រិតជាតិស្ករខ្ពស់ក្នុងឈាម

កម្រិតជាតិស្ករខ្ពស់ក្នុងឈាម បណ្ដាលមកពីការញ៉ាំអាហារច្រើនពេក ការញ៉ាំអាហារកែឆ្នៃ ឬការញ៉ាំអាហារមានជាតិស្ករ (Glycemic) ខ្ពស់។ នៅពេលរាងកាយ ទទួលជាតិស្ករកម្រិតខ្ពស់ វាបញ្ចេញអាំងស៊ុយលីនក្នុងបរិមាណច្រើនជាងធម្មតា ចេញពីលំពែងរបស់យើង។ បរិមាណអាំងស៊ុយលីនក្នុងកម្រិតធម្មតា ពុំប៉ះពាល់រាងកាយទេ ប៉ុន្ដែបើកម្រិតខ្ពស់ វាប៉ះពាល់ និងកែប្រែមេតាប៉ូលិស ដោយបង្កឲ្យធាត់ និងរលាក។ វាក៏អាចបង្កការវិវត្តទៅកើតជំងឺទឹកនោមផ្អែមផងដែរ។

កម្រិតជាតិស្ករខ្ពស់ក្នុងឈាម បណ្ដាលឲ្យមានជាតិស្ករ (Glycation) នៅក្នុងជាលិកា ដោយការចងភ្ជាប់ជាលិកា និងការពន្លឿនការបំផ្លាញដោយសារធាតុ AGEs។ ដូចបញ្ជាក់ពីខាងលើ សារធាតុ AGEs នេះ ពាក់ព័ន្ធជំងឺភ្លេចភ្លាំង។

៥. ប្រឹងហាក់ប្រាណខ្លាំង ពេលរាងកាយធ្លាក់ចុះវីតាមីន C និង E

ការហាត់ប្រាណ គឺល្អសម្រាប់សុខភាពរយៈពេលវែង ប៉ុន្ដែក៏មានពពួករ៉ាឌីកាល់សេរីមួយចំនួន ត្រូវបានផលិត នៅពេលហាត់ប្រាណផងដែរ។ ប្រសិនបើយើងមានការធ្លាក់ចុះកម្រិតវីតាមីន C និង E ពេលហាត់ប្រាណ ពពួករ៉ាឌីកាល់សេរី នឹងបង្កការបំផ្លាញសរីរាង្គទាំងអស់ រួមទាំងខួរក្បាលផងដែរ៕

អត្ថបទផ្ដល់ដោយ៖ Hello Krupet

ចុចអាន៖មកដឹងពីមូលហេតុ ដែលធ្វើឲ្យដាច់សរសៃឈាមខួរក្បាល និងរោគសញ្ញា

The post ប្រយ័ត្ន បើធ្វើរឿងទាំងនេះ ធ្វើឲ្យខួរក្បាលស្ពឹក និងងាប់កោសិកា appeared first on Kampuchea Thmey Daily.

បរិភោគអាហារទាំងនេះ ដើម្បីកាត់បន្ថយគ្រោះថ្នាក់សរសៃឈាមខួរក្បាល

Sorn Phanith — Thu, 14 Oct 2021 01:36:07 +0000

ជំងឺគ្រោះថ្នាក់សរសៃឈាមខួរក្បាល គឺជាមូលហេតុចម្បងទីមួយនៃ ពិការភាព នៅទូទាំងសកលលោក ជាពិសេសលើមនុស្សដែលមានអាយុលើសពី ៦៥ឆ្នាំឡើងទៅ។ ក្នុងរវាងកន្លះសតវត្សចុងក្រោយនេះ អត្រានៃជំងឺនេះមានការថយចុះប្រហែល ៤០ភាគរយនៅប្រទេសអភិវឌ្ឍន៍ តែមានការកើនឡើង ១០០ភាគរយ នៅបណ្តាលប្រទេស ដែលមានចំណូលទាប និងមធ្យម។

