វិស័យ​សេវាកម្ម ផលិតកម្ម និងកសិកម្ម នៅតែជាសសរស្តម្ភសំខាន់ៗដែលគាំទ្រដល់ដំណើរការសេដ្ឋកិច្ចទាំងមូល។

សេវាកម្មរួមចំណែក​ ៣៦,៣% នៃសេដ្ឋកិច្ច ដែលគាំទ្រដោយកំណើននៃសកម្មភាពទាក់ទងនឹងទេសចរណ៍ ការដឹកជញ្ជូន និងពាណិជ្ជកម្ម។ ចំណែកវិស័យផលិតកម្មវិញ រួមចំណែក ៣២% និងកសិកម្ម ២០,៣%។ ​

​ទៅមុខទៀត​ រដ្ឋាភិបាលឡាវ​មានគោលបំណងជំរុញកំណើនសេដ្ឋកិច្ចឱ្យបាន​ដល់យ៉ាងហោចណាស់ ​៥,៥% នៅឆ្នាំ ២០២៦ ដែលលើសពីការ​ព្យាករ​បច្ចុប្បន្ន ៥,១​%។​ ឧស្សាហកម្មទេសចរណ៍ ថាមពល ភស្តុភារកម្ម កសិកម្ម និងឧស្សាហកម្មកែច្នៃកសិ-ឧស្សាហកម្ម ត្រូវបានកំណត់ថាជាកត្តាជំរុញដ៏សំខាន់សម្រាប់ឆ្នាំ ២០២៦។

ក្រៅពីនេះ ឡាវ​ក៏មានគោលបំណងបង្កើនកម្រិតចំណូលបន្ថែមទៀតផងដែរ​ ដោយផលិតផលក្នុងស្រុកសរុប (GDP) សម្រាប់ម្នាក់ ត្រូវបានព្យាករ​នៅ​ ២ ២៣៨ ដុល្លារអាមេរិក/ម្នាក់៕ ​

The post សេដ្ឋកិច្ចឡាវកើនឡើង ៤,៨% នៅឆ្នាំមុន appeared first on Kampuchea Thmey Daily.

សារព័ត៌មានក្នុងស្រុកឡាវ បានរាយការណ៍ដោយដកស្រង់សម្តីរបស់លោកស្រី Suddaphone Khomthavong ប្រធានមន្ទីរព័ត៌មាន វប្បធម៌ និងទេសចរណ៍ខេត្តហ្លួងព្រះបាង (Luang Prabang) ដែល​បាន​និយាយ​ថា ក្នុងរយៈពេល៣ខែដើមឆ្នាំ២០២៥នេះ ភ្ញៀវទេសចរបានមកកម្សាន្តនៅទីក្រុងទេសចរណ៍បេតិកភណ្ឌ​ពិភពលោក​របស់​អង្គការ​យូ​ណេ​ស្កូ «ខេត្តហ្លួងព្រះបាង (Luang Prabang)»​ សរុបចំនួន ១,១៦៧,៥៨១នាក់ បើធៀបនឹងរយៈពេលដូចគ្នាកាលពីឆ្នាំមុន កើនឡើងចំនួន៧២២,៦៧៩%។

ក្នុងចំណោម​​​ភ្ញៀវទេសចរ​ទាំង​អស់ ភ្ញៀវ​ក្នុងស្រុកមានចំនួន ៤៥៩,០៩១នាក់ កើនឡើងចំនួន ២៩៧,០៨១នាក់ ស្មើនឹង១៨៣% បើធៀបនឹងរយៈពេលដូចគ្នាកាលពីឆ្នាំមុន និងភ្ញៀវទេសចរអន្តរជាតិ មាន​ចំនួន ៧០៨,៤៩០នាក់ កើនឡើងចំនួន ៤២៥,៦៦១នាក់ ស្មើនឹង២៣២% បើធៀបនឹងរយៈពេលដូចគ្នាកាលពីឆ្នាំមុន ដែលធ្វើឱ្យឡាវទទួលបានប្រាក់ចំណូលសរុប​ពី​ភ្ញៀវ​ទេសចររហូតដល់ ៥៨៤,៦៦៥,៣៦៩ដុល្លារ។

