សែនឆេងម៉េង Archives - Kampuchea Thmey Daily

ខ្មែរសែស្រឡាយ ចិន ត្រូវដឹងពីត្រណមធំៗ កុំប្រព្រឹត្តនៅថ្ងៃសែនឆេងម៉េង

សាង ស្រីល័ក្ខ — Mon, 03 Apr 2023 02:00:00 +0000

នៅថ្ងៃសែនឆេងម៉េង គឺជាថ្ងៃដ៏វិសេសសម្រាប់កូនចៅចិន នាំគ្នាធ្វើដំណើរទៅកាន់ផ្នូររបស់ដូនតា ដើម្បីទៅលាងសំអាតនិងយកគ្រឿងតង្វាយ ទៅសែនសុំសេចក្ដីសុខដល់កូនចៅប្រុសស្រី។

ទន្ទឹមនោះ មុននឹងទៅគោរពផ្នូរដូនតា យើងក៏ត្រូវដឹងខ្លះៗពីត្រណមហាមផ្ដាច់ បើបំពាននឹងនាំភាពស៊យ ឬហៅម៉្យាងទៀតថាដូនតាដាក់បណ្ដាសា។

កុំ ៦ យ៉ាង ដែលកូនចៅចិនឬខ្មែរជាប់សែស្រឡាយមិនអាចធ្វើបាននោះគឺ៖

១ កុំស្លៀកពាក់ខោអាវពណ៌ស្រស់ៗពេក ព្រោះវាមិនល្អ កាលដែលយើងកំពុងស្ថិតនៅពីមុខផ្នូរដូនតា។

២ យល់ល្អកុំថតរូបជុំគ្នាពីមុខផ្នូរ ឬបង្ហាញកាយវិការណាមួយមិនសមរម្យដាក់ផ្នូរដូនតា។

៣ អ្នកមានផ្ទៃពោះ សូមរើសថ្ងៃល្អដើម្បីទៅ ឬមិនចាំបាច់ទៅក៏បានដែរ ។

៤ អ្នកមានជំងឺប្រចាំកាយ ឬពិបាកដើរ កុំទៅអី បើទៅកុំប្រក់ផ្នូរ កុំបាច់ទឹក កុំលើកដី ការងារធ្ងន់ៗកុំធ្វើ។

៥ កុំជេរគ្នា កុំនិយាយពាក្យអសុរោះវាចាដាក់គ្នា និងចាក់ចម្រៀងច្រៀងលេងកម្សាន្ត រាំរែកឲ្យសោះ។

៦ ពេលមកដល់ផ្ទះ ត្រូវលាងសំអាតស្បែកជើង កុំឲ្យជាប់ដីពីកន្លែងផ្នូរមកចូលផ្ទះ លាងស្បែកជើងឲ្យស្អាត ចាំយកចូលផ្ទះជាការស្រេច៕

គ្រូ ណុប

ប្រភព៖ហុងស៊ុយ

ចុចអាន៖ត្រណមធំៗ ចាស់ៗពីដើម ហាមស្ត្រីមានផ្ទៃពោះនិងបម្រុងយកកូន កុំប្រព្រឹត្តដាច់ខាត

ចុចអាន៖គ្រឿងតង្វាយបន់ស្រន់ សុំលាភសំណាង និងកុំឲ្យមានជម្លោះក្នុងគ្រួសារ គួរធ្វើបែបនេះ

The post ខ្មែរសែស្រឡាយ ចិន ត្រូវដឹងពីត្រណមធំៗ កុំប្រព្រឹត្តនៅថ្ងៃសែនឆេងម៉េង appeared first on Kampuchea Thmey Daily.