ដោយសារតែជំងឺនេះ ភាគច្រើន អាចមានសភាពធ្ងន់ធ្ងរ បណ្តាលឲ្យស្លាប់ ឬក៏បន្សល់នូវភាព ពិការច្រើន ទោះបី បច្ចុប្បន្ននេះមានការព្យាបាលដោយបច្ចេកវិទ្យាទំនើបៗក៏ដោយ ទើបមានការសិក្សាស្រាវជ្រាវជាច្រើន ដើម្បីស្វែងរកវិធីបង្ការកុំឲ្យកើតមានជំងឺនេះ។ កត្តាដែលអាចបង្ការជំងឺគ្រោះថ្នាក់សរសៃឈាមខួរក្បាល ដែលយើងគ្រប់គ្នាអាចអនុវត្តបាន គឺ ការផ្លាស់ប្តូរទម្លាប់មួយចំនួន ក្នុងជីវិតរស់នៅប្រចាំថ្ងៃរបស់យើង(Lifestyle change)។

ក) របបអាហារដែលយើងទទួលទានរាល់ថ្ងៃ៖

– ត្រូវពិសាអាហារដែលមានជាតិអំបិលតិចបំផុត

– ពិសាបន្លែ និងផ្លែឈើឲ្យបានច្រើនមុខ

– ត្រូវបញ្ចូលគ្រាប់ធញ្ញជាតិទៅក្នុងរបបអាហារប្រចាំថ្ងៃរបស់យើង។

វាមានសារៈសំខាន់ណាស់ក្នុងការកាត់បន្ថយជំងឺ Stoke នេះ ដោយការទទួលទានអាហារសុខភាព(Healthy diet) អាចកាត់បន្ថយហានិភ័យនេះបានដោយតាមរយៈ ការការពារជំងឺមួយចំនួនដូចជា:

– ជំងឺលើសឈាម

– ជំងឺទឹកនោមផ្អែម

– លើសជាតិខ្លាញ់

– ជំងឺធាត់

– និងជំងឺសរសៃឈាមបេះដូងជាដើម ល…

ខ) តើត្រូវធ្វើលំហាត់ប្រាណបែបណា ទើបគ្រប់គ្រាន់និងត្រឹមត្រូវ?

ការធ្វើលំហាត់ប្រាណ គឺអាចកាត់បន្ថយជំងឺលើសឈាម និងមូលហេតុបង្កផ្សេងៗទៀត នៃជំងឺសរសៃឈាម។ យើងត្រូវធ្វើលំហាត់ប្រាណឲ្យបានយ៉ាងតិច ៣ ទៅ ៤ដងក្នុងមួយសប្តាហ៍ និងម្ដងៗមានរយៈពេលយ៉ាងតិច ៣០នាទី។

គ) កត្តាផ្សេងៗទៀត ដែលយើងត្រូវយកចិត្តទុកដាក់មានដូចជា៖

– ត្រូវរក្សាលំនឹងទម្ងន់ឲ្យបានសមស្រប

• បុរស: រង្វង់ចង្កេះកុំឲ្យលើសពី ៩០ សង់ទីម៉ែត្រ

• នារី: រង្វង់ចង្កេះកុំឲ្យលើសពី ៨០ សង់ទីម៉ែត្រ

• BMI: សូមឲ្យតិចជាង ២៣គីឡូក្នុងមួយម៉ែត្រការ៉េ (< 23 Kg/m2)

– ត្រូវអញ្ជើញពិនិត្យ និងព្យាបាល ជំងឺលើសឈាម ជំងឺទឹកនោមផ្អែម លើសជាតិខ្លាញ់ និងជំងឺបេះដូងនិងសរសៃឈាមឲ្យបានត្រឹមត្រូវជាមួយវេជ្ជបណ្ឌិតជំនាញ។

សរុបសេចក្តីមក ដើម្បីជៀសវាងពីជំងឺដ៏កាចសាហាវនេះ យើងទាំងអស់គ្នា គប្បីថែរក្សាសុខភាពយើងឲ្យបានល្អ និងត្រូវធ្វើការពិនិត្យសុខភាពឲ្យបានទៀងទាត់ជាមួយនិងក្រុមវេជ្ជបណ្ឌិតជំនាញ៕

អត្ថបទ៖ រស្មី

The post បរិភោគអាហារទាំងនេះ ដើម្បីកាត់បន្ថយគ្រោះថ្នាក់សរសៃឈាមខួរក្បាល appeared first on Kampuchea Thmey Daily.