លោកស្រី Suddaphone បានបន្តថា សម្រាប់ឆ្នាំ២០២៤កន្លងទៅ ក្រុងហ្លួងព្រះបាង (Luang Prabang) ទទួលបានភ្ញៀវទេសចរសរុបចំនួន ២,៣២៦,៧៥៨នាក់ ពោលគឺលើសពីគោលដៅ៣០,៨%នៃផែនការប្រចាំឆ្នាំ និងទទួលបានប្រាក់ចំណូលពីភ្ញៀវទេសចរចំនួន ១,២០៩,១៨៩,៥៤៩ដុល្លារ។

សារព័ត៌មានឡាវ Lao National Radio បានរាយការណ៍ថា ការកើនឡើងនៃចំនួនភ្ញៀវ​ទេសចរមកកាន់ទីក្រុង បេតិកភណ្ឌ​ពិភពលោកខេត្តហ្លួងព្រះបាងនេះ ដោយសារឡាវមានផ្លូវរថភ្លើងល្បឿនលឿន (ឡាវ-ចិន) ពីទីក្រុងវៀងចន្ទន៍-ក្រុងហ្លួងព្រះបាង-តំបន់សេដ្ឋកិច្ចពិសេសបរតែន (Borten) ជាប់ព្រំដែនជាមួយប្រទេសចិន ដែលធ្វើឱ្យភ្ញៀវ​ទេសចរចំណាយពេលតិចក្នុងការធ្វើដំណើរត្រឹមតែរយៈពេលប្រហែល២ម៉ោងប៉ុណ្ណោះ បើធៀបពីមុនត្រូវចំណាយពេលរហូតដល់ជាង៨ម៉ោងឯណោះទើបដល់ ពោលគឺងាយស្រួលក្នុងការធ្វើដំណើរនិងកាត់បន្ថយការចំណាយ៕

ភ្នាក់ងារ​

The post ​ត្រីមាស​ដំបូង​ តំបន់ទេសចរណ៍ហ្លួងព្រះបាង​របស់​ឡាវ មាន​កំណើនទេសចរ​ជាង​៧២២​% ទទួលចំណូល​​ជាង ៥៨៤លានដុល្លារ appeared first on Kampuchea Thmey Daily.

​ក្នុងខែកុម្ភៈ ​តម្លៃនៃការថែទាំសុខភាព និងថ្នាំពេទ្យ​ បានថយចុះ ២២,៧ ភាគរយ ​ប៉ុន្តែវា​នៅស្ថិត​នៅក្នុងប្រភេទ​នៃ​ការចំណាយ​ខ្ពស់​។

ថ្លៃស្នាក់នៅ ទឹក ភ្លើង និងហ្គាសចម្អិនអាហារ បានធ្លាក់ចុះ ២១,៨ ភាគរយ ហើយ​បន្ទាប់​មក​ទៀត​គឺការចុះនៃថ្លៃអប់រំ (២០,៧ ភាគរយ) ​គ្រឿងប្រើប្រាស់ក្នុងផ្ទះ (២០,៣ ភាគរយ) ​ភោជនីយដ្ឋាន និងសណ្ឋាគារ (១៩ ភាគរយ) ​និងអាហារ និង​ភេសជ្ជៈគ្មានជាតិអាល់កុល ដែលជាទំនិញប្រើប្រាស់ច្រើនបំផុតដោយប្រជាជនឡាវ (១០,៨ ភាគរយ​)។

យោងតាមរបាយការណ៍ ការធ្លាក់ចុះនៃអត្រាអតិផរណានាពេល​នេះ គឺបណ្តាលមកពីកត្តាជាច្រើន រួមទាំងការផ្គត់ផ្គង់កសិផលដែលមានស្ថិរភាព និងការធ្វើឱ្យប្រសើរឡើងនូវស្ថិរភាពអត្រាប្តូរប្រាក់ ដែលបានជំរុញឱ្យអ្នកប្រើប្រាស់ ទិញទំនិញនាំចូលកាន់តែច្រើន និង​កាត់បន្ថយសម្ពាធលើតម្លៃក្នុងស្រុក។