ប្រវត្តិចាក់ស្រេះនៃពិធីបុណ្យសែនផ្នូរ ឬ ឆេងម៉េង ជាប្រពៃណីជនជាតិ ចិន ពីបុរាណកាល

សាង ស្រីល័ក្ខ — Fri, 31 Mar 2023 01:00:00 +0000

សែនឆេងម៉េង ឬភាសាចិនហៅថា Qingming គឺជាពិធីបុណ្យប្រពៃណីរបស់ជនជាតិចិនដែលប្រារព្ធតាំងពី ២៥០០ ឆ្នាំមុន។ ពិធីនេះធ្វើឡើងដោយជនជាតិហាន នៃប្រទេសចិនដីគោក ដូចជា ហុងកុង ម៉ាកាវ តៃវ៉ាន់ និងជនជាតិចិននៃម៉ាឡេស៊ី សិង្ហបុរី ឥណ្ឌូណេស៊ី ថៃនិង កម្ពុជា ផងដែរ។

ជារៀងរាល់ឆ្នាំកូនចៅចិន តែងធ្វើពិធីនេះតាមប្រតិទិននៃច័ន្ទគតិ ចំនួន១៥ថ្ងៃ តែភាគច្រើនគេច្រើនធ្វើនៅថ្ងៃ ៤, ៥ ឬ ៦ មេសា ។ ក្នុងអំឡុងពេលឆេងម៉េង គ្រួសារជនជាតិចិន ទៅលេងផ្នូររបស់បុព្វបុរស ដើម្បីសម្អាតផ្នូរ និងបួងសួងសុំសេចក្ដីសុខដល់គ្រូសារ ។

យ៉ាងណាមិញ នៅក្នុងប្រវត្តិសាស្ត្រ កាលពីបុរាណកាល ២០០០ឆ្នាំមុន មានព្រះរាជបុត្របន្តវេនមួយអង្គ តែងតែមានទឹកព្រះទ័យល្អចំពោះមនុស្សជុំវិញខ្លួន ជាពិសេសគឺប្រជាជនក្នុងព្រះនគររបស់ទ្រង់តែម្ដង ឃើញបែបនេះ ក៏មានអ្នកម្នាងម្នាក់មានបំណងចង់សម្លាប់ព្រះរាជបុត្របន្តវេន ដើម្បីទុកឱកាសឲ្យបុត្រារបស់គេឡើងបន្តវេនវិញ។ ជាឱកាសល្អ ព្រះរាជបុត្របន្តវេននោះគឺត្រូវមានព្រះរាជកិច្ចការ ចេញពីព្រះរាជវាំង ចុះទៅសិក្សាពីជីវភាពប្រជាជនជាមួយអ្នកបម្រើម្នាក់ និងមេទ័ពម្នាក់ទៀត។ ធ្វើដំណើរកាន់តែឆ្ងាយទៅៗ ទៅដល់តំបន់មួយដែលដាច់ស្រយាលខ្លាំង ខ្វះអាហារនិងទឹក ហើយព្រះអង្គក៏មានរាជបន្ទូលថា យើងឃ្លានជិតដាច់ពោះស្លាប់ហើយ ចុះទម្រាំប្រជារាស្ត្រយើងវិញ គេរស់នៅបានដោយរបៀបណា។ ភ្លាមៗនោះ ស្រាប់តែអ្នកបម្រើម្នាក់ឈ្មោះជី ជឺធួយ (Jie Zi Tui) បានយកស៊ុបក្ដៅៗមួយចាន មកឲ្យទ្រង់សោយ ក្រោយសោយរួច ក៏មានកំលាំងឡើងវិញ ហើយក៏មានបន្ទូលឡើងថា ស៊ុបនេះមានរសជាតិឆ្ងាញ់មែន ប៉ុន្តែស្រាប់តែព្រះអង្គបានប្រទះភ្នែកឃើញជើងរបស់អ្នកបម្រើមានហូរឈាមចេញមកភ្លាមៗ ទ្រង់ដឹងថាអ្នកបម្រើយកសាច់ភ្លៅខ្លួនឯង មកធ្វើជាស៊ុបថ្វាយព្រះអង្គ ព្រះរាជបុត្របានសន្យាថានឹងផ្ដល់រង្វាន់ជាទីពេញចិត្តដល់អ្នកបម្រើនោះ។