មកដឹងពីមូលហេតុ ដែលធ្វើឲ្យដាច់សរសៃឈាមខួរក្បាល និងរោគសញ្ញា

Sorn Phanith — Tue, 20 Jul 2021 01:26:25 +0000

ការដាច់សរសៃឈាមខួរក្បាលដោយឯកឯង ដែលបណ្តាលមកពីសម្ពាធឈាមឡើងខ្ពស់ភ្លាមៗគ្រប់គ្រងមិនបានល្អ ហើយដែលនាំឲ្យមានឈាមកកនៅក្នុងខួរក្បាល។

១) ផលវិបាកនៃការដាច់សរសៃឈាមនេះធ្វើឲ្យ

– អ្នកជំងឺមានពិការភាពដោយសារខ្វះឈាមទៅចិញ្ចឹមខួរក្បាលនៅជុំវិញតំបន់នោះ និងដោយការសង្កត់នៃដុំឈាម

– អាចបង្កគ្រោះថ្នាក់ដល់ជីវិតភ្លាមៗ ឫពេលវេលាណាមួយ បើដុំឈាមមានទំហំធំវាអាចធ្វើឲ្យមានការកើនឡើងនៃសម្ពាធក្នុងក្បាល។

២) រោគសញ្ញា

– ឈឺក្បាលខ្លាំង ភ្លាមៗ

– មានសភាពខ្សោយនៃការកម្រើកសាច់ដុំ (ទន់មួយចំហៀងខ្លួន, ដៃ, ជើង ឬមុខ)

– វង្វេងស្មារតី ឬសន្លប់

៣) មូលហេតុ

យើងជួបប្រទះភាគច្រើន គឺបណ្តាលមកពីជំងឺលើសឈាម (៦០-៧០%) គួបផ្សំនឹងកត្តាមួយចំនួនទៀតដូចជា៖

– ជំងឺទឹកនោមផ្អែម

– ការពិសាស្រា និងបារីច្រើន

៤) ការធ្វើរោគវិនិច្ឆ័យ

ដើម្បីបញ្ជាក់ឲ្យដឹងថា លោកអ្នកមានជំងឺដាច់សរសៃឈាមក្នុងខួរក្បាល ឬក៏អត់ លោកអ្នកតម្រូវឲ្យធ្វើ CT Scan ខួរក្បាល ហើយវាអាចបញ្ជាក់ពីទីតាំង និងទំហំនៃដុំឈាមកក ដើម្បីងាយស្រួលអោយគ្រូពេទ្យជ្រើសរើសវិធីសាស្ត្រព្យាបាល។

៥) ការព្យាបាល

ក) ការព្យាបាលដោយការប្រើថ្នាំ (មិនវះកាត់)៖

– គ្រប់គ្រងសម្ពាធឈាមឲ្យបានត្រឹមត្រូវ និងតាមដានជាប់លាប់ជាប្រចាំ

– ការប្រើប្រាស់ថ្នាំបន្ថយការឈឺចាប់

– ការសម្រាក និងដាក់ក្បាលខ្ពស់ ៣០ដឺក្រេ។

ខ) ការព្យាបាលដោយការវះកាត់

គោលបំណងនៃការវះកាត់យកឈាមចេញ គឺជាការបន្ថយសម្ពាធតឹងណែននៅក្នុងក្បាល ដើម្បីជួយជីវិតអ្នកជំងឺ។

យើងធ្វើការវះកាត់នៅពេលដែល៖

– ទំហំនៃដុំឈាមកក (លើសពី ៣៥ សង់ទីម៉ែត្រគីប)

