ស្ត្រីខ្មែរ Archives - Kampuchea Thmey Daily

ស្ត្រីខ្មែរ ៦ រូបចូលរួមយ៉ាងសកម្មក្នុងវិស័យកីឡាបាល់ទាត់កម្ពុជា

chean virakbot — Fri, 03 Apr 2026 05:40:00 +0000

នៅកម្ពុជាមានក្លិបបាល់ទាត់ជាច្រើនដឹកនាំដោយបុរស ប៉ុន្តែក៏មានស្ត្រីមួយចំនួនដែរដែលដឹកនាំក្លិប ក្នុងនោះក៏មានស្ត្រីមួយចំនួនទទួលបានការងារផ្នែករដ្ឋបាល បច្ចេកទេស ទំនាក់ទំនង ផ្សព្វផ្សាយ និងទីផ្សារជាដើម។ ថ្ងៃនេះ សារព័ត៌មាន«កម្ពុជាថ្មី» សូមលើកយកស្ត្រីខ្មែរ ៦ រូបដែលរួមចំណែកយ៉ាងសំខាន់ក្នុងការដឹកនាំក្លិប និងបំពេញតួនាទីយ៉ាងសកម្ម។

១. លោកស្រី កែ សួនសុភី ប្រធានក្លិបបាល់ទាត់ វិសាខា

លោកស្រី កែ សួនសុភី ជាប្រធានក្លិបបាល់ទាត់វិសាខា ដែលត្រូវបានមើលឃើញពីការយកចិត្តទុកដាក់ខ្លាំងលើការអភិវឌ្ឍក្លិប។ រាប់ចាប់តាំងពីការសាងសង់កីឡដ្ឋានកាន់តែទំនើប បង្កើតមជ្ឈមណ្ឌលហ្វឹកហាត់ និងបណ្តុះបណ្តាលថ្នាលយុវជនជាច្រើនកម្រិត លោកស្រីតែងតែចូលរួមយ៉ាងសកម្មជាមួយកីឡាករ កីឡាការិនីស្ទើររាល់ការប្រកួតនៅចុងសប្តាហ៍។ មិនត្រឹមតែប៉ុណ្ណោះ ក្រុមការងារដឹកនាំក្លិបរបស់លោកស្រី មានស្ត្រីភេទជាច្រើននាក់ទៀតផងដែលនេះជាការផ្តល់ឱកាសឲ្យស្ត្រីចូលរួមបំពេញការងារនៅក្នុងវិស័យបាល់ទាត់។

២. លោកស្រី ភូ ឈាលីន ប្រធានក្លិបបាល់ទាត់ ភ្នំពេញក្រោន

អ្នកគាំទ្រខ្លះប្រហែលជាគិតថា ចាប់តាំងឧកញ៉ា ឬទ្ធី សំណាង ប្រធានក្លិបបាល់ទាត់ភ្នំពេញក្រោន លាចាកលោកទៅ ក្លិបដ៏ធំមួយនេះពិបាកក្នុងការដឹកនាំអភិវឌ្ឍបន្ត ប៉ុន្តែផ្ទុយស្រឡះ។ លោកស្រី ភូ ឈាលីន បានបន្តដឹកនាំក្នុងនាមជាប្រធានក្លិបដោយមិនបន្ធូរដៃក្នុងការអភិវឌ្ឍក្លិបឡើយ។ លោកស្រីនៅតែចំណាយធនធានហិរញ្ញវត្ថុយ៉ាងច្រើនដើម្បីពង្រឹងក្រុមធំជម្រើសដៃទី១ ការង្រឹងក្រុមនារី ការបណ្តុះបណ្តាលថ្នាលយុវជន ការកែលំអកីឡដ្ឋាន និងបង្កើតប្រព័ន្ធអេកូបាល់ទាត់នៅកីឡដ្ឋានដើម្បីក្លាយជាសហគមន៍បាល់ទាត់ដ៏ទំនើប។

៣. លោកស្រី ពុធ ធីតា ប្រធានក្លិបបាល់ទាត់ បឹងកេត និងជាសមាជិកគណៈកម្មការប្រតិបត្តិសហព័ន្ធកីឡាបាល់ទាត់កម្ពុជា

បើនិយាយដល់ស្ត្រីក្នុងវិស័យកីឡាបាល់ទាត់គឺអ្នកគាំទ្រប្រហែលជាគិតដល់លោកស្រី ពុធ ធីតា មុនគេ។ ពិតណាស្ត្រីម្នាក់នេះអ្នកសង្គ្រោះក្លិបបាល់ទាត់ បឹងកេត។ លោកស្រីបានតស៊ូដឹកនាំឲ្យក្លិបមួយនេះឲ្យរក្សាបាននូវភាពខ្លាំងរហូតដល់បច្ចុប្បន្ន បើទោះបីជាជួបការលំបាកខ្លាំងរឿងលុយកាក់ និងមិនមានកីឡដ្ឋានផ្ទាល់ខ្លួនទៀងទាត់ក៏ដោយ។ ក្តីស្រឡាញ់ចំពោះបាល់ទាត់របស់លោក ត្រូវបានសហព័ន្ធបាល់ទាត់កម្ពុជាផ្តល់ទំនុកចិត្តឲ្យក្លាយជាសមាជិកប្រតិបត្តិរូប និងទទួលបន្ទុកលើបាល់ទាត់នារី។

៤. កញ្ញា អ៊ូ បញ្ញាសុកិត្យា នាយិការគ្រប់គ្រងក្លិបបាល់ទាត់វិសាខា និងជាសមាជិក គណៈកម្មការប្រតិបត្តិសហព័ន្ធកីឡាបាល់ទាត់កម្ពុជា

វាមិនមែនជាការងាយស្រួលនោះទេដែលស្ត្រីដឹកនាំក្លិបបាល់ទាត់ដែលក្រុមការងារភាគច្រើនជាបុរស ប៉ុន្តែកញ្ញា អ៊ូ បញ្ញាសុកិត្យា បានដឹកនាំក្លិបបាល់ទាត់ វិសាខា យ៉ាងល្អ ក្នុងនាមជានាយិការគ្រប់គ្រង។ កញ្ញាអាចចាត់ទុកជាស្ត្រីខ្មែរទី ១ ដែលបានសិក្សារៀនសូត្រអំពីបាល់ទាត់ និងការដឹកនាំក្លិបបាល់ទាត់នៅតំអឺរ៉ុប។ មិនតែប៉ុណ្ណោះ ស្ត្រីខ្មែរវ័យក្មេងរូបនេះក៏បានក្លាយជាសមាជិកប្រតិបត្តិមួយរូបនៃសហព័ន្ធកីឡាបាល់ទាត់កម្ពុជា។

៥. អ្នកស្រី យិន ម៉ារ៉ាឌី ប្រធានរដ្ឋបាលនៃសហព័ន្ធកីឡាបាល់ទាត់កម្ពុជា និងជាសមាជិកគណៈកម្មការការប្រកួតបាល់ទាត់យុវនារី របស់សហព័ន្ធកីឡាបាល់ទាត់អន្តរជាតិ (FIFA)

