សេវាប្រមូលសំរាម Archives - Kampuchea Thmey Daily

នាយកសហគ្រាសគ្រប់គ្រងសំរាម ស្នើពលរដ្ឋនៅភ្នំពេញ បង់ថ្លៃសេវាសំរាមឱ្យបានគ្រប់គ្នាៗ

Thoeun Vansong — Fri, 29 Sep 2023 07:44:19 +0000

អគ្គនាយកសហគ្រាសគ្រប់គ្រងសំរាម សំណល់រឹងទីប្រជុំជន នៃរដ្ឋបាលរាជធានីភ្នំពេញ បានអំពាវនាវឱ្យប្រជាពលរដ្ឋនៅរាជធានីភ្នំពេញ បន្តចូលរួមបង់ថ្លៃសេវាសំរាមឱ្យបានគ្រប់គ្នាៗ ក្រោមពាក្យស្លោកថា «អ្នកបង្កើតសំរាម សំណល់រឹង មានកាតព្វកិច្ចបង់ថ្លៃសេវា»។

ក្នុងសិក្ខាសាលានៃវេទិកាគោលនយោបាយស្ដីពីការបញ្ឈប់ការចោលសំរាមមិនត្រឹមត្រូវ នៅព្រឹកថ្ងៃទី២៩ ខែកញ្ញា ឆ្នាំ ២០២៣នេះ លោក គឹម សេត អគ្គនាយកសហគ្រាសគ្រប់គ្រងសំរាម សំណល់រឹង រាជធានីភ្នំពេញ បានថ្លែងអំពាវនាវយ៉ាងដូច្នេះថា៖ «ខ្ញុំសូមអំពាវនាវឱ្យមានការចូលរួមពីដៃគូអភិវឌ្ឍន៍ ភាគីពាក់ព័ន្ធ និងប្រជាពលរដ្ឋ រួមគ្នាធ្វើយ៉ាងណាឱ្យទីក្រុងស្អាត ជាពិសេសចូលរួមបង់ថ្លៃសេវាសំរាម ក្រោមពាក្យស្លោកថា អ្នកបង្កើតសំរាមសំណល់រឹង មានកាតព្វកិច្ចបង់ថ្លៃសេវា»។ មន្ត្រីទទួលបន្ទុកគ្រប់គ្រងសំរាមរូបនេះ ក៏បានអំពាវនាវដល់មន្ត្រីរាជការ អាជ្ញាធរមូលដ្ឋាន និងប្រជាពលរដ្ឋនៅភ្នំពេញទាំងអស់ រួមគ្នាបង្កើតទម្លាប់រក្សាទុក និងគ្រប់គ្រងសំរាមរបស់ខ្លួនឱ្យបានត្រឹមត្រូវ និងធ្វើជាគំរូល្អដល់កូនចៅជំនាន់ក្រោយផងដែរ។

បើតាមលោក គឹម សេត វិស័យបរិស្ថាន ត្រូវបានរាជរដ្ឋាភិបាលកម្ពុជា ចាត់ទុកជាវិស័យអាទិភាពមួយដែលបានដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ច-សង្គម វប្បធម៌ និងទេសចរណ៍។ តែយ៉ាងណាមិញ ដើម្បីរួមចំណែកលើកស្ទួយបរិស្ថាន និងទេសចរណ៍ រដ្ឋបាលរាជធានីភ្នំពេញ បានខិតខំអភិវឌ្ឍន៍ហេដ្ឋាចរនាសម្ព័ន្ធសំខាន់ៗជាច្រើនក្នុងការធ្វើឱ្យទីក្រុងភ្នំពេញមានការប្រែមុខមាត់ថ្មី និងភាពរីកចម្រើនយ៉ាងឆាប់រហ័សលើគ្រប់វិស័យ។

លោក គឹម សេត លើកឡើងថា តាមរយៈភាពរីកចម្រើនរបស់រាជធានីភ្នំពេញនេះ បានធ្វើឱ្យមានការកើនឡើងបរិមាណសំរាមរហូតដល់ ៣ ៧០០តោនក្នុងមួយថ្ងៃ ដែលជាកង្វល់មួយរបស់អាជ្ញាធរត្រូវយកចិត្តទុកដាក់។ ប៉ុន្តែ បញ្ហាសំរាមត្រូវបានដោះស្រាយ ក្រោយមានការកែទម្រង់របស់រាជរដ្ឋាភិបាលកម្ពុជា លើការគ្រប់គ្រងសំរាម សំណល់រឹង នៅភូមិសាស្ត្ររាជធានីភ្នំពេញ។

