សុខភាពអ្នកម្ដាយ Archives - Kampuchea Thmey Daily

ស្មុគការងារផ្ទះ ថែទាំកូនខ្លាំង វិធីសាស្ត្រទាំងនេះ អាចជួយបាន

សាង ស្រីល័ក្ខ — Sun, 07 Nov 2021 06:05:00 +0000

ការងារកន្លែងធ្វើការផង កិច្ចការផ្ទះផង ណាមួយត្រូវមើលកូនទៀត រវល់នោះរវល់ រកតែពេលសម្រាប់ខ្លួនឯងគ្មាន។ គ្នាយើងអ្នកណាខ្លះកំពុងជួបរឿងបែបនេះខ្លះ? ហត់ណាស់មិនអ៊ីចឹង? ប៉ុន្តែហត់យ៉ាងណា រវល់យ៉ាងណា គួរមានពេលធ្វើឲ្យខ្លួនឯងមានសេចក្តីសុខខ្លះទៅ។

“Hello គ្រូពេទ្យ” មានវិធីសាស្ត្រពិសេស ងាយៗ ជួយគ្នាយើងបំបាត់ការនឿយហត់ ស្មុគស្មាញទាំងនេះ ត្រឹមតែ ១០ នាទីប៉ុណ្ណោះ។

១- ធ្វើខ្លួនឲ្យទំនេរ

ជីវិតយើងម្នាក់ៗ សុទ្ធតែកើតមកជាមួយនិងកាលវិភាគ ហេតុនេះសាកល្បងសម្រាកមួយភ្លែត មិនធ្វើអ្វីទាំងអស់ ត្រឹម ១០ នាទី។ អាចរកវិធីសាមញ្ញមួយដើម្បីជួយឲ្យអារម្មណ៍ស្រស់ស្រាយ អាចទម្រេតខ្លួនបន្តិច អានសៀវភៅកំប្លែងៗ សប្បាយៗ ជាដើម។

២- ជជែកលេងជាមួយមិត្តភក្តិ

ត្រឹម ១០នាទី គ្នាយើងច្បាស់ជាមិនអាចណាត់ជួបមិត្តភក្តិបានទេ។ យ៉ាងណាយើងនៅតែអាចទូរស័ព្ទទៅមិត្តភក្តិ ជជែកលេង និយាយពីរឿងសប្បាយៗណាមួយ។ ប្រធានបទគួរតែធ្វើជួយយើងអាចបន្ធូរអារម្មណ៍ ធ្វើឲ្យរំភើប ដូចជារឿងស្រីៗទូទៅចាប់អារម្មណ៍ខ្លាំង។ ចៀសវាងប្រធានបទណាធ្វើឲ្យស្មុគស្មាញ ព្រោះអាចនាំឲ្យយើងកាន់តែស្មុគលើសដើម។

៣- ម៉ាស្សា ធ្វើក្រចក

ទៅហាងម៉ាស្សា ឬហាងធ្វើកក់សក់ ធ្វើក្រចក មួយអាទិត្យម្តង ជារឿងល្អ អាចស្វែងរកកញ្ចប់សេវាកម្មរហ័ស ត្រឹម ១០នាទី អាចទាំងម៉ាស្សាជើង និងខ្នងផង លាបក្រចកផង ក្នុងពេលជាមួយគ្នា កាន់តែប្រសើរ។

៤- ដេកត្រាំក្នុងអាងទឹក

ជារឿងប្រសើរមួយ មានពេលខ្លះត្រាំខ្លួនក្នុងទឹកក្តៅឧណ្ហៗ ព្រោះអាចបន្ធូរអារម្មណ៍ ដោយដុសខ្លួនជាមួយពពុះសាប៊ូទន់ៗ មានក្លិនក្រអូបប្រហើរ ហើយចាក់ចំរៀងតិចៗ កាន់តែជួយធ្វើឲ្យអារម្មណ៍ស្រស់ស្រាយ មានសេចក្តីសុខមួយកម្រិតទៀត។

