សុខ រ៉ាស៊ី Archives - Kampuchea Thmey Daily

ពិធីករ សុខ រ៉ាស៊ី អង្វរបុរសៗ សូមកុំមានជម្លោះជាមួយមនុស្សស្រី

អ៊ិន ពិសី — Tue, 18 Feb 2025 03:23:02 +0000

ពិធីករល្បីឈ្មោះ និងមានប្រជាប្រិយភាព លោក សុខ រ៉ាស៊ី សុខៗ ស្រាប់តែគេឃើញពិធីករសង្ហារូបនេះ បានចេញមក ដោយអង្វរបុរសៗ សូមកុំមានជម្លោះជាមួយមនុស្សស្រី មិនថាជាប្តីប្រពន្ធ ឬជាមួយអ្នកផ្សេងទេ។

ការលើកឡើងរបស់ពិធីករ លោក សុខ រ៉ាស៊ី នេះដែរ ក៏ស្របពេលនឹងគ្នាដែលតារាចម្រៀងស្រីវ័យក្មេង កញ្ញា វ៉ាន់ នីឡា បាននិងកំពុងជួបរឿងមិនសប្បាយចិត្ត ក្រោយរងការប្រមាថមាក់ងាយពីសំណាក់បុគ្គលមួយចំនួនជាមនុស្សប្រុសមកលើនាងដែលជាស្ត្រីទន់ខ្សោយ។

លោក សុខ រ៉ាស៊ី បានឲ្យដឹងថា «ខ្ញុំសូមអង្វរបងប្អូនប្រុសៗ បើអាច សូមកុំមានជម្លោះជាមួយមនុស្សស្រី អ្នកណាក៏មានរាសីឡើងរាសីចុះដែរ ម្តងគេម្តងយើង សូមកុំរុញគាត់ទៅរឿងចាស់ ផ្លូវចិត្តគាត់ជួសជុលបានប៉ុណ្ណេះវាមិនងាយទេ សូមអង្វរឈប់បានឈប់ទៅ»។

តាមរយៈខ្លឹមសារបំផុសរបស់ពិធីករ លោក សុខ រ៉ាស៊ី ខាងលើនេះពិតជាទទួលបានការគាំទ្រពីសំណាក់មហាជនអ្នកលេងបណ្តាញសង្គមហ្វេសប៊ុកជាច្រើន ទោះបីថាការលើកឡើងរបស់លោកមិនសំដៅចំលើបុគ្គលរូបណាក៏ដោយ តែនេះក៏ជាសារដាស់តឿនមួយដែលមានប្រយោជន៍ និងជាគំរូល្អសម្រាប់សង្គមផងដែរ។

ដោយឡែក កាលពីថ្មីៗ កន្លងមកនេះដែរ ឧកញ៉ា នឹម វណ្ណៈ ដែលជាកូនស្រីបង្កើតលោកជំទាវចិត្តធម៌ ហ៊ុន ស៊ីណាត បានបង្ហោះខ្លឹមសារខ្លីពាក់ព័ន្ធស្ត្រីដែរថា ស្ត្រី ជាមាតាពិភពលោក អ្នកជេរប្រមាថស្ត្រី គឺដូចជាប្រមាថដល់ស្ត្រីទូទាំងពិភពលោកដូច្នេះដែរ៕

អត្ថបទ ៖ ចាន់រ៉ា

The post ពិធីករ សុខ រ៉ាស៊ី អង្វរបុរសៗ សូមកុំមានជម្លោះជាមួយមនុស្សស្រី appeared first on Kampuchea Thmey Daily.

ពិធីករ សុខ រ៉ាស៊ី ថា «បើខ្ញុំជាម្ចាស់ឆ្កែ មុនទៅប្ដឹងគេ គួរតែវេរលុយឲ្យបុគ្គលិកសិន»

អ៊ិន ពិសី — Thu, 31 Oct 2024 01:51:39 +0000

បន្ទាប់ពីមានការចែករំលែកនូវរូបភាព និងវីដេអូរវាងបុគ្គលិកដែលកំពុងមានបញ្ហាជាមួយថៅកែម្ចាស់ឆ្កែប្តឹងនោះ គេសង្កេតឃើញថា មានការវែកញែកជាច្រើននៅលើបណ្ដាញសង្គម ក្នុងនោះក៏មានពិធីករលោក សុខ រ៉ាស៊ី បានបញ្ចេញមតិលើរឿងរ៉ាវដ៏ហួសចិត្តនេះផងដែរ។

