សុខភាពស្រ្ដី Archives - Kampuchea Thmey Daily

ស្ត្រីៗ ត្រូវដឹងពីប្រភេទអាហារ សម្រាប់ជំនួយដល់សុខភាពទ្វារមាស

សាង ស្រីល័ក្ខ — Wed, 15 Jun 2022 01:10:00 +0000

សព្វថ្ងៃមានស្ត្រីជាច្រើនផ្ទុកបញ្ហារោគស្ត្រី ដោយសារតែពួកគាត់មិនសូវយល់ដឹងអំពីការថែទាំ ជាពិសេសអនាម័យការរស់នៅ និងការហូបចុក អ្វីដែលស្ត្រីតែងតែធ្វើខុសនោះគឺ ជ្រើសរើស ផលិតផលគ្មានស្តង់ដារ ហើយគ្មានគុណភាពមកប្រើប្រាស់លើតំបន់ពិសេសនោះ រួចនាំឲ្យគាត់មានបញ្ហារោគស្ត្រីធ្ងន់ធ្ងរលើសដើម អាចឈានដល់ថ្នាក់មិនអាចមានគត៌បានទៀត។ ខាងក្រោមនេះ ជាពពួកអាហារដែលអាចថែរក្សាសុខភាពទ្វារមាស ឲ្យរឹងមាំមានសុខភាពល្អ៖

១. ពពួកប្រូប៊ីយ៉ូទិច និងយ៉ាអ៊ួធម្មជាតិ

ក្រុមអាហារដែលមានប្រូប៊ីយ៉ូទិចពីធម្មជាតិ គឺពិតជាមានគុណប្រយោជន៍ក្នុងការថែរក្សាសុខភាពទ្វារមាសរបស់មិត្តនារី។ ចំណែកឯយ៉ាអ៊ួធម្មជាតិវិញ ក៏ប្រៀបបានជារនាំងការពារបញ្ហាឆ្លងរោគផ្សេងៗ ព្រមទាំងប្រយុទ្ធប្រឆាំងនឹងជំងឺមួយចំនួនផងដែរ។

២. ផ្លែប៊័រ

ជាមួយនឹងបិរមាណច្រើននៃប៉ូតាស្យូម និង វីតាមីនB6 ផ្លែប៊័រជាជំនួយដ៏ល្អក្នុងការផលិតទឹករំអិលធម្មជាតិសម្រាប់ការពារភាពស្ងួតនៅតំបន់ទ្វារមាស។

៣. ដំឡូងជ្វា

ដំឡូងជ្វាសម្បូរទៅដោយវីតាមីន និងសារធាតុចិញ្ចឹមជាច្រើនរួមមានវីតាមីនA C និង B សារធាតុសរសៃ ម៉ាញេស្យូម និងប៉ូតាស្យូមដែលជួយពង្រឹងសុខភាពទ្វារមាស ក៏ដូចជាបង្កើននូវសារធាតុប្រឆាំងអុកស៊ីតកម្ម។

៤. គ្រាប់ល្ពៅ និងគ្រាប់ធញ្ញជាតិ

ជាមួយនឹងវីតាមីនE និងសារធាតុស័ង្កសី ការទទួលទានគ្រាប់ល្ពៅ នឹងជួយឲ្យមិត្តនារីមានវដ្ដរដូវទៀងទាត់ និងមិនមានបញ្ហារំខាន ឬរមាស់នៅតំបន់ពិសេសរបស់ខ្លួន។ ម្យ៉ាងទៀត វាក៏បង្ការបញ្ហាស្ងួត និងអាការៈឈឺចាប់ពេលមករដូវផងដែរ។

៥. ខ្ទឹមស

ខ្ទឹមសមិនត្រឹមតែបង្ការបញ្ហាធ្លាក់ស រមាស់ និងក្លិនមិនល្អប៉ុណ្ណោះទេ វាក៏ជួយការពារទ្វារមាសពីការឆ្លងមេរោគ ជាពិសេសមេរោគផ្សិតទៀតផង។

៦. ផលិតផលសណ្តែក

សារធាតុដែលមាននៅក្នុងផលិតផលសណ្តែក ជំរុញដំណើរផលិតទឹករំអិលធម្មជាតិ និងការពារអាការៈឈឺចាប់ក្នុងពេលមករដូវ។

៧. បន្លែបៃតង

បរិមាណដ៏ច្រើននៃវីតាមីនA និងC នៅក្នុងបន្លែបៃតងជួយជំរុញដំណើរចលនាក្នុងឈាម បង្ការពីមេរោគឆ្លងនិងការពារបញ្ហាស្ងួតនៅតំបន់ទ្វារមាស។

ការហូបចុកល្អតែមួយមុខមិនគ្រប់គ្រាន់ទេ អ្នកក៏ត្រូវការលំហាត់ប្រាណ និងការរស់នៅស្អាតផងដែរទើបវាមានប្រសិទ្ធិភាពខ្ពស់។ សម្រាប់បងអូននារីៗណាដែលមានបញ្ហាធ្លាក់សរ យើងគប្បីប្រើខោទ្រនាប់ធ្វើពីកប្បាស ឬប្រើជាសំឡីប្រចាំថ្ងៃដើម្បីរក្សាអនាម័យតំបន់ពិសេសយើង៕

ប្រែសម្រួល៖ វារី

ចុចអាន៖ដំបៅក្រពះបង្កឡើងដោយមូលហេតុអ្វី? មានរោគសញ្ញាអ្វីខ្លះ?

ចុចអាន៖ស្រីៗខ្លះចេះតែរាករូស អំឡុងពេលមករដូវ ធ្វើម៉េចទើបបាត់?

The post ស្ត្រីៗ ត្រូវដឹងពីប្រភេទអាហារ សម្រាប់ជំនួយដល់សុខភាពទ្វារមាស appeared first on Kampuchea Thmey Daily.