គួរគូស​បញ្ជាក់ថា​ ថៃធ្លាក់ចូល​ទៅក្នុងវិបត្តិអតិផរណា​ខ្ពស់​កប់ពពក​ក្នុងរយៈពេល​ប៉ុន្មានឆ្នាំចុង​ក្រោយ​នេះ ដោយសារតែការធ្លាក់ចុះ​នៃរូបិយប័ណ្ណក្នុងស្រុក ដែលធ្វើឱ្យ​ទំនិញ​ក្នុងប្រទេស​ពឹង​ផ្អែក​ខ្លាំងលើការនាំចូលមួយ​នេះ ហក់ឡើង​។

បូករួម​ទាំងកំណើនសេដ្ឋកិច្ចយឺតយ៉ាវ​ក្រោយ​វិបត្តិកូវីដ១៩ ​អតិផរណា​​បាន​ហក់ឡើងដល់ចំណុច​កំពូលប្រមាណ ៤១,២៦ ភាគរយ នៅខែ​កុម្ភៈ ឆ្នាំ ២០២៣។ អត្រាអតិផរណា​ធ្លាក់ចុះ​ចាប់ពីពេលនោះមក ប៉ុន្តែ​នៅ​តែស្ថិតក្នុងកម្រិតខ្ពស់​ ពោលគឺជាង​ ២០ ភាគរយ នៅក្នុងឆ្នាំ ២០២៤។ អត្រានេះ​ធ្លាក់ចុះ​ក្រោម ២០ ជាលើកដំបូង​នៅខែធ្នូ ២០២៤ មកត្រឹម ១៦,៩ ភាគរយ​៕

The post អតិផរណា​ឡាវ ធ្លាក់ចុះមកត្រឹម ១២,៧ ភាគរយ នៅខែ​កុម្ភៈ appeared first on Kampuchea Thmey Daily.

គំនិតផ្តួចផ្តើមរយៈពេល៦ឆ្នាំនេះ ​មានតម្លៃ ៥៦ លានដុល្លារអាមេរិក ​និង​មានគោលបំណងពង្រឹងហេដ្ឋារចនាសម្ព័ន្ធដឹកជញ្ជូននៅភាគកណ្តាល និងភាគខាងត្បូងនៃប្រទេសឡាវ ដោយ​ធ្វើឱ្យប្រសើរឡើងនូវ​ការ​ដឹក​ជញ្ជូន​ទំនិញ​ទៅ​ទីផ្សារ និងសេវាកម្មសំខាន់ៗសម្រាប់ប្រជាជនប្រមាណ ៦០០ ០០០ នាក់​។​

ជា​ធម្មតា​ គម្រោង​បែប​នេះ​ទទួល​បាន​ការឧបត្ថម្ភថវិកាដោយសមាគមអភិវឌ្ឍន៍អន្តរជាតិ ​នៃ​ធនាគារពិភពលោក ដែល​ផ្តោតលើប្រទេស​មានចំណូលទាប ដើម្បីពង្រឹង​សេដ្ឋកិច្ចរបស់ពួកគេ។ នៅ​ក្នុង​ប្រទេស​ឡាវ​ ​​ខេត្ត​រួម​មាន​ Khammouane, Salavanh, និង Savannakhet ត្រូវបានជ្រើសរើសសម្រាប់​អនុវត្តគម្រោង​នេះ​ ដោយសារខេត្ត​ទាំង​៣ មាន​ស្ថានភាពផ្លូវមិនល្អ ​ងាយរងគ្រោះខ្ពស់ចំពោះទឹកជំនន់ និង​​មាន​អត្រាភាព​ក្រីក្រខ្ពស់​ និង​ដើរ​តួរសំខាន់​ក្នុង​ផលិតកម្ម​កសិកម្ម​របស់​ប្រទេស​។