លោក បានថ្លែងឱ្យដឹងថា រាជរដ្ឋាភិបាល បានជ្រើសរើសក្រុមហ៊ុនឯកជនចំនួន៣ ក្នុងការប្រកួតប្រជែងគ្នាផ្ដល់សេវាសម្អាត ប្រមូល និងដឹកជញ្ជូនសំរាម សំណល់រឹង ដែលបានចាប់ផ្ដើមតាំងពីឆ្នាំ២០២១។ ជាលទ្ធផល ពិនិត្យឃើញថា ក្រុមហ៊ុនទាំង៣ បានអនុវត្តភារកិច្ចយ៉ាងល្អប្រសើរ ទាំងការសម្អាត ប្រមូល និងដឹកជញ្ជូនសំរាម សំណល់រឹងនៅតាមមូលដ្ឋានទូទាំងរាជធានីភ្នំពេញ។

លោក គឹម សេត បន្ថែមថា រដ្ឋបាលរាជធានីភ្នំពេញ ក៏បានដាក់ចេញនូវវិធានការចាំបាច់មួយចំនួនបន្ថែមទៀត ដូចជា៖ ការចេញសេចក្ដីណែនាំ សេចក្ដីជូនដំណឹង ការផ្សព្វផ្សាយតាមគ្រប់មធ្យោបាយដល់ប្រជាពលរដ្ឋអំពីការទុកដាក់សំរាមទៅតាមប្រភេទ និងបញ្ចេញសំរាមតាមពេលវេលាកំណត់ ក៏ដូចជាការខិតខំប្រមូលសំរាមដែលនៅសេសសល់ជាដើម។ ទន្ទឹមនេះ រដ្ឋបាលរាជធានីភ្នំពេញ ថែមទាំងបានផាកវិន័យដល់អ្នកដែលមិនអនុវត្តតាមការណែនាំនេះដែរ ដើម្បីសំដៅជម្រុញឱ្យមានការចូលរួមពីប្រជាពលរដ្ឋឱ្យមាននិរន្តរភាពបរិស្ថានល្អ ហើយសព្វថ្ងៃ កិច្ចការទាំងនេះនៅតែបន្តអនុវត្តជាប់ជាប្រចាំ៕

The post នាយកសហគ្រាសគ្រប់គ្រងសំរាម ស្នើពលរដ្ឋនៅភ្នំពេញ បង់ថ្លៃសេវាសំរាមឱ្យបានគ្រប់គ្នាៗ appeared first on Kampuchea Thmey Daily.

ថ្លៃសេវាប្រមូលសំរាម នៅរាជធានីភ្នំពេញ ជិតផុតហើយ សូមបងប្អូនប្រញាប់ទៅបង់

Sorn Phanith — Fri, 17 Dec 2021 03:08:18 +0000

រដ្ឋបាលរាជធានីភ្នំពេញ បានបន្តប្រកាន់យកភាពអត់ធ្មត់មិនអនុវត្ត វិធានការរដ្ឋបាល និងច្បាប់ ដោយនៅតែទុកឱកាសឱ្យបងប្អូនប្រជាពលរដ្ឋជាអាជីវករ ពាណិជ្ជករ សិប្បករ ធុរៈជន ភ្ញាក់រលឹក និងរួសរាន់បង់ថ្លៃសេវាប្រមូលសំរាម សំណល់រឹង ឱ្យបានទាន់ពេលវេលាកំណត់។ ដោយឡែក ចំពោះ ថ្លៃសេវាប្រមូលសំរាមខែវិច្ឆិកា ឆ្នាំ២០២១ ត្រូវកំណត់នៅត្រឹមថ្ងៃទី៣១ ខែធ្នូ ឆ្នាំ២០២១។