អង្គការ AHF ប្រារព្ធទិវាសុខភាពពេលមករដូវ ខណៈស្រ្តីជួបបញ្ហាប្រឈម ក្នុងវិបត្តិកូវីដ-១៩

KC Virak — Mon, 23 May 2022 04:06:07 +0000

អង្គការមូលនិធិថែទាំសុខភាពអេដស៍កម្ពុជា (AHF) សហការជាមួយអង្គការខេមរា និងស្ថាប័នពាក់ព័ន្ធ បានប្រារព្ធទិវាសុខភាពពេលមករដូវ ថ្ងៃទី២៨ ខែឧសភា ឆ្នាំ២០២២ ដែលផ្តល់សិទ្ធិអំណាចដល់ស្ត្រីទាំងអស់ដែលមករដូវ ដើម្បីចូលរួមយ៉ាងពេញលេញនៅក្នុងសង្គម និងរស់នៅក្នុងជីវិតដែលមានសុខភាពល្អ និងសម្រេចចិត្តដោយខ្លួនឯង ខណៈស្រ្តីលើពិភពលោកបាន និងកំពុងជួបបញ្ហាប្រឈមមួយចំនួន ក្នុងវិបត្តិកូវីដ-១៩។

ការប្រារព្ធទិវានេះ អង្គការ AHF បានរៀបចំយុទ្ធនាការមួយក្រោមប្រធានបទ “បញ្ឈប់ការរើសអើង” ចាប់ពីថ្ងៃទី២០ ដល់ថ្ងៃទី២៨ ខែឧសភា ឆ្នាំ២០២២។

លោកស្រី វេជ្ជបណ្ឌិត ហួយ ស៊ីខេង ប្រធានគ្រប់គ្រងកម្មវិធីប្រចាំប្រទេសកម្ពុជា បានមានប្រសាសន៍ថា ទិវាសុខភាពពេលមករដូវ ត្រូវបានទទួលស្គាល់ទូទាំងពិភពលោក នៅថ្ងៃទី២៨ ខែឧសភា ហើយត្រូវបានបង្កើតឡើងជាលើកដំបូងដោយអ្នកតស៊ូមតិ នៅក្នុងឆ្នាំ២០១៤។

លោកស្រីបានលើកឡើងរបាយការណ៍មកបញ្ជាក់ថា ក្នុងចំណោមមនុស្សជាង ១,៨ ពាន់លាននាក់នៅទូទាំងពិភពលោក ដែលមករដូវ ៥០០ លាននាក់ មិនអាចទទួលបានទីកន្លែងសុវត្ថិភាព និងផលិតផលរក្សាអនាម័យ ដើម្បីគ្រប់គ្រងសុខភាពការមករដូវរបស់ពួកគេ។

លោកស្រីបានបន្តថា កង្វះខាត និងតម្លៃទីផ្សារខ្ពស់ដែលបង្កឡើងដោយជំងឺកូវីដ-១៩ ក៏បានធ្វើឱ្យការទិញផលិតផល អនាម័យកាន់តែលំបាកនៅទូទាំងពិភពលោក ដែលកង្វះខាតទាំងនេះបណ្តាលឱ្យមនុស្សដែលមករដូវមានការលំបាក រួមទាំងការខកខានមិនបានចូលរៀនរហូតដល់ ១៨ ថ្ងៃ ក្នុងឆ្នាំសិក្សារបស់ពួកគេ ការធ្លាក់ទឹកចិត្តដោយសារតែការមាក់ងាយ និងការរើសអើង និងហានិភ័យកាន់តែច្រើន ក្នុងការធ្លាក់ខ្លួនជាជនរងគ្រោះនៃការជួញដូរផ្លូវភេទ។

លោកស្រីបានបន្តទៀតថា នៅក្នុងទិវាសុខភាពពេលមករដូវឆ្នាំនេះ អង្គការ AHF នាំយកសំឡីអនាម័យ ៤ ០០០ ដុំ ចែកជូនដល់សិស្សាសាលានៅស្រុកបាទី និងកម្មការិនីរោចក្រ នៅខណ្ឌកំបូលរាជធានីភ្នំពេញ ដើម្បីចូលរួមលើកកម្ពស់សុខភាពរបស់ពួកគេកា់តែប្រសើរ។

គួរបញ្ជាក់ថា ប្រារព្ធទិវាសុខភាពពេលមករដូវនេះ មានធ្វើនៅលើបណ្តាញសង្គម ចាប់ពីថ្ងៃទី២០ រហូតដល់ថ្ងៃទី២៩ ខែឧសភា ឆ្នាំ២០២២ ផ្សាយបន្តផ្ទាល់ និងសំណួរចម្លើយយករង្វាន់។ នៅថ្ងៃទី២០ ឧសភា ធ្វើនៅវិទ្យាល័យ ហ៊ុន សែន ១មិថុនា ស្ថិតក្នុងស្រុកបាទី ខេត្តតាកែវ។ នៅថ្ងៃទី២១ ឧសភា ធ្វើនៅទីតាំងរោងចក្រ Ocean Apparel Manufacturing Co.,Ltd រាជធានីភ្នំពេញ និងថ្ងៃទី២៨ ឧសភា ធ្វើនៅទីតាំងវិទ្យាល័យហ៊ុន សែន ពងទឹក ខេត្តស្វាយរៀង៕

អត្ថបទ៖ សំអឿន

The post អង្គការ AHF ប្រារព្ធទិវាសុខភាពពេលមករដូវ ខណៈស្រ្តីជួបបញ្ហាប្រឈម ក្នុងវិបត្តិកូវីដ-១៩ appeared first on Kampuchea Thmey Daily.

វដ្ដរដូវអាចប្រែប្រួលទៅតាមវ័យ ស្រីៗយើងគួរដឹង

សាង ស្រីល័ក្ខ — Fri, 11 Feb 2022 09:02:00 +0000

ពិតណាស់ រាងកាយស្រីៗយើងប្រឈមនឹងការប្រែប្រួលជាច្រើន រួមទាំងពណ៌សក់ ស្បែក ក៏ដូចជាវដ្ដរដូវផងដែរ។ ការបញ្ចេញឈាម និងជាលិកាពីក្នុងស្បូន ត្រូវបានកំណត់ដោយអ័រម៉ូន ហើយកម្រិតអ័រម៉ូនក្នុងរាងកាយទាំងនោះ មានការប្រែប្រួលទៅតាមវ័យរបស់យើង។ ដូច្នេះហើយ ការមករដូវក៏មានការប្រែប្រួលដូចគ្នា។

វដ្ដរដូវធម្មតាមានលក្ខណៈយ៉ាងម៉េចខ្លះ?