ពិធីករល្បីឈ្មោះ លោក សុខ រ៉ាស៊ី បានឲ្យដឹងបែបនេះថា «បើខ្ញុំជាម្ចាស់ឆ្កែមុនមានមុខទៅប្តឹងគេ គួរតែវេរលុយឲ្យបុគ្គលិកសិន បើគេមិនឲ្យឆ្កែវិញបានប្តឹង គ្នារស់ដូរបាយទេ»។ ជាមួយគ្នានេះក៏មានការបញ្ចេញមតិជាច្រើនពីសំណាក់អ្នកប្រើប្រាស់បណ្ដាញសង្គមហ្វេសប៊ុកជុំវិញករណីនេះផងដែរ។

ដោយឡែកតារាកំប្លែងល្បីឈ្មោះ លោក ចែម ចាន់រ៉ា ហៅ នាយពែកមី ក៏បានបញ្ចេញមតិចំពោះរឿងនេះដែរ។ លោកបានលើកឡើងថា បច្ចុប្បន្ននេះ ហ្វេសប៊ុកអាចរកយុត្តិធម៌ជូនអ្នកទន់ខ្សោយបាន ព្រោះលោកធ្លាប់ធ្វើកម្មករ លោកយល់ពីការខ្វះខាតលុយ ដើម្បីតែក្រពះ ដាច់លុយ គឺដាច់បាយតែម្ដង។

តារាកំប្លែងមានទឹកដីពីខេត្តស្វាយរៀង នាយ ពែកមី បានបញ្ជាក់បន្ថែមថា «ខ្ញុំមិនគាំទ្រការលួចយកកូនឆ្កែនោះទេ តែស្តាប់ទៅគាត់ធ្វើដើម្បីតែថ្នូរនឹងប្រាក់ខែគាត់តែប៉ុណ្ណោះ បងប្អូនស្តាប់ហើយពិចារណាចុះ»។

ទោះបីយ៉ាងណាពេលនេះកំពុងមានការចែករំលែកនៅលើបណ្ដាញសង្គមពាក់ព័ន្ធរឿងហេតុដែលបានកើតឡើងខាងលើនេះ ខណៈមានការវែកញែកជាច្រើនទៀតផង៕

អត្ថបទ ៖ ចាន់រ៉ា

The post ពិធីករ សុខ រ៉ាស៊ី ថា «បើខ្ញុំជាម្ចាស់ឆ្កែ មុនទៅប្ដឹងគេ គួរតែវេរលុយឲ្យបុគ្គលិកសិន» appeared first on Kampuchea Thmey Daily.

សុខ រ៉ាស៊ី ព្រមានទម្លាយមុខអតីតឧកញ៉ាវាយប្រពន្ធម្នាក់ ជំពាក់លុយមិនសង

អ៊ិន ពិសី — Thu, 05 Sep 2024 02:56:29 +0000

ពិធីករល្បីឈ្មោះលោក សុខ រ៉ាស៊ី ដោយអស់ភាពអត់ធ្មត់បានប្រកាសព្រមានទម្លាយមុខអតីតឧកញ៉ាម្នាក់ធ្លាប់ផ្ទុះរឿងអាស្រូវវាយប្រពន្ធជំពាក់លុយជាងមិនសងទុកឲ្យខ្លួនជាអ្នកចេញជំនួសទៅវិញ។

លោក សុខ រ៉ាស៊ី ជាពិធីករដែលមានប្រជាប្រិយភាពទទួលបានការងារច្រើនពីបណ្តាកម្មវិធីតូច-ធំមួយចំនួន ព្រោះគេមើលឃើញពីសមត្ថភាព និងវោហារស័ព្ទកំប្លុកកំប្លែងធ្វើឲ្យអ្នកទស្សនាសប្បាយរីករាយគ្រប់ពេល។ យ៉ាងណាមិញអំឡុងមួយរយៈចុងក្រោយនេះ លោក រ៉ាស៊ី ហាក់រាសីឆុងរឿងគេជំពាក់លុយមិនសងជាបន្តបន្ទាប់។