នេះបើយោងតាមសេចក្តីជូនដំណឹងរបស់រដ្ឋបាលរាជធានីភ្នំពេញ ដែលក្នុងសេចក្តីជូនដំណឹងនេះមានន័យថា៖ រដ្ឋបាលរាជធានីភ្នំពេញ សូមជម្រាបជូនដំណឹងដល់បងប្អូនប្រជាពលរដ្ឋ ម្ចាស់អាជីវកម្ម សេវាកម្ម និងស្ថាប័នឯកជនទាំងអស់ជ្រាបថា បច្ចុប្បន្ន រដ្ឋបាលរាជធានីភ្នំពេញ កំពុងទទួលការបង់ថ្លៃសេវាប្រមូលសំរាម និងសំណល់រឹង រាជធានីភ្នំពេញ សម្រាប់ខែវិច្ឆិកា ឆ្នាំ ២០២១។ ចំពោះបងប្អូនប្រជាពលរដ្ឋដែលខកខានមិនបាន បង់ថ្លៃសេវាប្រមូលសំរាមសម្រាប់ខែសីហា និងខែមុនៗ កន្លងមក ក្នុងឆ្នាំ ២០២០ រដ្ឋបាលរាជធានីភ្នំពេញ បានអនុវត្ត វិធានការដោយកត់ត្រាជាបំណុលរួចហើយ។ រដ្ឋបាលរាជធានីភ្នំពេញ បានបន្តប្រកាន់យកភាពអត់ធ្មត់មិនអនុវត្ត វិធានការរដ្ឋបាល និងច្បាប់ ដោយនៅតែទុកឱកាសឱ្យបងប្អូនប្រជាពលរដ្ឋជាអាជីវករ ពាណិជ្ជករ សិប្បករ ធុរៈជន ភ្ញាក់រលឹក និងរួសរាន់បង់ថ្លៃសេវាប្រមូលសំរាម សំណល់រឹង ឱ្យបានទាន់ពេលវេលាកំណត់ ដោយឡែក ចំពោះ ថ្លៃសេវាប្រមូលសំរាមខែវិច្ឆិកា ឆ្នាំ ២០២១ ត្រូវកំណត់នៅត្រឹមថ្ងៃទី ៣១ ខែធ្នូ ឆ្នាំ ២០២១ ។

ចំពោះនីតិវិធីនៃការបង់សេវាប្រមូលសំរាម និងសំណល់វឹងរាជធានីភ្នំពេញ សូមប្រើប្រាស់លេខសំគាល់ អតិថិជន ID (មានក្នុងវិក្កយបត្រអគ្គិសនីកម្ពុជា) តាមមធ្យោបាយប្រព័ន្ធទូទាត់អេឡិចត្រូនិក (តាមទូរស័ព្ទដៃ) ឬបញ្ចរទូទាត់នៅធនាគារអេស៊ីលីដា, ហត្ថា, កាណាឌីយ៉ា ក អ, វឌ្ឍនៈ, ប្រៃសណីយ៍កម្ពុជា ក.អ, ABA, WING, AMK, FTB, Woori Bank, Phillip Bank, Prince, Bank,CHIP MONG, ស្ថាបនា, ប្រាសាក់, អម្រឹត ឬតាមភ្នាក់ងារទូទាត់ផ្សេងៗទៀតដូចជា eMONEY, TrueMONEY, លីហួរវេរលុយ, DaraPay និងPiPay។ សម្រាប់ព័ត៌មានបន្ថែមសូមទំនាក់ទំនងមកសាលារាជធានីភ្នំពេញ ឬតាមទំព័រហ្វេសប៊ុកផ្លូវការ រដ្ឋាករស្វយ័តគ្រប់គ្រង សំរាម និងសំណល់រឹង រាជធានីភ្នំពេញ ឬតាមលេខទូរស័ព្ទ០៨១ ៦៤៦ ២២២ / ០១១ ៦៤៦ ២២២ ។

ទទួលបានសេចក្តីជូនដំណឹងនេះ សូមបងប្អូនប្រជាពលរដ្ឋ ម្ចាស់អាជីវកម្ម សេវាកម្ម និងស្ថាប័នឯកជន ទាំងអស់ នៅរាជធានីភ្នំពេញ មេត្តាជ្រាប និងអនុវត្តឱ្យមានប្រសិទ្ធភាព៕

អត្ថបទ៖ ស្រីរ័ត្ន

The post ថ្លៃសេវាប្រមូលសំរាម នៅរាជធានីភ្នំពេញ ជិតផុតហើយ សូមបងប្អូនប្រញាប់ទៅបង់ appeared first on Kampuchea Thmey Daily.