វដ្ដរដូវមានរយៈពេលពី២៤ ទៅ៣៥ថ្ងៃ
ការធ្លាក់ឈាមប្រចាំខែមានចន្លោះពី៤ ទៅ៨ថ្ងៃ
បរិមាណឈាមរដូវមិនលើស៨០មិល្លីលីត្ររ ប៉ុន្តែបើយើងត្រូវផ្លាស់ប្ដូរសំឡីអនាម័យជារៀងរាល់មួយម៉ោងម្ដង ក្នុងរយៈពេលពីរម៉ោងជាប់គ្នា នេះអាចជាកត្តាដែលគួរឲ្យបារម្ភ។

វដ្ដរដូវក្មេងស្រីជំទង់

ជាទូទៅ ក្មេងស្រីជំទង់ចាប់ផ្ដើមមានរដូវនៅអាយុ១២ឆ្នាំ ប៉ុន្តែការមករដូវមិនទៀងទាត់ឡើយ នៅអំឡុងពេលនេះ។ ជាក់ស្ដែង ក្មេងស្រីជំទង់ត្រូវរង់ចាំរហូតដល់៣ឆ្នាំ ដើម្បីឲ្យវដ្ដរដូវមកទៀងទាត់វិញ។

វដ្ដរដូវនៅវ័យ២០ឆ្នាំ

ការប្រើថ្នាំពន្យារកំណើតម្ដងម្កាល ឬផ្លាស់ប្ដូរវិធីសាស្ត្រក្នុងការពន្យារកំណើត អាចធ្វើឲ្យមានការប្រែប្រួលលំហូរ ឬរយៈពេលនៃការមករដូវ។ យ៉ាងណាមិញ ការបាត់រដូវក្នុងវ័យនេះ អាចជាសញ្ញានៃការមានផ្ទៃពោះ ឬក៏បណ្ដាលមកពីបញ្ហាស្រ្តេស។ ក្នុងករណីខ្លះ ការបាត់រដូវក៏អាចបង្កឡើងដោយការហាត់ប្រាណលើសកម្រិត ឬវិបត្តិនៃការញ៉ាំអាហារ ផងដែរ។

វដ្ដរដូវនៅវ័យ៣០ឆ្នាំ

មិនថាយើងអាយុប៉ុន្មានឡើយ បើស្រីៗយើងធ្លាប់មានកូន នោះរដូវអាចប្រែប្រួលបន្ទាប់ពីមានផ្ទៃពោះ។ គ្នាយើងខ្លះអាចប្រឈមនឹងការមករដូវច្រើនជ្រុល មានរយៈពេលយូរ ឬឈឺចាប់ នៅក្រោយពេលសម្រាលកូនរួច។ ទន្ទឹមនឹងនេះដែរ ស្រីៗជាច្រើនមិនមករដូវ នៅអំឡុងពេលបំបៅដោះកូនឡើយ។ នៅពេលដែលចូលដល់វ័យជិត៤០ឆ្នាំ គ្នាយើងអាចមករដូវមិនសូវញឹកញាប់ ឬតិចជាងធម្មតា។

វដ្ដរដូវក្រោយវ័យ៤០ឆ្នាំ

ក្នុងវ័យ៤០ឆ្នាំ ការផលិតអ័រម៉ូន Estrogen នឹងមានការថយចុះ ដែលធ្វើឲ្យយើងមករដូវតិចជាងមុន និងមានរយៈពេលខ្លីជាងមុន។ ការអស់រដូវកើតឡើងនៅពេលដែលរដូវរាំងរយៈពេល១២ខែជាប់ៗគ្នា។ ស្ត្រីភាគច្រើនអាចនឹងអស់រដូវនៅវ័យជិត ៥០ឆ្នាំ ឬចាប់ពី៥០ឆ្នាំឡើងទៅ៕

អត្ថបទផ្ដល់ដោយ៖ Hello Krupet

ចុចអាន៖ជំនឿមិនពិត ៥ យ៉ាង របស់ស្ត្រី អំពីការមករដូវ

ចុចអាន៖ខែត្រជាក់ អាចរំខានដល់ការមករដូវរបស់ស្រីៗមួយចំនួន

The post វដ្ដរដូវអាចប្រែប្រួលទៅតាមវ័យ ស្រីៗយើងគួរដឹង appeared first on Kampuchea Thmey Daily.

ស្រីៗធ្លាក់ទឹករម្អិលពណ៌បៃតង អាចមកពីបញ្ហាទាំងនេះ

សាង ស្រីល័ក្ខ — Tue, 25 Jan 2022 02:07:19 +0000

ជួនកាល ការធ្លាក់ទឹករម្អិលពីទ្វារមាស អាចជាសញ្ញាបញ្ជាក់ពីបញ្ហាសុខភាពមួយចំនួន ដែលស្រីៗយើងតែងតែមើលរំលង។ ពិតណាស់ ទឹករម្អិលជាសារធាតុរាវដែលហូរចេញពីទ្វារមាស និងត្រូវបានផលិតឡើងដោយក្រពេញនៅជញ្ជាំងទ្វារមាស និងមាត់ស្បូន ដើម្បីរក្សាទ្វារមាស និងបំពង់បន្តពូជឲ្យស្អាត និងមានសុខភាពល្អ។