ជាក់ស្ដែង កាលពីរសៀលថ្ងៃទី ០៤ ខែកញ្ញា ឆ្នាំ ២០២៤ លោក សុខ រ៉ាស៊ី បានបង្ហោះខ្លឹមសារភ្ញាក់ផ្អើលមួយដោយព្រមានអតីតឧកញ៉ាវាយប្រពន្ធម្នាក់រឿងជំពាក់លុយមិនសង។ លោក សុខ រ៉ាស៊ី បាននិយាយថា «បន្តិចទៀត បង្ហាញមុខអតីតឧកញ៉ាវាយប្រពន្ធបើកក្លិបមិនឲ្យលុយជាង ខ្ញុំសុខចិត្តចេញជំនួស ជិត ១ ឆ្នាំ ហើយ»។

ទោះបីជាមានការប្រតិកម្ម ដោយការព្រមានដូចការលើកឡើងខាងលើនេះក៏ពិតមែន តែរហូតមកដល់ពេលនេះលោក សុខ រ៉ាស៊ី មិនទាន់បញ្ជាក់ពីអត្តសញ្ញាណអតីតឧកញ៉ារូបនោះនៅឡើយទេ ខណៈលោកប្រាប់កម្ពុជាថ្មីយ៉ាងខ្លីថា លោកឆ្ងល់មែនទែន មានលុយច្រើនប៉ុណ្ណឹង ហេតុអ្វីធ្វើបែបនេះ?៕

អត្ថបទ ៖ ចាន់រ៉ា

The post សុខ រ៉ាស៊ី ព្រមានទម្លាយមុខអតីតឧកញ៉ាវាយប្រពន្ធម្នាក់ ជំពាក់លុយមិនសង appeared first on Kampuchea Thmey Daily.

សុខ រ៉ាស៊ី លើកឡើង ៣ ចំណុច បញ្ហាសំរាមតាមផ្ទះធ្វើឲ្យប៉ះពាល់ដល់បរិស្ថាន

Din Thary — Fri, 30 Aug 2024 02:18:32 +0000

ដោយមើលឃើញពីបញ្ហាប្រឈមពាក់ព័ន្ធនឹងរឿងទុកដាក់សំរាមនៅតាមមុខផ្ទះរបស់ប្រជាពលរដ្ឋដែលធ្វើឲ្យប៉ះពាល់ដល់បរិស្ថាន និងសោភ័ណភាពទីក្រុងពិធីកររូបស្រស់សង្ហាលោក សុខ រ៉ាស៊ី បានចេញមកលើកឡើងនូវយោបល់ចំនួន ៣ ចំណុច។

លោក សុខ រ៉ាស៊ី បានបញ្ចេញវីដេអូរយៈពេលប្រមាណជិត ៣នាទី ដោយភ្ជាប់ខ្លឹមសារថា “ខ្ញុំចង់និយាយរឿងសំរាមតាមផ្ទះ ចាំមើលអ្នកណាស៊ែរខ្លះរឿងសង្គម“។ លោក សុខ រ៉ាស៊ី បានលើកឡើងថា បើតាមការមើលឃើញ និងសក្សាទៅគឺមានចំណោតបញ្ហា ៣ ជុំវិញរឿងសំរាមនៅតាមផ្ទះដែលបង្កផលប៉ះពាល់ដល់បរិស្ថានយ៉ាងខ្លាំង។

ពិធីករ សុខ រ៉ាស៊ី បានបន្តថា កត្តាទី១ ដែលលោកបានរកឃើញនោះគឺ ស្នើឲ្យមានការចូលរួមដោយផ្ទាល់ពីម្ចាស់ផ្ទះតាមរយៈការទុកដាក់សំរាមឲ្យបានត្រឹមត្រូវ និងវេចខ្ចប់សំរាមដាក់ទៅក្នុងធុងចៀសវាងការចោលសំរាមរប៉ាត់រប៉ាយគ្មានរបៀប។

កត្តាទី២ គឺស្នើសុំឲ្យមានការចូលរួមសហការពីបងប្អូនបុគ្គលិកខាងក្រុមហ៊ុនប្រមូលសំរាម(សូមមេត្តាព្យាយាមចូលប្រមូលសំរាមឲ្យបានគ្រប់កន្លែង ពិសេសផ្ទះបងប្អូនដែលនៅតាមផ្លូវច្រកចូលតូចៗដើម្បីកុំឲ្យពួកគាត់ប្រមូលផ្តុំសំរាមដាក់នៅមុខផ្ទះ ឬតាមផ្ទះអ្នកដទៃ) ដូច្នេះសូមបង្កើនប្រសិទ្ធភាពក្នុងការប្រមូលសំរាមនៅក្នុងរាជធានីភ្នំពេញ និងតាមបណ្តាខេត្តដ៏ទៃទៀត។