បើនិយាយពីស្ត្រីខ្មែរដែលបានធ្វើការងារបាល់ទាត់ផ្នែករដ្ឋបាល និងចេញទៅក្រៅប្រទេសដើម្បីការងារបាល់ទាត់ច្រើនជាងគេបំផុត គឺប្រហែលជាមានតែអ្នកស្រី យិន ម៉ារ៉ាឌី នេះហើយ។ អ្នកស្រីជាប្រធានរដ្ឋបាលនៃសហព័ន្ធកីឡាបាល់ទាត់កម្ពុជា និងសមាជិកនៃគណៈកម្មការការប្រកួតបាល់ទាត់យុវនារី របស់សហព័ន្ធកីឡាបាល់ទាត់អន្តរជាតិ ដែលបានជាស្ត្រីខ្មែរទី ១ មានតួនាទីនៅ FIFA។ ស្ត្រីខ្មែររូបនេះតែងតែមានមុខរហូតរាល់ពេលមានព្រឹត្តិការណ៍បាល់ទាត់សំខាន់ៗនៅក្នុងស្រុក ហើយក៏បានចេញទៅក្រៅប្រទេសគ្រប់ទ្វីប ស្ទើរគ្រប់ប្រទេសដើម្បីបំពេញការងារក្នុងនាមស្ត្រីតំណាងសហព័ន្ធកីឡាបាល់ទាត់កម្ពុជាលើឆាកអន្តរជាតិ។

៦. កញ្ញា ជា ស្រីលីស ប្រធានអាជ្ញាប័ណ្ណក្លិបបាល់ទាត់នៃខេមបូឌានព្រីមៀរលីគ

កញ្ញា ជា ស្រីលីស មានតួនាទីជាប្រធានអាជ្ញាប័ណ្ណក្លិបបាល់ទាត់នៃខេមបូឌានព្រីមៀរលីគ។ កញ្ញាមានជំនាញអន្តរទំនាក់ទំនងដើម្បីបំពេញការងារសម្រាប់ ខេមបូឌានព្រីមៀរលីគ និងសហព័ន្ធកីឡាបាល់ទាត់កម្ពុជាជាមួយសហព័ន្ធកីឡាបាល់ទាត់អាស៊ី ព្រមទាំងជាមួយក្លិបបាល់ទាត់នៅកម្ពុជា។ កញ្ញាយល់ច្បាស់ពីច្បាប់ លក្ខន្តិកៈ និងគោលការណ៍ផ្សេងៗរបស់សហព័ន្ធកីឡាបាល់ទាត់អាស៊ីដើម្បីឲ្យក្លិបបាល់ទាត់នៅកម្ពុជាបំពេញទៅតាមតម្រូវការទើបមានសិទ្ធិចូលរួមប្រកួតទាំងពានរង្វាន់ក្នុងស្រុក និងអន្តរជាតិ៕

អត្ថបទ៖ វិរបុត្រ

The post ស្ត្រីខ្មែរ ៦ រូបចូលរួមយ៉ាងសកម្មក្នុងវិស័យកីឡាបាល់ទាត់កម្ពុជា appeared first on Kampuchea Thmey Daily.

មន្ត្រីជាន់ខ្ពស់អប់រំ ជំរុញឱ្យយកចិត្តទុកដាក់ខ្ពស់លើសុខភាពរបស់ស្ត្រី តាំងពីពេលមានរដូវរហូតដល់ក្លាយជាមាតាដ៏មានសក្ដានុពល

អ៊ិន ពិសី — Mon, 13 Oct 2025 07:06:28 +0000

មន្ត្រីជាន់ខ្ពស់ក្រសួងអប់រំ យុវជន និងកីឡា បានជំរុញឱ្យយកចិត្តទុកដាក់ទៅលើសុខភាពរបស់ស្ត្រីចាប់តាំងពីពេលមានរដូវ រហូតដល់ក្លាយទៅជាមាតាមួយដ៏មានសក្ដានុពលនៅក្នុងសង្គម។

ថ្លែងក្នុងទិវាក្មេងស្រីអន្តរជាតិដែលរៀបចំឡើងដោយអង្គការមូលនិធិថែទាំសុខភាពអ្នកជំងឺអេដស៍ (AHF) ប្រចាំប្រទេសកម្ពុជា កាលពីព្រឹកថ្ងៃទី ១៣ តុលា នៅវិទ្យាល័យ សម្តេច ហ៊ុន សែន ប៊ុន រ៉ានី ច្បារអំពៅ លោកស្រីបណ្ឌិត សឿ សុជាតា អនុរដ្ឋលេខាធិការ ក្រសួងអប់រំ យុវជន និងកីឡា មានប្រសាសន៍ថា «ក្មេងស្រី គឺជាមាតាពិភពលោក បុរសអត់អាចបង្កើតកូនបានទេ ឯស្ត្រីបង្កើតកូនបាន។ សុខភាពរបស់ស្ត្រីគឺជាកត្តាចាំបាច់ដែលយើងត្រូវគិតគូរតាំងពីពេលមានរដូវ រហូតដល់ពេលយើងអាចក្លាយទៅជាមាតាមួយដ៏មានសក្ដានុពល អីចឹងដើម្បីសុខភាពល្អ យើងត្រូវគិតគូរឱ្យបានត្រឹមត្រូវ ការពារឱ្យបានត្រឹមត្រូវ»។

លោកស្រីបណ្ឌិត បានបង្ហាញការគាំទ្រចលនាសកម្មភាពលើកកម្ពស់សុខភាពក្មេងស្រី នៅថ្ងៃទិវាក្មេងស្រីអន្តរជាតិ ហើយសូមថ្លែងអំណរគុណដល់អង្គការ AHF ដែលតែងតែចូលរួមគាំទ្រស្ត្រី កុមារី ជាមួយក្រសួងអប់រំ យុវជន និងកីឡា ជាពិសេសគឺគាំទ្រចលនា នៃដំណើរការយ៉ាងស្វាហាប់ នៃដំណើររបស់យើងទាំងអស់គ្នា ការកសាងធនធានមនុស្សឱ្យក្លាយទៅជាមូលធនមនុស្សដ៏មានសក្ដានុពលភាព ដើម្បីការកសាងប្រទេសជាតិរបស់យើងឱ្យក្លាយទៅជាប្រទេសមានចំណូលមធ្យមកម្រិតខ្ពស់នាឆ្នាំ ២០៣០ និងក្លាយជាប្រទេសអភិវឌ្ឍន៍នាឆ្នាំ ២០៥០។

លោកវេជ្ជបណ្ឌិត ចន ផាន់ណា ប្រធានកម្មវិធីអង្គការមូលនិធិថែទាំសុខភាពអ្នកជំងឺអេដស៍កម្ពុជាមានប្រសាសន៍ថា ការផ្តល់អំណាចដល់ក្មេងស្រី គឺការផ្តល់នូវអ្វីៗ ដែលសម្រាប់ដំណើរឆ្ពោះទៅមុខ រួមទាំងការចូលសាលារៀន និងរក្សាសុខភាពអនាគតរបស់ពួកគាត់។

លោកវេជ្ជបណ្ឌិត បានបន្តថា នៅទូទាំងពិភពលោក មានភាពមិនស្មើគ្នា ចំពោះក្មេងស្រីវ័យជំទង់ និងស្ត្រីវ័យក្មេង ប្រឈមមុខនឹងបញ្ហាមេរោគអេដស៍។ AHF អំពាវនាវឱ្យមានការវិនិយោគកាន់តែច្រើននៅក្នុងកម្មវិធីបង្ការ ការធ្វើតេស្ត និងការព្យាបាលមេរោគអេដស៍/ជំងឺកាមរោគ និងគោលនយោបាយគាំទ្រដែលពង្រីកលទ្ធភាពទទួលបានសេវាថែទាំសុខភាព រួមទាំងសេវាសុខភាពផ្លូវភេទ និងសុខភាពបន្តពូជ ដោយផ្តោតលើការខ្វះខាតនៅពេលមករដូវ ការលើកកម្ពស់ការអប់រំសុខភាពផ្លូវភេទគ្រប់ជ្រុងជ្រោយ និងដោះស្រាយឱ្យមានភាពស្មើគ្នាក្នុងការទទួលបានការអប់រំសុខភាព ដូចជាអំពើហិង្សាផ្អែកលើយេនឌ័រ និងអាពាហ៍ពិពាហ៍កុមារ។