អ្វីទៅជាការធ្លាក់ទឹករម្អិលទ្វារមាសពណ៌បៃតង

ជាទូទៅ ទ្វារមាសដែលមានសុខភាពល្អអាចមានសភាពដូចទឹក ឬស្អិត ហើយមានពណ៌ថ្លា ទៅស ព្រមទាំងមានក្លិនតិចតួច។ ប៉ុន្តែ ការធ្លាក់ទឹករម្អិលពណ៌បៃតងមិនមែនជារឿងធម្មតានោះទេ ហើយក៏ចាំបាច់ធ្វើការព្យាបាលផងដែរ ពីព្រោះទឹករម្អិលពណ៌នេះ បញ្ជាក់ពីការឆ្លងមេរោគ ជាពិសេស នៅពេលដែលវាមានក្លិនស្អុយ។

ការធ្លាក់ទឹករម្អិលពណ៌បៃតងពីទ្វារមាស អាចបណ្ដាលមកពី៖

ជំងឺទ្រីកូម៉ូនីញ៉ាស៊ីស (ប្រភេទជំងឺកាមរោគ)
ជំងឺរលាកអាងត្រគាក (PID)
វត្ថុផ្សេងៗនៅក្នុងទ្វារមាស ដូចជាសំឡីអនាម័យប្រភេទស៊កចូលទ្វារមាស (Tampon)
ជំងឺរលាកទ្វារមាស
បាក់តេរីក្នុងទ្វារមាស។

ធ្លាក់ទឹករម្អិលពណ៌បៃតងអំឡុងពេលពពោះ ជារឿងធម្មតាឬអត់?

ការធ្លាក់ទឹករម្អិលពណ៌បៃតងអំឡុងពេលពពោះ គឺជាសញ្ញាគ្រោះថ្នាក់មួយ ដែលម៉ាក់ៗចាំបាច់ទៅជួបជាមួយគ្រូពេទ្យជាបន្ទាន់។ ទឹករម្អិលពណ៌នេះ បង្ហាញពីបញ្ហាសុខភាពមួយចំនួន ដូចបានរៀបរាប់ខាងលើ ដែលអាចប៉ះពាល់ធ្ងន់ធ្ងរដល់ម្ដាយ និងកូនក្នុងផ្ទៃ។

គន្លឹះបំបាត់ការធ្លាក់ទឹករម្អិលពណ៌បៃតង

ញ៉ាំថ្នាំតាមវេជ្ជបញ្ជារបស់គ្រូពេទ្យ
រក្សាអនាម័យទ្វារមាសឲ្យបានស្អាតល្អ
ជៀសវាងប្រើផលិតផលដែលមានសារធាតុគីមីណាមួយនៅត្រង់បរិវេណនោះ
ងូតទឹកក្ដៅឧណ្ហៗ
ពាក់ខោទ្រនាប់ដែលធ្វើពីកប្បាស៕

អត្ថបទផ្ដល់ដោយ៖ Hello Krupet

ចុចអាន៖សម្រាលកូនហើយប៉ុន្មានខែ ទើបអាចចាក់វ៉ាក់សាំងកូវីដ-១៩ បាន?

ចុចអាន៖ម៉ាក់ៗកំពុងពពោះ អាចញ៉ាំសាច់អន្ទង់បានអត់?

The post ស្រីៗធ្លាក់ទឹករម្អិលពណ៌បៃតង អាចមកពីបញ្ហាទាំងនេះ appeared first on Kampuchea Thmey Daily.

ពេលកូនខ្ចីសាច់ឡើងសស្អាត និងមត់រលោង បើម៉ាក់ៗអាចធ្វើរឿងទាំងនេះ

សាង ស្រីល័ក្ខ — Wed, 24 Nov 2021 01:53:17 +0000

ក្រោយសម្រាលកូនរួច ម៉ាក់ៗពិតជាចង់ឲ្យខ្លួន និងកូនមានសុខភាពល្អ ហើយអ្វីដែលពិសេសគឺទទួលបានសម្រស់ស្រស់ស្អាតឡើងវិញ។ បើតាមការចែករំលែករបស់ម៉ាក់ៗទាំង ៤ រូបនេះបានឲ្យដឹងថា ការប្រើវិធីបុរាណដែលចាស់ៗតែងធ្វើ និងការរបៀបរបបរស់នៅប្រចាំថ្ងៃមួយចំនួន អាចជួយឲ្យសម្រស់យើងស្អាតមិនចាញ់ពេលមិនទាន់មានកូនប៉ុន្មានទេ។

១- ខាត់ស្បែកជាមួយពន្លៃ

រូបមន្តខាត់ស្បែកដែលផ្សំពីរមៀតលាយជាមួយពន្លៃ ទឹកដោះគោឆៅ និងក្រូចឆ្មារ ឬក្រូចពោធិ៍សាត់។ សុគន្ធា ដែលមានសាច់ចាំវ័យជិត ៤០ ឆ្នាំហើយ តែនៅស្អាតដដែលបានរៀបរាប់ថា ស្រីៗយើងទើបសម្រាលប៊េបីបាន កន្លះខែទៅ គួរតែឧស្សាហ៍អនុវត្តន៍វិធីនេះ ទើបជួយរក្សាស្បែកឲ្យមានសំណើមជាប់ជានិច្ច ព្រោះពេលពពោះ យើងមិនបានប្រើប្រាស់ផលិតផលអ្វីឡើយ ដូចនេះហើយទើបស្បែកមិនស្រស់ថ្លាល្អ។

២.ឆ្ពុង

សីហា ដែលមានតួនាទីជាគ្រូពេទ្យ ក៏នៅតែជឿលើវិធីបុរាណមួយនេះដែរ ព្រោះវាប្រៀបដូចជាវិធីអប់សាច់ឲ្យក្ដៅងំ និងជួយសម្រួលសរសៃឈាមឲ្យរត់ស្រួល។ អ្នកគ្រូពេទ្យខាងលើ ក៏បានបន្តទៀតថា ក្រោយពេលឆ្ពុងរួច អ្នកយកពន្លៃមកលាបពេញខ្លួន រឹតតែមានប្រសិទ្ធភាព។ វិធីនេះអាចធ្វើរហូតដល់កូន ១ ឆ្នាំក៏បានដែរស្បែកកាន់តែស្អាត និងភ្លឺរលោង។