បើ​តាម​ការ​ចុះ​ផ្សាយ​របស់​ Laotian Times បច្ចុប្បន្ន​ការវិនិយោគលើផ្លូវថ្នល់​នៅ​ឡាវ គឺ​ផ្តោតជាចម្បងលើផ្លូវហាយវេ និងតំបន់ទីក្រុង ដែលធ្វើ​ឱ្យ​តំបន់ដាច់ស្រយាល​មាន​ផ្លូវ​ពិបាក​ជិះ​។ ផ្លូវ​ជនបទ​ប្រមាណ ៤០ ភាគរយ​ នៅ​មិនទាន់​​ឈូស​ឆាយ​ឱ្យ​ស្អាត​ ដោយ​មាន​ផ្លូវ​តែ ១៥ ភាគរយ​ប៉ុណ្ណោះ ​ដែល​មាន​ស្ថានភាព​ល្អ។ គម្រោង​របស់​ធនាគារ​ពិភព​លោក​ នឹងផ្តោតលើការកែលម្អតំបន់ដែល​មាន​ផ្លូវ​រដិបរដុប​ទាំងនេះ ដែលងាយប្រឈមនឹងគ្រោះធម្មជាតិដូចជាទឹកជំនន់ និងការរអិលបាក់ដីជាដើម​។

នាយកធនាគារពិភពលោកប្រចាំប្រទេសឡាវ លោក Alex Kremer បាន​ថ្លែង​ថា​ បណ្ដាញ​ផ្លូវ​តភ្ជាប់​ទៅ​ទីផ្សារ​ សាលារៀន​ និង​សេវាថែទាំ​សុខភាព​មាន​សារៈសំខាន់​ណាស់​ ខណៈ​ប្រជាជននៅតាមជនបទ រួមទាំងស្ត្រី និងកសិករ ប្រឈមមុខនឹងហានិភ័យខ្ពស់បំផុតពីការប្រែប្រួលអាកាសធាតុ។ តាម​រយៈ​ការកែលម្អ​ផ្លូវ​ដែល​ធន​នឹង​អាកាសធាតុ​ ពួកគេ​នឹង​អាច​ទទួលបានអត្ថប្រយោជន៍យ៉ាងច្រើន​៕

The post ឡាវ៖ ធនាគារពិភពលោកអនុម័តទឹកប្រាក់​ ៥៦ លាន​ដុល្លារ សម្រាប់​​គម្រោងសាងសង់​ផ្លូវ​ធន់​នឹង​អាកាសធាតុ​ appeared first on Kampuchea Thmey Daily.

ទំហំ​ពាណិជ្ជកម្ម​ឡាវ​ មាន​ទំហំ​សរុប​ប្រមាណជាង​​ ១​,២ ប៊ីលាន​ដុល្លារ​ ដោយ​ការ​នាំ​ចេញ​មាន​ប្រមាណ​ ​៥៤១ ​លាន​ដុល្លារ ខណៈ​ការ​នាំ​ចូល​សរុប​ មាន​ចំនួន​ ​​៦៧០​ លាន​ដុល្លារ ។ តួលេខទាំងនេះ មិនរាប់បញ្ចូលតម្លៃនៃការនាំចូល និងនាំចេញអគ្គិសនី​នោះ​ទេ​។

កាល​ពី​ខែ​កក្កដា​ ឡាវ​កត់​ត្រា​ឱន​ភាព​ពាណិជ្ជកម្ម​ប្រមាណ​ ១៥៤ លាន​ដុល្លារ​។ ទោះ​បី​ជា​ចំនួន​នេះ​ មាន​ការ​ថយ​ចុះ​ក៏​ដោយ​ ក៏​ប៉ុន្តែ​វា​នៅ​តែ​ជា​ក្ដីបារម្ភ​សម្រាប់​ឡាវ​អំពី​អតុល្យភាព​នៃជញ្ជីង​ពាណិជ្ជកម្ម​ពេញ​មួយ​ឆ្នាំ​ ២០២៤​។