ក្រោយមក ពេលព្រះអង្គបានឡើងសោយរាជ្យជាព្រះរាជា ទ្រង់ក៏នឹកឃើញពីអ្នកបម្រើម្នាក់នោះ ក៏បានតែងតាំងតំណែងដ៏ល្អមួយ និងរង្វាន់ជាមាសដ៏ច្រើន តែអ្នកបម្រើនោះបានបដិសេធហើយនិយាយថា គេធ្វើល្អគឺមិនមែនចង់បានផលតបស្នងវិញនោះទេ ហើយអ្នកបម្រើក៏បាននាំម្ដាយចាស់របស់ខ្លួនរត់ចូលក្នុងព្រៃបាត់ខ្លួន និងសំងំរស់នៅជាធម្មតា។ ដោយព្រះអង្គសព្វព្រះទ័យជាមួយទឹកចិត្តល្អរបស់អ្នកបម្រើ ក៏ចេញបញ្ជាឲ្យគេតាមរកក្នុងព្រៃ តែរកមិនឃើញសោះ មន្ត្រីម្នាក់ក៏បានឲ្យយោបល់ថា ឲ្យដុតព្រៃនេះ ពីចុងព្រៃដេញមក ដោយទុកផ្លូវមួយសម្រាប់ឲ្យអ្នកខាងក្នុងរត់ចេញមក ក្រោយពីដុតហើយ ទ្រង់ក៏ឃើញតែសត្វព្រៃនាំគ្នារត់ តែមិនឃើញអ្នកបម្រើ និងម្ដាយចាស់នោះរត់ចេញមកនោះទេ។

ទីបំផុតព្រះអង្គក៏បានឃើញសាកសពរបស់អ្នកទាំងពីរ ដេកស្លាប់ក្បែរគល់ឈើ ដោយកើតមានវិប្បដិសារីខ្លាំងពេក ព្រះអង្គក៏បានបញ្ជាឲ្យគេយកសពនោះកប់នៅទីតាំងនេះ យកថ្មមួយផ្ទាំងមកឆ្លាក់ឈ្មោះអ្នកបម្រើនោះ ដោយបញ្ជាថា រៀងរាល់ឆ្នាំនាពេលចុងខែរងា ត្រូវមកទីនេះដើម្បីគោរពបូជា រហូតចំណារក្រោយៗ មន្ត្រីនិងប្រជាជន ក៏បានយកគំរូតាម ឲ្យតែមានសមាជិកគ្រួសារម្នាក់ស្លាប់ គឺគេរកដីណាដែលល្អ មានហុងស៊ុយ មកបញ្ចុះហើយធ្វើសិលាចារឈ្មោះ គោរពជារៀងរាល់ឆ្នាំ បន្តមកដល់បច្ចុប្បន្ននេះឯង ៕

គ្រូ ណុប

ចុចអាន៖ដង្វាយសែនចូលឆ្នាំ ចិន សុទ្ធតែមានអត្ថន័យ និងលាភសំណាងឲ្យម្ចាស់ផ្ទះ រកស៊ីមានបាន

ចុចអាន៖អាហារសម្រន់នាំសំណាង ហូបពេលចូលឆ្នាំ ចិន នឹងផ្ដល់សុភមង្គល ចូលមកក្នុងជីវិតពេញលេញ

The post ប្រវត្តិចាក់ស្រេះនៃពិធីបុណ្យសែនផ្នូរ ឬ ឆេងម៉េង ជាប្រពៃណីជនជាតិ ចិន ពីបុរាណកាល appeared first on Kampuchea Thmey Daily.