៣- ងូតទឹកក្ដៅ

ទើបតែសម្រាលកូនមិនគួរងូតទឹកត្រជាក់ឡើយ។ ងូតទឹកក្ដៅជារៀងរាល់ថ្ងៃក្នុងមួយថ្ងៃពីរដង នោះស្បែកនឹងមិនឆាប់ចាស់។ នេះជាការលើកឡើងរបស់ សេងលី ដែលមានកូន ៣ នាក់ ទៅហើយក្ដី។ ដើម្បីឲ្យសាច់កាន់តែទន់រលោង គួរតែឧស្សាហ៍ត្រាំទឹកក្ដៅឧណ្ហ៍ៗ លាយជាមួយស្រទាប់ផ្កាចម្រុះ។

៤- ហាត់ប្រាណ

សម្រាលកូនបាន ១ខែកន្លះ ម៉ាក់ៗអាចចាប់ផ្តើមហាត់ប្រាណបានវិញហើយ ការហាត់ប្រាណមិនត្រឹមជួយឲ្យសុខភាពល្អនោះទេ ស្បែកតឹងណែនស្អាត នេះបើតាមបទពិសោធរបស់ សោភា ដែលមានកូន ២នាក់។ ។

៥-ញ៉ាំទឹកឲ្យបានច្រើន

បើតាម ស្រីម៉ៅ ១ថ្ងៃ ស្រីៗយើងត្រូវញ៉ាំទឹកឲ្យបានលើស ២លីត្រ នោះស្បែកភ្លឺថ្លា មិនជ្រីវជ្រួញនោះទេ៕

អត្ថបទផ្ដល់ដោយ៖Hello Krupet

ចុចអាន៖អ្នកមានសុខភាពខ្សោយ អាចចេញសញ្ញាទាំង ៧នេះ

ចុចអាន៖អាហារ ៧មុខ ជួយស្បែក សក់ និងក្រចក ឲ្យមានសុខភាពល្អ

The post ពេលកូនខ្ចីសាច់ឡើងសស្អាត និងមត់រលោង បើម៉ាក់ៗអាចធ្វើរឿងទាំងនេះ appeared first on Kampuchea Thmey Daily.

ក្លិនទ្វារមាសស្ត្រីមាន ៥ ប្រភេទ បញ្ជាក់ពីស្ថានភាពជំងឺផ្សេងៗគ្នា

សាង ស្រីល័ក្ខ — Wed, 03 Nov 2021 04:28:55 +0000

ជាធម្មតាស្រ្តីជាច្រើនគិតថា ទ្វារមាសមានក្លិនគឺដូចគ្នាទាំងអស់ ប៉ុន្តែលោក ច័ន្ទ រស្មី ឯកទេសសម្ភព និងរោគស្ត្រី បានឲ្យដឹងថា ក្លិនទ្វារមាសមានផ្សេងៗគ្នា ដែលទាំងនោះក៏អាចបញ្ជាក់ពីស្ថានភាពជំងឺទៀត។

១- ក្លិនលោហធាតុច្រែះ

ក្លិនដែលចេញពីទ្វារមាសក្រោយពេលមានរដូវ ឬក្រោយពេលរួមភេទជាមួយការបញ្ចេញទឹកកាមទៅខាងក្នុង គឺជាបាតុភូតធម្មតាទាំងស្រុង។ វាបណ្ដាលមកពីការផ្លាស់ប្ដូរ pH នៅខាងក្នុងទ្វារមាសហើយជាធម្មតាវានឹងបាត់ទៅវិញយ៉ាងឆាប់រហ័ស។ ទោះជាយ៉ាងណាក៏ដោយប្រសិនបើវានៅតែបន្តកើតមាន ឬមានរោគសញ្ញាផ្សេងទៀតសូមសាកសួរគ្រូពេទ្យ។

២- ក្លិនត្រីប្រឡាក់

ប្រភេទបែបនេះជះក្លិនខ្លាំង និងគួរឲ្យរំខានណាស់ ក្លិននេះគឺជាសញ្ញាដែលអ្នកទទួលរងពីជំងឺទ្វារមាស ការឆ្លងបាក់តេរីបណ្ដាលមកពីអតុល្យភាព Flora ដែលមាននៅក្នុងទ្វារមាស។ វាអាចជាសញ្ញានៃជំងឺ trichomoniasis ដែលជាជំងឺកាមរោគ។ ជាទូទៅក្លិនមិនល្អនេះត្រូវបានអមដោយការហូរទឹករម្អិលពណ៌ស ឬពណ៌ប្រផេះហើយបាត់ទៅវិញបន្ទាប់ពីការព្យាបាលការឆ្លងមេរោគជាមួយនឹងថ្នាំអង់ទីប៊ីយោទិច។ ដូច្នេះវាចាំបាច់ក្នុងការពិគ្រោះយោបល់រោគស្ត្រីភ្លាមៗនៅពេលវាលេចឡើង។

៣- ក្លិនឆួលដូចមេនំប៉ាវ

ក្លិនឆួលខ្លាំង និងគួរឲ្យធុញទ្រាន់នេះ ច្រើនតែបណ្ដាលមកពីបែកញើសច្រើនពេក។ ដូច្នេះប្រសិនបើយើងឧស្សាហ៍ស្លៀកសម្លៀកបំពាក់តឹង ឬខោទ្រនាប់ធ្វើពីសម្ភារៈសំយោគដែលធ្វើឲ្យរំខានដល់ស្បែក ដូច្នេះវានឹងបែកញើសខ្លាំង យើងគួរតែផ្លាស់ប្ដូរទម្លាប់ស្លៀកពាក់បែបនោះចេញ។ ជ្រើសរើសសម្លៀកបំពាក់ដែលរលុង អាចឲ្យស្បែកមានខ្យល់ចេញចូល ហើយជ្រើសរើសខោអាវកប្បាសដែលស្រូបយកញើស។