អ្នក​ជំនាញ​សេដ្ឋកិច្ច​បាន​លើក​ឡើង​ថា​ មាន​កត្តា​ច្រើន​យ៉ាង​ ដែល​ធ្វើ​ឱ្យ​​​ឡាវ​បាន​បន្ត​ប្រឈម​មុខ​នឹង​ឱនភាព​ពាណិជ្ជកម្ម​។ មូលដ្ឋាន​នៃ​ការ​នាំ​ចេញ​របស់​ប្រទេស​នេះនៅ​តែ​មាន​ដែន​កំណត់​ ​ ដោយ​បន្ត​ពឹង​​​ផ្អែក​ខ្លាំង​លើ​ធម្មជាតិ ដូចជា​ធនធានរ៉ែ ​និង​ផលិត​ផល​កសិកម្ម​ ចំពេល​ដែល​វិស័យ​ផលិតកម្ម​របស់​ប្រទេស​នេះ​ស្ថិត​នៅ​ក្នុង​ភាព​ទន់​ខ្សោយ​ខ្លាំង​។

បើតាម​ LTP ទំនិញនាំចេញសំខាន់ៗរួមមាន គ្រឿងអគ្គិសនី មាស កៅស៊ូ ក្រដាស រ៉ែមាសមិន​ទាន់​កែ​ច្នៃ​ ស្ករស​ អំបិលប៉ូតាស្យូម ម្សៅដំឡូងមី និងដំឡូងមីជាដើម​។ ផ្ទុយ​ទៅ​វិញ​ ​ឡាវ​នាំចូលទំនិញ​សំខាន់ៗដែល​រួមមាន ប្រេងម៉ាស៊ូត គ្រឿងចក្រ យានជំនិះ ទំនិញគីមី គ្រឿងអគ្គិសនី ដែក ទំនិញប្លាស្ទិក គ្រឿងបន្លាស់រថយន្ត ប្រេងសាំង និងភេសជ្ជៈ។

អ្នក​ជំនាញ​មើល​ឃើញ​ថា​ ឡាវ​នៅ​តែ​ពឹង​ផ្អែក​ខ្លាំង​លើ​ទំនិញ​នាំ​ចូល​ សម្រាប់​ទំនិញ​ប្រើ​ប្រាស់​ជា​ច្រើន​មុខ​​ពី​បរទេស​ ខណៈ​​បញ្ហា​​ហេដ្ឋារចនាសម្ព័ន្ធ​របស់​ឡាវ​ ​បាន​​រារាំង​ប្រទេស​ដែល​គ្មាន​ដែន​សមុទ្រ​មួយ​នេះ​ ឱ្យ​ពិបាក​ក្នុង​ការ​ដឹកជញ្ជូន​ទំនិញ​នាំ​ចេញ​។ ក្រៅ​ពី​នេះ​ ឡាវ​ក៏​ប្រឈម​មុខ​​នឹង​ការ​ប្រកួត​ប្រជែង​ពី​ប្រទេស​ផ្សេង​ៗ​ទៀត​ក្នុង​តំបន់​តាម​រយៈ​កិច្ច​ព្រម​ព្រៀង​ពាណិជ្ជកម្ម​សេរី​ជាដើម​៕

The post ហេតុអ្វីបានជាឡាវបន្តប្រឈមមុខនឹងឱនភាពពាណិជ្ជកម្ម? appeared first on Kampuchea Thmey Daily.

ក្នុង​រយៈពេល​ប៉ុន្មាន​ខែ​ថ្មីៗ​នេះ ​ឡាវ​បាន​ប្រឈម​មុខ​នឹង​ការ​ឡើង​ថ្លៃ​លើ​វិស័យ​ជា​ច្រើន​។ ​ក្នុង​ខែ​សីហា​ តម្លៃ​​នៃ​ការថែទាំសុខភាព និងថ្នាំពេទ្យ ​ការ​ចំណាយ​​ប្រចាំ​ផ្ទះ​ (រាប់បញ្ចូលទាំងការចំណាយលើទឹក ភ្លើង និងហ្គាសចម្អិនអាហារ) ​​ភោជនីយដ្ឋាន និងសណ្ឋាគារ ​​ក៏ដូច​ជា​ឧបករណ៍ប្រើប្រាស់ក្នុងផ្ទះ បានកើនឡើង​ជាង​ ៣០ ភាគរយ​ ខណៈ​តម្លៃអាហារ និងភេសជ្ជៈគ្មានជាតិអាល់កុល បានកើនឡើង ២២,៥ ភាគរយ។