– អ្នកជំងឺស្ថិតក្នុងសភាពសន្លប់ (GCS ៨-១២)

– ដុំឈាមនៅរាក់ប្រហែល ១សង់ទីម៉ែត្រ ពីឆ្អឹង

បច្ចុប្បន្ននេះ មន្ទីរពេទ្យកាល់ម៉ែត ជាមួយនឹងក្រុមការងារចម្រុះគ្រូពេទ្យឯកទេស ផ្នែកវេជ្ជសាស្ត្រប្រសាទសាស្ត្រ និងឯកទេសវះកាត់ខួរក្បាលច្បាស់លាស់ ដែលទទួលបាននូវបទពិសោធន៍ និងការបណ្តុះបណ្តាលជំនាញនៅប្រទេសបារាំងជាច្រើនឆ្នាំ គួបផ្សំនឹងលទ្ធភាពនៃសម្ភារៈបរិក្ខារវះកាត់បច្ចេកវិទ្យាទំនើបៗ បាន និងកំពុងទទួលពិគ្រោះ និងព្យាបាលវះកាត់គ្រប់ករណី និងស្ថានភាពធ្ងន់ធ្ងរនៃជំងឺដាច់សរសៃឈាម ដើម្បីព្យាយាមសង្គ្រោះអាយុជីវិតអ្នកជំងឺយើងប្រកបដោយសុវត្ថិភាព និងប្រសិទ្ធភាពខ្ពស់៕

អត្ថបទ៖ រស្មី

សូមចុចអាន៖ ហេតុបានជាកើតជំងឺកូនពង លើការវិវត្តន៍មិនប្រក្រតី នៃគភ៌របស់ស្ត្រី

The post មកដឹងពីមូលហេតុ ដែលធ្វើឲ្យដាច់សរសៃឈាមខួរក្បាល និងរោគសញ្ញា appeared first on Kampuchea Thmey Daily.

មកដឹងរោគសញ្ញាមួយចំនួន ពីជំងឺដុំសាច់ក្នុងស្រោមខួរក្បាល ដែលអ្នកមិនសូវចាប់អារម្មណ៍

Sorn Phanith — Wed, 14 Jul 2021 01:43:02 +0000

ក) តើជំងឺនេះមានរោគសញ្ញាអ្វីខ្លះ?

– ការរីកលូតលាស់របស់ដុំសាច់នេះមានសភាពយឺតយ៉ាវ ដូច្នេះរោគសញ្ញារបស់វាអាស្រ័យទៅតាមទំហំ និង ទីកន្លែងរបស់វា។

– រោគសញ្ញាដែលជួបប្រទះញឹកញាប់ដូចជា៖

• ឈឺក្បាល

• ប្រកាច់

• មើលពុំច្បាស់

• ភាពខ្សោយអវយវៈ

• និងប្រសិនបើដុំសាច់នោះធំខ្លាំងអាចបណ្តាលឲ្យសន្លប់បាត់ស្មារតី។

ខ) មូលហេតុ៖

រហូតមកដល់បច្ចុប្បន្ននេះ គ្មានការស្រាវជ្រាវណា ដែលបញ្ជាក់ពីមូលហេតុច្បាស់លាសរបស់ជំងឺនេះទេ។

គ) តើមានមធ្យោបាយអ្វីដែលអាចឲ្យយើងដឹងថាមានដុំសាច់ប្រភេទនេះ?