មកដឹងពីអត្ថន័យក្រដាសសែនជូនដូនតាទាំង ៩ ប្រភេទ ក្នុងថ្ងៃ ឆេងម៉ង

សាង ស្រីល័ក្ខ — Tue, 05 Apr 2022 01:10:00 +0000

ផ្នូររបស់បុព្វបុរសយើង គឺពិតសំខាន់ណាស់ ព្រោះផ្នូរនេះហើយ គឺជាឫសគល់នៃភាពចម្រុងចម្រើនមានដល់កូនចៅបច្ចុប្បន្ន និងជំនាន់ក្រោយ។ ទន្ទឹមនោះការទៅសែន សំអាតផ្នូរដូនតា គឺជាបង្ហាញចេញនូវទឹកចិត្តនៃការដឹងគុណវង្សត្រកូលខ្លួនឯង ផងដែរ។ ជាពិសេស ក្រដាសសែននាពេលបច្ចុប្បន្នមានច្រើនប្រភេទណាស់ តែក្រដាសសែនដែលត្រឹមត្រូវ ដែលបុរាណកាលនិយមប្រើមកដល់សព្វថ្ងៃ និងត្រូវបានគេជឿថា អាចទៅដល់ដូនតាពិតមែនមានដូចជា៖

១ ដុំមាស គឺជាសម្រាប់ឲ្យដូនតាយើង យកទៅជូនអស់ទេវតាដែលតាមថែរក្សាខ្លូនគាត់ មានដូចជា ទេវតាយមរាជ យកបាល ទ័ពក្បាលសេះ ក្បាលគោ នានា ។ ដែលអាចជួយត្រឡប់ឲ្យកូនចៅដែលនៅរស់វិញ គឺទៅទីជិតទីឆ្ងាយ មិនថាព្រៃភ្នំ មិនថាដំណើរផ្លូវឆ្ងាយ គឺមានទេវតាតាមថែរក្សាគ្រប់ទីកន្លែង។

២ ដុំមាសលាភ មួយរយ គឺជាដុំមាសមួយដុំ ដែលអាចឲ្យដូនតាយកទៅចាយបានគ្រប់ទីកន្លែង មិនថាឋានលើ ឋានកណ្ដាល ឬឋានក្រោមនោះទេ។ ដុំមាសលាភ មួយរយ គឺជួយដល់កូនចៅឲ្យរកលុយស្រួល ជួញដុំផ្លូវជិត ឬផ្លូវច្រើន ជួញដូរឆ្លងប្រទេស គឺបានផលសម្រេចដូចគ្នា។

៣ ក្រដាសដុំមាស គឺជាក្រដាសសម្រាប់ឲ្យដូនតាប្រើប្រាស់ ពេលដែលដូនតាចង់ជួយកូនចៅនៅពេលដែលកូនចៅបួងសួងសុំ ព្រោះនៅឋានមនុស្សយើង រាល់ផ្លូវដែលបែកជាបួន មិនថាតូចឬធំ គឺមានទ័ពទាហានចាំការពារ បើដូនតាយើងមិនមានមាសបង្ហាញពួកគេទេ គឺមានន័យថាដូនតារបស់យើងមិនអាចមកជួប ឬជួយកូនចៅពេលមានអាសន្នណាមួយនោះទេ។

៤ ក្រដាសស្បថ សុំលាងបាប ដូនតា ដូនតាយើង ពេលគាត់នៅរស់ គាត់បានសម្លាប់សត្វ សាងអំពើបាបណាមួយ ដើម្បីចិញ្ជឹមយើង ដូចនេះបាបទាំងអស់នេះ ពេលលោកចែកឋានគឺត្រូវទៅទូទាត់នៅឋានក្រោម ដូចនេះក្រដាសលាងបាបនេះ គឺធ្វើឡើងដើម្បីបញ្ជាក់ និងស្បថធានាជូនយមរាជ ឬយមបាល ទេវតាកត់ត្រាបាបកម្មថា ទង្វើបាបទាំងអស់ដែលគាត់ត្រូវសាងឡើងដើម្បីចិញ្ជឹមយើង ធ្វើបែបនេះបាបខ្លះត្រូវបានកាត់បន្ថយ បាបខ្លះត្រូវបានព្យួរទុកឲ្យកូនចៅដែលនៅរស់ព្យាយាមធ្វើបុណ្យសាងកុសលដើម្បីទូទាត់។ លាងបាបនេះ គឺដើម្បីឲ្យដូនតាយើងមានសិទ្ធសេរីភាពក្នុងការហើរហោះ និងមានសិទ្ធិក្នុងការចាប់ភពថ្មី។