​អត្រានៃ​កំណើន​តម្លៃបានធ្លាក់ចុះ​​ ​ប៉ុន្តែ​វិស័យមួយចំនួននៅតែឃើញ​ពី​ការកើនឡើងតម្លៃគួរឱ្យកត់សម្គាល់។ វិស័យភោជនីយដ្ឋាន និងសណ្ឋាគារ ប្រឈមនឹងការកើនឡើងខ្លាំង​​ ដែលភាគច្រើនដោយសារតែថ្លៃដើមខ្ពស់នៃ​ទំនិញ​ដូច​ជា​​ស្រូវ​សើម ស្រាបៀរ និងមាន់ដុត។ ​វិស័យ​អប់រំ​ ក៏​ជួប​នឹង​កំណើន​តម្លៃ​ផងដែរ​ ​ជា​ពិសេស​​​ឯកសណ្ឋាន​សិស្ស និង​សៀវភៅ​សិក្សា​​។

ក្នុង​ផ្នែក​អាហារ និង​ភេសជ្ជៈ​គ្មាន​ជាតិ​អាល់កុល ក៏​តម្លៃ​បន្ត​ឡើង​ផង​ដែរ​ ដោយ​ថ្លៃ​បន្លែ​កើន​ខ្លាំង​ជា​ង​គេ​​ ក្រៅ​ពី​នេះ​មាន​ដូច​ជា​ម្ទេសស្រស់ ស៊ុតមាន់ និងសាច់ជ្រូក។ ប្រភេទឧបករណ៍ប្រើប្រាស់ក្នុងផ្ទះ ក៏មានតម្លៃខ្ពស់ផងដែរ ជាពិសេសសម្រាប់ពូក ម៉ាស៊ីនត្រជាក់ ម៉ាស៊ីនបោកគក់ និងចង្កៀង។

​ផ្ទុយ​ទៅ​វិញ​ គេ​ឃើញ​មាន​មុខ​ទំនិញ​មួយ​ចំនួន​ ដែលតម្លៃ​ថយ​ចុះ​។ ជា​ឧទាហរណ៍ តម្លៃ​ក្នុង​វិស័យដឹកជញ្ជូនបាន​ថយ​ចុះ​ ដូច​ជា​តម្លៃរថយន្ត ម៉ូតូ និងប្រេងឥន្ធនៈ​ជាដើម​។

គួរ​គូស​បញ្ជាក់​ថា​ អតិផរណាខ្ពស់ថេរ​ក្នុងប្រទេសឡាវ បណ្តាលមកពីកត្តា​ច្រើន​យ៉ាង​។ ការ​អភិវឌ្ឍ​នៃ​វិស័យផលិតកម្មក្នុងស្រុករបស់​ប្រទេស​នេះ​ ​នៅ​មាន​កម្រិត​នៅ​ឡើយ​ ខណៈ​​កិច្ចខិតខំប្រឹងប្រែងថ្មីៗក្នុងការលើកកម្ពស់ផលិតកម្មក្នុងស្រុក ក៏​មិនទាន់ទទួលបានលទ្ធផលគួរឱ្យកត់សម្គាល់នៅឡើយ។ ជាងនេះទៅទៀត ការប្រែប្រួលនៃអត្រាប្តូរប្រាក់ បន្ត​​ប៉ះពាល់​ដល់​សេដ្ឋកិច្ច​ ​ហើយយន្តការបច្ចុប្បន្នសម្រាប់ការគ្រប់គ្រងតម្លៃទំនិញរបស់​រដ្ឋាភិបាល​ នៅតែមិនគ្រប់គ្រាន់៕

The post អតិផរណា​ឡាវ​ថយ​ចុះ​តិច​តួច​ ត្រឹម​ ២៤​,៣ ភាគរយ​ នៅ​ខែ​សីហានេះ​​ appeared first on Kampuchea Thmey Daily.