៤- ក្លិនផ្អូម

ថ្វីដ្បិតតែមិនសូវមាន ហើយមិនសូវខ្លាំងដូចក្លិនមុនៗ តែក្លិននេះជារោគសញ្ញាមួយក្នុងចំណោមរោគសញ្ញាប្រាប់ពីការឆ្លងមេរោគផ្សិត។ ជារឿយៗវាត្រូវបានអមដោយការហូរទឹករម្អិលពណ៌សក្រាស់ និងរមាស់ខ្លាំង។ ដូច្នេះយើងត្រូវពិគ្រោះជាមួយគ្រូពេទ្យភ្លាមៗនៅពេលរោគសញ្ញាទាំងនេះលេចឡើង។

៥- ក្លិនរលួយ

ប្រសិនបើទ្វារមាសរបស់យើងមានក្លិនស្អុយរលួយសូមកុំរង់ចាំយូរ ត្រូវតែទៅជួបគ្រូពេទ្យព្រោះអាចជាសញ្ញាមួយដែលកើតឡើងដោយសម្លីអនាម័យ ឬរបស់មិនល្អនៅក្នុងទ្វារមាសរលួយ ត្រូវបានទុកចោលនៅខាងក្នុងសរីរាង្គ។ ការត្រួតពិនិត្យជាមួយគ្រូពេទ្យ ត្រូវធ្វើឡើងជាបន្ទាន់ ដើម្បីដកយកវត្ថុនោះចេញ៕

អត្ថបទផ្ដល់ដោយ៖ Hello Krupet

ចុចអាន៖ការពិតទាំង៥ ទាក់ទងនឹងទ្វារមាសស្រីៗគួរដឹង

ចុចអាន៖គោលបំណងទាំង៥ ក្នុងការពិនិត្យក្រោយសម្រាលកូន

The post ក្លិនទ្វារមាសស្ត្រីមាន ៥ ប្រភេទ បញ្ជាក់ពីស្ថានភាពជំងឺផ្សេងៗគ្នា appeared first on Kampuchea Thmey Daily.

កុំប្រហែស! ជំងឺ ៦ ប្រភេទនេះ តែងកើតលើស្ត្រីវ័យកណ្ដាល និងអាចគ្រោះថ្នាក់ដល់ជីវិត បើឈានដល់ធ្ងន់ធ្ងរ

សាង ស្រីល័ក្ខ — Fri, 16 Jul 2021 04:35:16 +0000

នៅពេលឈានដល់វ័យកណ្ដាល មនុស្សស្រីជាច្រើននឹងចាប់ផ្ដើមមានអារម្មណ៍ថា រាងកាយខ្លួនឯងកំពុងតែផ្លាស់ប្ដូរ។ ដោយសារវ័យនេះគឺជាវ័យដែលរាងកាយពួកគេចាប់ផ្តើមទទួលរងពីជំងឺផ្សេងៗ។

ដូចច្នេះក្នុងនាមជាស្រ្តី ដែលឈានដល់វ័យកណ្ដាល គួរកុំប្រហែស ហើយត្រូវត្រៀមខ្លួនសំរាប់ជំងឺ មុនពេលអ្វីៗមានសភាពធ្ងន់ធ្ងរជាងនេះ។

ខាងក្រោមនេះជាប្រភេទជំងឺ ដែលស្រ្តីវ័យកណ្ដាលតែងកើតមានសឹងតែគ្រប់គ្នា ៖

១ រោគសញ្ញាចក្ខុទាក់ទងនឹងកុំព្យូទ័រ

រោគសញ្ញានេះគឺជាជំងឺដ៏ពេញនិយមមួយ ដែលកើតឡើងលើមនុស្សស្រីជាពិសេស ដែលគេថៅថាមនុស្សស្គ្រីន ។ រោគសញ្ញានៃជំងឺនេះ បណ្តាលមកពីមនុស្សស្រីនៅពេលវ័យក្មេងជាទូទៅ តែងប្រើពេលសម្លឹងមើលអេក្រង់ទូរស័ព្ទដៃឬកុំព្យូទ័ររបស់ពួកគេ អស់រយៈពេលជាង ៤០ នាទី ដែលជាលទ្ធផល ធ្វើឲ្យសាច់ដុំភ្នែកផ្តោតអារម្មណ៍មិនធម្មតា និងកាត់បន្ថយអត្រាភ្លឹបភ្លែតៗក្នុងភ្នែក។

២ រមួលក្រពើពេលមានរដូវ

ការរមួលក្រពើក្នុងពេលមានរដូវ គឺជាសញ្ញាព្រមាននៃជំងឺមិនល្អ ជាពិសេសវដ្តឬបកក្នុងដៃស្បូននៃជំងឺសរសៃប្រសាទ ស្រទាប់សាច់ដុំស្បូន រលាកដុំស្បូន ឬប្រភេទជាច្រើននៃជាតិសរសៃក្នុងស្បូន ទាំងអស់នេះគឺជាជំងឺដែលមានការឈឺចាប់ពេលមានរដូវ។

៣ មហារីកពោះវៀន

រឿងនេះតែងកើតឡើងចំពោះស្ត្រីវ័យកណ្តាល ជាធម្មតាបណ្តាលមកពីការទល់លាមក។ ប៉ុន្តែបញ្ហានេះ មិនត្រឹមតែកើតឡើងចំពោះស្ត្រីវ័យកណ្ដាលប៉ុណ្ណោះទេ ប៉ុន្តែវាក៏កើតឡើងចំពោះស្ត្រីទូទៅផងដែរ។ ជាពិសេសស្រីៗដែលមានអាយុ ១០ ឆ្នាំឡើង គឺងាយនឹងទល់លាមក ១០ ដងច្រើនជាងបុរស ព្រោះជំងឺក្រពះពោះវៀនរបស់ស្ត្រីមានសភាពយឺត បូកនឹងអាកប្បកិរិយារបស់ស្ត្រីដែលផឹកទឹកតិច និងភាពតានតឹង ភាពមិនធម្មតា និងការប្រើថ្នាំមួយចំនួន។