ចំណែកឯកត្តាទី៣ គឺលោក សុខ រ៉ាស៊ី ផ្តោតលើបងប្អូនប្រកបរបររើសអេតចាយ។ លោកថា ខ្ញុំមិនមែននិយាយមើលងាយដល់បងប្អូនអ្នករើសអេតចាយទេ ប៉ុន្តែខ្ញុំឃើញបងប្អូនរើសអេតចាយខ្លះគាត់តែងរើកកាយសំរាមដែលយើងបានវេចខ្ចប់ទុកដាក់ត្រឹមត្រូវបង្កឲ្យរាយប៉ាយពេញផ្លូវនេះ ខ្ញុំនិយាយតែមួយចំនួនតូចទេ។ ពិធីករសុខ រ៉ាស៊ី សង្ឃឹមថាប្រជាពលរដ្ឋនឹងចូលរួមទាំងអស់គ្នាដើម្បីបរិស្ថានល្អ និងទីក្រុងស្អាត៕

អត្ថបទ៖ ចាន់រ៉ា

The post សុខ រ៉ាស៊ី លើកឡើង ៣ ចំណុច បញ្ហាសំរាមតាមផ្ទះធ្វើឲ្យប៉ះពាល់ដល់បរិស្ថាន appeared first on Kampuchea Thmey Daily.

សុខ រ៉ាស៊ី ស្នើមន្ត្រីពាក់ព័ន្ធ គួរចាប់អ្នកលក់អាហារគីមី និងថ្នាំពេទ្យគេចពន្ធមុនគេ

Din Thary — Thu, 06 Jun 2024 09:26:55 +0000

គេកត់សម្គាល់ឃើញថា អំឡុងពេលប៉ុន្មានថ្ងៃមុននេះបានផ្ទុះនូវរឿងរ៉ាវដ៏ចាប់អារម្មណ៍ និងភ្ញាក់ផ្អើលពាក់ព័ន្ធករណីមន្រ្តីគយចុះចាប់កន្លែង អាជីវករលក់ទូរស័ព្ទអត់ពន្ធ។ ករណីនេះក៏មានការរិះគន់ និងវែកញែកជាច្រើនពីសំណាក់មហាជនគ្រប់មជ្ឈដ្ឋាន។

ទោះបីយ៉ាងណាមកដល់ពេលនេះនៅតែមានប្រជាពលរដ្ឋមួយចំនួនមិនទាន់អស់មន្ទិលចំពោះករណីនេះ ថ្វីត្បិតតែមានការបកស្រាយយ៉ាងណាក្តី។ ដោយឡែកងាកមកចាប់អារម្មណ៍លើពិធីករសម្បូរវោហារស័ព្ទលោក សុខ រ៉ាស៊ី បានចេញមកស្នើដល់មន្រ្តីពាក់ព័ន្ធថា រឿងដែលចំបាច់ត្រូវចាប់មុនគេគួរចាប់អ្នកលក់អាហារគីមីនឹងថ្នាំពេទ្យគេចពន្ធចំណែកឯទូរស័ព្ទគេចពន្ធកុំទាន់ចាប់។

លោក សុខ រ៉ាស៊ី បានបង្ហោះខ្លឹមសារនៅលើបណ្តាញសង្គមហ្វេសប៊ុករបស់ខ្លួនកាលពីម្សិលមិញ ដោយលើកជាមតិថា “ទូរស័ព្ទគេចពន្ធកុំទាន់ចាប់ ចង់ឲ្យ ចាប់អ្នកលក់អាហារគីមី និងថ្នាំពេទ្យគេចពន្ធមុន វាចាំបាច់ជាងជួយSHARED “។ តាមរយៈការលើកឡើងរបស់លោក សុខ រ៉ាស៊ី ខាងលើមានមតិជាច្រើនបានសម្តែងការគាំទ្រ។

ជាមួយគ្នានេះក៏មានការបញ្ចេញមតិថា «គាំទ្របង,ជាពិសេសបន្លែប្រទេសជិតខាង ចូលមកគ្មានពិនិត្យរកសាធាតុគីមីស្អីទេឲ្យតែឲ្យលុយពួកមន្រ្ដីគ្រាប់ល្ពៅអស់នឹងគ្រាន់ត្រឹមកាន់ច្រកពួកគេមានប្រពន្ធ ៥ លុយវាល់លានដុល្លារ។ ត្រូវបង មើលៗផងបងៗមន្រ្តីពាក់ព័ន្ធ, យោបល់ល្អស័ក្តិសមជាតារារបស់មហាជន សូមសរសើរៗ»។ ទោះបីយ៉ាងណានេះគ្រាន់តែជាការលើកឡើងដើម្បីជាសំណើរពីសំណាក់ពិធីកររូបសង្ហា សុខ រ៉ាស៊ី ទៅកាន់មន្ត្រីពាក់ព័ន្ធ៕