៥- បើកឡានមើលទេសភាព

ចេញទៅក្រៅ មើលទេសភាព ដូចជា បើកឡានតាមផ្លូវស្អាតៗ ស្រលះៗក្នុងទីក្រុង ឬក្បែរៗផ្ទះក៏ជារឿងល្អម្យ៉ាង។ ស្តាប់ចំរៀងពីរោះៗតាមវិទ្យុ ឬចាក់ផ្ទាល់ ហើយច្រៀងឲ្យខ្លាំងៗ តាមចំរៀងបទយើងចូលចិត្ត។

៥- បំភ្លេចរឿងសម្រកទម្ងន់

បណ្តោយខ្លួនតាមចិត្តចង់បន្តិចទៅ គ្មានខុសខាតអីប៉ុន្មានទេ។ ញ៉ាំនំខេក ឬនំដែលឆ្ងាញ់ៗបន្តិចបន្តួច ដើម្បីទទួលអារម្មណ៍រីករាយ។ ញ៉ាំអ្វីយើងចូលចិត្ត បើអាចធ្វើឲ្យសប្បាយរីករាយ ឡើងទម្ងន់បន្តិចមានអីគួរឲ្យខ្លាច។

៦- ទិញឥវ៉ាន់ចង់បាន

មិនមែនចាំបាច់ជិះឡានផ្លូវឆ្ងាយ ដើម្បីទៅកាន់ផ្សារទំនើបរកទិញឥវ៉ាន់ឯណា។ សម័យនេះ គ្រាន់តែអង្គុយមុខកុំព្យូទ័រ ឬប្រើទូរស័ព្ទ មើលទិញទំនិញតាម Online ជាវិធីងាយស្រួល និងពេញនិយម។ គ្នាយើងអាចមើលរបស់ប្រើប្រាស់យើងចង់បាន ដូចជា កាបូប សម្លៀកបំពាក់ គ្រឿងសម្អាង ជាដើម។ បែបនេះអាចជួយឲ្យរីករាយដូចគ្នា។

៧- អានសៀវភៅ

អាចអានប្រលោមលោកខ្លីៗ សរសេរដោយអ្នកនិពន្ធយើងចូលចិត្ត គួរជារឿងកំប្លែងខ្លីៗ ឬអាចលើអ៊ីនធឺណែតក៏បាន។ ប្រសិនហើយជាអត្ថបទទាក់ទងភាពជាឪពុកម្តាយ ឬភាពជាម្តាយ ត្រូវប្រាកដថាមិនធ្វើឲ្យយើងស្មុគស្មាញ។ រកអត្ថបទណាសប្បាយៗ ធ្វើឲ្យកម្សាន្តចិត្ត សមនឹងពេលវេលាយើងចំណាយពេលអានវា។

៨- ផឹកតែបន្ធូរអារម្មណ៍

តែ ជាភេសជ្ជៈមានប្រសិទ្ធភាព អាចកម្ចាត់ភាពតានតឹងដ៏អស្ចារ្យ។ តែក្តៅឧណ្ហៗមួយពែង អាចធ្វើឲ្យអារម្មណ៍ស្រស់ស្រាយ ជួយបន្ធូរអារម្មណ៍បានភ្លាមៗ។

៩- ឆែកអ៊ីនធឺណែត

១០នាទី ប្រហែលជាមិនអាចអោយអ្នកមើលរឿងភាគ ឬរឿងវែងៗបានក៏ពិតមែន ប៉ុន្តែអាចមើលរឿងកំប្លែងខ្លីៗលើ Youtube ឬអាចរកមើលអ្វីយើងចូលចិត្តលើបណ្តាញសង្គមក៏បាន។

ទាំងនេះជាវិធីសាស្ត្រសាមញ្ញៗ អាចផ្តល់ក្តីសុខចំពោះខ្លួនយើង មិនត្រឹមតែអាចកាត់បន្ថយភាពស្មុគស្មាញប៉ុណ្ណោះទេ ថែមទាំងជួយជំរុញចិត្ត ដើម្បីបន្តការងារប្រចាំថ្ងៃទៀតផង៕

អត្ថបទផ្ដល់ដោយ៖ Hello Krupet

ចុចអាន៖អាយុច្រើនទើបមានកូន មិនល្អទេ ឯក្មេងពេករឹតតែជួបបញ្ហាទៀត

ចុចអាន៖សញ្ញាទាំង ៦ បង្ហាញថា អ្នកម្ដាយកំពុងពពោះកូនភ្លោះក្នុងផ្ទៃ

The post ស្មុគការងារផ្ទះ ថែទាំកូនខ្លាំង វិធីសាស្ត្រទាំងនេះ អាចជួយបាន appeared first on Kampuchea Thmey Daily.