សេវា សម្អាត ប្រមូល និងដឹកជញ្ជូនសំរាមនៅរាជធានីភ្នំពេញ បច្ចុប្បន្ននេះមានការសាទរ និងវាយតម្លៃខ្ពស់ពីបងប្អូនប្រជាពលរដ្ឋ

Kang Tola — Fri, 22 Oct 2021 12:02:56 +0000

ភ្នំពេញ ៖ ការកំណែទម្រង់នៃការគ្រប់គ្រងសំរាម និង សំណូល័រឹង នៅរាជធានីភ្នំពេញ តាមរយៈការដេញថ្លៃជ្រើសរើសប្រតិបត្តិករថ្មីចំនួន០៣ដើម្បីផ្តល់សេវា សម្អាត ប្រមូល និងដឹកជញ្ជូនសំរាមនៅរាជធានីភ្នំពេញ ដែលបានដំណើរការផ្ដល់សេវា ចាប់ពីថ្ងៃទី០១ ខែកក្កដា ឆ្នាំ២០២១ រហូតដល់ បច្ចុប្បន្ន ជាលទ្ធផល មានការសាទរ និងវាយតម្លៃខ្ពស់ពីបងប្អូនប្រជាពលរដ្ឋ ពោលគឺមិនមានគំនរសំរាមសេសសល់ច្រើនដូចមុន ការប្រមូលបានទៀងទាត់ជាងមុន ស្អាតជាងមុន មធ្យោបាយនិងសម្ភារបរិក្ខារប្រើប្រាស់ថ្មីជាងមុន បុគ្គលិកកម្មករច្រើននិងមានការអប់រំជាងមុន ដែលប្រការនេះបានធ្វើឱ្យ មានការសាទរជាបណ្តើរៗពីគ្រប់មជ្ឈដ្ឋាន នៅរាជធានីភ្នំពេញ។

នេះបើយោងតាមសេចក្តីជូនដំណឹងរបស់រដ្ឋបាលរាជធានីភ្នំពេញ ដែលព័ត៌មានយើងទទួលបាននៅរាត្រីថ្ងៃទី២២ តុលានេះ ដែលក្នុងសេចក្តីជូនដំណឹងនេះមានន័យថា រដ្ឋបាលរាជធានីភ្នំពេញ មានកិត្តិយស សូមជម្រាបជូនដំណឹងដល់ម្ចាស់លំនៅឋាន ម្ចាស់អាជីវកម្ម សេវាកម្មនិងបងប្អូនប្រជាពលរដ្ឋទាំងអស់នៅរាជធានីភ្នំពេញឱ្យបានជ្រាបថា ក្នុងការធ្វើកំណែទម្រង់នៃការគ្រប់គ្រងសំរាម និង សំណល់រឹង នៅរាជធានីភ្នំពេញ តាមរយៈការដេញថ្លៃជ្រើសរើសប្រតិបត្តិករថ្មីចំនួន០៣ដើម្បីផ្តល់សេវា សម្អាត ប្រមូល និងដឹកជញ្ជូនសំរាមនៅរាជធានីភ្នំពេញ ដែលបានដំណើរការផ្ដល់សេវា ចាប់ពីថ្ងៃទី០១ ខែកក្កដា ឆ្នាំ២០២១ រហូតដល់ បច្ចុប្បន្ន ជាលទ្ធផល មានការសាទរ និងវាយតម្លៃខ្ពស់ពីបងប្អូនប្រជាពលរដ្ឋ ថាមានការផ្លាស់ប្តូរគុណភាពសវាគួរឱ្យ កត់សម្គាល់ ជាអាទិ៍៖ មិនមានគំនរសំរាមសសសល់ច្រើនដូចមុន ការប្រមូលបានទៀងទាត់ជាងមុន ស្អាតជាងមុន មធ្យោបាយនិងសម្ភារបរិក្ខារប្រើប្រាស់ថ្មីជាងមុន បុគ្គលិកកម្មករច្រើននិងមានការអប់រំជាងមុន ដែលប្រការនេះបានធ្វើឱ្យ មានការសាទរជាបណ្តើរៗពីគ្រប់មជ្ឈដ្ឋាន នៅរាជធានីភ្នំពេញ។