អត្ថបទ៖ ចាន់រ៉ា

The post សុខ រ៉ាស៊ី ស្នើមន្ត្រីពាក់ព័ន្ធ គួរចាប់អ្នកលក់អាហារគីមី និងថ្នាំពេទ្យគេចពន្ធមុនគេ appeared first on Kampuchea Thmey Daily.

សុខ រ៉ាស៊ី ហួសចិត្ត ក្រោយធ្លាយរឿងអ្នកគ្រប់គ្រងកម្មវិធីបវរកញ្ញាមួយ យកលុយជាថ្នូរបានតំណែង Top 5

អ៊ិន ពិសី — Fri, 24 May 2024 05:10:26 +0000

ទស្សនិកជន និងអ្នកនិយមតាមដានវិស័យដើរម៉ូដនៅកម្ពុជា បានសម្តែងការភ្ញាក់ផ្អើលជាថ្មី ខណៈមានការទម្លាយថា អ្នកគ្រប់គ្រងយកលុយជាថ្នូរបានតំណែងក្នុងបេក្ខភាព Top5 នៃ Miss Global Cambodia២០២៤។ ម្យ៉ាងទៀត ក៏មានការលក់មកុដឲ្យអ្នកដែលមានចិត្តចង់ចំណាយជាជាងឲ្យបេក្ខភាពប្រជែងយកមកុដ Miss Global Cambodia។

នេះបើយោងតាមលោក សុខ រ៉ាស៊ី ដែលជាពិធីករល្បីឈ្មោះ បានបង្ហោះខ្លឹមសារអមដោយក្តីហួសចិត្តដែលបានដកស្រង់សំណេរបកប្រែជាភាសាខ្មែររបស់ជនជាតិបរទេសម្នាក់ដែលបានអះអាងថា អនុប្រធាន Miss Global Cambodia បានបង្ហោះរៀបរាប់នៅលើគណនីហ្វេសប៊ុករបស់គេ កាលពីថ្មីៗ នេះ។

ពិធីករ សុខ រ៉ាស៊ី បានលើកឡើងថា «សូមសរសើរធ្វើបាបខ្មែរមិនអស់ចិត្ត ធ្វើបាបដល់ជាតិសាសន៍ផ្សេងទៀត តើអ្នកណាអាចមានចំណាត់ការលើបុគ្គល អ៊ិន សុភិន នេះបាន? លុយខ្ញុំមិនបានសូម្បីមួយរៀល ៤ ឆ្នាំហើយ មានបុគ្គលិក មានគ្រូបង្វឹក មានអ្នកនិពន្ធ សុទ្ធតែជននេះធ្លាប់បោកប្រាស់»។

លោក សុខ រ៉ាស៊ី បានភ្ជាប់ខ្លឹមសារបកប្រែមួយដូច្នេះថា «បកប្រែពីសំណេររបស់គាត់ ៖ សួស្ដីអ្នកទាំងអស់គ្នា ខ្ញុំឈ្មោះ Fahed Sharaf ខ្ញុំត្រូវបានតែងតាំងជាអនុប្រធាន Miss Global Cambodia នាពេលថ្មីៗ នេះហើយ ខ្ញុំកំពុងចែករំលែកការបង្ហោះនេះ ដើម្បីផ្លុំកញ្ចែអំពីរបៀបដែលនាយកជាតិ លោក សុភិន អ៊ិន កំពុងដឹកនាំប្រតិបត្តិការរបស់ខ្លួន»។