៤ សៀវភៅធម៍សុំសីល គឺដើម្បីឲ្យលោកបំពេញសីល ឬជាប័ណ្ណសម្រាប់ប្រគល់ដល់ទេវតាកត់ត្រា ថាខ្លួនជាខ្មោចដែលមានកូនចៅគោរព មានកូនចៅសែនឲ្យខ្លួនរាល់ពេលមានពិធីបុណ្យ ជួយដល់កូនចៅដូចជា៖ ឲ្យកូនដៅរស់នៅប្រកបដោយធម៌ទាំង៤ ជួបមនុស្សដែលមានចិត្តធម៌ ចិត្តបុណ្យ ឲ្យកូនចៅស្រលាញ់គ្នា រស់នៅបានសុខចម្រើនត្រជាក់ត្រជំក្រោមពន្លឺធម៌។

៥ សៀវភៅកាក់លឿង និង កាក់ប្រាក់ គឺជាបញ្ជីកត់ត្រាលុយកាក់របស់ដូនតា អាចជួយដល់កូនចៅក្នុងការគ្រប់គ្រងបញ្ជីប្រាក់ប្រចាំគ្រួសារ កុំឲ្យលុយហូរចេញច្រើនតាមរូបភាពផ្សេងៗ ដូចជា រកលុយបានច្រើនបន្តិច បែរជាឈឺចូលពេទ្យចាយលុយទៅវិញអស់រលីង ឬមានបញ្ហាបន្ទាន់ណាមួយ ដែលត្រូវចាយលុយចេញទៅវិញភ្លាមៗ ។

៦ សំលៀកបំពាក់ គឺជាទ្រព្យសម្បត្តិរបស់ដូនតា ដែលយើងដុតជូនគាត់ឲ្យគាត់ប្រើប្រាស់។ គឺជួយដល់កូនចៅឲ្យមានលទ្ធភាពក្នុងការទិញសម្ភារៈល្អ ឬរក្សាទ្រព្យសម្បត្តិឲ្យបានល្អ កុំឲ្យរកព្រឹកខ្វះល្ងាច រកល្ងាចខ្វះព្រឹក ។

៧ មាសគីឡូ គឺសម្រាប់ឲ្យដូនតា ដាក់តាមខ្លួន ឲ្យធ្ងន់ខ្លួន ដូចមនុស្សយើងអញ្ជឹងពេលទៅណាមកណា បើក្នុងខ្លួនអត់លុយ ដូចមិនសូវហ៊ាន មិនសូវធ្ងន់ខ្លួន តែពេលមានលុយវិញគឺ ទៅណាមកណា ដោយចិត្តរីករាយធ្ងន់ខ្លួន ធ្វើអ្វីបានជោគជ័យឆាប់រហ័ស។ ជួយកូនចៅឲ្យរកស៊ីធូរ ងាយរកលុយ ជួបដៃគូរកស៊ីល្អៗ ជួបអតិថិជនល្អ។

៨ ក្រដាសសុំសិទ្ធចាប់ជាតិ ក្រដាសនេះ មានប្រយោជន៍សម្រាប់ដូនតានៅពេលដែលគាត់ចង់ចាប់ភពថ្មី លោកត្រូវមានក្រដាសនេះ ដើម្បីទៅចាប់កំណើតនៅទីកន្លែងល្អ ៗ មានរាងកាយគ្រប់គ្រាន់ មិនមានជំងឺ ឬខ្វះអវយវរាងកាយណាមួយនោះឡើយ ជាទារកដែលនាំសំណាង ត្រូវបានគេថ្នាក់ថ្មមស្រលាញ់ ជួបអ្នកមានធម៌ មានព្រហ្មវិហារទាំង ៤ មិនរងកម្ម ឬរងទុក្ខ។