លោកវេជ្ជបណ្ឌិត បន្តទៀតថា បច្ចុប្បន្ន រៀងរាល់សប្ដាហ៍ ស្ត្រីវ័យក្មេងចំនួន ៤ ០០០ នាក់ ដែលមានអាយុពី ១៥ ដល់ ២៤ ឆ្នាំ បានឆ្លងមេរោគអេដស៍ថ្មី ក្នុងនោះ មានជាង ៣ ៣០០ ករណី នៅអនុតំបន់សាហារ៉ាអាហ្វ្រិក។ ក្នុងឆ្នាំ ២០២៣ កុមារី និងស្ត្រីវ័យជំទង់ ១ លាន ៩ សែននាក់ កំពុងរស់នៅជាមួយមេរោគអេដស៍ បើធៀបនឹងក្មេងប្រុស និងបុរសវ័យក្មេង ១ លាន ២ សែននាក់ ដែលមានអាយុដូចគ្នា។ ឧបសគ្គ នៃការអប់រំក៏មានសភាពធ្ងន់ធ្ងរផងដែរ ដោយក្មេងស្រី ១៣៣ លាននាក់ នៅទូទាំងពិភពលោក បានបោះបង់សាលារៀន ដោយធ្វើឱ្យពួកគាត់មិនអាចរស់នៅដោយខ្លួនឯងបាន និងជីវិតដែលមានសុខភាពល្អនាពេលអនាគត។

តាមរយៈកម្មវិធី Girls Act របស់ខ្លួន AHF ផ្តល់សិទ្ធិអំណាចដល់ក្មេងស្រី និងស្ត្រីវ័យក្មេង ក្នុង ៤០ ប្រទេស ជាមួយនឹងចំណេះដឹង ការគាំទ្រ និងធនធាន ដើម្បីរក្សាឱ្យរួចផុតពីមេរោគអេដស៍ និងជំងឺកាមរោគ ប្រកាន់ខ្ជាប់នូវការព្យាបាលសម្រាប់ក្មេងស្រីដែលរស់នៅជាមួយមេរោគអេដស៍ ឱ្យបានចូលសាលារៀន និងជៀសវាងការមានផ្ទៃពោះដោយមិនបានគ្រោងទុក។

អង្គការមូលនិធិថែទាំសុខភាពអ្នកជំងឺអេដស៍ គឺជាអង្គការពិភពលោកដ៏ធំបំផុតដែលបាននិងកំពុងផ្តល់សេវាថែទាំព្យាបាលដោយមិនគិតពីលទ្ធភាព នៃការបង់ប្រាក់ ដល់អតិថិជនជាង ២.៥ លាននាក់ ក្នុង ៥០ ប្រទេស ជុំវិញពិភពលោក ដូចជានៅ សហរដ្ឋអាមេរិក អាហ្វ្រិក អាមេរិកឡាទីន ការាបៀន តំបន់អាស៊ី ប៉ាស៊ីហ្វិក និងអឺរ៉ុប៕

អត្ថបទ ៖ សំអឿន

The post មន្ត្រីជាន់ខ្ពស់អប់រំ ជំរុញឱ្យយកចិត្តទុកដាក់ខ្ពស់លើសុខភាពរបស់ស្ត្រី តាំងពីពេលមានរដូវរហូតដល់ក្លាយជាមាតាដ៏មានសក្ដានុពល appeared first on Kampuchea Thmey Daily.

មេដឹកនាំសហជីព ៖ ស្ត្រីក្នុងវិស័យការងារត្រូវបានលើកកម្ពស់ ក្រោមការដឹកនាំរបស់រាជរដ្ឋាភិបាលកម្ពុជានៅគ្រប់អាណត្តិ

អ៊ិន ពិសី — Thu, 06 Mar 2025 09:05:42 +0000

បណ្ដាមេដឹកនាំសហជីពនៅកម្ពុជា បានលើកឡើងថា ស្ត្រីនៅក្នុងវិស័យការងារមិនថាក្នុងប្រព័ន្ធ និងក្រៅប្រព័ន្ធ ត្រូវបានលើកកម្ពស់សិទ្ធិ សមភាពយេនឌ័រ ទទួលបានកិច្ចគាំពារពេញលេញ និងទទួលបានភាពកក់ក្តៅ នៅគ្រប់អាណត្តិ នៃរាជរដ្ឋាភិបាលកម្ពុជា ពោលគឺចាប់តាំងពីក្រោមការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី បន្តរហូតមកដល់រាជរដ្ឋាភិបាលអាណត្តិទី ៧ ក្រោមការដឹកនាំរបស់ សម្តេចមហាបវរធិបតី នាយករដ្ឋមន្ត្រីកម្ពុជា។

លោក គឹម ចាន់សំណាង ប្រធានសភាសម្ព័ន្ធសហជីពជាតិកម្ពុជា (NACC) បានលើកឡើងថា ស្ត្រីនៅក្នុងវិស័យការងារនៅប្រទេសកម្ពុជាត្រូវបានលើកកម្ពស់ និងមានការយកចិត្តទុកដាក់ខ្ពស់ពីសំណាក់ប្រមុខរាជរដ្ឋាភិបាលកម្ពុជា មិនថាឱកាសការងារ ការទទួលបានកិច្ចគាំពារសង្គម និងអត្ថប្រយោជន៍ផ្សេងៗ ទៀត នោះទេ។

ប្រធានសហជីពរូបនេះ បន្ថែមថា បើនិយាយនៅក្នុងវិស័យកាត់ដេរសម្លៀកបំពាក់វិញ ស្ត្រីមានជិត ១ លាននាក់ ច្រើនជាងបុរសដាច់ ដូច្នេះវាបានបង្ហាញថាស្ត្រីនៅកម្ពុជាបានដើរតួនាទី និងចូលរួមចំណែកយ៉ាងសំខាន់នៅក្នុងវិស័យការងារនៅកម្ពុជា។ ទន្ទឹមនឹងនេះ វាក៏បានបង្ហាញថា យេនឌ័រត្រូវបានលើកកម្ពស់ ស្ត្រីជាចំណែកមួយយ៉ាងសំខាន់នៅក្នុងសង្គមសេដ្ឋកិច្ច។ ចំពោះយន្តការលើកកម្ពស់កិច្ចគាំពារសង្គម ប្រធានសហជីពរូបនេះ ពន្យល់ទៀតថា ស្ត្រីត្រូវស្ថិតនៅអាទិភាពជានិច្ចក្នុងយន្តការរបស់រាជរដ្ឋាភិបាល។ ស្ត្រីក្នុងវិស័យកាត់ដេរគ្រប់ៗ រូប ទទួលបានការប្រើប្រាស់បណ្ណ ប.ស.ស ដោយឥតគិតថ្លៃ ជាពិសេសស្ត្រីដែលមានផ្ទៃពោះទទួលបានអត្ថប្រយោជន៍ពេញលេញទាំងមុន និងក្រោយសម្រាលកូន រហូតកូនមានអាយុក្រោមពីរឆ្នាំ។