សម្រាលកូនភ្លោះ អ្នកម្ដាយគួរដឹងបញ្ហា ៤ យ៉ាងនេះ

សាង ស្រីល័ក្ខ — Mon, 25 Oct 2021 02:30:00 +0000

ស្រីៗយើងដឹងស្រាប់ហើយថា ការពពោះ និងការសម្រាលកូនមួយៗ មិនមែនជារឿងងាយស្រួលទេ ទើបឆ្លងផុត ចុះទម្រាំម៉ាក់ៗដែលពពោះកូនភ្លោះទៀត។ ជាការពិត អ្នកជំនាញចាត់ទុកការពពោះកូនភ្លោះជាវិបត្តិមួយ ព្រោះម្ដាយ និងគភ៌ប្រឈមនឹងហានិភ័យច្រើនទាំងពេលពពោះ និងពេលសម្រាលកូនភ្លោះ។

តាមមន្ទីរពេទ្យ កាល់ម៉ែត បានឲ្យដឹងថា ការពពោះកូនភ្លោះ ផ្ដល់ផលពិបាកច្រើនដល់សុខភាពម្ដាយ និងគភ៌ បើប្រៀបនឹងស្ត្រីមានផ្ទៃពោះកូនតែមួយ។ លើសពីនេះ ម៉ាក់ៗពពោះកូនភ្លោះទាមទារឲ្យមានការយកចិត្តទុកដាក់ខ្ពស់ជានិច្ច ដើម្បីចៀសផុតពីផលពិបាកអំឡុងពេលពពោះដូចជា ម្ដាយស្លេកស្លាំង កូនសម្រាលមុនខែ ឬកូនមិនគ្រប់គីឡូជាដើម។

ផលពិបាកអំឡុងពេលសម្រាលកូនភ្លោះ

– វិបត្តិនៃការកន្ត្រាក់ស្បូន
– ការលូនទងសុកមកក្រៅមុនពេលកូនសម្រាលចេញ
– ការធ្លាក់ឈាមខ្លាំង
– ស្ហុក កូនចុះដំណាលគ្នា ទាមទារការវះកាត់ជាបន្ទាន់។

ដើម្បីទប់ស្កាត់បញ្ហាខាងលើកើតឡើងពេលសម្រាលកូនភ្លោះ ម៉ាក់ៗគប្បីថែទាំសុខភាពឲ្យបានល្អ ពិសេសតាមការណែនាំរបស់អ្នកជំនាញ។ ទន្ទឹមគ្នានេះដែរ លោកវេជ្ជបណ្ឌិត ឃួន សុវណ្ណារិទ្ធ ឯកទេសផ្នែកសម្ភព និងរោគស្ត្រី ណែនាំឲ្យស្ត្រីពពោះគ្រប់រូប មើលថែសុខភាពខ្លួន និងកូនដោយ៖

ពិនិត្យសុខភាពតាមការកំណត់អំឡុងពេលពពោះ
មានរបបអាហារត្រឹមត្រូវ បរិភោគអាហារសម្បូរជីវជាតិ សម្បូរប្រូតេអ៊ីន បន្លែផ្លែឈើ ញ៉ាំទឹកដោះគោ ១-២កែវ/ថ្ងៃ
ទទួលជាតិដែកឲ្យបានត្រឹមត្រូវតាមវេជ្ជបញ្ជា
សម្រាក និងថែទាំសុខភាពឲ្យបានល្អ ចៀសវាងធ្វើការងារហួសកម្លាំង។

អត្ថបទផ្ដល់ដោយ៖ Hello Krupet

ចុចអាន៖សញ្ញាទាំង ៦ បង្ហាញថា អ្នកម្ដាយកំពុងពពោះកូនភ្លោះក្នុងផ្ទៃ

ចុចអាន៖អាយុច្រើនទើបមានកូន មិនល្អទេ ឯក្មេងពេករឹតតែជួបបញ្ហាទៀត

The post សម្រាលកូនភ្លោះ អ្នកម្ដាយគួរដឹងបញ្ហា ៤ យ៉ាងនេះ appeared first on Kampuchea Thmey Daily.