៩ ក្រដាសកន្សែងជូតមុខ គឺសម្រាប់ឲ្យដូនតា ជូតមុខសំអាតអស់សេចក្ដីសៅហ្មងទាំងឡាយណា ដែលលោកមិនទាន់អស់ចិត្ត ឬរឿងគុំនុំក្នុងចិត្តកាលលោកនៅរស់ ដើម្បីឲ្យលោកឆាប់មានក្លាយទៅព្រលឹងដូនតាដែលមានសីល អាចជួយដល់កូនចៅបាន ជួយដល់កូនចៅ ឲ្យមានមន្តស្នេហ៍ អ្នកផងទាំងពួងស្រលាញ់រាប់អាន មុខមាត់មានអំណាយទាន គេឃើញគេអាណិត គេស្រលាញ់ចូលចិត្ត បើអ្នកធ្វើការជាមេគេ ឬជាមន្ត្រីមានឈ្មោះ គឺបន្ថែមនូវការអំណាច ទទួលការគោរពពីកូនចៅ ថែមទាំងកូនចៅស្មោះស្ម័គ្រទៀតផង៕

គ្រូ ណុប

ប្រភព៖ ហុង ស៊ុយ

ចុចអាន៖ខ្មែរសែស្រឡាយ ចិន ត្រូវដឹងពីត្រណមធំៗ កុំប្រព្រឹត្តនៅថ្ងៃសែន ឆេងម៉េង

ចុចអាន៖ក្បួនសំអាតផ្នូរ ប្រក់ផ្នូរដូនតា នាំហុងស៊ុយ យោងលាភដល់កូនចៅ នៅថ្ងៃឆេងម៉េង

The post មកដឹងពីអត្ថន័យក្រដាសសែនជូនដូនតាទាំង ៩ ប្រភេទ ក្នុងថ្ងៃ ឆេងម៉ង appeared first on Kampuchea Thmey Daily.

ក្បួនសំអាតផ្នូរ ប្រក់ផ្នូរដូនតា នាំហុងស៊ុយ យោងលាភដល់កូនចៅ នៅថ្ងៃឆេងម៉េង

សាង ស្រីល័ក្ខ — Mon, 04 Apr 2022 00:45:00 +0000

ខណៈថ្ងៃសែនឆេងម៉េងធំ នឹងមកដល់ស្អែកនេះ ក្នុងនោះគេឃើញប្រជាជនខ្មែរដែលជាប់សែស្រឡាយចិនគ្រប់គ្នា ខ្លះក៏បានប្រញាប់ប្រញាល់ ធ្វើដំណើរទៅស្រុកកំណើត ដើម្បីសែនផ្នូរដូនតា ដែលបានចែកឋានទៅកាន់បរលោកយូរណាស់មកហើយ។

ទន្ទឹមនោះ ដើម្បីកុំឲ្យមានរឿងមិនល្អក្នុងថ្ងៃឆេងម៉េងធំ កូនចៅចិនឬជាប់សែស្រឡាយចិន គួរមានក្បួនខ្នាតត្រឹមត្រូវ ហើយឲ្យច្បាស់ កុំចេះតែធ្វើតាមគេឯង ប្រយ័ត្ននាំទុក្ខនាំស៊យដល់អ្នកផ្ទះ។

ត្រូវដឹងរបៀបសំអាតផ្នូរដូនតា

១ ពេលទៅដល់ផ្នូរ ត្រូវបែងចែកកូនចៅ ឡើងបោចស្មៅ ពីលើផ្នូរចេញឲ្យស្អាត ព្រោះផ្នូរដែលល្អ គឺមិនឲ្យមានស្មៅ កូនឈើ ដុះពីលើ ឬពីមុខនោះទេ។