ចំណែក លោក លាង ស៊ុនហ៊ាង ប្រធានសហព័ន្ធសហជីពកម្មករកម្ពុជា បានលើកឡើងថា នាពេលបច្ចុប្បន្ននេះស្ត្រីមិនត្រឹមតែត្រូវបានលើកកម្ពស់សិទ្ធិនោះទេ ថែមទាំងទទួលបានការយកចិត្តទុកដាក់យ៉ាងពេញលេញពីសំណាក់រាជរដ្ឋាភិបាលកម្ពុជា។ មិនថាទាំងឱកាសការងារ និងកិច្ចគាំពារសង្គមទេ ស្ត្រីតែងត្រូវបានគិតគូរជានិច្ចពីសំណាក់ថ្នាក់ដឹកនាំ។ ប្រធានសហជីពរូបនេះ បន្ថែមថា ក្រៅតែពីអត្ថប្រយោជន៍ស្ត្រីនៅក្នុងវិស័យកាត់ដេរតែងទទួលបានភាពកក់ក្តៅពីសំណាក់ប្រមុខរាជរដ្ឋាភិបាល។ ជាក់ស្តែង សម្តេចធិបតី តែងចុះសួរសុខទុក្ខកម្មករ-និយោជិត និងបង្ហាញពីភាពកក់ក្តៅចំពោះពលករទាំងស្ត្រី និងបុរសជានិច្ច។ ជាពិសេសស្ត្រីមានផ្ទៃពោះត្រូវបានទទួលបានការឧបត្ថម្ភពី សម្តេចផ្ទាល់ មកទល់បច្ចុប្បន្នផងដែរ។

ទន្ទឹមនឹងនេះ ប្រធានសហជីព បានគូសបញ្ជាក់ថា សិទ្ធិស្ត្រីនៅក្នុងវិស័យការងារ ត្រូវបានបន្តពង្រឹង នៅក្នុងអាណត្តិទី ៧ នៃរាជរដ្ឋាភិបាល ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី៕

The post មេដឹកនាំសហជីព ៖ ស្ត្រីក្នុងវិស័យការងារត្រូវបានលើកកម្ពស់ ក្រោមការដឹកនាំរបស់រាជរដ្ឋាភិបាលកម្ពុជានៅគ្រប់អាណត្តិ appeared first on Kampuchea Thmey Daily.

នាយករដ្ឋមន្ត្រីឱ្យបញ្ឈប់ការប្រើពាក្យសម្ដីអសីលធម៌ ខ្វះការគោរពចំពោះស្រ្តី

Thoeun Vansong — Tue, 04 Mar 2025 02:01:54 +0000

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃទី០៤ ខែមីនា ឆ្នាំ២០២៥នេះ បានអំពាវនាវឱ្យបញ្ឈប់ជាបន្ទាន់នូវទង្វើ ឬការប្រើប្រាស់ពាក្យសម្ដីអសីលធម៌ ដោយខ្វះការគោរពចំពោះតម្លៃ និងសេចក្តីថ្លៃថ្នូររបស់ស្ត្រី។

ការអំពាវនាវរបស់សម្ដេចធិបតី នាយករដ្ឋមន្ត្រី គឺបានធ្វើឡើងបន្ទាប់ពីសង្កេតឃើញថា ក្នុងមួយរយៈនេះ មានសកម្មភាព ឬការបញ្ចេញមតិរបស់បុគ្គលមួយចំនួន ដែលធ្វើឱ្យប៉ះពាល់ទៅដល់អារម្មណ៍ និងសេចក្តីថ្លៃថ្នូររបស់អ្នកដទៃ ជាពិសេសស្ត្រីភេទ ពោលគឺបាននិយាយសម្តីលេបខាយ មើលងាយ អត់ឱ្យតម្លៃលើស្ត្រី។

សកម្មភាព ឬនិយាយរបស់បុគ្គលមួយចំនួនបែបនេះ ប្រហែលជាមិនមានចេតនាអាក្រក់ ហើយគ្រាន់តែចង់បានការចាប់អារម្មណ៍ពីអ្នកមើល ឬអ្នកស្ដាប់ចំពោះសកម្មភាព ឬពាក្យសម្តីរបស់ខ្លួន និងអាចចាត់ទុកថាជារឿងលេងសើចធម្មតាមិនមានអ្វីធ្ងន់ធ្ងរនោះក្ដី ក៏ប៉ុន្តែសម្ដេចធិបតី ហ៊ុន ម៉ាណែត ថា សកម្មភាព ឬពាក្យសម្ដីទាំងនោះអាចប៉ះពាល់យ៉ាងខ្លាំងទៅដល់អារម្មណ៍ ក៏ដូចជាសេចក្តីថ្លៃថ្នូររបស់អ្នកដែលត្រូវទទួលរងនូវសកម្មភាព ឬពាក្យសម្ដីទាំងនោះទេ។

ក្នុងន័យនេះ តាមរយៈសារលើបណ្ដាញទំនាក់ទំនងសង្គម សម្ដេចធិបតី បានអំពាវនាវដល់ប្រជាពលរដ្ឋខ្មែរទាំងអស់ ជាពិសេសយុវជនធ្វើសកម្មភាព ឬប្រើប្រាស់ពាក្យសម្ដីជាមួយអ្នកដទៃដោយការគោរពគ្នាទៅវិញទៅមក និងប្រកាន់ខ្ជាប់នូវសីលធម៌ គុណធម៌ និងសេចក្តីថ្លៃថ្នូររបស់ខ្មែរយើង ឱ្យស័ក្តិសមជាប្រជាពលរដ្ឋដែលរស់នៅក្នុងសង្គមស៊ីវិល័យ។

សម្ដេច សង្កត់ធ្ងន់ថា បើទោះបីជាសកម្មភាពស្របច្បាប់ ឬការបញ្ចេញមតិជាសិទ្ធិរបស់បុគ្គល ក៏ប៉ុន្តែការគោរពសិទ្ធិ និងសេចក្តីថ្លៃថ្នូររបស់អ្នកដទៃ ជាកាតព្វកិច្ចសីលធម៌របស់ទាំងអស់គ្នា និងដែលត្រូវប្រកាន់ខ្ជាប់គ្រប់ពេលវេលា ដើម្បីចូលរួមថែរក្សាសុខដុមនីយកម្មសង្គម៕

The post នាយករដ្ឋមន្ត្រីឱ្យបញ្ឈប់ការប្រើពាក្យសម្ដីអសីលធម៌ ខ្វះការគោរពចំពោះស្រ្តី appeared first on Kampuchea Thmey Daily.

លោកជំទាវ ពេជ ចន្ទមុន្នី៖ ការផ្ដល់សិទ្ធិ អំណាចដល់ស្ត្រី មិនត្រឹមជួយឱ្យស្ត្រីជោគជ័យប៉ុណ្ណោះទេ ប៉ុន្តែថែមទាំងជួយឱ្យជាតិទាំងមូលរីកចម្រើន

Ngoeul Narath — Mon, 03 Mar 2025 08:04:47 +0000

លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ថ្លែងថា ការផ្ដល់សិទ្ធិ និងអំណាចដល់ស្ត្រី មិនត្រឹមតែជួយឱ្យស្ត្រីទទួលបានជោគជ័យប៉ុណ្ណោះទេ ប៉ុន្តែថែមទាំងរួមចំណែកដល់ការរីកចម្រើន និងវិបុលភាពនៃសង្គម និងប្រទេសជាតិទាំងមូល។ លោកជំទាវបណ្ឌិត ថ្លែងដូច្នេះ តាមរយៈសារអបអរសាទរក្នុងឱកាសទិវាអន្តរជាតិនារី ខួបលើកទី១១៤។