សំណេរនោះ បានរៀបរាប់ថា «ថ្មីៗ នេះ មានការចាប់អារម្មណ៍ថាបេក្ខភាពមួយរូបបានផ្ទេរប្រាក់ទៅឲ្យអ្នកគ្រប់គ្រងផលិតកម្មមហាហង្ស គឺលោក សេង សន ដើម្បីធានាបានតំណែងក្នុងបេក្ខភាព Top 5 សម្រាប់ការប្រកួត Miss Global Cambodia 2024 ដែលរំពឹងថា នឹងធ្វើជាម្ចាស់ផ្ទះ។ ក្នុងខែសីហាឆ្នាំនេះ។ តាមការកត់សម្គាល់ក្នុងប្រតិបត្តិការនេះជាភាសាខ្មែរ ប៉ុន្តែខ្ញុំត្រូវបានគេជូនដំណឹងថាវាមានន័យថា ប្រតិបត្តិការ ៥០០ ដុល្លារ គឺជាការទូទាត់ដំបូងដែលនៅសេសសល់ចំនួន ១ ៥០០ ដុល្លារ សម្រាប់នាងក្នុងការជាប់ចំណាត់ថ្នាក់លេខ ៥។ មានន័យថា លោក សុភិន អ៊ិន លក់មកុដឲ្យអ្នកដែលមានចិត្តចង់ចំណាយជាជាងឲ្យបេក្ខភាពប្រជែងយកមកុដ Miss Global Cambodia តាមវិធីដែលបវរកញ្ញាជុំវិញពិភពលោកត្រូវដឹកនាំដោយមានម្ចាស់ជ័យលាភី Miss Global ជាតំណាងផ្លូវការរបស់ Mis s Global នៃប្រទេសដែលចូលរួម។ សូមជួយShare ផុសនេះ ដើម្បីបង្កើនការយល់ដឹងអំពីស្ថានភាពនេះ។ ជាមួយនឹងការលាតត្រដាងពីរបៀបដែលលោក សុភិ ន អ៊ិន កំពុងដឹកនាំ Miss Global Cambodia ខ្ញុំសូមប្រកាសលាលែងពីតំណែងអនុប្រធាន Miss Global Cambodia។ ខ្ញុំបានជូនដំណឹងដល់ព័ត៌មានអំពីស្ថានភាពនេះរួចហើយ ហើយនឹងទាក់ទងអ្នកសារព័ត៌មានផ្សេងទៀតផងដែរ ដើម្បីស៊ើបអង្កេតស្ថានភាពនេះ»។

នៅក្នុងសំណេរបកប្រែដែលលោក សុខ រ៉ាស៊ី យកមកបង្ហោះនោះ បាននិយាយទៀតថា «ខ្ញុំក៏បានទទួលដំណឹងពីប្រជាពលរដ្ឋជាច្រើនថា លោក សុភិន ក្នុងការពន្យារពេលបើកប្រាក់ខែ និងប្រាក់ខែសម្រាប់ការងារដែលពួកគេបានធ្វើជាច្រើនខែមកហើយ។ រួមទាំងករណីមួយដែលត្រូវបានចែករំលែកនៅក្នុងការបង្ហោះមួយផ្សេងទៀតជាមួយគ្រូបង្វឹកដែលចង្អុលបង្ហាញថា លោកជំពាក់គាត់ $ 2000+ ហើយរហូតមកដល់សព្វថ្ងៃនេះមិនទាន់បានសងគាត់វិញទេ»។

ទាក់ទងនឹងដំណឹងដ៏រសើបខាងលើនេះដែរ កម្ពុជាថ្មី នៅព្រឹកថ្ងៃទី ២៤ ខែឧសភា ឆ្នាំ ២០២៤ នេះ មិនទាន់អាចទាក់ទងដើម្បីស្វែងរកការបំភ្លឺពីសំណាក់លោក អ៊ិន សុភិន ជុំវិញរឿងរ៉ាវនេះបាននៅឡើយទេ។ ដូច្នេះសង្ឃឹមថា លោក អ៊ិន សុភិន នឹងចេញមកបកស្រាយ ដើម្បីឲ្យមហាជនបានដឹងការពិត៕

អត្ថបទ ៖ ចាន់រ៉ា

The post សុខ រ៉ាស៊ី ហួសចិត្ត ក្រោយធ្លាយរឿងអ្នកគ្រប់គ្រងកម្មវិធីបវរកញ្ញាមួយ យកលុយជាថ្នូរបានតំណែង Top 5 appeared first on Kampuchea Thmey Daily.