២ បន្ទាប់មកត្រូវចាក់ដីបន្ថែមពីលើផ្នូរ ឲ្យធំប៉ុនទំហំកាលពីឆ្នាំទៅ តែកុំធំដល់ថ្នាក់ហួសហេតុ ទៅចាក់ចូលដីគេ ឬដីម៉ុងរបស់គេផ្សេង គឺមិនល្អទេ អាចមានបញ្ហាឈ្លោះទាល់ទែងគ្នាក្នុងថ្ងៃឆេងម៉េងបាន។

៣ ចាក់ដីហើយ យើងយកទឹកចំនួន ៣ ផ្ដិលបាចពីលើផ្នូរ ជាការស្រេច ។

របៀបប្រក់ផ្នូរនាំហុងស៊ុយ

១ ពេលដែលអុចធូបហើយគ្រប់គ្នា អាចឲ្យកូនចៅយកក្រដាសប្រក់ផ្នូរម្នាក់បន្តិចៗ ទៅប្រក់ដោយឲ្យអ្នកទម្ងន់ស្រាលៗឡើងទៅខាងលើផ្នូរ មនុស្សចាស់ ឬ អ្នកគីឡូធ្ងន់ ប្រក់ពីខាងក្រោមទៅបានហើយ។

២ ពេលប្រក់ គឺជាពេលសាកថាមពល DNA ដូនតាហ្នឹងហើយ ប្រក់ផងបួងសួងផង ដើម្បីសុំសេចក្ដីសុខ ដូនតាជួយឃុំគ្រងនិងតាមថែរក្សា។

៣ ពេលប្រក់ហើយ លាងដៃឲ្យស្អាត ទៅអង្គុយពីមុខស្លាកឈ្មោះដូនតា ហើយបិទភ្នែកបួងសួង គិតពីអ្វីដែលយើងចង់បាន គិតរឿងល្អៗឲ្យបានច្រើន ដកដង្លើមមួយៗ និយាយហើយចាំបើកភ្នែកឡើងវិញញញឹមដាក់ស្លាកឈ្មោះដូនតា ហើយយកដៃទៅអង្អែលឈ្មោះដូនតាថ្មមៗ សំពះ ៣ ដងជាការស្រេច។

៤ ពេលកូនចៅប្រក់ផ្នូរហើយអស់ យកទឹកមកបាច់ពីលើផ្នូរឲ្យត្រដាក់ដល់ដូនតា និងកូនចៅដែលបានទៅសែនឆេងម៉េងផងដែរ។

យ៉ាងណាមិញ ពេលទៅដល់ផ្នូរ ក៏កុំភ្លេចរៀបចំសែនដល់ទេវតាម្ចាស់ដីមុន រួចចាំសែនផ្នូរដូនតាជាក្រោយ។ ព្រោះនេះជាការគោរពដល់អ្នកដែលជាម្ចាស់នៅនៅទីនោះ និងព្រមទាំងសុំការអនុញ្ញាតិឲ្យពួកគាត់បើកផ្លូវឲ្យយើង។ ជាពិសេសបើយើងគោរពគេ មិនបំពានគេ យើងក៏រស់មានក្ដីសុខតាមហ្នឹងដូចគ្នា៕

គ្រូ ណុប

ប្រភព៖ ហុងស៊ុយ

ចុចអាន៖ប្រវត្តិចាក់ស្រេះនៃពិធីបុណ្យសែនផ្នូរ ឬ ឆេងម៉េង ជាប្រពៃណីជនជាតិ ចិន ពីបុរាណកាល

The post ក្បួនសំអាតផ្នូរ ប្រក់ផ្នូរដូនតា នាំហុងស៊ុយ យោងលាភដល់កូនចៅ នៅថ្ងៃឆេងម៉េង appeared first on Kampuchea Thmey Daily.