៤ ជំងឺដាច់សរសៃឈាមខួរក្បាល

ជំងឺនេះសម្លាប់មនុស្សនៅលើកំពូល។ រោគសញ្ញានៃជំងឺនេះធ្វើឲ្យអវយវៈចុះខ្សោយ។ ភ្នែកចាប់ផ្ដើមព្រិលឬមើលមិនឃើញ និងឈឺក្បាលស្រួចស្រាវ ដែលជារឿងធម្មតាក្នុងចំនោមអ្នកដែលមានជំងឺទឹកនោមផ្អែម ជំងឺបេះដូង ជំងឺលើសឈាម លើសឈាម។ វាច្រើនកើតឡើងនៅពេលដែលការផ្គត់ផ្គង់ឈាមទៅផ្នែកណាមួយនៃខួរក្បាលរបស់អ្នក ត្រូវបានរំខានឬកាត់បន្ថយ។ ជាពិសេសអ្នកមានទំលាប់ជក់បារីច្រើន ហើយធ្លាប់មានជំងឺដាច់សរសៃឈាមក្នុងគ្រួសាររបស់ពីមុន។

៥ ជំងឺឆ្កួតជ្រូក

ជំងឺឆ្កួតជ្រូកគឺជាជំងឺមួយដែលកើតឡើងគ្រប់ពេល និងមានរោគសញ្ញាជាច្រើនដែលមិនចាំបាច់ប្រកាច់ឬចុកចាប់ក៏អាចកើតមានជំងឺនេះបានដែរ។ ប៉ុន្តែវាអាស្រ័យទៅលើផ្នែកមួយនៃចរន្តអគ្គិសនី ដែលស្ថិតនៅក្នុងខួរក្បាល ហើយវានឹងបង្ហាញរោគសញ្ញាធ្ងន់ធ្ងរប៉ុណ្ណា។ រោគសញ្ញាជំងឺឆ្កួតជ្រូក គឺភ្នែកព្រិល ហើយមិនចាំអ្វីទាំងអស់។

៦ ជំងឺពុកឆ្អឹង

ជំងឺពុកឆ្អឹងគឺជាជំងឺមួយ ដែលរោគសញ្ញាភាគច្រើនគឺឈឺចុកចាប់ដងខ្លួន នេះគឺជាអ្វីដែលអ្នកជំងឺជួបប្រទះ។ ឆ្អឹងត្រូវបានបែកបាក់ ព្រោះជំងឺពុកឆ្អឹងជាធម្មតាកើតឡើងចំពោះស្ត្រីដែលអស់រដូវ ដែលទំហំឆ្អឹងថយចុះយ៉ាងឆាប់រហ័ស៕

ប្រែសម្រួល៖ សាង ស្រីល័ក្ខ

ចុចអាន៖កុំប្រហែស ! រោគសញ្ញាស្នាមជាំលើដងខ្លួន កំពុងបញ្ជាក់ពីស្ថានភាពជំងឺធ្ងន់ធ្ងរក្នុងរាងកាយ

ចុចអាន៖ក្រោយជាសះស្បើយពីកូវីដ សួតនឹងវិលមករកភាពធម្មតាវិញឬយ៉ាងណា!

The post កុំប្រហែស! ជំងឺ ៦ ប្រភេទនេះ តែងកើតលើស្ត្រីវ័យកណ្ដាល និងអាចគ្រោះថ្នាក់ដល់ជីវិត បើឈានដល់ធ្ងន់ធ្ងរ appeared first on Kampuchea Thmey Daily.

ជំនឿខុសឆ្គងមួយចំនួន ធ្វើឲ្យគ្រោះថ្នាក់ដល់ស្ត្រី និងកូន

សាង ស្រីល័ក្ខ — Sun, 13 Jun 2021 01:14:34 +0000

ជំនឿចាស់បុរាណពាក់ព័ន្ធនឹងស្ត្រីពពោះមានច្រើន ក្រៅពីផ្តល់សារអប់រំ ជំនឿមួយចំនួនជាជំនឿខុសឆ្គង ប្រាសចាកពីក្បូនវេជ្ជសាស្ត្រ ជះឥទ្ធិពលអាក្រក់ដល់សុខភាពស្ត្រី និងកូន។ លោកវេជ្ជបណ្ឌិត ចាន់ ស៊ីណេត ប្រធានផ្នែកសម្ភព និងរោគស្ត្រី នៃមន្ទីរពេទ្យបង្អែកមិត្តភាពកម្ពុជា-ចិន សែនសុខ បានពន្យល់លម្អិតពីជំនឿនាំឲ្យគ្រោះថ្នាក់ទាំងនោះ។

១. ផឹកថ្នាំបុរាណពេលពពោះ

ការផឹកថ្នាំបុរាណពេលពពោះ ដែលចាស់ៗជឿថាថ្នាំបុរាណជាថ្នាំរក្សាគភ៌ និងជាថ្នាំជំនួយសុខភាពនោះមិនពិតនោះឡើយ។ លោកវេជ្ជបណ្ឌិតថា ការផឹកថ្នាំខ្មែរ ឬថ្នាំចិនសែ ពេលពពោះ មិនបានជួយអ្វីនោះទេ ថែមទាំងបង្កផលប៉ះពាល់ធ្ងន់ធ្ងរទាំងសុខភាពម្តាយ និងកូនក្នុងផ្ទៃ ដូចជាធ្វើឲ្យសុកក្រិន ស្អិតជាប់ស្បូន សុកអត់ធ្លាក់ ទឹកភ្លោះមិនថ្លាល្អ មាត់ស្បូនមិនបើក កូនពិបាកកើត ធ្លាក់ឈាមខ្លាំង ឈាមរាវ កូនខ្សោយ ឬស្លាប់ក្នុងពោះ។