អាយុច្រើនទើបមានកូន មិនល្អទេ ឯក្មេងពេករឹតតែជួបបញ្ហាទៀត

សាង ស្រីល័ក្ខ — Tue, 28 Sep 2021 01:46:31 +0000

ថ្ងៃមុន “Hello គ្រូពេទ្យ” ចេញផ្សាយអត្ថបទមួយប្រាប់ស្រីៗគ្នាយើងថា មានបេប៊ីនៅចន្លោះអាយុជាង ២០ឆ្នាំ គឺល្អបំផុត ព្រោះជាអំឡុងពេលរាងកាយពោរពេញដោយថាមពល។ ប៉ុន្តែ គ្មានអ្វីមានគុណសម្បត្តិ គ្មានគុណវិបត្តិនោះទេ បើទោះជាវ័យ ២០ឆ្នាំជាង គឺជាពេលល្អបំផុតសម្រាប់ពពោះ តែអាយុចាស់ជាងនេះបន្តិចក៏នៅតែអាចយកបេប៊ីបានដែរ គ្រាន់តែមានគុណសម្បត្តិ និងគុណវិបត្តិផ្សេងគ្នា។ ខាងក្រោមនេះ ជាគុណវិបត្តិខ្លះៗសម្រាប់គ្នាយើងមានបេប៊ីនៅវ័យក្មេង។

១- បាត់បង់ឱកាសការងារ

ជោគជ័យក្នុងការងារ ជាក្ដីសុបិនធំបំផុតមួយក្នុងជីវិតយុវវ័យ។ ស្របពេលគ្នាយើងកំពុងព្យាយាមប្រឹងប្រែងសម្រេចក្តីសុបិនមួយនេះ ស្រាប់តែមានអូនៗជាហេតុនាំឲ្យត្រូវផ្អាកការងារមួយរយៈ ហើយទម្រាំតែមាតុភាពកន្លងផុត ត្រលប់ចូលធ្វើការងារវិញ អ្វីៗអាចហួសពេលបាត់ទៅហើយ។

២- លុយកាក់មិនសូវមាន

មានអូនៗដូចត្រូវបង់ពន្ធមួយជីវិត ម៉ាក់ៗត្រូវលះបង់គ្រប់បែបយ៉ាង ហើយការត្រលប់ទៅធ្វើការងារវិញ ក៏មិនងាយបានផ្លែផ្កាជាដុំកំភួនអ្វីដែរ បើប្រៀបធៀបទៅអ្នកមិនទាន់មានអូនៗ។ មានអូនៗពេលចាស់បន្តិច មិនត្រឹមតែមានពេលត្រៀមខ្លួនបានល្អប៉ុណ្ណោះទេ ការងារក៏មានភាពនឹងន ហើយមានលុយគ្រប់គ្រាន់រៀបចំផែនការគ្រួសារទៀតផង។

៣- ចំណងអាពាហ៍ពិពាហ៍អាចប្រេះស្រាំ

ប្ដីប្រពន្ធថ្មីថ្មោង មិនសូវមានបទពិសោធមើលថែទាំចិញ្ចឹមបីបាច់បេប៊ីនោះឡើយ អាចគិតថាវាជារឿងពិបាក។ ម៉ាក់ៗមួយចំនួនអាចនឹងមានអារម្មណ៍ស្ត្រេស បាក់ទឹកចិត្តក៏មាន ចំណែក ប៉ាៗវិញក៏អាចមានអារម្មណ៍ដូចមិនត្រូវបានយកចិត្តទុកដាក់ ដូចពេលទើបរៀបការថ្មីៗផងដែរ។ មួយវិញទៀត ពេលខ្លះដោយហេតុថាវ័យនៅក្មេងពេក ភាពអំណត់អត់ធន់នៅមានកម្រិត ហើយចំណូលចិត្ដដូចជាការដើរលេងកម្សាន្ត មើលកុន ដើរផ្សារជាមួយដៃគូ មិនទាន់លះបង់បាននៅឡើយ។ ហេតុនេះអាចបណ្ដាលឲ្យមានការអាក់អន់ស្រពន់ចិត្តនឹងគ្នា តែយ៉ាងណានៅតែមានគូស្វាមីភរិយាខ្លះអាចជម្នះឧបសគ្គទាំងនេះបានយ៉ាងល្អ៕