– កាថតដោយម៉ាស៊ីន CT Scan ឬ MRI អាចឲ្យយើងធ្វើរោគវិនិច្ឆ័យបាន។

ឃ) ការព្យាបាល៖

– ការវះកាត់ជាមធ្យោបាយ និងជាជម្រើសដំបូងបំផុត ដើម្បីព្យាបាលដុំសាច់ប្រភេទនេះ ហើយប្រសិនបើការវះកាត់នោះពុំអាចយកដុំសាច់នោះចេញអស់ យើងត្រូវបន្តការព្យាបាលដោយបាញ់កាំរស្មី ( Radiation )។ លើសពីនេះទៅទៀត ប្រសិនបើដុំសាច់នេះតូច ហើយស្ថិតនៅទីកន្លែងដែលលំបាក និងគ្រោះថ្នាក់បំផុត គេអាចធ្វើការព្យាបាលដោយ Radiosurgery ។

ដូចនេះប្រសិនបើលោកអ្នកមានអាការ និងរោគសញ្ញាដូចបានជម្រាបជូន សូមមកជួបជាមួយវេជ្ជបណ្ឌិតជំនាញនៅមន្ទីរពេទ្យកាល់ម៉ែត ដើម្បីធ្វើរោគវិនិច្ឆ័យ និងទទួលការព្យាបាលដោយបច្ចេកវិទ្យាទំនើប ប្រកបដោយជោគជ័យ និងប្រសិទ្ធភាពខ្ពស់។

សូមធ្វើការតាមដានវីដេអូ ដែលអត្ថាធិប្បាយលំអិតដោយគ្រូពេទ្យជំនាញអំពីការវះកាត់នៃជំងឺដុំសាច់របស់ស្រោមខួរក្បាលនូវការផ្សព្វផ្សាយនៅលើកក្រោយទៀត៕

អត្ថបទ៖ រស្មី

សូមចុចអាន៖ ប្រយ័ត្ន បើធ្វើរឿងទាំងនេះ ធ្វើឲ្យខួរក្បាលស្ពឹក និងងាប់កោសិកា

The post មកដឹងរោគសញ្ញាមួយចំនួន ពីជំងឺដុំសាច់ក្នុងស្រោមខួរក្បាល ដែលអ្នកមិនសូវចាប់អារម្មណ៍ appeared first on Kampuchea Thmey Daily.

ជំងឺឈាមកកស្រួចស្រាវចន្លោះស្រោមខួរ

Sorn Phanith — Wed, 30 Jun 2021 02:16:01 +0000

ជំងឺឈាមកកស្រួចស្រាវចន្លោះស្រោមខួរ ខួរក្បាល(Acute Subdural Hematoma) គឺជាការកកឈាមក្រោយពីការប៉ះទង្គិចរហូតដល់រយៈពេលមួយអាទិត្យ ហើយក៏ជាប្រភេទជំងឺធ្ងន់ធ្ងរជាងគេក្នុងចំណោមជំងឺឈាមកកចន្លោះស្រោមខួរទាំងអស់(subdural hematoma)។

ជាទូទៅវាកើតឡើងបន្ទាប់ពីរងរបួសក្បាលធ្ងន់ធ្ងរ ដោយសារគ្រោះថ្នាក់ចរាចរណ៍ ដែលអ្នកបើកបរភាគច្រើន បើកបរក្នុងសភាពស្រវឹងជោគជាំ មិនមានមួកសុវត្ថិភាព ការបើកបរលើសល្បឿនកំណត់ ការធ្លាក់ពីលើទីខ្ពស់ និងការរអិលដួលបោកក្បាលជាដើម។ល។ ជំងឺនេះ ទាមទារឲ្យអ្នកជំងឺចូលសម្រាកក្នុងមន្ទីរពេទ្យជាបន្ទាន់ ហើយមួយភាគធំនៃអ្នកជំងឺអាចឈានទៅដល់ការវះកាត់យកឈាមកកចេញ។