ទើបអាយុ ១២ឆ្នាំ កូនប្រុសពិធីករ សុខ រ៉ាស៊ី សង្ហាមិនចាញ់ឪពុក

Din Thary — Thu, 25 Apr 2024 08:27:38 +0000

កាលពីថ្មីៗនេះពិធីករពោរពេញដោយវោហារស័ព្ទចូលចិត្តនិយាយកំប្លុកកំប្លែងលោក សុខ រ៉ាស៊ី បានបញ្ចេញរូបថត ១សន្លឹករវាងលោក និងកូនប្រុសជាទីរបស់ខ្លួននៅលើបណ្តាញសង្គមហ្វេសប៊ុកបង្កការចាប់អារម្មណ៍ និងភ្ញាក់ផ្អើលដោយហេតុថាគេមិននឹកស្មានថា លោកមានកូនធំពេញរូបពេញរាងសង្ហាដូចនេះទេ។

កន្លងមកពិធីករល្បីឈ្មោះរូបនេះកម្របង្ហាញឲ្យដឹងថាលោកមានកូនប្រុសធំយ៉ាងសង្ហាបែបនេះឡើយ ទើបតែមុននេះ រ៉ាស៊ី បានបង្ហោះជាសាធារណៈនៅលើបណ្តាញសង្គមខណៈមានមតិជាច្រើនបានលាន់មាត់សរសើរគ្រប់គ្នាថាសង្ហាមិនចាញ់ឪពុកទេ។ ម្យ៉ាងទៀតក៏មានអ្នកគាំទ្រមួយចំនួនបាននិយាយបែបចំអន់លេងសើចដោយហៅលោក សុខ រ៉ាស៊ី ថាប៉ាក្មេកទៀតផង។

ដូចគ្នាទៅនឹងអ្នកគាំទ្រដែរ តារាសម្តែង-កំប្លែងភេទទី៣ លោក ម៉ា ដូណា ដែលជាមិត្តភក្តិរង្វង់សិល្ប:ជាមួយលោក សុខ រ៉ាស៊ី ក៏បានបញ្ចេញមតិបែបលេងសើចថា «កូនសុំគោរពលោកពុកក្មេក Mc Rasy Sok ពីចម្ងាយកូនស្រីម្នាក់នេះខុសឆ្គងពីមុនដែលនិយាយជ្រុលជ្រួសសូមលោកពុកកុំប្រកាន់ កូននឹងកែតម្រូវរាល់កំហុសឆ្គងតាមអ្វីដែលលោកពុកចង់បានដោយក្តីគោរពពីកូនប្រសារគួរឲ្យស្រលាញ់»។

បើតាមការឲ្យដឹងពីពិធីករលោក សុខ រ៉ាស៊ី បានប្រាប់ «កម្ពុជាថ្មី» ថា កូនប្រុសជាទីស្រលាញ់របស់លោក គឺទើប តែមានអាយុ ១២ឆ្នាំប៉ុណ្ណោះ ហើយបច្ចុប្បន្នកំពុងរៀនថ្នាក់ទី៦។ ដោយឡែកនៅពេលសួរថា តើធំទៅមានបំណងបណ្តុះគាត់ឲ្យចូលសិល្បៈដូច រ៉ាស៊ី ទេ ? ត្រង់ចំណុចនេះលោក សុខ រ៉ាស៊ី បានបញ្ជាក់ខ្លីថា “តាមនិស្ស័យរបស់គាត់”៕

អត្ថបទ៖ចាន់រ៉ា

The post ទើបអាយុ ១២ឆ្នាំ កូនប្រុសពិធីករ សុខ រ៉ាស៊ី សង្ហាមិនចាញ់ឪពុក appeared first on Kampuchea Thmey Daily.

ពិធីករ សុខ រ៉ាស៊ី ត្រូវបានជ្រើសរើសជាគណៈកម្មការរៀបចំការបោះឆ្នោតប្រធានសមាគមសិល្បករខ្មែរ

អ៊ិន ពិសី — Sun, 21 Apr 2024 04:06:51 +0000

ពិធីករមានប្រជាប្រិយភាពលោក សុខ រ៉ាស៊ី បង្ហើបឲ្យដឹងថា លោកត្រូវបានតែងតាំងជាគណៈកម្មការរៀបចំការបោះឆ្នោត ជ្រើសរើសប្រធានសមាគមសិល្បករខ្មែរ ដែលនឹងធ្វើឡើងនៅដើមខែឧសភា ឆ្នាំ ២០២៤ ខាងមុខនេះ។

លោក សុខ រ៉ាស៊ី បានបញ្ជាក់ប្រាប់កម្ពុជាថ្មីថា លោកពិតជាមានអារម្មណ៍រំភើបខ្លាំងណាស់ ដែលត្រូវបាន លោក ទិត្យ ថាវរិទ្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ សម្រេចតែងតាំងឲ្យធ្វើជាគណៈកម្មការរៀបចំការបោះឆ្នោតជ្រើសរើសប្រធានសមាគមសិល្បករខ្មែរអាណត្តិថ្មី នាពេលឆាប់ៗ នេះ។