អត្ថបទផ្ដល់ដោយ៖ Hello Krupet

ចុចអាន៖សញ្ញាទាំង ៦ បង្ហាញថា អ្នកម្ដាយកំពុងពពោះកូនភ្លោះក្នុងផ្ទៃ

ចុចអាន៖គ្រូពេទ្យ ៖ ព្យាបាលទាស់ពេលកូនខ្ចី អ្នកម្ដាយដាច់ខាត កុំប្រើថ្នាំខ្មែរផ្សំពីសត្វព្រៃ

ចុចអាន៖ស្រីៗអាយុតិច មានកូនឆ្លាតជាងអ្នកអាយុច្រើន ព្រោះហេតុផលបែបនេះ

The post អាយុច្រើនទើបមានកូន មិនល្អទេ ឯក្មេងពេករឹតតែជួបបញ្ហាទៀត appeared first on Kampuchea Thmey Daily.

សញ្ញាទាំង ៦ បង្ហាញថា អ្នកម្ដាយកំពុងពពោះកូនភ្លោះក្នុងផ្ទៃ

សាង ស្រីល័ក្ខ — Thu, 15 Jul 2021 02:18:35 +0000

ការទទួលបានកូនភ្លោះ គឺជារឿងល្អសម្រាប់ម្តាយដែលចង់បាន។ សម្រាប់អ្នកដែលមានកូនភ្លោះ ពេលខ្លះអាចមកពីហ្សែនជាមួយគ្រួសារអ្នក។ ប្រសិនបើអ្នកម្តាយដែលកំពុងពពោះ ហើយមានចម្ងល់ថា តើខ្លួនពិតជាមានកូនភ្លោះក្នុងផ្ទៃពិតប្រាកដឬយ៉ាងណា។

សញ្ញាទាំង ៦ ខាងក្រោមនេះ នឹងបង្ហាញច្បាស់ៗថា អ្នកម្ដាយកំពុងមានកូនភ្លោះក្នុងផ្ទៃ ៖

១ ឡើងទម្ងន់លឿន

ក្នុងពេលមានផ្ទៃពោះ ត្រូវចេះសង្កេតមើលប្រសិនបើអ្នកឡើងទម្ងន់លឿន។ ជាពិសេសក្នុងរយៈពេល ៣ ខែដំបូង ប៉ុន្តែវាក៏អាចបណ្តាលមកពីម្តាយឡើងទម្ងន់ឬមកពីការញ៉ាំផងដែរ។ ដូច្នេះត្រូវចេះសង្គេតពីទម្ងន់របស់ខ្លួន ក្នុងនាមជាអ្នកម្ដាយមួយរូប។

២ ទំហំពោះធំកាន់តែច្រើន

ការមានផ្ទៃពោះបើមានទារកមកចាប់កំណើតតែម្នាក់ ជាធម្មតាពេលយើងឆ្លុះអេកូតែងឃើញមុខមាត់កូនច្បាស់ ក្នុងកំឡុងពេល ៥ ខែ។ ប៉ុន្តែសម្រាប់ផ្ទៃពោះភ្លោះ អាចកើនទំហំពោះលឿនដូចជា ពោះ៣ ខែ ប៉ុន្តែមានទំហំពោះដូច ៥ ខែឬ ការឆ្លុះអេកូក៏អាចមិនសូវច្បាស់ពីមុខមាត់កូនដែរ។

៣ ប្រតិកម្មអាឡ័កស៊ីធ្ងន់ធ្ងរជាងមនុស្សមានផ្ទៃពោះកូនមួយ

ជារឿយៗអ្នកមានប្រតិកម្មអាឡ័កស៊ីទៅនឹងក្រពះ ដោយសារតែការផ្លាស់ប្តូរអ័រម៉ូន ដែលប្រែប្រួលពីមនុស្សម្នាក់ទៅក្រពះ ប៉ុន្តែក្នុងករណីមានប្រតិកម្មធ្ងន់ធ្ងរ វាអាចបណ្តាលមកពីការមានផ្ទៃពោះភ្លោះ។