តាមរយៈសារអបអរសាទរលោកជំទាវស្ត្រីទីមួយ ថ្លែងថាការលើកកម្ពស់សិទ្ធិ សមភាព និងបង្កើនភាពអង់អាចដល់ស្ត្រី និងក្មេងស្រី មិនត្រឹមតែជាកិច្ចការចម្បង ដើម្បីឈានទៅសម្រេចគោលដៅអភិវឌ្ឍន៍ដោយយូរអង្វែងប៉ុណ្ណោះទេ ប៉ុន្តែជាភាពចាំបាច់ ជាឱកាស និងជាកម្លាំងថ្មីមួយរួមចំណែកពន្លឿនការសម្រេចបាននូវសមភាពយេនឌ័រ និងការអភិវឌ្ឍសេដ្ឋកិច្ចសង្គមប្រកបដោយភាពយូរអង្វែង និងបរិយាបន្ន។

នៅក្នុងសារអបអរសាទរជាវីដេអូរយៈពេលជាង២នាទី លោកជំទាវបណ្ឌិត ពេជ ចន្ទមុន្នី សង្កត់ធ្ងន់ដូច្នេះ៖«ការផ្ដល់សិទ្ធិអំណាចដល់ស្ត្រី គឺមិនត្រឹមតែបង្កើនភាពជោគជ័យសម្រាប់ស្ត្រីខ្លួនឯងប៉ុណ្ណោះទេ ប៉ុន្តែថែមទាំងរួមចំណែកដល់វឌ្ឍនភាព និងវិបុលភាពនៃសង្គម និងប្រទេសជាតិទាំងមូល»។

សម្រាប់លោកជំទាវបណ្ឌិត ស្ត្រីនិងក្មេងស្រី គឺជាភ្នាក់ងារនៃការផ្លាស់ប្ដូរ ប្រកបដោយគំនិតច្នៃប្រឌិតថ្មីៗ និងជាសមាសភាពដ៏សំខាន់មិនអាចខ្វះបាន ក្នុងការជំរុញ និងពន្លឿនកិច្ចអភិវឌ្ឍន៍លើគ្រប់វិស័យ។

លោកជំទាវ ពេជ ចន្ទមុន្នី អំពាវនាវឱ្យគ្រប់តួអង្គទាំងអស់គ្នាចាំបាច់ត្រូវទទួលស្គាល់ គាំទ្រ និងផ្ដល់តម្លៃ ព្រមទាំងបង្កបរិយាកាសងាយស្រួលឱ្យស្ត្រី និងក្មេងស្រី បានចូលរួមដោយពេញលេញ និងទទួលភាគផលដោយស្មើភាពពីកិច្ចអភិវឌ្ឍលើគ្រប់វិស័យសំដៅឆ្ពោះទៅពង្រឹងភាពជាពលរដ្ឋនៅក្នុងសង្គមដែលមានអារ្យធម៌ខ្ពស់ប្រកបដោយសីលធម៌ សមធម៌ និងបរិយាបន្ន ដែលក្នុងនោះ «ស្ត្រីគឺជាស្នូល»។

គួរជ្រាបថា ទិវាអន្តរជាតិនារី ៨មីនា លើកទី១១៤ ត្រូវបានរៀបចំឡើងក្រោមប្រធានបទ «សិទ្ធិ សមភាព និងភាពអង់អាច ចំពោះស្ត្រីនិងក្មេងស្រីគ្រប់រូប» ក្នុងគោលបំណងដើម្បីគូសបញ្ជាក់អំពីសារៈសំខាន់នៃការទទួលបាន និងអនុវត្តសិទ្ធិ ការលើកកម្ពស់សមភាព និងការពង្រឹងភាពអង់អាចចំពោះស្ត្រីនិងក្មេងស្រីគ្រប់រូបនៅកម្ពុជា។ ប្រធានបទនេះ ក៏ផ្តោតសំខាន់ផងដែរ លើការលើកកម្ពស់ផលជះជាវិជ្ជមាន និងទាញយកអត្ថប្រយោជន៍ពីភាគលាភយេនឌ័រជូនគ្រួសារ ពង្រឹងសហគមន៍និងវឌ្ឍនភាពសង្គម ជំរុញកំណើនការអភិវឌ្ឍសេដ្ឋកិច្ច និងលើកកម្ពស់សុខុមាលភាពសង្គម ជាមួយការឆ្លុះបញ្ចាំងអំពីវឌ្ឍនភាព សមិទ្ធផល បញ្ហាប្រឈម កាលានុវត្តភាពនានា ជាពិសេសបង្ហាញពីការប្តេជ្ញាចិត្តនិងវិធានការវិជ្ជមានក្នុងការលើកកម្ពស់សមភាពយេនឌ័រ និងបង្កើនភាពអង់អាចដល់ស្ត្រីនិងក្មេងស្រីគ្រប់រូប៕

ដោយ៖ង៉ិល ណារ៉ាត់

The post លោកជំទាវ ពេជ ចន្ទមុន្នី៖ ការផ្ដល់សិទ្ធិ អំណាចដល់ស្ត្រី មិនត្រឹមជួយឱ្យស្ត្រីជោគជ័យប៉ុណ្ណោះទេ ប៉ុន្តែថែមទាំងជួយឱ្យជាតិទាំងមូលរីកចម្រើន appeared first on Kampuchea Thmey Daily.

សម្ដេច ហ៊ុន សែន ប្រាប់ជប៉ុនថា នៅអាស៊ាន កម្ពុជាបានយកចិត្តទុកដាក់លើស្ត្រីខ្លាំងជាងគេ

Thoeun Vansong — Thu, 26 Sep 2024 10:03:58 +0000

នៅក្នុងជំនួបនាព្រឹកថ្ងៃទី២៦ ខែកញ្ញា ឆ្នាំ២០២៤ សម្ដេចតេជោ ហ៊ុន សែន បានប្រាប់អតីតអនុរដ្ឋមន្ត្រីក្រសួងការបរទេសជប៉ុន ថា កម្ពុជា ជាប្រទេសក្នុងតំបន់អាស៊ានដែលបានយកចិត្តទុកដាក់លើស្ត្រីខ្លាំងជាងគេ ខណៈគោលនយោបាយជាតិគាំពារសង្គមរបស់កម្ពុជា បានកំណត់យកស្ត្រី ជាមូលដ្ឋានមុនគេ។

សម្ដេចតេជោ ហ៊ុន សែន ប្រធានព្រឹទ្ធសភា លើកឡើងថា ពាក់ព័ន្ធនឹងការវិនិយោគលើស្ត្រី គឺប្រទេសអាស៊ានទាំង១០ កម្ពុជាជាប់បានពិន្ទុល្អក្នុងការយកចិត្តទុកដាក់លើស្ត្រី ហើយជាក់ស្តែង កម្ពុជាមានគោលនយោបាយជាតិគាំពារសង្គមដែលយកស្ត្រីជាមូលដ្ឋាន ជាពិសេសការយកចិត្តទុកដាក់ទៅលើស្ត្រីមានផ្ទៃពោះ ដោយផ្តល់ការឧបត្ថម្ភចាប់តាំងពីមានផ្ទៃពោះរហូតដល់ពេលសម្រាលកូន ទាំងការពិនិត្យសុខភាពនៅមន្ទីរពេទ្យ រហូតដល់កុមារកើតមកអាយុ២ឆ្នាំ។

ការលើកឡើងរបស់សម្ដេចតេជោ ធ្វើឡើងក្នុងជំនួបសម្ដែងការគួរសមជាមួយលោកស្រីសាស្ត្រាចារ្យ YAMANAKA Akiko អតីតអនុរដ្ឋមន្ត្រីក្រសួងការបរទេសជប៉ុន និងជាអតីតឯកអគ្គរាជទូតពិសេសសម្រាប់ការកសាងសន្តិភាពនៃរដ្ឋាភិបាលជប៉ុន នាព្រឹកថ្ងៃទី២៦ ខែកញ្ញា ឆ្នាំ២០២៤ នៅវិមានព្រឹទ្ធសភា រាជធានីភ្នំពេញ។