ការប៉ះទង្គិចក្បាលធ្ងន់ធ្ងរ ធ្វើឲ្យខួរក្បាលរបស់មនុស្សខូចដោយសារមូលហេតុចំនួន៣៖

– បណ្ដាលមកពីការបែកសរសៃវែន ដែលជាសរសៃនាំឈាមចេញពីខួរក្បាលទៅបេះដូង និងសួត

– បណ្ដាលមកពីការបែកសរសៃអាកទែ ដែលជាអ្នកនាំឈាមពីបេះដូងទៅកាន់ខួរក្បាល

– ការខូចខាតដល់ជាលិកាខួរក្បាល ដែលបណ្ដាលឲ្យមានការហូរឈាមក្នុងខួរក្បាល

ទន្ទឹមគ្នានេះដែរ ការសង្កត់របស់ដុំឈាមទៅលើខួរក្បាលបានបន្ថយ និងបង្អាក់នូវលំហូររបស់សរសៃឈាមខួរក្បាល ហើយជាលទ្ធផលវានឹងធ្វើឲ្យមានការហើម និងខូចខាតយ៉ាងខ្លាំងដល់ខួរក្បាល ដែលជាមជ្ឈមណ្ឌលបញ្ជាវិញ្ញាណទាំងប្រាំរបស់យើង។

ក) ការប៉ះពាល់៖

ជំងឺឈាមកកស្រួចស្រាវចន្លោះស្រោមខួរ ASH មានហានិភ័យខ្ពស់រហូតអាចបណ្តាលឲ្យអ្នកជំងឺបាត់បងជីវិតបាន។ អាយុគឺជាកត្តាសំខាន់ដែលប៉ះពាល់ដល់ការវិវត្តន៍របស់អ្នកជំងឺ៖

– អាយុក្រោម ៤០ឆ្នាំមានហានិភ័យ ២០% នៃការស្លាប់

– អាយុចាប់ពី ៣០ឆ្នាំទៅ ៤០ឆ្នាំមានហានិភ័យ ៦៥% នៃការស្លាប់

– ចាប់ពី ៨០ឆ្នាំឡើងទៅមានហានិភ័យនៃការស្លាប់ ៨៨%

ការជាសះស្បើយពីជំងឺនេះត្រូវអាស្រ័យលើកត្តាជាច្រើន ក្នុងនោះមានដូចជាដុំឈាមតូចឬធំ ការមកដល់មន្ទីរពេទ្យលឿនឬក៏យឺត។ ជួនកាលអ្នកជំងឺត្រូវញាំញីដោយស្លាកស្នាមរបួសដែលជាសំណល់របស់ជំងឺនេះទាំងផ្លូវកាយ និងផ្លូវចិត្តជារៀងរហូតក៏មានដែរ។

ខ) រោគសញ្ញា៖

រោគសញ្ញានៃជំងឺឈាមកកស្រួចស្រាវនៅក្នុងស្រទាប់ខួរក្បាល ASH អាចកើតឡើងយ៉ាងឆាប់រហ័សបន្ទាប់ពីការប៉ះទង្គិចក្បាល មានដូចជា៖

– ការឈឺក្បាលខ្លាំង ឬតិច

– ការក្អួតចង្អោរ ឬមានអារម្មណ៍មិនស្រណុក

– ការវង្វេង

– ការផ្លាស់ប្ដូរបុគ្គលិកលក្ខណៈ ឬផ្លាស់ប្តូរអារម្មណ៍ភ្លាមៗ

– ទន់ត្របកភ្នែក ងងុយជាប់រហូត

– ពិបាកនិយាយ ឬនិយាយមិនចេញ

– ការមើលឃើញព្រិលៗ ឬបែករូបភាពជាពីរ

– ទន់ ឬពិការមួយចំហៀងខ្លួន

– ការបាត់បង់ស្មារតី ឬសន្លប់

គ) ការព្យាបាល៖

ការព្យាបាលអាស្រ័យទៅលើដុំកំណកឈាម ឈាមដែលមានទំហំតូច ភាគច្រើនអាចព្យាបាលដោយថ្នាំ និងការតាមដាន។ រីឯដុំឈាមដែលមានទំហំចាប់ពី១០មីលីម៉ែត្រ ឬធំជាងនេះ នឹងត្រូវធ្វើការវះកាត់យកចេញដោយក្រុមវេជ្ជបណ្ឌិតជំនាញ និងមានការតាមដានយ៉ាងយកចិត្តទុកដាក់បំផុត។