ពិធីករ សុខ រ៉ាស៊ី បាននិយាយបន្តទៀតថា បើតាមគម្រោង សម្រាប់ការបោះឆ្នោតជ្រើសរើសប្រធានសមាគមសិល្បករខ្មែរអាណត្តិថ្មីនេះ នឹងរៀបចំធ្វើឡើងនៅថ្ងៃទី ០២ ខែឧសភា ឆ្នាំ ២០២៤ ដែលមានការអញ្ជើញសិល្បករ-សិល្បការិនីទាំងទៅចូលរួមការបោះឆ្នោតនេះឲ្យបានគ្រប់គ្នា ដើម្បីជ្រើសរើសសមាសភាពប្រធានថ្មីដឹកនាំបន្តពីអ្នកនាង ចន ច័ន្ទលក្ខិណា ដែលជាប្រធានចាស់។

ជាមួយគ្នានេះដែរ លោក សុខ រ៉ាស៊ី ក៏បានរំពឹងថា សិល្បករ-សិល្បការិនីទាំងអស់ នឹងអញ្ជើញចូលរួមបោះឆ្នោតដើម្បីជ្រើសរើសប្រធានសមាគមសិល្បករខ្មែរអាណត្តិថ្មីតាមការកំណត់។

សូមបញ្ជាក់ថា កាលពីថ្មីៗ នេះ សមាគមសិល្បករខ្មែរ ក៏បានចេញការជូនដំណឹងដល់សិល្បករ-សិល្បការិនី ដែលមានបំណងចូលរួមបោះឆ្នោតជ្រើសរើសប្រធានសមាគមសិល្បៈអាណត្តិទី ៦ ទៅបំពេញឈ្មោះ ដើម្បីទទួលបានបណ្ណបញ្ជាក់សិទ្ធិចូលរួមបោះឆ្នោតចាប់ពីថ្ងៃទី ២០ ដល់ ៣០ ខែមេសា ឆ្នាំ ២០២៤ ផងដែរ៕

អត្ថបទ ៖ ចាន់រ៉ា

The post ពិធីករ សុខ រ៉ាស៊ី ត្រូវបានជ្រើសរើសជាគណៈកម្មការរៀបចំការបោះឆ្នោតប្រធានសមាគមសិល្បករខ្មែរ appeared first on Kampuchea Thmey Daily.

សុខ រ៉ាស៊ី Archives - Kampuchea Thmey Daily

ពិធីករ សុខ រ៉ាស៊ី អង្វរបុរសៗ សូមកុំមានជម្លោះជាមួយមនុស្សស្រី

ពិធីករ សុខ រ៉ាស៊ី ថា «បើខ្ញុំជាម្ចាស់ឆ្កែ មុនទៅប្ដឹងគេ គួរតែវេរលុយឲ្យបុគ្គលិកសិន»

សុខ រ៉ាស៊ី ព្រមានទម្លាយមុខអតីតឧកញ៉ាវាយប្រពន្ធម្នាក់ ជំពាក់លុយមិនសង

សុខ រ៉ាស៊ី លើកឡើង ៣ ចំណុច បញ្ហាសំរាមតាមផ្ទះធ្វើឲ្យប៉ះពាល់ដល់បរិស្ថាន

សុខ រ៉ាស៊ី ស្នើមន្ត្រីពាក់ព័ន្ធ គួរចាប់អ្នកលក់អាហារគីមី និងថ្នាំពេទ្យគេចពន្ធមុនគេ

សុខ រ៉ាស៊ី ហួសចិត្ត ក្រោយធ្លាយរឿងអ្នកគ្រប់គ្រងកម្មវិធីបវរកញ្ញាមួយ យកលុយជាថ្នូរបានតំណែង Top 5

ទើបអាយុ ១២ឆ្នាំ កូនប្រុសពិធីករ សុខ រ៉ាស៊ី សង្ហាមិនចាញ់ឪពុក

ពិធីករ សុខ រ៉ាស៊ី ត្រូវបានជ្រើសរើសជាគណៈកម្មការរៀបចំការបោះឆ្នោត​ប្រធានសមាគមសិល្បករខ្មែរ

ពិធីករ សុខ រ៉ាស៊ី ត្រូវបានជ្រើសរើសជាគណៈកម្មការរៀបចំការបោះឆ្នោតប្រធានសមាគមសិល្បករខ្មែរ