លោកស្រីសាស្ត្រាចារ្យ YAMANAKA Akiko បានជម្រាបជូនសម្ដេចតេជោពីគោលបំណងរបស់លោកស្រីមកកាន់កម្ពុជានាពេលនេះ គឺដើម្បីចូលរួមក្នុងសិក្ខាសាលាមួយ ដែលរៀបចំឡើងដោយវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីខាងកើត ដែលប្រព្រឹត្តទៅនៅថ្ងៃទី២៧ ខែកញ្ញា ហើយលោកស្រី នឹងថ្លែងបាឋកថាមួយនៅសាកលវិទ្យាល័យភូមិន្ទភ្នំពេញ។ លោកស្រី បញ្ជាក់ថា សិក្ខាសាលានេះ មានគោលដៅជំរុញ និងលើកកម្ពស់របៀបវារៈស្តីពីស្ត្រី សន្តិភាព និងសន្តិសុខ និងស្ត្រីក្នុងសេដ្ឋកិច្ចឌីជីថល។ លោកស្រី បានបន្តជម្រាបជូនសម្ដេចតេជោ ថា អគ្គលេខាធិការអាស៊ាន លោក កៅ គឹមហួន គាំទ្រចំពោះគម្រោងនេះ និងលើកទឹកចិត្តឱ្យជប៉ុនតែងតាំងប្រេសិតពិសេសសម្រាប់ការកសាងសន្តិភាព។

លោកស្រី ក៏បានបញ្ជាក់អំពីការជួបពិភាក្សាជាមួយរដ្ឋមន្ត្រីក្រសួងវប្បធម៌ និងរដ្ឋមន្ត្រីក្រសួងកិច្ចការនារីរបស់កម្ពុជា ទាក់ទងទៅនឹងតួនាទីរបស់ស្ត្រី ក្នុងការរួមចំណែកថែរក្សាសុខសន្តិភាពនៅក្នុងសង្គមផងដែរ។

សម្ដេចតេជោ ហ៊ុន សែន ប្រាប់លោកស្រីសាស្ត្រាចារ្យ YAMANAKA Akiko ថា ក្នុងនាមជាអនុប្រធានកិត្តិយសក្រុមប្រឹក្សាជាតិកម្ពុជាដើម្បីស្ត្រី សម្តេចបានបន្តរួមចំណែក និងធ្វើការរួមគ្នាដើម្បីស្ត្រី តាមរយៈការទម្លាក់ថវិកាផ្ទាល់ ការបង្កើតក្រុមមេធាវី ស្វះស្វែងផ្តល់ឱកាសដល់ស្ត្រី ជាពិសេសគឺការដាក់ចេញនូវកូតាចំនួនស្ត្រីក្នុងគណៈអភិបាលរាជធានី ខេត្ត ស្រុក ក្រុង ខណ្ឌ និងក្នុងជួរថ្នាក់ដឹកនាំកំពូលរបស់ស្ថាប័ននានា។ តួយ៉ាង មានស្ត្រីជាប្រធានរដ្ឋសភាដំបូងក្នុងប្រវត្តិសាស្ត្រ និងរដ្ឋមន្ត្រីជាស្ត្រីជាច្រើនរូបថែមទៀត។

សម្តេចតេជោ ថា កម្ពុជា ជាប្រទេសមាតាធិបតេយ្យ ដូច្នេះត្រូវវិនិយោគលើស្ត្រីបន្ថែមទៀត ដែលសម្តេចមានពាក្យស្លោកមួយថា «ជួយស្ត្រី គឺជួយខ្លួនឯង» ហើយអ្វីដែលត្រូវយកចិត្តទុកដាក់បន្តគឺស្ត្រីត្រូវជួយស្ត្រីគ្នាឯង។ សម្តេច បន្តថា កម្ពុជាជាប់ចំណាត់ថ្នាក់លេខ១ ក្នុងអាស៊ាន ចំពោះចំនួននៃការបញ្ជូនកងទ័ពស្ត្រីនៅក្នុងប្រតិបត្តិការសន្តិភាពរបស់អង្គការសហប្រជាជាតិ។

បន្ថែមពីនេះ ស្ត្រីដែលជាកម្មការិនីក្នុងអំឡុងពេលសម្រាកមាតុភាព៣ខែ មានប្រាក់បៀវត្សចំនួន១២០% ដែលសម្តេចបានលើកឡើងថា ប្រហែលជាប្រទេសដទៃមិនទាន់មានគោលការណ៍នេះនៅឡើយទេ ហើយរាជរដ្ឋាភិបាលអាណត្តិថ្មី ក៏បានកំពុងតែខិតខំប្រឹងប្រែងដើម្បីអនុវត្តដូចគ្នានេះដែរចំពោះមន្ត្រីរាជការ៕

The post សម្ដេច ហ៊ុន សែន ប្រាប់ជប៉ុនថា នៅអាស៊ាន កម្ពុជាបានយកចិត្តទុកដាក់លើស្ត្រីខ្លាំងជាងគេ appeared first on Kampuchea Thmey Daily.

ជារឿងកម្រណាស់! យុវតីខ្មែរ១រូប បានអភិវឌ្ឍខ្លួនពីនារីអាកាសចរណ៍ ក្លាយជាអ្នកបើកយន្តហោះ

អុន ស្រីមាន — Tue, 26 Mar 2024 02:49:51 +0000

កញ្ញា ហុង ចិន្តា ដែលជាស្ត្រីខ្មែរ១រូប មានមហិច្ឆតាខ្ពស់ ខិតខំប្រឹងប្រែងរៀនសូត្រ ចាប់យកនូវចំណេះដឹងថ្មីៗ បានប្រែខ្លួនជានារីអាកាសចរណ៍នៅលើយន្តហោះ ក្លាយជាអាកាសយានិកាម្នាក់ ដែលជារឿងមួយគួរឱ្យមានមោទនភាព ដែលនារីខ្មែររូបនេះ មានសមត្ថភាពអាចបម្រើការងារនេះមិនចាញ់បុរសឡើយ។ នេះបើតាមការចុះផ្សាយរបស់ក្រសួងកិច្ចការនារី នៅថ្ងៃទី២៥ ខែមីនា ឆ្នាំ២០២៤។

សព្វថ្ងៃ កញ្ញា ហុង ចិន្តា គឺជាអាកាសយានិកានៃក្រុមហ៊ុនអាកាសចរណ៍ឡានម៉ី (Lanmei Airline)។ ក្រសួងកិច្ចការនារីបានឱ្យដឹងថា កញ្ញា ជាអតីតសិស្សវិទ្យាល័យបាក់ទូក និងបានបន្តការសិក្សាផ្នែកបរិញ្ញាបត្រសណ្ឋាគារទេសចរណ៍ នៅសាកលវិទ្យាល័យន័រតុន។ នៅពេលខ្លួនកំពុងសិក្សាជានិស្សិតឆ្នាំទី៣លើជំនាញនេះ កញ្ញាក៏ចង់ស្វែងយល់ និងស្វែងរកបទពិសោធការងាររវាងការផ្តល់សេវាកម្មដល់ភ្ញៀវនៅលើយន្តហោះ និងនៅសណ្ឋាគារ។ ដោយហេតុនេះ កញ្ញា ហុង ចន្តា ក៏សម្រេចចិត្តដាក់ពាក្យបម្រើការងារជានារីអាកាសចរណ៍នៅក្រុមហ៊ុន Cambodia Angkor Air។