៤ ទារកក្នុងផ្ទៃបត់បែនលឿនជាងធម្មតា

នៅពេលពោះកាន់តែធំ ទារកនឹងចាប់ផ្តើមលូតលាស់ ហើយផ្លាស់ទីទៅក្រោយ។ ទោះជាយ៉ាងណាក៏ដោយ ក្នុងករណីម្តាយដែលមានផ្ទៃពោះកូនភ្លោះ ប្រសិនបើសង្កេតឃើញញឹកញាប់ដូចជា ទារកមានភាពបត់បែនខ្លាំង ហើយញឹកញាប់ជាងការមានផ្ទៃពោះតែមួយ។ នោះសបញ្ជាក់ថា អ្នកមានកូនភ្លោះហើយ!

៥ ចង្វាក់បេះដូងលោតគឺជាសញ្ញាប្រាប់

ចង្វាក់បេះដូងលោតត្រូវបានរកឃើញនៅក្នុងរយៈពេលខ្លីមួយនៃពេលវេលា។ នេះមិនប៉ះពាល់ដល់ម្តាយទេ ប៉ុន្តែចំពោះកូនភ្លោះ។ ចង្វាក់បេះដូងលឿនជាងមុន ព្រោះបេះដូងត្រូវខិតខំបូមឈាម ដើម្បីធ្វើឲ្យប្រសើរឡើងនូវការលូតលាស់របស់ទារកភ្លោះ។

៦ កម្រិតឈាមខ្ពស់ជាងធម្មតា

អ្នកដែលពិនិត្យរកអ័រម៉ូនក្នុងរាងកាយ ត្រូវបានគេរកឃើញថាមានអត្រាឈាមខ្ពស់ជាងម្តាយដែលមានផ្ទៃពោះតែមួយនេះជាសញ្ញាមួយទៀត ដែលម្តាយអាចមានកូនភ្លោះក្នុងផ្ទៃ។

តើអ្នកម្តាយរូបណាកំពុងមានកូនភ្លោះក្នុងផ្ទៃនិងមានរោគសញ្ញាបែបនេះ? ប្រសិនបើអ្នកមានរោគសញ្ញាបែបនេះ វាត្រូវបានគេណែនាំឲ្យស្វែងរកដំបូន្មានវេជ្ជសាស្ត្រភ្លាមៗ ដើម្បីឲ្យអ្នកអាចថែរក្សាខ្លួនឯងបានល្អជាងមុន។ ដើម្បីមានសុខភាពល្អទាំងម្ដាយនិងទារកដែលមិនទាន់កើត៕

ប្រែសម្រួល៖ សាង ស្រីល័ក្ខ

ចុចអាន៖មូលហេតុដែលក្តៅខ្លួន ក្នុងអំឡុងពេលមានផ្ទៃពោះ!

ចុចអាន៖គ្រោះថ្នាក់នៃការបង្ករោគលើទារកក្រោមអាយុ ២៨ថ្ងៃ

The post សញ្ញាទាំង ៦ បង្ហាញថា អ្នកម្ដាយកំពុងពពោះកូនភ្លោះក្នុងផ្ទៃ appeared first on Kampuchea Thmey Daily.

សុខភាពអ្នកម្ដាយ Archives - Kampuchea Thmey Daily

ស្មុគការងារផ្ទះ ថែទាំកូនខ្លាំង វិធីសាស្ត្រទាំងនេះ អាចជួយបាន

សម្រាលកូនភ្លោះ អ្នកម្ដាយគួរដឹងបញ្ហា ៤ យ៉ាងនេះ

អាយុច្រើនទើបមានកូន មិនល្អទេ ​ ឯក្មេងពេករឹតតែជួបបញ្ហាទៀត

សញ្ញាទាំង ៦ បង្ហាញថា អ្នកម្ដាយកំពុងពពោះកូនភ្លោះក្នុងផ្ទៃ

អាយុច្រើនទើបមានកូន មិនល្អទេ ឯក្មេងពេករឹតតែជួបបញ្ហាទៀត