២. ផឹកស្រា-ស្រាថ្នាំក្រោយពេលសម្រាល

ចាស់ៗជឿថាញ៉ាំស្រា ឬស្រាថ្នាំ ដែលផ្សំពីរុក្ខជាតិ ឫសរុក្ខជាតិ សត្វព្រៃផ្សេងៗ ក្រោយសម្រាលកូន ជួយឲ្យស្ត្រីឆាប់រឹងសរសៃខ្ចី និងបំបាត់អាការៈទាស់សរសៃ ដូចជាស្ពឹកដៃជើង ចុករួយចង្កេះខ្នង ស្រវាំងភ្នែក ព្រឺរងា។ ចំពោះពេទ្យវិញ ការដែលស្ត្រីសម្រាលកូនរួចជួបអាការៈទាំងប៉ុន្មានខាងលើនេះ មកពីការញ៉ាំចំណីអាហារមិនគ្រប់គ្រាន់ មិនសម្បូរជីវជាតិ ញ៉ាំតែក្រៀមក្រោះ កូនធ្វើទុក្ខអត់ងងុយ ឬខ្វះអនាម័យក្រោយសម្រាល ធ្វើឲ្យឆ្លងរោគជាដើម។ ចំណែកការញ៉ាំស្រាវិញមិនអាចបំបាត់អាការៈទាំងប៉ុន្មានខាងលើនោះទេ តែវាធ្វើឲ្យប៉ះពាល់ទាំងសុខភាពភាពម្តាយ និងកូនធ្ងន់ធ្ងរ ប្រសិនបើម៉ាក់ៗបំបៅកូនដោយទឹកដោះ។

៣- ញ៉ាំអាហារហឹរៗធ្វើឲ្យឆាប់រឹងសរសៃខ្ចី

ការដែលចាស់ៗឲ្យស្រីៗទើបសម្រាលកូនរួចញ៉ាំអាហារហឹរៗ ព្រោះសម្អាងថា អាហារទាំងនោះញ៉ាំទៅធ្វើឲ្យឆាប់រឹងសរសៃសរសូងឡើងវិញបន្ទាប់ពីសម្រាលកូន។ តែបើតាមក្បូនពេទ្យវិញ អាហារទាំងនោះ មិនត្រឹមតែមិនផ្តល់វីតាមីនគ្រប់គ្រាន់នោះទេ ថែមទាំងបង្កផលប៉ះពាល់ធ្ងន់ធ្ងរចំពោះសុខភាពស្ត្រីក្រោយសម្រាលកូនរួចទៀត ដូចជា ខ្វះជីវជាតិចិញ្ចឹម ប៉ះពាល់ដល់ក្រពះពោះវៀន ម្តាយមិនមានទឹកដោះគ្រប់គ្រាន់ឲ្យកូនបៅ។

៤. សម្រាលកូនរួចឆ្អើរភ្លើង-សង្កត់ថ្មក្តៅ

ជំនឿ និងធ្វើតាមៗតៗគ្នាដោយឲ្យស្ត្រីសម្រាលកូនរួចឆ្អើរភ្លើង ស្អំថ្មក្តៅដុតដាក់អំបិលលើពោះ ដើម្បីជួយឲ្យស្ត្រីឆាប់ឆ្អិនសរសៃ ក្បាលពោះរាបស្មើនោះគ្រោះថ្នាក់បំផុត ។ ការស្អំថ្មក្តៅលើពោះធ្វើឲ្យរលាកស្បែកពោះ រំខានដល់ការកន្ត្រាក់នៃស្បូន នាំឲ្យដក់ឈាមក្នុងស្បូន ឈានទៅមានបញ្ហាឆ្លងមេរោគពីខាងក្រោមទ្វារមាសទៅក្នុងស្រទាប់ស្បូន ដែលយូរៗទៅនឹងវិវត្តជារលាកស្រទាប់ស្បូន ឬរលាកស្រោមពោះក៏មាន។ ចំណែកឯឆ្អើរភ្លើងវិញ នាំឲ្យស្ត្រី ពុលផ្សែងភ្លើង រលាក សម្ពាធឈាមចុះ ឈឺក្បាល វិលមុខ ខ្សោះជាតិទឹក គ្មានកម្លាំងកំហែងជាដើម៕

អត្ថបទផ្ដល់ដោយ៖Hello Krupet

ចុចអាន៖ផ្លែ ញ មិនសូវមានអ្នកចូលចិត្តពិតមែន តែជាឱសថព្យាបាលរោគដ៏មានប្រសិទ្ធភាព

ចុចអាន៖ការឈឺចាប់ក្រោយវះកាត់ លែងជាក្តីបារម្ភ ប្រសិនប្រើប្រាស់តាមការណែនាំទាំងនេះ

The post ជំនឿខុសឆ្គងមួយចំនួន ធ្វើឲ្យគ្រោះថ្នាក់ដល់ស្ត្រី និងកូន appeared first on Kampuchea Thmey Daily.

សុខភាពស្រ្ដី Archives - Kampuchea Thmey Daily

ស្ត្រីៗ ត្រូវដឹងពីប្រភេទអាហារ សម្រាប់ជំនួយដល់សុខភាពទ្វារមាស

អង្គការ AHF ប្រារព្ធទិវាសុខភាពពេលមករដូវ ខណៈស្រ្តីជួបបញ្ហាប្រឈម ក្នុងវិបត្តិកូវីដ-១៩

វដ្ដរដូវអាចប្រែប្រួលទៅតាមវ័យ ស្រីៗយើងគួរដឹង

ពេលកូនខ្ចីសាច់ឡើងសស្អាត និងមត់រលោង បើម៉ាក់ៗអាចធ្វើរឿងទាំងនេះ

ក្លិនទ្វារមាសស្ត្រីមាន ៥ ប្រភេទ បញ្ជាក់ពីស្ថានភាពជំងឺផ្សេងៗគ្នា

កុំប្រហែស! ជំងឺ ៦ ប្រភេទនេះ តែងកើតលើស្ត្រីវ័យកណ្ដាល និងអាចគ្រោះថ្នាក់ដល់ជីវិត បើឈានដល់ធ្ងន់ធ្ងរ

ជំនឿ​ខុស​ឆ្គង​មួយ​ចំនួន ធ្វើ​ឲ្យ​គ្រោះថ្នាក់​ដល់​ស្ត្រី និង​កូន

ជំនឿខុសឆ្គងមួយចំនួន ធ្វើឲ្យគ្រោះថ្នាក់ដល់ស្ត្រី និងកូន