បន្ទាប់ពីការដាក់ពាក្យនៅទីនោះ ជាឱកាសល្អមួយដែលក្រុមហ៊ុន Cambodia Angkor Air បានសហការជាមួយ Viet Flight Training Center ដើម្បីផ្តល់ឱកាសដល់និស្សិតខ្មែរដែលចង់ក្លាយជាអាកាសយានិក អាចសិក្សាលើជំនាញនេះបាន។ នៅពេលឱកាសបានមកដល់ កញ្ញា ហុង ចិន្តា ក៏បានចុះឈ្មោះចូលរៀនវគ្គបណ្តុះបណ្តាលនៅទីនោះ ដោយកញ្ញា គឺជានិស្សិតជំនាន់ទី៣ក្នុងនាមជាកូនខ្មែរដែលបានទៅរៀនជំនាញនេះនៅវៀតណាម។

កញ្ញាបានចែករំលែកថា ជំនាញនេះ តម្រូវឱ្យមានការចេះស្ទាត់ និងទំនួលខុសត្រូវខ្ពស់ ហើយការសិក្សាវិញ គឺត្រូវសិក្សារហូត ដោយសារតែងតែមានអ្វីៗថ្មីៗច្រើន។ ចំពោះផ្នែកភាសាវិញ ប្រសិនជាចេះភាសាអង់គ្លេសស្ទាត់ជំនាញគឺជារឿងល្អ ព្រោះជាភាសាផ្លូវការ ប៉ុន្តែ ប្រសិនជាចេះភាសាផ្សេងច្បាស់ទៀតកាន់តែប្រសើរ។

បើក្រឡេកមើលពីដំណាក់កាលនីមួយៗរបស់កញ្ញា ហុង ចិន្តា មុនក្លាយជាអាកាសយានិកានេះ គឺកញ្ញាត្រូវឆ្លងកាត់វគ្គបណ្តុះបណ្តាលជាច្រើនដូចជា ទី១ គឺការដាក់ពាក្យសិក្សាវគ្គបណ្តុះបណ្តាលទ្រឹស្តីនៅប្រទេសវៀតណាមរយៈពេល៦ខែ។ សម្រាប់វគ្គសិក្សានេះ គឺសិក្សាពីបច្ចេកទេសរបស់យន្តហោះ និងសិក្សាពីអាកាសធាតុ។ ជំហានទី២. ដាក់ពាក្យចូលរៀនវគ្គបណ្តុះបណ្តាលពីការហោះហើរនៅប្រទេសហ្វីលីពីនរយៈពេល១៣ខែ ដោយវគ្គសិក្សានេះ និស្សិតមានការយល់ដឹងពីរបៀបហោះហើរ ចុះចត និងការទំនាក់ទំនងជាមួយអ្នកបញ្ជាចរាចរណ៍យន្តហោះ ជាដើម។

បន្ទាប់ពីមានការសិក្សាពីជំហាននីមួយៗហើយ គឺឈានដល់ជំហានទី៣ ជាវគ្គសិក្សាពីប្រភេទយន្តហោះនីមួយៗនៅប្រទេសកូរ៉េរយៈពេល ១ខែ ២០ថ្ងៃ។ បន្ទាប់ពីសិក្សាពីប្រភេទយន្តហោះ គឺជំហានទី៤ ត្រូវមាន Student pilot license នៅប្រទេសម៉ាឡេស៊ី ថែមទៀតផង។

ជាការគួរសម្គាល់ អាកាសយានិកជាស្ត្រី គឺកម្រមានណាស់ ជាពិសេស គឺនៅកម្ពុជាតែម្តង។ នេះ គឺជាមោទនភាពមួយរបស់កម្ពុជា ដែលកញ្ញា ហុង ចិន្តា ជាកូនខ្មែរមួយរូប ថែមទាំងជាស្រ្តីទៀតនោះ មានសមត្ថភាពខ្ពស់អាចក្លាយជាអាកាសយានិកាបែបនេះ។ ក្នុងនាមជាស្ត្រីមានសមត្ថភាពខ្លាំង កញ្ញា ហុង ចិន្តា បានផ្តាំផ្ញើដល់សាធារណជនគ្រប់រូប ជាពិសេស ស្ត្រីគ្រប់រូបថា នៅពេលដែលខ្លួនចង់ធ្វើអ្វីមួយ ឬស្រឡាញ់អ្វីមួយនោះ ចូរកុំគិតពីសម្តីរបស់អ្នកដទៃខ្លាំងពេក ប្រសិនជាស្រឡាញ់អ្វីមួយ ត្រូវធ្វើរឿងនោះឱ្យបានសម្រេច។ កញ្ញា ជឿជាក់ថា ស្រ្តី គឺមានភាពជាអ្នកដឹកនាំមិនចាញ់បុរសឡើយ ទោះបីមានកម្លាំងខ្សោយជាងបុរសមែន ប៉ុន្តែ សមត្ថភាពមិនចាញ់បុរសនោះទេ៕

The post ជារឿងកម្រណាស់! យុវតីខ្មែរ១រូប បានអភិវឌ្ឍខ្លួនពីនារីអាកាសចរណ៍ ក្លាយជាអ្នកបើកយន្តហោះ appeared first on Kampuchea Thmey Daily.

លោក ទេព អស្នារិទ្ធ៖ ស្រ្តីជាអ្នកសារព័ត៌មាន បានដើរតួនាទីយ៉ាងសំខាន់ និងសកម្មក្នុងការរួមចំណែកលើកស្ទួយសមភាពយេនឌ័រ

sopheak khoun — Thu, 07 Mar 2024 02:25:28 +0000

ស្ត្រីជាធនធានមនុស្សមិនអាចខ្វះបានក្នុងវិស័យព័ត៌មាន ហើយស្រ្តីដែលជាអ្នកសារព័ត៌មាន បានដើរតួនាទីយ៉ាងសំខាន់ និងយ៉ាងសកម្មក្នុងការរួមចំណែកលើកស្ទួយសមភាពយេនឌ័រ ការពារ និងលើកកម្ពស់តម្លៃស្ត្រីនៅក្នុងសង្គម។ នេះបើតាមការលើកឡើងរបស់លោក ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន។

លោក ទេព អស្នារិទ្ធ មានប្រសាសន៍ប្រាប់កម្ពុជាថ្មី នៅព្រឹកថ្ងៃទី ៧ ខែមីនា ឆ្នាំ ២០២៤នេះថា ស្របពេលដែលសង្គមមានការរីកចម្រើន ការអភិវឌ្ឍក្នុងវិស័យព័ត៌មាន បានបង្កឱកាសបន្ថែមទៀតសម្រាប់ស្ត្រី ដែលការចូលរួមរបស់ស្ត្រីទាំងក្នុងសារព័ត៌មាន ការផលិតមាតិកាព័ត៌មានអនឡាញ និងជាអ្នកដឹកនាំកម្មវិធីផ្សាយព័ត៌មាននានា មានការកើនឡើង ដែលរួមចំណែកយ៉ាងសំខាន់ក្នុងការផ្តល់ដំណឹង ចំណេះដឹង ការកំសាន្ត និងព័ត៌មានផ្សេងៗទៀត ជាពិសេសតាមរយៈប្រព័ន្ធផ្សព្វផ្សាយទំនើប សម្រាប់ជាប្រយោជន៍ដល់ការប្រកបការងារ របរចិញ្ចឹមជីវិត និងការរស់នៅប្រចាំថ្ងៃរបស់ប្រជាជន។