ទន្ទឹមនឹងលទ្ធផលគួរជាទីមោទនៈនេះ រដ្ឋបាលរាជធានីភ្នំពេញ កត់សម្គាល់ឃើញថា ការអនុវត្តការបង់ប្រាក់ ថ្លៃសេវាប្រមូល និងដឹកជញ្ជូនសំរាម សំណល់រឹង ដោយប្រើប្រាស់តារាងបង់ប្រាក់ឆ្នាំ២០០៣ គឺមិនទាន់ឆ្លើយតប ទៅនឹងកំណើនសេដ្ឋកិច្ចរបស់ប្រទេសជាតិ កំណើនសន្ទស្សន៍ថ្លៃទំនិញ និងជីវភាពរស់នៅនាពេលបច្ចុប្បន្នឡើយ ពិសេស មិនមានលទ្ធភាពទូទាត់ថ្លៃសេវាសម្អាត ប្រមូល និងដឹកជញ្ជូនសំរាមទៅកាន់ទីលានជូនប្រតិបត្តិករទាំង៣ (ដែលបាន ប្រើប្រាស់រថយន្តដឹកសំរាម រថយន្តបោសថ្នល់ រថយន្តបាញ់លាងសម្អាតថ្នល់ ម៉ូតូកង់បីប្រើអាគុយ ម៉ូតូកង់បីធាក់ជើង កង់ប្រមូលសំរាម ធុងដាំស្ទ័រ ធុងសំរាម និងសម្ភារប្រមូលសំរាមផ្សេងៗទៀតថ្មីៗ ព្រមទាំងប្រាក់បៀវត្សបុគ្គលិក កម្មករ ដែលមានតម្លៃខ្ពស់ជាងមុន) ការចំណាយរដ្ឋបាលរបស់សហគ្រាស និងការចំណាយរៀបចំទីលានសុវត្ថិភាពនៅឡើយ។

ដូច្នេះ ដើម្បីធានាប្រក្រតីភាពនៃប្រតិបត្តិការថ្មី និងឱ្យត្រូវតាមការអភិវឌ្ឍរបស់ប្រទេសជាតិនាពេលបច្ចុប្បន្ន ដោយមានការដឹកនាំចង្អុលបង្ហាញពីក្រសួងសេដ្ឋកិច្ច និងហិរញ្ញវត្ថុ រដ្ឋបាលរាជធានីភ្នំពេញ បានសហការជាមួយក្រុម ការងារអន្តរក្រសួង និងអាជ្ញាធរមូលដ្ឋាន ហើយបានប្រើប្រាស់សេវាប្រឹក្សាយោបល់បច្ចេកទេសរបស់ក្រុមហ៊ុន CRISIL Risk and Infrastructure Solutions Limited ដើម្បីសិក្សាធ្វើបច្ចុប្បន្នភាពរៀបចំតារាងកម្រៃសេវាឡើង់វិញ ដោយយក តារាងកម្រៃសេវាចាស់ឆ្នាំ២០០៣ ជាគោល និងផ្អែកលើមូលដ្ឋាន គោលនយោបាយ ការវិភាគ ការវាយតម្លៃប្រូកបដោយ លក្ខណៈវិទ្យាសាស្ត្រ គោលការណ៍សមធម៌ ស្របតាមកំណើនសេដ្ឋកិច្ចរបស់ប្រទេសជាតិ និងជីវភាពរស់នៅរបស់ ប្រជាពលរដ្ឋនាពេបច្ចុប្បន្ន សម្រេចបានតារាងតម្លៃថ្មី ដែលចែកជាពី០២ប្រភេទ គឺ (ទី១) ទីតាំងមិនប្រកបអាជីវកម្ម មាន១៦អនុប្រភេទ ស្មើនឹង ៨០% នៃទីតាំងសរុប និង (ទី២) ទីតាំងប្រកបអាជីវកម្ម មាន៣៦អនុប្រភេទ ស្មើនឹង ២០% ទីតាំងសរុប ដែលក្នុងនោះ ១៥% ជាអាជីវកម្ម សេវាកម្ម និងហាងទំនិញ ដូចបានជូនភ្ជាប់មកជាមួយ ដែលនឹងដាក់ ឱ្យអនុវត្តចាប់ពីថ្ងៃទី០៦ ខែវិច្ឆិកា ឆ្នាំ២០២១ តទៅ។ ទទួលបានសេចក្ដីជូនដំណឹងនេះ សូមម្ចាស់លំនៅឋាន ម្ចាស់អាជីវកម្ម សេវាកម្ម និងបងប្អូនប្រជាពលរដ្ឋទាំងអស់នៅរាជធានីភ្នំពេញ មេត្តាជ្រាប និងអនុវត្តឱ្យមានប្រសិទ្ធភាពខ្ពស់៕

ដោយ ៖ ស្រីរ័ត្ន

The post សេវា សម្អាត ប្រមូល និងដឹកជញ្ជូនសំរាមនៅរាជធានីភ្នំពេញ បច្ចុប្បន្ននេះមានការសាទរ និងវាយតម្លៃខ្ពស់ពីបងប្អូនប្រជាពលរដ្ឋ appeared first on Kampuchea Thmey Daily.