ចំណែកឯការជាសះស្បើយពីជំងឺមិនដូចគ្នាទាំងអស់នោះទេ ពេលខ្លះអ្នកជំងឺត្រូវចំណាយពេលមួយឆ្នាំ ឬច្រើនជាងនេះ ដើម្បីស្ដារលទ្ធភាពពលកម្មឲ្យបានជាសះស្បើយមកវិញជាមួយក្រុមគ្រូពេទ្យព្យាបាលដោយចលនា(physiotherapists) ក្រុមគ្រូពេទ្យព្យាបាលសំឡេង (speech therapists)ផងដែរ។ ចូរចាំថាអ្នកជំងឺអាចនឹងផ្លាស់ប្ដូរជារៀងរហូតនូវសភាពផ្លូវកាយ ផ្លូវចិត្ត និងការចងចាំរបស់គាត់។

“ប្រសិនបើលោកអ្នកបន្ទាប់ពីមានការប៉ះទង្គិចក្បាល ហើយមានរោគសញ្ញារឬអាការៈដូចដែលបានរៀបរាប់ខាងលើ សូមមកកាន់មន្ទីរពេទ្យកាល់ម៉ែតជាបន្ទាន់ ដើម្បីស្វែងរកជំងឺឈាមកកក្នុងខួរក្បាលឬស្រទាប់ខួរក្បាល និងធ្វើការព្យាបាលឲ្យបានទាន់ពេល”៕

អត្ថបទ៖ រស្មី

សូមចុចអាន៖ អាហារទាំងនេះ សក្ដិសមបំផុតសម្រាប់អ្នកមានជំងឺទឹកនោមផ្អែម គួរតែហូបជាប្រចាំថ្ងៃ

The post ជំងឺឈាមកកស្រួចស្រាវចន្លោះស្រោមខួរ appeared first on Kampuchea Thmey Daily.

សុខភាពខួរក្បាល Archives - Kampuchea Thmey Daily

មកដឹងពីផលប៉ះពាល់នៃផ្សែងពុល ចំពោះខួរក្បាល

អាហារល្អៗទាំង ៥ ជួយពង្រឹងសុខភាពខួរក្បាលកាន់តែប្រសើរ

១. សណ្ដែក

២. អង្ករ​សម្រូប

៣. គ្រាប់​ធញ្ញជាតិ​

៤. ផ្លែ​ចេក​

៥. ស្ពៃ​ក្ដោប

ដុះសាច់ក្នុងខួរក្បាល គ្រោះថ្នាក់ដល់ជីវិតអត់?

ប្រយ័ត្ន បើធ្វើរឿងទាំងនេះ ធ្វើឲ្យខួរក្បាលស្ពឹក និងងាប់កោសិកា

បរិភោគអាហារទាំងនេះ ដើម្បីកាត់បន្ថយគ្រោះថ្នាក់សរសៃឈាមខួរក្បាល

មក​ដឹង​ពី​មូល​ហេតុ ដែល​ធ្វើ​ឲ្យដាច់​សរសៃ​ឈាម​ខួរ​ក្បាល និង​រោគសញ្ញា

មក​ដឹងរោគសញ្ញាមួយចំនួន ពីជំងឺ​ដុំ​សាច់​ក្នុងស្រោម​ខួរក្បាល​ ដែល​អ្នកមិនសូវចាប់អារម្មណ៍

ជំងឺ​ឈាមកក​ស្រួចស្រាវ​ចន្លោះ​ស្រោមខួរ​

២. អង្ករសម្រូប

៣. គ្រាប់ធញ្ញជាតិ

៤. ផ្លែចេក

៥. ស្ពៃក្ដោប

មកដឹងពីមូលហេតុ ដែលធ្វើឲ្យដាច់សរសៃឈាមខួរក្បាល និងរោគសញ្ញា

មកដឹងរោគសញ្ញាមួយចំនួន ពីជំងឺដុំសាច់ក្នុងស្រោមខួរក្បាល ដែលអ្នកមិនសូវចាប់អារម្មណ៍

ជំងឺឈាមកកស្រួចស្រាវចន្លោះស្រោមខួរ