យ៉ាងណាក៏ដោយ ឱកាសក្នុងការទទួលបានការងារក្នុងវិស័យព័ត៌មាននៅមានកម្រិតនៅឡើយ ជាពិសេសសម្រាប់ស្រ្តីដែលរស់នៅតាមជនបទ បើធៀបនឹងចំនួនអ្នកសារព័ត៌មានទាំងអស់។ ម្យ៉ាងទៀត ស្ត្រីប្រឈមនឹងហានិភ័យមួយចំនួន ជាពិសេសពាក់ព័ន្ធនឹងសុវត្ថិភាពតាមប្រព័ន្ធអនឡាញ និងសុខុមាលភាពការងារ។ ទន្ទឹមនេះ វប្បធម៌ និងផ្នត់គំនិតចំពោះស្ត្រីដែលចាក់ឫសយ៉ាងជ្រៅក្នុងសង្គមកម្ពុជា ក៏ជាកត្តារារាំងដល់ស្ត្រី និងក្មេងស្រី ក្នុងការចូលរួមឲ្យបានពេញលេញ។

អ្នកនាំពាក្យក្រសួងព័ត៌មាន បានលើកឡើងបន្តថា ទោះយ៉ាងនេះក្តី ក្នុងបរិបទនៃបរិវត្តកម្មឌីជីថល វាមានភាពចាំបាច់ក្នុងការប្រែក្លាយឱកាសជាមធ្យោបាយ ដើម្បីលើកកម្ពស់ការចូលរួមរបស់ស្ត្រីក្នុងវិស័យព័ត៌មាន ជាពិសេសតាមរយៈប្រព័ន្ធផ្សព្វផ្សាយទំនើប ដើម្បីបង្កើនការរួមចំណែករបស់ស្រ្តីក្នុងវិស័យព័ត៌មាន ជួយដោះស្រាយបញ្ហាប្រឈមរបស់ស្ត្រី ព្រមទាំងលើកទឹកចិត្តពួកគាត់ឲ្យសម្របខ្លួនបាន ទៅនឹងសម័យកាលនៃការវិវត្តបច្ចុប្បន្ន។

ក្នុងន័យនេះ រាជរដ្ឋាភិបាល និងក្រសួងព័ត៌មាន បានផ្តល់តម្លៃខ្ពស់ដល់ការចូលរួមរបស់ស្ត្រី ជាវិស័យអាទិភាពមួយ ដោយបានដាក់បញ្ចូល «ស្ត្រី និង ក្មេងស្រី ក្នុងបរិវត្តកម្ម ឌីជីថល» ទៅក្នុងផែនការយុទ្ធសាស្ត្រ សម្រាប់ការអនុវត្ត។ ក្នុងនោះ ក្រសួងព័ត៌មានបានផ្តល់ឱកាសជូនដល់មន្ត្រីរាជការ និងអ្នកសារព័ត៌មានជាស្ត្រី និងលើកទឹកចិត្តដល់ស្ត្រីនៅកម្ពុជា ឲ្យទទួលបានការបណ្តុះបណ្តាលផ្នែកព័ត៌មាន ក្រមសីលធម៌វិជ្ជាជីវៈ អក្ខរកម្មឌីជីថល បច្ចេកវិទ្យា ធុរកិច្ចឌីជីថល ដែលចំណេះ និងជំនាញទាំងនេះនឹងផ្តល់ឲ្យពួកគាត់នូវភាពអង់អាច លទ្ធភាព និងបង្កើនសក្តានុពលសម្រាប់ស្ត្រីក្នុងការអភិវឌ្ឍខ្លួនឯង និងចូលរួមក្នុងសកម្មភាពអភិវឌ្ឍន៍ប្រទេសជាតិ ឲ្យកាន់តែរីកចម្រើនឡើងថែមទៀត។

លោក ទេព អស្នារិទ្ធ បានលើកឡើងទៀតថា «យើងចាំបាច់ត្រូវធានាថា ស្ត្រី និងក្មេងស្រី នឹងទទួលបានឱកាស និងអត្ថប្រយោជន៍ពីបរិវត្តកម្មឌីជីថល និងការអភិវឌ្ឍនៃវិស័យព័ត៌មាន តាមរយៈការលើកទឹកចិត្តឲ្យបងើ្កនកូតាស្រ្តីក្នុងការទទួលបានការបណ្តុះបណ្តាល ជំរុញការផ្សព្វផ្សាយប្រធានបទ ស្តីពី ស្ត្រីបន្ថែមទៀត បង្កឱកាសការងារសម្រាប់ស្ត្រីទាំងក្នុងក្របខណ្ឌរដ្ឋ និងឯកជន ក៏ដូចជាសកម្មភាពក្នុងក្របខណ្ឌកិច្ចសហប្រតិបត្តិការនានា លើកកម្ពស់ការផ្សព្វផ្សាយពីយេនឌ័រ បង្កបរិយាកាសសមរម្យ និងងាយស្រួលសម្រាប់ស្ត្រីក្នុងការងារព័ត៌មាន និងទំនាក់ទំនង ព្រមទាំងលើកកម្ពស់សិទ្ធិស្ត្រីក្នុងសង្គមកម្ពុជាទាំងមូល។

លោកបញ្ជាក់ថា ក្រសួងព័ត៌មាន បាននិងកំពុងពាំនាំនូវគំនិត សំឡេងរបស់ស្ត្រីនិង ក្មេងស្រី ទៅកាន់សង្គមទាំងមូល និងពិភពលោក ព្រមទាំងជំរុញការលើកកម្ពស់សិទ្ធិរបស់ពួកគេ ឲ្យបានកាន់តែទូលំទូលាយនៅគ្រប់ស្រទាប់សង្គម ដើម្បីបង្កឱកាស និងលើកតម្កើងការចូលរួមរបស់ស្ត្រី និងក្មេងស្រី សម្រាប់ការអភិវឌ្ឍទទួលបានលទ្ធផលជា វិជ្ជមាន ជាប្រយោជន៍ដល់ស្ត្រី និងក្មេងស្រីផ្ទាល់ ក៏ដូចជាដល់សហគមន៍ និងជាតិទាំងមូល៕

The post លោក ទេព អស្នារិទ្ធ៖ ស្រ្តីជាអ្នកសារព័ត៌មាន បានដើរតួនាទីយ៉ាងសំខាន់ និងសកម្មក្នុងការរួមចំណែកលើកស្ទួយសមភាពយេនឌ័រ appeared first on Kampuchea Thmey Daily.

ស្ត្រីខ្មែរ Archives - Kampuchea Thmey Daily

ស្ត្រីខ្មែរ​ ៦ រូប​ចូល​រួម​​​យ៉ាង​សកម្ម​ក្នុង​វិស័យ​កីឡា​បាល់ទាត់កម្ពុជា

នាយករដ្ឋមន្ត្រីឱ្យបញ្ឈប់ការប្រើពាក្យសម្ដីអសីលធម៌ ខ្វះការគោរពចំពោះស្រ្តី

សម្ដេច ហ៊ុន សែន ប្រាប់ជប៉ុនថា នៅអាស៊ាន កម្ពុជាបានយកចិត្តទុកដាក់លើស្ត្រីខ្លាំងជាងគេ

ជារឿងកម្រណាស់! យុវតីខ្មែរ១រូប បានអភិវឌ្ឍខ្លួនពីនារីអាកាសចរណ៍ ក្លាយជាអ្នកបើកយន្តហោះ

ស្ត្រីខ្មែរ ៦ រូបចូលរួមយ៉ាងសកម្មក្នុងវិស័យកីឡាបាល់ទាត់កម្ពុជា